੩. ਸਙ੍ਘਾਨੁਸ੍ਸਤਿਕਥਾ

੧੫੪. ਸਙ੍ਘਾਨੁਸ੍ਸਤਿਂ ਭਾਵੇਤੁਕਾਮੇਨਾਪਿ ਰਹੋਗਤੇਨ ਪਟਿਸਲ੍ਲੀਨੇਨ ‘‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ, ਉਜੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ, ਞਾਯਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ, ਸਾਮੀਚਿਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ, ਯਦਿਦਂ ਚਤ੍ਤਾਰਿ ਪੁਰਿਸਯੁਗਾਨਿ ਅਟ੍ਠ ਪੁਰਿਸਪੁਗ੍ਗਲਾ, ਏਸ ਭਗਵਤੋ ਸਾਵਕਸਙ੍ਘੋ ਆਹੁਨੇਯ੍ਯੋ, ਪਾਹੁਨੇਯ੍ਯੋ, ਦਕ੍ਖਿਣੇਯ੍ਯੋ, ਅਞ੍ਜਲਿਕਰਣੀਯੋ, ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾ’’ਤਿ (ਅ. ਨਿ. ੬.੧੦) ਏਵਂ ਅਰਿਯਸਙ੍ਘਗੁਣਾ ਅਨੁਸ੍ਸਰਿਤਬ੍ਬਾ.

੧੫੫. ਤਤ੍ਥ ਸੁਪ੍ਪਟਿਪਨ੍ਨੋਤਿ ਸੁਟ੍ਠੁ ਪਟਿਪਨ੍ਨੋ, ਸਮ੍ਮਾਪਟਿਪਦਂ ਅਨਿਵਤ੍ਤਿਪਟਿਪਦਂ ਅਨੁਲੋਮਪਟਿਪਦਂ ਅਪਚ੍ਚਨੀਕਪਟਿਪਦਂ ਧਮ੍ਮਾਨੁਧਮ੍ਮਪਟਿਪਦਂ ਪਟਿਪਨ੍ਨੋਤਿ ਵੁਤ੍ਤਂ ਹੋਤਿ. ਭਗਵਤੋ ਓਵਾਦਾਨੁਸਾਸਨਿਂ ਸਕ੍ਕਚ੍ਚਂ ਸੁਣਨ੍ਤੀਤਿ ਸਾਵਕਾ. ਸਾਵਕਾਨਂ ਸਙ੍ਘੋ ਸਾਵਕਸਙ੍ਘੋ, ਸੀਲਦਿਟ੍ਠਿਸਾਮਞ੍ਞਤਾਯ ਸਙ੍ਘਾਤਭਾਵਮਾਪਨ੍ਨੋ ਸਾਵਕਸਮੂਹੋਤਿ ਅਤ੍ਥੋ. ਯਸ੍ਮਾ ਪਨ ਸਾ ਸਮ੍ਮਾਪਟਿਪਦਾ ਉਜੁ ਅਵਙ੍ਕਾ ਅਕੁਟਿਲਾ ਅਜਿਮ੍ਹਾ, ਅਰਿਯੋ ਚ ਞਾਯੋਤਿਪਿ ਵੁਚ੍ਚਤਿ, ਅਨੁਚ੍ਛਵਿਕਤ੍ਤਾ ਚ ਸਾਮੀਚੀਤਿਪਿ ਸਙ੍ਖਂ ਗਤਾ. ਤਸ੍ਮਾ ਤਮ੍ਪਟਿਪਨ੍ਨੋ ਅਰਿਯਸਙ੍ਘੋ ਉਜੁਪ੍ਪਟਿਪਨ੍ਨੋ ਞਾਯਪ੍ਪਟਿਪਨ੍ਨੋ ਸਾਮੀਚਿਪ੍ਪਟਿਪਨ੍ਨੋਤਿਪਿ ਵੁਤ੍ਤੋ.

ਏਤ੍ਥ ਚ ਯੇ ਮਗ੍ਗਟ੍ਠਾ, ਤੇ ਸਮ੍ਮਾਪਟਿਪਤ੍ਤਿਸਮਙ੍ਗਿਤਾਯ ਸੁਪ੍ਪਟਿਪਨ੍ਨਾ. ਯੇ ਫਲਟ੍ਠਾ, ਤੇ ਸਮ੍ਮਾਪਟਿਪਦਾਯ ਅਧਿਗਨ੍ਤਬ੍ਬਸ੍ਸ ਅਧਿਗਤਤ੍ਤਾ ਅਤੀਤਂ ਪਟਿਪਦਂ ਸਨ੍ਧਾਯ ਸੁਪ੍ਪਟਿਪਨ੍ਨਾਤਿ ਵੇਦਿਤਬ੍ਬਾ.

ਅਪਿਚ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਯਥਾਨੁਸਿਟ੍ਠਂ ਪਟਿਪਨ੍ਨਤ੍ਤਾਪਿ ਅਪਣ੍ਣਕਪਟਿਪਦਂ ਪਟਿਪਨ੍ਨਤ੍ਤਾਪਿ ਸੁਪ੍ਪਟਿਪਨ੍ਨੋ.

ਮਜ੍ਝਿਮਾਯ ਪਟਿਪਦਾਯ ਅਨ੍ਤਦ੍ਵਯਮਨੁਪਗਮ੍ਮ ਪਟਿਪਨ੍ਨਤ੍ਤਾ ਕਾਯਵਚੀਮਨੋਵਙ੍ਕਕੁਟਿਲਜਿਮ੍ਹਦੋਸਪ੍ਪਹਾਨਾਯ ਪਟਿਪਨ੍ਨਤ੍ਤਾ ਚ ਉਜੁਪ੍ਪਟਿਪਨ੍ਨਤ੍ਤਾ ਚ ਉਜੁਪ੍ਪਟਿਪਨ੍ਨੋ.

ਞਾਯੋ ਵੁਚ੍ਚਤਿ ਨਿਬ੍ਬਾਨਂ. ਤਦਤ੍ਥਾਯ ਪਟਿਪਨ੍ਨਤ੍ਤਾ ਞਾਯਪ੍ਪਟਿਪਨ੍ਨੋ.

ਯਥਾ ਪਟਿਪਨ੍ਨਾ ਸਾਮੀਚਿਪ੍ਪਟਿਪਨ੍ਨਾਰਹਾ ਹੋਨ੍ਤਿ, ਤਥਾ ਪਟਿਪਨ੍ਨਤ੍ਤਾ ਸਾਮੀਚਿਪ੍ਪਟਿਪਨ੍ਨੋ.

੧੫੬. ਯਦਿਦਨ੍ਤਿ ਯਾਨਿ ਇਮਾਨਿ. ਚਤ੍ਤਾਰਿ ਪੁਰਿਸਯੁਗਾਨੀਤਿ ਯੁਗਲ਼ਵਸੇਨ ਪਠਮਮਗ੍ਗਟ੍ਠੋ ਫਲਟ੍ਠੋਤਿ ਇਦਮੇਕਂ ਯੁਗਲ਼ਨ੍ਤਿ ਏਵਂ ਚਤ੍ਤਾਰਿ ਪੁਰਿਸਯੁਗਲ਼ਾਨਿ ਹੋਨ੍ਤਿ. ਅਟ੍ਠ ਪੁਰਿਸਪੁਗ੍ਗਲਾਤਿ ਪੁਰਿਸਪੁਗ੍ਗਲਵਸੇਨ ਏਕੋ ਪਠਮਮਗ੍ਗਟ੍ਠੋ ਏਕੋ ਫਲਟ੍ਠੋਤਿ ਇਮਿਨਾ ਨਯੇਨ ਅਟ੍ਠੇਵ ਪੁਰਿਸਪੁਗ੍ਗਲਾ ਹੋਨ੍ਤਿ. ਏਤ੍ਥ ਚ ਪੁਰਿਸੋਤਿ ਵਾ ਪੁਗ੍ਗਲੋਤਿ ਵਾ ਏਕਤ੍ਥਾਨਿ ਏਤਾਨਿ ਪਦਾਨਿ. ਵੇਨੇਯ੍ਯਵਸੇਨ ਪਨੇਤਂ ਵੁਤ੍ਤਂ. ਏਸ ਭਗਵਤੋ ਸਾਵਕਸਙ੍ਘੋਤਿ ਯਾਨਿਮਾਨਿ ਯੁਗਵਸੇਨ ਚਤ੍ਤਾਰਿ ਪੁਰਿਸਯੁਗਾਨਿ, ਪਾਟਿਏਕ੍ਕਤੋ ਅਟ੍ਠ ਪੁਰਿਸਪੁਗ੍ਗਲਾ, ਏਸ ਭਗਵਤੋ ਸਾਵਕਸਙ੍ਘੋ, ਆਹੁਨੇਯ੍ਯੋਤਿਆਦੀਸੁ ਆਨੇਤ੍ਵਾ ਹੁਨਿਤਬ੍ਬਨ੍ਤਿ ਆਹੁਨਂ, ਦੂਰਤੋਪਿ ਆਨੇਤ੍ਵਾ ਸੀਲਵਨ੍ਤੇਸੁ ਦਾਤਬ੍ਬਨ੍ਤਿ ਅਤ੍ਥੋ. ਚਤੁਨ੍ਨਂ ਪਚ੍ਚਯਾਨਮੇਤਮਧਿਵਚਨਂ. ਤਂ ਆਹੁਨਂ ਪਟਿਗ੍ਗਹੇਤੁਂ ਯੁਤ੍ਤੋ ਤਸ੍ਸ ਮਹਪ੍ਫਲਕਰਣਤੋਤਿ ਆਹੁਨੇਯ੍ਯੋ. ਅਥ ਵਾ ਦੂਰਤੋਪਿ ਆਗਨ੍ਤ੍ਵਾ ਸਬ੍ਬਸਾਪਤੇਯ੍ਯਮ੍ਪਿ ਏਤ੍ਥ ਹੁਨਿਤਬ੍ਬਨ੍ਤਿ ਆਹਵਨੀਯੋ. ਸਕ੍ਕਾਦੀਨਮ੍ਪਿ ਵਾ ਆਹਵਨਂ ਅਰਹਤੀਤਿ ਆਹਵਨੀਯੋ. ਯੋ ਚਾਯਂ ਬ੍ਰਾਹ੍ਮਣਾਨਂ ਆਹਵਨੀਯੋ ਨਾਮ ਅਗ੍ਗਿ, ਯਤ੍ਥ ਹੁਤਂ ਮਹਪ੍ਫਲਨ੍ਤਿ ਤੇਸਂ ਲਦ੍ਧਿ. ਸਚੇ ਹੁਤਸ੍ਸ ਮਹਪ੍ਫਲਤਾਯ ਆਹਵਨੀਯੋ, ਸਙ੍ਘੋਵ ਆਹਵਨੀਯੋ. ਸਙ੍ਘੇ ਹੁਤਞ੍ਹਿ ਮਹਪ੍ਫਲਂ ਹੋਤਿ. ਯਥਾਹ –

‘‘ਯੋ ਚ ਵਸ੍ਸਸਤਂ ਜਨ੍ਤੁ, ਅਗ੍ਗਿਂ ਪਰਿਚਰੇ ਵਨੇ;

ਏਕਞ੍ਚ ਭਾਵਿਤਤ੍ਤਾਨਂ, ਮੁਹੁਤ੍ਤਮਪਿ ਪੂਜਯੇ;

ਸਾਯੇਵ ਪੂਜਨਾ ਸੇਯ੍ਯੋ, ਯਞ੍ਚੇ ਵਸ੍ਸਸਤਂ ਹੁਤ’’ਨ੍ਤਿ. (ਧ. ਪ. ੧੦੭);

ਤਦੇਤਂ ਨਿਕਾਯਨ੍ਤਰੇ ਆਹਵਨੀਯੋਤਿ ਪਦਂ ਇਧ ਆਹੁਨੇਯ੍ਯੋਤਿ ਇਮਿਨਾ ਪਦੇਨ ਅਤ੍ਥਤੋ ਏਕਂ. ਬ੍ਯਞ੍ਜਨਤੋ ਪਨੇਤ੍ਥ ਕਿਞ੍ਚਿਮਤ੍ਤਮੇਵ ਨਾਨਂ. ਇਤਿ ਆਹੁਨੇਯ੍ਯੋ.

ਪਾਹੁਨੇਯ੍ਯੋਤਿ ਏਤ੍ਥ ਪਨ ਪਾਹੁਨਂ ਵੁਚ੍ਚਤਿ ਦਿਸਾਵਿਦਿਸਤੋ ਆਗਤਾਨਂ ਪਿਯਮਨਾਪਾਨਂ ਞਾਤਿਮਿਤ੍ਤਾਨਮਤ੍ਥਾਯ ਸਕ੍ਕਾਰੇਨ ਪਟਿਯਤ੍ਤਂ ਆਗਨ੍ਤੁਕਦਾਨਂ. ਤਮ੍ਪਿ ਠਪੇਤ੍ਵਾ ਤੇ ਤਥਾਰੂਪੇ ਪਾਹੁਨਕੇ ਸਙ੍ਘਸ੍ਸੇਵ ਦਾਤੁਂ ਯੁਤ੍ਤਂ, ਸਙ੍ਘੋਵ ਤਂ ਪਟਿਗ੍ਗਹੇਤੁਂ ਯੁਤ੍ਤੋ. ਸਙ੍ਘਸਦਿਸੋ ਹਿ ਪਾਹੁਨਕੋ ਨਤ੍ਥਿ. ਤਥਾ ਹੇਸ ਏਕਬੁਦ੍ਧਨ੍ਤਰੇ ਚ ਦਿਸ੍ਸਤਿ, ਅਬ੍ਬੋਕਿਣ੍ਣਞ੍ਚ ਪਿਯਮਨਾਪਤ੍ਤਕਰੇਹਿ ਧਮ੍ਮੇਹਿ ਸਮਨ੍ਨਾਗਤੋਤਿ. ਏਵਂ ਪਾਹੁਨਮਸ੍ਸ ਦਾਤੁਂ ਯੁਤ੍ਤਂ ਪਾਹੁਨਞ੍ਚ ਪਟਿਗ੍ਗਹੇਤੁਂ ਯੁਤ੍ਤੋਤਿ ਪਾਹੁਨੇਯ੍ਯੋ. ਯੇਸਂ ਪਨ ਪਾਹਵਨੀਯੋਤਿ ਪਾਲ਼ਿ, ਤੇਸਂ ਯਸ੍ਮਾ ਸਙ੍ਘੋ ਪੁਬ੍ਬਕਾਰਮਰਹਤਿ, ਤਸ੍ਮਾ ਸਬ੍ਬਪਠਮਂ ਆਨੇਤ੍ਵਾ ਏਤ੍ਥ ਹੁਨਿਤਬ੍ਬਨ੍ਤਿ ਪਾਹਵਨੀਯੋ. ਸਬ੍ਬਪ੍ਪਕਾਰੇਨ ਵਾ ਆਹਵਨਮਰਹਤੀਤਿ ਪਾਹਵਨੀਯੋ. ਸ੍ਵਾਯਮਿਧ ਤੇਨੇਵ ਅਤ੍ਥੇਨ ਪਾਹੁਨੇਯ੍ਯੋਤਿ ਵੁਚ੍ਚਤਿ.

ਦਕ੍ਖਿਣਾਤਿ ਪਨ ਪਰਲੋਕਂ ਸਦ੍ਦਹਿਤ੍ਵਾ ਦਾਤਬ੍ਬਦਾਨਂ ਵੁਚ੍ਚਤਿ. ਤਂ ਦਕ੍ਖਿਣਂ ਅਰਹਤਿ, ਦਕ੍ਖਿਣਾਯ ਵਾ ਹਿਤੋ ਯਸ੍ਮਾ ਨਂ ਮਹਪ੍ਫਲਕਰਣਤਾਯ ਵਿਸੋਧੇਤੀਤਿ ਦਕ੍ਖਿਣੇਯ੍ਯੋ.

ਉਭੋ ਹਤ੍ਥੇ ਸਿਰਸ੍ਮਿਂ ਪਤਿਟ੍ਠਪੇਤ੍ਵਾ ਸਬ੍ਬਲੋਕੇਨ ਕਯਿਰਮਾਨਂ ਅਞ੍ਜਲਿਕਮ੍ਮਂ ਅਰਹਤੀਤਿ ਅਞ੍ਜਲਿਕਰਣੀਯੋ.

ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾਤਿ ਸਬ੍ਬਲੋਕਸ੍ਸ ਅਸਦਿਸਂ ਪੁਞ੍ਞਵਿਰੂਹਨਟ੍ਠਾਨਂ. ਯਥਾ ਹਿ ਰਞ੍ਞੋ ਵਾ ਅਮਚ੍ਚਸ੍ਸ ਵਾ ਸਾਲੀਨਂ ਵਾ ਯਵਾਨਂ ਵਾ ਵਿਰੂਹਨਟ੍ਠਾਨਂ ਰਞ੍ਞੋ ਸਾਲਿਕ੍ਖੇਤ੍ਤਂ ਰਞ੍ਞੋ ਯਵਕ੍ਖੇਤ੍ਤਨ੍ਤਿ ਵੁਚ੍ਚਤਿ, ਏਵਂ ਸਙ੍ਘੋ ਸਬ੍ਬਲੋਕਸ੍ਸ ਪੁਞ੍ਞਾਨਂ ਵਿਰੂਹਨਟ੍ਠਾਨਂ. ਸਙ੍ਘਂ ਨਿਸ੍ਸਾਯ ਹਿ ਲੋਕਸ੍ਸ ਨਾਨਪ੍ਪਕਾਰਹਿਤਸੁਖਸਂਵਤ੍ਤਨਿਕਾਨਿ ਪੁਞ੍ਞਾਨਿ ਵਿਰੂਹਨ੍ਤਿ. ਤਸ੍ਮਾ ਸਙ੍ਘੋ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾਤਿ.

੧੫੭. ਏਵਂ ਸੁਪ੍ਪਟਿਪਨ੍ਨਤਾਦਿਭੇਦੇ ਸਙ੍ਘਗੁਣੇ ਅਨੁਸ੍ਸਰਤੋ ਨੇਵ ਤਸ੍ਮਿਂ ਸਮਯੇ ਰਾਗਪਰਿਯੁਟ੍ਠਿਤਂ ਚਿਤ੍ਤਂ ਹੋਤਿ. ਨ ਦੋਸ…ਪੇ… ਨ ਮੋਹਪਰਿਯੁਟ੍ਠਿਤਂ ਚਿਤ੍ਤਂ ਹੋਤਿ. ਉਜੁਗਤਮੇਵਸ੍ਸ ਤਸ੍ਮਿਂ ਸਮਯੇ ਚਿਤ੍ਤਂ ਹੋਤਿ ਸਙ੍ਘਂ ਆਰਬ੍ਭਾਤਿ (ਅ. ਨਿ. ੬.੧੦) ਪੁਰਿਮਨਯੇਨੇਵ ਵਿਕ੍ਖਮ੍ਭਿਤਨੀਵਰਣਸ੍ਸ ਏਕਕ੍ਖਣੇ ਝਾਨਙ੍ਗਾਨਿ ਉਪ੍ਪਜ੍ਜਨ੍ਤਿ. ਸਙ੍ਘਗੁਣਾਨਂ ਪਨ ਗਮ੍ਭੀਰਤਾਯ ਨਾਨਪ੍ਪਕਾਰਗੁਣਾਨੁਸ੍ਸਰਣਾਧਿਮੁਤ੍ਤਤਾਯ ਵਾ ਅਪ੍ਪਨਂ ਅਪ੍ਪਤ੍ਵਾ ਉਪਚਾਰਪ੍ਪਤ੍ਤਮੇਵ ਝਾਨਂ ਹੋਤਿ. ਤਦੇਤਂ ਸਙ੍ਘਗੁਣਾਨੁਸ੍ਸਰਣਵਸੇਨ ਉਪ੍ਪਨ੍ਨਤ੍ਤਾ ਸਙ੍ਘਾਨੁਸ੍ਸਤਿਚ੍ਚੇਵ ਸਙ੍ਖਂ ਗਚ੍ਛਤਿ.

ਇਮਞ੍ਚ ਪਨ ਸਙ੍ਘਾਨੁਸ੍ਸਤਿਂ ਅਨੁਯੁਤ੍ਤੋ ਭਿਕ੍ਖੁ ਸਙ੍ਘੇ ਸਗਾਰਵੋ ਹੋਤਿ ਸਪ੍ਪਤਿਸ੍ਸੋ. ਸਦ੍ਧਾਦਿਵੇਪੁਲ੍ਲਂ ਅਧਿਗਚ੍ਛਤਿ, ਪੀਤਿਪਾਮੋਜ੍ਜਬਹੁਲੋ ਹੋਤਿ, ਭਯਭੇਰਵਸਹੋ, ਦੁਕ੍ਖਾਧਿਵਾਸਨਸਮਤ੍ਥੋ, ਸਙ੍ਘੇਨ ਸਂਵਾਸਸਞ੍ਞਂ ਪਟਿਲਭਤਿ. ਸਙ੍ਘਗੁਣਾਨੁਸ੍ਸਤਿਯਾ ਅਜ੍ਝਾਵੁਤ੍ਥਞ੍ਚਸ੍ਸ ਸਰੀਰਂ ਸਨ੍ਨਿਪਤਿਤਸਙ੍ਘਮਿਵ ਉਪੋਸਥਾਗਾਰਂ ਪੂਜਾਰਹਂ ਹੋਤਿ, ਸਙ੍ਘਗੁਣਾਧਿਗਮਾਯ ਚਿਤ੍ਤਂ ਨਮਤਿ, ਵੀਤਿਕ੍ਕਮਿਤਬ੍ਬਵਤ੍ਥੁਸਮਾਯੋਗੇ ਚਸ੍ਸ ਸਮ੍ਮੁਖਾ ਸਙ੍ਘਂ ਪਸ੍ਸਤੋ ਵਿਯ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਾਤਿ, ਉਤ੍ਤਰਿ ਅਪ੍ਪਟਿਵਿਜ੍ਝਨ੍ਤੋ ਪਨ ਸੁਗਤਿਪਰਾਯਨੋ ਹੋਤਿ.

ਤਸ੍ਮਾ ਹਵੇ ਅਪ੍ਪਮਾਦਂ, ਕਯਿਰਾਥ ਸੁਮੇਧਸੋ;

ਏਵਂ ਮਹਾਨੁਭਾਵਾਯ, ਸਙ੍ਘਾਨੁਸ੍ਸਤਿਯਾ ਸਦਾਤਿ.

ਇਦਂ ਸਙ੍ਘਾਨੁਸ੍ਸਤਿਯਂ ਵਿਤ੍ਥਾਰਕਥਾਮੁਖਂ.