੧੯. ਏਕੂਨਵੀਸਤਿਮਵਗ੍ਗੋ

(੧੮੬) ੧. ਕਿਲੇਸਜਹਨਕਥਾ

੮੨੮. ਅਤੀਤੇ ਕਿਲੇਸੇ ਜਹਤੀਤਿ? ਆਮਨ੍ਤਾ. ਨਿਰੁਦ੍ਧਂ ਨਿਰੋਧੇਤਿ, ਵਿਗਤਂ ਵਿਗਮੇਤਿ, ਖੀਣਂ ਖੇਪੇਤਿ, ਅਤ੍ਥਙ੍ਗਤਂ ਅਤ੍ਥਙ੍ਗਮੇਤਿ, ਅਬ੍ਭਤ੍ਥਙ੍ਗਤਂ ਅਬ੍ਭਤ੍ਥਙ੍ਗਮੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤੀਤੇ ਕਿਲੇਸੇ ਜਹਤੀਤਿ? ਆਮਨ੍ਤਾ. ਨਨੁ ਅਤੀਤਂ ਨਿਰੁਦ੍ਧਨ੍ਤਿ? ਆਮਨ੍ਤਾ. ਹਞ੍ਚਿ ਅਤੀਤਂ ਨਿਰੁਦ੍ਧਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤੀਤੇ ਕਿਲੇਸੇ ਜਹਤੀ’’ਤਿ. ਅਤੀਤੇ ਕਿਲੇਸੇ ਜਹਤੀਤਿ? ਆਮਨ੍ਤਾ. ਨਨੁ ਅਤੀਤਂ ਨਤ੍ਥੀਤਿ? ਆਮਨ੍ਤਾ. ਹਞ੍ਚਿ ਅਤੀਤਂ ਨਤ੍ਥਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤੀਤੇ ਕਿਲੇਸੇ ਜਹਤੀ’’ਤਿ.

੮੨੯. ਅਨਾਗਤੇ ਕਿਲੇਸੇ ਜਹਤੀਤਿ? ਆਮਨ੍ਤਾ. ਅਜਾਤਂ ਅਜਨੇਤਿ, ਅਸਞ੍ਜਾਤਂ ਅਸਞ੍ਜਨੇਤਿ, ਅਨਿਬ੍ਬਤ੍ਤਂ ਅਨਿਬ੍ਬਤ੍ਤੇਤਿ, ਅਪਾਤੁਭੂਤਂ ਅਪਾਤੁਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਗਤੇ ਕਿਲੇਸੇ ਜਹਤੀਤਿ? ਆਮਨ੍ਤਾ. ਨਨੁ ਅਨਾਗਤਂ ਅਜਾਤਨ੍ਤਿ? ਆਮਨ੍ਤਾ. ਹਞ੍ਚਿ ਅਨਾਗਤਂ ਅਜਾਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਤੇ ਕਿਲੇਸੇ ਜਹਤੀ’’ਤਿ. ਅਨਾਗਤੇ ਕਿਲੇਸੇ ਜਹਤੀਤਿ? ਆਮਨ੍ਤਾ. ਨਨੁ ਅਨਾਗਤਂ ਨਤ੍ਥੀਤਿ? ਆਮਨ੍ਤਾ. ਹਞ੍ਚਿ ਅਨਾਗਤਂ ਨਤ੍ਥਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਤੇ ਕਿਲੇਸੇ ਜਹਤੀ’’ਤਿ.

੮੩੦. ਪਚ੍ਚੁਪ੍ਪਨ੍ਨੇ ਕਿਲੇਸੇ ਜਹਤੀਤਿ? ਆਮਨ੍ਤਾ. ਰਤ੍ਤੋ ਰਾਗਂ ਜਹਤਿ, ਦੁਟ੍ਠੋ ਦੋਸਂ ਜਹਤਿ, ਮੂਲ਼੍ਹੋ ਮੋਹਂ ਜਹਤਿ, ਕਿਲਿਟ੍ਠੋ ਕਿਲੇਸੇ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰਾਗੇਨ ਰਾਗਂ ਜਹਤਿ, ਦੋਸੇਨ ਦੋਸਂ ਜਹਤਿ, ਮੋਹੇਨ ਮੋਹਂ ਜਹਤਿ, ਕਿਲੇਸੇਹਿ ਕਿਲੇਸੇ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰਾਗੋ ਚਿਤ੍ਤਸਮ੍ਪਯੁਤ੍ਤੋ, ਮਗ੍ਗੋ ਚਿਤ੍ਤਸਮ੍ਪਯੁਤ੍ਤੋਤਿ? ਆਮਨ੍ਤਾ. ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰਾਗੋ ਅਕੁਸਲੋ, ਮਗ੍ਗੋ ਕੁਸਲੋਤਿ? ਆਮਨ੍ਤਾ. ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਸੁਵਿਦੂਰਵਿਦੂਰਾਨਿ! ਕਤਮਾਨਿ ਚਤ੍ਤਾਰਿ? ਨਭਞ੍ਚ, ਭਿਕ੍ਖਵੇ, ਪਥਵੀ ਚ – ਇਦਂ ਪਠਮਂ ਸੁਵਿਦੂਰਵਿਦੂਰਂ…ਪੇ… ਤਸ੍ਮਾ ਸਤਂ ਧਮ੍ਮੋ ਅਸਬ੍ਭਿ ਆਰਕਾ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਕੁਸਲਾਕੁਸਲਾ…ਪੇ… ਸਮ੍ਮੁਖੀਭਾਵਂ ਆਗਚ੍ਛਨ੍ਤੀ’’ਤਿ.

੮੩੧. ਨ ਵਤ੍ਤਬ੍ਬਂ – ‘‘ਅਤੀਤੇ ਕਿਲੇਸੇ ਜਹਤਿ, ਅਨਾਗਤੇ ਕਿਲੇਸੇ ਜਹਤਿ, ਪਚ੍ਚੁਪ੍ਪਨ੍ਨੇ ਕਿਲੇਸੇ ਜਹਤੀ’’ਤਿ? ਆਮਨ੍ਤਾ. ਨਤ੍ਥਿ ਕਿਲੇਸੇ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਅਤੀਤੇ ਕਿਲੇਸੇ ਜਹਤਿ, ਅਨਾਗਤੇ ਕਿਲੇਸੇ ਜਹਤਿ, ਪਚ੍ਚੁਪ੍ਪਨ੍ਨੇ ਕਿਲੇਸੇ ਜਹਤੀਤਿ.

ਕਿਲੇਸਜਹਨਕਥਾ ਨਿਟ੍ਠਿਤਾ.

੧੯. ਏਕੂਨਵੀਸਤਿਮਵਗ੍ਗੋ

(੧੮੭) ੨. ਸੁਞ੍ਞਤਾਕਥਾ

੮੩੨. ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾਤਿ? ਆਮਨ੍ਤਾ. ਅਨਿਮਿਤ੍ਤਂ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾਤਿ? ਆਮਨ੍ਤਾ. ਅਪ੍ਪਣਿਹਿਤੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਿਮਿਤ੍ਤਂ ਨ ਵਤ੍ਤਬ੍ਬਂ – ‘‘ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨ’’ਨ੍ਤਿ? ਆਮਨ੍ਤਾ. ਸੁਞ੍ਞਤਾ ਨ ਵਤ੍ਤਬ੍ਬਾ – ‘‘ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਪ੍ਪਣਿਹਿਤੋ ਨ ਵਤ੍ਤਬ੍ਬੋ – ‘‘ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ’’ਤਿ? ਆਮਨ੍ਤਾ. ਸੁਞ੍ਞਤਾ ਨ ਵਤ੍ਤਬ੍ਬਾ – ‘‘ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾਤਿ? ਆਮਨ੍ਤਾ. ਸਙ੍ਖਾਰਕ੍ਖਨ੍ਧੋ ਨ ਅਨਿਚ੍ਚੋ ਨ ਸਙ੍ਖਤੋ ਨ ਪਟਿਚ੍ਚਸਮੁਪ੍ਪਨ੍ਨੋ ਨ ਖਯਧਮ੍ਮੋ ਨ ਵਯਧਮ੍ਮੋ ਨ ਵਿਰਾਗਧਮ੍ਮੋ ਨ ਨਿਰੋਧਧਮ੍ਮੋ ਨ ਵਿਪਰਿਣਾਮਧਮ੍ਮੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸਙ੍ਖਾਰਕ੍ਖਨ੍ਧੋ ਅਨਿਚ੍ਚੋ ਸਙ੍ਖਤੋ ਪਟਿਚ੍ਚਸਮੁਪ੍ਪਨ੍ਨੋ ਖਯਧਮ੍ਮੋ ਵਯਧਮ੍ਮੋ ਵਿਰਾਗਧਮ੍ਮੋ ਨਿਰੋਧਧਮ੍ਮੋ ਵਿਪਰਿਣਾਮਧਮ੍ਮੋਤਿ? ਆਮਨ੍ਤਾ. ਹਞ੍ਚਿ ਸਙ੍ਖਾਰਕ੍ਖਨ੍ਧੋ ਅਨਿਚ੍ਚੋ…ਪੇ… ਵਿਪਰਿਣਾਮਧਮ੍ਮੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ’’ਤਿ.

੮੩੩. ਰੂਪਕ੍ਖਨ੍ਧਸ੍ਸ ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾਤਿ? ਆਮਨ੍ਤਾ. ਸਙ੍ਖਾਰਕ੍ਖਨ੍ਧਸ੍ਸ ਸੁਞ੍ਞਤਾ ਰੂਪਕ੍ਖਨ੍ਧਪਰਿਯਾਪਨ੍ਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾਕ੍ਖਨ੍ਧਸ੍ਸ…ਪੇ… ਸਞ੍ਞਾਕ੍ਖਨ੍ਧਸ੍ਸ… ਵਿਞ੍ਞਾਣਕ੍ਖਨ੍ਧਸ੍ਸ ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾਤਿ? ਆਮਨ੍ਤਾ. ਸਙ੍ਖਾਰਕ੍ਖਨ੍ਧਸ੍ਸ ਸੁਞ੍ਞਤਾ ਵਿਞ੍ਞਾਣਕ੍ਖਨ੍ਧਪਰਿਯਾਪਨ੍ਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਙ੍ਖਾਰਕ੍ਖਨ੍ਧਸ੍ਸ ਸੁਞ੍ਞਤਾ ਨ ਵਤ੍ਤਬ੍ਬਾ – ‘‘ਰੂਪਕ੍ਖਨ੍ਧਪਰਿਯਾਪਨ੍ਨਾ’’ਤਿ? ਆਮਨ੍ਤਾ. ਰੂਪਕ੍ਖਨ੍ਧਸ੍ਸ ਸੁਞ੍ਞਤਾ ਨ ਵਤ੍ਤਬ੍ਬਾ – ‘‘ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਕ੍ਖਨ੍ਧਸ੍ਸ ਸੁਞ੍ਞਤਾ ਨ ਵਤ੍ਤਬ੍ਬਾ – ‘‘ਵੇਦਨਾਕ੍ਖਨ੍ਧਪਰਿਯਾਪਨ੍ਨਾ…ਪੇ… ਸਞ੍ਞਾਕ੍ਖਨ੍ਧਪਰਿਯਾਪਨ੍ਨਾ… ਵਿਞ੍ਞਾਣਕ੍ਖਨ੍ਧਪਰਿਯਾਪਨ੍ਨਾ’’ਤਿ? ਆਮਨ੍ਤਾ. ਵਿਞ੍ਞਾਣਕ੍ਖਨ੍ਧਸ੍ਸ ਸੁਞ੍ਞਤਾ ਨ ਵਤ੍ਤਬ੍ਬਾ – ‘‘ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੩੪. ਨ ਵਤ੍ਤਬ੍ਬਂ – ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸੁਞ੍ਞਮਿਦਂ, ਭਿਕ੍ਖਵੇ, ਸਙ੍ਖਾਰਾ ਅਤ੍ਤੇਨ ਵਾ ਅਤ੍ਤਨਿਯੇਨ ਵਾ’’ਤਿ [ਮ. ਨਿ. ੩.੬੯ ਆਨੇਞ੍ਜਸਪ੍ਪਾਯੇ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾਤਿ.

ਸੁਞ੍ਞਤਾਕਥਾ ਨਿਟ੍ਠਿਤਾ.

੧੯. ਏਕੂਨਵੀਸਤਿਮਵਗ੍ਗੋ

(੧੮੮) ੩ ਸਾਮਞ੍ਞਫਲਕਥਾ

੮੩੫. ਸਾਮਞ੍ਞਫਲਂ ਅਸਙ੍ਖਤਨ੍ਤਿ? ਆਮਨ੍ਤਾ. ਨਿਬ੍ਬਾਨਂ ਤਾਣਂ ਲੇਣਂ ਸਰਣਂ ਪਰਾਯਣਂ ਅਚ੍ਚੁਤਂ ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਾਮਞ੍ਞਫਲਂ ਅਸਙ੍ਖਤਂ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੩੬. ਸਾਮਞ੍ਞਫਲਂ ਅਸਙ੍ਖਤਨ੍ਤਿ? ਆਮਨ੍ਤਾ. ਸਾਮਞ੍ਞਂ ਅਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਸਾਮਞ੍ਞਂ ਸਙ੍ਖਤਨ੍ਤਿ? ਆਮਨ੍ਤਾ. ਸਾਮਞ੍ਞਫਲਂ ਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸੋਤਾਪਤ੍ਤਿਫਲਂ ਅਸਙ੍ਖਤਨ੍ਤਿ? ਆਮਨ੍ਤਾ. ਸੋਤਾਪਤ੍ਤਿਮਗ੍ਗੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੋਤਾਪਤ੍ਤਿਮਗ੍ਗੋ ਸਙ੍ਖਤੋਤਿ? ਆਮਨ੍ਤਾ. ਸੋਤਾਪਤ੍ਤਿਫਲਂ ਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਕਦਾਗਾਮਿਫਲਂ…ਪੇ… ਅਨਾਗਾਮਿਫਲਂ…ਪੇ… ਅਰਹਤ੍ਤਫਲਂ ਅਸਙ੍ਖਤਨ੍ਤਿ? ਆਮਨ੍ਤਾ. ਅਰਹਤ੍ਤਮਗ੍ਗੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਤ੍ਤਮਗ੍ਗੋ ਸਙ੍ਖਤੋਤਿ? ਆਮਨ੍ਤਾ. ਅਰਹਤ੍ਤਫਲਂ ਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸੋਤਾਪਤ੍ਤਿਫਲਂ ਅਸਙ੍ਖਤਂ, ਸਕਦਾਗਾਮਿਫਲਂ…ਪੇ… ਅਨਾਗਾਮਿਫਲਂ …ਪੇ… ਅਰਹਤ੍ਤਫਲਂ ਅਸਙ੍ਖਤਂ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਪਞ੍ਚ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਞ੍ਚ ਅਸਙ੍ਖਤਾਨੀਤਿ? ਆਮਨ੍ਤਾ. ਪਞ੍ਚ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਾਮਞ੍ਞਫਲਕਥਾ ਨਿਟ੍ਠਿਤਾ.

੧੯. ਏਕੂਨਵੀਸਤਿਮਵਗ੍ਗੋ

(੧੮੯) ੪. ਪਤ੍ਤਿਕਥਾ

੮੩੭. ਪਤ੍ਤਿ ਅਸਙ੍ਖਤਾਤਿ? ਆਮਨ੍ਤਾ. ਨਿਬ੍ਬਾਨਂ ਤਾਣਂ ਲੇਣਂ ਸਰਣਂ ਪਰਾਯਣਂ ਅਚ੍ਚੁਤਂ ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਤ੍ਤਿ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੩੮. ਚੀਵਰਸ੍ਸ ਪਤ੍ਤਿ ਅਸਙ੍ਖਤਾਤਿ? ਆਮਨ੍ਤਾ. ਨਿਬ੍ਬਾਨਂ…ਪੇ… ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚੀਵਰਸ੍ਸ ਪਤ੍ਤਿ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਿਣ੍ਡਪਾਤਸ੍ਸ…ਪੇ… ਸੇਨਾਸਨਸ੍ਸ…ਪੇ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਸ੍ਸ ਪਤ੍ਤਿ ਅਸਙ੍ਖਤਾਤਿ? ਆਮਨ੍ਤਾ. ਨਿਬ੍ਬਾਨਂ…ਪੇ… ਅਚ੍ਚੁਤਂ ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਸ੍ਸ ਪਤ੍ਤਿ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਚੀਵਰਸ੍ਸ ਪਤ੍ਤਿ ਅਸਙ੍ਖਤਾ…ਪੇ… ਪਿਣ੍ਡਪਾਤਸ੍ਸ…ਪੇ… ਸੇਨਾਸਨਸ੍ਸ…ਪੇ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਸ੍ਸ ਪਤ੍ਤਿ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਪਞ੍ਚ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਞ੍ਚ ਅਸਙ੍ਖਤਾਨੀਤਿ? ਆਮਨ੍ਤਾ. ਪਞ੍ਚ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੩੯. ਪਠਮਸ੍ਸ ਝਾਨਸ੍ਸ ਪਤ੍ਤਿ ਅਸਙ੍ਖਤਾ (ਏਵਂ ਸਬ੍ਬਂ ਵਿਤ੍ਥਾਰੇਤਬ੍ਬਂ) ਦੁਤਿਯਸ੍ਸ ਝਾਨਸ੍ਸ… ਤਤਿਯਸ੍ਸ ਝਾਨਸ੍ਸ… ਚਤੁਤ੍ਥਸ੍ਸ ਝਾਨਸ੍ਸ… ਆਕਾਸਾਨਞ੍ਚਾਯਤਨਸ੍ਸ… ਵਿਞ੍ਞਾਣਞ੍ਚਾਯਤਨਸ੍ਸ… ਆਕਿਞ੍ਚਞ੍ਞਾਯਤਨਸ੍ਸ… ਨੇਵਸਞ੍ਞਾਨਾਸਞ੍ਞਾਯਤਨਸ੍ਸ… ਸੋਤਾਪਤ੍ਤਿਮਗ੍ਗਸ੍ਸ… ਸੋਤਾਪਤ੍ਤਿਫਲਸ੍ਸ… ਸਕਦਾਗਾਮਿਮਗ੍ਗਸ੍ਸ… ਸਕਦਾਗਾਮਿਫਲਸ੍ਸ… ਅਨਾਗਾਮਿਮਗ੍ਗਸ੍ਸ… ਅਨਾਗਾਮਿਫਲਸ੍ਸ… ਅਰਹਤ੍ਤਮਗ੍ਗਸ੍ਸ… ਅਰਹਤ੍ਤਫਲਸ੍ਸ ਪਤ੍ਤਿ ਅਸਙ੍ਖਤਾਤਿ? ਆਮਨ੍ਤਾ. ਨਿਬ੍ਬਾਨਂ…ਪੇ… ਅਚ੍ਚੁਤਂ ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਤ੍ਤਫਲਸ੍ਸ ਪਤ੍ਤਿ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸੋਤਾਪਤ੍ਤਿਮਗ੍ਗਸ੍ਸ ਪਤ੍ਤਿ ਅਸਙ੍ਖਤਾ… ਸੋਤਾਪਤ੍ਤਿਫਲਸ੍ਸ ਪਤ੍ਤਿ ਅਸਙ੍ਖਤਾ… ਅਰਹਤ੍ਤਮਗ੍ਗਸ੍ਸ ਪਤ੍ਤਿ ਅਸਙ੍ਖਤਾ… ਅਰਹਤ੍ਤਫਲਸ੍ਸ ਪਤ੍ਤਿ ਅਸਙ੍ਖਤਾ… ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਨਵ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਵ ਅਸਙ੍ਖਤਾਨੀਤਿ? ਆਮਨ੍ਤਾ. ਨਵ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੪੦. ਨ ਵਤ੍ਤਬ੍ਬਂ – ਪਤ੍ਤਿ ਅਸਙ੍ਖਤਾਤਿ? ਆਮਨ੍ਤਾ. ਪਤ੍ਤਿ ਰੂਪਂ … ਵੇਦਨਾ… ਸਞ੍ਞਾ… ਸਙ੍ਖਾਰਾ… ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਪਤ੍ਤਿ ਅਸਙ੍ਖਤਾਤਿ.

ਪਤ੍ਤਿਕਥਾ ਨਿਟ੍ਠਿਤਾ.

੧੯. ਏਕੂਨਵੀਸਤਿਮਵਗ੍ਗੋ

(੧੯੦) ੫. ਤਥਤਾਕਥਾ

੮੪੧. ਸਬ੍ਬਧਮ੍ਮਾਨਂ ਤਥਤਾ ਅਸਙ੍ਖਤਾਤਿ? ਆਮਨ੍ਤਾ. ਨਿਬ੍ਬਾਨਂ…ਪੇ… ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਬ੍ਬਧਮ੍ਮਾਨਂ ਤਥਤਾ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੪੨. ਰੂਪਸ੍ਸ ਰੂਪਤਾ, ਨਨੁ ਰੂਪਤਾ ਅਸਙ੍ਖਤਾਤਿ? ਆਮਨ੍ਤਾ. ਨਿਬ੍ਬਾਨਂ…ਪੇ… ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰੂਪਸ੍ਸ ਰੂਪਤਾ, ਨਨੁ ਰੂਪਤਾ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵੇਦਨਾਯ ਵੇਦਨਤਾ, ਨਨੁ ਵੇਦਨਤਾ…ਪੇ… ਸਞ੍ਞਾਯ ਸਞ੍ਞਤਾ, ਨਨੁ ਸਞ੍ਞਤਾ…ਪੇ… ਸਙ੍ਖਾਰਾਨਂ ਸਙ੍ਖਾਰਤਾ, ਨਨੁ ਸਙ੍ਖਾਰਤਾ…ਪੇ… ਵਿਞ੍ਞਾਣਸ੍ਸ ਵਿਞ੍ਞਾਣਤਾ, ਨਨੁ ਵਿਞ੍ਞਾਣਤਾ ਅਸਙ੍ਖਤਾਤਿ? ਆਮਨ੍ਤਾ. ਨਿਬ੍ਬਾਨਂ…ਪੇ… ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ …ਪੇ….

ਰੂਪਸ੍ਸ ਰੂਪਤਾ, ਨਨੁ ਰੂਪਤਾ…ਪੇ… ਵਿਞ੍ਞਾਣਸ੍ਸ ਵਿਞ੍ਞਾਣਤਾ, ਨਨੁ ਵਿਞ੍ਞਾਣਤਾ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਛ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਛ ਅਸਙ੍ਖਤਾਨੀਤਿ? ਆਮਨ੍ਤਾ. ਛ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੪੩. ਨ ਵਤ੍ਤਬ੍ਬਂ – ‘‘ਸਬ੍ਬਧਮ੍ਮਾਨਂ ਤਥਤਾ ਅਸਙ੍ਖਤਾ’’ਤਿ? ਆਮਨ੍ਤਾ. ਸਬ੍ਬਧਮ੍ਮਾਨਂ ਤਥਤਾ ਰੂਪਂ… ਵੇਦਨਾ… ਸਞ੍ਞਾ… ਸਙ੍ਖਾਰਾ… ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਸਬ੍ਬਧਮ੍ਮਾਨਂ ਤਥਤਾ ਅਸਙ੍ਖਤਾਤਿ.

ਤਥਤਾਕਥਾ ਨਿਟ੍ਠਿਤਾ.

੧੯. ਏਕੂਨਵੀਸਤਿਮਵਗ੍ਗੋ

(੧੯੧) ੬. ਕੁਸਲਕਥਾ

੮੪੪. ਨਿਬ੍ਬਾਨਧਾਤੁ ਕੁਸਲਾਤਿ? ਆਮਨ੍ਤਾ. ਸਾਰਮ੍ਮਣਾ, ਅਤ੍ਥਿ ਤਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਨਾਰਮ੍ਮਣਾ, ਨਤ੍ਥਿ ਤਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਹਞ੍ਚਿ ਅਨਾਰਮ੍ਮਣਾ, ਨਤ੍ਥਿ ਤਾਯ ਆਵਟ੍ਟਨਾ…ਪੇ… ਪਣਿਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਿਬ੍ਬਾਨਧਾਤੁ ਕੁਸਲਾ’’ਤਿ.

੮੪੫. ਅਲੋਭੋ ਕੁਸਲੋ ਸਾਰਮ੍ਮਣੋ, ਅਤ੍ਥਿ ਤਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਨਿਬ੍ਬਾਨਧਾਤੁ ਕੁਸਲਾ ਸਾਰਮ੍ਮਣਾ, ਅਤ੍ਥਿ ਤਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਅਦੋਸੋ ਕੁਸਲੋ…ਪੇ… ਅਮੋਹੋ ਕੁਸਲੋ…ਪੇ… ਸਦ੍ਧਾ… ਵੀਰਿਯਂ… ਸਤਿ… ਸਮਾਧਿ…ਪੇ… ਪਞ੍ਞਾ ਕੁਸਲਾ ਸਾਰਮ੍ਮਣਾ, ਅਤ੍ਥਿ ਤਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਨਿਬ੍ਬਾਨਧਾਤੁ ਕੁਸਲਾ ਸਾਰਮ੍ਮਣਾ, ਅਤ੍ਥਿ ਤਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਬ੍ਬਾਨਧਾਤੁ ਕੁਸਲਾ ਅਨਾਰਮ੍ਮਣਾ, ਨਤ੍ਥਿ ਤਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਅਲੋਭੋ ਕੁਸਲੋ ਅਨਾਰਮ੍ਮਣੋ, ਨਤ੍ਥਿ ਤਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਿਬ੍ਬਾਨਧਾਤੁ ਕੁਸਲਾ ਅਨਾਰਮ੍ਮਣਾ, ਨਤ੍ਥਿ ਤਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਅਦੋਸੋ ਕੁਸਲੋ…ਪੇ… ਅਮੋਹੋ ਕੁਸਲੋ…ਪੇ… ਸਦ੍ਧਾ… ਵੀਰਿਯਂ… ਸਤਿ… ਸਮਾਧਿ…ਪੇ… ਪਞ੍ਞਾ ਕੁਸਲਾ ਅਨਾਰਮ੍ਮਣਾ, ਨਤ੍ਥਿ ਤਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੪੬. ਨ ਵਤ੍ਤਬ੍ਬਂ – ‘‘ਨਿਬ੍ਬਾਨਧਾਤੁ ਕੁਸਲਾ’’ਤਿ? ਆਮਨ੍ਤਾ. ਨਨੁ ਨਿਬ੍ਬਾਨਧਾਤੁ ਅਨਵਜ੍ਜਾਤਿ? ਆਮਨ੍ਤਾ. ਹਞ੍ਚਿ ਨਿਬ੍ਬਾਨਧਾਤੁ ਅਨਵਜ੍ਜਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਨਿਬ੍ਬਾਨਧਾਤੁ ਕੁਸਲਾ’’ਤਿ.

ਕੁਸਲਕਥਾ ਨਿਟ੍ਠਿਤਾ.

੧੯. ਏਕੂਨਵੀਸਤਿਮਵਗ੍ਗੋ

(੧੯੨) ੭. ਅਚ੍ਚਨ੍ਤਨਿਯਾਮਕਥਾ

੮੪੭. ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾਤਿ? ਆਮਨ੍ਤਾ. ਮਾਤੁਘਾਤਕੋ ਅਚ੍ਚਨ੍ਤਨਿਯਤੋ, ਪਿਤੁਘਾਤਕੋ…ਪੇ… ਅਰਹਨ੍ਤਘਾਤਕੋ…ਪੇ… ਰੁਹਿਰੁਪ੍ਪਾਦਕੋ …ਪੇ… ਸਙ੍ਘਭੇਦਕੋ ਅਚ੍ਚਨ੍ਤਨਿਯਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੪੮. ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾਤਿ? ਆਮਨ੍ਤਾ. ਅਚ੍ਚਨ੍ਤਨਿਯਤਸ੍ਸ ਪੁਗ੍ਗਲਸ੍ਸ ਵਿਚਿਕਿਚ੍ਛਾ ਉਪ੍ਪਜ੍ਜੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਅਚ੍ਚਨ੍ਤਨਿਯਤਸ੍ਸ ਪੁਗ੍ਗਲਸ੍ਸ ਵਿਚਿਕਿਚ੍ਛਾ ਉਪ੍ਪਜ੍ਜੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾ’’ਤਿ.

ਅਚ੍ਚਨ੍ਤਨਿਯਤਸ੍ਸ ਪੁਗ੍ਗਲਸ੍ਸ ਵਿਚਿਕਿਚ੍ਛਾ ਨੁਪ੍ਪਜ੍ਜੇਯ੍ਯਾਤਿ? ਆਮਨ੍ਤਾ. ਪਹੀਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਹੀਨਾਤਿ? ਆਮਨ੍ਤਾ. ਸੋਤਾਪਤ੍ਤਿਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਕਦਾਗਾਮਿਮਗ੍ਗੇਨ …ਪੇ… ਅਨਾਗਾਮਿਮਗ੍ਗੇਨ…ਪੇ… ਅਰਹਤ੍ਤਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਤਮੇਨ ਮਗ੍ਗੇਨਾਤਿ? ਅਕੁਸਲੇਨ ਮਗ੍ਗੇਨਾਤਿ. ਅਕੁਸਲੋ ਮਗ੍ਗੋ ਨਿਯ੍ਯਾਨਿਕੋ ਖਯਗਾਮੀ ਬੋਧਗਾਮੀ ਅਨਾਸਵੋ…ਪੇ… ਅਸਂਕਿਲੇਸਿਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਕੁਸਲੋ ਮਗ੍ਗੋ ਅਨਿਯ੍ਯਾਨਿਕੋ…ਪੇ… ਸਂਕਿਲੇਸਿਕੋਤਿ? ਆਮਨ੍ਤਾ. ਹਞ੍ਚਿ ਅਕੁਸਲੋ ਮਗ੍ਗੋ ਅਨਿਯ੍ਯਾਨਿਕੋ…ਪੇ… ਸਂਕਿਲੇਸਿਕੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਚ੍ਚਨ੍ਤਨਿਯਤਸ੍ਸ ਪੁਗ੍ਗਲਸ੍ਸ ਵਿਚਿਕਿਚ੍ਛਾ ਅਕੁਸਲੇਨ ਮਗ੍ਗੇਨ ਪਹੀਨਾ’’ਤਿ.

੮੪੯. ਸਸ੍ਸਤਦਿਟ੍ਠਿਯਾ ਨਿਯਤਸ੍ਸ ਪੁਗ੍ਗਲਸ੍ਸ ਉਚ੍ਛੇਦਦਿਟ੍ਠਿ ਉਪ੍ਪਜ੍ਜੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਸਸ੍ਸਤਦਿਟ੍ਠਿਯਾ ਨਿਯਤਸ੍ਸ ਪੁਗ੍ਗਲਸ੍ਸ ਉਚ੍ਛੇਦਦਿਟ੍ਠਿ ਉਪ੍ਪਜ੍ਜੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾ’’ਤਿ.

ਸਸ੍ਸਤਦਿਟ੍ਠਿਯਾ ਨਿਯਤਸ੍ਸ ਪੁਗ੍ਗਲਸ੍ਸ ਉਚ੍ਛੇਦਦਿਟ੍ਠਿ ਨੁਪ੍ਪਜ੍ਜੇਯ੍ਯਾਤਿ? ਆਮਨ੍ਤਾ. ਪਹੀਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਹੀਨਾਤਿ? ਆਮਨ੍ਤਾ. ਸੋਤਾਪਤ੍ਤਿਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਕਦਾਗਾਮਿਮਗ੍ਗੇਨ…ਪੇ… ਅਨਾਗਾਮਿਮਗ੍ਗੇਨ…ਪੇ… ਅਰਹਤ੍ਤਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਤਮੇਨ ਮਗ੍ਗੇਨਾਤਿ? ਅਕੁਸਲੇਨ ਮਗ੍ਗੇਨ. ਅਕੁਸਲੋ ਮਗ੍ਗੋ…ਪੇ… ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਸ੍ਸਤਦਿਟ੍ਠਿਯਾ ਨਿਯਤਸ੍ਸ ਪੁਗ੍ਗਲਸ੍ਸ ਉਚ੍ਛੇਦਦਿਟ੍ਠਿ ਅਕੁਸਲੇਨ ਮਗ੍ਗੇਨ ਪਹੀਨਾ’’ਤਿ.

੮੫੦. ਉਚ੍ਛੇਦਦਿਟ੍ਠਿਯਾ ਨਿਯਤਸ੍ਸ ਪੁਗ੍ਗਲਸ੍ਸ ਸਸ੍ਸਤਦਿਟ੍ਠਿ ਉਪ੍ਪਜ੍ਜੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਉਚ੍ਛੇਦਦਿਟ੍ਠਿਯਾ ਨਿਯਤਸ੍ਸ ਪੁਗ੍ਗਲਸ੍ਸ ਸਸ੍ਸਤਦਿਟ੍ਠਿ ਉਪ੍ਪਜ੍ਜੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾ’’ਤਿ.

ਉਚ੍ਛੇਦਦਿਟ੍ਠਿਯਾ ਨਿਯਤਸ੍ਸ ਪੁਗ੍ਗਲਸ੍ਸ ਸਸ੍ਸਤਦਿਟ੍ਠਿ ਨੁਪ੍ਪਜ੍ਜੇਯ੍ਯਾਤਿ? ਆਮਨ੍ਤਾ. ਪਹੀਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਹੀਨਾਤਿ? ਆਮਨ੍ਤਾ. ਸੋਤਾਪਤ੍ਤਿਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਸਕਦਾਗਾਮਿਮਗ੍ਗੇਨ…ਪੇ… ਅਨਾਗਾਮਿਮਗ੍ਗੇਨ…ਪੇ… ਅਰਹਤ੍ਤਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਤਮੇਨ ਮਗ੍ਗੇਨਾਤਿ? ਅਕੁਸਲੇਨ ਮਗ੍ਗੇਨਾਤਿ. ਅਕੁਸਲੋ ਮਗ੍ਗੋ…ਪੇ… ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਉਚ੍ਛੇਦਦਿਟ੍ਠਿਯਾ ਨਿਯਤਸ੍ਸ ਪੁਗ੍ਗਲਸ੍ਸ ਸਸ੍ਸਤਦਿਟ੍ਠਿ ਅਕੁਸਲੇਨ ਮਗ੍ਗੇਨ ਪਹੀਨਾ’’ਤਿ.

੮੫੧. ਨ ਵਤ੍ਤਬ੍ਬਂ – ‘‘ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਸਮਨ੍ਨਾਗਤੋ ਹੋਤਿ ਏਕਨ੍ਤਕਾਲ਼ਕੇਹਿ ਅਕੁਸਲੇਹਿ ਧਮ੍ਮੇਹਿ, ਸੋ [ਏਵਂ ਖੋ ਭਿਕ੍ਖਵੇ ਪੁਗ੍ਗਲੋ (ਅ. ਨਿ. ੭.੧੫)] ਸਕਿਂ ਨਿਮੁਗ੍ਗੋ ਨਿਮੁਗ੍ਗੋਵ ਹੋਤੀ’’ਤਿ [ਅ. ਨਿ. ੭.੧੫]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾਤਿ.

੮੫੨. ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਸਮਨ੍ਨਾਗਤੋ ਹੋਤਿ ਏਕਨ੍ਤਕਾਲ਼ਕੇਹਿ ਅਕੁਸਲੇਹਿ ਧਮ੍ਮੇਹਿ, ਸੋ ਸਕਿਂ ਨਿਮੁਗ੍ਗੋ ਨਿਮੁਗ੍ਗੋਵ ਹੋਤੀ’’ਤਿ ਕਤ੍ਵਾ ਤੇਨ ਚ ਕਾਰਣੇਨ ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾਤਿ? ਆਮਨ੍ਤਾ. ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਉਮ੍ਮੁਜ੍ਜਿਤ੍ਵਾ ਨਿਮੁਜ੍ਜਤੀ’’ਤਿ [ਅ. ਨਿ. ੭.੧੫]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਸਬ੍ਬਕਾਲਂ ਉਮ੍ਮੁਜ੍ਜਿਤ੍ਵਾ ਨਿਮੁਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਸਮਨ੍ਨਾਗਤੋ ਹੋਤਿ ਏਕਨ੍ਤਕਾਲ਼ਕੇਹਿ ਅਕੁਸਲੇਹਿ ਧਮ੍ਮੇਹਿ, ਸੋ ਸਕਿਂ ਨਿਮੁਗ੍ਗੋ ਨਿਮੁਗ੍ਗੋਵ ਹੋਤੀ’’ਤਿ – ਕਤ੍ਵਾ ਤੇਨ ਚ ਕਾਰਣੇਨ ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾਤਿ? ਆਮਨ੍ਤਾ. ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਏਕਚ੍ਚੋ ਪੁਗ੍ਗਲੋ ਉਮ੍ਮੁਜ੍ਜਿਤ੍ਵਾ ਠਿਤੋ ਹੋਤਿ, ਉਮ੍ਮੁਜ੍ਜਿਤ੍ਵਾ ਵਿਪਸ੍ਸਤਿ ਵਿਲੋਕੇਤਿ, ਉਮ੍ਮੁਜ੍ਜਿਤ੍ਵਾ ਪਤਰਤਿ, ਉਮ੍ਮੁਜ੍ਜਿਤ੍ਵਾ ਪਤਿਗਾਧਪ੍ਪਤ੍ਤੋ ਹੋਤੀ’’ਤਿ [ਅ. ਨਿ. ੭.੧੫]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਸਬ੍ਬਕਾਲਂ ਉਮ੍ਮੁਜ੍ਜਿਤ੍ਵਾ ਪਤਿਗਾਧਪ੍ਪਤ੍ਤੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਚ੍ਚਨ੍ਤਨਿਯਾਮਕਥਾ ਨਿਟ੍ਠਿਤਾ.

੧੯. ਏਕੂਨਵੀਸਤਿਮਵਗ੍ਗੋ

(੧੯੩) ੮. ਇਨ੍ਦ੍ਰਿਯਕਥਾ

੮੫੩. ਨਤ੍ਥਿ ਲੋਕਿਯਂ ਸਦ੍ਧਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਨਤ੍ਥਿ ਲੋਕਿਯਾ ਸਦ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਲੋਕਿਯਂ ਵੀਰਿਯਿਨ੍ਦ੍ਰਿਯਂ…ਪੇ… ਸਤਿਨ੍ਦ੍ਰਿਯਂ…ਪੇ… ਸਮਾਧਿਨ੍ਦ੍ਰਿਯਂ…ਪੇ… ਪਞ੍ਞਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਨਤ੍ਥਿ ਲੋਕਿਯਾ ਪਞ੍ਞਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਲੋਕਿਯਾ ਸਦ੍ਧਾਤਿ? ਆਮਨ੍ਤਾ. ਅਤ੍ਥਿ ਲੋਕਿਯਂ ਸਦ੍ਧਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਲੋਕਿਯਂ ਵੀਰਿਯਂ…ਪੇ… ਸਤਿ…ਪੇ… ਸਮਾਧਿ…ਪੇ… ਪਞ੍ਞਾਤਿ? ਆਮਨ੍ਤਾ. ਅਤ੍ਥਿ ਲੋਕਿਯਂ ਪਞ੍ਞਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਲੋਕਿਯੋ ਮਨੋ, ਅਤ੍ਥਿ ਲੋਕਿਯਂ ਮਨਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯਾ ਸਦ੍ਧਾ, ਅਤ੍ਥਿ ਲੋਕਿਯਂ ਸਦ੍ਧਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਲੋਕਿਯੋ ਮਨੋ, ਅਤ੍ਥਿ ਲੋਕਿਯਂ ਮਨਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯਾ ਪਞ੍ਞਾ, ਅਤ੍ਥਿ ਲੋਕਿਯਂ ਪਞ੍ਞਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਲੋਕਿਯਂ ਸੋਮਨਸ੍ਸਂ, ਅਤ੍ਥਿ ਲੋਕਿਯਂ ਸੋਮਨਸ੍ਸਿਨ੍ਦ੍ਰਿਯਂ…ਪੇ… ਅਤ੍ਥਿ ਲੋਕਿਯਂ ਜੀਵਿਤਂ, ਅਤ੍ਥਿ ਲੋਕਿਯਂ ਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯਾ ਸਦ੍ਧਾ, ਅਤ੍ਥਿ ਲੋਕਿਯਂ ਸਦ੍ਧਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਲੋਕਿਯਂ ਜੀਵਿਤਂ, ਅਤ੍ਥਿ ਲੋਕਿਯਂ ਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯਾ ਪਞ੍ਞਾ, ਅਤ੍ਥਿ ਲੋਕਿਯਂ ਪਞ੍ਞਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੫੪. ਅਤ੍ਥਿ ਲੋਕਿਯਾ ਸਦ੍ਧਾ, ਨਤ੍ਥਿ ਲੋਕਿਯਂ ਸਦ੍ਧਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯੋ ਮਨੋ, ਨਤ੍ਥਿ ਲੋਕਿਯਂ ਮਨਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਲੋਕਿਯਾ ਪਞ੍ਞਾ, ਨਤ੍ਥਿ ਲੋਕਿਯਂ ਪਞ੍ਞਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯੋ ਮਨੋ, ਨਤ੍ਥਿ ਲੋਕਿਯਂ ਮਨਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਲੋਕਿਯਾ ਸਦ੍ਧਾ, ਨਤ੍ਥਿ ਲੋਕਿਯਂ ਸਦ੍ਧਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯਂ ਸੋਮਨਸ੍ਸਂ, ਨਤ੍ਥਿ ਲੋਕਿਯਂ ਸੋਮਨਸ੍ਸਿਨ੍ਦ੍ਰਿਯਨ੍ਤਿ… ਅਤ੍ਥਿ ਲੋਕਿਯਂ ਜੀਵਿਤਂ, ਨਤ੍ਥਿ ਲੋਕਿਯਂ ਜੀਵਿਤਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਲੋਕਿਯਾ ਪਞ੍ਞਾ, ਨਤ੍ਥਿ ਲੋਕਿਯਂ ਪਞ੍ਞਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯੋ ਮਨੋ, ਨਤ੍ਥਿ ਲੋਕਿਯਂ ਮਨਿਨ੍ਦ੍ਰਿਯਨ੍ਤਿ…ਪੇ… ਅਤ੍ਥਿ ਲੋਕਿਯਂ ਜੀਵਿਤਂ, ਨਤ੍ਥਿ ਲੋਕਿਯਂ ਜੀਵਿਤਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੫੫. ਅਤ੍ਥਿ ਲੋਕੁਤ੍ਤਰਾ ਸਦ੍ਧਾ, ਅਤ੍ਥਿ ਲੋਕੁਤ੍ਤਰਂ ਸਦ੍ਧਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯਾ ਸਦ੍ਧਾ, ਅਤ੍ਥਿ ਲੋਕਿਯਂ ਸਦ੍ਧਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਲੋਕੁਤ੍ਤਰਂ ਵੀਰਿਯਂ…ਪੇ… ਅਤ੍ਥਿ ਲੋਕੁਤ੍ਤਰਾ ਪਞ੍ਞਾ, ਅਤ੍ਥਿ ਲੋਕੁਤ੍ਤਰਂ ਪਞ੍ਞਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕਿਯਾ ਪਞ੍ਞਾ, ਅਤ੍ਥਿ ਲੋਕਿਯਂ ਪਞ੍ਞਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਲੋਕਿਯਾ ਸਦ੍ਧਾ, ਨਤ੍ਥਿ ਲੋਕਿਯਂ ਸਦ੍ਧਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕੁਤ੍ਤਰਾ ਸਦ੍ਧਾ, ਨਤ੍ਥਿ ਲੋਕੁਤ੍ਤਰਂ ਸਦ੍ਧਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਲੋਕਿਯਂ ਵੀਰਿਯਂ…ਪੇ… ਅਤ੍ਥਿ ਲੋਕਿਯਾ ਪਞ੍ਞਾ, ਨਤ੍ਥਿ ਲੋਕਿਯਂ ਪਞ੍ਞਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਲੋਕੁਤ੍ਤਰਾ ਪਞ੍ਞਾ, ਨਤ੍ਥਿ ਲੋਕੁਤ੍ਤਰਂ ਪਞ੍ਞਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੫੬. ਨਤ੍ਥਿ ਲੋਕਿਯਾਨਿ ਪਞ੍ਚਿਨ੍ਦ੍ਰਿਯਾਨੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਅਦ੍ਦਸਂ ਖੋ ਅਹਂ, ਭਿਕ੍ਖਵੇ, ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਸਤ੍ਤੇ ਅਪ੍ਪਰਜਕ੍ਖੇ ਮਹਾਰਜਕ੍ਖੇ, ਤਿਕ੍ਖਿਨ੍ਦ੍ਰਿਯੇ ਮੁਦਿਨ੍ਦ੍ਰਿਯੇ, ਸ੍ਵਾਕਾਰੇ, ਸੁਵਿਞ੍ਞਾਪਯੇ, ਅਪ੍ਪੇਕਚ੍ਚੇ ਪਰਲੋਕਵਜ੍ਜਭਯਦਸ੍ਸਾਵਿਨੋ ਵਿਹਰਨ੍ਤੇ’’ਤਿ [ਮ. ਨਿ. ੧.੨੮੩ ਤਤ੍ਥ ‘‘ਦ੍ਵਾਕਾਰੇ ਦੁਵਿਞ੍ਞਾਪਯੇ’’ ਇਚ੍ਚਾਦੀਨਿਪਿ ਪਦਾਨਿ ਦਿਸ੍ਸਨ੍ਤਿ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਤ੍ਥਿ ਲੋਕਿਯਾਨਿ ਪਞ੍ਚਿਨ੍ਦ੍ਰਿਯਾਨੀਤਿ.

ਇਨ੍ਦ੍ਰਿਯਕਥਾ ਨਿਟ੍ਠਿਤਾ.

ਏਕੂਨਵੀਸਤਿਮਵਗ੍ਗੋ.

ਤਸ੍ਸੁਦ੍ਦਾਨਂ –

ਅਤੀਤੇ ਕਿਲੇਸੇ ਜਹਤਿ ਅਨਾਗਤੇ ਕਿਲੇਸੇ ਜਹਤਿ ਪਚ੍ਚੁਪ੍ਪਨ੍ਨੇ ਕਿਲੇਸੇ ਜਹਤਿ, ਸੁਞ੍ਞਤਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ, ਸਾਮਞ੍ਞਫਲਂ ਅਸਙ੍ਖਤਂ, ਪਤ੍ਤਿ ਅਸਙ੍ਖਤਾ, ਸਬ੍ਬਧਮ੍ਮਾਨਂ ਤਥਤਾ ਅਸਙ੍ਖਤਾ, ਨਿਬ੍ਬਾਨਧਾਤੁ ਕੁਸਲਾ, ਅਤ੍ਥਿ ਪੁਥੁਜ੍ਜਨਸ੍ਸ ਅਚ੍ਚਨ੍ਤਨਿਯਾਮਤਾ, ਨਤ੍ਥਿ ਲੋਕਿਯਾਨਿ ਪਞ੍ਚਿਨ੍ਦ੍ਰਿਯਾਨੀਤਿ.