੨. ਦੁਤਿਯਵਗ੍ਗੋ
(੨੦) ੧੧. ਨਿਰੋਧਕਥਾ
੩੫੩. ਦ੍ਵੇ ਨਿਰੋਧਾਤਿ? ਆਮਨ੍ਤਾ. ਦ੍ਵੇ ਦੁਕ੍ਖਨਿਰੋਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਦੁਕ੍ਖਨਿਰੋਧਾਤਿ? ਆਮਨ੍ਤਾ. ਦ੍ਵੇ ਨਿਰੋਧਸਚ੍ਚਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਨਿਰੋਧਸਚ੍ਚਾਨੀਤਿ? ਆਮਨ੍ਤਾ. ਦ੍ਵੇ ਦੁਕ੍ਖਸਚ੍ਚਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਨਿਰੋਧਸਚ੍ਚਾਨੀਤਿ? ਆਮਨ੍ਤਾ. ਦ੍ਵੇ ਸਮੁਦਯਸਚ੍ਚਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਨਿਰੋਧਸਚ੍ਚਾਨੀਤਿ? ਆਮਨ੍ਤਾ. ਦ੍ਵੇ ਮਗ੍ਗਸਚ੍ਚਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦ੍ਵੇ ਨਿਰੋਧਸਚ੍ਚਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਦ੍ਵੇ ਲੇਣਾਨਿ… ਦ੍ਵੇ ਸਰਣਾਨਿ… ਦ੍ਵੇ ਪਰਾਯਣਾਨਿ… ਦ੍ਵੇ ਅਚ੍ਚੁਤਾਨਿ… ਦ੍ਵੇ ਅਮਤਾਨਿ… ਦ੍ਵੇ ਨਿਬ੍ਬਾਨਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦ੍ਵੇ ਨਿਬ੍ਬਾਨਾਨੀਤਿ? ਆਮਨ੍ਤਾ. ਅਤ੍ਥਿ ਦ੍ਵਿਨ੍ਨਂ ਨਿਬ੍ਬਾਨਾਨਂ ਉਚ੍ਚਨੀਚਤਾ ਹੀਨਪਣੀਤਤਾ ਉਕ੍ਕਂਸਾਵਕਂਸੋ ਸੀਮਾ ਵਾ ਭੇਦੋ ਵਾ ਰਾਜਿ ਵਾ ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦ੍ਵੇ ਨਿਰੋਧਾਤਿ? ਆਮਨ੍ਤਾ. ਨਨੁ ਅਪ੍ਪਟਿਸਙ੍ਖਾਨਿਰੁਦ੍ਧੇ ਸਙ੍ਖਾਰੇ ਪਟਿਸਙ੍ਖਾ ਨਿਰੋਧੇਨ੍ਤੀਤਿ? ਆਮਨ੍ਤਾ. ਹਞ੍ਚਿ ਅਪ੍ਪਟਿਸਙ੍ਖਾਨਿਰੁਦ੍ਧੇ ਸਙ੍ਖਾਰੇ ਪਟਿਸਙ੍ਖਾ ਨਿਰੋਧੇਨ੍ਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਦ੍ਵੇ ਨਿਰੋਧਾ’’ਤਿ.
ਨ ਵਤ੍ਤਬ੍ਬਂ – ‘‘ਦ੍ਵੇ ਨਿਰੋਧਾ’’ਤਿ? ਆਮਨ੍ਤਾ. ਨਨੁ ਅਪ੍ਪਟਿਸਙ੍ਖਾਨਿਰੁਦ੍ਧਾਪਿ ਸਙ੍ਖਾਰਾ ਅਚ੍ਚਨ੍ਤਭਗ੍ਗਾ, ਪਟਿਸਙ੍ਖਾਨਿਰੁਦ੍ਧਾਪਿ ਸਙ੍ਖਾਰਾ ਅਚ੍ਚਨ੍ਤਭਗ੍ਗਾਤਿ? ਆਮਨ੍ਤਾ. ਹਞ੍ਚਿ ਅਪ੍ਪਟਿਸਙ੍ਖਾਨਿਰੁਦ੍ਧਾਪਿ ਸਙ੍ਖਾਰਾ ਅਚ੍ਚਨ੍ਤਭਗ੍ਗਾ, ਪਟਿਸਙ੍ਖਾਨਿਰੁਦ੍ਧਾਪਿ ਸਙ੍ਖਾਰਾ ਅਚ੍ਚਨ੍ਤਭਗ੍ਗਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਦ੍ਵੇ ਨਿਰੋਧਾ’’ਤਿ.
ਦ੍ਵੇ ਨਿਰੋਧਾਤਿ? ਆਮਨ੍ਤਾ. ਪਟਿਸਙ੍ਖਾਨਿਰੁਦ੍ਧਾਪਿ [ਪਟਿਸਙ੍ਖਾਨਿਰੁਦ੍ਧਾ (?)] ਸਙ੍ਖਾਰਾ ਅਰਿਯਮਗ੍ਗਂ ਆਗਮ੍ਮ ਨਿਰੁਦ੍ਧਾਤਿ? ਆਮਨ੍ਤਾ. ਅਪ੍ਪਟਿਸਙ੍ਖਾਨਿਰੁਦ੍ਧਾ ਸਙ੍ਖਾਰਾ ਅਰਿਯਮਗ੍ਗਂ ਆਗਮ੍ਮ ਨਿਰੁਦ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦ੍ਵੇ ਨਿਰੋਧਾਤਿ? ਆਮਨ੍ਤਾ. ਪਟਿਸਙ੍ਖਾਨਿਰੁਦ੍ਧਾ ਸਙ੍ਖਾਰਾ ਨ ਪੁਨ ਉਪ੍ਪਜ੍ਜਨ੍ਤੀਤਿ? ਆਮਨ੍ਤਾ. ਅਪ੍ਪਟਿਸਙ੍ਖਾਨਿਰੁਦ੍ਧਾ ਸਙ੍ਖਾਰਾ ਨ ਪੁਨ ਉਪ੍ਪਜ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਨ ਵਤ੍ਤਬ੍ਬਂ – ‘‘ਦ੍ਵੇ ਨਿਰੋਧਾ’’ਤਿ.
ਨਿਰੋਧਕਥਾ ਨਿਟ੍ਠਿਤਾ.
ਦੁਤਿਯਵਗ੍ਗੋ.
ਤਸ੍ਸੁਦ੍ਦਾਨਂ –
ਪਰੂਪਹਾਰੋ ਅਞ੍ਞਾਣਂ, ਕਙ੍ਖਾ ਪਰਵਿਤਾਰਣਾ;
ਵਚੀਭੇਦੋ ਦੁਕ੍ਖਾਹਾਰੋ, ਚਿਤ੍ਤਟ੍ਠਿਤਿ ਚ ਕੁਕ੍ਕੁਲ਼ਾ;
ਅਨੁਪੁਬ੍ਬਾਭਿਸਮਯੋ, ਵੋਹਾਰੋ ਚ ਨਿਰੋਧਕੋਤਿ.