੧੦. ਦਸਮਵਗ੍ਗੋ

(੯੯) ੫. ਸਾਭੋਗਾਤਿਕਥਾ

੫੮੪. ਪਞ੍ਚਵਿਞ੍ਞਾਣਾ ਸਾਭੋਗਾਤਿ? ਆਮਨ੍ਤਾ. ਨਨੁ ਪਞ੍ਚਵਿਞ੍ਞਾਣਾ ਉਪ੍ਪਨ੍ਨਵਤ੍ਥੁਕਾ ਉਪ੍ਪਨ੍ਨਾਰਮ੍ਮਣਾਤਿ? ਆਮਨ੍ਤਾ. ਹਞ੍ਚਿ ਪਞ੍ਚਵਿਞ੍ਞਾਣਾ ਉਪ੍ਪਨ੍ਨਵਤ੍ਥੁਕਾ ਉਪ੍ਪਨ੍ਨਾਰਮ੍ਮਣਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਞ੍ਚਵਿਞ੍ਞਾਣਾ ਸਾਭੋਗਾ’’ਤਿ. ਨਨੁ ਪਞ੍ਚਵਿਞ੍ਞਾਣਾ ਪੁਰੇਜਾਤਵਤ੍ਥੁਕਾ ਪੁਰੇਜਾਤਾਰਮ੍ਮਣਾ ਅਜ੍ਝਤ੍ਤਿਕਵਤ੍ਥੁਕਾ ਬਾਹਿਰਾਰਮ੍ਮਣਾ ਅਸਮ੍ਭਿਨ੍ਨਵਤ੍ਥੁਕਾ ਅਸਮ੍ਭਿਨ੍ਨਾਰਮ੍ਮਣਾ ਨਾਨਾਵਤ੍ਥੁਕਾ ਨਾਨਾਰਮ੍ਮਣਾ ਨ ਅਞ੍ਞਮਞ੍ਞਸ੍ਸ ਗੋਚਰਵਿਸਯਂ ਪਚ੍ਚਨੁਭੋਨ੍ਤਿ, ਨ ਅਸਮਨ੍ਨਾਹਾਰਾ ਉਪ੍ਪਜ੍ਜਨ੍ਤਿ, ਨ ਅਮਨਸਿਕਾਰਾ ਉਪ੍ਪਜ੍ਜਨ੍ਤਿ, ਨ ਅਬ੍ਬੋਕਿਣ੍ਣਾ ਉਪ੍ਪਜ੍ਜਨ੍ਤਿ, ਨ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜਨ੍ਤਿ, ਨਨੁ ਪਞ੍ਚਵਿਞ੍ਞਾਣਾ ਨ ਅਞ੍ਞਮਞ੍ਞਸ੍ਸ ਸਮਨਨ੍ਤਰਾ ਉਪ੍ਪਜ੍ਜਨ੍ਤੀਤਿ? ਆਮਨ੍ਤਾ. ਹਞ੍ਚਿ ਪਞ੍ਚਵਿਞ੍ਞਾਣਾ ਨ ਅਞ੍ਞਮਞ੍ਞਸ੍ਸ ਸਮਨਨ੍ਤਰਾ ਉਪ੍ਪਜ੍ਜਨ੍ਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਞ੍ਚਵਿਞ੍ਞਾਣਾ ਸਾਭੋਗਾ’’ਤਿ.

੫੮੫. ਚਕ੍ਖੁਵਿਞ੍ਞਾਣਂ ਸਾਭੋਗਨ੍ਤਿ? ਆਮਨ੍ਤਾ. ਚਕ੍ਖੁਵਿਞ੍ਞਾਣਂ ਸੁਞ੍ਞਤਂ ਆਰਬ੍ਭ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਕ੍ਖੁਵਿਞ੍ਞਾਣਂ ਸੁਞ੍ਞਤਂ ਆਰਬ੍ਭ ਉਪ੍ਪਜ੍ਜਤੀਤਿ? ਆਮਨ੍ਤਾ. ਚਕ੍ਖੁਞ੍ਚ ਪਟਿਚ੍ਚ ਸੁਞ੍ਞਤਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਕ੍ਖੁਞ੍ਚ ਪਟਿਚ੍ਚ ਸੁਞ੍ਞਤਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਆਮਨ੍ਤਾ. ‘‘ਚਕ੍ਖੁਞ੍ਚ ਪਟਿਚ੍ਚ ਸੁਞ੍ਞਤਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ…ਪੇ… ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਹਞ੍ਚਿ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਕ੍ਖੁਞ੍ਚ ਪਟਿਚ੍ਚ ਸੁਞ੍ਞਤਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ.

ਚਕ੍ਖੁਵਿਞ੍ਞਾਣਂ ਸਾਭੋਗਨ੍ਤਿ? ਆਮਨ੍ਤਾ. ਚਕ੍ਖੁਵਿਞ੍ਞਾਣਂ ਅਤੀਤਾਨਾਗਤਂ ਆਰਬ੍ਭ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਕ੍ਖੁਵਿਞ੍ਞਾਣਂ ਸਾਭੋਗਨ੍ਤਿ? ਆਮਨ੍ਤਾ. ਚਕ੍ਖੁਵਿਞ੍ਞਾਣਂ ਫਸ੍ਸਂ ਆਰਬ੍ਭ…ਪੇ… ਫੋਟ੍ਠਬ੍ਬਂ ਆਰਬ੍ਭ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਨੋਵਿਞ੍ਞਾਣਂ ਸਾਭੋਗਂ, ਮਨੋਵਿਞ੍ਞਾਣਂ ਸੁਞ੍ਞਤਂ ਆਰਬ੍ਭ ਉਪ੍ਪਜ੍ਜਤੀਤਿ? ਆਮਨ੍ਤਾ. ਚਕ੍ਖੁਵਿਞ੍ਞਾਣਂ ਸਾਭੋਗਂ, ਚਕ੍ਖੁਵਿਞ੍ਞਾਣਂ ਸੁਞ੍ਞਤਂ ਆਰਬ੍ਭ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਨੋਵਿਞ੍ਞਾਣਂ ਸਾਭੋਗਂ, ਮਨੋਵਿਞ੍ਞਾਣਂ ਅਤੀਤਾਨਾਗਤਂ ਆਰਬ੍ਭ ਉਪ੍ਪਜ੍ਜਤੀਤਿ? ਆਮਨ੍ਤਾ. ਚਕ੍ਖੁਵਿਞ੍ਞਾਣਂ ਸਾਭੋਗਂ, ਚਕ੍ਖੁਵਿਞ੍ਞਾਣਂ ਅਤੀਤਾਨਾਗਤਂ ਆਰਬ੍ਭ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਨੋਵਿਞ੍ਞਾਣਂ ਸਾਭੋਗਂ, ਮਨੋਵਿਞ੍ਞਾਣਂ ਫਸ੍ਸਂ ਆਰਬ੍ਭ…ਪੇ… ਫੋਟ੍ਠਬ੍ਬਂ ਆਰਬ੍ਭ ਉਪ੍ਪਜ੍ਜਤੀਤਿ? ਆਮਨ੍ਤਾ. ਚਕ੍ਖੁਵਿਞ੍ਞਾਣਂ ਸਾਭੋਗਂ, ਚਕ੍ਖੁਵਿਞ੍ਞਾਣਂ ਫਸ੍ਸਂ ਆਰਬ੍ਭ…ਪੇ… ਫੋਟ੍ਠਬ੍ਬਂ ਆਰਬ੍ਭ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੮੬. ਨ ਵਤ੍ਤਬ੍ਬਂ – ‘‘ਪਞ੍ਚਵਿਞ੍ਞਾਣਾ ਸਾਭੋਗਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਭਿਕ੍ਖੁ ਚਕ੍ਖੁਨਾ ਰੂਪਂ ਦਿਸ੍ਵਾ ਨਿਮਿਤ੍ਤਗ੍ਗਾਹੀ ਹੋਤਿ…ਪੇ… ਨ ਨਿਮਿਤ੍ਤਗ੍ਗਾਹੀ ਹੋਤਿ…ਪੇ… ਕਾਯੇਨ ਫੋਟ੍ਠਬ੍ਬਂ ਫੁਸਿਤ੍ਵਾ ਨਿਮਿਤ੍ਤਗ੍ਗਾਹੀ ਹੋਤਿ…ਪੇ… ਨ ਨਿਮਿਤ੍ਤਗ੍ਗਾਹੀ ਹੋਤੀ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਪਞ੍ਚਵਿਞ੍ਞਾਣਾ ਸਾਭੋਗਾਤਿ…ਪੇ….

ਸਾਭੋਗਾਤਿਕਥਾ ਨਿਟ੍ਠਿਤਾ.