੧. ਸਞ੍ਞਾਪਰਿਭਾਸਾਨਿਦ੍ਦੇਸ-ਪਠਮਪਰਿਚ੍ਛੇਦ

੧. ਨਮ’ਤ੍ਥੁ ਜਨ ਸਨ੍ਤਾਨ, ਤਮ ਸਨ੍ਤਾਨ ਭੇਦਿਨੋ;

ਧਮ੍ਮੁ’ਜ੍ਜਲਨ੍ਤ ਰੁਚਿਨੋ, ਮੁਨਿਨ੍ਦੋ’ਦਾਤ ਰੋਚਿਨੋ.

੨. ਪਿਙ੍ਗਲਾ’ਚਰਿਯਾਦੀਹਿ, ਛਨ੍ਦਂ ਯ ਮੁਦਿਤਂ ਪੁਰਾ;

ਸੁਦ੍ਧਮਾਗਧਿਕਾਨਂ ਤਂ, ਨ ਸਾਧੇਤਿ ਯਥਿਚ੍ਛਿਤਂ [ਯ’ਦਿਚ੍ਛਿਤਂ ਯਤਿ’ਚ੍ਛਿਤਂ (ਕ.)].

੩. ਤਤੋ ਮਾਗਧਭਾਸਾਯ, ਮਤ੍ਤਾ,ਵਣ੍ਣ,ਵਿਭੇਦਨਂ;

ਲਕ੍ਖ੍ਯ ਲਕ੍ਖਣ ਸਂਯੁਤ੍ਤਂ, ਪਸਨ੍ਨ’ਤ੍ਥ,ਪਦ,ਕ੍ਕਮਂ.

੪. ਇਦਂ ਵੁਤ੍ਤੋਦਯਂ ਨਾਮ, ਲੋਕਿਯ’ਚ੍ਛਨ੍ਦਨਿਸ੍ਸਿਤਂ;

ਆਰਭਿਸ੍ਸ’ਮਹਂ ਦਾਨਿ, ਤੇਸਂ ਸੁਖਵਿਬੁਦ੍ਧਿਯਾ.

੫. ਸਬ੍ਬਗ੍ਲਾ ਮ੍ਨਾ,’ਦਿਗਲਹੂ, ਭ੍ਯਾ’,ਮਜ੍ਝ’ਨ੍ਤ ਗਰੂ ਜਸਾ;

ਮਜ੍ਝ’ਨ੍ਤਲਾ ਰ,ਤੇ’ਤੇ’ਟ੍ਠ, ਗਣਾ ਗੋ ਗਰੁ,ਲੋ ਲਹੁ.

੬. ਭ,ਜ,ਸਾ ਸਬ੍ਬਗ,ਲਹੂ, ਪਞ੍ਚਿ’ਮੇ ਸਣ੍ਠਿਤਾ ਗਣਾ;

ਅਰਿਯਾਦਿਮ੍ਹਿ ਵਿਞ੍ਞੇਯ੍ਯਾ, ਗਣੋ ਇਧ ਚਤੁ’ਕ੍ਕਲੋ.

੭. ਸਂਯੋਗਾ’ਦਿ ਚ, ਦੀਘੋ ਚ, ਨਿਗ੍ਗਹੀਤਪਰੋ ਚ, ਯੋ;

ਗਰੁ, ਵਙ੍ਕੋ, ਪਾਦਨ੍ਤੋ,ਵਾ, ਰਸ੍ਸੋ’ਞ੍ਞੋ ਮਤ੍ਤਿਕੋ ਲੁ’ਜੁ.

੮. ਪਰੇ ਪਾਦਾਦਿਸਂਯੋਗੇ, ਯੋ ਪੁਬ੍ਬੋ ਗਰੁਕ’ਕ੍ਖਰੋ;

ਲਹੁ ਸ ਕ੍ਵਚਿ ਵਿਞ੍ਞੇਯ੍ਯੋ, ਤਦੁਦਾਹਰਣਂ ਯਥਾ.

੯. ਦਸ੍ਸਨਰਸਾ’ਨੁਭਾਵਨੇ, ਨਿਬਦ੍ਧਗੇਧਾ ਜਿਨਸ੍ਸ’ਯਂ ਜਨਤਾ;

ਵਿਮ੍ਹਯਜਨਨੀ ਸਞ੍ਞਤ, ਕ੍ਰਿਯਾ ਨੁ ਕਂ ਨਾ’ਨੁਰਞ੍ਜਯਤਿ.

੧੦. ਵਿਞ੍ਞੇਯ੍ਯਾ ਲੋਕਤੋ ਸਞ੍ਞਾ, ਸਮੁਦ੍ਦੋ,ਸੁ,ਰਸਾਦਿਨਂ;

ਪਾਦੋਞੇਯ੍ਯੋ ਚਤੁਤ੍ਥਂ’ਸੋ, ਪਦਚ੍ਛੇਦੋ ਯਤੀ ਭਵੇ.

੧੧. ਸਮ,ਮਡ੍ਢਸਮਂ, ਵੁਤ੍ਤਂ, ਵਿਸਮਂ ਚਾ’ਪਰਂ ਤਿਧਾ;

ਸਮਾ ਲਕ੍ਖਣਤੋ ਪਾਦਾ, ਚਤ੍ਤਾਰੋ ਯਸ੍ਸ ਤਂ ਸਮਂ.

੧੨. ਯਸ੍ਸ’ਨ੍ਤਿਮੇਨ ਦੁਤਿਯੋ, ਤਤਿਯੇਨਾ’ਦਿਮੋ ਸਮੋ;

ਤ’ਦਡ੍ਢਸਮ, ਮਞ੍ਞਂ ਤੁ, ਭਿਨ੍ਨ ਲਕ੍ਖਣ ਪਾਦਿਕਂ.

੧੩. ਪਾਦ’ਮੇਕਕ੍ਖਰਾ’ਰਬ੍ਭ, ਯਾਵ ਛਬ੍ਬੀਸਤ’ਕ੍ਖਰਾ;

ਭਵੇ ਪਾਦੇਹਿ ਤਂ ਛਨ੍ਦਂ, ਨਾਨਾਨਾਮੋ’ਦਿਤਂ ਤਤੋ.

੧੪. ਦਣ੍ਡਕਾ ਚਣ੍ਡਵੁਟ੍ਠ੍ਯਾ’ਦਿ, ਪਾਦੇਹਿ ਛਹਿ, ਤੀਹਿ ਤੁ;

‘ਗਾਥਾ’ਤਿ ਚ ਪਰਤ੍ਥੇ’ਵਂ, ਛਨ੍ਦੋ ਸਞ੍ਞਾ ਪਕਾਸਿਤਾ.

੧੫. ਅਨਨ੍ਤਰੋ’ਦਿਤਂ ਚ’ਞ੍ਞ, ਮੇਤਂ ਸਾਮਞ੍ਞ ਨਾਮਤੋ;

‘ਗਾਥਾ’ਇਚ੍ਚੇਵ ਨਿਦ੍ਦਿਟ੍ਠਂ, ਮੁਨਿਨ੍ਦਵਚਨੇ ਪਨ.

੧੬. ਵਿਸੇਸਨਾਮਤੋ ਕਿਞ੍ਚਿ, ਗਹੇਤ੍ਵਾ ਸਬ੍ਬਥੋ’ਚਿਤਂ;

ਦਸ੍ਸਯਿਸ੍ਸਾਮ’ਹਂ ਤੇ’ਤ੍ਥ, ਨਾਮਾਨਾ’ਵਿ ਭਵਿਸ੍ਸਰੇ.

ਇਤਿ ਵੁਤ੍ਤੋਦਯੇ ਛਨ੍ਦਸਿ ਸਞ੍ਞਾਪਰਿਭਾਸਾ ਨਿਦ੍ਦੇਸੋ ਨਾਮ

ਪਠਮੋ ਪਰਿਚ੍ਛੇਦੋ.