੧੨. ਦ੍ਵਾਦਸਮਵਗ੍ਗੋ

(੧੧੮) ੩. ਸਦ੍ਦੋ ਵਿਪਾਕੋਤਿਕਥਾ

੬੩੬. ਸਦ੍ਦੋ ਵਿਪਾਕੋਤਿ? ਆਮਨ੍ਤਾ. ਸੁਖਵੇਦਨਿਯੋ ਦੁਕ੍ਖਵੇਦਨਿਯੋ ਅਦੁਕ੍ਖਮਸੁਖਵੇਦਨਿਯੋ, ਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ, ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤੋ, ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤੋ, ਫਸ੍ਸੇਨ ਸਮ੍ਪਯੁਤ੍ਤੋ, ਵੇਦਨਾਯ ਸਮ੍ਪਯੁਤ੍ਤੋ, ਸਞ੍ਞਾਯ ਸਮ੍ਪਯੁਤ੍ਤੋ, ਚੇਤਨਾਯ ਸਮ੍ਪਯੁਤ੍ਤੋ, ਚਿਤ੍ਤੇਨ ਸਮ੍ਪਯੁਤ੍ਤੋ, ਸਾਰਮ੍ਮਣੋ; ਅਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ ਸਮਨ੍ਨਾਹਾਰੋ ਮਨਸਿਕਾਰੋ ਚੇਤਨਾ ਪਤ੍ਥਨਾ ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਨ ਸੁਖਵੇਦਨਿਯੋ ਨ ਦੁਕ੍ਖਵੇਦਨਿਯੋ…ਪੇ… ਅਨਾਰਮ੍ਮਣੋ, ਨਤ੍ਥਿ ਤਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਹਞ੍ਚਿ ਨ ਸੁਖਵੇਦਨਿਯੋ…ਪੇ… ਅਨਾਰਮ੍ਮਣੋ, ਨਤ੍ਥਿ ਤਸ੍ਸ ਆਵਟ੍ਟਨਾ…ਪੇ… ਪਣਿਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਦ੍ਦੋ ਵਿਪਾਕੋ’’ਤਿ.

ਫਸ੍ਸੋ ਵਿਪਾਕੋ, ਫਸ੍ਸੋ ਸੁਖਵੇਦਨਿਯੋ…ਪੇ… ਸਾਰਮ੍ਮਣੋ, ਅਤ੍ਥਿ ਤਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਸਦ੍ਦੋ ਵਿਪਾਕੋ, ਸਦ੍ਦੋ ਸੁਖਵੇਦਨਿਯੋ…ਪੇ… ਸਾਰਮ੍ਮਣੋ, ਅਤ੍ਥਿ ਤਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਦ੍ਦੋ ਵਿਪਾਕੋ, ਸਦ੍ਦੋ ਨ ਸੁਖਵੇਦਨਿਯੋ…ਪੇ… ਅਨਾਰਮ੍ਮਣੋ, ਨਤ੍ਥਿ ਤਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਫਸ੍ਸੋ ਵਿਪਾਕੋ, ਫਸ੍ਸੋ ਨ ਸੁਖਵੇਦਨਿਯੋ, ਨ ਦੁਕ੍ਖਵੇਦਨਿਯੋ…ਪੇ… ਅਨਾਰਮ੍ਮਣੋ, ਨਤ੍ਥਿ ਤਸ੍ਸ ਆਵਟ੍ਟਨਾ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੩੭. ਨ ਵਤ੍ਤਬ੍ਬਂ – ‘‘ਸਦ੍ਦੋ ਵਿਪਾਕੋ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸੋ ਤਸ੍ਸ ਕਮ੍ਮਸ੍ਸ ਕਤਤ੍ਤਾ ਉਪਚਿਤਤ੍ਤਾ ਉਸ੍ਸਨ੍ਨਤ੍ਤਾ ਵਿਪੁਲਤ੍ਤਾ ਬ੍ਰਹ੍ਮਸ੍ਸਰੋ ਹੋਤਿ ਕਰਵਿਕਭਾਣੀ’’ਤਿ [ਦੀਘਨਿਕਾਯੇ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਸਦ੍ਦੋ ਵਿਪਾਕੋਤਿ.

ਸਦ੍ਦੋ ਵਿਪਾਕੋਤਿਕਥਾ ਨਿਟ੍ਠਿਤਾ.