(੭੫) ੩. ਕਾਮਗੁਣਕਥਾ

੫੧੦. ਪਞ੍ਚੇਵ ਕਾਮਗੁਣਾ ਕਾਮਧਾਤੂਤਿ? ਆਮਨ੍ਤਾ. ਨਨੁ ਅਤ੍ਥਿ ਤਪ੍ਪਟਿਸਞ੍ਞੁਤ੍ਤੋ ਛਨ੍ਦੋਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਤਪ੍ਪਟਿਸਞ੍ਞੁਤ੍ਤੋ ਛਨ੍ਦੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਞ੍ਚੇਵ ਕਾਮਗੁਣਾ ਕਾਮਧਾਤੂ’’ਤਿ. ਨਨੁ ਅਤ੍ਥਿ ਤਪ੍ਪਟਿਸਞ੍ਞੁਤ੍ਤੋ ਰਾਗੋ ਤਪ੍ਪਟਿਸਞ੍ਞੁਤ੍ਤੋ ਛਨ੍ਦੋ ਤਪ੍ਪਟਿਸਞ੍ਞੁਤ੍ਤੋ ਛਨ੍ਦਰਾਗੋ ਤਪ੍ਪਟਿਸਞ੍ਞੁਤ੍ਤੋ ਸਙ੍ਕਪ੍ਪੋ ਤਪ੍ਪਟਿਸਞ੍ਞੁਤ੍ਤੋ ਰਾਗੋ ਤਪ੍ਪਟਿਸਞ੍ਞੁਤ੍ਤੋ ਸਙ੍ਕਪ੍ਪਰਾਗੋ ਤਪ੍ਪਟਿਸਞ੍ਞੁਤ੍ਤਾ ਪੀਤਿ ਤਪ੍ਪਟਿਸਞ੍ਞੁਤ੍ਤਂ ਸੋਮਨਸ੍ਸਂ ਤਪ੍ਪਟਿਸਞ੍ਞੁਤ੍ਤਂ ਪੀਤਿਸੋਮਨਸ੍ਸਨ੍ਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਤਪ੍ਪਟਿਸਞ੍ਞੁਤ੍ਤਂ ਪੀਤਿਸੋਮਨਸ੍ਸਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਞ੍ਚੇਵ ਕਾਮਗੁਣਾ ਕਾਮਧਾਤੂ’’ਤਿ.

ਪਞ੍ਚੇਵ ਕਾਮਗੁਣਾ ਕਾਮਧਾਤੂਤਿ? ਆਮਨ੍ਤਾ. ਮਨੁਸ੍ਸਾਨਂ ਚਕ੍ਖੁ ਨ ਕਾਮਧਾਤੂਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਨੁਸ੍ਸਾਨਂ ਸੋਤਂ…ਪੇ… ਮਨੁਸ੍ਸਾਨਂ ਘਾਨਂ…ਪੇ… ਮਨੁਸ੍ਸਾਨਂ ਜਿਵ੍ਹਾ…ਪੇ… ਮਨੁਸ੍ਸਾਨਂ ਕਾਯੋ…ਪੇ… ਮਨੁਸ੍ਸਾਨਂ ਮਨੋ ਨ ਕਾਮਧਾਤੂਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਨੁਸ੍ਸਾਨਂ ਮਨੋ ਨ ਕਾਮਧਾਤੂਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਪਞ੍ਚ ਕਾਮਗੁਣਾ ਲੋਕੇ, ਮਨੋਚ੍ਛਟ੍ਠਾ ਪਵੇਦਿਤਾ;

ਏਤ੍ਥ ਛਨ੍ਦਂ ਵਿਰਾਜੇਤ੍ਵਾ, ਏਵਂ ਦੁਕ੍ਖਾ ਪਮੁਚ੍ਚਤੀ’’ਤਿ [ਸੁ. ਨਿ. ੧੭੩; ਸਂ. ਨਿ. ੧.੩੦].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਮਨੁਸ੍ਸਾਨਂ ਮਨੋ ਨ ਕਾਮਧਾਤੂ’’ਤਿ.

੫੧੧. ਪਞ੍ਚੇਵ ਕਾਮਗੁਣਾ ਕਾਮਧਾਤੂਤਿ? ਆਮਨ੍ਤਾ. ਕਾਮਗੁਣਾ ਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਵਿਞ੍ਞਾਣਟ੍ਠਿਤਿ ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਕਾਮਗੁਣੂਪਗਂ ਕਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਕਾਮਗੁਣੂਪਗਾ ਸਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਗੁਣੇ ਸਤ੍ਤਾ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਗੁਣੇ ਅਤ੍ਥਿ ਰੂਪਂ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਗੁਣਾ ਪਞ੍ਚਵੋਕਾਰਭਵੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਗੁਣੇ ਸਮ੍ਮਾਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ, ਪਚ੍ਚੇਕਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ, ਸਾਵਕਯੁਗਂ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਧਾਤੁ ਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਵਿਞ੍ਞਾਣਟ੍ਠਿਤਿ ਅਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਕਾਮਗੁਣਾ ਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਵਿਞ੍ਞਾਣਟ੍ਠਿਤਿ ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਕਾਮਧਾਤੂਪਗਂ ਕਮ੍ਮਨ੍ਤਿ? ਆਮਨ੍ਤਾ. ਅਤ੍ਥਿ ਕਾਮਗੁਣੂਪਗਂ ਕਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਕਾਮਧਾਤੂਪਗਾ ਸਤ੍ਤਾਤਿ? ਆਮਨ੍ਤਾ. ਅਤ੍ਥਿ ਕਾਮਗੁਣੂਪਗਾ ਸਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਧਾਤੁਯਾ ਸਤ੍ਤਾ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤੀਤਿ? ਆਮਨ੍ਤਾ. ਕਾਮਗੁਣੇ ਸਤ੍ਤਾ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਕਾਮਧਾਤੁਯਾ ਅਤ੍ਥਿ ਰੂਪਂ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਆਮਨ੍ਤਾ. ਕਾਮਗੁਣੇ ਅਤ੍ਥਿ ਰੂਪਂ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਧਾਤੁ ਪਞ੍ਚਵੋਕਾਰਭਵੋਤਿ? ਆਮਨ੍ਤਾ. ਕਾਮਗੁਣਾ ਪਞ੍ਚਵੋਕਾਰਭਵੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਧਾਤੁਯਾ ਸਮ੍ਮਾਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ, ਪਚ੍ਚੇਕਸਬੁਦ੍ਧਾ ਉਪ੍ਪਜ੍ਜਨ੍ਤਿ, ਸਾਵਕਯੁਗਂ ਉਪ੍ਪਜ੍ਜਤੀਤਿ? ਆਮਨ੍ਤਾ. ਕਾਮਗੁਣੇ ਸਮ੍ਮਾਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ, ਪਚ੍ਚੇਕਸਮ੍ਬੁਦ੍ਧਾ ਉਪ੍ਪਜ੍ਜਨ੍ਤਿ, ਸਾਵਕਯੁਗਂ ਉਪ੍ਪਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੧੨. ਨ ਵਤ੍ਤਬ੍ਬਂ – ‘‘ਪਞ੍ਚੇਵ ਕਾਮਗੁਣਾ ਕਾਮਧਾਤੂ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਪਞ੍ਚਿਮੇ, ਭਿਕ੍ਖਵੇ, ਕਾਮਗੁਣਾ! ਕਤਮੇ ਪਞ੍ਚ? ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਸੋਤਵਿਞ੍ਞੇਯ੍ਯਾ ਸਦ੍ਦਾ…ਪੇ… ਘਾਨਵਿਞ੍ਞੇਯ੍ਯਾ ਗਨ੍ਧਾ…ਪੇ… ਜਿਵ੍ਹਾਵਿਞ੍ਞੇਯ੍ਯਾ ਰਸਾ…ਪੇ… ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ – ਇਮੇ ਖੋ, ਭਿਕ੍ਖਵੇ, ਪਞ੍ਚ ਕਾਮਗੁਣਾ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਪਞ੍ਚੇਵ ਕਾਮਗੁਣਾ ਕਾਮਧਾਤੂਤਿ.

ਕਾਮਗੁਣਕਥਾ ਨਿਟ੍ਠਿਤਾ.