ਠਾਯੀਭਾਵਨਿਦ੍ਦੇਸ

ਰਤਿਠਾਯੀਭਾਵ

੩੫੬. ਰਮ੍ਮਦੇਸਕਲਾਕਾਲ-ਵੇਸਾਦਿਪਟਿਸੇਵਨਾ;

ਯੁਵਾਨ’ਞ੍ਞੋਞ੍ਞਰਤ੍ਤਾਨਂ, ਪਮੋਦੋਰਤਿ ਰੁਚ੍ਚਤੇ.

੩੫੬. ਸਿਙ੍ਗਾਰਾਦਯੋ ਵਿਭਾਗਤੋ ਦਸ੍ਸੇਤੁਮਾਹ ‘‘ਰਮ੍ਮੇ’’ਚ੍ਚਾਦਿ. ਤਤ੍ਥ ‘‘ਰਮ੍ਮਦੇਸ’’ਇਚ੍ਚਾਦਿਨਾ ਉਦ੍ਦੀਪਨਵਿਭਾਵਾ ਦਸ੍ਸਿਤਾ. ‘‘ਯੁਵਾਨ’’ਨ੍ਤਿ ਇਮਿਨਾ ਆਲਮ੍ਬਣਵਿਭਾਵੋ. ਇਤ੍ਥੀ ਹਿ ਪੁਰਿਸਸ੍ਸ, ਪੁਰਿਸੋ ਇਤ੍ਥਿਯਾ ਆਲਮ੍ਬਣਵਿਭਾਵੋ. ਪਮੋਦੋਤਿ ਅਞ੍ਞਮਞ੍ਞਾਭਿਰਮਣਵਸੇਨ ਆਮੋਦਰੂਪੋ.

੩੫੬. ਇਦਾਨਿ ਸਿਙ੍ਗਾਰਾਦਿਨਾਮਕੇ ਤੇਰਤ੍ਯਾਦਿਕੇ ਕਮੇਨ ਨਿਦ੍ਦਿਸਤਿ ‘‘ਰਮ੍ਮ’’ਇਚ੍ਚਾਦਿਨਾ. ਰਮ੍ਮਦੇਸਕਲਾਕਾਲਵੇਸਾਦਿਪਟਿਸੇਵਨਾ ਰਮਣੀਯਨਿਰਾਵਰਣਸੁਚਿਪਵਿਤ੍ਤਵਾਸਾਰਹਦੇਸੋ ਰਮ੍ਮਗੀਤਿਕਾਦਿਕਲਾ ਰਤਿਜਨਕਵਸਨ੍ਤਾਦਿਅਨੁਰੂਪਕਾਲੋ ਮਾਲਾਗਨ੍ਧਾਦਿ ਉਪਸੋਭਿਤਕਿਰਿਯਾਦਿ ਮਨੁਞ੍ਞਵੇਸੋ, ਆਦਿਸਦ੍ਦੇਨ ਨਿਦ੍ਦਿਟ੍ਠਭਾਸਿਤਮਿਹਿਤਾਦਿਚੇਤਿ ਇਮੇਸਂ ਦਿਟ੍ਠਸੁਤਮੁਤਾਦੀਸੁ ਦਿਟ੍ਠਾਦਿਮਤ੍ਤਮਕਤ੍ਵਾ ਪਞ੍ਞਾਯ ਤੇਨ ਤੇਨਾਕਾਰੇਨ ਪੁਨਪ੍ਪੁਨਾਨੁਭਵਨੇਨ ਅਞ੍ਞੋਞ੍ਞਰਤ੍ਤਾਨਂ ਅਞ੍ਞਮਞ੍ਞਂ ਨਿਮਿਤ੍ਤਾਨੁਬ੍ਯਞ੍ਜਨਸਙ੍ਕਪ੍ਪਵਸੇਨਾਤਿਰਤ੍ਤਾਨਂ ਯੁਵਾਨਂ ਤਰੁਣਿਤ੍ਥਿ ਪੁਰਿਸਾਨਂ ਪਮੋਦੋ ਅਭਿਰਮਣਵਸੇਨ ਸਨ੍ਤੋਸੋ ਪੀਤਿ ਰਤਿ ਰੁਚ੍ਚਤੇ ਰੁਚ੍ਚਨਤੋ ‘‘ਰਤੀ’’ਤਿ ਵੁਚ੍ਚਤੀਤਿ. ਇਮਸ੍ਮਿਂ ਪਕ੍ਖੇ ਰਕਾਰੋ ਸਨ੍ਧਿਜੋ. ਦੇਸੋ ਚ ਕਲਾ ਚ ਕਾਲੋ ਚ ਵੇਸੋ ਚੇਤਿ ਚ, ਤੇ ਆਦਯੋ ਯੇਸਮਿਤਿ ਚ, ਰਮ੍ਮਾ ਚ ਤੇ ਦੇਸ…ਪੇ… ਵੇਸਾਦਯੋ ਚੇਤਿ ਚ, ਤੇਸਂ ਪਟਿ ਪੁਨਪ੍ਪੁਨਂ ਸੇਵਨਮਿਤਿ ਚ, ਅਞ੍ਞੋ ਚ ਅਞ੍ਞੋ ਚੇਤਿ ਚ, ਤੇਸੁ ਰਤ੍ਤਾਤਿ ਚ ਵਾਕ੍ਯਂ.

੩੫੭. ਯੁਤ੍ਯਾ ਭਾਵਾਨੁਭਾਵਾ ਤੇ,

ਨਿਬਨ੍ਧਾ ਪੋਸਯਨ੍ਤਿ ਨਂ;

ਸੋਪ੍ਯਾ’ਯੋਗਵਿਪ੍ਪਯੋਗ-

ਸਮ੍ਭੋਗਾਨਂ ਵਸਾ ਤਿਧਾ.

੩੫੭. ‘‘ਯੁਤ੍ਯਾ’’ਇਚ੍ਚਾਦਿ. ਤੇ ਯਥਾਵੁਤ੍ਤਾ ਭਾਵਾਨੁਭਾਵਾ ਯੁਤ੍ਯਾ ਆਲਸਿਯਉਗ੍ਗਤਾਜਿਗੁਚ੍ਛਾਵਜ੍ਜਿਤਾ ਯੇ ਸਙ੍ਕਾਉਸ੍ਸੁਕ੍ਕਾਦਯੋ ਭਾਵਾ ਤਂਬ੍ਯਞ੍ਜਕਾ ਤਦਨੁਰੂਪਾ ਅਨੁਭਾਵਾ ਚ ਅਯੋਗਾਦਿਕੇ ਸਿਙ੍ਗਾਰੇ ਯਥਾ ਯਥਾ ਯੁਞ੍ਜਨ੍ਤਿ, ਤਾਦਿਸਿਯਾਵ ਯੁਤ੍ਤਿਯਾ ਨਿਬਨ੍ਧਾ ਨਂ ਰਤਿਂ ਸਮ੍ਪੋਸਯਨ੍ਤਿ, ਸੋਯੇਵਮੇਵਂ ਪੋਸਿਤੋ ਸਿਙ੍ਗਾਰੋ ਨਾਮ ਰਸੋ ਸਮ੍ਪਜ੍ਜਤੇ. ਸੋਪਿ ਤਿਧਾਤਿ ਸਮ੍ਬਨ੍ਧੋ. ਤਤ੍ਥ ਅਯੋਗੋ ਨਾਮ ਪੁਬ੍ਬੇ ਅਸਙ੍ਗਤਾਨਂ ਅਨੁਰਾਗੇਨ ਸਙ੍ਗਮਮਿਚ੍ਛਨ੍ਤਾਨਂ ਇਤ੍ਥਿਪੁਰਿਸਾਨਮਸਙ੍ਗਮੋ. ਅਤਿਸਯਵਿਰੁਲ਼੍ਹਪੇਮਾਨਮੁਭਿਨ੍ਨਮ੍ਪਿ ਸਿਲੇਸੋ ਵਿਪ੍ਪਯੋਗੋ. ਬਲਵਕਾਮਾਵੇਸਵਿਸੇਸਾਨਂ ਕਾਮੀਨਂ ਦਸ੍ਸਨਾਦਿਸਮਞ੍ਜਨਂ ਸਮ੍ਭੋਗੋ.

੩੫੭. ਇਦਾਨਿ ਰਤਿਯਾ ਪੁਟ੍ਠਕਾਰਣਂ ਪੁਟ੍ਠਪਯੋਗਞ੍ਚ ਦਸ੍ਸੇਤਿ ‘‘ਯੁਤ੍ਯਾ’’ਇਚ੍ਚਾਦਿਨਾ. ਤੇ ਭਾਵਾਨੁਭਾਵਾ ਨਿਦ੍ਦਿਟ੍ਠਬ੍ਯਭਿਚਾਰੀਭਾਵੇਸੁ ਰਤ੍ਯਾਨੁਰੂਪਬ੍ਯਭਿਚਾਰੀਭਾਵੋ ਤਪ੍ਪਕਾਸਕੋ ਅਨੁਭਾਵੋ ਚੇਤਿ ਇਮੇ ਦ੍ਵੇ ਯੁਤ੍ਯਾ ਹੇਤੁਭੂਤਾਯ ਅਯੋਗਵਿਪ੍ਪਯੋਗਸਮ੍ਭੋਗਸਙ੍ਖਤਾਨਂ ਤਿਣ੍ਣਂ ਸਿਙ੍ਗਾਰਾਨਂ ਅਨੁਕੂਲਤ੍ਥੇਨ ਰਤਿਯਾ ਵਿਰੁਦ੍ਧਤ੍ਤਾ ਆਲਸਿਯਉਗ੍ਗਜਿਗੁਚ੍ਛਾਦਿਕੇ ਪਰਿਵਜ੍ਜੇਤ੍ਵਾ ਸਙ੍ਕਾਉਸ੍ਸੁਕ੍ਕਾਦੀਨਂ ਰਤ੍ਯਾਨੁਕੂਲਭਾਵਾਨਂ ਵਸੇਨ ਯਥਾਯੋਗਂ ਨਿਬਨ੍ਧਾ ਕਵੀਹਿ ਬਨ੍ਧਾ ਨਂ ਰਤਿਂ ਪੋਸਯਨ੍ਤਿ ਯਥਾ ਤਪ੍ਪਕਾਸਨੇਨ ਪੂਰੇਨ੍ਤਿ ਸਜ੍ਜੇਨ੍ਤਿ, ਏਵਂ ਸਜ੍ਜਿਤੋ ਰਤਿਸਿਙ੍ਗਾਰੋ ਨਾਮ ਰਸੋ ਹੋਤਿ. ਸੋਪਿ ਸਾਮਞ੍ਞੇਨ ਨਿਦ੍ਦਿਟ੍ਠਸਿਙ੍ਗਾਰਰਸੋਪਿ ਅਯੋਗਵਿਪ੍ਪਯੋਗਸਮ੍ਭੋਗਾਨਂ ਸਿਙ੍ਗਾਰਾਨਂ ਵਸਾ ਭੇਦੇਨ ਤਿਧਾ ਭਵਤੀਤਿ. ਤਤ੍ਥ ਅਯੋਗੋ ਨਾਮ ਪੁਬ੍ਬੇ ਅਞ੍ਞਮਞ੍ਞਸਙ੍ਗਮਰਹਿਤਾਨਂ ਅਭਿਨਵਾਨੁਰਾਗਬਲੇਨ ਸਙ੍ਗਮਂ ਪਤ੍ਥੇਨ੍ਤਾਨਂ ਥੀਪੁਮਾਨਂ ਅਸਙ੍ਗਮੋ. ਵਿਪ੍ਪਯੋਗੋ ਨਾਮ ਸਙ੍ਗਮਾਤਿਸਯੇਨ ਵਿਰੁਲ਼੍ਹਪੇਮਾਨਂ ਥੀਪੁਮਾਨਂ ਅਞ੍ਞਮਞ੍ਞਵਿਸਿਲੇਸੋ. ਸਮ੍ਭੋਗੋ ਨਾਮ ਬਲਵਕਾਮਤਣ੍ਹਾਵਿਸੇਸਵਸੇਨ ਯੁਤ੍ਤਾਨਂ ਕਾਮਿਨਿਕਾਮੁਕਾਨਂ ਅਞ੍ਞਮਞ੍ਞਂ ਦਸ੍ਸਨਾਦਿਅਸ੍ਸਾਦੋ. ਭਾਵੋ ਚ ਅਨੁਭਾਵੋ ਚੇਤਿ ਚ, ਅਯੋਗੋ ਚ ਵਿਪ੍ਪਯੋਗੋ ਚ ਸਮ੍ਭੋਗੋ ਚੇਤਿ ਚ ਵਾਕ੍ਯਂ.

ਇਮਮਲਙ੍ਕਾਰਂ ਕਰੋਨ੍ਤੇਨ ਆਚਰਿਯਸਙ੍ਘਰਕ੍ਖਿਤਮਹਾਸਾਮਿਪਾਦੇਨ ਪਨ ਪਰਮਮਧੁਰਸਦ੍ਧਮ੍ਮਾਮਤਲੁਦ੍ਧਸੁਦ੍ਧਸਨ੍ਤਾਨਾਨਂ ਤਪੋਧਨਾਨਂ ਅਞ੍ਞਰਸਾਵਬੋਧਨੇ ਪਯੋਜਨਾਭਾਵੇਪਿ ਲੋਕਿਯੇਸੁ ਤੇਸੁ ਤੇਸੁ ਵੋਹਾਰੇਸੁ ਅਸਮ੍ਮੋਹਤ੍ਥਂ ਸਿਙ੍ਗਾਰਾਦਿਨਵਵਿਧਰਸਾਨਂ ਲਕ੍ਖਣਮਤ੍ਤਸ੍ਸੇਵ ਦਸ੍ਸਿਤਤ੍ਤਾ ਤਦਨੁਰੂਪਲਕ੍ਖਿਯਪਰਿਗ੍ਗਹੇ ਅਸਤਿ ਲਕ੍ਖਣਾਵਬੋਧਸ੍ਸ ਸੁਬ੍ਯਤ੍ਤਾਭਾਵਤੋ ਵੁਤ੍ਤਲਕ੍ਖਣਾਵਬੋਧਤ੍ਥਂ ਤਂਤਂਲਕ੍ਖਣਕਥਨਾਨਨ੍ਤਰਂ ਤਸ੍ਸ ਤਸ੍ਸ ਲਕ੍ਖਿਯਸ੍ਸ ਮੁਖਮਤ੍ਤਂ ਦਸ੍ਸੇਤਬ੍ਬਂ ਹੋਤਿ. ਹੇਟ੍ਠਾ ‘‘ਰਾਗਾਨਤਬ੍ਭੁਤਸਰੋਜਮੁਖਂ ਧਰਾਯਾ’’ਤਿਆਦਿਨਾ ਨਿਦ੍ਦਿਟ੍ਠਸਮ੍ਭੋਗਸਿਙ੍ਗਾਰਰਸਾਭਾਸੇਨੇਵ ਹਸਾਭਾਸਾਦੀਨਂ ਅਟ੍ਠਨ੍ਨਂ ਰਸਾਭਾਸਰੂਪਸ੍ਸ ਭਾਵਾਭਾਸਸ੍ਸ, ਵਿਭਾਵਾਭਾਸਸ੍ਸ, ਅਨੁਭਾਵਾਭਾਸਸ੍ਸ ਚ ਞਾਤਬ੍ਬਤ੍ਤਾ ਸਿਙ੍ਗਾਰਰਸਸ੍ਸ ਲਕ੍ਖਿਯਮੇਵਂ ਵੇਦਿਤਬ੍ਬਂ.

ਗੀਤਸ੍ਸਰੇਨ ਉਪਕਡ੍ਢਿਯ ਨੇਤ੍ਤਰਸ੍ਮਿ-

ਬਨ੍ਧਂ ਕਰਂਵ ਵਿਵਸਞ੍ਚ ਕਰਗ੍ਗਹੇਨ;

ਯਾ ਤਾਦਿਸੇਪਿ ਵਿਨਿਯੋਜਯਿ ਦੁਕ੍ਕਰੇ ਮਂ,

ਸੇਰਨ੍ਦਤੀ ਅਧਿਗਤਾ ਵਿਧਿਨਾ ਮਯਜ੍ਜਾਤਿ.

ਗੀਤਸ੍ਸਰੇਨ ਹਤ੍ਥੀਨਂ ਗੀਤਿਕਾਯ ਪਿਯਤ੍ਤਾ ਗੀਤਿਕਾਧਨਿਨਾ ਉਪਕਡ੍ਢਿਯ ਅਤ੍ਤਨੋ ਸਮੀਪਂ ਆਕਡ੍ਢਿਤ੍ਵਾ ਨੇਤ੍ਤਰਸ੍ਮਿਬਨ੍ਧਂ ਨੇਤ੍ਤਸਙ੍ਖਾਤਹਤ੍ਥਾਚਰਿਯਸ੍ਸ ਰਜ੍ਜੁਨਾ ਬਨ੍ਧਂ ਕਰਗ੍ਗਹੇਨ ਹਤ੍ਥਗ੍ਗਾਹੇਨ ਸੋਣ੍ਡਗ੍ਗਹਣੇਨ ਵਿਵਸਞ੍ਚ ਅਪਗਤਇਚ੍ਛਾਚਾਰਂ ਪਰਵਸਂ ਕਰਂ ਇਵ ਹਤ੍ਥਂ ਇਵ ਗੀਤਸ੍ਸਰੇਨ ਅਤ੍ਤਨੋ ਲੀਲੋਪੇਤਗੀਤਿਕਾਧਨਿਨਾ ਉਪਕਡ੍ਢਿਯ ਅਤ੍ਤਨੋ ਸਮੀਪਂ ਨੇਤ੍ਵਾ ਨੇਤ੍ਤਰਸ੍ਮਿਬਨ੍ਧਂ ਅਤ੍ਤਨੋ ਨਯਨਕਨ੍ਤਿਯਾ ਪਟਿਬਨ੍ਧਂ ਕਰਗ੍ਗਹੇਨ ਹਤ੍ਥਗ੍ਗਾਹੇਨ ਵਿਵਸਞ੍ਚ ਅਪਗਤਧਿਤਿਂ ਮੂਲ਼੍ਹਂ ਮਂ ਯਾ ਕਨ੍ਤਾ ਤਾਦਿਸੇਪਿ ਦੁਕ੍ਕਰੇ ਵਿਨਿਯੋਜਯਿ, ਸਾ ਇਰਨ੍ਦਤੀ ਇਰਨ੍ਦਤੀ ਨਾਮ ਨਾਗਮਾਨਵਿਕਾ ਮਯਾ ਅਜ੍ਜ ਵਿਧਿਨਾ ਭਾਗ੍ਯੇਨ ਅਧਿਗਤਾ ਲਦ੍ਧਾਤਿ.

ਏਤ੍ਥ ਗੀਤਸ੍ਸਰਨੇਤ੍ਤਰਸ੍ਮਿਕਰਗ੍ਗਹਸਙ੍ਖਤਾਹਿ ਇਮਾਹਿ ਪਦਾਵਲੀਹਿ ਉਦ੍ਦੀਪਨਵਿਭਾਵੋ ਦਸ੍ਸਿਤੋ. ਥਿਯਾ ਪੁਰਿਸੋ ਚ, ਪੁਰਿਸਸ੍ਸ ਥੀ ਚ ਆਲਮ੍ਬਣਂ ਹੋਤੀਤਿ ‘‘ਸਾ ਇਰਨ੍ਦਤੀ ਮਯਾ’’ਤਿ ਇਮਿਨਾ ਆਰਮ੍ਮਣਵਿਭਾਵੋ ਦਸ੍ਸਿਤੋ. ‘‘ਉਪਕਡ੍ਢਿਯ ਬਨ੍ਧਂ ਵਿਵਸ’’ਨ੍ਤਿ ਇਮੇਹਿ ਕਾਮੇਨ ਉਦ੍ਦੀਪਿਤਠਾਯੀਭਾਵਸਙ੍ਖਤਾ ਰਤਿ ਦਸ੍ਸਿਤਾ. ‘‘ਤਾਦਿਸੇਪਿ ਦੁਕ੍ਕਰੇ ਵਿਨਿਯੋਜਯੀ’’ਤਿ ਇਮੇਹਿ ਉਸ੍ਸਾਹਾਦਿਕਾ ਚ ‘‘ਵਿਧਿਨਾ ਅਧਿਗਤਾ ਮਯਜ੍ਜਾ’’ਤਿ ਇਮੇਹਿ ਹਰਿਸਾਦਿਕਾ ਚ ਬ੍ਯਭਿਚਾਰੀਭਾਵਾ ਦਸ੍ਸਿਤਾ. ਰਤਿਯਾ ਵਿਰੁਦ੍ਧੇ ਨਿਬ੍ਬੇਦਆਲਸਿਯਉਗ੍ਗਤਜਿਗੁਚ੍ਛਾਦਿਕੇ ਬ੍ਯਭਿਚਾਰੀਭਾਵੇ ਵਜ੍ਜੇਤ੍ਵਾ ਵੁਤ੍ਤਪ੍ਪਕਾਰਵਿਭਾਵਾਦਿਕੇ ਪਕਾਸਨ੍ਤੋ ‘‘ਗੀਤਸ੍ਸਰੇਨੇ’’ਚ੍ਚਾਦਿਕਾ ਰਤਿਪ੍ਪਤੀਤਿਯਾ ਅਨੁਰੂਪਂ ਪਯੁਤ੍ਤਾ ਕਵਿਪ੍ਪਯੋਗਾ ਇਧ ਅਨੁਭਾਵਾ ਨਾਮ ਹੋਨ੍ਤਿ. ਨਾਟਕਾਦਿਦਸ੍ਸਨੀਯਸਤ੍ਥੇ ਅਭਿਨਯੋ ਅਨੁਭਾਵੋ. ਰਮ੍ਮਦੇਸਰਮ੍ਮਕਾਲਰਮ੍ਮਵੇਸਾਦਯੋ ਤਦਭਾਵੇ ਰਤਿਯਾ ਅਨੁਪ੍ਪਜ੍ਜਨਤੋ ਸਾਮਤ੍ਥਿਯਾ ਗਮ੍ਯਾ ਭਵਨ੍ਤੀਤਿ ਏਵਂ ਲਕ੍ਖਣਾਨੁਗਤਲਕ੍ਖਿਯਪਰਿਗ੍ਗਾਹੋ ਸਬ੍ਬਤ੍ਥ ਕਾਤਬ੍ਬੋ. ਏਵਂ ਸਤਿਬਨ੍ਧਤ੍ਥਾਵਬੋਧਕਾਨਂ ਸਬ੍ਭਾਨਂ ਉਪ੍ਪਜ੍ਜਮਾਨਾਯਪੀਤਿਯਾ ਕਾਰਣਤ੍ਤਾ ਕਾਰਿਯੋਪਚਾਰੇਨ ਏਸੋ ਬਨ੍ਧੋ ਰਸੋ ਨਾਮ ਹੋਤੀਤਿ. ਉਪਰਿਪਿ ਏਵਮੇਵ.

ਹਸ੍ਸਠਾਯੀਭਾਵ

੩੫੮. ਵਿਕਾਰਾਕਤਿਆਦੀਹਿ,

ਅਤ੍ਤਨੋ’ਥ ਪਰਸ੍ਸ ਵਾ;

ਹਾਸੋ ਨਿਦ੍ਦਾ ਸਮਾਲਸ੍ਯ-

ਮੁਚ੍ਛਾਦਿਬ੍ਯਭਿਚਾਰਿਭਿ;

ਪਰਿਪੋਸੇ ਸਿਯਾ ਹਸ੍ਸੋ,

ਭਿਯ੍ਯੋ’ਤ੍ਥਿਪਭੁਤੀਨ ਸੋ.

੩੫੮. ‘‘ਵਿਕਾਰੇ’’ਚ੍ਚਾਦਿ. ਵਿਕਾਰਾਕਤਿ ਦੇਸਵਯਾਦੀਨਂ ਵਿਪਰੀਤੋ ਕੇਸਬਨ੍ਧਨਾਦਿ, ਸੋ ਆਦਿ ਯੇਸਂ ਅਞ੍ਞਾਕਤ੍ਯਾਦਿਨਚ੍ਚਨਾਦੀਨਂ, ਤੇਹਿ ਵਿਭਾਵੇਹਿ ਹਾਸੋ ਚੇਤੋਵਿਕਾਸੋ, ਸੋਪਿ ਅਤ੍ਤਨੋ ਸਮ੍ਬਨ੍ਧੀ ਵਾ ਅਥ ਪਰਸ੍ਸ ਸਮ੍ਬਨ੍ਧੀ ਵਾ, ਤਤ੍ਥ ਯੋ ਵਿਭਾਵਸਾਮਤ੍ਥਿਯਾਯੇਵਾਭਿਬ੍ਯਤ੍ਤਿਂ ਯਾਤਿ, ਸੋ ਅਤ੍ਤਟ੍ਠੋ. ਯੋ ਪਨ ਵਿਭਾਵਦਸ੍ਸਨਾ ਉਪ੍ਪਨ੍ਨਾਪਿ ਪੁਰਿਸਸ੍ਸ ਗਮ੍ਭੀਰਤ੍ਤਾਦਿਨਾ ਛਾਦਿਤੋ ਸਮਾਨੋ ਪੁਰਿਸਨ੍ਤਰੇ ਹਸਤ੍ਯਾਭਿਬ੍ਯਤ੍ਤੋ, ਸੋ ਪਰਟ੍ਠੋ. ਸੋ ਹਾਸੋ ਨਿਦ੍ਦਾਦੀਹਿ ਬ੍ਯਭਿਚਾਰੀਹਿਯੇਵ, ਅਨੁਭਾਵਪਕ੍ਖੇ ਆਦਿਸਦ੍ਦੇਨ ਅਕ੍ਖਿਫਨ੍ਦਨਾਦਯੋ ਗਹਿਤਾ. ਪਰਿਪੋਸੇ ਸਤਿ ਹਸ੍ਸੋ ਨਾਮ ਰਸੋ ਸਿਯਾ. ਸੋ ਹਸ੍ਸੋ ਭਿਯ੍ਯੋ ਇਤ੍ਥਿਪਭੁਤੀਨਂ ਸਿਯਾਤਿ ਸਮ੍ਬਨ੍ਧੋ. ਏਤ੍ਥ ਪਭੁਤਿਸਦ੍ਦੇਨ ਨੀਚਪਕਤਯੋ ਸਙ੍ਗਣ੍ਹਨ੍ਤਿ.

੩੫੮. ਇਦਾਨਿ ਹਸ੍ਸਰਸਸ੍ਸ ਪੋਸਨਾਕਾਰਂ ਦਸ੍ਸੇਤੁਮਾਹ ‘‘ਵਿਕਾਰ’’ਇਚ੍ਚਾਦਿ. ਵਿਕਾਰਾਕਤਿਆਦੀਹਿ ਦੇਸਵਯੋਲਿਙ੍ਗਾਨਂ ਵਿਪਰੀਤੇਹਿ ਕੇਸਬਨ੍ਧਗਤਿਟ੍ਠਿਤਿਆਦਿਕੇਹਿ, ਨਚ੍ਚਗੀਤਆਦਿਕੇਹਿ ਚ ਦੁਵਿਧੇਹਿ ਆਕਤਿਸਙ੍ਖਤੇਹਿ ਹੇਤੁਭੂਤੇਹਿ ਅਤ੍ਤਨੋ ਵਾ ਅਥ ਪਰਸ੍ਸ ਵਾ ਸਮ੍ਬਨ੍ਧੀ ਸੋ ਹਾਸੋ ਚੇਤੋ ਵਿਕਾਸਲਕ੍ਖਣੋ ਨਿਦ੍ਦਾਸਮਾਲਸ੍ਯਮੁਚ੍ਛਾਦਿਬ੍ਯਭਿਚਾਰਿਭਿ ਨਿਦ੍ਦਾਸਮਆਲਸ੍ਯਮੁਚ੍ਛਾਅਕ੍ਖਿਫਨ੍ਦਨਾਦੀਹਿ ਅਨੁਭਾਵੇਹਿ ਸੁਤਸਮ੍ਬਨ੍ਧੇਨ ਤੇਹੇਵ ਨਿਦ੍ਦਾਸਮਾਲਸ੍ਯਮੁਚ੍ਛਾਸਙ੍ਖਤਬ੍ਯਭਿਚਾਰੀਹਿ ਕਰਣਭੂਤੇਹਿ ਪਰਿਪੋਸੇ ਸਤਿ ਹਸ੍ਸੋ ਹਸ੍ਸੋ ਨਾਮ ਰਸੋ ਸਿਯਾ, ਸੋ ਹਸ੍ਸੋ ਭਿਯ੍ਯੋ ਇਤ੍ਥਿਪਭੁਤੀਨਂ, ਨੀਚਪਕਤੀਨਞ੍ਚ ਸਿਯਾਤਿ. ਵਿਕਾਰਾ ਚ ਸਾ ਆਕਤਿ ਚੇਤਿ ਚ, ਸੋ ਆਦਿ ਯੇਸਨ੍ਤਿ ਚ, ਨਿਦ੍ਦਾ ਚ ਸਮੋ ਚ ਆਲਸ੍ਯਞ੍ਚ ਮੁਚ੍ਛਾ ਚੇਤਿ ਚ, ਤੇ ਆਦਿ ਯੇਸਂ ਅਕ੍ਖਿਫਨ੍ਦਨਾਦੀਨਂ ਅਨੁਭਾਵਾਨਨ੍ਤਿ ਚ, ਤੇ ਚ ਬ੍ਯਭਿਚਾਰਿਨੋ ਚੇਤਿ ਚ, ਇਤ੍ਥੀ ਪਭੁਤਿ ਯੇਸਂ ਨੀਚਪਕਤੀਨਨ੍ਤਿ ਚ ਵਾਕ੍ਯਂ.

ਹਸ੍ਸਪ੍ਪਭੇਦ

੩੫੯. ਸਿਤਮਿਹ ਵਿਕਾਸਿਨਯਨਂ,

ਕਿਞ੍ਚਾ’ਲਕ੍ਖਿਯਦਿਜਨ੍ਤੁ ਤਂ ਹਸਿਤਂ;

ਮਧੁਰਸ੍ਸਰਂ ਵਿਹਸਿਤਂ,

ਸਂਸਸਿਰੋਕਮ੍ਪਮੁਪਹਸਿਤਂ.

੩੬੦. ਅਪਹਸਿਤਂ ਸਞ੍ਜਲ’ਕ੍ਖਿ,

ਵਿਕ੍ਖਿਤ੍ਤਙ੍ਗਂ ਭਵਤ੍ਯ’ਤਿਹਸਿਤਂ;

ਦ੍ਵੇ ਦ੍ਵੇ ਹਸ੍ਸਾ ਕਥਿਤਾ ਚੇ’ਸਂ,

ਜੇਟ੍ਠੇ ਮਜ੍ਝੇ’ਧਮੇਪਿ ਚ ਕਮਸੋ.

੩੫੯-੩੬੦. ਹਸ੍ਸੇ ਭੇਦਮਾਹ ‘‘ਸਿਤ’’ਮਿਚ੍ਚਾਦਿਨਾ. ਇਹ ਹਸ੍ਸੇ ਵਿਕਾਸੀਨਿ ਨਯਨਾਨਿ ਯਸ੍ਸ ਤਂ ਸਿਤਂ, ਕਿਞ੍ਚਿ ਆਲਕ੍ਖਿਯਾ ਦਿਜਾ ਦਨ੍ਤਾ ਯਸ੍ਸ ਤਂ ਹਸਿਤਂ. ਏਵਂ ਮਧੁਰੋ ਸਰੋ ਸਦ੍ਦੋ ਯਸ੍ਸ ਤਂ ਵਿਹਸਿਤਂ. ਅਂਸਸਿਰੋਕਮ੍ਪੇਨ ਸਹ ਵਤ੍ਤਮਾਨਂ ਉਪਹਸਿਤਂ, ਸਹ ਜਲੇਨ ਅਸ੍ਸੁਨਾ ਵਤ੍ਤਮਾਨਾਨਿ ਅਕ੍ਖੀਨਿ ਯਸ੍ਸ ਤਂ ਅਪਹਸਿਤਂ. ਵਿਕ੍ਖਿਤ੍ਤਾਨਿ ਇਤੋ ਤਤੋ ਪਸਾਰਿਤਾਨਿ ਅਙ੍ਗਾਨਿ ਯਸ੍ਸ ਤਂ ਅਤਿਹਸਿਤਂ ਨਾਮ. ਏਸਞ੍ਚ ਸਿਤਾਦੀਨਂ ਮਜ੍ਝੇ ਦ੍ਵੇ ਦ੍ਵੇ ਹਸ੍ਸਾ ਆਦਿਤੋ ਪਟ੍ਠਾਯ ਕਮਸੋ ਯਥਾਕ੍ਕਮੇਨ ਜੇਟ੍ਠੇ ਮਜ੍ਝੇ ਅਧਮੇਪਿ ਚ ਕਥਿਤਾਤਿ ਸਮ੍ਬਨ੍ਧੋ. ਪੁਰਾਤਨੇਹੀਤਿ ਵਿਞ੍ਞਾਯਤਿ.

੩੫੯-੩੬੦. ਇਦਾਨਿ ਹਸ੍ਸਭੇਦਂ ਦਸ੍ਸੇਤਿ ‘‘ਸਿਤ’’ਮਿਚ੍ਚਾਦਿਨਾ. ਇਹ ਇਮਸ੍ਮਿਂ ਹਸ੍ਸਵਿਸਯੇ ਵਿਕਾਸਿਨਯਨਂ ਵਿਵਟਨਯਨਂ ਸਿਤਂ ਨਾਮ. ਕਿਞ੍ਚਿ ਆਲਕ੍ਖਿਯਦਿਜਂ ਤੁ ਕਿਞ੍ਚਿ ਦਿਸ੍ਸਮਾਨਦਨ੍ਤਂ, ਤਂ ਹਸਿਤਂ ਨਾਮ. ਮਧੁਰਸ੍ਸਰਂ ਮਧੁਰਨਾਦਂ ਵਿਹਸਿਤਂ ਨਾਮ. ਸਂਸਸਿਰੋਕਮ੍ਪਂ ਅਂਸਸਿਰੋਕਮ੍ਪਸਹਿਤਂ ਉਪਹਸਿਤਂ ਨਾਮ. ਸਜਲਕ੍ਖਿ ਅਸ੍ਸੁਵਿਲੋਚਨਸਹਿਤਂ ਅਪਹਸਿਤਂ ਨਾਮ. ਵਿਕ੍ਖਿਤ੍ਤਙ੍ਗਂ ਅਟ੍ਠਾਨੇ ਪਸਾਰਣਵਸੇਨ ਵਿਕ੍ਖਿਤ੍ਤਹਤ੍ਥਪਾਦਾਦਿਅਵਯਵਵਨ੍ਤਂ ਅਤਿਹਸਿਤਂ ਨਾਮ ਭਵਤਿ. ਏਸਂ ਛਨ੍ਨਂ ਕਮਸੋ ਕਮੇਨ ਦ੍ਵੇ ਦ੍ਵੇ ਜੇਟ੍ਠੇ ਮਜ੍ਝੇ ਅਧਮੇਪਿ ਵਿਸਯੇ ਕਥਿਤਾ ਪੁਰਾਤਨੇਹਿ ਭਾਸਿਤਾਤਿ. ਵਿਕਾਸੀਨਿ ਨਯਨਾਨਿ ਅਸ੍ਸੇਤਿ ਚ, ਕਿਞ੍ਚਿ ਈਸਕਂ ਆਲਕ੍ਖਿਯਾ ਦਿਜਾ ਯਸ੍ਸੇਤਿ ਚ, ਮਧੁਰੋ ਸਰੋ ਅਸ੍ਸੇਤਿ ਚ, ਅਂਸੋ ਚ ਸਿਰੋ ਚੇਤਿ ਚ, ਅਂਸਸਿਰਸੋ ਕਮ੍ਪੋਤਿ ਚ, ਤੇਨ ਸਹ ਵਤ੍ਤਤੀਤਿ ਚ, ਸਹ ਜਲੇਨ ਵਤ੍ਤਮਾਨਾਨਿ ਅਕ੍ਖੀਨਿ ਯਸ੍ਸੇਤਿ ਚ, ਅਨੁਸ੍ਵਰਾਗਮੋ. ਵਿਕ੍ਖਿਤ੍ਤਾਨਿ ਅਙ੍ਗਾਨਿ ਯਸ੍ਸੇਤਿ ਚ ਵਾਕ੍ਯਂ. ਸਿਤਹਸਿਤਦ੍ਵਯਂ ਉਤ੍ਤਮੇ, ਵਿਹਸਿਤਉਪਹਸਿਤਦ੍ਵਯਂ ਮਜ੍ਝਿਮੇ, ਅਪਹਸਿਤਅਤਿਹਸਿਤਦ੍ਵਯਂ ਅਧਮੇ ਵਤ੍ਤਤੇ. ਏਵਂ ਸਿਤਾਦਯੋ ਅਨੁਰੂਪਵਿਭਾਵਾਦਿਨਾ ਪਯੁਤ੍ਤਾ ਇਮੇ ਰਸਾ’ਵਤ੍ਥਂ ਪਾਪੁਣਨ੍ਤੀਤਿ ਅਧਿਪ੍ਪਾਯੋ.

ਹਸ੍ਸਰਸਸ੍ਸ ਏਵਮੁਦਾਹਰਣਂ ਞਾਤਬ੍ਬਂ –

ਪੂਜੇਸਿ ਕਣ੍ਠਮਣਿਨਾ ਅਪਿ ਯੋ ਪਸਨ੍ਨੋ,

ਧਮ੍ਮੇ ਪੁਰਾ’ਸਮਧੁਰਂ ਵਿਧੁਰਂ ਸ ਹਨ੍ਤੁਂ;

ਗੋਪੇਨ੍ਤਿਯਾਪਿ ਵਚਨੇਨ ਥਿਯਾ ਸਭਾਵਂ;

ਭਤ੍ਤਿਂ ਅਕਾਸਿ ਫਰੁਸੇ ਮਯਿ ਨਾਗਰਾਜਾਤਿ.

ਯੋ ਪੁਰਾ ਪੁਬ੍ਬੇ ਧਮ੍ਮੇ ਤਸ੍ਸ ਧਮ੍ਮਕਥਨੇ ਪਸਨ੍ਨੋ ਕਣ੍ਠਮਣਿਨਾ ਅਪਿ ਅਤ੍ਤਨੋ ਅਨਗ੍ਘਕਣ੍ਠਮਣਿਨਾਪਿ ਤਂ ਪੂਜੇਸਿ, ਸੋ ਨਾਗਰਾਜਾ ਸਭਾਵਂ ਅਤ੍ਤਨੋ ਅਧਿਪ੍ਪਾਯਂ ਗੋਪੇਨ੍ਤਿਯਾ ਅਪਿ ਥਿਯਾ ਵਚਨੇਨ ਇਤ੍ਥਿਯਾ ਵਚਨੇਨ ਅਸਮਧੁਰਂ ਤੁਲ੍ਯਰਹਿਤਂ ਵਿਧੁਰਂ ਵਿਧੁਰਪਣ੍ਡਿਤਂ ਹਨ੍ਤੁਂ ਵਿਨਾਸਨਤ੍ਥਂ ਫਰੁਸੇ ਚਣ੍ਡੇ ਮਯਿ ਭਤ੍ਤਿਂ ਅਕਾਸੀਤਿ. ਇਹ ਏਕਸ੍ਮਿਂਯੇਵ ਵਤ੍ਥੁਨਿ ਨਾਗਰਾਜਸ੍ਸ ਪਸਾਦਵਧਵਿਧਾਨਾਦਿਵਿਪਰੀਤਪ੍ਪਵਤ੍ਤਿ ਆਲਮ੍ਬਣਵਿਭਾਵੋ, ਪਠਮਂ ਅਨਗ੍ਘਪਿਯਵਤ੍ਥੂਹਿ ਪੂਜਿਤਭਾਵੋ ਚ ਬੋਧਿਸਤ੍ਤਸ੍ਸ ਅਤੁਲ੍ਯਭਾਵੋ ਚ ਇਤ੍ਥਿਵਚਨਸ੍ਸ ਸਮ੍ਪਟਿਚ੍ਛਨਭਾਵੋ ਚ ਤਸ੍ਸਾਧਿਪ੍ਪਾਯਸ੍ਸ ਅਞ੍ਞਾਤਭਾਵੋ ਚ ਪੁਣ੍ਣਕਸ੍ਸ ਚਣ੍ਡਭਾਵੋ ਚੇਤਿ ਇਮੇਹਿ ਸਬ੍ਬਵਚਨੇਹਿ ਉਦ੍ਦੀਪਨਵਿਭਾਵੋ ਦਸ੍ਸਿਤੋ. ਇਮੇਹਿ ਉਦ੍ਦੀਪਿਤਠਾਯੀਭਾਵਸਙ੍ਖਤੋ ਹਾਸੋ ਵਾਕ੍ਯਸਾਮਤ੍ਥਿਯਾ ਪਕਾਸਿਤੋ ਹਾਸਵਿਰੋਧਿਨਿਬ੍ਬੇਦਾਦਿਵਜ੍ਜਿਤਾ ਸਮਾਲਸਿਯਸਨ੍ਤੋਸਅਸ੍ਸੁਵੇਪਥਾਦਿਕਾ ਬ੍ਯਭਿਚਾਰੀਭਾਵਾ ਸਾਤ੍ਤਿਕਾਭਾਵਾ ਚ ਏਵਂ ਸਾਮਤ੍ਥਿਯੇਨ ਦੀਪਿਤਾ. ਤਦਨੁਰੂਪਵਿਭਾਵਾਦਿਪਕਾਸਕਾ ਯਥਾਵੁਤ੍ਤਕਵਿਪ੍ਪਯੋਗਾ ਅਨੁਭਾਵਾ ਨਾਮ ਹੋਨ੍ਤਿ. ਹਸ੍ਸਭੇਦੇਨ ਮਜ੍ਝਿਮੇ ਪੁਰਿਸੇ ਵਤ੍ਤਬ੍ਬਾਪਿ ਹਸਿਤਉਪਹਸਿਤਾ ਦ੍ਵੇ ਇਮਾ ਦਟ੍ਠਬ੍ਬਾ.

ਕਰੁਣਾਠਾਯੀਭਾਵ

੩੬੧. ਸੋਕਰੂਪੋ ਤੁ ਕਰੁਣੋ-

ਨਿਟ੍ਠਪਤ੍ਤਿਟ੍ਠਨਾਸਤੋ;

ਤਤ੍ਥਾ’ਨੁਭਾਵਾ ਰੁਦਿਤ-

ਪਲਯਤ੍ਥਮ੍ਭਕਾਦਯੋ;

ਵਿਸਾਦਾਲਸ੍ਯਮਰਣ-

ਚਿਨ੍ਤਾਦੀ ਬ੍ਯਭਿਚਾਰਿਨੋ.

੩੬੧. ‘‘ਸੋਕੇ’’ਚ੍ਚਾਦਿ. ਅਨਿਟ੍ਠਸ੍ਸ ਪੁਤ੍ਤਵਿਯੋਗਾਦਿਨੋ ਦੇਸਨਿਕ੍ਕਡ੍ਢਨਾਦਿਨੋ ਪਤ੍ਤਿ ਚ ਇਟ੍ਠਸ੍ਸ ਧਮ੍ਮਸ੍ਸ, ਧਨਾਦਿਨੋ ਵਾ ਨਾਸੋ ਚ ਤਤੋ ਵਿਭਾਵਭੂਤੇਹਿ ਸਮ੍ਪਨ੍ਨੋ ਸੋਕਰੂਪੋ ਸੋਕਸਭਾਵੋ ਤੁ ਕਰੁਣੋ ਰਸੋ ਨਾਮ. ਤਤ੍ਥ ਉਤ੍ਤਮਾਨਂ ਸੋਕੋ ਪੁਤ੍ਤਵਿਯੋਗਾਦਿਅਨਿਟ੍ਠੁਪ੍ਪਤ੍ਤਿਤੋ, ਧਮ੍ਮਾਦਿਇਟ੍ਠਨਾਸਤੋ ਚ ਜਾਯਤੇ. ਨੀਚਾਨਂ ਤੁ ਦੇਸਨਿਕ੍ਕਡ੍ਢਨਾਦਿਅਨਿਟ੍ਠੁਪ੍ਪਤ੍ਤਿਤੋ, ਧਨਾਦਿਇਟ੍ਠਨਾਸਤੋ ਚ, ਪਰੇਸਂ ਧਨਾਦਿਨਾਸਤੋ ਤੁ ਉਤ੍ਤਮਸ੍ਸੇਵ ਮਹਾਕਾਰੁਣਿਕਤ੍ਤਾ, ਸੇਸਂ ਸੁਬੋਧਂ. ਅਨੁਭਾਵੋ ਪਨੇਤ੍ਥ ਯਥੋਚਿਤ੍ਯਂ ਨਿਰੂਪਯਿਤਬ੍ਬੋ.

੩੬੧. ਇਦਾਨਿ ਕਰੁਣਾਰਸਪੋਸਨਕ੍ਕਮਂ ਦਸ੍ਸੇਤਿ ‘‘ਸੋਕ’’ਇਚ੍ਚਾਦਿਨਾ. ਅਨਿਟ੍ਠਪ੍ਪਤ੍ਤਿਟ੍ਠਨਾਸਤੋ ਪੁਤ੍ਤਵਿਯੋਗਾਦਿਨੋ, ਦੇਸਚਾਗਾਦਿਨੋ ਵਾ ਅਨਿਟ੍ਠਸ੍ਸ ਉਪ੍ਪਤ੍ਤਿ ਚ ਸੀਲਾਦਿਨੋ, ਧਨਾਦਿਨੋ ਵਾ ਇਟ੍ਠਸ੍ਸ ਕਨ੍ਤਿਵਤ੍ਥੁਨੋ ਵਿਨਾਸੋ ਚਾਤਿ ਇਮੇਹਿ ਆਲਮ੍ਬਣਵਿਭਾਵੇਹਿ ਕਰਣਭੂਤੇਹਿ ਉਪ੍ਪਨ੍ਨੋ ਸੋਕਰੂਪੋ ਤੁ ਸੋਕਸਭਾਵੋ ਪਨ ਕਰੁਣੋ ਕਰੁਣਾਰਸੋ ਨਾਮ ਹੋਤਿ. ਤਤ੍ਥ ਕਰੁਣਾਰਸੇ ਰੁਦਿਤਪਲਯਤ੍ਥਮ੍ਭਕਾਦਯੋ ਰੁਦਿਤੋ ਪਲਯੋ ਥਮ੍ਭੋਤਿਆਦਯੋ ਅਨੁਭਾਵਾ ਨਾਮ ਭਵਨ੍ਤੀਤਿ. ਥਮ੍ਭਾਦੀਨਂ ਸਰੂਪੋ ਹੇਟ੍ਠਾ ਵੁਤ੍ਤੋਵ. ਵਿਸਾਦਆਲਸ੍ਯਮਰਣਚਿਨ੍ਤਾਦਯੋ ਬ੍ਯਭਿਚਾਰਿਨੋ ਤਸ੍ਮਿਂਯੇਵ ਬ੍ਯਭਿਚਾਰਿਨੋ ਭਵਨ੍ਤਿ. ਇਹ ਪੁਤ੍ਤਵਿਯੋਗਾਦਿਅਨਿਟ੍ਠਪ੍ਪਤ੍ਤਿਯਾ ਚ ਸੀਲਧਮ੍ਮਾਦਿਇਟ੍ਠਨਾਸਨੇਨ ਚ ਉਤ੍ਤਮਾਨਂ ਸੋਕੋ ਉਪ੍ਪਜ੍ਜਤਿ, ਦੇਸਚਾਗਾਦਿਅਨਿਟ੍ਠਪ੍ਪਤ੍ਤਿਯਾ ਚ ਧਨਾਦਿਇਟ੍ਠਨਾਸਨੇਨ ਚ ਨੀਚਾਨਂ. ਅਞ੍ਞੇਸਂ ਧਨਾਦਿਵਿਨਾਸਨੇਨ ਪਨ ਮਹਾਕਰੁਣਿਕਤ੍ਤਾ ਉਤ੍ਤਮਸ੍ਸੇਵ ਉਪ੍ਪਜ੍ਜਤਿ. ਤਸ੍ਮਿਂ ਵਿਸਯੇ ਸੋ ਸੋਕੋ ਸੇਸਾਨਂ ਨੁਪ੍ਪਜ੍ਜਤਿ. ਤਸ੍ਮਾ ਯਥਾਰਹਂ ਪਯੋਗੋ ਕਾਤਬ੍ਬੋ. ਸੋਕਸ੍ਸ ਰੂਪੋ ਸਭਾਵੋਤਿ ਚ, ਅਨਿਟ੍ਠਸ੍ਸ ਪਤ੍ਤੀਤਿ ਚ, ਇਟ੍ਠਸ੍ਸ ਨਾਸੋਤਿ ਚ, ਅਨਿਟ੍ਠਪ੍ਪਤ੍ਤਿ ਚ ਇਟ੍ਠਨਾਸੋ ਚੇਤਿ ਚ, ਰੁਦਿਤਞ੍ਚ ਪਲਯੋ ਚ ਥਮ੍ਭਕੋ ਚੇਤਿ ਚ, ਤੇ ਆਦਿ ਯੇਸਮਿਤਿ ਚ, ਵਿਸਾਦੋ ਚ ਆਲਸ੍ਯਞ੍ਚ ਮਰਣਞ੍ਚ ਚਿਨ੍ਤਾ ਚੇਤਿ ਚ, ਤਾ ਆਦਿ ਯੇਸਮਿਤਿ ਚ ਵਾਕ੍ਯਂ. ਇਮਸ੍ਸ ਕਰੁਣਾਰਸਸ੍ਸ ਲਕ੍ਖਿਯਮੇਵਂ ਦਟ੍ਠਬ੍ਬਂ –

ਆਕਡ੍ਢਿਤੇ’ਕਸਤਰਾਜਪੁਰਕ੍ਖਤੋ ਯੋ,

ਧਮ੍ਮੇਨ ਆਸਨਮਲਂਕੁਰੁਤੇ ਜਿਨੋਵ;

ਸੋ ਅਸ੍ਸਵਾਲਮਵਲਮ੍ਬਿਯ ਦਾਨਿ ਨੀਤੋ,

ਯਕ੍ਖੇਨ ਲੋਕਤਿਲਕੋ ਕੁਰੁਤੇ ਕਿਮੇਕੋਤਿ.

ਯੋ ਏਕਸਤਰਾਜਪੁਰਕ੍ਖਤੋ ਰਾਜੂਨਂ ਏਕਸਤੇਨ ਪਰਿਵਾਰਿਤੋ ਜਿਨੋ ਇਵ ਬੁਦ੍ਧੋ ਇਵ ਧਮ੍ਮੇਨ ਮਧੁਰਧਮ੍ਮਕਥਨੇਨ ਆਸਨਂ ਧਮ੍ਮਾਸਨਂ ਅਲਂਕੁਰੁਤੇ ਸਜ੍ਜੇਤਿ, ਲੋਕਤਿਲਕੋ ਲੋਕਸ੍ਸ ਪਿਯਤਾਯ ਤਿਲਕਾਲਙ੍ਕਾਰਭੂਤੋ ਸੋ ਵਿਧੁਰਪਣ੍ਡਿਤੋ ਯਕ੍ਖੇਨ ਪੁਣ੍ਣਕੇਨ ਆਕਡ੍ਢਿਤੋ ਹੁਤ੍ਵਾ ਨੀਤੋ ਅਸ੍ਸਵਾਲਂ ਅਵਲਮ੍ਬਿਯ ਇਦਾਨਿ ਏਕੋ ਕਿਂ ਕੁਰੁਤੇਤਿ. ਇਹਾਨੀਤੋਤਿ ਦਸ੍ਸਿਤਪਿਯਵਤ੍ਥੁਵਿਯੋਗੋ ਸੋਕਸ੍ਸ ਆਲਮ੍ਬਣਵਿਭਾਵੋ ਹੋਤਿ. ‘‘ਆਕਡ੍ਢਿਤੇਕਸਤਰਾਜੇ’’ਚ੍ਚਾਦਿਨਾ ਸਕਲੇਨ ਵਾਕ੍ਯੇਨ ਉਦ੍ਦੀਪਨਵਿਭਾਵੋ ਦਸ੍ਸਿਤੋ, ਉਦ੍ਦੀਪਿਤਸੋਕਸਙ੍ਖਾਤਠਾਯੀਭਾਵੋ ਚ ਵਿਸਾਦਾਲਸ੍ਯਚਿਨ੍ਤਾਦਿਕੋ ਬ੍ਯਭਿਚਾਰੀਭਾਵੋ ਚ ਰੁਦਿਤਪਲਯਥਮ੍ਭਕਾਦਿਕਾ ਵਿਭਾਵਾਦਿਬੋਧਕਅਨੁਭਾਵਾ ਚ ਵਾਕ੍ਯਸਾਮਤ੍ਥਿਯੇਨ ਦੀਪਿਤਾ ਹੋਨ੍ਤਿ.

ਰੁਦ੍ਦਠਾਯੀਭਾਵ

੩੬੨. ਕੋਧੋ ਮਚ੍ਛਰਿਯਾਦੀਹਿ, ਪੋਸੇ ਤਾਸਮਦਾਦਿਭਿ;

ਨਯਨਾਰੁਣਤਾਦੀਹਿ, ਰੁਦ੍ਦੋ ਨਾਮ ਰਸੋ ਭਵੇ.

੩੬੨. ‘‘ਕੋਧੋ’’ਇਚ੍ਚਾਦਿ, ਸੁਬੋਧਂ. ਏਤ੍ਥ ਪਠਮੇਨ ਆਦਿਸਦ੍ਦੇਨ ਅਵਿਕ੍ਖੇਪਉਪਹਾਸਾਦਯੋ ਵਿਭਾਵਾ ਗਹਿਤਾ, ਦੁਤਿਯੇਨ ਉਗ੍ਗਸਮ੍ਭਮਾਦਯੋ ਬ੍ਯਭਿਚਾਰਿਨੋ, ਤਤਿਯੇਨ ਭੂਕੁਟਿਪੁਰਣਓਟ੍ਠਨਿਪ੍ਪੀਲ਼ਨਾਦਯੋ ਅਨੁਭਾਵਾ.

੩੬੨. ਇਦਾਨਿ ਰੁਦ੍ਦਰਸਸ੍ਸ ਪੋਸਨਕ੍ਕਮਂ ਦਸ੍ਸੇਤਿ ‘‘ਕੋਧੋ’’ਇਚ੍ਚਾਦਿਨਾ. ਕੋਧੋ ਮਚ੍ਛਰਿਯਾਦੀਹਿ ਮਚ੍ਛਰਿਯਅਵਿਕ੍ਖੇਪਉਪਹਾਸਾਦੀਹਿ ਆਲਮ੍ਬਣਾਦੀਹਿ ਵਿਭਾਵੇਹਿ ਚ ਹੇਤੁਭੂਤੇਹਿ ਤਾਸਮਦਾਦੀਹਿ ਤਾਸਮਦਉਗ੍ਗਤਸਮ੍ਭਮਾਦੀਹਿ ਬ੍ਯਭਿਚਾਰੀਭਾਵੇਹਿ ਚ ਨਯਨਾਰੁਣਤਾਦੀਹਿ ਨੇਤ੍ਤਰਤ੍ਤਸੁਭਙ੍ਗਓਟ੍ਠਪੀਲ਼ਨਾਦੀਹਿ ਅਨੁਭਾਵੇਹਿ ਚ ਕਰਣਭੂਤੇਹਿ ਪੋਸੇ ਸਤਿ ਰੁਦ੍ਦੋ ਨਾਮ ਰਸੋ ਭਵੇਤਿ. ਮਚ੍ਛਰਿਯਂ ਆਦਿ ਯੇਸਨ੍ਤਿ ਚ, ਤਾਸੋ ਚ ਮਦੋ ਚੇਤਿ ਚ, ਤੇ ਆਦਿ ਯੇਸਮਿਤਿ ਚ, ਨਯਨਾਨਿ ਚ ਤਾਨਿ ਅਰੁਣਾਨਿ ਚਾਤਿ ਚ, ਤੇਸਂ ਭਾਵੋਤਿ ਚ, ਸਾ ਆਦਿ ਯੇਸਮਿਤਿ ਚ ਵਾਕ੍ਯਂ.

ਰੁਦ੍ਦਰਸਸ੍ਸ ਉਦਾਹਰਣਮੇਵਂ ਦਟ੍ਠਬ੍ਬਂ –

ਯਕ੍ਖੇਨ ਭੋ ਅਧਿਗਤੋਸਿ ਮਨੁਸ੍ਸਭਕ੍ਖੇ,

ਨਾ’ਸ੍ਸਸ੍ਸ ਵਾਲ’ਮਵਲਮ੍ਬ ਪੁਰਂ ਅਵੇਕ੍ਖ;

ਵੇਰਮ੍ਭਵਾਤਮੁਖਚੁਣ੍ਣਿਤਸਬ੍ਬਗਤ੍ਤੋ,

ਮਚ੍ਚੋ ਕਥਂ ਪੁਨਪਿ ਪਸ੍ਸਤਿ ਜੀਵਲੋਕਨ੍ਤਿ.

ਭੋ ਮਨੁਸ੍ਸਭਕ੍ਖੇਨ ਯਕ੍ਖੇਨ ਅਧਿਗਤੋਸਿ ਗਹਿਤੋ ਅਸਿ, ਅਸ੍ਸਸ੍ਸ ਵਾਲਮਵਲਮ੍ਬ ਵਾਲਧਿਂ ਗਹੇਤ੍ਵਾ ਇਦਾਨੇਵ ਪੁਰਂ ਅਵੇਕ੍ਖ ਤੁਯ੍ਹਂ ਨਗਰਂ ਓਲੋਕੇਹਿ, ਤਥੇਵ ਹਿ ਵੇਰਮ੍ਭਵਾਤਮੁਖਚੁਣ੍ਣਿਤਸਬ੍ਬਗਤ੍ਤੋ ਵੇਰਮ੍ਭਵਾਤਸ੍ਸ ਅਭਿਮੁਖਿਚੁਣ੍ਣਿਤਸਕਲਸਰੀਰੋ ਮਚ੍ਚੋ ਮਨੁਸ੍ਸੋ ਜੀਵਲੋਕਂ ਸਤ੍ਤਲੋਕਂ ਪੁਨਪਿ ਕਥਂ ਪਸ੍ਸਤੀਤਿ. ਇਹ ਮਚ੍ਛਰਿਯਾਦਿਵਿਭਾਵਾ ਚ ਕੋਧਾਦਿਸਙ੍ਖਾਤੋ ਠਾਯੀਭਾਵੋ ਚ ਵਾਕ੍ਯਸਾਮਤ੍ਥਿਯਾ ਦੀਪਿਤਾ ਹੋਨ੍ਤਿ, ਅਪਰਦ੍ਧੇਨ ਤਾਸਮਦਉਗ੍ਗਤਾਦਿਬ੍ਯਭਿਚਾਰੀਭਾਵਾ ਵਿਭਾਵਿਤਾ ਹੋਨ੍ਤਿ. ਸਮੁਦਾਯੇਨ ਨਯਨਾਰੁਣਤਾਦਯੋ ਅਨੁਭਾਵਾ ਸੂਚਿਤਾ ਹੋਨ੍ਤਿ.

ਵੀਰਠਾਯੀਭਾਵ

੩੬੩. ਪਤਾਪਵਿਕ੍ਕਮਾਦੀਹੁ-ਸ੍ਸਾਹੋ ਵਿਰੋਤਿ ਸਞ੍ਞਿਤੋ;

ਰਣਦਾਨਦਯਾਯੋਗਾ, ਵੀਰੋ’ਯਂ ਤਿਵਿਧੋ ਭਵੇ;

ਤੇਵਾ’ਨੁਭਾਵਾ ਧਿਤਿਮ-ਤ੍ਯਾਦਯੋ ਬ੍ਯਭਿਚਾਰਿਨੋ.

੩੬੩. ‘‘ਪਤਾਪਿ’’ਚ੍ਚਾਦਿ. ਪਤਾਪੋ ਸਤ੍ਤੁਸਨ੍ਤਾਪਕਾਰੀ ਤੇਜੋ, ਵਿਕ੍ਕਮੋ ਪਰਮਣ੍ਡਲਕ੍ਕਮਨ੍ਤਂ, ਤੇ ਆਦਯੋ ਯੇਸਂ ਬਲਾਵਿਕ੍ਖੇਪਾਦੀਨਂ ਪਟਿਪੁਗ੍ਗਲਗਤਾਨਂ ਵਿਭਾਵਾਨਂ, ਤੇਹਿ ਜਾਤੋ ਉਸ੍ਸਾਹੋ ਰਸਤ੍ਤਮਾਪਨ੍ਨੋ ਵੀਰੋ ਰਸੋਤਿ ਸਞ੍ਞਿਤੋ, ਅਯਂ ਵੀਰੋ ਰਣਦਾਨਦਯਾਯੋਗਾ ਤਿਵਿਧੋ ਭਵੇ ਯੁਦ੍ਧਵੀਰੋ ਦਾਨਵੀਰੋ ਦਯਾਵੀਰੋਤਿ, ਤੇ ਯੁਦ੍ਧਕਰਣਾਦਯੋ ਏਵ ਤਤ੍ਥ ਅਨੁਭਾਵਾ ਭਵਨ੍ਤਿ. ਧਿਤਿਮਤਿਉਗ੍ਗਤਾਦਯੋ ਬ੍ਯਭਿਚਾਰਿਨੋ ਭਵਨ੍ਤੀਤਿ.

੩੬੩. ਇਦਾਨਿ ਵੀਰਰਸਭੇਦਂ, ਪੋਸਨਕ੍ਕਮਞ੍ਚ ਦਸ੍ਸੇਤਿ ‘‘ਪਤਾਪ’’ਇਚ੍ਚਾਦਿਨਾ. ਪਤਾਪਵਿਕ੍ਕਮਾਦੀਹਿ ਅਞ੍ਞਰਾਜੂਨਂ ਦਣ੍ਡਜਤੇਜਸਙ੍ਖਤਪਤਾਪੋ, ਤੇਸਮੇਵ ਪਰਮਣ੍ਡਲਕ੍ਕਮਨਸਙ੍ਖਾਤਵਿਕ੍ਕਮੋ ਫਲਭੇਦੋ ਚੇਤਿਆਦੀਹਿ ਉਪ੍ਪਨ੍ਨੋ ਉਸ੍ਸਾਹੋ ਵੀਰੋਤਿ ਵੀਰਰਸੋਤਿ ਸਞ੍ਞਿਤੋ ਕਵੀਹਿ ਞਾਤੋ, ਅਯਂ ਵੀਰਰਸੋ ਰਣਦਾਨਦਯਾਯੋਗਾ ਯੁਦ੍ਧਚਾਗਕਰੁਣਾਯੋਗੇਨ ਹੇਤੁਭੂਤੇਨ ਤਿਵਿਧੋ ਭਵੇ. ਤੇ ਏਵ ਰਣਦਾਨਦਯਾ ਏਵ ਇਮਾ ਅਨੁਭਾਵਾ ਨਾਮ ਹੋਨ੍ਤਿ. ਧਿਤਿਮਤ੍ਯਾਦਯੋ ਧਿਤਿਮਤਿਉਗ੍ਗਤਗਬ੍ਬਾਦਯੋ ਬ੍ਯਭਿਚਾਰਿਨੋ ਭਾਵਾ ਹੋਨ੍ਤੀਤਿ. ਯੁਦ੍ਧਵੀਰਦਾਨਵੀਰਦਯਾਵੀਰਵਸੇਨ ਵੀਰਰਸੋ ਤਿਵਿਧੋ ਹੋਤਿ. ਪਤਾਪੋ ਚ ਵਿਕ੍ਕਮੋ ਚੇਤਿ ਚ, ਤੇ ਆਦਿ ਯੇਸਮਿਤਿ ਚ, ਰਣੋ ਚ ਦਾਨਞ੍ਚ ਦਯਾ ਚੇਤਿ ਚ, ਤਾਹਿ ਯੋਗੋਤਿ ਚ, ਤਯੋ ਵਿਧਾ ਪਕਾਰਾ ਅਸ੍ਸਾਤਿ ਚ, ਧਿਤਿ ਚ ਮਤਿ ਚੇਤਿ ਚ, ਤਾ ਆਦਿ ਯੇਸਮਿਤਿ ਚ ਵਾਕ੍ਯਂ.

ਵੀਰਰਸਸ੍ਸ ਉਦਾਹਰਣਮੇਵਂ ਦਟ੍ਠਬ੍ਬਂ –

ਵਿਞ੍ਞਾਪੇਤ੍ਵਾ ਕੁਵੇਰਂ ਸੁਮਹਤਿ-

ਮਪਿ ਚੇ’ਕੋਵਕੁਮ੍ਭਣ੍ਡਸੇਨਂ,

ਉਤ੍ਤਾਸੇਤ੍ਵਾ ਗਹੇਤ੍ਵਾ ਮਣਿਰਤਨਵਰਂ

ਲਕ੍ਖਮਾਧਾਯ ਜੂਤੇ;

ਜੇਤ੍ਵਾ ਕੋਰਬ੍ਯਰਾਜਂ ਸਚਿਵਰਤਨ-

ਮੁਦ੍ਧਚ੍ਚ ਰਞ੍ਞਂ ਸਤਮ੍ਹਾ,

ਏਤ੍ਥਾਨੇਤ੍ਵਾ’ਦਿਯਿਸ੍ਸਂ ਸੁਯੁਵਤਿਰਤਨਂ

ਕੋ ਮਮੇ’ਤ੍ਥ’ਤ੍ਥਿ ਭਾਰੋਤਿ.

ਕੁਵੇਰਂ ਵੇਸ੍ਸਵਣਮਹਾਰਾਜਂ ਵਿਞ੍ਞਾਪੇਤ੍ਵਾ ਬੋਧੇਤ੍ਵਾ ਸੁਮਹਤਿਮਪਿ ਕੁਮ੍ਭਣ੍ਡਸੇਨਂ ਅਤਿਮਹਨ੍ਤਿਂ ਕੁਮ੍ਭਣ੍ਡਸੇਨਂ ਏਕੋਵ ਉਤ੍ਤਾਸੇਤ੍ਵਾ ਭਯਂ ਜਨੇਤ੍ਵਾ ਮਣਿਰਤਨਵਰਂ ਗਹੇਤ੍ਵਾ ਜੂਤੇ ਅਕ੍ਖਕੀਲ਼ਾਯਂ ਲਕ੍ਖਂ ਆਧਾਯ ਠਪੇਤ੍ਵਾ ਕੋਰਬ੍ਯਰਾਜਂ ਜੇਤ੍ਵਾ ਰਞ੍ਞਂ ਸਤਮ੍ਹਾ ਰਾਜਸਮ੍ਬਨ੍ਧਿਨਾ ਸਤੇਨ ਸਚਿਵਰਤਨਂ ਅਮਚ੍ਚਰਤਨਂ ਉਦ੍ਧਚ੍ਚ ਉਦ੍ਧਰਿਤ੍ਵਾ ਏਤ੍ਥਾਨੇਤ੍ਵਾ ਸੁਯੁਵਤਿਰਤਨਂ ਸੋਭਨਇਤ੍ਥਿਰਤਨਂ ਆਦਿਯਿਸ੍ਸਂ ਗਣ੍ਹਿਸ੍ਸਾਮਿ, ਏਤ੍ਥ ਯਥਾਵੁਤ੍ਤੇਸੁ ਮਮ ਕੋ ਭਾਰੋ ਅਤ੍ਥੀਤਿ. ਏਤ੍ਥ ‘‘ਕੋ ਮਮੇਤ੍ਥਤ੍ਥਿ ਭਾਰੋ’’ਤਿ ਇਮਿਨਾ ਉਸ੍ਸਾਹਸਙ੍ਖਾਤੋ ਠਾਯੀਭਾਵੋ ਪਕਾਸਿਤੋ. ਏਤਸ੍ਸ ਉਪ੍ਪਤ੍ਤਿਉਦ੍ਦੀਪਨੇਸੁ ਕਾਰਣਭੂਤਸ੍ਸ ਇਤ੍ਥਿਰਤਨਸ੍ਸ ਆਦਾਨਖ੍ਯਾਤਨਾਗਰਾਜਗਤਪਤਾਪਵਿਕ੍ਕਮਾਦਿਵਿਭਾਵੋ ਚ, ਤਂਤਂਰੂਪਪ੍ਪਕਾਸਕਕਵਿਵਚਨਸਙ੍ਖਾਤਾਨੁਭਾਵੋ ਚ ‘‘ਵਿਞ੍ਞਾਪੇਤ੍ਵਾ’’ਇਚ੍ਚਾਦਿਨਾ ਵਾਕ੍ਯਸਾਮਤ੍ਥਿਯੇਨ ਪਟਿਪਾਦਨੀਯਾ ਹੋਨ੍ਤਿ. ‘‘ਸੁਮਹਤਿਮਪਿ ਕੁਮ੍ਭਣ੍ਡਸੇਨਂ ਏਕੋ’’ਤਿ ਚ, ‘‘ਰਞ੍ਞਂ ਸਤਮ੍ਹਾ ਸਚਿਵਰਤਨਮੁਦ੍ਧਚ੍ਚਾ’’ਤਿ ਚ ਇਮੇਹਿ ਧਿਤਿਉਗ੍ਗਤਗਬ੍ਬਾਦਯੋ ਚ, ‘‘ਵਿਞ੍ਞਾਪੇਤ੍ਵਾ ਕੁਵੇਰ’’ਨ੍ਤਿ ਚ, ‘‘ਉਤ੍ਤਾਸੇਤ੍ਵਾ ਕੋਰਬ੍ਯਰਾਜ’’ਨ੍ਤਿ ਚ, ‘‘ਏਤ੍ਥਾਨੇਤ੍ਵਾ ਇਚ੍ਚਾਦਯੋ’’ਤਿ ਚ ਇਮੇਹਿ ਮਤ੍ਯਾਦਯੋ ਚ ਬ੍ਯਭਿਚਾਰਿਨੋ ਭਾਵਾ ਵਿਭਾਵਿਤਾ ਹੋਨ੍ਤਿ. ਇਮੇਹਿ ਵਿਭਾਵਾਨੁਭਾਵਬ੍ਯਭਿਚਾਰੀਭਾਵੇਹਿ ਯੁਦ੍ਧਵੀਰਰਸੋ ਪੋਸਿਤੋਤਿ ਦਟ੍ਠਬ੍ਬੋ. ਇਮਿਨਾਯੇਵ ਨਯੇਨ ਦਾਨਵੀਰਾਦਯੋ ਵਿਞ੍ਞਾਤਬ੍ਬਾ.

ਭਯਠਾਯੀਭਾਵ

੩੬੪. ਵਿਕਾਰਿਸਨਸਤ੍ਤਾਦਿ-

ਭਯੁਕ੍ਕਂਸੋ ਭਯਾਨਕੋ;

ਸੇਦਾਦਯੋ’ਨੁਭਾਵੇ’ਤ੍ਥ,

ਤਾਸਾਦੀ ਬ੍ਯਭਿਚਾਰਿਨੋ.

੩੬੪. ‘‘ਵਿਕਾਰਿ’’ਚ੍ਚਾਦਿ. ਵਿਕਾਰਿ ਅਸਭਾਵਪ੍ਪਵਤ੍ਤੋ ਵਿਰੁਦ੍ਧੋ ਸਨੋ ਸਦ੍ਦੋ ਸਤ੍ਤੋ ਚ, ਤੇ ਆਦਯੋ ਯੇਸਂ ਸੁਞ੍ਞਾਰਞ੍ਞਾਦੀਨਂ ਇਤ੍ਥਿਨੀਚਪ੍ਪਕਤਿਸਮ੍ਭਵਨ੍ਤਾਨਂ, ਵਿਭਾਵਾਨਂ, ਗੁਰੁਆਦੀਨਂ ਵਾ ਉਤ੍ਤਮਾਨਂ, ਤੇਹਿ ਜਾਤਸ੍ਸ ਭਯਸ੍ਸ, ਕਿਤ੍ਤਿਮਸ੍ਸ ਵਾ ਉਕ੍ਕਂਸੋ ਭਯਾਨਕੋ ਨਾਮ ਰਸੋ. ਏਤ੍ਥ ਸੇਦਕਮ੍ਪਨਪਾਦਚਲਨਾਦਯੋ ਅਨੁਭਾਵਾ, ਤਾਸਾਦਯੋ ਬ੍ਯਭਿਚਾਰਿਨੋ.

੩੬੪. ਇਦਾਨਿ ਭਯਾਨਕਰਸਸ੍ਸ ਪੋਸਨਕ੍ਕਮਂ ਦਸ੍ਸੇਤਿ ‘‘ਵਿਕਾਰਿ’’ਚ੍ਚਾਦਿਨਾ. ਵਿਕਾਰਿਸਨਸਤ੍ਤਾਦਿਭਯੁਕ੍ਕਂਸੋ ਪਕਤਿਵਿਰਹੇਨ ਵਿਕਾਰਵਨ੍ਤੇਹਿ ਵਿਰੁਦ੍ਧੇਹਿ ਅਸਨਿਸਦ੍ਦਾਦਿਸਦ੍ਦੇਹਿ, ਰਕ੍ਖਸਾਦਿਸਤ੍ਤੇਹਿ ਵਾ ਵਿਭਾਵੇਹਿ ਹੇਤੁਭੂਤੇਹਿ ਸਞ੍ਜਾਤੋ ਸਾਭਾਵਿਕੋ, ਕਿਤ੍ਤਿਮੋ ਵਾ ਭਯਪਟਿਬਨ੍ਧੋ ਉਕ੍ਕਂਸੋ ਭਯਾਨਕਰਸੋ ਨਾਮ ਹੋਤਿ. ਏਤ੍ਥ ਭਯਾਨਕਰਸਵਿਸਯੇ ਸੇਦਾਦਯੋ ਦਾਹਸਰੀਰਕਮ੍ਪਨਾਦਯੋ ਅਨੁਭਾਵਾ ਕਾਯਿਕਵਾਚਸਿਕਪ੍ਪਯੋਗਸਙ੍ਖਤਾ ਅਨੁਭਾਵਾ ਹੋਨ੍ਤਿ. ਤਾਸਾਦੀ ਬ੍ਯਭਿਚਾਰਿਨੋ ਤਾਸਸਙ੍ਕਾਦਯੋ ਇਹ ਬ੍ਯਭਿਚਾਰੀਭਾਵਾ ਹੋਨ੍ਤੀਤਿ. ਸਨੋ ਚ ਸਤ੍ਤੋ ਚੇਤਿ ਚ, ਵਿਕਾਰੋ ਏਤੇਸਂ ਅਤ੍ਥੀਤਿ ਚ, ਵਿਕਾਰਿਨੋ ਚ ਤੇ ਸਨਸਤ੍ਤਾ ਚੇਤਿ ਚ, ਤੇ ਆਦਯੋ ਯੇਸਂ ਸੁਞ੍ਞਾਰਞ੍ਞਾਦੀਨਮਿਤਿ ਚ, ਤੇਹਿ ਜਾਤਂ ਭਯਮਿਤਿ ਚ, ਮਜ੍ਝੇ ਪਦਲੋਪੋ, ਤਸ੍ਸ ਉਕ੍ਕਂਸੋਤਿ ਚ, ਸੇਦੋ ਆਦਿ ਯੇਸਂ ਕਮ੍ਪਨਾਦੀਨਮਿਤਿ ਚ, ਤਾਸੋ ਆਦਿ ਯੇਸਂ ਸਙ੍ਕਾਦੀਨਮਿਤਿ ਚ ਵਾਕ੍ਯਂ. ਇਤ੍ਥਿਨੀਚਪ੍ਪਕਤਿਕਾਨਂ ਭਯਹੇਤੁ ਵਿਕਾਰਿਸਨਸਤ੍ਤਾਦਿ, ਉਤ੍ਤਮਾਨਂ ਗੁਰੁਆਦਿ.

ਏਤ੍ਥ ਲਕ੍ਖਿਯਮੇਵਂ ਵੇਦਿਤਬ੍ਬਂ –

ਯਂ ਦਿਟ੍ਠਿਸਤ੍ਥਪਤਨੇਨ ਪਰਿਪ੍ਫੁਰਨ੍ਤੀ,

ਕੁਮ੍ਭਣ੍ਡਰਕ੍ਖਸਚਮੂ ਗਮਿਤਾ ਸਮਨ੍ਤਾ;

ਆਚਕ੍ਕਵਾਲ਼ਨਗ’ਮਸ੍ਸਗਤਂ ਪੁਰੀਵ,

ਭੋਤੋ ਮੁਹੁਂ ਮੁਹੁ’ਮਪਸ੍ਸਿ ਸ ਪੁਣ੍ਣਕੋ’ਹਨ੍ਤਿ.

ਦਿਟ੍ਠਿਸਤ੍ਥਪਤਨੇਨ ਦਿਟ੍ਠਿਸਲ੍ਲਸਮ੍ਪਾਤਨੇਨ ਪਰਿਪ੍ਫੁਰਨ੍ਤੀ ਕਮ੍ਪਮਾਨਾ ਸਮਨ੍ਤਾ ਪਰਿਸਮਨ੍ਤਤੋ ਆਚਕ੍ਕਵਾਲ਼ਨਗਂ ਚਕ੍ਕਵਾਲ਼ਪਬ੍ਬਤਾਵਧਿ ਗਮਿਤਾ ਪਲਾਪਿਤਾ ਕੁਮ੍ਭਣ੍ਡਰਕ੍ਖਸਚਮੂ ਕੁਮ੍ਭਣ੍ਡਰਕ੍ਖਸਾਨਂ ਸੇਨਾ ਯਂ ਅਸ੍ਸਗਤਂ ਅਸ੍ਸਪਿਟ੍ਠੇ ਨਿਸਿਨ੍ਨਕਂ ਭੋਤੋ ਭਵਤਂ ਤੁਮ੍ਹਾਕਂ ਪੁਰੀ ਇਵ ਪੁਰਿਯਾ ਦਸ੍ਸਨਮਿਵ ਮੁਹੁਂ ਮੁਹੁਂ ਅਪਸ੍ਸਿ ਖਣੇ ਖਣੇ ਅਪਸ੍ਸਿਤ੍ਥ, ਸੋ ਅਹਂ ਪੁਣ੍ਣਕੋ ਨਾਮ ਯਕ੍ਖੋਤਿ. ਏਤ੍ਥ ‘‘ਦਿਟ੍ਠਿਸਤ੍ਥਪਤਨੇਨਾ’’ਤਿ ਦਿਟ੍ਠਿਸਤ੍ਥਾਰੋਪਨੇਨ ਚ ‘‘ਸ ਪੁਣ੍ਣਕੋ ਅਹ’’ਨ੍ਤਿ ਇਮਿਨਾ ਚ ਭਯਜਨਨਸ੍ਸ ਹੇਤੁਭੂਤਵਿਰੁਦ੍ਧਸਤ੍ਤਸਙ੍ਖਾਤਾ ਵਿਭਾਵਾ ਨਿਦ੍ਦਿਟ੍ਠਾ, ‘‘ਮੁਹੁਂ ਮੁਹੁ’ਮਪਸ੍ਸੀ’’ਤਿ ਰਸਾਵਤ੍ਥਸਮ੍ਪਤ੍ਤਭਯੁਕ੍ਕਂਸਸਙ੍ਖਤੋ ਠਾਯੀਭਾਵੋ ਵਿਭਾਵਿਤੋ, ‘‘ਕੁਮ੍ਭਣ੍ਡਰਕ੍ਖਸਚਮੂ ਗਮਿਤਾ ਸਮਨ੍ਤਾ ਆਚਕ੍ਕਵਾਲ਼ਨਗ’’ਨ੍ਤਿ ਤਾਸਸਙ੍ਕਾਦਿਕਾ ਬ੍ਯਭਿਚਾਰਿਨੋ ਭਾਵਾ ਜੋਤਿਤਾ. ‘‘ਪਰਿਪ੍ਫੁਰਨ੍ਤੀ’’ਤਿ ਸੇਦਕਮ੍ਪਾਦਯੋ ਅਨੁਭਾਵਾ ਦਸ੍ਸਿਤਾ ਹੋਨ੍ਤਿ.

ਜਿਗੁਚ੍ਛਾਠਾਯੀਭਾਵ

੩੬੫. ਜਿਗੁਚ੍ਛਾ ਰੁਧਿਰਾਦੀਹਿ,

ਪੂਤ੍ਯਾਦੀਹਿ ਵਿਰਾਗਤੋ;

ਬੀਭਚ੍ਛੋ ਖੋਭਨੁ’ਬ੍ਬੇਗੀ,

ਕਮੇਨ ਕਰੁਣਾਯੁਤੋ;

ਨਾਸਾਵਿਕੁਨਨਾਦੀਹਿ,

ਸਙ੍ਕਾਦੀਹਿ’ਸ੍ਸ ਪੋਸਨਂ.

੩੬੫. ‘‘ਜਿਗੁਚ੍ਛਾ’’ਇਚ੍ਚਾਦਿ. ਰੁਧਿਰਨ੍ਤਾਦੀਹਿ ਪੂਤਿਕਿਮਿਆਦੀਹਿ ਵਿਰਾਗਤੋ ਚ ਜਾਤਾ ਜਿਗੁਚ੍ਛਾ ਗਰਹਾ ਕਮੇਨ ਖੋਭਨੋ ਉਬ੍ਬੇਗੀ ਕਰੁਣਾਯੁਤੋ ਚ ਬੀਭਚ੍ਛੋ ਭਵਤਿ, ਨਾਸਾਵਿਕੁਨਨਮੁਖਚ੍ਛਦਨਾਦੀਹਿ ਅਨੁਭਾਵੇਹਿ, ਸਙ੍ਕਾਵੇਗਾਦੀਹਿ ਬ੍ਯਭਿਚਾਰੀਹਿ ਚ ਅਸ੍ਸ ਪੋਸਨਂ ਭਵਤੀਤਿ.

੩੬੫. ਇਦਾਨਿ ਬੀਭਚ੍ਛਰਸਸ੍ਸ ਪੋਸਨਕ੍ਕਮਂ ਦਸ੍ਸੇਤਿ ‘‘ਜਿਗੁਚ੍ਛਾ’’ਇਚ੍ਚਾਦਿਨਾ. ਰੁਧਿਰਾਦੀਹਿ ਰਤ੍ਤਨ੍ਤਗੁਣਾਦੀਹਿ ਚ, ਪੂਤ੍ਯਾਦੀਹਿ ਪੂਤਿਕਿਮਿਆਦੀਹਿ ਚ, ਵਿਰਾਗਤੋ ਵਿਰਤ੍ਤਭਾਵੇਨ ਚਾਤਿ ਇਮੇਹਿ ਤੀਹਿ ਵਿਭਾਵੇਹਿ ਹੇਤੁਭੂਤੇਹਿ ਉਪ੍ਪਜ੍ਜਮਾਨਾ ਜਿਗੁਚ੍ਛਾ ਕਮੇਨ ਰੁਧਿਰਾਦੀਨਂ ਤਿਣ੍ਣਂ ਵਿਭਾਵਾਨਂ ਪਟਿਪਾਟਿਯਾ ਖੋਭਨੋ ਅਨਵਟ੍ਠਾਨੋ ਅਸਮਾਹਿਤੋ ਉਬ੍ਬੇਗੀ ਉਬ੍ਬੇਗਵਾ ਕਰੁਣਾਯੁਤੋ ਸੋਕਰੂਪੇਨ ਸਹਿਤੋ ਚਾਤਿ ਏਵਂ ਬੀਭਚ੍ਛੋ ਰਸੋ ਨਾਮ ਹੋਤਿ. ਨਾਸਾਵਿਕੁਨਨਾਦੀਹਿ ਨਾਸਸਙ੍ਕੋਚਨਮੁਖਪਿਦਹਨਾਦੀਹਿ ਅਨੁਭਾਵੇਹਿ ਚ ਸਙ੍ਕਾਦੀਹਿ ਚ ਸਙ੍ਕਾਆਵੇਗਾਦੀਹਿ ਬ੍ਯਭਿਚਾਰੀਭਾਵੇਹਿ ਚ ਕਰਣਭੂਤੇਹਿ ਅਸ੍ਸ ਬੀਭਚ੍ਛਰਸਸ੍ਸ ਪੋਸਨਂ ਹੋਤੀਤਿ. ਰੁਧਿਰਾਦੀਸੁ ਤੀਸੁ ਪਦੇਸੁ, ਖੋਭਨਾਦੀਸੁ ਤੀਸੁ ਚ ਗਮ੍ਯਮਾਨਤ੍ਤਾ ਅਵੁਤ੍ਤੋਪਿ ਚਸਦ੍ਦੋ ਯੋਜੇਤਬ੍ਬੋ, ਤਸ੍ਮਾ ਖੋਭਨਾਦੀਹਿ ਤੀਹਿ ਯੁਤ੍ਤੋਵ ਬੀਭਚ੍ਛਰਸੋ ਨਾਮਾਤਿ ਦਟ੍ਠਬ੍ਬੋ. ਰੁਧਿਰਂ ਆਦਿ ਯੇਸਂ ਅਨ੍ਤਾਦੀਨਮਿਤਿ ਚ, ਪੂਤਿਆਦਿ ਯੇਸਂ ਕਿਮਿਆਦੀਨਮਿਤਿ ਚ, ਉਬ੍ਬੇਗੋ ਅਸ੍ਸ ਬੀਭਚ੍ਛਸ੍ਸ ਅਤ੍ਥੀਤਿ ਚ, ਕਰੁਣੇਨ ਆਯੁਤੋਤਿ ਚ, ਨਾਸਾਯ ਵਿਕੁਨਨਂ ਸਙ੍ਕੋਚਨਮਿਤਿ ਚ, ਤਂ ਆਦਿ ਯੇਸਂ ਮੁਖਚ੍ਛਾਦਨਾਦੀਨਮਿਤਿ ਚ, ਸਙ੍ਕਾ ਆਦਿ ਯੇਸਂ ਆਵੇਗਾਦੀਨਮਿਤਿ ਚ ਵਾਕ੍ਯਂ.

ਇਮਸ੍ਸ ਬੀਭਚ੍ਛਸ੍ਸੋਦਾਹਰਣਮੇਵਂ ਵੇਦਿਤਬ੍ਬਂ –

ਯਕ੍ਖਾ ਮਚ੍ਚਕਰਙ੍ਕਕਙ੍ਕਨਧਰਾ ਯੇ ਨਿਮ੍ਮਿਤਾ ਪੁਣ੍ਣਕੇ-

ਨੁ’ਤ੍ਤਂਸੀਕਤਪਾਣਿਪਲ੍ਲਵਧਰਾ ਹਾਰੀਕਤਨ੍ਤੋਰਗਾ;

ਲਿਤ੍ਤਾ ਲੋਹਿਤਕੁਙ੍ਕੁਮੇਹਿ ਵਿਧੁਰੇਨੇ’ਤੇ ਪਿਵਨ੍ਤਾ ਵਸਾ-

ਮਜ੍ਜਂ ਸੀਸਕਪਾਲਪਾਤਿਹਿ ਪੁਰੇ ਧੁਤ੍ਤਾ ਵਿਯੋ’ਪੇਕ੍ਖਿਤਾਤਿ.

ਪੁਣ੍ਣਕੇਨ ਯਕ੍ਖੇਨ ਨਿਮ੍ਮਿਤਾ ਮਚ੍ਚਕਰਙ੍ਕਕਙ੍ਕਨਧਰਾ ਮਨੁਸ੍ਸਟ੍ਠਿਸਙ੍ਖਾਤਕਰਭੂਸਨਧਾਰਿਨੋ ਉਤ੍ਤਂਸੀਕਤਪਾਣਿਪਲ੍ਲਵਧਰਾ ਮਤ੍ਥਕਮਾਲਿਕਤਹਤ੍ਥਤਲਸਙ੍ਖਤਪਲ੍ਲਵਧਾਰਿਨੋ ਹਾਰੀਕਤਨ੍ਤੋਰਗਾ ਮੁਤ੍ਤਾਹਾਰੀਕਤਮਨੁਸ੍ਸਨ੍ਤਸਙ੍ਖਾਤਉਰਗਸਮ੍ਪਯੁਤ੍ਤਾ ਲੋਹਿਤਕੁਙ੍ਕੁਮੇਹਿ ਰੁਧਿਰਸਙ੍ਖਾਤਕੁਙ੍ਕੁਮਕਕ੍ਕੇਹਿ ਲਿਤ੍ਤਾ ਸੀਸਕਪਾਲਪਾਤਿਹਿ ਸੀਸਕਪਾਲਸਙ੍ਖਾਤੇਹਿ ਸਰਾਵੇਹਿ ਵਸਾਮਜ੍ਜਂ ਵਸਾਸਙ੍ਖਾਤਸੁਰਂ ਪੁਰੇ ਅਭਿਮੁਖੇ ਪਿਵਨ੍ਤਾ ਯੇ ਯਕ੍ਖਾ ਸਿਯੁਂ, ਏਤੇ ਯਕ੍ਖਾ ਵਿਧੁਰੇਨ ਪਣ੍ਡਿਤੇਨ ਧੁਤ੍ਤਾ ਵਿਯ ਨਗਰੇ ਸੁਰਾਧੁਤ੍ਤਾ ਵਿਯ ਉਪੇਕ੍ਖਿਤਾ ਹੋਨ੍ਤੀਤਿ. ਇਹ ‘‘ਲਿਤ੍ਤਾ ਲੋਹਿਤਕੁਙ੍ਕੁਮੇਹੀ’’ਤਿ ਚ ‘‘ਉਤ੍ਤਂਸੀਕਤਪਾਣਿਪਲ੍ਲਵਧਰਾ’’ਤਿ ਚ ‘‘ਹਾਰੀਕਤਨ੍ਤੋਰਗਾ’’ਤਿ ਚ ਇਮੇਹਿ ਚਿਤ੍ਤਕ੍ਖੋਭਕਾਰਣਭੂਤੋ ਰੁਧਿਰਾਦਿਵਿਭਾਵੋ ਚ, ‘‘ਮਚ੍ਚਕਰਙ੍ਕਕਙ੍ਕਨਰੋ’’ਤਿ ਚ ‘‘ਸੀਸਕਪਾਲਪਾਤਿਹਿ ਵਸਾਮਜ੍ਜਂ ਪਿਵਨ੍ਤਾ’’ਤਿ ਚ ਇਮੇਹਿ ਉਬ੍ਬੇਗਵਨ੍ਤਸਭਾਵਸ੍ਸ ਹੇਤੁਭੂਤੋ ਪੂਤ੍ਯਾਦਿਵਿਭਾਵੋ ਚ ਪਕਾਸਿਤੋ. ਕਰੁਣਾਯੁਤਸਭਾਵਸ੍ਸ ਕਾਰਣਭੂਤਵਿਰਜ੍ਜਨਵਿਭਾਵੋ ਚ ਨਾਸਾਵਿਕੁਨਨਾਦਿਅਨੁਭਾਵੋ ਚ ਸਙ੍ਕਾਵੇਗਾਦਿਬ੍ਯਭਿਚਾਰੀਭਾਵੋ ਚ ਬੀਭਚ੍ਛਸਙ੍ਖਾਤਠਾਯੀਭਾਵੋ ਚਾਤਿ ਇਮੇ ਸਬ੍ਬੇ ਵਾਕ੍ਯਸਾਮਤ੍ਥਿਯੇਨ ਗਮ੍ਮਾਤਿ ਵੇਦਿਤਬ੍ਬਾ.

ਵਿਮ੍ਹਯਠਾਯੀਭਾਵ

੩੬੬. ਅਤਿਲੋਕਪਦਤ੍ਥੇਹਿ,

ਵਿਮ੍ਹਯੋ’ਯਂ ਰਸੋ’ਬ੍ਭੁਤੋ;

ਤਸ੍ਸਾ’ਨੁਭਾਵਾ ਸੇਦਸ੍ਸੁ-

ਸਾਧੁਵਾਦਾਦਯੋ ਸਿਯੁਂ;

ਤਾਸਾਵੇਗਧਿਤਿਪ੍ਪਞ੍ਞਾ,

ਹੋਨ੍ਤੇ’ਤ੍ਥ ਬ੍ਯਭਿਚਾਰਿਨੋ.

੩੬੬. ‘‘ਅਤਿ’’ਚ੍ਚਾਦਿ. ਅਤਿਲੋਕੇਹਿ ਲੋਕਾਤਿਵੁਤ੍ਤੀਹਿ ਮਾਯਾਦਿਬ੍ਬਗੇਹਾਰਾਮਾਦੀਹਿ ਪਦਤ੍ਥੇਹਿ ਜਾਤੋ ਅਯਂ ਵਿਮ੍ਹਯੋ ਚਿਤ੍ਤਵਿਕਾਰਸਙ੍ਖਾਤੋ ਠਾਯੀਭਾਵੋ ਅਬ੍ਭੁਤੋ ਰਸੋ ਨਾਮ. ਸੇਦਅਸ੍ਸੁਸਾਧੁਵਾਦਰੋਮਞ੍ਚਾਦਯੋ ਤਸ੍ਸ ਅਨੁਭਾਵਾ ਸਿਯੁਂ, ਤਾਸਾਦਯੋ ਬ੍ਯਭਿਚਾਰਿਨੋ ਹੋਨ੍ਤੀਤਿ.

੩੬੬. ਇਦਾਨਿ ਵਿਮ੍ਹਯਰਸਸ੍ਸ ਪੋਸਨਕ੍ਕਮਂ ਦਸ੍ਸੇਤਿ ‘‘ਅਤਿ’’ਇਚ੍ਚਾਦਿਨਾ. ਅਤਿਲੋਕਪਦਤ੍ਥੇਹਿ ਲੋਕਟ੍ਠਿਤਿਮਤਿਕ੍ਕਮ੍ਮ ਪਵਤ੍ਤੇਹਿ ਮਾਯਾਦਿਬ੍ਬਭਵਨਆਰਾਮਵਿਮਾਨਾਦਿਪਦਤ੍ਥੇਹਿ ਹੇਤੁਭੂਤੇਹਿ ਉਪ੍ਪਜ੍ਜਮਾਨੋ ਅਯਂ ਵਿਮ੍ਹਯੋ ਚਿਤ੍ਤਬ੍ਯਾਪਨਸਙ੍ਖਾਤੋ ਠਾਯੀਭਾਵੋ ਅਬ੍ਭੁਤੋ ਰਸੋ ਅਬ੍ਭੁਤਰਸੋ ਨਾਮ ਭਵੇ, ਸੇਦਸ੍ਸੁਸਾਧੁਵਾਦਾਦਯੋ ਤਸ੍ਸ ਅਬ੍ਭੁਤਰਸਸ੍ਸ ਅਨੁਭਾਵਾ ਸਿਯੁਂ, ਤਾਸਾਵੇਗਧਿਤਿਪ੍ਪਞ੍ਞਾ ਏਤ੍ਥ ਅਬ੍ਭੁਤਰਸਵਿਸਯੇ ਬ੍ਯਭਿਚਾਰਿਨੋ ਭਾਵਾ ਹੋਨ੍ਤੀਤਿ. ਅਤਿਕ੍ਕਨ੍ਤਾ ਲੋਕਮਿਤਿ ਚ, ਤੇ ਚ ਤੇ ਪਦਤ੍ਥਾ ਚੇਤਿ ਚ, ਸਾਧੁਇਤਿ ਵਾਦੋਤਿ ਚ, ਸੇਦੋ ਚ ਅਸ੍ਸੁ ਚ ਸਾਧੁਵਾਦੋ ਚੇਤਿ ਚ, ਤੇ ਆਦਿ ਯੇਸਂ ਰੋਮਞ੍ਚਾਦੀਨਮਿਤਿ ਚ, ਤਾਸੋ ਚ ਆਵੇਗੋ ਚ ਧਿਤਿ ਚ ਪਞ੍ਞਾ ਚੇਤਿ ਚ ਵਾਕ੍ਯਂ.

ਇਮਸ੍ਸ ਅਬ੍ਭੁਤਰਸਸ੍ਸੋਦਾਹਰਣਮੇਵਂ ਦਟ੍ਠਬ੍ਬਂ –

ਸ ਪੁਣ੍ਣਕੇਨਾ’ਹਟਨੇਕਭਿਂਸਨੇ-

ਸ੍ਵ’ਹੋ ਨਟੇਨੇਵ ਸੁਨਿਚ੍ਚਲੋ’ਚਲਾ;

ਨਿਪਾਤਿਤੋ ਤੇਨ ਅਵਂਸਿਰੋਪਤਂ,

ਅਸਨ੍ਤਸਂ ਤਂ ਮਿਨਿ ਦਿਟ੍ਠਿਯਟ੍ਠਿਯਾਤਿ.

ਸੋ ਵਿਧੁਰਪਣ੍ਡਿਤੋ ਪੁਣ੍ਣਕੇਨ ਯਕ੍ਖੇਨ ਨਟੇਨ ਇਵ ਅਨੇਕਵਿਕਾਰਦਸ੍ਸਨਕੇਨ ਨਾਟਕੇਨ ਵਿਯ ਆਹਟਨੇਕਭਿਂਸਨੇਸੁ ਭਯਤ੍ਤਮਾਨੀਤਾਨੇਕਵਿਧਭਿਂਸਨੇਸੁ ਵਤ੍ਤਮਾਨੇਸੁ ਸੁਨਿਚ੍ਚਲੋ ਤੇਨ ਪੁਣ੍ਣਕੇਨ ਅਚਲਾ ਸਟ੍ਠਿਯੋਜਨੁਬ੍ਬੇਧਕਾਲ਼ਾਗਿਰਿਪਬ੍ਬਤਮਤ੍ਥਕਤੋ ਨਿਪਾਤਿਤੋ ਅਵਂਸਿਰੋਪਤਂ ਅਧੋਸੀਸਂ ਪਤਨ੍ਤੋ ਅਸਨ੍ਤਸਂ ਏਵਂ ਅਪ੍ਪਤਿਟ੍ਠੇਪਿ ਅਨੁਤ੍ਤਸਨ੍ਤੋ ਤਂ ਪਬ੍ਬਤਂ ਦਿਟ੍ਠਿਯਟ੍ਠਿਯਾ ਮਿਨਿ ਪਮਾਣਮਕਾਸਿ, ਅਹੋ ਅਚ੍ਛਰਿਯਨ੍ਤਿ. ਏਤ੍ਥ ਭਯਹੇਤੁਮ੍ਹਿ ਸਤਿ ਭੀਤਿਯਾ ਚ ਤਤ੍ਥ ਪਰਿਜਾਨਨਾਭਾਵਸ੍ਸ ਚ ਲੋਕਸਭਾਵਤ੍ਤਾ ਤਮਤਿਕ੍ਕਮ੍ਮ ਭਯਕਰਣੇ ਅਸਨ੍ਤਾਸਸ੍ਸ ਚ ਦਿਟ੍ਠਿਯਾ ਪਬ੍ਬਤਮਿਨਨਸ੍ਸ ਚ ਪਵਤ੍ਤਭਾਵਕਥਨੇਨ ਲੋਕਾਤਿਕ੍ਕਨ੍ਤਪਦਤ੍ਥਸਙ੍ਖਾਤੋ ਵਿਭਾਵੋ ‘‘ਅਸਨ੍ਤਸਂ ਤਂ ਮਿਨਿ ਦਿਟ੍ਠਿਯਟ੍ਠਿਯਾ’’ਤਿ ਇਮਿਨਾ ਪਕਾਸਿਤੋ. ‘‘ਅਹੋ’’ਤਿ ਵਚਨੇਨ, ਤਸ੍ਸ ਸਾਮਤ੍ਥਿਯੇਨ ਚ ਸਾਧੁਵਾਦਸੇਦਅਸ੍ਸੁਆਦਯੋ ਅਨੁਭਾਵਾ ਵਿਭਾਵਿਤਾ. ਤਾਸਆਵੇਗਧਿਤਿਚ੍ਚਾਦਿਬ੍ਯਭਿਚਾਰੀਭਾਵਾ, ਵਿਮ੍ਹਯਸਙ੍ਖਾਤਠਾਯੀਭਾਵੋ ਚ ਸਮੁਦਿਤਵਾਕ੍ਯਸਾਮਤ੍ਥਿਯੇਨ ਜੋਤਿਤੋ.

ਸਮਠਾਯੀਭਾਵ

੩੬੭. ਠਾਯੀਭਾਵੋ ਸਮੋ ਮੇਤ੍ਤਾ-

ਦਯਾਮੋਦਾਦਿਸਮ੍ਭਵੋ;

ਭਾਵਾਦੀਹਿ ਤਦੁ’ਕ੍ਕਂਸੋ,

ਸਨ੍ਤੋ ਸਨ੍ਤਨਿਸੇਵਿਤੋ.

ਇਤਿ ਸਙ੍ਘਰਕ੍ਖਿਤਮਹਾਸਾਮਿਪਾਦਵਿਰਚਿਤੇ

ਸੁਬੋਧਾਲਙ੍ਕਾਰੇ

ਰਸਭਾਵਾਵਬੋਧੋ ਨਾਮ ਪਞ੍ਚਮੋ ਪਰਿਚ੍ਛੇਦੋ.

ਸੁਬੋਧਾਲਙ੍ਕਾਰੋ ਸਮਤ੍ਤੋ.

੩੬੭. ‘‘ਠਾਯਿ’’ਚ੍ਚਾਦਿ. ਮੇਤ੍ਤਾਦਿਸਮ੍ਭਵੋ ਸਮੋ ਉਪਸਮਸਙ੍ਖਾਤੋ ਠਾਯੀਭਾਵੋ ਭਵਤਿ, ਤਦਨੁਰੂਪੇਹਿ ਭਾਵਾਨੁਭਾਵੇਹਿ ਤਸ੍ਸ ਉਕ੍ਕਂਸੋ ਯਸ੍ਸ, ਸੋ ਸਨ੍ਤੋ ਨਾਮ ਰਸੋ ਭਵਤਿ, ਸੋ ਚ ਸਨ੍ਤਨਿਸੇਵਿਤੋਤਿ.

ਇਤਿ ਸੁਬੋਧਾਲਙ੍ਕਾਰੇ ਮਹਾਸਾਮਿਨਾਮਿਕਾਯਂ ਟੀਕਾਯਂ

ਰਸਭਾਵਾਵਬੋਧੋ ਪਞ੍ਚਮੋ ਪਰਿਚ੍ਛੇਦੋ.

੩੬੭. ਇਦਾਨਿ ਸਨ੍ਤਰਸਸ੍ਸ ਪੋਸਨਕ੍ਕਮਂ ਦਸ੍ਸੇਤਿ ‘‘ਠਾਯਿ’’ਚ੍ਚਾਦਿਨਾ. ਮੇਤ੍ਤਾਦਯਾਮੋਦਾਦਿਸਮ੍ਭਵੋ ਮੇਤ੍ਤਾਕਰੁਣਾਪੀਤਿਆਦਿਵਿਭਾਵੇਹਿ ਸਮ੍ਭੂਤੋ ਸਮੋ ਕਾਯਚਿਤ੍ਤੋਪਸਮੋ ਠਾਯੀਭਾਵੋ ਨਾਮ ਹੋਤਿ, ਭਾਵਾਦੀਹਿ ਬ੍ਯਭਿਚਾਰੀਭਾਵਾਦੀਹਿ ਕਰਣਭੂਤੇਹਿ, ਅਪਿਚ ਤਸ੍ਸ ਸਮਸ੍ਸ ਅਨੁਰੂਪੇਹਿ ਬ੍ਯਭਿਚਾਰੀਭਾਵਾਨੁਭਾਵੇਹਿ ਤਦੁਕ੍ਕਂਸੋ ਤਸ੍ਸ ਠਾਯੀਭਾਵਸ੍ਸ ਉਕ੍ਕਂਸਯੁਤ੍ਤੋ ਸਨ੍ਤਨਿਸੇਵਿਤੋ ਸਾਧੂਹਿ ਸੇਵਿਤੋ ਸਨ੍ਤੋ ਸਨ੍ਤਰਸੋ ਨਾਮ ਹੋਤੀਤਿ. ਮੇਤ੍ਤਾ ਚ ਦਯਾ ਚ ਮੋਦੋ ਚੇਤਿ ਚ, ਤੇ ਆਦਯੋ ਯੇਸਮਿਤਿ ਚ, ਤੇਹਿ ਸਮ੍ਭਵੋ ਯਸ੍ਸੇਤਿ ਚ, ਤਸ੍ਸ ਉਕ੍ਕਂਸੋ ਅਸ੍ਸ ਸਨ੍ਤਸ੍ਸੇਤਿ ਚ, ਸਤਂ ਨਿਸੇਵਿਤੋਤਿ ਚ ਵਾਕ੍ਯਂ.

ਅਸ੍ਸ ਸਨ੍ਤਰਸਸ੍ਸੋਦਾਹਰਣਮੇਵਂ ਦਟ੍ਠਬ੍ਬਂ –

ਏਨ੍ਤੇਸੁ ਕੇਸਰਿਕਰੀਸ੍ਵ’ਪਿ ਵੇਠਯਨ੍ਤੇ,

ਨਾਗੇ ਨਗਂ ਮਦਗਜੇ ਵਿਯ ਵੇਲ਼ੁਗੁਮ੍ਬਂ;

ਯਕ੍ਖੇ ਵਿਚਾਲਯਤਿ ਨੋਚਲਿ ਈਸਕਮ੍ਪਿ,

ਸਨ੍ਤਿਂ ਗਤੋਵ ਵਿਧੁਰੋ ਮਧੁਰਾਪਿ ਭਾਵੋਤਿ.

ਕੇਸਰਿਕਰੀਸੁ ਸੀਹਹਤ੍ਥੀਸੁ ਏਨ੍ਤੇਸੁ ਅਪਿ ਭਿਂਸਨਾਕਾਰੇਨ ਸਮੀਪਮਾਗਚ੍ਛਨ੍ਤੇਸੁਪਿ ਨਾਗੇ ਵੇਠਯਨ੍ਤੇਪਿ ਨਾਗੇਸੁ ਸਰੀਰਂ ਵੇਠਯਨ੍ਤੇਸੁਪਿ. ਜਾਤ੍ਯਾਪੇਕ੍ਖਾਯੇਕਵਚਨਂ, ਵੇਲ਼ੁਗੁਮ੍ਬਂ ਮਦਗਜੇ ਵਿਯ ਵਿਚਾਲਯਤਿ ਮਦਗਲ਼ਿਤਹਤ੍ਥਿਮ੍ਹਿ ਚਾਲੇਨ੍ਤੇ ਇਵ ਯਕ੍ਖੇ ਪੁਣ੍ਣਕੇ ਨਗਂ ਕਾਲ਼ਾਗਿਰਿਪਬ੍ਬਤਂ ਵਿਚਾਲਯਤਿਪਿ ਅਨੇਕਪ੍ਪਕਾਰੇ ਚਾਲੇਨ੍ਤੇਪਿ ਵਿਧੁਰੋ ਪਣ੍ਡਿਤੋ ਸਨ੍ਤਿਂ ਗਤੋਵ ਨਿਬ੍ਬਾਨਂ ਆਲਮ੍ਬਣਕਰਣਵਸੇਨ ਸਮ੍ਪਤ੍ਤੋ ਵਿਯ ਫਲਸਮਾਪਤ੍ਤਿਸਮਾਪਨ੍ਨੋ ਇਵ ਅਥ ਵਾ ਦਿਟ੍ਠਧਮ੍ਮਨਿਬ੍ਬਾਨਸਙ੍ਖਤਨਿਰੋਧਸਮਾਪਤ੍ਤਿਸਮਾਪਨ੍ਨੋ ਵਿਯ ਈਸਕਮ੍ਪਿ ਅਪ੍ਪਕਮ੍ਪਿ ਮਧੁਰਾ ਭਾਵਾ ਅਪਿ ਮਧੁਰਸਭਾਵਤੋਪਿ ਨੋ ਚਲਿ, ਨਿਸਿਨ੍ਨਟ੍ਠਾਨਤੋ ਪਗੇਵਾਤਿ ਅਧਿਪ੍ਪਾਯੋ. ਏਤ੍ਥ ਧਾਵਨਰੋਦਨਕਮ੍ਪਨਾਦੀਨਂ ਕਰਣਭੂਤਂ ਸੀਹਾਦੀਨਮਾਗਮਨਂ ਨਾਗਵੇਠਨਂ ਪਬ੍ਬਤਕਮ੍ਪਨਨ੍ਤਿਆਦੀਸੁ ਵਤ੍ਤਮਾਨੇਸੁਪਿ ਨਿਬ੍ਬਿਕਾਰਤ੍ਤੇਨ ਸਨ੍ਤਿਂ ਗਤੋਤਿ ਇਮਿਨਾ ਸਨ੍ਤਰਸਸ੍ਸ ਪਕਤਿਭੂਤੇ ਉਦ੍ਦੇਸੇ ਦਸ੍ਸਿਤੋ ਨਵਮੋ ਠਾਯੀਭਾਵੋ ਦਸ੍ਸਿਤੋ ਹੋਤਿ, ਏਤਸ੍ਸ ਉਪ੍ਪਤ੍ਤਿਉਦ੍ਦੀਪਨਾਨਂ ਕਾਰਣਭੂਤਾ ਮੇਤ੍ਤਾਦਯਾਮੋਦਾਦਿਵਿਭਾਵਾ ਸਾਮਤ੍ਥਿਯਾ ਦਸ੍ਸਿਤਾ ਹੋਨ੍ਤੀਤਿ. ਧਿਤਿਮਤਿਸਤਿਆਦਯੋ ਤਦਨੁਰੂਪਬ੍ਯਭਿਚਾਰੀਭਾਵਾ ਚ ਤਾਦਿਸਾਨੁਭਾਵਾ ਚ ‘‘ਏਨ੍ਤੇਸੁ ਵੇਠਯਨ੍ਤੇ ਵਿਚਾਲਯਤੀ’’ਤਿ ਇਮਿਨਾ, ਸਕਲਵਾਕ੍ਯਸਾਮਤ੍ਥਿਯੇਨ ਚ ਪਕਾਸਿਤਾਤਿ ਦਟ੍ਠਬ੍ਬਾ.

ਇਤਿ ਸੁਬੋਧਾਲਙ੍ਕਾਰਨਿਸ੍ਸਯੇ

ਰਸਭਾਵਾਵਬੋਧੋ ਨਾਮ ਪਞ੍ਚਮੋ ਪਰਿਚ੍ਛੇਦੋ.