੨. ਦੁਤਿਯਵਗ੍ਗੋ
(੧੬) ੭. ਚਿਤ੍ਤਟ੍ਠਿਤਿਕਥਾ
੩੩੫. ਏਕਂ ਚਿਤ੍ਤਂ ਦਿਵਸਂ ਤਿਟ੍ਠਤੀਤਿ? ਆਮਨ੍ਤਾ. ਉਪਡ੍ਢਦਿਵਸੋ ਉਪ੍ਪਾਦਕ੍ਖਣੋ, ਉਪਡ੍ਢਦਿਵਸੋ ਵਯਕ੍ਖਣੋਤਿ? ਨ ਹੇਵਂ ਵਤ੍ਤਬ੍ਬੇ.
ਏਕਂ ਚਿਤ੍ਤਂ ਦ੍ਵੇ ਦਿਵਸੇ ਤਿਟ੍ਠਤੀਤਿ? ਆਮਨ੍ਤਾ. ਦਿਵਸੋ ਉਪ੍ਪਾਦਕ੍ਖਣੋ, ਦਿਵਸੋ ਵਯਕ੍ਖਣੋਤਿ? ਨ ਹੇਵਂ ਵਤ੍ਤਬ੍ਬੇ.
ਏਕਂ ਚਿਤ੍ਤਂ ਚਤ੍ਤਾਰੋ ਦਿਵਸੇ ਤਿਟ੍ਠਤਿ… ਅਟ੍ਠ ਦਿਵਸੇ ਤਿਟ੍ਠਤਿ… ਦਸ ਦਿਵਸੇ ਤਿਟ੍ਠਤਿ… ਵੀਸਤਿ ਦਿਵਸੇ ਤਿਟ੍ਠਤਿ… ਮਾਸਂ ਤਿਟ੍ਠਤਿ… ਦ੍ਵੇ ਮਾਸੇ ਤਿਟ੍ਠਤਿ… ਚਤ੍ਤਾਰੋ ਮਾਸੇ ਤਿਟ੍ਠਤਿ… ਅਟ੍ਠ ਮਾਸੇ ਤਿਟ੍ਠਤਿ… ਦਸ ਮਾਸੇ ਤਿਟ੍ਠਤਿ… ਸਂਵਚ੍ਛਰਂ ਤਿਟ੍ਠਤਿ… ਦ੍ਵੇ ਵਸ੍ਸਾਨਿ ਤਿਟ੍ਠਤਿ… ਚਤ੍ਤਾਰਿ ਵਸ੍ਸਾਨਿ ਤਿਟ੍ਠਤਿ… ਅਟ੍ਠ ਵਸ੍ਸਾਨਿ ਤਿਟ੍ਠਤਿ… ਦਸ ਵਸ੍ਸਾਨਿ ਤਿਟ੍ਠਤਿ… ਵੀਸਤਿ ਵਸ੍ਸਾਨਿ ਤਿਟ੍ਠਤਿ… ਤਿਂਸ ਵਸ੍ਸਾਨਿ ਤਿਟ੍ਠਤਿ… ਚਤ੍ਤਾਰੀਸ ਵਸ੍ਸਾਨਿ ਤਿਟ੍ਠਤਿ… ਪਞ੍ਞਾਸ ਵਸ੍ਸਾਨਿ ਤਿਟ੍ਠਤਿ… ਵਸ੍ਸਸਤਂ ਤਿਟ੍ਠਤਿ… ਦ੍ਵੇ ਵਸ੍ਸਸਤਾਨਿ ਤਿਟ੍ਠਤਿ… ਚਤ੍ਤਾਰਿ ਵਸ੍ਸਸਤਾਨਿ ਤਿਟ੍ਠਤਿ… ਪਞ੍ਚ ਵਸ੍ਸਸਤਾਨਿ ਤਿਟ੍ਠਤਿ… ਵਸ੍ਸਸਹਸ੍ਸਂ ਤਿਟ੍ਠਤਿ… ਦ੍ਵੇ ਵਸ੍ਸਸਹਸ੍ਸਾਨਿ ਤਿਟ੍ਠਤਿ… ਚਤ੍ਤਾਰਿ ਵਸ੍ਸਸਹਸ੍ਸਾਨਿ ਤਿਟ੍ਠਤਿ… ਅਟ੍ਠ ਵਸ੍ਸਸਹਸ੍ਸਾਨਿ ਤਿਟ੍ਠਤਿ… ਸੋਲ਼ਸ ਵਸ੍ਸਸਹਸ੍ਸਾਨਿ ਤਿਟ੍ਠਤਿ… ਕਪ੍ਪਂ ਤਿਟ੍ਠਤਿ… ਦ੍ਵੇ ਕਪ੍ਪੇ ਤਿਟ੍ਠਤਿ… ਚਤ੍ਤਾਰੋ ਕਪ੍ਪੇ ਤਿਟ੍ਠਤਿ… ਅਟ੍ਠ ਕਪ੍ਪੇ ਤਿਟ੍ਠਤਿ… ਸੋਲ਼ਸ ਕਪ੍ਪੇ ਤਿਟ੍ਠਤਿ… ਬਾਤ੍ਤਿਂਸ ਕਪ੍ਪੇ ਤਿਟ੍ਠਤਿ… ਚਤੁਸਟ੍ਠਿ ਕਪ੍ਪੇ ਤਿਟ੍ਠਤਿ… ਪਞ੍ਚ ਕਪ੍ਪਸਤਾਨਿ ਤਿਟ੍ਠਤਿ… ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਦ੍ਵੇ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਚਤ੍ਤਾਰਿ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਅਟ੍ਠ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਸੋਲ਼ਸ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਵੀਸਤਿ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਚਤ੍ਤਾਰੀਸ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਸਟ੍ਠਿ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਚਤੁਰਾਸੀਤਿ ਕਪ੍ਪਸਹਸ੍ਸਾਨਿ ਤਿਟ੍ਠਤੀਤਿ? ਆਮਨ੍ਤਾ. ਦ੍ਵੇਚਤ੍ਤਾਰੀਸ ਕਪ੍ਪਸਹਸ੍ਸਾਨਿ ਉਪ੍ਪਾਦਕ੍ਖਣੋ, ਦ੍ਵੇਚਤ੍ਤਾਰੀਸ ਕਪ੍ਪਸਹਸ੍ਸਾਨਿ ਵਯਕ੍ਖਣੋਤਿ? ਨ ਹੇਵਂ ਵਤ੍ਤਬ੍ਬੇ.
ਏਕਂ ਚਿਤ੍ਤਂ ਦਿਵਸਂ ਤਿਟ੍ਠਤੀਤਿ? ਆਮਨ੍ਤਾ. ਅਤ੍ਥਞ੍ਞੇ ਧਮ੍ਮਾ ਏਕਾਹਂ ਬਹੁਮ੍ਪਿ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤੀਤਿ? ਆਮਨ੍ਤਾ. ਤੇ ਧਮ੍ਮਾ ਚਿਤ੍ਤੇਨ ਲਹੁਪਰਿਵਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ.
ਤੇ ਧਮ੍ਮਾ ਚਿਤ੍ਤੇਨ ਲਹੁਪਰਿਵਤ੍ਤਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਨਾਹਂ, ਭਿਕ੍ਖਵੇ, ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ ਏਵਂ ਲਹੁਪਰਿਵਤ੍ਤਂ ਯਥਯਿਦਂ ਚਿਤ੍ਤਂ. ਯਾਵਞ੍ਚਿਦਂ, ਭਿਕ੍ਖਵੇ, ਉਪਮਾਪਿ ਨ ਸੁਕਰਾ ਯਾਵ ਲਹੁਪਰਿਵਤ੍ਤਂ ਚਿਤ੍ਤ’’ਨ੍ਤਿ [ਅ. ਨਿ. ੧.੪੮]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਤੇ ਧਮ੍ਮਾ ਚਿਤ੍ਤੇਨ ਲਹੁਪਰਿਵਤ੍ਤਾ’’ਤਿ.
ਤੇ ਧਮ੍ਮਾ ਚਿਤ੍ਤੇਨ ਲਹੁਪਰਿਵਤ੍ਤਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸੇਯ੍ਯਥਾਪਿ, ਭਿਕ੍ਖਵੇ, ਮਕ੍ਕਟੋ ਅਰਞ੍ਞੇ ਪਵਨੇ ਚਰਮਾਨੋ ਸਾਖਂ ਗਣ੍ਹਤਿ, ਤਂ ਮੁਞ੍ਚਿਤ੍ਵਾ ਅਞ੍ਞਂ ਗਣ੍ਹਤਿ, ਤਂ ਮੁਞ੍ਚਿਤ੍ਵਾ ਅਞ੍ਞਂ ਗਣ੍ਹਤਿ; ਏਵਮੇਵ ਖੋ, ਭਿਕ੍ਖਵੇ, ਯਮਿਦਂ [ਯਦਿਦਂ (ਬਹੂਸੁ)] ਵੁਚ੍ਚਤਿ ਚਿਤ੍ਤਂ ਇਤਿਪਿ ਮਨੋ ਇਤਿਪਿ ਵਿਞ੍ਞਾਣਂ ਇਤਿਪਿ ਤਂ ਰਤ੍ਤਿਯਾ ਚ ਦਿਵਸਸ੍ਸ ਚ ਅਞ੍ਞਦੇਵ ਉਪ੍ਪਜ੍ਜਤਿ ਅਞ੍ਞਂ ਨਿਰੁਜ੍ਝਤੀ’’ਤਿ [ਸਂ. ਨਿ. ੨.੬੧]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਤੇ ਧਮ੍ਮਾ ਚਿਤ੍ਤੇਨ ਲਹੁਪਰਿਵਤ੍ਤਾ’’ਤਿ.
੩੩੬. ਏਕਂ ਚਿਤ੍ਤਂ ਦਿਵਸਂ ਤਿਟ੍ਠਤੀਤਿ? ਆਮਨ੍ਤਾ. ਚਕ੍ਖੁਵਿਞ੍ਞਾਣਂ ਦਿਵਸਂ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ. ਸੋਤਵਿਞ੍ਞਾਣਂ…ਪੇ… ਘਾਨਵਿਞ੍ਞਾਣਂ… ਜਿਵ੍ਹਾਵਿਞ੍ਞਾਣਂ… ਕਾਯਵਿਞ੍ਞਾਣਂ… ਅਕੁਸਲਂ ਚਿਤ੍ਤਂ… ਰਾਗਸਹਗਤਂ… ਦੋਸਸਹਗਤਂ… ਮੋਹਸਹਗਤਂ… ਮਾਨਸਹਗਤਂ… ਦਿਟ੍ਠਿਸਹਗਤਂ… ਵਿਚਿਕਿਚ੍ਛਾਸਹਗਤਂ… ਥਿਨਸਹਗਤਂ… ਉਦ੍ਧਚ੍ਚਸਹਗਤਂ… ਅਹਿਰਿਕਸਹਗਤਂ… ਅਨੋਤ੍ਤਪ੍ਪਸਹਗਤਂ ਚਿਤ੍ਤਂ ਦਿਵਸਂ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਏਕਂ ਚਿਤ੍ਤਂ ਦਿਵਸਂ ਤਿਟ੍ਠਤੀਤਿ? ਆਮਨ੍ਤਾ. ਯੇਨੇਵ ਚਿਤ੍ਤੇਨ ਚਕ੍ਖੁਨਾ ਰੂਪਂ ਪਸ੍ਸਤਿ, ਤੇਨੇਵ ਚਿਤ੍ਤੇਨ ਸੋਤੇਨ ਸਦ੍ਦਂ ਸੁਣਾਤਿ…ਪੇ… ਘਾਨੇਨ ਗਨ੍ਧਂ ਘਾਯਤਿ… ਜਿਵ੍ਹਾਯ ਰਸਂ ਸਾਯਤਿ… ਕਾਯੇਨ ਫੋਟ੍ਠਬ੍ਬਂ ਫੁਸਤਿ… ਮਨਸਾ ਧਮ੍ਮਂ ਵਿਜਾਨਾਤਿ…ਪੇ… ਯੇਨੇਵ ਚਿਤ੍ਤੇਨ ਮਨਸਾ ਧਮ੍ਮਂ ਵਿਜਾਨਾਤਿ, ਤੇਨੇਵ ਚਿਤ੍ਤੇਨ ਚਕ੍ਖੁਨਾ ਰੂਪਂ ਪਸ੍ਸਤਿ…ਪੇ… ਸੋਤੇਨ ਸਦ੍ਦਂ ਸੁਣਾਤਿ… ਘਾਨੇਨ ਗਨ੍ਧਂ ਘਾਯਤਿ… ਜਿਵ੍ਹਾਯ ਰਸਂ ਸਾਯਤਿ…ਪੇ… ਕਾਯੇਨ ਫੋਟ੍ਠਬ੍ਬਂ ਫੁਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਏਕਂ ਚਿਤ੍ਤਂ ਦਿਵਸਂ ਤਿਟ੍ਠਤੀਤਿ? ਆਮਨ੍ਤਾ. ਯੇਨੇਵ ਚਿਤ੍ਤੇਨ ਅਭਿਕ੍ਕਮਤਿ, ਤੇਨੇਵ ਚਿਤ੍ਤੇਨ ਪਟਿਕ੍ਕਮਤਿ; ਯੇਨੇਵ ਚਿਤ੍ਤੇਨ ਪਟਿਕ੍ਕਮਤਿ, ਤੇਨੇਵ ਚਿਤ੍ਤੇਨ ਅਭਿਕ੍ਕਮਤਿ; ਯੇਨੇਵ ਚਿਤ੍ਤੇਨ ਆਲੋਕੇਤਿ, ਤੇਨੇਵ ਚਿਤ੍ਤੇਨ ਵਿਲੋਕੇਤਿ; ਯੇਨੇਵ ਚਿਤ੍ਤੇਨ ਵਿਲੋਕੇਤਿ, ਤੇਨੇਵ ਚਿਤ੍ਤੇਨ ਆਲੋਕੇਤਿ; ਯੇਨੇਵ ਚਿਤ੍ਤੇਨ ਸਮਿਞ੍ਜੇਤਿ, ਤੇਨੇਵ ਚਿਤ੍ਤੇਨ ਪਸਾਰੇਤਿ; ਯੇਨੇਵ ਚਿਤ੍ਤੇਨ ਪਸਾਰੇਤਿ, ਤੇਨੇਵ ਚਿਤ੍ਤੇਨ ਸਮਿਞ੍ਜੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੩੩੭. ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਏਕਂ ਚਿਤ੍ਤਂ ਯਾਵਤਾਯੁਕਂ ਤਿਟ੍ਠਤੀਤਿ? ਆਮਨ੍ਤਾ. ਮਨੁਸ੍ਸਾਨਂ ਏਕਂ ਚਿਤ੍ਤਂ ਯਾਵਤਾਯੁਕਂ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ.
ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਏਕਂ ਚਿਤ੍ਤਂ ਯਾਵਤਾਯੁਕਂ ਤਿਟ੍ਠਤੀਤਿ? ਆਮਨ੍ਤਾ. ਚਾਤੁਮਹਾਰਾਜਿਕਾਨਂ ਦੇਵਾਨਂ…ਪੇ… ਤਾਵਤਿਂਸਾਨਂ ਦੇਵਾਨਂ… ਯਾਮਾਨਂ ਦੇਵਾਨਂ… ਤੁਸਿਤਾਨਂ ਦੇਵਾਨਂ… ਨਿਮ੍ਮਾਨਰਤੀਨਂ ਦੇਵਾਨਂ… ਪਰਨਿਮ੍ਮਿਤਵਸਵਤ੍ਤੀਨਂ ਦੇਵਾਨਂ… ਬ੍ਰਹ੍ਮਪਾਰਿਸਜ੍ਜਾਨਂ ਦੇਵਾਨਂ… ਬ੍ਰਹ੍ਮਪੁਰੋਹਿਤਾਨਂ ਦੇਵਾਨਂ… ਮਹਾਬ੍ਰਹ੍ਮਾਨਂ ਦੇਵਾਨਂ… ਪਰਿਤ੍ਤਾਭਾਨਂ ਦੇਵਾਨਂ… ਅਪ੍ਪਮਾਣਾਭਾਨਂ ਦੇਵਾਨਂ… ਆਭਸ੍ਸਰਾਨਂ ਦੇਵਾਨਂ… ਪਰਿਤ੍ਤਸੁਭਾਨਂ ਦੇਵਾਨਂ… ਅਪ੍ਪਮਾਣਸੁਭਾਨਂ ਦੇਵਾਨਂ… ਸੁਭਕਿਣ੍ਹਾਨਂ ਦੇਵਾਨਂ … ਵੇਹਪ੍ਫਲਾਨਂ ਦੇਵਾਨਂ… ਅਵਿਹਾਨਂ ਦੇਵਾਨਂ… ਅਤਪ੍ਪਾਨਂ ਦੇਵਾਨਂ… ਸੁਦਸ੍ਸਾਨਂ ਦੇਵਾਨਂ… ਸੁਦਸ੍ਸੀਨਂ ਦੇਵਾਨਂ… ਅਕਨਿਟ੍ਠਾਨਂ ਦੇਵਾਨਂ ਏਕਂ ਚਿਤ੍ਤਂ ਯਾਵਤਾਯੁਕਂ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ.
ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਵੀਸਤਿ ਕਪ੍ਪਸਹਸ੍ਸਾਨਿ ਆਯੁਪ੍ਪਮਾਣਂ, ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਏਕਂ ਚਿਤ੍ਤਂ ਵੀਸਤਿ ਕਪ੍ਪਸਹਸ੍ਸਾਨਿ ਤਿਟ੍ਠਤੀਤਿ? ਆਮਨ੍ਤਾ. ਮਨੁਸ੍ਸਾਨਂ ਵਸ੍ਸਸਤਂ ਆਯੁਪ੍ਪਮਾਣਂ, ਮਨੁਸ੍ਸਾਨਂ ਏਕਂ ਚਿਤ੍ਤਂ ਵਸ੍ਸਸਤਂ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ.
ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਵੀਸਤਿ ਕਪ੍ਪਸਹਸ੍ਸਾਨਿ ਆਯੁਪ੍ਪਮਾਣਂ, ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਏਕਂ ਚਿਤ੍ਤਂ ਵੀਸਤਿ ਕਪ੍ਪਸਹਸ੍ਸਾਨਿ ਤਿਟ੍ਠਤੀਤਿ? ਆਮਨ੍ਤਾ. ਚਾਤੁਮਹਾਰਾਜਿਕਾਨਂ ਦੇਵਾਨਂ ਪਞ੍ਚ ਵਸ੍ਸਸਤਾਨਿ ਆਯੁਪ੍ਪਮਾਣਂ, ਚਾਤੁਮਹਾਰਾਜਿਕਾਨਂ ਦੇਵਾਨਂ ਏਕਂ ਚਿਤ੍ਤਂ ਪਞ੍ਚ ਵਸ੍ਸਸਤਾਨਿ ਤਿਟ੍ਠਤਿ… ਵਸ੍ਸਸਹਸ੍ਸਂ ਤਿਟ੍ਠਤਿ… ਦ੍ਵੇ ਵਸ੍ਸਸਹਸ੍ਸਾਨਿ ਤਿਟ੍ਠਤਿ… ਚਤ੍ਤਾਰਿ ਵਸ੍ਸਸਹਸ੍ਸਾਨਿ ਤਿਟ੍ਠਤਿ… ਅਟ੍ਠ ਵਸ੍ਸਸਹਸ੍ਸਾਨਿ ਤਿਟ੍ਠਤਿ… ਸੋਲ਼ਸ ਵਸ੍ਸਸਹਸ੍ਸਾਨਿ ਤਿਟ੍ਠਤਿ… ਕਪ੍ਪਸ੍ਸ ਤਤਿਯਭਾਗਂ ਤਿਟ੍ਠਤਿ… ਉਪਡ੍ਢਕਪ੍ਪਂ ਤਿਟ੍ਠਤਿ… ਏਕਂ ਕਪ੍ਪਂ ਤਿਟ੍ਠਤਿ… ਦ੍ਵੇ ਕਪ੍ਪੇ ਤਿਟ੍ਠਤਿ… ਚਤ੍ਤਾਰੋ ਕਪ੍ਪੇ ਤਿਟ੍ਠਤਿ… ਅਟ੍ਠ ਕਪ੍ਪੇ ਤਿਟ੍ਠਤਿ… ਸੋਲ਼ਸ ਕਪ੍ਪੇ ਤਿਟ੍ਠਤਿ… ਬਾਤ੍ਤਿਂਸ ਕਪ੍ਪੇ ਤਿਟ੍ਠਤਿ… ਚਤੁਸਟ੍ਠਿ ਕਪ੍ਪੇ ਤਿਟ੍ਠਤਿ… ਪਞ੍ਚ ਕਪ੍ਪਸਤਾਨਿ ਤਿਟ੍ਠਤਿ… ਕਪ੍ਪਸਹਸ੍ਸਂ ਤਿਟ੍ਠਤਿ… ਦ੍ਵੇ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਚਤ੍ਤਾਰਿ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਅਟ੍ਠ ਕਪ੍ਪਸਹਸ੍ਸਾਨਿ ਤਿਟ੍ਠਤਿ… ਅਕਨਿਟ੍ਠਾਨਂ ਦੇਵਾਨਂ ਸੋਲ਼ਸ ਕਪ੍ਪਸਹਸ੍ਸਾਨਿ ਆਯੁਪ੍ਪਮਾਣਂ, ਅਕਨਿਟ੍ਠਾਨਂ ਦੇਵਾਨਂ ਏਕਂ ਚਿਤ੍ਤਂ ਸੋਲ਼ਸ ਕਪ੍ਪਸਹਸ੍ਸਾਨਿ ਤਿਟ੍ਠਤੀਤਿ? ਨ ਹੇਵਂ ਵਤ੍ਤਬ੍ਬੇ.
ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਚਿਤ੍ਤਂ ਮੁਹੁਤ੍ਤਂ ਮੁਹੁਤ੍ਤਂ ਉਪ੍ਪਜ੍ਜਤਿ ਮੁਹੁਤ੍ਤਂ ਮੁਹੁਤ੍ਤਂ ਨਿਰੁਜ੍ਝਤੀਤਿ? ਆਮਨ੍ਤਾ. ਆਕਾਸਾਨਞ੍ਚਾਯਤਨੂਪਗਾ ਦੇਵਾ ਮੁਹੁਤ੍ਤਂ ਮੁਹੁਤ੍ਤਂ ਚਵਨ੍ਤਿ ਮੁਹੁਤ੍ਤਂ ਮੁਹੁਤ੍ਤਂ ਉਪ੍ਪਜ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ.
ਆਕਾਸਾਨਞ੍ਚਾਯਤਨੂਪਗਾਨਂ ਦੇਵਾਨਂ ਏਕਂ ਚਿਤ੍ਤਂ ਯਾਵਤਾਯੁਕਂ ਤਿਟ੍ਠਤੀਤਿ? ਆਮਨ੍ਤਾ. ਆਕਾਸਾਨਞ੍ਚਾਯਤਨੂਪਗਾ ਦੇਵਾ ਯੇਨੇਵ ਚਿਤ੍ਤੇਨ ਉਪ੍ਪਜ੍ਜਨ੍ਤਿ, ਤੇਨੇਵ ਚਿਤ੍ਤੇਨ ਚਵਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਚਿਤ੍ਤਟ੍ਠਿਤਿਕਥਾ ਨਿਟ੍ਠਿਤਾ.