੮. ਅਟ੍ਠਮਵਗ੍ਗੋ

(੭੮) ੬. ਅਰੂਪਧਾਤੁਕਥਾ

੫੧੭. ਅਰੂਪਿਨੋ ਧਮ੍ਮਾ ਅਰੂਪਧਾਤੂਤਿ? ਆਮਨ੍ਤਾ. ਵੇਦਨਾ ਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਵਿਞ੍ਞਾਣਟ੍ਠਿਤਿ ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਵੇਦਨੂਪਗਂ ਕਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਵੇਦਨੂਪਗਾ ਸਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾਯ ਸਤ੍ਤਾ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾਯ ਅਤ੍ਥਿ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾ ਚਤੁਵੋਕਾਰਭਵੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰੂਪਧਾਤੁ ਭਵੋ ਗਤਿ…ਪੇ… ਅਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਵੇਦਨਾ ਭਵੋ ਗਤਿ…ਪੇ… ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਅਰੂਪਧਾਤੂਪਗਂ ਕਮ੍ਮਨ੍ਤਿ? ਆਮਨ੍ਤਾ. ਅਤ੍ਥਿ ਵੇਦਨੂਪਗਂ ਕਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਅਰੂਪਧਾਤੂਪਗਾ ਸਤ੍ਤਾਤਿ? ਆਮਨ੍ਤਾ. ਅਤ੍ਥਿ ਵੇਦਨੂਪਗਾ ਸਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰੂਪਧਾਤੁਯਾ ਸਤ੍ਤਾ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤੀਤਿ? ਆਮਨ੍ਤਾ. ਵੇਦਨਾਯ ਸਤ੍ਤਾ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰੂਪਧਾਤੁਯਾ ਅਤ੍ਥਿ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਆਮਨ੍ਤਾ. ਵੇਦਨਾਯ ਅਤ੍ਥਿ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰੂਪਧਾਤੁ ਚਤੁਵੋਕਾਰਭਵੋਤਿ? ਆਮਨ੍ਤਾ. ਵੇਦਨਾ ਚਤੁਵੋਕਾਰਭਵੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੧੮. ਅਰੂਪਿਨੋ ਧਮ੍ਮਾ ਅਰੂਪਧਾਤੁ, ਕਾਮਧਾਤੁਯਾ ਅਤ੍ਥਿ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਆਮਨ੍ਤਾ. ਸਾਵ ਕਾਮਧਾਤੁ, ਸਾ ਅਰੂਪਧਾਤੂਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਾਵ ਕਾਮਧਾਤੁ, ਸਾ ਅਰੂਪਧਾਤੂਤਿ? ਆਮਨ੍ਤਾ. ਕਾਮਭਵੇਨ ਸਮਨ੍ਨਾਗਤੋ ਪੁਗ੍ਗਲੋ ਦ੍ਵੀਹਿ ਭਵੇਹਿ ਸਮਨ੍ਨਾਗਤੋ ਹੋਤਿ – ਕਾਮਭਵੇਨ ਚ ਅਰੂਪਭਵੇਨ ਚਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਿਨੋ ਧਮ੍ਮਾ ਰੂਪਧਾਤੁ, ਅਰੂਪਿਨੋ ਧਮ੍ਮਾ ਅਰੂਪਧਾਤੁ, ਕਾਮਧਾਤੁਯਾ ਅਤ੍ਥਿ ਰੂਪਂ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਆਮਨ੍ਤਾ. ਸਾਵ ਕਾਮਧਾਤੁ, ਸਾ ਰੂਪਧਾਤੁ, ਸਾ ਅਰੂਪਧਾਤੂਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਾਵ ਕਾਮਧਾਤੁ, ਸਾ ਰੂਪਧਾਤੁ, ਸਾ ਅਰੂਪਧਾਤੂਤਿ? ਆਮਨ੍ਤਾ. ਕਾਮਭਵੇਨ ਸਮਨ੍ਨਾਗਤੋ ਪੁਗ੍ਗਲੋ ਤੀਹਿ ਭਵੇਹਿ ਸਮਨ੍ਨਾਗਤੋ ਹੋਤਿ – ਕਾਮਭਵੇਨ ਚ ਰੂਪਭਵੇਨ ਚ ਅਰੂਪਭਵੇਨ ਚਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰੂਪਧਾਤੁਕਥਾ ਨਿਟ੍ਠਿਤਾ.