੨੧. ਏਕਵੀਸਤਿਮਵਗ੍ਗੋ

(੨੦੫) ੬. ਸਬ੍ਬਦਿਸਾਕਥਾ

੮੮੬. ਸਬ੍ਬਾ ਦਿਸਾ ਬੁਦ੍ਧਾ ਤਿਟ੍ਠਨ੍ਤੀਤਿ? ਆਮਨ੍ਤਾ. ਪੁਰਤ੍ਥਿਮਾਯ ਦਿਸਾਯ ਬੁਦ੍ਧੋ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪੁਰਤ੍ਥਿਮਾਯ ਦਿਸਾਯ ਬੁਦ੍ਧੋ ਤਿਟ੍ਠਤੀਤਿ? ਆਮਨ੍ਤਾ. ਕਿਨ੍ਨਾਮੋ ਸੋ ਭਗਵਾ, ਕਿਂਜਚ੍ਚੋ, ਕਿਂਗੋਤ੍ਤੋ, ਕਿਨ੍ਨਾਮਾ ਤਸ੍ਸ ਭਗਵਤੋ ਮਾਤਾਪਿਤਰੋ, ਕਿਨ੍ਨਾਮਂ ਤਸ੍ਸ ਭਗਵਤੋ ਸਾਵਕਯੁਗਂ, ਕੋਨਾਮੋ ਤਸ੍ਸ ਭਗਵਤੋ ਉਪਟ੍ਠਾਕੋ, ਕੀਦਿਸਂ ਚੀਵਰਂ ਧਾਰੇਤਿ, ਕੀਦਿਸਂ ਪਤ੍ਤਂ ਧਾਰੇਤਿ, ਕਤਰਸ੍ਮਿਂ ਗਾਮੇ ਵਾ ਨਿਗਮੇ ਵਾ ਨਗਰੇ ਵਾ ਰਟ੍ਠੇ ਵਾ ਜਨਪਦੇ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦਕ੍ਖਿਣਾਯ ਦਿਸਾਯ…ਪੇ… ਪਚ੍ਛਿਮਾਯ ਦਿਸਾਯ…ਪੇ… ਉਤ੍ਤਰਾਯ ਦਿਸਾਯ…ਪੇ… ਹੇਟ੍ਠਿਮਾਯ ਦਿਸਾਯ ਬੁਦ੍ਧੋ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਹੇਟ੍ਠਿਮਾਯ ਦਿਸਾਯ ਬੁਦ੍ਧੋ ਤਿਟ੍ਠਤੀਤਿ? ਆਮਨ੍ਤਾ. ਕਿਨ੍ਨਾਮੋ ਸੋ ਭਗਵਾ…ਪੇ… ਜਨਪਦੇ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਉਪਰਿਮਾਯ ਦਿਸਾਯ ਬੁਦ੍ਧੋ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਉਪਰਿਮਾਯ ਦਿਸਾਯ ਬੁਦ੍ਧੋ ਤਿਟ੍ਠਤੀਤਿ? ਆਮਨ੍ਤਾ. ਚਾਤੁਮਹਾਰਾਜਿਕੇ ਤਿਟ੍ਠਤਿ…ਪੇ… ਤਾਵਤਿਂਸੇ ਤਿਟ੍ਠਤਿ…ਪੇ… ਯਾਮੇ ਤਿਟ੍ਠਤਿ…ਪੇ… ਤੁਸਿਤੇ ਤਿਟ੍ਠਤਿ…ਪੇ… ਨਿਮ੍ਮਾਨਰਤਿਯਾ ਤਿਟ੍ਠਤਿ…ਪੇ… ਪਰਨਿਮ੍ਮਿਤਵਸਵਤ੍ਤਿਯਾ ਤਿਟ੍ਠਤਿ…ਪੇ… ਬ੍ਰਹ੍ਮਲੋਕੇ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਬ੍ਬਦਿਸਾਕਥਾ ਨਿਟ੍ਠਿਤਾ.