(੨੦੩) ੪. ਇਦ੍ਧਿਕਥਾ

੮੮੩. ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਆਮਨ੍ਤਾ. ‘‘ਨਿਚ੍ਚਪਣ੍ਣਾ ਰੁਕ੍ਖਾ ਹੋਨ੍ਤੂ’’ਤਿ – ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਿਚ੍ਚਪੁਪ੍ਫਾ ਰੁਕ੍ਖਾ ਹੋਨ੍ਤੁ…ਪੇ… ਨਿਚ੍ਚਫਲਿਕਾ ਰੁਕ੍ਖਾ ਹੋਨ੍ਤੁ… ਨਿਚ੍ਚਂ ਜੁਣ੍ਹਂ ਹੋਤੁ… ਨਿਚ੍ਚਂ ਖੇਮਂ ਹੋਤੁ… ਨਿਚ੍ਚਂ ਸੁਭਿਕ੍ਖਂ ਹੋਤੁ… ‘‘ਨਿਚ੍ਚਂ ਸੁਵਤ੍ਥਿ [ਸੁਵੁਟ੍ਠਿਕਂ (ਸ੍ਯਾ.)] ਹੋਤੂ’’ਤਿ – ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਆਮਨ੍ਤਾ. ‘‘ਉਪ੍ਪਨ੍ਨੋ ਫਸ੍ਸੋ ਮਾ ਨਿਰੁਜ੍ਝੀ’’ਤਿ – ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਉਪ੍ਪਨ੍ਨਾ ਵੇਦਨਾ…ਪੇ… ਸਞ੍ਞਾ… ਚੇਤਨਾ… ਚਿਤ੍ਤਂ… ਸਦ੍ਧਾ… ਵੀਰਿਯਂ… ਸਤਿ… ਸਮਾਧਿ…ਪੇ… ਪਞ੍ਞਾ ਮਾ ਨਿਰੁਜ੍ਝੀਤਿ – ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਆਮਨ੍ਤਾ. ‘‘ਰੂਪਂ ਨਿਚ੍ਚਂ ਹੋਤੂ’’ਤਿ – ਅਤ੍ਥਿ ਅਧਿਪ੍ਪਾਯਇਦ੍ਧਿ… ਵੇਦਨਾ…ਪੇ… ਸਞ੍ਞਾ…ਪੇ… ਸਙ੍ਖਾਰਾ…ਪੇ… ‘‘ਵਿਞ੍ਞਾਣਂ ਨਿਚ੍ਚਂ ਹੋਤੂ’’ਤਿ – ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਆਮਨ੍ਤਾ. ‘‘ਜਾਤਿਧਮ੍ਮਾ ਸਤ੍ਤਾ ਮਾ ਜਾਯਿਂਸੂ’’ਤਿ ਅਤ੍ਥਿ…ਪੇ… ‘‘ਜਰਾਧਮ੍ਮਾ ਸਤ੍ਤਾ ਮਾ ਜੀਰਿਂਸੂ’’ਤਿ…ਪੇ… ‘‘ਬ੍ਯਾਧਿਧਮ੍ਮਾ ਸਤ੍ਤਾ ਮਾ ਬ੍ਯਾਧਿਯਿਂਸੂ’’ਤਿ…ਪੇ… ‘‘ਮਰਣਧਮ੍ਮਾ ਸਤ੍ਤਾ ਮਾ ਮੀਯਿਂਸੂ’’ਤਿ – ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੮੪. ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾ’’ਤਿ? ਆਮਨ੍ਤਾ. ਨਨੁ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਾਸਾਦਂ ‘‘ਸੁਵਣ੍ਣ’’ਨ੍ਤ੍ਵੇਵ ਅਧਿਮੁਚ੍ਚਿ, ਸੁਵਣ੍ਣੋ ਚ ਪਨ ਆਸੀਤਿ [ਪਾਰਾ. ੬੨੧; ਮਹਾਵ. ੨੭੧]? ਆਮਨ੍ਤਾ. ਹਞ੍ਚਿ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਾਸਾਦਂ ਸੁਵਣ੍ਣਨ੍ਤ੍ਵੇਵ ਅਧਿਮੁਚ੍ਚਿ, ਸੁਵਣ੍ਣੋ ਚ ਪਨ ਆਸਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਧਿਪ੍ਪਾਯਇਦ੍ਧਿ ਬੁਦ੍ਧਾਨਂ ਵਾ ਸਾਵਕਾਨਂ ਵਾ’’ਤਿ.

ਇਦ੍ਧਿਕਥਾ ਨਿਟ੍ਠਿਤਾ.