੨. ਦੁਤਿਯਵਗ੍ਗੋ

(੧੯) ੧੦. ਵੋਹਾਰਕਥਾ

੩੪੭. ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋਤਿ? ਆਮਨ੍ਤਾ. ਲੋਕੁਤ੍ਤਰੇ ਸੋਤੇ ਪਟਿਹਞ੍ਞਤਿ ਨੋ ਲੋਕਿਯੇ, ਲੋਕੁਤ੍ਤਰੇਨ ਵਿਞ੍ਞਾਣੇਨ ਪਟਿਵਿਜਾਨਨ੍ਤਿ ਨੋ ਲੋਕਿਯੇਨ, ਸਾਵਕਾ ਪਟਿਵਿਜਾਨਨ੍ਤਿ ਨੋ ਪੁਥੁਜ੍ਜਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਨੁ ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕਿਯੇ ਸੋਤੇ ਪਟਿਹਞ੍ਞਤੀਤਿ? ਆਮਨ੍ਤਾ. ਹਞ੍ਚਿ ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕਿਯੇ ਸੋਤੇ ਪਟਿਹਞ੍ਞਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋ’’ਤਿ.

ਨਨੁ ਬੁਦ੍ਧਸ੍ਸ ਭਗਵਤੋ ਵੋਹਾਰਂ ਲੋਕਿਯੇਨ ਵਿਞ੍ਞਾਣੇਨ ਪਟਿਵਿਜਾਨਨ੍ਤੀਤਿ? ਆਮਨ੍ਤਾ. ਹਞ੍ਚਿ ਬੁਦ੍ਧਸ੍ਸ ਭਗਵਤੋ ਵੋਹਾਰਂ ਲੋਕਿਯੇਨ ਵਿਞ੍ਞਾਣੇਨ ਪਟਿਵਿਜਾਨਨ੍ਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋ’’ਤਿ.

ਨਨੁ ਬੁਦ੍ਧਸ੍ਸ ਭਗਵਤੋ ਵੋਹਾਰਂ ਪੁਥੁਜ੍ਜਨਾ ਪਟਿਵਿਜਾਨਨ੍ਤੀਤਿ? ਆਮਨ੍ਤਾ. ਹਞ੍ਚਿ ਬੁਦ੍ਧਸ੍ਸ ਭਗਵਤੋ ਵੋਹਾਰਂ ਪੁਥੁਜ੍ਜਨਾ ਪਟਿਵਿਜਾਨਨ੍ਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋ’’ਤਿ.

੩੪੮. ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋਤਿ? ਆਮਨ੍ਤਾ. ਮਗ੍ਗੋ ਫਲਂ ਨਿਬ੍ਬਾਨਂ, ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ, ਸਕਦਾਗਾਮਿਮਗ੍ਗੋ ਸਕਦਾਗਾਮਿਫਲਂ, ਅਨਾਗਾਮਿਮਗ੍ਗੋ ਅਨਾਗਾਮਿਫਲਂ, ਅਰਹਤ੍ਤਮਗ੍ਗੋ ਅਰਹਤ੍ਤਫਲਂ, ਸਤਿਪਟ੍ਠਾਨਂ ਸਮ੍ਮਪ੍ਪਧਾਨਂ ਇਦ੍ਧਿਪਾਦੋ ਇਨ੍ਦ੍ਰਿਯਂ ਬਲਂ ਬੋਜ੍ਝਙ੍ਗੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋਤਿ? ਆਮਨ੍ਤਾ. ਅਤ੍ਥਿ ਕੇਚਿ ਬੁਦ੍ਧਸ੍ਸ ਭਗਵਤੋ ਵੋਹਾਰਂ ਸੁਣਨ੍ਤੀਤਿ? ਆਮਨ੍ਤਾ. ਲੋਕੁਤ੍ਤਰੋ ਧਮ੍ਮੋ ਸੋਤਵਿਞ੍ਞੇਯ੍ਯੋ, ਸੋਤਸ੍ਮਿਂ ਪਟਿਹਞ੍ਞਤਿ, ਸੋਤਸ੍ਸ ਆਪਾਥਂ ਆਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਨੁ ਲੋਕੁਤ੍ਤਰੋ ਧਮ੍ਮੋ ਨ ਸੋਤਵਿਞ੍ਞੇਯ੍ਯੋ, ਨ ਸੋਤਸ੍ਮਿਂ ਪਟਿਹਞ੍ਞਤਿ, ਨ ਸੋਤਸ੍ਸ ਆਪਾਥਂ ਆਗਚ੍ਛਤੀਤਿ? ਆਮਨ੍ਤਾ. ਹਞ੍ਚਿ ਲੋਕੁਤ੍ਤਰੋ ਧਮ੍ਮੋ ਨ ਸੋਤਵਿਞ੍ਞੇਯ੍ਯੋ, ਨ ਸੋਤਸ੍ਮਿਂ ਪਟਿਹਞ੍ਞਤਿ, ਨ ਸੋਤਸ੍ਸ ਆਪਾਥਂ ਆਗਚ੍ਛਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋ’’ਤਿ.

੩੪੯. ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋਤਿ? ਆਮਨ੍ਤਾ. ਅਤ੍ਥਿ ਕੇਚਿ ਬੁਦ੍ਧਸ੍ਸ ਭਗਵਤੋ ਵੋਹਾਰੇ ਰਜ੍ਜੇਯ੍ਯੁਨ੍ਤਿ? ਆਮਨ੍ਤਾ. ਲੋਕੁਤ੍ਤਰੋ ਧਮ੍ਮੋ ਰਾਗਟ੍ਠਾਨਿਯੋ ਰਜਨੀਯੋ ਕਮਨੀਯੋ ਮਦਨੀਯੋ ਬਨ੍ਧਨੀਯੋ ਮੁਚ੍ਛਨੀਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਨੁ ਲੋਕੁਤ੍ਤਰੋ ਧਮ੍ਮੋ ਨ ਰਾਗਟ੍ਠਾਨਿਯੋ ਨ ਰਜਨੀਯੋ ਨ ਕਮਨੀਯੋ ਨ ਮਦਨੀਯੋ ਨ ਬਨ੍ਧਨੀਯੋ ਨ ਮੁਚ੍ਛਨੀਯੋਤਿ? ਆਮਨ੍ਤਾ. ਹਞ੍ਚਿ ਲੋਕੁਤ੍ਤਰੋ ਧਮ੍ਮੋ ਨ ਰਾਗਟ੍ਠਾਨਿਯੋ ਨ ਰਜਨੀਯੋ ਨ ਕਮਨੀਯੋ ਨ ਮਦਨੀਯੋ ਨ ਬਨ੍ਧਨੀਯੋ ਨ ਮੁਚ੍ਛਨੀਯੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋ’’ਤਿ.

ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋਤਿ? ਆਮਨ੍ਤਾ. ਅਤ੍ਥਿ ਕੇਚਿ ਬੁਦ੍ਧਸ੍ਸ ਭਗਵਤੋ ਵੋਹਾਰੇ ਦੁਸ੍ਸੇਯ੍ਯੁਨ੍ਤਿ? ਆਮਨ੍ਤਾ. ਲੋਕੁਤ੍ਤਰੋ ਧਮ੍ਮੋ ਦੋਸਟ੍ਠਾਨਿਯੋ ਕੋਪਟ੍ਠਾਨਿਯੋ ਪਟਿਘਟ੍ਠਾਨਿਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਨੁ ਲੋਕੁਤ੍ਤਰੋ ਧਮ੍ਮੋ ਨ ਦੋਸਟ੍ਠਾਨਿਯੋ ਨ ਕੋਪਟ੍ਠਾਨਿਯੋ ਨ ਪਟਿਘਟ੍ਠਾਨਿਯੋਤਿ? ਆਮਨ੍ਤਾ. ਹਞ੍ਚਿ ਲੋਕੁਤ੍ਤਰੋ ਧਮ੍ਮੋ ਨ ਦੋਸਟ੍ਠਾਨਿਯੋ ਨ ਕੋਪਟ੍ਠਾਨਿਯੋ ਨ ਪਟਿਘਟ੍ਠਾਨਿਯੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋ’’ਤਿ.

ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋਤਿ? ਆਮਨ੍ਤਾ. ਅਤ੍ਥਿ ਕੇਚਿ ਬੁਦ੍ਧਸ੍ਸ ਭਗਵਤੋ ਵੋਹਾਰੇ ਮੁਯ੍ਹੇਯ੍ਯੁਨ੍ਤਿ? ਆਮਨ੍ਤਾ. ਲੋਕੁਤ੍ਤਰੋ ਧਮ੍ਮੋ ਮੋਹਟ੍ਠਾਨਿਯੋ ਅਞ੍ਞਾਣਕਰਣੋ ਅਚਕ੍ਖੁਕਰਣੋ ਪਞ੍ਞਾਨਿਰੋਧਿਕੋ ਵਿਘਾਤਪਕ੍ਖਿਕੋ ਅਨਿਬ੍ਬਾਨਸਂਵਤ੍ਤਨਿਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਨੁ ਲੋਕੁਤ੍ਤਰੋ ਧਮ੍ਮੋ ਨ ਮੋਹਟ੍ਠਾਨਿਯੋ ਨ ਅਞ੍ਞਾਣਕਰਣੋ ਨ ਅਚਕ੍ਖੁਕਰਣੋ ਪਞ੍ਞਾਵੁਦ੍ਧਿਕੋ ਅਵਿਘਾਤਪਕ੍ਖਿਕੋ ਨਿਬ੍ਬਾਨਸਂਵਤ੍ਤਨਿਕੋਤਿ? ਆਮਨ੍ਤਾ. ਹਞ੍ਚਿ ਲੋਕੁਤ੍ਤਰੋ ਧਮ੍ਮੋ ਨ ਮੋਹਟ੍ਠਾਨਿਯੋ ਨ ਅਞ੍ਞਾਣਕਰਣੋ ਨ ਅਚਕ੍ਖੁਕਰਣੋ ਪਞ੍ਞਾਵੁਦ੍ਧਿਕੋ ਅਵਿਘਾਤਪਕ੍ਖਿਕੋ ਨਿਬ੍ਬਾਨਸਂਵਤ੍ਤਨਿਕੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋ’’ਤਿ.

੩੫੦. ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕੁਤ੍ਤਰੋਤਿ? ਆਮਨ੍ਤਾ. ਯੇ ਕੇਚਿ ਬੁਦ੍ਧਸ੍ਸ ਭਗਵਤੋ ਵੋਹਾਰਂ ਸੁਣਨ੍ਤਿ, ਸਬ੍ਬੇ ਤੇ ਮਗ੍ਗਂ ਭਾਵੇਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਯੇ ਕੇਚਿ ਬੁਦ੍ਧਸ੍ਸ ਭਗਵਤੋ ਵੋਹਾਰਂ ਸੁਣਨ੍ਤਿ, ਸਬ੍ਬੇ ਤੇ ਮਗ੍ਗਂ ਭਾਵੇਨ੍ਤੀਤਿ? ਆਮਨ੍ਤਾ. ਬਾਲਪੁਥੁਜ੍ਜਨਾ ਬੁਦ੍ਧਸ੍ਸ ਭਗਵਤੋ ਵੋਹਾਰਂ ਸੁਣਨ੍ਤਿ, ਬਾਲਪੁਥੁਜ੍ਜਨਾ ਮਗ੍ਗਂ ਭਾਵੇਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਾਤੁਘਾਤਕੋ ਮਗ੍ਗਂ ਭਾਵੇਤਿ…ਪੇ… ਪਿਤੁਘਾਤਕੋ… ਅਰਹਨ੍ਤਘਾਤਕੋ… ਰੁਹਿਰੁਪ੍ਪਾਦਕੋ… ਸਙ੍ਘਭੇਦਕੋ ਬੁਦ੍ਧਸ੍ਸ ਭਗਵਤੋ ਵੋਹਾਰਂ ਸੁਣਾਤਿ, ਸਙ੍ਘਭੇਦਕੋ ਮਗ੍ਗਂ ਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੫੧. ਲਬ੍ਭਾ ਸੋਵਣ੍ਣਮਯਾਯ ਲਟ੍ਠਿਯਾ ਧਞ੍ਞਪੁਞ੍ਜੋਪਿ ਸੁਵਣ੍ਣਪੁਞ੍ਜੋਪਿ ਆਚਿਕ੍ਖਿਤੁਨ੍ਤਿ? ਆਮਨ੍ਤਾ. ਏਵਮੇਵਂ ਭਗਵਾ ਲੋਕੁਤ੍ਤਰੇਨ ਵੋਹਾਰੇਨ ਲੋਕਿਯਮ੍ਪਿ ਲੋਕੁਤ੍ਤਰਮ੍ਪਿ ਧਮ੍ਮਂ ਵੋਹਰਤੀਤਿ.

ਲਬ੍ਭਾ ਏਲਣ੍ਡਿਯਾਯ ਲਟ੍ਠਿਯਾ ਧਞ੍ਞਪੁਞ੍ਜੋਪਿ ਸੁਵਣ੍ਣਪੁਞ੍ਜੋਪਿ ਆਚਿਕ੍ਖਿਤੁਨ੍ਤਿ? ਆਮਨ੍ਤਾ. ਏਵਮੇਵਂ ਭਗਵਾ ਲੋਕਿਯੇਨ ਵੋਹਾਰੇਨ ਲੋਕਿਯਮ੍ਪਿ ਲੋਕੁਤ੍ਤਰਮ੍ਪਿ ਧਮ੍ਮਂ ਵੋਹਰਤੀਤਿ.

੩੫੨. ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕਿਯਂ ਵੋਹਰਨ੍ਤਸ੍ਸ ਲੋਕਿਯੋ ਹੋਤਿ, ਲੋਕੁਤ੍ਤਰਂ ਵੋਹਰਨ੍ਤਸ੍ਸ ਲੋਕੁਤ੍ਤਰੋ ਹੋਤੀਤਿ? ਆਮਨ੍ਤਾ. ਲੋਕਿਯਂ ਵੋਹਰਨ੍ਤਸ੍ਸ ਲੋਕਿਯੇ ਸੋਤੇ ਪਟਿਹਞ੍ਞਤਿ, ਲੋਕੁਤ੍ਤਰਂ ਵੋਹਰਨ੍ਤਸ੍ਸ ਲੋਕੁਤ੍ਤਰੇ ਸੋਤੇ ਪਟਿਹਞ੍ਞਤਿ; ਲੋਕਿਯਂ ਵੋਹਰਨ੍ਤਸ੍ਸ ਲੋਕਿਯੇਨ ਵਿਞ੍ਞਾਣੇਨ ਪਟਿਵਿਜਾਨਨ੍ਤਿ, ਲੋਕੁਤ੍ਤਰਂ ਵੋਹਰਨ੍ਤਸ੍ਸ ਲੋਕੁਤ੍ਤਰੇਨ ਵਿਞ੍ਞਾਣੇਨ ਪਟਿਵਿਜਾਨਨ੍ਤਿ; ਲੋਕਿਯਂ ਵੋਹਰਨ੍ਤਸ੍ਸ ਪੁਥੁਜ੍ਜਨਾ ਪਟਿਵਿਜਾਨਨ੍ਤਿ, ਲੋਕੁਤ੍ਤਰਂ ਵੋਹਰਨ੍ਤਸ੍ਸ ਸਾਵਕਾ ਪਟਿਵਿਜਾਨਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ – ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕਿਯਂ ਵੋਹਰਨ੍ਤਸ੍ਸ ਲੋਕਿਯੋ ਹੋਤਿ, ਲੋਕੁਤ੍ਤਰਂ ਵੋਹਰਨ੍ਤਸ੍ਸ ਲੋਕੁਤ੍ਤਰੋ ਹੋਤੀਤਿ? ਆਮਨ੍ਤਾ. ਨਨੁ ਭਗਵਾ ਲੋਕਿਯਮ੍ਪਿ ਲੋਕੁਤ੍ਤਰਮ੍ਪਿ ਧਮ੍ਮਂ ਵੋਹਰਤੀਤਿ? ਆਮਨ੍ਤਾ. ਹਞ੍ਚਿ ਭਗਵਾ ਲੋਕਿਯਮ੍ਪਿ ਲੋਕੁਤ੍ਤਰਮ੍ਪਿ ਧਮ੍ਮਂ ਵੋਹਰਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕਿਯਂ ਵੋਹਰਨ੍ਤਸ੍ਸ ਲੋਕਿਯੋ ਹੋਤਿ, ਲੋਕੁਤ੍ਤਰਂ ਵੋਹਰਨ੍ਤਸ੍ਸ ਲੋਕੁਤ੍ਤਰੋ ਹੋਤੀ’’ਤਿ.

ਬੁਦ੍ਧਸ੍ਸ ਭਗਵਤੋ ਵੋਹਾਰੋ ਲੋਕਿਯਂ ਵੋਹਰਨ੍ਤਸ੍ਸ ਲੋਕਿਯੋ ਹੋਤਿ, ਲੋਕੁਤ੍ਤਰਂ ਵੋਹਰਨ੍ਤਸ੍ਸ ਲੋਕੁਤ੍ਤਰੋ ਹੋਤੀਤਿ? ਆਮਨ੍ਤਾ. ਮਗ੍ਗਂ ਵੋਹਰਨ੍ਤਸ੍ਸ ਮਗ੍ਗੋ ਹੋਤਿ, ਅਮਗ੍ਗਂ ਵੋਹਰਨ੍ਤਸ੍ਸ ਅਮਗ੍ਗੋ ਹੋਤਿ, ਫਲਂ ਵੋਹਰਨ੍ਤਸ੍ਸ ਫਲਂ ਹੋਤਿ, ਅਫਲਂ ਵੋਹਰਨ੍ਤਸ੍ਸ ਅਫਲਂ ਹੋਤਿ, ਨਿਬ੍ਬਾਨਂ ਵੋਹਰਨ੍ਤਸ੍ਸ ਨਿਬ੍ਬਾਨਂ ਹੋਤਿ, ਅਨਿਬ੍ਬਾਨਂ ਵੋਹਰਨ੍ਤਸ੍ਸ ਅਨਿਬ੍ਬਾਨਂ ਹੋਤਿ, ਸਙ੍ਖਤਂ ਵੋਹਰਨ੍ਤਸ੍ਸ ਸਙ੍ਖਤਂ ਹੋਤਿ, ਅਸਙ੍ਖਤਂ ਵੋਹਰਨ੍ਤਸ੍ਸ ਅਸਙ੍ਖਤਂ ਹੋਤਿ, ਰੂਪਂ ਵੋਹਰਨ੍ਤਸ੍ਸ ਰੂਪਂ ਹੋਤਿ, ਅਰੂਪਂ ਵੋਹਰਨ੍ਤਸ੍ਸ ਅਰੂਪਂ ਹੋਤਿ, ਵੇਦਨਂ ਵੋਹਰਨ੍ਤਸ੍ਸ ਵੇਦਨਾ ਹੋਤਿ, ਅਵੇਦਨਂ ਵੋਹਰਨ੍ਤਸ੍ਸ ਅਵੇਦਨਾ ਹੋਤਿ, ਸਞ੍ਞਂ ਵੋਹਰਨ੍ਤਸ੍ਸ ਸਞ੍ਞਾ ਹੋਤਿ, ਅਸਞ੍ਞਂ ਵੋਹਰਨ੍ਤਸ੍ਸ ਅਸਞ੍ਞਾ ਹੋਤਿ, ਸਙ੍ਖਾਰੇ ਵੋਹਰਨ੍ਤਸ੍ਸ ਸਙ੍ਖਾਰਾ ਹੋਨ੍ਤਿ, ਅਸਙ੍ਖਾਰੇ ਵੋਹਰਨ੍ਤਸ੍ਸ ਅਸਙ੍ਖਾਰਾ ਹੋਨ੍ਤਿ, ਵਿਞ੍ਞਾਣਂ ਵੋਹਰਨ੍ਤਸ੍ਸ ਵਿਞ੍ਞਾਣਂ ਹੋਤਿ, ਅਵਿਞ੍ਞਾਣਂ ਵੋਹਰਨ੍ਤਸ੍ਸ ਅਵਿਞ੍ਞਾਣਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵੋਹਾਰਕਥਾ ਨਿਟ੍ਠਿਤਾ.