(੩੩) ੧. ਗਿਹਿਸ੍ਸ ਅਰਹਾਤਿਕਥਾ

੩੮੭. ਗਿਹਿਸ੍ਸ ਅਰਹਾਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਗਿਹਿਸਂਯੋਜਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਅਰਹਤੋ ਗਿਹਿਸਂਯੋਜਨਨ੍ਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਅਰਹਤੋ ਗਿਹਿਸਂਯੋਜਨਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਗਿਹਿਸ੍ਸ ਅਰਹਾ’’ਤਿ.

ਗਿਹਿਸ੍ਸ ਅਰਹਾਤਿ? ਆਮਨ੍ਤਾ. ਨਨੁ ਅਰਹਤੋ ਗਿਹਿਸਂਯੋਜਨਂ ਪਹੀਨਂ ਉਚ੍ਛਿਨ੍ਨਮੂਲਂ ਤਾਲਾਵਤ੍ਥੁਕਤਂ ਅਨਭਾਵਙ੍ਕਤਂ ਆਯਤਿਂ ਅਨੁਪ੍ਪਾਦਧਮ੍ਮਨ੍ਤਿ? ਆਮਨ੍ਤਾ. ਹਞ੍ਚਿ ਅਰਹਤੋ ਗਿਹਿਸਂਯੋਜਨਂ ਪਹੀਨਂ ਉਚ੍ਛਿਨ੍ਨਮੂਲਂ ਤਾਲਾਵਤ੍ਥੁਕਤਂ ਅਨਭਾਵਙ੍ਕਤਂ ਆਯਤਿਂ ਅਨੁਪ੍ਪਾਦਧਮ੍ਮਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਗਿਹਿਸ੍ਸ ਅਰਹਾ’’ਤਿ.

ਗਿਹਿਸ੍ਸ ਅਰਹਾਤਿ? ਆਮਨ੍ਤਾ. ਅਤ੍ਥਿ ਕੋਚਿ ਗਿਹੀ ਗਿਹਿਸਂਯੋਜਨਂ ਅਪ੍ਪਹਾਯ ਦਿਟ੍ਠੇਵ ਧਮ੍ਮੇ ਦੁਕ੍ਖਸ੍ਸਨ੍ਤਕਰੋਤਿ [ਮ. ਨਿ. ੨.੧੮੬]? ਨਤ੍ਥਿ. ਹਞ੍ਚਿ ਨਤ੍ਥਿ ਕੋਚਿ ਗਿਹੀ ਗਿਹਿਸਂਯੋਜਨਂ ਅਪ੍ਪਹਾਯ ਦਿਟ੍ਠੇਵ ਧਮ੍ਮੇ ਦੁਕ੍ਖਸ੍ਸਨ੍ਤਕਰੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਗਿਹਿਸ੍ਸ ਅਰਹਾ’’ਤਿ.

ਗਿਹਿਸ੍ਸ ਅਰਹਾਤਿ? ਆਮਨ੍ਤਾ. ਨਨੁ ਵਚ੍ਛਗੋਤ੍ਤੋ ਪਰਿਬ੍ਬਾਜਕੋ ਭਗਵਨ੍ਤਂ ਏਤਦਵੋਚ – ‘‘ਅਤ੍ਥਿ ਨੁ ਖੋ, ਭੋ ਗੋਤਮ, ਕੋਚਿ ਗਿਹੀ ਗਿਹਿਸਂਯੋਜਨਂ ਅਪ੍ਪਹਾਯ ਕਾਯਸ੍ਸ ਭੇਦਾ ਦੁਕ੍ਖਸ੍ਸਨ੍ਤਕਰੋ’’ਤਿ? ‘‘ਨਤ੍ਥਿ ਖੋ, ਵਚ੍ਛ, ਕੋਚਿ ਗਿਹੀ ਗਿਹਿਸਂਯੋਜਨਂ ਅਪ੍ਪਹਾਯ ਕਾਯਸ੍ਸ ਭੇਦਾ ਦੁਕ੍ਖਸ੍ਸਨ੍ਤਕਰੋ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਗਿਹਿਸ੍ਸ ਅਰਹਾ’’ਤਿ.

ਗਿਹਿਸ੍ਸ ਅਰਹਾਤਿ? ਆਮਨ੍ਤਾ. ਅਰਹਾ ਮੇਥੁਨਂ ਧਮ੍ਮਂ ਪਟਿਸੇਵੇਯ੍ਯ, ਮੇਥੁਨਂ ਉਪ੍ਪਾਦੇਯ੍ਯ, ਪੁਤ੍ਤਸਮ੍ਬਾਧਸਯਨਂ ਅਜ੍ਝਾਵਸੇਯ੍ਯ, ਕਾਸਿਕਚਨ੍ਦਨਂ ਪਚ੍ਚਨੁਭਵੇਯ੍ਯ, ਮਾਲਾਗਨ੍ਧਵਿਲੇਪਨਂ ਧਾਰੇਯ੍ਯ, ਜਾਤਰੂਪਰਜਤਂ ਸਾਦਿਯੇਯ੍ਯ, ਅਜੇਲ਼ਕਂ ਪਟਿਗ੍ਗਣ੍ਹੇਯ੍ਯ, ਕੁਕ੍ਕੁਟਸੂਕਰਂ ਪਟਿਗ੍ਗਣ੍ਹੇਯ੍ਯ, ਹਤ੍ਥਿਗਵਸ੍ਸਵਲ਼ਵਂ ਪਟਿਗ੍ਗਣ੍ਹੇਯ੍ਯ, ਤਿਤ੍ਤਿਰਵਟ੍ਟਕਮੋਰਕਪਿਞ੍ਜਰਂ [… ਕਪਿਞ੍ਜਲਂ (ਸ੍ਯਾ. ਕਂ. ਪੀ.)] ਪਟਿਗ੍ਗਣ੍ਹੇਯ੍ਯ, ਚਿਤ੍ਤਵਣ੍ਡਵਾਲਮੋਲ਼ਿਂ [ਪੀਤਵਣ੍ਟਵਾਲਮੋਲ਼ਿਕਂ (ਸ੍ਯਾ. ਕਂ. ਪੀ.)] ਧਾਰੇਯ੍ਯ, ਓਦਾਤਾਨਿ ਵਤ੍ਥਾਨਿ ਦੀਘਦਸਾਨਿ ਧਾਰੇਯ੍ਯ, ਯਾਵਜੀਵਂ ਅਗਾਰਿਯਭੂਤੋ ਅਸ੍ਸਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ – ‘‘ਗਿਹਿਸ੍ਸ ਅਰਹਾ’’ਤਿ? ਆਮਨ੍ਤਾ. ਨਨੁ ਯਸੋ ਕੁਲਪੁਤ੍ਤੋ, ਉਤ੍ਤਿਯੋ ਗਹਪਤਿ, ਸੇਤੁ ਮਾਣਵੋ, ਗਿਹਿਬ੍ਯਞ੍ਜਨੇਨ ਅਰਹਤ੍ਤਂ ਪਤ੍ਤੋਤਿ? ਆਮਨ੍ਤਾ. ਹਞ੍ਚਿ ਯਸੋ ਕੁਲਪੁਤ੍ਤੋ, ਉਤ੍ਤਿਯੋ ਗਹਪਤਿ, ਸੇਤੁ ਮਾਣਵੋ, ਗਿਹਿਬ੍ਯਞ੍ਜਨੇਨ ਅਰਹਤ੍ਤਂ ਪਤ੍ਤੋ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਗਿਹਿਸ੍ਸ ਅਰਹਾ’’ਤਿ.

ਗਿਹਿਸ੍ਸ ਅਰਹਾਤਿਕਥਾ ਨਿਟ੍ਠਿਤਾ.