੧੩. ਤੇਰਸਮਵਗ੍ਗੋ

(੧੨੬) ੧. ਕਪ੍ਪਟ੍ਠਕਥਾ

੬੫੪. ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਕਪ੍ਪੋ ਚ ਸਣ੍ਠਾਤਿ ਬੁਦ੍ਧੋ ਚ ਲੋਕੇ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਕਪ੍ਪੋ ਚ ਸਣ੍ਠਾਤਿ ਸਙ੍ਘੋ ਚ ਭਿਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਕਪ੍ਪੋ ਚ ਸਣ੍ਠਾਤਿ ਕਪ੍ਪਟ੍ਠੋ ਚ ਕਪ੍ਪਟ੍ਠਿਯਂ ਕਮ੍ਮਂ ਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਕਪ੍ਪੋ ਚ ਸਣ੍ਠਾਤਿ ਕਪ੍ਪਟ੍ਠੋ ਚ ਪੁਗ੍ਗਲੋ ਕਾਲਂ ਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੫੫. ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਅਤੀਤਂ ਕਪ੍ਪਂ ਤਿਟ੍ਠੇਯ੍ਯ, ਅਨਾਗਤਂ ਕਪ੍ਪਂ ਤਿਟ੍ਠੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਦ੍ਵੇ ਕਪ੍ਪੇ ਤਿਟ੍ਠੇਯ੍ਯ… ਤਯੋ ਕਪ੍ਪੇ ਤਿਟ੍ਠੇਯ੍ਯ… ਚਤ੍ਤਾਰੋ ਕਪ੍ਪੇ ਤਿਟ੍ਠੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੫੬. ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਕਪ੍ਪਟ੍ਠੋ ਕਪ੍ਪੇ ਡਯ੍ਹਨ੍ਤੇ ਕਤ੍ਥ ਗਚ੍ਛਤੀਤਿ? ਅਞ੍ਞਂ ਲੋਕਧਾਤੁਂ ਗਚ੍ਛਤੀਤਿ. ਮਤੋ ਗਚ੍ਛਤਿ, ਵੇਹਾਸਂ ਗਚ੍ਛਤੀਤਿ? ਮਤੋ ਗਚ੍ਛਤੀਤਿ. ਕਪ੍ਪਟ੍ਠਿਯਂ ਕਮ੍ਮਂ ਅਪਰਾਪਰਿਯਵੇਪਕ੍ਕਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… [ਵੇਹਾਸਂ ਗਚ੍ਛਤੀਤਿ (?) ਅਯਂ ਹਿ ਪਰਵਾਦਿਸ੍ਸ ਪਟਿਞ੍ਞਾਯੇਵ, ਕਥਾ. ੬੨੧-੬੨੩ ਨਵਮਪਨ੍ਤਿਯਂ ਵਿਯ] ਵੇਹਾਸਂ ਗਚ੍ਛਤੀਤਿ? ਆਮਨ੍ਤਾ [ਵੇਹਾਸਂ ਗਚ੍ਛਤੀਤਿ (?) ਅਯਂ ਹਿ ਪਰਵਾਦਿਸ੍ਸ ਪਟਿਞ੍ਞਾਯੇਵ, ਕਥਾ. ੬੨੧-੬੨੩ ਨਵਮਪਨ੍ਤਿਯਂ ਵਿਯ]. ਕਪ੍ਪਟ੍ਠੋ ਇਦ੍ਧਿਮਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਪ੍ਪਟ੍ਠੋ ਇਦ੍ਧਿਮਾਤਿ? ਆਮਨ੍ਤਾ. ਕਪ੍ਪਟ੍ਠੇਨ ਛਨ੍ਦਿਦ੍ਧਿਪਾਦੋ ਭਾਵਿਤੋ ਵੀਰਿਯਿਦ੍ਧਿਪਾਦੋ ਭਾਵਿਤੋ ਚਿਤ੍ਤਿਦ੍ਧਿਪਾਦੋ ਭਾਵਿਤੋ ਵੀਮਂਸਿਦ੍ਧਿਪਾਦੋ ਭਾਵਿਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੫੭. ਨ ਵਤ੍ਤਬ੍ਬਂ – ‘‘ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਆਪਾਯਿਕੋ ਨੇਰਯਿਕੋ, ਕਪ੍ਪਟ੍ਠੋ ਸਙ੍ਘਭੇਦਕੋ;

ਵਗ੍ਗਰਤੋ ਅਧਮ੍ਮਟ੍ਠੋ, ਯੋਗਕ੍ਖੇਮਾ ਪਧਂਸਤਿ;

ਸਙ੍ਘਂ ਸਮਗ੍ਗਂ ਭੇਤ੍ਵਾਨ [ਭਿਨ੍ਦਿਤ੍ਵਾ (ਸੀ. ਕ.)], ਕਪ੍ਪਂ ਨਿਰਯਮ੍ਹਿ ਪਚ੍ਚਤੀ’’ਤਿ [ਚੂਲ਼ਵ. ੩੫੪; ਅ. ਨਿ. ੧੦.੩੯; ਇਤਿਵੁ. ੧੮].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯਾਤਿ.

ਕਪ੍ਪਟ੍ਠਕਥਾ ਨਿਟ੍ਠਿਤਾ.

੧੩. ਤੇਰਸਮਵਗ੍ਗੋ

(੧੨੭) ੨. ਕੁਸਲਪਟਿਲਾਭਕਥਾ

੬੫੮. ਕਪ੍ਪਟ੍ਠੋ ਕੁਸਲਂ ਚਿਤ੍ਤਂ ਨ ਪਟਿਲਭੇਯ੍ਯਾਤਿ? ਆਮਨ੍ਤਾ. ਕਪ੍ਪਟ੍ਠੋ ਦਾਨਂ ਦਦੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਕਪ੍ਪਟ੍ਠੋ ਦਾਨਂ ਦਦੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਕਪ੍ਪਟ੍ਠੋ ਕੁਸਲਂ ਚਿਤ੍ਤਂ ਨ ਪਟਿਲਭੇਯ੍ਯਾ’’ਤਿ.

ਕਪ੍ਪਟ੍ਠੋ ਕੁਸਲਂ ਚਿਤ੍ਤਂ ਨ ਪਟਿਲਭੇਯ੍ਯਾਤਿ? ਆਮਨ੍ਤਾ. ਕਪ੍ਪਟ੍ਠੋ ਚੀਵਰਂ ਦਦੇਯ੍ਯ…ਪੇ… ਪਿਣ੍ਡਪਾਤਂ ਦਦੇਯ੍ਯ…ਪੇ… ਸੇਨਾਸਨਂ ਦਦੇਯ੍ਯ…ਪੇ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦਦੇਯ੍ਯ … ਖਾਦਨੀਯਂ ਦਦੇਯ੍ਯ… ਭੋਜਨੀਯਂ ਦਦੇਯ੍ਯ… ਪਾਨੀਯਂ ਦਦੇਯ੍ਯ… ਚੇਤਿਯਂ ਵਨ੍ਦੇਯ੍ਯ… ਚੇਤਿਯੇ ਮਾਲਂ ਆਰੋਪੇਯ੍ਯ… ਗਨ੍ਧਂ ਆਰੋਪੇਯ੍ਯ… ਵਿਲੇਪਨਂ ਆਰੋਪੇਯ੍ਯ…ਪੇ… ਚੇਤਿਯਂ ਅਭਿਦਕ੍ਖਿਣਂ [ਪਦਕ੍ਖਿਣਂ (ਪੀ.)] ਕਰੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਕਪ੍ਪਟ੍ਠੋ ਚੇਤਿਯਂ ਅਭਿਦਕ੍ਖਿਣਂ ਕਰੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਕਪ੍ਪਟ੍ਠੋ ਕੁਸਲਂ ਚਿਤ੍ਤਂ ਨ ਪਟਿਲਭੇਯ੍ਯਾ’’ਤਿ…ਪੇ….

੬੫੯. ਕਪ੍ਪਟ੍ਠੋ ਕੁਸਲਂ ਚਿਤ੍ਤਂ ਪਟਿਲਭੇਯ੍ਯਾਤਿ? ਆਮਨ੍ਤਾ. ਤਤੋ ਵੁਟ੍ਠਾਨਂ ਕੁਸਲਂ ਚਿਤ੍ਤਂ ਪਟਿਲਭੇਯ੍ਯਾਤਿ? ਆਮਨ੍ਤਾ. ਰੂਪਾਵਚਰਂ…ਪੇ… ਅਰੂਪਾਵਚਰਂ…ਪੇ… ਲੋਕੁਤ੍ਤਰਂ ਕੁਸਲਂ ਚਿਤ੍ਤਂ ਪਟਿਲਭੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕੁਸਲਪਟਿਲਾਭਕਥਾ ਨਿਟ੍ਠਿਤਾ.

੧੩. ਤੇਰਸਮਵਗ੍ਗੋ

(੧੨੮) ੩. ਅਨਨ੍ਤਰਾਪਯੁਤ੍ਤਕਥਾ

੬੬੦. ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਸਮ੍ਮਤ੍ਤਨਿਯਾਮਂ ਓਕ੍ਕਮੇਯ੍ਯਾਤਿ? ਆਮਨ੍ਤਾ. ਮਿਚ੍ਛਤ੍ਤਨਿਯਾਮਞ੍ਚ ਸਮ੍ਮਤ੍ਤਨਿਯਾਮਞ੍ਚ ਉਭੋ ਓਕ੍ਕਮੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਸਮ੍ਮਤ੍ਤਨਿਯਾਮਂ ਓਕ੍ਕਮੇਯ੍ਯਾਤਿ? ਆਮਨ੍ਤਾ. ਨਨੁ ਤਂ ਕਮ੍ਮਂ ਪਯੁਤ੍ਤਂ ਕੁਕ੍ਕੁਚ੍ਚਂ ਉਪ੍ਪਾਦਿਤਂ ਵਿਪ੍ਪਟਿਸਾਰਿਯਂ ਜਨਿਤਨ੍ਤਿ? ਆਮਨ੍ਤਾ. ਹਞ੍ਚਿ ਤਂ ਕਮ੍ਮਂ ਪਯੁਤ੍ਤਂ ਕੁਕ੍ਕੁਚ੍ਚਂ ਉਪ੍ਪਾਦਿਤਂ ਵਿਪ੍ਪਟਿਸਾਰਿਯਂ ਜਨਿਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਸਮ੍ਮਤ੍ਤਨਿਯਾਮਂ ਓਕ੍ਕਮੇਯ੍ਯਾ’’ਤਿ.

੬੬੧. ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਅਭਬ੍ਬੋ ਸਮ੍ਮਤ੍ਤਨਿਯਾਮਂ ਓਕ੍ਕਮਿਤੁਨ੍ਤਿ? ਆਮਨ੍ਤਾ. ਮਾਤਾ ਜੀਵਿਤਾ ਵੋਰੋਪਿਤਾ… ਪਿਤਾ ਜੀਵਿਤਾ ਵੋਰੋਪਿਤੋ… ਅਰਹਾ ਜੀਵਿਤਾ ਵੋਰੋਪਿਤੋ… ਦੁਟ੍ਠੇਨ ਚਿਤ੍ਤੇਨ ਤਥਾਗਤਸ੍ਸ ਲੋਹਿਤਂ ਉਪ੍ਪਾਦਿਤਂ… ਸਙ੍ਘੋ ਭਿਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਤਂ ਕਮ੍ਮਂ ਪਟਿਸਂਹਰਿਤ੍ਵਾ ਕੁਕ੍ਕੁਚ੍ਚਂ ਪਟਿਵਿਨੋਦੇਤ੍ਵਾ ਵਿਪ੍ਪਟਿਸਾਰਿਯਂ ਪਟਿਵਿਨੇਤ੍ਵਾ [ਪਟਿਵਿਨੋਦੇਤ੍ਵਾ (ਸੀ. ਪੀ. ਕ.)] ਅਭਬ੍ਬੋ ਸਮ੍ਮਤ੍ਤਨਿਯਾਮਂ ਓਕ੍ਕਮਿਤੁਨ੍ਤਿ? ਆਮਨ੍ਤਾ. ਮਾਤਾ ਜੀਵਿਤਾ ਵੋਰੋਪਿਤਾ… ਪਿਤਾ ਜੀਵਿਤਾ ਵੋਰੋਪਿਤੋ…ਪੇ… ਸਙ੍ਘੋ ਭਿਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਤਂ ਕਮ੍ਮਂ ਪਟਿਸਂਹਰਿਤ੍ਵਾ ਕੁਕ੍ਕੁਚ੍ਚਂ ਪਟਿਵਿਨੋਦੇਤ੍ਵਾ ਵਿਪ੍ਪਟਿਸਾਰਿਯਂ ਪਟਿਵਿਨੇਤ੍ਵਾ ਅਭਬ੍ਬੋ ਸਮ੍ਮਤ੍ਤਨਿਯਾਮਂ ਓਕ੍ਕਮਿਤੁਨ੍ਤਿ? ਆਮਨ੍ਤਾ. ਨਨੁ ਤਂ ਕਮ੍ਮਂ ਪਟਿਸਂਹਟਂ ਕੁਕ੍ਕੁਚ੍ਚਂ ਪਟਿਵਿਨੋਦਿਤਂ ਵਿਪ੍ਪਟਿਸਾਰਿਯਂ ਪਟਿਵਿਨੀਤਨ੍ਤਿ? ਆਮਨ੍ਤਾ. ਹਞ੍ਚਿ ਤਂ ਕਮ੍ਮਂ ਪਟਿਸਂਹਟਂ ਕੁਕ੍ਕੁਚ੍ਚਂ ਪਟਿਵਿਨੋਦਿਤਂ ਵਿਪ੍ਪਟਿਸਾਰਿਯਂ ਪਟਿਵਿਨੀਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਤਂ ਕਮ੍ਮਂ ਪਟਿਸਂਹਰਿਤ੍ਵਾ ਕੁਕ੍ਕੁਚ੍ਚਂ ਪਟਿਵਿਨੋਦੇਤ੍ਵਾ ਵਿਪ੍ਪਟਿਸਾਰਿਯਂ ਪਟਿਵਿਨੇਤ੍ਵਾ ਅਭਬ੍ਬੋ ਸਮ੍ਮਤ੍ਤਨਿਯਾਮਂ ਓਕ੍ਕਮਿਤੁ’’ਨ੍ਤਿ.

੬੬੨. ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਸਮ੍ਮਤ੍ਤਨਿਯਾਮਂ ਓਕ੍ਕਮੇਯ੍ਯਾਤਿ? ਆਮਨ੍ਤਾ. ਨਨੁ ਤਂ ਕਮ੍ਮਂ ਪਯੁਤ੍ਤੋ ਆਸੀਤਿ? ਆਮਨ੍ਤਾ. ਹਞ੍ਚਿ ਤਂ ਕਮ੍ਮਂ ਪਯੁਤ੍ਤੋ ਆਸਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਸਮ੍ਮਤ੍ਤਨਿਯਾਮਂ ਓਕ੍ਕਮੇਯ੍ਯਾ’’ਤਿ.

ਅਨਨ੍ਤਰਾਪਯੁਤ੍ਤਕਥਾ ਨਿਟ੍ਠਿਤਾ.

੧੩. ਤੇਰਸਮਵਗ੍ਗੋ

(੧੨੯) ੪. ਨਿਯਤਸ੍ਸ ਨਿਯਾਮਕਥਾ

੬੬੩. ਨਿਯਤੋ ਨਿਯਾਮਂ ਓਕ੍ਕਮਤੀਤਿ? ਆਮਨ੍ਤਾ. ਮਿਚ੍ਛਤ੍ਤਨਿਯਤੋ ਸਮ੍ਮਤ੍ਤਨਿਯਾਮਂ ਓਕ੍ਕਮਤਿ, ਸਮ੍ਮਤ੍ਤਨਿਯਤੋ ਮਿਚ੍ਛਤ੍ਤਨਿਯਾਮਂ ਓਕ੍ਕਮਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਯਤੋ ਨਿਯਾਮਂ ਓਕ੍ਕਮਤੀਤਿ? ਆਮਨ੍ਤਾ. ਪੁਬ੍ਬੇ ਮਗ੍ਗਂ ਭਾਵੇਤ੍ਵਾ ਪਚ੍ਛਾ ਨਿਯਾਮਂ ਓਕ੍ਕਮਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪੁਬ੍ਬੇ ਸੋਤਾਪਤ੍ਤਿਮਗ੍ਗਂ ਭਾਵੇਤ੍ਵਾ ਪਚ੍ਛਾ ਸੋਤਾਪਤ੍ਤਿਨਿਯਾਮਂ ਓਕ੍ਕਮਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪੁਬ੍ਬੇ ਸਕਦਾਗਾਮਿ…ਪੇ… ਅਨਾਗਾਮਿ…ਪੇ… ਅਰਹਤ੍ਤਮਗ੍ਗਂ ਭਾਵੇਤ੍ਵਾ ਪਚ੍ਛਾ ਅਰਹਤ੍ਤਨਿਯਾਮਂ ਓਕ੍ਕਮਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪੁਬ੍ਬੇ ਸਤਿਪਟ੍ਠਾਨਂ…ਪੇ… ਸਮ੍ਮਪ੍ਪਧਾਨਂ… ਇਦ੍ਧਿਪਾਦਂ… ਇਨ੍ਦ੍ਰਿਯਂ… ਬਲਂ… ਬੋਜ੍ਝਙ੍ਗਂ ਭਾਵੇਤ੍ਵਾ ਪਚ੍ਛਾ ਨਿਯਾਮਂ ਓਕ੍ਕਮਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੬੪. ਨ ਵਤ੍ਤਬ੍ਬਂ – ‘‘ਨਿਯਤੋ ਨਿਯਾਮਂ ਓਕ੍ਕਮਤੀ’’ਤਿ? ਆਮਨ੍ਤਾ. ਭਬ੍ਬੋ ਬੋਧਿਸਤ੍ਤੋ ਤਾਯ ਜਾਤਿਯਾ ਧਮ੍ਮਂ ਨਾਭਿਸਮੇਤੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਨਿਯਤੋ ਨਿਯਾਮਂ ਓਕ੍ਕਮਤੀਤਿ.

ਨਿਯਤਸ੍ਸ ਨਿਯਾਮਕਥਾ ਨਿਟ੍ਠਿਤਾ.

੧੩. ਤੇਰਸਮਵਗ੍ਗੋ

(੧੩੦) ੫. ਨਿਵੁਤਕਥਾ

੬੬੫. ਨਿਵੁਤੋ ਨੀਵਰਣਂ ਜਹਤੀਤਿ? ਆਮਨ੍ਤਾ. ਰਤ੍ਤੋ ਰਾਗਂ ਜਹਤਿ, ਦੁਟ੍ਠੋ ਦੋਸਂ ਜਹਤਿ, ਮੂਲ਼੍ਹੋ ਮੋਹਂ ਜਹਤਿ, ਕਿਲਿਟ੍ਠੋ ਕਿਲੇਸੇ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰਾਗੇਨ ਰਾਗਂ ਜਹਤਿ, ਦੋਸੇਨ ਦੋਸਂ ਜਹਤਿ, ਮੋਹੇਨ ਮੋਹਂ ਜਹਤਿ, ਕਿਲੇਸੇਹਿ ਕਿਲੇਸੇ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰਾਗੋ ਚਿਤ੍ਤਸਮ੍ਪਯੁਤ੍ਤੋ, ਮਗ੍ਗੋ ਚਿਤ੍ਤਸਮ੍ਪਯੁਤ੍ਤੋਤਿ? ਆਮਨ੍ਤਾ. ਦ੍ਵਿਨ੍ਨਂ ਫਸ੍ਸਾਨਂ…ਪੇ… ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰਾਗੋ ਅਕੁਸਲੋ, ਮਗ੍ਗੋ ਕੁਸਲੋਤਿ? ਆਮਨ੍ਤਾ. ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੬੬. ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਸੁਵਿਦੂਰਵਿਦੂਰਾਨਿ! ਕਤਮਾਨਿ ਚਤ੍ਤਾਰਿ? ਨਭਞ੍ਚ, ਭਿਕ੍ਖਵੇ, ਪਥਵੀ ਚ – ਇਦਂ ਪਠਮਂ ਸੁਵਿਦੂਰਵਿਦੂਰਂ…ਪੇ… ਤਸ੍ਮਾ ਸਤਂ ਧਮ੍ਮੋ ਅਸਬ੍ਭਿ ਆਰਕਾ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਕੁਸਲਾਕੁਸਲਾ…ਪੇ… ਸਮ੍ਮੁਖੀਭਾਵਂ ਆਗਚ੍ਛਨ੍ਤੀ’’ਤਿ.

ਨਿਵੁਤੋ ਨੀਵਰਣਂ ਜਹਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸੋ ਏਵਂ ਸਮਾਹਿਤੇ ਚਿਤ੍ਤੇ ਪਰਿਸੁਦ੍ਧੇ ਪਰਿਯੋਦਾਤੇ ਅਨਙ੍ਗਣੇ ਵਿਗਤੂਪਕ੍ਕਿਲੇਸੇ ਮੁਦੁਭੂਤੇ ਕਮ੍ਮਨਿਯੇ ਠਿਤੇ ਆਨੇਞ੍ਜਪ੍ਪਤ੍ਤੇ ਆਸਵਾਨਂ ਖਯਞਾਣਾਯ ਚਿਤ੍ਤਂ ਅਭਿਨਿਨ੍ਨਾਮੇਤੀ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਨਿਵੁਤੋ ਨੀਵਰਣਂ ਜਹਤੀ’’ਤਿ…ਪੇ….

੬੬੭. ਨ ਵਤ੍ਤਬ੍ਬਂ – ‘‘ਨਿਵੁਤੋ ਨੀਵਰਣਂ ਜਹਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਤਸ੍ਸ ਏਵਂ ਜਾਨਤੋ ਏਵਂ ਪਸ੍ਸਤੋ ਕਾਮਾਸਵਾਪਿ ਚਿਤ੍ਤਂ ਵਿਮੁਚ੍ਚਤਿ…ਪੇ… ਅਵਿਜ੍ਜਾਸਵਾਪਿ ਚਿਤ੍ਤਂ ਵਿਮੁਚ੍ਚਤੀ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨਿਵੁਤੋ ਨੀਵਰਣਂ ਜਹਤੀਤਿ.

ਨਿਵੁਤਕਥਾ ਨਿਟ੍ਠਿਤਾ.

੧੩. ਤੇਰਸਮਵਗ੍ਗੋ

(੧੩੧) ੬. ਸਮ੍ਮੁਖੀਭੂਤਕਥਾ

੬੬੮. ਸਮ੍ਮੁਖੀਭੂਤੋ ਸਂਯੋਜਨਂ ਜਹਤੀਤਿ? ਆਮਨ੍ਤਾ. ਰਤ੍ਤੋ ਰਾਗਂ ਜਹਤਿ, ਦੁਟ੍ਠੋ ਦੋਸਂ ਜਹਤਿ, ਮੂਲ਼੍ਹੋ ਮੋਹਂ ਜਹਤਿ, ਕਿਲਿਟ੍ਠੋ ਕਿਲੇਸੇ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰਾਗੇਨ ਰਾਗਂ ਜਹਤਿ, ਦੋਸੇਨ ਦੋਸਂ ਜਹਤਿ, ਮੋਹੇਨ ਮੋਹਂ ਜਹਤਿ, ਕਿਲੇਸੇਹਿ ਕਿਲੇਸੇ ਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੬੯. ਕੁਸਲਾਕੁਸਲਾ…ਪੇ… ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਸੁਵਿਦੂਰਵਿਦੂਰਾਨਿ! ਕਤਮਾਨਿ ਚਤ੍ਤਾਰਿ? ਨਭਞ੍ਚ, ਭਿਕ੍ਖਵੇ, ਪਥਵੀ ਚ – ਇਦਂ ਪਠਮਂ ਸੁਵਿਦੂਰਵਿਦੂਰਂ…ਪੇ… ਤਸ੍ਮਾ ਸਤਂ ਧਮ੍ਮੋ ਅਸਬ੍ਭਿ ਆਰਕਾ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਕੁਸਲਾਕੁਸਲਾ…ਪੇ… ਸਮ੍ਮੁਖੀਭਾਵਂ ਆਗਚ੍ਛਨ੍ਤੀ’’ਤਿ.

ਸਮ੍ਮੁਖੀਭੂਤੋ ਸਂਯੋਜਨਂ ਜਹਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸੋ ਏਵਂ ਸਮਾਹਿਤੇ ਚਿਤ੍ਤੇ…ਪੇ… ਆਸਵਾਨਂ ਖਯਞਾਣਾਯ ਚਿਤ੍ਤਂ ਅਭਿਨਿਨ੍ਨਾਮੇਤੀ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਸਮ੍ਮੁਖੀਭੂਤੋ ਸਂਯੋਜਨਂ ਜਹਤੀ’’ਤਿ.

੬੭੦. ਨ ਵਤ੍ਤਬ੍ਬਂ – ‘‘ਸਮ੍ਮੁਖੀਭੂਤੋ ਸਂਯੋਜਨਂ ਜਹਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਤਸ੍ਸ ਏਵਂ ਜਾਨਤੋ ਏਵਂ ਪਸ੍ਸਤੋ ਕਾਮਾਸਵਾਪਿ ਚਿਤ੍ਤਂ ਵਿਮੁਚ੍ਚਤਿ…ਪੇ… ਅਵਿਜ੍ਜਾਸਵਾਪਿ ਚਿਤ੍ਤਂ ਵਿਮੁਚ੍ਚਤੀ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਸਮ੍ਮੁਖੀਭੂਤੋ ਸਂਯੋਜਨਂ ਜਹਤੀਤਿ.

ਸਮ੍ਮੁਖੀਭੂਤਕਥਾ ਨਿਟ੍ਠਿਤਾ.

੧੩. ਤੇਰਸਮਵਗ੍ਗੋ

(੧੩੨) ੭. ਸਮਾਪਨ੍ਨੋ ਅਸ੍ਸਾਦੇਤਿਕਥਾ

੬੭੧. ਸਮਾਪਨ੍ਨੋ ਅਸ੍ਸਾਦੇਤਿ, ਝਾਨਨਿਕਨ੍ਤਿ ਝਾਨਾਰਮ੍ਮਣਾਤਿ? ਆਮਨ੍ਤਾ. ਤਂ ਝਾਨਂ ਤਸ੍ਸ ਝਾਨਸ੍ਸ ਆਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਂ ਝਾਨਂ ਤਸ੍ਸ ਝਾਨਸ੍ਸ ਆਰਮ੍ਮਣਨ੍ਤਿ? ਆਮਨ੍ਤਾ. ਤੇਨ ਫਸ੍ਸੇਨ ਤਂ ਫਸ੍ਸਂ ਫੁਸਤਿ, ਤਾਯ ਵੇਦਨਾਯ ਤਂ ਵੇਦਨਂ ਵੇਦੇਤਿ, ਤਾਯ ਸਞ੍ਞਾਯ ਤਂ ਸਞ੍ਞਂ ਸਞ੍ਜਾਨਾਤਿ, ਤਾਯ ਚੇਤਨਾਯ ਤਂ ਚੇਤਨਂ ਚੇਤੇਤਿ, ਤੇਨ ਚਿਤ੍ਤੇਨ ਤਂ ਚਿਤ੍ਤਂ ਚਿਨ੍ਤੇਤਿ, ਤੇਨ ਵਿਤਕ੍ਕੇਨ ਤਂ ਵਿਤਕ੍ਕਂ ਵਿਤਕ੍ਕੇਤਿ, ਤੇਨ ਵਿਚਾਰੇਨ ਤਂ ਵਿਚਾਰਂ ਵਿਚਾਰੇਤਿ, ਤਾਯ ਪੀਤਿਯਾ ਤਂ ਪੀਤਿ ਪਿਯਾਯਤਿ, ਤਾਯ ਸਤਿਯਾ ਤਂ ਸਤਿਂ ਸਰਤਿ, ਤਾਯ ਪਞ੍ਞਾਯ ਤਂ ਪਞ੍ਞਂ ਪਜਾਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਝਾਨਨਿਕਨ੍ਤਿ ਚਿਤ੍ਤਸਮ੍ਪਯੁਤ੍ਤਾ, ਝਾਨਂ ਚਿਤ੍ਤਸਮ੍ਪਯੁਤ੍ਤਨ੍ਤਿ? ਆਮਨ੍ਤਾ. ਦ੍ਵਿਨ੍ਨਂ ਫਸ੍ਸਾਨਂ…ਪੇ… ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਝਾਨਨਿਕਨ੍ਤਿ ਅਕੁਸਲਂ, ਝਾਨਂ ਕੁਸਲਨ੍ਤਿ? ਆਮਨ੍ਤਾ. ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੭੨. ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਸੁਵਿਦੂਰਵਿਦੂਰਾਨਿ! ਕਤਮਾਨਿ ਚਤ੍ਤਾਰਿ? ਨਭਞ੍ਚ, ਭਿਕ੍ਖਵੇ, ਪਥਵੀ ਚ – ਇਦਂ ਪਠਮਂ ਸੁਵਿਦੂਰਵਿਦੂਰਂ…ਪੇ… ਤਸ੍ਮਾ ਸਤਂ ਧਮ੍ਮੋ ਅਸਬ੍ਭਿ ਆਰਕਾ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀ’’ਤਿ.

੬੭੩. ਨ ਵਤ੍ਤਬ੍ਬਂ – ‘‘ਸਮਾਪਨ੍ਨੋ ਅਸ੍ਸਾਦੇਤਿ, ਝਾਨਨਿਕਨ੍ਤਿ ਝਾਨਾਰਮ੍ਮਣਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਭਿਕ੍ਖੁ ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ, ਸੋ ਤਂ ਅਸ੍ਸਾਦੇਤਿ ਤਂ ਨਿਕਾਮੇਤਿ ਤੇਨ ਚ ਵਿਤ੍ਤਿਂ ਆਪਜ੍ਜਤਿ; ਵਿਤਕ੍ਕਵਿਚਾਰਾਨਂ ਵੂਪਸਮਾ…ਪੇ… ਦੁਤਿਯਂ ਝਾਨਂ…ਪੇ… ਤਤਿਯਂ ਝਾਨਂ…ਪੇ… ਚਤੁਤ੍ਥਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ, ਸੋ ਤਂ ਅਸ੍ਸਾਦੇਤਿ ਤਂ ਨਿਕਾਮੇਤਿ ਤੇਨ ਚ ਵਿਤ੍ਤਿਂ ਆਪਜ੍ਜਤੀ’’ਤਿ [ਅ. ਨਿ. ੪.੧੨੩]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਸਮਾਪਨ੍ਨੋ ਅਸ੍ਸਾਦੇਤਿ, ਝਾਨਨਿਕਨ੍ਤਿ ਝਾਨਾਰਮ੍ਮਣਾਤਿ.

ਸਮਾਪਨ੍ਨੋ ਅਸ੍ਸਾਦੇਤਿਕਥਾ ਨਿਟ੍ਠਿਤਾ.

੧੩. ਤੇਰਸਮਵਗ੍ਗੋ

(੧੩੩) ੮. ਅਸਾਤਰਾਗਕਥਾ

੬੭੪. ਅਤ੍ਥਿ ਅਸਾਤਰਾਗੋਤਿ? ਆਮਨ੍ਤਾ. ਦੁਕ੍ਖਾਭਿਨਨ੍ਦਿਨੋ ਸਤ੍ਤਾ, ਅਤ੍ਥਿ ਕੇਚਿ ਦੁਕ੍ਖਂ ਪਤ੍ਥੇਨ੍ਤਿ ਪਿਹੇਨ੍ਤਿ ਏਸਨ੍ਤਿ ਗਵੇਸਨ੍ਤਿ ਪਰਿਯੇਸਨ੍ਤਿ, ਦੁਕ੍ਖਂ ਅਜ੍ਝੋਸਾਯ ਤਿਟ੍ਠਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸੁਖਾਭਿਨਨ੍ਦਿਨੋ ਸਤ੍ਤਾ, ਅਤ੍ਥਿ ਕੇਚਿ ਸੁਖਂ ਪਤ੍ਥੇਨ੍ਤਿ ਪਿਹੇਨ੍ਤਿ ਏਸਨ੍ਤਿ ਗਵੇਸਨ੍ਤਿ ਪਰਿਯੇਸਨ੍ਤਿ, ਸੁਖਂ ਅਜ੍ਝੋਸਾਯ ਤਿਟ੍ਠਨ੍ਤੀਤਿ? ਆਮਨ੍ਤਾ. ਹਞ੍ਚਿ ਸੁਖਾਭਿਨਨ੍ਦਿਨੋ ਸਤ੍ਤਾ, ਅਤ੍ਥਿ ਕੇਚਿ ਸੁਖਂ ਪਤ੍ਥੇਨ੍ਤਿ ਪਿਹੇਨ੍ਤਿ ਏਸਨ੍ਤਿ ਗਵੇਸਨ੍ਤਿ ਪਰਿਯੇਸਨ੍ਤਿ, ਸੁਖਂ ਅਜ੍ਝੋਸਾਯ ਤਿਟ੍ਠਨ੍ਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਸਾਤਰਾਗੋ’’ਤਿ.

ਅਤ੍ਥਿ ਅਸਾਤਰਾਗੋਤਿ? ਆਮਨ੍ਤਾ. ਦੁਕ੍ਖਾਯ ਵੇਦਨਾਯ ਰਾਗਾਨੁਸਯੋ ਅਨੁਸੇਤਿ, ਸੁਖਾਯ ਵੇਦਨਾਯ ਪਟਿਘਾਨੁਸਯੋ ਅਨੁਸੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸੁਖਾਯ ਵੇਦਨਾਯ ਰਾਗਾਨੁਸਯੋ ਅਨੁਸੇਤਿ, ਦੁਕ੍ਖਾਯ ਵੇਦਨਾਯ ਪਟਿਘਾਨੁਸਯੋ ਅਨੁਸੇਤੀਤਿ? ਆਮਨ੍ਤਾ. ਹਞ੍ਚਿ ਸੁਖਾਯ ਵੇਦਨਾਯ ਰਾਗਾਨੁਸਯੋ ਅਨੁਸੇਤਿ, ਦੁਕ੍ਖਾਯ ਵੇਦਨਾਯ ਪਟਿਘਾਨੁਸਯੋ ਅਨੁਸੇਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਸਾਤਰਾਗੋ’’ਤਿ.

੬੭੫. ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਸਾਤਰਾਗੋ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸੋ ਏਵਂ ਅਨੁਰੋਧਵਿਰੋਧਂ ਸਮਾਪਨ੍ਨੋ ਯਂ ਕਿਞ੍ਚਿ ਵੇਦਨਂ ਵੇਦਯਤਿ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ, ਸੋ ਤਂ ਵੇਦਨਂ ਅਭਿਨਨ੍ਦਤਿ ਅਭਿਵਦਤਿ ਅਜ੍ਝੋਸਾਯ ਤਿਟ੍ਠਤੀ’’ਤਿ [ਮ. ਨਿ. ੩.੪੦੯ ਮਹਾਤਣ੍ਹਾਸਙ੍ਖਯੇ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਤ੍ਥਿ ਅਸਾਤਰਾਗੋਤਿ.

ਅਸਾਤਰਾਗਕਥਾ ਨਿਟ੍ਠਿਤਾ.

੧੩. ਤੇਰਸਮਵਗ੍ਗੋ

(੧੩੪) ੯. ਧਮ੍ਮਤਣ੍ਹਾ ਅਬ੍ਯਾਕਤਾਤਿਕਥਾ

੬੭੬. ਧਮ੍ਮਤਣ੍ਹਾ ਅਬ੍ਯਾਕਤਾਤਿ? ਆਮਨ੍ਤਾ. ਵਿਪਾਕਾਬ੍ਯਾਕਤਾ ਕਿਰਿਯਾਬ੍ਯਾਕਤਾ ਰੂਪਂ ਨਿਬ੍ਬਾਨਂ ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਧਮ੍ਮਤਣ੍ਹਾ ਅਬ੍ਯਾਕਤਾਤਿ? ਆਮਨ੍ਤਾ. ਰੂਪਤਣ੍ਹਾ ਅਬ੍ਯਾਕਤਾਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਧਮ੍ਮਤਣ੍ਹਾ ਅਬ੍ਯਾਕਤਾਤਿ? ਆਮਨ੍ਤਾ. ਸਦ੍ਦਤਣ੍ਹਾ…ਪੇ… ਗਨ੍ਧਤਣ੍ਹਾ…ਪੇ… ਰਸਤਣ੍ਹਾ…ਪੇ… ਫੋਟ੍ਠਬ੍ਬਤਣ੍ਹਾ ਅਬ੍ਯਾਕਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਤਣ੍ਹਾ ਅਕੁਸਲਾਤਿ? ਆਮਨ੍ਤਾ. ਧਮ੍ਮਤਣ੍ਹਾ ਅਕੁਸਲਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਦ੍ਦਤਣ੍ਹਾ…ਪੇ… ਫੋਟ੍ਠਬ੍ਬਤਣ੍ਹਾ ਅਕੁਸਲਾਤਿ? ਆਮਨ੍ਤਾ. ਧਮ੍ਮਤਣ੍ਹਾ ਅਕੁਸਲਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੭੭. ਧਮ੍ਮਤਣ੍ਹਾ ਅਬ੍ਯਾਕਤਾਤਿ? ਆਮਨ੍ਤਾ. ਨਨੁ ਤਣ੍ਹਾ ਅਕੁਸਲਾ ਵੁਤ੍ਤਾ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਤਣ੍ਹਾ ਅਕੁਸਲਾ ਵੁਤ੍ਤਾ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਧਮ੍ਮਤਣ੍ਹਾ ਅਬ੍ਯਾਕਤਾ’’ਤਿ.

ਧਮ੍ਮਤਣ੍ਹਾ ਅਬ੍ਯਾਕਤਾਤਿ? ਆਮਨ੍ਤਾ. ਨਨੁ ਲੋਭੋ ਅਕੁਸਲੋ ਵੁਤ੍ਤੋ ਭਗਵਤਾ, ਧਮ੍ਮਤਣ੍ਹਾ ਲੋਭੋਤਿ? ਆਮਨ੍ਤਾ. ਹਞ੍ਚਿ ਲੋਭੋ ਅਕੁਸਲੋ ਵੁਤ੍ਤੋ ਭਗਵਤਾ, ਧਮ੍ਮਤਣ੍ਹਾ ਲੋਭੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਧਮ੍ਮਤਣ੍ਹਾ ਅਬ੍ਯਾਕਤਾ’’ਤਿ.

੬੭੮. ਧਮ੍ਮਤਣ੍ਹਾ ਲੋਭੋ ਅਬ੍ਯਾਕਤੋਤਿ? ਆਮਨ੍ਤਾ. ਰੂਪਤਣ੍ਹਾ ਲੋਭੋ ਅਬ੍ਯਾਕਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਧਮ੍ਮਤਣ੍ਹਾ ਲੋਭੋ ਅਬ੍ਯਾਕਤੋਤਿ? ਆਮਨ੍ਤਾ. ਸਦ੍ਦਤਣ੍ਹਾ…ਪੇ… ਫੋਟ੍ਠਬ੍ਬਤਣ੍ਹਾ ਲੋਭੋ ਅਬ੍ਯਾਕਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਤਣ੍ਹਾ ਲੋਭੋ ਅਕੁਸਲੋਤਿ? ਆਮਨ੍ਤਾ. ਧਮ੍ਮਤਣ੍ਹਾ ਲੋਭੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਦ੍ਦਤਣ੍ਹਾ…ਪੇ… ਫੋਟ੍ਠਬ੍ਬਤਣ੍ਹਾ ਲੋਭੋ ਅਕੁਸਲੋਤਿ? ਆਮਨ੍ਤਾ. ਧਮ੍ਮਤਣ੍ਹਾ ਲੋਭੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੭੯. ਧਮ੍ਮਤਣ੍ਹਾ ਅਬ੍ਯਾਕਤਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਯਾਯਂ ਤਣ੍ਹਾ ਪੋਨੋਬ੍ਭਵਿਕਾ ਨਨ੍ਦੀਰਾਗਸਹਗਤਾ ਤਤ੍ਰਤਤ੍ਰਾਭਿਨਨ੍ਦਿਨੀ, ਸੇਯ੍ਯਥਿਦਂ – ਕਾਮਤਣ੍ਹਾ, ਭਵਤਣ੍ਹਾ, ਵਿਭਵਤਣ੍ਹਾ’’ਤਿ [ਮਹਾਵ. ੧੪; ਦੀ. ਨਿ. ੨.੪੦੦]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਧਮ੍ਮਤਣ੍ਹਾ ਅਬ੍ਯਾਕਤਾ’’ਤਿ.

੬੮੦. ਨ ਵਤ੍ਤਬ੍ਬਂ – ‘‘ਧਮ੍ਮਤਣ੍ਹਾ ਅਬ੍ਯਾਕਤਾ’’ਤਿ? ਆਮਨ੍ਤਾ. ਨਨੁ ਸਾ ਧਮ੍ਮਤਣ੍ਹਾਤਿ? ਆਮਨ੍ਤਾ. ਹਞ੍ਚਿ ਸਾ ਧਮ੍ਮਤਣ੍ਹਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਧਮ੍ਮਤਣ੍ਹਾ ਅਬ੍ਯਾਕਤਾ’’ਤਿ.

ਧਮ੍ਮਤਣ੍ਹਾ ਅਬ੍ਯਾਕਤਾਤਿਕਥਾ ਨਿਟ੍ਠਿਤਾ.

੧੩. ਤੇਰਸਮਵਗ੍ਗੋ

(੧੩੫) ੧੦. ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋਤਿਕਥਾ

੬੮੧. ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਰੂਪਤਣ੍ਹਾ ਨ ਦੁਕ੍ਖਸਮੁਦਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਸਦ੍ਦਤਣ੍ਹਾ…ਪੇ… ਗਨ੍ਧਤਣ੍ਹਾ…ਪੇ… ਰਸਤਣ੍ਹਾ…ਪੇ… ਫੋਟ੍ਠਬ੍ਬਤਣ੍ਹਾ ਨ ਦੁਕ੍ਖਸਮੁਦਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਤਣ੍ਹਾ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਧਮ੍ਮਤਣ੍ਹਾ ਦੁਕ੍ਖਸਮੁਦਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਦ੍ਦਤਣ੍ਹਾ…ਪੇ… ਗਨ੍ਧਤਣ੍ਹਾ…ਪੇ… ਰਸਤਣ੍ਹਾ…ਪੇ… ਫੋਟ੍ਠਬ੍ਬਤਣ੍ਹਾ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਧਮ੍ਮਤਣ੍ਹਾ ਦੁਕ੍ਖਸਮੁਦਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੮੨. ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਨਨੁ ਤਣ੍ਹਾ ਦੁਕ੍ਖਸਮੁਦਯੋ ਵੁਤ੍ਤੋ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਤਣ੍ਹਾ ਦੁਕ੍ਖਸਮੁਦਯੋ ਵੁਤ੍ਤੋ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋ’’ਤਿ. ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਨਨੁ ਲੋਭੋ ਦੁਕ੍ਖਸਮੁਦਯੋ ਵੁਤ੍ਤੋ ਭਗਵਤਾ, ਧਮ੍ਮਤਣ੍ਹਾ ਲੋਭੋਤਿ? ਆਮਨ੍ਤਾ. ਹਞ੍ਚਿ ਲੋਭੋ ਦੁਕ੍ਖਸਮੁਦਯੋ ਵੁਤ੍ਤੋ ਭਗਵਤਾ, ਧਮ੍ਮਤਣ੍ਹਾ ਲੋਭੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋ’’ਤਿ.

੬੮੩. ਧਮ੍ਮਤਣ੍ਹਾ ਲੋਭੋ, ਨ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਰੂਪਤਣ੍ਹਾ ਲੋਭੋ, ਨ ਦੁਕ੍ਖਸਮੁਦਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਧਮ੍ਮਤਣ੍ਹਾ ਲੋਭੋ, ਨ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਸਦ੍ਦਤਣ੍ਹਾ…ਪੇ… ਗਨ੍ਧਤਣ੍ਹਾ…ਪੇ… ਰਸਤਣ੍ਹਾ…ਪੇ… ਫੋਟ੍ਠਬ੍ਬਤਣ੍ਹਾ ਲੋਭੋ, ਨ ਦੁਕ੍ਖਸਮੁਦਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਤਣ੍ਹਾ ਲੋਭੋ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਧਮ੍ਮਤਣ੍ਹਾ ਲੋਭੋ ਦੁਕ੍ਖਸਮੁਦਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਦ੍ਦਤਣ੍ਹਾ…ਪੇ… ਫੋਟ੍ਠਬ੍ਬਤਣ੍ਹਾ ਲੋਭੋ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਧਮ੍ਮਤਣ੍ਹਾ ਲੋਭੋ ਦੁਕ੍ਖਸਮੁਦਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੮੪. ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਯਾਯਂ ਤਣ੍ਹਾ ਪੋਨੋਬ੍ਭਵਿਕਾ ਨਨ੍ਦੀਰਾਗਸਹਗਤਾ ਤਤ੍ਰਤਤ੍ਰਾਭਿਨਨ੍ਦਿਨੀ, ਸੇਯ੍ਯਥਿਦਂ – ਕਾਮਤਣ੍ਹਾ, ਭਵਤਣ੍ਹਾ, ਵਿਭਵਤਣ੍ਹਾ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋ’’ਤਿ.

੬੮੫. ਨ ਵਤ੍ਤਬ੍ਬਂ – ‘‘ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋ’’ਤਿ? ਆਮਨ੍ਤਾ. ਨਨੁ ਸਾ ਧਮ੍ਮਤਣ੍ਹਾਤਿ? ਆਮਨ੍ਤਾ. ਹਞ੍ਚਿ ਸਾ ਧਮ੍ਮਤਣ੍ਹਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋ’’ਤਿ.

ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋਤਿਕਥਾ ਨਿਟ੍ਠਿਤਾ.

ਤੇਰਸਮਵਗ੍ਗੋ.

ਤਸ੍ਸੁਦ੍ਦਾਨਂ –

ਕਪ੍ਪਟ੍ਠੋ ਕਪ੍ਪਂ ਤਿਟ੍ਠੇਯ੍ਯ, ਕਪ੍ਪਟ੍ਠੋ ਕੁਸਲਂ ਚਿਤ੍ਤਂ ਨ ਪਟਿਲਭੇਯ੍ਯ, ਅਨਨ੍ਤਰਾਪਯੁਤ੍ਤੋ ਪੁਗ੍ਗਲੋ ਸਮ੍ਮਤ੍ਤਨਿਯਾਮਂ ਓਕ੍ਕਮੇਯ੍ਯ, ਨਿਯਤੋ ਨਿਯਾਮਂ ਓਕ੍ਕਮਤਿ, ਨਿਵੁਤੋ ਨੀਵਰਣਂ ਜਹਤਿ, ਸਮ੍ਮੁਖੀਭੂਤੋ ਸਂਯੋਜਨਂ ਜਹਤਿ, ਝਾਨਨਿਕਨ੍ਤਿ, ਅਸਾਤਰਾਗੋ, ਧਮ੍ਮਤਣ੍ਹਾ ਅਬ੍ਯਾਕਤਾ, ਧਮ੍ਮਤਣ੍ਹਾ ਨ ਦੁਕ੍ਖਸਮੁਦਯੋਤਿ.