੧੪. ਚੁਦ੍ਦਸਮਵਗ੍ਗੋ
(੧੩੬) ੧. ਕੁਸਲਾਕੁਸਲਪਟਿਸਨ੍ਦਹਨਕਥਾ
੬੮੬. ਅਕੁਸਲਮੂਲਂ ਪਟਿਸਨ੍ਦਹਤਿ ਕੁਸਲਮੂਲਨ੍ਤਿ? ਆਮਨ੍ਤਾ. ਯਾ ਅਕੁਸਲਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਕੁਸਲਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਕੁਸਲਮੂਲਂ ਪਟਿਸਨ੍ਦਹਤਿ ਕੁਸਲਮੂਲਂ, ਨ ਵਤ੍ਤਬ੍ਬਂ – ‘‘ਯਾ ਅਕੁਸਲਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਕੁਸਲਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀ’’ਤਿ? ਆਮਨ੍ਤਾ. ਕੁਸਲਂ ਅਨਾਵਟ੍ਟੇਨ੍ਤਸ੍ਸ [ਅਨਾਵਟ੍ਟਨ੍ਤਸ੍ਸ (ਸੀ. ਪੀ. ਕ.), ਅਨਾਵਜ੍ਜਨ੍ਤਸ੍ਸ (ਸ੍ਯਾ. ਕਂ.)] ਉਪ੍ਪਜ੍ਜਤਿ …ਪੇ… ਅਪ੍ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਕੁਸਲਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਕੁਸਲਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਕੁਸਲਮੂਲਂ ਪਟਿਸਨ੍ਦਹਤਿ ਕੁਸਲਮੂਲ’’ਨ੍ਤਿ.
੬੮੭. ਅਕੁਸਲਮੂਲਂ ਪਟਿਸਨ੍ਦਹਤਿ ਕੁਸਲਮੂਲਨ੍ਤਿ? ਆਮਨ੍ਤਾ. ਅਕੁਸਲਮੂਲਂ ਅਯੋਨਿਸੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਕੁਸਲਂ ਅਯੋਨਿਸੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਕੁਸਲਂ ਯੋਨਿਸੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਕੁਸਲਂ ਯੋਨਿਸੋ ਮਨਸਿਕਰੋਤੋ ਉਪ੍ਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਕੁਸਲਮੂਲਂ ਪਟਿਸਨ੍ਦਹਤਿ ਕੁਸਲਮੂਲ’’ਨ੍ਤਿ.
ਅਕੁਸਲਮੂਲਂ ਪਟਿਸਨ੍ਦਹਤਿ ਕੁਸਲਮੂਲਨ੍ਤਿ? ਆਮਨ੍ਤਾ. ਕਾਮਸਞ੍ਞਾਯ ਅਨਨ੍ਤਰਾ ਨੇਕ੍ਖਮ੍ਮਸਞ੍ਞਾ ਉਪ੍ਪਜ੍ਜਤਿ, ਬ੍ਯਾਪਾਦਸਞ੍ਞਾਯ ਅਨਨ੍ਤਰਾ ਅਬ੍ਯਾਪਾਦਸਞ੍ਞਾ ਉਪ੍ਪਜ੍ਜਤਿ, ਵਿਹਿਂਸਾਸਞ੍ਞਾਯ ਅਨਨ੍ਤਰਾ ਅਵਿਹਿਂਸਾਸਞ੍ਞਾ ਉਪ੍ਪਜ੍ਜਤਿ, ਬ੍ਯਾਪਾਦਸ੍ਸ ਅਨਨ੍ਤਰਾ ਮੇਤ੍ਤਾ ਉਪ੍ਪਜ੍ਜਤਿ, ਵਿਹਿਂਸਾਯ ਅਨਨ੍ਤਰਾ ਕਰੁਣਾ ਉਪ੍ਪਜ੍ਜਤਿ, ਅਰਤਿਯਾ ਅਨਨ੍ਤਰਾ ਮੁਦਿਤਾ ਉਪ੍ਪਜ੍ਜਤਿ, ਪਟਿਘਸ੍ਸ ਅਨਨ੍ਤਰਾ ਉਪੇਕ੍ਖਾ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੬੮੮. ਕੁਸਲਮੂਲਂ ਪਟਿਸਨ੍ਦਹਤਿ ਅਕੁਸਲਮੂਲਨ੍ਤਿ? ਆਮਨ੍ਤਾ. ਯਾ ਕੁਸਲਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਅਕੁਸਲਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਕੁਸਲਮੂਲਂ ਪਟਿਸਨ੍ਦਹਤਿ ਅਕੁਸਲਮੂਲਂ, ਨ ਵਤ੍ਤਬ੍ਬਂ – ‘‘ਯਾ ਕੁਸਲਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਅਕੁਸਲਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀ’’ਤਿ? ਆਮਨ੍ਤਾ. ਅਕੁਸਲਂ ਅਨਾਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਅਪ੍ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਕੁਸਲਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਅਕੁਸਲਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਕੁਸਲਮੂਲਂ ਪਟਿਸਨ੍ਦਹਤਿ ਅਕੁਸਲਮੂਲ’’ਨ੍ਤਿ.
੬੮੯. ਕੁਸਲਮੂਲਂ ਪਟਿਸਨ੍ਦਹਤਿ ਅਕੁਸਲਮੂਲਨ੍ਤਿ? ਆਮਨ੍ਤਾ. ਕੁਸਲਂ ਯੋਨਿਸੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਅਕੁਸਲਂ ਯੋਨਿਸੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਕੁਸਲਂ ਅਯੋਨਿਸੋ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਅਕੁਸਲਂ ਅਯੋਨਿਸੋ ਮਨਸਿਕਰੋਤੋ ਉਪ੍ਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਕੁਸਲਮੂਲਂ ਪਟਿਸਨ੍ਦਹਤਿ ਅਕੁਸਲਮੂਲ’’ਨ੍ਤਿ.
ਕੁਸਲਮੂਲਂ ਪਟਿਸਨ੍ਦਹਤਿ ਅਕੁਸਲਮੂਲਨ੍ਤਿ? ਆਮਨ੍ਤਾ. ਨੇਕ੍ਖਮ੍ਮਸਞ੍ਞਾਯ ਅਨਨ੍ਤਰਾ ਕਾਮਸਞ੍ਞਾ ਉਪ੍ਪਜ੍ਜਤਿ, ਅਬ੍ਯਾਪਾਦਸਞ੍ਞਾਯ ਅਨਨ੍ਤਰਾ ਬ੍ਯਾਪਾਦਸਞ੍ਞਾ ਉਪ੍ਪਜ੍ਜਤਿ, ਅਵਿਹਿਂਸਾਸਞ੍ਞਾਯ ਅਨਨ੍ਤਰਾ ਵਿਹਿਂਸਾਸਞ੍ਞਾ ਉਪ੍ਪਜ੍ਜਤਿ, ਮੇਤ੍ਤਾਯ ਅਨਨ੍ਤਰਾ ਬ੍ਯਾਪਾਦੋ ਉਪ੍ਪਜ੍ਜਤਿ, ਕਰੁਣਾਯ ਅਨਨ੍ਤਰਾ ਵਿਹਿਂਸਾ ਉਪ੍ਪਜ੍ਜਤਿ, ਮੁਦਿਤਾਯ ਅਨਨ੍ਤਰਾ ਅਰਤਿ ਉਪ੍ਪਜ੍ਜਤਿ, ਉਪੇਕ੍ਖਾਯ ਅਨਨ੍ਤਰਾ ਪਟਿਘਂ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੬੯੦. ਨ ਵਤ੍ਤਬ੍ਬਂ – ‘‘ਅਕੁਸਲਮੂਲਂ ਪਟਿਸਨ੍ਦਹਤਿ ਕੁਸਲਮੂਲਂ, ਕੁਸਲਮੂਲਂ ਪਟਿਸਨ੍ਦਹਤਿ ਅਕੁਸਲਮੂਲ’’ਨ੍ਤਿ? ਆਮਨ੍ਤਾ. ਨਨੁ ਯਸ੍ਮਿਂਯੇਵ ਵਤ੍ਥੁਸ੍ਮਿਂ ਰਜ੍ਜਤਿ ਤਸ੍ਮਿਞ੍ਞੇਵ ਵਤ੍ਥੁਸ੍ਮਿਂ ਵਿਰਜ੍ਜਤਿ, ਯਸ੍ਮਿਂਯੇਵ ਵਤ੍ਥੁਸ੍ਮਿਂ ਵਿਰਜ੍ਜਤਿ ਤਸ੍ਮਿਞ੍ਞੇਵ ਵਤ੍ਥੁਸ੍ਮਿਂ ਰਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਯਸ੍ਮਿਞ੍ਞੇਵ ਵਤ੍ਥੁਸ੍ਮਿਂ ਰਜ੍ਜਤਿ ਤਸ੍ਮਿਞ੍ਞੇਵ ਵਤ੍ਥੁਸ੍ਮਿਂ ਵਿਰਜ੍ਜਤਿ, ਯਸ੍ਮਿਞ੍ਞੇਵ ਵਤ੍ਥੁਸ੍ਮਿਂ ਵਿਰਜ੍ਜਤਿ ਤਸ੍ਮਿਞ੍ਞੇਵ ਵਤ੍ਥੁਸ੍ਮਿਂ ਰਜ੍ਜਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਕੁਸਲਮੂਲਂ ਪਟਿਸਨ੍ਦਹਤਿ ਕੁਸਲਮੂਲਂ, ਕੁਸਲਮੂਲਂ ਪਟਿਸਨ੍ਦਹਤਿ ਅਕੁਸਲਮੂਲ’’ਨ੍ਤਿ.
ਕੁਸਲਾਕੁਸਲਪਟਿਸਨ੍ਦਹਨਕਥਾ ਨਿਟ੍ਠਿਤਾ.
੧੪. ਚੁਦ੍ਦਸਮਵਗ੍ਗੋ
(੧੩੭) ੨. ਸਲ਼ਾਯਤਨੁਪ੍ਪਤ੍ਤਿਕਥਾ
੬੯੧. ਸਲ਼ਾਯਤਨਂ ਅਪੁਬ੍ਬਂ ਅਚਰਿਮਂ ਮਾਤੁਕੁਚ੍ਛਿਸ੍ਮਿਂ ਸਣ੍ਠਾਤੀਤਿ? ਆਮਨ੍ਤਾ. ਸਬ੍ਬਙ੍ਗਪਚ੍ਚਙ੍ਗੀ ਅਹੀਨਿਨ੍ਦ੍ਰਿਯੋ ਮਾਤੁਕੁਚ੍ਛਿਸ੍ਮਿਂ ਓਕ੍ਕਮਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਉਪਪਤ੍ਤੇਸਿਯੇਨ ਚਿਤ੍ਤੇਨ ਚਕ੍ਖਾਯਤਨਂ ਸਣ੍ਠਾਤੀਤਿ? ਆਮਨ੍ਤਾ. ਉਪਪਤ੍ਤੇਸਿਯੇਨ ਚਿਤ੍ਤੇਨ ਹਤ੍ਥਾ ਸਣ੍ਠਨ੍ਤਿ, ਪਾਦਾ ਸਣ੍ਠਨ੍ਤਿ, ਸੀਸਂ ਸਣ੍ਠਾਤਿ, ਕਣ੍ਣੋ ਸਣ੍ਠਾਤਿ, ਨਾਸਿਕਾ ਸਣ੍ਠਾਤਿ, ਮੁਖਂ ਸਣ੍ਠਾਤਿ, ਦਨ੍ਤਾ ਸਣ੍ਠਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਉਪਪਤ੍ਤੇਸਿਯੇਨ ਚਿਤ੍ਤੇਨ ਸੋਤਾਯਤਨਂ…ਪੇ… ਘਾਨਾਯਤਨਂ…ਪੇ… ਜਿਵ੍ਹਾਯਤਨਂ ਸਣ੍ਠਾਤੀਤਿ? ਆਮਨ੍ਤਾ. ਉਪਪਤ੍ਤੇਸਿਯੇਨ ਚਿਤ੍ਤੇਨ ਹਤ੍ਥਾ ਸਣ੍ਠਨ੍ਤਿ, ਪਾਦਾ ਸਣ੍ਠਨ੍ਤਿ, ਸੀਸਂ ਸਣ੍ਠਾਤਿ, ਕਣ੍ਣੋ ਸਣ੍ਠਾਤਿ, ਨਾਸਿਕਾ ਸਣ੍ਠਾਤਿ, ਮੁਖਂ ਸਣ੍ਠਾਤਿ, ਦਨ੍ਤਾ ਸਣ੍ਠਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੬੯੨. ਮਾਤੁਕੁਚ੍ਛਿਗਤਸ੍ਸ ਪਚ੍ਛਾ ਚਕ੍ਖਾਯਤਨਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਮਾਤੁਕੁਚ੍ਛਿਸ੍ਮਿਂ ਚਕ੍ਖੁਪਟਿਲਾਭਾਯ ਕਮ੍ਮਂ ਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਾਤੁਕੁਚ੍ਛਿਗਤਸ੍ਸ ਪਚ੍ਛਾ ਸੋਤਾਯਤਨਂ…ਪੇ… ਘਾਨਾਯਤਨਂ…ਪੇ… ਜਿਵ੍ਹਾਯਤਨਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਮਾਤੁਕੁਚ੍ਛਿਸ੍ਮਿਂ ਜਿਵ੍ਹਾਪਟਿਲਾਭਾਯ ਕਮ੍ਮਂ ਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਮਾਤੁਕੁਚ੍ਛਿਗਤਸ੍ਸ ਪਚ੍ਛਾ ਕੇਸਾ ਲੋਮਾ ਨਖਾ ਦਨ੍ਤਾ ਅਟ੍ਠੀ ਉਪ੍ਪਜ੍ਜਨ੍ਤੀਤਿ? ਆਮਨ੍ਤਾ. ਮਾਤੁਕੁਚ੍ਛਿਸ੍ਮਿਂ ਅਟ੍ਠਿਪਟਿਲਾਭਾਯ ਕਮ੍ਮਂ ਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਨ ਵਤ੍ਤਬ੍ਬਂ – ‘‘ਮਾਤੁਕੁਚ੍ਛਿਗਤਸ੍ਸ ਪਚ੍ਛਾ ਕੇਸਾ ਲੋਮਾ ਨਖਾ ਦਨ੍ਤਾ ਅਟ੍ਠੀ ਉਪ੍ਪਜ੍ਜਨ੍ਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –
‘‘ਪਠਮਂ ਕਲਲਂ ਹੋਤਿ, ਕਲਲਾ ਹੋਤਿ ਅਬ੍ਬੁਦਂ;
ਅਬ੍ਬੁਦਾ ਜਾਯਤੇ ਪੇਸਿ [ਪੇਸੀ (ਸ੍ਯਾ. ਕਂ. ਪੀ.)], ਪੇਸਿ ਨਿਬ੍ਬਤ੍ਤਤੇ [ਨਿਬ੍ਬਤ੍ਤਤੀ (ਸੀ. ਸ੍ਯਾ., ਸਂ. ਨਿ. ੧.੨੩੫), ਨਿਬ੍ਬਤ੍ਤਤਿ (ਪੀ. ਕ.)] ਘਨੋ;
ਘਨਾ ਪਸਾਖਾ ਜਾਯਨ੍ਤਿ, ਕੇਸਾ ਲੋਮਾ ਨਖਾਪਿ ਚ.
‘‘ਯਞ੍ਚਸ੍ਸ ਭੁਞ੍ਜਤਿ ਮਾਤਾ, ਅਨ੍ਨਂ ਪਾਨਞ੍ਚ ਭੋਜਨਂ;
ਤੇਨ ਸੋ ਤਤ੍ਥ ਯਾਪੇਤਿ, ਮਾਤੁਕੁਚ੍ਛਿਗਤੋ ਨਰੋ’’ਤਿ [ਸਂ. ਨਿ. ੧.੨੩੫].
ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਮਾਤੁਕੁਚ੍ਛਿਗਤਸ੍ਸ ਪਚ੍ਛਾ ਕੇਸਾ ਲੋਮਾ ਨਖਾ ਦਨ੍ਤਾ ਅਟ੍ਠੀ ਉਪ੍ਪਜ੍ਜਨ੍ਤੀਤਿ.
ਸਲ਼ਾਯਤਨੁਪ੍ਪਤ੍ਤਿਕਥਾ ਨਿਟ੍ਠਿਤਾ.
੧੪. ਚੁਦ੍ਦਸਮਵਗ੍ਗੋ
(੧੩੮) ੩. ਅਨਨ੍ਤਰਪਚ੍ਚਯਕਥਾ
੬੯੩. ਚਕ੍ਖੁਵਿਞ੍ਞਾਣਸ੍ਸ ਅਨਨ੍ਤਰਾ ਸੋਤਵਿਞ੍ਞਾਣਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਯਾ ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਸੋਤਵਿਞ੍ਞਾਣਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਚਕ੍ਖੁਵਿਞ੍ਞਾਣਸ੍ਸ ਅਨਨ੍ਤਰਾ ਸੋਤਵਿਞ੍ਞਾਣਂ ਉਪ੍ਪਜ੍ਜਤਿ, ਨ ਵਤ੍ਤਬ੍ਬਂ – ‘‘ਯਾ ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਸੋਤਵਿਞ੍ਞਾਣਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਸੋਤਵਿਞ੍ਞਾਣਂ ਅਨਾਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਅਪ੍ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਨਨੁ ਸੋਤਵਿਞ੍ਞਾਣਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ, ਆਮਨ੍ਤਾ. ਹਞ੍ਚਿ ਸੋਤਵਿਞ੍ਞਾਣਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਕ੍ਖੁਵਿਞ੍ਞਾਣਸ੍ਸ ਅਨਨ੍ਤਰਾ ਸੋਤਵਿਞ੍ਞਾਣਂ ਉਪ੍ਪਜ੍ਜਤੀ’’ਤਿ.
੬੯੪. ਚਕ੍ਖੁਵਿਞ੍ਞਾਣਸ੍ਸ ਅਨਨ੍ਤਰਾ ਸੋਤਵਿਞ੍ਞਾਣਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਚਕ੍ਖੁਵਿਞ੍ਞਾਣਂ ਰੂਪਨਿਮਿਤ੍ਤਂ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਸੋਤਵਿਞ੍ਞਾਣਂ ਰੂਪਨਿਮਿਤ੍ਤਂ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਚਕ੍ਖੁਵਿਞ੍ਞਾਣਂ ਰੂਪਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣਨ੍ਤਿ? ਆਮਨ੍ਤਾ. ਸੋਤਵਿਞ੍ਞਾਣਂ ਰੂਪਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਆਮਨ੍ਤਾ. ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਸੋਤਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਸੋਤਵਿਞ੍ਞਾਣਨ੍ਤਿ? ਆਮਨ੍ਤਾ. ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਸੋਤਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਹਞ੍ਚਿ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਸੋਤਵਿਞ੍ਞਾਣ’’ਨ੍ਤਿ.
ਚਕ੍ਖੁਵਿਞ੍ਞਾਣਸ੍ਸ ਅਨਨ੍ਤਰਾ ਸੋਤਵਿਞ੍ਞਾਣਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਤਞ੍ਞੇਵ ਚਕ੍ਖੁਵਿਞ੍ਞਾਣਂ ਤਂ ਸੋਤਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੬੯੫. ਸੋਤਵਿਞ੍ਞਾਣਸ੍ਸ ਅਨਨ੍ਤਰਾ ਘਾਨਵਿਞ੍ਞਾਣਂ ਉਪ੍ਪਜ੍ਜਤਿ…ਪੇ… ਘਾਨਵਿਞ੍ਞਾਣਸ੍ਸ ਅਨਨ੍ਤਰਾ ਜਿਵ੍ਹਾਵਿਞ੍ਞਾਣਂ ਉਪ੍ਪਜ੍ਜਤਿ…ਪੇ… ਜਿਵ੍ਹਾਵਿਞ੍ਞਾਣਸ੍ਸ ਅਨਨ੍ਤਰਾ ਕਾਯਵਿਞ੍ਞਾਣਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਯਾ ਜਿਵ੍ਹਾਵਿਞ੍ਞਾਣਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਕਾਯਵਿਞ੍ਞਾਣਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਜਿਵ੍ਹਾਵਿਞ੍ਞਾਣਸ੍ਸ ਅਨਨ੍ਤਰਾ ਕਾਯਵਿਞ੍ਞਾਣਂ ਉਪ੍ਪਜ੍ਜਤਿ, ਨ ਵਤ੍ਤਬ੍ਬਂ – ‘‘ਯਾ ਜਿਵ੍ਹਾਵਿਞ੍ਞਾਣਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧਿ, ਸਾਵ ਕਾਯਵਿਞ੍ਞਾਣਸ੍ਸ ਉਪ੍ਪਾਦਾਯ ਆਵਟ੍ਟਨਾ…ਪੇ… ਪਣਿਧੀ’’ਤਿ? ਆਮਨ੍ਤਾ. ਕਾਯਵਿਞ੍ਞਾਣਂ ਅਨਾਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਅਪ੍ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਕਾਯਵਿਞ੍ਞਾਣਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਕਾਯਵਿਞ੍ਞਾਣਂ ਆਵਟ੍ਟੇਨ੍ਤਸ੍ਸ ਉਪ੍ਪਜ੍ਜਤਿ…ਪੇ… ਪਣਿਦਹਨ੍ਤਸ੍ਸ ਉਪ੍ਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਜਿਵ੍ਹਾਵਿਞ੍ਞਾਣਸ੍ਸ ਅਨਨ੍ਤਰਾ ਕਾਯਵਿਞ੍ਞਾਣਂ ਉਪ੍ਪਜ੍ਜਤੀ’’ਤਿ.
੬੯੬. ਜਿਵ੍ਹਾਵਿਞ੍ਞਾਣਸ੍ਸ ਅਨਨ੍ਤਰਾ ਕਾਯਵਿਞ੍ਞਾਣਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਜਿਵ੍ਹਾਵਿਞ੍ਞਾਣਂ ਰਸਨਿਮਿਤ੍ਤਂ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਕਾਯਵਿਞ੍ਞਾਣਂ ਰਸਨਿਮਿਤ੍ਤਂ ਮਨਸਿਕਰੋਤੋ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਜਿਵ੍ਹਾਵਿਞ੍ਞਾਣਂ ਰਸਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣਨ੍ਤਿ? ਆਮਨ੍ਤਾ. ਕਾਯਵਿਞ੍ਞਾਣਂ ਰਸਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਜਿਵ੍ਹਞ੍ਚ ਪਟਿਚ੍ਚ ਰਸੇ ਚ ਉਪ੍ਪਜ੍ਜਤਿ ਜਿਵ੍ਹਾਵਿਞ੍ਞਾਣਨ੍ਤਿ? ਆਮਨ੍ਤਾ. ਜਿਵ੍ਹਞ੍ਚ ਪਟਿਚ੍ਚ ਰਸੇ ਚ ਉਪ੍ਪਜ੍ਜਤਿ ਕਾਯਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਜਿਵ੍ਹਞ੍ਚ ਪਟਿਚ੍ਚ ਰਸੇ ਚ ਉਪ੍ਪਜ੍ਜਤਿ ਕਾਯਵਿਞ੍ਞਾਣਨ੍ਤਿ? ਆਮਨ੍ਤਾ. ‘‘ਜਿਵ੍ਹਞ੍ਚ ਪਟਿਚ੍ਚ ਰਸੇ ਚ ਉਪ੍ਪਜ੍ਜਤਿ ਕਾਯਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ‘‘ਜਿਵ੍ਹਞ੍ਚ ਪਟਿਚ੍ਚ ਰਸੇ ਚ ਉਪ੍ਪਜ੍ਜਤਿ ਜਿਵ੍ਹਾਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਹਞ੍ਚਿ ‘‘ਜਿਵ੍ਹਞ੍ਚ ਪਟਿਚ੍ਚ ਰਸੇ ਚ ਉਪ੍ਪਜ੍ਜਤਿ ਜਿਵ੍ਹਾਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਜਿਵ੍ਹਞ੍ਚ ਪਟਿਚ੍ਚ ਰਸੇ ਚ ਉਪ੍ਪਜ੍ਜਤਿ ਕਾਯਵਿਞ੍ਞਾਣ’’ਨ੍ਤਿ.
ਜਿਵ੍ਹਾਵਿਞ੍ਞਾਣਸ੍ਸ ਅਨਨ੍ਤਰਾ ਕਾਯਵਿਞ੍ਞਾਣਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਤਞ੍ਞੇਵ ਜਿਵ੍ਹਾਵਿਞ੍ਞਾਣਂ ਤਂ ਕਾਯਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੬੯੭. ਨ ਵਤ੍ਤਬ੍ਬਂ – ‘‘ਪਞ੍ਚਵਿਞ੍ਞਾਣਾ ਅਞ੍ਞਮਞ੍ਞਸ੍ਸ ਸਮਨਨ੍ਤਰਾ ਉਪ੍ਪਜ੍ਜਨ੍ਤੀ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੋਚਿ ਨਚ੍ਚਤਿ ਗਾਯਤਿ ਵਾਦੇਤਿ, ਰੂਪਞ੍ਚ ਪਸ੍ਸਤਿ, ਸਦ੍ਦਞ੍ਚ ਸੁਣਾਤਿ, ਗਨ੍ਧਞ੍ਚ ਘਾਯਤਿ, ਰਸਞ੍ਚ ਸਾਯਤਿ, ਫੋਟ੍ਠਬ੍ਬਞ੍ਚ ਫੁਸਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੋਚਿ ਨਚ੍ਚਤਿ ਗਾਯਤਿ ਵਾਦੇਤਿ, ਰੂਪਞ੍ਚ ਪਸ੍ਸਤਿ, ਸਦ੍ਦਞ੍ਚ ਸੁਣਾਤਿ, ਗਨ੍ਧਞ੍ਚ ਘਾਯਤਿ, ਰਸਞ੍ਚ ਸਾਯਤਿ, ਫੋਟ੍ਠਬ੍ਬਞ੍ਚ ਫੁਸਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪਞ੍ਚਵਿਞ੍ਞਾਣਾ ਅਞ੍ਞਮਞ੍ਞਸ੍ਸ ਸਮਨਨ੍ਤਰਾ ਉਪ੍ਪਜ੍ਜਨ੍ਤੀ’’ਤਿ.
ਅਨਨ੍ਤਰਪਚ੍ਚਯਕਥਾ ਨਿਟ੍ਠਿਤਾ.
੧੪. ਚੁਦ੍ਦਸਮਵਗ੍ਗੋ
(੧੩੯) ੪. ਅਰਿਯਰੂਪਕਥਾ
੬੯੮. ਅਰਿਯਰੂਪਂ ਮਹਾਭੂਤਾਨਂ ਉਪਾਦਾਯਾਤਿ? ਆਮਨ੍ਤਾ. ਅਰਿਯਰੂਪਂ ਕੁਸਲਨ੍ਤਿ? ਆਮਨ੍ਤਾ. ਮਹਾਭੂਤਾ ਕੁਸਲਾਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਮਹਾਭੂਤਾ ਅਬ੍ਯਾਕਤਾਤਿ? ਆਮਨ੍ਤਾ. ਅਰਿਯਰੂਪਂ ਅਬ੍ਯਾਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਿਯਰੂਪਂ ਮਹਾਭੂਤਾਨਂ ਉਪਾਦਾਯਾਤਿ? ਆਮਨ੍ਤਾ. ਅਰਿਯਰੂਪਂ ਅਨਾਸਵਂ ਅਸਂਯੋਜਨਿਯਂ ਅਗਨ੍ਥਨਿਯਂ ਅਨੋਘਨਿਯਂ ਅਯੋਗਨਿਯਂ ਅਨੀਵਰਣਿਯਂ ਅਪਰਾਮਟ੍ਠਂ ਅਨੁਪਾਦਾਨਿਯਂ ਅਸਂਕਿਲੇਸਿਯਨ੍ਤਿ? ਆਮਨ੍ਤਾ. ਮਹਾਭੂਤਾ ਅਨਾਸਵਾ…ਪੇ… ਅਸਂਕਿਲੇਸਿਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਹਾਭੂਤਾ ਸਾਸਵਾ ਸਂਯੋਜਨਿਯਾ…ਪੇ… ਸਂਕਿਲੇਸਿਯਾਤਿ? ਆਮਨ੍ਤਾ. ਅਰਿਯਰੂਪਂ ਸਾਸਵਂ ਸਂਯੋਜਨਿਯਂ…ਪੇ… ਸਂਕਿਲੇਸਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੬੯੯. ਨ ਵਤ੍ਤਬ੍ਬਂ – ‘‘ਅਰਿਯਰੂਪਂ ਮਹਾਭੂਤਾਨਂ ਉਪਾਦਾਯਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਯਂ ਕਿਞ੍ਚਿ, ਭਿਕ੍ਖਵੇ, ਰੂਪਂ ਚਤ੍ਤਾਰਿ ਮਹਾਭੂਤਾਨਿ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪ’’ਨ੍ਤਿ [ਮ. ਨਿ. ੧.੩੪੭; ਅ. ਨਿ. ੧੧.੧੫]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਰਿਯਰੂਪਂ ਮਹਾਭੂਤਾਨਂ ਉਪਾਦਾਯਾਤਿ.
ਅਰਿਯਰੂਪਕਥਾ ਨਿਟ੍ਠਿਤਾ.
੧੪. ਚੁਦ੍ਦਸਮਵਗ੍ਗੋ
(੧੪੦) ੫. ਅਞ੍ਞੋ ਅਨੁਸਯੋਤਿਕਥਾ
੭੦੦. ਅਞ੍ਞੋ ਕਾਮਰਾਗਾਨੁਸਯੋ ਅਞ੍ਞਂ ਕਾਮਰਾਗਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਅਞ੍ਞੋ ਕਾਮਰਾਗੋ ਅਞ੍ਞਂ ਕਾਮਰਾਗਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸ੍ਵੇਵ ਕਾਮਰਾਗੋ ਤਂ ਕਾਮਰਾਗਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਸ੍ਵੇਵ ਕਾਮਰਾਗਾਨੁਸਯੋ ਤਂ ਕਾਮਰਾਗਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਞ੍ਞੋ ਪਟਿਘਾਨੁਸਯੋ ਅਞ੍ਞਂ ਪਟਿਘਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਅਞ੍ਞਂ ਪਟਿਘਂ ਅਞ੍ਞਂ ਪਟਿਘਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਞ੍ਞੇਵ ਪਟਿਘਂ ਤਂ ਪਟਿਘਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਸ੍ਵੇਵ ਪਟਿਘਾਨੁਸਯੋ ਤਂ ਪਟਿਘਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਞ੍ਞੋ ਮਾਨਾਨੁਸਯੋ ਅਞ੍ਞਂ ਮਾਨਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਅਞ੍ਞੋ ਮਾਨੋ ਅਞ੍ਞਂ ਮਾਨਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸ੍ਵੇਵ ਮਾਨੋ ਤਂ ਮਾਨਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਸ੍ਵੇਵ ਮਾਨਾਨੁਸਯੋ ਤਂ ਮਾਨਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਞ੍ਞੋ ਦਿਟ੍ਠਾਨੁਸਯੋ ਅਞ੍ਞਂ ਦਿਟ੍ਠਿਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਅਞ੍ਞਾ ਦਿਟ੍ਠਿ ਅਞ੍ਞਂ ਦਿਟ੍ਠਿਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਾਵ ਦਿਟ੍ਠਿ ਤਂ ਦਿਟ੍ਠਿਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਸ੍ਵੇਵ ਦਿਟ੍ਠਾਨੁਸਯੋ ਤਂ ਦਿਟ੍ਠਿਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਞ੍ਞੋ ਵਿਚਿਕਿਚ੍ਛਾਨੁਸਯੋ ਅਞ੍ਞਂ ਵਿਚਿਕਿਚ੍ਛਾਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਅਞ੍ਞਾ ਵਿਚਿਕਿਚ੍ਛਾ ਅਞ੍ਞਂ ਵਿਚਿਕਿਚ੍ਛਾਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਾਵ ਵਿਚਿਕਿਚ੍ਛਾ ਤਂ ਵਿਚਿਕਿਚ੍ਛਾਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਸ੍ਵੇਵ ਵਿਚਿਕਿਚ੍ਛਾਨੁਸਯੋ ਤਂ ਵਿਚਿਕਿਚ੍ਛਾਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਞ੍ਞੋ ਭਵਰਾਗਾਨੁਸਯੋ ਅਞ੍ਞਂ ਭਵਰਾਗਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਅਞ੍ਞੋ ਭਵਰਾਗੋ ਅਞ੍ਞਂ ਭਵਰਾਗਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸ੍ਵੇਵ ਭਵਰਾਗੋ ਤਂ ਭਵਰਾਗਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਸ੍ਵੇਵ ਭਵਰਾਗਾਨੁਸਯੋ ਤਂ ਭਵਰਾਗਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਞ੍ਞੋ ਅਵਿਜ੍ਜਾਨੁਸਯੋ ਅਞ੍ਞਂ ਅਵਿਜ੍ਜਾਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਅਞ੍ਞਾ ਅਵਿਜ੍ਜਾ ਅਞ੍ਞਂ ਅਵਿਜ੍ਜਾਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਾਵ ਅਵਿਜ੍ਜਾ ਤਂ ਅਵਿਜ੍ਜਾਪਰਿਯੁਟ੍ਠਾਨਨ੍ਤਿ? ਆਮਨ੍ਤਾ. ਸ੍ਵੇਵ ਅਵਿਜ੍ਜਾਨੁਸਯੋ ਤਂ ਅਵਿਜ੍ਜਾਪਰਿਯੁਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੭੦੧. ਨ ਵਤ੍ਤਬ੍ਬਂ – ‘‘ਅਞ੍ਞੋ ਅਨੁਸਯੋ ਅਞ੍ਞਂ ਪਰਿਯੁਟ੍ਠਾਨ’’ਨ੍ਤਿ? ਆਮਨ੍ਤਾ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ‘‘ਸਾਨੁਸਯੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ‘‘ਪਰਿਯੁਟ੍ਠਿਤੋ’’ਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਅਞ੍ਞੋ ਅਨੁਸਯੋ ਅਞ੍ਞਂ ਪਰਿਯੁਟ੍ਠਾਨਨ੍ਤਿ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ‘‘ਸਰਾਗੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ‘‘ਪਰਿਯੁਟ੍ਠਿਤੋ’’ਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਅਞ੍ਞੋ ਰਾਗੋ ਅਞ੍ਞਂ ਪਰਿਯੁਟ੍ਠਾਨਨ੍ਤਿ.
ਅਞ੍ਞੋ ਅਨੁਸਯੋਤਿਕਥਾ ਨਿਟ੍ਠਿਤਾ.
੧੪. ਚੁਦ੍ਦਸਮਵਗ੍ਗੋ
(੧੪੧) ੬. ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾ
੭੦੨. ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ? ਆਮਨ੍ਤਾ. ਰੂਪਂ ਨਿਬ੍ਬਾਨਂ ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ? ਆਮਨ੍ਤਾ. ਨਤ੍ਥਿ ਸਰਾਗਂ ਚਿਤ੍ਤਂ ਸਦੋਸਂ ਚਿਤ੍ਤਂ ਸਮੋਹਂ ਚਿਤ੍ਤਂ…ਪੇ… ਅਕੁਸਲਂ ਚਿਤ੍ਤਂ ਸਂਕਿਲਿਟ੍ਠਂ ਚਿਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਤ੍ਥਿ ਸਰਾਗਂ ਚਿਤ੍ਤਂ ਸਦੋਸਂ ਚਿਤ੍ਤਂ ਸਮੋਹਂ ਚਿਤ੍ਤਂ…ਪੇ… ਅਕੁਸਲਂ ਚਿਤ੍ਤਂ ਸਂਕਿਲਿਟ੍ਠਂ ਚਿਤ੍ਤਨ੍ਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਸਰਾਗਂ ਚਿਤ੍ਤਂ ਸਦੋਸਂ ਚਿਤ੍ਤਂ ਸਮੋਹਂ ਚਿਤ੍ਤਂ…ਪੇ… ਅਕੁਸਲਂ ਚਿਤ੍ਤਂ ਸਂਕਿਲਿਟ੍ਠਂ ਚਿਤ੍ਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤ’’ਨ੍ਤਿ.
ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾ ਨਿਟ੍ਠਿਤਾ.
੧੪. ਚੁਦ੍ਦਸਮਵਗ੍ਗੋ
(੧੪੨) ੭. ਪਰਿਯਾਪਨ੍ਨਕਥਾ
੭੦੩. ਰੂਪਰਾਗੋ ਰੂਪਧਾਤੁਂ ਅਨੁਸੇਤਿ, ਰੂਪਧਾਤੁਪਰਿਯਾਪਨ੍ਨੋਤਿ? ਆਮਨ੍ਤਾ. ਸਮਾਪਤ੍ਤੇਸਿਯੋ ਉਪਪਤ੍ਤੇਸਿਯੋ ਦਿਟ੍ਠਧਮ੍ਮਸੁਖਵਿਹਾਰੋ, ਸਮਾਪਤ੍ਤੇਸਿਯੇਨ ਚਿਤ੍ਤੇਨ ਉਪਪਤ੍ਤੇਸਿਯੇਨ ਚਿਤ੍ਤੇਨ ਦਿਟ੍ਠਧਮ੍ਮਸੁਖਵਿਹਾਰੇਨ ਚਿਤ੍ਤੇਨ ਸਹਗਤੋ ਸਹਜਾਤੋ ਸਂਸਟ੍ਠੋ ਸਮ੍ਪਯੁਤ੍ਤੋ ਏਕੁਪ੍ਪਾਦੋ ਏਕਨਿਰੋਧੋ ਏਕਵਤ੍ਥੁਕੋ ਏਕਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਨ ਸਮਾਪਤ੍ਤੇਸਿਯੋ ਨ ਉਪਪਤ੍ਤੇਸਿਯੋ ਨ ਦਿਟ੍ਠਧਮ੍ਮਸੁਖਵਿਹਾਰੋ, ਨ ਸਮਾਪਤ੍ਤੇਸਿਯੇਨ ਚਿਤ੍ਤੇਨ ਨ ਉਪਪਤ੍ਤੇਸਿਯੇਨ ਚਿਤ੍ਤੇਨ ਨ ਦਿਟ੍ਠਧਮ੍ਮਸੁਖਵਿਹਾਰੇਨ ਚਿਤ੍ਤੇਨ ਸਹਗਤੋ ਸਹਜਾਤੋ ਸਂਸਟ੍ਠੋ ਸਮ੍ਪਯੁਤ੍ਤੋ ਏਕੁਪ੍ਪਾਦੋ ਏਕਨਿਰੋਧੋ ਏਕਵਤ੍ਥੁਕੋ ਏਕਾਰਮ੍ਮਣੋਤਿ? ਆਮਨ੍ਤਾ. ਹਞ੍ਚਿ ਨ ਸਮਾਪਤ੍ਤੇਸਿਯੋ ਨ ਉਪਪਤ੍ਤੇਸਿਯੋ ਨ ਦਿਟ੍ਠਧਮ੍ਮਸੁਖਵਿਹਾਰੋ…ਪੇ… ਏਕਾਰਮ੍ਮਣੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਰੂਪਰਾਗੋ ਰੂਪਧਾਤੁਂ ਅਨੁਸੇਤਿ, ਰੂਪਧਾਤੁਪਰਿਯਾਪਨ੍ਨੋ’’ਤਿ…ਪੇ….
ਰੂਪਰਾਗੋ ਰੂਪਧਾਤੁਂ ਅਨੁਸੇਤਿ, ਰੂਪਧਾਤੁਪਰਿਯਾਪਨ੍ਨੋਤਿ? ਆਮਨ੍ਤਾ. ਸਦ੍ਦਰਾਗੋ ਸਦ੍ਦਧਾਤੁਂ ਅਨੁਸੇਤਿ, ਸਦ੍ਦਧਾਤੁਪਰਿਯਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰੂਪਰਾਗੋ ਰੂਪਧਾਤੁਂ ਅਨੁਸੇਤਿ, ਰੂਪਧਾਤੁਪਰਿਯਾਪਨ੍ਨੋਤਿ? ਆਮਨ੍ਤਾ. ਗਨ੍ਧਰਾਗੋ…ਪੇ… ਰਸਰਾਗੋ…ਪੇ… ਫੋਟ੍ਠਬ੍ਬਰਾਗੋ ਫੋਟ੍ਠਬ੍ਬਧਾਤੁਂ ਅਨੁਸੇਤਿ, ਫੋਟ੍ਠਬ੍ਬਧਾਤੁਪਰਿਯਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਸਦ੍ਦਰਾਗੋ ਸਦ੍ਦਧਾਤੁਂ ਅਨੁਸੇਤਿ, ਨ ਵਤ੍ਤਬ੍ਬਂ – ‘‘ਸਦ੍ਦਧਾਤੁਪਰਿਯਾਪਨ੍ਨੋ’’ਤਿ? ਆਮਨ੍ਤਾ. ਰੂਪਰਾਗੋ ਰੂਪਧਾਤੁਂ ਅਨੁਸੇਤਿ, ਨ ਵਤ੍ਤਬ੍ਬਂ – ‘‘ਰੂਪਧਾਤੁਪਰਿਯਾਪਨ੍ਨੋ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਗਨ੍ਧਰਾਗੋ…ਪੇ… ਰਸਰਾਗੋ…ਪੇ… ਫੋਟ੍ਠਬ੍ਬਰਾਗੋ ਫੋਟ੍ਠਬ੍ਬਧਾਤੁਂ ਅਨੁਸੇਤਿ, ਨ ਵਤ੍ਤਬ੍ਬਂ – ‘‘ਫੋਟ੍ਠਬ੍ਬਧਾਤੁਪਰਿਯਾਪਨ੍ਨੋ’’ਤਿ? ਆਮਨ੍ਤਾ. ਰੂਪਰਾਗੋ ਰੂਪਧਾਤੁਂ ਅਨੁਸੇਤਿ, ਨ ਵਤ੍ਤਬ੍ਬਂ – ‘‘ਰੂਪਧਾਤੁਪਰਿਯਾਪਨ੍ਨੋ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੭੦੪. ਅਰੂਪਰਾਗੋ ਅਰੂਪਧਾਤੁਂ ਅਨੁਸੇਤਿ, ਅਰੂਪਧਾਤੁਪਰਿਯਾਪਨ੍ਨੋਤਿ? ਆਮਨ੍ਤਾ. ਸਮਾਪਤ੍ਤੇਸਿਯੋ ਉਪਪਤ੍ਤੇਸਿਯੋ ਦਿਟ੍ਠਧਮ੍ਮਸੁਖਵਿਹਾਰੋ, ਸਮਾਪਤ੍ਤੇਸਿਯੇਨ ਚਿਤ੍ਤੇਨ ਉਪਪਤ੍ਤੇਸਿਯੇਨ ਚਿਤ੍ਤੇਨ ਦਿਟ੍ਠਧਮ੍ਮਸੁਖਵਿਹਾਰੇਨ ਚਿਤ੍ਤੇਨ ਸਹਗਤੋ ਸਹਜਾਤੋ ਸਂਸਟ੍ਠੋ ਸਮ੍ਪਯੁਤ੍ਤੋ ਏਕੁਪ੍ਪਾਦੋ ਏਕਨਿਰੋਧੋ ਏਕਵਤ੍ਥੁਕੋ ਏਕਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਨਨੁ ਨ ਸਮਾਪਤ੍ਤੇਸਿਯੋ ਨ ਉਪਪਤ੍ਤੇਸਿਯੋ ਨ ਦਿਟ੍ਠਧਮ੍ਮਸੁਖਵਿਹਾਰੋ, ਨ ਸਮਾਪਤ੍ਤੇਸਿਯੇਨ ਚਿਤ੍ਤੇਨ…ਪੇ… ਏਕਾਰਮ੍ਮਣੋਤਿ? ਆਮਨ੍ਤਾ. ਹਞ੍ਚਿ ਨ ਸਮਾਪਤ੍ਤੇਸਿਯੋ ਨ ਉਪਪਤ੍ਤੇਸਿਯੋ…ਪੇ… ਏਕਾਰਮ੍ਮਣੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰੂਪਰਾਗੋ ਅਰੂਪਧਾਤੁਂ ਅਨੁਸੇਤਿ, ਅਰੂਪਧਾਤੁਪਰਿਯਾਪਨ੍ਨੋ’’ਤਿ.
ਅਰੂਪਰਾਗੋ ਅਰੂਪਧਾਤੁਂ ਅਨੁਸੇਤਿ, ਅਰੂਪਧਾਤੁਪਰਿਯਾਪਨ੍ਨੋਤਿ? ਆਮਨ੍ਤਾ. ਸਦ੍ਦਰਾਗੋ ਸਦ੍ਦਧਾਤੁਂ ਅਨੁਸੇਤਿ, ਸਦ੍ਦਧਾਤੁਪਰਿਯਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰੂਪਰਾਗੋ ਅਰੂਪਧਾਤੁਂ ਅਨੁਸੇਤਿ, ਅਰੂਪਧਾਤੁਪਰਿਯਾਪਨ੍ਨੋਤਿ? ਆਮਨ੍ਤਾ. ਗਨ੍ਧਰਾਗੋ…ਪੇ… ਰਸਰਾਗੋ…ਪੇ… ਫੋਟ੍ਠਬ੍ਬਰਾਗੋ ਫੋਟ੍ਠਬ੍ਬਧਾਤੁਂ ਅਨੁਸੇਤਿ, ਫੋਟ੍ਠਬ੍ਬਧਾਤੁਪਰਿਯਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਸਦ੍ਦਰਾਗੋ ਸਦ੍ਦਧਾਤੁਂ ਅਨੁਸੇਤਿ, ਨ ਵਤ੍ਤਬ੍ਬਂ – ‘‘ਸਦ੍ਦਧਾਤੁਪਰਿਯਾਪਨ੍ਨੋ’’ਤਿ? ਆਮਨ੍ਤਾ. ਅਰੂਪਰਾਗੋ ਅਰੂਪਧਾਤੁਂ ਅਨੁਸੇਤਿ, ਨ ਵਤ੍ਤਬ੍ਬਂ – ‘‘ਅਰੂਪਧਾਤੁਪਰਿਯਾਪਨ੍ਨੋ’’ਤਿ, ਨ ਹੇਵਂ ਵਤ੍ਤਬ੍ਬੇ…ਪੇ… ਗਨ੍ਧਰਾਗੋ…ਪੇ… ਰਸਰਾਗੋ…ਪੇ… ਫੋਟ੍ਠਬ੍ਬਰਾਗੋ ਫੋਟ੍ਠਬ੍ਬਧਾਤੁਂ ਅਨੁਸੇਤਿ, ਨ ਵਤ੍ਤਬ੍ਬਂ – ‘‘ਫੋਟ੍ਠਬ੍ਬਧਾਤੁਪਰਿਯਾਪਨ੍ਨੋ’’ਤਿ? ਆਮਨ੍ਤਾ. ਅਰੂਪਰਾਗੋ ਅਰੂਪਧਾਤੁਂ ਅਨੁਸੇਤਿ, ਨ ਵਤ੍ਤਬ੍ਬਂ – ‘‘ਅਰੂਪਧਾਤੁਪਰਿਯਾਪਨ੍ਨੋ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੭੦੫. ਨ ਵਤ੍ਤਬ੍ਬਂ – ‘‘ਰੂਪਰਾਗੋ ਰੂਪਧਾਤੁਂ ਅਨੁਸੇਤਿ ਰੂਪਧਾਤੁਪਰਿਯਾਪਨ੍ਨੋ, ਅਰੂਪਰਾਗੋ ਅਰੂਪਧਾਤੁਂ ਅਨੁਸੇਤਿ ਅਰੂਪਧਾਤੁਪਰਿਯਾਪਨ੍ਨੋ’’ਤਿ? ਆਮਨ੍ਤਾ. ਨਨੁ ਕਾਮਰਾਗੋ ਕਾਮਧਾਤੁਂ ਅਨੁਸੇਤਿ, ਕਾਮਧਾਤੁਪਰਿਯਾਪਨ੍ਨੋਤਿ? ਆਮਨ੍ਤਾ. ਹਞ੍ਚਿ ਕਾਮਰਾਗੋ ਕਾਮਧਾਤੁਂ ਅਨੁਸੇਤਿ ਕਾਮਧਾਤੁਪਰਿਯਾਪਨ੍ਨੋ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਰੂਪਰਾਗੋ ਰੂਪਧਾਤੁਂ ਅਨੁਸੇਤਿ ਰੂਪਧਾਤੁਪਰਿਯਾਪਨ੍ਨੋ, ਅਰੂਪਰਾਗੋ ਅਰੂਪਧਾਤੁਂ ਅਨੁਸੇਤਿ ਅਰੂਪਧਾਤੁਪਰਿਯਾਪਨ੍ਨੋ’’ਤਿ.
ਪਰਿਯਾਪਨ੍ਨਕਥਾ ਨਿਟ੍ਠਿਤਾ.
੧੪. ਚੁਦ੍ਦਸਮਵਗ੍ਗੋ
(੧੪੩) ੮. ਅਬ੍ਯਾਕਤਕਥਾ
੭੦੬. ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ? ਆਮਨ੍ਤਾ. ਵਿਪਾਕਾਬ੍ਯਾਕਤਂ ਕਿਰਿਯਾਬ੍ਯਾਕਤਂ ਰੂਪਂ ਨਿਬ੍ਬਾਨਂ ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ? ਆਮਨ੍ਤਾ. ਦਿਟ੍ਠਿਗਤਸਮ੍ਪਯੁਤ੍ਤੋ ਫਸ੍ਸੋ ਅਬ੍ਯਾਕਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ? ਆਮਨ੍ਤਾ. ਦਿਟ੍ਠਿਗਤਸਮ੍ਪਯੁਤ੍ਤਾ ਵੇਦਨਾ…ਪੇ… ਸਞ੍ਞਾ…ਪੇ… ਚੇਤਨਾ…ਪੇ… ਚਿਤ੍ਤਂ ਅਬ੍ਯਾਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦਿਟ੍ਠਿਗਤਸਮ੍ਪਯੁਤ੍ਤੋ ਫਸ੍ਸੋ ਅਕੁਸਲੋਤਿ? ਆਮਨ੍ਤਾ. ਦਿਟ੍ਠਿਗਤਂ ਅਕੁਸਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦਿਟ੍ਠਿਗਤਸਮ੍ਪਯੁਤ੍ਤਾ ਵੇਦਨਾ ਸਞ੍ਞਾ ਚੇਤਨਾ ਚਿਤ੍ਤਂ ਅਕੁਸਲਨ੍ਤਿ? ਆਮਨ੍ਤਾ. ਦਿਟ੍ਠਿਗਤਂ ਅਕੁਸਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੭੦੭. ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ? ਆਮਨ੍ਤਾ. ਅਫਲਂ ਅਵਿਪਾਕਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸਫਲਂ ਸਵਿਪਾਕਨ੍ਤਿ? ਆਮਨ੍ਤਾ. ਹਞ੍ਚਿ ਸਫਲਂ ਸਵਿਪਾਕਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦਿਟ੍ਠਿਗਤਂ ਅਬ੍ਯਾਕਤ’’ਨ੍ਤਿ.
ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ? ਆਮਨ੍ਤਾ. ਨਨੁ ਮਿਚ੍ਛਾਦਿਟ੍ਠਿਪਰਮਾਨਿ ਵਜ੍ਜਾਨਿ [ਅਙ੍ਗੁਤ੍ਤਰਨਿਕਾਯੇ] ਵੁਤ੍ਤਾਨਿ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਮਿਚ੍ਛਾਦਿਟ੍ਠਿਪਰਮਾਨਿ ਵਜ੍ਜਾਨਿ ਵੁਤ੍ਤਾਨਿ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦਿਟ੍ਠਿਗਤਂ ਅਬ੍ਯਾਕਤ’’ਨ੍ਤਿ.
ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਮਿਚ੍ਛਾਦਿਟ੍ਠਿ ਖੋ, ਵਚ੍ਛ, ਅਕੁਸਲਾ [ਅਕੁਸਲਂ (ਮ. ਨਿ. ੨.੧੯੪)], ਸਮ੍ਮਾਦਿਟ੍ਠਿ ਕੁਸਲਾ’’ [ਕੁਸਲਂ (ਮ. ਨਿ. ੨.੧੦੪)] ਤਿ [ਮ. ਨਿ. ੨.੧੯੪]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਦਿਟ੍ਠਿਗਤਂ ਅਬ੍ਯਾਕਤ’’ਨ੍ਤਿ.
ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਮਿਚ੍ਛਾਦਿਟ੍ਠਿਸ੍ਸ ਖੋ ਅਹਂ, ਪੁਣ੍ਣ, ਦ੍ਵਿਨ੍ਨਂ ਗਤੀਨਂ ਅਞ੍ਞਤਰਂ ਗਤਿਂ ਵਦਾਮਿ – ਨਿਰਯਂ ਵਾ ਤਿਰਚ੍ਛਾਨਯੋਨਿਂ ਵਾ’’ਤਿ [ਮ. ਨਿ. ੨.੭੯]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਦਿਟ੍ਠਿਗਤਂ ਅਬ੍ਯਾਕਤ’’ਨ੍ਤਿ.
੭੦੮. ਨ ਵਤ੍ਤਬ੍ਬਂ – ‘‘ਦਿਟ੍ਠਿਗਤਂ ਅਬ੍ਯਾਕਤ’’ਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘‘ਸਸ੍ਸਤੋ ਲੋਕੋ’ਤਿ ਖੋ, ਵਚ੍ਛ, ਅਬ੍ਯਾਕਤਮੇਤਂ, ‘ਅਸਸ੍ਸਤੋ ਲੋਕੋ’ਤਿ ਖੋ, ਵਚ੍ਛ, ਅਬ੍ਯਾਕਤਮੇਤਂ, ‘ਅਨ੍ਤਵਾ ਲੋਕੋ’ਤਿ ਖੋ, ਵਚ੍ਛ, ਅਬ੍ਯਾਕਤਮੇਤਂ, ‘ਅਨਨ੍ਤਵਾ ਲੋਕੋ’ਤਿ ਖੋ, ਵਚ੍ਛ…ਪੇ… ‘ਤਂ ਜੀਵਂ ਤਂ ਸਰੀਰ’ਨ੍ਤਿ ਖੋ, ਵਚ੍ਛ…ਪੇ… ‘ਅਞ੍ਞਂ ਜੀਵਂ ਅਞ੍ਞਂ ਸਰੀਰ’ਨ੍ਤਿ ਖੋ, ਵਚ੍ਛ…ਪੇ… ‘ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਖੋ, ਵਚ੍ਛ…ਪੇ… ‘ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਖੋ, ਵਚ੍ਛ…ਪੇ… ‘ਹੋਤਿ ਚ ਨ ਚ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਖੋ, ਵਚ੍ਛ…ਪੇ… ‘ਨੇਵ ਹੋਤਿ ਨ ਨ ਹੋਤਿ ਤਥਾਗਤੋ ਪਰਂ ਮਰਣਾ’ਤਿ ਖੋ, ਵਚ੍ਛ, ਅਬ੍ਯਾਕਤਮੇਤ’’ਨ੍ਤਿ [ਸਂ. ਨਿ. ੪.੪੧੬, ਥੋਕਂ ਪਨ ਵਿਸਦਿਸਂ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ.
ਦਿਟ੍ਠਿਗਤਂ ਅਬ੍ਯਾਕਤਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਮਿਚ੍ਛਾਦਿਟ੍ਠਿਕਸ੍ਸ, ਭਿਕ੍ਖਵੇ, ਪੁਰਿਸਪੁਗ੍ਗਲਸ੍ਸ ਯਞ੍ਚੇਵ ਕਾਯਕਮ੍ਮਂ ਯਥਾਦਿਟ੍ਠਿਸਮਤ੍ਤਂ ਸਮਾਦਿਨ੍ਨਂ, ਯਞ੍ਚ ਵਚੀਕਮ੍ਮਂ…ਪੇ… ਯਞ੍ਚ ਮਨੋਕਮ੍ਮਂ, ਯਾ ਚ ਚੇਤਨਾ, ਯਾ ਚ ਪਤ੍ਥਨਾ, ਯੋ ਚ ਪਣਿਧਿ, ਯੇ ਚ ਸਙ੍ਖਾਰਾ, ਸਬ੍ਬੇ ਤੇ ਧਮ੍ਮਾ ਅਨਿਟ੍ਠਾਯ ਅਕਨ੍ਤਾਯ ਅਮਨਾਪਾਯ ਅਹਿਤਾਯ ਦੁਕ੍ਖਾਯ ਸਂਵਤ੍ਤਨ੍ਤੀ’’ਤਿ [ਅ. ਨਿ. ੧.੩੦੬]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਦਿਟ੍ਠਿਗਤਂ ਅਬ੍ਯਾਕਤ’’ਨ੍ਤਿ.
ਅਬ੍ਯਾਕਤਕਥਾ ਨਿਟ੍ਠਿਤਾ.
੧੪. ਚੁਦ੍ਦਸਮਵਗ੍ਗੋ
(੧੪੪) ੯. ਅਪਰਿਯਾਪਨ੍ਨਕਥਾ
੭੦੯. ਦਿਟ੍ਠਿਗਤਂ ਅਪਰਿਯਾਪਨ੍ਨਨ੍ਤਿ? ਆਮਨ੍ਤਾ. ਮਗ੍ਗੋ ਫਲਂ ਨਿਬ੍ਬਾਨਂ, ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ, ਸਕਦਾਗਾਮਿਮਗ੍ਗੋ ਸਕਦਾਗਾਮਿਫਲਂ, ਅਨਾਗਾਮਿਮਗ੍ਗੋ ਅਨਾਗਾਮਿਫਲਂ, ਅਰਹਤ੍ਤਮਗ੍ਗੋ ਅਰਹਤ੍ਤਫਲਂ, ਸਤਿਪਟ੍ਠਾਨਂ ਸਮ੍ਮਪ੍ਪਧਾਨਂ ਇਦ੍ਧਿਪਾਦੋ ਇਨ੍ਦ੍ਰਿਯਂ ਬਲਂ ਬੋਜ੍ਝਙ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੭੧੦. ਨ ਵਤ੍ਤਬ੍ਬਂ – ‘‘ਦਿਟ੍ਠਿਗਤਂ ਅਪਰਿਯਾਪਨ੍ਨ’’ਨ੍ਤਿ? ਆਮਨ੍ਤਾ. ਪੁਥੁਜ੍ਜਨੋ ‘‘ਕਾਮੇਸੁ ਵੀਤਰਾਗੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ‘‘ਵਿਗਤਦਿਟ੍ਠਿਯੋ’’ਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਦਿਟ੍ਠਿਗਤਂ ਅਪਰਿਯਾਪਨ੍ਨਨ੍ਤਿ.
ਅਪਰਿਯਾਪਨ੍ਨਕਥਾ ਨਿਟ੍ਠਿਤਾ.
ਚੁਦ੍ਦਸਮਵਗ੍ਗੋ.
ਤਸ੍ਸੁਦ੍ਦਾਨਂ –
ਅਕੁਸਲਮੂਲਂ ਪਟਿਸਨ੍ਦਹਤਿ ਕੁਸਲਮੂਲਂ, ਕੁਸਲਮੂਲਂ ਪਟਿਸਨ੍ਦਹਤਿ ਅਕੁਸਲਮੂਲਂ, ਸਲ਼ਾਯਤਨਂ ਛਵਿਞ੍ਞਾਣਕਾਯਾ, ਅਰਿਯਰੂਪਂ ਮਹਾਭੂਤਾਨਂ ਉਪਾਦਾਯ, ਸ੍ਵੇਵ ਅਨੁਸਯੋ ਤਂ ਪਰਿਯੁਟ੍ਠਾਨਂ, ਪਰਿਯੁਟ੍ਠਾਨਂ ਚਿਤ੍ਤਵਿਪ੍ਪਯੁਤ੍ਤਂ, ਯਥਾਧਾਤੁ ਤਞ੍ਞੇਵ ਅਨੁਸੇਤਿ, ਦਿਟ੍ਠਿਗਤਂ ਅਬ੍ਯਾਕਤਂ, ਦਿਟ੍ਠਿਗਤਂ ਅਪਰਿਯਾਪਨ੍ਨਨ੍ਤਿ.