੧੫. ਪਨ੍ਨਰਸਮਵਗ੍ਗੋ

(੧੪੫) ੧. ਪਚ੍ਚਯਤਾਕਥਾ

੭੧੧. ਪਚ੍ਚਯਤਾ ਵਵਤ੍ਥਿਤਾਤਿ? ਆਮਨ੍ਤਾ. ਨਨੁ ਵੀਮਂਸਾ ਹੇਤੁ, ਸੋ ਚ ਅਧਿਪਤੀਤਿ? ਆਮਨ੍ਤਾ. ਹਞ੍ਚਿ ਵੀਮਂਸਾ ਹੇਤੁ, ਸੋ ਚ ਅਧਿਪਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਹੇਤੁਪਚ੍ਚਯੇਨ ਪਚ੍ਚਯੋ, ਅਧਿਪਤਿਪਚ੍ਚਯੇਨ ਪਚ੍ਚਯੋ’’ਤਿ.

ਨਨੁ ਛਨ੍ਦਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤੀਤਿ? ਆਮਨ੍ਤਾ. ਹਞ੍ਚਿ ਛਨ੍ਦਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਸਹਜਾਤਪਚ੍ਚਯੇਨ ਪਚ੍ਚਯੋ’’ਤਿ.

੭੧੨. ਨਨੁ ਵੀਰਿਯਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤੀਤਿ? ਆਮਨ੍ਤਾ. ਹਞ੍ਚਿ ਵੀਰਿਯਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਸਹਜਾਤਪਚ੍ਚਯੇਨ ਪਚ੍ਚਯੋ’’ਤਿ.

ਨਨੁ ਵੀਰਿਯਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਇਨ੍ਦ੍ਰਿਯਨ੍ਤਿ? ਆਮਨ੍ਤਾ. ਹਞ੍ਚਿ ਵੀਰਿਯਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਇਨ੍ਦ੍ਰਿਯਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ’’ਤਿ.

ਨਨੁ ਵੀਰਿਯਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਮਗ੍ਗਙ੍ਗਨ੍ਤਿ? ਆਮਨ੍ਤਾ. ਹਞ੍ਚਿ ਵੀਰਿਯਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਮਗ੍ਗਙ੍ਗਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਮਗ੍ਗਪਚ੍ਚਯੇਨ ਪਚ੍ਚਯੋ’’ਤਿ.

੭੧੩. ਨਨੁ ਚਿਤ੍ਤਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤੀਤਿ? ਆਮਨ੍ਤਾ. ਹਞ੍ਚਿ ਚਿਤ੍ਤਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਸਹਜਾਤਪਚ੍ਚਯੇਨ ਪਚ੍ਚਯੋ’’ਤਿ.

ਨਨੁ ਚਿਤ੍ਤਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਸੋ ਚ ਆਹਾਰੋਤਿ? ਆਮਨ੍ਤਾ. ਹਞ੍ਚਿ ਚਿਤ੍ਤਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਸੋ ਚ ਆਹਾਰੋ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਆਹਾਰਪਚ੍ਚਯੇਨ ਪਚ੍ਚਯੋ’’ਤਿ.

ਨਨੁ ਚਿਤ੍ਤਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਇਨ੍ਦ੍ਰਿਯਨ੍ਤਿ? ਆਮਨ੍ਤਾ. ਹਞ੍ਚਿ ਚਿਤ੍ਤਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਇਨ੍ਦ੍ਰਿਯਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ’’ਤਿ.

੭੧੪. ਨਨੁ ਵੀਮਂਸਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤੀਤਿ? ਆਮਨ੍ਤਾ. ਹਞ੍ਚਿ ਵੀਮਂਸਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਸਹਜਾਤਪਚ੍ਚਯੇਨ ਪਚ੍ਚਯੋ’’ਤਿ.

ਨਨੁ ਵੀਮਂਸਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਇਨ੍ਦ੍ਰਿਯਨ੍ਤਿ? ਆਮਨ੍ਤਾ. ਹਞ੍ਚਿ ਵੀਮਂਸਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਇਨ੍ਦ੍ਰਿਯਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਇਨ੍ਦ੍ਰਿਯਪਚ੍ਚਯੇਨ ਪਚ੍ਚਯੋ’’ਤਿ.

ਨਨੁ ਵੀਮਂਸਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਮਗ੍ਗਙ੍ਗਨ੍ਤਿ? ਆਮਨ੍ਤਾ. ਹਞ੍ਚਿ ਵੀਮਂਸਾਧਿਪਤਿ ਸਹਜਾਤਾਨਂ ਧਮ੍ਮਾਨਂ ਅਧਿਪਤਿ, ਤਞ੍ਚ ਮਗ੍ਗਙ੍ਗਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਮਗ੍ਗਪਚ੍ਚਯੇਨ ਪਚ੍ਚਯੋ’’ਤਿ.

੭੧੫. ਨਨੁ ਅਰਿਯਂ ਧਮ੍ਮਂ ਗਰੁਂ ਕਤ੍ਵਾ ਉਪ੍ਪਜ੍ਜਤਿ ਪਚ੍ਚਵੇਕ੍ਖਣਾ, ਤਞ੍ਚਾਰਮ੍ਮਣਨ੍ਤਿ? ਆਮਨ੍ਤਾ. ਹਞ੍ਚਿ ਅਰਿਯਂ ਧਮ੍ਮਂ ਗਰੁਂ ਕਤ੍ਵਾ ਉਪ੍ਪਜ੍ਜਤਿ ਪਚ੍ਚਵੇਕ੍ਖਣਾ, ਤਞ੍ਚਾਰਮ੍ਮਣਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਧਿਪਤਿਪਚ੍ਚਯੇਨ ਪਚ੍ਚਯੋ, ਆਰਮ੍ਮਣਪਚ੍ਚਯੇਨ ਪਚ੍ਚਯੋ’’ਤਿ.

੭੧੬. ਨਨੁ ਪੁਰਿਮਾ ਪੁਰਿਮਾ ਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਕੁਸਲਾਨਂ ਧਮ੍ਮਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਾ ਚ ਆਸੇਵਨਾਤਿ? ਆਮਨ੍ਤਾ. ਹਞ੍ਚਿ ਪੁਰਿਮਾ ਪੁਰਿਮਾ ਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਕੁਸਲਾਨਂ ਧਮ੍ਮਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਾ ਚ ਆਸੇਵਨਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਆਸੇਵਨਪਚ੍ਚਯੇਨ ਪਚ੍ਚਯੋ’’ਤਿ.

ਨਨੁ ਪੁਰਿਮਾ ਪੁਰਿਮਾ ਅਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਅਕੁਸਲਾਨਂ ਧਮ੍ਮਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਾ ਚ ਆਸੇਵਨਾਤਿ? ਆਮਨ੍ਤਾ. ਹਞ੍ਚਿ ਪੁਰਿਮਾ ਪੁਰਿਮਾ ਅਕੁਸਲਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਅਕੁਸਲਾਨਂ ਧਮ੍ਮਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਾ ਚ ਆਸੇਵਨਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਆਸੇਵਨਪਚ੍ਚਯੇਨ ਪਚ੍ਚਯੋ’’ਤਿ.

ਨਨੁ ਪੁਰਿਮਾ ਪੁਰਿਮਾ ਕਿਰਿਯਾਬ੍ਯਾਕਤਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਕਿਰਿਯਾਬ੍ਯਾਕਤਾਨਂ ਧਮ੍ਮਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਾ ਚ ਆਸੇਵਨਾਤਿ? ਆਮਨ੍ਤਾ. ਹਞ੍ਚਿ ਪੁਰਿਮਾ ਪੁਰਿਮਾ ਕਿਰਿਯਾਬ੍ਯਾਕਤਾ ਧਮ੍ਮਾ ਪਚ੍ਛਿਮਾਨਂ ਪਚ੍ਛਿਮਾਨਂ ਕਿਰਿਯਾਬ੍ਯਾਕਤਾਨਂ ਧਮ੍ਮਾਨਂ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਾ ਚ ਆਸੇਵਨਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਆਸੇਵਨਪਚ੍ਚਯੇਨ ਪਚ੍ਚਯੋ’’ਤਿ.

੭੧੭. ਨ ਵਤ੍ਤਬ੍ਬਂ – ‘‘ਪਚ੍ਚਯਤਾ ਵਵਤ੍ਥਿਤਾ’’ਤਿ? ਆਮਨ੍ਤਾ. ਹੇਤੁਪਚ੍ਚਯੇਨ ਪਚ੍ਚਯੋ ਹੋਤਿ, ਆਰਮ੍ਮਣਪਚ੍ਚਯੇਨ ਪਚ੍ਚਯੋ ਹੋਤਿ, ਅਨਨ੍ਤਰਪਚ੍ਚਯੇਨ ਪਚ੍ਚਯੋ ਹੋਤਿ, ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਪਚ੍ਚਯਤਾ ਵਵਤ੍ਥਿਤਾਤਿ.

ਪਚ੍ਚਯਤਾਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੪੬) ੨. ਅਞ੍ਞਮਞ੍ਞਪਚ੍ਚਯਕਥਾ

੭੧੮. ਅਵਿਜ੍ਜਾਪਚ੍ਚਯਾਵ ਸਙ੍ਖਾਰਾ, ਨ ਵਤ੍ਤਬ੍ਬਂ – ‘‘ਸਙ੍ਖਾਰਪਚ੍ਚਯਾਪਿ ਅਵਿਜ੍ਜਾ’’ਤਿ? ਆਮਨ੍ਤਾ. ਨਨੁ ਅਵਿਜ੍ਜਾ ਸਙ੍ਖਾਰੇਨ ਸਹਜਾਤਾਤਿ? ਆਮਨ੍ਤਾ. ਹਞ੍ਚਿ ਅਵਿਜ੍ਜਾ ਸਙ੍ਖਾਰੇਨ ਸਹਜਾਤਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਵਿਜ੍ਜਾਪਚ੍ਚਯਾਪਿ ਸਙ੍ਖਾਰਾ, ਸਙ੍ਖਾਰਪਚ੍ਚਯਾਪਿ ਅਵਿਜ੍ਜਾ’’ਤਿ.

ਤਣ੍ਹਾਪਚ੍ਚਯਾਵ ਉਪਾਦਾਨਂ, ਨ ਵਤ੍ਤਬ੍ਬਂ – ‘‘ਉਪਾਦਾਨਪਚ੍ਚਯਾਪਿ ਤਣ੍ਹਾ’’ਤਿ? ਆਮਨ੍ਤਾ. ਨਨੁ ਤਣ੍ਹਾ ਉਪਾਦਾਨੇਨ ਸਹਜਾਤਾਤਿ? ਆਮਨ੍ਤਾ. ਹਞ੍ਚਿ ਤਣ੍ਹਾ ਉਪਾਦਾਨੇਨ ਸਹਜਾਤਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਤਣ੍ਹਾਪਚ੍ਚਯਾਪਿ ਉਪਾਦਾਨਂ, ਉਪਾਦਾਨਪਚ੍ਚਯਾਪਿ ਤਣ੍ਹਾ’’ਤਿ.

੭੧੯. ‘‘ਜਰਾਮਰਣਪਚ੍ਚਯਾ, ਭਿਕ੍ਖਵੇ, ਜਾਤਿ, ਜਾਤਿਪਚ੍ਚਯਾ ਭਵੋ’’ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ਤੇਨ ਹਿ ਅਵਿਜ੍ਜਾਪਚ੍ਚਯਾਵ ਸਙ੍ਖਾਰਾ, ਨ ਵਤ੍ਤਬ੍ਬਂ – ‘‘ਸਙ੍ਖਾਰਪਚ੍ਚਯਾਪਿ ਅਵਿਜ੍ਜਾ’’ਤਿ. ਤਣ੍ਹਾਪਚ੍ਚਯਾਵ ਉਪਾਦਾਨਂ, ਨ ਵਤ੍ਤਬ੍ਬਂ – ‘‘ਉਪਾਦਾਨਪਚ੍ਚਯਾਪਿ ਤਣ੍ਹਾ’’ਤਿ.

‘‘ਵਿਞ੍ਞਾਣਪਚ੍ਚਯਾ, ਭਿਕ੍ਖਵੇ, ਨਾਮਰੂਪਂ, ਨਾਮਰੂਪਪਚ੍ਚਯਾਪਿ ਵਿਞ੍ਞਾਣ’’ਨ੍ਤਿ [ਦੀ. ਨਿ. ੨.੫੮, ਥੋਕਂ ਪਨ ਵਿਸਦਿਸਂ] – ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਵਿਜ੍ਜਾਪਚ੍ਚਯਾਪਿ ਸਙ੍ਖਾਰਾ, ਸਙ੍ਖਾਰਪਚ੍ਚਯਾਪਿ ਅਵਿਜ੍ਜਾ; ਤਣ੍ਹਾਪਚ੍ਚਯਾਪਿ ਉਪਾਦਾਨਂ, ਉਪਾਦਾਨਪਚ੍ਚਯਾਪਿ ਤਣ੍ਹਾਤਿ.

ਅਞ੍ਞਮਞ੍ਞਪਚ੍ਚਯਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੪੭) ੩. ਅਦ੍ਧਾਕਥਾ

੭੨੦. ਅਦ੍ਧਾ ਪਰਿਨਿਪ੍ਫਨ੍ਨੋਤਿ? ਆਮਨ੍ਤਾ. ਰੂਪਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾ…ਪੇ… ਸਞ੍ਞਾ…ਪੇ… ਸਙ੍ਖਾਰਾ…ਪੇ… ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤੀਤੋ ਅਦ੍ਧਾ ਪਰਿਨਿਪ੍ਫਨ੍ਨੋਤਿ? ਆਮਨ੍ਤਾ. ਰੂਪਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾ…ਪੇ… ਸਞ੍ਞਾ…ਪੇ… ਸਙ੍ਖਾਰਾ…ਪੇ… ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਗਤੋ ਅਦ੍ਧਾ ਪਰਿਨਿਪ੍ਫਨ੍ਨੋਤਿ? ਆਮਨ੍ਤਾ. ਰੂਪਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾ…ਪੇ… ਸਞ੍ਞਾ…ਪੇ… ਸਙ੍ਖਾਰਾ…ਪੇ… ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਚ੍ਚੁਪ੍ਪਨ੍ਨੋ ਅਦ੍ਧਾ ਪਰਿਨਿਪ੍ਫਨ੍ਨੋਤਿ? ਆਮਨ੍ਤਾ. ਰੂਪਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾ…ਪੇ… ਸਞ੍ਞਾ…ਪੇ… ਸਙ੍ਖਾਰਾ…ਪੇ… ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤੀਤਂ ਰੂਪਂ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਂ ਅਤੀਤੋ ਅਦ੍ਧਾਤਿ? ਆਮਨ੍ਤਾ. ਅਤੀਤਾ ਪਞ੍ਚਦ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਗਤਂ ਰੂਪਂ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਂ ਅਨਾਗਤੋ ਅਦ੍ਧਾਤਿ? ਆਮਨ੍ਤਾ. ਅਨਾਗਤਾ ਪਞ੍ਚਦ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਚ੍ਚੁਪ੍ਪਨ੍ਨਂ ਰੂਪਂ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਂ ਪਚ੍ਚੁਪ੍ਪਨ੍ਨੋ ਅਦ੍ਧਾਤਿ? ਆਮਨ੍ਤਾ. ਪਚ੍ਚੁਪ੍ਪਨ੍ਨਾ ਪਞ੍ਚਦ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤੀਤਾ ਪਞ੍ਚਕ੍ਖਨ੍ਧਾ ਅਤੀਤੋ ਅਦ੍ਧਾ, ਅਨਾਗਤਾ ਪਞ੍ਚਕ੍ਖਨ੍ਧਾ ਅਨਾਗਤੋ ਅਦ੍ਧਾ, ਪਚ੍ਚੁਪ੍ਪਨ੍ਨਾ ਪਞ੍ਚਕ੍ਖਨ੍ਧਾ ਪਚ੍ਚੁਪ੍ਪਨ੍ਨੋ ਅਦ੍ਧਾਤਿ? ਆਮਨ੍ਤਾ. ਪਨ੍ਨਰਸਦ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤੀਤਾਨਿ ਦ੍ਵਾਦਸਾਯਤਨਾਨਿ ਅਤੀਤੋ ਅਦ੍ਧਾ, ਅਨਾਗਤਾਨਿ ਦ੍ਵਾਦਸਾਯਤਨਾਨਿ ਅਨਾਗਤੋ ਅਦ੍ਧਾ, ਪਚ੍ਚੁਪ੍ਪਨ੍ਨਾਨਿ ਦ੍ਵਾਦਸਾਯਤਨਾਨਿ ਪਚ੍ਚੁਪ੍ਪਨ੍ਨੋ ਅਦ੍ਧਾਤਿ? ਆਮਨ੍ਤਾ. ਛਤ੍ਤਿਂਸ ਅਦ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤੀਤਾ ਅਟ੍ਠਾਰਸ ਧਾਤੁਯੋ ਅਤੀਤੋ ਅਦ੍ਧਾ, ਅਨਾਗਤਾ ਅਟ੍ਠਾਰਸ ਧਾਤੁਯੋ ਅਨਾਗਤੋ ਅਦ੍ਧਾ, ਪਚ੍ਚੁਪ੍ਪਨ੍ਨਾ ਅਟ੍ਠਾਰਸ ਧਾਤੁਯੋ ਪਚ੍ਚੁਪ੍ਪਨ੍ਨੋ ਅਦ੍ਧਾਤਿ? ਆਮਨ੍ਤਾ. ਚਤੁਪਞ੍ਞਾਸ ਅਦ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤੀਤਾਨਿ ਬਾਵੀਸਤਿਨ੍ਦ੍ਰਿਯਾਨਿ ਅਤੀਤੋ ਅਦ੍ਧਾ, ਅਨਾਗਤਾਨਿ ਬਾਵੀਸਤਿਨ੍ਦ੍ਰਿਯਾਨਿ ਅਨਾਗਤੋ ਅਦ੍ਧਾ, ਪਚ੍ਚੁਪ੍ਪਨ੍ਨਾਨਿ ਬਾਵੀਸਤਿਨ੍ਦ੍ਰਿਯਾਨਿ ਪਚ੍ਚੁਪ੍ਪਨ੍ਨੋ ਅਦ੍ਧਾਤਿ? ਆਮਨ੍ਤਾ. ਛਸਟ੍ਠਿ ਅਦ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੨੧. ਨ ਵਤ੍ਤਬ੍ਬਂ – ‘‘ਅਦ੍ਧਾ ਪਰਿਨਿਪ੍ਫਨ੍ਨੋਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਤੀਣਿਮਾਨਿ, ਭਿਕ੍ਖਵੇ, ਕਥਾਵਤ੍ਥੂਨਿ! ਕਤਮਾਨਿ ਤੀਣਿ? ਅਤੀਤਂ ਵਾ, ਭਿਕ੍ਖਵੇ, ਅਦ੍ਧਾਨਂ ਆਰਬ੍ਭ ਕਥਂ ਕਥੇਯ੍ਯ – ‘ਏਵਂ ਅਹੋਸਿ ਅਤੀਤਮਦ੍ਧਾਨ’ਨ੍ਤਿ; ਅਨਾਗਤਂ ਵਾ, ਭਿਕ੍ਖਵੇ, ਅਦ੍ਧਾਨਂ ਆਰਬ੍ਭ ਕਥਂ ਕਥੇਯ੍ਯ – ‘ਏਵਂ ਭਵਿਸ੍ਸਤਿ ਅਨਾਗਤਮਦ੍ਧਾਨ’ਨ੍ਤਿ; ਏਤਰਹਿ ਵਾ, ਭਿਕ੍ਖਵੇ, ਪਚ੍ਚੁਪ੍ਪਨ੍ਨਂ ਅਦ੍ਧਾਨਂ ਆਰਬ੍ਭ ਕਥਂ ਕਥੇਯ੍ਯ – ‘ਏਵਂ ਹੋਤਿ ਏਤਰਹਿ ਪਚ੍ਚੁਪ੍ਪਨ੍ਨ’ਨ੍ਤਿ. ਇਮਾਨਿ ਖੋ, ਭਿਕ੍ਖਵੇ, ਤੀਣਿ ਕਥਾਵਤ੍ਥੂਨੀ’’ਤਿ [ਅ. ਨਿ. ੩.੬੮; ਦੀ. ਨਿ. ੩.੩੦੫]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਦ੍ਧਾ ਪਰਿਨਿਪ੍ਫਨ੍ਨੋਤਿ.

ਅਦ੍ਧਾਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੪੮) ੪. ਖਣਲਯਮੁਹੁਤ੍ਤਕਥਾ

੭੨੨. ਖਣੋ ਪਰਿਨਿਪ੍ਫਨ੍ਨੋ, ਲਯੋ ਪਰਿਨਿਪ੍ਫਨ੍ਨੋ, ਮੁਹੁਤ੍ਤਂ ਪਰਿਨਿਪ੍ਫਨ੍ਨਨ੍ਤਿ? ਆਮਨ੍ਤਾ. ਰੂਪਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾ… ਸਞ੍ਞਾ… ਸਙ੍ਖਾਰਾ… ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੨੩. ਨ ਵਤ੍ਤਬ੍ਬਂ – ‘‘ਮੁਹੁਤ੍ਤਂ ਪਰਿਨਿਪ੍ਫਨ੍ਨਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਤੀਣਿਮਾਨਿ, ਭਿਕ੍ਖਵੇ, ਕਥਾਵਤ੍ਥੂਨਿ! ਕਤਮਾਨਿ ਤੀਣਿ? ਅਤੀਤਂ ਵਾ, ਭਿਕ੍ਖਵੇ, ਅਦ੍ਧਾਨਂ ਆਰਬ੍ਭ ਕਥਂ ਕਥੇਯ੍ਯ – ‘ਏਵਂ ਅਹੋਸਿ ਅਤੀਤਮਦ੍ਧਾਨ’ਨ੍ਤਿ; ਅਨਾਗਤਂ ਵਾ, ਭਿਕ੍ਖਵੇ, ਅਦ੍ਧਾਨਂ ਆਰਬ੍ਭ ਕਥਂ ਕਥੇਯ੍ਯ – ‘ਏਵਂ ਭਵਿਸ੍ਸਤਿ ਅਨਾਗਤਮਦ੍ਧਾਨ’ਨ੍ਤਿ; ਏਤਰਹਿ ਵਾ, ਭਿਕ੍ਖਵੇ, ਪਚ੍ਚੁਪ੍ਪਨ੍ਨਂ ਅਦ੍ਧਾਨਂ ਆਰਬ੍ਭ ਕਥਂ ਕਥੇਯ੍ਯ – ‘ਏਵਂ ਹੋਤਿ ਏਤਰਹਿ ਪਚ੍ਚੁਪ੍ਪਨ੍ਨ’ਨ੍ਤਿ. ਇਮਾਨਿ ਖੋ, ਭਿਕ੍ਖਵੇ, ਤੀਣਿ ਕਥਾਵਤ੍ਥੂਨੀ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਮੁਹੁਤ੍ਤਂ ਪਰਿਨਿਪ੍ਫਨ੍ਨਨ੍ਤਿ.

ਖਣਲਯਮੁਹੁਤ੍ਤਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੪੯) ੫. ਆਸਵਕਥਾ

੭੨੪. ਚਤ੍ਤਾਰੋ ਆਸਵਾ ਅਨਾਸਵਾਤਿ? ਆਮਨ੍ਤਾ. ਮਗ੍ਗੋ ਫਲਂ ਨਿਬ੍ਬਾਨਂ, ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ…ਪੇ… ਬੋਜ੍ਝਙ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੨੫. ਨ ਵਤ੍ਤਬ੍ਬਂ – ‘‘ਚਤ੍ਤਾਰੋ ਆਸਵਾ ਅਨਾਸਵਾਤਿ? ਆਮਨ੍ਤਾ. ਅਤ੍ਥਞ੍ਞੇਵ ਆਸਵਾ ਯੇਹਿ ਆਸਵੇਹਿ ਤੇ ਆਸਵਾ ਸਾਸਵਾ ਹੋਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਚਤ੍ਤਾਰੋ ਆਸਵਾ ਅਨਾਸਵਾਤਿ.

ਆਸਵਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੫੦) ੬. ਜਰਾਮਰਣਕਥਾ

੭੨੬. ਲੋਕੁਤ੍ਤਰਾਨਂ ਧਮ੍ਮਾਨਂ ਜਰਾਮਰਣਂ ਲੋਕੁਤ੍ਤਰਨ੍ਤਿ? ਆਮਨ੍ਤਾ. ਮਗ੍ਗੋ ਫਲਂ ਨਿਬ੍ਬਾਨਂ, ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ…ਪੇ… ਬੋਜ੍ਝਙ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੋਤਾਪਤ੍ਤਿਮਗ੍ਗਸ੍ਸ ਜਰਾਮਰਣਂ ਸੋਤਾਪਤ੍ਤਿਮਗ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੋਤਾਪਤ੍ਤਿਮਗ੍ਗਸ੍ਸ ਜਰਾਮਰਣਂ ਸੋਤਾਪਤ੍ਤਿਮਗ੍ਗੋਤਿ? ਆਮਨ੍ਤਾ. ਸੋਤਾਪਤ੍ਤਿਫਲਸ੍ਸ ਜਰਾਮਰਣਂ ਸੋਤਾਪਤ੍ਤਿਫਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਸਕਦਾਗਾਮਿਮਗ੍ਗਸ੍ਸ…ਪੇ… ਸਕਦਾਗਾਮਿਫਲਸ੍ਸ…ਪੇ… ਅਨਾਗਾਮਿਮਗ੍ਗਸ੍ਸ…ਪੇ… ਅਨਾਗਾਮਿਫਲਸ੍ਸ…ਪੇ… ਅਰਹਤ੍ਤਮਗ੍ਗਸ੍ਸ ਜਰਾਮਰਣਂ ਅਰਹਤ੍ਤਮਗ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਤ੍ਤਮਗ੍ਗਸ੍ਸ ਜਰਾਮਰਣਂ ਅਰਹਤ੍ਤਮਗ੍ਗੋਤਿ? ਆਮਨ੍ਤਾ. ਅਰਹਤ੍ਤਫਲਸ੍ਸ ਜਰਾਮਰਣਂ ਅਰਹਤ੍ਤਫਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਤਿਪਟ੍ਠਾਨਾਨਂ… ਸਮ੍ਮਪ੍ਪਧਾਨਾਨਂ… ਇਦ੍ਧਿਪਾਦਾਨਂ… ਇਨ੍ਦ੍ਰਿਯਾਨਂ… ਬਲਾਨਂ… ਬੋਜ੍ਝਙ੍ਗਾਨਂ ਜਰਾਮਰਣਂ ਬੋਜ੍ਝਙ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੨੭. ਨ ਵਤ੍ਤਬ੍ਬਂ – ‘‘ਲੋਕੁਤ੍ਤਰਾਨਂ ਧਮ੍ਮਾਨਂ ਜਰਾਮਰਣਂ ਲੋਕੁਤ੍ਤਰਨ੍ਤਿ? ਆਮਨ੍ਤਾ. ਲੋਕਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਲੋਕੁਤ੍ਤਰਨ੍ਤਿ.

ਜਰਾਮਰਣਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੫੧) ੭. ਸਞ੍ਞਾਵੇਦਯਿਤਕਥਾ

੭੨੮. ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਲੋਕੁਤ੍ਤਰਾਤਿ? ਆਮਨ੍ਤਾ. ਮਗ੍ਗੋ ਫਲਂ ਨਿਬ੍ਬਾਨਂ, ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ…ਪੇ… ਬੋਜ੍ਝਙ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੨੯. ਨ ਵਤ੍ਤਬ੍ਬਂ – ‘‘ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਲੋਕੁਤ੍ਤਰਾਤਿ? ਆਮਨ੍ਤਾ. ਲੋਕਿਯਾਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਲੋਕੁਤ੍ਤਰਾਤਿ.

ਸਞ੍ਞਾਵੇਦਯਿਤਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੫੨) ੮. ਦੁਤਿਯਸਞ੍ਞਾਵੇਦਯਿਤਕਥਾ

੭੩੦. ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਲੋਕਿਯਾਤਿ? ਆਮਨ੍ਤਾ. ਰੂਪਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾ… ਸਞ੍ਞਾ… ਸਙ੍ਖਾਰਾ… ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਾਵਚਰਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰੂਪਾਵਚਰਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰੂਪਾਵਚਰਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੩੧. ਨ ਵਤ੍ਤਬ੍ਬਂ – ‘‘ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਲੋਕਿਯਾਤਿ? ਆਮਨ੍ਤਾ. ਲੋਕੁਤ੍ਤਰਾਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਲੋਕਿਯਾਤਿ.

ਦੁਤਿਯਸਞ੍ਞਾਵੇਦਯਿਤਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੫੩) ੯. ਤਤਿਯਸਞ੍ਞਾਵੇਦਯਿਤਕਥਾ

੭੩੨. ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਕਾਲਂ ਕਰੇਯ੍ਯਾਤਿ? ਆਮਨ੍ਤਾ. ਅਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਮਾਰਣਨ੍ਤਿਯੋ ਫਸ੍ਸੋ, ਮਾਰਣਨ੍ਤਿਯਾ ਵੇਦਨਾ, ਮਾਰਣਨ੍ਤਿਯਾ ਸਞ੍ਞਾ, ਮਾਰਣਨ੍ਤਿਯਾ ਚੇਤਨਾ, ਮਾਰਣਨ੍ਤਿਯਂ ਚਿਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਮਾਰਣਨ੍ਤਿਯੋ ਫਸ੍ਸੋ, ਮਾਰਣਨ੍ਤਿਯਾ ਵੇਦਨਾ, ਮਾਰਣਨ੍ਤਿਯਾ ਸਞ੍ਞਾ, ਮਾਰਣਨ੍ਤਿਯਾ ਚੇਤਨਾ, ਮਾਰਣਨ੍ਤਿਯਂ ਚਿਤ੍ਤਨ੍ਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਮਾਰਣਨ੍ਤਿਯੋ ਫਸ੍ਸੋ, ਮਾਰਣਨ੍ਤਿਯਾ ਵੇਦਨਾ, ਮਾਰਣਨ੍ਤਿਯਾ ਸਞ੍ਞਾ, ਮਾਰਣਨ੍ਤਿਯਾ ਚੇਤਨਾ, ਮਾਰਣਨ੍ਤਿਯਂ ਚਿਤ੍ਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਕਾਲਂ ਕਰੇਯ੍ਯਾ’’ਤਿ.

ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਕਾਲਂ ਕਰੇਯ੍ਯਾਤਿ? ਆਮਨ੍ਤਾ. ਅਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਚਿਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਚਿਤ੍ਤਨ੍ਤਿ? ਆਮਨ੍ਤਾ. ਅਫਸ੍ਸਕਸ੍ਸ ਕਾਲਂ ਕਿਰਿਯਾ, ਅਵੇਦਨਕਸ੍ਸ ਕਾਲਂ ਕਿਰਿਯਾ…ਪੇ… ਅਚਿਤ੍ਤਕਸ੍ਸ ਕਾਲਂ ਕਿਰਿਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸਫਸ੍ਸਕਸ੍ਸ ਕਾਲਂ ਕਿਰਿਯਾ…ਪੇ… ਸਚਿਤ੍ਤਕਸ੍ਸ ਕਾਲਂ ਕਿਰਿਯਾਤਿ? ਆਮਨ੍ਤਾ. ਹਞ੍ਚਿ ਸਫਸ੍ਸਕਸ੍ਸ ਕਾਲਂ ਕਿਰਿਯਾ…ਪੇ… ਸਚਿਤ੍ਤਕਸ੍ਸ ਕਾਲਂ ਕਿਰਿਯਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਕਾਲਂ ਕਰੇਯ੍ਯਾ’’ਤਿ.

ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਕਾਲਂ ਕਰੇਯ੍ਯਾਤਿ? ਆਮਨ੍ਤਾ. ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਕਾਯੇ ਵਿਸਂ ਕਮੇਯ੍ਯ, ਸਤ੍ਥਂ ਕਮੇਯ੍ਯ, ਅਗ੍ਗਿ ਕਮੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਕਾਯੇ ਵਿਸਂ ਨ ਕਮੇਯ੍ਯ, ਸਤ੍ਥਂ ਨ ਕਮੇਯ੍ਯ, ਅਗ੍ਗਿ ਨ ਕਮੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਕਾਯੇ ਵਿਸਂ ਨ ਕਮੇਯ੍ਯ, ਸਤ੍ਥਂ ਨ ਕਮੇਯ੍ਯ, ਅਗ੍ਗਿ ਨ ਕਮੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਕਾਲਂ ਕਰੇਯ੍ਯਾ’’ਤਿ.

ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਕਾਲਂ ਕਰੇਯ੍ਯਾਤਿ? ਆਮਨ੍ਤਾ. ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਕਾਯੇ ਵਿਸਂ ਕਮੇਯ੍ਯ, ਸਤ੍ਥਂ ਕਮੇਯ੍ਯ, ਅਗ੍ਗਿ ਕਮੇਯ੍ਯਾਤਿ? ਆਮਨ੍ਤਾ. ਨ ਨਿਰੋਧਂ ਸਮਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੩੩. ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਨ ਕਾਲਂ ਕਰੇਯ੍ਯਾਤਿ? ਆਮਨ੍ਤਾ. ਅਤ੍ਥਿ ਸੋ ਨਿਯਾਮੋ ਯੇਨ ਨਿਯਾਮੇਨ ਨਿਯਤੋ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਨ ਕਾਲਂ ਕਰੇਯ੍ਯਾਤਿ? ਨਤ੍ਥਿ. ਹਞ੍ਚਿ ਨਤ੍ਥਿ ਸੋ ਨਿਯਾਮੋ ਯੇਨ ਨਿਯਾਮੇਨ ਨਿਯਤੋ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਨ ਕਾਲਂ ਕਰੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਨ ਕਾਲਂ ਕਰੇਯ੍ਯਾਤਿ.

੭੩੪. ਚਕ੍ਖੁਵਿਞ੍ਞਾਣਸਮਙ੍ਗੀ ਨ ਕਾਲਂ ਕਰੇਯ੍ਯਾਤਿ? ਆਮਨ੍ਤਾ. ਅਤ੍ਥਿ ਸੋ ਨਿਯਾਮੋ ਯੇਨ ਨਿਯਾਮੇਨ ਨਿਯਤੋ ਚਕ੍ਖੁਵਿਞ੍ਞਾਣਸਮਙ੍ਗੀ ਨ ਕਾਲਂ ਕਰੇਯ੍ਯਾਤਿ? ਨਤ੍ਥਿ. ਹਞ੍ਚਿ ਨਤ੍ਥਿ ਸੋ ਨਿਯਾਮੋ ਯੇਨ ਨਿਯਾਮੇਨ ਨਿਯਤੋ ਚਕ੍ਖੁਵਿਞ੍ਞਾਣਸਮਙ੍ਗੀ ਨ ਕਾਲਂ ਕਰੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਕ੍ਖੁਵਿਞ੍ਞਾਣਸਮਙ੍ਗੀ ਨ ਕਾਲਂ ਕਰੇਯ੍ਯਾ’’ਤਿ.

ਤਤਿਯਸਞ੍ਞਾਵੇਦਯਿਤਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੫੪) ੧੦. ਅਸਞ੍ਞਸਤ੍ਤੁਪਿਕਕਥਾ

੭੩੫. ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਅਸਞ੍ਞਸਤ੍ਤੁਪਿਕਾਤਿ? ਆਮਨ੍ਤਾ. ਅਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਅਲੋਭੋ ਕੁਸਲਮੂਲਂ, ਅਦੋਸੋ ਕੁਸਲਮੂਲਂ, ਅਮੋਹੋ ਕੁਸਲਮੂਲਂ, ਸਦ੍ਧਾ ਵੀਰਿਯਂ ਸਤਿ ਸਮਾਧਿ ਪਞ੍ਞਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਅਲੋਭੋ ਕੁਸਲਮੂਲਂ, ਅਦੋਸੋ ਕੁਸਲਮੂਲਂ…ਪੇ… ਪਞ੍ਞਾਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਅਲੋਭੋ ਕੁਸਲਮੂਲਂ, ਅਦੋਸੋ ਕੁਸਲਮੂਲਂ, ਅਮੋਹੋ ਕੁਸਲਮੂਲਂ, ਸਦ੍ਧਾ ਵੀਰਿਯਂ ਸਤਿ ਸਮਾਧਿ ਪਞ੍ਞਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਅਸਞ੍ਞਸਤ੍ਤੁਪਿਕਾ’’ਤਿ.

ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਅਸਞ੍ਞਸਤ੍ਤੁਪਿਕਾਤਿ? ਆਮਨ੍ਤਾ. ਅਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਚਿਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਚਿਤ੍ਤਨ੍ਤਿ? ਆਮਨ੍ਤਾ. ਅਫਸ੍ਸਕਸ੍ਸ ਮਗ੍ਗਭਾਵਨਾ…ਪੇ… ਅਚਿਤ੍ਤਕਸ੍ਸ ਮਗ੍ਗਭਾਵਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸਫਸ੍ਸਕਸ੍ਸ ਮਗ੍ਗਭਾਵਨਾ…ਪੇ… ਸਚਿਤ੍ਤਕਸ੍ਸ ਮਗ੍ਗਭਾਵਨਾਤਿ? ਆਮਨ੍ਤਾ. ਹਞ੍ਚਿ ਸਫਸ੍ਸਕਸ੍ਸ ਮਗ੍ਗਭਾਵਨਾ…ਪੇ… ਸਚਿਤ੍ਤਕਸ੍ਸ ਮਗ੍ਗਭਾਵਨਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਅਸਞ੍ਞਸਤ੍ਤੁਪਿਕਾ’’ਤਿ.

ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਅਸਞ੍ਞਸਤ੍ਤੁਪਿਕਾਤਿ? ਆਮਨ੍ਤਾ. ਯੇ ਕੇਚਿ ਸਞ੍ਞਾਵੇਦਯਿਤਨਿਰੋਧਂ ਸਮਾਪਜ੍ਜਨ੍ਤਿ, ਸਬ੍ਬੇ ਤੇ ਅਸਞ੍ਞਸਤ੍ਤੁਪਿਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੩੬. ਨ ਵਤ੍ਤਬ੍ਬਂ – ‘‘ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਅਸਞ੍ਞਸਤ੍ਤੁਪਿਕਾ’’ਤਿ? ਆਮਨ੍ਤਾ. ਨਨੁ ਇਧਾਪਿ ਅਸਞ੍ਞੀ ਤਤ੍ਰਾਪਿ ਅਸਞ੍ਞੀਤਿ? ਆਮਨ੍ਤਾ. ਹਞ੍ਚਿ ਇਧਾਪਿ ਅਸਞ੍ਞੀ ਤਤ੍ਰਾਪਿ ਅਸਞ੍ਞੀ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਅਸਞ੍ਞਸਤ੍ਤੁਪਿਕਾ’’ਤਿ.

ਅਸਞ੍ਞਸਤ੍ਤੁਪਿਕਕਥਾ ਨਿਟ੍ਠਿਤਾ.

੧੫. ਪਨ੍ਨਰਸਮਵਗ੍ਗੋ

(੧੫੫) ੧੧. ਕਮ੍ਮੂਪਚਯਕਥਾ

੭੩੭. ਅਞ੍ਞਂ ਕਮ੍ਮਂ ਅਞ੍ਞੋ ਕਮ੍ਮੂਪਚਯੋਤਿ? ਆਮਨ੍ਤਾ. ਅਞ੍ਞੋ ਫਸ੍ਸੋ, ਅਞ੍ਞੋ ਫਸ੍ਸੂਪਚਯੋ; ਅਞ੍ਞਾ ਵੇਦਨਾ, ਅਞ੍ਞੋ ਵੇਦਨੂਪਚਯੋ; ਅਞ੍ਞਾ ਸਞ੍ਞਾ, ਅਞ੍ਞੋ ਸਞ੍ਞੂਪਚਯੋ; ਅਞ੍ਞਾ ਚੇਤਨਾ, ਅਞ੍ਞੋ ਚੇਤਨੂਪਚਯੋ; ਅਞ੍ਞਂ ਚਿਤ੍ਤਂ, ਅਞ੍ਞੋ ਚਿਤ੍ਤੂਪਚਯੋ; ਅਞ੍ਞਾ ਸਦ੍ਧਾ, ਅਞ੍ਞੋ ਸਦ੍ਧੂਪਚਯੋ; ਅਞ੍ਞਂ ਵੀਰਿਯਂ, ਅਞ੍ਞੋ ਵੀਰਿਯੂਪਚਯੋ; ਅਞ੍ਞਾ ਸਤਿ, ਅਞ੍ਞੋ ਸਤੂਪਚਯੋ; ਅਞ੍ਞੋ ਸਮਾਧਿ, ਅਞ੍ਞੋ ਸਮਾਧੂਪਚਯੋ; ਅਞ੍ਞਾ ਪਞ੍ਞਾ, ਅਞ੍ਞੋ ਪਞ੍ਞੂਪਚਯੋ; ਅਞ੍ਞੋ ਰਾਗੋ, ਅਞ੍ਞੋ ਰਾਗੂਪਚਯੋ…ਪੇ… ਅਞ੍ਞਂ ਅਨੋਤ੍ਤਪ੍ਪਂ, ਅਞ੍ਞੋ ਅਨੋਤ੍ਤਪ੍ਪੂਪਚਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੩੮. ਅਞ੍ਞਂ ਕਮ੍ਮਂ, ਅਞ੍ਞੋ ਕਮ੍ਮੂਪਚਯੋਤਿ? ਆਮਨ੍ਤਾ. ਕਮ੍ਮੂਪਚਯੋ ਕਮ੍ਮੇਨ ਸਹਜਾਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਮ੍ਮੂਪਚਯੋ ਕਮ੍ਮੇਨ ਸਹਜਾਤੋਤਿ, ਆਮਨ੍ਤਾ. ਕੁਸਲੇਨ ਕਮ੍ਮੇਨ ਸਹਜਾਤੋ ਕਮ੍ਮੂਪਚਯੋ ਕੁਸਲੋਤਿ, ਨ ਹੇਵਂ ਵਤ੍ਤਬ੍ਬੇ…ਪੇ….

ਕੁਸਲੇਨ ਕਮ੍ਮੇਨ ਸਹਜਾਤੋ ਕਮ੍ਮੂਪਚਯੋ ਕੁਸਲੋਤਿ? ਆਮਨ੍ਤਾ. ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੇਨ ਕਮ੍ਮੇਨ ਸਹਜਾਤੋ ਕਮ੍ਮੂਪਚਯੋ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੁਕ੍ਖਾਯ ਵੇਦਨਾਯ…ਪੇ… ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤੇਨ ਕਮ੍ਮੇਨ ਸਹਜਾਤੋ ਕਮ੍ਮੂਪਚਯੋ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੩੯. ਕਮ੍ਮੂਪਚਯੋ ਕਮ੍ਮੇਨ ਸਹਜਾਤੋਤਿ? ਆਮਨ੍ਤਾ. ਅਕੁਸਲੇਨ ਕਮ੍ਮੇਨ ਸਹਜਾਤੋ ਕਮ੍ਮੂਪਚਯੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਕੁਸਲੇਨ ਕਮ੍ਮੇਨ ਸਹਜਾਤੋ ਕਮ੍ਮੂਪਚਯੋ ਅਕੁਸਲੋਤਿ? ਆਮਨ੍ਤਾ. ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੇਨ ਕਮ੍ਮੇਨ ਸਹਜਾਤੋ ਕਮ੍ਮੂਪਚਯੋ ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੁਕ੍ਖਾਯ ਵੇਦਨਾਯ…ਪੇ… ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤੇਨ ਕਮ੍ਮੇਨ ਸਹਜਾਤੋ ਕਮ੍ਮੂਪਚਯੋ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੪੦. ਕਮ੍ਮਂ ਚਿਤ੍ਤੇਨ ਸਹਜਾਤਂ, ਕਮ੍ਮਂ ਸਾਰਮ੍ਮਣਨ੍ਤਿ? ਆਮਨ੍ਤਾ. ਕਮ੍ਮੂਪਚਯੋ ਚਿਤ੍ਤੇਨ ਸਹਜਾਤੋ, ਕਮ੍ਮੂਪਚਯੋ ਸਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਮ੍ਮੂਪਚਯੋ ਚਿਤ੍ਤੇਨ ਸਹਜਾਤੋ, ਕਮ੍ਮੂਪਚਯੋ ਅਨਾਰਮ੍ਮਣੋਤਿ? ਆਮਨ੍ਤਾ. ਕਮ੍ਮਂ ਚਿਤ੍ਤੇਨ ਸਹਜਾਤਂ, ਕਮ੍ਮਂ ਅਨਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਮ੍ਮਂ ਚਿਤ੍ਤੇਨ ਸਹਜਾਤਂ, ਚਿਤ੍ਤਂ ਭਿਜ੍ਜਮਾਨਂ ਕਮ੍ਮਂ ਭਿਜ੍ਜਤੀਤਿ? ਆਮਨ੍ਤਾ. ਕਮ੍ਮੂਪਚਯੋ ਚਿਤ੍ਤੇਨ ਸਹਜਾਤੋ, ਚਿਤ੍ਤਂ ਭਿਜ੍ਜਮਾਨਂ ਕਮ੍ਮੂਪਚਯੋ ਭਿਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਮ੍ਮੂਪਚਯੋ ਚਿਤ੍ਤੇਨ ਸਹਜਾਤੋ, ਚਿਤ੍ਤਂ ਭਿਜ੍ਜਮਾਨਂ ਕਮ੍ਮੂਪਚਯੋ ਨ ਭਿਜ੍ਜਤੀਤਿ? ਆਮਨ੍ਤਾ. ਕਮ੍ਮਂ ਚਿਤ੍ਤੇਨ ਸਹਜਾਤਂ, ਚਿਤ੍ਤਂ ਭਿਜ੍ਜਮਾਨਂ ਕਮ੍ਮਂ ਨ ਭਿਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੪੧. ਕਮ੍ਮਮ੍ਹਿ ਕਮ੍ਮੂਪਚਯੋਤਿ? ਆਮਨ੍ਤਾ. ਤਞ੍ਞੇਵ ਕਮ੍ਮਂ ਸੋ ਕਮ੍ਮੂਪਚਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਮ੍ਮਮ੍ਹਿ ਕਮ੍ਮੂਪਚਯੋ, ਕਮ੍ਮੂਪਚਯਤੋ ਵਿਪਾਕੋ ਨਿਬ੍ਬਤ੍ਤਤੀਤਿ? ਆਮਨ੍ਤਾ. ਤਞ੍ਞੇਵ ਕਮ੍ਮਂ, ਸੋ ਕਮ੍ਮੂਪਚਯੋ, ਸੋ ਕਮ੍ਮਵਿਪਾਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਮ੍ਮਮ੍ਹਿ ਕਮ੍ਮੂਪਚਯੋ, ਕਮ੍ਮੂਪਚਯਤੋ ਵਿਪਾਕੋ ਨਿਬ੍ਬਤ੍ਤਤਿ, ਵਿਪਾਕੋ ਸਾਰਮ੍ਮਣੋਤਿ? ਆਮਨ੍ਤਾ. ਕਮ੍ਮੂਪਚਯੋ ਸਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਮ੍ਮੂਪਚਯੋ ਅਨਾਰਮ੍ਮਣੋਤਿ? ਆਮਨ੍ਤਾ. ਵਿਪਾਕੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੪੨. ਅਞ੍ਞਂ ਕਮ੍ਮਂ ਅਞ੍ਞੋ ਕਮ੍ਮੂਪਚਯੋਤਿ, ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਇਧ, ਪੁਣ੍ਣ, ਏਕਚ੍ਚੋ ਸਬ੍ਯਾਬਜ੍ਝਮ੍ਪਿ ਅਬ੍ਯਾਬਜ੍ਝਮ੍ਪਿ [ਸਬ੍ਯਾਪਜ੍ਝਮ੍ਪਿ ਅਬ੍ਯਾਪਜ੍ਝਮ੍ਪਿ (ਕ.) ਮ. ਨਿ. ੨.੮੧ ਪਸ੍ਸਿਤਬ੍ਬਂ] ਕਾਯਸਙ੍ਖਾਰਂ ਅਭਿਸਙ੍ਖਰੋਤਿ, ਸਬ੍ਯਾਬਜ੍ਝਮ੍ਪਿ ਅਬ੍ਯਾਬਜ੍ਝਮ੍ਪਿ ਵਚੀਸਙ੍ਖਾਰਂ…ਪੇ… ਮਨੋਸਙ੍ਖਾਰਂ ਅਭਿਸਙ੍ਖਰੋਤਿ, ਸੋ ਸਬ੍ਯਾਬਜ੍ਝਮ੍ਪਿ ਅਬ੍ਯਾਬਜ੍ਝਮ੍ਪਿ ਕਾਯਸਙ੍ਖਾਰਂ ਅਭਿਸਙ੍ਖਰਿਤ੍ਵਾ, ਸਬ੍ਯਾਬਜ੍ਝਮ੍ਪਿ ਅਬ੍ਯਾਬਜ੍ਝਮ੍ਪਿ ਵਚੀਸਙ੍ਖਾਰਂ…ਪੇ… ਮਨੋਸਙ੍ਖਾਰਂ ਅਭਿਸਙ੍ਖਰਿਤ੍ਵਾ ਸਬ੍ਯਾਬਜ੍ਝਮ੍ਪਿ ਅਬ੍ਯਾਬਜ੍ਝਮ੍ਪਿ ਲੋਕਂ ਉਪਪਜ੍ਜਤਿ. ਤਮੇਨਂ ਸਬ੍ਯਾਬਜ੍ਝਮ੍ਪਿ ਅਬ੍ਯਾਬਜ੍ਝਮ੍ਪਿ ਲੋਕਂ ਉਪਪਨ੍ਨਂ ਸਮਾਨਂ ਸਬ੍ਯਾਬਜ੍ਝਾਪਿ ਅਬ੍ਯਾਬਜ੍ਝਾਪਿ ਫਸ੍ਸਾ ਫੁਸਨ੍ਤਿ. ਸੋ ਸਬ੍ਯਾਬਜ੍ਝੇਹਿਪਿ ਅਬ੍ਯਾਬਜ੍ਝੇਹਿਪਿ ਫਸ੍ਸੇਹਿ ਫੁਟ੍ਠੋ ਸਮਾਨੋ ਸਬ੍ਯਾਬਜ੍ਝਮ੍ਪਿ ਅਬ੍ਯਾਬਜ੍ਝਮ੍ਪਿ ਵੇਦਨਂ ਵੇਦੇਤਿ ਵੋਕਿਣ੍ਣਸੁਖਦੁਕ੍ਖਂ, ਸੇਯ੍ਯਥਾਪਿ ਮਨੁਸ੍ਸਾ ਏਕਚ੍ਚੇ ਚ ਦੇਵਾ ਏਕਚ੍ਚੇ ਚ ਵਿਨਿਪਾਤਿਕਾ. ਇਤਿ ਖੋ, ਪੁਣ੍ਣ, ਭੂਤਾ ਭੂਤਸ੍ਸ ਉਪਪਤ੍ਤਿ ਹੋਤਿ, ਯਂ ਕਰੋਤਿ ਤੇਨ ਉਪਪਜ੍ਜਤਿ, ਉਪਪਨ੍ਨਮੇਤਂ ਫਸ੍ਸਾ ਫੁਸਨ੍ਤਿ. ਏਵਮ੍ਪਾਹਂ, ਪੁਣ੍ਣ, ‘ਕਮ੍ਮਦਾਯਾਦਾ ਸਤ੍ਤਾ’ਤਿ ਵਦਾਮੀ’’ਤਿ [ਮ. ਨਿ. ੨.੮੧]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਞ੍ਞਂ ਕਮ੍ਮਂ, ਅਞ੍ਞੋ ਕਮ੍ਮੂਪਚਯੋ’’ਤਿ.

ਕਮ੍ਮੂਪਚਯਕਥਾ ਨਿਟ੍ਠਿਤਾ.

ਪਨ੍ਨਰਸਮਵਗ੍ਗੋ.

ਤਸ੍ਸੁਦ੍ਦਾਨਂ –

ਪਚ੍ਚਯਤਾ ਵਵਤ੍ਥਿਤਾ, ਪਟਿਚ੍ਚਸਮੁਪ੍ਪਾਦੋ, ਅਦ੍ਧਾ, ਖਣੋ ਲਯੋ ਮੁਹੁਤ੍ਤਂ, ਚਤ੍ਤਾਰੋ ਆਸਵਾ ਅਨਾਸਵਾ, ਲੋਕੁਤ੍ਤਰਾਨਂ ਧਮ੍ਮਾਨਂ ਜਰਾਮਰਣਂ ਲੋਕੁਤ੍ਤਰਾ, ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਲੋਕੁਤ੍ਤਰਾ, ਸਞ੍ਞਾਵੇਦਯਿਤਨਿਰੋਧਸਮਾਪਤ੍ਤਿ ਲੋਕਿਯਾ, ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨੋ ਕਾਲਂ ਕਰੇਯ੍ਯ, ਸ੍ਵੇਵ ਮਗ੍ਗੋ ਅਸਞ੍ਞਸਤ੍ਤੁਪਪਤ੍ਤਿਯਾ, ਅਞ੍ਞਂ ਕਮ੍ਮਂ ਅਞ੍ਞੋ ਕਮ੍ਮੂਪਚਯੋਤਿ.

ਤਤਿਯੋ ਪਣ੍ਣਾਸਕੋ.

ਤਸ੍ਸੁਦ੍ਦਾਨਂ –

ਅਨੁਸਯਾ, ਸਂਵਰੋ, ਕਪ੍ਪੋ, ਮੂਲਞ੍ਚ ਵਵਤ੍ਥਿਤਾਤਿ.