੧. ਵਿਭਙ੍ਗਵਾਰੋ

ਹੇਤੁਪਚ੍ਚਯੋ

੧੦੨. ਉਪਾਦਾਨੋ ਚੇਵ ਉਪਾਦਾਨਸਮ੍ਪਯੁਤ੍ਤੋ ਚ ਧਮ੍ਮੋ ਉਪਾਦਾਨਸ੍ਸ ਚੇਵ ਉਪਾਦਾਨਸਮ੍ਪਯੁਤ੍ਤਸ੍ਸ ਚ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚ ਹੇਤੂ ਸਮ੍ਪਯੁਤ੍ਤਕਾਨਂ ਉਪਾਦਾਨਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਉਪਾਦਾਨਾਨਞ੍ਚ ਹੇਤੁਪਚ੍ਚਯੇਨ ਪਚ੍ਚਯੋ. (੩)

੧੦੩. ਉਪਾਦਾਨਸਮ੍ਪਯੁਤ੍ਤੋ ਚੇਵ ਨੋ ਚ ਉਪਾਦਾਨੋ ਧਮ੍ਮੋ ਉਪਾਦਾਨਸਮ੍ਪਯੁਤ੍ਤਸ੍ਸ ਚੇਵ ਨੋ ਚ ਉਪਾਦਾਨਸ੍ਸ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ ਹੇਤੂ ਸਮ੍ਪਯੁਤ੍ਤਕਾਨਂ ਉਪਾਦਾਨਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਉਪਾਦਾਨਾਨਞ੍ਚ ਹੇਤੁਪਚ੍ਚਯੇਨ ਪਚ੍ਚਯੋ. (੩)

੧੦੪. ਉਪਾਦਾਨੋ ਚੇਵ ਉਪਾਦਾਨਸਮ੍ਪਯੁਤ੍ਤੋ ਚ ਉਪਾਦਾਨਸਮ੍ਪਯੁਤ੍ਤੋ ਚੇਵ ਨੋ ਚ ਉਪਾਦਾਨੋ ਚ ਧਮ੍ਮਾ ਉਪਾਦਾਨਸ੍ਸ ਚੇਵ ਉਪਾਦਾਨਸਮ੍ਪਯੁਤ੍ਤਸ੍ਸ ਚ ਧਮ੍ਮਸ੍ਸ ਹੇਤੁਪਚ੍ਚਯੇਨ ਪਚ੍ਚਯੋ – ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚ ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ ਚ ਹੇਤੂ ਸਮ੍ਪਯੁਤ੍ਤਕਾਨਂ ਉਪਾਦਾਨਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚ ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ ਚ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਹੇਤੁਪਚ੍ਚਯੇਨ ਪਚ੍ਚਯੋ. (ਮੂਲਂ ਪੁਚ੍ਛਿਤਬ੍ਬਂ) ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚ ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ ਚ ਹੇਤੂ ਸਮ੍ਪਯੁਤ੍ਤਕਾਨਂ ਖਨ੍ਧਾਨਂ ਉਪਾਦਾਨਾਨਞ੍ਚ ਹੇਤੁਪਚ੍ਚਯੇਨ ਪਚ੍ਚਯੋ. (੩)

ਆਰਮ੍ਮਣਪਚ੍ਚਯੋ

੧੦੫. ਉਪਾਦਾਨੋ ਚੇਵ ਉਪਾਦਾਨਸਮ੍ਪਯੁਤ੍ਤੋ ਚ ਧਮ੍ਮੋ ਉਪਾਦਾਨਸ੍ਸ ਚੇਵ ਉਪਾਦਾਨਸਮ੍ਪਯੁਤ੍ਤਸ੍ਸ ਚ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਉਪਾਦਾਨੇ ਆਰਬ੍ਭ ਉਪਾਦਾਨਾ ਉਪ੍ਪਜ੍ਜਨ੍ਤਿ. (ਮੂਲਂ ਪੁਚ੍ਛਿਤਬ੍ਬਂ) ਉਪਾਦਾਨੇ ਆਰਬ੍ਭ ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ ਖਨ੍ਧਾ ਉਪ੍ਪਜ੍ਜਨ੍ਤਿ. (ਮੂਲਂ ਪੁਚ੍ਛਿਤਬ੍ਬਂ) ਉਪਾਦਾਨੇ ਆਰਬ੍ਭ ਉਪਾਦਾਨਾ ਚ ਸਮ੍ਪਯੁਤ੍ਤਕਾ ਚ ਖਨ੍ਧਾ ਉਪ੍ਪਜ੍ਜਨ੍ਤਿ. (੩)

ਉਪਾਦਾਨਸਮ੍ਪਯੁਤ੍ਤੋ ਚੇਵ ਨੋ ਚ ਉਪਾਦਾਨੋ ਧਮ੍ਮੋ ਉਪਾਦਾਨਸਮ੍ਪਯੁਤ੍ਤਸ੍ਸ ਚੇਵ ਨੋ ਚ ਉਪਾਦਾਨਸ੍ਸ ਧਮ੍ਮਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋ – ਉਪਾਦਾਨਸਮ੍ਪਯੁਤ੍ਤੇ ਚੇਵ ਨੋ ਚ ਉਪਾਦਾਨੇ ਖਨ੍ਧੇ ਆਰਬ੍ਭ ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ ਖਨ੍ਧਾ ਉਪ੍ਪਜ੍ਜਨ੍ਤਿ (ਤੀਣਿਪਿ ਕਾਤਬ੍ਬਾ, ਘਟਨੇ ਤੀਣਿਪਿ ਕਾਤਬ੍ਬਾ).

ਅਧਿਪਤਿਪਚ੍ਚਯੋ

੧੦੬. ਉਪਾਦਾਨੋ ਚੇਵ ਉਪਾਦਾਨਸਮ੍ਪਯੁਤ੍ਤੋ ਚ ਧਮ੍ਮੋ ਉਪਾਦਾਨਸ੍ਸ ਚੇਵ ਉਪਾਦਾਨਸਮ੍ਪਯੁਤ੍ਤਸ੍ਸ ਚ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ… ਤੀਣਿ. (੩)

ਉਪਾਦਾਨਸਮ੍ਪਯੁਤ੍ਤੋ ਚੇਵ ਨੋ ਚ ਉਪਾਦਾਨੋ ਧਮ੍ਮੋ ਉਪਾਦਾਨਸਮ੍ਪਯੁਤ੍ਤਸ੍ਸ ਚੇਵ ਨੋ ਚ ਉਪਾਦਾਨਸ੍ਸ ਧਮ੍ਮਸ੍ਸ ਅਧਿਪਤਿਪਚ੍ਚਯੇਨ ਪਚ੍ਚਯੋ – ਆਰਮ੍ਮਣਾਧਿਪਤਿ, ਸਹਜਾਤਾਧਿਪਤਿ (ਤੀਣਿਪਿ, ਤੀਸੁਪਿ ਦ੍ਵੇਪਿ ਅਧਿਪਤਿ ਕਾਤਬ੍ਬਾ, ਘਟਨਾਧਿਪਤਿਪਿ ਤੀਣਿ).

ਅਨਨ੍ਤਰਪਚ੍ਚਯੋ

੧੦੭. ਉਪਾਦਾਨੋ ਚੇਵ ਉਪਾਦਾਨਸਮ੍ਪਯੁਤ੍ਤੋ ਚ ਧਮ੍ਮੋ ਉਪਾਦਾਨਸ੍ਸ ਚੇਵ ਉਪਾਦਾਨਸਮ੍ਪਯੁਤ੍ਤਸ੍ਸ ਚ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ – ਪੁਰਿਮਾ ਪੁਰਿਮਾ ਉਪਾਦਾਨਾ ਚੇਵ ਉਪਾਦਾਨਸਮ੍ਪਯੁਤ੍ਤਾ ਚ ਖਨ੍ਧਾ ਪਚ੍ਛਿਮਾਨਂ ਪਚ੍ਛਿਮਾਨਂ ਉਪਾਦਾਨਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ (ਏਵਂ ਨਵਪਿ ਪਞ੍ਹਾ ਕਾਤਬ੍ਬਾ, ਆਵਜ੍ਜਨਾਪਿ ਵੁਟ੍ਠਾਨਮ੍ਪਿ ਨਤ੍ਥਿ).

ਸਮਨਨ੍ਤਰਪਚ੍ਚਯਾਦਿ

੧੦੮. ਉਪਾਦਾਨੋ ਚੇਵ ਉਪਾਦਾਨਸਮ੍ਪਯੁਤ੍ਤੋ ਚ ਧਮ੍ਮੋ ਉਪਾਦਾਨਸ੍ਸ ਚੇਵ ਉਪਾਦਾਨਸਮ੍ਪਯੁਤ੍ਤਸ੍ਸ ਚ ਧਮ੍ਮਸ੍ਸ ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ… ਨਵ… ਸਹਜਾਤਪਚ੍ਚਯੇਨ ਪਚ੍ਚਯੋ… ਨਵ… ਅਞ੍ਞਮਞ੍ਞਪਚ੍ਚਯੇਨ ਪਚ੍ਚਯੋ… ਨਵ… ਨਿਸ੍ਸਯਪਚ੍ਚਯੇਨ ਪਚ੍ਚਯੋ… ਨਵ.

ਉਪਨਿਸ੍ਸਯਪਚ੍ਚਯੋ

੧੦੯. ਉਪਾਦਾਨੋ ਚੇਵ ਉਪਾਦਾਨਸਮ੍ਪਯੁਤ੍ਤੋ ਚ ਧਮ੍ਮੋ ਉਪਾਦਾਨਸ੍ਸ ਚੇਵ ਉਪਾਦਾਨਸਮ੍ਪਯੁਤ੍ਤਸ੍ਸ ਚ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ…ਪੇ… ਤੀਣਿ.

ਉਪਾਦਾਨਸਮ੍ਪਯੁਤ੍ਤੋ ਚੇਵ ਨੋ ਚ ਉਪਾਦਾਨੋ ਧਮ੍ਮੋ ਉਪਾਦਾਨਸਮ੍ਪਯੁਤ੍ਤਸ੍ਸ ਚੇਵ ਨੋ ਚ ਉਪਾਦਾਨਸ੍ਸ ਧਮ੍ਮਸ੍ਸ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ – ਆਰਮ੍ਮਣੂਪਨਿਸ੍ਸਯੋ, ਅਨਨ੍ਤਰੂਪਨਿਸ੍ਸਯੋ, ਪਕਤੂਪਨਿਸ੍ਸਯੋ…ਪੇ…. ਪਕਤੂਪਨਿਸ੍ਸਯੋ – ਉਪਾਦਾਨਸਮ੍ਪਯੁਤ੍ਤਾ ਚੇਵ ਨੋ ਚ ਉਪਾਦਾਨਾ ਖਨ੍ਧਾ ਉਪਾਦਾਨਸਮ੍ਪਯੁਤ੍ਤਕਾਨਞ੍ਚੇਵ ਨੋ ਚ ਉਪਾਦਾਨਾਨਂ ਖਨ੍ਧਾਨਂ ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ (ਤੀਣਿ ਘਟਨੁਪਨਿਸ੍ਸਯੇਪਿ ਤੀਣਿ)… ਆਸੇਵਨਪਚ੍ਚਯੇਨ ਪਚ੍ਚਯੋ… ਨਵ.

ਕਮ੍ਮਪਚ੍ਚਯਾਦਿ

੧੧੦. ਉਪਾਦਾਨਸਮ੍ਪਯੁਤ੍ਤੋ ਚੇਵ ਨੋ ਚ ਉਪਾਦਾਨੋ ਧਮ੍ਮੋ ਉਪਾਦਾਨਸਮ੍ਪਯੁਤ੍ਤਸ੍ਸ ਚੇਵ ਨੋ ਚ ਉਪਾਦਾਨਸ੍ਸ ਧਮ੍ਮਸ੍ਸ ਕਮ੍ਮਪਚ੍ਚਯੇਨ ਪਚ੍ਚਯੋ… ਤੀਣਿ… ਆਹਾਰਪਚ੍ਚਯੇਨ ਪਚ੍ਚਯੋ… ਤੀਣਿ… ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ… ਤੀਣਿ… ਝਾਨਪਚ੍ਚਯੇਨ ਪਚ੍ਚਯੋ… ਤੀਣਿ… ਮਗ੍ਗਪਚ੍ਚਯੇਨ ਪਚ੍ਚਯੋ… ਨਵ… ਸਮ੍ਪਯੁਤ੍ਤਪਚ੍ਚਯੇਨ ਪਚ੍ਚਯੋ… ਨਵ… ਅਤ੍ਥਿਪਚ੍ਚਯੇਨ ਪਚ੍ਚਯੋ… ਨਵ… ਨਤ੍ਥਿਪਚ੍ਚਯੇਨ ਪਚ੍ਚਯੋ… ਨਵ… ਵਿਗਤਪਚ੍ਚਯੇਨ ਪਚ੍ਚਯੋ… ਨਵ… ਅਵਿਗਤਪਚ੍ਚਯੇਨ ਪਚ੍ਚਯੋ… ਨਵ.