੪. ਜਹਤਿਕਥਾ

੧. ਨਸੁਤ੍ਤਾਹਰਣਕਥਾ

੨੭੯. ਜਹਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦਨ੍ਤਿ? ਆਮਨ੍ਤਾ. ਅਚ੍ਚਨ੍ਤਂ ਜਹਤਿ, ਅਨਵਸੇਸਂ ਜਹਤਿ, ਅਪ੍ਪਟਿਸਨ੍ਧਿਯਂ ਜਹਤਿ, ਸਮੂਲਂ ਜਹਤਿ, ਸਤਣ੍ਹਂ ਜਹਤਿ, ਸਾਨੁਸਯਂ ਜਹਤਿ, ਅਰਿਯੇਨ ਞਾਣੇਨ ਜਹਤਿ, ਅਰਿਯੇਨ ਮਗ੍ਗੇਨ ਜਹਤਿ, ਅਕੁਪ੍ਪਂ ਪਟਿਵਿਜ੍ਝਨ੍ਤੋ ਜਹਤਿ, ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਕ੍ਖਮ੍ਭੇਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦਨ੍ਤਿ? ਆਮਨ੍ਤਾ. ਅਚ੍ਚਨ੍ਤਂ ਵਿਕ੍ਖਮ੍ਭੇਤਿ, ਅਨਵਸੇਸਂ ਵਿਕ੍ਖਮ੍ਭੇਤਿ, ਅਪ੍ਪਟਿਸਨ੍ਧਿਯਂ ਵਿਕ੍ਖਮ੍ਭੇਤਿ, ਸਮੂਲਂ ਵਿਕ੍ਖਮ੍ਭੇਤਿ, ਸਤਣ੍ਹਂ ਵਿਕ੍ਖਮ੍ਭੇਤਿ, ਸਾਨੁਸਯਂ ਵਿਕ੍ਖਮ੍ਭੇਤਿ, ਅਰਿਯੇਨ ਞਾਣੇਨ ਵਿਕ੍ਖਮ੍ਭੇਤਿ, ਅਰਿਯੇਨ ਮਗ੍ਗੇਨ ਵਿਕ੍ਖਮ੍ਭੇਤਿ, ਅਕੁਪ੍ਪਂ ਪਟਿਵਿਜ੍ਝਨ੍ਤੋ ਵਿਕ੍ਖਮ੍ਭੇਤਿ, ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਵਿਕ੍ਖਮ੍ਭੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਜਹਤਿ ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਕਾਮਰਾਗਬ੍ਯਾਪਾਦਂ, ਸੋ ਚ ਅਚ੍ਚਨ੍ਤਂ ਜਹਤਿ, ਅਨਵਸੇਸਂ ਜਹਤਿ…ਪੇ… ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਜਹਤੀਤਿ? ਆਮਨ੍ਤਾ. ਜਹਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦਂ, ਸੋ ਚ ਅਚ੍ਚਨ੍ਤਂ ਜਹਤਿ, ਅਨਵਸੇਸਂ ਜਹਤਿ…ਪੇ… ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਕ੍ਖਮ੍ਭੇਤਿ ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਕਾਮਰਾਗਬ੍ਯਾਪਾਦਂ, ਸੋ ਚ ਅਚ੍ਚਨ੍ਤਂ ਵਿਕ੍ਖਮ੍ਭੇਤਿ, ਅਨਵਸੇਸਂ ਵਿਕ੍ਖਮ੍ਭੇਤਿ…ਪੇ… ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਵਿਕ੍ਖਮ੍ਭੇਤੀਤਿ? ਆਮਨ੍ਤਾ. ਵਿਕ੍ਖਮ੍ਭੇਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦਂ, ਸੋ ਚ ਅਚ੍ਚਨ੍ਤਂ ਵਿਕ੍ਖਮ੍ਭੇਤਿ, ਅਨਵਸੇਸਂ ਵਿਕ੍ਖਮ੍ਭੇਤਿ …ਪੇ… ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਵਿਕ੍ਖਮ੍ਭੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਜਹਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦਂ, ਸੋ ਚ ਨ ਅਚ੍ਚਨ੍ਤਂ ਜਹਤਿ, ਨ ਅਨਵਸੇਸਂ ਜਹਤਿ…ਪੇ… ਨ ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਜਹਤੀਤਿ? ਆਮਨ੍ਤਾ. ਜਹਤਿ ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਕਾਮਰਾਗਬ੍ਯਾਪਾਦਂ, ਸੋ ਚ ਨ ਅਚ੍ਚਨ੍ਤਂ ਜਹਤਿ…ਪੇ… ਨ ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਕ੍ਖਮ੍ਭੇਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦਂ, ਸੋ ਚ ਨ ਅਚ੍ਚਨ੍ਤਂ ਵਿਕ੍ਖਮ੍ਭੇਤਿ, ਨ ਅਨਵਸੇਸਂ ਵਿਕ੍ਖਮ੍ਭੇਤਿ…ਪੇ… ਨ ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਵਿਕ੍ਖਮ੍ਭੇਤੀਤਿ? ਆਮਨ੍ਤਾ. ਵਿਕ੍ਖਮ੍ਭੇਤਿ ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਕਾਮਰਾਗਬ੍ਯਾਪਾਦਂ, ਸੋ ਚ ਨ ਅਚ੍ਚਨ੍ਤਂ ਵਿਕ੍ਖਮ੍ਭੇਤਿ, ਨ ਅਨਵਸੇਸਂ ਵਿਕ੍ਖਮ੍ਭੇਤਿ…ਪੇ… ਨ ਅਨਾਗਾਮਿਫਲਂ ਸਚ੍ਛਿਕਰੋਨ੍ਤੋ ਵਿਕ੍ਖਮ੍ਭੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਜਹਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦਨ੍ਤਿ? ਆਮਨ੍ਤਾ. ਕਤਮੇਨ ਮਗ੍ਗੇਨਾਤਿ? ਰੂਪਾਵਚਰੇਨ ਮਗ੍ਗੇਨਾਤਿ. ਰੂਪਾਵਚਰੋ ਮਗ੍ਗੋ ਨਿਯ੍ਯਾਨਿਕੋ ਖਯਗਾਮੀ ਬੋਧਗਾਮੀ ਅਪਚਯਗਾਮੀ ਅਨਾਸਵੋ ਅਸਂਯੋਜਨਿਯੋ ਅਗਨ੍ਥਨਿਯੋ ਅਨੋਘਨਿਯੋ ਅਯੋਗਨਿਯੋ ਅਨੀਵਰਣਿਯੋ ਅਪਰਾਮਟ੍ਠੋ ਅਨੁਪਾਦਾਨਿਯੋ ਅਸਂਕਿਲੇਸਿਯੋਤਿ? ਨ ਹੇਵਂ ਵਤ੍ਤਬ੍ਬੇ. ਨਨੁ ਰੂਪਾਵਚਰੋ ਮਗ੍ਗੋ ਅਨਿਯ੍ਯਾਨਿਕੋ ਨ ਖਯਗਾਮੀ ਨ ਬੋਧਗਾਮੀ ਨ ਅਪਚਯਗਾਮੀ ਸਾਸਵੋ ਸਂਯੋਜਨਿਯੋ…ਪੇ… ਸਂਕਿਲੇਸਿਯੋਤਿ? ਆਮਨ੍ਤਾ. ਹਞ੍ਚਿ ਰੂਪਾਵਚਰੋ ਮਗ੍ਗੋ ਅਨਿਯ੍ਯਾਨਿਕੋ ਨ ਖਯਗਾਮੀ…ਪੇ… ਸਂਕਿਲੇਸਿਯੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਜਹਤਿ ਪੁਥੁਜ੍ਜਨੋ ਰੂਪਾਵਚਰੇਨ ਮਗ੍ਗੇਨ ਕਾਮਰਾਗਬ੍ਯਾਪਾਦ’’ਨ੍ਤਿ.

ਜਹਤਿ ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਅਨਾਗਾਮਿਮਗ੍ਗੇਨ ਕਾਮਰਾਗਬ੍ਯਾਪਾਦਂ, ਸੋ ਚ ਮਗ੍ਗੋ ਨਿਯ੍ਯਾਨਿਕੋ ਖਯਗਾਮੀ ਬੋਧਗਾਮੀ ਅਪਚਯਗਾਮੀ ਅਨਾਸਵੋ…ਪੇ… ਅਸਂਕਿਲੇਸਿਯੋਤਿ? ਆਮਨ੍ਤਾ. ਜਹਤਿ ਪੁਥੁਜ੍ਜਨੋ ਰੂਪਾਵਚਰੇਨ ਮਗ੍ਗੇਨ ਕਾਮਰਾਗਬ੍ਯਾਪਾਦਂ, ਸੋ ਚ ਮਗ੍ਗੋ ਨਿਯ੍ਯਾਨਿਕੋ ਖਯਗਾਮੀ ਬੋਧਗਾਮੀ ਅਪਚਯਗਾਮੀ ਅਨਾਸਵੋ…ਪੇ… ਅਸਂਕਿਲੇਸਿਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਜਹਤਿ ਪੁਥੁਜ੍ਜਨੋ ਰੂਪਾਵਚਰੇਨ ਮਗ੍ਗੇਨ ਕਾਮਰਾਗਬ੍ਯਾਪਾਦਂ, ਸੋ ਚ ਮਗ੍ਗੋ ਅਨਿਯ੍ਯਾਨਿਕੋ ਨ ਖਯਗਾਮੀ ਨ ਬੋਧਗਾਮੀ ਨ ਅਪਚਯਗਾਮੀ ਸਾਸਵੋ…ਪੇ… ਸਂਕਿਲੇਸਿਯੋਤਿ? ਆਮਨ੍ਤਾ. ਜਹਤਿ ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਅਨਾਗਾਮਿਮਗ੍ਗੇਨ ਕਾਮਰਾਗਬ੍ਯਾਪਾਦਂ, ਸੋ ਚ ਮਗ੍ਗੋ ਅਨਿਯ੍ਯਾਨਿਕੋ ਨ ਖਯਗਾਮੀ ਨ ਬੋਧਗਾਮੀ ਨ ਅਪਚਯਗਾਮੀ ਸਾਸਵੋ…ਪੇ… ਸਂਕਿਲੇਸਿਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੨੮੦. ਪੁਥੁਜ੍ਜਨੋ ਕਾਮੇਸੁ ਵੀਤਰਾਗੋ ਸਹ ਧਮ੍ਮਾਭਿਸਮਯਾ ਅਨਾਗਾਮਿਫਲੇ ਸਣ੍ਠਾਤੀਤਿ? ਆਮਨ੍ਤਾ. ਅਰਹਤ੍ਤੇ ਸਣ੍ਠਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪੁਥੁਜ੍ਜਨੋ ਕਾਮੇਸੁ ਵੀਤਰਾਗੋ ਸਹ ਧਮ੍ਮਾਭਿਸਮਯਾ ਅਨਾਗਾਮਿਫਲੇ ਸਣ੍ਠਾਤੀਤਿ? ਆਮਨ੍ਤਾ. ਅਪੁਬ੍ਬਂ ਅਚਰਿਮਂ ਤਯੋ ਮਗ੍ਗੇ ਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਪੁਬ੍ਬਂ ਅਚਰਿਮਂ ਤਯੋ ਮਗ੍ਗੇ ਭਾਵੇਤੀਤਿ? ਆਮਨ੍ਤਾ. ਅਪੁਬ੍ਬਂ ਅਚਰਿਮਂ ਤੀਣਿ ਸਾਮਞ੍ਞਫਲਾਨਿ ਸਚ੍ਛਿਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਪੁਬ੍ਬਂ ਅਚਰਿਮਂ ਤੀਣਿ ਸਾਮਞ੍ਞਫਲਾਨਿ ਸਚ੍ਛਿਕਰੋਤੀਤਿ? ਆਮਨ੍ਤਾ. ਤਿਣ੍ਣਂ ਫਸ੍ਸਾਨਂ ਤਿਸ੍ਸਨ੍ਨਂ ਵੇਦਨਾਨਂ ਤਿਸ੍ਸਨ੍ਨਂ ਸਞ੍ਞਾਨਂ ਤਿਸ੍ਸਨ੍ਨਂ ਚੇਤਨਾਨਂ ਤਿਣ੍ਣਂ ਚਿਤ੍ਤਾਨਂ ਤਿਸ੍ਸਨ੍ਨਂ ਸਦ੍ਧਾਨਂ ਤਿਣ੍ਣਂ ਵੀਰਿਯਾਨਂ ਤਿਸ੍ਸਨ੍ਨਂ ਸਤੀਨਂ ਤਿਣ੍ਣਂ ਸਮਾਧੀਨਂ ਤਿਸ੍ਸਨ੍ਨਂ ਪਞ੍ਞਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪੁਥੁਜ੍ਜਨੋ ਕਾਮੇਸੁ ਵੀਤਰਾਗੋ ਸਹ ਧਮ੍ਮਾਭਿਸਮਯਾ ਅਨਾਗਾਮਿਫਲੇ ਸਣ੍ਠਾਤੀਤਿ? ਆਮਨ੍ਤਾ. ਸੋਤਾਪਤ੍ਤਿਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਕਦਾਗਾਮਿਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ. ਕਤਮੇਨ ਮਗ੍ਗੇਨਾਤਿ? ਅਨਾਗਾਮਿਮਗ੍ਗੇਨਾਤਿ. ਅਨਾਗਾਮਿਮਗ੍ਗੇਨ ਸਕ੍ਕਾਯਦਿਟ੍ਠਿਂ ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੨. ਸੁਤ੍ਤਾਹਰਣਕਥਾ

੨੮੧. ਅਨਾਗਾਮਿਮਗ੍ਗੇਨ ਸਕ੍ਕਾਯਦਿਟ੍ਠਿਂ ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਜਹਤੀਤਿ? ਆਮਨ੍ਤਾ. ਨਨੁ ਤਿਣ੍ਣਂ ਸਂਯੋਜਨਾਨਂ ਪਹਾਨਾ ਸੋਤਾਪਤ੍ਤਿਫਲਂ ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਤਿਣ੍ਣਂ ਸਂਯੋਜਨਾਨਂ ਪਹਾਨਾ ਸੋਤਾਪਤ੍ਤਿਫਲਂ ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਾਮਿਮਗ੍ਗੇਨ ਸਕ੍ਕਾਯਦਿਟ੍ਠਿਂ ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਜਹਤੀ’’ਤਿ. ਅਨਾਗਾਮਿਮਗ੍ਗੇਨ ਓਲ਼ਾਰਿਕਂ ਕਾਮਰਾਗਂ ਓਲ਼ਾਰਿਕਂ ਬ੍ਯਾਪਾਦਂ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਾਗਾਮਿਮਗ੍ਗੇਨ ਓਲ਼ਾਰਿਕਂ ਕਾਮਰਾਗਂ ਓਲ਼ਾਰਿਕਂ ਬ੍ਯਾਪਾਦਂ ਜਹਤੀਤਿ? ਆਮਨ੍ਤਾ. ਨਨੁ ਕਾਮਰਾਗਬ੍ਯਾਪਾਦਾਨਂ ਤਨੁਭਾਵਾ ਸਕਦਾਗਾਮਿਫਲਂ ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਕਾਮਰਾਗਬ੍ਯਾਪਾਦਾਨਂ ਤਨੁਭਾਵਾ ਸਕਦਾਗਾਮਿਫਲਂ ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਾਮਿਮਗ੍ਗੇਨ ਓਲ਼ਾਰਿਕਂ ਕਾਮਰਾਗਂ ਓਲ਼ਾਰਿਕਂ ਬ੍ਯਾਪਾਦਂ ਜਹਤੀ’’ਤਿ.

ਪੁਥੁਜ੍ਜਨੋ ਕਾਮੇਸੁ ਵੀਤਰਾਗੋ ਸਹ ਧਮ੍ਮਾਭਿਸਮਯਾ ਅਨਾਗਾਮਿਫਲੇ ਸਣ੍ਠਾਤੀਤਿ? ਆਮਨ੍ਤਾ. ਯੇ ਕੇਚਿ ਧਮ੍ਮਂ ਅਭਿਸਮੇਨ੍ਤਿ, ਸਬ੍ਬੇ ਤੇ ਸਹ ਧਮ੍ਮਾਭਿਸਮਯਾ ਅਨਾਗਾਮਿਫਲੇ ਸਣ੍ਠਹਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ – ‘‘ਜਹਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦ’’ਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਅਹੇਸੁਂ ਤੇ [ਅਹਿਂਸਕਾ (ਅ. ਨਿ. ੬.੫੪)] ਅਤੀਤਂਸੇ, ਛ ਸਤ੍ਥਾਰੋ ਯਸਸ੍ਸਿਨੋ;

ਨਿਰਾਮਗਨ੍ਧਾ ਕਰੁਣੇਧਿਮੁਤ੍ਤਾ [ਕਰੁਣਾਧਿਮੁਤ੍ਤਾ (ਸੀ. ਕ.)], ਕਾਮਸਂਯੋਜਨਾਤਿਗਾ.

‘‘ਕਾਮਰਾਗਂ ਵਿਰਾਜੇਤ੍ਵਾ, ਬ੍ਰਹ੍ਮਲੋਕੂਪਗਾ ਅਹੁ;

ਅਹੇਸੁਂ ਸਾਵਕਾ ਤੇਸਂ, ਅਨੇਕਾਨਿ ਸਤਾਨਿਪਿ.

‘‘ਨਿਰਾਮਗਨ੍ਧਾ ਕਰੁਣੇਧਿਮੁਤ੍ਤਾ, ਕਾਮਸਂਯੋਜਨਾਤਿਗਾ;

ਕਾਮਰਾਗਂ ਵਿਰਾਜੇਤ੍ਵਾ, ਬ੍ਰਹ੍ਮਲੋਕੂਪਗਾ ਅਹੂ’’ਤਿ [ਅ. ਨਿ. ੬.੫੪].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਜਹਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦਨ੍ਤਿ.

ਜਹਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸੋ ਹਿ ਨਾਮ, ਭਿਕ੍ਖਵੇ, ਸੁਨੇਤ੍ਤੋ ਸਤ੍ਥਾ ਏਵਂ ਦੀਘਾਯੁਕੋ ਸਮਾਨੋ ਏਵਂ ਚਿਰਟ੍ਠਿਤਿਕੋ ਅਪਰਿਮੁਤ੍ਤੋ ਅਹੋਸਿ ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਅਪਰਿਮੁਤ੍ਤੋ ਦੁਕ੍ਖਸ੍ਮਾਤਿ ਵਦਾਮਿ. ਤਂ ਕਿਸ੍ਸ ਹੇਤੁ? ਚਤੁਨ੍ਨਂ ਧਮ੍ਮਾਨਂ ਅਨਨੁਬੋਧਾ ਅਪ੍ਪਟਿਵੇਧਾ. ਕਤਮੇਸਂ ਚਤੁਨ੍ਨਂ? ਅਰਿਯਸ੍ਸ ਸੀਲਸ੍ਸ ਅਨਨੁਬੋਧਾ ਅਪ੍ਪਟਿਵੇਧਾ, ਅਰਿਯਸ੍ਸ ਸਮਾਧਿਸ੍ਸ, ਅਰਿਯਾਯ ਪਞ੍ਞਾਯ, ਅਰਿਯਾਯ ਵਿਮੁਤ੍ਤਿਯਾ ਅਨਨੁਬੋਧਾ ਅਪ੍ਪਟਿਵੇਧਾ. ਤਯਿਦਂ, ਭਿਕ੍ਖਵੇ, ਅਰਿਯਂ ਸੀਲਂ ਅਨੁਬੁਦ੍ਧਂ ਪਟਿਵਿਦ੍ਧਂ, ਅਰਿਯੋ ਸਮਾਧਿ ਅਨੁਬੁਦ੍ਧੋ ਪਟਿਵਿਦ੍ਧੋ, ਅਰਿਯਾ ਪਞ੍ਞਾ ਅਨੁਬੁਦ੍ਧਾ ਪਟਿਵਿਦ੍ਧਾ, ਅਰਿਯਾ ਵਿਮੁਤ੍ਤਿ ਅਨੁਬੁਦ੍ਧਾ ਪਟਿਵਿਦ੍ਧਾ, ਉਚ੍ਛਿਨ੍ਨਾ ਭਵਤਣ੍ਹਾ, ਖੀਣਾ ਭਵਨੇਤ੍ਤਿ, ਨਤ੍ਥਿ ਦਾਨਿ ਪੁਨਬ੍ਭਵੋਤਿ.

‘‘ਸੀਲਂ ਸਮਾਧਿ ਪਞ੍ਞਾ ਚ, ਵਿਮੁਤ੍ਤਿ ਚ ਅਨੁਤ੍ਤਰਾ;

ਅਨੁਬੁਦ੍ਧਾ ਇਮੇ ਧਮ੍ਮਾ, ਗੋਤਮੇਨ ਯਸਸ੍ਸਿਨਾ.

‘‘ਇਤਿ ਬੁਦ੍ਧੋ ਅਭਿਞ੍ਞਾਯ, ਧਮ੍ਮਮਕ੍ਖਾਸਿ ਭਿਕ੍ਖੁਨਂ;

ਦੁਕ੍ਖਸ੍ਸਨ੍ਤਕਰੋ ਸਤ੍ਥਾ, ਚਕ੍ਖੁਮਾ ਪਰਿਨਿਬ੍ਬੁਤੋ’’ਤਿ [ਅ. ਨਿ. ੭.੬੬].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਜਹਤਿ ਪੁਥੁਜ੍ਜਨੋ ਕਾਮਰਾਗਬ੍ਯਾਪਾਦ’’ਨ੍ਤਿ.

ਜਹਤਿਕਥਾ ਨਿਟ੍ਠਿਤਾ.