੨੧. ਏਕਵੀਸਤਿਮਵਗ੍ਗੋ

(੨੦੭) ੮. ਕਮ੍ਮਕਥਾ

੮੮੯. ਸਬ੍ਬੇ ਕਮ੍ਮਾ ਨਿਯਤਾਤਿ? ਆਮਨ੍ਤਾ. ਮਿਚ੍ਛਤ੍ਤਨਿਯਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮ੍ਮਤ੍ਤਨਿਯਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਅਨਿਯਤੋ ਰਾਸੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਤ੍ਥਿ ਅਨਿਯਤੋ ਰਾਸੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਅਨਿਯਤੋ ਰਾਸਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬੇ ਕਮ੍ਮਾ ਨਿਯਤਾ’’ਤਿ.

ਸਬ੍ਬੇ ਕਮ੍ਮਾ ਨਿਯਤਾਤਿ? ਆਮਨ੍ਤਾ. ਨਨੁ ਤਯੋ ਰਾਸੀ ਵੁਤ੍ਤਾ ਭਗਵਤਾ – ਮਿਚ੍ਛਤ੍ਤਨਿਯਤੋ ਰਾਸਿ, ਸਮ੍ਮਤ੍ਤਨਿਯਤੋ ਰਾਸਿ, ਅਨਿਯਤੋ ਰਾਸੀਤਿ? ਆਮਨ੍ਤਾ. ਹਞ੍ਚਿ ਤਯੋ ਰਾਸੀ ਵੁਤ੍ਤਾ ਭਗਵਤਾ – ਮਿਚ੍ਛਤ੍ਤਨਿਯਤੋ ਰਾਸਿ, ਸਮ੍ਮਤ੍ਤਨਿਯਤੋ ਰਾਸਿ, ਅਨਿਯਤੋ ਰਾਸਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬੇ ਕਮ੍ਮਾ ਨਿਯਤਾ’’ਤਿ.

੮੯੦. ਦਿਟ੍ਠਧਮ੍ਮਵੇਦਨੀਯਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਟ੍ਠੇਨ ਨਿਯਤਨ੍ਤਿ? ਆਮਨ੍ਤਾ. ਮਿਚ੍ਛਤ੍ਤਨਿਯਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮ੍ਮਤ੍ਤਨਿਯਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਉਪਪਜ੍ਜਵੇਦਨੀਯਂ ਕਮ੍ਮਂ…ਪੇ… ਅਪਰਾਪਰਿਯਵੇਦਨੀਯਂ ਕਮ੍ਮਂ ਅਪਰਾਪਰਿਯਵੇਦਨੀਯਟ੍ਠੇਨ ਨਿਯਤਨ੍ਤਿ? ਆਮਨ੍ਤਾ. ਮਿਚ੍ਛਤ੍ਤਨਿਯਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮ੍ਮਤ੍ਤਨਿਯਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੯੧. ਨ ਵਤ੍ਤਬ੍ਬਂ – ਦਿਟ੍ਠਧਮ੍ਮਵੇਦਨੀਯਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਟ੍ਠੇਨ ਨਿਯਤਂ, ਉਪਪਜ੍ਜਵੇਦਨੀਯਂ ਕਮ੍ਮਂ…ਪੇ… ਅਪਰਾਪਰਿਯਵੇਦਨੀਯਂ ਕਮ੍ਮਂ ਅਪਰਾਪਰਿਯਵੇਦਨੀਯਟ੍ਠੇਨ ਨਿਯਤਨ੍ਤਿ? ਆਮਨ੍ਤਾ. ਦਿਟ੍ਠਧਮ੍ਮਵੇਦਨੀਯਂ ਕਮ੍ਮਂ ਉਪਪਜ੍ਜਵੇਦਨੀਯਂ ਹੋਤਿ, ਅਪਰਾਪਰਿਯਵੇਦਨੀਯਂ ਹੋਤਿ…ਪੇ… ਉਪਪਜ੍ਜਵੇਦਨੀਯਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ ਹੋਤਿ, ਅਪਰਾਪਰਿਯਵੇਦਨੀਯਂ ਹੋਤਿ…ਪੇ… ਅਪਰਾਪਰਿਯਵੇਦਨੀਯਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ ਹੋਤਿ, ਉਪਪਜ੍ਜਵੇਦਨੀਯਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਦਿਟ੍ਠਧਮ੍ਮਵੇਦਨੀਯਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਟ੍ਠੇਨ ਨਿਯਤਂ, ਉਪਪਜ੍ਜਵੇਦਨੀਯਂ ਕਮ੍ਮਂ…ਪੇ… ਅਪਰਾਪਰਿਯਵੇਦਨੀਯਂ ਕਮ੍ਮਂ ਅਪਰਾਪਰਿਯਵੇਦਨੀਯਟ੍ਠੇਨ ਨਿਯਤਨ੍ਤਿ.

ਕਮ੍ਮਕਥਾ ਨਿਟ੍ਠਿਤਾ.

ਏਕਵੀਸਤਿਮਵਗ੍ਗੋ.

ਤਸ੍ਸੁਦ੍ਦਾਨਂ –

ਸਾਸਨਂ ਨਵਂ ਕਤਂ ਅਤ੍ਥਿ ਕੋਚਿ ਤਥਾਗਤਸ੍ਸ ਸਾਸਨਂ ਨਵਂ ਕਰੋਤਿ ਲਬ੍ਭਾ ਤਥਾਗਤਸ੍ਸ ਸਾਸਨਂ ਪੁਨ ਨਵਂ ਕਾਤੁਂ, ਪੁਥੁਜ੍ਜਨੋ ਤੇਧਾਤੁਕੇਹਿ ਧਮ੍ਮੇਹਿ ਅਵਿਵਿਤ੍ਤੋ, ਅਤ੍ਥਿ ਕਿਞ੍ਚਿ ਸਂਯੋਜਨਂ ਅਪ੍ਪਹਾਯ ਅਰਹਤ੍ਤਪ੍ਪਤ੍ਤਿ, ਅਤ੍ਥਿ ਅਧਿਪ੍ਪਾਯਿਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾ, ਅਤ੍ਥਿ ਬੁਦ੍ਧਾਨਂ ਬੁਦ੍ਧੇਹਿ ਹੀਨਾਤਿਰੇਕਤਾ, ਸਬ੍ਬਾ ਦਿਸਾ ਬੁਦ੍ਧਾ ਤਿਟ੍ਠਨ੍ਤਿ, ਸਬ੍ਬੇ ਧਮ੍ਮਾ ਨਿਯਤਾ, ਸਬ੍ਬੇ ਕਮ੍ਮਾ ਨਿਯਤਾਤਿ.