(੭੬) ੪. ਕਾਮਕਥਾ

੫੧੩. ਪਞ੍ਚੇਵਾਯਤਨਾ ਕਾਮਾਤਿ? ਆਮਨ੍ਤਾ. ਨਨੁ ਅਤ੍ਥਿ ਤਪ੍ਪਟਿਸਂਯੁਤ੍ਤੋ ਛਨ੍ਦੋਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਤਪ੍ਪਟਿਸਂਯੁਤ੍ਤੋ ਛਨ੍ਦੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਞ੍ਚੇਵਾਯਤਨਾ ਕਾਮਾ’’ਤਿ. ਨਨੁ ਅਤ੍ਥਿ ਤਪ੍ਪਟਿਸਂਯੁਤ੍ਤੋ ਰਾਗੋ ਤਪ੍ਪਟਿਸਂਯੁਤ੍ਤੋ ਛਨ੍ਦੋ ਤਪ੍ਪਟਿਸਂਯੁਤ੍ਤੋ ਛਨ੍ਦਰਾਗੋ ਤਪ੍ਪਟਿਸਂਯੁਤ੍ਤੋ ਸਙ੍ਕਪ੍ਪੋ ਤਪ੍ਪਟਿਸਂਯੁਤ੍ਤੋ ਰਾਗੋ ਤਪ੍ਪਟਿਸਂਯੁਤ੍ਤੋ ਸਙ੍ਕਪ੍ਪਰਾਗੋ ਤਪ੍ਪਟਿਸਂਯੁਤ੍ਤਾ ਪੀਤਿ ਤਪ੍ਪਟਿਸਂਯੁਤ੍ਤਂ ਸੋਮਨਸ੍ਸਂ ਤਪ੍ਪਟਿਸਂਯੁਤ੍ਤਂ ਪੀਤਿਸੋਮਨਸ੍ਸਨ੍ਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਤਪ੍ਪਟਿਸਂਯੁਤ੍ਤਂ ਪੀਤਿਸੋਮਨਸ੍ਸਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਞ੍ਚੇਵਾਯਤਨਾ ਕਾਮਾ’’ਤਿ.

੫੧੪. ਨ ਵਤ੍ਤਬ੍ਬਂ – ‘‘ਪਞ੍ਚੇਵਾਯਤਨਾ ਕਾਮਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਪਞ੍ਚਿਮੇ, ਭਿਕ੍ਖਵੇ, ਕਾਮਗੁਣਾ! ਕਤਮੇ ਪਞ੍ਚ? ਚਕ੍ਖੁਵਿਞ੍ਞੇਯ੍ਯਾ ਰੂਪਾ…ਪੇ… ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ – ਇਮੇ ਖੋ, ਭਿਕ੍ਖਵੇ, ਪਞ੍ਚ ਕਾਮਗੁਣਾ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਪਞ੍ਚੇਵਾਯਤਨਾ ਕਾਮਾਤਿ.

ਪਞ੍ਚੇਵਾਯਤਨਾ ਕਾਮਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਪਞ੍ਚਿਮੇ, ਭਿਕ੍ਖਵੇ, ਕਾਮਗੁਣਾ! ਕਤਮੇ ਪਞ੍ਚ? ਚਕ੍ਖੁਵਿਞ੍ਞੇਯ੍ਯਾ ਰੂਪਾ…ਪੇ… ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ – ਇਮੇ ਖੋ, ਭਿਕ੍ਖਵੇ, ਪਞ੍ਚ ਕਾਮਗੁਣਾ. ਅਪਿ ਚ, ਭਿਕ੍ਖਵੇ, ਨੇਤੇ ਕਾਮਾ ਕਾਮਗੁਣਾ ਨਾਮੇਤੇ ਅਰਿਯਸ੍ਸ ਵਿਨਯੇ ਵੁਚ੍ਚ’’ਨ੍ਤਿ –

‘‘ਸਙ੍ਕਪ੍ਪਰਾਗੋ ਪੁਰਿਸਸ੍ਸ ਕਾਮੋ,

ਨ ਤੇ ਕਾਮਾ ਯਾਨਿ ਚਿਤ੍ਰਾਨਿ ਲੋਕੇ;

ਸਙ੍ਕਪ੍ਪਰਾਗੋ ਪੁਰਿਸਸ੍ਸ ਕਾਮੋ,

ਤਿਟ੍ਠਨ੍ਤਿ ਚਿਤ੍ਰਾਨਿ ਤਥੇਵ ਲੋਕੇ;

ਅਥੇਤ੍ਥ ਧੀਰਾ ਵਿਨਯਨ੍ਤਿ ਛਨ੍ਦ’’ਨ੍ਤਿ [ਅ. ਨਿ. ੬.੬੩ ਨਿਬ੍ਬੇਧਿਕਸੁਤ੍ਤੇ].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਪਞ੍ਚੇਵਾਯਤਨਾ ਕਾਮਾ’’ਤਿ.

ਕਾਮਕਥਾ ਨਿਟ੍ਠਿਤਾ.