੪. ਅਤ੍ਥਾਲਙ੍ਕਾਰਾਵਬੋਧਪਰਿਚ੍ਛੇਦ
੧੬੪. ਅਤ੍ਥਾਲਙ੍ਕਾਰਸਹਿਤਾ, ਸਗੁਣਾ ਬਨ੍ਧਪਦ੍ਧਤਿ;
ਅਚ੍ਚਨ੍ਤਕਨ੍ਤਾ ਕਨ੍ਤਾਵ [ਯਤੋਅਚ੍ਚਨ੍ਤਕਨ੍ਤਾਵ (ਕ.)], ਵੁਚ੍ਚਨ੍ਤੇਤੇ ਤਤੋ’ਧੁਨਾ.
੧੬੪. ਏਵਂ ਸਦ੍ਦਾਲਙ੍ਕਾਰੇ ਪਰਿਚ੍ਛਿਜ੍ਜ ਸਮ੍ਪਤ੍ਯਤ੍ਥਾਲਙ੍ਕਾਰਂ ਬੋਧਯਿਤੁਮਾਹ ‘‘ਅਤ੍ਥਾਲਙ੍ਕਾਰ’’ਇਚ੍ਚਾਦਿ. ਸਗੁਣਾ ਯਥਾਵੁਤ੍ਤੇਹਿ ਪਸਾਦਾਦੀਹਿ ਸਦ੍ਦਗੁਣੇਹਿ ਸਹਿਤਾ ਬਨ੍ਧਪਦ੍ਧਤਿ ਕਬ੍ਬਰਚਨਂ. ਅਲਙ੍ਕਰੀਯਤਿ ਕਨ੍ਤਿਂ ਨੀਯਤਿ ਬਨ੍ਧੋ ਏਤੇਹਿ ਸਰੀਰਮਿਵ ਹਾਰਾਦੀਹੀਤਿ ਅਲਙ੍ਕਾਰਾ, ਤੇਹਿ ਅਤ੍ਥਾਲਙ੍ਕਾਰੇਹਿ ਜਾਤ੍ਯਾਦਿਲਕ੍ਖਣੇਹਿ ਸਹਿਤਾ ਸਂਯੁਤ੍ਤਾ ਸਤੀ ਸਗੁਣਾ ਪਤਿਬ੍ਬਤਾਦਿਗੁਣੋਪੇਤਾ ਅਤ੍ਥੇਨ ਧਨੇਨ ਅਲਙ੍ਕਾਰੇਨ ਆਭਰਣੇਨ ਸਹਿਤਾ ਯੁਤ੍ਤਾ ਕਨ੍ਤਾਵ ਅਙ੍ਗਨਾ ਵਿਯ. ਯਤੋ ਅਚ੍ਚਨ੍ਤਕਨ੍ਤਾ ਅਤਿਸਯਰਮਣੀਯਾ ਸਿਯਾ, ਤਤੋ ਤੇਨ ਕਾਰਣੇਨ ਯੇ ਅਤ੍ਥਾਲਙ੍ਕਾਰਾ ਅਵਸਰਂ ਪਤ੍ਤਾ, ਤੇ ਅਧੁਨਾ ਇਦਾਨਿ ਵੁਚ੍ਚਨ੍ਤੇ ਕਥੀਯਨ੍ਤਿ.
੧੬੪. ਏਵਂ ਸਦ੍ਦਾਲਙ੍ਕਾਰਵਿਭਾਗਂ ਦਸ੍ਸੇਤ੍ਵਾ ਇਦਾਨਿ ਤਨ੍ਨਿਸ੍ਸਯਂਯੇਵ ਅਤ੍ਥਾਲਙ੍ਕਾਰਬਨ੍ਧਮਾਰਭਨ੍ਤੋ ‘‘ਅਤ੍ਥਾਲਙ੍ਕਾਰਿ’’ਚ੍ਚਾਦਿਮਾਹ. ਸਗੁਣਾ ਯਥਾਵੁਤ੍ਤਪਸਾਦਾਦਿਸਦ੍ਦਗੁਣਯੁਤ੍ਤਾ ਬਨ੍ਧਪਦ੍ਧਤਿ ਪਜ੍ਜਗਜ੍ਜਾਦਿਪਭੇਦਾ ਰਚਨਾਵਲਿ ਅਤ੍ਥਾਲਙ੍ਕਾਰਸਹਿਤਾ ਸਭਾਵਵੁਤ੍ਤਿਵਙ੍ਕਵੁਤ੍ਤਿਸਙ੍ਖਾਤੇਨ ਅਤ੍ਥਾਲਙ੍ਕਾਰੇਨ ਸਂਯੁਤ੍ਤਾ ਸਗੁਣਾ ਅਤ੍ਥਾਲਙ੍ਕਾਰਸਹਿਤਾ ਕਨ੍ਤਾ ਇਵ ਪਤਿਬ੍ਬਤਾਦੀਹਿ ਗੁਣੇਹਿ ਯੁਤ੍ਤਾ ਸੁਵਣ੍ਣਰਜਤਮਣਿਮੁਤ੍ਤਾਦਿਧਨੇਹਿ ਗੀਵੇਯ੍ਯਕਟਕਨੂਪੁਰਾਦੀਹਿ ਆਭਰਣੇਹਿ ਚ ਯੁਤ੍ਤਾ ਅਙ੍ਗਨਾਵ ਅਚ੍ਚਨ੍ਤਕਨ੍ਤਾ ਯਤੋ ਅਤਿਸਯੇਨ ਰਮਣੀਯਾ, ਤਤੋ ਤਸ੍ਮਾ ਤੇ ਅਤ੍ਥਾਲਙ੍ਕਾਰਾ ਅਧੁਨਾ ਦਾਨਿ ਵੁਚ੍ਚਨ੍ਤੇ. ਅਲਙ੍ਕਰੋਨ੍ਤਿ ਬਨ੍ਧਂ ਸਰੀਰਂ ਵਾ ਏਤੇਹੀਤਿ ਚ, ਅਤ੍ਥਸ੍ਸ ਅਲਙ੍ਕਾਰਾਤਿ ਚ, ਤੇਹਿ ਸਹਿਤਾਤਿ ਚ, ਗੁਣੇਹਿ ਸਹ ਵਤ੍ਤਤੀਤਿ ਚ, ਬਨ੍ਧਸ੍ਸ ਪਦ੍ਧਤੀਤਿ ਚ, ਅਚ੍ਚਨ੍ਤਂ ਅਤਿਸਯੇਨ ਕਨ੍ਤਾਤਿ ਚ ਵਿਗ੍ਗਹੋ.
੧੬੫. ਸਭਾਵਵਙ੍ਕਵੁਤ੍ਤੀਨਂ, ਭੇਦਾ ਦ੍ਵਿਧਾ ਅਲਂਕ੍ਰਿਯਾ;
ਪਠਮਾ ਤਤ੍ਥ ਵਤ੍ਥੂਨਂ, ਨਾਨਾਵਤ੍ਥਾਵਿਭਾਵਿਨੀ.
੧੬੫. ਕਤਿਪ੍ਪਭੇਦਾ ਤੇ ਇਚ੍ਚਾਹ ‘‘ਸਭਾਵ’’ਇਚ੍ਚਾਦਿ. ਸਭਾਵਵੁਤ੍ਤਿ ਵਙ੍ਕਵੁਤ੍ਤੀਤਿ ਇਮੇਸਂ ਭੇਦਾ ਪਭੇਦੇਨ ਅਲਂਕ੍ਰਿਯਾ ਅਤ੍ਥਾਲਙ੍ਕਾਰਾਦ੍ਵਿਧਾਦ੍ਵਿਪ੍ਪਕਾਰਾ. ਤੇਸੁ ਸਭਾਵਵੁਤ੍ਤਿ ਕੀਦਿਸੀਤਿ ਆਹ ‘‘ਪਠਮਾ’’ਤਿਆਦਿ. ਤਤ੍ਥ ਤਾਸੁ ਪਠਮਾ ਸਭਾਵਵੁਤ੍ਤਿ ਵਤ੍ਥੂਨਂ ਪਦਤ੍ਥਾਨਂ ਜਾਤਿਗੁਣਕ੍ਰਿਯਾਦਬ੍ਬਸਭਾਵਾਨਂ ਨਾਨਾ ਵਿਚਿਤ੍ਤਾ, ਨ ਦ੍ਵੇਕਾਵ ਅਵਤ੍ਥਾ ਅਵਸਰਾ ਵਿਭਾਵਿਨੀ ਪਕਾਸਿਕਾ ਵਿਞ੍ਞੇਯ੍ਯਾ. ਜਾਤ੍ਯਾਦੀਨਂ ਪਦਤ੍ਥਾਨਂ ਯਥਾਸਭਾਵਮਨੇਕਪ੍ਪਕਾਰਂ ਸਮ੍ਮਦੇਵ ਵਿਵਰਨ੍ਤੀ ਸਭਾਵਂ ਪਦਤ੍ਥਾਨਂ ਵਿਚਿਤ੍ਤਂ ਵਦਤੀਤਿ ਸਭਾਵਵੁਤ੍ਤਿ ਨਾਮਾਤਿ ਅਧਿਪ੍ਪਾਯੋ, ਸਾਵ ਜਾਤਿਯਾ ਪਦਤ੍ਥਸਰੂਪਸ੍ਸ ਤਥਾਤਥਾਪਟਿਪਾਦਕਤ੍ਤੇਨ ਵੁਤ੍ਤਿਯਾ [ਦਤ੍ਤਿਯਾ (ਕ.)] ਜਾਤਿਪਿ ਵੁਚ੍ਚਤਿ.
੧੬੫. ਪਸਤ੍ਥਾਲਙ੍ਕਾਰਾ [ਪਸਤ੍ਥਾਦਿਅਲਙ੍ਕਾਰਾ (ਕ.)] ਪਭੇਦਤੋ ਏਤ੍ਤਕਾਤਿ ਦਸ੍ਸੇਨ੍ਤੋ ‘‘ਸਭਾਵਿ’’ਚ੍ਚਾਦਿਮਾਹ. ਅਲਂਕ੍ਰਿਯਾ ਅਤ੍ਥਾਲਙ੍ਕਾਰਾ ਸਭਾਵਵਙ੍ਕਵੁਤ੍ਤੀਨਂ ਭੇਦਾ ਪਭੇਦਤੋ ਦ੍ਵਿਧਾ ਦ੍ਵਿਪ੍ਪਕਾਰਾ ਹੋਨ੍ਤਿ. ਤਤ੍ਥ ਤਾਸੁਦ੍ਵੀਸੁ ਪਠਮਾ ਸਭਾਵਵੁਤ੍ਤਿ ਵਤ੍ਥੂਨਂ ਜਾਤਿਗੁਣਕ੍ਰਿਯਾਦਬ੍ਬਲਕ੍ਖਣਾਨਂ ਪਦਤ੍ਥਾਨਂ ਨਾਨਾਵਤ੍ਥਾਵਿਭਾਵਿਨੀ ਅਨੇਕਪ੍ਪਕਾਰਸ੍ਸ ਪਕਾਸਿਨੀ ਹੋਤਿ. ਏਤ੍ਥ ਜਾਤ੍ਯਾਦੀਨਂ ਪਦਤ੍ਥਾਨਂ ਅਨੇਕਪ੍ਪਕਾਰਸਭਾਵਪਕਾਸਿਨੀ ਸਭਾਵਵੁਤ੍ਤਿ ਨਾਮ. ਏਸਾਵ ਜਾਤਿ ਗੁਣਾਦਿਚਤੁਬ੍ਬਿਧਪਦਤ੍ਥਾਨਂ ਸਰੂਪਸਙ੍ਖਾਤਜਾਤਿਯਾ ਤੇਹਿ ਆਕਾਰੇਹਿ ਪਟਿਪਾਦਨਤੋ ਉਪਚਾਰਤੋ ਜਾਤਿ ਨਾਮ ਹੋਤਿ. ਜਾਤ੍ਯਾਦਿਪਦਤ੍ਥਾਨਂਯੇਵ ਯਥਾਸਭਾਵਂ ਹਿਤ੍ਵਾ ਵਤ੍ਥੁਪਰਿਕਪ੍ਪਿਤਅਤਿਸਯੋਪਮਾਰੂਪਕਾਦਿਸਰੂਪਸਙ੍ਖਾਤਂ ਵਙ੍ਕਸਭਾਵਂ ਪਕਾਸੇਨ੍ਤੀ ਵਙ੍ਕਵੁਤ੍ਤਿ ਨਾਮ. ਯਭਾਵੋ ਚ ਵਙ੍ਕੋ ਚਾਤਿ ਚ, ਤੇਸਂ ਵੁਤ੍ਤੀਤਿ ਚ, ਅਲਂਕਰੋਨ੍ਤਿ ਏਤਾਹੀਤਿ ਚ, ਨਾਨਾ ਅਨੇਕਾ ਚ ਸਾ ਅਵਤ੍ਥਾ ਚਾਤਿ ਚ ਵਾਕ੍ਯਂ.
ਯਥਾ –
੧੬੬. ਲੀਲਾਵਿਕਨ੍ਤਿਸੁਭਗੋ,
ਦਿਸਾਥਿਰਵਿਲੋਕਨੋ;
ਬੋਧਿਸਤ੍ਤਙ੍ਕੁਰੋ ਭਾਸਂ,
ਵਿਰੋਚਿ ਵਾਚਮਾਸਭਿਂ.
੧੬੬. ‘‘ਯਥੇ’’ਤਿ ਤਂ ਉਦਾਹਰਤਿ. ਲੀਲਾਯ ਵਿਲਾਸੇਨ ਵਿਹਿਤਾਯ ਵਿਕਨ੍ਤਿਯਾ ਗਮਨੇਨ ਸਤ੍ਤਪਦਵੀਤਿਹਾਰਸਙ੍ਖਾਤੇਨ ਸੁਭਗੋ ਸੁਨ੍ਦਰੋ ਦਿਸਾਸੁ ਦਸਸੁ ਥਿਰਮਚਲਂ ਵਿਲੋਕਨਂ ਯਸ੍ਸ ਸੋ ਬੋਧਿਸਤ੍ਤਙ੍ਕੁਰੋ ਤਦਹੁਜਾਤੋ ਮਹਾਬੋਧਿਸਤ੍ਤੋ ਆਸਭਿਂ ਵਾਚਂ ‘‘ਅਗ੍ਗੋਹਮਸ੍ਮੀ’’ਤਿਆਦਿਕਮੁਤ੍ਤਮਂ ਨਿਬ੍ਭਯਵਚਨਂ ਭਾਸਂ ਵਦਨ੍ਤੋ ਵਿਰੋਚਿ ਵਿਸੇਸੇਨ ਰਮਣੀਯਤ੍ਤਂ ਪਤ੍ਤੋ. ਅਯਂ ਸਭਾਵਵੁਤ੍ਤਿ. ਏਵਂ ਜਾਤਿਸਭਾਵਵੁਤ੍ਯਾਦਯੋਪਿ ਪਰਿਕਪ੍ਪਨੀਯਾ.
੧੬੬. ਇਦਾਨਿ ਸਭਾਵਵੁਤ੍ਤਿਯਾ ਉਦਾਹਰਣਂ ਆਹ ‘‘ਯਥਾ – ਲੀਲਾਵਿਕਨ੍ਤਿ’’ਚ੍ਚਾਦਿ. ਲੀਲਾਵਿਕਨ੍ਤਿਸੁਭਗੋ ਵਿਲਾਸਗਮਨੇਨ ਸਤ੍ਤਪਦਵੀਤਿਹਾਰੇਨ ਸੁਨ੍ਦਰੋ ਦਿਸਾਥਿਰਵਿਲੋਕਨੋ ਦਸਦਿਸਾਸੁ ਅਚਲਓਲੋਕਨੋ ਬੋਧਿਸਤ੍ਤਙ੍ਕੁਰੋ ਮਹਾਬੋਧਿਸਤ੍ਤਙ੍ਕੁਰੋ ਆਸਭਿਂ ਵਾਚਂ ‘‘ਅਗ੍ਗੋਹਮਸ੍ਮੀ’’ਤਿਆਦਿਨਾ ਅਭੀਤਵਚਨਂ ਭਾਸਂ ਵਦਨ੍ਤੋ ਵਿਰੋਚਿ ਅਸੋਭੀਤਿ. ਇਹ ਬੋਧਿਸਤ੍ਤਸਙ੍ਖਾਤਸ੍ਸ ਦਬ੍ਬਸ੍ਸ ਲੀਲਾਵਿਕਨ੍ਤਿਦਿਸਾਥਿਰਵਿਲੋਕਨਵਚੋਨਿਚ੍ਛਾਰਣਸਙ੍ਖਤਾਨਂ ਅਵਤ੍ਥਾਨਂ ਪਕਾਸਿਤਤ੍ਤਾ ਦਬ੍ਬਸਭਾਵਵੁਤ੍ਤੀਤਿ ਞਾਤਬ੍ਬਾ. ਏਸਾਯੇਵ ਦਬ੍ਬਗਤਗਤ੍ਯਾਦਿਵਿਚਿਤ੍ਰਸਰੂਪਂ ਅਲਙ੍ਕਰਣਤੋ ਅਲਙ੍ਕਾਰੋ ਨਾਮ, ਦਬ੍ਬਗਤਗਤ੍ਯਾਦਯੋ ਪਨ ਅਲਂਕਿਰਿਯਮਾਨਤ੍ਤਾ ਅਲਂਕਿਰਿਯਾ ਨਾਮ. ਜਾਤਿਗੁਣਕ੍ਰਿਯਾਸਭਾਵਵੁਤ੍ਤਿਯੋਪਿ ਏਵਮੇਵ ਦਟ੍ਠਬ੍ਬਾ. ਲੀਲਾਯ ਯੁਤ੍ਤਾ ਵਿਕਨ੍ਤੀਤਿ ਚ, ਤਾਯ ਸੁਭਗੋਤਿ ਚ, ਦਿਸਾਸੁ ਥਿਰਂ ਵਿਲੋਕਨਂ ਯਸ੍ਸੇਤਿ ਚ, ਬੋਧਿਯਾ ਪਞ੍ਞਾਯ ਸਤ੍ਤੋਤਿ ਚ, ਸੋਯੇਵ ਅਙ੍ਕੁਰੋਤਿ ਚ, ਉਸਭਸ੍ਸ ਭਾਵੋਤਿ ਚ ਵਾਕ੍ਯਂ. ਉਸਭਸ੍ਸ ਭਾਵਸਙ੍ਖਾਤਾ ਅਕਮ੍ਪਨੀਯਾ ਠਿਤਿ ਆਸਭਂ ਨਾਮ, ਅਕਮ੍ਪਭਾਵਤੋ ਤੇਨ ਸਮਾਪਿ ਵਾਚਾ ਉਪਚਾਰਤੋ ਆਸਭੀ ਨਾਮ ਹੋਤਿ.
੧੬੭. ਵੁਤ੍ਤਿ ਵਤ੍ਥੁਸਭਾਵਸ੍ਸ, ਯਾ’ਞ੍ਞਥਾ ਸਾ ਪਰਾਭਵੇ;
ਤਸ੍ਸਾ’ਨਨ੍ਤਵਿਕਪ੍ਪਤ੍ਤਾ, ਹੋਤਿ ਬੀਜੋਪਦਸ੍ਸਨਂ.
੧੬੭. ਦੁਤਿਯਮਾਹ ‘‘ਵੁਤ੍ਤਿ’’ਚ੍ਚਾਦਿਨਾ. ਵਤ੍ਥੁਨੋ ਜਾਤ੍ਯਾਦਿਰੂਪਸ੍ਸ ਪਦਤ੍ਥਸ੍ਸ ਸਭਾਵੋ ਯਸ੍ਸਂ ਅਵਤ੍ਥਾਯਂ ਯਾਦਿਸਂ ਰੂਪਂ ਤਸ੍ਸ ਅਞ੍ਞਥਾਭਾਵੇਨ ਤਸ੍ਸ ਰੂਪਸ੍ਸ ਤਥੇਤਂ ਦਬ੍ਬਾਪਨੇਨ ਵੁਤ੍ਤਿ ਵਚਨਂ. ਪਰਾ ਭਵੇ ਅਞ੍ਞਾ ਵਙ੍ਕਵੁਤ੍ਤਿ ਨਾਮ ਸਿਯਾ. ਕਿਂ ਸਾ ਸਾਕਲ੍ਲੇਨ ਵਤ੍ਤੁਂ ਸਕ੍ਕਾਤਿ ਆਹ ‘‘ਤਸ੍ਸਾ’’ਇਚ੍ਚਾਦਿ. ਤਸ੍ਸਾ ਵਙ੍ਕਵੁਤ੍ਤਿਯਾ ਅਨਨ੍ਤਵਿਕਪ੍ਪਤ੍ਤਾ ਅਪਰਿਮਿਤਭੇਦਕਤ੍ਤਾ ਬੀਜਸ੍ਸ ਕਾਰਣਤ੍ਤਾ ਸਕਲਬ੍ਯਤ੍ਤਿਬ੍ਯਾਪਿਸਾਮਞ੍ਞਰੂਪਸ੍ਸ ਯਤੋ ਪਰੇ ਵਿਚਿਤ੍ਤਾਲਙ੍ਕਾਰਾ ਪਸਵਨ੍ਤਿ, ਉਪਦਸ੍ਸਨਂ ਕਥਨਂ ਹੋਤਿ ਨਿਰਵਸੇਸਾਭਿਧਾਨਸ੍ਸ ਕੇਨਾਪ੍ਯਸਕ੍ਕੁਣੇਯ੍ਯਤ੍ਤਾ.
੧੬੭. ਇਦਾਨਿ ਵਙ੍ਕਵੁਤ੍ਤਿਂ ਦਸ੍ਸੇਤਿ ‘‘ਵੁਤ੍ਤਿ’’ਚ੍ਚਾਦਿਨਾ. ਵਤ੍ਥੁਸਭਾਵਸ੍ਸ ਜਾਤ੍ਯਾਦਿਪਦਤ੍ਥਸਮ੍ਬਨ੍ਧਿਨੋ ਤਾਸੁ ਤਾਸੁ ਅਵਤ੍ਥਾਸੁ ਯੋ ਸਭਾਵੋ ਵਿਜ੍ਜਤਿ, ਤਸ੍ਸ ਸਭਾਵਸ੍ਸ ਅਞ੍ਞਥਾ ਵਿਜ੍ਜਮਾਨਾਕਾਰਂ ਹਿਤ੍ਵਾ ਵਤ੍ਤੁਪਰਿਕਪ੍ਪਿਤੇਨ ਅਤਿਸਯਉਪਮਾਰੂਪਕਾਦਿਅਞ੍ਞਪਕਾਰੇਨ ਯਾ ਵੁਤ੍ਤਿ ਯਂ ਕਥਨਂ ਅਤ੍ਥਿ, ਸਾ ਪਰਾਭਵੇ ਸਭਾਵਵੁਤ੍ਤਿਤੋ ਅਞ੍ਞਾ ਵਙ੍ਕਵੁਤ੍ਤਿ ਨਾਮ ਸਿਯਾ. ਤਸ੍ਸਾ ਵਙ੍ਕਵੁਤ੍ਤਿਯਾ ਅਨਨ੍ਤਵਿਕਪ੍ਪਤ੍ਤਾ ਅਪ੍ਪਮਾਣਪਕ੍ਖਤ੍ਤਾ ਕਥਨੇਨ ਪਰਿਸਮਾਪੇਤੁਂ ਅਸਕ੍ਕੁਣੇਯ੍ਯਤ੍ਤਾ ਨਯਤੋ ਤਸ੍ਸ ਅਨਨ੍ਤਪਕ੍ਖਸ੍ਸ ਪਰਿਗ੍ਗਹਣਤ੍ਥਂ ਬੀਜੋਪਦਸ੍ਸਨਂ ਕਾਰਣਮਤ੍ਤਸ੍ਸ ਨਿਦਸ੍ਸਨਂ ਹੋਤਿ. ਵਕ੍ਖਮਾਨਭੇਦਤੋ ਏਕਮੇਕਮ੍ਪਿ ਅਤ੍ਤਨਾ ਸਦਿਸਂ ਅਨਨ੍ਤਭੇਦਪਰਿਗ੍ਗਹਜਾਨਨਤ੍ਥਂ ਪਹੋਤੀਤਿ ਅਧਿਪ੍ਪਾਯੋ. ਵਤ੍ਥੂਨਂ ਸਭਾਵੋਤਿ ਚ, ਅਨਨ੍ਤਾ ਵਿਕਪ੍ਪਾ ਯਸ੍ਸ ਸਭਾਵਸ੍ਸੇਤਿ ਚ, ਤਸ੍ਸ ਭਾਵੋਤਿ ਚ, ਬੀਜਸ੍ਸ ਉਪਦਸ੍ਸਨਨ੍ਤਿ ਚ ਵਿਗ੍ਗਹੋ.
ਵਙ੍ਕਵੁਤ੍ਤਿਅਤ੍ਥਾਲਙ੍ਕਾਰਉਦ੍ਦੇਸਵਣ੍ਣਨਾ
੧੬੮. ਤਤ੍ਥਾ’ਤਿਸਯਉਪਮਾ-
ਰੂਪਕਾਵੁਤ੍ਤਿਦੀਪਕਂ;
ਅਕ੍ਖੇਪੋ’ਤ੍ਥਨ੍ਤਰਨ੍ਯਾਸੋ,
ਬ੍ਯਤਿਰੇਕੋ ਵਿਭਾਵਨਾ.
੧੬੯. ਹੇਤੁਕ੍ਕਮੋ ਪਿਯਤਰਂ, ਸਮਾਸਪਰਿਕਪ੍ਪਨਾ;
ਸਮਾਹਿਤਂ ਪਰਿਯਾਯ-ਵੁਤ੍ਤਿਬ੍ਯਾਜੋਪਵਣ੍ਣਨਂ.
੧੭੦. ਵਿਸੇਸ ਰੁਲ਼੍ਹਾਹਙ੍ਕਾਰਾ,
ਸਿਲੇਸੋ ਤੁਲ੍ਯਯੋਗਿਤਾ;
ਨਿਦਸ੍ਸਨਂ ਮਹਨ੍ਤਤ੍ਤਂ,
ਵਞ੍ਚਨਾ’ਪ੍ਪਕਤਤ੍ਥੁਤਿ.
੧੭੧. ਏਕਾਵਲਿ ਅਞ੍ਞਮਞ੍ਞਂ, ਸਹਵੁਤ੍ਤਿ ਵਿਰੋਧਿਤਾ;
ਪਰਿਵੁਤ੍ਤਿਬ੍ਭਮੋਭਾਵੋ, ਮਿਸ੍ਸ’ਮਾਸੀ ਰਸੀ ਇਤਿ.
੧੭੨. ਏਤੇ ਭੇਦਾ ਸਮੁਦ੍ਦਿਟ੍ਠਾ, ਭਾਵੋ ਜੀਵਿਤਮੁਚ੍ਚਤੇ;
ਵਙ੍ਕਵੁਤ੍ਤੀਸੁ ਪੋਸੇਤਿ, ਸਿਲੇਸੋ ਤੁ ਸਿਰਿਂ ਪਰਂ.
੧੬੮-੧੭੨. ਯਥੋਦ੍ਦੇਸਂ ਨਿਦ੍ਦਿਸਿਤੁਕਾਮੋ ਉਦ੍ਦਿਸਤਿ ‘‘ਤਤ੍ਥੇ’’ਚ੍ਚਾਦਿ. ਤਤ੍ਥਾਤਿ ਤਸ੍ਸਂ ਵਙ੍ਕਵੁਤ੍ਤਿਯਂ ‘‘ਏਤੇ ਭੇਦਾ ਸਮੁਦ੍ਦਿਟ੍ਠਾ’’ਤਿ ਇਮਿਨਾ ਸਮ੍ਬਨ੍ਧੋ. ਸਮੁਦ੍ਦਿਟ੍ਠਾਤਿ ਸਙ੍ਖੇਪਨਯੇਨ ਵੁਤ੍ਤਾ. ਅਤਿਸਯੋ ਉਪਮਾ ਰੂਪਕਂ ਆਵੁਤ੍ਤਿ ਦੀਪਕਞ੍ਚ, ਸਮਾਸੋ ਸਮਾਸਵੁਤ੍ਤਿ ਪਰਿਕਪ੍ਪਨਾ ਚ, ਵਿਸੇਸੋ ਰੁਲ਼੍ਹਾਹਙ੍ਕਾਰੋ ਚ, ਜੀਵਿਤਮੁਚ੍ਚਤੇਤਿ ਤਦਭਾਵੇ ਬਨ੍ਧਸ੍ਸ ਛਵਸ੍ਸੇਵ ਹੇਯ੍ਯਤ੍ਤਾ ਵੁਤ੍ਤਂ, ਸਿਲੇਸੋ ਤੁ ਵਙ੍ਕਵੁਤ੍ਤੀਸੁ ਸਭਾਵਵੁਤ੍ਤਿਂ ਹਿਤ੍ਵਾ ਵਤ੍ਥੁਸਭਾਵਤੋ ਅਞ੍ਞਥਾ ਯਥਾ ਤਥਾ ਪਰਿਕਪ੍ਪਨਰੂਪਾਸੁ ਅਤਿਸਯਾਦੀਸੁ ਵੁਤ੍ਤੀਸੁ ਪਰਂ ਸਿਰਿਂ ਕਨ੍ਤਿਂ ਪੋਸੇਤਿ ਤਂ ਪੂਰੇਤਿ ਆਵਹਤੀਤਿ.
੧੬੮-੧੭੨. ਭੇਦਵਨ੍ਤਾਨਂ ਪਦਤ੍ਥਾਨਂ ਸਭਾਵਕਥਨਂ ਉਦ੍ਦੇਸਕ੍ਕਮੇਨ ਪਾਕਟਂ ਹੋਤੀਤਿ ਵਤ੍ਤਮਾਨੇਹਿ ਅਲਙ੍ਕਾਰੇਹਿ ਉਦ੍ਦਿਸਨ੍ਤੋ ‘‘ਤਤ੍ਥਾਤਿਸਯ…ਪੇ… ਰਸੀ’’ਤਿ ਗਾਥਾਚਤੁਕ੍ਕਮਾਹ. ਤਤ੍ਥ ਤਤ੍ਥਾਤਿ ਤਿਸ੍ਸਂ ਵਙ੍ਕਵੁਤ੍ਤਿਯਂ ਇਤਿ ਏਵਂ ਏਤੇ ਪਞ੍ਚਤਿਂਸ ਭੇਦਾ ਸਮੁਦ੍ਦਿਟ੍ਠਾ ਸਙ੍ਖੇਪੇਨ ਵੁਤ੍ਤਾਤਿ. ਏਤੇਸਂ ਪਨ ਪਦਾਨਂ ਅਤ੍ਥੋ ਨਿਦ੍ਦੇਸੇ ਆਵਿਭਵਿਸ੍ਸਤਿ. ਇਮਿਨਾ ਭਾਵੋ ਚ ਸਿਲੇਸੋ ਚ ਅਤਿਪ੍ਪਸਤ੍ਥੋਤਿ ਦੀਪੇਤਿ. ਭਾਵੋ ਭਾਵਾਲਙ੍ਕਾਰੋ ਜੀਵਿਤਂ ਬਨ੍ਧਸ੍ਸ ਪਾਣਭੂਤੋਤਿ ਵੁਚ੍ਚਤੇ, ਭਾਵਰਹਿਤਸ੍ਸ ਬਨ੍ਧਸ੍ਸ ਛਵਸਰੀਰਸ੍ਸ ਵਿਯ ਅਨੁਪਾਦੇਯ੍ਯਤ੍ਤਾ, ਸਿਲੇਸੋ ਤੁ ਸਿਲੇਸਾਲਙ੍ਕਾਰੋ ਪਨ ਵਙ੍ਕਵੁਤ੍ਤੀਸੁ ਅਤਿਸਯੋਪਮਾਦਿਵਙ੍ਕਵੁਤ੍ਤੀਸੁ ਪਰਮੁਕ੍ਕਂਸਭੂਤਂ ਸਿਰਿਂ ਸੋਭਂ ਪੋਸੇਤਿ ਪੂਰੇਤਿ.
ਨਿਦ੍ਦੇਸਵਣ੍ਣਨਾ
੧੭੩. ਪਕਾਸਿਕਾ ਵਿਸੇਸਸ੍ਸ,
ਸਿਯਾ’ਤਿਸਯਵੁਤ੍ਤਿ ਯਾ;
ਲੋਕਾਤਿਕ੍ਕਨ੍ਤਵਿਸਯਾ,
ਲੋਕਿਯਾਤਿ ਚ ਸਾ ਦ੍ਵਿਧਾ.
੧੭੩. ਤਤ੍ਥਾਤਿਸਯਵੁਤ੍ਤੀਨਂ ਤਾਵ ਨਿਦ੍ਦਿਸਨ੍ਤੋ ਆਹ ‘‘ਪਕਾਸਿਕਾ’’ਇਚ੍ਚਾਦਿ. ਵਿਸੇਸਸ੍ਸ ਵਤ੍ਥੁਗਤਸ੍ਸਾਤਿਮਤ੍ਤਸ੍ਸ ਪਕਾਸਿਕਾਯਾਤਿ ਅਨੁਵਦਿਤ੍ਵਾ ਸਾ ਅਤਿਸਯਵੁਤ੍ਤਿ ਸਿਯਾਤਿ ਵਿਧੀਯਤੇ, ਅਤਿਸਯਸ੍ਸ ਵਤ੍ਥੁਨੋ ਉਕ੍ਕਂਸਸ੍ਸ ਪਟਿਪਾਦਿਕਾ ਵੁਤ੍ਤਿ ਅਤਿਸਯਵੁਤ੍ਤਿ. ਸਾ ਚ ਦੁਵਿਧਾਤਿ ਆਹ ‘‘ਲੋਕ’’ਇਚ੍ਚਾਦਿ. ਲੋਕਂ ਲੋਕਪ੍ਪਤੀਤਿਂ ਅਤਿਕ੍ਕਨ੍ਤੋ ਵਿਸਯੋ ਗੋਚਰੋ ਯਸ੍ਸਾ ਸਾ ਲੋਕਾਤਿਕ੍ਕਨ੍ਤਵਿਸਯਾ ਚ ਲੋਕੇ ਭਵਾ ਲੋਕਠਿਤਿਮਨਤਿਕ੍ਕਨ੍ਤਤ੍ਤਾਤਿ ਲੋਕਿਯਾ ਚਾਤਿ ਅਤਿਸਯਵੁਤ੍ਤਿ ਦ੍ਵਿਧਾ ਦ੍ਵਿਪ੍ਪਕਾਰਾ ਭਵਤਿ.
੧੭੩. ਇਦਾਨਿ ਉਦ੍ਦੇਸਕ੍ਕਮੇਨ ਅਤਿਸਯਵੁਤ੍ਤਿਂ ਦਸ੍ਸੇਤਿ ‘‘ਪਕਾਸਿ’’ਚ੍ਚਾਦਿਨਾ. ਵਿਸੇਸਸ੍ਸ ਜਾਤ੍ਯਾਦਿਪਦਤ੍ਥਗਤਅਧਿਕਵਿਸੇਸਸ੍ਸ ਯਾ ਵੁਤ੍ਤਿ ਪਕਾਸਿਕਾ, ਸਾ ਅਤਿਸਯਵੁਤ੍ਤਿ ਨਾਮ ਸਿਯਾ, ਸਾ ਅਤਿਸਯਵੁਤ੍ਤਿ ਲੋਕਾਤਿਕ੍ਕਨ੍ਤਵਿਸਯਾ ਚ ਜਾਤ੍ਯਾਦਿਪਦਤ੍ਥਾਨਂ ਯਥਾਸਭਾਵਸਙ੍ਖਤਲੋਕਠਿਤ੍ਯਾਤਿਕ੍ਕਨ੍ਤਵਿਸਯਤ੍ਤਾ ਲੋਕਾਤਿਕ੍ਕਨ੍ਤ ਵਿਸਯਾਤਿ ਚ ਲੋਕਿਯਾਤਿ ਚ ਯਥਾਵੁਤ੍ਤਲੋਕਮਨਤਿਕ੍ਕਮ੍ਮ ਪਵਤ੍ਤਨਤੋ ਲੋਕਿਯਾਤਿ ਚੇਵਂ ਦ੍ਵਿਧਾ ਦ੍ਵਿਪ੍ਪਕਾਰਾ ਹੋਨ੍ਤਿ. ਵਦਤੀਤਿ ਵੁਤ੍ਤਿ, ਅਤਿਸਯਸ੍ਸ ਵੁਤ੍ਤੀਤਿ ਚ, ਲੋਕਂ ਅਤਿਕ੍ਕਨ੍ਤੋ ਵਿਸਯੋ ਏਤਿਸ੍ਸਾਤਿ ਚ, ਲੋਕੇ ਭਵਾਤਿ ਚ ਵਿਗ੍ਗਹੋ. ‘‘ਵਿਸੇਸਸ੍ਸ ਪਕਾਸਿਕਾ’’ਤਿ ਪਸਿਦ੍ਧਗੁਣਾਨੁਵਾਦੇਨ ਸਾ ਅਤਿਸਯਵੁਤ੍ਤਿ ਸਿਯਾਤਿ ਅਪਸਿਦ੍ਧਂ ਅਤਿਸਯਵੁਤ੍ਤਿਵਿਧਾਨਂ ਕਰੋਤਿ, ਯਥਾ ‘‘ਯੋ ਕੁਣ੍ਡਲੀ, ਸੋ ਦੇਵਦਤ੍ਤੋ’’ਤਿ. ਅਨੁਵਾਦਕਅਨੁਵਾਦਨੀਯਭੇਦੋ ਉਪਰਿਪ੍ਯੇਵਮੇਵ ਦਟ੍ਠਬ੍ਬੋ.
੧੭੪. ਲੋਕਿਯਾਤਿਸਯਸ੍ਸੇ’ਤੇ,
ਭੇਦਾ ਯੇ ਜਾਤਿਆਦਯੋ;
ਪਟਿਪਾਦੀਯਤੇ ਤ੍ਵ’ਜ੍ਜ,
ਲੋਕਾਤਿਕ੍ਕਨ੍ਤਗੋਚਰਾ.
੧੭੪. ਅਯਂ ਦ੍ਵਿਪ੍ਪਕਾਰਾ ਅਤਿਸਯਵੁਤ੍ਤਿ ਸਭਾਵਵੁਤ੍ਯਾਦੀਹਿ ਭਿਨ੍ਨਾਤਿ ਚੇ? ਆਹ ‘‘ਲੋਕ’’ਇਚ੍ਚਾਦਿ. ਜਾਤਿਆਦਯੋ ਯਤੋ ਪਦਤ੍ਥਸ੍ਸ ਵਿਚਿਤ੍ਤਂ ਸਰੂਪਂ ਵਦਤੀਤਿ ਵਿਚਿਤ੍ਤਸਰੂਪਪਟਿਪਾਦਿਕਾ ਸਭਾਵਵੁਤ੍ਤਿਪਿ ਅਲਙ੍ਕਾਰੋ, ਅਲਙ੍ਕਾਰਿਯਂ ਤੁ ਵਤ੍ਥੁਮਤ੍ਤਂ, ਤਤੋ ਸਭਾਵਵੁਤ੍ਯਾਦਯੋ ਯੇ ਭੇਦਾ ਵਿਸੇਸਾ, ਏਤੇ ਲੋਕਿਯਾਤਿਸਯਸ੍ਸ ਭੇਦਾ, ਯਥਾ ਸਰੀਰੇ ਯਂ ਸਹਜਂ ਸੁਨ੍ਦਰਤ੍ਤਂ, ਤਸ੍ਸ ਪੋਸਕਾਪਿ ਮੁਤ੍ਤਾਵਲਿਪ੍ਪਭੁਤਿ ਅਲਙ੍ਕਾਰੋਤਿ ਵੁਚ੍ਚਤਿ, ਏਵਂ ਬਨ੍ਧੇਪ੍ਯਲਙ੍ਕਾਰਿਯਵਤ੍ਥੁਨਿਮਿਤ੍ਤਂ ਧਮ੍ਮਤ੍ਤਂ ਯਾਯ ਉਕ੍ਕਂਸੀਯਤਿ, ਸਾ ਉਕ੍ਕਂਸੋਤਿ ਵੁਚ੍ਚਤਿ. ਸਾ ਚ ਵੁਤ੍ਤਿ ਅਲਙ੍ਕਾਰਸਦ੍ਦੇਨ ਵੁਚ੍ਚਤੇ. ਸਾ ਪਨ ਅਤਿਸਯਵੁਤ੍ਤਿਯੇਵ. ਤੇਨੇਵਾਹ ‘‘ਲੋਕਿਯਾਤਿਸਯਸ੍ਸੇਤੇ, ਭੇਦਾ ਯੇ ਜਾਤਿਆਦਯੋ’’ਤਿ. ਯਤੋ ਏਵਂ, ਤਤੋ ਲੋਕਾਤਿਕ੍ਕਨ੍ਤਵਿਸਯਾ ਚ ਵਿਸੁਂ ਦਸ੍ਸਨੀਯਾਤਿ ਆਹ ‘‘ਪਟੀ’’ਤਿਆਦਿ. ਤੁਸਦ੍ਦੋ ਭੇਦੇ. ਅਜ੍ਜ ਤੁ ਇਦਾਨਿ ਪਨ ਲੋਕਾਤਿਕ੍ਕਨ੍ਤਗੋਚਰਾ ਪਟਿਪਾਦੀਯਤੇਤਿ ਸਮ੍ਬਨ੍ਧੋ.
੧੭੪. ਇਦਾਨਿ ਏਸਾ ਦ੍ਵਿਪ੍ਪਕਾਰਾਪਿ ਅਤਿਸਯਵੁਤ੍ਤਿਸਭਾਵਵੁਤ੍ਯਾਦੀਹਿ ਅਨਞ੍ਞਾਤਿ ਦਸ੍ਸੇਤੁਂ ‘‘ਲੋਕਿਯੇ’’ਚ੍ਚਾਦਿਮਾਹ. ਜਾਤਿਆਦਯੋ ਜਾਤਿਗੁਣਾਦਿਪਦਤ੍ਥਗਤਵਿਚਿਤ੍ਤਸਰੂਪਸ੍ਸ ਪਕਾਸਨਤੋ ਨਿਸ੍ਸਯਵੋਹਾਰੇਨ ‘‘ਜਾਤ੍ਯਾਦਯੋ’’ਤਿ ਨਿਦ੍ਦਿਟ੍ਠਾ ਜਾਤਿਸਭਾਵਵੁਤ੍ਤਿਗੁਣਸਭਾਵਵੁਤ੍ਯਾਦਯੋ ਯੇ ਭੇਦਾ ਵਿਸੇਸਾ, ਏਤੇ ਲੋਕਿਯਾਤਿਸਯਸ੍ਸ ਲੋਕਿਯਾਤਿਸਯਵੁਤ੍ਤਿਯਾਯੇਵ ਭੇਦਾ ਅਵਯਵਾ. ਤਤ੍ਥ ਲੋਕਿਯਾਤਿਸਯਵੁਤ੍ਤਿ ਨਾਮ ਜਾਤਿਸਭਾਵਵੁਤ੍ਤਿਗੁਣਸਭਾਵਵੁਤ੍ਯਾਦਯੋਯੇਵਾਤਿ. ਏਸਾਯੇਵ ਵਿਚਿਤ੍ਰਰੂਪਪਟਿਪਾਦਿਕਾ ਉਕ੍ਕਂਸਾਤਿ ਚ ਵੁਚ੍ਚਤਿ. ਏਵਂ ਲੋਕਿਯਾਤਿਸਯਵੁਤ੍ਤਿਯਾ ‘‘ਲੀਲਾਵਿਕਨ੍ਤਿਸੁਭਗੋ’’ਤਿ ਉਦਾਹਰਣਸ੍ਸ ਗਮ੍ਯਮਾਨਤ੍ਤਾ ਵਕ੍ਖਮਾਨਂ ਪਟਿਜਾਨਾਤਿ ‘‘ਪਟਿਪਾਦੀਯਤੇ’’ਚ੍ਚਾਦਿਨਾ. ਅਜ੍ਜ ਤੁ ਇਦਾਨਿ ਪਨ ਲੋਕਾਤਿਕ੍ਕਨ੍ਤਗੋਚਰਾ ਅਤਿਸਯਵੁਤ੍ਤਿ ਪਟਿਪਾਦੀਯਤੇ ਉਦਾਹਰਣਤੋ ਨਿਪ੍ਫਾਦੀਯਤਿ. ਲੋਕੇ ਭਵੋਤਿ ਚ, ਤਸ੍ਸ ਅਤਿਸਯੋ ਆਧਿਕ੍ਕਮਿਤਿ ਚ ਵਾਕ੍ਯਂ.
੧੭੫. ਪਿਵਨ੍ਤਿ ਦੇਹਕਨ੍ਤੀ ਯੇ,
ਨੇਤ੍ਤਞ੍ਜਲਿਪੁਟੇਨ ਤੇ;
ਨਾ’ਲਂ ਹਨ੍ਤੁਂ ਜਿਨੇ’ਸਂ ਤ੍ਵਂ,
ਤਣ੍ਹਂ ਤਣ੍ਹਾਹਰੋਪਿ ਕਿਂ.
੧੭੫. ਤਮੁਦਾਹਰਤਿ ‘‘ਪਿਵਨ੍ਤਿ’’ਚ੍ਚਾਦਿਨਾ. ਜਿਨ ਤੇ ਦੇਹਕਨ੍ਤੀ ਸਰੀਰਸੋਭਾਯੋ ਯੇ ਜਨਾ ਨੇਤ੍ਤਞ੍ਜਲਿਪੁਟੇਨ ਅਤ੍ਤਨੋ ਨਯਨਦ੍ਵਨ੍ਦਸਙ੍ਖਾਤੇਨ ਅਞ੍ਜਲਿਪੁਟੇਨ ਪਿਵਨ੍ਤਿ, ਏਸਂ ਜਨਾਨਂ ਤਣ੍ਹਂ ਪਿਪਾਸਂ ਲੋਭਮੇਵ ਵਾ ਹਰਤਿ ਅਨੁਪਤਤਿ [ਅਪਨਯਤਿ (?)]. ਤਣ੍ਹਾਹਰੋਪਿ ਸਮਾਨੋ ਤ੍ਵਂ ਹਨ੍ਤੁਂ ਨਿਵਤ੍ਤਿਤੁਂ ਕਿਂ ਨਾਲਂ ਕਸ੍ਮਾ ਅਸਮਤ੍ਥੋਸਿ. ਤਣ੍ਹਾਹਰਾ ਨਾਮ ਤਣ੍ਹਮੇਵ ਨੁਦਨ੍ਤਿ. ਅਤ੍ਰ ਹਨਨ੍ਤਾਮਪਿਹ ਸਮ੍ਪਨੁਦਤਿ ਲੋਕਠਿਤਿਂ ਅਤਿਕ੍ਕਮ੍ਮ ਦੇਹਕਨ੍ਤਿਯਾ ਬਹੁਤ੍ਤਨਧਮ੍ਮੋ ਵੁਤ੍ਤੋ.
੧੭੫. ਇਦਾਨਿ ਪਟਿਞ੍ਞਾਤਾਨੁਸਾਰੇਨ ਪਟਿਪਾਦੇਤਿ ‘‘ਪਿਵਨ੍ਤਿ’’ਚ੍ਚਾਦਿਨਾ. ਭੋ ਜਿਨ ਤੇ ਤੁਯ੍ਹਂ ਦੇਹਕਨ੍ਤੀ ਸਰੀਰਸੋਭਾਯੋ ਯੇ ਜਨਾ ਨੇਤ੍ਤਞ੍ਜਲਿਪੁਟੇਨ ਨੇਤ੍ਤਸਙ੍ਖਾਤੇਨ ਹਤ੍ਥਪੁਟੇਨ ਪਿਵਨ੍ਤਿ, ਏਸਂ ਸਾਧੁਜਨਾਨਂ ਤਣ੍ਹਂ ਪਿਪਾਸਂ ਲੋਭਮੇਵ ਵਾ ਤਣ੍ਹਾਹਰੋਪਿ ਤ੍ਵਂ ਸਬ੍ਬੇਸਂ ਤਣ੍ਹਾਵਿਨਾਸਕੋਪਿ ਹਨ੍ਤੁਂ ਨਿਵਾਰੇਤੁਂ ਕਿਂ ਨਾਲਂ ਕਸ੍ਮਾ ਅਸਮਤ੍ਥੋਸੀਤਿ. ਏਤ੍ਥ ਪਿਵਨਂ ਨਾਮ ਪਿਪਾਸਂ ਵਿਨੇਤੀਤਿ ਲੋਕਸਭਾਵੋ. ਤਣ੍ਹਂ ਹਨ੍ਤੁਂ ਨਾਲਮਿਤਿ ਲੋਕਸਭਾਵਮਤਿਕ੍ਕਨ੍ਤਤ੍ਥੋ. ਕਨ੍ਤੀਨਂ ਅਧਿਕਪਿਯਤਾ ਅਤਿਸਯਧਮ੍ਮੋ, ਤਸ੍ਸ ਵੁਤ੍ਤਿ ਪਨ ਤਣ੍ਹਂ ਹਨ੍ਤੁਂ ਨਾਲਮਿਤਿ ਲੋਕਾਤਿਕ੍ਕਨ੍ਤਅਤ੍ਥਂ ਵਿਸਯਂ ਕਤ੍ਵਾ ਪਵਤ੍ਤੋ ਹੋਤਿ. ਸਾ ਪਨ ਕਥੇਤੁਮਿਚ੍ਛਿਤਂ ਕਨ੍ਤੀਨਂ ਅਧਿਕਪਿਯਤਂ ਤਣ੍ਹਾਹਨਨੇ ਅਸਮਤ੍ਥਂ ਵਤ੍ਵਾ ਦੀਪੇਤੀਤਿ ਵਙ੍ਕਵੁਤ੍ਤਿ ਨਾਮ. ਵੁਚ੍ਚਮਾਨਾਨਂ ਉਪਮਾਰੂਪਕਾਦੀਨਮ੍ਪਿ ਵਙ੍ਕਵੁਤ੍ਤਿਤਾ ਇਚ੍ਛਿਤਤ੍ਥਸ੍ਸ ਪਕਾਰਨ੍ਤਰੇਨ ਪਕਾਸਨਤੋਯੇਵ. ਯਥਾ ਨਾਮ ਸਰੀਰਸਹਜਂ ਪੀਨਤ੍ਤਾਦਿਸੁਨ੍ਦਰਤ੍ਤਂ ਉਦ੍ਦੀਪਨਾਕਾਰੇਨ ਠਿਤਾ ਕਟਕਉਣ੍ਹੀਸਹਾਰਾਦਯੋ ਅਲਙ੍ਕਾਰਾ ਨਾਮ ਭਵਨ੍ਤਿ, ਏਵਂ ਬਨ੍ਧਸਰੀਰਸਙ੍ਖਾਤੇ ਅਲਙ੍ਕਰਣੀਯਵਤ੍ਥੁਮ੍ਹਿ ਵਿਜ੍ਜਮਾਨਅਤਿਪਿਯਤਾਦਿਮੇਵ ਉਦ੍ਦੀਪੇਤ੍ਵਾ ਅਲਙ੍ਕੁਰੁਮਾਨਾ ‘‘ਤਣ੍ਹਾਹਰੋਸਿ ਤ੍ਵਂ ਏਸਂ ਕਨ੍ਤੀ ਪਿਵਨ੍ਤਾਨਂ ਤਣ੍ਹਂ ਹਨ੍ਤੁਂ ਨਾਲ’’ਮਿਤਿ ਵਾਚਾਭਙ੍ਗੀ ਅਲਙ੍ਕਾਰੋ ਨਾਮ. ਅਲਙ੍ਕਾਰਿਯਂ ਨਾਮ ਅਲਙ੍ਕਾਤਬ੍ਬਕਨ੍ਤਿਪਿਯਤਾਯ ਬਹੁਤ੍ਤਨ੍ਤਿ. ਉਤ੍ਤਰਿਪਿ ਅਲਙ੍ਕਾਰਅਲਙ੍ਕਾਰਿਯਵਿਭਾਗੋ ਚ ਅਨੁਰੂਪਤੋ ਯੋਜਨਕ੍ਕਮੋ ਚ ਏਵਮੇਵ ਦਟ੍ਠਬ੍ਬੋ. ਦੇਹੇ ਕਨ੍ਤੀਤਿ ਚ, ਅਞ੍ਜਲੀਯੇਵ ਪੁਟੋਤਿ ਚ, ਨੇਤ੍ਤਾਨਿਯੇਵ ਅਞ੍ਜਲਿਪੁਟੋਤਿ ਚ, ਤਣ੍ਹਂ ਹਰਤੀਤਿ ਚ ਵਿਗ੍ਗਹੋ.
੧੭੬. ਉਪਮਾਨੋਪਮੇਯ੍ਯਾਨਂ, ਸਧਮ੍ਮਤ੍ਤਂ ਸਿਯੋ’ਪਮਾ;
ਸਦ੍ਦਤ੍ਥਗਮ੍ਮਾ ਵਾਕ੍ਯਤ੍ਥ-ਵਿਸਯਾਤਿ ਚ ਸਾ ਤਿਧਾ.
੧੭੬. ਉਪਮਂ ਨਿਦ੍ਦਿਸਤਿ ‘‘ਉਪਮਾਨੇ’’ਚ੍ਚਾਦਿਨਾ. ਉਪਮੀਯਤੇ ਅਨੇਨਾਤਿ ਉਪਮਾਨਂ, ਪਦੁਮਾਦਿਕਵਤ੍ਥੁ. ਪਦੁਮਾਦਿਕੋ ਤੁ ਸਦ੍ਦੋ ਉਪਮਾਨਵਾਚਕੋ. ਉਪਮੀਯਤੀਤਿ ਉਪਮੇਯ੍ਯਂ, ਮੁਖਾਦਿਕਵਤ੍ਥੁ. ਮੁਖਾਦਿਕੋ ਸਦ੍ਦੋ ਤੁ ਉਪਮੇਯ੍ਯਵਾਚਕੋ. ਤੇਸਂ ਉਪਮਾਨੋਪਮੇਯ੍ਯਾਨਂ ਪਦੁਮਾਦਿਮੁਖਾਦਿਵਤ੍ਥੂਨਞ੍ਚ. ਸਧਮ੍ਮਤ੍ਤਨ੍ਤਿ ਸਮਾਨੋ ਧਮ੍ਮੋ ਕਨ੍ਤਿਮਨ੍ਤਤਾ ਯਸ੍ਸ ਸੋ ਸਧਮ੍ਮੋ, ਤਸ੍ਸ ਭਾਵੋ ਸਧਮ੍ਮਸਦ੍ਦਸ੍ਸ ਪਵਤ੍ਤਿਨਿਮਿਤ੍ਤਸਮਾਨੇਨ ਧਮ੍ਮੇਨ ਸਹ ਸਮ੍ਬਨ੍ਧੋ ਸਧਮ੍ਮਤ੍ਤਂ ਉਪਮਾਨੋਪਮੇਯ੍ਯਪਤਿਟ੍ਠਿਤਂ ਉਪਮਾ ਸਿਯਾ, ਉਪਮੀਯਤਿ ਯਥਾਵੁਤ੍ਤੋ ਸਮ੍ਬਨ੍ਧੋਤਿ ਕਤ੍ਵਾ. ਸਾ ਪਨਾਲਙ੍ਕਾਰਿਯਸ੍ਸ ਧਮ੍ਮਸ੍ਸਾਤਿਸਯਪਟਿਪਾਦਨਪ੍ਪਕਾਰੋ. ਕਤਿਵਿਧਾ ਸਾਤਿ ਆਹ ‘‘ਸਦ੍ਦ’’ਇਚ੍ਚਾਦਿ. ਸਦ੍ਦੋ ਚ ਅਤ੍ਥੋ ਚ, ਤੇਹਿ ਗਮ੍ਮਾ ਪਤੀਯਮਾਨਾ ਸਦ੍ਦਤ੍ਥਗਮ੍ਮਾ. ਵਾਕ੍ਯਂ ਪਦਸਮੁਦਾਯੋ. ਤਸ੍ਸ ਅਤ੍ਥੋ ਵਿਸਯੋ ਗੋਚਰੋ ਯਸ੍ਸਾ ਵਾਕ੍ਯਤ੍ਥਵਿਸਯਾਤਿ ਚ ਸਾ ਉਪਮਾ ਤਿਵਿਧਾ ਸਦ੍ਦਗਮ੍ਮਅਤ੍ਥਗਮ੍ਮਵਾਕ੍ਯਤ੍ਥਵਿਸਯਾਤਿ ਤਿਧਾ ਹੋਤਿ.
੧੭੬. ਇਦਾਨਿ ਉਪਮਾਲਙ੍ਕਾਰਂ ਨਿਦ੍ਦਿਸਤਿ ‘‘ਉਪਮਾਨੋ’’ਚ੍ਚਾਦਿਨਾ. ਉਪਮਾਨੋਪਮੇਯ੍ਯਾਨਂ ਚਨ੍ਦਨੀਲੁਪ੍ਪਲਦਲਾਭਾਦੀਨਂ ਆਨਨਨਯਨਾਦੀਨਞ੍ਚ ਪਦਤ੍ਥਾਨਂ ਸਧਮ੍ਮਤ੍ਤਂ ਕਨ੍ਤਿਮਨ੍ਤਤਾਪੀਨਤਾਦਿਤੁਲ੍ਯਧਮ੍ਮਸਮ੍ਬਨ੍ਧੋ ਉਪਮਾ ਨਾਮ ਸਿਯਾ, ਸਾ ਅਲਙ੍ਕਰਣੀਯਵਤ੍ਥੁਨੋ ਆਧਿਕ੍ਕਪਟਿਪਾਦਨਪ੍ਪਕਾਰਾ ਉਪਮਾ ਸਦ੍ਦਤ੍ਥਗਮ੍ਮਾ ਸਦ੍ਦਗਮ੍ਮਾ ਚ ਅਤ੍ਥਗਮ੍ਮਾ ਚ ਵਾਕ੍ਯਤ੍ਥਵਿਸਯਾ ਚ, ਇਤਿ ਏਵਂ ਤਿਧਾ ਤਿਪ੍ਪਕਾਰਾ ਹੋਤਿ. ਏਤ੍ਥ ਉਪਮਾਨੋਪਮੇਯ੍ਯਭੂਤਾਨਂ ਚਨ੍ਦਾਨਨਾਦਿਪਦਤ੍ਥਾਨਂ ਸਧਮ੍ਮਸਙ੍ਖਤੋ ਅਞ੍ਞਮਞ੍ਞਤੁਲ੍ਯਕਨ੍ਤਿਮਨ੍ਤਤਾਪੀਨਤਾਦਿਧਮ੍ਮਯੋਗੋ ਪਦਤ੍ਥਾਨਂ ਉਪਮਤ੍ਥਸ੍ਸ ਪਤਿਟ੍ਠਿਤਤ੍ਤਾ ਉਪਟ੍ਠਾਨਤਾਯ ਉਪਮਾ ਨਾਮ ਹੋਤਿ, ਤਨ੍ਨਿਸ੍ਸਯਚਨ੍ਦਾਦਯੋ ਪਨ ਨਿਸ੍ਸਿਤਵੋਹਾਰੇਨ ਉਪਮਾ ਨਾਮ ਹੋਤਿ, ਉਪਮਾਨਭੂਤਚਨ੍ਦਾਦਿਅਤ੍ਥਪਟਿਪਾਦਕੋ ਚਨ੍ਦਿਮਾਦਿਸਦ੍ਦੋਪਿ ਤਦਤ੍ਥੇਨ ਉਪਮਾ ਨਾਮ ਹੋਤਿ, ਉਪਮੇਯ੍ਯੁਪਮੇਯ੍ਯਨਿਸ੍ਸਯਤਪ੍ਪਟਿਪਾਦਕਾਨਮ੍ਪਿ ਉਪਮੇਯ੍ਯਭਾਵੋ ਏਵਮੇਵ ਦਟ੍ਠਬ੍ਬੋ. ਉਪਮੀਯਤੇ ਅਨੇਨਾਤਿ ਉਪਮਾਨਨ੍ਤਿ ਕਤ੍ਵਾ ਚਨ੍ਦਾਦਿ ਉਪਮਾਨਂ ਵੁਚ੍ਚਤਿ, ਉਪਮੀਯਤੀਤਿ ਉਪਮੇਯ੍ਯਂ, ਆਨਨਾਦਿ, ਉਪਮਾਨਞ੍ਚ ਉਪਮੇਯ੍ਯਞ੍ਚਾਤਿ ਚ, ਸਮਾਨੋ ਚ ਸੋ ਧਮ੍ਮੋ ਚੇਤਿ ਚ, ਤਸ੍ਸ ਭਾਵੋਤਿ ਚ, ਸਦ੍ਦੋ ਚ ਅਤ੍ਥੋ ਚਾਤਿ ਚ, ਤੇਹਿ ਗਮ੍ਮਾਤਿ ਚ, ਵਾਕ੍ਯਸ੍ਸ ਅਤ੍ਥੋਤਿ ਚ, ਸੋ ਵਿਸਯੋ ਯਸ੍ਸਾ ਉਪਮਾਯਾਤਿ ਚ ਵਾਕ੍ਯਂ.
੧੭੭. ਸਮਾਸਪਚ੍ਚਯੇਵਾਦੀ, ਸਦ੍ਦਾ ਤੇਸਂ ਵਸਾ ਤਿਧਾ;
ਸਦ੍ਦਗਮ੍ਮਾ ਸਮਾਸੇਨ, ਮੁਨਿਨ੍ਦੋ ਚਨ੍ਦਿਮਾਨਨੋ.
੧੭੭. ਤਤ੍ਥ ਸਦ੍ਦਗਮ੍ਮਾਪਿ ਤਿਧਾ ਸਿਯਾਤਿ ਦਸ੍ਸੇਤੁਮਾਹ ‘‘ਸਮਾਸ’’ਇਚ੍ਚਾਦਿ. ਸਮਾਸੋ ਚ ਪਚ੍ਚਯੋ ਚ ਇਵਾਦਿ ਚ, ਤੇ ਸਦ੍ਦਾ ਨਾਮ, ਸਦ੍ਦਸਦ੍ਦੇਨ ਸਮਾਸਾਦਯੋ ਵਤ੍ਤੁਮਧਿਪ੍ਪੇਤਾਤਿ ਅਤ੍ਥੋ. ਤੇਸਂ ਸਮਾਸਾਦੀਨਂ ਵਸਾ ਸਦ੍ਦਗਮ੍ਮਾ ਤਿਧਾ ਹੋਤਿ ਸਮਾਸਸਦ੍ਦਗਮ੍ਮਾ ਪਚ੍ਚਯਸਦ੍ਦਗਮ੍ਮਾ ਇਵਾਦਿਸਦ੍ਦਗਮ੍ਮਾਤਿ, ਸਮਾਸੇਨ ਸਮਾਸਸਦ੍ਦੇਨ ਗਮ੍ਮਾ ਉਪਮਾ ਵੁਚ੍ਚਤੀਤਿ ਸੇਸੋ. ਉਦਾਹਰਤਿ ‘‘ਮੁਨਿਨ੍ਦੋ ਚਨ੍ਦਿਮਾਨਨੋ’’ਤਿ, ਚਨ੍ਦਿਮਾ ਵਿਯ ਰੁਚਿਰਮਾਨਨਂ ਮੁਖਂ ਯਸ੍ਸ ਸੋ ਚਨ੍ਦਿਮਾਨਨੋ. ਏਤ੍ਥ ਚ ਚਨ੍ਦਿਮਂ ਉਪਮਾਨਂ, ਆਨਨਂ ਉਪਮੇਯ੍ਯਂ, ਰੁਚਿਰਤ੍ਤਂ ਧਮ੍ਮੋ, ਚਨ੍ਦਿਮਾਨਨਾਨਂ ਸਮਾਨਧਮ੍ਮਸਮ੍ਬਨ੍ਧਿਜੋਤਕੋ ਵਿਯਸਦ੍ਦੋ, ਤੇਸੁ ਸਾਧਾਰਣਧਮ੍ਮਵਾਚਕਸ੍ਸ ਵਿਯਸਦ੍ਦਸ੍ਸ ਚੋਪਮਾਜੋਤਕਸ੍ਸਾਪ੍ਪਯੋਗੋ ਸਮਾਸੇਨੇਵ ਵੁਤ੍ਤਤ੍ਤਾ, ਏਤ੍ਥ ਪਨ ਵਿਯਸਦ੍ਦੋ ਚਨ੍ਦਿਮਾਸਦ੍ਦੇਨ ਉਪਮਾਨਵਾਚਕੇਨ ਸਮ੍ਬਨ੍ਧਮੁਪਗਤੋ ਚਨ੍ਦਗਤਮੇਵ ਸਦਿਸਤ੍ਤਂ ਵਦਤਿ, ਮੁਖਗਤਂ ਪਨ ਸਾਮਤ੍ਥਿਯਾ ਪਦੀਯਤੇ, ਏਵਮੀਦਿਸਂ ਦਟ੍ਠਬ੍ਬਂ.
੧੭੭. ਤੇਸੁ ਯਥਾਵੁਤ੍ਤੇਸੁ ਸਦ੍ਦਗਮ੍ਮਸ੍ਸ ਤਿਵਿਧਤ੍ਤਂ ਦਸ੍ਸੇਤੁਂ ਆਹ ‘‘ਸਮਾਸੇ’’ਚ੍ਚਾਦਿ. ਸਮਾਸਪਚ੍ਚਯੇਵਾਦੀ ਸਮਾਸੋ, ਆਯਾਦਿਪਚ੍ਚਯਾ, ਇਵਾਦਯੋ ਚ ਸਦ੍ਦਾ ਨਾਮ, ਤੇਸਂ ਸਮਾਸਾਦੀਨਂ ਵਸਾ ਭੇਦੇਨ ਸਦ੍ਦਗਮ੍ਮਾ ਤਿਧਾ ਸਮਾਸਸਦ੍ਦਗਮ੍ਮਾ ਪਚ੍ਚਯਸਦ੍ਦਗਮ੍ਮਾ ਇਵਾਦਿਸਦ੍ਦਗਮ੍ਮਾਤਿ ਤਿਵਿਧਾ ਹੋਤਿ. ਸਮਾਸੇਨ ਸਮਾਸਸਦ੍ਦੇਨ ਗਮ੍ਮੋਪਮਾ ਵੁਚ੍ਚਤਿ ‘‘ਮੁਨਿਨ੍ਦੋ ਚਨ੍ਦਿਮਾਨਨੋ’’ਤਿ. ਮੁਨਿਨ੍ਦੋ ਸਮ੍ਮਾਸਮ੍ਬੁਦ੍ਧੋ ਚਨ੍ਦਿਮਾਨਨੋ ਚਨ੍ਦਸਮਾਨਮਨੋਹਰਮੁਖਮਣ੍ਡਲੇਨ ਯੁਤ੍ਤੋ ਹੋਤਿ, ਸਮਾਸੋ ਚ ਪਚ੍ਚਯੋ ਚ ਇਵਇਤਿ ਇਦਂ ਆਦਿ ਯੇਸਂ ਵਾਦੀਨਨ੍ਤਿ ਚ, ਸਦ੍ਦੇਨ ਗਮ੍ਮਾਤਿ ਚ, ਮੁਨੀਨਂ ਇਨ੍ਦੋਤਿ ਚ, ਚਨ੍ਦਿਮਾ ਵਿਯ ਰੁਚਿਰਂ ਆਨਨਂ ਮੁਖਂ ਯਸ੍ਸੇਤਿ ਚ ਵਿਗ੍ਗਹੋ. ਏਤ੍ਥ ‘‘ਚਨ੍ਦਿਮਾ’’ਤਿ ਉਪਮਾਨਂ, ‘‘ਆਨਨ’’ਨ੍ਤਿ ਉਪਮੇਯ੍ਯਂ, ਰੁਚਿਰਤ੍ਤਂ ਉਪਮਾਨੋਪਮੇਯ੍ਯਾਨਂ ਸਾਧਾਰਣਧਮ੍ਮੋ, ‘‘ਵਿਯਾ’’ਤਿ ਸਦ੍ਦੋ ਚਨ੍ਦਾਨਨਾਨਂ ਦ੍ਵਿਨ੍ਨਂ ਆਨਨਗਤਰੁਚਿਰਤ੍ਤਂ ਚਨ੍ਦੇ ਚ, ਚਨ੍ਦਗਤਰੁਚਿਰਤ੍ਤਂ ਆਨਨੇ ਚ ਅਤ੍ਥੀਤਿ ਸਮਾਨਧਮ੍ਮਸਮ੍ਬਨ੍ਧਂ ਜੋਤੇਤਿ, ਇਹ ਸਾਧਾਰਣਧਮ੍ਮਵਾਚਕਸ੍ਸ ਰੁਚਿਰਸਦ੍ਦਸ੍ਸ, ਤੁਲ੍ਯਧਮ੍ਮਸਙ੍ਖਾਤੋਪਮਾਜੋਤਕਸ੍ਸ ਵਿਯਸਦ੍ਦਸ੍ਸ ਚ ਅਪ੍ਪਯੋਗੋ ਤੇਸਂ ਅਤ੍ਥਾਨਂ ਸਮਾਸੇਨ ਵੁਤ੍ਤਤ੍ਤਾ. ਏਤ੍ਥ ਉਪਮਾਨਵਾਚਕੇਨ ਚਨ੍ਦਿਮਾਸਦ੍ਦੇਨ ਯੁਤ੍ਤੋ ਵਿਯ ਸਦ੍ਦੋ ਚਨ੍ਦਗਤਸਦਿਸਤ੍ਤਂ ਜੋਤੇਤਿ, ਮੁਖਗਤਸਦਿਸਤ੍ਤਂ ਪਨ ਸਾਮਤ੍ਥਿਯਾ ਪਤੀਯਤੇ. ਤਥਾ ਹਿ ਮੁਖਂ ਚਨ੍ਦਸਮਾਨਮਾਗਚ੍ਛਨ੍ਤਂ ਚਨ੍ਦਸ੍ਸ ਮੁਖਸਦਿਸਤ੍ਤਂ ਵਿਨਾ ਨ ਭਵਤੀਤਿ ਅਞ੍ਞਥਾਨੁਪਪਤ੍ਤਿ ਸਾਮਤ੍ਥਿਯਨ੍ਤਿ.
੧੭੮. ਆਯਾਦੀ ਪਚ੍ਚਯਾ ਤੇਹਿ, ਵਦਨਂ ਪਙ੍ਕਜਾਯਤੇ;
ਮੁਨਿਨ੍ਦਨਯਨਦ੍ਵਨ੍ਦਂ, ਨੀਲੁਪ੍ਪਲਦਲੀਯਤਿ.
੧੭੮. ਇਦਾਨਿ ਪਚ੍ਚਯਸਦ੍ਦਗਮ੍ਮਂ ਦਸ੍ਸੇਤਿ ‘‘ਆਯਾਦਿ’’ਚ੍ਚਾਦਿਨਾ. ਆਯਾਦੀਤਿ ਆਯਈਯਕਪਚ੍ਚਯਾਦਯੋ ਪਚ੍ਚਯਾ ਪਚ੍ਚਯਸਦ੍ਦਾ ਨਾਮ, ਤੇਹਿ ਪਚ੍ਚਯਸਦ੍ਦੇਹਿ ਗਮ੍ਮਾ ਉਪਮਾ ਵੁਚ੍ਚਤਿ. ਉਦਾਹਰਤਿ ‘‘ਵਦਨ’’ਮਿਚ੍ਚਾਦਿ. ਪਙ੍ਕਜਮਿਵ ਰੁਚਿਰਮਾਚਰਤਿ ਪਙ੍ਕਜਾਯਤੇ. ਏਤ੍ਥਾਪਿ ਪਙ੍ਕਜਮੁਪਮਾਨਂ, ਆਚਰਣਕ੍ਰਿਯਾਯ ਕਤ੍ਤੁਭੂਤਂ ਆਨਨਮੁਪਮੇਯ੍ਯਂ, ਰੁਚਿਰਤ੍ਤਂ ਸਧਮ੍ਮੋ, ਪਙ੍ਕਜਾਨਨਾਨਂ ਸਮਾਨਧਮ੍ਮਸਮ੍ਬਨ੍ਧਜੋਤਕੋ ਇਵਸਦ੍ਦੋ. ਤਤ੍ਥ ਰੁਚਿਰ ਇਵਸਦ੍ਦਾਨਂ ਪੁਬ੍ਬੇ ਵਿਯਾਪ੍ਪਯੋਗੋ ਪਚ੍ਚਯੇਨ ਵੁਤ੍ਤਤ੍ਤਾਤਿ ਸਬ੍ਬਤ੍ਥ ਵਿਞ੍ਞੇਯ੍ਯਂ. ਏਵਮੁਪਰਿਪਿ.
੧੭੮. ਇਦਾਨਿ ਪਚ੍ਚਯਸਦ੍ਦਗਮ੍ਮੋਪਮਂ ਨਿਦਸ੍ਸੇਤਿ ‘‘ਆਯਾਦਿ’’ਚ੍ਚਾਦਿਨਾ. ਆਯਾਦੀ ‘‘ਆਯ ਈਯ ਕ’’ਇਤਿਆਦਯੋ ਪਚ੍ਚਯਾ ਪਚ੍ਚਯਸਦ੍ਦਾ ਨਾਮ, ਤੇਹਿ ਪਚ੍ਚਯਸਦ੍ਦੇਹਿ ਗਮ੍ਮੋਪਮਾ ਵੁਚ੍ਚਤਿ ‘‘ਵਦਨਂ…ਪੇ… ਦਲੀਯਤੀ’’ਤਿ. ਵਦਨਂ ਮੁਖਂ ਪਙ੍ਕਜਾਯਤੇ ਪਦੁਮਮਿਵ ਰੁਚਿਰਂ ਆਚਰਤਿ. ਮੁਨਿਨ੍ਦਨਯਨਦ੍ਵਨ੍ਦਂ ਸਬ੍ਬਞ੍ਞੁਨੋ ਨੇਤ੍ਤਯੁਗਲ਼ਂ ਨੀਲੁਪ੍ਪਲਦਲੀਯਤਿ ਨੀਲੁਪ੍ਪਲਪਤ੍ਤਮਿਵ ਰੁਚਿਰਮਾਚਰਤਿ. ਆਯੋ ਆਦਿ ਯੇਸਂ ਈਯਾਦੀਨਨ੍ਤਿ ਚ, ਪਙ੍ਕਜਮਿਵ ਰੁਚਿਰਮਾਚਰਤਿ ਪਵਤ੍ਤਤੀਤਿ ਚ, ਮੁਨਿਨ੍ਦਸ੍ਸ ਨਯਨਦ੍ਵਨ੍ਦਮਿਤਿ ਚ, ਨੀਲੁਪ੍ਪਲਸ੍ਸ ਦਲਮਿਤਿ ਚ, ਤਮਿਵ ਰੁਚਿਰਮਾਚਰਤੀਤਿ ਚ ਵਾਕ੍ਯਂ. ਏਤ੍ਥ ‘‘ਪਙ੍ਕਜ’’ਮਿਤਿ ਚ ‘‘ਨੀਲੁਪ੍ਪਲ’’ਮਿਤਿ ਚ ਉਪਮਾਨਂ, ਆਚਰਣਕ੍ਰਿਯਾਯ ਕਤ੍ਤੁਭੂਤਂ ਵਦਨਂ ਨਯਨਦ੍ਵਨ੍ਦਞ੍ਚ ਉਪਮੇਯ੍ਯਂ, ਰੁਚਿਰਤ੍ਤਂ ਉਪਮਾਨੋਪਮੇਯ੍ਯਾਨਂ ਸਧਮ੍ਮੋ, ਉਪਮਾਨੋਪਮੇਯ੍ਯਾਨਂ ਸਮਾਨਧਮ੍ਮਜੋਤਕੋ ਇਵਸਦ੍ਦੋ, ਤੇਸਂ ਅਤ੍ਥਾਨਂ ਪਚ੍ਚਯੇਨ ਵੁਤ੍ਤਤ੍ਤਾ ਤੇਸਮਪ੍ਪਯੋਗੋ. ਏਵਰੂਪੇਸੁ ਅਞ੍ਞੇਸੁਪਿ ਏਵਮੇਵ ਵੇਦਿਤਬ੍ਬੋ.
੧੭੯. ਇਵਾਦੀ ਇਵ ਵਾ ਤੁਲ੍ਯ-ਸਮਾਨ ਨਿਭ ਸਨ੍ਨਿਭਾ;
ਯਥਾਸਙ੍ਕਾਸ ਤੁਲਿਤ-ਪ੍ਪਕਾਸ ਪਤਿਰੂਪਕਾ.
੧੮੦. ਸਰੀਸਰਿਕ੍ਖ ਸਂਵਾਦੀ, ਵਿਰੋਧੀ ਸਦਿਸਾ ਵਿਯ;
ਪਟਿਪਕ੍ਖਪਚ੍ਚਨੀਕ-ਸਪਕ੍ਖੋ’ਪਮਿਤੋ’ਪਮਾ.
੧੮੧. ਪਟਿਬਿਮ੍ਬ ਪਟਿਚ੍ਛਨ੍ਨ-ਸਰੂਪ ਸਮ ਸਮ੍ਮਿਤਾ;
ਸਵਣ੍ਣਾ’ਭਾ ਪਟਿਨਿਧਿ, ਸਧਮ੍ਮਾਦਿ ਸਲਕ੍ਖਣਾ.
੧੮੨. ਜਯਤ੍ਯ’ਕ੍ਕੋਸਤਿ ਹਸਤਿ, ਪਤਿਗਜ੍ਜਤਿ ਦੂਭਤਿ;
ਉਸੂਯਤ੍ਯ’ਵਜਾਨਾਤਿ, ਨਿਨ੍ਦਤਿ’ਸ੍ਸਤਿ ਰੁਨ੍ਧਤਿ.
੧੮੩. ਤਸ੍ਸ ਚੋਰੇਤਿ ਸੋਭਗ੍ਗਂ, ਤਸ੍ਸ ਕਨ੍ਤਿਂ ਵਿਲੁਮ੍ਪਤਿ;
ਤੇਨ ਸਦ੍ਧਿਂ ਵਿਵਦਤਿ, ਤੁਲ੍ਯਂ ਤੇਨਾਧਿਰੋਹਤਿ.
੧੮੪. ਕਚ੍ਛਂਵਿਗਾਹਤੇ ਤਸ੍ਸ, ਤਮਨ੍ਵੇਤ੍ਯ’ਨੁਬਨ੍ਧਤਿ;
ਤਂਸੀਲਂ, ਤਂ ਨਿਸੇਧੇਤਿ, ਤਸ੍ਸ ਚਾਨੁਕਰੋਤਿ’ਮੇ.
੧੭੯-੧੮੪. ਇਵਾਦੀ ਇਵਾਦਯੋ ਨਾਮ ਇਮੇਤਿ ਸਮ੍ਬਨ੍ਧੋ. ਇਵੋ ਚ ਵਾ ਚ ਤੁਲ੍ਯੋ ਚ ਸਮਾਨੋ ਚ ਨਿਭੋ ਚ ਸਨ੍ਨਿਭੋ ਚਾਤਿ ਦ੍ਵਨ੍ਦੇ ਇਵ…ਪੇ… ਸਨ੍ਨਿਭਾ. ਸਦ੍ਦਮਪੇਕ੍ਖਿਯ ਪੁਲ੍ਲਿਙ੍ਗਤਾ. ਏਵਮੁਪਰਿਪਿ ਯਥਾਯੋਗਂ. ‘‘ਸਧਮ੍ਮਾਦੀ’’ਤਿ ਆਦਿਸਦ੍ਦੇਨ ਸਾਧਾਰਣਸਚ੍ਛਾਯਾਦੀਨਂ ਪਰਿਗ੍ਗਹੋ. ਜਯਤਿਚ੍ਚਾਦੀਸੁ ਕਮ੍ਮਂ.
੧੭੯-. ੧੮੪. ਇਵਾਦਿਸਦ੍ਦਗਮ੍ਮੋਪਮਾਧਿਕਾਰੇ ਪਠਮਂ ਤਾਵ ‘‘ਇਵਾਦਯੋ ਨਾਮ ਏਤੇ’’ਤਿ ਦਸ੍ਸੇਤਿ ‘‘ਇਵਾਦਿ’’ਚ੍ਚਾਦਿਨਾ. ਇਵਾਦੀਤਿ ਪਦਸ੍ਸ ਛਟ੍ਠਮਗਾਥਾਯ ਇਮੇਤਿ ਇਮਿਨਾ ਸਮ੍ਬਨ੍ਧੋ, ਤਸ੍ਸ ਚਾਤਿ ਚਸਦ੍ਦਂ ਯੁਜ੍ਜਨਟ੍ਠਾਨੇ ਯੋਜੇਤ੍ਵਾ ਸਨ੍ਨਿਭਾ ਚਾਤਿਆਦਯੋ ਯੋਜੇਤਬ੍ਬਾ. ‘‘ਸਧਮ੍ਮਾਦੀ’’ਤਿਆਦਿਸਦ੍ਦੇਨ ਸਾਧਾਰਣਸਚ੍ਛਾਯਾਦਯੋ ਗਹਿਤਾ. ਨਿਨ੍ਦਤਿ ਇਸ੍ਸਤੀਤਿ ਪਦਚ੍ਛੇਦੋ, ਇਮੇ ਦ੍ਵੇਪਞ੍ਞਾਸ ਇਵਾਦਯੋ ਨਾਮ. ‘‘ਜਯਤਿ ਅਕ੍ਕੋਸਤਿ ਹਸਤਿ’’ਇਚ੍ਚਾਦਿਕਂ ਤਂਤਂਕ੍ਰਿਯਾਪਦਸਙ੍ਖਤਅਨੁਕਾਰਿਯਾਨਂ ਅਨੁਕਰਣਨ੍ਤਿ ਕਤ੍ਵਾ ਦ੍ਵਨ੍ਦੋਯੇਵ, ‘‘ਸਨ੍ਧਿਸਮਾਸਾ ਅਦ੍ਧਸ੍ਸਾ’’ਤਿ [ਸਨ੍ਧਿਸਮਾਸੋ ਤਦਦ੍ਧਸ੍ਸਾਤਿ (ਕ.)] ਵੁਤ੍ਤਤ੍ਤਾ ਸਨ੍ਧਿਸਮਾਸਾਨਂ ਗਾਥਦ੍ਧਸ੍ਸ ਵਿਨਾ ਉਭਯਦ੍ਧਮਜ੍ਝੇ ਅਲਬ੍ਭਨਤੋ ਦੂਭਤਿਪਦਤੋ ਪੁਬ੍ਬੇਯੇਵ ਸਮਾਸੋ ਕਾਤਬ੍ਬੋ, ਨੋ ਚੇ, ਅਸਮਾਸੋਤਿ ਗਹੇਤਬ੍ਬੋ. ਤਸ੍ਸ ਚੋਰੇਤਿ ਸੋਭਗ੍ਗਮਿਚ੍ਚਾਦਿਕਮ੍ਪਿ ਵਾਕ੍ਯਾਨੁਕਰਣਨ੍ਤਿ ਕਤ੍ਵਾ ਤਤ੍ਥ ਸਮਾਸੋ, ਵਾਕ੍ਯੇ ਕੇਵਲਪਦਾਨੀਤਿ ਵਾ ਗਹੇਤਬ੍ਬੋ. ਇਮੇਸਂ ਸਬ੍ਬੇਸਮ੍ਪਿ ਇਵ ਸਦ੍ਦਪਰਿਯਾਯਤ੍ਤਾ ਸਦਿਸਤ੍ਥਾਤਿ ਸਬ੍ਬਤ੍ਥ ਭਾਵਤ੍ਥੋ, ਅਵਯਵਤ੍ਥੋ ਪਨ ਪਾਕਟੋਯੇਵ.
੧੮੫. ਉਪਮਾਨੋਪਮੇਯ੍ਯਾਨਂ, ਸਧਮ੍ਮਤ੍ਤਂ ਵਿਭਾਵਿਹਿ;
ਇਮੇਹਿ ਉਪਮਾਭੇਦਾ, ਕੇਚਿ ਨਿਯ੍ਯਨ੍ਤਿ ਸਮ੍ਪਤਿ.
੧੮੫. ਇਵਾਦੀਨਂ ਵਿਨਿਯੋਗਵਿਸਯਂ ਦਸ੍ਸੇਤ੍ਵਾ ਉਪਮਾਭੇਦਂ ਦਸ੍ਸੇਤੁਂ ਪਟਿਜਾਨਾਤਿ ‘‘ਉਪਮਾਨ’’ਇਚ੍ਚਾਦਿ. ਕੇਚੀਤਿ ਇਮਿਨਾ ਅਪਰਿਯਨ੍ਤਤ੍ਤਮੇਸਂ [ਅਪਰਿਯਨ੍ਤਪਭੇਦਂ (ਕ.)] ਦਸ੍ਸੇਤਿ. ਤਥਾ ਚ ਵਕ੍ਖਤਿ ‘‘ਪਰਿਯਨ੍ਤੋ ਵਿਕਪ੍ਪਾਨ’’ਨ੍ਤਿਆਦਿ. ਨਿਯ੍ਯਨ੍ਤਿ ਉਦਾਹਰੀਯਨ੍ਤਿ.
੧੮੫. ਇਦਾਨਿ ਇਵਾਦਿਸਦ੍ਦਗਮ੍ਮੋਪਮਂ ਦਸ੍ਸੇਤੁਂ ਪਟਿਜਾਨਾਤਿ ‘‘ਉਪਮਾਨੋ’’ਚ੍ਚਾਦਿਨਾ. ਉਪਮਾਨੋਪਮੇਯ੍ਯਾਨਂ ਸਧਮ੍ਮਤ੍ਤਂ ਸਮਾਨਧਮ੍ਮਸਮ੍ਬਨ੍ਧੋ. ਵਿਭਾਵਿਹਿ ਪਕਾਸਕੇਹਿ. ਇਮੇਹਿ ਇਵਾਦੀਹਿ ਸਦ੍ਦੇਹਿ ਜਾਨਿਤਬ੍ਬਾ ਕੇਚਿ ਉਪਮਾਭੇਦਾ ਅਪਰਿਯਨ੍ਤਤ੍ਤਾ ਸਮ੍ਪਤਿ ਦਾਨਿ ਲਦ੍ਧਾਵਸਰੇ ਨਿਯ੍ਯਨ੍ਤਿ ਉਦਾਹਰਣਮਤ੍ਤੇਨ ਪਟਿਪਾਦੀਯਨ੍ਤਿ.
੧੮੬. ਵਿਕਾਸਿਪਦੁਮਂ’ਵਾ’ਤਿ-ਸੁਨ੍ਦਰਂ ਸੁਗਤਾਨਨਂ;
ਇਤਿ ਧਮ੍ਮੋਪਮਾ ਨਾਮ, ਤੁਲ੍ਯਧਮ੍ਮਨਿਦਸ੍ਸਨਾ.
੧੮੬. ‘‘ਵਿਕਾਸਿ’’ਚ੍ਚਾਦਿ. ਸੁਗਤਾਨਨਂ ਮੁਨਿਨ੍ਦਸ੍ਸ ਵਦਨਂ ਅਤਿਸੁਨ੍ਦਰਂ ਅਚ੍ਚਨ੍ਤਰਮਣੀਯਂ. ਕਿਮਿਵ? ਵਿਕਾਸਿਪਦੁਮਂਵ ਪਬੁਜ੍ਝਮਾਨਪਦੁਮਂਵਿਯ. ਇਤਿ ਅਯਮੇਵਂਵਿਧਾ ਧਮ੍ਮੋਪਮਾ ਨਾਮ ਹੋਤਿ. ਕਸ੍ਮਾ? ਆਨਨਪਦੁਮਾਨਂ ਸਮਾਨਸ੍ਸ ਧਮ੍ਮਸ੍ਸ ਗੁਣਸ੍ਸ ਸੁਨ੍ਦਰਸ੍ਸ ਲਕ੍ਖਣਸ੍ਸ ਨਿਦਸ੍ਸਨਾ ਸੁਨ੍ਦਰਤ੍ਤਨ੍ਤਿ ਪਟਿਪਾਦਨਤੋ.
੧੮੬. ਉਦਾਹਰਣਮਾਹ ‘‘ਵਿਕਾਸਿ’’ਚ੍ਚਾਦਿਨਾ. ਸੁਗਤਾਨਨਂ ਭਗਵਤੋ ਮੁਖਂ ਵਿਕਾਸਿਪਦੁਮਂਵ ਬੁਜ੍ਝਮਾਨਪਙ੍ਕਜਮਿਵ ਅਤਿਸੁਨ੍ਦਰਂ ਹੋਤਿ. ਇਤਿ ਈਦਿਸਾ ਉਪਮਾ ਤੁਲ੍ਯਧਮ੍ਮਨਿਦਸ੍ਸਨਾ ਅਤਿਸੁਨ੍ਦਰਮਿਤਿ ਸਮਾਨਗੁਣਦਸ੍ਸਨੇਨ ਧਮ੍ਮੋਪਮਾ ਨਾਮ ਹੋਤਿ. ਪਦੁਮਾਨਨਾਨਂ ਸਾਧਾਰਣਗੁਣਸ੍ਸ ਪਕਾਸਨਤੋ ਅਤਿਸੁਨ੍ਦਰਮਿਤਿ ਤੁਲ੍ਯਧਮ੍ਮੋ ਨਾਮ ਹੋਤਿ. ਏਤ੍ਥ ਪਦੁਮਗਤਤੁਲ੍ਯਧਮ੍ਮਸਮ੍ਬਨ੍ਧਸਙ੍ਖਾਤਾਯ ਉਪਮਾਯ ਇਵਸਦ੍ਦੇਨ ਜੋਤਿਯਮਾਨਤ੍ਤੇਪਿ ਅਤਿਸੁਨ੍ਦਰਨ੍ਤਿ ਵੁਤ੍ਤਤ੍ਤਾ ਯਥਾਵੁਤ੍ਤੋਪਮਾਯ ਧਮ੍ਮੇਨ ਯੁਤ੍ਤਤ੍ਤਾ ਧਮ੍ਮੋਪਮਾ ਨਾਮ ਹੋਤੀਤਿ ਅਧਿਪ੍ਪਾਯੋ.
੧੮੭. ਧਮ੍ਮਹੀਨਾ ਮੁਖ’ਮ੍ਭੋਜ-ਸਦਿਸਂ ਮੁਨਿਨੋ ਇਤਿ;
ਵਿਪਰੀਤੋਪਮਾ ਤੁਲ੍ਯ-ਮਾਨਨੇਨ’ਮ੍ਬੁਜਂ ਤਵ.
੧੮੭. ‘‘ਧਮ੍ਮ’’ਇਚ੍ਚਾਦਿ. ਮੁਨਿਨੋ ਸਮ੍ਮਾਸਮ੍ਬੁਦ੍ਧਸ੍ਸ ਮੁਖਂ ਅਮ੍ਭੋਜੇਨ ਪਦੁਮੇਨ ਸਦਿਸਂ ਸਮਾਨਂ. ਇਤਿ ਅਯਂ ਧਮ੍ਮਹੀਨੋਪਮਾ ਨਾਮ ਸੁਨ੍ਦਰਸਙ੍ਖਾਤਸ੍ਸ ਗੁਣਸ੍ਸ ਅਨਿਦ੍ਦਿਟ੍ਠਤ੍ਤਾ, ਸਾ ਤੁ ਅਤ੍ਥਵਸਾ ਗਮ੍ਯਤੇ. ਕਥਮਞ੍ਞਥਾ ਯੁਜ੍ਜਤੀਤਿ? ਏਤ੍ਥ ਪਨ ਸਦਿਸਸਦ੍ਦੋ ਉਪਮੇਯ੍ਯਸ੍ਸ ਮੁਖਸ੍ਸ ਵਿਸੇਸਨਨ੍ਤਿ ਮੁਖਗਤਮੇਵ ਸਦਿਸਤ੍ਤਂ ਵਦਤਿ, ਅਮ੍ਭੋਜਗਤਂ ਤੁ ਸਾਮਤ੍ਥਿਯਾ ਗਮ੍ਯਤੇ. ਏਵਮੀਦਿਸਂ ਞੇਯ੍ਯਂ. ‘‘ਵਿਪਰੀਤੇ’’ਚ੍ਚਾਦਿ. ਮੁਨੀਤਿ ਗਮ੍ਯਤੇ ਸੁਤਤ੍ਤਾ, ਭੋ ਮੁਨਿ ਤਵ ਆਨਨੇਨ ਮੁਖੇਨ ਅਮ੍ਬੁਜਂ ਤੁਲ੍ਯਨ੍ਤਿ ਅਯਂ ਵਿਪਰੀਤੋਪਮਾ. ਧਮ੍ਮਹੀਨਤ੍ਤੇਪਿ ਪਸਿਦ੍ਧਿਵਿਪਰਿਯਯੇਨਾਭਿਹਿਤਤ੍ਤਾ ਤਨ੍ਨਾਮੇਨੇਵ ਵੁਤ੍ਤਾ. ਏਵਮੁਪਰਿਪਿ.
੧੮੭. ‘‘ਧਮ੍ਮਹੀਨੇ’’ਚ੍ਚਾਦਿ. ‘‘ਮੁਖਮ੍ਭੋਜਸਦਿਸਂ ਮੁਨਿਨੋ’’ਤ੍ਯਯਂ ਉਪਮਾ. ਧਮ੍ਮਹੀਨਾ ਤੁਲ੍ਯਧਮ੍ਮਪਕਾਸਕਸੁਨ੍ਦਰਾਦਿਸਦ੍ਦਹੀਨਤ੍ਤਾ ਧਮ੍ਮਹੀਨਾ ਨਾਮ. ਵਾਚਕਾਭਾਵੇ ਤੁਲ੍ਯਧਮ੍ਮੋ ਕਥਂ ਪਤੀਯਤੀਤਿ ਚੇ? ਮੁਨਿਨੋ ਮੁਖਂ ਵਦਨਂ ਅਮ੍ਭੋਜਸਦਿਸਂ ਪਦੁਮਸਦਿਸਮਿਤਿ. ਏਤ੍ਥ ਮੁਖਸ੍ਸ ਅਮ੍ਭੋਜਸਮਾਨਤ੍ਤਂ ਮੁਖਮ੍ਭੋਜਾਨਂ ਸਾਧਾਰਣਧਮ੍ਮੇ ਅਸਤਿ ਕਥਂ ਭਵਤੀਤਿ? ਅਞ੍ਞਥਾਨੁਪਪਤ੍ਤਿਲਕ੍ਖਣਸਾਮਤ੍ਥਿਯਾਤਿ, ਇਵਪਰਿਯਾਯੋ ਸਦਿਸਸਦ੍ਦੋ ਮੁਖਸ੍ਸ ਵਿਸੇਸਨਂ ਯਸ੍ਮਾ ਹੋਤਿ, ਤਸ੍ਮਾ ਮੁਖਗਤਸਦਿਸਤ੍ਤਂ ਵਦਤਿ, ਅਮ੍ਭੋਜਗਤਸਦਿਸਤ੍ਤਂ ਪਨ ਸਾਮਤ੍ਥਿਯਾ ਏਵ ਵਿਞ੍ਞਾਯਤੇ. ਹੇ ਮੁਨਿ ਤਵ ਤੁਯ੍ਹਂ ਆਨਨੇਨ ਅਮ੍ਭੋਜਂ ਤੁਲ੍ਯਂ ਸਮਾਨਨ੍ਤਿ ਅਯਂ ਵਿਪਰੀਤੋਪਮਾ. ‘‘ਅਮ੍ਬੁਜੇਨ ਆਨਨਂ ਤੁਲ੍ਯ’’ਨ੍ਤਿ ਲੋਕਪ੍ਪਸਿਦ੍ਧਿਯਾ ਵਿਪਰਿਯਯੇਨ ‘‘ਆਨਨੇਨ ਅਮ੍ਬੁਜਂ ਤੁਲ੍ਯ’’ਨ੍ਤਿ ਵੁਤ੍ਤਤ੍ਤਾ ਧਮ੍ਮਹੀਨਤ੍ਤੇ ਸਤਿਪਿ ਵਿਪਰੀਤੋਪਮਾ ਨਾਮ ਹੋਤਿ. ‘‘ਸੁਤਾਨੁਮਿਤੇਸੁ ਸੁਤਸਮ੍ਬਨ੍ਧੋ ਬਲਵਾ’’ਤਿ [ਪਰਿਭਾਸੇਨ੍ਦੁਸੇਖਰ ੧੧੨] ਵੁਤ੍ਤਤ੍ਤਾ ਏਤ੍ਥ ‘‘ਮੁਨੀ’’ਤਿ ਅਵਿਜ੍ਜਮਾਨੇਪਿ ਪੁਬ੍ਬਦ੍ਧੇ ‘‘ਮੁਨਿਨੋ’’ਤਿ ਸੁਤਤ੍ਤਾ ਲਬ੍ਭਮਾਨੋ ‘‘ਤਵਾ’’ਤਿ ਤੁਮ੍ਹਸਦ੍ਦਸਨ੍ਨਿਧਾਨੇਨ ਆਮਨ੍ਤਨਤ੍ਥੋ ਵਿਞ੍ਞਾਯਤਿ. ਏਤ੍ਥ ਇਵਪਰਿਯਾਯੋ ਤੁਲ੍ਯਸਦ੍ਦੋ ਅਮ੍ਬੁਜਵਿਸੇਸਨਭੂਤੋ ਅਮ੍ਬੁਜਗਤਸਦਿਸਤ੍ਤਂ ਵਦਤਿ, ਆਨਨਗਤਸਦਿਸਤ੍ਤਞ੍ਚ ਅਮ੍ਬੁਜਾਨਨਾਨਂ ਸਾਧਾਰਣਧਮ੍ਮੋ ਚ ਸਾਮਤ੍ਥਿਯਾ ਞਾਯਤਿਚ੍ਚਾਦਿਕਂ ਵੁਤ੍ਤਨਯੇਨ ਞਾਤਬ੍ਬਂ. ਉਪਰਿਪਿ ਪਾਕਟਟ੍ਠਾਨਂ ਯਥਾਰਹਂ ਯੋਜੇਤਬ੍ਬਂ.
੧੮੮. ਤਵਾਨਨ’ਮਿਵ’ਮ੍ਭੋਜਂ, ਅਮ੍ਭੋਜ’ਮਿਵ ਤੇ ਮੁਖਂ;
ਅਞ੍ਞਮਞ੍ਞੋਪਮਾ ਸਾ’ਯਂ, ਅਞ੍ਞਮਞ੍ਞੋਪਮਾਨਤੋ.
੧੮੮. ‘‘ਤਵ’’ਇਚ੍ਚਾਦਿ. ਅਞ੍ਞਮਞ੍ਞੋਪਮਾਨਤੋਤਿ ਅਞ੍ਞਮਞ੍ਞਸ੍ਸ ਮੁਖਸ੍ਸ ਅਮ੍ਭੋਜਸ੍ਸ ਚ ਅਞ੍ਞਮਞ੍ਞੇਨ ਤਂਦ੍ਵਯੇਨ ਉਪਮਾਨਤੋ.
੧੮੮. ‘‘ਤਵਾਨਨਿ’’ਚ੍ਚਾਦਿ. ‘‘ਅਮ੍ਭੋਜਂ ਤਵਾਨਨਮਿਵ, ਤੇ ਮੁਖਂ ਅਮ੍ਭੋਜਮਿਵਾ’’ਤਿ ਅਯਮੁਪਮਾ. ਅਞ੍ਞਮਞ੍ਞੋਪਮਾਨਤੋ ਅਞ੍ਞਮਞ੍ਞਸ੍ਸ ਉਪਮਾਨਤ੍ਤਾ ਅਞ੍ਞਮਞ੍ਞੋਪਮਾ ਨਾਮ ਹੋਤਿ. ਅਞ੍ਞਮਞ੍ਞਸ੍ਸ ਉਪਮਾਤਿ ਚ, ਅਞ੍ਞਮਞ੍ਞਸ੍ਸ ਉਪਮਾਨਨ੍ਤਿ ਚ ਵਿਗ੍ਗਹੋ. ਵਿਗ੍ਗਹਦ੍ਵਯੇਪਿ ਪੁਬ੍ਬਵਿਭਤ੍ਤਿਲੋਪੋ. ਸਬ੍ਬਾਦੀਨਂ ਬ੍ਯਤਿਹਾਰਲਕ੍ਖਣੇਨ ਉਤ੍ਤਰਵਿਭਤ੍ਤਿਲੋਪੋ. ਸਮਾਸਲਕ੍ਖਣੇਨ ਅਞ੍ਞਤ੍ਥਸ੍ਸ ਅਪੇਕ੍ਖਾਸਿਦ੍ਧਤ੍ਤਾ ਮੁਖਾਪੇਕ੍ਖਾਯ ਅਞ੍ਞਂ ਅਮ੍ਭੋਜਞ੍ਚ, ਅਮ੍ਭੋਜਾਪੇਕ੍ਖਾਯ ਅਞ੍ਞਂ ਮੁਖਞ੍ਚ ਕਮੇਨ ਉਪਮੇਯ੍ਯਾ ਨਾਮ. ਅਮ੍ਭੋਜਾਪੇਕ੍ਖਾਯ ਅਞ੍ਞਂ ਮੁਖਞ੍ਚ, ਮੁਖਾਪੇਕ੍ਖਾਯ ਅਞ੍ਞਂ ਅਮ੍ਭੋਜਞ੍ਚ ਉਪਮਾਨਂ ਨਾਮ.
੧੮੯. ਯਦਿ ਕਿਞ੍ਚਿ ਭਵੇ’ਮ੍ਭੋਜਂ,
ਲੋਚਨਬ੍ਭਮੁਵਿਬ੍ਭਮਂ;
ਧਾਰੇਤੁਂ ਮੁਖਸੋਭਂ ਤਂ,
ਤਵੇ’ਤਿ ਅਬ੍ਭੁਤੋਪਮਾ.
੧੮੯. ‘‘ਯਦਿ’’ਚ੍ਚਾਦਿ. ਲੋਚਨਾਨਿ ਚ ਭਮੁਯੋ ਚ, ਤਾਸਂ ਵਿਬ੍ਭਮੋ ਯਸ੍ਮਿਂ, ਤਂ, ਤਾਦਿਸਮਮ੍ਭੋਜਂ ਕਿਞ੍ਚਿ ਕਿਮਪਿ ਯਦਿ ਭਵੇ. ਤਮੀਦਿਸਮਮ੍ਭੋਜਂ ਤਵ ਮੁਖਸੋਭਂ ਵਦਨਕਨ੍ਤਿਂ ਧਾਰੇਤੁਂ ਨਿਸਿਜ੍ਝਤੇ. ਕਿਂ ਨ੍ਵਚ੍ਛਰਿਯਮੀਦਿਸਨ੍ਤਿ ਅਬ੍ਭੁਤਤ੍ਥਵਿਭਾਵਨੇਨ ਵਦਨਮਮ੍ਬੁਜੇਨੋਪਮੀਯਤੀਤਿ ਅਯਮਬ੍ਭੁਤੋਪਮਾ ਞਾਤਬ੍ਬਾਤਿ.
੧੮੯. ‘‘ਯਦਿ’’ਚ੍ਚਾਦਿ. ਲੋਚਨਬ੍ਭਮੁਵਿਬ੍ਭਮਂ ਲੋਚਨਭਮੂਨਂ ਲੀਲਾਵਨ੍ਤਂ ਕਿਞ੍ਚਿ ਅਮ੍ਭੋਜਂ ਕਿਞ੍ਚਿ ਅਚ੍ਛਰਿਯਂ ਪਦੁਮਂ ਯਦਿ ਭਵੇ ਚੇ ਸਿਯਾ, ਤਮਮ੍ਭੋਜਂ ਤਵ ਮੁਖਸੋਭਂ ਵਦਨਕਨ੍ਤਿਂ ਧਾਰੇਤੁਂ ਸਮਤ੍ਥੋ ਹੋਤਿ. ਇਤਿ ਈਦਿਸੀ ਉਪਮਾ ਅਬ੍ਭੁਤੋਪਮਾ ਅਬ੍ਭੁਤਧਮ੍ਮਪਕਾਸਕਤ੍ਤਾ ਅਬ੍ਭੁਤੋਪਮਾ ਨਾਮ. ਏਤ੍ਥ ਅਵਿਜ੍ਜਮਾਨੋਪਿ ਵਿਜ੍ਜਮਾਨਤ੍ਤੇਨ ਪਰਿਕਪ੍ਪਿਤੋ ਪਦੁਮਗਤੋ ਲੋਚਨਬ੍ਭਮੁਵਿਬ੍ਭਮਸਮ੍ਬਨ੍ਧੋ ਅਮ੍ਭੋਜਵਿਸੇਸਨੇਨ ‘‘ਲੋਚਨਬ੍ਭਮੁਵਿਬ੍ਭਮ’’ਨ੍ਤਿ ਇਮਿਨਾ ਜੋਤਿਤੋ. ਤਸ੍ਮਾ ਅਮ੍ਭੋਜਂ ਲੋਚਨਬ੍ਭਮੁਵਿਬ੍ਭਮਸਮ੍ਬਨ੍ਧਸਙ੍ਖਤਉਪਮਾਯ ਜੋਤਕਤ੍ਤਾ ਨਿਸ੍ਸਿਤਵੋਹਾਰੇਨ ਉਪਮਾ, ਮੁਖਂ ਉਪਮੇਯ੍ਯਨ੍ਤਿ ਮੁਖਗਤੋ ਲੋਚਨਬ੍ਭਮੁਵਿਬ੍ਭਮਸਮ੍ਬਨ੍ਧੋ ਯਦਿ ਮੁਖੇ ਨ ਭਵੇਯ੍ਯ, ਤਾਦਿਸਂ ਮੁਖਸੋਭਂ ਧਾਰੇਤੁਂ ਕਥਂ ਸਮਤ੍ਥੋਤਿ ਸਾਮਤ੍ਥਿਯਾ ਞਾਯਤਿ. ਲੋਚਨਬ੍ਭਮੁਵਿਬ੍ਭਮਸਙ੍ਖਾਤਸਾਧਾਰਣਧਮ੍ਮੋ ਪਨ ‘‘ਲੋਚਨਾਨਿ ਚ ਭਮੁਯੋ ਚੇਤਿ ਚ, ਤਾਸਂ ਵਿਬ੍ਭਮੋ ਯਸ੍ਮਿ’’ਨ੍ਤਿ ਚ ਵਿਗ੍ਗਹੇ ਨਿਪ੍ਫਨ੍ਨੇਨ ਭਿਨ੍ਨਾਧਿਕਰਣਅਞ੍ਞਪਦਤ੍ਥਸਮਾਸੇਨ ਗੁਣੀਭੂਤਸ੍ਸਪਿ ਗਹਿਤਤ੍ਤਾ ਵਿਞ੍ਞਾਯਤਿ [ਗਹਣਸ੍ਸ ਵਿਞ੍ਞਾਯਮਾਨਤ੍ਤਾ (ਕ.)].
੧੯੦. ਸੁਗਨ੍ਧਿ ਸੋਭਸਮ੍ਬਨ੍ਧਿ, ਸਿਸਿਰਂਸੁਵਿਰੋਧਿ ਚ;
ਮੁਖਂ ਤਵ’ਮ੍ਬੁਜਂਵੇ’ਤਿ, ਸਾ ਸਿਲੇਸੋਪਮਾ ਮਤਾ.
੧੯੦. ‘‘ਸੁਗਨ੍ਧਿ’’ਚ੍ਚਾਦਿ. ਤਵ ਮੁਖਂ ਅਮ੍ਭੋਜਮਿਵ ਸਿਸਿਰਂਸੁਨੋਚਨ੍ਦਸ੍ਸ ਵਿਰੋਧਿ ਪਚ੍ਚਨੀਕਂ, ਮੁਖਂ ਤਂਸਮਾਨਕਨ੍ਤਿਤ੍ਤਾ ਅਮ੍ਬੁਜਞ੍ਚ ਤਦੁਦਯੇ ਸਙ੍ਕੋਚਭਜਨਤੋ. ਸੋਭਸਮ੍ਬਨ੍ਧਿ ਕਨ੍ਤਿਯੁਤ੍ਤਂ, ਮੁਖਮਮ੍ਬੁਜਞ੍ਚ. ਸੁਗਨ੍ਧੋ ਅਸ੍ਸ ਅਤ੍ਥੀਤਿ ਸੁਗਨ੍ਧਿ ਚ ਦ੍ਵਯਮਪੀਤਿ ਏਵਂ ਸਿਲੇਸਪਰਿਗ੍ਗਹੇਨ ਮੁਖਮ੍ਬੁਜਾਨਂ ਉਪਮਾਯੋਗਤੋ ਸਾ ਯਥਾਵੁਤ੍ਤਾ ਸਿਲੇਸੋਪਮਾ ਮਤਾ.
੧੯੦. ‘‘ਸੁਗਨ੍ਧਿ’’ਚ੍ਚਾਦਿ. ਤਵ ਮੁਖਂ ਅਮ੍ਭੋਜਮਿਵ ਸਿਸਿਰਂਸੁਵਿਰੋਧਿ ਚਨ੍ਦਸ੍ਸ ਵਿਰੁਦ੍ਧਂ ਹੋਤਿ ਤੁਲ੍ਯਤ੍ਤਾ. ਪਦੁਮਂ ਪਨ ਚਨ੍ਦੋਦਯੇਨ ਅਤ੍ਤਨੋ ਸਙ੍ਕੋਚਨਤ੍ਤਾ ਤਸ੍ਸ ਵਿਰੁਦ੍ਧਂ ਹੋਤਿ. ਸੋਭਸਮ੍ਬਨ੍ਧਿ ਚ ਅਨਞ੍ਞਸਾਧਾਰਣਮੁਖਗਤਕਨ੍ਤਿਸਮ੍ਬਨ੍ਧਯੁਤ੍ਤਞ੍ਚ ਹੋਤਿ. ਪਦੁਮਂ ਪਨ ਪਦੁਮਗਤਕਨ੍ਤਿਸਮ੍ਬਨ੍ਧਿਨਾ ਯੁਤ੍ਤਂ ਹੋਤਿ. ਸੁਗਨ੍ਧਿ ਚ ਚਤੁਜ੍ਜਾਤਿਸੁਗਨ੍ਧਵਹਨਤੋ […ਵਮਨਤੋ (ਕ.)] ਸੁਗਨ੍ਧਿ ਚ ਹੋਤਿ. ਅਮ੍ਬੁਜਂ ਪਨ ਪਦੁਮਸੁਗਨ੍ਧੇਨੇਵ ਯੁਤ੍ਤਂ ਹੋਤਿ. ਇਤਿ ਈਦਿਸੀ ਉਪਮਾ ਸਿਲੇਸੋਪਮਾ ਏਕਪਦਾਤਿਹਿਤਉਭਯਤ੍ਥਲਕ੍ਖਣੇਨ ਸਿਲੇਸਵਸੇਨ ਵੁਤ੍ਤਤ੍ਤਾ ਸਿਲੇਸੋਪਮਾ ਨਾਮ ਹੋਤਿ. ਸਿਸਿਰਾ ਸੀਤਲਾ ਅਂਸੁ ਕਨ੍ਤਿ ਅਸ੍ਸੇਤਿ ਚ, ਤਸ੍ਸ ਵਿਰੁਜ੍ਝਤਿ ਸੀਲੇਨੇਤਿ ਚ, ਪਚ੍ਚਯਸਾਮਤ੍ਥਿਯਵਸੇਨ ਦ੍ਵਿਨ੍ਨਂ ਦ੍ਵਿਨ੍ਨਂ ਅਤ੍ਥਾਨਂ ਲਬ੍ਭਨਤੋ ਸਿਲਿਸ੍ਸਤਿ ਅਪਰੋਪਿ ਅਤ੍ਥੋ ਏਤ੍ਥ ਅਲਙ੍ਕਾਰੇਤਿ ਚ, ਸਿਲੇਸਵਸੇਨ ਵੁਤ੍ਤਾ ਉਪਮਾਤਿ ਚ ਵਿਗ੍ਗਹੋ. ਏਤ੍ਥ ਸੁਗਨ੍ਧੋ ਚ ਸੋਤਸਮ੍ਬਨ੍ਧੋ ਚ ਸਿਸਿਰਂਸੁਵਿਰੋਧਿਤ੍ਤਞ੍ਚੇਤਿ ਇਮੇ ਉਪਮਾਨੋਪਮੇਯ੍ਯਾਨਮਮ੍ਬੁਜਮੁਖਾਨਂ ਤੁਲ੍ਯਧਮ੍ਮੋ, ਤੇਸੁ ਅਮ੍ਬੁਜਗਤਤੁਲ੍ਯਧਮ੍ਮਸਮ੍ਬਨ੍ਧੋ ਸਧਮ੍ਮਤ੍ਤਾ ਉਪਮਾ ਨਾਮ ਹੋਤਿ, ਸਾ ਅਮ੍ਬੁਜਸਮ੍ਬਨ੍ਧਿਨਾ ਇਵਸਦ੍ਦੇਨ ਜੋਤਿਤਾ, ਮੁਖਗਤਤੁਲ੍ਯਧਮ੍ਮੋ ਪਨ ਅਸ੍ਸਤ੍ਥਿਤਸ੍ਸੀਲਤ੍ਥੇ ਕਤਪਚ੍ਚਯੇ ਸਤਿਪਿ ਸਾਮਤ੍ਥਿਯਾਯੇਵ ਗਮ੍ਯਤੇ.
੧੯੧. ਸਰੂਪਸਦ੍ਦਵਾਚ੍ਚਤ੍ਤਾ, ਸਾ ਸਨ੍ਤਾਨੋਪਮਾ ਯਥਾ;
ਬਾਲਾ’ਵੁ’ਯ੍ਯਾਨਮਾਲਾ’ਯਂ, ਸਾਲਕਾਨਨਸੋਭਿਨੀ.
੧੯੧. ‘‘ਸਰੂਪ’’ਇਚ੍ਚਾਦਿ. ਅਯਮੁਯ੍ਯਾਨਮਾਲਾ ਬਾਲਾਵ ਇਤ੍ਥੀ ਵਿਯ. ਕਥਂ? ਸਾਲਕਾਨਨਸੋਭਿਨੀ ਬਾਲਾ ਤਾਵ ਸਹਾਲਕੇਨ ਕੇਸਸਨ੍ਨਿਵੇਸਵਿਸੇਸੇਨ ਵਤ੍ਤਤੇ ਸਾਲਕਮਾਨਨਂ ਤੇਨ ਸੋਭਤੇ. ਸਾਲਕਾਨਨਸੋਭਿਨੀ ਉਯ੍ਯਾਨਮਾਲਾਪਿ ਸਾਲਾਨਂ ਰੁਕ੍ਖਵਿਸੇਸਾਨਂ ਕਾਨਨੇਨ ਗਹਨੇਨ ਸੋਭਤੇ, ਏਵਰੂਪਾ ਸਾ ਤਾਦਿਸੀ ਸਨ੍ਤਾਨੋਪਮਾ ਆਖ੍ਯਾਯਤੇ, ਕਸ੍ਮਾ? ਸਿਲੇਸੋਪਮਤ੍ਤਸਭਾਵੇਪਿ ਸਰੂਪੇਨ ਸਦਿਸੇਨ ਸਦ੍ਦੇਨ ‘‘ਸਾਲਕਾਨਨਸੋਭਿਨੀ’’ਤ੍ਵੇਵਂਵਿਧੇਨ ਸਦ੍ਦਸਨ੍ਤਾਨੇਨ ਵਿਸੇਸਭੂਤੇਨ ਵਾਚ੍ਚਤ੍ਤਾ ਪਕਾਸਿਯਤ੍ਤਾ ਤਸ੍ਸਾਇਤਿ ਗਮ੍ਯਤੇ. ਯਥੇਤਿ ਨਿਦਸ੍ਸਨੇ.
੧੯੧. ‘‘ਸਰੂਪੇ’’ਚ੍ਚਾਦਿ. ਸਰੂਪਸਦ੍ਦਵਾਚ੍ਚਤ੍ਤਾ ਤੁਲ੍ਯਸੁਤਿਯਾ ਅਚ੍ਛਿਨ੍ਨਸਮ੍ਬਨ੍ਧਵਚਨਮਾਲਾਯ ਵੁਚ੍ਚਮਾਨਤ੍ਤਾ ਸਾ ਉਪਮਾ ਸਨ੍ਤਾਨੋਪਮਾ ਨਾਮ ਹੋਤਿ, ਸਿਲੇਸਤ੍ਤੇ ਸਤਿਪਿ ਕਤਸਮਾਸੇਹਿ ਪਦਸਨ੍ਤਾਨੇਹਿ ਵੁਚ੍ਚਮਾਨਤ੍ਤਾ ਸਨ੍ਤਾਨੋਪਮਾ ਨਾਮ ਹੋਤੀਤਿ ਅਧਿਪ੍ਪਾਯੋ. ‘‘ਯਥੇ’’ਤਿ ਉਦਾਹਰਤਿ. ਅਯਂ ਉਯ੍ਯਾਨਮਾਲਾ ਏਸਾ ਉਯ੍ਯਾਨਪਨ੍ਤਿ ਸਾਲਕਾਨਨਸੋਭਿਨੀ ਅਲਕਸਙ੍ਖਾਤਕੇਸਸਨ੍ਨਿਵੇਸਸਹਿਤੇਨ ਮੁਖੇਨ ਸੋਭਮਾਨਾ ਬਾਲਾਵ ਅਙ੍ਗਨਾ ਇਵ ਸਾਲਕਾਨਨਸੋਭਿਨੀ ਸਾਲਵਨੇਹਿ ਸੋਭਮਾਨਾ ਹੋਤਿ. ਉਪਮਾਨੋਪਮੇਯ੍ਯਾਨਂ ਸਮਾਨਂ ਰੂਪਂ ਯੇਸਨ੍ਤਿ ਚ, ਸਰੂਪਾ ਚ ਤੇ ਸਦ੍ਦਾ ਚੇਤਿ ਚ, ਤੇਹਿ ਵਾਚ੍ਚਾ ਉਪਮਾਤਿ ਚ, ਤਸ੍ਸਾ ਭਾਵੋਤਿ ਚ, ਸਨ੍ਤਾਨੇਨ ਯੁਤ੍ਤਾ ਉਪਮਾਤਿ ਚ, ਉਯ੍ਯਾਨਾਨਂ ਮਾਲਾਤਿ ਚ, ਸਹ ਅਲਕੇਨ ਵਤ੍ਤਮਾਨਨ੍ਤਿ ਚ, ਤਞ੍ਚ ਤਂ ਆਨਨਞ੍ਚਾਤਿ ਚ, ਤੇਨ ਸੋਭਤਿ ਸੀਲੇਨਾਤਿ ਚ, ਸਾਲਾਨਂ ਕਾਨਨਨ੍ਤਿ ਚ, ਤੇਨ ਸੋਭਤਿ ਸੀਲੇਨਾਤਿ ਚ ਵਾਕ੍ਯਂ.
੧੯੨. ਖਯੀ ਚਨ੍ਦੋ ਬਹੁਰਜਂ, ਪਦੁਮਂ ਤੇਹਿ ਤੇ ਮੁਖਂ;
ਸਮਾਨਮ੍ਪਿ ਸਮੁਕ੍ਕਂਸੀ-ਤ੍ਯ’ਯਂ ਨਿਨ੍ਦੋਪਮਾ ਮਤਾ.
੧੯੨. ‘‘ਖਯੀ’’ਇਚ੍ਚਾਦਿ. ਚਨ੍ਦੋ ਖਯੀ ਖਯੋ ਅਚ੍ਚਯੋ ਯਸ੍ਸੇਤਿ, ਪਦੁਮਂ ਬਹੁਰਜਂ ਬਹੂਨਿ ਰਜਾਨਿ ਪਰਾਗਾਵਯਵਾ ਯਸ੍ਮਿਨ੍ਤਿ, ਤੇਹਿ ਏਵਂਭੂਤੇਹਿ ਚਨ੍ਦਪਦੁਮੇਹਿ ਕਨ੍ਤਿਆਦਿਨਾ ਸਮਾਨਮ੍ਪਿ ਸਦਿਸਮ੍ਪਿ ਸਨ੍ਤਂ ਤਵ ਮੁਖਂ ਸਮੁਕ੍ਕਂਸਿ ਪਰਮੁਕ੍ਕਂਸਵਨ੍ਤਂ, ਖਯਸਦ੍ਦਸ੍ਸ ਚ ਰਜਸ੍ਸ ਚ ਦੋਸੇਪਿ ਵਤ੍ਤਨਤੋ, ਸਦ੍ਦਚ੍ਛਲੇਨ ਖਯਸ੍ਸ ਦੋਸਰੂਪਸ੍ਸ ਬਹੁਰਜਤ੍ਤਸ੍ਸ ਚ ਤਤ੍ਥਾਭਾਵਤੋਤਿ. ਇਤਿ ਏਵਰੂਪਾ ਅਯਂ ਨਿਨ੍ਦੋਪਮਾ ਮਤਾ ਨਿਨ੍ਦਿਤੇਨ ਚਨ੍ਦਾਦਿਨਾ ਖਯਸ੍ਸੋਪਮਿਤਤ੍ਤਾ.
੧੯੨. ‘‘ਖਯਿ’’ਚ੍ਚਾਦਿ. ਚਨ੍ਦੋ ਖਯੀ ਪਾਟਿਪਦਤੋ ਪਟ੍ਠਾਯ ਦਿਨੇ ਦਿਨੇ ਏਕਮੇਕਾਯ ਕਲਾਯ ਸੂਰਿਯਸ੍ਸ ਆਸਨ੍ਨਹੇਤੁ ਖੀਯਨਸਭਾਵਯੁਤ੍ਤੋ ਹੋਤਿ, ਪਦੁਮਂ ਬਹੁਰਜਂ ਬਹੁਰੇਣੁਸਮਨ੍ਨਾਗਤਂ ਹੋਤਿ, ਤੇਹਿ ਚਨ੍ਦਪਦੁਮੇਹਿ ਸਮਾਨਮ੍ਪਿ ਕਨ੍ਤਿਸੁਗਨ੍ਧਾਦੀਹਿ ਸਦਿਸਮ੍ਪਿ ਤੇ ਮੁਖਂ ਤਵਾਨਨਂ ਸਮੁਕ੍ਕਂਸਿ ਖਯਰਜਸਦ੍ਦੇਹਿ ਦੋਸਸ੍ਸਾਪਿ ਵਾਚ੍ਚਤ੍ਤਾ ਸਦ੍ਦਚ੍ਛਲੇਹਿ ਗਮ੍ਯਮਾਨਸ੍ਸ ਤਾਦਿਸਸ੍ਸ ਦੋਸਸ੍ਸ ਮੁਖੇ ਅਵਿਜ੍ਜਮਾਨਤ੍ਤਾ ਅਧਿਕੁਕ੍ਕਂਸਗੁਣਵਨ੍ਤਂ ਹੋਤਿ, ਇਤਿ ਈਦਿਸੀ ਅਯਂ ਉਪਮਾ ਨਿਨ੍ਦੋਪਮਾ ਨਿਨ੍ਦਿਤਾਨਂ ਚਨ੍ਦਪਦੁਮਾਨਂ ਮੁਖਸ੍ਸ ਉਪਮਿਤਾਤਿ ਨਿਨ੍ਦੋਪਮਾ ਨਾਮ ਹੋਤਿ, ਮੁਖਵਿਸੇਸਨੇਨ ਇਵਸਦ੍ਦਪਰਿਯਾਯੇਨ ਸਮਾਨਸਦ੍ਦੇਨ ਮੁਖਗਤਸਧਮ੍ਮੋ ਜੋਤਿਤੋ ਹੋਤਿ, ਉਪਮਾਸਙ੍ਖਤਚਨ੍ਦਪਦੁਮਗਤਸਧਮ੍ਮੋਪਿ ਦ੍ਵੀਸੁ ਤੁਲ੍ਯਧਮ੍ਮੋਪਿ ਸਾਮਤ੍ਥਿਯਾ ਗਮ੍ਯਤੇ, ਅਪਿਸਦ੍ਦੋ ਚੇਤ੍ਥ ਵਤ੍ਤਬ੍ਬਨ੍ਤਰਸਮੁਚ੍ਚਯੇ, ਸਮੁਕ੍ਕਂਸੋਤਿ ਵਤ੍ਤਬ੍ਬਨ੍ਤਰੋ.
੧੯੩. ਅਸਮਤ੍ਥੋ ਮੁਖੇਨਿ’ਨ੍ਦੁ, ਜਿਨ ਤੇ ਪਟਿਗਜ੍ਜਿਤੁਂ;
ਜਲ਼ੋ ਕਲਙ੍ਕੀ’ਤਿ ਅਯਂ, ਪਟਿਸੇਧੋਪਮਾ ਸਿਯਾ.
੧੯੩. ‘‘ਅਸਮਤ੍ਥੋ’’ਇਚ੍ਚਾਦਿ. ਜਿਨ ਤੇ ਮੁਖੇਨ ਜਲ਼ੋ ਸੀਤੋ ਅਕੁਸਲੋ ਚ ਕਲਙ੍ਕੋ ਮਿਗਲਞ੍ਛਨਲਕ੍ਖਣੋ ਦੋਸੋ ਅਸ੍ਸ ਅਤ੍ਥੀਤਿ ਕਲਙ੍ਕੀ. ਸਦ੍ਦਚ੍ਛਲੇਨ ਦੋਸਕਥਨਂ. ਤਾਦਿਸੋ ਇਨ੍ਦੁ ਚਨ੍ਦੋ ਪਟਿਗਜ੍ਜਿਤੁਂ ਵਿਵਦਿਤੁਂ ਅਸਮਤ੍ਥੋ, ਮੁਖਨ੍ਤੁ ਵਿਸਦਂ ਅਲਙ੍ਕਤਞ੍ਚੇਤਿ ਕਥਮਨੇਨਾਯਂ ਸਦਿਸੋਤਿ ਨਿਸੇਧਦ੍ਵਾਰੇਨ ਸਧਮ੍ਮਤਾਵ ਗਮ੍ਮਤੇ, ਅਯਂ ਪਟਿਸੇਧੋਪਮਾ ਸਿਯਾ.
੧੯੩. ‘‘ਅਸਮਤ੍ਥੋ’’ਚ੍ਚਾਦਿ. ਹੇ ਜਿਨ ਤੇ ਤੁਯ੍ਹਂ ਮੁਖੇਨ ਪਟਿਗਜ੍ਜਿਤੁਂ ਵਿਵਦਿਤੁਂ ਜਲ਼ੋ ਸੀਤਲੋ ਅਵਿਸਦੋ ਕਲਙ੍ਕੀ ਸਸਲਕ੍ਖਣੋ ਵਾ ਸਦੋਸੋ ਵਾ ਇਨ੍ਦੁ ਚਨ੍ਦੋ ਅਸਮਤ੍ਥੋ ਹੋਤੀਤਿ, ਅਯਂ ਏਦਿਸੀ ਉਪਮਾ ਪਟਿਸੇਧੋਪਮਾ ਨਾਮ. ਕਲਙ੍ਕੋ ਅਸ੍ਸ ਅਤ੍ਥੀਤਿ ਵਾਕ੍ਯਂ. ਏਤ੍ਥ ਵਿਸਦੇਨ ਕਲਙ੍ਕਰਹਿਤੇਨ ਮੁਖੇਨ ਸੀਤਲੋ ਅਵਿਸਦੋ ਸਦੋਸੋ ਚਨ੍ਦੋ ਸਮਾਨੋ ਭਵਿਤੁਮਸਮਤ੍ਥੋਤਿ ਏਵਂ ਪਟਿਸੇਧਦ੍ਵਯੇਨ ਇਨ੍ਦਮੁਖਸਙ੍ਖਾਤਾਨਂ ਉਪਮਾਨੋਪਮੇਯ੍ਯਾਨਂ ਤੁਲ੍ਯਧਮ੍ਮਸਮ੍ਬਨ੍ਧਸ੍ਸ ਪਕਾਸਿਤਤ੍ਤਾ ਸਤਿਪਿ ਨਿਨ੍ਦੋਪਮਾਭਾਵੇ ਪਟਿਸੇਧੋਪਮਾ ਨਾਮ ਹੋਤੀਤਿ ਅਧਿਪ੍ਪਾਯੋ. ‘‘ਪਟਿਗਜ੍ਜਿਤੁ’’ਨ੍ਤਿ ਇਦਂ ਚਨ੍ਦਸ੍ਸ ਵਿਸੇਸਨਤ੍ਤਾ ਚਨ੍ਦਗਤਸਧਮ੍ਮਂ ਜੋਤੇਤਿ.
੧੯੪. ਕਚ੍ਛਂ ਚਨ੍ਦਾਰਵਿਨ੍ਦਾਨਂ, ਅਤਿਕ੍ਕਮ੍ਮ ਮੁਖਂ ਤਵ;
ਅਤ੍ਤਨਾਵ ਸਮਂ ਜਾਤ-ਮਿਤ੍ਯ’ਸਾਧਾਰਣੋਪਮਾ.
੧੯੪. ‘‘ਕਚ੍ਛ’’ਮਿਚ੍ਚਾਦਿ. ਚਨ੍ਦਸ੍ਸ ਅਰਵਿਨ੍ਦਸ੍ਸ ਚ ਕਚ੍ਛਂ ਪਦਵਿਂ ਅਤਿਕ੍ਕਮ੍ਮ ਅਵਤ੍ਥਰਿਯ ਤੇਸ’ਮਵਕਂਸਤੋ [ਅਵਤ੍ਥੁਯਤੇਸਮਣਂਸਤੋ (ਕ.)], ਤਵ ਮੁਖਂ ਅਤ੍ਤਨੋ ਸਰੂਪੇਨੇਵ ਸਮਂ ਜਾਤਮਿਤਿ ਏਵਰੂਪਾ ਅਸਾਧਾਰਣਤਾਭਿਧਾਨੇਨ ਸਦਿਸਤ੍ਤਪਤੀਤਿਯਾ ਅਸਾਧਾਰਣੋਪਮੇਤਿ ਨਿਗਦ੍ਯਤੇ.
੧੯੪. ‘‘ਕਚ੍ਛ’’ਮਿਚ੍ਚਾਦਿ. ਹੇ ਮੁਨਿ ਤਵ ਮੁਖਂ ਚਨ੍ਦਾਰਵਿਨ੍ਦਾਨਂ ਲੋਕਪੂਜਿਤਾਨਂ ਸਸਿਅਮ੍ਬੁਜਾਨਂ ਕਚ੍ਛਂ ਪਦਵਿਂ ਅਵਤ੍ਥਂ ਵਾ ਅਤਿਕ੍ਕਮ੍ਮ ਅਤ੍ਤਨੋ ਅਤੁਲ੍ਯਤ੍ਤੇਨ ਅਤ੍ਤਨਾ ਏਵ ਸਮਾਨਤ੍ਤਵਤ੍ਥੁਨੋ ਅਭਾਵਾ ਸਮਂ ਜਾਤਂ, ਇਤਿ ਈਦਿਸਾ ਉਪਮਾ ਅਸਾਧਾਰਣੋਪਮਾ ਅਤੁਲ੍ਯਧਮ੍ਮਭਾਵਸ੍ਸ ਪਕਾਸਨਤੋ ਅਸਾਧਾਰਣੋਪਮਾ ਨਾਮ ਹੋਤਿ. ਇਹ ਉਪਮਾਭੂਤਾਨਂ ਚਨ੍ਦਾਰਵਿਨ੍ਦਾਨਂ ਮੁਖਸ੍ਸ ਹੀਨਭਾਵਪਟਿਪਾਦਨਦ੍ਵਾਰੇਨ ਚਨ੍ਦਾਰਵਿਨ੍ਦੇਹਿ ਮੁਖਂ ਤੁਲ੍ਯਨ੍ਤਿ ਪਞ੍ਞਾਪਨਤੋ ਚਨ੍ਦਾਰਵਿਨ੍ਦਾ ਅਸਾਧਾਰਣੋਪਮਾ ਨਾਮ ਹੋਤਿ. ਸਮਸਦ੍ਦੋ ਮੁਖਗਤਸ੍ਸ ਸਾਧਾਰਣਧਮ੍ਮਂ ਜੋਤੇਤਿ. ਸੇਸਂ ਸੁਵਿਞ੍ਞੇਯ੍ਯਂ.
੧੯੫. ਸਬ੍ਬਮ੍ਭੋਜਪ੍ਪਭਾਸਾਰੋ, ਰਾਸਿਭੂਤੋਵ ਕਤ੍ਥਚਿ;
ਤਵਾ’ਨਨਂ ਵਿਭਾਤੀਤਿ, ਹੋਤਾ’ਭੂਤੋਪਮਾ ਅਯਂ.
੧੯੫. ‘‘ਸਬ੍ਬ’’ਇਚ੍ਚਾਦਿ. ਕਤ੍ਥਚਿ ਏਕਟ੍ਠਾਨੇ ਰਾਸਿਭੂਤੋ ਸਬ੍ਬੇਸਮਮ੍ਭੋਜਾਨਂ ਪਭਾਸਾਰੋਵ ਤਵਾਨਨਂ ਵਿਭਾਤੀਤਿ ਏਵਂਭੂਤਾ ਅਯਂ ਅਭੂਤੋਪਮਾ ਹੋਤਿ.
੧੯੫. ‘‘ਸਬ੍ਬ’’ਮਿਚ੍ਚਾਦਿ. ਕਤ੍ਥਚਿ ਠਾਨੇ ਰਾਸਿਭੂਤੋ ਸਬ੍ਬਮ੍ਭੋਜਪ੍ਪਭਾਸਾਰੋਵ ਸਕਲਪਦੁਮਾਨਂ ਉਤ੍ਤਮਕਨ੍ਤਿਪੁਞ੍ਜੋ ਵਿਯ ਤਵਾਨਨਂ ਵਿਭਾਤਿ ਵਿਸੇਸੇਨ ਪਭਾਤਿ, ਇਤਿ ਈਦਿਸੀ ਉਪਮਾ ਅਭੂਤੋਪਮਾ ਅਵਿਜ੍ਜਮਾਨਵਤ੍ਥੁਨੋ ਉਪਮਿਤਤ੍ਤਾ ਅਭੂਤੋਪਮਾ ਨਾਮ ਹੋਤਿ. ਅਰਾਸਿ ਰਾਸਿਭੂਤੋਤਿ ਵਿਗ੍ਗਹੋ. ਏਤ੍ਥ ਯੋਜਨਾਵਿਭੂਤੋ ਤਾਦਿਸਪਭਾਸਾਰਾਭਾਵਤੋ ਅਵਿਜ੍ਜਮਾਨਤ੍ਥੇਨ ਪਰਿਕਪ੍ਪਿਤੋ.
੧੯੬. ਪਤੀਯਤੇ’ਤ੍ਥਗਮ੍ਮਾ ਤੁ, ਸਦ੍ਦਸਾਮਤ੍ਥਿਯਾ ਕ੍ਵਚਿ;
ਸਮਾਸਪ੍ਪਚ੍ਚਯੇਵਾਦਿ-ਸਦ੍ਦਯੋਗਂ ਵਿਨਾ ਅਪਿ.
੧੯੬. ਅਤ੍ਥਗਮ੍ਮੋਪਮਂ ਦਸ੍ਸੇਤਿ ‘‘ਪਤੀਯਤੇ’’ਇਚ੍ਚਾਦਿ. ਅਤ੍ਥਗਮ੍ਮਾ ਤੁ’ਪਮਾ ਕ੍ਵਚਿ ਕਿਸ੍ਮਿਞ੍ਚਿ ਠਾਨੇ ਸਮਾਸਾਦਿਸਦ੍ਦਾਨਂ ਯੋਗਂ ਵਿਨਾ ਅਪਿ ਸਦ੍ਦਾਨਂ ਪਯੋਗਵਿਸੇਸਾਦਿਗਾਲ਼੍ਹੇਨ ਅਞ੍ਞਥਾਨੁਪਪਤ੍ਤਿਲਕ੍ਖਣੇਨ ਸਾਮਤ੍ਥਿਯੇਨ ਪਤੀਯਤੇ.
੧੯੬. ਤਿਵਿਧਂ ਸਦ੍ਦਗਮ੍ਮੋਪਮਂ ਦਸ੍ਸੇਤ੍ਵਾ ਇਦਾਨਿ ਅਤ੍ਥਗਮ੍ਮੋਪਮਂ ਦਸ੍ਸੇਤਿ ‘‘ਪਤੀਯਤੇ’’ਤ੍ਯਾਦਿਨਾ. ਅਤ੍ਥਗਮ੍ਮਾ ਤੁ ਅਤ੍ਥਗਮ੍ਮੋਪਮਾ ਪਨ ਕ੍ਵਚਿ ਠਾਨੇ ਸਮਾਸਪਚ੍ਚਯੇਵਾਦਿਸਦ੍ਦਯੋਗਂ ਵਿਨਾਪਿ ਤੇਸਂ ਸਦ੍ਦਾਨਂ ਸਮ੍ਬਨ੍ਧਂ ਹਿਤ੍ਵਾਪਿ ਸਦ੍ਦਸਾਮਤ੍ਥਿਯਾ ਸਮ੍ਬਨ੍ਧੇ ਪਯੁਤ੍ਤਾਵਸੇਸਸਦ੍ਦਾਨਂ ਅਤ੍ਥਸਤ੍ਤਿਯਾ ਪਤੀਯਤੇ. ਸਦ੍ਦਾਨਂ ਸਾਮਤ੍ਥਿਯਨ੍ਤਿ ਵਿਗ੍ਗਹੋ.
੧੯੭. ਭਿਙ੍ਗਾਨੇ’ਮਾਨਿ ਚਕ੍ਖੂਨਿ, ਨਾ’ਮ੍ਬੁਜਂ ਮੁਖ’ਮੇਵਿ’ਦਂ;
ਸੁਬ੍ਯਤ੍ਤਸਦਿਸਤ੍ਤੇਨ, ਸਾ ਸਰੂਪੋਪਮਾ ਮਤਾ.
੧੯੭. ਉਦਾਹਰਤਿ ‘‘ਭਿਙ੍ਗੇ’’ਚ੍ਚਾਦਿਨਾ. ਨ ਭਿਙ੍ਗਾ ਏਤੇ, ਕਿਞ੍ਚਰਹਿ ਚਕ੍ਖੂਨਿਮਾਨਿ, ਨਮ੍ਬੁਜਮੇਤਂ, ਕਿਨ੍ਤੁ ਮੁਖਮੇਵਿਦਨ੍ਤਿ ਏਵਰੂਪਾ ਸਾ ਸਰੂਪੋਪਮਾ ਮਤਾ ਭਿਙ੍ਗਾਦੀਨਮਵਿਪਰੀਤਸਰੂਪਸ੍ਸ ਦੀਪਨਤੋ. ਤੇਨਾਹ ‘‘ਸੁਬ੍ਯਤ੍ਤੇ’’ਤ੍ਯਾਦਿ. ਸੁਬ੍ਯਤ੍ਤੇਨ ਭਿਙ੍ਗਚਕ੍ਖੂਨਂ ਅਮ੍ਬੁਜਮੁਖਾਨਞ੍ਚ ਪਰਿਫੁਟੇਨ ਸਦਿਸਤ੍ਤੇਨ ਚਞ੍ਚਲਤ੍ਤਕਨ੍ਤ੍ਯਾਦਿਲਕ੍ਖਣੇਨ ਤੇਨੇਵਾਭੇਦਸਙ੍ਕਾਪੁਬ੍ਬਮੇਵ ਵਿਵੇਚਿਤਂ ਅਞ੍ਞਤ੍ਰ ਚਕ੍ਖਾਦੀਸੁ ਯਂ ਭਿਙ੍ਗਾਦਿਞ੍ਞਾਣਮੁਪ੍ਪਨ੍ਨਂ, ਤਸ੍ਸ ਪਚ੍ਚਕ੍ਖਾਨਤੋ ਉਪਮਾਜੋਤਕਾਨਮਿਵਾਦੀਨਮਭਾਵੇਪਿ ਭਿਙ੍ਗਲੋਚਨਾਦੀਨਂ ਸਦਿਸਤ੍ਤਂ ਪਤੀਯਤੇ ਸਾਮਤ੍ਥਿਯਤੋ. ਏਵਮੁਪਰਿਪਿ ਯਥਾਯੋਗਂ.
੧੯੭. ਇਦਾਨਿ ਉਦਾਹਰਣਮਾਹਰਤਿ ‘‘ਭਿਙ੍ਗਾਨਿ’’ਚ੍ਚਾਦਿਨਾ. ਇਮਾਨਿ ਭਿਙ੍ਗਾਨਿ ਭਮਰਾ ਨ ਭਵਨ੍ਤਿ, ਕਿਞ੍ਚਰਹਿ ਚਕ੍ਖੂਨਿ. ਅਮ੍ਬੁਜਂ ਨ ਇਦਂ ਪਦੁਮਂ ਨ ਹੋਤਿ, ਕਿਨ੍ਤੁ ਮੁਖਮੇਵਾਤਿ. ਈਦਿਸੀ ਸਾ ਉਪਮਾ ਸੁਬ੍ਯਤ੍ਤਸਦਿਸਤ੍ਤੇਨ ਸੁਪਾਕਟੇਨ ਭਿਙ੍ਗਲੋਚਨਾਨਂ ਅਮ੍ਬੁਜਮੁਖਾਨਞ੍ਚ ਤੁਲ੍ਯਭਾਵੇਨ ਸਰੂਪੋਪਮਾ ਨਾਮ ਹੋਤਿ. ਏਤ੍ਥ ਸਮਾਸਪਚ੍ਚਯਇਵਾਦਿਸਦ੍ਦਪਯੋਗਾਭਾਵੇਪਿ ‘‘ਭਿਙ੍ਗਾਨੇਮਾਨਿ ਚਕ੍ਖੂਨਿ’’ਚ੍ਚਾਦਿਨਾ ਚਕ੍ਖੁਮੁਖੇਸੁ ਭਿਙ੍ਗਅਮ੍ਬੁਜਨ੍ਤਿ ਵਿਪਰੀਤਪਵਤ੍ਤਬੁਦ੍ਧਿਂ ਪਟਿਸੇਧੇਤ੍ਵਾ ਚਕ੍ਖੁਮੁਖਵਿਧਾਨਤੋ ਚਞ੍ਚਲਤ੍ਤਕਨ੍ਤਿਮਤ੍ਤਾਦੀਸੁ ਸੁਬ੍ਯਤ੍ਤਂ ਤੁਲ੍ਯਤ੍ਤਂ ਵਿਨਾ ਚਕ੍ਖੁਮੁਖੇਸੁ ਭਿਙ੍ਗਮ੍ਬੁਜਬੁਦ੍ਧਿਂ ਕੀਦਿਸਮੁਪ੍ਪਜ੍ਜਤੀਤਿ ਅਞ੍ਞਥਾਨੁਪਪਤ੍ਤਿਲਕ੍ਖਣਸਾਮਤ੍ਥਿਯਾ ਉਪਮਾਨਭੂਤਾਨਂ ਭਿਙ੍ਗਮ੍ਬੁਜਾਨਂ ਉਪਮੇਯ੍ਯਭੂਤਾਨਂ ਚਕ੍ਖੁਮੁਖਾਨਞ੍ਚ ਸਦਿਸਤ੍ਤਂ ਞਾਯਤਿ. ਸੁਟ੍ਠੁ ਬ੍ਯਤ੍ਤਂ ਪਾਕਟਨ੍ਤਿ ਚ, ਤਞ੍ਚ ਤਂ ਸਦਿਸਤ੍ਤਞ੍ਚਾਤਿ ਚ, ਸਮਾਨਂ ਰੂਪਂ ਸਭਾਵੋ ਯਸ੍ਸਾ ਉਪਮਾਯਾਤਿ ਚ, ਸਾ ਚ ਸਾ ਉਪਮਾ ਚਾਤਿ ਚ ਵਾਕ੍ਯਂ.
੧੯੮. ਮਯੇਵ ਮੁਖਸੋਭਾ’ਸ੍ਸੇ-ਤ੍ਯਲ’ਮਿਨ੍ਦੁ ਵਿਕਤ੍ਥਨਾ;
ਯਤੋ’ਮ੍ਬੁਜੇਪਿਸਾ’ਤ੍ਥੀਤਿ, ਪਰਿਕਪ੍ਪੋਪਮਾ ਅਯਂ.
੧੯੮. ‘‘ਮਯੇਵਿ’’ਚ੍ਚਾਦਿ. ਇਨ੍ਦੁ ਚਨ੍ਦ, ਅਸ੍ਸ ਮੁਨਿਨੋ ਮੁਖਸੋਭਾ ਵਦਨਜੁਤਿ ਮਯੇਵ, ਨਾਞ੍ਞਤ੍ਰਾਤਿ ਏਵਰੂਪਾ ਵਿਕਤ੍ਥਨਾ ਅਤ੍ਥਪਸਂਸਨੇਨ ਅਲਮਿਤਿ ਪਟਿਸੇਧੋ. ਕਿਮਿਤਿ? ਯਤੋ ਯਸ੍ਮਾ ਕਾਰਣਾ ਸਾ ਮੁਖਸੋਭਾ ਅਮ੍ਬੁਜੇਪਿ ਨ ਕੇਵਲਮਿਨ੍ਦੁਮ੍ਹਿ ਅਤ੍ਥਿ, ਨੋ ਨਤ੍ਥੀਤਿ ਅਸਤੋਪਿ ਤਥਾ ਵਿਕਤ੍ਥਨਸ੍ਸ ਪਰਿਕਪ੍ਪਨਤੋ ਵਦਨਮਿਨ੍ਦੁਨੋਪਮੀਯਤੀਤਿ ਏਵਰੂਪਾ ਅਯਂ ਪਰਿਕਪ੍ਪੋਪਮਾ.
੧੯੮. ‘‘ਮਯੇ’’ਚ੍ਚਾਦਿ. ਹੇ ਇਨ੍ਦੁ ਅਸ੍ਸ ਇਮਸ੍ਸ ਲੋਕਸਾਮਿਨੋ ਮੁਖਸੋਭਾ ਵਦਨਕਨ੍ਤਿ ਏਕਕੇ ਮਯਿ ਏਵ, ਈਦਿਸੀ ਵਿਕਤ੍ਥਨਾ ਅਤ੍ਤਸਿਲਾਘੇਨ ਅਲਂ ਨਿਪ੍ਪਯੋਜਨਂ. ਕਸ੍ਮਾਤਿ ਚੇ? ਯਤੋ ਸਾ ਮੁਖਸੋਭਾ ਅਮ੍ਬੁਜੇਪਿ ਅਤ੍ਥਿ, ਤਸ੍ਮਾਤਿ. ਇਤਿ ਈਦਿਸਾ ਅਯਂ ਉਪਮਾ ਪਰਿਕਪ੍ਪੋਪਮਾ ਨਾਮ ਹੋਤਿ. ਯਤੋਤਿ ਅਨਿਯਮਨਿਦ੍ਦਿਟ੍ਠਕਾਰਣਂ ਪਨ ਅਮ੍ਬੁਜੇਪਿ ਸਾ ਅਤ੍ਥੀਤਿ ਦਸ੍ਸਿਯਮਾਨਂ ਪਦੁਮੇਪਿ ਤਸ੍ਸ ਅਤ੍ਥਿਤ੍ਤਮੇਵ. ਪਰਿਕਪ੍ਪਨਾਯ ਵੁਤ੍ਤਾ ਉਪਮਾਤਿ ਵਿਗ੍ਗਹੋ. ਇਧ ਚਨ੍ਦਸ੍ਸ ਅਵਿਜ੍ਜਮਾਨਵਿਕਤ੍ਥਨਸ੍ਸ ਵਿਜ੍ਜਮਾਨਤ੍ਤੇਨ ਪਰਿਕਪ੍ਪਨਤੋ ਸਧਮ੍ਮਜੋਤਕਸਦ੍ਦਨ੍ਤਰੇ ਅਸਤਿਪਿ ਉਪਮਾਨਭੂਤਇਨ੍ਦੁਨੋ ਚ ਉਪਮੇਯ੍ਯਭੂਤਮੁਖਸ੍ਸ ਚ ਸਦਿਸਤ੍ਤਂ ਇਮੇਸਂ ਦ੍ਵਿਨ੍ਨਂ ਸਦਿਸਤ੍ਤਂ ਵਿਨਾ ਵਤ੍ਤੁਨੋ ਤਾਦਿਸਕਪ੍ਪਨਾ ਕਥਂ ਹੋਤੀਤਿ ਇਮਾਯ ਅਤ੍ਥਸਤ੍ਤਿਯਾ ਗਮ੍ਯਤੇ.
੧੯੯. ਕਿਂ ਵਾ’ਮ੍ਬੁਜ’ਨ੍ਤੋਭਨ੍ਤਾਲਿ,
ਕਿਂ ਲੋਲਨਯਨਂ ਮੁਖਂ;
ਮਮ ਦੋਲਾਯਤੇ ਚਿਤ੍ਤ-
ਮਿਚ੍ਚ’ਯਂ ਸਂਸਯੋਪਮਾ.
੧੯੯. ‘‘ਕਿਂ ਵਾ’’ਇਚ੍ਚਾਦਿ. ਅਨ੍ਤੋ ਭਨ੍ਤਾ ਅਲੀ ਭਮਰਾ ਯਸ੍ਮਿਂ, ਤਮੀਦਿਸਮਮ੍ਬੁਜਂ ਕਿਂ ਵਾ. ਲੋਲਾਨਿ ਚਪਲਾਨਿ ਨਯਨਾਨਿ ਯਸ੍ਮਿਂ, ਤਾਦਿਸਂ ਵਾ. ਜਿਨ ਤਵੇਦਂ ਮੁਖਂ ਕਿਨ੍ਤਿ ਮਮ ਚਿਤ੍ਤਂ ਦੋਲਾਯਤੇ ਦੋਲੇਵਾਚਰਤਿ. ਏਵਂ ਪਕ੍ਖਦ੍ਵਯਪਰਿਗ੍ਗਹੇਨ ਸਂਸਯਤੀਤਿ ਅਤ੍ਥੋ. ਇਚ੍ਚਯਮੀਦਿਸੀ ਸਂਸਯਵੇਸੇਨ ਅਮ੍ਬੁਜਮੁਖਾਨਮੋਪਮਾਵਗਮਾ ਸਂਸਯੋਪਮਾ.
੧੯੯. ‘‘ਕਿਂ ਵਾ’ਮ੍ਬੁਜੇ’’ਚ੍ਚਾਦਿ. ਅਨ੍ਤੋਭਨ੍ਤਾਲਿ ਅਬ੍ਭਨ੍ਤਰੇ ਭਮਮਾਨਭਮਰਵਨ੍ਤਂ ਅਮ੍ਬੁਜਂ ਕਿਂ ਵਾ, ਤੁਯ੍ਹਂ ਲੋਲਨਯਨਂ ਚਞ੍ਚਲਨੇਤ੍ਤਂ ਮੁਖਂ ਕਿਂ ਵਾਤਿ ਮਮ ਚਿਤ੍ਤਂ ਦੋਲਾਯਤੇ ਉਭਯਸਮ੍ਭਮਜਨਨਤੋ ਦੋਲਾ ਵਿਯ ਹੋਤਿ. ਇਤਿ ਅਯਂ ਏਵਰੂਪਾ ਉਪਮਾ ਸਂਸਯੋਪਮਾ ਦ੍ਵਿਨ੍ਨਂ ਸਦਿਸਤ੍ਤਸ੍ਸ ਸਂਸਯੇਨ ਪਕਾਸਿਤਤ੍ਤਾ ਸਂਸਯੋਪਮਾ ਨਾਮ ਹੋਤਿ. ਅਨ੍ਤੋ ਭਨ੍ਤਾ ਅਲੀ ਯਸ੍ਮਿਨ੍ਤਿ ਚ, ਲੋਲਾਨਿ ਨਯਨਾਨਿ ਯਸ੍ਮਿਨ੍ਤਿ ਚ, ਦੋਲਾ ਵਿਯ ਆਚਰਤੀਤਿ ਚ, ਸਂਸਯੇਨ ਵੁਤ੍ਤਾ ਉਪਮਾਤਿ ਚ ਵਿਗ੍ਗਹੋ. ਇਹਾਪਿ ਸਧਮ੍ਮਪਕਾਸਕੇ ਸਦ੍ਦਨ੍ਤਰੇ ਅਸਤਿਪਿ ਯਥਾਵੁਤ੍ਤਵਿਸੇਸਨਦ੍ਵਯੇਨ ਵਿਸਿਟ੍ਠਾਨਂ ਦ੍ਵਿਨ੍ਨਂ ਅਮ੍ਬੁਜਮੁਖਾਨਂ ਸਂਸਯਨਿਮਿਤ੍ਤੇ ਤੁਲ੍ਯਤ੍ਤੇ ਅਸਤਿ ਕਥਂ ਸਂਸਯੋ ਉਪ੍ਪਜ੍ਜਤੀਤਿ ਇਮਿਨਾ ਸਾਮਤ੍ਥਿਯੇਨੇਵ ਤੁਲ੍ਯਧਮ੍ਮਸਮ੍ਬਨ੍ਧੋ ਗਮ੍ਯਤੇ.
੨੦੦. ਕਿਞ੍ਚਿ ਵਤ੍ਥੁਂ ਪਦਸ੍ਸੇਤ੍ਵਾ,
ਸਧਮ੍ਮਸ੍ਸਾ’ਭਿਧਾਨਤੋ;
ਸਾਮ੍ਯਪ੍ਪਤੀਤਿਸਬ੍ਭਾਵਾ,
ਪਤਿਵਤ੍ਥੂਪਮਾ ਯਥਾ.