੬. ਛਪ੍ਪਚ੍ਚਯਵਿਭਾਗ-ਛਟ੍ਠਪਰਿਚ੍ਛੇਦ

੧੨੯. ਪਤ੍ਥਾਰੇ ਸਬ੍ਬਗੇ ਪਾਦੇ, ਪੁਬ੍ਬਗਾ’ਧੋ ਲ੍ਪ’ਰੇ ਸਮਾ;

ਪੁਬ੍ਬੇ ਗਰੁ ਤੇ ਚ ਮਿਮੇ, ਕਤ੍ਤਬ੍ਬਾ ਯਾਵ ਸਬ੍ਬਲਾ.

੧੩੦. ਨਟ੍ਠਸ੍ਸ ਯੋ ਭਵੇਯ੍ਯ’ਙ੍ਕੋ, ਤਸ੍ਮਿਂ ਲੋ’ਦ੍ਧਿਕਤੇ ਸਮੇ;

ਵਿਸਮੇ ਤ੍ਵੇ’ਕਸਹਿਤੇ, ਭਵੇਯ੍ਯ’ਦ੍ਧਿਕਤੇ ਗਰੁ.

੧੩੧. ਏਕਾ’ਦਿਨੁਕ੍ਕਮੇਨ’ਙ੍ਕੇ, ਪੁਬ੍ਬਾਧੋ ਦ੍ਵਿਗੁਣੇ ਲਿਖੇ;

ਮਿਸ੍ਸਕੇਹਿ ਲਹੁਟ੍ਠੇਹਿ, ਸੇ’ਕੇਹੁ’ਦ੍ਦਿਟ੍ਠਕਂ ਭਵੇ.

੧੩੨. ਵੁਤ੍ਤ’ਕ੍ਖਰ ਸਮਾ ਸਙ੍ਖ੍ਯਾ, ਲਿਕ੍ਖ੍ਯ ਸੇਕੋ’ਪਰੂ’ਪਰਿ;

ਏਕੇਕਹੀਨ ਮੇਕਾਦਿ, ਨੁ’ਟ੍ਠਾਨੇ ਸਬ੍ਬਗਾਦਿਕਂ.

੧੩੩. ਗਰੁਕ੍ਰਿਯਾ’ਙ੍ਕ ਸਨ੍ਦੋਹੇ, ਭਵੇ ਸਙ੍ਖ੍ਯਾ ਵਿਮਿਸ੍ਸਿਤੇ;

ਉਦ੍ਦਿਟ੍ਠ’ਙ੍ਕ ਸਮਾਹਾਰੋ, ਸੇ’ਕੋ ਵੇ’ਮਂ ਸਮਾ’ਨਯੇ.

੧੩੪. ਸਙ੍ਖ੍ਯੇਵ ਦ੍ਵਿਗੁਣੇ’ਕੂਨਾ, ਵਿਤ੍ਥਾਰਾ’ਯਾਮਸਮ੍ਭਵਾ;

ਵੁਤ੍ਤਸ੍ਸ’ਦ੍ਧ’ਨ੍ਤਰਾਨਞ੍ਚ, ਗਰੁਲਾਨਞ੍ਚ ਅਙ੍ਗੁਲਂ.

ਇਤਿ ਵੁਤ੍ਤੋਦਯੇ ਛਨ੍ਦਸਿ ਛਪ੍ਪਚ੍ਚਯਵਿਭਾਗੋ ਨਾਮ

ਛਟ੍ਠੋ ਪਰਿਚ੍ਛੇਦੋ.

੧੩੫. ਸੇਲ’ਨ੍ਤਰਾ’ਯਤਨ ਵਾਸਿਕ ਸੀਲ’ਤ੍ਥੇਰ,

ਪਾਦੋ ਗਰੁ ਗ੍ਗੁਣਗਰੁ ਜ੍ਜਯਤਂ ਮਮੇ’ਸੋ;

ਯਸ੍ਸ ਪ੍ਪਭਾਵ’ਮਵਲਮ੍ਬ ਮਯੇ’ਦਿਸੋਪਿ,

ਸਮ੍ਪਾਦਿਤੋ’ਭਿਮਤ ਸਿਦ੍ਧਿਕਰੋ ਪਰਤ੍ਥੋ.

੧੩੬. ਪਰਤ੍ਥ ਸਮ੍ਪਾਦਨਤੋ, ਪੁਞ੍ਞੇਨਾ’ਧਿਗਤੇਨ’ਹਂ;

ਪਰਤ੍ਥ ਸਮ੍ਪਾਦਨਕੋ, ਭਵੇਯ੍ਯਂ ਜਾਤਿ ਜਾਤਿਯਂ.

੧੩੭. ਅਵਲੋਕਿਤ ਮਤ੍ਤੇਨ, ਯਥਾ ਛਪ੍ਪਚ੍ਚਯਾ ਮਯਾ;

ਸਾਧਿਤਾ ਸਾਧਯਨ੍ਤੇ’ਵ, ਮਿਚ੍ਛਿਤਤ੍ਥਮ੍ਪਿ ਪਾਣਿਨੋਤਿ.

ਇਤਿ ਸਙ੍ਘਰਕ੍ਖਿਤਮਹਾਸਾਮਿਤ੍ਥੇਰੇਨ ਵਿਰਚਿਤਂ

ਵੁਤ੍ਤੋਦਯਪ੍ਪਕਰਣਂ ਪਰਿਨਿਟ੍ਠਿਤਂ.