(੯੨) ੯. ਨ ਯਥਾਚਿਤ੍ਤਸ੍ਸ ਵਾਚਾਤਿਕਥਾ

੫੬੪. ਨ ਯਥਾਚਿਤ੍ਤਸ੍ਸ ਵਾਚਾਤਿ? ਆਮਨ੍ਤਾ. ਅਫਸ੍ਸਕਸ੍ਸ ਵਾਚਾ ਅਵੇਦਨਕਸ੍ਸ ਵਾਚਾ ਅਸਞ੍ਞਕਸ੍ਸ ਵਾਚਾ ਅਚੇਤਨਕਸ੍ਸ ਵਾਚਾ ਅਚਿਤ੍ਤਕਸ੍ਸ ਵਾਚਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸਫਸ੍ਸਕਸ੍ਸ ਵਾਚਾ ਸਵੇਦਨਕਸ੍ਸ ਵਾਚਾ ਸਸਞ੍ਞਕਸ੍ਸ ਵਾਚਾ ਸਚੇਤਨਕਸ੍ਸ ਵਾਚਾ ਸਚਿਤ੍ਤਕਸ੍ਸ ਵਾਚਾਤਿ? ਆਮਨ੍ਤਾ. ਹਞ੍ਚਿ ਸਫਸ੍ਸਕਸ੍ਸ ਵਾਚਾ…ਪੇ… ਸਚਿਤ੍ਤਕਸ੍ਸ ਵਾਚਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

ਨ ਯਥਾਚਿਤ੍ਤਸ੍ਸ ਵਾਚਾਤਿ? ਆਮਨ੍ਤਾ. ਅਨਾਵਟ੍ਟੇਨ੍ਤਸ੍ਸ [ਅਨਾਵਟ੍ਟਨ੍ਤਸ੍ਸ (ਪੀ.), ਅਨਾਵਜ੍ਜਨ੍ਤਸ੍ਸ (ਸੀ. ਸ੍ਯਾ. ਕ.) ਕਥਾ. ੪੮੪ ਪਸ੍ਸਿਤਬ੍ਬਂ] ਵਾਚਾ…ਪੇ… ਅਨਾਭੋਗਸ੍ਸ ਵਾਚਾ…ਪੇ… ਅਪ੍ਪਣਿਦਹਨ੍ਤਸ੍ਸ ਵਾਚਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਆਵਟ੍ਟੇਨ੍ਤਸ੍ਸ ਵਾਚਾ ਆਭੋਗਸ੍ਸ ਵਾਚਾ…ਪੇ… ਪਣਿਦਹਨ੍ਤਸ੍ਸ ਵਾਚਾਤਿ? ਆਮਨ੍ਤਾ. ਹਞ੍ਚਿ ਆਵਟ੍ਟੇਨ੍ਤਸ੍ਸ ਵਾਚਾ ਆਭੋਗਸ੍ਸ ਵਾਚਾ ਪਣਿਦਹਨ੍ਤਸ੍ਸ ਵਾਚਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

ਨ ਯਥਾਚਿਤ੍ਤਸ੍ਸ ਵਾਚਾਤਿ? ਆਮਨ੍ਤਾ. ਨਨੁ ਵਾਚਾ ਚਿਤ੍ਤਸਮੁਟ੍ਠਾਨਾ ਚਿਤ੍ਤੇਨ ਸਹਜਾਤਾ ਚਿਤ੍ਤੇਨ ਸਹ ਏਕੁਪ੍ਪਾਦਾਤਿ? ਆਮਨ੍ਤਾ. ਹਞ੍ਚਿ ਵਾਚਾ ਚਿਤ੍ਤਸਮੁਟ੍ਠਾਨਾ ਚਿਤ੍ਤੇਨ ਸਹਜਾਤਾ ਚਿਤ੍ਤੇਨ ਸਹ ਏਕੁਪ੍ਪਾਦਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

ਨ ਯਥਾਚਿਤ੍ਤਸ੍ਸ ਵਾਚਾਤਿ? ਆਮਨ੍ਤਾ. ਨ ਭਣਿਤੁਕਾਮੋ ਭਣਤਿ, ਨ ਕਥੇਤੁਕਾਮੋ ਕਥੇਤਿ, ਨ ਆਲਪਿਤੁਕਾਮੋ ਆਲਪਤਿ, ਨ ਵੋਹਰਿਤੁਕਾਮੋ ਵੋਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਭਣਿਤੁਕਾਮੋ ਭਣਤਿ, ਕਥੇਤੁਕਾਮੋ ਕਥੇਤਿ, ਆਲਪਿਤੁਕਾਮੋ ਆਲਪਤਿ, ਵੋਹਰਿਤੁਕਾਮੋ ਵੋਹਰਤੀਤਿ? ਆਮਨ੍ਤਾ. ਹਞ੍ਚਿ ਭਣਿਤੁਕਾਮੋ ਭਣਤਿ, ਕਥੇਤੁਕਾਮੋ ਕਥੇਤਿ, ਆਲਪਿਤੁਕਾਮੋ ਆਲਪਤਿ, ਵੋਹਰਿਤੁਕਾਮੋ ਵੋਹਰਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

੫੬੫. ਨ ਵਤ੍ਤਬ੍ਬਂ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੋਚਿ ‘‘ਅਞ੍ਞਂ ਭਣਿਸ੍ਸਾਮੀ’’ਤਿ ਅਞ੍ਞਂ ਭਣਤਿ, ‘‘ਅਞ੍ਞਂ ਕਥੇਸ੍ਸਾਮੀ’’ਤਿ ਅਞ੍ਞਂ ਕਥੇਤਿ, ‘‘ਅਞ੍ਞਂ ਆਲਪਿਸ੍ਸਾਮੀ’’ਤਿ ਅਞ੍ਞਂ ਆਲਪਤਿ, ‘‘ਅਞ੍ਞਂ ਵੋਹਰਿਸ੍ਸਾਮੀ’’ਤਿ ਅਞ੍ਞਂ ਵੋਹਰਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੋਚਿ ‘‘ਅਞ੍ਞਂ ਭਣਿਸ੍ਸਾਮੀ’’ਤਿ ਅਞ੍ਞਂ ਭਣਤਿ,…ਪੇ… ‘‘ਅਞ੍ਞਂ ਵੋਹਰਿਸ੍ਸਾਮੀ’’ਤਿ ਅਞ੍ਞਂ ਵੋਹਰਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

ਨ ਯਥਾਚਿਤ੍ਤਸ੍ਸ ਵਾਚਾਤਿਕਥਾ ਨਿਟ੍ਠਿਤਾ.