੯. ਨਵਮਵਗ੍ਗੋ

(੯੦) ੭. ਵਿਤਕ੍ਕਾਨੁਪਤਿਤਕਥਾ

੫੬੨. ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਨ੍ਤਿ? ਆਮਨ੍ਤਾ. ਸਬ੍ਬਂ ਚਿਤ੍ਤਂ ਵਿਚਾਰਾਨੁਪਤਿਤਂ ਪੀਤਾਨੁਪਤਿਤਂ ਸੁਖਾਨੁਪਤਿਤਂ ਦੁਕ੍ਖਾਨੁਪਤਿਤਂ ਸੋਮਨਸ੍ਸਾਨੁਪਤਿਤਂ ਦੋਮਨਸ੍ਸਾਨੁਪਤਿਤਂ ਉਪੇਕ੍ਖਾਨੁਪਤਿਤਂ ਸਦ੍ਧਾਨੁਪਤਿਤਂ ਵੀਰਿਯਾਨੁਪਤਿਤਂ ਸਤਾਨੁਪਤਿਤਂ ਸਮਾਧਾਨੁਪਤਿਤਂ ਪਞ੍ਞਾਨੁਪਤਿਤਂ ਰਾਗਾਨੁਪਤਿਤਂ ਦੋਸਾਨੁਪਤਿਤਂ…ਪੇ… ਅਨੋਤ੍ਤਪ੍ਪਾਨੁਪਤਿਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਨ੍ਤਿ? ਆਮਨ੍ਤਾ. ਨਨੁ ਅਤ੍ਥਿ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤ’’ਨ੍ਤਿ.

ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਨ੍ਤਿ? ਆਮਨ੍ਤਾ. ਨਨੁ ਅਤ੍ਥਿ ਅਵਿਤਕ੍ਕੋ ਅਵਿਚਾਰੋ ਸਮਾਧੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਅਵਿਤਕ੍ਕੋ ਅਵਿਚਾਰੋ ਸਮਾਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤ’’ਨ੍ਤਿ. ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਨ੍ਤਿ? ਆਮਨ੍ਤਾ. ਨਨੁ ਤਯੋ ਸਮਾਧੀ ਵੁਤ੍ਤਾ ਭਗਵਤਾ – ਸਵਿਤਕ੍ਕੋ ਸਵਿਚਾਰੋ ਸਮਾਧਿ, ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ, ਅਵਿਤਕ੍ਕੋ ਅਵਿਚਾਰੋ ਸਮਾਧੀਤਿ [ਦੀ. ਨਿ. ੩.੩੦੫, ੩੫੩]? ਆਮਨ੍ਤਾ. ਹਞ੍ਚਿ ਤਯੋ ਸਮਾਧੀ ਵੁਤ੍ਤਾ ਭਗਵਤਾ – ਸਵਿਤਕ੍ਕੋ ਸਵਿਚਾਰੋ ਸਮਾਧਿ, ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ, ਅਵਿਤਕ੍ਕੋ ਅਵਿਚਾਰੋ ਸਮਾਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤ’’ਨ੍ਤਿ.

ਵਿਤਕ੍ਕਾਨੁਪਤਿਤਕਥਾ ਨਿਟ੍ਠਿਤਾ.