੨. ਦੁਤਿਯਵਗ੍ਗੋ

(੧੮) ੯. ਅਨੁਪੁਬ੍ਬਾਭਿਸਮਯਕਥਾ

੩੩੯. ਅਨੁਪੁਬ੍ਬਾਭਿਸਮਯੋਤਿ? ਆਮਨ੍ਤਾ. ਅਨੁਪੁਬ੍ਬੇਨ ਸੋਤਾਪਤ੍ਤਿਮਗ੍ਗਂ ਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਨੁਪੁਬ੍ਬੇਨ ਸੋਤਾਪਤ੍ਤਿਮਗ੍ਗਂ ਭਾਵੇਤੀਤਿ? ਆਮਨ੍ਤਾ. ਅਨੁਪੁਬ੍ਬੇਨ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ.

ਅਨੁਪੁਬ੍ਬਾਭਿਸਮਯੋਤਿ? ਆਮਨ੍ਤਾ. ਅਨੁਪੁਬ੍ਬੇਨ ਸਕਦਾਗਾਮਿਮਗ੍ਗਂ ਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਨੁਪੁਬ੍ਬੇਨ ਸਕਦਾਗਾਮਿਮਗ੍ਗਂ ਭਾਵੇਤੀਤਿ? ਆਮਨ੍ਤਾ. ਅਨੁਪੁਬ੍ਬੇਨ ਸਕਦਾਗਾਮਿਫਲਂ ਸਚ੍ਛਿਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ.

ਅਨੁਪੁਬ੍ਬਾਭਿਸਮਯੋਤਿ? ਆਮਨ੍ਤਾ. ਅਨੁਪੁਬ੍ਬੇਨ ਅਨਾਗਾਮਿਮਗ੍ਗਂ ਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਨੁਪੁਬ੍ਬੇਨ ਅਨਾਗਾਮਿਮਗ੍ਗਂ ਭਾਵੇਤੀਤਿ? ਆਮਨ੍ਤਾ. ਅਨੁਪੁਬ੍ਬੇਨ ਅਨਾਗਾਮਿਫਲਂ ਸਚ੍ਛਿਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ.

ਅਨੁਪੁਬ੍ਬਾਭਿਸਮਯੋਤਿ? ਆਮਨ੍ਤਾ. ਅਨੁਪੁਬ੍ਬੇਨ ਅਰਹਤ੍ਤਮਗ੍ਗਂ ਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ. ਅਨੁਪੁਬ੍ਬੇਨ ਅਰਹਤ੍ਤਮਗ੍ਗਂ ਭਾਵੇਤੀਤਿ? ਆਮਨ੍ਤਾ. ਅਨੁਪੁਬ੍ਬੇਨ ਅਰਹਤ੍ਤਫਲਂ ਸਚ੍ਛਿਕਰੋਤੀਤਿ? ਨ ਹੇਵਂ ਵਤ੍ਤਬ੍ਬੇ.

੩੪੦. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਦਸ੍ਸਨੇਨ ਕਿਂ ਜਹਤੀਤਿ? ਸਕ੍ਕਾਯਦਿਟ੍ਠਿਂ, ਵਿਚਿਕਿਚ੍ਛਂ, ਸੀਲਬ੍ਬਤਪਰਾਮਾਸਂ, ਤਦੇਕਟ੍ਠੇ ਚ ਕਿਲੇਸੇ ਚਤੁਭਾਗਂ ਜਹਤੀਤਿ. ਚਤੁਭਾਗਂ ਸੋਤਾਪਨ੍ਨੋ, ਚਤੁਭਾਗਂ ਨ ਸੋਤਾਪਨ੍ਨੋ, ਚਤੁਭਾਗਂ ਸੋਤਾਪਤ੍ਤਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਸਤ੍ਤਕ੍ਖਤ੍ਤੁਪਰਮੋ ਕੋਲਙ੍ਕੋਲੋ ਏਕਬੀਜੀ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ, ਧਮ੍ਮੇ…ਪੇ… ਸਙ੍ਘੇ…ਪੇ… ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ ਚਤੁਭਾਗਂ ਨ ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ.

ਸਮੁਦਯਦਸ੍ਸਨੇਨ…ਪੇ… ਨਿਰੋਧਦਸ੍ਸਨੇਨ…ਪੇ… ਮਗ੍ਗਦਸ੍ਸਨੇਨ ਕਿਂ ਜਹਤੀਤਿ? ਸਕ੍ਕਾਯਦਿਟ੍ਠਿਂ, ਵਿਚਿਕਿਚ੍ਛਂ, ਸੀਲਬ੍ਬਤਪਰਾਮਾਸਂ, ਤਦੇਕਟ੍ਠੇ ਚ ਕਿਲੇਸੇ ਚਤੁਭਾਗਂ ਜਹਤੀਤਿ. ਚਤੁਭਾਗਂ ਸੋਤਾਪਨ੍ਨੋ, ਚਤੁਭਾਗਂ ਨ ਸੋਤਾਪਨ੍ਨੋ, ਚਤੁਭਾਗਂ ਸੋਤਾਪਤ੍ਤਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਸਤ੍ਤਕ੍ਖਤ੍ਤੁਪਰਮੋ ਕੋਲਙ੍ਕੋਲੋ ਏਕਬੀਜੀ ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਸਮਨ੍ਨਾਗਤੋ, ਧਮ੍ਮੇ…ਪੇ… ਸਙ੍ਘੇ…ਪੇ… ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋ, ਚਤੁਭਾਗਂ ਨ ਅਰਿਯਕਨ੍ਤੇਹਿ ਸੀਲੇਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੪੧. ਸਕਦਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਦਸ੍ਸਨੇਨ ਕਿਂ ਜਹਤੀਤਿ? ਓਲ਼ਾਰਿਕਂ ਕਾਮਰਾਗਂ, ਓਲ਼ਾਰਿਕਂ ਬ੍ਯਾਪਾਦਂ, ਤਦੇਕਟ੍ਠੇ ਚ ਕਿਲੇਸੇ ਚਤੁਭਾਗਂ ਜਹਤੀਤਿ. ਚਤੁਭਾਗਂ ਸਕਦਾਗਾਮੀ, ਚਤੁਭਾਗਂ ਨ ਸਕਦਾਗਾਮੀ, ਚਤੁਭਾਗਂ ਸਕਦਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮੁਦਯਦਸ੍ਸਨੇਨ…ਪੇ… ਨਿਰੋਧਦਸ੍ਸਨੇਨ…ਪੇ… ਮਗ੍ਗਦਸ੍ਸਨੇਨ ਕਿਂ ਜਹਤੀਤਿ? ਓਲ਼ਾਰਿਕਂ ਕਾਮਰਾਗਂ, ਓਲ਼ਾਰਿਕਂ ਬ੍ਯਾਪਾਦਂ, ਤਦੇਕਟ੍ਠੇ ਚ ਕਿਲੇਸੇ ਚਤੁਭਾਗਂ ਜਹਤੀਤਿ. ਚਤੁਭਾਗਂ ਸਕਦਾਗਾਮੀ, ਚਤੁਭਾਗਂ ਨ ਸਕਦਾਗਾਮੀ, ਚਤੁਭਾਗਂ ਸਕਦਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੪੨. ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਦਸ੍ਸਨੇਨ ਕਿਂ ਜਹਤੀਤਿ? ਅਣੁਸਹਗਤਂ ਕਾਮਰਾਗਂ, ਅਣੁਸਹਗਤਂ ਬ੍ਯਾਪਾਦਂ, ਤਦੇਕਟ੍ਠੇ ਚ ਕਿਲੇਸੇ ਚਤੁਭਾਗਂ ਜਹਤੀਤਿ. ਚਤੁਭਾਗਂ ਅਨਾਗਾਮੀ, ਚਤੁਭਾਗਂ ਨ ਅਨਾਗਾਮੀ, ਚਤੁਭਾਗਂ ਅਨਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਅਨ੍ਤਰਾਪਰਿਨਿਬ੍ਬਾਯੀ…ਪੇ… ਉਪਹਚ੍ਚਪਰਿਨਿਬ੍ਬਾਯੀ… ਅਸਙ੍ਖਾਰਪਰਿਨਿਬ੍ਬਾਯੀ… ਸਸਙ੍ਖਾਰਪਰਿਨਿਬ੍ਬਾਯੀ… ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਚਤੁਭਾਗਂ ਨ ਉਦ੍ਧਂਸੋਤੋ ਨ ਅਕਨਿਟ੍ਠਗਾਮੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮੁਦਯਦਸ੍ਸਨੇਨ…ਪੇ… ਨਿਰੋਧਦਸ੍ਸਨੇਨ…ਪੇ… ਮਗ੍ਗਦਸ੍ਸਨੇਨ ਕਿਂ ਜਹਤੀਤਿ? ਅਣੁਸਹਗਤਂ ਕਾਮਰਾਗਂ, ਅਣੁਸਹਗਤਂ ਬ੍ਯਾਪਾਦਂ, ਤਦੇਕਟ੍ਠੇ ਚ ਕਿਲੇਸੇ ਚਤੁਭਾਗਂ ਜਹਤੀਤਿ. ਚਤੁਭਾਗਂ ਅਨਾਗਾਮੀ, ਚਤੁਭਾਗਂ ਨ ਅਨਾਗਾਮੀ, ਚਤੁਭਾਗਂ ਅਨਾਗਾਮਿਫਲਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਅਨ੍ਤਰਾਪਰਿਨਿਬ੍ਬਾਯੀ…ਪੇ… ਉਪਹਚ੍ਚਪਰਿਨਿਬ੍ਬਾਯੀ… ਅਸਙ੍ਖਾਰਪਰਿਨਿਬ੍ਬਾਯੀ… ਸਸਙ੍ਖਾਰਪਰਿਨਿਬ੍ਬਾਯੀ… ਉਦ੍ਧਂਸੋਤੋ ਅਕਨਿਟ੍ਠਗਾਮੀ, ਚਤੁਭਾਗਂ ਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੪੩. ਅਰਹਤ੍ਤਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਦਸ੍ਸਨੇਨ ਕਿਂ ਜਹਤੀਤਿ? ਰੂਪਰਾਗਂ, ਅਰੂਪਰਾਗਂ, ਮਾਨਂ, ਉਦ੍ਧਚ੍ਚਂ, ਅਵਿਜ੍ਜਂ, ਤਦੇਕਟ੍ਠੇ ਚ ਕਿਲੇਸੇ ਚਤੁਭਾਗਂ ਜਹਤੀਤਿ. ਚਤੁਭਾਗਂ ਅਰਹਾ, ਚਤੁਭਾਗਂ ਨ ਅਰਹਾ, ਚਤੁਭਾਗਂ ਅਰਹਤ੍ਤਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਵੀਤਰਾਗੋ…ਪੇ… ਵੀਤਦੋਸੋ… ਵੀਤਮੋਹੋ…ਪੇ… ਕਤਕਰਣੀਯੋ ਓਹਿਤਭਾਰੋ ਅਨੁਪ੍ਪਤ੍ਤਸਦਤ੍ਥੋ ਪਰਿਕ੍ਖੀਣਭਵਸਂਯੋਜਨੋ ਸਮ੍ਮਦਞ੍ਞਾਵਿਮੁਤ੍ਤੋ ਉਕ੍ਖਿਤ੍ਤਪਲਿਘੋ ਸਙ੍ਕਿਣ੍ਣਪਰਿਖੋ ਅਬ੍ਬੂਲ਼੍ਹੇਸਿਕੋ ਨਿਰਗ੍ਗਲ਼ੋ ਅਰਿਯੋ ਪਨ੍ਨਦ੍ਧਜੋ ਪਨ੍ਨਭਾਰੋ ਵਿਸਞ੍ਞੁਤ੍ਤੋ ਸੁਵਿਜਿਤਵਿਜਯੋ, ਦੁਕ੍ਖਂ ਤਸ੍ਸ ਪਰਿਞ੍ਞਾਤਂ, ਸਮੁਦਯੋ ਪਹੀਨੋ, ਨਿਰੋਧੋ ਸਚ੍ਛਿਕਤੋ, ਮਗ੍ਗੋ ਭਾਵਿਤੋ, ਅਭਿਞ੍ਞੇਯ੍ਯਂ ਅਭਿਞ੍ਞਾਤਂ, ਪਰਿਞ੍ਞੇਯ੍ਯਂ ਪਰਿਞ੍ਞਾਤਂ, ਪਹਾਤਬ੍ਬਂ ਪਹੀਨਂ, ਭਾਵੇਤਬ੍ਬਂ ਭਾਵਿਤਂ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਚਤੁਭਾਗਂ ਸਚ੍ਛਿਕਾਤਬ੍ਬਂ ਨ ਸਚ੍ਛਿਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮੁਦਯਦਸ੍ਸਨੇਨ … ਨਿਰੋਧਦਸ੍ਸਨੇਨ… ਮਗ੍ਗਦਸ੍ਸਨੇਨ ਕਿਂ ਜਹਤੀਤਿ? ਰੂਪਰਾਗਂ, ਅਰੂਪਰਾਗਂ, ਮਾਨਂ, ਉਦ੍ਧਚ੍ਚਂ, ਅਵਿਜ੍ਜਂ, ਤਦੇਕਟ੍ਠੇ ਚ ਕਿਲੇਸੇ ਚਤੁਭਾਗਂ ਜਹਤੀਤਿ. ਚਤੁਭਾਗਂ ਅਰਹਾ, ਚਤੁਭਾਗਂ ਨ ਅਰਹਾ, ਚਤੁਭਾਗਂ ਅਰਹਤ੍ਤਪ੍ਪਤ੍ਤੋ ਪਟਿਲਦ੍ਧੋ ਅਧਿਗਤੋ ਸਚ੍ਛਿਕਤੋ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਚਤੁਭਾਗਂ ਵੀਤਰਾਗੋ… ਵੀਤਦੋਸੋ… ਵੀਤਮੋਹੋ… ਕਤਕਰਣੀਯੋ ਓਹਿਤਭਾਰੋ ਅਨੁਪ੍ਪਤ੍ਤਸਦਤ੍ਥੋ ਪਰਿਕ੍ਖੀਣਭਵਸਂਯੋਜਨੋ ਸਮ੍ਮਦਞ੍ਞਾਵਿਮੁਤ੍ਤੋ ਉਕ੍ਖਿਤ੍ਤਪਲਿਘੋ ਸਙ੍ਕਿਣ੍ਣਪਰਿਖੋ ਅਬ੍ਬੂਲ਼੍ਹੇਸਿਕੋ ਨਿਰਗ੍ਗਲ਼ੋ ਅਰਿਯੋ ਪਨ੍ਨਦ੍ਧਜੋ ਪਨ੍ਨਭਾਰੋ ਵਿਸਞ੍ਞੁਤ੍ਤੋ ਸੁਵਿਜਿਤਵਿਜਯੋ, ਦੁਕ੍ਖਂ ਤਸ੍ਸ ਪਰਿਞ੍ਞਾਤਂ, ਸਮੁਦਯੋ ਪਹੀਨੋ, ਨਿਰੋਧੋ ਸਚ੍ਛਿਕਤੋ, ਮਗ੍ਗੋ ਭਾਵਿਤੋ, ਅਭਿਞ੍ਞੇਯ੍ਯਂ ਅਭਿਞ੍ਞਾਤਂ, ਪਰਿਞ੍ਞੇਯ੍ਯਂ ਪਰਿਞ੍ਞਾਤਂ, ਪਹਾਤਬ੍ਬਂ ਪਹੀਨਂ, ਭਾਵੇਤਬ੍ਬਂ ਭਾਵਿਤਂ…ਪੇ… ਸਚ੍ਛਿਕਾਤਬ੍ਬਂ ਸਚ੍ਛਿਕਤਂ, ਚਤੁਭਾਗਂ ਸਚ੍ਛਿਕਾਤਬ੍ਬਂ ਨ ਸਚ੍ਛਿਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੪੪. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਦੁਕ੍ਖੇ ਦਿਟ੍ਠੇ ਫਲੇ ਠਿਤੋਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ. ਸਮੁਦਯਂ ਦਕ੍ਖਨ੍ਤੋ…ਪੇ… ਨਿਰੋਧਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਨਿਰੋਧੇ ਦਿਟ੍ਠੇ ਫਲੇ ਠਿਤੋਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ.

ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਮਗ੍ਗਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋ, ਮਗ੍ਗੇ ਦਿਟ੍ਠੇ ਫਲੇ ਠਿਤੋਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਦੁਕ੍ਖਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋ, ਦੁਕ੍ਖੇ ਦਿਟ੍ਠੇ ਫਲੇ ਠਿਤੋਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਗ੍ਗਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋ, ਮਗ੍ਗੇ ਦਿਟ੍ਠੇ ਫਲੇ ਠਿਤੋਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਸਮੁਦਯਂ ਦਕ੍ਖਨ੍ਤੋ…ਪੇ… ਨਿਰੋਧਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋ, ਨਿਰੋਧੇ ਦਿਟ੍ਠੇ ਫਲੇ ਠਿਤੋਤਿ ਵਤ੍ਤਬ੍ਬੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋ, ਦੁਕ੍ਖੇ ਦਿਟ੍ਠੇ ਨ ਵਤ੍ਤਬ੍ਬਂ – ‘‘ਫਲੇ ਠਿਤੋਤਿ ਵਤ੍ਤਬ੍ਬੋ’’ਤਿ? ਆਮਨ੍ਤਾ. ਮਗ੍ਗਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋ, ਮਗ੍ਗੇ ਦਿਟ੍ਠੇ ਨ ਵਤ੍ਤਬ੍ਬਂ – ‘‘ਫਲੇ ਠਿਤੋਤਿ ਵਤ੍ਤਬ੍ਬੋ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮੁਦਯਂ ਦਕ੍ਖਨ੍ਤੋ… ਨਿਰੋਧਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋ, ਨਿਰੋਧੇ ਦਿਟ੍ਠੇ ਨ ਵਤ੍ਤਬ੍ਬਂ – ‘‘ਫਲੇ ਠਿਤੋਤਿ ਵਤ੍ਤਬ੍ਬੋ’’ਤਿ? ਆਮਨ੍ਤਾ. ਮਗ੍ਗਂ ਦਕ੍ਖਨ੍ਤੋ ‘‘ਪਟਿਪਨ੍ਨਕੋ’’ਤਿ ਵਤ੍ਤਬ੍ਬੋ, ਮਗ੍ਗੇ ਦਿਟ੍ਠੇ ਨ ਵਤ੍ਤਬ੍ਬਂ – ‘‘ਫਲੇ ਠਿਤੋਤਿ ਵਤ੍ਤਬ੍ਬੋ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

[ਸਕਵਾਦੀਪੁਚ੍ਛਾਲਕ੍ਖਣਂ] ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਦੁਕ੍ਖਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋ, ਦੁਕ੍ਖੇ ਦਿਟ੍ਠੇ ਨ ਵਤ੍ਤਬ੍ਬਂ – ‘‘ਫਲੇ ਠਿਤੋਤਿ ਵਤ੍ਤਬ੍ਬੋ’’ਤਿ? ਆਮਨ੍ਤਾ. ਨਿਰਤ੍ਥਿਯਂ ਦੁਕ੍ਖਦਸ੍ਸਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮੁਦਯਂ ਦਕ੍ਖਨ੍ਤੋ…ਪੇ… ਨਿਰੋਧਂ ਦਕ੍ਖਨ੍ਤੋ ਪਟਿਪਨ੍ਨਕੋਤਿ ਵਤ੍ਤਬ੍ਬੋ, ਨਿਰੋਧੇ ਦਿਟ੍ਠੇ ਨ ਵਤ੍ਤਬ੍ਬਂ – ‘‘ਫਲੇ ਠਿਤੋਤਿ ਵਤ੍ਤਬ੍ਬੋ’’ਤਿ? ਆਮਨ੍ਤਾ. ਨਿਰਤ੍ਥਿਯਂ ਨਿਰੋਧਦਸ੍ਸਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੪੫. [ਪਰਵਾਦੀਪੁਚ੍ਛਾਲਕ੍ਖਣਂ] ਦੁਕ੍ਖੇ ਦਿਟ੍ਠੇ ਚਤ੍ਤਾਰਿ ਸਚ੍ਚਾਨਿ ਦਿਟ੍ਠਾਨਿ ਹੋਨ੍ਤੀਤਿ? ਆਮਨ੍ਤਾ. ਦੁਕ੍ਖਸਚ੍ਚਂ ਚਤ੍ਤਾਰਿ ਸਚ੍ਚਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

[ਸਕਵਾਦੀਪੁਚ੍ਛਾਲਕ੍ਖਣਂ] ਰੂਪਕ੍ਖਨ੍ਧੇ ਅਨਿਚ੍ਚਤੋ ਦਿਟ੍ਠੇ ਪਞ੍ਚਕ੍ਖਨ੍ਧਾ ਅਨਿਚ੍ਚਤੋ ਦਿਟ੍ਠਾ ਹੋਨ੍ਤੀਤਿ? ਆਮਨ੍ਤਾ. ਰੂਪਕ੍ਖਨ੍ਧੋ ਪਞ੍ਚਕ੍ਖਨ੍ਧਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

[ਸਕਵਾਦੀਪੁਚ੍ਛਾਲਕ੍ਖਣਂ] ਚਕ੍ਖਾਯਤਨੇ ਅਨਿਚ੍ਚਤੋ ਦਿਟ੍ਠੇ ਦ੍ਵਾਦਸਾਯਤਨਾਨਿ ਅਨਿਚ੍ਚਤੋ ਦਿਟ੍ਠਾਨਿ ਹੋਨ੍ਤੀਤਿ? ਆਮਨ੍ਤਾ. ਚਕ੍ਖਾਯਤਨਂ ਦ੍ਵਾਦਸਾਯਤਨਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

[ਸਕਵਾਦੀਪੁਚ੍ਛਾਲਕ੍ਖਣਂ] ਚਕ੍ਖੁਧਾਤੁਯਾ ਅਨਿਚ੍ਚਤੋ ਦਿਟ੍ਠਾਯ ਅਟ੍ਠਾਰਸ ਧਾਤੁਯੋ ਅਨਿਚ੍ਚਤੋ ਦਿਟ੍ਠਾ ਹੋਨ੍ਤੀਤਿ? ਆਮਨ੍ਤਾ. ਚਕ੍ਖੁਧਾਤੁ ਅਟ੍ਠਾਰਸ ਧਾਤੁਯੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

[ਸਕਵਾਦੀਪੁਚ੍ਛਾਲਕ੍ਖਣਂ] ਚਕ੍ਖੁਨ੍ਦ੍ਰਿਯੇ ਅਨਿਚ੍ਚਤੋ ਦਿਟ੍ਠੇ ਬਾਵੀਸਤਿਨ੍ਦ੍ਰਿਯਾਨਿ ਅਨਿਚ੍ਚਤੋ ਦਿਟ੍ਠਾਨਿ ਹੋਨ੍ਤੀਤਿ? ਆਮਨ੍ਤਾ. ਚਕ੍ਖੁਨ੍ਦ੍ਰਿਯਂ ਬਾਵੀਸਤਿਨ੍ਦ੍ਰਿਯਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

[ਸਕਵਾਦੀਪੁਚ੍ਛਾਲਕ੍ਖਣਂ] ਚਤੂਹਿ ਞਾਣੇਹਿ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤੀਤਿ? ਆਮਨ੍ਤਾ. ਚਤ੍ਤਾਰਿ ਸੋਤਾਪਤ੍ਤਿਫਲਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਟ੍ਠਹਿ ਞਾਣੇਹਿ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤੀਤਿ? ਆਮਨ੍ਤਾ. ਅਟ੍ਠ ਸੋਤਾਪਤ੍ਤਿਫਲਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵਾਦਸਹਿ ਞਾਣੇਹਿ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤੀਤਿ? ਆਮਨ੍ਤਾ. ਦ੍ਵਾਦਸ ਸੋਤਾਪਤ੍ਤਿਫਲਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਤੁਚਤ੍ਤਾਰੀਸਾਯ ਞਾਣੇਹਿ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤੀਤਿ? ਆਮਨ੍ਤਾ. ਚਤੁਚਤ੍ਤਾਰੀਸਂ ਸੋਤਾਪਤ੍ਤਿਫਲਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਤ੍ਤਸਤ੍ਤਤਿਯਾ ਞਾਣੇਹਿ ਸੋਤਾਪਤ੍ਤਿਫਲਂ ਸਚ੍ਛਿਕਰੋਤੀਤਿ? ਆਮਨ੍ਤਾ. ਸਤ੍ਤਸਤ੍ਤਤਿ ਸੋਤਾਪਤ੍ਤਿਫਲਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੩੪੬. ਨ ਵਤ੍ਤਬ੍ਬਂ – ‘‘ਅਨੁਪੁਬ੍ਬਾਭਿਸਮਯੋ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਸੇਯ੍ਯਥਾਪਿ, ਭਿਕ੍ਖਵੇ, ਮਹਾਸਮੁਦ੍ਦੋ ਅਨੁਪੁਬ੍ਬਨਿਨ੍ਨੋ ਅਨੁਪੁਬ੍ਬਪੋਣੋ ਅਨੁਪੁਬ੍ਬਪਬ੍ਭਾਰੋ, ਨ ਆਯਤਕੇਨੇਵ ਪਪਾਤੋ; ਏਵਮੇਵ ਖੋ, ਭਿਕ੍ਖਵੇ, ਇਮਸ੍ਮਿਂ ਧਮ੍ਮਵਿਨਯੇ ਅਨੁਪੁਬ੍ਬਸਿਕ੍ਖਾ ਅਨੁਪੁਬ੍ਬਕਿਰਿਯਾ ਅਨੁਪੁਬ੍ਬਪਟਿਪਦਾ, ਨ ਆਯਤਕੇਨੇਵ ਅਞ੍ਞਾਪਟਿਵੇਧੋ’’ਤਿ [ਚੂਲ਼ਵ. ੩੮੫; ਅ. ਨਿ. ੮.੨੦; ਉਦਾ. ੪੫ ਉਦਾਨੇ ਚ]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਨੁਪੁਬ੍ਬਾਭਿਸਮਯੋਤਿ.

ਨ ਵਤ੍ਤਬ੍ਬਂ – ‘‘ਅਨੁਪੁਬ੍ਬਾਭਿਸਮਯੋ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਅਨੁਪੁਬ੍ਬੇਨ ਮੇਧਾਵੀ, ਥੋਕਂ ਥੋਕਂ ਖਣੇ ਖਣੇ;

ਕਮ੍ਮਾਰੋ ਰਜਤਸ੍ਸੇਵ, ਨਿਦ੍ਧਮੇ ਮਲਮਤ੍ਤਨੋ’’ਤਿ [ਧ. ਪ. ੨੩੯ ਧਮ੍ਮਪਦੇ].

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਨੁਪੁਬ੍ਬਾਭਿਸਮਯੋਤਿ.

ਅਨੁਪੁਬ੍ਬਾਭਿਸਮਯੋਤਿ? ਆਮਨ੍ਤਾ. ਨਨ੍ਵਾਯਸ੍ਮਾ ਗਵਮ੍ਪਤਿ ਥੇਰੋ ਭਿਕ੍ਖੂ ਏਤਦਵੋਚ – ‘‘ਸਮ੍ਮੁਖਾ ਮੇਤਂ, ਆਵੁਸੋ, ਭਗਵਤੋ ਸੁਤਂ ਸਮ੍ਮੁਖਾ ਪਟਿਗ੍ਗਹਿਤਂ – ‘ਯੋ, ਭਿਕ੍ਖਵੇ, ਦੁਕ੍ਖਂ ਪਸ੍ਸਤਿ ਦੁਕ੍ਖਸਮੁਦਯਮ੍ਪਿ ਸੋ ਪਸ੍ਸਤਿ, ਦੁਕ੍ਖਨਿਰੋਧਮ੍ਪਿ ਪਸ੍ਸਤਿ, ਦੁਕ੍ਖਨਿਰੋਧਗਾਮਿਨਿਂ ਪਟਿਪਦਮ੍ਪਿ ਪਸ੍ਸਤਿ; ਯੋ ਦੁਕ੍ਖਸਮੁਦਯਂ ਪਸ੍ਸਤਿ ਦੁਕ੍ਖਮ੍ਪਿ ਸੋ ਪਸ੍ਸਤਿ, ਦੁਕ੍ਖਨਿਰੋਧਮ੍ਪਿ ਪਸ੍ਸਤਿ, ਦੁਕ੍ਖਨਿਰੋਧਗਾਮਿਨਿਂ ਪਟਿਪਦਮ੍ਪਿ ਪਸ੍ਸਤਿ; ਯੋ ਦੁਕ੍ਖਨਿਰੋਧਂ ਪਸ੍ਸਤਿ ਦੁਕ੍ਖਮ੍ਪਿ ਸੋ ਪਸ੍ਸਤਿ, ਦੁਕ੍ਖਸਮੁਦਯਮ੍ਪਿ ਪਸ੍ਸਤਿ, ਦੁਕ੍ਖਨਿਰੋਧਗਾਮਿਨਿਂ ਪਟਿਪਦਮ੍ਪਿ ਪਸ੍ਸਤਿ; ਯੋ ਦੁਕ੍ਖਨਿਰੋਧਗਾਮਿਨਿਂ ਪਟਿਪਦਂ ਪਸ੍ਸਤਿ ਦੁਕ੍ਖਮ੍ਪਿ ਸੋ ਪਸ੍ਸਤਿ, ਦੁਕ੍ਖਸਮੁਦਯਮ੍ਪਿ ਪਸ੍ਸਤਿ, ਦੁਕ੍ਖਨਿਰੋਧਮ੍ਪਿ ਪਸ੍ਸਤੀ’’’ਤਿ [ਸਂ. ਨਿ. ੫.੧੧੦੦]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਨੁਪੁਬ੍ਬਾਭਿਸਮਯੋ’’ਤਿ.

ਅਨੁਪੁਬ੍ਬਾਭਿਸਮਯੋਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ –

‘‘ਸਹਾਵਸ੍ਸ ਦਸ੍ਸਨਸਮ੍ਪਦਾਯ,

ਤਯਸ੍ਸੁ ਧਮ੍ਮਾ ਜਹਿਤਾ ਭਵਨ੍ਤਿ;

ਸਕ੍ਕਾਯਦਿਟ੍ਠੀ ਵਿਚਿਕਿਚ੍ਛਿਤਞ੍ਚ,

ਸੀਲਬ੍ਬਤਂ ਵਾਪਿ ਯਦਤ੍ਥਿ ਕਿਞ੍ਚਿ;

ਚਤੂਹਪਾਯੇਹਿ ਚ ਵਿਪ੍ਪਮੁਤ੍ਤੋ,

ਛਚ੍ਚਾਭਿਠਾਨਾਨਿ ਅਭਬ੍ਬ ਕਾਤੁ’’ਨ੍ਤਿ.

ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਨੁਪੁਬ੍ਬਾਭਿਸਮਯੋ’’ਤਿ.

ਅਨੁਪੁਬ੍ਬਾਭਿਸਮਯੋਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਯਸ੍ਮਿਂ, ਭਿਕ੍ਖਵੇ, ਸਮਯੇ ਅਰਿਯਸਾਵਕਸ੍ਸ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘ਯਂ ਕਿਞ੍ਚਿ ਸਮੁਦਯਧਮ੍ਮਂ ਸਬ੍ਬਂ ਤਂ ਨਿਰੋਧਧਮ੍ਮ’ਨ੍ਤਿ, ਸਹ ਦਸ੍ਸਨੁਪ੍ਪਾਦਾ, ਭਿਕ੍ਖਵੇ, ਅਰਿਯਸਾਵਕਸ੍ਸ ਤੀਣਿ ਸਂਯੋਜਨਾਨਿ ਪਹੀਯਨ੍ਤਿ – ਸਕ੍ਕਾਯਦਿਟ੍ਠਿ, ਵਿਚਿਕਿਚ੍ਛਾ, ਸੀਲਬ੍ਬਤਪਰਾਮਾਸੋ’’ਤਿ! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਅਨੁਪੁਬ੍ਬਾਭਿਸਮਯੋ’’ਤਿ.

ਅਨੁਪੁਬ੍ਬਾਭਿਸਮਯਕਥਾ ਨਿਟ੍ਠਿਤਾ.