੨੧. ਏਕਵੀਸਤਿਮਵਗ੍ਗੋ

(੨੦੨) ੩. ਸਂਯੋਜਨਕਥਾ

੮੮੧. ਅਤ੍ਥਿ ਕਿਞ੍ਚਿ ਸਂਯੋਜਨਂ ਅਪ੍ਪਹਾਯ ਅਰਹਤ੍ਤਪ੍ਪਤ੍ਤੀਤਿ? ਆਮਨ੍ਤਾ. ਅਤ੍ਥਿ ਕਿਞ੍ਚਿ ਸਕ੍ਕਾਯਦਿਟ੍ਠਿਂ ਅਪ੍ਪਹਾਯ…ਪੇ… ਵਿਚਿਕਿਚ੍ਛਂ ਅਪ੍ਪਹਾਯ…ਪੇ… ਸੀਲਬ੍ਬਤਪਰਾਮਾਸਂ ਅਪ੍ਪਹਾਯ… ਰਾਗਂ ਅਪ੍ਪਹਾਯ… ਦੋਸਂ ਅਪ੍ਪਹਾਯ… ਮੋਹਂ ਅਪ੍ਪਹਾਯ… ਅਨੋਤ੍ਤਪ੍ਪਂ ਅਪ੍ਪਹਾਯ ਅਰਹਤ੍ਤਪ੍ਪਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਕਿਞ੍ਚਿ ਸਂਯੋਜਨਂ ਅਪ੍ਪਹਾਯ ਅਰਹਤ੍ਤਪ੍ਪਤ੍ਤੀਤਿ? ਆਮਨ੍ਤਾ. ਅਰਹਾ ਸਰਾਗੋ ਸਦੋਸੋ ਸਮੋਹੋ ਸਮਾਨੋ ਸਮਕ੍ਖੋ ਸਪਲ਼ਾਸੋ ਸਉਪਾਯਾਸੋ ਸਕਿਲੇਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਰਹਾ ਨਿਰਾਗੋ ਨਿਦ੍ਦੋਸੋ ਨਿਮ੍ਮੋਹੋ ਨਿਮ੍ਮਾਨੋ ਨਿਮ੍ਮਕ੍ਖੋ ਨਿਪ੍ਪਲ਼ਾਸੋ ਨਿਰੁਪਾਯਾਸੋ ਨਿਕ੍ਕਿਲੇਸੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨਿਰਾਗੋ…ਪੇ… ਨਿਕ੍ਕਿਲੇਸੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਕਿਞ੍ਚਿ ਸਂਯੋਜਨਂ ਅਪ੍ਪਹਾਯ ਅਰਹਤ੍ਤਪ੍ਪਤ੍ਤੀ’’ਤਿ.

੮੮੨. ਨ ਵਤ੍ਤਬ੍ਬਂ – ‘‘ਅਤ੍ਥਿ ਕਿਞ੍ਚਿ ਸਂਯੋਜਨਂ ਅਪ੍ਪਹਾਯ ਅਰਹਤ੍ਤਪ੍ਪਤ੍ਤੀ’’ਤਿ? ਆਮਨ੍ਤਾ. ਅਰਹਾ ਸਬ੍ਬਂ ਬੁਦ੍ਧਵਿਸਯਂ ਜਾਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਅਤ੍ਥਿ ਕਿਞ੍ਚਿ ਸਂਯੋਜਨਂ ਅਪ੍ਪਹਾਯ ਅਰਹਤ੍ਤਪ੍ਪਤ੍ਤੀਤਿ.

ਸਂਯੋਜਨਕਥਾ ਨਿਟ੍ਠਿਤਾ.