੧. ਵਿਭਙ੍ਗਵਾਰੋ

ਨਹੇਤੁਪਚ੍ਚਯੋ

੨੪੩. ਚਿਤ੍ਤਸਹਭੁਂ ਧਮ੍ਮਂ ਪਟਿਚ੍ਚ ਚਿਤ੍ਤਸਹਭੂ ਧਮ੍ਮੋ ਉਪ੍ਪਜ੍ਜਤਿ ਨਹੇਤੁਪਚ੍ਚਯਾ – ਅਹੇਤੁਕਂ ਚਿਤ੍ਤਸਹਭੁਂ ਏਕਂ ਖਨ੍ਧਂ ਪਟਿਚ੍ਚ ਦ੍ਵੇ ਖਨ੍ਧਾ ਚਿਤ੍ਤਸਹਭੁ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ, ਦ੍ਵੇ ਖਨ੍ਧੇ…ਪੇ… ਅਹੇਤੁਕਪਟਿਸਨ੍ਧਿਕ੍ਖਣੇ…ਪੇ… ਵਿਚਿਕਿਚ੍ਛਾਸਹਗਤੇ ਉਦ੍ਧਚ੍ਚਸਹਗਤੇ ਖਨ੍ਧੇ ਪਟਿਚ੍ਚ ਵਿਚਿਕਿਚ੍ਛਾਸਹਗਤੋ ਉਦ੍ਧਚ੍ਚਸਹਗਤੋ ਮੋਹੋ. (ਏਵਂ ਨਵਪਿ ਪਞ੍ਹਾ ਕਾਤਬ੍ਬਾ. ‘‘ਅਹੇਤੁਕ’’ਨ੍ਤਿ ਨਿਯਾਮੇਤਬ੍ਬਂ. ਯਥਾ ਅਨੁਲੋਮੇ ਲਬ੍ਭਤਿ ਏਵਂ ਕਾਤਬ੍ਬਂ. ਤੀਣਿ ਮੋਹੋ ਯਥਾ ਚਿਤ੍ਤਸਮੁਟ੍ਠਾਨਦੁਕੇ ਏਵਮੇਵ ਕਾਤਬ੍ਬਾ.)

ਨਕਮ੍ਮਪਚ੍ਚਯੋ

੨੪੪. ਚਿਤ੍ਤਸਹਭੁਂ ਧਮ੍ਮਂ ਪਟਿਚ੍ਚ ਚਿਤ੍ਤਸਹਭੂ ਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ – ਚਿਤ੍ਤਸਹਭੂ ਖਨ੍ਧੇ ਪਟਿਚ੍ਚ ਚਿਤ੍ਤਸਹਭੂ ਚੇਤਨਾ.

ਨੋਚਿਤ੍ਤਸਹਭੁਂ ਧਮ੍ਮਂ ਪਟਿਚ੍ਚ ਨੋਚਿਤ੍ਤਸਹਭੂ ਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ – ਬਾਹਿਰਂ… ਆਹਾਰਸਮੁਟ੍ਠਾਨਂ… ਉਤੁਸਮੁਟ੍ਠਾਨਂ…ਪੇ….

ਨੋਚਿਤ੍ਤਸਹਭੁਂ ਧਮ੍ਮਂ ਪਟਿਚ੍ਚ ਚਿਤ੍ਤਸਹਭੂ ਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ – ਚਿਤ੍ਤਂ ਪਟਿਚ੍ਚ ਸਮ੍ਪਯੁਤ੍ਤਕਾ ਚੇਤਨਾ.

ਚਿਤ੍ਤਸਹਭੁਞ੍ਚ ਨੋਚਿਤ੍ਤਸਹਭੁਞ੍ਚ ਧਮ੍ਮਂ ਪਟਿਚ੍ਚ ਚਿਤ੍ਤਸਹਭੂ ਧਮ੍ਮੋ ਉਪ੍ਪਜ੍ਜਤਿ ਨਕਮ੍ਮਪਚ੍ਚਯਾ – ਚਿਤ੍ਤਸਹਭੂ ਖਨ੍ਧੇ ਚ ਚਿਤ੍ਤਞ੍ਚ ਪਟਿਚ੍ਚ ਸਮ੍ਪਯੁਤ੍ਤਕਾ ਚੇਤਨਾ.

ਨਝਾਨਪਚ੍ਚਯੋ

੨੪੫. ਚਿਤ੍ਤਸਹਭੁਂ ਧਮ੍ਮਂ ਪਟਿਚ੍ਚ ਚਿਤ੍ਤਸਹਭੂ ਧਮ੍ਮੋ ਉਪ੍ਪਜ੍ਜਤਿ ਨਝਾਨਪਚ੍ਚਯਾ – ਪਞ੍ਚਵਿਞ੍ਞਾਣਸਹਗਤਂ…ਪੇ….