੨. ਅਨਾਗਤਾਦਿਏਕਚ੍ਚਕਥਾ

੩੦੦. ਅਨਾਗਤਂ ਅਤ੍ਥੀਤਿ? ਏਕਚ੍ਚਂ ਅਤ੍ਥਿ, ਏਕਚ੍ਚਂ ਨਤ੍ਥੀਤਿ. ਏਕਚ੍ਚਂ ਜਾਤਂ, ਏਕਚ੍ਚਂ ਅਜਾਤਂ; ਏਕਚ੍ਚਂ ਸਞ੍ਜਾਤਂ, ਏਕਚ੍ਚਂ ਅਸਞ੍ਜਾਤਂ; ਏਕਚ੍ਚਂ ਨਿਬ੍ਬਤ੍ਤਂ, ਏਕਚ੍ਚਂ ਅਨਿਬ੍ਬਤ੍ਤਂ; ਏਕਚ੍ਚਂ ਪਾਤੁਭੂਤਂ, ਏਕਚ੍ਚਂ ਅਪਾਤੁਭੂਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਾਗਤਂ ਏਕਚ੍ਚਂ ਅਤ੍ਥਿ, ਏਕਚ੍ਚਂ ਨਤ੍ਥੀਤਿ? ਆਮਨ੍ਤਾ. ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ ਏਕਚ੍ਚੇ ਅਤ੍ਥਿ, ਏਕਚ੍ਚੇ ਨਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਗਤਂ ਏਕਚ੍ਚਂ ਅਤ੍ਥਿ, ਏਕਚ੍ਚਂ ਨਤ੍ਥੀਤਿ? ਆਮਨ੍ਤਾ. ਅਨਾਗਤਾ ਅਨੁਪ੍ਪਾਦਿਨੋ ਧਮ੍ਮਾ ਏਕਚ੍ਚੇ ਅਤ੍ਥਿ, ਏਕਚ੍ਚੇ ਨਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਾਗਤਂ ਏਕਚ੍ਚਂ ਅਤ੍ਥਿ, ਏਕਚ੍ਚਂ ਨਤ੍ਥੀਤਿ? ਆਮਨ੍ਤਾ. ਕਿਂ ਅਤ੍ਥਿ, ਕਿਂ ਨਤ੍ਥੀਤਿ? ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ – ਤੇ ਅਤ੍ਥਿ; ਅਨਾਗਤਾ ਅਨੁਪ੍ਪਾਦਿਨੋ ਧਮ੍ਮਾ – ਤੇ ਨਤ੍ਥੀਤਿ. ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ – ਤੇ ਅਤ੍ਥੀਤਿ? ਆਮਨ੍ਤਾ. ਅਨਾਗਤਾ ਅਨੁਪ੍ਪਾਦਿਨੋ ਧਮ੍ਮਾ – ਤੇ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਗਤਾ ਅਨੁਪ੍ਪਾਦਿਨੋ ਧਮ੍ਮਾ – ਤੇ ਨਤ੍ਥੀਤਿ? ਆਮਨ੍ਤਾ. ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ – ਤੇ ਨਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ – ਤੇ ਅਤ੍ਥੀਤਿ? ਆਮਨ੍ਤਾ. ਨਨੁ ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ ਅਜਾਤਾਤਿ? ਆਮਨ੍ਤਾ. ਹਞ੍ਚਿ ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ ਅਜਾਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ – ਤੇ ਅਤ੍ਥੀ’’ਤਿ.

ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ ਅਜਾਤਾ – ਤੇ ਅਤ੍ਥੀਤਿ? ਆਮਨ੍ਤਾ. ਅਨਾਗਤਾ ਅਨੁਪ੍ਪਾਦਿਨੋ ਧਮ੍ਮਾ ਅਜਾਤਾ – ਤੇ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਗਤਾ ਅਨੁਪ੍ਪਾਦਿਨੋ ਧਮ੍ਮਾ ਅਜਾਤਾ – ਤੇ ਨਤ੍ਥੀਤਿ? ਆਮਨ੍ਤਾ. ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ ਅਜਾਤਾ – ਤੇ ਨਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ – ‘‘ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ – ਤੇ ਅਤ੍ਥੀ’’ਤਿ? ਆਮਨ੍ਤਾ. ਨਨੁ ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ ਉਪ੍ਪਜ੍ਜਿਸ੍ਸਨ੍ਤੀਤਿ? ਆਮਨ੍ਤਾ. ਹਞ੍ਚਿ ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ ਉਪ੍ਪਜ੍ਜਿਸ੍ਸਨ੍ਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ – ਤੇ ਅਤ੍ਥੀ’’ਤਿ.

ਅਨਾਗਤਾ ਉਪ੍ਪਾਦਿਨੋ ਧਮ੍ਮਾ ਉਪ੍ਪਜ੍ਜਿਸ੍ਸਨ੍ਤੀਤਿ ਕਤ੍ਵਾ ਤੇ ਅਤ੍ਥੀਤਿ? ਆਮਨ੍ਤਾ. ਉਪ੍ਪਜ੍ਜਿਸ੍ਸਨ੍ਤੀਤਿ ਕਤ੍ਵਾ ਪਚ੍ਚੁਪ੍ਪਨ੍ਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਉਪ੍ਪਜ੍ਜਿਸ੍ਸਨ੍ਤੀਤਿ ਕਤ੍ਵਾ ਪਚ੍ਚੁਪ੍ਪਨ੍ਨਾਤਿ? ਆਮਨ੍ਤਾ. ਪਚ੍ਚੁਪ੍ਪਨ੍ਨਾ ਧਮ੍ਮਾ ਨਿਰੁਜ੍ਝਿਸ੍ਸਨ੍ਤੀਤਿ ਕਤ੍ਵਾ ਤੇ ਨਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਏਕਚ੍ਚਂ ਅਤ੍ਥੀਤਿਕਥਾ ਨਿਟ੍ਠਿਤਾ.