੫. ਭਾਵਾਵਬੋਧਪਰਿਚ੍ਛੇਦ
੩੩੮. ਪਟਿਭਾਨਵਤਾ ਲੋਕ-ਵੋਹਾਰ’ਮਨੁਸਾਰਿਨਾ;
ਤਤੋ’ਚਿਤ੍ਯਸਮੁਲ੍ਲਾਸ-ਵੇਦਿਨਾ ਕਵਿਨਾ ਪਰਂ.
੩੩੮. ਤਦੇਵ ਯਥਾਪਟਿਞ੍ਞਾਤਮਲਙ੍ਕਾਰਵਿਭਾਗਂ ਬੋਧੇਤ੍ਵਾ ਸਮ੍ਪਤਿ ਰਸਵਨ੍ਤਾਲਙ੍ਕਾਰਪ੍ਪਸਙ੍ਗੇਨਾਧਿਗਤਂ ਰਸਂ ਸਕਲ ਸਂਸਾਰਦੁਕ੍ਖਨਿਸ੍ਸ ਰਣੇਕਨਿਮਿਤ੍ਤਵਿਮੁਤ੍ਤਿਰਸੇਕਰਸਵਿਸੁਦ੍ਧਸਦ੍ਧਮ੍ਮਾਗਮਵਿਗ੍ਗਾਹਸਪ੍ਪੀਣਨੋਣਤਮਤੀਨਂ ਪਰਮਸਦ੍ਧਾਲੂਨਮਨਧਿਗਤਤ੍ਤੇਪਿ ਲਕ੍ਖਣਮਤ੍ਤੇਨ ਲੋਕਵੋਹਾਰਕੋਸਲ੍ਲਮਤ੍ਤਪਰਿਗ੍ਗਹਾਯ ਕਿਞ੍ਚਿਮਤ੍ਤਮੁਪਦਿਸਿਤੁਂ ਨ ਸਾਕਲ੍ਲੇਨ ‘‘ਪਟਿਭਾਨਵਤਾ’’ਤਿਆਦਿਮਾਹ. ਪਟਿਭਾਨਂ ਤਂਤਂਠਾਨਾਨੁਰੂਪਪ੍ਪਵਤ੍ਤਾ ਪਞ੍ਞਾ. ਸਾ ਹਿ ਸਰਸਰਚਨਾਯਚ੍ਚਨ੍ਤੋਪਕਾਰਿਕਾ, ਤਤੋਵ ਕਬ੍ਬਂ ‘‘ਪਟਿਭਾਨ’’ਨ੍ਤਿ ਵੁਚ੍ਚਤਿ. ਤੇਨਾਹ ‘‘ਪਟਿਭਾਨਵਤਾ’’ਤਿ. ਕਵਿਨਾ ਲੋਕਵੋਹਾਰਾਨੁਗਨ੍ਤਬ੍ਬੋ. ਯੋ ਹਿ ਸਕਲਂ ਲੋਕਵੋਹਾਰਂ ਨਾਨੁਸਰਤਿ, ਸੋ ਕਵਿਯੇਵ ਨ ਹੋਤਿ. ਤੇਨਾਹ ‘‘ਲੋਕਵੋਹਾਰਮਨੁਸਾਰਿਨਾ’’ਤਿ. ਯਤੋ ਓਚਿਤ੍ਯਂ ਨਾਮ ਕਵੀਨਂ ਪਰਮਂ ਰਹਸ੍ਸਂ ਲੋਕਵੋਹਾਰੇਪਿ ਉਚਿਤਞ੍ਞੂਯੇਵ ਪਸਂਸੀਯਤੇ, ਸਮੁਚਿਤਲੋਕਵੋਹਾਰਾਨੁਸਾਰੇਨੇਵ ਚ ਵਕ੍ਖਮਾਨਾਨੁਕ੍ਕਮੇਨ ਵਿਰਚਿਤਾ ਰਚਨਾ ਸਚੇਤਨਾਨਂ ਰਸਸ੍ਸਾਦਾਯ ਸਮ੍ਪਜ੍ਜਤੇ, ਤਸ੍ਮਾ ਓਚਿਤ੍ਯੇ ਸਮੁਲ੍ਲਸਤ੍ਤਂ ਦਿਤ੍ਤਂ ਫੁਟਮੇਵ ਬਨ੍ਧਨਂ ਕਾਤੁਂ ਵਟ੍ਟਤਿ. ਤਤੋਵਚ੍ਚਨ੍ਤਮੋਚਿਤ੍ਯਸਮੁਲ੍ਲਾਸਵੇਦਿਨਾ ਕਵਿਨਾ ਭਵਿਤਬ੍ਬਂ. ਤੇਨਾਹ ‘‘ਪਰਂ ਓਚਿਤ੍ਯਸਮੁਲ੍ਲਾਸਵੇਦਿਨਾ’’ਤਿ. ਸਬ੍ਬਞ੍ਚੇਤਂ ‘‘ਕਵਿਨਾ’’ਤਿ ਏਤ੍ਥ ਵਿਸੇਸਨਂ, ‘‘ਕਵਿਨਾ’’ਤਿ ਚੇਤਂ ‘‘ਨਿਬਨ੍ਧਾ’’ਤਿ ਏਤ੍ਥ ਅਵੁਤ੍ਤੋ ਕਤ੍ਤਾ.
੩੩੮. ਏਵਂ ਯਥਾਪਟਿਞ੍ਞਾਤਾਨਮਲਙ੍ਕਾਰਾਨਂ ਦਸ੍ਸਨਾਵਸਰੇ ਰਸਵਨ੍ਤਾਲਙ੍ਕਾਰਪ੍ਪਸਙ੍ਗੇਨਾਧਿਗਤਨਵਵਿਧਸਿਙ੍ਗਾਰਾਦਿਰਸੇ ਸਕਲਸਂਸਾਰਦੁਕ੍ਖਨਿਸ੍ਸਰਣਅਸਹਾਯਕਰਣਭੂਤਵਿਮੁਤ੍ਤਿਰਸੇਨ ਏਕਰਸਭੂਤੇ ਅਤਿਪਣੀਤੇ ਸਦ੍ਧਮ੍ਮਾਮਤਰਸੇਯੇਵ ਲੁਦ੍ਧਾਨਂ ਸਦ੍ਧਾਬਾਹੁਲ੍ਲਸੁਦ੍ਧਸਂਯਮਾਨਂ ਵਿਮੁਖੇਪਿ ਲਕ੍ਖਣਮਤ੍ਤਪਰਿਞ੍ਞਾਣੇਨ ਲੋਕਵੋਹਾਰੇਸੁ ਅਸਮ੍ਮੋਹਤ੍ਥਂ ਸਙ੍ਖੇਪੇਨ ਦਸ੍ਸੇਤੁਕਾਮੋ ਇਦਾਨਿ ‘‘ਪਟਿਭਾਨਵਤਾ’’ਇਚ੍ਚਾਦਿਮਾਹ. ਪਟਿਭਾਨਵਤਾ ਸਰਸਰਚਨਾਯ ਅਚ੍ਚਨ੍ਤੋਪਕਾਰਟ੍ਠਾਨੋਚਿਤਪਞ੍ਞਾਵਿਸੇਸਵਤਾ ਲੋਕਵੋਹਾਰਮਨੁਸਾਰਿਨਾ ਸਕਲਲੋਕੇ ਵੋਹਾਰਾਨੁਰੂਪਮਨੁਗਤੇਨ ਤਤੋ ਯਸ੍ਮਾ ਓਚਿਤ੍ਯਂ ਨਾਮ ਹਦਯਤੋ ਅਬਹਿ ਕਾਤਬ੍ਬਂ, ਰਹਸ੍ਸਮਿਵ ਬਨ੍ਧਤੋ ਵਿਯੋਜਨੀਯਂ ਨ ਹੋਤਿ. ਤਸ੍ਮਾ ਪਰਮਤਿਸਯੇਨ ਓਚਿਤ੍ਯਸਮੁਲ੍ਲਾਸਵੇਦਿਨਾ ਉਚਿਤਭਾਵੇਨ ਵਤ੍ਤੁਮਿਚ੍ਛਿਤਤ੍ਥਸ੍ਸ ਉਦ੍ਦੀਪਨਸ੍ਸੇਵ ਅਨੁਰੂਪਪ੍ਪਕਾਰੇਨ ਇਟ੍ਠਤ੍ਥਸ੍ਸ ਸਮੁਲ੍ਲਾਸਨਂ ਦਿਤ੍ਤਿਂ ਜਾਨਨ੍ਤੇਨ ਕਵਿਨਾ ਬਨ੍ਧਕਾਰਕੇਨ ਨਿਬਨ੍ਧਾਤਿ ਸਮ੍ਬਨ੍ਧੋ. ਪਟਿਭਾ ਪਟਿਭਾਨਨ੍ਤਿ ਪਞ੍ਞਾਯੇਤਂ ਨਾਮਂ, ਤਤੋ ਜਾਤਕਬ੍ਬਸ੍ਸਪਿ ਪਟਿਭਾਤਿ ਵੁਚ੍ਚਮਾਨਤ੍ਤਾ ਅਯਂ ਪਞ੍ਞਾਵਿਸੇਸੋ ਰਚਨਾਯ ਅਚ੍ਚਨ੍ਤੋਪਕਾਰੋਤਿ ਞਾਤਬ੍ਬੋ. ਪਟਿਭਾਨਮਸ੍ਸਤ੍ਥੀਤਿ ਚ, ਲੋਕਸ੍ਸ ਵੋਹਾਰੋਤਿ ਚ, ਤਂ ਅਨੁਗਚ੍ਛਤਿ ਸੀਲੇਨਾਤਿ ਚ, ਓਚਿਤ੍ਯੇਨ ਸਮੁਲ੍ਲਾਸੋਤਿ ਚ, ਤਂ ਵਿਜਾਨਾਤਿ ਸੀਲੇਨਾਤਿ ਚ ਵਿਗ੍ਗਹੋ.
੩੩੯. ਠਾਯੀਸਮ੍ਬਨ੍ਧਿਨੋ ਭਾਵ-ਵਿਭਾਵਾ ਸਾਨੁਭਾਵਕਾ;
ਸਮ੍ਪਜ੍ਜਨ੍ਤਿ ਨਿਬਨ੍ਧਾ ਤੇ, ਰਸਸ੍ਸਾਦਾਯ ਸਾਧੁਨਂ.
੩੩੯. ‘‘ਠਾਯਿ’’ਚ੍ਚਾਦਿ. ਠਾਯਿਨੋ ਵਕ੍ਖਮਾਨਰਤ੍ਯਾਦਯੋ ਤੇਹਿ ਸਹ ਸਮ੍ਬਨ੍ਧੋ ਵਿਭਾਵਾਦੀਹਿ ਯੋਗੇ ਰਤ੍ਯਾਦੀਨਮਸ੍ਸਾਦਿਯਤ੍ਤਮਾਨੀਯਮਾਨਤ੍ਤਾ ਏਤੇਸਮਤ੍ਥੀਤਿ ਠਾਯੀਸਮ੍ਬਨ੍ਧਿਨੋ. ਸਹ ਅਨੁਭਾਵੇਹਿ ਵਕ੍ਖਮਾਨਲਕ੍ਖਣੇਹੀਤਿ ਸਾਨੁਭਾਵਕਾ, ਭਾਵੋ ਵਿਭਾਵੋ ਚ, ਵਕ੍ਖਮਾਨੋ ਭਾਵੇਨ ਭਾਵਾਭਾਸੋਪਿ ਇਮਿਨਾਵ ਸਙ੍ਗਹਿਤੋ, ਰਸਸ੍ਸਾਦਾਯ ਸਮ੍ਪਜ੍ਜਨ੍ਤੀਤਿ ਸਮ੍ਬਨ੍ਧੋ.
੩੩੯. ‘‘ਠਾਯਿ’’ਚ੍ਚਾਦਿ. ਠਾਯੀਸਮ੍ਬਨ੍ਧਿਨੋ ਠਾਯੀਪਦੇਨ, ਤੇਨ ਵਾਚ੍ਚਰਤਿਹਾਸਾਦਿਅਤ੍ਥੇਨ ਵਾ ਸਮ੍ਬਨ੍ਧੁਪਗਤਾ ਸਾਨੁਭਾਵਕਾ ਵਕ੍ਖਮਾਨਾਨੁਭਾਵੇਹਿ ਸਹ ਪਵਤ੍ਤਾ ਭਾਵਵਿਭਾਵਾ ਵਕ੍ਖਮਾਨਭਾਵਵਿਭਾਵਾ ਨਿਬਨ੍ਧਾ ਵੁਤ੍ਤਗੁਣੋਪੇਤਕਵਿਨਾ ਬਨ੍ਧਿਤਾ ਏਕਤ੍ਥ ਆਹਰਿਤ੍ਵਾ ਦਸ੍ਸਿਤਾ ਸਾਧੁਨਂ ਇਸ੍ਸਾਦਿਦੋਸਰਹਿਤਾਨਂ ਸਜ੍ਜਨਾਨਂ ਰਸਸ੍ਸਾਦਾਯ ਸਿਙ੍ਗਾਰਾਦਿਵਕ੍ਖਮਾਨਰਸਸ੍ਸ ਅਸ੍ਸਾਦਨਤ੍ਥਂ ਸਮ੍ਪਜ੍ਜਨ੍ਤਿ ਪਵਤ੍ਤਨ੍ਤੀਤਿ. ਇਮਾਯ ਗਾਥਾਯ ਠਾਯੀਭਾਵੋ ਬ੍ਯਭਿਚਾਰੀਭਾਵੋ ਕੇਵਲਭਾਵੋ ਵਿਭਾਵੋ ਅਨੁਭਾਵੋ ਰਸੋ ਚੇਤਿ ਇਮੇ ਉਦ੍ਦਿਟ੍ਠਾ ਭਵਨ੍ਤਿ, ਕਥਨ੍ਤਿ ਚੇ? ਭਾਵਵਿਭਾਵਾਨਂ ‘‘ਠਾਯੀਸਮ੍ਬਨ੍ਧਿਨੋ’’ਤਿ ਵਿਸੇਸਨਂ ਭਵਤਿ, ਤੇਨ ਭਾਵਸ੍ਸ ਠਾਯੀ ਚ ਸੋ ਭਾਵੋ ਚੇਤਿ ਚ ਠਾਯੀਪਦੇਨ ਸਮ੍ਬਨ੍ਧਤ੍ਤਾ ਠਾਯੀਭਾਵੋ ਚ, ਪੁਨ ਬ੍ਯਭਿਚਾਰੀਭਾਵੇ ਸਤਿ ‘‘ਠਾਯੀਭਾਵੋ’’ਤਿ ਇਮਸ੍ਸ ਸਾਧਕਤ੍ਤਾ ਇਮਸ੍ਸੇਵ ਠਾਯੀਭਾਵਪਦਸ੍ਸ ਪਯੋਗਸਾਮਤ੍ਥਿਯੇਨ ਗਮ੍ਮਮਾਨੋ ਬ੍ਯਭਿਚਾਰੀਭਾਵੋ ਚ, ਪੁਨ ਠਾਯੀਪਦੇਨ ਸਮਾਸਮਕਤ੍ਵਾ ਵਿਸੁਂ ਦਸ੍ਸਿਤਭਾਵਸਦ੍ਦਸੁਤਿਯਾ ਠਾਯੀਭਾਵਬ੍ਯਭਿਚਾਰੀਭਾਵੇਹਿ ਅਞ੍ਞੋ ਭਾਵੋ ਚ, ਤਥਾ ਏਵ ਠਾਯੀਪਦੇਨ ਵਾਚ੍ਚਰਤਿਹਾਸਾਦਿਅਤ੍ਥਸ੍ਸ ਉਪ੍ਪਤ੍ਤਿਉਦ੍ਦੀਪਨਦ੍ਵਯਂ ਵਿਭੂਤਂ ਕਤ੍ਵਾ ਸਜ੍ਜੇਤ੍ਵਾ ਠਿਤਤ੍ਤਾ ਤੇਹਿ ਰਤਿਹਾਸਾਦੀਹਿ ਅਤ੍ਥੇਹਿ ਸਮ੍ਬਨ੍ਧਿਨੋ ਆਲਮ੍ਬਣਉਦ੍ਦੀਪਨਸਙ੍ਖਤਵਿਵਿਧਵਿਭਾਵਾ ਚ, ਏਵਮੇਵ ਸਾਨੁਭਾਵਕਪਦੇਨ ਸਮਾਯੋਗੇਨ ਦਸ੍ਸਿਤਾਨੁਭਾਵੋ ਚ, ‘‘ਰਸਸ੍ਸਾਦਾਯਾ’’ਤਿ ਇਮਿਨਾ ਨਿਦ੍ਦਿਟ੍ਠਰਸੋ ਚਾਤਿ ਏਵਮਿਮੇ ਠਾਯੀਭਾਵਾਦਯੋ ਉਦ੍ਦਿਟ੍ਠਾ ਹੋਨ੍ਤਿ. ਠਾਯਿਨਾ ਸਹ ਸਮ੍ਬਨ੍ਧੋਤਿ ਚ, ਸੋ ਏਤੇਸਮਤ੍ਥੀਤਿ ਚ, ਭਾਵੋ ਚ ਵਿਭਾਵੋ ਚੇਤਿ ਚ, ਸਹ ਅਨੁਭਾਵੇਹਿ ਵਤ੍ਤਨ੍ਤੀਤਿ ਚ, ਰਸਸ੍ਸ ਅਸ੍ਸਾਦੋਤਿ ਚ ਵਾਕ੍ਯਂ.
ਭਾਵਅਧਿਪ੍ਪਾਯ
੩੪੦. ਚਿਤ੍ਤਵੁਤ੍ਤਿਵਿਸੇਸਾ ਤੁ, ਭਾਵਯਨ੍ਤਿ ਰਸੇ ਯਤੋ;
ਰਤ੍ਯਾਦਯੋ ਤਤੋ ਭਾਵ-ਸਦ੍ਦੇਨ ਪਰਿਕਿਤ੍ਤਿਤਾ.
੩੪੦. ਇਦਾਨਿ ਯਥਾਉਦ੍ਦਿਟ੍ਠੇਸੁ ਠਾਯਾਦੀਹਿ ਭਾਵਵਿਭਾਵਾਨੁਭਾਵਰਸੇਸੁ ਪਠਮਂ ਭਾਵਂ ਵਿਭਾਵੇਤੁਂ ਭਾਵਸਦ੍ਦਮਨ੍ਵਤ੍ਥਯਤਿ ‘‘ਚਿਤ੍ਤ’’ਇਚ੍ਚਾਦਿਨਾ. ਚਿਤ੍ਤਸ੍ਸ ਵੁਤ੍ਤਿਯੋ ਰਮਣਹਸਨਾਦਿਆਕਾਰੇਨ ਪਵਤ੍ਤਿਯੋ, ਤਾਵ ਵਿਸੇਸਾ ਵਿਸਿਟ੍ਠਸਭਾਵਤ੍ਥਾਤਿ ਚਿਤ੍ਤਵੁਤ੍ਤਿਵਿਸੇਸਾ. ਰਤ੍ਯਾਦਯੋ ਠਾਯੀਬ੍ਯਭਿਚਾਰੀਸਾਤ੍ਤਿਕਾ. ਤੁਸਦ੍ਦੋ ਵਿਸੇਸੇ. ਯਤੋ ਰਸੇ ਸਿਙ੍ਗਾਰਾਦਯੋ ਭਾਵਯਨ੍ਤਿ ਨਿਪ੍ਫਾਦੇਨ੍ਤਿ. ਤਤੋ ਭਾਵਸਦ੍ਦੇਨ ਪਰਿਕਿਤ੍ਤਿਤਾ ਭਰਤਾਦੀਹਿ ਕਥਿਤਾ. ਏਤ੍ਥ ਹਿ ਣ੍ਯਨ੍ਤੋ ਭੂਧਾਤੁ ਕਰਣੇ ਵਤ੍ਤਤੇ. ਯਤੋ ਚਾਯਂ ਨ ਕੇਵਲਂ ਕਰਣੇਯੇਵ ਵਤ੍ਤਤੇ, ਅਥ ਖੋ ਬ੍ਯਾਪਨੇ, ਪਟਿਪਾਦਨੇ ਚ, ਤਸ੍ਮਾਸ੍ਸ ਪਟਿਭਾਨਂ ਚਿਤ੍ਤਂ ਭਾਵਯਨ੍ਤਿ ਬ੍ਯਾਪੇਨ੍ਤਿ. ਅਥ ਵਾ ਕਵਿਨੋ ਲੋਕਟ੍ਠਿਤਿਞਾਣਲਕ੍ਖਣਂ ਅਧਿਪ੍ਪਾਯਂ ਭਾਵਯਨ੍ਤਿ ਪਟਿਪਾਦੇਨ੍ਤੀਤਿ ਭਾਵਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.
੩੪੦. ਇਦਾਨਿ ਉਦ੍ਦਿਟ੍ਠੇਸੁ ਠਾਯੀਭਾਵਾਦੀਸੁ ਠਾਯੀਆਦੀਨਂ [ਠਾਯੀਭਾਵਾਦੀਨਂ (ਕ.)] ਤਿਣ੍ਣਂ ਸਾਧਾਰਣੋ ਭਾਵੋ ਨਾਮ ਏਸੋਤਿ ਦਸ੍ਸੇਨ੍ਤੋ ਅਨ੍ਵਤ੍ਥਵਸੇਨ ਦਸ੍ਸੇਤਿ ‘‘ਚਿਤ੍ਤ’’ਇਚ੍ਚਾਦਿ. ਚਿਤ੍ਤਵੁਤ੍ਤਿਵਿਸੇਸਾ ਤੁ ਚਿਤ੍ਤਸ੍ਸ ਉਤ੍ਤਰਿ ਵਕ੍ਖਮਾਨਾਰਮ੍ਮਣਹਸਨਸੋਚਨਾਦੀਹਿ, ਨਿਬ੍ਬੇਦਾਦੀਹਿ, ਥਮ੍ਭਾਦੀਹਿ ਚ ਆਕਾਰੇਹਿ ਪਵਤ੍ਤਿਸਙ੍ਖਾਤਾ ਅਞ੍ਞਮਞ੍ਞਂ ਅਸਙ੍ਕਰਾਕਾਰਸਙ੍ਖਾਤਾ ਵਿਸੇਸਾ ਪਨ ਠਾਯੀਬ੍ਯਭਿਚਾਰੀਸਾਤ੍ਤਿਕਾ ਯਤੋ ਯਸ੍ਮਾ ਰਸੇ ਸਿਙ੍ਗਾਰਾਦਿਰਸੇ ਭਾਵਯਨ੍ਤਿ ਨਿਪ੍ਫਾਦੇਨ੍ਤਿ ਕਰੋਨ੍ਤਿ. ਨੋ ਚੇ, ਰਸੇ ਸਿਙ੍ਗਾਰਾਦਿਰਸਵਿਸਯੇ ਪਣ੍ਡਿਤਾਨਂ ਚਿਤ੍ਤਂ ਭਾਵਯਨ੍ਤਿ ਬ੍ਯਾਪਨਂ ਕਰੋਨ੍ਤਿ. ਨੋ ਚੇ, ਤਸ੍ਮਿਂਯੇਵ ਰਸਵਿਸਯੇ ਕਵਿਨੋ ਲੋਕਸਭਾਵਂ ਵਿਸਯਂ ਕਤ੍ਵਾ ਪਵਤ੍ਤਞਾਣਲਕ੍ਖਣਂ ਅਧਿਪ੍ਪਾਯਂ ਭਾਵਯਨ੍ਤਿ ਪਟਿਪਾਦਨਂ ਕਰੋਨ੍ਤਿ. ਤਤੋ ਭਾਵਸਦ੍ਦੇਨ ਹੇਤੁਕਤ੍ਤਰਿ ਨਿਪ੍ਫਨ੍ਨੇਨ ਰਤ੍ਯਾਦਯੋ ਰਤਿਹਾਸਾਦਯੋ ਪਰਿਕਿਤ੍ਤਿਤਾ ਭਰਤਾਦੀਹਿ ਵੁਤ੍ਤਾ ਹੋਨ੍ਤੀਤਿ. ‘‘ਰਤ੍ਯਾਦਯੋ’’ਤਿ ਏਤ੍ਥ ਆਦਿਸਦ੍ਦੇਨ ਹਾਸਾਦਯੋ ਠਾਯੀਭਾਵਾ ਚ, ਨਿਬ੍ਬੇਦਾਦਯੋ ਬ੍ਯਭਿਚਾਰੀਭਾਵਾ ਚ, ਥਮ੍ਭਪਲਯਾਦਯੋ ਸਾਤ੍ਤਿਕਭਾਵਾ ਚ ਸਙ੍ਗਹਿਤਾਤਿ ਦਟ੍ਠਬ੍ਬਾ. ਚਿਤ੍ਤਸ੍ਸ ਵੁਤ੍ਤਿਯੋਤਿ ਚ, ਤਾ ਏਵ ਵਿਸੇਸਾਤਿ ਚ, ਭਾਵੋ ਇਤਿ ਸਦ੍ਦੋਤਿ ਚ ਵਾਕ੍ਯਂ.
ਠਾਯੀਭਾਵਅਧਿਪ੍ਪਾਯ
੩੪੧. ਵਿਰੋਧਿਨਾ’ਞ੍ਞਭਾਵੇਨ,
ਯੋ ਭਾਵੋ ਨ ਤਿਰੋਹਿਤੋ;
ਸੀਲੇਨ ਤਿਟ੍ਠਤਿ’ਚ੍ਚੇ’ਸੋ,
ਠਾਯੀਭਾਵੋਤਿ ਸਦ੍ਦਿਤੋ.
੩੪੧. ਠਾਯਾਦਿਕੇ ਤਿਵਿਧੇ ਭਾਵੇ ਕਮੇਨਾਹ ‘‘ਵਿਰੋਧਿਨਾ’’ਇਚ੍ਚਾਦਿਨਾ. ਵਿਰੋਧਿਨਾ ਅਞ੍ਞੇਨ ਜਿਗੁਚ੍ਛਾਦਿਨਾ ਭਾਵੇਨ ਯੋ ਭਾਵੋ ਰਤ੍ਯਾਦਿਕੋ ਨ ਤਿਰੋਹਿਤੋ ਨਚ੍ਛਾਦਿਤੋ, ਏਸੋ ਭਾਵੋ ਅਨੁਚ੍ਛਿਜ੍ਜਮਾਨਤ੍ਤਾ ਏਵ ਤਿਟ੍ਠਤਿ ਸੀਲੇਨਾਤਿ, ਠਾਯੀ ਏਵ ਭਾਵੋਤਿ ਠਾਯੀਭਾਵੋਤਿ ਸਦ੍ਦਿਤੋ ਕਥਿਤੋ. ਯੋ ਭਾਵਾਦੀਹਿ ਆਲੋਕਿਤਸ੍ਸਾਦਂ ਨੀਤੋ ਸਮਾਨੀਤੋ, ਸੋ ਸਾਮਾਜਿਕੇਹਿ ਅਸ੍ਸਾਦਿਯਮਾਨਤ੍ਤਾ ਰਸੋਤਿ ਵੁਚ੍ਚਤਿ. ਵਕ੍ਖਤਿ ਹਿ ‘‘ਸਵਿਭਾਵ’’ਇਚ੍ਚਾਦਿ.
੩੪੧. ਇਦਾਨਿ ਠਾਯੀਆਦਿਕੇ ਤਿਵਿਧਭਾਵੇ ਕਮੇਨ ਨਿਦ੍ਦਿਸਤਿ ‘‘ਵਿਰੋਧਿ’’ਇਚ੍ਚਾਦਿਨਾ. ਵਿਰੋਧਿਨਾ ਅਞ੍ਞਭਾਵੇਨ ਰਤਿਹਾਸਾਦੀਨਂ ਵਿਰੁਦ੍ਧੇਨ ਜਿਗੁਚ੍ਛਾਦਿਨਾ ਅਞ੍ਞਭਾਵੇਨ ਯੋ ਭਾਵੋ ਰਤਿਹਾਸਾਦਿਕੋ ਤਿਰੋਹਿਤੋ ਨ ਬ੍ਯਵਹਿਤੋ ਨ ਹੋਤਿ, ਏਸੋ ਵਿਰੁਦ੍ਧਭਾਵੇਨ ਅਬ੍ਯਵਹਿਤੋ ਭਾਵੋ ਤਿਟ੍ਠਤਿ ਸੀਲੇਨਾਤਿ ਇਮਿਨਾ ਅਤ੍ਥੇਨ ਠਾਯੀ ਨਾਮ ਹੋਤੀਤਿ ਕਤ੍ਵਾ ਠਾਯੀਭਾਵੋਤਿ ਸਦ੍ਦਿਤੋ ਕਥਿਤੋਤਿ. ਯੋ ਵਿਭਾਵਾਨੁਭਾਵਾਦੀਹਿ ਅਸ੍ਸਾਦਨੀਯਤ੍ਤਂ ਪਾਪਿਤੋ ਸਬ੍ਭੇਹਿ ਅਸ੍ਸਾਦਨੀਯਤ੍ਤਾ ਰਸੋਤਿ ਵੁਚ੍ਚਤਿ, ਸੋ ਠਾਯੀ ਨਾਮਾਤਿ ਵੁਚ੍ਚਤਿ. ਅਞ੍ਞੋ ਚ ਸੋ ਭਾਵੋ ਚੇਤਿ ਚ, ਤਿਰੋ ਕਯਿਰਿਤ੍ਥਾਤਿ ਚ, ਠਾਯੀ ਚ ਸੋ ਭਾਵੋ ਚੇਤਿ ਚ ਵਿਗ੍ਗਹੋ.
ਠਾਯੀਭਾਵਪ੍ਪਭੇਦਉਦ੍ਦੇਸ
੩੪੨. ਰਤਿਹਾਸਾ ਚ ਸੋਕੋ ਚ,
ਕੋਧੁਸ੍ਸਾਹਭਯ’ਮ੍ਪਿ ਚ;
ਜਿਗੁਚ੍ਛਾਵਿਮ੍ਹਯਾ ਚੇਵ,
ਸਮੋ ਚ ਨਵ ਠਾਯਿਨੋ.
੩੪੨. ਰਤ੍ਯਾਦੀਨਂ ਨਵਨ੍ਨਮੇਵ ਠਾਯਿਤ੍ਵਂ ਸਮ੍ਭਵਤੀਤ੍ਯਾਹ ‘‘ਰਤਿ’’ਚ੍ਚਾਦਿ. ਸਮੋ ਚੇਤਿ ਏਵਂ ਠਾਯਿਨੋ ਨਵਾਤਿ ਯੋਜਨਾ. ਨਵੇਵੇਤੇ ਸਕਸਕਵਿਭਾਵਾਨੁਭਾਵੇਹਿ ਸਮੁਲ੍ਲਾਸਿਤਾ ਵਿਸੁਮ੍ਪਿ ਬਨ੍ਧਿਤਬ੍ਬਾ ਕਵਿਨਾ, ਅਭਿਨੇਤਬ੍ਬਾ ਚ ਨਟੇਨ, ਤਥਾ ਸੇਸਭਾਵਾਪਿ. ਤਤ੍ਥ ਯਦਿ ਪਨਾਯਂ ਰਤਿ ਅਸੇਸਇਤ੍ਥਿਪੁਰਿਸਗੁਣਯੁਤ੍ਤਾਨਂ ਇਤ੍ਥਿਪੁਰਿਸਾਨਂ ਅਞ੍ਞਮਞ੍ਞਂ ਜਨਿਤਾ, ਚਨ੍ਦਾਦੀਹਿ ਉਦ੍ਦੀਪਨਵਿਭਾਵੇਹਿ ਉਦ੍ਦੀਪਿਤਾ, ਉਸ੍ਸੁਕ੍ਕਤਾਦਿਬਾਧਕੇਹਿ ਅਨੁਭਾਵੇਹਿ ਪਰਿਪੋਸਿਤਾ, ਸਕਸਕਾਨੁਭਾਵਸਾਮਤ੍ਥਿਯਾ ਪਤੀਯਮਾਨੇਹਿ ਅਨੇਕਰੂਪੇਹਿ ਬ੍ਯਭਿਚਾਰੀਹਿ ਚਿਤ੍ਤਤਾ ਸਿਯਾ, ਤਦਾ ਤੁ ਠਾਯੀ ਰਤਿ ਨਟਾਭਿਨਯੇਨ, ਸੁਬਨ੍ਧਸਵਨੇਨ ਵਾ ਸਬ੍ਭੇਹਿ ਅਸ੍ਸਾਦਿਯਮਾਨਾ ਸਿਙ੍ਗਾਰਰਸਤ੍ਤਮਾਪਜ੍ਜਤੇ. ਏਵਂ ਯਥਾਯੋਗਂ ਹਾਸਾਦਿਠਾਯੀਭਾਵਾਨਂ ਹਸ੍ਸਰਸਾਦਿਭਾਵਾਪਜ੍ਜਨੇ ਯੁਤ੍ਤਿਂ ਸਮਨ੍ਨੇਯ੍ਯ.
੩੪੨. ਠਾਯੀਭਾਵੋ ਨਾਮ ਰਤ੍ਯਾਦਯੋ ਨਵੇਵੇਤਿ ਦਸ੍ਸੇਤੁਂ ‘‘ਰਤਿਹਾਸਾ’’ਤਿਆਦਿਮਾਹ. ਰਤਿਹਾਸਾ ਚ ਸੋਕੋ ਚ ਕੋਧੁਸ੍ਸਾਹਭਯਮ੍ਪਿ ਚ ਜਿਗੁਚ੍ਛਾਵਿਮ੍ਹਯਾ ਚੇਵ ਸਮੋ ਸਨ੍ਤਗੁਣੋ ਚਾਤਿ ਏਵਂ ਠਾਯਿਨੋ ਨਵ ਹੋਨ੍ਤਿ. ਇਮੇਸਂ ਰਤ੍ਯਾਦੀਨਂ ਨਵਨ੍ਨਂ ਸਰੂਪਕਥਨਂ ‘‘ਸਿਙ੍ਗਾਰਹਸ੍ਸਕਰੁਣਾ’’ਤਿਆਦਿਕਾਯ ਉਦ੍ਦੇਸਗਾਥਾਯ ਅਨਨ੍ਤਰੇ ਨਿਦ੍ਦੇਸੇ ਪਾਕਟੋ ਹੋਤਿ. ਰਤਿ ਚ ਹਾਸੋ ਚਾਤਿ ਚ, ਕੋਧੋ ਚ ਉਸ੍ਸਾਹੋ ਚ ਭਯਞ੍ਚੇਤਿ ਚ, ਜਿਗੁਚ੍ਛਾ ਚ ਵਿਮ੍ਹਯਾ ਚੇਤਿ ਚ ਵਾਕ੍ਯਂ. ਇਮੇ ਨਵ ਚ ਏਵਂ ਬ੍ਯਭਿਚਾਰੀਭਾਵਸਾਤ੍ਤਿਕਾਭਾਵੋ ਚੇਤਿ ਇਮੇ ਯਥਾਸਕਮਨੁਰੂਪਵਿਭਾਵਾਨੁਭਾਵੇਹਿ ਦਿਤ੍ਤਂ ਕਤ੍ਵਾ ਪਚ੍ਚੇਕਂ ਕਵਿਨਾ ਬਨ੍ਧਿਤਬ੍ਬਾ, ਨਟੇਨ ਗਹੇਤ੍ਵਾ ਦਸ੍ਸਿਤਬ੍ਬਾ ਚ. ਇਮੇਸੁ ਤਿਵਿਧਭਾਵੇਸੁ ਅਯਂ ਰਤਿ ਅਸੇਸਪੁਮਿਤ੍ਥਿਗੁਣੇਹਿ ਯੁਤ੍ਤੇਹਿ ਨਰਨਾਰੀਹਿ ਅਞ੍ਞਮਞ੍ਞਂ ਉਪ੍ਪਾਦਿਤਾ, ਚਨ੍ਦਾਦੀਹਿ ਉਦ੍ਦੀਪਨਵਿਭਾਵੇਹਿ ਉਦ੍ਦੀਪਿਤਾ, ਉਸ੍ਸਾਹਾਦਿਪਕਾਸਕਕਾਯਿਕਵਾਚਸਿਕਪਯੋਗਸਙ੍ਖਾਤਾਨੁਭਾਵੇਨ ਪੋਸਿਤਾ, ਸਕਸਕਾਨੁਭਾਵਸਾਮਤ੍ਥਿਯੇਹਿ ਗਮ੍ਮਮਾਨਾਨੇਕਪ੍ਪਕਾਰਬ੍ਯਭਿਚਾਰੀਭਾਵੇਹਿ ਵਿਚਿਤ੍ਤਕਤਾ ਹੋਤਿ. ਈਦਿਸਾ’ਯਂ ਰਤਿ ਨਟਸ੍ਸ ਅਭਿਨਯੇਨ ਚ ਪਸਤ੍ਥਬਨ੍ਧਸਵਨੇਨ ਚ ਸਬ੍ਭੇਹਿ ਅਸ੍ਸਾਦਿਯਮਾਨਸਿਙ੍ਗਾਰਾਦਿਰਸਤ੍ਤਂ ਪਾਪੁਣਾਤੀਤਿ ਵਿਞ੍ਞਾਤਬ੍ਬਾ. ਹਾਸਾਦੀਨਂ ਸੇਸਠਾਯੀਭਾਵਾਨਂ ਹਸ੍ਸਰਸਾਦਿਭਾਵਾਪਤ੍ਤਿਯਂ ਯੁਤ੍ਤਿ ਏਵਂ ਯਥਾਰਹਂ ਵੇਦਿਤਬ੍ਬਾਤਿ.
ਬ੍ਯਭਿਚਾਰੀਭਾਵਅਧਿਪ੍ਪਾਯ
੩੪੩. ਤਿਰੋਭਾਵਾਵਿਭਾਵਾਦਿ-
ਵਿਸੇਸੇਨਾ’ਭਿਮੁਖ੍ਯਤੋ;
ਯੇਤੇ ਚਰਨ੍ਤਿ ਸੀਲੇਨ,
ਤੇ ਹੋਨ੍ਤਿ ਬ੍ਯਭਿਚਾਰਿਨੋ.
੩੪੩. ਬ੍ਯਭਿਚਾਰਿਨੋ ਆਹ ‘‘ਤਿਰੋਭਾਵ’’ਇਚ੍ਚਾਦਿਨਾ. ਤਿਰੋਭਾਵੋ ਠਾਯੀਨਂ ਏਕਸ੍ਸਾਪਿ ਭਾਵਸ੍ਸ ਨਿਬ੍ਬੇਦਾਦਿਨੋ ਅਚਿਰਟ੍ਠਾਯਿਤਾ ਚ ਆਵਿਭਾਵੋ ਪਾਕਟਤਾ ਚ ਨਾਨਾਰਸਨਿਸ੍ਸਯਤ੍ਤਾ ਤੇ ਆਦਯੋ ਯਸ੍ਸ. ਆਦਿਸਦ੍ਦੇਨ ਠਾਯੀਧਮ੍ਮਸ੍ਸ ਸੁਖਦੁਕ੍ਖਾਦਿਰੂਪਸ੍ਸ ਗਹਣਂ, ਸੋਵ ਵਿਸੇਸੋ, ਤੇਨ. ਠਾਯੀਧਮ੍ਮਸ੍ਸ ਸੁਖਦੁਕ੍ਖਰੂਪਸ੍ਸ ਗਹਣਂ, ਅਤ੍ਤਨੋ ਧਮ੍ਮਸ੍ਸ ਸੁਖਦੁਕ੍ਖਰੂਪਸ੍ਸ ਠਾਯਿਨਿ ਸਮਾਰੋਪਨਞ੍ਚਾਭਿਮੁਖ੍ਯਂ. ਤਥਾ ਹਿ ਰਤਿਯਂ ਪਰਿਸਮੋ ਸੁਖਾਨੁਵਿਦ੍ਧੋ ਭਵਤਿ, ਸੋਕੇ ਦੁਕ੍ਖਾਨੁਵਿਦ੍ਧੋ. ਰਤਿਯਂ ਸੁਖਸਭਾਵਾਪਿ ਗਿਲਾਨਿਪ੍ਪਭੁਤਯੋ ਬ੍ਯਭਿਚਾਰਿਨੋ ਸਕਮ੍ਮਂ ਦੁਕ੍ਖਮਿਮਂ ਸਮਾਰੋਪਯਨ੍ਤੇਵ. ਤਤੋ ਤੇਨ ਅਭਿਮੁਖਭਾਵੇਨ ਯੇ ਏਤੇ ਭਾਵਾ ਸੀਲੇਨ ਚਰਨ੍ਤਿ ਪਵਤ੍ਤਨ੍ਤਿ, ਤੇ ਬ੍ਯਭਿਚਾਰਿਨੋ ਹੋਨ੍ਤੀਤਿ.
੩੪੩. ਇਦਾਨਿ ਉਦ੍ਦੇਸਕ੍ਕਮੇਨ ਬ੍ਯਭਿਚਾਰੀਭਾਵੇ ਲਕ੍ਖਣਤੋ ਦਸ੍ਸੇਤਿ ‘‘ਤਿਰੋਭਾਵਾ’’ਇਚ੍ਚਾਦਿਨਾ. ਤਿਰੋਭਾਵਾਵਿਭਾਵਾਦਿਵਿਸੇਸੇਨ ਬ੍ਯਭਿਚਾਰੀਭਾਵਾਨਂ ਅਤ੍ਤਨੋ ਅਨੇਕਰਸਂ ਨਿਸ੍ਸਾਯ ਪਵਤ੍ਤਤ੍ਤਾ, ਲੋਕਸ੍ਸ ਭਿਨ੍ਨਰੁਚਿਕਤ੍ਤਾ ਚ ਕਿਸ੍ਮਿਞ੍ਚਿ ਠਾਯੀਭਾਵੇ ਬ੍ਯਭਿਚਾਰੀਭਾਵਾਨਮਤ੍ਤਨੋ ਗੁਣਸ੍ਸ ਲੀਨਤ੍ਤਞ੍ਚ ਕਿਸ੍ਮਿਞ੍ਚਿ ਤਸ੍ਸੇਵ ਗੁਣਸ੍ਸ ਪਾਕਟਤ੍ਤਞ੍ਚਾਤਿਆਦਿਕੇਨ ਵਿਸੇਸੇਨ ਅਭਿਮੁਖ੍ਯਤੋ ਠਾਯੀਭਾਵਾਨਂ ਸੁਖਦੁਕ੍ਖਰੂਪਂ ਅਤ੍ਤਨਿ ਚ ਅਤ੍ਤਨੋ ਸੁਖਦੁਕ੍ਖਰੂਪਂ ਠਾਯੀਭਾਵੇਸੁ ਚ ਆਰੋਪਨਸਙ੍ਖਾਤੇਨ ਅਭਿਮੁਖਭਾਵੇਨ ਯੇਤੇ ਭਾਵਾ ਸੀਲੇਨ ਚਰਨ੍ਤਿ ਪਕਤਿਯਾ ਪਵਤ੍ਤਨ੍ਤਿ, ਤੇ ਭਾਵਾ ਬ੍ਯਭਿਚਾਰਿਨੋ ਨਾਮ ਹੋਨ੍ਤੀਤਿ. ਏਵਮੇਵ [ਏਵਰੂਪਾ (ਕ.)] ਪੀਲ਼ਾ ਸਰੂਪੇਨ ਏਕੋ ਪਰਿਸਮਸਙ੍ਖਤਬ੍ਯਭਿਚਾਰੀਭਾਵੋ ਰਤਿਯਂ ਸਗੁਣੇਨ ਲੀਨੋ ਸੁਖਾਨੁਵਿਦ੍ਧੋ ਹੁਤ੍ਵਾ, ਸੋਕੇ ਸਗੁਣੇਨ ਪਾਕਟੋ ਦੁਕ੍ਖਾਨੁਵਿਦ੍ਧੋ ਚ ਹੁਤ੍ਵਾ ਪਵਤ੍ਤਤੇ. ਏਵਮੇਵ ਸੁਖਸਭਾਵਰਤਿਯਂ ਗਿਲਾਨਾਦਯੋ ਬ੍ਯਭਿਚਾਰਿਨੋ ਸਕਿਯਂ ਦੁਕ੍ਖਸਰੂਪਂ ਆਰੋਪੇਨ੍ਤੀਤਿ ਕਤ੍ਵਾ ਤਿਰੋਭਾਵਵਿਭਾਵਾਦਿਵਿਸੇਸੇਨ ਅਭਿਮੁਖਂ ਪਵਤ੍ਤਨ੍ਤਿ. ਤਿਰੋਭਵਨਮਿਤਿ ਚ, ਆਵਿਭਵਨਮਿਤਿ ਚ, ਤਿਰੋਭਾਵੋ ਚ ਆਵਿਭਾਵੋ ਚੇਤਿ ਚ, ਤੇ ਆਦਯੋ ਯਸ੍ਸ ਠਾਯੀਭਾਵੇਸੁ ਵਿਜ੍ਜਮਾਨਾਨਂ ਸੁਖਦੁਕ੍ਖਸਭਾਵਾਨਂ ਅਤ੍ਤਨਿ ਆਰੋਪਨਸ੍ਸੇਤਿ ਚ, ਸੋਯੇਵ ਵਿਸੇਸੋਤਿ ਚ, ਅਭਿਮੁਖਾਨਂ ਭਾਵੋਤਿ ਚ ਵਿਗ੍ਗਹੋ. ਬ੍ਯਭਿਚਾਰੀਪਦੇ ਵਿਸਦ੍ਦੋ ਵਿਸੇਸਤ੍ਥੇ ਅਭਿਸਦ੍ਦੋ ਅਭਿਮੁਖਭਾਵੇ ਵਤ੍ਤਤਿ.
ਬ੍ਯਭਿਚਾਰੀਭਾਵਪ੍ਪਭੇਦ
੩੪੪. ਨਿਬ੍ਬੇਦੋ ਤਕ੍ਕਸਙ੍ਕਾ ਸਮ-
ਧਿਤਿਜਲ਼ਤਾ ਦੀਨਤੁਗ੍ਗਾਲਸਤ੍ਤਂ,
ਸੁਤ੍ਤਂ ਤਾਸੋ ਗਿਲਾਨੁ’ਸ੍ਸੁਕਹਰਿਸ-
ਸਤਿਸ੍ਸਾਵਿਸਾਦਾਬਹਿਤ੍ਥਾ.
ਚਿਨ੍ਤਾ ਗਬ੍ਬਾ’ਪਮਾਰੋ’ਮਰਿਸਮਦ-
ਮਤੁਮ੍ਮਾਦਮੋਹਾ ਵਿਬੋਧੋ,
ਨਿਦ੍ਦਾਵੇਗਾ ਸਬਿਲ਼ਂ ਮਰਣ-
ਸਚਪਲਾਬ੍ਯਾਧਿ ਤੇਤ੍ਤਿਂਸਮੇ’ਤੇ.
੩੪੪. ਤੇ ਦਸ੍ਸੇਤਿ ‘‘ਨਿਬ੍ਬੇਦੋ’’ਇਚ੍ਚਾਦਿਨਾ. ਦੀਨਤੁਗ੍ਗਾਲਸਤ੍ਤਨ੍ਤਿ ਦੀਨਤਾ ਚ ਉਗ੍ਗਤਞ੍ਚ ਆਲਸਤ੍ਤਞ੍ਚ, ਗਿਲਾਨਿ ਉਸ੍ਸੁਕਇਤਿ ਉਸ੍ਸੁਕ੍ਕਂ. ਚਪਲਇਤਿ ਚਾਪਲ੍ਲਂ, ਸਹ ਚਪਲੇਨ ਸਚਪਲੋ, ਸੋ ਚਾਯਂ ਬ੍ਯਾਧਿ ਚ, ਮਰਣਞ੍ਚ ਸਚਪਲਬ੍ਯਾਧਿ ਚ ਸਮਾਹਾਰੇ. ਤਞ੍ਚ ਸਹ ਬਿਲ਼ਾਯ ਵਤ੍ਤਤੀਤਿ ਸਬਿਲ਼ਨ੍ਤਿ ਏਤੇ ਯਥਾਵੁਤ੍ਤਬ੍ਯਭਿਚਾਰੀਭਾਵਾ ਤੇਤ੍ਤਿਂਸ ਹੋਨ੍ਤੀਤਿ. ਉਸ੍ਸਾਹਵਤਾ ਵੀਰਰਸੋ ਤਂਵਸੇਨੇਵ ਅਸ੍ਸਾਦੀਯਤਿ. ਭੀਰੁਨਾ ਤੁ ਸੋਵ ਭਯਾਨਕਰਸਵਸੇਨੇਤਿ ਲੋਕਸਭਾਵਸ੍ਸ ਅਨੇਕਤ੍ਤਾ ਤਦਤ੍ਥਮੇਤੇ ਬ੍ਯਭਿਚਾਰਿਨੋ ਏਕੇਕਸ੍ਸਰਸਸ੍ਸ ਬਹਵੋ ਵਣ੍ਣਨੀਯਾ, ਯਤੋ ਤਂਵਣ੍ਣਨਾਦ੍ਵਾਰੇਨ ਸਬ੍ਬੋਪਿ ਤੇਸੁ ਕਿਞ੍ਚਿ ਅਸ੍ਸਾਦੇਤੀਤਿ. ਤਤ੍ਥ ਯਸ੍ਮਾ ਪਨ ਮਾਰਣੋਪਗਤਵੇਰਿਦਸ੍ਸਨਮੇਕਮੇਵ ਤਙ੍ਖਣੇਯੇਵ ਭਿਨ੍ਨਂ ਪਕਤਿਵਸੇਨ ਭੀਰੁਨੋ ਭਯਸ੍ਸ ਹੇਤੁ, ਸਙ੍ਗਾਮਲੋਲਸ੍ਸ ਤੁ ਉਸ੍ਸਾਹਨਿਮਿਤ੍ਤਂ ਸਿਯਾ. ਤਥਾ ਨਟੇਨ ਕਤਂ ਵਿਕਤਮਾਭਰਣਂ ਕ੍ਰਿਯਾਵਾ ਨੀਚਪਕਤੀਨਂ ਠਾਯਿਨੋ ਹਾਸਸ੍ਸ ਹੇਤੁ, ਗਮ੍ਭੀਰਪਕਤੀਨਂ ਬ੍ਯਭਿਚਾਰਿਨੋ ਹਾਸਸ੍ਸ, ਤਸ੍ਮਾ ਭਾਵੇ ਵਣ੍ਣਯਤਾ ਕਵਿਨਾ ਭਾਵਾ ਤਥਾ ਵਣ੍ਣਨੀਯਾ, ਯਥੋਚਿਤ੍ਯਪਰਿਪੋਸੋ ਸਿਯਾ. ਓਚਿਤ੍ਯਭਙ੍ਗੋ ਤੁ ਮਹਤਾ ਵਾਯਾਮੇਨ ਪਰਿਹਰਿਤਬ੍ਬੋ.
ਤੇਸੁ ਨਿਬ੍ਬੇਦੋ ਅਤ੍ਤਾਵਮਾਨਨਂ. ਤਸ੍ਸ ਚ ਇਤ੍ਥੀਨਞ੍ਚ ਨੀਚਾਨਞ੍ਚ ਦਾਲਿਦ੍ਦਿਯਂ ਵਿਭਾਵੋ, ਯੋਗੀਨਂ ਤੁ ਤਤ੍ਵਸਂਵੇਦਨਂ ਵਿਭਾਵੋ, ਅਸ੍ਸੁਪਤਨਚਿਨ੍ਤਾਦਯੋ ਏਤ੍ਥ ਅਨੁਭਾਵਾ.
ਤਕ੍ਕੋ ਵਿਤਕ੍ਕਨਂ. ਤਸ੍ਸ ਸਨ੍ਦੇਹੋ ਵਿਭਾਵੋ, ਸਿਰੋਕਮ੍ਪਾਦਿ ਅਨੁਭਾਵੋ.
ਸਙ੍ਕਾਯ ਵਿਰੁਦ੍ਧਚਰਣਂ ਵਿਭਾਵੋ, ਕਮ੍ਪਾਦਯੋ ਅਨੁਭਾਵੋ.
ਸਮੋ ਖੇਦੋ. ਤਤ੍ਥ ਗਤ੍ਯਾਦਿ ਵਿਭਾਵੋ, ਸੇਦਾਦਿ ਅਨੁਭਾਵੋ.
ਧਿਤਿ ਸਨ੍ਤੋਸੋ. ਞਾਣਾਦਿ ਵਿਭਾਵੋ, ਅਨੁਭਾਵੋ ਭੋਗਾਲੋਲਤਾਦਿ.
ਜਲ਼ਤਾ ਅਪ੍ਪਟਿਪਤ੍ਤਿ. ਤਸ੍ਸਾ ਇਟ੍ਠਾਨਿਟ੍ਠਦਸ੍ਸਨਾਦਿ ਵਿਭਾਵੋ, ਅਨਿਮਿਸਨਯਨਾਲੋਚਨਾਦਿ ਅਨੁਭਾਵੋ.
ਦੀਨਤਾ ਚੇਤਸੋ ਅਨੋਜਤਾ. ਤਸ੍ਸਾ ਵਿਭਾਵੋ ਦੁਗ੍ਗਤਤਾਦਿ, ਅਨੁਭਾਵੋ ਮਲਿਨਵਤ੍ਥਤਾਦਿ.
ਉਗ੍ਗਤਾ ਦਾਰੁਣਤ੍ਤਂ. ਤਸ੍ਸਾ ਵਿਭਾਵੋ ਬਲਵਾਪਰਾਧਾਦਿ, ਤਸ੍ਸ ਅਨੁਭਾਵੋ ਤਜ੍ਜਨਾਦਿ.
ਆਲਸਤ੍ਤਸ੍ਸ ਪਰਿਸਮਾਦਿ ਵਿਭਾਵੋ, ਜਿਮ੍ਹਤਾਦਿ ਅਨੁਭਾਵੋ.
ਸੁਤ੍ਤਸ੍ਸ ਨਿਦ੍ਦਾ ਵਿਭਾਵੋ, ਤਸ੍ਸਾਦਾਦਯੋ ਅਨੁਭਾਵੋ.
ਤਾਸੋ ਚਿਤ੍ਤਕ੍ਖੋਭੋ. ਵਿਭਾਵੋ ਅਸ੍ਸ ਗਜ੍ਜਿਤਾਦਿ, ਕਮ੍ਪਨਾਦਿ ਅਨੁਭਾਵੋ.
ਆਯਾਸਪਿਪਾਸਾਦਿ ਵਿਭਾਵੋ ਗਿਲਾਨਿਯਾ, ਵਿਵਣ੍ਣਤਾਦਯੋ ਅਨੁਭਾਵੋ.
ਕਾਲਕ੍ਖਮਤਾ ਉਸ੍ਸੁਕਂ. ਵਿਭਾਵੋ ਤਸ੍ਸ ਰਮਣੀਯਦਸ੍ਸਨਿਚ੍ਛਾਦਿ, ਅਨੁਭਾਵੋ ਤੁਰਿਤਤਾਦਿ.
ਚੇਤੋਪਸਾਦੋ ਹਰਿਤੋ. ਤਤ੍ਰ ਉਸ੍ਸਵਾਦਿ ਵਿਭਾਵੋ, ਅਸ੍ਸੁਸੇਦਾਦਯੋ ਅਨੁਭਾਵੋ.
ਸਦਿਸਦਸ੍ਸਨਾਦਿ ਵਿਭਾਵੋ ਸਤਿਯਾ, ਅਨੁਭਾਵੋ ਭਮੁਸਮੁਨ੍ਨਮਨਾਦਿ.
ਪਰੇਸਮੁਕ੍ਕਂਸਾਸਹਨਤਾ ਇਸ੍ਸਾ. ਤਸ੍ਸਾ ਦੁਜ੍ਜਨਤ੍ਤਗਬ੍ਬਾਦਯੋ ਵਿਭਾਵੋ, ਦੋਸਕਥਨਾਵਜਾਨਨਾਦਯੋ ਅਨੁਭਾਵੋ.
ਵਿਸਾਦੋ ਖੇਦੋ. ਵਿਭਾਵੋ ਤਸ੍ਸ ਆਰਦ੍ਧਕਾਰਿਯਾਸਿਦ੍ਧਾਦਿ, ਬਾਧਯਤਾਪਾਦਿ ਅਨੁਭਾਵੋ.
ਅਬਹਿਤ੍ਥਾ ਕਾਯਸਂਵਰਣਂ. ਤਸ੍ਸਾ ਵਿਭਾਵੋ ਲਜ੍ਜਾਦਿ, ਅਨੁਭਾਵੋ’ਞ੍ਞਵਿਕ੍ਰਿਯਾ.
ਚਿਨ੍ਤਾ ਇਟ੍ਠਾਲਾਭਾਦੀਹਿ, ਅਨੁਭਾਵੋ ਮੁਕੁਲਿਤਨਯਨਾਦਿ.
ਗਬ੍ਬੋ ਅਭਿਮਾਨੋ. ਵਿਭਾਵੋਸ੍ਸ ਇਸ੍ਸਰਿਯਾਦਿ, ਅਨੁਭਾਵੋ ਅਵਜਾਨਨਾਦਿ.
ਅਪਮਾਰੋ ਗਾਹਰੁਕ੍ਖਾਦੀਹਿ [ਗਾਹਰੁਕ੍ਖਪਤਨਾਦੀਹਿ (?)], ਭੂਪਾਤਾਦਯੋ ਏਤ੍ਥ ਅਨੁਭਾਵੋ.
ਅਮਰਿਸੋ ਅਕ੍ਖਮਤਾ. ਵਿਭਾਵੋ ਅਸ੍ਸਾਵਮਾਨਨਾਦਿ, ਸਿਰੋਕਮ੍ਪਨਤਜ੍ਜਨਾਦਯੋ ਅਨੁਭਾਵੋ.
ਮਦੋ ਪਮਾਦੁਕ੍ਕਂਸੋ. ਤਸ੍ਸ ਵਿਭਾਵੋ ਪਾਨਂ, ਚਲਮਾਨਙ੍ਗਵਚੋਗਤਿਹਾਸਾਦਯੋ ਅਨੁਭਾਵੋ.
ਮਤਿ ਕਙ੍ਖਚ੍ਛੇਦੋ. ਉਪਦੇਸਾਦਿ ਵਿਭਾਵੋ, ਮੁਖਵਿਕਾਸਾਦਿ ਏਤ੍ਥ ਅਨੁਭਾਵੋ.
ਅਸਮੇਕ੍ਖਿਤਕਾਰਿਤਾ ਉਮ੍ਮਾਦੋ. ਤਸ੍ਸ ਵਿਭਾਵੋ ਸਨ੍ਨਿਪਾਤਗਹਣਾਦਿ, ਅਟ੍ਠਾਨਰੁਦਿਤਗੀਤਹਾਸਾਦਯੋ ਅਨੁਭਾਵੋ.
ਮੋਹੋ ਭਯਾਦੀਹਿ, ਅਨੁਭਾਵੋ ਥਮ੍ਭਕਮ੍ਪਾਦਿ.
ਦੁਰਾਚਾਰਾਦੀਹਿ ਬਿਲ਼ਂ, ਅਧੋਮੁਖਤਾਦਿ ਅਨੁਭਾਵੋ.
ਮਰਣਂ ਵਿਭਾਵਅਨੁਭਾਵੇਹਿ ਸੁਪਸਿਦ੍ਧਂ.
ਚਪਲਤਾ ਰਾਗਦੋਸਾਦੀਹਿ, ਸਚ੍ਛਨ੍ਦਚਰਣਾਦਿ ਅਨੁਭਾਵੋ. ਬ੍ਯਾਧਿ ਪਾਕਟੋ.
ਯੇ ਵਾ ਪਨਞ੍ਞੇ ਇਧ ਨਿਦ੍ਦਿਟ੍ਠਾ ਚਿਤ੍ਤਵੁਤ੍ਤਿਵਿਸੇਸਾਪਿ ਸਂਵਿਜ੍ਜਨ੍ਤਿ ਸੁਖੁਮਭੇਦਾ, ਤੇਸੁ ਕੇਚਿ ਵੁਤ੍ਤੇਸ੍ਵਨ੍ਤੋਗਧਾ ਹੋਨ੍ਤਿ. ਯਥਾ ਹਿ ਇਚ੍ਛਾਸਭਾਵਾ ਸਬ੍ਬੇ ਕਾਮਾ ਰਤਿਯਂ ਅਨ੍ਤੋਗਧਾ, ਤਥਾ ਦੋਸਪ੍ਪਕਾਰਾ ਕੋਧਾ ਮਰਿਸਇਸ੍ਸਾਦੀਸ੍ਵਨ੍ਤੋਗਧਾ, ਦੁਕ੍ਖਸਭਾਵਾ ਸੋਕਸਮਬ੍ਯਾਧਿਗਿਲਾਨਿ ਵਿਸਾਦਾਦੀਸ੍ਵਨ੍ਤੋਗਧਾ. ਪੀਤ੍ਯਾਦਯੋ ਸੁਖਸਭਾਵਾ ਹਰਿਸੇਤਿ ਦਟ੍ਠਬ੍ਬਂ. ਤੇਸੁ ਭਯਾ ਤਾਸੋ ਅਞ੍ਞੋ, ਸਙ੍ਕਾ ਤਥਾ ਅਮਰਿਸੋ. ਤਸ੍ਮਾ ਇਸ੍ਸਾ, ਤਥਾ ਗਿਲਾਨਿਤੋ ਸਮੋ, ਨਿਦ੍ਦਾਯ ਸੁਤ੍ਤਂ, ਉਸ੍ਸੁਕਾ ਚਪਲਤਾ, ਤਥਾ ਮੋਹਾ ਪਲਯੋ ਵਕ੍ਖਮਾਨੋ ਅਞ੍ਞੋਤਿ ਮਨ੍ਤਬ੍ਬਂ.
੩੪੪. ਇਦਾਨਿ ਤੇ ਬ੍ਯਭਿਚਾਰੀਭਾਵੇ ਸਰੂਪੇਨ ਦਸ੍ਸੇਤਿ ‘‘ਨਿਬ੍ਬੇਦੋ’’ਇਚ੍ਚਾਦਿਨਾ. ਨਿਬ੍ਬੇਦੋ ਅਤ੍ਤਨਿਨ੍ਦਾਸਙ੍ਖਤੋ ਚ, ਤਕ੍ਕਸਙ੍ਕਾ ਚ, ਸਮਧਿਤਿਜਲ਼ਤਾ ਪਰਿਸਮੋ ਸਨ੍ਤੋਸਲਕ੍ਖਣਾ ਧਿਤਿ ਜਲ਼ਤਾ ਚ, ਦੀਨਤੁਗ੍ਗਾਲਸਤ੍ਤਂ ਦੀਨਭਾਵਦਾਰੁਣਭਾਵਅਲਸਭਾਵਾ ਚ, ਸੁਤ੍ਤਂ ਸਯਨਞ੍ਚ, ਤਾਸੋ ਚਿਤ੍ਤਕ੍ਖੋਭੋ ਚ, ਗਿਲਾਨਪਰਿਮਦ੍ਦਿਤਭਾਵੋ ਚ, ਉਸ੍ਸੁਕਹਰਿਸਸਤਿਸ੍ਸਾਵਿਸਾਦਾਬਹਿਤ੍ਥਾ ਉਸ੍ਸਾਹਪਿਤਿਸਤਿਇਸ੍ਸਾਖੇਦਆਕਾਰਸਂਵਰਾ ਚ, ਚਿਨ੍ਤਾ ਚ, ਗਬ੍ਬੋ ਅਭਿਮਾਨੋ ਚ, ਅਪਮਾਰੋ ਚ, ਅਮਰਿਸਮਦਮਤੁਮ੍ਮਾਦਮੋਹਾ ਅਕ੍ਖਨ੍ਤਿਪਮਾਦਾਧਿਕ੍ਕਾ ਕਙ੍ਖਚ੍ਛੇਦਉਮ੍ਮਾਦਮੋਹਾ ਚ, ਵਿਬੋਧੋ ਪਬੋਧੋ ਚ, ਨਿਦ੍ਦਾਵੇਗਾ ਨਿਦ੍ਦਾ ਚ, ਆਵੇਗਸਙ੍ਖਾਤੋ ਸਮ੍ਭਮੋ ਚ, ਸਬਿਲ਼ਂ ਲਜ੍ਜਾਸਹਿਤਂ ਮਰਣਸਚਪਲਾਬ੍ਯਾਧਿ ਮਰਣਞ੍ਚ ਚਾਪਲ੍ਯਸਹਿਤਾ ਬ੍ਯਾਧਿ ਚੇਤਿ. ਏਤੇ ਤੇਤ੍ਤਿਂਸ ਬ੍ਯਭਿਚਾਰੀਭਾਵਾ ਨਾਮ ਹੋਨ੍ਤਿ. ਤਕ੍ਕੋ ਚ ਸਙ੍ਕਾ ਚੇਤਿ ਚ, ਸਮੋ ਚ ਧਿਤਿ ਚ ਜਲ਼ਤਾ ਚੇਤਿ ਚ, ਦੀਨਤਾ ਚ ਉਗ੍ਗੋ ਚ ਅਲਸਤ੍ਤਞ੍ਚਾਤਿ ਚ, ਉਸ੍ਸੁਕਞ੍ਚਹਰਿਸੋ ਚ ਸਤਿ ਚ ਇਸ੍ਸਾ ਚ ਵਿਸਾਦੋ ਚ ਅਬਹਿਤ੍ਥਾ ਚੇਤਿ ਚ, ਅਮਰਿਸੋ ਚ ਮਦੋ ਚ ਮਤਿ ਚ ਉਮ੍ਮਾਦੋ ਚ ਮੋਹੋ ਚੇਤਿ ਚ, ਨਿਦ੍ਦਾ ਚ ਆਵੇਗੋ ਚੇਤਿ ਚ, ਸਹ ਬਿਲ਼ਾਯ ਵਤ੍ਤਤੀਤਿ ਚ, ਸਹ ਚਪਲੇਨ ਚਾਪਲ੍ਯੇਨ ਵਤ੍ਤਤੀਤਿ ਚ, ਸਚਪਲੋ ਚ ਸੋ ਬ੍ਯਾਧਿਚੇਤਿ ਚ, ਮਰਣਞ੍ਚ ਸਚਪਲਬ੍ਯਾਧਿ ਚੇਤਿ ਚ ਵਾਕ੍ਯਂ. ਮਰਣਸਚਪਲਾਬ੍ਯਾਧੀਤਿ ਸਮਾਹਾਰਦ੍ਵਨ੍ਦੋ. ਤਸ੍ਮਾ ‘‘ਸਬਿਲ਼’’ਨ੍ਤਿ ਪਦਂ ਏਤਸ੍ਸ ਵਿਸੇਸਨਂ ਹੋਤਿ.
ਲੋਕਸਭਾਵਸ੍ਸ ਅਨੇਕਵਿਧਤ੍ਤਾ ਏਕੋਯੇਵ ਵੀਰਰਸੋ ਉਸ੍ਸਾਹਵਤਾ ਵੀਰਰਸਾਕਾਰੇਨ ਅਸ੍ਸਾਦਨੀਯੋ ਹੋਤਿ, ਸੋਯੇਵ ਭੀਰੁਨਾ ਭਯਾਕਾਰੇਨ ਅਸ੍ਸਾਦਨੀਯੋ ਹੋਤਿ. ਤਸ੍ਮਾ ਏਕੇਕਸ੍ਸ ਰਸਸ੍ਸ ਇਮੇ ਬਹੂ ਬ੍ਯਭਿਚਾਰਿਨੋ ਵਣ੍ਣੇਤਬ੍ਬਾ ਹੋਨ੍ਤਿ. ਏਵਂ ਸਤਿ ਅਨੇਕਾਧਿਪ੍ਪਾਯਕੋ ਲੋਕੋ ਤੇਸੁ ਕਿਞ੍ਚਿ ਅਸ੍ਸਾਦੇਤਿ. ਏਵਂ ਸਤਿ ਬਨ੍ਧੋ ਸਬ੍ਬਜਨਸ੍ਸ ਕਨ੍ਤੋ ਹੋਤਿ. ਤਸ੍ਸਂ ਭਾਵਵਣ੍ਣਨਾਯਂ ਯਸ੍ਮਾ ਮਾਰੇਤੁਮਾਗਚ੍ਛਨ੍ਤਾਨਂ ਸਤ੍ਤੂਨਂ ਦਸ੍ਸਨਮੇਕਮੇਵ ਤਙ੍ਖਣੇ ਜਨਾਧਿਪ੍ਪਾਯਤੋ ਭਿਜ੍ਜਿਤ੍ਵਾ ਪਕਤਿਭੀਰੂਨਂ ਪੁਰਿਸਾਨਂ ਭਯਸ੍ਸ ਚ ਯੁਦ੍ਧਲੋਲਸ੍ਸ ਉਸ੍ਸਾਹਨਸ੍ਸ ਚ ਕਾਰਣਂ ਹੋਤਿ. ਏਵਂ ਨਟੇਨ ਹਸਨਤ੍ਥਂ ਕਤਵਿਕਤਮਾਭਰਣਞ੍ਚ ਤਾਦਿਸਕਿਰਿਯਾ ਚ ਉਤ੍ਤਾਨਪਕਤਿਕਾਨਂ ਪੁਰਿਸਾਨਂ ਠਾਯੀਹਾਸਸ੍ਸ ਚ ਗਮ੍ਭੀਰਪਕਤਿਕਾਨਂ ਬ੍ਯਭਿਚਾਰੀਹਾਸਸ੍ਸ ਚ ਹੇਤੁ ਭਵੇਯ੍ਯ. ਤਸ੍ਮਾ ਭਾਵੇ ਵਣ੍ਣੇਨ੍ਤੇਨ ਕਵਿਨਾ ਓਚਿਤ੍ਯਭਙ੍ਗਮਕਤ੍ਵਾ ਸਕ੍ਕਚ੍ਚਮੋਚਿਤ੍ਯਂ ਸਜ੍ਜੇਤ੍ਵਾ ਭਾਵਪ੍ਪਕਾਸਕਾਨਿ ਸਵਿਭਾਵਾਨੁਭਾਵਕਵਿਵਚਨਾਨਿ ਵਣ੍ਣੇਤਬ੍ਬਾਨਿ. ਏਤ੍ਥ ਭਾਵਾਵਬੋਧਕਵਿਭਾਵਾਦੀਨਂ ਜਾਨਿਤਬ੍ਬਤ੍ਤਾ ਤੇਹਿ ਤੇਹਿ ਭਾਵੇਹਿ ਸਦ੍ਧਿਂ ਏਵਂ ਵੇਦਿਤਬ੍ਬਾ.
ਤੇਸੁ ਭਾਵੇਸੁ ਅਤ੍ਤਾਵਮਾਨਨਲਕ੍ਖਣੋ ਨਿਬ੍ਬੇਦੋ. ਇਤ੍ਥੀਨਂ, ਹੀਨਾਨਂ [ਹੀਨਾਚਾਰਾਨਂ (ਕ.)] ਵਾ ਉਪ੍ਪਜ੍ਜਤਿ ਚੇ, ਦਾਲਿਦ੍ਦਿਯਂ ਆਲਮ੍ਬਣਵਿਭਾਵੋ ਨਾਮ, ਯੋਗੀਨਂ ਚੇ, ਤਥਾਵਬੋਧੋ ਆਲਮ੍ਬਣਵਿਭਾਵੋ, ਏਤ੍ਥ ਅਸ੍ਸੁਪਤਨਚਿਨ੍ਤਾਦਿਕਂ ਅਨੁਭਾਵੋ ਨਾਮ.
ਵਿਤਕ੍ਕਸ੍ਸ ਸਨ੍ਦੇਹੋ ਉਦ੍ਦੀਪਨਵਿਭਾਵੋ ਨਾਮ, ਸਿਰੋਕਮ੍ਪਾਦਿਕਂ ਅਨੁਭਾਵੋ ਨਾਮ.
ਸਙ੍ਕਾਯ ਵਿਰੁਦ੍ਧਪ੍ਪਵਤ੍ਤਿ ਉਦ੍ਦੀਪਨਵਿਭਾਵੋ, ਕਮ੍ਪਾਦਿਕੋ ਅਨੁਭਾਵੋ. ਉਪਰਿ ‘‘ਵਿਭਾਵੋ’’ਤਿ ਵੁਤ੍ਤੇ ਆਲਮ੍ਬਣੁਦ੍ਦੀਪਨੇਸੁ ਦ੍ਵੀਸੁ ਯਂ ਯੁਜ੍ਜਤਿ, ਤਂ ਗਹੇਤਬ੍ਬਂ.
ਖੇਦਲਕ੍ਖਣਸ੍ਸ ਸਮਸ੍ਸ ਗਮਨਾਦਿਕਂ ਵਿਭਾਵੋ, ਸੇਦਾਦਿ ਅਨੁਭਾਵੋ.
ਸਨ੍ਤੋਸਲਕ੍ਖਣਾਯ ਧਿਤਿਯਾ ਞਾਣਾਦਿ ਵਿਭਾਵੋ, ਭੋਗੇਸੁ ਅਲੋਲਭਾਵਾਦਿ ਅਨੁਭਾਵੋ.
ਅਯੋਗ੍ਗਤਾਲਕ੍ਖਣਾਯ ਜਲ਼ਤਾਯ ਇਟ੍ਠਾਨਿਟ੍ਠਾਨਂ ਅਜਾਨਨਾਦਿ ਵਿਭਾਵੋ, ਵਿਵਟਨਯਨੇਹਿ ਅਭਿਮੁਖਵਿਲੋਕਨਤਾਦਿ ਅਨੁਭਾਵੋ.
ਚਿਤ੍ਤਸ੍ਸਨਿਤ੍ਤੇਜਲਕ੍ਖਣਾਯ ਦੀਨਤਾਯ ਦੁਗ੍ਗਤਤਾਦਿ ਵਿਭਾਵੋ, ਮਲਿਨਵਤ੍ਥਤਾਦਿ ਅਨੁਭਾਵੋ.
ਦਾਰੁਣਤਾਲਕ੍ਖਣਸ੍ਸ ਉਗ੍ਗਭਾਵਸ੍ਸਾਤਿਸਯਾਪਰਾਧਾਦਿ ਵਿਭਾਵੋ, ਤਜ੍ਜਨਾਦਿ ਅਨੁਭਾਵੋ.
ਅਲਸਤ੍ਤਸ੍ਸ ਅਟ੍ਠਾਨਪਰਿਸਮਾਦਿ ਵਿਭਾਵੋ, ਵਙ੍ਕਿਕਭਾਵੋ ਅਨੁਭਾਵੋ.
ਸਯਨਸਙ੍ਖਾਤਸ੍ਸ ਸੁਤ੍ਤਸ੍ਸ ਨਿਦ੍ਦਾਦਿ ਵਿਭਾਵੋ, ਅਸ੍ਸਾਦਾਦਿ ਅਨੁਭਾਵੋ. ਏਤ੍ਥ ਅਸ੍ਸਾਦਨਂ ਨਾਮ ਸੇਯ੍ਯਸੁਖਪਸ੍ਸਸੁਖਾਦਿਕਂ.
ਚਿਤ੍ਤਕ੍ਖੋਭਸਙ੍ਖਾਤਸ੍ਸ ਤਾਸਸ੍ਸ ਗਜ੍ਜਿਤਾਦਿ ਵਿਭਾਵੋ, ਗਜ੍ਜਿਤਂ ਨਾਮ ਭਯਜਨਕਵਚਨਂ. ਕੋਪੇਨ ਕਮ੍ਪਨਾ ਅਨੁਭਾਵੋ.
ਪੀਲ਼ਾਸਙ੍ਖਾਤਸ੍ਸ ਗਿਲਾਨਸ੍ਸ ਆਯਾਸਪਿਪਾਸਾਦਿ ਵਿਭਾਵੋ, ਦੁਬ੍ਬਣ੍ਣਤਾਦਿ ਅਨੁਭਾਵੋ.
ਅਨੁਰੂਪਕਾਲਸ੍ਸ ਅਨੋਲੋਕਨਸ੍ਸ ਉਸ੍ਸੁਕ੍ਕਸ੍ਸ ਰਮ੍ਮਵਤ੍ਥੁਦਸ੍ਸਨਿਚ੍ਛਾਦਿ ਵਿਭਾਵੋ, ਤੁਰਿਤਤਾਦਿ ਅਨੁਭਾਵੋ.
ਚੇਤੋਪਸਾਦਲਕ੍ਖਣਸ੍ਸ ਹਰਿਸਸ੍ਸ ਮਙ੍ਗਲਕੀਲ਼ਾਦਿ ਵਿਭਾਵੋ, ਸਨ੍ਤੋਸਵਚਨਾਦਿ ਅਨੁਭਾਵੋ.
ਸਰਣਲਕ੍ਖਣਾਯ ਸਤਿਯਾ ਸਞ੍ਞਾਣਦਸ੍ਸਨਾਦਿ ਵਿਭਾਵੋ, ਭਮੁਕ੍ਖੇਪਾਦਿ ਅਨੁਭਾਵੋ.
ਪਰਸਮ੍ਪਤ੍ਤਿਅਸਹਨਲਕ੍ਖਣਾਯ ਇਸ੍ਸਾਯ ਦੁਜ੍ਜਨਭਾਵਗਬ੍ਬਾਦਿ ਵਿਭਾਵੋ, ਦੋਸਕਥਨਾਵਜਾਨਨਾਦਿ ਅਨੁਭਵੋ.
ਖੇਦਲਕ੍ਖਣਸ੍ਸ ਵਿਸਾਦਸ੍ਸ ਆਰਦ੍ਧਕਾਰਿਯਾਸਿਦ੍ਧਿਕਾਰਿਯਬ੍ਯਾਪਤ੍ਤਿਆਦਿ ਵਿਭਾਵੋ, ਮਨੋਸਨ੍ਤਾਪਾਦਿ ਅਨੁਭਾਵੋ.
ਆਕਾਰਸਂਵਰਣਲਕ੍ਖਣਾਯ, ਰਸਸਭਾਵਪਟਿਚ੍ਛਾਦਨਲਕ੍ਖਣਾਯ ਵਾ ਅਬਹਿਤ੍ਥਯਲਜ੍ਜਾਦਿ ਵਿਭਾਵੋ, ਤਦਞ੍ਞਕ੍ਰਿਯਾਕਰਣਂ, ਅਧੋਮੁਖਕਰਣਂ, ਪਾਦੇਹਿ ਭੂਮਿਖਣਨਨ੍ਤਿਆਦਿ ਅਨੁਭਾਵੋ.
ਚਿਨ੍ਤਾਯ ਇਟ੍ਠਤ੍ਥਾਲਾਭਾਦੀ ਵਿਭਾਵੋ, ਮਕੁਲਿਤਨਯਨਾਦਿ ਅਧੋਖਿਤ੍ਤਚਕ੍ਖਾਦਿ ਵਾ ਅਨੁਭਾਵੋ.
ਗਬ੍ਬਸ੍ਸ ਇਸ੍ਸਰਿਯਾਦਿ ਵਿਭਾਵੋ, ਅਵਜਾਨਨਾਦਿ ਅਨੁਭਾਵੋ.
ਅਪਮਾਰਸ੍ਸ ਯਕ੍ਖਪੀਲ਼ਾਦਿ ਵਿਭਾਵੋ, ਭੂਮਿਪਤਨਾਦਯੋ ਅਨੁਭਾਵੋ.
ਅਕ੍ਖਮਲਕ੍ਖਣਸ੍ਸ ਅਮਰਿਸਸ੍ਸ ਅਵਮਾਨਨਾਦਿ ਵਿਭਾਵੋ, ਸਿਰੋਕਮ੍ਪਨਤਜ੍ਜਨਾਦਿ ਅਨੁਭਾਵੋ.
ਪਮਾਦਾਧਿਕ੍ਕਲਕ੍ਖਣਸ੍ਸ ਮਦਸ੍ਸ ਸਨ੍ਤੋਸਪਾਨਂ ਵਿਭਾਵੋ, ਕਮ੍ਪਮਾਨਹਤ੍ਥਪਾਦਵਚਨਗਮਨਹਾਸਾਦੀ ਅਨੁਭਾਵੋ.
ਕਙ੍ਖਾਚ੍ਛੇਦਨਲਕ੍ਖਣਾਯ ਮਤਿਯਾ ਉਪਦੇਸਾਦਿ ਵਿਭਾਵੋ, ਮੁਖਸਨ੍ਤੋਸਾਦਿ ਅਨੁਭਾਵੋ.
ਅਨੁਪਪਰਿਕ੍ਖਕਾਰਿਤਾਲਕ੍ਖਣਸ੍ਸ ਉਮ੍ਮਾਦਸ੍ਸ ਸਨ੍ਨਿਪਾਤਜ੍ਜਰਯਕ੍ਖਾਦਿ ਵਿਭਾਵੋ, ਅਕਾਰਣਰੋਦਨਹਸਨਾਦਿ ਅਨੁਭਾਵੋ.
ਮੁਯ੍ਹਨਲਕ੍ਖਣਸ੍ਸ ਮੋਹਸ੍ਸ ਅਧਿਕਭਯਾਦਿ ਵਿਭਾਵੋ, ਸਭਾਵਾਨਵਬੋਧਨਾਦਿ ਅਨੁਭਾਵੋ.
ਨਿਦ੍ਦਾਪਗਮਸਙ੍ਖਾਤਸ੍ਸ ਵਿਬੋਧਸ੍ਸ ਕਾਲਪਰਿਣਾਮਾਦਿ ਆਲੋਕਸਰਣਾਦਿ ਵਾ ਵਿਭਾਵੋ, ਅਕ੍ਖਿਮਦ੍ਦਨਾਦਿ ਅਨੁਭਾਵੋ.
ਮਨੋਸਮ੍ਪੀਲ਼ਨਲਕ੍ਖਣਾਯ ਨਿਦ੍ਦਾਯ ਕਸ੍ਸਚਿ ਅਚਿਨ੍ਤਨਅਕਰਣਾਦਿ ਵਿਭਾਵੋ, ਅਕ੍ਖਿਪਿਦਹਨਾਦਿ ਅਨੁਭਾਵੋ.
ਭਯਾਗਮਨਲਕ੍ਖਣਸ੍ਸ ਆਵੇਗਸ੍ਸ ਪਚ੍ਚਤ੍ਥਿਕਦਸ੍ਸਨਾਦਿ ਵਿਭਾਵੋ, ਉਤ੍ਰਾਸਕਮ੍ਪਾਦਿ ਅਨੁਭਾਵੋ.
ਲਜ੍ਜਾਲਕ੍ਖਣਾਯ ਬਿਲ਼ਾਯ ਦੁਰਾਚਾਰਾਦਿ ਵਿਭਾਵੋ, ਅਧੋਮੁਖਤਾਦਿ ਅਨੁਭਾਵੋ.
ਮਰਣਸ੍ਸ ਸਤ੍ਥਪਹਾਰਰੋਗਾਦਿ ਵਿਭਾਵੋ, ਮੁਖਵਿਕਾਰਾਦਿ ਅਨੁਭਾਵੋ.
ਚਾਪਲ੍ਲਸ੍ਸ ਰਾਗਦੋਸਾਦਿ ਵਿਭਾਵੋ, ਅਤ੍ਤਨੋ ਸਚ੍ਛਨ੍ਦਚਰਣਾਦਿ ਅਨੁਭਾਵੋ.
ਬ੍ਯਾਧਿਯਾ ਵਾਤਪਿਤ੍ਤਾਦੀਨਂ ਉਸ੍ਸਦਭਾਵਾਦਿ ਵਿਭਾਵੋ, ਨਿਤ੍ਥੁਨਨਾਦਿ ਅਨੁਭਾਵੋ.
ਇਮਸ੍ਮਿਂ ਸੁਬੋਧਾਲਙ੍ਕਾਰੇ ਅਦਸ੍ਸਿਤਸੁਖੁਮਭੇਦਾ ਅਞ੍ਞਾਪਿ ਚਿਤ੍ਤਵੁਤ੍ਤਿਵਿਸੇਸਾ ਸਨ੍ਤਿ, ਤੇਸੁ ਇਚ੍ਛਾਸਭਾਵਾ ਸਬ੍ਬੇ ਭੇਦਾ ਕਾਮਰਤਿਯਞ੍ਚ, ਦੋਸਪਕਾਰਾ ਕੋਧਅਮਰਿਸਇਸ੍ਸਾਦੀਸੁ ਚ, ਦੁਕ੍ਖਸਭਾਵਾ ਸੋਕਸਮਬ੍ਯਾਧਿਗਿਲਾਨਵਿਸਾਦਾਦੀਸੁ ਚ, ਪਿਤਿਆਦਯੋ ਹਰਿਸੇ ਚ ਅਨ੍ਤੋਗਧਾਤਿ ਵੇਦਿਤਬ੍ਬਾ. ਏਵਂ ਸਮਾਨਾਨਂ ਸਙ੍ਗਹੇ ਸਤਿਪਿ ਤਾਸਤੋ ਭਯਸ੍ਸ ਚ, ਸਙ੍ਕਾਯ ਅਮਰਿਸ੍ਸ ਚ, ਅਮਰਿਸਤੋ ਇਸ੍ਸਾਯ ਚ, ਗਿਲਾਨਤੋ ਸਮਸ੍ਸ ਚ, ਨਿਦ੍ਦਾਯ ਸੁਤ੍ਤਸ੍ਸ ਚ, ਉਸ੍ਸੁਕ੍ਕਤੋ ਚਪਲਤਾਯ ਚ, ਮੋਹਤੋ ਵਕ੍ਖਮਾਨਪਲਯਸ੍ਸ ਚ ਪਾਕਟਵਿਸੇਸੇਨ ਅਞ੍ਞਥਾ ਵਿਸੁਂ ਵਿਸੁਂ ਦਸ੍ਸਿਤਨ੍ਤਿ ਦਟ੍ਠਬ੍ਬਂ.
ਸਾਤ੍ਤਿਕਭਾਵਅਧਿਪ੍ਪਾਯ
੩੪੫. ਸਮਾਹਿਤਤ੍ਤਪ੍ਪਭਵਂ, ਸਤ੍ਤਂ ਤੇਨੋ’ਪਪਾਦਿਤਾ;
ਸਾਤ੍ਤਿਕਾ’ਪ੍ਯ’ਨੁਭਾਵਤ੍ਤੇ, ਵਿਸੁਂ ਭਾਵਾਭਵਨ੍ਤਿ ਤੇ.
੩੪੫. ਸਾਤ੍ਤਿਕੇ ਵਦਤਿ ‘‘ਸਮਾਹਿਤੇ’’ਚ੍ਚਾਦਿਨਾ. ਸਮਾਹਿਤੋ ਏਕਗ੍ਗਤਾਭਾਵਾਪਾਦਨੇਨ ਕਤਸਮਾਧਾਨੋ ਅਤ੍ਤਾ ਚਿਤ੍ਤਂ ਤਤੋ ਪਭਵਂ ਉਪ੍ਪਨ੍ਨਂ ਯਂ, ਤਂ ਸਤ੍ਤਂ ਨਾਮ. ਤੇਨ ਸਤ੍ਤੇਨ ਉਪਪਾਦਿਤਾ ਨਿਬ੍ਬਤ੍ਤਿਤਾ ਥਮ੍ਭਾਦਯੋ ਸਾਤ੍ਤਿਕਾ ਵੁਚ੍ਚਨ੍ਤੇ. ਤੇ ਚ ਪੁਨ ਅਨੁਭਾਵਾਪਿ ਭਵਨ੍ਤਿ ਥਮ੍ਭਾਦਿਭਾਵਸਂਸੂਚਨਸਭਾਵਵਿਕਾਰਰੂਪਤ੍ਤਾ. ਤਞ੍ਚ ‘‘ਚਿਤ੍ਤਵੁਤ੍ਤਿਵਿਸੇਸਤ੍ਤਾ’’ਇਚ੍ਚਾਦਿਨਾ ਵਕ੍ਖਤਿ. ਤੇਨਾਹ ‘‘ਅਨੁਭਾਵਤ੍ਤੇਪੀ’’ਤਿ. ਏਵਂ ਸਤ੍ਯਪਿ ਤੇ ਸਾਤ੍ਤਿਕਾ ਵਿਸੁਂ ਪੁਥਗੇਵ ਭਾਵਾ ਭਵਨ੍ਤਿ, ਵੁਤ੍ਤਨਯੇਨ ਚਿਤ੍ਤਭਵਤ੍ਤਵਿਰੂਪਤ੍ਤਾ ਤੇਸਨ੍ਤਿ.
੩੪੫. ਇਦਾਨਿ ਉਦ੍ਦੇਸਕ੍ਕਮੇਨਾਧਿਗਤਕੇਵਲਭਾਵਸਙ੍ਖਾਤਂ ਸਾਤ੍ਤਿਕਾਭਾਵਂ ਦਸ੍ਸੇਤਿ ‘‘ਸਮਾਹਿਤ’’ਇਚ੍ਚਾਦਿਨਾ. ਸਮਾਹਿਤਤ੍ਤਪ੍ਪਭਵਂ ਏਕਗ੍ਗਤਾਭਾਵਾਪਾਦਨੇਨ ਕਤਸਮਾਧਾਨਚਿਤ੍ਤਤੋ ਸਮ੍ਭੂਤਂ ਸਤ੍ਤਂ ਨਾਮ ਹੋਤਿ. ਤੇਨ ਲਾਭਾਲਾਭਾਦੀਸੁ ਏਕਾਕਾਰਸ੍ਸ ਹੇਤੁਨਾ ਥਿਰਭਾਵੇਨ ਉਪਪਾਦਿਤਾ ਨਿਪ੍ਫਾਦਿਤਾ ਥਮ੍ਭਾਦਯੋ ਸਾਤ੍ਤਿਕਾ ਨਾਮ ਭਵਨ੍ਤਿ. ਤੇ ਸਾਤ੍ਤਿਕਾ ਅਨੁਭਾਵਤ੍ਤੇਪਿ ਚਿਤ੍ਤਾਕਾਰਸਙ੍ਖਾਤਥਮ੍ਭਾਦਿਪਕਾਸਨਸਭਾਵਵਿਕਾਰਸਰੂਪਤ੍ਤਾ ਅਤ੍ਤਨੋ ਅਨੁਭਾਵਤ੍ਤੇ ਸਤਿਪਿ ਵਿਸੁਂ ਭਾਵਾ ਭਵਨ੍ਤਿ ਯਥਾਵੁਤ੍ਤ ‘‘ਚਿਤ੍ਤਵੁਤ੍ਤਿਵਿਸੇਸਾ ਤੁ, ਭਾਵਯਨ੍ਤਿ ਰਸੇ ਯਤੋ’’ਤਿਆਦਿਨਾ ਭਾਵਾ ਨਾਮ ਹੋਨ੍ਤੀਤਿ. ਇਮੇ ਸਾਤ੍ਤਿਕਾਭਾਵਾਨੁਭਾਵਵਸੇਨ ਦੁਵਿਧਾ ਹੋਨ੍ਤਿ. ਸਮਾਹਿਤੋ ਚ ਸੋ ਅਤ੍ਤਾ ਚੇਤਿ ਚ, ਤਤੋ ਪਭਵਮਿਤਿ ਚ, ਸਨ੍ਤੋ ਉਪਸਨ੍ਤੋ ਚ ਸੋ ਅਤ੍ਤਾ ਚੇਤਿ ਚ, ਸਤ੍ਤਤੋ ਭਵਨ੍ਤੀਤਿ ਚ, ਸਤ੍ਤੇਨ ਉਪ੍ਪਾਦਿਤਾਤਿ ਚ, ਅਨੁਭਾਵਾਨਂ ਭਾਵੋਤਿ ਚ ਵਾਕ੍ਯਂ. ਅਪੀਤਿ ਅਨੁਗ੍ਗਹਤ੍ਥੇ ਨਿਪਾਤੋ.
ਸਾਤ੍ਤਿਕਭਾਵਪ੍ਪਭੇਦ
੩੪੬. ਥਮ੍ਭੋ ਪਲਯਰੋਮਞ੍ਚਾ,
ਤਥਾ ਸੇਦਸ੍ਸੁਵੇਪਥੁ;
ਵੇਵਣ੍ਣਿਯਂ ਵਿਸ੍ਸਰਤਾ,
ਭਾਵਾ’ਟ੍ਠੇ’ਤੇ ਤੁ ਸਾਤ੍ਤਿਕਾ.
੩੪੬. ਤੇ ਦਸ੍ਸੇਤਿ ‘‘ਥਮ੍ਭੋ’’ਇਚ੍ਚਾਦਿਨਾ. ਏਤ੍ਥ ਥਮ੍ਭੋ ਅਵਿਸ੍ਸਰਕਾਯਚਿਤ੍ਤਤਾ. ਪਲਯੋ ਅਸ੍ਸਾਸਪਸ੍ਸਾਸਮਤ੍ਤਾਵਸੇਸੋ ਸੁਤ੍ਤਾਵਤ੍ਥਾਸਭਾਵੋ ਨਿਦ੍ਦਾਪਭਵੋ. ਸੁਬ੍ਯਤ੍ਤਲਕ੍ਖਣਾ ਸੇਸਾ.
੩੪੬. ਇਦਾਨਿ ਸਾਤ੍ਤਿਕੇ ਦਸ੍ਸੇਤਿ ‘‘ਥਮ੍ਭੋ’’ਇਚ੍ਚਾਦਿਨਾ. ਥਮ੍ਭੋ ਕਾਯਚਿਤ੍ਤਾਨਂ ਅਵਿਸਰਭਾਵਸਙ੍ਖਾਤੋ ਚ ਪਲਯਰੋਮਞ੍ਚਾ ਨਿਦ੍ਦਾਯ ਉਪ੍ਪਜ੍ਜਮਾਨਅਸ੍ਸਾਸਪਸ੍ਸਾਸਮਤ੍ਤਾਤਿਰਿਤ੍ਤਸੁਤ੍ਤਾਵਤ੍ਥਾ ਚ ਪਸਾਦਾਦਿਸਮ੍ਭਵੋ ਰੋਮੁਗ੍ਗਮੋ ਚ ਤਥਾ ਏਵਂ ਸੇਦਸ੍ਸੁਵੇਪਥੁ ਚ ਭਯਾਦੀਹਿ ਉਪ੍ਪਜ੍ਜਮਾਨਦਾਹੋ ਚ ਸਨ੍ਤੋਸਾਦੀਹਿ ਉਪ੍ਪਜ੍ਜਮਾਨਅਸ੍ਸੁ ਚ ਕਮ੍ਪਾ ਚ ਵੇਵਣ੍ਣਿਯਂ ਵਿਰੂਪਤਾ ਚ ਵਿਸ੍ਸਰਤਾ ਵਿਰੂਪਸਦ੍ਦਤਾ ਚਾਤਿ ਏਤੇ ਅਟ੍ਠ ਸਾਤ੍ਤਿਕਾ ਭਾਵਾ ਨਾਮ ਹੋਨ੍ਤਿ. ਰੋਮਾਨਂ ਅਞ੍ਚੋ ਉਗ੍ਗਮੋਤਿ ਚ, ਪਲਯੋ ਚ ਰੋਮਞ੍ਚੋ ਚੇਤਿ ਚ, ਵੇਪਨਂ ਕਮ੍ਪਨਮਿਤਿ ਚ, ਸੇਦੋ ਚ ਅਸ੍ਸੁ ਚ ਵੇਪਥੁ ਚਾਤਿ ਚ, ਵਿਰੂਪੋ ਵਣ੍ਣੋ ਅਸ੍ਸੇਤਿ ਚ, ਤਸ੍ਸ ਭਾਵੋਤਿ ਚ, ਵਿਰੂਪੋ ਸਰੋ ਅਸ੍ਸੇਤਿ ਚ, ਤਸ੍ਸ ਭਾਵੋਤਿ ਚ ਵਾਕ੍ਯਂ.
੩੪੭. ਯਦਾ ਰਤ੍ਯਾਦਯੋ ਭਾਵਾ,
ਠਿਤਿਸੀਲਾ ਨ ਹੋਨ੍ਤਿ ਚੇ;
ਤਦਾ ਸਬ੍ਬੇਪਿ ਤੇ ਭਾਵਾ,
ਭਵਨ੍ਤਿ ਬ੍ਯਭਿਚਾਰਿਨੋ.
੩੪੭. ਨ ਕੇਵਲਂ ਵੁਤ੍ਤਾਯੇਵ ਬ੍ਯਭਿਚਾਰਿਨੋ, ਰਤ੍ਯਾਦਯੋਪੀਤਿ ਆਹ ‘‘ਯਦਾ’’ਇਚ੍ਚਾਦਿ. ਭਵਨ੍ਤਿ ਬ੍ਯਭਿਚਾਰਿਨੋਤਿ ਯਥਾਯੋਗਂ ਯਥਾਸਮ੍ਬਨ੍ਧਂ ਬ੍ਯਭਿਚਾਰਿਨੋ ਹੋਨ੍ਤੀਤਿ ਅਤ੍ਥੋ. ਸੇਸਂ ਸੁਬੋਧਂ.
੩੪੭. ਇਦਾਨਿ ਨਿਬ੍ਬੇਦਾਦਯੋ ਵਿਯ ਰਤਿਹਾਸਾਦਯੋਪਿ ਕਿਸ੍ਮਿਞ੍ਚਿ ਕਾਲੇ ਬ੍ਯਭਿਚਾਰਿਨੋਪਿ ਹੋਨ੍ਤੀਤਿ ਦਸ੍ਸੇਤਿ ‘‘ਯਦਾ’’ ਇਚ੍ਚਾਦਿਨਾ. ਰਤ੍ਯਾਦਯੋ ਰਤਿਹਾਸਾਦਯੋ ਭਾਵਾ ਨਵ ਠਾਯੀਭਾਵਾ ਯਦਾ ਠਿਤਿਸੀਲਾ ਨ ਹੋਨ੍ਤਿ ਚੇ ਵਿਰੋਧੀਹਿ ਤੇਹਿ ਤੇਹਿ ਭਾਵਨ੍ਤਰੇਹਿ ਬ੍ਯਵਹਿਤਤ੍ਤਾ ਸਭਾਵਤੋ ਠਿਤਿਸਭਾਵਾ ਯਦਿ ਨ ਹੋਨ੍ਤਿ, ਤਦਾ ਤੇ ਭਾਵਾ ਰਤ੍ਯਾਦਯੋ ਸਬ੍ਬੇਪਿ ਬ੍ਯਭਿਚਾਰਿਨੋ ਭਵਨ੍ਤੀਤਿ. ਯਥਾਸਕਂ ਬ੍ਯਭਿਚਾਰਿਤਾਨੁਰੂਪਵਿਭਾਵਾਨੁਭਾਵਾਨਂ ਯੋਗਾਨੁਰੂਪੇਨ ਬ੍ਯਭਿਚਾਰੀਭਾਵਾ ਹੋਨ੍ਤਿ. ਰਤਿਆਦਿ ਯੇਸਂ ਹਾਸਾਦੀਨਮਿਤਿ ਚ, ਠਿਤਿ ਸੀਲਂ ਯੇਸਂ ਰਤ੍ਯਾਦੀਨਮਿਤਿ ਚ ਵਿਗ੍ਗਹੋ.
੩੪੮. ਵਿਭਾਵੋ ਕਾਰਣਂ ਤੇਸੁ’-
ਪ੍ਪਤ੍ਤਿਯੁ’ਦ੍ਦੀਪਨੇ ਤਥਾ;
ਯੋ ਸਿਯਾ ਬੋਧਕੋ ਤੇਸ-
ਮਨੁਭਾਵੋ’ਯ’ਮੀਰਿਤੋ.
੩੪੮. ਇਦਾਨਿ ਵਿਭਾਵਾਨੁਭਾਵੇ ਦਸ੍ਸੇਤਿ ‘‘ਵਿਭਾਵੋ’’ਇਚ੍ਚਾਦਿਨਾ. ਤੇਸਂ ਰਤ੍ਯਾਦੀਨਂ ਭਾਵਾਨਂ ਉਪ੍ਪਤ੍ਤਿਯਾ, ਤਥਾ ਉਦ੍ਦੀਪਨੇ ਚ ਕਾਰਣਂ ਆਲਮ੍ਬਣਉਦ੍ਦੀਪਨਵਸੇਨ ਦੁਵਿਧੋ ਵਿਭਾਵੋ ਨਾਮ. ਤਤ੍ਥ ਆਲਮ੍ਬਣਵਿਭਾਵੋ ਕਨ੍ਤਾਦਿ, ਉਦ੍ਦੀਪਨਵਿਭਾਵੋ ਚਨ੍ਦਾਦਿ. ਤੇਸਂ ਬੋਧਕੋ ਞਾਪਕੋ ਕਾਯਿਕੋ ਚ ਵਾਚਸਿਕੋ ਚ ਬ੍ਯਾਪਾਰੋ ਸਿਯਾ, ਅਯਂ ਅਨੁਭਾਵੋ ਈਰਿਤੋ.
੩੪੮. ਇਦਾਨਿ ਵਿਭਾਵਾਨੁਭਾਵੇ ਦਸ੍ਸੇਤਿ ‘‘ਵਿਭਾਵੋ’’ਇਚ੍ਚਾਦਿਨਾ. ਤੇਸਂ ਠਾਯੀਭਾਵਾਦੀਨਂ ਤਿਣ੍ਣਂ ਉਪ੍ਪਤ੍ਤਿਯਾ ਚ ਤਥਾ ਉਦ੍ਦੀਪਨੇ ਚ ਉਪ੍ਪਨ੍ਨਾਨਂ ਦੀਪਨੇ ਚ ਕਾਰਣਂ ਆਲਮ੍ਬਣਉਦ੍ਦੀਪਨਵਸੇਨ ਦੁਵਿਧੋ ਹੇਤੁ ਵਿਭਾਵੋ ਨਾਮ, ਤੇਸਂ ਠਾਯੀਭਾਵਾਦੀਨਂ ਬੋਧਕੋ ਕਾਯਿਕਵਾਚਸਿਕੋ ਯੋ ਸਿਯਾ ਨਟਕਵੀਨਂ ਬ੍ਯਾਪਾਰੋ ਅਤ੍ਥਿ, ਅਯਂ ਅਨੁਭਾਵੋਤਿ ਈਰਿਤੋਤਿ. ਵਿਸੇਸੇਨ ਭਾਵੇਤਿ ਵਡ੍ਢੇਤੀਤਿ ਵਿਭਾਵੋ. ਅਨੁਭਾਵੇਤਿ ਬੋਧੇਤੀਤਿ ਅਨੁਭਾਵੋ. ਏਤ੍ਥ ਵਿਭਾਵੋ ਨਾਮ ਰਤਿਵਿਸਯੇ ਨਰਨਾਰੀਨਂ ਅਞ੍ਞਮਞ੍ਞਂ ਆਲਮ੍ਬਣਵਿਭਾਵੋ, ਚਨ੍ਦਰਮ੍ਮਦੇਸਾਦਿ ਉਦ੍ਦੀਪਨਵਿਭਾਵੋ ਚੇਤਿ ਦੁਵਿਧੋ. ਹਾਸਾਦੀਨਮ੍ਪਿ ਦੁਵਿਧਵਿਭਾਵਂ ਯਥਾਰਹਂ ਯੋਜੇਤਬ੍ਬਂ. ਅਨੁਭਾਵੋ ਨਾਮ ਠਾਯੀਭਾਵਾਦੀਨਂ ਤੇਸਂ ਤੇਸਂ ਭਾਵਾਨਂ ਪਕਾਸਕਵਾਚਸਿਕਬ੍ਯਾਪਾਰਸਙ੍ਖਾਤਕਵਿਪਯੋਗੋ ਚ ਕਾਯਿਕਪਯੋਗਭੂਤੋ ਨਟਾਨਂ ਅਭਿਨਯਸਙ੍ਖਾਤੋ ਤਂਤਂਭਾਵਸਰੂਪਨਿਰੂਪਕੋ ਚੇਤਿ ਦੁਵਿਧੋ ਬ੍ਯਾਪਾਰੋ.
੩੪੯. ਨੇਕਹੇਤੁਂ ਮਨੋਵੁਤ੍ਤਿ-ਵਿਸੇਸਞ੍ਚ ਵਿਭਾਵਿਤੁਂ;
ਭਾਵਂ ਵਿਭਾਵਾਨੁਭਾਵਾ, ਵਣ੍ਣਿਯਾ ਬਨ੍ਧਨੇ ਫੁਟਂ.
੩੪੯. ਵਿਭਾਵਾਦਿਵਣ੍ਣਨਾਯਮੇਵ ਭਾਵਵਿਸੇਸਾਵਬੋਧੋ ਸਿਯਾ, ਅਞ੍ਞਥਾ ‘‘ਦੇਵਦਤ੍ਤਸ੍ਸ ਸਾਸ੍ਸੁਲੋਚਨਯੁਗਂ ਸਞ੍ਜਾਤ’’ਮਿਤਿ ਵੁਤ੍ਤੇ ਸੋਕਾ ਆਨਨ੍ਦਾ ਰੋਗਾ ਚੇਤਿ ਕੋ ਨਾਮ ਸਕ੍ਕੋਤਿ ਕਾਰਣਂ ਨਿਚ੍ਛਿਤੁਂ, ਚਿਤ੍ਤਵੁਤ੍ਤਿਵਿਸੇਸਞ੍ਚ ਭਾਵਂ ਵਿਨਾ ਵਿਭਾਵਾਨੁਭਾਵਂ ਕਵਿ ਵਣ੍ਣੇਤੁਂ ਨਟੋਭਿਨੇਤੁਂ ਸਾਮਜ੍ਜਿਕੋ ਵਾ ਵਿਞ੍ਞਾਤੁਂ ਕੋ ਸਕ੍ਕੋਤੀਤਿ ਦਸ੍ਸੇਤੁਮਾਹ ‘‘ਨੇਕ’’ਇਚ੍ਚਾਦਿ. ਨੇਕਹੇਤੁਂ ਬਹੁਹੇਤੁਂ ਮਨੋਵੁਤ੍ਤਿਵਿਸੇਸਞ੍ਚ ਭਾਵਂ ਵਿਭਾਵਿਤੁਂ ਪਕਾਸੇਤੁਂ ਵਿਭਾਵਾਨੁਭਾਵਾ ਵੁਤ੍ਤਲਕ੍ਖਣਾ ਬਨ੍ਧਨੇ ਸਭਾਵਨਿਰੂਪਕਪਦੇ ਫੁਟਂ ਵਣ੍ਣਨੀਯਾ, ਵਿਭਾਵਾਦਿਰੂਪਕੇਨੇਵ ਅਵੁਤ੍ਤਮ੍ਪਿ ਕਿਞ੍ਚਿ ਪਤੀਯਤੇ.
੩੪੯. ‘‘ਦੇਵਦਤ੍ਤਸ੍ਸ ਚਕ੍ਖੂਨਿ ਅਸ੍ਸੁਪੁਣ੍ਣਾਨੀ’’ਤਿ ਵੁਤ੍ਤੇ ਸੋਕੇਨ ਸਨ੍ਤੋਸੇਨ ਰੋਗੇਨ ਵਾਤਿ ਯਥਾ ਅਸ੍ਸੁਕਾਰਣਕਥਨਂ ਵਿਨਾ ਨ ਜਾਨਾਤਿ, ਏਵਂ ਚਿਤ੍ਤਸ੍ਸ ਪਵਤ੍ਤਿਸਙ੍ਖਾਤਾ ਰਤਿਹਾਸਾਦਯੋ ਤੇ ਤੇ ਭਾਵਾ ਅਤ੍ਤਨੋ ਪਤੀਤਿਯਾਨੁਰੂਪਂ ਵਿਭਾਵਾਨੁਭਾਵਕਥਨਂ ਵਿਨਾ ਕਵੀਹਿ ਵਣ੍ਣੇਤਬ੍ਬਾ, ਨਟੇਹਿ ਦਸ੍ਸੇਤਬ੍ਬਾ, ਸਬ੍ਭੇਹਿ ਅਸ੍ਸਾਦਨੀਯਾ ਨਤ੍ਥੀਤਿ ਠਾਯੀਆਦੀਨਂ ਵਣ੍ਣਨਮੇਵ ਕਾਤਬ੍ਬਨ੍ਤਿ ਇਦਾਨਿ ਅਨੁਸਾਸੇਨ੍ਤੋ ਆਹ ‘‘ਨੇਕ’’ਇਚ੍ਚਾਦਿ. ਨੇਕਹੇਤੁਂ ਤੇਸਂ ਤੇਸਂ ਭਾਵਾਨਂ ਉਪ੍ਪਤ੍ਯਾਦੋ ਆਲਮ੍ਬਣਵਿਭਾਵਾਦਿਬਹੁਕਾਰਣਵਨ੍ਤਂ ਮਨੋਵੁਤ੍ਤਿਵਿਸੇਸਂ ਭਾਵਞ੍ਚ ਚਿਤ੍ਤਸ੍ਸ ਪਵਤ੍ਤਿਵਿਸੇਸਸਙ੍ਖਾਤਭਾਵਞ੍ਚ ਵਿਭਾਵਿਤੁਂ ਪਕਾਸੇਤੁਂ ਵਿਭਾਵਾਨੁਭਾਵਾ ਅਨਨ੍ਤਰਨਿਦ੍ਦਿਟ੍ਠਾ ਬਨ੍ਧਨੇ ਰਸਭਾਵਪ੍ਪਕਾਸਨੇ ਫੁਟਂ ਪਕਾਸਂ ਕਤ੍ਵਾ ਵਣ੍ਣਿਯਾ ਕਵਿਨਾ ਵਣ੍ਣਨੀਯਾ ਹੋਨ੍ਤੀਤਿ. ਨ ਏਕੋਤਿ ਚ, ਸੋ ਹੇਤੁ ਅਸ੍ਸੇਤਿ ਚ, ਮਨਸੋ ਵੁਤ੍ਤੀਤਿ ਚ, ਤਾਯ ਵਿਸੇਸੋਤਿ ਚ, ਵਿਭਾਵੋ ਚ ਅਨੁਭਾਵੋ ਚੇਤਿ ਚ ਵਾਕ੍ਯਂ.
੩੫੦. ਸਵਿਭਾਵਾਨੁਭਾਵੇਹਿ, ਭਾਵਾ ਤੇ ਤੇ ਯਥਾਰਹਂ;
ਵਣ੍ਣਨੀਯਾ ਯਥੋਚਿਤ੍ਯਂ, ਲੋਕਰੂਪਾਨੁਗਾਮਿਨਾ.
੩੫੦. ਇਦਾਨਿ ਤੇ ਭਾਵਾ ਲੋਕਸਭਾਵਾਨਤਿਕ੍ਕਮੇਨ ਵਿਭਾਵਾਦੀਹਿ ਵਣ੍ਣਨੀਯਾਤਿ ਆਹ ‘‘ਸਵਿਭਾਵੇ’’ਚ੍ਚਾਦਿ. ਸਹ ਵਿਭਾਵੇਹਿ ਸਵਿਭਾਵਾ, ਤੇ ਚ ਤੇ ਅਨੁਭਾਵਾ ਚ, ਤੇਹਿ. ਯਥਾਰਹਨ੍ਤਿ ਅਤ੍ਤਨੋ ਸਮ੍ਬਨ੍ਧੀਨਂ ਵਸੇਨ ਯਥਾਰਹਂ ਵਣ੍ਣਨੀਯਾ.
੩੫੦. ਇਦਾਨਿ ਵਿਭਾਵਾਨੁਭਾਵੇ ਨਿਸ੍ਸਾਯ ਵਣ੍ਣਨੀਯਾ ਤੇ ਭਾਵਾ ਲੋਕਸਭਾਵਮਨਤਿਕ੍ਕਮ੍ਮ ਕਾਤਬ੍ਬਾਤਿ ਅਨੁਸਾਸਨ੍ਤੋ ਆਹ ‘‘ਸਵਿਭਾਵਾ’’ਇਚ੍ਚਾਦਿ. ਲੋਕਰੂਪਾਨੁਗਾਮਿਨਾ ਲੋਕਵੋਹਾਰਮਨੁਵਤ੍ਤਮਾਨੇਨ ਤੇ ਤੇ ਭਾਵਾ ਠਾਯੀਭਾਵਾਦਯੋ ਤਯੋ ਯਥੋਚਿਤ੍ਯਂ ਓਚਿਤ੍ਯਾਨੁਰੂਪਂ ਸਵਿਭਾਵਾਨੁਭਾਵੇਹਿ ਵਿਭਾਵਸਹਿਤੇਹਿ ਅਨੁਭਾਵੇਹਿ ਕਰਣਭੂਤੇਹਿ ਯਥਾਰਹਂ ਤੇਹਿ ਤੇਹਿ ਭਾਵੇਹਿ ਸਮ੍ਬਨ੍ਧੀਨਂ ਵਿਭਾਵਾਦੀਨਂ ਵਸੇਨ ਅਨੁਰੂਪਤੋ ਵਣ੍ਣਨੀਯਾ ਵਣ੍ਣੇਤਬ੍ਬਾ ਹੋਨ੍ਤੀਤਿ. ਵਿਭਾਵੇਹਿ ਸਹ ਯੇ ਵਤ੍ਤਨ੍ਤੀਤਿ ਚ, ਤੇ ਚ ਤੇ ਅਨੁਭਾਵਾ ਚੇਤਿ ਚ, ਅਨਤਿਕ੍ਕਮ੍ਮ ਅਰਹਨ੍ਤਿ ਚ, ਅਨਤਿਕ੍ਕਮ੍ਮ ਓਚਿਤ੍ਯਮਿਤਿ ਚ, ਲੋਕਸ੍ਸ ਰੂਪਂ ਸਰੂਪਮਿਤਿ ਚ, ਤਂ ਅਨੁਗਚ੍ਛਤਿ ਸੀਲੇਨਾਤਿ ਚ ਵਿਗ੍ਗਹੋ.
੩੫੧. ਚਿਤ੍ਤਵੁਤ੍ਤਿ ਵਿਸੇਸਤ੍ਤਾ, ਮਾਨਸਾ ਸਾਤ੍ਤਿਕ’ਙ੍ਗਤੋ;
ਬਹਿਨਿਸ੍ਸਟਸੇਦਾਦਿ-ਅਨੁਭਾਵੇਹਿ ਵਣ੍ਣਿਯਾ.
੩੫੧. ਸਾਤ੍ਤਿਕਾ ਕਥਂ ਵਣ੍ਣਨੀਯਾਤਿ ਆਹ ‘‘ਚਿਤ੍ਤੇ’’ਚ੍ਚਾਦਿ. ਚਿਤ੍ਤਸ੍ਸ ਵੁਤ੍ਤਿਵਿਸੇਸੋ ਯੇਸਂ, ਤੇਸਂ ਭਾਵੋ, ਤਸ੍ਮਾ ਮਾਨਸਾ ਮਨਸਿ ਭਵਾ ਸਾਤ੍ਤਿਕਾ ਅਙ੍ਗਤੋ ਸਰੀਰਤੋ ਬਹਿਨਿਸ੍ਸਟੇਹਿ ਨਿਗ੍ਗਤੇਹਿ ਸੇਦਾਦੀਹਿ ਅਨੁਭਾਵੇਹਿ ਵਣ੍ਣਨੀਯਾ, ਨ ਪਨ ਸੇਦਸਲਿਲਮੇਵ ਭਾਵੋਤਿ ਅਧਿਪ੍ਪਾਯੋ.
੩੫੧. ਏਵਂ ਸਾਮਞ੍ਞੇਨ ਭਾਵਵਣ੍ਣਨਕ੍ਕਮਂ ਦਸ੍ਸੇਤ੍ਵਾ ਇਦਾਨਿ ਵਿਸੇਸੇਨ ਸਾਤ੍ਤਿਕਭਾਵਵਣ੍ਣਨਾ ਈਦਿਸਾਤਿ ਦਸ੍ਸੇਤਿ ‘‘ਚਿਤ੍ਤ’’ਇਚ੍ਚਾਦਿਨਾ. ਚਿਤ੍ਤਵੁਤ੍ਤਿਵਿਸੇਸਤ੍ਤਾ ਚਿਤ੍ਤਸ੍ਸ ਪਵਤ੍ਤਿਵਿਸੇਸਤ੍ਤਾ ਮਾਨਸਾ ਚਿਤ੍ਤੇ ਭਵਾ ਸਾਤ੍ਤਿਕਾਭਾਵਾ ਅਙ੍ਗਤੋ ਸਰੀਰਤੋ ਬਹਿਨਿਸ੍ਸਟਸੇਦਾਦਿਅਨੁਭਾਵੇਹਿ ਬਹਿਨਿਕ੍ਖਨ੍ਤਸੇਦਾਦੀਹਿ ਅਨੁਭਾਵੇਹਿ ਕਰਣਭੂਤੇਹਿ ਵਣ੍ਣਿਯਾ ਵਣ੍ਣਨੀਯਾ ਹੋਨ੍ਤੀਤਿ, ਅਙ੍ਗਤੋ ਬਹਿ ਨਿਸ੍ਸਟਨ੍ਤਿ ਵਿਸੇਸਨੇਨ ਵਿਸਿਟ੍ਠਭੂਤਸੇਦਾਦੀਨਮੇਵ ਭਾਵਾਨੁਭਾਵਤ੍ਤਂ ਵਿਨਾ ਕੇਵਲਂ ਸੇਦਾਦਯੋ ਵੁਤ੍ਤਾ ਸਮਾਨਾ ਭਾਵਾਦਯੋ ਨਾਮ ਨ ਹੋਨ੍ਤੀਤਿ ਅਧਿਪ੍ਪਾਯੋ. ਚਿਤ੍ਤਸ੍ਸ ਵੁਤ੍ਤੀਤਿ ਚ, ਸਾ ਏਵ ਵਿਸੇਸੋ ਯੇਸਂ ਸਾਤ੍ਤਿਕਾਨਮਿਤਿ ਚ, ਤੇਸਂ ਭਾਵੋਤਿ ਚ, ਮਨਸਿ ਭਵਾਤਿ ਚ, ਸੇਦੋ ਆਦਿ ਯੇਸਂ ਖੇਲ਼ਾਦੀਨਮਿਤਿ ਚ, ਨਿਸ੍ਸਟਾ ਨਿਗ੍ਗਤਾ ਚ ਤੇ ਸੇਦਾਦਯੋ ਚੇਤਿ ਚ, ਤੇ ਏਵ ਅਨੁਭਾਵਾਤਿ ਚ ਵਾਕ੍ਯਂ.
ਰਸਅਧਿਪ੍ਪਾਯ
੩੫੨. ਸਾਮਜ੍ਜਿਕਾਨ’ਮਾਨਨ੍ਦੋ, ਯੋ ਬਨ੍ਧਤ੍ਥਾਨੁਸਾਰਿਨਂ;
ਰਸੀਯਤੀਤਿ ਤਞ੍ਞੂਹਿ, ਰਸੋ ਨਾਮਾ’ਯ’ਮੀਰਿਤੋ.