(੩੫) ੩. ਅਨਾਸਵਕਥਾ

੩੯੧. ਅਰਹਤੋ ਸਬ੍ਬੇ ਧਮ੍ਮਾ ਅਨਾਸਵਾਤਿ? ਆਮਨ੍ਤਾ. ਮਗ੍ਗੋ ਫਲਂ ਨਿਬ੍ਬਾਨਂ, ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ, ਸਕਦਾਗਾਮਿਮਗ੍ਗੋ ਸਕਦਾਗਾਮਿਫਲਂ, ਅਨਾਗਾਮਿਮਗ੍ਗੋ ਅਨਾਗਾਮਿਫਲਂ, ਅਰਹਤ੍ਤਮਗ੍ਗੋ ਅਰਹਤ੍ਤਫਲਂ, ਸਤਿਪਟ੍ਠਾਨਂ ਸਮ੍ਮਪ੍ਪਧਾਨਂ ਇਦ੍ਧਿਪਾਦੋ ਇਨ੍ਦ੍ਰਿਯਂ ਬਲਂ ਬੋਜ੍ਝਙ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰਹਤੋ ਸਬ੍ਬੇ ਧਮ੍ਮਾ ਅਨਾਸਵਾਤਿ? ਆਮਨ੍ਤਾ. ਅਰਹਤੋ ਚਕ੍ਖੁਂ ਅਨਾਸਵਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਅਰਹਤੋ ਚਕ੍ਖੁਂ ਅਨਾਸਵਨ੍ਤਿ? ਆਮਨ੍ਤਾ. ਮਗ੍ਗੋ ਫਲਂ ਨਿਬ੍ਬਾਨਂ, ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ…ਪੇ… ਬੋਜ੍ਝਙ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰਹਤੋ ਸੋਤਂ…ਪੇ… ਅਰਹਤੋ ਘਾਨਂ… ਅਰਹਤੋ ਜਿਵ੍ਹਾ… ਅਰਹਤੋ ਕਾਯੋ ਅਨਾਸਵੋਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਅਰਹਤੋ ਕਾਯੋ ਅਨਾਸਵੋਤਿ? ਆਮਨ੍ਤਾ. ਮਗ੍ਗੋ ਫਲਂ ਨਿਬ੍ਬਾਨਂ, ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ…ਪੇ… ਬੋਜ੍ਝਙ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰਹਤੋ ਕਾਯੋ ਅਨਾਸਵੋਤਿ? ਆਮਨ੍ਤਾ. ਅਰਹਤੋ ਕਾਯੋ ਪਗ੍ਗਹਨਿਗ੍ਗਹੁਪਗੋ ਛੇਦਨਭੇਦਨੁਪਗੋ ਕਾਕੇਹਿ ਗਿਜ੍ਝੇਹਿ ਕੁਲਲੇਹਿ ਸਾਧਾਰਣੋਤਿ? ਆਮਨ੍ਤਾ. ਅਨਾਸਵੋ ਧਮ੍ਮੋ ਪਗ੍ਗਹਨਿਗ੍ਗਹੁਪਗੋ ਛੇਦਨਭੇਦਨੁਪਗੋ ਕਾਕੇਹਿ ਗਿਜ੍ਝੇਹਿ ਕੁਲਲੇਹਿ ਸਾਧਾਰਣੋਤਿ? ਨ ਹੇਵਂ ਵਤ੍ਤਬ੍ਬੇ …ਪੇ….

ਅਰਹਤੋ ਕਾਯੇ ਵਿਸਂ ਕਮੇਯ੍ਯ, ਸਤ੍ਥਂ ਕਮੇਯ੍ਯ, ਅਗ੍ਗਿ ਕਮੇਯ੍ਯਾਤਿ? ਆਮਨ੍ਤਾ. ਅਨਾਸਵੇ ਧਮ੍ਮੇ ਵਿਸਂ ਕਮੇਯ੍ਯ, ਸਤ੍ਥਂ ਕਮੇਯ੍ਯ, ਅਗ੍ਗਿ ਕਮੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਲਬ੍ਭਾ ਅਰਹਤੋ ਕਾਯੋ ਅਦ੍ਦੁਬਨ੍ਧਨੇਨ ਬਨ੍ਧਿਤੁਂ, ਰਜ੍ਜੁਬਨ੍ਧਨੇਨ ਬਨ੍ਧਿਤੁਂ, ਸਙ੍ਖਲਿਕਬਨ੍ਧਨੇਨ ਬਨ੍ਧਿਤੁਂ, ਗਾਮਬਨ੍ਧਨੇਨ ਬਨ੍ਧਿਤੁਂ, ਨਿਗਮਬਨ੍ਧਨੇਨ ਬਨ੍ਧਿਤੁਂ, ਨਗਰਬਨ੍ਧਨੇਨ ਬਨ੍ਧਿਤੁਂ, ਜਨਪਦਬਨ੍ਧਨੇਨ ਬਨ੍ਧਿਤੁਂ, ਕਣ੍ਠਪਞ੍ਚਮੇਹਿ ਬਨ੍ਧਨੇਹਿ ਬਨ੍ਧਿਤੁਨ੍ਤਿ? ਆਮਨ੍ਤਾ. ਲਬ੍ਭਾ ਅਨਾਸਵੋ ਧਮ੍ਮੋ ਅਦ੍ਦੁਬਨ੍ਧਨੇਨ ਬਨ੍ਧਿਤੁਂ, ਰਜ੍ਜੁਬਨ੍ਧਨੇਨ ਬਨ੍ਧਿਤੁਂ, ਸਙ੍ਖਲਿਕਬਨ੍ਧਨੇਨ ਬਨ੍ਧਿਤੁਂ, ਗਾਮਨਿਗਮਨਗਰਜਨਪਦਬਨ੍ਧਨੇਨ ਬਨ੍ਧਿਤੁਂ, ਕਣ੍ਠਪਞ੍ਚਮੇਹਿ ਬਨ੍ਧਨੇਹਿ ਬਨ੍ਧਿਤੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੯੨. ਯਦਿ ਅਰਹਾ ਪੁਥੁਜ੍ਜਨਸ੍ਸ ਚੀਵਰਂ ਦੇਤਿ, ਅਨਾਸਵਂ ਹੁਤ੍ਵਾ ਸਾਸਵਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਸਵਂ ਹੁਤ੍ਵਾ ਸਾਸਵਂ ਹੋਤੀਤਿ? ਆਮਨ੍ਤਾ. ਤਞ੍ਞੇਵ ਅਨਾਸਵਂ ਤਂ ਸਾਸਵਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਞ੍ਞੇਵ ਅਨਾਸਵਂ ਤਂ ਸਾਸਵਨ੍ਤਿ? ਆਮਨ੍ਤਾ. ਮਗ੍ਗੋ ਅਨਾਸਵੋ ਹੁਤ੍ਵਾ ਸਾਸਵੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਫਲਂ… ਸਤਿਪਟ੍ਠਾਨਂ… ਸਮ੍ਮਪ੍ਪਧਾਨਂ… ਇਦ੍ਧਿਪਾਦੋ… ਇਨ੍ਦ੍ਰਿਯਂ… ਬਲਂ… ਬੋਜ੍ਝਙ੍ਗੋ ਅਨਾਸਵੋ ਹੁਤ੍ਵਾ ਸਾਸਵੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਯਦਿ ਅਰਹਾ ਪੁਥੁਜ੍ਜਨਸ੍ਸ ਪਿਣ੍ਡਪਾਤਂ ਦੇਤਿ, ਸੇਨਾਸਨਂ ਦੇਤਿ, ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦੇਤਿ, ਅਨਾਸਵੋ ਹੁਤ੍ਵਾ ਸਾਸਵੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਸਵੋ ਹੁਤ੍ਵਾ ਸਾਸਵੋ ਹੋਤੀਤਿ? ਆਮਨ੍ਤਾ. ਤਞ੍ਞੇਵ ਅਨਾਸਵਂ ਤਂ ਸਾਸਵਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਞ੍ਞੇਵ ਅਨਾਸਵਂ ਤਂ ਸਾਸਵਨ੍ਤਿ? ਆਮਨ੍ਤਾ. ਮਗ੍ਗੋ ਅਨਾਸਵੋ ਹੁਤ੍ਵਾ ਸਾਸਵੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਫਲਂ… ਸਤਿਪਟ੍ਠਾਨਂ… ਸਮ੍ਮਪ੍ਪਧਾਨਂ… ਇਦ੍ਧਿਪਾਦੋ… ਇਨ੍ਦ੍ਰਿਯਂ… ਬਲਂ… ਬੋਜ੍ਝਙ੍ਗੋ ਅਨਾਸਵੋ ਹੁਤ੍ਵਾ ਸਾਸਵੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਯਦਿ ਪੁਥੁਜ੍ਜਨੋ ਅਰਹਤੋ ਚੀਵਰਂ ਦੇਤਿ, ਸਾਸਵਂ ਹੁਤ੍ਵਾ ਅਨਾਸਵਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਾਸਵਂ ਹੁਤ੍ਵਾ ਅਨਾਸਵਂ ਹੋਤੀਤਿ? ਆਮਨ੍ਤਾ. ਤਞ੍ਞੇਵ ਸਾਸਵਂ ਤਂ ਅਨਾਸਵਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਞ੍ਞੇਵ ਸਾਸਵਂ ਤਂ ਅਨਾਸਵਨ੍ਤਿ? ਆਮਨ੍ਤਾ. ਰਾਗੋ ਸਾਸਵੋ ਹੁਤ੍ਵਾ ਅਨਾਸਵੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੋਸੋ…ਪੇ… ਮੋਹੋ…ਪੇ… ਅਨੋਤ੍ਤਪ੍ਪਂ ਸਾਸਵਂ ਹੁਤ੍ਵਾ ਅਨਾਸਵਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਯਦਿ ਪੁਥੁਜ੍ਜਨੋ ਅਰਹਤੋ ਪਿਣ੍ਡਪਾਤਂ ਦੇਤਿ, ਸੇਨਾਸਨਂ ਦੇਤਿ, ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦੇਤਿ, ਸਾਸਵੋ ਹੁਤ੍ਵਾ ਅਨਾਸਵੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਾਸਵੋ ਹੁਤ੍ਵਾ ਅਨਾਸਵੋ ਹੋਤੀਤਿ? ਆਮਨ੍ਤਾ. ਤਞ੍ਞੇਵ ਸਾਸਵਂ ਤਂ ਅਨਾਸਵਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਞ੍ਞੇਵ ਸਾਸਵਂ ਤਂ ਅਨਾਸਵਨ੍ਤਿ? ਆਮਨ੍ਤਾ. ਰਾਗੋ ਸਾਸਵੋ ਹੁਤ੍ਵਾ ਅਨਾਸਵੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੋਸੋ…ਪੇ… ਮੋਹੋ…ਪੇ… ਅਨੋਤ੍ਤਪ੍ਪਂ ਸਾਸਵਂ ਹੁਤ੍ਵਾ ਅਨਾਸਵਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ – ‘‘ਅਰਹਤੋ ਸਬ੍ਬੇ ਧਮ੍ਮਾ ਅਨਾਸਵਾ’’ਤਿ? ਆਮਨ੍ਤਾ. ਨਨੁ ਅਰਹਾ ਅਨਾਸਵੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਅਨਾਸਵੋ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਰਹਤੋ ਸਬ੍ਬੇ ਧਮ੍ਮਾ ਅਨਾਸਵਾ’’ਤਿ.

ਅਨਾਸਵਕਥਾ ਨਿਟ੍ਠਿਤਾ.