੧੯. ਪਟਿਵੇਧਾਨੁਯੋਗੋ

੨੦੧. ਨ ਵਤ੍ਤਬ੍ਬਂ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ? ਆਮਨ੍ਤਾ. ਨਨੁ ਸੋਤਾਪਨ੍ਨੋ ਅਤ੍ਥੀਤਿ? ਆਮਨ੍ਤਾ. ਹਞ੍ਚਿ ਸੋਤਾਪਨ੍ਨੋ ਅਤ੍ਥਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ.

੨੦੨. ਨ ਵਤ੍ਤਬ੍ਬਂ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ? ਆਮਨ੍ਤਾ. ਨਨੁ ਸਕਦਾਗਾਮੀ ਅਤ੍ਥਿ…ਪੇ… ਅਨਾਗਾਮੀ ਅਤ੍ਥਿ… ਅਰਹਾ ਅਤ੍ਥਿ… ਉਭਤੋਭਾਗਵਿਮੁਤ੍ਤੋ ਅਤ੍ਥਿ… ਪਞ੍ਞਾਵਿਮੁਤ੍ਤੋ ਅਤ੍ਥਿ… ਕਾਯਸਕ੍ਖਿ [ਕਾਯਸਕ੍ਖੀ (ਸ੍ਯਾ.)] ਅਤ੍ਥਿ… ਦਿਟ੍ਠਿਪ੍ਪਤ੍ਤੋ ਅਤ੍ਥਿ… ਸਦ੍ਧਾਵਿਮੁਤ੍ਤੋ ਅਤ੍ਥਿ… ਧਮ੍ਮਾਨੁਸਾਰੀ ਅਤ੍ਥਿ… ਸਦ੍ਧਾਨੁਸਾਰੀ ਅਤ੍ਥੀਤਿ? ਆਮਨ੍ਤਾ.

ਹਞ੍ਚਿ ਸਦ੍ਧਾਨੁਸਾਰੀ ਅਤ੍ਥਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ.

੨੦੩. ਸੋਤਾਪਨ੍ਨੋ ਅਤ੍ਥੀਤਿ ਕਤ੍ਵਾ ਤੇਨ ਚ ਕਾਰਣੇਨ ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ? ਆਮਨ੍ਤਾ. ਅਤ੍ਥਿ ਕੋਚਿ ਨ ਸੋਤਾਪਨ੍ਨੋ ਹੁਤ੍ਵਾ ਸੋਤਾਪਨ੍ਨੋ ਹੋਤੀਤਿ? ਆਮਨ੍ਤਾ. ਅਤ੍ਥਿ ਕੋਚਿ ਨ ਪੁਗ੍ਗਲੋ ਹੁਤ੍ਵਾ ਪੁਗ੍ਗਲੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੨੦੪. ਅਤ੍ਥਿ ਕੋਚਿ ਨ ਸਕਦਾਗਾਮੀ ਹੁਤ੍ਵਾ… ਨ ਅਨਾਗਾਮੀ ਹੁਤ੍ਵਾ… ਨ ਅਰਹਾ ਹੁਤ੍ਵਾ… ਨ ਉਭਤੋਭਾਗਵਿਮੁਤ੍ਤੋ ਹੁਤ੍ਵਾ… ਨ ਪਞ੍ਞਾਵਿਮੁਤ੍ਤੋ ਹੁਤ੍ਵਾ… ਨ ਕਾਯਸਕ੍ਖਿ ਹੁਤ੍ਵਾ… ਨ ਦਿਟ੍ਠਿਪ੍ਪਤ੍ਤੋ ਹੁਤ੍ਵਾ… ਨ ਸਦ੍ਧਾਵਿਮੁਤ੍ਤੋ ਹੁਤ੍ਵਾ… ਨ ਧਮ੍ਮਾਨੁਸਾਰੀ ਹੁਤ੍ਵਾ… ਨ ਸਦ੍ਧਾਨੁਸਾਰੀ ਹੁਤ੍ਵਾ ਸਦ੍ਧਾਨੁਸਾਰੀ ਹੋਤੀਤਿ? ਆਮਨ੍ਤਾ. ਅਤ੍ਥਿ ਕੋਚਿ ਨ ਪੁਗ੍ਗਲੋ ਹੁਤ੍ਵਾ ਪੁਗ੍ਗਲੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੨੦੫. ਸੋਤਾਪਨ੍ਨੋ ਅਤ੍ਥੀਤਿ ਕਤ੍ਵਾ ਤੇਨ ਚ ਕਾਰਣੇਨ ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ? ਆਮਨ੍ਤਾ. ਅਤ੍ਥਿ ਕੋਚਿ ਸੋਤਾਪਨ੍ਨੋ ਹੁਤ੍ਵਾ ਨ ਸੋਤਾਪਨ੍ਨੋ ਹੋਤੀਤਿ? ਆਮਨ੍ਤਾ. ਅਤ੍ਥਿ ਕੋਚਿ ਪੁਗ੍ਗਲੋ ਹੁਤ੍ਵਾ ਨ ਪੁਗ੍ਗਲੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਕੋਚਿ ਸਕਦਾਗਾਮੀ ਹੁਤ੍ਵਾ… ਅਨਾਗਾਮੀ ਹੁਤ੍ਵਾ ਨ ਅਨਾਗਾਮੀ ਹੋਤੀਤਿ? ਆਮਨ੍ਤਾ. ਅਤ੍ਥਿ ਕੋਚਿ ਪੁਗ੍ਗਲੋ ਹੁਤ੍ਵਾ ਨ ਪੁਗ੍ਗਲੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਟਿਵੇਧਾਨੁਯੋਗੋ.