੧. ਵਿਭਙ੍ਗਵਾਰੋ

ਨਹੇਤੁਪਚ੍ਚਯੋ

੩੨੩. ਅਜ੍ਝਤ੍ਤਿਕਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਪਟਿਸਨ੍ਧਿਕ੍ਖਣੇ ਚਿਤ੍ਤਂ ਪਟਿਚ੍ਚ ਅਜ੍ਝਤ੍ਤਿਕਂ ਕਟਤ੍ਤਾਰੂਪਂ. (੧)

ਅਜ੍ਝਤ੍ਤਿਕਂ ਧਮ੍ਮਂ ਪਟਿਚ੍ਚ ਬਾਹਿਰੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਚਿਤ੍ਤਂ ਪਟਿਚ੍ਚ ਸਮ੍ਪਯੁਤ੍ਤਕਾ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ; ਅਹੇਤੁਕਪਟਿਸਨ੍ਧਿਕ੍ਖਣੇ ਚਿਤ੍ਤਂ ਪਟਿਚ੍ਚ ਸਮ੍ਪਯੁਤ੍ਤਕਾ ਖਨ੍ਧਾ ਬਾਹਿਰਂ ਕਟਤ੍ਤਾ ਚ ਰੂਪਂ, ਵਿਚਿਕਿਚ੍ਛਾਸਹਗਤਂ ਉਦ੍ਧਚ੍ਚਸਹਗਤਂ ਚਿਤ੍ਤਂ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (੨)

ਅਜ੍ਝਤ੍ਤਿਕਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਚ ਬਾਹਿਰੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਨਹੇਤੁਪਚ੍ਚਯਾ – ਅਹੇਤੁਕਪਟਿਸਨ੍ਧਿਕ੍ਖਣੇ ਚਿਤ੍ਤਂ ਪਟਿਚ੍ਚ ਸਮ੍ਪਯੁਤ੍ਤਕਾ ਖਨ੍ਧਾ ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਕਟਤ੍ਤਾਰੂਪਂ. (੩)

੩੨੪. ਬਾਹਿਰਂ ਧਮ੍ਮਂ ਪਟਿਚ੍ਚ ਬਾਹਿਰੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਬਾਹਿਰਂ ਏਕਂ ਖਨ੍ਧਂ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ, ਦ੍ਵੇ ਖਨ੍ਧੇ…ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ …ਪੇ… (ਯਾਵ ਅਸਞ੍ਞਸਤ੍ਤਾ) ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (੧)

ਬਾਹਿਰਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕੇ ਬਾਹਿਰੇ ਖਨ੍ਧੇ ਪਟਿਚ੍ਚ ਚਿਤ੍ਤਂ; ਅਹੇਤੁਕਪਟਿਸਨ੍ਧਿਕ੍ਖਣੇ ਬਾਹਿਰੇ ਖਨ੍ਧੇ ਪਟਿਚ੍ਚ ਚਿਤ੍ਤਂ ਅਜ੍ਝਤ੍ਤਿਕਂ ਕਟਤ੍ਤਾ ਚ ਰੂਪਂ, ਅਹੇਤੁਕਪਟਿਸਨ੍ਧਿਕ੍ਖਣੇ ਵਤ੍ਥੁਂ ਪਟਿਚ੍ਚ ਚਿਤ੍ਤਂ. (੨)

ਬਾਹਿਰਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਚ ਬਾਹਿਰੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਬਾਹਿਰਂ ਏਕਂ ਖਨ੍ਧਂ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਞ੍ਚ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ, ਦ੍ਵੇ ਖਨ੍ਧੇ …ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ ਬਾਹਿਰਂ ਏਕਂ ਖਨ੍ਧਂ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਞ੍ਚ ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਕਟਤ੍ਤਾਰੂਪਂ, ਅਹੇਤੁਕਪਟਿਸਨ੍ਧਿਕ੍ਖਣੇ ਵਤ੍ਥੁਂ ਪਟਿਚ੍ਚ ਚਿਤ੍ਤਂ ਸਮ੍ਪਯੁਤ੍ਤਕਾ ਚ ਖਨ੍ਧਾ. (੩)

੩੨੫. ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਪਟਿਸਨ੍ਧਿਕ੍ਖਣੇ ਚਿਤ੍ਤਞ੍ਚ ਸਮ੍ਪਯੁਤ੍ਤਕੇ ਚ ਖਨ੍ਧੇ ਪਟਿਚ੍ਚ ਅਜ੍ਝਤ੍ਤਿਕਂ ਕਟਤ੍ਤਾਰੂਪਂ. (੧)

ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਧਮ੍ਮਂ ਪਟਿਚ੍ਚ ਬਾਹਿਰੋ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਬਾਹਿਰਂ ਏਕਂ ਖਨ੍ਧਞ੍ਚ ਚਿਤ੍ਤਞ੍ਚ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ, ਦ੍ਵੇ ਖਨ੍ਧੇ…ਪੇ… ਅਹੇਤੁਕਂ ਚਿਤ੍ਤਞ੍ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ; ਅਹੇਤੁਕਪਟਿਸਨ੍ਧਿਕ੍ਖਣੇ ਬਾਹਿਰਂ ਏਕਂ ਖਨ੍ਧਞ੍ਚ ਚਿਤ੍ਤਞ੍ਚ ਪਟਿਚ੍ਚ ਦ੍ਵੇ ਖਨ੍ਧਾ ਬਾਹਿਰਂ ਕਟਤ੍ਤਾ ਚ ਰੂਪਂ; ਅਹੇਤੁਕਪਟਿਸਨ੍ਧਿਕ੍ਖਣੇ ਚਿਤ੍ਤਞ੍ਚ ਮਹਾਭੂਤੇ ਚ ਪਟਿਚ੍ਚ ਬਾਹਿਰਂ ਕਟਤ੍ਤਾਰੂਪਂ, ਅਹੇਤੁਕਪਟਿਸਨ੍ਧਿਕ੍ਖਣੇ ਚਿਤ੍ਤਞ੍ਚ ਵਤ੍ਥੁਞ੍ਚ ਪਟਿਚ੍ਚ ਬਾਹਿਰਾ ਖਨ੍ਧਾ, ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਚ ਚਿਤ੍ਤਞ੍ਚ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (੨)

ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਚ ਬਾਹਿਰੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਨਹੇਤੁਪਚ੍ਚਯਾ – ਅਹੇਤੁਕਪਟਿਸਨ੍ਧਿਕ੍ਖਣੇ ਬਾਹਿਰਂ ਏਕਂ ਖਨ੍ਧਞ੍ਚ ਚਿਤ੍ਤਞ੍ਚ ਪਟਿਚ੍ਚ ਦ੍ਵੇ ਖਨ੍ਧਾ ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਕਟਤ੍ਤਾਰੂਪਂ, ਦ੍ਵੇ ਖਨ੍ਧੇ ਚ…ਪੇ…. (੩)

ਨਆਰਮ੍ਮਣਪਚ੍ਚਯੋ

੩੨੬. ਅਜ੍ਝਤ੍ਤਿਕਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਪਟਿਸਨ੍ਧਿਕ੍ਖਣੇ ਚਿਤ੍ਤਂ ਪਟਿਚ੍ਚ ਅਜ੍ਝਤ੍ਤਿਕਂ ਕਟਤ੍ਤਾਰੂਪਂ. (੧)

ਅਜ੍ਝਤ੍ਤਿਕਂ ਧਮ੍ਮਂ ਪਟਿਚ੍ਚ ਬਾਹਿਰੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਚਿਤ੍ਤਂ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ; ਪਟਿਸਨ੍ਧਿਕ੍ਖਣੇ ਚਿਤ੍ਤਂ ਪਟਿਚ੍ਚ ਬਾਹਿਰਂ ਕਟਤ੍ਤਾਰੂਪਂ. (੨)

ਅਜ੍ਝਤ੍ਤਿਕਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਚ ਬਾਹਿਰੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਨਆਰਮ੍ਮਣਪਚ੍ਚਯਾ; ਪਟਿਸਨ੍ਧਿਕ੍ਖਣੇ ਚਿਤ੍ਤਂ ਪਟਿਚ੍ਚ ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਕਟਤ੍ਤਾਰੂਪਂ. (੩)

ਬਾਹਿਰਂ ਧਮ੍ਮਂ ਪਟਿਚ੍ਚ ਬਾਹਿਰੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਬਾਹਿਰੇ ਖਨ੍ਧੇ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ; ਪਟਿਸਨ੍ਧਿਕ੍ਖਣੇ ਬਾਹਿਰੇ ਖਨ੍ਧੇ ਪਟਿਚ੍ਚ ਬਾਹਿਰਂ ਕਟਤ੍ਤਾਰੂਪਂ, ਬਾਹਿਰੇ ਖਨ੍ਧੇ ਪਟਿਚ੍ਚ ਵਤ੍ਥੁ, ਏਕਂ ਮਹਾਭੂਤਂ…ਪੇ… (ਯਾਵ ਅਸਞ੍ਞਸਤ੍ਤਾ). (੧)

ਬਾਹਿਰਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਪਟਿਸਨ੍ਧਿਕ੍ਖਣੇ ਬਾਹਿਰੇ ਖਨ੍ਧੇ ਪਟਿਚ੍ਚ ਅਜ੍ਝਤ੍ਤਿਕਂ ਕਟਤ੍ਤਾਰੂਪਂ. (੨)

ਬਾਹਿਰਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਚ ਬਾਹਿਰੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਨਆਰਮ੍ਮਣਪਚ੍ਚਯਾ – ਪਟਿਸਨ੍ਧਿਕ੍ਖਣੇ ਬਾਹਿਰੇ ਖਨ੍ਧੇ ਪਟਿਚ੍ਚ ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਕਟਤ੍ਤਾਰੂਪਂ. (੩)

੩੨੭. ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਪਟਿਸਨ੍ਧਿਕ੍ਖਣੇ ਚਿਤ੍ਤਞ੍ਚ ਸਮ੍ਪਯੁਤ੍ਤਕੇ ਚ ਖਨ੍ਧੇ ਪਟਿਚ੍ਚ ਅਜ੍ਝਤ੍ਤਿਕਂ ਕਟਤ੍ਤਾਰੂਪਂ. (੧)

ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਧਮ੍ਮਂ ਪਟਿਚ੍ਚ ਬਾਹਿਰੋ ਧਮ੍ਮੋ ਉਪ੍ਪਜ੍ਜਤਿ ਨਆਰਮ੍ਮਣਪਚ੍ਚਯਾ – ਬਾਹਿਰੇ ਖਨ੍ਧੇ ਚ ਚਿਤ੍ਤਞ੍ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ, ਚਿਤ੍ਤਞ੍ਚ ਮਹਾਭੂਤੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ (ਪਟਿਸਨ੍ਧਿਕ੍ਖਣੇ ਦ੍ਵੇ ਕਾਤਬ੍ਬਾ).

ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਚ ਬਾਹਿਰੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਨਆਰਮ੍ਮਣਪਚ੍ਚਯਾ – ਪਟਿਸਨ੍ਧਿਕ੍ਖਣੇ ਚਿਤ੍ਤਞ੍ਚ ਸਮ੍ਪਯੁਤ੍ਤਕੇ ਚ ਖਨ੍ਧੇ ਪਟਿਚ੍ਚ ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਕਟਤ੍ਤਾਰੂਪਂ (ਸਂਖਿਤ੍ਤਂ). (੩)

ਨਝਾਨਪਚ੍ਚਯੋ

੩੨੮. ਅਜ੍ਝਤ੍ਤਿਕਂ ਧਮ੍ਮਂ ਪਟਿਚ੍ਚ ਬਾਹਿਰੋ ਧਮ੍ਮੋ ਉਪ੍ਪਜ੍ਜਤਿ ਨਝਾਨਪਚ੍ਚਯਾ – ਚਕ੍ਖੁਵਿਞ੍ਞਾਣਂ ਪਟਿਚ੍ਚ ਸਮ੍ਪਯੁਤ੍ਤਕਾ ਖਨ੍ਧਾ…ਪੇ… ਕਾਯਵਿਞ੍ਞਾਣਂ…ਪੇ….

ਬਾਹਿਰਂ ਧਮ੍ਮਂ ਪਟਿਚ੍ਚ ਬਾਹਿਰੋ ਧਮ੍ਮੋ ਉਪ੍ਪਜ੍ਜਤਿ ਨਝਾਨਪਚ੍ਚਯਾ – ਚਕ੍ਖੁਵਿਞ੍ਞਾਣਸਹਗਤਂ ਏਕਂ ਖਨ੍ਧਂ ਪਟਿਚ੍ਚ ਦ੍ਵੇ ਖਨ੍ਧਾ, ਦ੍ਵੇ ਖਨ੍ਧੇ…ਪੇ… ਕਾਯਵਿਞ੍ਞਾਣਸਹਗਤਂ…ਪੇ… ਬਾਹਿਰਂ… ਆਹਾਰਸਮੁਟ੍ਠਾਨਂ… ਉਤੁਸਮੁਟ੍ਠਾਨਂ… ਅਸਞ੍ਞਸਤ੍ਤਾਨਂ…ਪੇ…. ਬਾਹਿਰਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਧਮ੍ਮੋ ਉਪ੍ਪਜ੍ਜਤਿ ਨਝਾਨਪਚ੍ਚਯਾ – ਚਕ੍ਖੁਵਿਞ੍ਞਾਣਸਹਗਤੇ ਖਨ੍ਧੇ ਪਟਿਚ੍ਚ ਚਕ੍ਖੁਵਿਞ੍ਞਾਣਂ…ਪੇ… ਕਾਯਵਿਞ੍ਞਾਣਸਹਗਤੇ ਖਨ੍ਧੇ ਪਟਿਚ੍ਚ ਕਾਯਵਿਞ੍ਞਾਣਂ. ਬਾਹਿਰਂ ਧਮ੍ਮਂ ਪਟਿਚ੍ਚ ਅਜ੍ਝਤ੍ਤਿਕੋ ਚ ਬਾਹਿਰੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਨਝਾਨਪਚ੍ਚਯਾ – ਚਕ੍ਖੁਵਿਞ੍ਞਾਣਸਹਗਤਂ ਏਕਂ ਖਨ੍ਧਂ ਪਟਿਚ੍ਚ ਦ੍ਵੇ ਖਨ੍ਧਾ ਚਕ੍ਖੁਵਿਞ੍ਞਾਣਞ੍ਚ, ਦ੍ਵੇ ਖਨ੍ਧੇ…ਪੇ… ਕਾਯਵਿਞ੍ਞਾਣਸਹਗਤਂ ਏਕਂ ਖਨ੍ਧਂ…ਪੇ…. (੩)

ਅਜ੍ਝਤ੍ਤਿਕਞ੍ਚ ਬਾਹਿਰਞ੍ਚ ਧਮ੍ਮਂ ਪਟਿਚ੍ਚ ਬਾਹਿਰੋ ਧਮ੍ਮੋ ਉਪ੍ਪਜ੍ਜਤਿ ਨਝਾਨਪਚ੍ਚਯਾ – ਚਕ੍ਖੁਵਿਞ੍ਞਾਣਸਹਗਤਂ ਏਕਂ ਖਨ੍ਧਞ੍ਚ ਚਕ੍ਖੁਵਿਞ੍ਞਾਣਞ੍ਚ ਪਟਿਚ੍ਚ ਦ੍ਵੇ ਖਨ੍ਧਾ, ਦ੍ਵੇ ਖਨ੍ਧੇ…ਪੇ… ਕਾਯਵਿਞ੍ਞਾਣਂ (ਚਕ੍ਕਂ).