੧੭. ਸਤ੍ਤਰਸਮਵਗ੍ਗੋ

(੧੬੬) ੧. ਅਰਹਤੋ ਪੁਞ੍ਞੂਪਚਯਕਥਾ

੭੭੬. ਅਤ੍ਥਿ ਅਰਹਤੋ ਪੁਞ੍ਞੂਪਚਯੋਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਅਪੁਞ੍ਞੂਪਚਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਅਰਹਤੋ ਅਪੁਞ੍ਞੂਪਚਯੋਤਿ? ਆਮਨ੍ਤਾ. ਨਤ੍ਥਿ ਅਰਹਤੋ ਪੁਞ੍ਞੂਪਚਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੭੭. ਅਤ੍ਥਿ ਅਰਹਤੋ ਪੁਞ੍ਞੂਪਚਯੋਤਿ? ਆਮਨ੍ਤਾ. ਅਰਹਾ ਪੁਞ੍ਞਾਭਿਸਙ੍ਖਾਰਂ ਅਭਿਸਙ੍ਖਰੋਤਿ, ਆਨੇਞ੍ਜਾਭਿਸਙ੍ਖਾਰਂ ਅਭਿਸਙ੍ਖਰੋਤਿ, ਗਤਿਸਂਵਤ੍ਤਨਿਯਂ ਕਮ੍ਮਂ ਕਰੋਤਿ, ਭਵਸਂਵਤ੍ਤਨਿਯਂ ਕਮ੍ਮਂ ਕਰੋਤਿ, ਇਸ੍ਸਰਿਯਸਂਵਤ੍ਤਨਿਯਂ ਕਮ੍ਮਂ ਕਰੋਤਿ, ਅਧਿਪਚ੍ਚਸਂਵਤ੍ਤਨਿਯਂ [ਆਧਿਪਚ੍ਚਸਂਵਤ੍ਤਨਿਕਂ (?)] ਕਮ੍ਮਂ ਕਰੋਤਿ, ਮਹਾਭੋਗਸਂਵਤ੍ਤਨਿਯਂ ਕਮ੍ਮਂ ਕਰੋਤਿ, ਮਹਾਪਰਿਵਾਰਸਂਵਤ੍ਤਨਿਯਂ ਕਮ੍ਮਂ ਕਰੋਤਿ, ਦੇਵਸੋਭਗ੍ਯਸਂਵਤ੍ਤਨਿਯਂ ਕਮ੍ਮਂ ਕਰੋਤਿ, ਮਨੁਸ੍ਸਸੋਭਗ੍ਯਸਂਵਤ੍ਤਨਿਯਂ ਕਮ੍ਮਂ ਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੭੮. ਅਤ੍ਥਿ ਅਰਹਤੋ ਪੁਞ੍ਞੂਪਚਯੋਤਿ? ਆਮਨ੍ਤਾ. ਅਰਹਾ ਆਚਿਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਾ ਅਪਚਿਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਅਰਹਾ ਪਜਹਤੀਤਿ…ਪੇ… ਅਰਹਾ ਉਪਾਦਿਯਤੀਤਿ…ਪੇ… ਅਰਹਾ ਵਿਸਿਨੇਤੀਤਿ…ਪੇ… ਅਰਹਾ ਉਸ੍ਸਿਨੇਤੀਤਿ…ਪੇ… ਅਰਹਾ ਵਿਧੂਪੇਤੀਤਿ …ਪੇ… ਅਰਹਾ ਸਨ੍ਧੂਪੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਰਹਾ ਨੇਵਾਚਿਨਾਤਿ ਨ ਅਪਚਿਨਾਤਿ ਅਪਚਿਨਿਤ੍ਵਾ ਠਿਤੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨੇਵਾਚਿਨਾਤਿ ਨਾਪਚਿਨਾਤਿ ਅਪਚਿਨਿਤ੍ਵਾ ਠਿਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਪੁਞ੍ਞੂਪਚਯੋ’’ਤਿ.

ਨਨੁ ਅਰਹਾ ਨੇਵ ਪਜਹਤਿ ਨ ਉਪਾਦਿਯਤਿ ਪਜਹਿਤ੍ਵਾ ਠਿਤੋ, ਨੇਵ ਵਿਸਿਨੇਤਿ ਨ ਉਸ੍ਸਿਨੇਤਿ ਵਿਸਿਨੇਤ੍ਵਾ ਠਿਤੋ, ਨੇਵ ਵਿਧੂਪੇਤਿ ਨ ਸਨ੍ਧੂਪੇਤਿ ਵਿਧੂਪੇਤ੍ਵਾ ਠਿਤੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨੇਵ ਵਿਧੂਪੇਤਿ ਨ ਸਨ੍ਧੂਪੇਤਿ ਵਿਧੂਪੇਤ੍ਵਾ ਠਿਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਪੁਞ੍ਞੂਪਚਯੋ’’ਤਿ.

੭੭੯. ਨਤ੍ਥਿ ਅਰਹਤੋ ਪੁਞ੍ਞੂਪਚਯੋਤਿ? ਆਮਨ੍ਤਾ. ਅਰਹਾ ਦਾਨਂ ਦਦੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਅਰਹਾ ਦਾਨਂ ਦਦੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਅਰਹਤੋ ਪੁਞ੍ਞੂਪਚਯੋ’’ਤਿ.

ਅਰਹਾ ਚੀਵਰਂ ਦਦੇਯ੍ਯ…ਪੇ… ਪਿਣ੍ਡਪਾਤਂ ਦਦੇਯ੍ਯ… ਸੇਨਾਸਨਂ ਦਦੇਯ੍ਯ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦਦੇਯ੍ਯ… ਖਾਦਨੀਯਂ ਦਦੇਯ੍ਯ… ਭੋਜਨੀਯਂ ਦਦੇਯ੍ਯ… ਪਾਨੀਯਂ ਦਦੇਯ੍ਯ… ਚੇਤਿਯਂ ਵਨ੍ਦੇਯ੍ਯ… ਚੇਤਿਯੇ ਮਾਲਂ ਆਰੋਪੇਯ੍ਯ… ਗਨ੍ਧਂ ਆਰੋਪੇਯ੍ਯ… ਵਿਲੇਪਨਂ ਆਰੋਪੇਯ੍ਯ…ਪੇ… ਚੇਤਿਯਂ ਅਭਿਦਕ੍ਖਿਣਂ [ਪਦਕ੍ਖਿਣਂ (?)] ਕਰੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਅਰਹਾ ਚੇਤਿਯਂ ਅਭਿਦਕ੍ਖਿਣਂ ਕਰੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਅਰਹਤੋ ਪੁਞ੍ਞੂਪਚਯੋ’’ਤਿ.

ਅਤ੍ਥਿ ਅਰਹਤੋ ਪੁਞ੍ਞੂਪਚਯੋਤਿਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੬੭) ੨. ਨਤ੍ਥਿ ਅਰਹਤੋ ਅਕਾਲਮਚ੍ਚੂਤਿਕਥਾ

੭੮੦. ਨਤ੍ਥਿ ਅਰਹਤੋ ਅਕਾਲਮਚ੍ਚੂਤਿ? ਆਮਨ੍ਤਾ. ਨਤ੍ਥਿ ਅਰਹਨ੍ਤਘਾਤਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਅਰਹਨ੍ਤਘਾਤਕੋਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਅਕਾਲਮਚ੍ਚੂਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਅਰਹਤੋ ਅਕਾਲਮਚ੍ਚੂਤਿ? ਆਮਨ੍ਤਾ. ਯੋ ਅਰਹਨ੍ਤਂ ਜੀਵਿਤਾ ਵੋਰੋਪੇਤਿ, ਸਤਿ ਜੀਵਿਤੇ ਜੀਵਿਤਾਵਸੇਸੇ ਜੀਵਿਤਾ ਵੋਰੋਪੇਤਿ, ਅਸਤਿ ਜੀਵਿਤੇ ਜੀਵਿਤਾਵਸੇਸੇ ਜੀਵਿਤਾ ਵੋਰੋਪੇਤੀਤਿ? ਸਤਿ ਜੀਵਿਤੇ ਜੀਵਿਤਾਵਸੇਸੇ ਜੀਵਿਤਾ ਵੋਰੋਪੇਤੀਤਿ. ਹਞ੍ਚਿ ਸਤਿ ਜੀਵਿਤੇ ਜੀਵਿਤਾਵਸੇਸੇ ਜੀਵਿਤਾ ਵੋਰੋਪੇਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਅਰਹਤੋ ਅਕਾਲਮਚ੍ਚੂ’’ਤਿ. ਅਸਤਿ ਜੀਵਿਤੇ ਜੀਵਿਤਾਵਸੇਸੇ ਜੀਵਿਤਾ ਵੋਰੋਪੇਤੀਤਿ, ਨਤ੍ਥਿ ਅਰਹਨ੍ਤਘਾਤਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੮੧. ਨਤ੍ਥਿ ਅਰਹਤੋ ਅਕਾਲਮਚ੍ਚੂਤਿ? ਆਮਨ੍ਤਾ. ਅਰਹਤੋ ਕਾਯੇ ਵਿਸਂ ਨ ਕਮੇਯ੍ਯ, ਸਤ੍ਥਂ ਨ ਕਮੇਯ੍ਯ, ਅਗ੍ਗਿ ਨ ਕਮੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਰਹਤੋ ਕਾਯੇ ਵਿਸਂ ਕਮੇਯ੍ਯ, ਸਤ੍ਥਂ ਕਮੇਯ੍ਯ, ਅਗ੍ਗਿ ਕਮੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਅਰਹਤੋ ਕਾਯੇ ਵਿਸਂ ਕਮੇਯ੍ਯ, ਸਤ੍ਥਂ ਕਮੇਯ੍ਯ, ਅਗ੍ਗਿ ਕਮੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਅਰਹਤੋ ਅਕਾਲਮਚ੍ਚੂ’’ਤਿ.

ਅਰਹਤੋ ਕਾਯੇ ਵਿਸਂ ਨ ਕਮੇਯ੍ਯ, ਸਤ੍ਥਂ ਨ ਕਮੇਯ੍ਯ, ਅਗ੍ਗਿ ਨ ਕਮੇਯ੍ਯਾਤਿ? ਆਮਨ੍ਤਾ. ਨਤ੍ਥਿ ਅਰਹਨ੍ਤਘਾਤਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੮੨. ਅਤ੍ਥਿ ਅਰਹਤੋ ਅਕਾਲਮਚ੍ਚੂਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਨਾਹਂ, ਭਿਕ੍ਖਵੇ, ਸਞ੍ਚੇਤਨਿਕਾਨਂ ਕਮ੍ਮਾਨਂ ਕਤਾਨਂ ਉਪਚਿਤਾਨਂ ਅਪ੍ਪਟਿਸਂਵੇਦਿਤ੍ਵਾ ਬ੍ਯਨ੍ਤੀਭਾਵਂ ਵਦਾਮਿ; ਤਞ੍ਚ ਖੋ ਦਿਟ੍ਠੇਵ ਧਮ੍ਮੇ ਉਪਪਜ੍ਜਂ ਵਾ ਅਪਰੇ ਵਾ ਪਰਿਯਾਯੇ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨਤ੍ਥਿ ਅਰਹਤੋ ਅਕਾਲਮਚ੍ਚੂਤਿ.

ਨਤ੍ਥਿ ਅਰਹਤੋ ਅਕਾਲਮਚ੍ਚੂਤਿਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੬੮) ੩. ਸਬ੍ਬਮਿਦਂ ਕਮ੍ਮਤੋਤਿਕਥਾ

੭੮੩. ਸਬ੍ਬਮਿਦਂ ਕਮ੍ਮਤੋਤਿ? ਆਮਨ੍ਤਾ. ਕਮ੍ਮਮ੍ਪਿ ਕਮ੍ਮਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਬ੍ਬਮਿਦਂ ਕਮ੍ਮਤੋਤਿ? ਆਮਨ੍ਤਾ. ਸਬ੍ਬਮਿਦਂ ਪੁਬ੍ਬੇਕਤਹੇਤੂਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਬ੍ਬਮਿਦਂ ਕਮ੍ਮਤੋਤਿ? ਆਮਨ੍ਤਾ. ਸਬ੍ਬਮਿਦਂ ਕਮ੍ਮਵਿਪਾਕਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੮੪. ਸਬ੍ਬਮਿਦਂ ਕਮ੍ਮਵਿਪਾਕਤੋਤਿ? ਆਮਨ੍ਤਾ. ਕਮ੍ਮਵਿਪਾਕੇਨ ਪਾਣਂ ਹਨੇਯ੍ਯਾਤਿ? ਆਮਨ੍ਤਾ. ਪਾਣਾਤਿਪਾਤੋ ਸਫਲੋਤਿ? ਆਮਨ੍ਤਾ. ਕਮ੍ਮਵਿਪਾਕੋ ਸਫਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਮ੍ਮਵਿਪਾਕੋ ਅਫਲੋਤਿ? ਆਮਨ੍ਤਾ. ਪਾਣਾਤਿਪਾਤੋ ਅਫਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਮ੍ਮਵਿਪਾਕੇਨ ਅਦਿਨ੍ਨਂ ਆਦਿਯੇਯ੍ਯ…ਪੇ… ਮੁਸਾ ਭਣੇਯ੍ਯ… ਪਿਸੁਣਂ ਭਣੇਯ੍ਯ… ਫਰੁਸਂ ਭਣੇਯ੍ਯ… ਸਮ੍ਫਂ ਪਲਪੇਯ੍ਯ… ਸਨ੍ਧਿਂ ਛਿਨ੍ਦੇਯ੍ਯ… ਨਿਲ੍ਲੋਪਂ ਹਰੇਯ੍ਯ… ਏਕਾਗਾਰਿਕਂ ਕਰੇਯ੍ਯ… ਪਰਿਪਨ੍ਥੇ ਤਿਟ੍ਠੇਯ੍ਯ… ਪਰਦਾਰਂ ਗਚ੍ਛੇਯ੍ਯ… ਗਾਮਘਾਤਕਂ ਕਰੇਯ੍ਯ… ਨਿਗਮਘਾਤਕਂ ਕਰੇਯ੍ਯ… ਕਮ੍ਮਵਿਪਾਕੇਨ ਦਾਨਂ ਦਦੇਯ੍ਯ… ਚੀਵਰਂ ਦਦੇਯ੍ਯ … ਪਿਣ੍ਡਪਾਤਂ ਦਦੇਯ੍ਯ… ਸੇਨਾਸਨਂ ਦਦੇਯ੍ਯ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦਦੇਯ੍ਯਾਤਿ? ਆਮਨ੍ਤਾ. ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰੋ ਸਫਲੋਤਿ? ਆਮਨ੍ਤਾ. ਕਮ੍ਮਵਿਪਾਕੋ ਸਫਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਮ੍ਮਵਿਪਾਕੋ ਅਫਲੋਤਿ? ਆਮਨ੍ਤਾ. ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰੋ ਅਫਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੮੫. ਨ ਵਤ੍ਤਬ੍ਬਂ – ‘‘ਸਬ੍ਬਮਿਦਂ ਕਮ੍ਮਤੋ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਕਮ੍ਮੁਨਾ ਵਤ੍ਤਤੀ [ਵਤ੍ਤਤਿ (ਪੀ. ਕ., ਮ. ਨਿ. ੨.੪੬੦), ਵਤ੍ਤਤੇ (?)] ਲੋਕੋ, ਕਮ੍ਮੁਨਾ ਵਤ੍ਤਤੀ [ਵਤ੍ਤਤਿ (ਪੀ. ਕ., ਮ. ਨਿ. ੨.੪੬੦), ਵਤ੍ਤਤੇ (?)] ਪਜਾ;

ਕਮ੍ਮਨਿਬਨ੍ਧਨਾ ਸਤ੍ਤਾ, ਰਥਸ੍ਸਾਣੀਵ ਯਾਯਤੋ [ਮ. ਨਿ. ੨.੪੬੦; ਸੁ. ਨਿ. ੬੫੯].

‘‘ਕਮ੍ਮੇਨ ਕਿਤ੍ਤਿਂ ਲਭਤੇ ਪਸਂਸਂ,

ਕਮ੍ਮੇਨ ਜਾਨਿਞ੍ਚ ਵਧਞ੍ਚ ਬਨ੍ਧਂ;

ਤਂ ਕਮ੍ਮਂ ਨਾਨਾਕਰਣਂ ਵਿਦਿਤ੍ਵਾ,

ਕਸ੍ਮਾ ਵਦੇ ਨਤ੍ਥਿ ਕਮ੍ਮਨ੍ਤਿ ਲੋਕੇ’’ਤਿ.

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ‘‘ਸਬ੍ਬਮਿਦਂ ਕਮ੍ਮਤੋ’’ਤਿ.

ਸਬ੍ਬਮਿਦਂ ਕਮ੍ਮਤੋਤਿਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੬੯) ੪. ਇਨ੍ਦ੍ਰਿਯਬਦ੍ਧਕਥਾ

੭੮੬. ਇਨ੍ਦ੍ਰਿਯਬਦ੍ਧਞ੍ਞੇਵ ਦੁਕ੍ਖਨ੍ਤਿ? ਆਮਨ੍ਤਾ. ਇਨ੍ਦ੍ਰਿਯਬਦ੍ਧਞ੍ਞੇਵ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਂ ਵਿਪਰਿਣਾਮਧਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਨਿਨ੍ਦ੍ਰਿਯਬਦ੍ਧਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਂ ਵਿਪਰਿਣਾਮਧਮ੍ਮਨ੍ਤਿ? ਆਮਨ੍ਤਾ. ਹਞ੍ਚਿ ਅਨਿਨ੍ਦ੍ਰਿਯਬਦ੍ਧਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਂ ਵਿਪਰਿਣਾਮਧਮ੍ਮਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਇਨ੍ਦ੍ਰਿਯਬਦ੍ਧਞ੍ਞੇਵ ਦੁਕ੍ਖ’’ਨ੍ਤਿ.

ਅਨਿਨ੍ਦ੍ਰਿਯਬਦ੍ਧਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ…ਪੇ… ਵਿਪਰਿਣਾਮਧਮ੍ਮਂ, ਤਞ੍ਚ ਨ ਦੁਕ੍ਖਨ੍ਤਿ? ਆਮਨ੍ਤਾ. ਇਨ੍ਦ੍ਰਿਯਬਦ੍ਧਂ ਅਨਿਚ੍ਚਂ ਸਙ੍ਖਤਂ…ਪੇ… ਵਿਪਰਿਣਾਮਧਮ੍ਮਂ, ਤਞ੍ਚ ਨ ਦੁਕ੍ਖਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਇਨ੍ਦ੍ਰਿਯਬਦ੍ਧਂ ਅਨਿਚ੍ਚਂ ਸਙ੍ਖਤਂ…ਪੇ… ਵਿਪਰਿਣਾਮਧਮ੍ਮਂ, ਤਞ੍ਚ ਦੁਕ੍ਖਨ੍ਤਿ [ਇਦਂ-ਪੁਚ੍ਛਾਦ੍ਵਯੇਨ ਪੁਰਿਮਪੁਚ੍ਛਾਦ੍ਵਯਸ੍ਸ ਪੁਰਤੋ ਭਵਿਤਬ੍ਬਂ]? ਆਮਨ੍ਤਾ. ਅਨਿਨ੍ਦ੍ਰਿਯਬਦ੍ਧਂ ਅਨਿਚ੍ਚਂ ਸਙ੍ਖਤਂ…ਪੇ… ਵਿਪਰਿਣਾਮਧਮ੍ਮਂ, ਤਞ੍ਚ ਦੁਕ੍ਖਨ੍ਤਿ [ਇਦਂ-ਪੁਚ੍ਛਾਦ੍ਵਯੇਨ ਪੁਰਿਮਪੁਚ੍ਛਾਦ੍ਵਯਸ੍ਸ ਪੁਰਤੋ ਭਵਿਤਬ੍ਬਂ]? ਨ ਹੇਵਂ ਵਤ੍ਤਬ੍ਬੇ…ਪੇ….

੭੮੭. ਇਨ੍ਦ੍ਰਿਯਬਦ੍ਧਞ੍ਞੇਵ ਦੁਕ੍ਖਨ੍ਤਿ? ਆਮਨ੍ਤਾ. ਨਨੁ ਯਦਨਿਚ੍ਚਂ ਤਂ ਦੁਕ੍ਖਂ [ਸਂ. ਨਿ. ੩.੧੫] ਵੁਤ੍ਤਂ ਭਗਵਤਾ – ‘‘ਅਨਿਨ੍ਦ੍ਰਿਯਬਦ੍ਧਂ ਅਨਿਚ੍ਚ’’ਨ੍ਤਿ? ਆਮਨ੍ਤਾ. ਹਞ੍ਚਿ ਯਦਨਿਚ੍ਚਂ ਤਂ ਦੁਕ੍ਖਂ [ਸਂ. ਨਿ. ੩.੧੫] ਵੁਤ੍ਤਂ ਭਗਵਤਾ – ਅਨਿਨ੍ਦ੍ਰਿਯਬਦ੍ਧਂ ਅਨਿਚ੍ਚਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਇਨ੍ਦ੍ਰਿਯਬਦ੍ਧਞ੍ਞੇਵ ਦੁਕ੍ਖ’’ਨ੍ਤਿ.

੭੮੮. ਨ ਵਤ੍ਤਬ੍ਬਂ – ‘‘ਇਨ੍ਦ੍ਰਿਯਬਦ੍ਧਞ੍ਞੇਵ ਦੁਕ੍ਖ’’ਨ੍ਤਿ? ਆਮਨ੍ਤਾ. ਯਥਾ ਇਨ੍ਦ੍ਰਿਯਬਦ੍ਧਸ੍ਸ ਦੁਕ੍ਖਸ੍ਸ ਪਰਿਞ੍ਞਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤਿ, ਏਵਮੇਵਂ ਅਨਿਨ੍ਦ੍ਰਿਯਬਦ੍ਧਸ੍ਸ ਦੁਕ੍ਖਸ੍ਸ ਪਰਿਞ੍ਞਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਯਥਾ ਇਨ੍ਦ੍ਰਿਯਬਦ੍ਧਂ ਦੁਕ੍ਖਂ ਪਰਿਞ੍ਞਾਤਂ ਨ ਪੁਨ ਉਪ੍ਪਜ੍ਜਤਿ, ਏਵਮੇਵਂ ਅਨਿਨ੍ਦ੍ਰਿਯਬਦ੍ਧਂ ਦੁਕ੍ਖਂ ਪਰਿਞ੍ਞਾਤਂ ਨ ਪੁਨ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਇਨ੍ਦ੍ਰਿਯਬਦ੍ਧਞ੍ਞੇਵ ਦੁਕ੍ਖਨ੍ਤਿ.

ਇਨ੍ਦ੍ਰਿਯਬਦ੍ਧਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੭੦) ੫. ਠਪੇਤ੍ਵਾ ਅਰਿਯਮਗ੍ਗਨ੍ਤਿਕਥਾ

੭੮੯. ਠਪੇਤ੍ਵਾ ਅਰਿਯਮਗ੍ਗਂ ਅਵਸੇਸਾ ਸਙ੍ਖਾਰਾ ਦੁਕ੍ਖਾਤਿ? ਆਮਨ੍ਤਾ. ਦੁਕ੍ਖਸਮੁਦਯੋਪਿ ਦੁਕ੍ਖੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੁਕ੍ਖਸਮੁਦਯੋਪਿ ਦੁਕ੍ਖੋਤਿ? ਆਮਨ੍ਤਾ. ਤੀਣੇਵ ਅਰਿਯਸਚ੍ਚਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੀਣੇਵ ਅਰਿਯਸਚ੍ਚਾਨੀਤਿ? ਆਮਨ੍ਤਾ. ਨਨੁ ਚਤ੍ਤਾਰਿ ਅਰਿਯਸਚ੍ਚਾਨਿ ਵੁਤ੍ਤਾਨਿ ਭਗਵਤਾ – ਦੁਕ੍ਖਂ, ਦੁਕ੍ਖਸਮੁਦਯੋ, ਦੁਕ੍ਖਨਿਰੋਧੋ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ? ਆਮਨ੍ਤਾ. ਹਞ੍ਚਿ ਚਤ੍ਤਾਰਿ ਅਰਿਯਸਚ੍ਚਾਨਿ ਵੁਤ੍ਤਾਨਿ ਭਗਵਤਾ – ਦੁਕ੍ਖਂ, ਦੁਕ੍ਖਸਮੁਦਯੋ, ਦੁਕ੍ਖਨਿਰੋਧੋ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ; ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਤੀਣੇਵ ਅਰਿਯਸਚ੍ਚਾਨੀ’’ਤਿ.

ਦੁਕ੍ਖਸਮੁਦਯੋਪਿ ਦੁਕ੍ਖੋਤਿ? ਆਮਨ੍ਤਾ. ਕੇਨਟ੍ਠੇਨਾਤਿ? ਅਨਿਚ੍ਚਟ੍ਠੇਨ. ਅਰਿਯਮਗ੍ਗੋ ਅਨਿਚ੍ਚੋਤਿ? ਆਮਨ੍ਤਾ. ਅਰਿਯਮਗ੍ਗੋ ਦੁਕ੍ਖੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰਿਯਮਗ੍ਗੋ ਅਨਿਚ੍ਚੋ, ਸੋ ਚ ਨ ਦੁਕ੍ਖੋਤਿ? ਆਮਨ੍ਤਾ. ਦੁਕ੍ਖਸਮੁਦਯੋ ਅਨਿਚ੍ਚੋ, ਸੋ ਚ ਨ ਦੁਕ੍ਖੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੁਕ੍ਖਸਮੁਦਯੋ ਅਨਿਚ੍ਚੋ, ਸੋ ਚ ਦੁਕ੍ਖੋਤਿ? ਆਮਨ੍ਤਾ. ਅਰਿਯਮਗ੍ਗੋ ਅਨਿਚ੍ਚੋ, ਸੋ ਚ ਦੁਕ੍ਖੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੯੦. ਨ ਵਤ੍ਤਬ੍ਬਂ – ‘‘ਠਪੇਤ੍ਵਾ ਅਰਿਯਮਗ੍ਗਂ ਅਵਸੇਸਾ ਸਙ੍ਖਾਰਾ ਦੁਕ੍ਖਾ’’ਤਿ? ਆਮਨ੍ਤਾ. ਨਨੁ ਸਾ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ? ਆਮਨ੍ਤਾ. ਹਞ੍ਚਿ ਸਾ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਠਪੇਤ੍ਵਾ ਅਰਿਯਮਗ੍ਗਂ ਅਵਸੇਸਾ ਸਙ੍ਖਾਰਾ ਦੁਕ੍ਖਾ’’ਤਿ.

ਠਪੇਤ੍ਵਾ ਅਰਿਯਮਗ੍ਗਨ੍ਤਿਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੭੧) ੬. ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤਿਕਥਾ

੭੯੧. ਨ ਵਤ੍ਤਬ੍ਬਂ – ‘‘ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀ’’ਤਿ? ਆਮਨ੍ਤਾ. ਨਨੁ ਸਙ੍ਘੋ ਆਹੁਨੇਯ੍ਯੋ ਪਾਹੁਨੇਯ੍ਯੋ ਦਕ੍ਖਿਣੇਯ੍ਯੋ ਅਞ੍ਜਲਿਕਰਣੀਯੋ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾਤਿ? ਆਮਨ੍ਤਾ. ਹਞ੍ਚਿ ਸਙ੍ਘੋ ਆਹੁਨੇਯ੍ਯੋ ਪਾਹੁਨੇਯ੍ਯੋ ਦਕ੍ਖਿਣੇਯ੍ਯੋ ਅਞ੍ਜਲਿਕਰਣੀਯੋ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀ’’ਤਿ.

ਨ ਵਤ੍ਤਬ੍ਬਂ – ‘‘ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀ’’ਤਿ? ਆਮਨ੍ਤਾ. ਨਨੁ ਚਤ੍ਤਾਰੋ ਪੁਰਿਸਯੁਗਾ ਅਟ੍ਠਪੁਰਿਸਪੁਗ੍ਗਲਾ ਦਕ੍ਖਿਣੇਯ੍ਯਾ ਵੁਤ੍ਤਾ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਚਤ੍ਤਾਰੋ ਪੁਰਿਸਯੁਗਾ ਅਟ੍ਠ ਪੁਰਿਸਪੁਗ੍ਗਲਾ ਦਕ੍ਖਿਣੇਯ੍ਯਾ ਵੁਤ੍ਤਾ ਭਗਵਤਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀ’’ਤਿ.

ਨ ਵਤ੍ਤਬ੍ਬਂ – ‘‘ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੇਚਿ ਸਙ੍ਘਸ੍ਸ ਦਾਨਂ ਦੇਨ੍ਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੇਚਿ ਸਙ੍ਘਸ੍ਸ ਦਾਨਂ ਦੇਨ੍ਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀ’’ਤਿ. ਨਨੁ ਅਤ੍ਥਿ ਕੇਚਿ ਸਙ੍ਘਸ੍ਸ ਚੀਵਰਂ ਦੇਨ੍ਤਿ…ਪੇ… ਪਿਣ੍ਡਪਾਤਂ ਦੇਨ੍ਤਿ… ਸੇਨਾਸਨਂ ਦੇਨ੍ਤਿ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦੇਨ੍ਤਿ… ਖਾਦਨੀਯਂ ਦੇਨ੍ਤਿ… ਭੋਜਨੀਯਂ ਦੇਨ੍ਤਿ…ਪੇ… ਪਾਨੀਯਂ ਦੇਨ੍ਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੇਚਿ ਸਙ੍ਘਸ੍ਸ ਪਾਨੀਯਂ ਦੇਨ੍ਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀ’’ਤਿ.

ਨ ਵਤ੍ਤਬ੍ਬਂ – ‘‘ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਆਹੁਤਿਂ ਜਾਤਵੇਦੋਵ, ਮਹਾਮੇਘਂਵ ਮੇਦਨੀ;

ਸਙ੍ਘੋ ਸਮਾਧਿਸਮ੍ਪਨ੍ਨੋ, ਪਟਿਗ੍ਗਣ੍ਹਾਤਿ ਦਕ੍ਖਿਣ’’ਨ੍ਤਿ.

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀਤਿ.

੭੯੨. ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀਤਿ? ਆਮਨ੍ਤਾ. ਮਗ੍ਗੋ ਪਟਿਗ੍ਗਣ੍ਹਾਤਿ, ਫਲਂ ਪਟਿਗ੍ਗਣ੍ਹਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤੀਤਿਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੭੨) ੭. ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਵਿਸੋਧੇਤੀਤਿਕਥਾ

੭੯੩. ਨ ਵਤ੍ਤਬ੍ਬਂ – ‘‘ਸਙ੍ਘੋ ਦਕ੍ਖਿਣਂ ਵਿਸੋਧੇਤੀ’’ਤਿ? ਆਮਨ੍ਤਾ. ਨਨੁ ਸਙ੍ਘੋ ਆਹੁਨੇਯ੍ਯੋ ਪਾਹੁਨੇਯ੍ਯੋ ਦਕ੍ਖਿਣੇਯ੍ਯੋ ਅਞ੍ਜਲਿਕਰਣੀਯੋ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾਤਿ? ਆਮਨ੍ਤਾ. ਹਞ੍ਚਿ ਸਙ੍ਘੋ ਆਹੁਨੇਯ੍ਯੋ…ਪੇ… ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਦਕ੍ਖਿਣਂ ਵਿਸੋਧੇਤੀ’’ਤਿ.

ਨ ਵਤ੍ਤਬ੍ਬਂ – ‘‘ਸਙ੍ਘੋ ਦਕ੍ਖਿਣਂ ਵਿਸੋਧੇਤੀ’’ਤਿ? ਆਮਨ੍ਤਾ. ਨਨੁ ਚਤ੍ਤਾਰੋ ਪੁਰਿਸਯੁਗਾ ਅਟ੍ਠ ਪੁਰਿਸਪੁਗ੍ਗਲਾ ਦਕ੍ਖਿਣੇਯ੍ਯਾ ਵੁਤ੍ਤਾ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਚਤ੍ਤਾਰੋ ਪੁਰਿਸਯੁਗਾ ਅਟ੍ਠ ਪੁਰਿਸਪੁਗ੍ਗਲਾ ਦਕ੍ਖਿਣੇਯ੍ਯਾ ਵੁਤ੍ਤਾ ਭਗਵਤਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਦਕ੍ਖਿਣਂ ਵਿਸੋਧੇਤੀ’’ਤਿ.

ਨ ਵਤ੍ਤਬ੍ਬਂ – ‘‘ਸਙ੍ਘੋ ਦਕ੍ਖਿਣਂ ਵਿਸੋਧੇਤੀ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੇਚਿ ਸਙ੍ਘਸ੍ਸ ਦਾਨਂ ਦਤ੍ਵਾ ਦਕ੍ਖਿਣਂ ਆਰਾਧੇਨ੍ਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੇਚਿ ਸਙ੍ਘਸ੍ਸ ਦਾਨਂ ਦਤ੍ਵਾ ਦਕ੍ਖਿਣਂ ਆਰਾਧੇਨ੍ਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਦਕ੍ਖਿਣਂ ਵਿਸੋਧੇਤੀ’’ਤਿ.

ਨਨੁ ਅਤ੍ਥਿ ਕੇਚਿ ਸਙ੍ਘਸ੍ਸ ਚੀਵਰਂ ਦਤ੍ਵਾ…ਪੇ… ਪਿਣ੍ਡਪਾਤਂ ਦਤ੍ਵਾ…ਪੇ… ਸੇਨਾਸਨਂ ਦਤ੍ਵਾ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦਤ੍ਵਾ… ਖਾਦਨੀਯਂ ਦਤ੍ਵਾ… ਭੋਜਨੀਯਂ ਦਤ੍ਵਾ…ਪੇ… ਪਾਨੀਯਂ ਦਤ੍ਵਾ ਦਕ੍ਖਿਣਂ ਆਰਾਧੇਨ੍ਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੇਚਿ ਸਙ੍ਘਸ੍ਸ ਪਾਨੀਯਂ ਦਤ੍ਵਾ ਦਕ੍ਖਿਣਂ ਆਰਾਧੇਨ੍ਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਦਕ੍ਖਿਣਂ ਵਿਸੋਧੇਤੀ’’ਤਿ.

੭੯੪. ਸਙ੍ਘੋ ਦਕ੍ਖਿਣਂ ਵਿਸੋਧੇਤੀਤਿ? ਆਮਨ੍ਤਾ. ਮਗ੍ਗੋ ਵਿਸੋਧੇਤਿ, ਫਲਂ ਵਿਸੋਧੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ ਸਙ੍ਘੋ ਦਕ੍ਖਿਣਂ ਵਿਸੋਧੇਤੀਤਿਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੭੩) ੮. ਨ ਵਤ੍ਤਬ੍ਬਂ ਸਙ੍ਘੋ ਭੁਞ੍ਜਤੀਤਿਕਥਾ

੭੯੫. ਨ ਵਤ੍ਤਬ੍ਬਂ – ‘‘ਸਙ੍ਘੋ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤੀ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੇਚਿ ਸਙ੍ਘਭਤ੍ਤਾਨਿ ਕਰੋਨ੍ਤਿ, ਉਦ੍ਦੇਸਭਤ੍ਤਾਨਿ ਕਰੋਨ੍ਤਿ, ਯਾਗੁਪਾਨਾਨਿ ਕਰੋਨ੍ਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੇਚਿ ਸਙ੍ਘਭਤ੍ਤਾਨਿ ਕਰੋਨ੍ਤਿ, ਉਦ੍ਦੇਸਭਤ੍ਤਾਨਿ ਕਰੋਨ੍ਤਿ, ਯਾਗੁਪਾਨਾਨਿ ਕਰੋਨ੍ਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤੀ’’ਤਿ.

ਨ ਵਤ੍ਤਬ੍ਬਂ – ‘‘ਸਙ੍ਘੋ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਗਣਭੋਜਨਂ ਪਰਮ੍ਪਰਭੋਜਨਂ ਅਤਿਰਿਤ੍ਤਭੋਜਨਂ ਅਨਤਿਰਿਤ੍ਤਭੋਜਨ’’ਨ੍ਤਿ? ਆਮਨ੍ਤਾ. ਹਞ੍ਚਿ ਵੁਤ੍ਤਂ ਭਗਵਤਾ – ‘‘ਗਣਭੋਜਨਂ ਪਰਮ੍ਪਰਭੋਜਨਂ ਅਤਿਰਿਤ੍ਤਭੋਜਨਂ ਅਨਤਿਰਿਤ੍ਤਭੋਜਨਂ’’, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤੀ’’ਤਿ.

ਨ ਵਤ੍ਤਬ੍ਬਂ – ‘‘ਸਙ੍ਘੋ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤੀ’’ਤਿ? ਆਮਨ੍ਤਾ. ਨਨੁ ਅਟ੍ਠ ਪਾਨਾਨਿ ਵੁਤ੍ਤਾਨਿ ਭਗਵਤਾ – ਅਮ੍ਬਪਾਨਂ, ਜਮ੍ਬੁਪਾਨਂ, ਚੋਚਪਾਨਂ, ਮੋਚਪਾਨਂ, ਮਧੁਕਪਾਨਂ, [ਮਧੁਪਾਨਂ (ਸੀ. ਸ੍ਯਾ. ਕਂ. ਪੀ.) ਮਹਾਵ. ੩੦੦ ਪਨ ਪਸ੍ਸਿਤਬ੍ਬਂ] ਮੁਦ੍ਦਿਕਪਾਨਂ, ਸਾਲੁਕਪਾਨਂ, ਫਾਰੁਸਕਪਾਨਨ੍ਤਿ? ਆਮਨ੍ਤਾ. ਹਞ੍ਚਿ ਅਟ੍ਠ ਪਾਨਾਨਿ ਵੁਤ੍ਤਾਨਿ ਭਗਵਤਾ – ਅਮ੍ਬਪਾਨਂ, ਜਮ੍ਬੁਪਾਨਂ, ਚੋਚਪਾਨਂ, ਮੋਚਪਾਨਂ, ਮਧੁਕਪਾਨਂ, ਮੁਦ੍ਦਿਕਪਾਨਂ, ਸਾਲੁਕਪਾਨਂ, ਫਾਰੁਸਕਪਾਨਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘੋ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤੀ’’ਤਿ.

੭੯੬. ਸਙ੍ਘੋ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤੀਤਿ? ਆਮਨ੍ਤਾ. ਮਗ੍ਗੋ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤਿ, ਫਲਂ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ ਸਙ੍ਘੋ ਭੁਞ੍ਜਤੀਤਿਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੭੪) ੯. ਨ ਵਤ੍ਤਬ੍ਬਂ ਸਙ੍ਘਸ੍ਸਦਿਨ੍ਨਂ ਮਹਪ੍ਫਲਨ੍ਤਿਕਥਾ

੭੯੭. ਨ ਵਤ੍ਤਬ੍ਬਂ – ‘‘ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ? ਆਮਨ੍ਤਾ. ਨਨੁ ਸਙ੍ਘੋ ਆਹੁਨੇਯ੍ਯੋ ਪਾਹੁਨੇਯ੍ਯੋ ਦਕ੍ਖਿਣੇਯ੍ਯੋ ਅਞ੍ਜਲਿਕਰਣੀਯੋ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾਤਿ? ਆਮਨ੍ਤਾ. ਹਞ੍ਚਿ ਸਙ੍ਘੋ ਆਹੁਨੇਯ੍ਯੋ…ਪੇ… ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ.

ਨ ਵਤ੍ਤਬ੍ਬਂ – ‘‘ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ? ਆਮਨ੍ਤਾ. ਨਨੁ ਚਤ੍ਤਾਰੋ ਪੁਰਿਸਯੁਗਾ ਅਟ੍ਠ ਪੁਰਿਸਪੁਗ੍ਗਲਾ ਦਕ੍ਖਿਣੇਯ੍ਯਾ ਵੁਤ੍ਤਾ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਚਤ੍ਤਾਰੋ ਪੁਰਿਸਯੁਗਾ ਅਟ੍ਠ ਪੁਰਿਸਪੁਗ੍ਗਲਾ ਦਕ੍ਖਿਣੇਯ੍ਯਾ ਵੁਤ੍ਤਾ ਭਗਵਤਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ.

੭੯੮. ਨ ਵਤ੍ਤਬ੍ਬਂ – ‘‘ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸਙ੍ਘੇ, ਗੋਤਮਿ, ਦੇਹਿ, ਸਙ੍ਘੇ ਤੇ ਦਿਨ੍ਨੇ ਅਹਞ੍ਚੇਵ ਪੂਜਿਤੋ ਭਵਿਸ੍ਸਾਮਿ ਸਙ੍ਘੋ ਚਾ’’ਤਿ [ਮ. ਨਿ. ੩.੩੭੬]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲਨ੍ਤਿ.

ਨ ਵਤ੍ਤਬ੍ਬਂ – ‘‘ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ? ਆਮਨ੍ਤਾ. ਨਨੁ ਸਕ੍ਕੋ ਦੇਵਾਨਮਿਨ੍ਦੋ ਭਗਵਨ੍ਤਂ ਏਤਦਵੋਚ –

‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਕਤ੍ਥ ਦਿਨ੍ਨਂ ਮਹਪ੍ਫਲਨ੍ਤਿ.

‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ.

‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲ’’ਨ੍ਤਿ [ਸਂ. ਨਿ. ੧.੨੬੨; ਵਿ. ਵ. ੬੪੨, ੭੫੧].

‘‘ਏਸੋ ਹਿ ਸਙ੍ਘੋ ਵਿਪੁਲੋ ਮਹਗ੍ਗਤੋ,

ਏਸਪ੍ਪਮੇਯ੍ਯੋ ਉਦਧੀਵ ਸਾਗਰੋ;

ਏਤੇ ਹਿ ਸੇਟ੍ਠਾ ਨਰਵੀਰਸਾਵਕਾ [ਨਰਸੀਹਸਾਵਕਾ (ਕ.)],

ਪਭਙ੍ਕਰਾ ਧਮ੍ਮਮੁਦੀਰਯਨ੍ਤਿ.

‘‘ਤੇਸਂ ਸੁਦਿਨ੍ਨਂ ਸੁਹੁਤਂ ਸੁਯਿਟ੍ਠਂ,

ਯੇ ਸਙ੍ਘਮੁਦ੍ਦਿਸ੍ਸ ਦਦਨ੍ਤਿ ਦਾਨਂ;

ਸਾ ਦਕ੍ਖਿਣਾ ਸਙ੍ਘਗਤਾ ਪਤਿਟ੍ਠਿਤਾ,

ਮਹਪ੍ਫਲਾ ਲੋਕਵਿਦੂਨ ਵਣ੍ਣਿਤਾ.

‘‘ਏਤਾਦਿਸਂ ਯਞ੍ਞਮਨੁਸ੍ਸਰਨ੍ਤਾ,

ਯੇ ਵੇਦਜਾਤਾ ਵਿਚਰਨ੍ਤਿ [ਵਿਹਰਨ੍ਤਿ (ਸੀ. ਕ.)] ਲੋਕੇ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ,

ਅਨਿਨ੍ਦਿਤਾ ਸਗ੍ਗਮੁਪੇਨ੍ਤਿ ਠਾਨ’’ਨ੍ਤਿ [ਵਿ. ਵ. ੬੪੫, ੭੫੪].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲਨ੍ਤਿ.

ਨ ਵਤ੍ਤਬ੍ਬਂ ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲਨ੍ਤਿਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੭੫) ੧੦. ਨ ਵਤ੍ਤਬ੍ਬਂ ਬੁਦ੍ਧਸ੍ਸਦਿਨ੍ਨਂ ਮਹਪ੍ਫਲਨ੍ਤਿਕਥਾ

੭੯੯. ਨ ਵਤ੍ਤਬ੍ਬਂ – ‘‘ਬੁਦ੍ਧਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ? ਆਮਨ੍ਤਾ. ਨਨੁ ਭਗਵਾ ਦ੍ਵਿਪਦਾਨਂ ਅਗ੍ਗੋ, ਦ੍ਵਿਪਦਾਨਂ ਸੇਟ੍ਠੋ, ਦ੍ਵਿਪਦਾਨਂ ਪਮੋਕ੍ਖੋ, ਦ੍ਵਿਪਦਾਨਂ ਉਤ੍ਤਮੋ, ਦ੍ਵਿਪਦਾਨਂ ਪਵਰੋ ਅਸਮੋ ਅਸਮਸਮੋ ਅਪ੍ਪਟਿਸਮੋ ਅਪ੍ਪਟਿਭਾਗੋ ਅਪ੍ਪਟਿਪੁਗ੍ਗਲੋਤਿ? ਆਮਨ੍ਤਾ. ਹਞ੍ਚਿ ਭਗਵਾ ਦ੍ਵਿਪਦਾਨਂ ਅਗ੍ਗੋ, ਦ੍ਵਿਪਦਾਨਂ ਸੇਟ੍ਠੋ, ਦ੍ਵਿਪਦਾਨਂ ਪਮੋਕ੍ਖੋ, ਦ੍ਵਿਪਦਾਨਂ ਉਤ੍ਤਮੋ, ਦ੍ਵਿਪਦਾਨਂ ਪਵਰੋ ਅਸਮੋ ਅਸਮਸਮੋ ਅਪ੍ਪਟਿਸਮੋ ਅਪ੍ਪਟਿਭਾਗੋ ਅਪ੍ਪਟਿਪੁਗ੍ਗਲੋ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ.

ਨ ਵਤ੍ਤਬ੍ਬਂ – ‘‘ਬੁਦ੍ਧਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ? ਆਮਨ੍ਤਾ. ਅਤ੍ਥਿ ਕੋਚਿ ਬੁਦ੍ਧੇਨ ਸਮਸਮੋ – ਸੀਲੇਨ ਸਮਾਧਿਨਾ ਪਞ੍ਞਾਯਾਤਿ? ਨਤ੍ਥਿ. ਹਞ੍ਚਿ ਨਤ੍ਥਿ ਕੋਚਿ ਬੁਦ੍ਧੇਨ ਸਮਸਮੋ – ਸੀਲੇਨ ਸਮਾਧਿਨਾ ਪਞ੍ਞਾਯ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ.

ਨ ਵਤ੍ਤਬ੍ਬਂ – ‘‘ਬੁਦ੍ਧਸ੍ਸ ਦਿਨ੍ਨਂ ਮਹਪ੍ਫਲ’’ਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਨਯਿਮਸ੍ਮਿਂ ਵਾ ਲੋਕੇ ਪਰਸ੍ਮਿਂ ਵਾ ਪਨ,

ਬੁਦ੍ਧੇਨ ਸੇਟ੍ਠੋ ਚ ਸਮੋ ਚ ਵਿਜ੍ਜਤਿ;

ਯਮਾਹੁਨੇਯ੍ਯਾਨਂ ਅਗ੍ਗਤਂ ਗਤੋ,

ਪੁਞ੍ਞਤ੍ਥਿਕਾਨਂ ਵਿਪੁਲਪ੍ਫਲੇਸਿਨ’’ਨ੍ਤਿ [ਵਿ. ਵ. ੧੦੪੭].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਬੁਦ੍ਧਸ੍ਸ ਦਿਨ੍ਨਂ ਮਹਪ੍ਫਲਨ੍ਤਿ.

ਨ ਵਤ੍ਤਬ੍ਬਂ ਬੁਦ੍ਧਸ੍ਸ ਦਿਨ੍ਨਂ ਮਹਪ੍ਫਲਨ੍ਤਿਕਥਾ ਨਿਟ੍ਠਿਤਾ.

੧੭. ਸਤ੍ਤਰਸਮਵਗ੍ਗੋ

(੧੭੬) ੧੧. ਦਕ੍ਖਿਣਾਵਿਸੁਦ੍ਧਿਕਥਾ

੮੦੦. ਦਾਯਕਤੋਵ ਦਾਨਂ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋਤਿ? ਆਮਨ੍ਤਾ. ਨਨੁ ਅਤ੍ਥਿ ਕੇਚਿ ਪਟਿਗ੍ਗਾਹਕਾ ਆਹੁਨੇਯ੍ਯਾ ਪਾਹੁਨੇਯ੍ਯਾ ਦਕ੍ਖਿਣੇਯ੍ਯਾ ਅਞ੍ਜਲਿਕਰਣੀਯਾ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੇਚਿ ਪਟਿਗ੍ਗਾਹਕਾ ਆਹੁਨੇਯ੍ਯਾ ਪਾਹੁਨੇਯ੍ਯਾ ਦਕ੍ਖਿਣੇਯ੍ਯਾ ਅਞ੍ਜਲਿਕਰਣੀਯਾ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦਾਯਕਤੋਵ ਦਾਨਂ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ’’ਤਿ.

ਦਾਯਕਤੋਵ ਦਾਨਂ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋਤਿ? ਆਮਨ੍ਤਾ. ਨਨੁ ਚਤ੍ਤਾਰੋ ਪੁਰਿਸਯੁਗਾ ਅਟ੍ਠ ਪੁਰਿਸਪੁਗ੍ਗਲਾ ਦਕ੍ਖਿਣੇਯ੍ਯਾ ਵੁਤ੍ਤਾ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਚਤ੍ਤਾਰੋ ਪੁਰਿਸਯੁਗਾ ਅਟ੍ਠ ਪੁਰਿਸਪੁਗ੍ਗਲਾ ਦਕ੍ਖਿਣੇਯ੍ਯਾ ਵੁਤ੍ਤਾ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦਾਯਕਤੋਵ ਦਾਨਂ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ’’ਤਿ.

ਦਾਯਕਤੋਵ ਦਾਨਂ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋਤਿ? ਆਮਨ੍ਤਾ. ਨਨੁ ਅਤ੍ਥਿ ਕੇਚਿ ਸੋਤਾਪਨ੍ਨੇ ਦਾਨਂ ਦਤ੍ਵਾ ਦਕ੍ਖਿਣਂ ਆਰਾਧੇਨ੍ਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੇਚਿ ਸੋਤਾਪਨ੍ਨੇ ਦਾਨਂ ਦਤ੍ਵਾ ਦਕ੍ਖਿਣਂ ਆਰਾਧੇਨ੍ਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦਾਯਕਤੋਵ ਦਾਨਂ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ’’ਤਿ.

ਨਨੁ ਅਤ੍ਥਿ ਕੇਚਿ ਸਕਦਾਗਾਮਿਸ੍ਸ…ਪੇ… ਅਨਾਗਾਮਿਸ੍ਸ…ਪੇ… ਅਰਹਤੋ ਦਾਨਂ ਦਤ੍ਵਾ ਦਕ੍ਖਿਣਂ ਆਰਾਧੇਨ੍ਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੇਚਿ ਅਰਹਤੋ ਦਾਨਂ ਦਤ੍ਵਾ ਦਕ੍ਖਿਣਂ ਆਰਾਧੇਨ੍ਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦਾਯਕਤੋਵ ਦਾਨਂ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ’’ਤਿ.

੮੦੧. ਪਟਿਗ੍ਗਾਹਕਤੋ ਦਾਨਂ ਵਿਸੁਜ੍ਝਤੀਤਿ? ਆਮਨ੍ਤਾ. ਅਞ੍ਞੋ ਅਞ੍ਞਸ੍ਸ ਕਾਰਕੋ, ਪਰਕਤਂ ਸੁਖਦੁਕ੍ਖਂ, ਅਞ੍ਞੋ ਕਰੋਤਿ ਅਞ੍ਞੋ ਪਟਿਸਂਵੇਦੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦਾਯਕਤੋਵ ਦਾਨਂ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਚਤਸ੍ਸੋ ਖੋ ਇਮਾ, ਆਨਨ੍ਦ, ਦਕ੍ਖਿਣਾ ਵਿਸੁਦ੍ਧਿਯੋ! ਕਤਮਾ ਚਤਸ੍ਸੋ? ਅਤ੍ਥਾਨਨ੍ਦ, ਦਕ੍ਖਿਣਾ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ; ਅਤ੍ਥਾਨਨ੍ਦ, ਦਕ੍ਖਿਣਾ ਪਟਿਗ੍ਗਾਹਕਤੋ ਵਿਸੁਜ੍ਝਤਿ, ਨੋ ਦਾਯਕਤੋ; ਅਤ੍ਥਾਨਨ੍ਦ, ਦਕ੍ਖਿਣਾ ਦਾਯਕਤੋ ਚੇਵ ਵਿਸੁਜ੍ਝਤਿ ਪਟਿਗ੍ਗਾਹਕਤੋ ਚ; ਅਤ੍ਥਾਨਨ੍ਦ, ਦਕ੍ਖਿਣਾ ਨੇਵ ਦਾਯਕਤੋ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ. ਇਮਾ ਖੋ, ਆਨਨ੍ਦ, ਚਤਸ੍ਸੋ ਦਕ੍ਖਿਣਾ ਵਿਸੁਦ੍ਧਿਯੋ’’ਤਿ [ਮ. ਨਿ. ੩.੩੮੧]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਦਾਯਕਤੋਵ ਦਾਨਂ ਵਿਸੁਜ੍ਝਤਿ, ਨੋ ਪਟਿਗ੍ਗਾਹਕਤੋ’’ਤਿ.

ਦਕ੍ਖਿਣਾਵਿਸੁਦ੍ਧਿਕਥਾ ਨਿਟ੍ਠਿਤਾ.

ਸਤ੍ਤਰਸਮਵਗ੍ਗੋ.

ਤਸ੍ਸੁਦ੍ਦਾਨਂ –

ਅਤ੍ਥਿ ਅਰਹਤੋ ਪੁਞ੍ਞੂਪਚਯੋ, ਨਤ੍ਥਿ ਅਰਹਤੋ ਅਕਾਲਮਚ੍ਚੁ, ਸਬ੍ਬਮਿਦਂ ਕਮ੍ਮਤੋ, ਇਨ੍ਦ੍ਰਿਯਬਦ੍ਧਞ੍ਞੇਵ ਦੁਕ੍ਖਂ, ਠਪੇਤ੍ਵਾ ਅਰਿਯਮਗ੍ਗਂ ਅਵਸੇਸਾ ਸਙ੍ਖਾਰਾ ਦੁਕ੍ਖਾ, ਸਙ੍ਘੋ ਦਕ੍ਖਿਣਂ ਪਟਿਗ੍ਗਣ੍ਹਾਤਿ, ਸਙ੍ਘੋ ਦਕ੍ਖਿਣਂ ਵਿਸੋਧੇਤਿ, ਸਙ੍ਘੋ ਭੁਞ੍ਜਤਿ ਪਿਵਤਿ ਖਾਦਤਿ ਸਾਯਤਿ, ਸਙ੍ਘਸ੍ਸ ਦਿਨ੍ਨਂ ਮਹਪ੍ਫਲਂ, ਅਤ੍ਥਿ ਦਾਨਂ ਵਿਸੁਦ੍ਧਿਯਾਤਿ [ਵਿਸੁਜ੍ਝਤੀਤਿ (ਸ੍ਯਾ.)].