੨. ਦੁਤਿਯਵਗ੍ਗੋ

(੧੩) ੪. ਪਰਵਿਤਾਰਣਕਥਾ

੩੨੨. ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਅਰਹਾ ਪਰਨੇਯ੍ਯੋ ਪਰਪਤ੍ਤਿਯੋ ਪਰਪਚ੍ਚਯੋ ਪਰਪਟਿਬਦ੍ਧਭੂ, ਨ ਜਾਨਾਤਿ ਨ ਪਸ੍ਸਤਿ ਸਮ੍ਮੂਲ਼੍ਹੋ ਅਸਮ੍ਪਜਾਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਨੁ ਅਰਹਾ ਨ ਪਰਨੇਯ੍ਯੋ ਨ ਪਰਪਤ੍ਤਿਯੋ ਨ ਪਰਪਚ੍ਚਯੋ ਨ ਪਰਪਟਿਬਦ੍ਧਭੂ ਜਾਨਾਤਿ ਪਸ੍ਸਤਿ ਅਸਮ੍ਮੂਲ਼੍ਹੋ ਸਮ੍ਪਜਾਨੋਤਿ? ਆਮਨ੍ਤਾ. ਹਞ੍ਚਿ ਅਰਹਾ ਨ ਪਰਨੇਯ੍ਯੋ ਨ ਪਰਪਤ੍ਤਿਯੋ ਨ ਪਰਪਚ੍ਚਯੋ ਨ ਪਰਪਟਿਬਦ੍ਧਭੂ, ਜਾਨਾਤਿ ਪਸ੍ਸਤਿ ਅਸਮ੍ਮੂਲ਼੍ਹੋ ਸਮ੍ਪਜਾਨੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਅਤ੍ਥਿ ਪੁਥੁਜ੍ਜਨਸ੍ਸ ਪਰਵਿਤਾਰਣਾ, ਸੋ ਚ ਪਰਨੇਯ੍ਯੋ ਪਰਪਤ੍ਤਿਯੋ ਪਰਪਚ੍ਚਯੋ ਪਰਪਟਿਬਦ੍ਧਭੂ, ਨ ਜਾਨਾਤਿ ਨ ਪਸ੍ਸਤਿ ਸਮ੍ਮੂਲ਼੍ਹੋ ਅਸਮ੍ਪਜਾਨੋਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਪਰਵਿਤਾਰਣਾ, ਸੋ ਚ ਪਰਨੇਯ੍ਯੋ ਪਰਪਤ੍ਤਿਯੋ ਪਰਪਚ੍ਚਯੋ ਪਰਪਟਿਬਦ੍ਧਭੂ, ਨ ਜਾਨਾਤਿ ਨ ਪਸ੍ਸਤਿ ਸਮ੍ਮੂਲ਼੍ਹੋ ਅਸਮ੍ਪਜਾਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਅਰਹਤੋ ਪਰਵਿਤਾਰਣਾ, ਸੋ ਚ ਨ ਪਰਨੇਯ੍ਯੋ ਨ ਪਰਪਤ੍ਤਿਯੋ ਨ ਪਰਪਚ੍ਚਯੋ ਨ ਪਰਪਟਿਬਦ੍ਧਭੂ, ਜਾਨਾਤਿ ਪਸ੍ਸਤਿ ਅਸਮ੍ਮੂਲ਼੍ਹੋ ਸਮ੍ਪਜਾਨੋਤਿ? ਆਮਨ੍ਤਾ. ਅਤ੍ਥਿ ਪੁਥੁਜ੍ਜਨਸ੍ਸ ਪਰਵਿਤਾਰਣਾ, ਸੋ ਚ ਨ ਪਰਨੇਯ੍ਯੋ ਨ ਪਰਪਤ੍ਤਿਯੋ ਨ ਪਰਪਚ੍ਚਯੋ ਨ ਪਰਪਟਿਬਦ੍ਧਭੂ, ਜਾਨਾਤਿ ਪਸ੍ਸਤਿ ਅਸਮ੍ਮੂਲ਼੍ਹੋ ਸਮ੍ਪਜਾਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਸਤ੍ਥਰਿ ਪਰਵਿਤਾਰਣਾ, ਧਮ੍ਮੇ ਪਰਵਿਤਾਰਣਾ, ਸਙ੍ਘੇ ਪਰਵਿਤਾਰਣਾ, ਸਿਕ੍ਖਾਯ ਪਰਵਿਤਾਰਣਾ, ਪੁਬ੍ਬਨ੍ਤੇ ਪਰਵਿਤਾਰਣਾ, ਅਪਰਨ੍ਤੇ ਪਰਵਿਤਾਰਣਾ, ਪੁਬ੍ਬਨ੍ਤਾਪਰਨ੍ਤੇ ਪਰਵਿਤਾਰਣਾ, ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਪਰਵਿਤਾਰਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਤ੍ਥਿ ਅਰਹਤੋ ਸਤ੍ਥਰਿ ਪਰਵਿਤਾਰਣਾ, ਧਮ੍ਮੇ ਪਰਵਿਤਾਰਣਾ…ਪੇ… ਇਦਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਪਰਵਿਤਾਰਣਾਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਅਰਹਤੋ ਸਤ੍ਥਰਿ ਪਰਵਿਤਾਰਣਾ, ਧਮ੍ਮੇ ਪਰਵਿਤਾਰਣਾ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਪਰਵਿਤਾਰਣਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਅਤ੍ਥਿ ਪੁਥੁਜ੍ਜਨਸ੍ਸ ਪਰਵਿਤਾਰਣਾ, ਅਤ੍ਥਿ ਤਸ੍ਸ ਸਤ੍ਥਰਿ ਪਰਵਿਤਾਰਣਾ, ਧਮ੍ਮੇ ਪਰਵਿਤਾਰਣਾ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਪਰਵਿਤਾਰਣਾਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਪਰਵਿਤਾਰਣਾ, ਅਤ੍ਥਿ ਤਸ੍ਸ ਸਤ੍ਥਰਿ ਪਰਵਿਤਾਰਣਾ, ਧਮ੍ਮੇ ਪਰਵਿਤਾਰਣਾ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਪਰਵਿਤਾਰਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਅਰਹਤੋ ਪਰਵਿਤਾਰਣਾ, ਨਤ੍ਥਿ ਤਸ੍ਸ ਸਤ੍ਥਰਿ ਪਰਵਿਤਾਰਣਾ, ਧਮ੍ਮੇ ਪਰਵਿਤਾਰਣਾ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਪਰਵਿਤਾਰਣਾਤਿ? ਆਮਨ੍ਤਾ. ਅਤ੍ਥਿ ਪੁਥੁਜ੍ਜਨਸ੍ਸ ਪਰਵਿਤਾਰਣਾ, ਨਤ੍ਥਿ ਤਸ੍ਸ ਸਤ੍ਥਰਿ ਪਰਵਿਤਾਰਣਾ, ਧਮ੍ਮੇ ਪਰਵਿਤਾਰਣਾ…ਪੇ… ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਨ੍ਨੇਸੁ ਧਮ੍ਮੇਸੁ ਪਰਵਿਤਾਰਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੨੩. ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਨਨੁ ਅਰਹਤੋ ਰਾਗੋ ਪਹੀਨੋ ਉਚ੍ਛਿਨ੍ਨਮੂਲੋ ਤਾਲਾਵਤ੍ਥੁਕਤੋ ਅਨਭਾਵਙ੍ਕਤੋ ਆਯਤਿਂ ਅਨੁਪ੍ਪਾਦਧਮ੍ਮੋਤਿ? ਆਮਨ੍ਤਾ. ਹਞ੍ਚਿ ਅਰਹਤੋ ਰਾਗੋ ਪਹੀਨੋ ਉਚ੍ਛਿਨ੍ਨਮੂਲੋ ਤਾਲਾਵਤ੍ਥੁਕਤੋ ਅਨਭਾਵਙ੍ਕਤੋ ਆਯਤਿਂ ਅਨੁਪ੍ਪਾਦਧਮ੍ਮੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਨਨੁ ਅਰਹਤੋ ਦੋਸੋ ਪਹੀਨੋ…ਪੇ… ਮੋਹੋ ਪਹੀਨੋ…ਪੇ… ਅਨੋਤ੍ਤਪ੍ਪਂ ਪਹੀਨਂ ਉਚ੍ਛਿਨ੍ਨਮੂਲਂ ਤਾਲਾਵਤ੍ਥੁਕਤਂ ਅਨਭਾਵਙ੍ਕਤਂ ਆਯਤਿਂ ਅਨੁਪ੍ਪਾਦਧਮ੍ਮਂ…ਪੇ… ਰਾਗਪ੍ਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ…ਪੇ… ਦੋਸਪ੍ਪਹਾਨਾਯ…ਪੇ… ਅਨੋਤ੍ਤਪ੍ਪਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ…ਪੇ… ਨਨੁ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਨ੍ਤਿ? ਆਮਨ੍ਤਾ. ਹਞ੍ਚਿ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

੩੨੪. ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਸਧਮ੍ਮਕੁਸਲਸ੍ਸ ਅਰਹਤੋ ਅਤ੍ਥਿ ਪਰਵਿਤਾਰਣਾ, ਪਰਧਮ੍ਮਕੁਸਲਸ੍ਸ ਅਰਹਤੋ ਨਤ੍ਥਿ ਪਰਵਿਤਾਰਣਾਤਿ. ਸਧਮ੍ਮਕੁਸਲਸ੍ਸ ਅਰਹਤੋ ਅਤ੍ਥਿ ਪਰਵਿਤਾਰਣਾਤਿ? ਆਮਨ੍ਤਾ. ਪਰਧਮ੍ਮਕੁਸਲਸ੍ਸ ਅਰਹਤੋ ਅਤ੍ਥਿ ਪਰਵਿਤਾਰਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਧਮ੍ਮਕੁਸਲਸ੍ਸ ਅਰਹਤੋ ਨਤ੍ਥਿ ਪਰਵਿਤਾਰਣਾਤਿ? ਆਮਨ੍ਤਾ. ਸਧਮ੍ਮਕੁਸਲਸ੍ਸ ਅਰਹਤੋ ਨਤ੍ਥਿ ਪਰਵਿਤਾਰਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਧਮ੍ਮਕੁਸਲਸ੍ਸ ਅਰਹਤੋ ਰਾਗੋ ਪਹੀਨੋ, ਅਤ੍ਥਿ ਤਸ੍ਸ ਪਰਵਿਤਾਰਣਾਤਿ? ਆਮਨ੍ਤਾ. ਪਰਧਮ੍ਮਕੁਸਲਸ੍ਸ ਅਰਹਤੋ ਰਾਗੋ ਪਹੀਨੋ, ਅਤ੍ਥਿ ਤਸ੍ਸ ਪਰਵਿਤਾਰਣਾਤਿ? ਨ ਹੇਵਂ ਵਤ੍ਤਬ੍ਬੇ.

ਸਧਮ੍ਮਕੁਸਲਸ੍ਸ ਅਰਹਤੋ ਦੋਸੋ ਪਹੀਨੋ…ਪੇ… ਮੋਹੋ ਪਹੀਨੋ…ਪੇ… ਅਨੋਤ੍ਤਪ੍ਪਂ ਪਹੀਨਂ …ਪੇ… ਰਾਗਪ੍ਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ…ਪੇ… ਦੋਸਪ੍ਪਹਾਨਾਯ…ਪੇ… ਅਨੋਤ੍ਤਪ੍ਪਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ…ਪੇ… ਸਧਮ੍ਮਕੁਸਲੋ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਅਤ੍ਥਿ ਤਸ੍ਸ ਪਰਵਿਤਾਰਣਾਤਿ? ਆਮਨ੍ਤਾ. ਪਰਧਮ੍ਮਕੁਸਲੋ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਅਤ੍ਥਿ ਤਸ੍ਸ ਪਰਵਿਤਾਰਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਧਮ੍ਮਕੁਸਲਸ੍ਸ ਅਰਹਤੋ ਰਾਗੋ ਪਹੀਨੋ, ਨਤ੍ਥਿ ਤਸ੍ਸ ਪਰਵਿਤਾਰਣਾਤਿ? ਆਮਨ੍ਤਾ. ਸਧਮ੍ਮਕੁਸਲਸ੍ਸ ਅਰਹਤੋ ਰਾਗੋ ਪਹੀਨੋ, ਨਤ੍ਥਿ ਤਸ੍ਸ ਪਰਵਿਤਾਰਣਾਤਿ? ਨ ਹੇਵਂ ਵਤ੍ਤਬ੍ਬੇ.

ਪਰਧਮ੍ਮਕੁਸਲਸ੍ਸ ਅਰਹਤੋ ਦੋਸੋ ਪਹੀਨੋ, ਮੋਹੋ ਪਹੀਨੋ…ਪੇ… ਅਨੋਤ੍ਤਪ੍ਪਂ ਪਹੀਨਂ…ਪੇ… ਰਾਗਪ੍ਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ…ਪੇ… ਦੋਸਪ੍ਪਹਾਨਾਯ…ਪੇ… ਅਨੋਤ੍ਤਪ੍ਪਪਹਾਨਾਯ ਮਗ੍ਗੋ ਭਾਵਿਤੋ…ਪੇ… ਬੋਜ੍ਝਙ੍ਗਾ ਭਾਵਿਤਾ…ਪੇ… ਪਰਧਮ੍ਮਕੁਸਲੋ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਨਤ੍ਥਿ ਤਸ੍ਸ ਪਰਵਿਤਾਰਣਾਤਿ? ਆਮਨ੍ਤਾ. ਸਧਮ੍ਮਕੁਸਲੋ ਅਰਹਾ ਵੀਤਰਾਗੋ ਵੀਤਦੋਸੋ ਵੀਤਮੋਹੋ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਨਤ੍ਥਿ ਤਸ੍ਸ ਪਰਵਿਤਾਰਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੨੫. ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਜਾਨਤੋਹਂ, ਭਿਕ੍ਖਵੇ, ਪਸ੍ਸਤੋ ਆਸਵਾਨਂ ਖਯਂ ਵਦਾਮਿ, ਨੋ ਅਜਾਨਤੋ ਨੋ ਅਪਸ੍ਸਤੋ! ਕਿਞ੍ਚ, ਭਿਕ੍ਖਵੇ, ਜਾਨਤੋ ਕਿਂ ਪਸ੍ਸਤੋ ਆਸਵਾਨਂ ਖਯੋ ਹੋਤਿ? ‘ਇਤਿ ਰੂਪਂ’…ਪੇ… ‘ਇਤਿ ਵਿਞ੍ਞਾਣਸ੍ਸ ਅਤ੍ਥਙ੍ਗਮੋ’ਤਿ – ਏਵਂ ਖੋ, ਭਿਕ੍ਖਵੇ, ਜਾਨਤੋ ਏਵਂ ਪਸ੍ਸਤੋ ਆਸਵਾਨਂ ਖਯੋ ਹੋਤੀ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਜਾਨਤੋਹਂ, ਭਿਕ੍ਖਵੇ, ਪਸ੍ਸਤੋ ਆਸਵਾਨਂ ਖਯਂ ਵਦਾਮਿ, ਨੋ ਅਜਾਨਤੋ ਨੋ ਅਪਸ੍ਸਤੋ! ਕਿਞ੍ਚ, ਭਿਕ੍ਖਵੇ, ਜਾਨਤੋ ਕਿਂ ਪਸ੍ਸਤੋ ਆਸਵਾਨਂ ਖਯੋ ਹੋਤਿ? ‘ਇਦਂ ਦੁਕ੍ਖ’ਨ੍ਤਿ – ਭਿਕ੍ਖਵੇ, ਜਾਨਤੋ ਪਸ੍ਸਤੋ ਆਸਵਾਨਂ ਖਯੋ ਹੋਤਿ, ‘ਅਯਂ ਦੁਕ੍ਖਸਮੁਦਯੋ’ਤਿ…ਪੇ… ‘ਅਯਂ ਦੁਕ੍ਖਨਿਰੋਧੋ’ਤਿ…ਪੇ… ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ – ਜਾਨਤੋ ਪਸ੍ਸਤੋ ਆਸਵਾਨਂ ਖਯੋ ਹੋਤਿ. ਏਵਂ ਖੋ, ਭਿਕ੍ਖਵੇ, ਜਾਨਤੋ ਏਵਂ ਪਸ੍ਸਤੋ ਆਸਵਾਨਂ ਖਯੋ ਹੋਤੀ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸਬ੍ਬਂ, ਭਿਕ੍ਖਵੇ, ਅਨਭਿਜਾਨਂ ਅਪਰਿਜਾਨਂ ਅਵਿਰਾਜਯਂ ਅਪ੍ਪਜਹਂ ਅਭਬ੍ਬੋ ਦੁਕ੍ਖਕ੍ਖਯਾਯ; ਸਬ੍ਬਞ੍ਚ ਖੋ, ਭਿਕ੍ਖਵੇ, ਅਭਿਜਾਨਂ ਪਰਿਜਾਨਂ ਵਿਰਾਜਯਂ ਪਜਹਂ ਭਬ੍ਬੋ ਦੁਕ੍ਖਕ੍ਖਯਾਯਾ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸਹਾਵਸ੍ਸ ਦਸ੍ਸਨਸਮ੍ਪਦਾਯ…ਪੇ… ਛਚ੍ਚਾਭਿਠਾਨਾਨਿ ਅਭਬ੍ਬ ਕਾਤੁ’’ਨ੍ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਯਸ੍ਮਿਂ, ਭਿਕ੍ਖਵੇ, ਸਮਯੇ ਅਰਿਯਸਾਵਕਸ੍ਸ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’ਨ੍ਤਿ, ਸਹ ਦਸ੍ਸਨੁਪ੍ਪਾਦਾ, ਭਿਕ੍ਖਵੇ, ਅਰਿਯਸਾਵਕਸ੍ਸ ਤੀਣਿ ਸਂਯੋਜਨਾਨਿ ਪਹੀਯਨ੍ਤਿ – ਸਕ੍ਕਾਯਦਿਟ੍ਠਿ, ਵਿਚਿਕਿਚ੍ਛਾ, ਸੀਲਬ੍ਬਤਪਰਾਮਾਸੋ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਨਾਹਂ ਸਹਿਸ੍ਸਾਮਿ [ਗਮਿਸ੍ਸਾਮਿ (ਸੀ. ਸ੍ਯਾ. ਕ.), ਸਮੀਹਾਮਿ (ਪੀ.)] ਪਮੋਚਨਾਯ,

ਕਥਙ੍ਕਥਿਂ ਧੋਤਕ ਕਞ੍ਚਿ [ਕਿਞ੍ਚਿ (ਕ.)] ਲੋਕੇ;

ਧਮ੍ਮਞ੍ਚ ਸੇਟ੍ਠਂ ਅਭਿਜਾਨਮਾਨੋ,

ਏਵਂ ਤੁਵਂ ਓਘਮਿਮਂ ਤਰੇਸੀ’’ਤਿ [ਸੁ. ਨਿ. ੧੦੭੦ ਸੁਤ੍ਤਨਿਪਾਤੇ; ਚੂਲ਼ਨਿ. ੩੩ ਧੋਤਕਮਾਣਵਪੁਚ੍ਛਾਨਿਦ੍ਦੇਸ].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਨ ਵਤ੍ਤਬ੍ਬਂ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ? ਆਮਨ੍ਤਾ. ਨਨੁ ਅਰਹਤੋ ਇਤ੍ਥਿਪੁਰਿਸਾਨਂ ਨਾਮਗੋਤ੍ਤਂ ਪਰੇ ਵਿਤਾਰੇਯ੍ਯੁਂ, ਮਗ੍ਗਾਮਗ੍ਗਂ ਪਰੇ ਵਿਤਾਰੇਯ੍ਯੁਂ, ਤਿਣਕਟ੍ਠਵਨਪ੍ਪਤੀਨਂ ਨਾਮਂ ਪਰੇ ਵਿਤਾਰੇਯ੍ਯੁਨ੍ਤਿ? ਆਮਨ੍ਤਾ. ਹਞ੍ਚਿ ਅਰਹਤੋ ਇਤ੍ਥਿਪੁਰਿਸਾਨਂ ਨਾਮਗੋਤ੍ਤਂ ਪਰੇ ਵਿਤਾਰੇਯ੍ਯੁਂ, ਮਗ੍ਗਾਮਗ੍ਗਂ ਪਰੇ ਵਿਤਾਰੇਯ੍ਯੁਂ, ਤਿਣਕਟ੍ਠਵਨਪ੍ਪਤੀਨਂ ਨਾਮਂ ਪਰੇ ਵਿਤਾਰੇਯ੍ਯੁਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਪਰਵਿਤਾਰਣਾ’’ਤਿ.

ਅਰਹਤੋ ਇਤ੍ਥਿਪੁਰਿਸਾਨਂ ਨਾਮਗੋਤ੍ਤਂ ਪਰੇ ਵਿਤਾਰੇਯ੍ਯੁਂ, ਮਗ੍ਗਾਮਗ੍ਗਂ ਪਰੇ ਵਿਤਾਰੇਯ੍ਯੁਂ, ਤਿਣਕਟ੍ਠਵਨਪ੍ਪਤੀਨਂ ਨਾਮਂ ਪਰੇ ਵਿਤਾਰੇਯ੍ਯੁਨ੍ਤਿ, ਅਤ੍ਥਿ ਅਰਹਤੋ ਪਰਵਿਤਾਰਣਾਤਿ? ਆਮਨ੍ਤਾ. ਅਰਹਤੋ ਸੋਤਾਪਤ੍ਤਿਫਲਂ ਵਾ ਸਕਦਾਗਾਮਿਫਲਂ ਵਾ ਅਨਾਗਾਮਿਫਲਂ ਵਾ ਅਰਹਤ੍ਤਂ ਵਾ ਪਰੇ ਵਿਤਾਰੇਯ੍ਯੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰਵਿਤਾਰਣਕਥਾ ਨਿਟ੍ਠਿਤਾ.