੧੮. ਅਟ੍ਠਾਰਸਮਵਗ੍ਗੋ

(੧੮੩) ੭. ਝਾਨਨ੍ਤਰਿਕਕਥਾ

੮੧੭. ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਤ੍ਥਿ ਫਸ੍ਸਨ੍ਤਰਿਕਾ…ਪੇ… ਅਤ੍ਥਿ ਸਞ੍ਞਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਹਞ੍ਚਿ ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਝਾਨਨ੍ਤਰਿਕਾ’’ਤਿ.

ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਹਞ੍ਚਿ ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਝਾਨਨ੍ਤਰਿਕਾ’’ਤਿ.

੮੧੮. ਪਠਮਸ੍ਸ ਚ ਝਾਨਸ੍ਸ ਦੁਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਠਮਸ੍ਸ ਚ ਝਾਨਸ੍ਸ ਦੁਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਪਠਮਸ੍ਸ ਚ ਝਾਨਸ੍ਸ ਦੁਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਪਠਮਸ੍ਸ ਚ ਝਾਨਸ੍ਸ ਦੁਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੧੯. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਸਵਿਤਕ੍ਕੋ ਸਵਿਚਾਰੋ ਸਮਾਧਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਵਿਤਕ੍ਕੋ ਅਵਿਚਾਰੋ ਸਮਾਧਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਵਿਤਕ੍ਕੋ ਸਵਿਚਾਰੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਵਿਤਕ੍ਕੋ ਅਵਿਚਾਰੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੮੨੦. ਦ੍ਵਿਨ੍ਨਂ ਝਾਨਾਨਂ ਪਟੁਪ੍ਪਨ੍ਨਾਨਮਨ੍ਤਰੇ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧੀਤਿ? ਆਮਨ੍ਤਾ. ਨਨੁ ਅਵਿਤਕ੍ਕੇ ਵਿਚਾਰਮਤ੍ਤੇ ਸਮਾਧਿਮ੍ਹਿ ਵਤ੍ਤਮਾਨੇ ਪਠਮਂ ਝਾਨਂ ਨਿਰੁਦ੍ਧਂ ਦੁਤਿਯਂ ਝਾਨਂ ਪਟੁਪ੍ਪਨ੍ਨਨ੍ਤਿ? ਆਮਨ੍ਤਾ. ਹਞ੍ਚਿ ਅਵਿਤਕ੍ਕੇ ਵਿਚਾਰਮਤ੍ਤੇ ਸਮਾਧਿਮ੍ਹਿ ਵਤ੍ਤਮਾਨੇ ਪਠਮਂ ਝਾਨਂ ਨਿਰੁਦ੍ਧਂ ਦੁਤਿਯਂ ਝਾਨਂ ਪਟੁਪ੍ਪਨ੍ਨਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦ੍ਵਿਨ੍ਨਂ ਝਾਨਾਨਂ ਪਟੁਪ੍ਪਨ੍ਨਾਨਮਨ੍ਤਰੇ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ.

੮੨੧. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਪਠਮਂ ਝਾਨਂ…ਪੇ… ਦੁਤਿਯਂ ਝਾਨਂ…ਪੇ… ਤਤਿਯਂ ਝਾਨਂ…ਪੇ… ਚਤੁਤ੍ਥਂ ਝਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ.

੮੨੨. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਨਨੁ ਤਯੋ ਸਮਾਧੀ ਵੁਤ੍ਤਾ ਭਗਵਤਾ – ਸਵਿਤਕ੍ਕੋ ਸਵਿਚਾਰੋ ਸਮਾਧਿ, ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ, ਅਵਿਤਕ੍ਕੋ ਅਵਿਚਾਰੋ ਸਮਾਧੀਤਿ [ਦੀ. ਨਿ. ੩.੩੦੫, ੩੫੩]? ਆਮਨ੍ਤਾ. ਹਞ੍ਚਿ ਤਯੋ ਸਮਾਧੀ ਵੁਤ੍ਤਾ ਭਗਵਤਾ – ਸਵਿਤਕ੍ਕੋ…ਪੇ… ਅਵਿਚਾਰੋ ਸਮਾਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾ’’ਤਿ.

ਝਾਨਨ੍ਤਰਿਕਕਥਾ ਨਿਟ੍ਠਿਤਾ.