੨. ਦੁਤਿਯਵਗ੍ਗੋ

(੧੪) ੫. ਵਚੀਭੇਦਕਥਾ

੩੨੬. ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਸਬ੍ਬਤ੍ਥ ਸਮਾਪਨ੍ਨਾਨਂ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਸਬ੍ਬਦਾ ਸਮਾਪਨ੍ਨਾਨਂ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਸਬ੍ਬੇਸਂ ਸਮਾਪਨ੍ਨਾਨਂ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਸਬ੍ਬਸਮਾਪਤ੍ਤੀਸੁ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਸਮਾਪਨ੍ਨਸ੍ਸ ਅਤ੍ਥਿ ਕਾਯਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮਾਪਨ੍ਨਸ੍ਸ ਨਤ੍ਥਿ ਕਾਯਭੇਦੋਤਿ? ਆਮਨ੍ਤਾ. ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮਾਪਨ੍ਨਸ੍ਸ ਅਤ੍ਥਿ ਵਾਚਾ, ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਸਮਾਪਨ੍ਨਸ੍ਸ ਅਤ੍ਥਿ ਕਾਯੋ, ਅਤ੍ਥਿ ਕਾਯਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮਾਪਨ੍ਨਸ੍ਸ ਅਤ੍ਥਿ ਕਾਯੋ, ਨਤ੍ਥਿ ਕਾਯਭੇਦੋਤਿ? ਆਮਨ੍ਤਾ. ਸਮਾਪਨ੍ਨਸ੍ਸ ਅਤ੍ਥਿ ਵਾਚਾ, ਨਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੨੭. ਦੁਕ੍ਖਨ੍ਤਿ ਜਾਨਨ੍ਤੋ ਦੁਕ੍ਖਨ੍ਤਿ ਵਾਚਂ ਭਾਸਤੀਤਿ? ਆਮਨ੍ਤਾ. ਸਮੁਦਯੋਤਿ ਜਾਨਨ੍ਤੋ ਸਮੁਦਯੋਤਿ ਵਾਚਂ ਭਾਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੁਕ੍ਖਨ੍ਤਿ ਜਾਨਨ੍ਤੋ ਦੁਕ੍ਖਨ੍ਤਿ ਵਾਚਂ ਭਾਸਤੀਤਿ? ਆਮਨ੍ਤਾ. ਨਿਰੋਧੋਤਿ ਜਾਨਨ੍ਤੋ ਨਿਰੋਧੋਤਿ ਵਾਚਂ ਭਾਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਦੁਕ੍ਖਨ੍ਤਿ ਜਾਨਨ੍ਤੋ ਦੁਕ੍ਖਨ੍ਤਿ ਵਾਚਂ ਭਾਸਤੀਤਿ? ਆਮਨ੍ਤਾ. ਮਗ੍ਗੋਤਿ ਜਾਨਨ੍ਤੋ ਮਗ੍ਗੋਤਿ ਵਾਚਂ ਭਾਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮੁਦਯੋਤਿ ਜਾਨਨ੍ਤੋ ਨ ਚ ਸਮੁਦਯੋਤਿ ਵਾਚਂ ਭਾਸਤੀਤਿ? ਆਮਨ੍ਤਾ. ਦੁਕ੍ਖਨ੍ਤਿ ਜਾਨਨ੍ਤੋ ਨ ਚ ਦੁਕ੍ਖਨ੍ਤਿ ਵਾਚਂ ਭਾਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਰੋਧੋਤਿ ਜਾਨਨ੍ਤੋ ਨ ਚ ਨਿਰੋਧੋਤਿ ਵਾਚਂ ਭਾਸਤੀਤਿ? ਆਮਨ੍ਤਾ. ਦੁਕ੍ਖਨ੍ਤਿ ਜਾਨਨ੍ਤੋ ਨ ਚ ਦੁਕ੍ਖਨ੍ਤਿ ਵਾਚਂ ਭਾਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਗ੍ਗੋਤਿ ਜਾਨਨ੍ਤੋ ਨ ਚ ਮਗ੍ਗੋਤਿ ਵਾਚਂ ਭਾਸਤੀਤਿ? ਆਮਨ੍ਤਾ. ਦੁਕ੍ਖਨ੍ਤਿ ਜਾਨਨ੍ਤੋ ਨ ਚ ਦੁਕ੍ਖਨ੍ਤਿ ਵਾਚਂ ਭਾਸਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੨੮. ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਞਾਣਂ ਕਿਂਗੋਚਰਨ੍ਤਿ? ਞਾਣਂ ਸਚ੍ਚਗੋਚਰਨ੍ਤਿ. ਸੋਤਂ ਸਚ੍ਚਗੋਚਰਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਸੋਤਂ ਕਿਂ ਗੋਚਰਨ੍ਤਿ? ਸੋਤਂ ਸਦ੍ਦਗੋਚਰਨ੍ਤਿ. ਞਾਣਂ ਸਦ੍ਦਗੋਚਰਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ ਞਾਣਂ ਸਚ੍ਚਗੋਚਰਂ, ਸੋਤਂ ਸਦ੍ਦਗੋਚਰਨ੍ਤਿ? ਆਮਨ੍ਤਾ. ਹਞ੍ਚਿ ਞਾਣਂ ਸਚ੍ਚਗੋਚਰਂ, ਸੋਤਂ ਸਦ੍ਦਗੋਚਰਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ ਞਾਣਂ ਸਚ੍ਚਗੋਚਰਂ, ਸੋਤਂ ਸਦ੍ਦਗੋਚਰਨ੍ਤਿ? ਆਮਨ੍ਤਾ. ਦ੍ਵਿਨ੍ਨਂ ਫਸ੍ਸਾਨਂ, ਦ੍ਵਿਨ੍ਨਂ ਵੇਦਨਾਨਂ, ਦ੍ਵਿਨ੍ਨਂ ਸਞ੍ਞਾਨਂ, ਦ੍ਵਿਨ੍ਨਂ ਚੇਤਨਾਨਂ, ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ.

੩੨੯. ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ.

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਆਪੋਕਸਿਣਂ…ਪੇ… ਤੇਜੋਕਸਿਣਂ… ਵਾਯੋਕਸਿਣਂ… ਨੀਲਕਸਿਣਂ… ਪੀਤਕਸਿਣਂ… ਲੋਹਿਤਕਸਿਣਂ… ਓਦਾਤਕਸਿਣਂ… ਆਕਾਸਾਨਞ੍ਚਾਯਤਨਂ … ਵਿਞ੍ਞਾਣਞ੍ਚਾਯਤਨਂ… ਆਕਿਞ੍ਚਞ੍ਞਾਯਤਨਂ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਹਞ੍ਚਿ ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

ਆਪੋਕਸਿਣਂ … ਤੇਜੋਕਸਿਣਂ… ਵਾਯੋਕਸਿਣਂ… ਨੀਲਕਸਿਣਂ… ਪੀਤਕਸਿਣਂ… ਲੋਹਿਤਕਸਿਣਂ… ਓਦਾਤਕਸਿਣਂ… ਆਕਾਸਾਨਞ੍ਚਾਯਤਨਂ … ਵਿਞ੍ਞਾਣਞ੍ਚਾਯਤਨਂ… ਆਕਿਞ੍ਚਞ੍ਞਾਯਤਨਂ… ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਹਞ੍ਚਿ ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕਿਯਸਮਾਪਤ੍ਤਿਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕਿਯਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕਿਯਂ ਦੁਤਿਯਂ ਝਾਨਂ… ਤਤਿਯਂ ਝਾਨਂ… ਚਤੁਤ੍ਥਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਲੋਕਿਯਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਹਞ੍ਚਿ ਲੋਕਿਯਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

ਲੋਕਿਯਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਹਞ੍ਚਿ ਲੋਕਿਯਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

ਲੋਕਿਯਂ ਦੁਤਿਯਂ ਝਾਨਂ… ਤਤਿਯਂ ਝਾਨਂ… ਚਤੁਤ੍ਥਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਹਞ੍ਚਿ ਲੋਕਿਯਂ ਚਤੁਤ੍ਥਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

੩੩੦. ਲੋਕੁਤ੍ਤਰਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕਿਯਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਲੋਕੁਤ੍ਤਰਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕਿਯਂ ਦੁਤਿਯਂ ਝਾਨਂ… ਤਤਿਯਂ ਝਾਨਂ… ਚਤੁਤ੍ਥਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਲੋਕਿਯਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕੁਤ੍ਤਰਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਲੋਕਿਯਂ ਦੁਤਿਯਂ ਝਾਨਂ… ਤਤਿਯਂ ਝਾਨਂ… ਚਤੁਤ੍ਥਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕੁਤ੍ਤਰਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੩੧. ਲੋਕੁਤ੍ਤਰਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕੁਤ੍ਤਰਂ ਦੁਤਿਯਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਲੋਕੁਤ੍ਤਰਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕੁਤ੍ਤਰਂ ਤਤਿਯਂ ਝਾਨਂ… ਚਤੁਤ੍ਥਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਲੋਕੁਤ੍ਤਰਂ ਦੁਤਿਯਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕੁਤ੍ਤਰਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਲੋਕੁਤ੍ਤਰਂ ਦੁਤਿਯਂ ਝਾਨਂ… ਤਤਿਯਂ ਝਾਨਂ… ਚਤੁਤ੍ਥਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਲੋਕੁਤ੍ਤਰਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਨਤ੍ਥਿ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੩੨. ਨ ਵਤ੍ਤਬ੍ਬਂ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ? ਆਮਨ੍ਤਾ. ਨਨੁ ਵਿਤਕ੍ਕਵਿਚਾਰਾ ਵਚੀਸਙ੍ਖਾਰਾ ਵੁਤ੍ਤਾ ਭਗਵਤਾ – ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ’’ਤਿ? ਆਮਨ੍ਤਾ. ਹਞ੍ਚਿ ਵਿਤਕ੍ਕਵਿਚਾਰਾ ਵਚੀਸਙ੍ਖਾਰਾ ਵੁਤ੍ਤਾ ਭਗਵਤਾ – ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ,’’ ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

ਵਿਤਕ੍ਕਵਿਚਾਰਾ ਵਚੀਸਙ੍ਖਾਰਾ ਵੁਤ੍ਤਾ ਭਗਵਤਾ – ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ’’ਤਿ [ਅਤ੍ਥਿ ਵਿਤਕ੍ਕਵਿਚਾਰਾ (ਸ੍ਯਾ.) ਏਵਮੁਪਰਿਪਿ], ਅਤ੍ਥਿ ਤਸ੍ਸ ਵਚੀਭੇਦੋਤਿ? ਆਮਨ੍ਤਾ. ਪਥਵੀਕਸਿਣਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ, ਅਤ੍ਥਿ ਤਸ੍ਸ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਤਕ੍ਕਵਿਚਾਰਾ ਵਚੀਸਙ੍ਖਾਰਾ ਵੁਤ੍ਤਾ ਭਗਵਤਾ – ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ’’ਤਿ, ਅਤ੍ਥਿ ਤਸ੍ਸ ਵਚੀਭੇਦੋਤਿ? ਆਮਨ੍ਤਾ. ਆਪੋਕਸਿਣਂ… ਤੇਜੋਕਸਿਣਂ… ਵਾਯੋਕਸਿਣਂ… ਨੀਲਕਸਿਣਂ… ਪੀਤਕਸਿਣਂ… ਲੋਹਿਤਕਸਿਣਂ… ਓਦਾਤਕਸਿਣਂ ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ, ਅਤ੍ਥਿ ਤਸ੍ਸ ਵਚੀਭੇਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ? ਆਮਨ੍ਤਾ. ਨਨੁ ਵਿਤਕ੍ਕਸਮੁਟ੍ਠਾਨਾ ਵਾਚਾ ਵੁਤ੍ਤਾ ਭਗਵਤਾ – ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ’’ਤਿ? ਆਮਨ੍ਤਾ. ਹਞ੍ਚਿ ਵਿਤਕ੍ਕਸਮੁਟ੍ਠਾਨਾ ਵਾਚਾ ਵੁਤ੍ਤਾ ਭਗਵਤਾ – ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ,’’ ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

ਵਿਤਕ੍ਕਸਮੁਟ੍ਠਾਨਾ ਵਾਚਾ ਵੁਤ੍ਤਾ ਭਗਵਤਾ – ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ’’ਤਿ, ਅਤ੍ਥਿ ਤਸ੍ਸ ਵਚੀਭੇਦੋਤਿ? ਆਮਨ੍ਤਾ. ਸਞ੍ਞਾਸਮੁਟ੍ਠਾਨਾ ਵਾਚਾ ਵੁਤ੍ਤਾ ਭਗਵਤਾ – ‘‘ਦੁਤਿਯਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਸਞ੍ਞਾ, ਅਤ੍ਥਿ ਤਸ੍ਸ ਵਿਤਕ੍ਕਵਿਚਾਰਾ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਤਕ੍ਕਸਮੁਟ੍ਠਾਨਾ ਵਾਚਾ ਵੁਤ੍ਤਾ ਭਗਵਤਾ – ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਅਤ੍ਥਿ ਵਿਤਕ੍ਕਵਿਚਾਰਾ’’ਤਿ, ਅਤ੍ਥਿ ਤਸ੍ਸ ਵਚੀਭੇਦੋਤਿ? ਆਮਨ੍ਤਾ. ਸਞ੍ਞਾਸਮੁਟ੍ਠਾਨਾ ਵਾਚਾ ਵੁਤ੍ਤਾ ਭਗਵਤਾ – ਤਤਿਯਂ ਝਾਨਂ…ਪੇ… ਚਤੁਤ੍ਥਂ ਝਾਨਂ… ਆਕਾਸਾਨਞ੍ਚਾਯਤਨਂ… ਵਿਞ੍ਞਾਣਞ੍ਚਾਯਤਨਂ… ਆਕਿਞ੍ਚਞ੍ਞਾਯਤਨਂ ਸਮਾਪਨ੍ਨਸ੍ਸ ਅਤ੍ਥਿ ਸਞ੍ਞਾ, ਅਤ੍ਥਿ ਤਸ੍ਸ ਵਿਤਕ੍ਕਵਿਚਾਰਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੩੩. ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਨਨੁ ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਵਾਚਾ ਨਿਰੁਦ੍ਧਾ ਹੋਤੀ’’ਤਿ [ਸਂ. ਨਿ. ੪.੨੫੯, ੨੬੩]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਹਞ੍ਚਿ ‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਵਾਚਾ ਨਿਰੁਦ੍ਧਾ ਹੋਤੀ’’ਤਿ, ਅਤ੍ਥੇਵ ਸੁਤ੍ਤਨ੍ਤੋਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਵਾਚਾ ਨਿਰੁਦ੍ਧਾ ਹੋਤੀ’’ਤਿ [ਸਂ. ਨਿ. ੪.੨੫੯, ੨੬੩], ਅਤ੍ਥੇਵ ਸੁਤ੍ਤਨ੍ਤੋਤਿ, ਅਤ੍ਥਿ ਤਸ੍ਸ ਵਚੀਭੇਦੋਤਿ? ਆਮਨ੍ਤਾ. ‘‘ਦੁਤਿਯਂ ਝਾਨਂ ਸਮਾਪਨ੍ਨਸ੍ਸ ਵਿਤਕ੍ਕਵਿਚਾਰਾ ਨਿਰੁਦ੍ਧਾ ਹੋਨ੍ਤੀ’’ਤਿ [ਸਂ. ਨਿ. ੪.੨੫੯, ੨੬੩], ਅਤ੍ਥੇਵ ਸੁਤ੍ਤਨ੍ਤੋਤਿ, ਅਤ੍ਥਿ ਤਸ੍ਸ ਵਿਤਕ੍ਕਵਿਚਾਰਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

‘‘ਪਠਮਂ ਝਾਨਂ ਸਮਾਪਨ੍ਨਸ੍ਸ ਵਾਚਾ ਨਿਰੁਦ੍ਧਾ ਹੋਤੀ’’ਤਿ [ਸਂ. ਨਿ. ੪.੨੫੯, ੨੬੩], ਅਤ੍ਥੇਵ ਸੁਤ੍ਤਨ੍ਤੋਤਿ, ਅਤ੍ਥਿ ਤਸ੍ਸ ਵਚੀਭੇਦੋਤਿ? ਆਮਨ੍ਤਾ. ‘‘ਤਤਿਯਂ ਝਾਨਂ ਸਮਾਪਨ੍ਨਸ੍ਸ ਪੀਤਿ ਨਿਰੁਦ੍ਧਾ ਹੋਤਿ, ਚਤੁਤ੍ਥਂ ਝਾਨਂ ਸਮਾਪਨ੍ਨਸ੍ਸ ਅਸ੍ਸਾਸਪਸ੍ਸਾਸਾ ਨਿਰੁਦ੍ਧਾ ਹੋਨ੍ਤਿ, ਆਕਾਸਾਨਞ੍ਚਾਯਤਨਂ ਸਮਾਪਨ੍ਨਸ੍ਸ ਰੂਪਸਞ੍ਞਾ ਨਿਰੁਦ੍ਧਾ ਹੋਤਿ, ਵਿਞ੍ਞਾਣਞ੍ਚਾਯਤਨਂ ਸਮਾਪਨ੍ਨਸ੍ਸ ਆਕਾਸਾਨਞ੍ਚਾਯਤਨਸਞ੍ਞਾ ਨਿਰੁਦ੍ਧਾ ਹੋਤਿ, ਆਕਿਞ੍ਚਞ੍ਞਾਯਤਨਂ ਸਮਾਪਨ੍ਨਸ੍ਸ ਵਿਞ੍ਞਾਣਞ੍ਚਾਯਤਨਸਞ੍ਞਾ ਨਿਰੁਦ੍ਧਾ ਹੋਤਿ, ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਸ੍ਸ ਆਕਿਞ੍ਚਞ੍ਞਾਯਤਨਸਞ੍ਞਾ ਨਿਰੁਦ੍ਧਾ ਹੋਤਿ, ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਸਞ੍ਞਾ ਚ ਵੇਦਨਾ ਚ ਨਿਰੁਦ੍ਧਾ ਹੋਨ੍ਤੀ’’ਤਿ [ਸਂ. ਨਿ. ੪.੨੫੯, ੨੬੩; ਅ. ਨਿ. ੯.੩੧; ਦੀ. ਨਿ. ੩.੩੪੪], ਅਤ੍ਥੇਵ ਸੁਤ੍ਤਨ੍ਤੋਤਿ, ਅਤ੍ਥਿ ਤਸ੍ਸ ਸਞ੍ਞਾ ਚ ਵੇਦਨਾ ਚਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ? ਆਮਨ੍ਤਾ. ਨਨੁ ਪਠਮਸ੍ਸ ਝਾਨਸ੍ਸ ਸਦ੍ਦੋ ਕਣ੍ਡਕੋ [ਕਣ੍ਟਕੋ (ਸ੍ਯਾ.) ਅ. ਨਿ. ੧੦.੭੨] ਵੁਤ੍ਤੋ ਭਗਵਤਾਤਿ [ਅ. ਨਿ. ੧੦.੭੨ ਕਣ੍ਟਕਸੁਤ੍ਤਂ ਨਿਸ੍ਸਾਯ ਪੁਚ੍ਛਤਿ]? ਆਮਨ੍ਤਾ. ਹਞ੍ਚਿ ਪਠਮਸ੍ਸ ਝਾਨਸ੍ਸ ਸਦ੍ਦੋ ਕਣ੍ਟਕੋ ਵੁਤ੍ਤੋ ਭਗਵਤਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ.

ਪਠਮਸ੍ਸ ਝਾਨਸ੍ਸ ਸਦ੍ਦੋ ਕਣ੍ਟਕੋ ਵੁਤ੍ਤੋ ਭਗਵਤਾਤਿ, ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ? ਆਮਨ੍ਤਾ. ਦੁਤਿਯਸ੍ਸ ਝਾਨਸ੍ਸ ਵਿਤਕ੍ਕਵਿਚਾਰਾ ਕਣ੍ਟਕੋ ਵੁਤ੍ਤੋ ਭਗਵਤਾ… ਤਤਿਯਸ੍ਸ ਝਾਨਸ੍ਸ ਪੀਤਿ ਕਣ੍ਟਕੋ ਵੁਤ੍ਤੋ ਭਗਵਤਾ… ਚਤੁਤ੍ਥਸ੍ਸ ਝਾਨਸ੍ਸ ਅਸ੍ਸਾਸਪਸ੍ਸਾਸਾ ਕਣ੍ਟਕੋ ਵੁਤ੍ਤੋ ਭਗਵਤਾ [ਅ. ਨਿ. ੧੦.੭੨] … ਆਕਾਸਾਨਞ੍ਚਾਯਤਨਂ ਸਮਾਪਨ੍ਨਸ੍ਸ ਰੂਪਸਞ੍ਞਾ ਕਣ੍ਟਕੋ ਵੁਤ੍ਤੋ ਭਗਵਤਾ… ਵਿਞ੍ਞਾਣਞ੍ਚਾਯਤਨਂ ਸਮਾਪਨ੍ਨਸ੍ਸ ਆਕਾਸਾਨਞ੍ਚਾਯਤਨਸਞ੍ਞਾ ਕਣ੍ਟਕੋ ਵੁਤ੍ਤੋ ਭਗਵਤਾ… ਆਕਿਞ੍ਚਞ੍ਞਾਯਤਨਂ ਸਮਾਪਨ੍ਨਸ੍ਸ ਵਿਞ੍ਞਾਣਞ੍ਚਾਯਤਨਸਞ੍ਞਾ ਕਣ੍ਟਕੋ ਵੁਤ੍ਤੋ ਭਗਵਤਾ… ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਸ੍ਸ ਆਕਿਞ੍ਚਞ੍ਞਾਯਤਨਸਞ੍ਞਾ ਕਣ੍ਟਕੋ ਵੁਤ੍ਤੋ ਭਗਵਤਾ… ਸਞ੍ਞਾਵੇਦਯਿਤਨਿਰੋਧਂ ਸਮਾਪਨ੍ਨਸ੍ਸ ਸਞ੍ਞਾ ਚ ਵੇਦਨਾ ਚ ਕਣ੍ਟਕੋ ਵੁਤ੍ਤੋ ਭਗਵਤਾ [ਅ. ਨਿ. ੧੦.੭੨], ਅਤ੍ਥਿ ਤਸ੍ਸ ਸਞ੍ਞਾ ਚ ਵੇਦਨਾ ਚਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ – ‘‘ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸਿਖਿਸ੍ਸ, ਆਨਨ੍ਦ, ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਅਭਿਭੂ ਨਾਮ ਸਾਵਕੋ ਬ੍ਰਹ੍ਮਲੋਕੇ ਠਿਤੋ ਦਸਸਹਸ੍ਸਿਲੋਕਧਾਤੁਂ ਸਰੇਨ ਵਿਞ੍ਞਾਪੇਸਿ –

‘ਆਰਬ੍ਭਥ ਨਿਕ੍ਕਮਥ, ਯੁਞ੍ਜਥ ਬੁਦ੍ਧਸਾਸਨੇ;

ਧੁਨਾਥ ਮਚ੍ਚੁਨੋ ਸੇਨਂ, ਨਲ਼ਾਗਾਰਂਵ ਕੁਞ੍ਜਰੋ.

‘ਯੋ ਇਮਸ੍ਮਿਂ ਧਮ੍ਮਵਿਨਯੇ, ਅਪ੍ਪਮਤ੍ਤੋ ਵਿਹਸ੍ਸਤਿ [ਵਿਹੇਸ੍ਸਤਿ (ਸੀ. ਸ੍ਯਾ. ਕਂ.) ਵਿਹਰਿਸ੍ਸਤਿ (ਕ.)];

ਪਹਾਯ ਜਾਤਿਸਂਸਾਰਂ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਤੀ’’’ਤਿ [ਅ. ਨਿ. ੧ ਤਿਕਨਿਪਾਤੇ; ਸਂ. ਨਿ. ੧.੨੮੫].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਸਮਾਪਨ੍ਨਸ੍ਸ ਅਤ੍ਥਿ ਵਚੀਭੇਦੋਤਿ.

ਵਚੀਭੇਦਕਥਾ ਨਿਟ੍ਠਿਤਾ.