੧੮. ਅਟ੍ਠਾਰਸਮਵਗ੍ਗੋ
(੧੭੭) ੧. ਮਨੁਸ੍ਸਲੋਕਕਥਾ
੮੦੨. ਨ ਵਤ੍ਤਬ੍ਬਂ – ‘‘ਬੁਦ੍ਧੋ ਭਗਵਾ ਮਨੁਸ੍ਸਲੋਕੇ ਅਟ੍ਠਾਸੀ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਬੁਦ੍ਧਵੁਤ੍ਥਾਨਿ ਚੇਤਿਯਾਨਿ ਆਰਾਮਵਿਹਾਰਗਾਮਨਿਗਮਨਗਰਾਨਿ ਰਟ੍ਠਾਨਿ ਜਨਪਦਾਨੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਬੁਦ੍ਧਵੁਤ੍ਥਾਨਿ ਚੇਤਿਯਾਨਿ ਆਰਾਮਵਿਹਾਰਗਾਮਨਿਗਮਨਗਰਾਨਿ ਰਟ੍ਠਾਨਿ ਜਨਪਦਾਨਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧੋ ਭਗਵਾ ਮਨੁਸ੍ਸਲੋਕੇ ਅਟ੍ਠਾਸੀ’’ਤਿ.
ਨ ਵਤ੍ਤਬ੍ਬਂ – ‘‘ਬੁਦ੍ਧੋ ਭਗਵਾ ਮਨੁਸ੍ਸਲੋਕੇ ਅਟ੍ਠਾਸੀ’’ਤਿ? ਆਮਨ੍ਤਾ. ਨਨੁ ਭਗਵਾ ਲੁਮ੍ਬਿਨਿਯਾ ਜਾਤੋ, ਬੋਧਿਯਾ ਮੂਲੇ ਅਭਿਸਮ੍ਬੁਦ੍ਧੋ, ਬਾਰਾਣਸਿਯਂ ਭਗਵਤਾ ਧਮ੍ਮਚਕ੍ਕਂ ਪਵਤ੍ਤਿਤਂ, ਚਾਪਾਲੇ ਚੇਤਿਯੇ ਆਯੁਸਙ੍ਖਾਰੋ ਓਸ੍ਸਟ੍ਠੋ, ਕੁਸਿਨਾਰਾਯਂ ਭਗਵਾ ਪਰਿਨਿਬ੍ਬੁਤੋਤਿ? ਆਮਨ੍ਤਾ. ਹਞ੍ਚਿ ਭਗਵਾ ਲੁਮ੍ਬਿਨਿਯਾ ਜਾਤੋ…ਪੇ… ਕੁਸਿਨਾਰਾਯਂ ਭਗਵਾ ਪਰਿਨਿਬ੍ਬੁਤੋ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧੋ ਭਗਵਾ ਮਨੁਸ੍ਸਲੋਕੇ ਅਟ੍ਠਾਸੀ’’ਤਿ.
ਨ ਵਤ੍ਤਬ੍ਬਂ – ‘‘ਬੁਦ੍ਧੋ ਭਗਵਾ ਮਨੁਸ੍ਸਲੋਕੇ ਅਟ੍ਠਾਸੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਏਕਮਿਦਾਹਂ, ਭਿਕ੍ਖਵੇ, ਸਮਯਂ ਉਕ੍ਕਟ੍ਠਾਯਂ ਵਿਹਰਾਮਿ ਸੁਭਗਵਨੇ ਸਾਲਰਾਜਮੂਲੇ’’ਤਿ [ਦੀ. ਨਿ. ੨.੯੧]; ‘‘ਏਕਮਿਦਾਹਂ, ਭਿਕ੍ਖਵੇ, ਸਮਯਂ ਉਰੁਵੇਲਾਯਂ ਵਿਹਰਾਮਿ ਅਜਪਾਲਨਿਗ੍ਰੋਧੇ ਪਠਮਾਭਿਸਮ੍ਬੁਦ੍ਧੋ’’ਤਿ [ਅ. ਨਿ. ੪.੨੧]; ‘‘ਏਕਮਿਦਾਹਂ, ਭਿਕ੍ਖਵੇ, ਸਮਯਂ ਰਾਜਗਹੇ ਵਿਹਰਾਮਿ ਵੇਲ਼ੁਵਨੇ ਕਲ਼ਨ੍ਦਕਨਿਵਾਪੇ’’ਤਿ [ਦੀ. ਨਿ. ੨.੧੮੦]; ‘‘ਏਕਮਿਦਾਹਂ, ਭਿਕ੍ਖਵੇ, ਸਮਯਂ ਸਾਵਤ੍ਥਿਯਂ ਵਿਹਰਾਮਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ’’ਤਿ; ‘‘ਏਕਮਿਦਾਹਂ, ਭਿਕ੍ਖਵੇ, ਸਮਯਂ ਵੇਸਾਲਿਯਂ ਵਿਹਰਾਮਿ ਮਹਾਵਨੇ ਕੂਟਾਗਾਰਸਾਲਾਯ’’ਨ੍ਤਿ [ਦੀ. ਨਿ. ੩.੧੧]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਬੁਦ੍ਧੋ ਭਗਵਾ ਮਨੁਸ੍ਸਲੋਕੇ ਅਟ੍ਠਾਸੀਤਿ.
੮੦੩. ਬੁਦ੍ਧੋ ਭਗਵਾ ਮਨੁਸ੍ਸਲੋਕੇ ਅਟ੍ਠਾਸੀਤਿ? ਆਮਨ੍ਤਾ. ਨਨੁ ਭਗਵਾ ਲੋਕੇ ਜਾਤੋ, ਲੋਕੇ ਸਂਵਡ੍ਢੋ, ਲੋਕਂ ਅਭਿਭੁਯ੍ਯ ਵਿਹਰਤਿ ਅਨੁਪਲਿਤ੍ਤੋ ਲੋਕੇਨਾਤਿ [ਅ. ਨਿ. ੪.੩੬]? ਆਮਨ੍ਤਾ. ਹਞ੍ਚਿ ਭਗਵਾ ਲੋਕੇ ਜਾਤੋ, ਲੋਕੇ ਸਂਵਡ੍ਢੋ, ਲੋਕਂ ਅਭਿਭੁਯ੍ਯ ਵਿਹਰਤਿ ਅਨੁਪਲਿਤ੍ਤੋ ਲੋਕੇਨ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧੋ ਭਗਵਾ ਮਨੁਸ੍ਸਲੋਕੇ ਅਟ੍ਠਾਸੀ’’ਤਿ.
ਮਨੁਸ੍ਸਲੋਕਕਥਾ ਨਿਟ੍ਠਿਤਾ.
੧੮. ਅਟ੍ਠਾਰਸਮਵਗ੍ਗੋ
(੧੭੮) ੨. ਧਮ੍ਮਦੇਸਨਾਕਥਾ
੮੦੪. ਨ ਵਤ੍ਤਬ੍ਬਂ – ‘‘ਬੁਦ੍ਧੇਨ ਭਗਵਤਾ ਧਮ੍ਮੋ ਦੇਸਿਤੋ’’ਤਿ? ਆਮਨ੍ਤਾ. ਕੇਨ ਦੇਸਿਤੋਤਿ? ਅਭਿਨਿਮ੍ਮਿਤੇਨ ਦੇਸਿਤੋਤਿ. ਅਭਿਨਿਮ੍ਮਿਤੋ ਜਿਨੋ ਸਤ੍ਥਾ ਸਮ੍ਮਾਸਮ੍ਬੁਦ੍ਧੋ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ ਧਮ੍ਮਸ੍ਸਾਮੀ ਧਮ੍ਮਪ੍ਪਟਿਸਰਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਨ ਵਤ੍ਤਬ੍ਬਂ – ‘‘ਬੁਦ੍ਧੇਨ ਭਗਵਤਾ ਧਮ੍ਮੋ ਦੇਸਿਤੋ’’ਤਿ? ਆਮਨ੍ਤਾ. ਕੇਨ ਦੇਸਿਤੋਤਿ? ਆਯਸ੍ਮਤਾ ਆਨਨ੍ਦੇਨ ਦੇਸਿਤੋਤਿ. ਆਯਸ੍ਮਾ ਆਨਨ੍ਦੋ ਜਿਨੋ ਸਤ੍ਥਾ ਸਮ੍ਮਾਸਮ੍ਬੁਦ੍ਧੋ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ ਧਮ੍ਮਸ੍ਸਾਮੀ ਧਮ੍ਮਪ੍ਪਟਿਸਰਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੮੦੫. ਨ ਵਤ੍ਤਬ੍ਬਂ – ‘‘ਬੁਦ੍ਧੇਨ ਭਗਵਤਾ ਧਮ੍ਮੋ ਦੇਸਿਤੋ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸਂਖਿਤ੍ਤੇਨਪਿ ਖੋ ਅਹਂ, ਸਾਰਿਪੁਤ੍ਤ, ਧਮ੍ਮਂ ਦੇਸੇਯ੍ਯਂ; ਵਿਤ੍ਥਾਰੇਨਪਿ ਖੋ ਅਹਂ, ਸਾਰਿਪੁਤ੍ਤ, ਧਮ੍ਮਂ ਦੇਸੇਯ੍ਯਂ; ਸਂਖਿਤ੍ਤਵਿਤ੍ਥਾਰੇਨਪਿ ਖੋ ਅਹਂ, ਸਾਰਿਪੁਤ੍ਤ, ਧਮ੍ਮਂ ਦੇਸੇਯ੍ਯਂ; ਅਞ੍ਞਾਤਾਰੋ ਚ ਦੁਲ੍ਲਭਾ’’ਤਿ [ਅ. ਨਿ. ੩.੩੩ ਸਾਰਿਪੁਤ੍ਤਸੁਤ੍ਤੇ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਬੁਦ੍ਧੇਨ ਭਗਵਤਾ ਧਮ੍ਮੋ ਦੇਸਿਤੋਤਿ.
੮੦੬. ਨ ਵਤ੍ਤਬ੍ਬਂ – ‘‘ਬੁਦ੍ਧੇਨ ਭਗਵਤਾ ਧਮ੍ਮੋ ਦੇਸਿਤੋ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘‘ਅਭਿਞ੍ਞਾਯਾਹਂ, ਭਿਕ੍ਖਵੇ, ਧਮ੍ਮਂ ਦੇਸੇਮਿ, ਨੋ ਅਨਭਿਞ੍ਞਾਯ; ਸਨਿਦਾਨਾਹਂ, ਭਿਕ੍ਖਵੇ, ਧਮ੍ਮਂ ਦੇਸੇਮਿ, ਨੋ ਅਨਿਦਾਨਂ; ਸਪ੍ਪਾਟਿਹਾਰਿਯਾਹਂ, ਭਿਕ੍ਖਵੇ, ਧਮ੍ਮਂ ਦੇਸੇਮਿ, ਨੋ ਅਪ੍ਪਾਟਿਹਾਰਿਯਂ; ਤਸ੍ਸ [ਯਞ੍ਚਸ੍ਸ (ਸੀ. ਪੀ. ਕ.)] ਮਯ੍ਹਂ, ਭਿਕ੍ਖਵੇ, ਅਭਿਞ੍ਞਾਯ ਧਮ੍ਮਂ ਦੇਸਯਤੋ ਨੋ ਅਨਭਿਞ੍ਞਾਯ, ਸਨਿਦਾਨਂ ਧਮ੍ਮਂ ਦੇਸਯਤੋ ਨੋ ਅਨਿਦਾਨਂ, ਸਪ੍ਪਾਟਿਹਾਰਿਯਂ ਧਮ੍ਮਂ ਦੇਸਯਤੋ ਨੋ ਅਪ੍ਪਾਟਿਹਾਰਿਯਂ ਕਰਣੀਯੋ ਓਵਾਦੋ ਕਰਣੀਯਾ ਅਨੁਸਾਸਨੀ; ਅਲਞ੍ਚ ਪਨ ਵੋ, ਭਿਕ੍ਖਵੇ, ਤੁਟ੍ਠਿਯਾ ਅਲਂ ਅਤ੍ਤਮਨਤਾਯ ਅਲਂ ਸੋਮਨਸ੍ਸਾਯ – ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’ਤਿ. ਇਮਸ੍ਮਿਞ੍ਚ ਪਨ ਵੇਯ੍ਯਾਕਰਣਸ੍ਮਿਂ ਭਞ੍ਞਮਾਨੇ ਦਸਸਹਸ੍ਸਿਲੋਕਧਾਤੁ ਅਕਮ੍ਪਿਤ੍ਥਾ’’ਤਿ [ਅ. ਨਿ. ੩.੧੨੬]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਬੁਦ੍ਧੇਨ ਭਗਵਤਾ ਧਮ੍ਮੋ ਦੇਸਿਤੋਤਿ.
ਧਮ੍ਮਦੇਸਨਾਕਥਾ ਨਿਟ੍ਠਿਤਾ.
੧੮. ਅਟ੍ਠਾਰਸਮਵਗ੍ਗੋ
(੧੭੯) ੩. ਕਰੁਣਾਕਥਾ
੮੦੭. ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾਤਿ? ਆਮਨ੍ਤਾ. ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਮੇਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾਤਿ? ਆਮਨ੍ਤਾ. ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਮੁਦਿਤਾ…ਪੇ… ਉਪੇਕ੍ਖਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਤ੍ਥਿ ਬੁਦ੍ਧਸ੍ਸ ਭਗਵਤੋ ਮੇਤ੍ਤਾਤਿ? ਆਮਨ੍ਤਾ. ਅਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਬੁਦ੍ਧਸ੍ਸ ਭਗਵਤੋ ਮੁਦਿਤਾ…ਪੇ… ਉਪੇਕ੍ਖਾਤਿ? ਆਮਨ੍ਤਾ. ਅਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾਤਿ? ਆਮਨ੍ਤਾ. ਭਗਵਾ ਅਕਾਰੁਣਿਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਭਗਵਾ ਕਾਰੁਣਿਕੋ ਲੋਕਹਿਤੋ ਲੋਕਾਨੁਕਮ੍ਪਕੋ ਲੋਕਤ੍ਥਚਰੋਤਿ? ਆਮਨ੍ਤਾ. ਹਞ੍ਚਿ ਭਗਵਾ ਕਾਰੁਣਿਕੋ ਲੋਕਹਿਤੋ ਲੋਕਾਨੁਕਮ੍ਪਕੋ ਲੋਕਤ੍ਥਚਰੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾ’’ਤਿ…ਪੇ….
ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾਤਿ? ਆਮਨ੍ਤਾ. ਨਨੁ ਭਗਵਾ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜੀਤਿ? ਆਮਨ੍ਤਾ. ਹਞ੍ਚਿ ਭਗਵਾ ਮਹਾਕਰੁਣਾਸਮਾਪਤ੍ਤਿਂ ਸਮਾਪਜ੍ਜਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾ’’ਤਿ.
੮੦੮. ਅਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾਤਿ? ਆਮਨ੍ਤਾ. ਭਗਵਾ ਸਰਾਗੋਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾਤਿ.
ਕਰੁਣਾਕਥਾ ਨਿਟ੍ਠਿਤਾ.
੧੮. ਅਟ੍ਠਾਰਸਮਵਗ੍ਗੋ
(੧੮੦) ੪. ਗਨ੍ਧਜਾਤਿਕਥਾ
੮੦੯. ਬੁਦ੍ਧਸ੍ਸ ਭਗਵਤੋ ਉਚ੍ਚਾਰਪਸ੍ਸਾਵੋ ਅਤਿਵਿਯ ਅਞ੍ਞੇ ਗਨ੍ਧਜਾਤੇ ਅਧਿਗ੍ਗਣ੍ਹਾਤੀਤਿ? ਆਮਨ੍ਤਾ. ਭਗਵਾ ਗਨ੍ਧਭੋਜੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਭਗਵਾ ਓਦਨਕੁਮ੍ਮਾਸਂ ਭੁਞ੍ਜਤੀਤਿ? ਆਮਨ੍ਤਾ. ਹਞ੍ਚਿ ਭਗਵਾ ਓਦਨਕੁਮ੍ਮਾਸਂ ਭੁਞ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਭਗਵਤੋ ਉਚ੍ਚਾਰਪਸ੍ਸਾਵੋ ਅਤਿਵਿਯ ਅਞ੍ਞੇ ਗਨ੍ਧਜਾਤੇ ਅਧਿਗ੍ਗਣ੍ਹਾਤੀ’’ਤਿ.
ਬੁਦ੍ਧਸ੍ਸ ਭਗਵਤੋ ਉਚ੍ਚਾਰਪਸ੍ਸਾਵੋ ਅਤਿਵਿਯ ਅਞ੍ਞੇ ਗਨ੍ਧਜਾਤੇ ਅਧਿਗ੍ਗਣ੍ਹਾਤੀਤਿ? ਆਮਨ੍ਤਾ. ਅਤ੍ਥਿ ਕੇਚਿ ਬੁਦ੍ਧਸ੍ਸ ਭਗਵਤੋ ਉਚ੍ਚਾਰਪਸ੍ਸਾਵਂ ਨ੍ਹਾਯਨ੍ਤਿ ਵਿਲਿਮ੍ਪਨ੍ਤਿ ਉਚ੍ਛਾਦੇਨ੍ਤਿ [ਉਚ੍ਚਾਰੇਨ੍ਤਿ (ਸੀ. ਪੀ. ਕ.)] ਪੇਲ਼ਾਯ ਪਟਿਸਾਮੇਨ੍ਤਿ ਕਰਣ੍ਡਾਯ ਨਿਕ੍ਖਿਪਨ੍ਤਿ ਆਪਣੇ ਪਸਾਰੇਨ੍ਤਿ, ਤੇਨ ਚ ਗਨ੍ਧੇਨ ਗਨ੍ਧਕਰਣੀਯਂ ਕਰੋਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਗਨ੍ਧਜਾਤਿਕਥਾ ਨਿਟ੍ਠਿਤਾ.
੧੮. ਅਟ੍ਠਾਰਸਮਵਗ੍ਗੋ
(੧੮੧) ੫. ਏਕਮਗ੍ਗਕਥਾ
੮੧੦. ਏਕੇਨ ਅਰਿਯਮਗ੍ਗੇਨ ਚਤ੍ਤਾਰਿ ਸਾਮਞ੍ਞਫਲਾਨਿ ਸਚ੍ਛਿਕਰੋਤੀਤਿ? ਆਮਨ੍ਤਾ. ਚਤੁਨ੍ਨਂ ਫਸ੍ਸਾਨਂ…ਪੇ… ਚਤੁਨ੍ਨਂ ਸਞ੍ਞਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਏਕੇਨ ਅਰਿਯਮਗ੍ਗੇਨ ਚਤ੍ਤਾਰਿ ਸਾਮਞ੍ਞਫਲਾਨਿ ਸਚ੍ਛਿਕਰੋਤੀਤਿ? ਆਮਨ੍ਤਾ. ਸੋਤਾਪਤ੍ਤਿਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਕਦਾਗਾਮਿ…ਪੇ… ਅਨਾਗਾਮਿਮਗ੍ਗੇਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਕਤਮੇਨ ਮਗ੍ਗੇਨਾਤਿ? ਅਰਹਤ੍ਤਮਗ੍ਗੇਨਾਤਿ. ਅਰਹਤ੍ਤਮਗ੍ਗੇਨ ਸਕ੍ਕਾਯਦਿਟ੍ਠਿਂ ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਤ੍ਤਮਗ੍ਗੇਨ ਸਕ੍ਕਾਯਦਿਟ੍ਠਿਂ ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਜਹਤੀਤਿ? ਆਮਨ੍ਤਾ. ਨਨੁ ਤਿਣ੍ਣਂ ਸਂਯੋਜਨਾਨਂ ਪਹਾਨਂ ਸੋਤਾਪਤ੍ਤਿਫਲਂ ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਤਿਣ੍ਣਂ ਸਂਯੋਜਨਾਨਂ ਪਹਾਨਂ ਸੋਤਾਪਤ੍ਤਿਫਲਂ ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰਹਤ੍ਤਮਗ੍ਗੇਨ ਸਕ੍ਕਾਯਦਿਟ੍ਠਿਂ ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਜਹਤੀ’’ਤਿ.
ਅਰਹਤ੍ਤਮਗ੍ਗੇਨ ਓਲ਼ਾਰਿਕਂ ਕਾਮਰਾਗਂ ਓਲ਼ਾਰਿਕਂ ਬ੍ਯਾਪਾਦਂ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਤ੍ਤਮਗ੍ਗੇਨ ਓਲ਼ਾਰਿਕਂ ਕਾਮਰਾਗਂ ਓਲ਼ਾਰਿਕਂ ਬ੍ਯਾਪਾਦਂ ਜਹਤੀਤਿ? ਆਮਨ੍ਤਾ. ਨਨੁ ਕਾਮਰਾਗਬ੍ਯਾਪਾਦਾਨਂ ਤਨੁਭਾਵਂ ਸਕਦਾਗਾਮਿਫਲਂ ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਕਾਮਰਾਗਬ੍ਯਾਪਾਦਾਨਂ ਤਨੁਭਾਵਂ ਸਕਦਾਗਾਮਿਫਲਂ ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰਹਤ੍ਤਮਗ੍ਗੇਨ ਓਲ਼ਾਰਿਕਂ ਕਾਮਰਾਗਂ ਓਲ਼ਾਰਿਕਂ ਬ੍ਯਾਪਾਦਂ ਜਹਤੀ’’ਤਿ.
ਅਰਹਤ੍ਤਮਗ੍ਗੇਨ ਅਣੁਸਹਗਤਂ ਕਾਮਰਾਗਂ ਅਣੁਸਹਗਤਂ ਬ੍ਯਾਪਾਦਂ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਤ੍ਤਮਗ੍ਗੇਨ ਅਣੁਸਹਗਤਂ ਕਾਮਰਾਗਂ ਅਣੁਸਹਗਤਂ ਬ੍ਯਾਪਾਦਂ ਜਹਤੀਤਿ? ਆਮਨ੍ਤਾ. ਨਨੁ ਕਾਮਰਾਗਬ੍ਯਾਪਾਦਾਨਂ ਅਨਵਸੇਸਪ੍ਪਹਾਨਂ ਅਨਾਗਾਮਿਫਲਂ ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਕਾਮਰਾਗਬ੍ਯਾਪਾਦਾਨਂ ਅਨਵਸੇਸਪ੍ਪਹਾਨਂ ਅਨਾਗਾਮਿਫਲਂ ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰਹਤ੍ਤਮਗ੍ਗੇਨ ਅਣੁਸਹਗਤਂ ਕਾਮਰਾਗਂ ਅਣੁਸਹਗਤਂ ਬ੍ਯਾਪਾਦਂ ਜਹਤੀ’’ਤਿ.
੮੧੧. ਨ ਵਤ੍ਤਬ੍ਬਂ – ‘‘ਏਕੇਨ ਅਰਿਯਮਗ੍ਗੇਨ ਚਤ੍ਤਾਰਿ ਸਾਮਞ੍ਞਫਲਾਨਿ ਸਚ੍ਛਿਕਰੋਤੀ’’ਤਿ? ਆਮਨ੍ਤਾ. ਭਗਵਤਾ ਸੋਤਾਪਤ੍ਤਿਮਗ੍ਗੋ ਭਾਵਿਤੋਤਿ? ਆਮਨ੍ਤਾ. ਭਗਵਾ ਸੋਤਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਭਗਵਤਾ ਸਕਦਾਗਾਮਿ…ਪੇ… ਅਨਾਗਾਮਿਮਗ੍ਗੋ ਭਾਵਿਤੋਤਿ? ਆਮਨ੍ਤਾ. ਭਗਵਾ ਅਨਾਗਾਮੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੮੧੨. ਭਗਵਾ ਏਕੇਨ ਅਰਿਯਮਗ੍ਗੇਨ ਚਤ੍ਤਾਰਿ ਸਾਮਞ੍ਞਫਲਾਨਿ ਸਚ੍ਛਿਕਰੋਤਿ, ਸਾਵਕਾ ਚਤੂਹਿ ਅਰਿਯਮਗ੍ਗੇਹਿ ਚਤ੍ਤਾਰਿ ਸਾਮਞ੍ਞਫਲਾਨਿ ਸਚ੍ਛਿਕਰੋਨ੍ਤੀਤਿ? ਆਮਨ੍ਤਾ. ਸਾਵਕਾ ਬੁਦ੍ਧਸ੍ਸ ਭਗਵਤੋ ਅਦਿਟ੍ਠਂ ਦਕ੍ਖਨ੍ਤਿ ਅਨਧਿਗਤਂ ਅਧਿਗਚ੍ਛਨ੍ਤਿ ਅਸਚ੍ਛਿਕਤਂ ਸਚ੍ਛਿਕਰੋਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਏਕਮਗ੍ਗਕਥਾ ਨਿਟ੍ਠਿਤਾ.
੧੮. ਅਟ੍ਠਾਰਸਮਵਗ੍ਗੋ
(੧੮੨) ੬. ਝਾਨਸਙ੍ਕਨ੍ਤਿਕਥਾ
੮੧੩. ਝਾਨਾ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਪਠਮਾ ਝਾਨਾ ਤਤਿਯਂ ਝਾਨਂ ਸਙ੍ਕਮਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਝਾਨਾ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਦੁਤਿਯਾ ਝਾਨਾ ਚਤੁਤ੍ਥਂ ਝਾਨਂ ਸਙ੍ਕਮਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਪਠਮਾ ਝਾਨਾ ਦੁਤਿਯਂ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਯਾ ਪਠਮਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਦੁਤਿਯਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਪਠਮਾ ਝਾਨਾ ਦੁਤਿਯਂ ਝਾਨਂ ਸਙ੍ਕਮਤਿ, ਨ ਵਤ੍ਤਬ੍ਬਂ – ‘‘ਯਾ ਪਠਮਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਦੁਤਿਯਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀ’’ਤਿ? ਆਮਨ੍ਤਾ. ਦੁਤਿਯਂ ਝਾਨਂ ਅਨਾਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਅਪ੍ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਦੁਤਿਯਂ ਝਾਨਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਦੁਤਿਯਂ ਝਾਨਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਠਮਾ ਝਾਨਾ ਦੁਤਿਯਂ ਝਾਨਂ ਸਙ੍ਕਮਤੀ’’ਤਿ…ਪੇ….
ਪਠਮਾ ਝਾਨਾ ਦੁਤਿਯਂ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਪਠਮਂ ਝਾਨਂ ਕਾਮੇ ਆਦੀਨਵਤੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਦੁਤਿਯਂ ਝਾਨਂ ਕਾਮੇ ਆਦੀਨਵਤੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਪਠਮਂ ਝਾਨਂ ਸਵਿਤਕ੍ਕਂ ਸਵਿਚਾਰਨ੍ਤਿ? ਆਮਨ੍ਤਾ. ਦੁਤਿਯਂ ਝਾਨਂ ਸਵਿਤਕ੍ਕਂ ਸਵਿਚਾਰਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਠਮਾ ਝਾਨਾ ਦੁਤਿਯਂ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਤਞ੍ਞੇਵ ਪਠਮਂ ਝਾਨਂ ਤਂ ਦੁਤਿਯਂ ਝਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੮੧੪. ਦੁਤਿਯਾ ਝਾਨਾ ਤਤਿਯਂ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਯਾ ਦੁਤਿਯਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਤਤਿਯਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦੁਤਿਯਾ ਝਾਨਾ ਤਤਿਯਂ ਝਾਨਂ ਸਙ੍ਕਮਤਿ, ਨ ਵਤ੍ਤਬ੍ਬਂ – ‘‘ਯਾ ਦੁਤਿਯਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਤਤਿਯਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀ’’ਤਿ? ਆਮਨ੍ਤਾ. ਤਤਿਯਂ ਝਾਨਂ ਅਨਾਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਅਪ੍ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਨਨੁ ਤਤਿਯਂ ਝਾਨਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਤਤਿਯਂ ਝਾਨਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦੁਤਿਯਾ ਝਾਨਾ ਤਤਿਯਂ ਝਾਨਂ ਸਙ੍ਕਮਤੀ’’ਤਿ.
ਦੁਤਿਯਾ ਝਾਨਾ ਤਤਿਯਂ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਦੁਤਿਯਂ ਝਾਨਂ ਵਿਤਕ੍ਕਵਿਚਾਰੇ ਆਦੀਨਵਤੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਤਤਿਯਂ ਝਾਨਂ ਵਿਤਕ੍ਕਵਿਚਾਰੇ ਆਦੀਨਵਤੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦੁਤਿਯਂ ਝਾਨਂ ਸਪ੍ਪੀਤਿਕਨ੍ਤਿ? ਆਮਨ੍ਤਾ. ਤਤਿਯਂ ਝਾਨਂ ਸਪ੍ਪੀਤਿਕਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੁਤਿਯਾ ਝਾਨਾ ਤਤਿਯਂ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਤਞ੍ਞੇਵ ਦੁਤਿਯਂ ਝਾਨਂ ਤਂ ਤਤਿਯਂ ਝਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੮੧੫. ਤਤਿਯਾ ਝਾਨਾ ਚਤੁਤ੍ਥਂ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਯਾ ਤਤਿਯਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਚਤੁਤ੍ਥਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਤਤਿਯਾ ਝਾਨਾ ਚਤੁਤ੍ਥਂ ਝਾਨਂ ਸਙ੍ਕਮਤਿ, ਨ ਵਤ੍ਤਬ੍ਬਂ – ‘‘ਯਾ ਤਤਿਯਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਚਤੁਤ੍ਥਸ੍ਸ ਝਾਨਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀ’’ਤਿ? ਆਮਨ੍ਤਾ. ਚਤੁਤ੍ਥਂ ਝਾਨਂ ਅਨਾਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਅਪ੍ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਚਤੁਤ੍ਥਂ ਝਾਨਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਚਤੁਤ੍ਥਂ ਝਾਨਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਤਤਿਯਾ ਝਾਨਾ ਚਤੁਤ੍ਥਂ ਝਾਨਂ ਸਙ੍ਕਮਤੀ’’ਤਿ.
ਤਤਿਯਾ ਝਾਨਾ ਚਤੁਤ੍ਥਂ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਤਤਿਯਂ ਝਾਨਂ ਪੀਤਿਂ ਆਦੀਨਵਤੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਚਤੁਤ੍ਥਂ ਝਾਨਂ ਪੀਤਿਂ ਆਦੀਨਵਤੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਤਤਿਯਂ ਝਾਨਂ ਸੁਖਸਹਗਤਨ੍ਤਿ? ਆਮਨ੍ਤਾ. ਚਤੁਤ੍ਥਂ ਝਾਨਂ ਸੁਖਸਹਗਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਤਿਯਾ ਝਾਨਾ ਚਤੁਤ੍ਥਂ ਝਾਨਂ ਸਙ੍ਕਮਤੀਤਿ? ਆਮਨ੍ਤਾ. ਤਞ੍ਞੇਵ ਤਤਿਯਂ ਝਾਨਂ ਤਂ ਚਤੁਤ੍ਥਂ ਝਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੮੧੬. ਨ ਵਤ੍ਤਬ੍ਬਂ – ‘‘ਝਾਨਾ ਝਾਨਂ ਸਙ੍ਕਮਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਭਿਕ੍ਖੁ ਵਿਵਿਚ੍ਚੇਵ ਕਾਮੇਹਿ…ਪੇ… ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਰਤੀ’’ਤਿ [ਅ. ਨਿ. ੨.੧੩; ੪.੧੬੩]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਝਾਨਾ ਝਾਨਂ ਸਙ੍ਕਮਤੀਤਿ.
ਝਾਨਸਙ੍ਕਨ੍ਤਿਕਥਾ ਨਿਟ੍ਠਿਤਾ.
੧੮. ਅਟ੍ਠਾਰਸਮਵਗ੍ਗੋ
(੧੮੩) ੭. ਝਾਨਨ੍ਤਰਿਕਕਥਾ
੮੧੭. ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਤ੍ਥਿ ਫਸ੍ਸਨ੍ਤਰਿਕਾ…ਪੇ… ਅਤ੍ਥਿ ਸਞ੍ਞਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਹਞ੍ਚਿ ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਝਾਨਨ੍ਤਰਿਕਾ’’ਤਿ.
ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਹਞ੍ਚਿ ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਝਾਨਨ੍ਤਰਿਕਾ’’ਤਿ.
੮੧੮. ਪਠਮਸ੍ਸ ਚ ਝਾਨਸ੍ਸ ਦੁਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਪਠਮਸ੍ਸ ਚ ਝਾਨਸ੍ਸ ਦੁਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਅਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦੁਤਿਯਸ੍ਸ ਚ ਝਾਨਸ੍ਸ ਤਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਪਠਮਸ੍ਸ ਚ ਝਾਨਸ੍ਸ ਦੁਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਤਤਿਯਸ੍ਸ ਚ ਝਾਨਸ੍ਸ ਚਤੁਤ੍ਥਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਪਠਮਸ੍ਸ ਚ ਝਾਨਸ੍ਸ ਦੁਤਿਯਸ੍ਸ ਚ ਝਾਨਸ੍ਸ ਅਨ੍ਤਰੇ ਨਤ੍ਥਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੮੧੯. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਸਵਿਤਕ੍ਕੋ ਸਵਿਚਾਰੋ ਸਮਾਧਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਵਿਤਕ੍ਕੋ ਅਵਿਚਾਰੋ ਸਮਾਧਿ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਸਵਿਤਕ੍ਕੋ ਸਵਿਚਾਰੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਵਿਤਕ੍ਕੋ ਅਵਿਚਾਰੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੮੨੦. ਦ੍ਵਿਨ੍ਨਂ ਝਾਨਾਨਂ ਪਟੁਪ੍ਪਨ੍ਨਾਨਮਨ੍ਤਰੇ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧੀਤਿ? ਆਮਨ੍ਤਾ. ਨਨੁ ਅਵਿਤਕ੍ਕੇ ਵਿਚਾਰਮਤ੍ਤੇ ਸਮਾਧਿਮ੍ਹਿ ਵਤ੍ਤਮਾਨੇ ਪਠਮਂ ਝਾਨਂ ਨਿਰੁਦ੍ਧਂ ਦੁਤਿਯਂ ਝਾਨਂ ਪਟੁਪ੍ਪਨ੍ਨਨ੍ਤਿ? ਆਮਨ੍ਤਾ. ਹਞ੍ਚਿ ਅਵਿਤਕ੍ਕੇ ਵਿਚਾਰਮਤ੍ਤੇ ਸਮਾਧਿਮ੍ਹਿ ਵਤ੍ਤਮਾਨੇ ਪਠਮਂ ਝਾਨਂ ਨਿਰੁਦ੍ਧਂ ਦੁਤਿਯਂ ਝਾਨਂ ਪਟੁਪ੍ਪਨ੍ਨਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦ੍ਵਿਨ੍ਨਂ ਝਾਨਾਨਂ ਪਟੁਪ੍ਪਨ੍ਨਾਨਮਨ੍ਤਰੇ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ.
੮੨੧. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਨ ਝਾਨਨ੍ਤਰਿਕਾਤਿ? ਆਮਨ੍ਤਾ. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਪਠਮਂ ਝਾਨਂ…ਪੇ… ਦੁਤਿਯਂ ਝਾਨਂ…ਪੇ… ਤਤਿਯਂ ਝਾਨਂ…ਪੇ… ਚਤੁਤ੍ਥਂ ਝਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ.
੮੨੨. ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾਤਿ? ਆਮਨ੍ਤਾ. ਨਨੁ ਤਯੋ ਸਮਾਧੀ ਵੁਤ੍ਤਾ ਭਗਵਤਾ – ਸਵਿਤਕ੍ਕੋ ਸਵਿਚਾਰੋ ਸਮਾਧਿ, ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ, ਅਵਿਤਕ੍ਕੋ ਅਵਿਚਾਰੋ ਸਮਾਧੀਤਿ [ਦੀ. ਨਿ. ੩.੩੦੫, ੩੫੩]? ਆਮਨ੍ਤਾ. ਹਞ੍ਚਿ ਤਯੋ ਸਮਾਧੀ ਵੁਤ੍ਤਾ ਭਗਵਤਾ – ਸਵਿਤਕ੍ਕੋ…ਪੇ… ਅਵਿਚਾਰੋ ਸਮਾਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ ਝਾਨਨ੍ਤਰਿਕਾ’’ਤਿ.
ਝਾਨਨ੍ਤਰਿਕਕਥਾ ਨਿਟ੍ਠਿਤਾ.
੧੮. ਅਟ੍ਠਾਰਸਮਵਗ੍ਗੋ
(੧੮੪) ੮. ਸਦ੍ਦਂ ਸੁਣਾਤੀਤਿਕਥਾ
੮੨੩. ਸਮਾਪਨ੍ਨੋ ਸਦ੍ਦਂ ਸੁਣਾਤੀਤਿ? ਆਮਨ੍ਤਾ. ਸਮਾਪਨ੍ਨੋ ਚਕ੍ਖੁਨਾ ਰੂਪਂ ਪਸ੍ਸਤਿ…ਪੇ… ਸੋਤੇਨ…ਪੇ… ਘਾਨੇਨ…ਪੇ… ਜਿਵ੍ਹਾਯ…ਪੇ… ਕਾਯੇਨ ਫੋਟ੍ਠਬ੍ਬਂ ਫੁਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਸਮਾਪਨ੍ਨੋ ਸਦ੍ਦਂ ਸੁਣਾਤੀਤਿ? ਆਮਨ੍ਤਾ. ਸੋਤਵਿਞ੍ਞਾਣਸਮਙ੍ਗੀ ਸਮਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ. ਨਨੁ ਸਮਾਧਿ ਮਨੋਵਿਞ੍ਞਾਣਸਮਙ੍ਗਿਸ੍ਸਾਤਿ? ਆਮਨ੍ਤਾ. ਹਞ੍ਚਿ ਸਮਾਧਿ ਮਨੋਵਿਞ੍ਞਾਣਸਮਙ੍ਗਿਸ੍ਸ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨੋ ਸਦ੍ਦਂ ਸੁਣਾਤੀ’’ਤਿ.
ਸਮਾਧਿ ਮਨੋਵਿਞ੍ਞਾਣਸਮਙ੍ਗਿਸ੍ਸ, ਸੋਤਵਿਞ੍ਞਾਣਸਮਙ੍ਗੀ ਸਦ੍ਦਂ ਸੁਣਾਤੀਤਿ? ਆਮਨ੍ਤਾ. ਹਞ੍ਚਿ ਸਮਾਧਿ ਮਨੋਵਿਞ੍ਞਾਣਸਮਙ੍ਗਿਸ੍ਸ, ਸੋਤਵਿਞ੍ਞਾਣਸਮਙ੍ਗੀ ਸਦ੍ਦਂ ਸੁਣਾਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨੋ ਸਦ੍ਦਂ ਸੁਣਾਤੀ’’ਤਿ. ਸਮਾਧਿ ਮਨੋਵਿਞ੍ਞਾਣਸਮਙ੍ਗਿਸ੍ਸ, ਸੋਤਵਿਞ੍ਞਾਣਸਮਙ੍ਗੀ ਸਦ੍ਦਂ ਸੁਣਾਤੀਤਿ? ਆਮਨ੍ਤਾ. ਦ੍ਵਿਨ੍ਨਂ ਫਸ੍ਸਾਨਂ…ਪੇ… ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੮੨੪. ਨ ਵਤ੍ਤਬ੍ਬਂ – ‘‘ਸਮਾਪਨ੍ਨੋ ਸਦ੍ਦਂ ਸੁਣਾਤੀ’’ਤਿ? ਆਮਨ੍ਤਾ. ਨਨੁ ਪਠਮਸ੍ਸ ਝਾਨਸ੍ਸ ਸਦ੍ਦੋ ਕਣ੍ਟਕੋ ਵੁਤ੍ਤੋ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਪਠਮਸ੍ਸ ਝਾਨਸ੍ਸ ਸਦ੍ਦੋ ਕਣ੍ਟਕੋ ਵੁਤ੍ਤੋ ਭਗਵਤਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨੋ ਸਦ੍ਦਂ ਸੁਣਾਤੀ’’ਤਿ.
੮੨੫. ਪਠਮਸ੍ਸ ਝਾਨਸ੍ਸ ਸਦ੍ਦੋ ਕਣ੍ਟਕੋ ਵੁਤ੍ਤੋ ਭਗਵਤਾਤਿ, ਸਮਾਪਨ੍ਨੋ ਸਦ੍ਦਂ ਸੁਣਾਤੀਤਿ? ਆਮਨ੍ਤਾ. ਦੁਤਿਯਸ੍ਸ ਝਾਨਸ੍ਸ ਵਿਤਕ੍ਕੋ ਵਿਚਾਰੋ ਕਣ੍ਟਕੋ ਵੁਤ੍ਤੋ ਭਗਵਤਾ, ਅਤ੍ਥਿ ਤਸ੍ਸ ਵਿਤਕ੍ਕਵਿਚਾਰਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਪਠਮਸ੍ਸ ਝਾਨਸ੍ਸ ਸਦ੍ਦੋ ਕਣ੍ਟਕੋ ਵੁਤ੍ਤੋ ਭਗਵਤਾਤਿ, ਸਮਾਪਨ੍ਨੋ ਸਦ੍ਦਂ ਸੁਣਾਤੀਤਿ? ਆਮਨ੍ਤਾ. ਤਤਿਯਸ੍ਸ ਝਾਨਸ੍ਸ ਪੀਤਿ ਕਣ੍ਟਕੋ…ਪੇ… ਚਤੁਤ੍ਥਸ੍ਸ ਝਾਨਸ੍ਸ ਅਸ੍ਸਾਸਪਸ੍ਸਾਸੋ ਕਣ੍ਟਕੋ … ਆਕਾਸਾਨਞ੍ਚਾਯਤਨਂ ਸਮਾਪਨ੍ਨਸ੍ਸ ਰੂਪਸਞ੍ਞਾ ਕਣ੍ਟਕੋ… ਵਿਞ੍ਞਾਣਞ੍ਚਾਯਤਨਂ ਸਮਾਪਨ੍ਨਸ੍ਸ ਆਕਾਸਾਨਞ੍ਚਾਯਤਨਸਞ੍ਞਾ ਕਣ੍ਟਕੋ… ਆਕਿਞ੍ਚਞ੍ਞਾਯਤਨਂ ਸਮਾਪਨ੍ਨਸ੍ਸ ਵਿਞ੍ਞਾਣਞ੍ਚਾਯਤਨਸਞ੍ਞਾ ਕਣ੍ਟਕੋ… ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਸ੍ਸ ਆਕਿਞ੍ਚਞ੍ਞਾਯਤਨਸਞ੍ਞਾ ਕਣ੍ਟਕੋ… ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਸਞ੍ਞਾ ਚ ਵੇਦਨਾ ਚ ਕਣ੍ਟਕੋ ਵੁਤ੍ਤੋ ਭਗਵਤਾ, ਅਤ੍ਥਿ ਤਸ੍ਸ ਸਞ੍ਞਾ ਚ ਵੇਦਨਾ ਚਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਸਦ੍ਦਂ ਸੁਣਾਤੀਤਿਕਥਾ ਨਿਟ੍ਠਿਤਾ.
੧੮. ਅਟ੍ਠਾਰਸਮਵਗ੍ਗੋ
(੧੮੫) ੯. ਚਕ੍ਖੁਨਾ ਰੂਪਂ ਪਸ੍ਸਤੀਤਿਕਥਾ
੮੨੬. ਚਕ੍ਖੁਨਾ ਰੂਪਂ ਪਸ੍ਸਤੀਤਿ? ਆਮਨ੍ਤਾ. ਰੂਪੇਨ ਰੂਪਂ ਪਸ੍ਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰੂਪੇਨ ਰੂਪਂ ਪਸ੍ਸਤੀਤਿ? ਆਮਨ੍ਤਾ. ਰੂਪੇਨ ਰੂਪਂ ਪਟਿਵਿਜਾਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰੂਪੇਨ ਰੂਪਂ ਪਟਿਵਿਜਾਨਾਤੀਤਿ? ਆਮਨ੍ਤਾ. ਰੂਪਂ ਮਨੋਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਕ੍ਖੁਨਾ ਰੂਪਂ ਪਸ੍ਸਤੀਤਿ? ਆਮਨ੍ਤਾ. ਅਤ੍ਥਿ ਚਕ੍ਖੁਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਨਤ੍ਥਿ ਚਕ੍ਖੁਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਚਕ੍ਖੁਸ੍ਸ ਆਵਟ੍ਟਨਾ…ਪੇ… ਪਣਿਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਕ੍ਖੁਨਾ ਰੂਪਂ ਪਸ੍ਸਤੀ’’ਤਿ.
ਸੋਤੇਨ ਸਦ੍ਦਂ ਸੁਣਾਤੀਤਿ…ਪੇ… ਘਾਨੇਨ ਗਨ੍ਧਂ ਘਾਯਤੀਤਿ…ਪੇ… ਜਿਵ੍ਹਾਯ ਰਸਂ ਸਾਯਤੀਤਿ…ਪੇ… ਕਾਯੇਨ ਫੋਟ੍ਠਬ੍ਬਂ ਫੁਸਤੀਤਿ? ਆਮਨ੍ਤਾ. ਰੂਪੇਨ ਰੂਪਂ ਫੁਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਰੂਪੇਨ ਰੂਪਂ ਫੁਸਤੀਤਿ? ਆਮਨ੍ਤਾ. ਰੂਪੇਨ ਰੂਪਂ ਪਟਿਵਿਜਾਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰੂਪੇਨ ਰੂਪਂ ਪਟਿਵਿਜਾਨਾਤੀਤਿ? ਆਮਨ੍ਤਾ. ਰੂਪਂ ਮਨੋਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਕਾਯੇਨ ਫੋਟ੍ਠਬ੍ਬਂ ਫੁਸਤੀਤਿ? ਆਮਨ੍ਤਾ. ਅਤ੍ਥਿ ਕਾਯਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਨਤ੍ਥਿ ਕਾਯਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਕਾਯਸ੍ਸ ਆਵਟ੍ਟਨਾ…ਪੇ… ਪਣਿਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਕਾਯੇਨ ਫੋਟ੍ਠਬ੍ਬਂ ਫੁਸਤੀ’’ਤਿ…ਪੇ….
੮੨੭. ਨ ਵਤ੍ਤਬ੍ਬਂ – ‘‘ਚਕ੍ਖੁਨਾ ਰੂਪਂ ਪਸ੍ਸਤੀ’’ਤਿ…ਪੇ… ‘‘ਕਾਯੇਨ ਫੋਟ੍ਠਬ੍ਬਂ ਫੁਸਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਭਿਕ੍ਖੁ ਚਕ੍ਖੁਨਾ ਰੂਪਂ ਪਸ੍ਸਤਿ…ਪੇ… ਕਾਯੇਨ ਫੋਟ੍ਠਬ੍ਬਂ ਫੁਸਤੀ’’ਤਿ [ਮ. ਨਿ. ੧.੩੪੯; ਅ. ਨਿ. ੪.੩੭ (ਅਟ੍ਠਕਥਾ ਪਸ੍ਸਿਤਬ੍ਬਾ)]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਚਕ੍ਖੁਨਾ ਰੂਪਂ ਪਸ੍ਸਤਿ…ਪੇ… ਕਾਯੇਨ ਫੋਟ੍ਠਬ੍ਬਂ ਫੁਸਤੀਤਿ.
ਚਕ੍ਖੁਨਾ ਰੂਪਂ ਪਸ੍ਸਤੀਤਿਕਥਾ ਨਿਟ੍ਠਿਤਾ.
ਅਟ੍ਠਾਰਸਮਵਗ੍ਗੋ.
ਤਸ੍ਸੁਦ੍ਦਾਨਂ –
ਬੁਦ੍ਧੋ ਭਗਵਾ ਮਨੁਸ੍ਸਲੋਕੇ ਅਟ੍ਠਾਸਿ, ਬੁਦ੍ਧੇਨ ਭਗਵਤਾ ਧਮ੍ਮੋ ਦੇਸਿਤੋ, ਨਤ੍ਥਿ ਬੁਦ੍ਧਸ੍ਸ ਭਗਵਤੋ ਕਰੁਣਾ, ਬੁਦ੍ਧਸ੍ਸ ਭਗਵਤੋ ਉਚ੍ਚਾਰਪਸ੍ਸਾਵੋ ਅਤਿਵਿਯ ਅਞ੍ਞੇ ਗਨ੍ਧਜਾਤੇ ਅਧਿਗ੍ਗਣ੍ਹਾਤਿ, ਏਕੇਨ ਅਰਿਯਮਗ੍ਗੇਨ ਚਤ੍ਤਾਰਿ ਸਾਮਞ੍ਞਫਲਾਨਿ ਸਚ੍ਛਿਕਰੋਤਿ, ਝਾਨਾ ਝਾਨਂ ਸਙ੍ਕਮਤਿ, ਅਤ੍ਥਿ ਝਾਨਨ੍ਤਰਿਕਾ, ਸਮਾਪਨ੍ਨੋ ਸਦ੍ਦਂ ਸੁਣਾਤਿ, ਚਕ੍ਖੁਨਾ ਰੂਪਂ ਪਸ੍ਸਤਿ ਕਾਯੇਨ ਫੋਟ੍ਠਬ੍ਬਂ ਫੁਸਤਿ.