੩. ਓਧਿਸੋਕਥਾ

੨੭੪. ਓਧਿਸੋਧਿਸੋ ਕਿਲੇਸੇ ਜਹਤੀਤਿ? ਆਮਨ੍ਤਾ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਦਸ੍ਸਨੇਨ ਕਿਂ ਜਹਤੀਤਿ? ਸਕ੍ਕਾਯਦਿਟ੍ਠਿਂ ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਸੋਤਾਪਨ੍ਨੋ, ਏਕਦੇਸਂ ਨ ਸੋਤਾਪਨ੍ਨੋ, ਏਕਦੇਸਂ ਸੋਤਾਪਤ੍ਤਿਫਲਪ੍ਪਤ੍ਤੋ [ਸੋਤਾਪਤ੍ਤਿਫਲਂ ਪਤ੍ਤੋ (?)] ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਸਤ੍ਤਕ੍ਖਤ੍ਤੁਪਰਮੋ, ਕੋਲਙ੍ਕੋਲੋ, ਏਕਬੀਜੀ, ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ, ਧਮ੍ਮੇ…ਪੇ… ਸਙ੍ਘੇ…ਪੇ… ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ ਏਕਦੇਸਂ ਅਰਿਯਕਨ੍ਤੇਹਿ ਸੀਲੇਹਿ ਨ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮੁਦਯਦਸ੍ਸਨੇਨ ਕਿਂ ਜਹਤੀਤਿ? ਸਕ੍ਕਾਯਦਿਟ੍ਠਿਂ ਜਹਤਿ, ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਸੋਤਾਪਨ੍ਨੋ, ਏਕਦੇਸਂ ਨ ਸੋਤਾਪਨ੍ਨੋ…ਪੇ… ਏਕਦੇਸਂ ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ, ਏਕਦੇਸਂ ਅਰਿਯਕਨ੍ਤੇਹਿ ਸੀਲੇਹਿ ਨ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਰੋਧਦਸ੍ਸਨੇਨ ਕਿਂ ਜਹਤੀਤਿ? ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਸੋਤਾਪਨ੍ਨੋ, ਏਕਦੇਸਂ ਨ ਸੋਤਾਪਨ੍ਨੋ…ਪੇ… ਏਕਦੇਸਂ ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ, ਏਕਦੇਸਂ ਅਰਿਯਕਨ੍ਤੇਹਿ ਸੀਲੇਹਿ ਨ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਗ੍ਗਦਸ੍ਸਨੇਨ ਕਿਂ ਜਹਤੀਤਿ? ਸੀਲਬ੍ਬਤਪਰਾਮਾਸਂ ਤਦੇਕਟ੍ਠੇ ਚ ਕਿਲੇਸੇ ਜਹਤੀਤਿ. ਏਕਦੇਸਂ ਸੋਤਾਪਨ੍ਨੋ, ਏਕਦੇਸਂ ਨ ਸੋਤਾਪਨ੍ਨੋ, ਏਕਦੇਸਂ ਸੋਤਾਪਤ੍ਤਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਸਤ੍ਤਕ੍ਖਤ੍ਤੁਪਰਮੋ, ਕੋਲਙ੍ਕੋਲੋ, ਏਕਬੀਜੀ, ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ, ਧਮ੍ਮੇ…ਪੇ… ਸਙ੍ਘੇ…ਪੇ… ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ, ਏਕਦੇਸਂ ਅਰਿਯਕਨ੍ਤੇਹਿ ਸੀਲੇਹਿ ਨ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੨੭੫. ਸਕਦਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਦਸ੍ਸਨੇਨ ਕਿਂ ਜਹਤੀਤਿ? ਓਲ਼ਾਰਿਕਂ ਕਾਮਰਾਗਂ ਜਹਤਿ, ਓਲ਼ਾਰਿਕਂ ਬ੍ਯਾਪਾਦਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਸਕਦਾਗਾਮੀ, ਏਕਦੇਸਂ ਨ ਸਕਦਾਗਾਮੀ, ਏਕਦੇਸਂ ਸਕਦਾਗਾਮਿਫਲਪ੍ਪਤ੍ਤੋ [ਸਕਦਾਗਾਮਿਫਲਂ ਪਤ੍ਤੋ (?)] ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮੁਦਯਦਸ੍ਸਨੇਨ ਕਿਂ ਜਹਤੀਤਿ? ਓਲ਼ਾਰਿਕਂ ਕਾਮਰਾਗਂ ਜਹਤਿ, ਓਲ਼ਾਰਿਕਂ ਬ੍ਯਾਪਾਦਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਸਕਦਾਗਾਮੀ, ਏਕਦੇਸਂ ਨ ਸਕਦਾਗਾਮੀ, ਏਕਦੇਸਂ ਸਕਦਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਰੋਧਦਸ੍ਸਨੇਨ ਕਿਂ ਜਹਤੀਤਿ? ਓਲ਼ਾਰਿਕਂ ਬ੍ਯਾਪਾਦਂ ਜਹਤਿ, ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਸਕਦਾਗਾਮੀ, ਏਕਦੇਸਂ ਨ ਸਕਦਾਗਾਮੀ, ਏਕਦੇਸਂ ਸਕਦਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਗ੍ਗਦਸ੍ਸਨੇਨ ਕਿਂ ਜਹਤੀਤਿ? ਓਲ਼ਾਰਿਕਂ ਬ੍ਯਾਪਾਦਂ ਜਹਤਿ, ਤਦੇਕਟ੍ਠੇ ਚ ਕਿਲੇਸੇ ਜਹਤੀਤਿ. ਏਕਦੇਸਂ ਸਕਦਾਗਾਮੀ, ਏਕਦੇਸਂ ਨ ਸਕਦਾਗਾਮੀ, ਏਕਦੇਸਂ ਸਕਦਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੨੭੬. ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਦਸ੍ਸਨੇਨ ਕਿਂ ਜਹਤੀਤਿ? ਅਣੁਸਹਗਤਂ ਕਾਮਰਾਗਂ ਜਹਤਿ, ਅਣੁਸਹਗਤਂ ਬ੍ਯਾਪਾਦਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਅਨਾਗਾਮੀ, ਏਕਦੇਸਂ ਨ ਅਨਾਗਾਮੀ, ਏਕਦੇਸਂ ਅਨਾਗਾਮਿਫਲਪ੍ਪਤ੍ਤੋ [ਅਨਾਗਾਮਿਫਲਂ ਪਤ੍ਤੋ (?)] ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਅਨ੍ਤਰਾਪਰਿਨਿਬ੍ਬਾਯੀ, ਉਪਹਚ੍ਚਪਰਿਨਿਬ੍ਬਾਯੀ, ਅਸਙ੍ਖਾਰਪਰਿਨਿਬ੍ਬਾਯੀ, ਸਸਙ੍ਖਾਰਪਰਿਨਿਬ੍ਬਾਯੀ, ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਏਕਦੇਸਂ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮੁਦਯਦਸ੍ਸਨੇਨ ਕਿਂ ਜਹਤੀਤਿ? ਅਣੁਸਹਗਤਂ ਕਾਮਰਾਗਂ ਜਹਤਿ, ਅਣੁਸਹਗਤਂ ਬ੍ਯਾਪਾਦਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਅਨਾਗਾਮੀ, ਏਕਦੇਸਂ ਨ ਅਨਾਗਾਮੀ…ਪੇ… ਏਕਦੇਸਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਏਕਦੇਸਂ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਰੋਧਦਸ੍ਸਨੇਨ ਕਿਂ ਜਹਤੀਤਿ? ਅਣੁਸਹਗਤਂ ਬ੍ਯਾਪਾਦਂ ਜਹਤਿ, ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਅਨਾਗਾਮੀ, ਏਕਦੇਸਂ ਨ ਅਨਾਗਾਮੀ…ਪੇ… ਏਕਦੇਸਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਏਕਦੇਸਂ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਗ੍ਗਦਸ੍ਸਨੇਨ ਕਿਂ ਜਹਤੀਤਿ? ਤਦੇਕਟ੍ਠੇ ਚ ਕਿਲੇਸੇ ਜਹਤੀਤਿ. ਏਕਦੇਸਂ ਅਨਾਗਾਮੀ, ਏਕਦੇਸਂ ਨ ਅਨਾਗਾਮੀ, ਏਕਦੇਸਂ ਅਨਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਅਨ੍ਤਰਾਪਰਿਨਿਬ੍ਬਾਯੀ, ਉਪਹਚ੍ਚਪਰਿਨਿਬ੍ਬਾਯੀ, ਅਸਙ੍ਖਾਰਪਰਿਨਿਬ੍ਬਾਯੀ, ਸਸਙ੍ਖਾਰਪਰਿਨਿਬ੍ਬਾਯੀ, ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਏਕਦੇਸਂ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੨੭੭. ਅਰਹਤ੍ਤਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਦਸ੍ਸਨੇਨ ਕਿਂ ਜਹਤੀਤਿ? ਰੂਪਰਾਗਂ ਅਰੂਪਰਾਗਂ ਮਾਨਂ ਉਦ੍ਧਚ੍ਚਂ ਅਵਿਜ੍ਜਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਅਰਹਾ, ਏਕਦੇਸਂ ਨ ਅਰਹਾ, ਏਕਦੇਸਂ ਅਰਹਤ੍ਤਪ੍ਪਤ੍ਤੋ [ਅਰਹਤ੍ਤਂ ਪਤ੍ਤੋ (?)] ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਵੀਤਰਾਗੋ ਵੀਤਦੋਸੋ ਵੀਤਮੋਹੋ ਕਤਕਰਣੀਯੋ ਓਹਿਤਭਾਰੋ ਅਨੁਪ੍ਪਤ੍ਤਸਦਤ੍ਥੋ ਪਰਿਕ੍ਖੀਣਭਵਸਂਯੋਜਨੋ ਸਮ੍ਮਦਞ੍ਞਾਵਿਮੁਤ੍ਤੋ ਉਕ੍ਖਿਤ੍ਤਪਲਿਘੋ ਸਙ੍ਕਿਣ੍ਣਪਰਿਖੋ ਅਬ੍ਬੂਲ਼੍ਹੇਸਿਕੋ ਨਿਰਗ੍ਗਲ਼ੋ ਅਰਿਯੋ ਪਨ੍ਨਦ੍ਧਜੋ ਪਨ੍ਨਭਾਰੋ ਵਿਸਞ੍ਞੁਤ੍ਤੋ ਸੁਵਿਜਿਤਵਿਜਯੋ, ਦੁਕ੍ਖਂ ਤਸ੍ਸ ਪਰਿਞ੍ਞਾਤਂ, ਸਮੁਦਯੋ ਪਹੀਨੋ, ਨਿਰੋਧੋ ਸਚ੍ਛਿਕਤੋ, ਮਗ੍ਗੋ ਭਾਵਿਤੋ, ਅਭਿਞ੍ਞੇਯ੍ਯਂ ਅਭਿਞ੍ਞਾਤਂ, ਪਰਿਞ੍ਞੇਯ੍ਯਂ ਪਰਿਞ੍ਞਾਤਂ, ਪਹਾਤਬ੍ਬਂ ਪਹੀਨਂ, ਭਾਵੇਤਬ੍ਬਂ ਭਾਵਿਤਂ, ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, (ਏਕਦੇਸਂ ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ,) [( ) (?)] ਏਕਦੇਸਂ ਸਚ੍ਛਿਕਾਤਬ੍ਬਂ ਨ ਸਚ੍ਛਿਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮੁਦਯਦਸ੍ਸਨੇਨ ਕਿਂ ਜਹਤੀਤਿ? ਰੂਪਰਾਗਂ ਅਰੂਪਰਾਗਂ ਜਹਤਿ, ਮਾਨਂ ਉਦ੍ਧਚ੍ਚਂ ਅਵਿਜ੍ਜਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਅਰਹਾ, ਏਕਦੇਸਂ ਨ ਅਰਹਾ…ਪੇ… ਏਕਦੇਸਂ ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਏਕਦੇਸਂ ਸਚ੍ਛਿਕਾਤਬ੍ਬਂ ਨ ਸਚ੍ਛਿਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਰੋਧਦਸ੍ਸਨੇਨ ਕਿਂ ਜਹਤੀਤਿ? ਮਾਨਂ ਜਹਤਿ, ਉਦ੍ਧਚ੍ਚਂ ਅਵਿਜ੍ਜਂ ਤਦੇਕਟ੍ਠੇ ਚ ਕਿਲੇਸੇ ਏਕਦੇਸੇ ਜਹਤੀਤਿ. ਏਕਦੇਸਂ ਅਰਹਾ, ਏਕਦੇਸਂ ਨ ਅਰਹਾ …ਪੇ… ਏਕਦੇਸਂ ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਏਕਦੇਸਂ ਸਚ੍ਛਿਕਾਤਬ੍ਬਂ ਨ ਸਚ੍ਛਿਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਗ੍ਗਦਸ੍ਸਨੇਨ ਕਿਂ ਜਹਤੀਤਿ? ਉਦ੍ਧਚ੍ਚਂ ਅਵਿਜ੍ਜਂ ਤਦੇਕਟ੍ਠੇ ਚ ਕਿਲੇਸੇ ਜਹਤੀਤਿ. ਏਕਦੇਸਂ ਅਰਹਾ, ਏਕਦੇਸਂ ਨ ਅਰਹਾ, ਏਕਦੇਸਂ ਅਰਹਤ੍ਤਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਏਕਦੇਸਂ ਵੀਤਰਾਗੋ ਵੀਤਦੋਸੋ ਵੀਤਮੋਹੋ ਕਤਕਰਣੀਯੋ ਓਹਿਤਭਾਰੋ ਅਨੁਪ੍ਪਤ੍ਤਸਦਤ੍ਥੋ ਪਰਿਕ੍ਖੀਣਭਵਸਂਯੋਜਨੋ ਸਮ੍ਮਦਞ੍ਞਾਵਿਮੁਤ੍ਤੋ ਉਕ੍ਖਿਤ੍ਤਪਲਿਘੋ ਸਙ੍ਕਿਣ੍ਣਪਰਿਖੋ ਅਬ੍ਬੂਲ਼੍ਹੇਸਿਕੋ ਨਿਰਗ੍ਗਲ਼ੋ ਅਰਿਯੋ ਪਨ੍ਨਦ੍ਧਜੋ ਪਨ੍ਨਭਾਰੋ ਵਿਸਞ੍ਞੁਤ੍ਤੋ ਸੁਵਿਜਿਤਵਿਜਯੋ, ਦੁਕ੍ਖਂ ਤਸ੍ਸ ਪਰਿਞ੍ਞਾਤਂ, ਸਮੁਦਯੋ ਪਹੀਨੋ, ਨਿਰੋਧੋ ਸਚ੍ਛਿਕਤੋ, ਮਗ੍ਗੋ ਭਾਵਿਤੋ, ਅਭਿਞ੍ਞੇਯ੍ਯਂ ਅਭਿਞ੍ਞਾਤਂ, ਪਰਿਞ੍ਞੇਯ੍ਯਂ ਪਰਿਞ੍ਞਾਤਂ, ਪਹਾਤਬ੍ਬਂ ਪਹੀਨਂ, ਭਾਵੇਤਬ੍ਬਂ ਭਾਵਿਤਂ, ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਏਕਦੇਸਂ ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਏਕਦੇਸਂ ਸਚ੍ਛਿਕਾਤਬ੍ਬਂ ਨ ਸਚ੍ਛਿਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੨੭੮. ਨ ਵਤ੍ਤਬ੍ਬਂ – ‘‘ਓਧਿਸੋਧਿਸੋ ਕਿਲੇਸੇ ਜਹਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਅਨੁਪੁਬ੍ਬੇਨ ਮੇਧਾਵੀ, ਥੋਕਂ ਥੋਕਂ ਖਣੇ ਖਣੇ;

ਕਮ੍ਮਾਰੋ ਰਜਤਸ੍ਸੇਵ, ਨਿਦ੍ਧਮੇ ਮਲਮਤ੍ਤਨੋ’’ਤਿ [ਧ. ਪ. ੨੩੯ ਧਮ੍ਮਪਦੇ].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਓਧਿਸੋਧਿਸੋ ਕਿਲੇਸੇ ਜਹਤੀ’’ਤਿ.

ਓਧਿਸੋਧਿਸੋ ਕਿਲੇਸੇ ਜਹਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਸਹਾਵਸ੍ਸ ਦਸ੍ਸਨਸਮ੍ਪਦਾਯ,

ਤਯਸ੍ਸੁ ਧਮ੍ਮਾ ਜਹਿਤਾ ਭਵਨ੍ਤਿ;

ਸਕ੍ਕਾਯਦਿਟ੍ਠੀ ਵਿਚਿਕਿਚ੍ਛਿਤਞ੍ਚ,

ਸੀਲਬ੍ਬਤਂ ਵਾਪਿ ਯਦਤ੍ਥਿ ਕਿਞ੍ਚਿ;

ਚਤੂਹਪਾਯੇਹਿ ਚ ਵਿਪ੍ਪਮੁਤ੍ਤੋ,

ਛਚ੍ਚਾਭਿਠਾਨਾਨਿ ਅਭਬ੍ਬ [ਅਭਬ੍ਬੋ (ਸੀ. ਸ੍ਯਾ.)] ਕਾਤੁ’’ਨ੍ਤਿ [ਖੁ. ਪਾ. ੬.੧੦; ਸੁ. ਨਿ. ੨੩੩].

ਓਧਿਸੋਧਿਸੋ ਕਿਲੇਸੇ ਜਹਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਯਸ੍ਮਿਂ, ਭਿਕ੍ਖਵੇ, ਸਮਯੇ ਅਰਿਯਸਾਵਕਸ੍ਸ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’ਨ੍ਤਿ, ਸਹ ਦਸ੍ਸਨੁਪ੍ਪਾਦਾ, ਭਿਕ੍ਖਵੇ, ਅਰਿਯਸਾਵਕਸ੍ਸ ਤੀਣਿ ਸਂਯੋਜਨਾਨਿ ਪਹੀਯਨ੍ਤਿ – ਸਕ੍ਕਾਯਦਿਟ੍ਠਿ ਵਿਚਿਕਿਚ੍ਛਾ ਸੀਲਬ੍ਬਤਪਰਾਮਾਸੋ’’ਤਿ [ਅਙ੍ਗੁਤ੍ਤਰਨਿਕਾਯੇ]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਓਧਿਸੋਧਿਸੋ ਕਿਲੇਸੇ ਜਹਤੀ’’ਤਿ.

ਓਧਿਸੋਕਥਾ ਨਿਟ੍ਠਿਤਾ.