੮. ਅਟ੍ਠਮਵਗ੍ਗੋ

(੮੦) ੮. ਅਰੂਪੇ ਰੂਪਕਥਾ

੫੨੪. ਅਤ੍ਥਿ ਰੂਪਂ ਅਰੂਪੇਸੂਤਿ? ਆਮਨ੍ਤਾ. ਰੂਪਭਵੋ ਰੂਪਗਤਿ ਰੂਪਸਤ੍ਤਾਵਾਸੋ ਰੂਪਸਂਸਾਰੋ ਰੂਪਯੋਨਿ ਰੂਪਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਰੂਪਭਵੋ ਅਰੂਪਗਤਿ ਅਰੂਪਸਤ੍ਤਾਵਾਸੋ ਅਰੂਪਸਂਸਾਰੋ ਅਰੂਪਯੋਨਿ ਅਰੂਪਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਹਞ੍ਚਿ ਅਰੂਪਭਵੋ…ਪੇ… ਅਰੂਪਤ੍ਤਭਾਵਪਟਿਲਾਭੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਰੂਪਂ ਅਰੂਪੇਸੂ’’ਤਿ.

ਅਤ੍ਥਿ ਰੂਪਂ ਅਰੂਪੇਸੂਤਿ? ਆਮਨ੍ਤਾ. ਪਞ੍ਚਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਵਿਞ੍ਞਾਣਟ੍ਠਿਤਿ ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਚਤੁਵੋਕਾਰਭਵੋ…ਪੇ… ਅਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਹਞ੍ਚਿ ਚਤੁਵੋਕਾਰਭਵੋ ਗਤਿ…ਪੇ… ਅਤ੍ਤਭਾਵਪਟਿਲਾਭੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਰੂਪਂ ਅਰੂਪੇਸੂ’’ਤਿ.

੫੨੫. ਅਤ੍ਥਿ ਰੂਪਂ ਰੂਪਧਾਤੁਯਾ, ਸੋ ਚ ਰੂਪਭਵੋ ਰੂਪਗਤਿ ਰੂਪਸਤ੍ਤਾਵਾਸੋ ਰੂਪਸਂਸਾਰੋ ਰੂਪਯੋਨਿ ਰੂਪਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਅਤ੍ਥਿ ਰੂਪਂ ਅਰੂਪੇਸੁ, ਸੋ ਚ ਰੂਪਭਵੋ ਰੂਪਗਤਿ…ਪੇ… ਰੂਪਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਰੂਪਂ ਰੂਪਧਾਤੁਯਾ, ਸੋ ਚ ਪਞ੍ਚਵੋਕਾਰਭਵੋ ਗਤਿ…ਪੇ… ਅਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਅਤ੍ਥਿ ਰੂਪਂ ਅਰੂਪੇਸੁ, ਸੋ ਚ ਪਞ੍ਚਵੋਕਾਰਭਵੋ ਗਤਿ…ਪੇ… ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਅਤ੍ਥਿ ਰੂਪਂ ਅਰੂਪੇਸੁ, ਸੋ ਚ ਅਰੂਪਭਵੋ ਅਰੂਪਗਤਿ ਅਰੂਪਸਤ੍ਤਾਵਾਸੋ ਅਰੂਪਸਂਸਾਰੋ ਅਰੂਪਯੋਨਿ ਅਰੂਪਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਅਤ੍ਥਿ ਰੂਪਂ ਰੂਪਧਾਤੁਯਾ [ਅਰੂਪਧਾਤੁਯਾ (ਸਬ੍ਬਤ੍ਥ)], ਸੋ ਚ ਅਰੂਪਭਵੋ ਅਰੂਪਗਤਿ…ਪੇ… ਅਰੂਪਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਰੂਪਂ ਅਰੂਪੇਸੁ, ਸੋ ਚ ਚਤੁਵੋਕਾਰਭਵੋ ਗਤਿ…ਪੇ… ਅਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਅਤ੍ਥਿ ਰੂਪਂ ਰੂਪਧਾਤੁਯਾ [ਅਰੂਪਧਾਤੁਯਾ (ਸਬ੍ਬਤ੍ਥ)], ਸੋ ਚ ਚਤੁਵੋਕਾਰਭਵੋ ਗਤਿ…ਪੇ… ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੨੬. ਅਤ੍ਥਿ ਰੂਪਂ ਅਰੂਪੇਸੂਤਿ? ਆਮਨ੍ਤਾ. ਨਨੁ ਰੂਪਾਨਂ ਨਿਸ੍ਸਰਣਂ ਅਰੂਪਂ [ਇਤਿਵੁ. ੭੨; ਅ. ਨਿ. ੫.੨੦੦; ਦੀ. ਨਿ. ੩.੩੨੧] ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਰੂਪਾਨਂ ਨਿਸ੍ਸਰਣਂ ਅਰੂਪਂ [ਇਤਿਵੁ. ੭੨; ਅ. ਨਿ. ੫.੨੦੦; ਦੀ. ਨਿ. ੩.੩੨੧] ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਰੂਪਂ ਅਰੂਪੇਸੂ’’ਤਿ.

ਰੂਪਾਨਂ ਨਿਸ੍ਸਰਣਂ ਅਰੂਪਂ ਵੁਤ੍ਤਂ ਭਗਵਤਾ, ਅਤ੍ਥਿ ਰੂਪਂ ਅਰੂਪੇਸੂਤਿ? ਆਮਨ੍ਤਾ. ਕਾਮਾਨਂ ਨਿਸ੍ਸਰਣਂ ਨੇਕ੍ਖਮ੍ਮਂ ਵੁਤ੍ਤਂ ਭਗਵਤਾ, ਅਤ੍ਥਿ ਨੇਕ੍ਖਮ੍ਮੇਸੁ ਕਾਮਾ, ਅਤ੍ਥਿ ਅਨਾਸਵੇਸੁ ਆਸਵਾ, ਅਤ੍ਥਿ ਅਪਰਿਯਾਪਨ੍ਨੇਸੁ ਪਰਿਯਾਪਨ੍ਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰੂਪੇ ਰੂਪਕਥਾ ਨਿਟ੍ਠਿਤਾ.