(੬੮) ੬. ਇਤੋਦਿਨ੍ਨਕਥਾ

੪੮੮. ਇਤੋ ਦਿਨ੍ਨੇਨ ਤਤ੍ਥ ਯਾਪੇਨ੍ਤੀਤਿ? ਆਮਨ੍ਤਾ. ਇਤੋ ਚੀਵਰਂ ਦੇਨ੍ਤਿ ਤਂ ਚੀਵਰਂ ਤਤ੍ਥ ਪਰਿਭੁਞ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਇਤੋ ਪਿਣ੍ਡਪਾਤਂ ਦੇਨ੍ਤਿ, ਇਤੋ ਸੇਨਾਸਨਂ ਦੇਨ੍ਤਿ, ਇਤੋ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦੇਨ੍ਤਿ, ਇਤੋ ਖਾਦਨੀਯਂ ਦੇਨ੍ਤਿ, ਇਤੋ ਭੋਜਨੀਯਂ ਦੇਨ੍ਤਿ, ਇਤੋ ਪਾਨੀਯਂ ਦੇਨ੍ਤਿ; ਤਂ ਪਾਨੀਯਂ ਤਤ੍ਥ ਪਰਿਭੁਞ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਇਤੋ ਦਿਨ੍ਨੇਨ ਤਤ੍ਥ ਯਾਪੇਨ੍ਤੀਤਿ? ਆਮਨ੍ਤਾ. ਅਞ੍ਞੋ ਅਞ੍ਞਸ੍ਸ ਕਾਰਕੋ ਪਰਕਤਂ ਸੁਖਦੁਕ੍ਖਂ ਅਞ੍ਞੋ ਕਰੋਤਿ, ਅਞ੍ਞੋ ਪਟਿਸਂਵੇਦੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੮੯. ਨ ਵਤ੍ਤਬ੍ਬਂ – ‘‘ਇਤੋ ਦਿਨ੍ਨੇਨ ਤਤ੍ਥ ਯਾਪੇਨ੍ਤੀ’’ਤਿ? ਆਮਨ੍ਤਾ. ਨਨੁ ਪੇਤਾ ਅਤ੍ਤਨੋ ਅਤ੍ਥਾਯ ਦਾਨਂ ਦੇਨ੍ਤਂ ਅਨੁਮੋਦੇਨ੍ਤਿ, ਚਿਤ੍ਤਂ ਪਸਾਦੇਨ੍ਤਿ, ਪੀਤਿਂ ਉਪ੍ਪਾਦੇਨ੍ਤਿ, ਸੋਮਨਸ੍ਸਂ ਪਟਿਲਭਨ੍ਤੀਤਿ? ਆਮਨ੍ਤਾ. ਹਞ੍ਚਿ ਪੇਤਾ ਅਤ੍ਤਨੋ ਅਤ੍ਥਾਯ ਦਾਨਂ ਦੇਨ੍ਤਂ ਅਨੁਮੋਦੇਨ੍ਤਿ, ਚਿਤ੍ਤਂ ਪਸਾਦੇਨ੍ਤਿ, ਪੀਤਿਂ ਉਪ੍ਪਾਦੇਨ੍ਤਿ, ਸੋਮਨਸ੍ਸਂ ਪਟਿਲਭਨ੍ਤਿ; ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਇਤੋ ਦਿਨ੍ਨੇਨ ਤਤ੍ਥ ਯਾਪੇਨ੍ਤੀ’’ਤਿ.

੪੯੦. ਨ ਵਤ੍ਤਬ੍ਬਂ – ‘‘ਇਤੋ ਦਿਨ੍ਨੇਨ ਤਤ੍ਥ ਯਾਪੇਨ੍ਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਉਨ੍ਨਮੇ ਉਦਕਂ ਵੁਟ੍ਠਂ, ਯਥਾਨਿਨ੍ਨਂ ਪਵਤ੍ਤਤਿ;

ਏਵਮੇਵ ਇਤੋ ਦਿਨ੍ਨਂ, ਪੇਤਾਨਂ ਉਪਕਪ੍ਪਤਿ.

‘‘ਯਥਾ ਵਾਰਿਵਹਾ ਪੂਰਾ, ਪਰਿਪੂਰੇਨ੍ਤਿ ਸਾਗਰਂ;

ਏਵਮੇਵ ਇਤੋ ਦਿਨ੍ਨਂ, ਪੇਤਾਨਂ ਉਪਕਪ੍ਪਤਿ.

‘‘ਨ ਹਿ ਤਤ੍ਥ ਕਸੀ ਅਤ੍ਥਿ, ਗੋਰਕ੍ਖੇਤ੍ਥ ਨ ਵਿਜ੍ਜਤਿ;

ਵਣਿਜ੍ਜਾ ਤਾਦਿਸੀ ਨਤ੍ਥਿ, ਹਿਰਞ੍ਞੇਨ ਕਯਾਕਯਂ [ਕਯਕ੍ਕਯਂ (ਸੀ. ਪੀ.)];

ਇਤੋ ਦਿਨ੍ਨੇਨ ਯਾਪੇਨ੍ਤਿ, ਪੇਤਾ ਕਾਲਙ੍ਕਤਾ ਤਹਿ’’ਨ੍ਤਿ [ਖੁ. ਪਾ. ੭.੬; ਪੇ. ਵ. ੧੯].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਇਤੋ ਦਿਨ੍ਨੇਨ ਤਤ੍ਥ ਯਾਪੇਨ੍ਤੀਤਿ.

੪੯੧. ਨ ਵਤ੍ਤਬ੍ਬਂ – ‘‘ਇਤੋ ਦਿਨ੍ਨੇਨ ਤਤ੍ਥ ਯਾਪੇਨ੍ਤੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਪਞ੍ਚਿਮਾਨਿ, ਭਿਕ੍ਖਵੇ, ਠਾਨਾਨਿ ਸਮ੍ਪਸ੍ਸਨ੍ਤਾ ਮਾਤਾਪਿਤਰੋ ਪੁਤ੍ਤਂ ਇਚ੍ਛਨ੍ਤਿ ਕੁਲੇ ਜਾਯਮਾਨਂ! ਕਤਮਾਨਿ ਪਞ੍ਚ? ਭਟੋ ਵਾ ਨੋ ਭਰਿਸ੍ਸਤਿ, ਕਿਚ੍ਚਂ ਵਾ ਨੋ ਕਰਿਸ੍ਸਤਿ, ਕੁਲਵਂਸੋ ਚਿਰਂ ਠਸ੍ਸਤਿ, ਦਾਯਜ੍ਜਂ ਪਟਿਪਜ੍ਜਿਸ੍ਸਤਿ, ਅਥ ਵਾ ਪਨ ਪੇਤਾਨਂ ਕਾਲਙ੍ਕਤਾਨਂ ਦਕ੍ਖਿਣਂ ਅਨੁਪ੍ਪਦਸ੍ਸਤਿ – ਇਮਾਨਿ ਖੋ, ਭਿਕ੍ਖਵੇ, ਪਞ੍ਚ ਠਾਨਾਨਿ ਸਮ੍ਪਸ੍ਸਨ੍ਤਾ ਮਾਤਾਪਿਤਰੋ ਪੁਤ੍ਤਂ ਇਚ੍ਛਨ੍ਤਿ ਕੁਲੇ ਜਾਯਮਾਨ’’ਨ੍ਤਿ.

‘‘ਪਞ੍ਚ ਠਾਨਾਨਿ ਸਮ੍ਪਸ੍ਸਂ, ਪੁਤ੍ਤਂ ਇਚ੍ਛਨ੍ਤਿ ਪਣ੍ਡਿਤਾ;

ਭਟੋ ਵਾ ਨੋ ਭਰਿਸ੍ਸਤਿ, ਕਿਚ੍ਚਂ ਵਾ ਨੋ ਕਰਿਸ੍ਸਤਿ.

‘‘ਕੁਲਵਂਸੋ ਚਿਰਂ ਤਿਟ੍ਠੇ, ਦਾਯਜ੍ਜਂ ਪਟਿਪਜ੍ਜਤਿ;

ਅਥ ਵਾ ਪਨ ਪੇਤਾਨਂ, ਦਕ੍ਖਿਣਂ ਅਨੁਪ੍ਪਦਸ੍ਸਤਿ.

‘‘ਠਾਨਾਨੇਤਾਨਿ ਸਮ੍ਪਸ੍ਸਂ, ਪੁਤ੍ਤਂ ਇਚ੍ਛਨ੍ਤਿ ਪਣ੍ਡਿਤਾ;

ਤਸ੍ਮਾ ਸਨ੍ਤੋ ਸਪ੍ਪੁਰਿਸਾ, ਕਤਞ੍ਞੂ ਕਤਵੇਦਿਨੋ.

‘‘ਭਰਨ੍ਤਿ ਮਾਤਾਪਿਤਰੋ, ਪੁਬ੍ਬੇ ਕਤਮਨੁਸ੍ਸਰਂ;

ਕਰੋਨ੍ਤਿ ਤੇਸਂ ਕਿਚ੍ਚਾਨਿ, ਯਥਾ ਤਂ ਪੁਬ੍ਬਕਾਰਿਨਂ.

‘‘ਓਵਾਦਕਾਰੀ ਭਟਪੋਸੀ, ਕੁਲਵਂਸਂ ਅਹਾਪਯਂ;

ਸਦ੍ਧੋ ਸੀਲੇਨ ਸਮ੍ਪਨ੍ਨੋ, ਪੁਤ੍ਤੋ ਹੋਤਿ ਪਸਂਸਿਯੋ’’ਤਿ [ਅ. ਨਿ. ੫.੩੧].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਇਤੋ ਦਿਨ੍ਨੇਨ ਤਤ੍ਥ ਯਾਪੇਨ੍ਤੀਤਿ.

ਇਤੋ ਦਿਨ੍ਨਕਥਾ ਨਿਟ੍ਠਿਤਾ.