੨. ਦੋਸਪਰਿਹਾਰਾਵਬੋਧਪਰਿਚ੍ਛੇਦਵਣ੍ਣਨਾ

੬੮. ਕਦਾਚਿ ਕਵਿਕੋਸਲ੍ਲਾ, ਵਿਰੋਧੋ ਸਕਲੋਪ੍ਯ’ਯਂ;

ਦੋਸਸਙ੍ਖ੍ਯਮਤਿਕ੍ਕਮ੍ਮ, ਗੁਣਵੀਥਿਂ ਵਿਗਾਹਤੇ.

੬੯. ਤੇਨ ਵੁਤ੍ਤਵਿਰੋਧਾਨ-ਮਵਿਰੋਧੋ ਯਥਾ ਸਿਯਾ;

ਤਥਾ ਦੋਸਪਰਿਹਾਰਾ-ਵਬੋਧੋ ਦਾਨਿ ਨੀਯਤੇ.

੬੮-੬੯. ਇਚ੍ਚੇਵਂ ਦੋਸਵਿਭਾਗਂ ਪਰਿਚ੍ਛਿਜ੍ਜ ਇਦਾਨਿ ਯਥਾਵੁਤ੍ਤਦੋਸਪਰਿਹਾਰਕ੍ਕਮਮੁਪਦਿਸਿਤੁਮਾਹ ‘‘ਕਦਾਚੀ’’ਤ੍ਯਾਦਿ. ਸਕਲੋਪਿ ਅਯਂ ਵਿਰੋਧੋ ਵਿਰੁਦ੍ਧਤ੍ਥਨ੍ਤਰਾਦਿਕਤੋ ਨ ਕੋਚਿ ਏਕੋ ਏਵ ਦੋਸੇਸੁ, ਦੋਸਾਨਂ ਵਾ ਸਙ੍ਖ੍ਯਂ ਗਣਨਂ ਦੋਸਭਾਵਂ ਅਤਿਕ੍ਕਮ੍ਮ ਪਰਿਚ੍ਛਿਜ੍ਜ ਗੁਣਾਨਂ ਵੀਥਿਂ ਪਦਵਿਂ ਗੁਣਸਭਾਵਤਂ ਵਿਗਾਹਤੇ ਅਬ੍ਭੁਪਗਚ੍ਛਤਿ ਕਦਾਚਿ, ਨ ਸਬ੍ਬਦਾ. ਕਵਿਨੋ ਪਯੁਜ੍ਜਕਸ੍ਸ ਕੋਸਲ੍ਲਾ ਤਾਦਿਸਵਿਸਯਪਰਿਗ੍ਗਹਲਕ੍ਖਣਨੇਪੁਞ੍ਞਕਾਰਣਾ, ਨ ਤੁ ਯਥਾ ਤਥਾ ਚੇਤਿ. ‘‘ਤੇਨੇ’’ਚ੍ਚਾਦਿ. ਯੇਨੇਵਂ, ਤੇਨ ਕਾਰਣੇਨ ਵੁਤ੍ਤਾਨਂ ਵਿਰੁਦ੍ਧਤ੍ਥਨ੍ਤਰਾਦੀਨਂ ਵਿਰੋਧਾਨਂ ਯਥਾ ਯੇਨ ਪਕਾਰੇਨ ਅਵਿਰੋਧੋ ਨਿਦ੍ਦੋਸਤਾ ਸਿਯਾ ਭਵੇਯ੍ਯ, ਤਥਾ ਤੇਨ ਪਕਾਰੇਨ ਦੋਸਾਨਂ ਪਰਿਹਾਰੋ ਦੂਰੀਕਰਣਂ ਅਵਬੁਜ੍ਝਤਿ ਞਾਯਤਿ ਏਤੇਨਾਤਿ ਅਵਬੋਧੋ, ਤਸ੍ਸ ਅਵਬੋਧੋ, ਤਨ੍ਨਾਮਿਕੋ ਪਰਿਚ੍ਛੇਦੋ ਇਦਾਨਿ ਨੀਯਤੇ ਆਨੀਯਤੇ ਵੁਚ੍ਚਤੇਤਿ ਅਤ੍ਥੋ.

੬੮-੬੯. ਏਵਂ ਦੋਸਵਿਭਾਗਂ ਪਰਿਚ੍ਛਿਨ੍ਦਿਤ੍ਵਾ ਇਦਾਨਿ ਯਥਾਵੁਤ੍ਤਦੋਸਾਨਂ ਪਰਿਹਾਰਤ੍ਥਮਾਰਭਨ੍ਤੋ ‘‘ਕਦਾਚੀ’’ਤ੍ਯਾਦਿਮਾਹ. ਸਕਲੋਪਿ ਅਯਂ ਵਿਰੋਧੋ ਪਦਦੋਸਾਦਿਕੋ ਦੋਸਸਙ੍ਖ੍ਯਂ ਦੋਸਾਨਂ, ਦੋਸੇਸੁ ਵਾ ਗਣਨਂ ਦੋਸਭਾਵਂ ਅਤਿਕ੍ਕਮ੍ਮ ਕਦਾਚਿ ਕਵਿਕੋਸਲ੍ਲਾ ਕਵਿਨੋ ਬ੍ਯਾਕਰਣਾਭਿਧਾਨਛਨ੍ਦੋਅਲਙ੍ਕਤਿਆਦੀਸੁ ਪਰਿਚਯਲਕ੍ਖਣੇਨ ਪਞ੍ਞਾਪਾਟਵੇਨ ਯਤੋ ਗੁਣਵੀਥਿਂ ਗੁਣਪਦਵਿਂ ਕੇਵਲਂ ਗੁਣਸਭਾਵਂ ਵਿਗਾਹਤੇ ਅਬ੍ਭੁਪਗਚ੍ਛਤਿ, ਤੇਨ ਕਾਰਣੇਨ ਵੁਤ੍ਤਵਿਰੋਧਾਨਂ ਯਥਾਵੁਤ੍ਤਪਦਦੋਸਾਦਿਵਿਰੋਧਾਨਂ ਅਵਿਰੋਧੋ ਅਵਿਰੁਦ੍ਧਤਾ ਯਥਾ ਸਿਯਾ ਯੇਨ ਪਕਾਰੇਨ ਭਵੇਯ੍ਯ, ਤਥਾ ਤੇਨ ਪਕਾਰੇਨ ਦੋਸਪਰਿਹਾਰਾਵਬੋਧੋ ਯਥਾਵੁਤ੍ਤਪਦਦੋਸਾਦਿਸਮ੍ਬਨ੍ਧਿਨੋ ਪਰਿਹਰਣਕ੍ਕਮਸ੍ਸ ਅਵਬੋਧਕਾਰਣਤ੍ਤਾ ਤਨ੍ਨਾਮਿਕਪਰਿਚ੍ਛੇਦੋ ਇਦਾਨਿ ਲਦ੍ਧਾਵਸਰੇ ਨੀਯਤੇ ਵੁਚ੍ਚਤੇ. ਯਥਾਵੁਤ੍ਤਦੋਸਾ ਕਵਿਸਾਮਤ੍ਥਿਯੇਨ ਨਿਦ੍ਦੋਸਤ੍ਤਂ ਭਜਨ੍ਤਿ, ਤਸ੍ਸ ਸਾਮਤ੍ਥਿਯਸ੍ਸ ਉਪਦੇਸਂ ਦਸ੍ਸਾਮਾਤਿ ਅਧਿਪ੍ਪਾਯੋ.

ਪਦਦੋਸਪਰਿਹਾਰਵਣ੍ਣਨਾ

ਤਤ੍ਥ ਵਿਰੁਦ੍ਧਤ੍ਥਨ੍ਤਰਸ੍ਸ ਪਰਿਹਾਰੋ ਯਥਾ –

੭੦. ਵਿਨ੍ਦਨ੍ਤਂ ਪਾਕਸਾਲੀਨਂ, ਸਾਲੀਨਂ ਦਸ੍ਸਨਾ ਸੁਖਂ;

ਤਂ ਕਥਂ ਨਾਮ ਮੇਘੋ’ਯਂ, ਵਿਸਦੋ ਸੁਖਯੇ ਜਨਂ.

੭੦. ‘‘ਵਿਨ੍ਦਨ੍ਤ’’ਮਿਚ੍ਚਾਦਿ. ਪਾਕੇਨ ਪਰਿਣਤਭਾਵੇਨ ਸਾਲੀਨਂ ਯੁਤ੍ਤਾਨਂ, ਮਨੁਞ੍ਞਾਨਂ ਵਾ ਸਾਲੀਨਂ ਰਤ੍ਤਸਾਲਿਆਦੀਨਂ ਸਾਲਿਜਾਤੀਨਂ ਦਸ੍ਸਨਾ ਸੁਖਂ ਚੇਤਸਿਕਂ ਸੋਮਨਸ੍ਸਂ ਵਿਨ੍ਦਨ੍ਤਂ ਤਂ ਜਨਂ ਵਿਸਦੋ ਅਯਂ ਮੇਘੋ ਅਮ੍ਬੁਦੋ ਕਥਂ ਨਾਮ ਸੁਖਯੇਤਿ. ਏਤ੍ਥ ਤਾਦਿਸਸ੍ਸ ਜਨਸ੍ਸ ਅਸੁਖਪ੍ਪਦਾਨਂ ਗਰਲ਼ਸ੍ਸ ਮੇਘਸ੍ਸਾਨੁਰੂਪਨ੍ਤਿ ਵਿਰੁਦ੍ਧਤ੍ਥਨ੍ਤਰਤਾ ਪਰਿਹਟਾ.

੭੦. ਤਤ੍ਥ ਵਿਰੁਦ੍ਧਤ੍ਥਨ੍ਤਰਸ੍ਸ ਪਰਿਹਾਰੋ ਯਥਾ ਏਵਂ. ‘‘ਵਿਨ੍ਦਨ੍ਤਿ’’ਚ੍ਚਾਦਿ. ਪਾਕਸਾਲੀਨਂ ਪਰਿਣਾਮੇਨ ਯੁਤ੍ਤਾਨਂ, ਮਨੁਞ੍ਞਾਨਂ ਵਾ ਸਾਲੀਨਂ ਰਤ੍ਤਸਾਲਿਆਦੀਨਂ ਦਸ੍ਸਨਾ ਦਸ੍ਸਨਹੇਤੁ ਸੁਖਂ ਚੇਤਸਿਕਸੋਮਨਸ੍ਸਂ ਵਿਨ੍ਦਨ੍ਤਂ ਅਨੁਭੋਨ੍ਤਂ ਤਂ ਜਨਂ ਤਂ ਕਸ੍ਸਕਜਨਂ ਵਿਸਦੋ ਜਲਦਾਯਕੋ ਅਯਂ ਮੇਘੋ ਕਥਂ ਨਾਮ ਸੁਖਯੇ, ਨ ਸੁਖਯਤੇਵ. ਤਾਦਿਸਸ੍ਸ ਜਨਸ੍ਸ ਦੁਕ੍ਖਦਾਨਂ ਗਰਲ਼ਦਾਯਕਸ੍ਸ ਮੇਘਸ੍ਸਾਪਿ ਅਨੁਰੂਪਮਿਤਿ ਵਿਰੁਦ੍ਧਞ੍ਞਤ੍ਥੋ ਅਪਨੀਤੋ ਹੋਤਿ. ਪਾਕੇਨ ਸਾਲਿਨੋਤਿ ਵਿਗ੍ਗਹੋ. ਸੁਖਂ ਕਰੋਤੀਤਿ ਸੁਖਯੇਤਿ ਨਾਮਧਾਤੁ.

ਯਥਾ ਵਾ –

੭੧. ਵਿਨਾਯਕੋਪਿ ਨਾਗੋਸਿ,

ਗੋਤਮੋਪਿ ਮਹਾਮਤਿ;

ਪਣੀਤੋਪਿ ਰਸਾਪੇਤੋ,

ਚਿਤ੍ਤਾ ਮੇ ਸਾਮਿ ਤੇ ਗਤਿ.

੭੧. ‘‘ਵਿਨਾਯਕੋਪਿ’’ਚ੍ਚਾਦਿ. ਵੀਨਂ ਪਕ੍ਖੀਨਂ ਨਾਯਕੋ, ਗਰੁਲ਼ੋ, ਸਤ੍ਤੇ ਵਿਨੇਤੀਤਿ ਵਿਨਾਯਕੋ, ਵੁਦ੍ਧੋ, ਭਗਵਾ ਚ. ਤਤ੍ਥ ਯਦਾ ਵਿਨਾਯਕੋ ਗਰੁਲ਼ੋ, ਤਦਾ ਤੁ ਨਾਗੋ ਪਨ੍ਨਗੋਸੀਤਿ ਵਿਰੁਦ੍ਧਂ, ਪਕ੍ਖਨ੍ਤਰੇ ਤ੍ਵਵਿਰੁਦ੍ਧਂ ਭਗਵਤੋ ਆਗੁਸ੍ਸ ਰਾਗਾਦਿਨੋ ਅਭਾਵਤੋ. ਇਮੇਸਂ ਗੁਨ੍ਨਂ ਅਤਿਸਯੇਨ ਗੋ ਗੋਤਮੋ ਹੀਨਪਸੁ, ਗੋਤਮਵਂਸਾਵਤਿਣ੍ਣਤ੍ਤਾ ਗੋਤਮੋ ਭਗਵਾ ਚ. ਹੀਨਪਸੁ ਚ ਤ੍ਵਂ ਮਹਾਮਤਿ ਅਸੀਤਿ ਵਿਰੁਦ੍ਧਂ ਅਚ੍ਚਨ੍ਤਹੀਨਪਸੁਨੋ ਮਹਤਿਯਾ ਪਞ੍ਞਾਯ ਅਭਾਵਤੋ. ਪਕ੍ਖਨ੍ਤਰੇ ਤੁ ਨ ਬ੍ਯਾਘਾਤੋ. ਪਣੀਤੋ ਮਧੁਰੋ ਰਸੋ, ਉਤ੍ਤਮੋ ਚ ਸੁਗਤੋ. ਤਤ੍ਥ ਮਧੁਰਰਸਤੋ ਅਪੇਤੋ ਅਪਗਤੋਸੀਤਿ ਵਿਰੁਜ੍ਝਤਿ, ਭਗਵਤੋ ਤੁ ਰਸੇਹਿ ਸਿਙ੍ਗਾਰਾਦੀਹਿ ਅਪੇਤੋਤਿ ਯੁਜ੍ਜਤਿ. ਮੇ ਮਮ. ਸਾਮੀਤਿ ਆਮਨ੍ਤਨਂ. ਤੇ ਤਵ ਗਤਿ ਪਵਤ੍ਤਿ ਚਿਤ੍ਤਾ ਅਬ੍ਭੁਤਾਤਿ. ਏਤ੍ਥ ਵਿਰੁਦ੍ਧਤ੍ਥਨ੍ਤਰਂ ਵਿਰੋਧਾਲਙ੍ਕਾਰਂ ਸਿਲਾਘਨੀਯਨ੍ਤਿ ਤੇਨ ਤਂ ਪਰਿਹਟਂ.

੭੧. ਯਥਾ ਵਾ ਉਤ੍ਤਦੋਸਸ੍ਸ ਪਰਿਹਾਰੋ ਈਦਿਸੋ ਵਾ. ‘‘ਵਿਨਾਯਕੋ’’ਚ੍ਚਾਦਿ. ਹੇ ਸਾਮਿ ਤ੍ਵਂ ਵਿਨਾਯਕੋਪਿ ਗਰੁਲ਼ੋਪਿ ਨਾਗੋਸਿ ਪਨ੍ਨਗੋ ਅਸਿ. ਨੋ ਚੇ, ਵਿਨਾਯਕੋਪਿ ਸਤ੍ਤੇ ਵਿਨੇਨ੍ਤੋ ਏਵ ਨਾਗੋਸਿ ਨਿਕ੍ਕਿਲੇਸੋ ਅਸਿ. ਗੋਤਮੋਪਿ ਪਸੁਤਮੋਪਿ ਮਹਾਮਤਿ ਮਹਾਪਞ੍ਞਵਾਸਿ. ਨੋ ਚੇ, ਗੋਤਮੋਪਿ ਗੋਤ੍ਤਤੋ ਗੋਤਮੋਯੇਵ ਮਹਾਮਤਿ ਮਹਾਪਞ੍ਞਵਾਸਿ. ਪਣੀਤੋਪਿ ਮਧੁਰੋਪਿ ਰਸਾਪੇਤੋ ਮਧੁਰਰਸਤੋ ਅਪਗਤੋਸਿ. ਨੋ ਚੇ, ਪਣੀਤੋਪਿ ਉਤ੍ਤਮੋ ਏਵ ਰਸਾਪੇਤੋ ਸਿਙ੍ਗਾਰਾਦਿਰਸਤੋ ਅਪਗਤੋਸਿ. ਤੇ ਤੁਯ੍ਹਂ ਗਤਿ ਪਵਤ੍ਤਿ ਮੇ ਮਯ੍ਹਂ ਚਿਤ੍ਤਾ ਅਚ੍ਛਰਿਯਾ. ਏਤ੍ਥ ਗਰੁਲ਼ਸ੍ਸ ਨਾਗਤ੍ਤਞ੍ਚ ਪਸੁਤਮਸ੍ਸ ਪਞ੍ਞਵਨ੍ਤਤ੍ਤਞ੍ਚ ਪਣੀਤਸ੍ਸ ਨਿਰਸਤ੍ਤਞ੍ਚ ਵਿਰੁਦ੍ਧਂ, ਤਥਾਪਿ ਅਞ੍ਞਪਕ੍ਖਸ੍ਸ ਅਵਿਰੁਦ੍ਧਤ੍ਤਾ ਵਿਰੁਦ੍ਧਤ੍ਥਨ੍ਤਰਦੋਸੋ ਪਸਤ੍ਥੇਨ ਵਿਰੁਦ੍ਧਾਲਙ੍ਕਾਰੇਨ ਨਿਰਾਕਤੋ. ਵੀਨਂ ਪਕ੍ਖੀਨਂ ਨਾਯਕੋ, ਗਰੁਲ਼ੋ. ਸਤ੍ਤੇ ਵਿਨੇਤੀਤਿ ਵਿਨਾਯਕੋ, ਬੁਦ੍ਧੋ. ਨਤ੍ਥਿ ਆਗੁ [ਅਗੋ (ਕ.)] ਏਤਸ੍ਸਾਤਿ ਨਾਗੋ, ਬੁਦ੍ਧੋ. ਗੁਨ੍ਨਮਤਿਸਯੇਨ ਗੋਤਮੋ, ਪਸੁ. ਮਹਤੀ ਮਤਿ ਅਸ੍ਸਾਤਿ ਮਹਾਮਤਿ, ਬੁਦ੍ਧੋ. ਪਧਾਨਤ੍ਤਂ ਨੀਤੋ ਪਣੀਤੋ, ਮਧੁਰੋ ਰਸੋ. ਰਸਤੋ ਅਪੇਤੋਤਿ ਰਸਾਪੇਤੋ, ਬੁਦ੍ਧੋਤਿ ਵਿਗ੍ਗਹੋ.

ਅਝਤ੍ਥਸ੍ਸ ਯਥਾ –

੭੨. ਕਥਂ ਤਾਦਿਗੁਣਾਭਾਵੇ,

ਲੋਕਂ ਤੋਸੇਤਿ ਦੁਜ੍ਜਨੋ;

ਓਭਾਸਿਤਾਸੇਸਦਿਸੋ,

ਖਜ੍ਜੋਤੋ ਨਾਮ ਕਿਂ ਭਵੇ.

੭੨. ‘‘ਕਥ’’ਮਿਚ੍ਚਾਦਿ. ਦੁਜ੍ਜਨੋ ਤਾਦਿਨੋ ਗੁਣਾ ਲੋਕਂ ਤੋਸੇਨ੍ਤਿ, ਤਾਦੀਨਂ ਗੁਣਾਨਂ ਅਤ੍ਤਨਿ ਅਭਾਵੇ ਸਤਿ ਲੋਕਂ ਸਤ੍ਤਲੋਕਂ ਕਥਂ ਤੋਸੇਤਿ, ਨ ਤੋਸੇਤੀਤਿ ਅਤ੍ਥੋ. ਵੁਤ੍ਤਮੇਵਤ੍ਥਨ੍ਤਰੇਨ ਸਾਧੇਤਿ ‘‘ਖਜ੍ਜੋਤੋ ਨਾਮ ਓਭਾਸਿਤਾ ਦੀਪਿਤਾ ਅਸੇਸਦਿਸਾ ਯੇਨ ਤਥਾਵਿਧੋ ਕਿਂ ਭਵੇ, ਨ ਭਵੇਯ੍ਯ ਤਾਦਿਨੋ ਗੁਣਸ੍ਸ ਅਭਾਵਤੋ’’ਤਿ. ਏਤ੍ਥ ਖਜ੍ਜੋਤਸ੍ਸ ਅਧਿਕਤ੍ਥਭਾਵੇਨ ਸਿਤੋ ਓਭਾਸਿਤਾਸੇਸਦਿਸਤ੍ਤਦੋਸੋ ‘‘ਕਥਂ ਤਾਦਿਗੁਣਾਭਾਵੇ’’ਤਿਆਦਿਵਚੋਭਙ੍ਗਿਯਾ ਪਰਿਹਟੋ.

੭੨. ਅਝਤ੍ਥਸ੍ਸ ਯਥਾਤਿ ਏਤ੍ਥ ਪਰਿਹਾਰੋ ਅਜ੍ਝਾਹਾਰੋ, ਏਵਮੁਪਰਿਪਿ. ‘‘ਕਥਿ’’ਚ੍ਚਾਦਿ. ਦੁਜ੍ਜਨੋ ਗੁਣਹੀਨਜਨੋ ਤਾਦਿਗੁਣਾਭਾਵੇ ਸਨ੍ਤੋਸਜਨਨਕਾਰਣਾਨਂ ਤਾਦਿਸਾਨਂ ਸੀਲਾਦਿਗੁਣਾਨਂ ਅਤ੍ਤਨਿ ਅਵਿਜ੍ਜਮਾਨਤ੍ਤੇ ਸਤਿ ਲੋਕਂ ਸਤ੍ਤਲੋਕਂ ਕਥਂ ਤੋਸੇਤਿ, ਨ ਤੋਸੇਤਿਯੇਵ, ਤਥਾ ਹਿ ਖਜ੍ਜੋਤੋ ਨਾਮ ਓਭਾਸਿਤਾਸੇਸਦਿਸੋ ਕਿਂ ਭਵੇ, ਨ ਭਵਤ੍ਯੇਵ. ਏਤ੍ਥ ਖਜ੍ਜੋਤਸ੍ਸ ਸਕਲਦਿਸੋਭਾਸਨਸਙ੍ਖਾਤਮਧਿਕਤ੍ਥਦੋਸੋ ‘‘ਕਥਂ ਤਾਦਿਗੁਣਾਭਾਵੇ’’ਚ੍ਚਾਦਿਵਾਕ੍ਯਲੀਲਾਯ ਨਿਰਾਕਤੋ. ਤਾਦੀ ਚ ਤੇ ਗੁਣਾ ਚੇਤਿ ਵਿਗ੍ਗਹੋ.

੭੩. ਪਹੇਲ਼ਿਕਾਯਮਾਰੁਲ਼੍ਹਾ, ਨ ਹਿ ਦੁਟ੍ਠਾ ਕਿਲਿਟ੍ਠਤਾ;

ਪਿਯਾ ਸੁਖਾ’ਲਿਙ੍ਗਿਤਂ ਕ-ਮਾਲਿਙ੍ਗਤਿ ਨੁ ਨੋ ਇਤਿ.

੭੩. ‘‘ਪਹੇਲ਼ਿਕਾਯਂ’’ਇਚ੍ਚਾਦਿ. ਕਿਲਿਟ੍ਠਤਾ ਕਿਲਿਟ੍ਠਪਦਦੋਸੋ ਪਹੇਲ਼ਿਕਾਯ ਵਿਸਯੇ ਆਰੁਲ਼੍ਹਾ ਸਹੀ ਨ ਹਿ ਨੋ ਦੁਟ੍ਠੋ ਸਿਯਾ. ਕੀਦਿਸੀਤਿ ਆਹ ‘‘ਪਿਯੇ’’ਚ੍ਚਾਦਿ. ਇਤੀਤਿ ਨਿਦਸ੍ਸਨੇ. ਪਿਯਾ ਵਲ੍ਲਭਾਯ ਆਲਿਙ੍ਗਿਤਂ ਕਂ ਜਨਂ ਸੁਖਂ ਕਾਯਿਕਂ ਚੇਤਸਿਕਞ੍ਚ ਨੋ ਆਲਿਙ੍ਗਤਿ ਨ ਸਂਯੁਜ੍ਜਤਿ ਨੁ. ਨੁਇਤਿ ਪਰਿਵਿਤਕ੍ਕੇ ਨਿਪਾਤੋ. ਏਤ੍ਥ ਪਿਯਾਤਿ ਕਿਲਿਟ੍ਠਂ ਪਹੇਲ਼ਿਕਾਯ ਸਮਾਰੋਪੇਨ ਪਰਿਹਟਂ.

੭੩. ‘‘ਪਹੇਲ਼ਿਕੇ’’ਚ੍ਚਾਦਿ. ਕਿਲਿਟ੍ਠਤਾ ਕਿਲਿਟ੍ਠਪਦਦੋਸਸਙ੍ਖਾਤਾ ਪਹੇਲ਼ਿਕਾਯਂ ਵਿਸਯੇ ਆਰੁਲ਼੍ਹਾ ਚੇ, ਨ ਹਿ ਦੁਟ੍ਠਾ ਦੁਟ੍ਠਾ ਨ ਹੋਤਿ. ਕਿਮੁਦਾਹਰਣਂ? ਪਿਯਾ ਸੁਖਾਲਿਙ੍ਗਿਤਂ ਕਮਾਲਿਙ੍ਗਤਿ ਨੁ ਨੋ ਇਤਿ, ਇਤਿਸਦ੍ਦਸ੍ਸ ਨਿਦਸ੍ਸਨਤ੍ਥਤ੍ਤਾ ਸੇਸਉਦਾਹਰਣਾਨਮੇਤਮੁਪਲਕ੍ਖਣਨ੍ਤਿ ਞਾਤਬ੍ਬਂ. ਨੋ ਚੇ, ਏਵਂਪਕਾਰਾਨਮੁਦਾਹਰਣਾਨਮਪਰਿਗ੍ਗਹੇਤਬ੍ਬਤ੍ਤਾ ਇਤਿਸਦ੍ਦੋ ਪਕਾਰਤ੍ਥੋਤਿ. ਪਿਯਾ ਵਲ੍ਲਭਾਯ ਆਲਿਙ੍ਗਿਤਂ ਉਪਗੁਹਿਤਂ ਕਂ ਨਾਮ ਜਨਂ ਸੁਖਂ ਕਾਯਿਕਮਾਨਸਿਕਂ ਨੋ ਆਲਿਙ੍ਗਤਿ ਨੁ, ਆਲਿਙ੍ਗਤੇਵਾਤਿ. ਏਤ੍ਥ ਪਿਯਾਤਿ ਕਿਲਿਟ੍ਠਪਦਂ ਪਹੇਲ਼ਿਕਾਯਮਾਰੋਪਨੇਨ ਨਿਰਾਕਤਂ ਹੋਤਿ.

੭੪. ਯਮਕੇ ਨੋ ਪਯੋਜੇਯ੍ਯ, ਕਿਲਿਟ੍ਠਪਦ’ਮਿਚ੍ਛਿਤੇ;

ਤਤੋ ਯਮਕ’ਮਞ੍ਞਂ ਤੁ, ਸਬ੍ਬਮੇਤਂਮਯਂ ਵਿਯ.

੭੪. ‘‘ਯਮਕੇ’’ਚ੍ਚਾਦਿ. ਤਤੋ ਅਞ੍ਞਨ੍ਤਿ ਇਚ੍ਛਿਤਯਮਕਤੋ ਅਞ੍ਞਂ. ਤੁਇਤਿ ਵਿਸੇਸਜੋਤਕੋ. ਏਤਂਮਯਂ ਵਿਯਾਤਿ ਏਤੇਨ ਕਿਲਿਟ੍ਠਪਦੇਨ ਨਿਬ੍ਬਤ੍ਤਂ ਵਿਯ.

੭੪. ‘‘ਯਮਕੇ’’ਚ੍ਚਾਦਿ. ਕਿਲਿਟ੍ਠਪਦਂ ਇਚ੍ਛਿਤੇ ਯਮਕੇ ਇਟ੍ਠਯਮਕੇ ਨੋ ਪਯੋਜੇਯ੍ਯ ਨਪ੍ਪਯੁਜ੍ਜੇਯ੍ਯ, ਤਤੋ ਇਟ੍ਠਯਮਕਤੋ ਅਞ੍ਞਂ ਸਬ੍ਬਂ ਯਮਕਂ ਪਨ ਏਤਂਮਯਂ ਵਿਯ ਇਮਿਨਾ ਕਿਲਿਟ੍ਠਪਦਦੋਸੇਨ ਕਤਂ ਵਿਯ ਹੋਤਿ. ਏਤ੍ਥ ਇਟ੍ਠਯਮਕਂ ਵੁਤ੍ਤਨਯੇਨ ਞਾਤਬ੍ਬਂ, ਏਤੇਨ ਨਿਬ੍ਬਤ੍ਤਂ ਏਤਂਮਯਨ੍ਤਿ ਵਿਗ੍ਗਹੋ.

ਦੇਸਵਿਰੋਧਿਨੋ ਯਥਾ –

੭੫. ਬੋਧਿਸਤ੍ਤਪ੍ਪਭਾਵੇਨ, ਥਲੇਪਿ ਜਲਜਾਨ੍ਯ’ਹੁਂ;

ਨੁਦਨ੍ਤਾਨਿ’ਵ ਸੁਚਿਰਾ-ਵਾਸਕ੍ਲੇਸਂ ਤਹਿਂ ਜਲੇ.

੭੫. ‘‘ਬੋਧਿਸਤ੍ਤੇ’’ਚ੍ਚਾਦਿ. ਬੋਧਿਸਤ੍ਤਸ੍ਸ ਮਾਯਾਦੇਵਿਯਾ ਸੁਤਸ੍ਸ ਵਕ੍ਖਮਾਨਸ੍ਸ ਵਿਸੇਸਸ੍ਸ ਤਦੁਪ੍ਪਨ੍ਨਦਿਨੇ ਸਮ੍ਭਵਾ ਪਭਾਵੇਨ ਪੁਞ੍ਞਪ੍ਪਭਾਵਤੋ ਜਲਜਾਨਿ ਅਮ੍ਬੁਜਾਨਿ ਥਲੇਪਿ ਅਹੁਂ ਅਹੇਸੁਂ ਅਚਿਨ੍ਤਨੀਯਤ੍ਤਾ ਪੁਞ੍ਞਪ੍ਪਭਾਵਸ੍ਸ. ਕਿਂ ਪਨ ਵਾਪ੍ਯਾਦੀਸੁ ਕਿਂ ਕਰੋਨ੍ਤਾਵ ਤਹਿਂ ਤਸ੍ਮਿਞ੍ਚ ਜਲੇ ਸੁਚਿਰਂ ਸਬ੍ਬਦਾਵ ਆਵਸਨਮਾਵਾਸੋ ਤੇਨ ਜਾਤੋ ਕ੍ਲੇਸੋ ਤਂ ਨੁਦਨ੍ਤਾਨਿਵ ਦੂਰਤੋ ਜਹਨ੍ਤਾਨਿਵੇਤਿ. ਅਚਿਨ੍ਤਨੀਯਤ੍ਤਾ ਪੁਞ੍ਞਪ੍ਪਭਾਵਸ੍ਸ ਈਦਿਸਮ੍ਪਿ ਅਚ੍ਛਰਿਯਮਹੋਸੀਤਿ ਨ ਦੇਸਵਿਰੋਧੋ.

੭੫. ਬੋਧਿਸਤ੍ਤਪ੍ਪਭਾਵੇਨ ਬੋਧਿਸਤ੍ਤਸ੍ਸ ਅਚਿਨ੍ਤੇਯ੍ਯਾਨੁਭਾਵੇਨ ਜਲਜਾਨਿ ਜਲਜਸਦਿਸਤ੍ਤਾ ਤਨ੍ਨਾਮਕਾਨਿ ਪਦੁਮਕੇਰਵਾਦੀਨਿ ਤਹਿਂ ਜਲੇ ਵਿਸਯਤ੍ਤੇਨ ਪਸਿਦ੍ਧੇ ਤਸ੍ਮਿਂ ਉਦਕੇ ਸੁਚਿਰਾਵਾਸਕ੍ਲੇਸਂ ਅਤਿਚਿਰਂ ਨਿਵਾਸਤੋ ਜਾਤਆਯਾਸਂ ਨੁਦਨ੍ਤਾਨਿ ਇਵ ਚਜਨ੍ਤਾਨਿ ਇਵ ਥਲੇਪਿ ਅਹੁਂ ਅਹੇਸੁਂ, ਵਾਪਿਆਦੀਸੁ ਕਾ ਕਥਾ. ਏਤ੍ਥ ਜਲਜਾਨਂ ਥਲੁਪ੍ਪਤ੍ਤਿਕਥਨਸਙ੍ਖਾਤਂ ਦੇਸਵਿਰੋਧਂ ਅਚਿਨ੍ਤੇਯ੍ਯਪੁਞ੍ਞਪ੍ਪਭਾਵੇਨ ਈਦਿਸਾਨਂ ਅਚ੍ਛਰਿਯਾਨਂ ਪਾਤੁਭਾਵਤੋ ‘‘ਬੋਧਿਸਤ੍ਤਪ੍ਪਭਾਵੇਨਾ’’ਤਿ ਇਮਿਨਾ ਨਿਰਾਕਰੋਤਿ. ਬੋਧਿਯਂ ਚਤੁਮਗ੍ਗਪਞ੍ਞਾਯਂ ਸਤ੍ਤੋਤਿ ਚ, ਤਸ੍ਸ ਪਭਾਵੋਤਿ ਚ, ਸੁਚਿਰਂ ਆਵਾਸੋਤਿ ਚ, ਤੇਨ ਭੂਤੋ ਕ੍ਲੇਸੋਤਿ ਚ ਵਾਕ੍ਯਂ.

ਕਾਲਵਿਰੋਧਿਨੋ ਯਥਾ –

੭੬. ਮਹਾਨੁਭਾਵਪਿਸੁਨੋ, ਮੁਨਿਨੋ ਮਨ੍ਦਮਾਰੁਤੋ;

ਸਬ੍ਬੋਤੁਕਮਯਂ ਵਾਯਿ, ਧੁਨਨ੍ਤੋ ਕੁਸੁਮਂ ਸਮਂ.

੭੬. ‘‘ਮਹਾ’’ਇਚ੍ਚਾਦਿ. ਮਨ੍ਦੋ ਮੁਦੁਭੂਤੋ ਮਾਰੁਤੋ ਅਯਂ ਸਬ੍ਬੋਤੁਕਂ ਸਬ੍ਬੇਸੁ ਉਤੂਸੁ ਪੁਪ੍ਫਨਕਂ ਕੁਸੁਮਂ ਪੁਪ੍ਫਂ ਸਮਂ ਏਕਤੋ ਕਤ੍ਵਾ ਧੁਨਨ੍ਤੋ ਵਿਕਿਰਨ੍ਤੋ ਮੁਨਿਨੋ ਮੁਨਿਸਦਿਸਤ੍ਤਾ ਭਵਿਸ੍ਸਨ੍ਤਮੁਨਿਭਾਵੇਨ ਚ ਬੋਧਿਸਤ੍ਤਸ੍ਸ, ਮੁਨਿਨੋਯੇਵ ਵਾ ਸਮ੍ਮਾਸਮ੍ਬੋਧਿਸਮਧਿਗਮਸਮਯੇ ਮਹਾਨੁਭਾਵਸ੍ਸ ਪਿਸੁਨੋ ਸੂਚਕੋ ਵਾਯਿ ਪਵਾਯਤੀਤਿ. ਏਤ੍ਥ ਯਦ੍ਯਪੇਕਦਾ ਸਬ੍ਬੋਤੁਕਾਸਮ੍ਭਵੋ ਨਾਨਾਉਤੂਸੁ ਨਾਨਾਕੁਸੁਮਸ੍ਸ ਸਮ੍ਭਵਾ, ਤਥਾਪਿ ਭਗਵਤੋ ਮਹਾਨੁਭਾਵਪਿਸੁਨਮੀਦਿਸਮੇਕਪਦਿਕਂ ਸਮ੍ਭਵਤੀਤਿ ਕਾਲਵਿਰੋਧੋ ਇਮਿਨਾ ਪਰਿਹਟੋ.

੭੬. ‘‘ਮਹਾਨੁਭਾਵੇ’’ਚ੍ਚਾਦਿ. ਅਯਂ ਮਨ੍ਦਮਾਰੁਤੋ ਅਚਣ੍ਡਸਮੀਰਣੋ ਸਬ੍ਬੋਤੁਕਂ ਵਸਨ੍ਤਾਦੀਸੁ ਸਬ੍ਬਉਤੂਸੁ ਵਿਕਸਨ੍ਤਂ ਕੁਸੁਮਂ ਪੁਪ੍ਫਜਾਤਂ ਸਮਂ ਏਕਤੋ ਕਤ੍ਵਾ ਧੁਨਨ੍ਤੋ ਕਮ੍ਪੇਨ੍ਤੋ ਮੁਨਿਨੋ ਏਕਨ੍ਤਭਾਵਿਤ੍ਤਾ ਮੁਨਿਸਙ੍ਖਾਤਸ੍ਸ ਬੋਧਿਸਤ੍ਤਸ੍ਸ, ਸਮ੍ਮਾਸਮ੍ਬੋਧਿਸਮਧਿਗਮਸਮਯੇ ਭੂਤਤ੍ਤਾ ਮੁਨਿਨੋ ਸਬ੍ਬਞ੍ਞੁਨੋ ਵਾ ਮਹਾਨੁਭਾਵਪਿਸੁਨੋ ਮਹਨ੍ਤਂ ਪੁਞ੍ਞਪ੍ਪਭਾਵਂ ਪਕਾਸੇਨ੍ਤੋ ਵਾਯਿ ਸਮ੍ਪਵਾਯੀਤਿ. ਏਤ੍ਥ ਨਾਨਾਕਾਲੇ ਸਮ੍ਭਵਨ੍ਤਾਨਮ੍ਪਿ ਕੁਸੁਮਾਨਂ ਏਕਕਾਲੇ ਸਮ੍ਭਵਸ੍ਸ ਕਾਲਵਿਰੋਧਤ੍ਤੇਪਿ ਭਗਵਤੋ ਪੁਞ੍ਞਾਨੁਭਾਵੋ ਤਾਦਿਸਮਚ੍ਛਰਿਯਮੇਕਕ੍ਖਣੇ ਜਨੇਤੁਂ ਸਮਤ੍ਥੋਤਿ ਕਾਲਵਿਰੋਧਂ ‘‘ਮਹਾਨੁਭਾਵਪਿਸੁਨੋ’’ਤਿ ਇਮਿਨਾ ਨਿਰਾਕਰੋਤਿ. ਮਹਾਨੁਭਾਵਸ੍ਸ, ਮਹਾਨੁਭਾਵਂ ਵਾ ਪਿਸੁਨੋਤਿ ਵਾਕ੍ਯਂ.

ਕਲਾਵਿਰੋਧਿਨੋ ਯਥਾ –

੭੭. ਨਿਮੁਗ੍ਗਮਨਸੋ ਬੁਦ੍ਧ-ਗੁਣੇ ਪਞ੍ਚਸਿਖਸ੍ਸਪਿ;

ਤਨ੍ਤਿਸ੍ਸਰਵਿਰੋਧੋ ਸੋ, ਨ ਸਮ੍ਪੀਣੇਤਿ ਕਂ ਜਨਂ.

੭੭. ‘‘ਨਿਮੁਗ੍ਗਿ’’ਚ੍ਚਾਦਿ. ਬੁਦ੍ਧਸ੍ਸ ਗੁਣੇ ਸੀਲਾਦਿਕੇ ਅਪਰਿਮਾਣੇ ਨਿਮੁਗ੍ਗਂ ਓਗਾਲ਼੍ਹਂ ਮਨਂ ਚਿਤ੍ਤਂ ਯਸ੍ਸ ਤਸ੍ਸ ਪਞ੍ਚਸਿਖਸ੍ਸ ਗਨ੍ਧਬ੍ਬਦੇਵਪੁਤ੍ਤਸ੍ਸਪਿ ਵੀਣਾਯ ਤਨ੍ਤਿਯਾ ਸਰੋ ਕਿਰਿਯਾਕਾਲਮਾਨਲਕ੍ਖਣਵਿਲਮ੍ਬਿਤਦੁਤਮਜ੍ਝਭੇਦਭਿਨ੍ਨੋ ਛਜ੍ਜਾਦਿਕੋ ਤਸ੍ਸ ਵਿਰੋਧੋ ਕਲਾਸਤ੍ਥਪਰਿਨਿਦ੍ਦਿਟ੍ਠਕਮਵੇਸਮਂ ਕਂ ਜਨਂ ਨ ਸਮ੍ਪੀਣੇਤਿ, ਪੀਣੇਤਿਯੇਵ. ਸਮ੍ਮਾਸਮ੍ਬੁਦ੍ਧਸ੍ਸ ਲੋਕਿਯਗੁਣਾਨੁਬਨ੍ਧਬੁਦ੍ਧੀਨਂ ਵਿਕ੍ਖੇਪਪ੍ਪਵਤ੍ਤਿਪਿ ਤਥਾਵਿਧਂ ਪੀਣੇਤੀਤਿ. ‘‘ਬੁਦ੍ਧਗੁਣੇ ਨਿਮੁਗ੍ਗਮਨਸੋ’’ਤਿ ਇਮਿਨਾ ਕਲਾਵਿਰੋਧੋ ਪਰਿਹਟੋ.

੭੭. ‘‘ਨਿਮੁਗ੍ਗਿ’’ਚ੍ਚਾਦਿ. ਬੁਦ੍ਧਗੁਣੇ ਸਬ੍ਬਞ੍ਞੁਨੋ ਵਿਮ੍ਹਯਜਨਕਸੀਲਾਦਿਗੁਣਸਮ੍ਭਾਰੇ ਨਿਮੁਗ੍ਗਮਨਸੋ ਓਤਿਣ੍ਣਚਿਤ੍ਤਸ੍ਸ ਪਞ੍ਚਸਿਖਸ੍ਸਪਿ ਗਨ੍ਧਬ੍ਬਦੇਵਪੁਤ੍ਤਸ੍ਸਾਪਿ ਸੋ ਤਨ੍ਤਿਸ੍ਸਰਵਿਰੋਧੋ ਵੀਣਾਯ ਤਨ੍ਤਿਯਾ ਘਟ੍ਟਨਕਿਰਿਯਾ, ਅਦ੍ਧਮਤ੍ਤਿਕਾਦਿਕਾਲੋ, ਹਤ੍ਥਾਦੀਨਂ ਸਨ੍ਨਿਵੇਸਲਕ੍ਖਣੋ ਮਾਨੋਤਿ ਇਮੇਹਿ ਤੀਹਿ ਲਕ੍ਖਣੇਹਿ ਯੁਤ੍ਤਸ੍ਸ ਮਨ੍ਦਸੀਘਮਜ੍ਝਿਮਪ੍ਪਮਾਣੇਹਿ ਭਿਨ੍ਨਸ੍ਸ ਛਜ੍ਜਾਦਿਸਤ੍ਤਸਰਸ੍ਸ ਕਲਾਸਤ੍ਥਾਗਤਕ੍ਕਮਸ੍ਸ ਵਿਨਾਸਸਙ੍ਖਾਤੋ ਵਿਰੋਧੋ ਕਂ ਜਨਂ ਨ ਸਮ੍ਪੀਣੇਤਿ, ਸਮ੍ਪੀਣੇਤਿ ਏਵ. ਏਤ੍ਥ ਅਕਨ੍ਤਿਯਾ ਕਾਰਣਭੂਤੋ ਕਲਾਸਤ੍ਥਾਗਤਕ੍ਕਮਭਙ੍ਗੋ ਲੋਕੁਤ੍ਤਰਬੁਦ੍ਧਗੁਣਾਨੁਗਤਬੁਦ੍ਧਿਯਾ ਜਾਤੋਤਿ ਸੋ ਭਙ੍ਗੋ ‘‘ਨਿਮੁਗ੍ਗਮਨਸੋ ਬੁਦ੍ਧਗੁਣੇ’’ਤਿ ਵੁਤ੍ਤਤ੍ਤਾ ਪੀਤਿਯਾ ਕਾਰਣਮੇਵੇਤਿ ਨ ਵਿਰੋਧੋ. ਨਿਮੁਗ੍ਗੋ ਮਨੋ ਅਸ੍ਸਾਤਿ ਚ, ਤਨ੍ਤਿਯਾ ਸਰੋਤਿ ਚ, ਤੇਸਂ ਵਿਰੋਧੋਤਿ ਚ ਵਾਕ੍ਯਂ.

ਲੋਕਵਿਰੋਧਿਨੋ ਯਥਾ –

੭੮. ਗਣਯੇ ਚਕ੍ਕਵਾਲ਼ਂ ਸੋ, ਚਨ੍ਦਨਾਯਪਿ ਸੀਤਲਂ;

ਸਮ੍ਬੋਧਿਸਤ੍ਤਹਦਯੋ, ਪਦਿਤ੍ਤਙ੍ਗਾਰਪੂਰਿਤਂ.

੭੮. ‘‘ਗਣਯੇ’’ਚ੍ਚਾਦਿ. ਚਨ੍ਦਨਾਯ ਅਪਿ ਸੀਤਲਂ ਗਣਯੇ ਚਿਨ੍ਤੇਸਿ. ਕਿਨ੍ਤਂ? ਪਦਿਤ੍ਤਙ੍ਗਾਰਪੂਰਿਤਂ ਚਕ੍ਕਵਾਲ਼ਂ. ਕੋ ਸੋ? ਸਮ੍ਬੋਧਿਯਂ ਸਬ੍ਬਞ੍ਞੁਤਞ੍ਞਾਣੇ ਸਤ੍ਤਂ ਪਰਿਬਦ੍ਧਂ ਹਦਯਂ ਚਿਤ੍ਤਂ ਯਸ੍ਸ ਸੋ. ਸਬ੍ਬਞ੍ਞੁਤਞ੍ਞਾਣਾਨੁਬਨ੍ਧਬੁਦ੍ਧਿਨੋ ਹਿ ਤਾਦਿਸੋ ਮਨੋਬਨ੍ਧੋਤਿ ਨ ਲੋਕਵਿਰੋਧੋ.

੭੮. ‘‘ਗਣਯੇ’’ਚ੍ਚਾਦਿ. ਸਮ੍ਬੋਧਿਸਤ੍ਤਹਦਯੋ ਸਬ੍ਬਞ੍ਞੁਤਞ੍ਞਾਣੇ ਆਸਤ੍ਤਚਿਤ੍ਤੋ ਸੋ ਬੋਧਿਸਤ੍ਤੋ ਪਦਿਤ੍ਤਙ੍ਗਾਰਪੂਰਿਤਂ ਆਦਿਤ੍ਤਙ੍ਗਾਰੇਹਿ ਪਰਿਪੁਣ੍ਣਂ ਚਕ੍ਕਵਾਲ਼ਂ ਚਕ੍ਕਵਾਲ਼ਗਬ੍ਭਂ ਚਨ੍ਦਨਾਯਪਿ ਚਨ੍ਦਨਤੋ ਅਪਿ ਸੀਤਲਂ ਅਤਿਸੀਤਲਂ ਕਤ੍ਵਾ ਗਣਯੇ ਚਿਨ੍ਤੇਯ੍ਯਾਤਿ. ਇਟ੍ਠਤ੍ਥਲੁਦ੍ਧਸ੍ਸ ਚਿਤ੍ਤਪ੍ਪਵਤ੍ਤਿਯਾ ਈਦਿਸਤ੍ਤਾ ਅਗ੍ਗਿਨੋ ਚਨ੍ਦਨਤੋਪਿ ਅਧਿਕਸੀਤਤ੍ਤਕਪ੍ਪਨਾ ‘‘ਚਨ੍ਦਨਂ ਸੀਤਲਂ, ਅਗ੍ਗਿ ਉਣ੍ਹੋ’’ਤਿ ਪਵਤ੍ਤਲੋਕਸੀਮਾਯ ਵਿਰੁਦ੍ਧਾ ਨ ਹੋਤਿ. ਸਮ੍ਬੋਧਿਯਂ ਸਤ੍ਤਹਦਯਂ ਯਸ੍ਸੇਤਿ ਚ, ਪਦਿਤ੍ਤਾਨਿ ਅਙ੍ਗਾਰਾਨੀਤਿ ਚ, ਤੇਹਿ ਪੂਰਿਤਨ੍ਤਿ ਚ ਵਿਗ੍ਗਹੋ.

ਞਾਯਵਿਰੋਧਿਨੋ ਯਥਾ –

੭੯. ਪਰਿਚ੍ਚਤ੍ਤਭਵੋਪਿ ਤ੍ਵ-ਮੁਪਨੀਤਭਵੋ ਅਸਿ;

ਅਚਿਨ੍ਤ੍ਯਗੁਣਸਾਰਾਯ, ਨਮੋ ਤੇ ਮੁਨਿਪੁਙ੍ਗਵ.

੭੯. ‘‘ਪਰਿਚ੍ਚਤ੍ਤੇ’’ਚ੍ਚਾਦਿ. ਮੁਨਿਪੁਙ੍ਗਵ ਮੁਨੀਨਂ ਉਤ੍ਤਮ ਪਰਿਚ੍ਚਤ੍ਤੋ ਵਿਸਟ੍ਠੋ ਭਵੋ ਸੁਗਤਿਦੁਗ੍ਗਤਿਸਙ੍ਖਾਤੋ ਯੇਨਾਤਿ ਪਰਿਚ੍ਚਤ੍ਤਭਵੋਪਿ ਤ੍ਵਂ ਉਪਨੀਤੋ ਆਨੀਤੋ ਪਵਤ੍ਤਿਤੋ ਭਵੋ ਵੁਡ੍ਢਿ ਯੇਨਾਤਿ ਉਪਨੀਤਭਵੋ ਅਸਿ. ਤਸ੍ਮਾ ਕਾਰਣਾ ਅਚਿਨ੍ਤ੍ਯਗੁਣਸਾਰਾਯ ਤੇ ਨਮੋ ਅਤ੍ਥੂਤਿ ਸੇਸੋ. ਈਦਿਸਂ ਨ ਞਾਯਵਿਰੁਦ੍ਧਮੇਵਂਵਿਧਤ੍ਤਾ ਮੁਨਿਪੁਙ੍ਗਵਸ੍ਸ.

੭੯. ‘‘ਪਰਿਚ੍ਚਤ੍ਤੇ’’ਚ੍ਚਾਦਿ. ਮੁਨਿਪੁਙ੍ਗਵ ਮੁਨਿਸੇਟ੍ਠ ਤ੍ਵਂ ਪਰਿਚ੍ਚਤ੍ਤਭਵੋਪਿ ਅਪਨੀਤਸੁਗਤਿਦੁਗ੍ਗਤਿਭਵੋਪਿ ਉਪਨੀਤਭਵੋ ਲੋਕਸ੍ਸਾਨੀਤਅਭਿਵੁਦ੍ਧਿਕੋ ਅਸਿ ਭਵਸਿ, ਅਚਿਨ੍ਤ੍ਯਗੁਣਸਾਰਾਯ ਤਤੋ ਏਵ ਚਿਨ੍ਤਾਵਿਸਯਾਤਿਕ੍ਕਨ੍ਤਸਾਰਗੁਣਸ੍ਸ ਤੇ ਤੁਯ੍ਹਂ ਨਮੋ ਅਤ੍ਥੂਤਿ ਸਬ੍ਬਾਕਾਰਤੋ ਭਵਸ੍ਸ ਪਰਿਚ੍ਚਤ੍ਤਤ੍ਤਾ ਅਤ੍ਤਨਿ ਅਵਿਜ੍ਜਮਾਨਂ ਸੁਗਤਿਭਵਂ ਲੋਕਸ੍ਸ ਦੇਤੀਤਿ ਏਤਂ ਞਾਯਾਗਤਂ ਨ ਹੋਤੀਤਿ ਪਟਿਭਾਤਿ, ਤਥਾਪਿ ਚ ਸਬ੍ਬਞ੍ਞੂਨਂ ਪਵਤ੍ਤਿ ਈਦਿਸਾਯੇਵਾਤਿ ਞਾਯਵਿਰੋਧੋ ਨਿਰਾਕਤੋ. ਅਚਿਨ੍ਤ੍ਯਾ ਗੁਣਸਾਰਾ ਯਸ੍ਮਿਨ੍ਤਿ ਵਿਗ੍ਗਹੋ.

ਆਗਮਵਿਰੋਧਿਨੋ ਯਥਾ –

੮੦. ਨੇਵਾਲਪਤਿ ਕੇਨਾਪਿ, ਵਚੀਵਿਞ੍ਞਤ੍ਤਿਤੋ ਯਤਿ;

ਸਮ੍ਪਜਾਨਮੁਸਾਵਾਦਾ, ਫੁਸੇਯ੍ਯਾਪਤ੍ਤਿਦੁਕ੍ਕਟਂ.

੮੦. ‘‘ਨੇਵੇ’’ਤਿਆਦਿ. ਯਤੀਤਿ ਭਿਕ੍ਖੁ ਕੇਨਾਪਿ ਸਹ ਨੇਵਾਲਪਤਿ ਨ ਵਦਤ੍ਯੇਵ, ਤਥਾਪਿ ਵਚੀਵਿਞ੍ਞਤ੍ਤਿਤੋ ਚੋਪਨਵਾਚਾਸਙ੍ਖਾਤੇਨ ਵਚੀਵਿਞ੍ਞਤ੍ਤਿਹੇਤੁਨਾ ਪਵਤ੍ਤਿਤੋ ਸਮ੍ਪਜਾਨਨ੍ਤਸ੍ਸ ਮੁਸਾਵਾਦਤੋ ਕਾਰਣਾ ਆਪਤ੍ਤਿਦੁਕ੍ਕਟਂ ‘‘ਸਮ੍ਪਜਾਨਮੁਸਾਵਾਦਸ੍ਸ ਹੋਤੀ’’ਤਿ ਵੁਤ੍ਤਦੁਕ੍ਕਟਾਪਤ੍ਤਿ ਫੁਸੇਯ੍ਯ ਆਪਜ੍ਜਤੀਤਿ. ਏਤ੍ਥ ਅਨਾਲਪਤੋ ਵਚੀਵਿਞ੍ਞਤ੍ਤਿਯਾ ਕਥਂ ਮੁਸਾਵਾਦੋਤਿ ਅਭਿਧਮ੍ਮਾਪਨ੍ਨਵਿਰੋਧੋ ਨਤ੍ਥਿ, ਅਪਰਵਚਨਤ੍ਥੇ ਤ੍ਵੀਦਿਸੋ ਵਿਰੁਜ੍ਝਤੀਤਿ.

੮੦. ‘‘ਨੇਵਿ’’ਚ੍ਚਾਦਿ. ਯਤਿ ਸਮਣੋ ਕੇਨਾਪਿ ਕੇਨਚਿ ਸਦ੍ਧਿਂ ਨੇਵਾਲਪਤਿ ਨੋ ਭਾਸਤਿ, ਤਥਾਪਿ ਵਚੀਵਿਞ੍ਞਤ੍ਤਿਤੋ ਚੋਪਨਵਾਚਾਸਙ੍ਖਾਤਵਿਞ੍ਞਤ੍ਤਿਕਾਰਣਾ ਪਵਤ੍ਤਨਤੋ ਸਮ੍ਪਜਾਨਮੁਸਾਵਾਦਾ ਸਮ੍ਪਜਾਨਨ੍ਤਸ੍ਸ ਮੁਸਾਭਣਨਤੋ ਆਪਤ੍ਤਿਦੁਕ੍ਕਟਂ ਦੁਕ੍ਕਟਾਪਤ੍ਤਿਂ ਫੁਸੇਯ੍ਯ ਆਪਜ੍ਜੇਯ੍ਯਾਤਿ. ਏਤ੍ਥ ਅਨਾਲਪਨ੍ਤਸ੍ਸ ਵਚੀਵਿਞ੍ਞਤ੍ਤਿਤੋ ਮੁਸਾਵਾਦੋ ਕਥਂ ਸਮ੍ਭਵਤੀਤਿ ਅਭਿਧਮ੍ਮਾਪਨ੍ਨਵਿਰੋਧੋ, ‘‘ਸਨ੍ਤਿਂ ਆਪਤ੍ਤਿਂ ਨਾਵਿਕਰੇਯ੍ਯ, ਸਮ੍ਪਜਾਨਮੁਸਾਵਾਦ’ਸ੍ਸ ਹੋਤੀ’’ਤਿ ਨਿਦਾਨੁਦ੍ਦੇਸੇ ਨਿਦ੍ਦਿਟ੍ਠਵਚੀਦ੍ਵਾਰੇ ਅਕਿਰਿਯਸਮੁਟ੍ਠਾਨਾ ਦੁਕ੍ਕਟਾਪਤ੍ਤਿ ਹੋਤੀਤਿ ਆਗਮਵਿਰੋਧੋ ਨਿਰਾਕਤੋ. ਮੁਸਾਭਣਨਂ ਵਿਨਾ ਆਪਤ੍ਤਿ ਕਥਂ ਭਵਤੀਤਿ? ਯਥਾ ਕਾਲੇ ਅਵਸ੍ਸਮਾਨਮੇਘਤੋ ਸਞ੍ਜਾਤਦੁਬ੍ਭਿਕ੍ਖਂ ‘‘ਮੇਘਕਤਂ ਦੁਬ੍ਭਿਕ੍ਖ’’ਨ੍ਤਿ ਵਤ੍ਤਬ੍ਬਂ ਹੋਤਿ, ਏਵਂ ਕਥੇਤਬ੍ਬਕਾਲੇ ਅਕਥਨਤੋ ਸਞ੍ਜਾਤਾ ਵਚੀਦ੍ਵਾਰੇ ਅਕਿਰਿਯਸਮੁਟ੍ਠਾਨਾ ਦੁਕ੍ਕਟਾਪਤ੍ਤਿਪਿ ਤਤੋ ਸਞ੍ਜਾਤਾਤਿ ਵਤ੍ਤਬ੍ਬਾ ਹੋਤਿ. ਸਮ੍ਪਜਾਨਨ੍ਤਸ੍ਸ ਮੁਸਾਵਾਦੋਤਿ ਚ, ਆਪਤ੍ਤਿਯੇਵ ਦੁਕ੍ਕਟਨ੍ਤਿ ਚ ਵਾਕ੍ਯਂ.

ਨੇਯ੍ਯਸ੍ਸ ਯਥਾ –

੮੧. ਮਰੀਚਿਚਨ੍ਦਨਾਲੇਪ-ਲਾਭਾ ਸੀਤਮਰੀਚਿਨੋ [ਸਿਤਮਰੀਚਿਨੋ (ਸੀ.)];

ਇਮਾ ਸਬ੍ਬਾਪਿ ਧਵਲਾ, ਦਿਸਾ ਰੋਚਨ੍ਤਿ ਨਿਬ੍ਭਰਂ.

੮੧. ‘‘ਮਰੀਚੀ’’ਤ੍ਯਾਦਿ. ਸੀਤਮਰੀਚਿਨੋ ਚਨ੍ਦਸ੍ਸ ਮਰੀਚਿਯੋ ਦੀਧਿਤਿਯੋ ਏਵ ਚਨ੍ਦਨਂ, ਤਸ੍ਸ ਆਲੇਪੋ ਉਪਦੇਹੋ, ਤਸ੍ਸ ਲਾਭੇਨ ਇਮਾ ਸਬ੍ਬਾਪਿ ਦਿਸਾ ਨਿਬ੍ਭਰਮਤਿਸਯਂ ਧਵਲਾ ਸੇਤਾ ਰੋਚਨ੍ਤੀਤਿ ਨਤ੍ਥੇਤ੍ਥ ਨੇਯ੍ਯਤਾ ਮਰੀਚਿਯਾ ਸਦ੍ਦੋਪਾਤ੍ਤਤ੍ਥਾਯ ਤੁ.

੮੧. ‘‘ਮਰੀਚਿ’’ਚ੍ਚਾਦਿ. ਸੀਤਮਰੀਚਿਨੋ ਚਨ੍ਦਸ੍ਸ ਮਰੀਚਿਚਨ੍ਦਨਾਲੇਪਲਾਭਾ ਮਰੀਚਿਸਙ੍ਖਾਤਚਨ੍ਦਨਾਲੇਪਸ੍ਸ ਪਟਿਲਾਭਤੋ ਇਮਾ ਸਬ੍ਬਾਪਿ ਦਿਸਾ ਨਿਬ੍ਭਰਮਤਿਸਯਂ ਧਵਲਾ ਸੇਤਾ ਰੋਚਨ੍ਤਿ ਦਿਬ੍ਬਨ੍ਤੀਤਿ. ਦਿਸਾਨਂ ਧਵਲਕਾਰਣਸ੍ਸ ‘‘ਮਰੀਚਿਚਨ੍ਦਨਾਲੇਪਲਾਭਾ ਸੀਤਮਰੀਚਿਨੋ’’ਤਿ ਵੁਤ੍ਤਤ੍ਤਾ ਨੇਯ੍ਯਦੋਸੋ ਨ ਪਤਿਟ੍ਠਾਤਿ, ਚਨ੍ਦਨਮਿਵ ਚਨ੍ਦਨਂ, ਮਰੀਚਿਯੋਯੇਵ ਚਨ੍ਦਨਮਿਤਿ ਚ, ਤਸ੍ਸ ਆਲੇਪੋਤਿ ਚ, ਤਸ੍ਸ ਲਾਭੋਤਿ ਚ ਵਿਗ੍ਗਹੋ.

ਯਥਾ ਵਾ –

੮੧. ਮਨੋਨੁਰਞ੍ਜਨੋ ਮਾਰ-ਙ੍ਗਨਾਸਿਙ੍ਗਾਰਵਿਬ੍ਭਮੋ;

ਜਿਨੇਨਾ’ਸਮਨੁਞ੍ਞਾਤੋ, ਮਾਰਸ੍ਸ ਹਦਯਾਨਲੋ.

੮੨. ‘‘ਮਨੋ’’ਚ੍ਚਾਦਿ. ਮਨਂ ਪਸ੍ਸਨ੍ਤਾਨਮਨੁਸ੍ਸਰਨ੍ਤਾਨਞ੍ਚ ਚਿਤ੍ਤਂ ਅਨੁਰਞ੍ਜੇਤੀਤਿ ਮਨੋਨੁਰਞ੍ਜਨੋ, ਮਾਰਙ੍ਗਨਾਨਂ ਸਿਙ੍ਗਾਰਕਤੋ ਵਿਬ੍ਭਮੋ ਵਿਲਾਸੋ ਜਿਨੇਨ ਅਸਮਨੁਞ੍ਞਾਤੋ ਅਬ੍ਭੁਪਗਤੋ ਮਾਰਸ੍ਸ ਵਸਵਤ੍ਤਿਨੋ ਹਦਯਾਨਲੋ ਹਦਯਗ੍ਗਿ ਜਾਤੋ. ਸੋਕੋ ਚੇਤ੍ਥ ਅਨਲਤ੍ਥੇ ਨਿਰੁਪ੍ਪਿਤੋ ਤਸ੍ਸ ਤਾਦਿਸਤ੍ਥਾਨਤਿਵਤ੍ਤਨਤੋ, ਕਾਰਣਨ੍ਤੁਪਚਾਰੇਨਾਤਿ. ਏਤ੍ਥ ਯਜ੍ਜਪਿ ਮਾਰਙ੍ਗਨਾਪਰਾਜਯੋ ਨ ਸਦ੍ਦੋਪਾਤ੍ਤਤ੍ਥੋ, ਤਥਾਪਿ ‘‘ਸਿਙ੍ਗਾਰਵਿਬ੍ਭਮੋ ਮਾਰਸ੍ਸ ਹਦਯਗ੍ਗੀ’’ਤਿ ਵੁਤ੍ਤੇ ਸਾਮਤ੍ਥਿਯਾ ਮਾਰਙ੍ਗਨਾਪਰਾਜਯੋ ਗਮ੍ਯਤੇ, ਤਥਾਵਿਧਸ੍ਸ ਮਾਰਸੋਕਸ੍ਸ ਮਾਰਙ੍ਗਨਾਪਰਾਜਯਾਬ੍ਯਭਿਚਾਰਤੋ. ਨੇਵੇਦਿਸਸ੍ਸ ਨੇਯ੍ਯਤਾ, ਵਙ੍ਕਵੁਤ੍ਤੀਦਿਸੀ ਗੁਣੋਯੇਵ ਬਨ੍ਧਸ੍ਸ.

੮੨. ਵਤ੍ਤਬ੍ਬਸ੍ਸ ਞਾਯੋਪਾਤ੍ਤਤ੍ਤਾ ਨੇਯ੍ਯਦੋਸਪਰਿਹਾਰਤ੍ਥਮੁਦਾਹਰਤਿ ‘‘ਮਨੋ’’ਚ੍ਚਾਦਿ. ਮਨੋਨੁਰਞ੍ਜਨੋ ਦਸ੍ਸਨਸਵਨਾਨੁਸ੍ਸਰਣਂ ਕਰੋਨ੍ਤਾਨਂ ਜਨਾਨਂ ਚਿਤ੍ਤਮਤ੍ਤਨਿ ਅਨੁਰਞ੍ਜਨ੍ਤੋ ਮਾਰਙ੍ਗਨਾਸਿਙ੍ਗਾਰਵਿਬ੍ਭਮੋ ਮਾਰਵਧੂਨਂ ਰਤਿਕੀਲ਼ਾਹੇਤੁਭੂਤਕਾਮਪਤ੍ਥਨਾਸਙ੍ਖਾਤਸਿਙ੍ਗਾਰੇਨ ਕਤਲੀਲਾ ਜਿਨੇਨ ਜਿਤਪਞ੍ਚਮਾਰੇਨ ਸਤ੍ਥੁਨਾ ਅਸਮਨੁਞ੍ਞਾਤੋ ਅਨਬ੍ਭੁਪਗਤੋ ਅਸਮ੍ਪਟਿਚ੍ਛਿਤੋ ਮਾਰਸ੍ਸ ਵਸਵਤ੍ਤਿਨੋ ਹਦਯਾਨਲੋ ਹਦਯਗ੍ਗਿ ਅਹੋਸੀਤਿ. ਅਨਲਤ੍ਤੇਨ ਕਪ੍ਪਿਤਕਾਰਿਯਭੂਤੋ ਸੋਕੋ ਮਾਰਙ੍ਗਨਾਸਿਙ੍ਗਾਰਵਿਬ੍ਭਮਸਙ੍ਖਾਤਕਾਰਣੇਨ ਸਦ੍ਧਿਂ ਅਭੇਦਕਪ੍ਪਨਾਯ [ਅਨਲਤ੍ਤਕਪ੍ਪਨਾਯ (ਕ.)] ‘‘ਗੁਲ਼ੋ ਸੇਮ੍ਹਂ, ਤਿਪੁਸਂ ਜਰੋ’’ਤਿਆਦੀਸੁ ਵਿਯ ਤੁਲ੍ਯਾਧਿਕਰਣਭਾਵੇਨ ਵੁਤ੍ਤੋ ਹੋਤਿ. ਏਤ੍ਥ ਕਿਞ੍ਚਾਪਿ ਮਾਰਙ੍ਗਨਾਨਂ ਪਰਾਜਯਵਾਚਕੋ ਸਦ੍ਦੋ ਨਤ੍ਥਿ, ਤਥਾਪਿ ‘‘ਸਿਙ੍ਗਾਰਵਿਬ੍ਭਮੋ ਮਾਰਸ੍ਸ ਹਦਯਾਨਲੋ’’ਤਿ ਵੁਤ੍ਤੇ ਮਾਰਙ੍ਗਨਾਪਰਾਜਯਂ ਵਿਨਾ ਤਾਦਿਸਸੋਕੁਪ੍ਪਤ੍ਤਿਕਾਰਣਸ੍ਸ ਅਨਧਿਗਤਤ੍ਤਾ ਅਞ੍ਞਥਾਨੁਪਪਤ੍ਤਿਲਕ੍ਖਣਸਾਮਤ੍ਥਿਯੇਨ ਤਾਸਂ ਪਰਾਜਯੋ ਪਕਾਸਿਤੋ ਹੋਤੀਤਿ ਈਦਿਸਵਙ੍ਕਵੁਤ੍ਤਿਯਾ ਬਨ੍ਧਗੁਣਤ੍ਤਾ ਨੇਯ੍ਯਦੋਸੋ ਨਿਰਾਕਤੋ ਹੋਤੀਤਿ. ਮਨੋ ਅਨੁਰਞ੍ਜੇਤੀਤਿ ਚ, ਮਾਰਙ੍ਗਨਾਨਂ ਸਿਙ੍ਗਾਰੋਤਿ ਚ, ਤੇਨ ਕਤੋ ਵਿਬ੍ਭਮੋਤਿ ਚ ਵਾਕ੍ਯਂ.

ਵਿਸੇਸਨਾਪੇਕ੍ਖਸ੍ਸ ਯਥਾ –

੮੩. ਅਪਯਾਤਾਪਰਾਧਮ੍ਪਿ, ਅਯਂ ਵੇਰੀ ਜਨਂ ਜਨੋ;

ਕੋਧਪਾਟਲਭੂਤੇਨ, ਭਿਯ੍ਯੋ ਪਸ੍ਸਤਿ ਚਕ੍ਖੁਨਾ.

੮੩. ‘‘ਅਪਯਾਤੇ’’ਚ੍ਚਾਦਿ. ਅਯਂ ਵੇਰੀ ਜਨੋ ਅਪਯਾਤਾਪਰਾਧਮ੍ਪਿ ਜਨਨ੍ਤਿ ਸਮ੍ਬਨ੍ਧੋ. ਅਪਯਾਤੋ ਅਪਗਤੋ ਅਪਰਾਧੋ ਯਸ੍ਸ ਤਂ, ਕੋਧੇਨ ਪਾਟਲਭੂਤੇਨ ਸੇਤਰਤ੍ਤੇਨ. ਇਮਿਨਾ ਵਿਸੇਸਨਾਪੇਕ੍ਖਦੋਸੋ ਪਰਿਹਟੋ.

੮੩. ‘‘ਅਪਯਾਤਿ’’ਚ੍ਚਾਦਿ. ਅਯਂ ਵੇਰੀ ਜਨੋ ਅਪਯਾਤਾਪਰਾਧਮ੍ਪਿ ਅਪਗਤਾਪਰਾਧਮ੍ਪਿ ਜਨਂ ਕੋਧਪਾਟਲਭੂਤੇਨ ਕੋਧੇਨ ਭੂਤਸੇਤਲੋਹਿਤਵਣ੍ਣਯੁਤ੍ਤੇਨ ਚਕ੍ਖੁਨਾ ਭਿਯ੍ਯੋ ਯੇਭੁਯ੍ਯੇਨ ਪਸ੍ਸਤੀਤਿ. ‘‘ਪਸ੍ਸਤੀ’’ਤਿ ਵਚਨਸ੍ਸ ਵਿਜ੍ਜਮਾਨਤ੍ਤੇਪਿ ‘‘ਚਕ੍ਖੁਨਾ’’ਤਿ ਵਿਸੇਸ੍ਯਵਚਨਂ ‘‘ਕੋਧਪਾਟਲਭੂਤੇਨਾ’’ਤਿ ਵਿਸੇਸਨਸ੍ਸ ਲਬ੍ਭਮਾਨਤ੍ਤਾ ਸਾਤ੍ਥਕਂ ਹੋਤੀਤਿ ਵਿਸੇਸਨਾਪੇਕ੍ਖਦੋਸੋ ਨਿਰਾਕਤੋਤਿ. ਅਪਯਾਤੋ ਅਪਗਤੋ ਅਪਰਾਧੋ ਅਸ੍ਮਾਤਿ ਚ, ਕੋਧੇਨ ਪਾਟਲਭੂਤਨ੍ਤਿ ਚ ਵਿਗ੍ਗਹੋ.

ਹੀਨਤ੍ਥਸ੍ਸ ਯਥਾ –

੮੪. ਅਪ੍ਪਕਾਨਮ੍ਪਿ ਪਾਪਾਨਂ,

ਪਭਾਵਂ ਨਾਸਯੇ ਬੁਧੋ;

ਅਪਿ ਨਿਪ੍ਪਭਤਾਨੀਤ-

ਖਜ੍ਜੋਤੋ ਹੋਤਿ ਭਾਣੁਮਾ.

੮੪. ‘‘ਅਪ੍ਪਕਾਨ’’ਮਿਚ੍ਚਾਦਿ. ਬੁਧੋ ਪਣ੍ਡਿਤਪੋਸੋ ਅਪ੍ਪਕਾਨਂ ਪਾਪਾਨਮ੍ਪਿ ਕਿਮੁਤਮਧਿਕਾਨਂ ਪਭਾਵਂ ਆਨੁਭਾਵਂ ਨਾਸਯੇ ਅਪ੍ਪਵਤ੍ਤਿਂ ਪਾਪੇਯ੍ਯ. ਤਂ ਅਤ੍ਥਨ੍ਤਰਨ੍ਯਾਸੇਨ ਸਾਧੇਤਿ. ਭਾਣੁਮਾ ਸੂਰਿਯੋ ਨਿਪ੍ਪਭਤਂ ਆਨੀਤੋ ਖਜ੍ਜੋਤੋ ਯੇਨ ਤਥਾਵਿਧੋ ਅਪਿ ਹੋਤਿ. ‘‘ਮਨ੍ਦਪ੍ਪਭੋ ਅਯ’’ਨ੍ਤਿ ਜੋਤਿਰਿਙ੍ਗਣਮ੍ਪਿ ਨੋਪੇਕ੍ਖਤਿ ਚਕ੍ਕਵਾਲ਼ਕੁਹਰਾਨੁਚਰਿਤਮਹਾਨੁਭਾਵੋਪੀਤਿ. ਏਤ੍ਥ ਅਪੀਤ੍ਯਾਦਿਨਾ ਵਚੋਭਙ੍ਗਿਯਾ ਹੀਨਤ੍ਥਦੋਸੋ ਪਰਿਹਟੋ.

੮੪. ‘‘ਅਪ੍ਪਕਾਨਿ’’ਚ੍ਚਾਦਿ. ਬੁਧੋ ਪਞ੍ਞਵਾ ਅਪ੍ਪਕਾਨਮ੍ਪਿ ਅਤਿਮਨ੍ਦਾਨਮ੍ਪਿ ਪਾਪਾਨਂ ਅਕੁਸਲਾਨਂ ਪਭਾਵਂ ਵਿਪਾਕਦਾਨਸਾਮਤ੍ਥਿਯਸਙ੍ਖਾਤਾਨੁਭਾਵਂ ਨਾਸਯੇ ਅਹੋਸਿਕਮ੍ਮਤਾਪਾਦਨੇਨ ਨਾਸੇਯ੍ਯ, ਬਹੂਨਂ ਪਾਪਾਨਂ ਵਤ੍ਤਬ੍ਬਮੇਵ ਨਤ੍ਥਿ. ਤਮਤ੍ਥਮਤ੍ਥਨ੍ਤਰਨ੍ਯਾਸਾਲਙ੍ਕਾਰੇਨ ਸਮਤ੍ਥੇਤਿ ਅਪਿਚ੍ਚਾਦਿ. ਭਾਣੁਮਾ ਸੂਰਿਯੋ ਨਿਪ੍ਪਭਤਾਨੀਤਖਜ੍ਜੋਤੋ ਅਪਿ ਨਿਪ੍ਪਭਤਮਾਪਾਦਿਤਜੋਤਿਰਿਙ੍ਗਣੇਹਿ ਸਮਨ੍ਨਾਗਤੋਪਿ ਹੋਤੀਤਿ. ਹੀਨਪਭਾਵੋ ਹੋਤਿ ਖਜ੍ਜੋਪਨਕੇ ਪਹਾਯ ਅਤ੍ਤਨੋ ਆਲੋਕਂ ਕਰੋਨ੍ਤੋ ਨ ਹੋਤੀਤਿ ਅਧਿਪ੍ਪਾਯੋ. ਏਤ੍ਥ ਅਪਿ ਨਿਪ੍ਪਭਤਿਚ੍ਚਾਦਿਵਚਨਵਿਲਾਸਵਸੇਨ ਹੀਨਪਕ੍ਖਂ ਗਹੇਤ੍ਵਾਪਿ ਸੂਰਿਯਉਦਾਰਤ੍ਤਸ੍ਸੇਵ ਪੋਸਿਤਤ੍ਤਾ ‘‘ਨਿਪ੍ਪਭਤਾਨੀਤਖਜ੍ਜੋਤੋ’’ਤਿ ਵਿਸੇਸਨਪਦਂ ਹੀਨਤ੍ਥਦੋਸਂ ਨ ਨਿਸ੍ਸਯਤਿ. ਨਤ੍ਥਿ ਪਭਾ ਯੇਸਨ੍ਤਿ ਚ, ਤੇਸਂ ਭਾਵੋਤਿ ਚ, ਤਂ ਆਨੀਤਾ ਖਜ੍ਜੋਤਾ ਯੇਨੇਤਿ ਚ ਵਿਗ੍ਗਹੋ.

ਅਨਤ੍ਥਸ੍ਸ ਯਥਾ –

੮੫. ਨ ਪਾਦਪੂਰਣਤ੍ਥਾਯ, ਪਦਂ ਯੋਜੇਯ੍ਯ ਕਤ੍ਥਚਿ;

ਯਥਾ ਵਨ੍ਦੇ ਮੁਨਿਨ੍ਦਸ੍ਸ, ਪਾਦਪਙ੍ਕੇਰੁਹਂ ਵਰਂ.

੮੫. ‘‘ਨ ਪਾਦੇ’’ਚ੍ਚਾਦਿ. ਏਤ੍ਥ ਵਨ੍ਦੇਇਚ੍ਚਾਦੋ ਹੇਟ੍ਠਾ ਵਿਯ ਪਾਦਪੂਰਣਸ੍ਸ ਕਸ੍ਸਚਿ ਅਭਾਵੇਨ ਅਨਤ੍ਥਾਭਾਵੋ.

੮੫. ‘‘ਨ ਪਾਦਿ’’ਚ੍ਚਾਦਿ. ਪਾਦਪੂਰਣਤ੍ਥਾਯ ਗਾਥਾਪਾਦਾਨਂ ਪੂਰਣਸਙ੍ਖਾਤਪਯੋਜਨਤ੍ਥਾਯ ਪਦਂ ਨਾਮਾਦਿਕਂ ਕਤ੍ਥਚਿ ਨ ਯੋਜੇਯ੍ਯ ਵਿਞ੍ਞੂਤਿ, ਯਥਾ ਨਿਰਤ੍ਥਕਪਦਾਯੋਜਨੇ ਉਦਾਹਰਣਮੇਵਂ ‘‘ਮੁਨਿਨ੍ਦਸ੍ਸ ਵਰਂ ਪਾਦਪਙ੍ਕੇਰੁਹਂ ਵਨ੍ਦੇ’’ਤਿ. ਹੇਟ੍ਠਾ ਦੁਟ੍ਠੋਦਾਹਰਣੇ ਵਿਯ ਪਾਦਪੂਰਣਤ੍ਥਂ ਕਸ੍ਸਚਿ ਪਦਸ੍ਸ ਅਯੋਜਿਤਤ੍ਤਾ ਸਾਤ੍ਥਕਪਦੇਹਿ ਨਿਰਤ੍ਥਕਦੋਸੋ ਨਿਰਾਕਤੋਤਿ. ਮੁਦੁਨਿਮ੍ਮਲਸੋਭਾਦਿਸਾਧਾਰਣਗੁਣਯੋਗਤੋ ਪਙ੍ਕੇਰੁਹਸਦਿਸਂ ਉਪਚਾਰਤੋ ਪਙ੍ਕੇਰੁਹਂ ਨਾਮ. ਪਾਦਮੇਵ ਪਙ੍ਕੇਰੁਹਨ੍ਤਿ ਵਿਗ੍ਗਹੋ. ਵਿਸੇਸਨਵਿਸੇਸ੍ਯਪਦਦੋਸਪਰਿਹਾਰੋ.

੮੬. ਭਯਕੋਧਪਸਂਸਾਦਿ-

ਵਿਸੇਸੋ ਤਾਦਿਸੋ ਯਦਿ;

ਵਤ੍ਤੁਂ ਕਾਮੀਯਤੇ ਦੋਸੋ,

ਨ ਤਤ੍ਥੇ’ਕਤ੍ਥਤਾਕਤੋ.

੮੬. ‘‘ਭਯੇ’’ਚ੍ਚਾਦਿ. ਭਯਞ੍ਚ ਚਿਤ੍ਤੁਤ੍ਰਾਸੋ ਕੋਧੋ ਚ ਦੋਸੋ ਪਸਂਸਾ ਚ ਥੁਤਿ, ਤਾ ਆਦਿ ਯਸ੍ਸ ਤੁਰਿਤਾਦਿਨੋ ਸੋ ਤਾਦਿਸੋ ਵਿਸੇਸੋ ਯਦਿ ਵਤ੍ਤੁਂ ਕਾਮੀਯਤੇ ਇਚ੍ਛੀਯਤੇ, ਤਤ੍ਥ ਤਸ੍ਮਿਂ ਭਯਾਦਿਵਿਸੇਸੇ ਵਿਸਯੇ ਏਕਤ੍ਥਤਾਯ ਏਕਤ੍ਥਭਾਵੇਨ ਕਤੋ ਦੋਸੋ ਨਤ੍ਥਿ.

੮੬. ਇਦਾਨਿ ਵਾਕ੍ਯਦੋਸਪਰਿਹਾਰਤ੍ਥਮਾਰਭਤਿ ‘‘ਭਯਕੋਧੇ’’ਚ੍ਚਾਦਿ. ਭਯਕੋਧਪਸਂਸਾਦਿ ਚਿਤ੍ਤੁਤ੍ਰਾਸਪਟਿਘਥੁਤਿਆਦੀਹਿ ਸਮਨ੍ਨਾਗਤੋ ਤਾਦਿਸੋ ਵਿਸੇਸੋ ਵਤ੍ਤੁਂ ਯਦਿ ਕਾਮੀਯਤੇ ਚੇ ਵਿਞ੍ਞੂਹਿ ਇਚ੍ਛੀਯਤੇ, ਤਤ੍ਥ ਭਯਕੋਧਾਦਿਕੇ ਵਿਸੇਸੇ ਏਕਤ੍ਥਤਾਕਤੋ ਏਕਤ੍ਥਭਾਵੇਨ ਕਤੋ ਦੋਸੋ ਵਾਕ੍ਯਦੋਸੋ ਨ ਭਵਤਿ. ਭਯਾਦਿਵਿਸੇਸੇ ਵਤ੍ਤੁਮਿਚ੍ਛਿਤੇ ਪੁਬ੍ਬੁਚ੍ਚਾਰਿਤਪਦਸ੍ਸ ਪੁਨੁਚ੍ਚਾਰਣੇ ਏਕਤ੍ਥਦੋਸੋ ਨ ਹੋਤੀਤਿ ਅਧਿਪ੍ਪਾਯੋ. ਭਯਞ੍ਚ ਕੋਧੋ ਚ ਪਸਂਸਾ ਚਾਤਿ ਚ, ਤਾ ਆਦਿ ਯਸ੍ਸ ਤੁਰਿਤਕੋਤੂਹਲਅਚ੍ਛਰਾਹਾਸਸੋਕਪਸਾਦਸਙ੍ਖਾਤਸ੍ਸ ਅਤ੍ਥਵਿਸੇਸਸ੍ਸੇਤਿ ਚ ਵਿਗ੍ਗਹੋ. ਤਗ੍ਗੁਣਸਂਵਿਞ੍ਞਾਣਅਞ੍ਞਪਦਤ੍ਥਸਮਾਸਤ੍ਤਾ ਭਯਾਦੀਸੁ ਕਥਿਤਮਪਿ ਗਹੇਤ੍ਵਾ ਪੁਨਪ੍ਪੁਨਂ ਕਥਨਮਵਿਰੋਧਂ. ਏਕੋ ਅਤ੍ਥੋ ਯੇਸਂ ਪਦਾਦੀਨਂ ਤੇ ਏਕਤ੍ਥਾ, ਤੇਸਂ ਭਾਵੋ ਏਕਤ੍ਥਤਾ, ਤਾਯ ਕਤੋਤਿ ਵਿਗ੍ਗਹੋ.

ਯਥਾ –

੮੭. ਸਪ੍ਪੋ ਸਪ੍ਪੋ ਅਯਂ ਹਨ੍ਦ, ਨਿਵਤ੍ਤਤੁ ਭਵਂ ਤਤੋ;

ਯਦਿ ਜੀਵਿਤੁਕਾਮੋ’ਸਿ, ਕਥਂ ਤਮੁਪਸਪ੍ਪਸਿ.

੮੭. ‘‘ਯਥੇ’’ਤ੍ਯੁਦਾਹਰਤਿ ‘‘ਸਪ੍ਪੋ’’ਇਚ੍ਚਾਦਿ. ‘‘ਅਯਂ ਸਪ੍ਪੋ ਸਪ੍ਪੋ’’ਤਿ ਭਯੇਨਾਮੇਡਿਤਂ ਹਨ੍ਦਾਤਿ ਖੇਦੇ ਤਤੋ ਤਮ੍ਹਾ ਠਾਨਾ, ਸਪ੍ਪਤੋ ਵਾ ਭਵਂ ਭਵਨ੍ਤੋ ਨਿਵਤ੍ਤਤੁ ਗਤਮਗ੍ਗਾਭਿਮੁਖੋ ਆਵਤ੍ਤਤੁ. ਤਂ ਠਾਨਂ, ਸਪ੍ਪਂ ਵਾ. ਨਤ੍ਥੇਤ੍ਥ ਏਕਤ੍ਥਤਾਦੋਸੋ ਭਯੇਨਾਮੇਡਿਤਪ੍ਪਯੋਗਤੋ.

੮੭. ‘‘ਸਪ੍ਪੋ’’ਚ੍ਚਾਦਿ. ਹਨ੍ਦ ਨਟ੍ਠੋ ਵਤ, ਅਯਂ ਸਪ੍ਪੋ ਸਪ੍ਪੋ ਭਵਂ ਤਤੋ ਠਾਨਤੋ, ਸਪ੍ਪਤੋ ਵਾ ਨਿਵਤ੍ਤਤੁ ਆਵਤ੍ਤਤੁ ਯਦਿ ਜੀਵਿਤੁਕਾਮੋ ਅਸਿ, ਤਂ ਠਾਨਂ, ਸਪ੍ਪਂ ਵਾ ਕਥਮੁਪਸਪ੍ਪਸਿ ਕਥਮੁਪਗਚ੍ਛਸੀਤਿ. ਭਯੇ ਆਮੇਡਿਤਵਚਨਤ੍ਤਾ ਏਕਤ੍ਥਤਾਦੋਸੋ ਨਤ੍ਥਿ, ਜੀਵਿਤੁਕਾਮੋਸੀਤਿ ਏਤ੍ਥ ਬਿਨ੍ਦੁਲੋਪੋ.

ਪਦਦੋਸਪਰਿਹਾਰਵਣ੍ਣਨਾ ਨਿਟ੍ਠਿਤਾ.

ਵਾਕ੍ਯਦੋਸਪਰਿਹਾਰਵਣ੍ਣਨਾ

ਭਗ੍ਗਰੀਤਿਨੋ ਯਥਾ –

੮੮. ਯੋ ਕੋਚਿ ਰੂਪਾਤਿਸਯੋ,

ਕਨ੍ਤਿ ਕਾਪਿ ਮਨੋਹਰਾ;

ਵਿਲਾਸਾਤਿਸਯੋ ਕੋਪਿ,

ਅਹੋ ਬੁਦ੍ਧਮਹੋਦਯੋ.

੮੮. ‘‘ਯੋ’’ਇਚ੍ਚਾਦਿ. ਰੂਪਸ੍ਸ ਅਨੁਬ੍ਯਞ੍ਜਨੇਹਿ ਅਨੁਬ੍ਯਞ੍ਜਿਤਬਾਤ੍ਤਿਂਸਵਰਪੁਰਿਸਲਕ੍ਖਣੋਪਸੋਭਿਤਸ੍ਸ ਬ੍ਯਾਮਪ੍ਪਭਾਕੇਤੁਮਾਲਾਵਿਰਾਜਿਤਸ੍ਸ ਅਤਿਸਯੋ ਆਧਿਕ੍ਕਂ ਵਾਚਾਗੋਚਰਭਾਵਾਤਿਕ੍ਕਮੇਨ ਅਵਚਨੀਯਤ੍ਤਾ ਯੋ ਕੋਚਿਯੇਵ. ਮਨੋ ਅਨੇਕਲੋਕਸ੍ਸ ਚਿਤ੍ਤਂ ਹਰਤੀਤਿ ਮਨੋਹਰਾ ਚਿਤ੍ਤਮਵਹਰਨ੍ਤੀ ਕਨ੍ਤਿ ਸੋਭਾ ਕਾਪਿ ਅਵਚਨਪਥਾ ਕਾਪਿਯੇਵ. ਵਿਲਾਸਸ੍ਸ ਗਤ੍ਯਾਦਿਨੋ ਅਤਿਸਯੋ ਵਚਨਪਥਾਤਿਕ੍ਕਨ੍ਤੋ ਕੋਪਿਯੇਵ, ਤਸ੍ਮਾ ਬੁਦ੍ਧਸ੍ਸ ਮਹਨ੍ਤੋ ਉਦਯੋ ਅਭਿਵੁਡ੍ਢਿ ਅਹੋ ਅਬ੍ਭੁਤੋਤਿ. ਏਤ੍ਥ ਕਿਂਸਦ੍ਦੇਨਾਰਦ੍ਧਾ ਰੀਤਿ ਨ ਕਤ੍ਥਚਿ ਭਗ੍ਗਾ.

੮੮. ‘‘ਯੋ ਕੋਚਿ’’ਚ੍ਚਾਦਿ. ਰੂਪਾਤਿਸਯੋ ਸੁਪ੍ਪਹਿਟ੍ਠਿਤਪਾਦਤਾਦਿਦ੍ਵਤ੍ਤਿਂਸਪੁਰਿਸਲਕ੍ਖਣੇਹਿ ਸੋਭਿਤਸ੍ਸ ਚਿਤ੍ਤਙ੍ਗੁਲਿਤਾਦਿਅਸੀਤਿਅਨੁਬ੍ਯਞ੍ਜਨੇਹਿ ਅਲਙ੍ਕਤਸ੍ਸ ਬ੍ਯਾਮਪ੍ਪਭਾਕੇਤੁਮਾਲਾਹਿ ਉਜ੍ਜਲਸ੍ਸ ਰੂਪਕਾਯਸ੍ਸ ਆਧਿਕ੍ਯਂ ਯੋ ਕੋਚਿਯੇਵ ਮਨੋਗੋਚਰਭਾਵਂ ਵਿਨਾ ਵਚਨਵਿਸਯਾਤਿਕ੍ਕਨ੍ਤਤ੍ਤਾ ਯੋ ਕੋਚਿਯੇਵ. ਮਨੋਹਰਾ ਲੋਕਸ੍ਸ ਚਿਤ੍ਤਂ ਹਰਨ੍ਤੀ ਕਨ੍ਤਿ ਸੋਭਾ ਕਾਪਿਯੇਵ ਵਚੀਵਿਸਯਾਤਿਕ੍ਕਨ੍ਤਤ੍ਤਾ ਕਾਪਿਯੇਵ. ਵਿਲਾਸਾਤਿਸਯੋ ਵਿਸਯਭੂਤਪਿਯਭਾਵਸਙ੍ਖਾਤਸ੍ਸ ਗਮਨਾਦਿਵਿਲਾਸਸ੍ਸ ਆਧਿਕ੍ਯਮ੍ਪਿ ਕੋਪਿਯੇਵ ਵੁਤ੍ਤਕਾਰਣੇਨੇਵਕੋਪਿਯੇਵ. ਤਤੋ ਬੁਦ੍ਧਮਹੋਦਯੋ ਬੁਦ੍ਧਸ੍ਸ ਮਹਾਭਿਵੁਦ੍ਧਿਸਙ੍ਖਾਤੋ ਉਦਯੋ ਅਹੋ ਅਚ੍ਛਰਿਯੋਤਿ. ਏਤ੍ਥ ਸਬ੍ਬਨਾਮਿਕੇਨ ਕਿਂ ਸਦ੍ਦੇਨ ਵਤ੍ਤੁਮਾਰਦ੍ਧਕ੍ਕਮੋ ਨ ਕਤ੍ਥਚਿ ਭਿਨ੍ਨੋਤਿ ਭਗ੍ਗਰੀਤਿਦੋਸੋ ਨਤ੍ਥੀਤਿ.

੮੯. ਅਬ੍ਯਾਮੋਹਕਰਂ ਬਨ੍ਧਂ, ਅਬ੍ਯਾਕਿਣ੍ਣਂ ਮਨੋਹਰਂ;

ਅਦੂਰਪਦਵਿਨ੍ਯਾਸਂ, ਪਸਂਸਨ੍ਤਿ ਕਵਿਸ੍ਸਰਾ.

੮੯. ‘‘ਅਬ੍ਯਾਮੋਹ’’ਇਚ੍ਚਾਦਿ. ਨਤ੍ਥਿ ਦੂਰਮੇਸਨ੍ਤਿ ਅਦੂਰਾਨਿ, ਤਾਨਿਯੇਵ ਪਦਾਨਿ, ਤੇਸਂ ਵਿਨ੍ਯਾਸੋ ਯਾਥਾਵਤੋ ਠਪਨਂ ਯਸ੍ਸ ਤਂ. ਤਤੋਯੇਵ ਅਬ੍ਯਾਕਿਣ੍ਣੋ ਅਸਮ੍ਮਿਸ੍ਸੋ ਚ. ਸੋ ਅਬ੍ਯਾਕਿਣ੍ਣਤਾਯ ਏਵ ਮਨੋਹਰੋ ਚਾਤਿ ਅਬ੍ਯਾਕਿਣ੍ਣਂ ਮਨੋਹਰਂ. ਤੇਨੇਵ ‘‘ਅਯਮੇਤ੍ਥ ਅਤ੍ਥੋ ਅਯਂ ਵਾ’’ਤਿ ਏਵਂ ਬ੍ਯਾਮੋਹਂ ਨ ਕਰੋਤੀਤਿ ਅਬ੍ਯਾਮੋਹਕਰੋ, ਤਂ. ਪਸਾਦਾਲਙ੍ਕਾਰਾਲਙ੍ਕਿਤਂ ਬਨ੍ਧਂ. ਕਵੀਨਂ ਇਸ੍ਸਰਾ ਪਧਾਨਾ. ਯੇ ਕਨਿਟ੍ਠਙ੍ਗੁਲਿਗਣਨਾਨਿਟ੍ਠਾ, ਤੇ ਪਸਂਸਨ੍ਤਿ ਥੁਵਨ੍ਤਿ ਤਾਦਿਸਬਨ੍ਧਗੁਣਸ੍ਸਾਤਿਸਯਪਸਂਸਾਰਹਭਾਵੇਨ.

੮੯. ‘‘ਅਬ੍ਯਾਮੋਹੇ’’ਚ੍ਚਾਦਿ. ਅਦੂਰਪਦਵਿਨ੍ਯਾਸਂ ਨਾਮਾਦਿਪਦਾਨਂ ਵੋਹਾਰਕਾਲੇ ਅਦੂਰਸਮ੍ਬਨ੍ਧੋ ਯਥਾ ਸਿਯਾ, ਤਥਾ ਪਟਿਪਾਟਿਯਾ ਪਦਟ੍ਠਪਨੇਨ ਸਮਨ੍ਨਾਗਤਂ ਅਬ੍ਯਾਕਿਣ੍ਣਂ, ਤਤੋਯੇਵ ਅਞ੍ਞਸਮ੍ਬਨ੍ਧੀਪਦੇਹਿ ਅਸਮ੍ਮਿਸ੍ਸਂ ਮਨੋਹਰਂ, ਤਤੋਯੇਵ ਵਿਞ੍ਞੂਨਂ ਚਿਤ੍ਤਮਾਰਾਧੇਨ੍ਤਂ ਅਬ੍ਯਾਮੋਹਕਰਂ ‘‘ਇਮਸ੍ਸਤ੍ਥੋ ਇਮਸ੍ਸਤ੍ਥੋ ਏਸੋ ਏਸੋ ਵਾ’’ਤਿ ਸਂਸਯਮਨੁਪ੍ਪਾਦੇਨ੍ਤਂ ਬਨ੍ਧਂ ਪਸਾਦਾਲਙ੍ਕਾਰਸਂਯੁਤ੍ਤਂ ਬਨ੍ਧਨਂ ਕਵਿਸ੍ਸਰਾ ਕਵੀਨਂ ਪਧਾਨਾ ਪਣ੍ਡਿਭਜਨਾ, ਕਨਿਟ੍ਠਙ੍ਗੁਲਿਯਾ ਗਣਿਤਬ੍ਬਾ ਅਗ੍ਗਕਵਿਨੋਤਿ ਅਧਿਪ੍ਪਾਯੋ. ਪਸਂਸਨ੍ਤਿ ਥੋਮੇਨ੍ਤਿ. ਬ੍ਯਾਮੋਹਂ ਨ ਕਰੋਤੀਤਿ ਅਬ੍ਯਾਮੋਹਕਰੋ. ਵਿ ਆਕਿਣ੍ਣੋ ਬ੍ਯਾਕਿਣ੍ਣੋ, ਨ ਬ੍ਯਾਕਿਣ੍ਣੋ ਅਬ੍ਯਾਕਿਣ੍ਣੋ. ਨਤ੍ਥਿ ਦੂਰਂ ਯੇਸਂ, ਤਾਨਿਯੇਵ ਪਦਾਨਿ, ਤੇਸਂ ਵਿਨ੍ਯਾਸੋ ਠਪਨਂ ਯਸ੍ਸ ਬਨ੍ਧਸ੍ਸਾਤਿ ਵਿਗ੍ਗਹੋ.

ਯਥਾ –

੯੦. ਨੀਲੁਪ੍ਪਲਾਭਂ ਨਯਨਂ,

ਬਨ੍ਧੁਕਰੁਚਿਰੋ’ਧਰੋ;

ਨਾਸਾ ਹੇਮਙ੍ਕੁਸੋ ਤੇਨ,

ਜਿਨੋਯਂ ਪਿਯਦਸ੍ਸਨੋ.

੯੦. ‘‘ਯਥੇ’’ਤ੍ਯੁਦਾਹਰਤਿ ‘‘ਨੀਲੁਪ੍ਪਲਾਭ’’ਮਿਚ੍ਚਾਦਿ. ਯਸ੍ਸ ਜਿਨਸ੍ਸ ਨਯਨਂ ਨੇਤ੍ਤਂ ਨੀਲੁਪ੍ਪਲਾਭਂ ਇਨ੍ਦੀਵਰਦ੍ਵਯਨਿਭਂ, ਅਧਰੋ ਅਧਰੋਟ੍ਠੋ ਬਨ੍ਧੁਕਮਿਵ ਬਨ੍ਧੁਕਕੁਸੁਮਮਿਵ ਰੁਚਿਰੋ ਕਨ੍ਤੋ, ਨਾਸਾ ਨਾਸਿਕਾ ਸਯਂ ਹੇਮਙ੍ਕੁਸੋ ਸੁਵਣ੍ਣਙ੍ਕੁਸੋਯੇਵ, ਤੇਨ ਕਾਰਣੇਨ ਅਯਂ ਜਿਨੋ ਪਿਯਂ ਮਧੁਰਂ ਦਸ੍ਸਨਮਸ੍ਸਾਤਿ ਪਿਯਦਸ੍ਸਨੋ. ਈਦਿਸੋ ਨ ਬ੍ਯਾਕਿਣ੍ਣਦੋਸੋ, ਅਬ੍ਯਾਕਿਣ੍ਣੋ ਪਸਾਦੋਯੇਵਾਤਿ.

੯੦. ਇਦਾਨਿ ਬ੍ਯਾਕਿਣ੍ਣਦੋਸਪਰਿਹਾਰਂ ਪਰਿਹਰਤਿ ‘‘ਨੀਲੁਪ੍ਪਲਿ’’ਚ੍ਚਾਦਿਨਾ. ਨਯਨਂ ਯਸ੍ਸ ਨੇਤ੍ਤਯੁਗਲ਼ਂ ਨੀਲੁਪ੍ਪਲਾਭਂ ਨੀਲੁਪ੍ਪਲਦਲਸਦਿਸਂ, ਅਧਰੋ ਅਧਰੋਟ੍ਠੋ ਬਨ੍ਧੁਕਰੁਚਿਰੋ ਬਨ੍ਧੁਕਪੁਪ੍ਫਮਿਵ ਮਨੁਞ੍ਞੋ, ਨਾਸਾ ਨਾਸਿਕਾ ਹੇਮਙ੍ਕੁਸੋ ਸੁਵਣ੍ਣਙ੍ਕੁਸੋਯੇਵ, ਤੇਨ ਕਾਰਣੇਨ ਅਯਂ ਜਿਨੋ ਪਿਯਦਸ੍ਸਨੋ ਮਨੁਞ੍ਞਦਸ੍ਸਨੋ ਹੋਤੀਤਿ. ਏਤ੍ਥ ਪਸਾਦਾਲਙ੍ਕਾਰੇਨ ਯੁਤ੍ਤਤ੍ਤਾ ਨ ਬ੍ਯਾਕਿਣ੍ਣਦੋਸੋ. ਆਭਾਸਦ੍ਦੋ ਨਿਭਾਸਦ੍ਦੋ ਵਿਯ ਇਵਤ੍ਥੋ. ਨੋ ਚੇ, ਪਭਾਪਰਿਯਾਯੋ ਵਾ ਹੋਤਿ. ਬਨ੍ਧੁਕਮਿਵ ਰੁਚਿਰੋਤਿ ਚ, ਪਿਯਂ ਦਸ੍ਸਨਂ ਯਸ੍ਸੇਤਿ ਚ ਵਿਗ੍ਗਹੋ. ਇਹ ਦਸ੍ਸਨਸ੍ਸ ਕਤ੍ਤੁਭੂਤਸਾਧੁਜਨਸਮ੍ਬਨ੍ਧਤ੍ਤੇਪਿ ਵਿਸਯਤ੍ਤੇਨੇਵ ਜਿਨਸਮ੍ਬਨ੍ਧੋ ਹੋਤੀਤਿ ਅਞ੍ਞਪਦਤ੍ਥੇਨ ਤਥਾਗਤੋ ਗਹਿਤੋਤਿ.

੯੧. ਸਮਤਿਕ੍ਕਨ੍ਤਗਾਮ੍ਮਤ੍ਤ-ਕਨ੍ਤਵਾਚਾਭਿਸਙ੍ਖਤਂ;

ਬਨ੍ਧਨਂ ਰਸਹੇਤੁਤ੍ਤਾ, ਗਾਮ੍ਮਤ੍ਤਂ ਅਤਿਵਤ੍ਤਤਿ.

੯੧. ‘‘ਸਮਤਿਕ੍ਕਨ੍ਤਿ’’ਚ੍ਚਾਦਿ. ਸਮ੍ਮਾ ਅਤਿਕ੍ਕਨ੍ਤਂ ਨਿਗ੍ਗਤਂ. ਗਾਮ੍ਮਸ੍ਸ ਭਾਵੋ ਗਾਮ੍ਮਤ੍ਤਂ. ਯਾਸਂ ਕਨ੍ਤਾਨਂ ਮਧੁਰਾਨਂ ਵਾਚਾਨਂ ਤਾਹਿ ਅਭਿਸਙ੍ਖਤਂ ਰਚਿਤਂ ਬਨ੍ਧਨਂ ਰਸਸ੍ਸ ਮਾਧੁਰਿਯਸ੍ਸ ਹੇਤੁਤ੍ਤਾ ਕਾਰਣਭਾਵੇਨ ਗਾਮ੍ਮਤ੍ਤਂ ਯਥਾਵੁਤ੍ਤਂ ਅਤਿਵਤ੍ਤਤਿ ਅਤਿਕ੍ਕਮਤਿ.

੯੧. ‘‘ਸਮਤਿ’’ਚ੍ਚਾਦਿ. ਸਮਤਿਕ੍ਕਨ੍ਤਗਾਮ੍ਮਤ੍ਤਕਨ੍ਤਵਾਚਾਭਿਸਙ੍ਖਤਂ ਵਿਸੇਸਤੋ ਅਤਿਕ੍ਕਨ੍ਤਗਾਮ੍ਮਭਾਵਾਹਿ ਕਨ੍ਤਵਾਚਾਹਿ ਰਚਿਤਂ ਬਨ੍ਧਨਂ ਮੁਤ੍ਤਕਾਦਿਬਨ੍ਧਨਂ ਰਸਹੇਤੁਤ੍ਤਾ ਪਣ੍ਡਿਤਾਨਂ ਪੀਤਿਰਸਸ੍ਸ ਕਾਰਣਤ੍ਤਾ ਯਥਾਵੁਤ੍ਤਗਾਮ੍ਮਦੋਸਂ ਅਤਿਵਤ੍ਤਤਿ ਅਤਿਕ੍ਕਮ੍ਮ ਪਵਤ੍ਤਤੀਤਿ. ਸਮ੍ਮਾ ਅਤਿਕ੍ਕਨ੍ਤਂ ਗਾਮ੍ਮਤ੍ਤਂ ਯਾਸਂ, ਤਾਹਿਯੇਵ ਕਨ੍ਤਵਾਚਾਹਿ ਅਭਿਸਙ੍ਖਤਨ੍ਤਿ ਚ, ਰਸਸ੍ਸ ਹੇਤੁ, ਤਸ੍ਸ ਭਾਵੋਤਿ ਚ ਵਿਗ੍ਗਹੋ.

ਯਥਾ –

੯੨. ਦੁਨੋਤਿ ਕਾਮਚਣ੍ਡਾਲੋ,

ਸੋ ਮਂ ਸਦਯ ਨਿਦ੍ਦਯੋ;

ਈਦਿਸਂ ਬ੍ਯਸਨਾਪਨ੍ਨਂ,

ਸੁਖੀਪਿ ਕਿਮੁਪੇਕ੍ਖਸੇ.

੯੨. ‘‘ਯਥੇ’’ਤ੍ਯੁਦਾਹਰਤਿ. ਕਾਮਾਤੁਰਾ ਕਾਚਿ ਵਨਿਤਾ ਅਤ੍ਤਨੋ ਪਿਯਂ ਪਤਿਂ ਵਿਰਵਤਿ ‘‘ਦੁਨੋਤਿ’’ਚ੍ਚਾਦਿਨਾ. ਦਯਾਯ ਸਹ ਪਵਤ੍ਤੀਤਿ ਸਦਯਇਤਿ ਅਨੁਨਯਵਸੇਨ ਪਿਯਸ੍ਸ ਆਮਨ੍ਤਨਂ, ਸਾਨੁਨਯਾਮਨ੍ਤਨਞ੍ਹਿ ਤਤੋਨੁਗ੍ਗਹਾਭਿਕਙ੍ਖਾਯਮਚ੍ਚਨ੍ਤਮੁਚਿਤਂ, ਸੋ ਕਾਮੋ ਕਨ੍ਦਪ੍ਪੋ ਏਵ ਚਣ੍ਡਾਲੋ ਅਕਣ੍ਡੋ ਵਾ ਅਸਯ੍ਹੋਪਤਾਪਾਵਹਤ੍ਤਾ. ਕਾਮੇ ਚਣ੍ਡਾਲਤ੍ਤਾਰੋਪਨਞ੍ਚ ਉਚਿਤਮੇਵ ਯਤੋਨੇਨ ਕਯਿਰਮਾਨਮਸਹਨਮੁਪਤਾਪਮਸਹਮਾਨਾ ਤਂ ਪਰਿਭਵਨ੍ਤਂ ਵਿਪ੍ਪਲਪਤਿ, ਨਿਦ੍ਦਯੋ ਨਿਕ੍ਕਰੁਣੋ, ਇਦਮਪਿ ਉਚਿਤਮੁਪਤਾਪੇ ਨਿਕ੍ਕਰੁਣਾਨਂ ਤਾਦਿਸੀ ਗਤੀਤਿ. ਮਂ ਦੁਨੋਤਿ ਅਧਿਕਮੁਪਤਾਪੇਤਿ ਨਿਦ੍ਦਯਤ੍ਤਾ, ਨ ਭਵਨ੍ਤਂ, ਤੇਨੇਵ ਭਵਂ ਸੁਖੀ. ਇਮਿਨਾ ਅਞ੍ਞਾਸਤ੍ਤਤਂ ਤਸ੍ਸ ਦੀਪੇਤਿ. ਯਦਿ ਨਾਞ੍ਞਾਸਤ੍ਤੋਸਿ, ਨਾਹਮੇਕਾਕਿਨੀ ਭਵਾਮਿ. ਅਸਹਾਯਾਨਞ੍ਹਿ ਪਟਿਸਤ੍ਤਵੋ ਹੋਨ੍ਤਿ. ਏਕਾਕਿਤ੍ਤਾਯੇਵਾਹਮਪ੍ਪਟਿਸਰਣਤ੍ਤਾਨੇਨ ਦੁਸਾਮੀਤਿ [ਦੁਞ੍ਞਾਮੀਤਿ (?)] ਤਵ ਕਾਮਂ ਤ੍ਵਂ ਸੁਖੀ ਹੋਸਿ. ਸਨਾਥਾਨਂ ਤਾਦਿਸੀ ਵੁਤ੍ਤੀਤਿ ਏਵਂ ਸੁਖੀਪਿ ਤ੍ਵਂ ਈਦਿਸਂ ਬ੍ਯਸਨਮਾਪਨ੍ਨਂ ਕਿਂ ਕਸ੍ਮਾ ਉਪੇਕ੍ਖਸੇਤਿ. ਏਵਮਯਂ ਵਙ੍ਕਵੁਤ੍ਤਿਯਾ ਅਤ੍ਤਨੋ, ਤਂ ਵਿਸਯਮਨੁਭਵਨ੍ਤਸ੍ਸ ਚ ਵਿਮੁਖਤ੍ਤਂ ਨਿਦਸ੍ਸੇਤੀਤੀਦਿਸਂ ਨ ਗਾਮ੍ਮਂ.

੯੨. ਗਾਮ੍ਮਦੋਸਪਰਿਹਾਰੇ ਲਕ੍ਖਿਯਂ ਦਸ੍ਸੇਤਿ ‘‘ਦੁਨੋਤਿ’’ਚ੍ਚਾਦਿ. ਕਾਮਤਣ੍ਹਾਭਿਭੂਤਾ ਅਙ੍ਗਨਾ ਅਤ੍ਤਨੋ ਵਲ੍ਲਭਂ ਨਿਸ੍ਸਾਯ ਏਵਂ ਵਿਲਪਤਿ ‘‘ਸਦਯ ਹੇ ਕਾਰੁਣਿਕ ਸੋ ਕਾਮਚਣ੍ਡਾਲੋ ਸੋ ਅਨਙ੍ਗਨੀਚੋ ਨਿਦ੍ਦਯੋ ਨਿਕ੍ਕਾਰੁਣਿਕੋ ਮਂ ਦੁਨੋਤਿ ਪੀਲ਼ੇਤਿ, ਸੁਖੀਪਿ ਮਮ ਵਿਯ ਅਨਾਥਭਾਵਾਭਾਵਤੋ ਸੁਖਿਤੋਪਿ ਤ੍ਵਂ ਈਦਿਸਂ ਬ੍ਯਸਨਾਪਨ੍ਨਂ ਏਵਂ ਕਾਮਚਣ੍ਡਾਲੇਨ ਅਕਾਰੁਣੇਨ ਕਤਅਸਯ੍ਹਸਨ੍ਤਾਪਸਙ੍ਖਾਤਬ੍ਯਸਨਮਨੁਪ੍ਪਤ੍ਤਂ ਮਂ ਕਿਮੁਪੇਕ੍ਖਸੇ ਕਸ੍ਮਾ ਉਦਾਸੀਨੋਸੀ’’ਤਿ. ਅਤ੍ਤਨੋ ਦੁਕ੍ਖਾਤੁਰਤ੍ਤਾ ਦੁਕ੍ਖਦੂਰੀਕਰਣਂ ਕਾਰੁਣਿਕਾਨਂਯੇਵ ਵਿਸਯਨ੍ਤਿ ‘‘ਸਦਯੇ’’ਤਿ ਅਨੁਨਯਵਸੇਨ ਆਮਨ੍ਤਨੁਚਿਤਂ ਅਤ੍ਤਨੋ ਦੁਕ੍ਖਾਤੁਰਤਂ ਪੋਸੇਤੁਂ ਪੀਲ਼ਾਕਾਰਕੇ ਕਾਮੇ ਚਣ੍ਡਾਲਤ੍ਤਾਰੋਪਨਞ੍ਚ ਨਿਦ੍ਦਯਤ੍ਤਕਥਨਞ੍ਚ ਉਚਿਤਮੇਵ ਅਤ੍ਤਨਿ ਉਪੇਕ੍ਖਕਤ੍ਤਾ. ਸੁਖੀਪੀਤਿ ਇਮਿਨਾ ਤਸ੍ਸ ਪਰਵਿਸਯਾਸਤ੍ਤਤਾਯ ਅਤਿਚਾਰਂ ਅਬ੍ਭੁਪਗਮੇਤਿ. ਏਵਂ ਵਙ੍ਕਵੁਤ੍ਤਿਯਾ ਅਤ੍ਤਨੋ ਵਲ੍ਲਭੇ ਸਾਨੁਰਾਗਤ੍ਤਞ੍ਚ ਅਤ੍ਤਨਿ ਤਸ੍ਸ ਤਦਭਾਵਤ੍ਤਞ੍ਚ ਦਸ੍ਸੇਤੀਤਿ. ‘‘ਕਞ੍ਞੇ ਕਾਮਯਮਾਨਂ ਮਂ, ਨ ਕਾਮਯਸਿ ਕਿਂਨ੍ਵਿਦ’’ਨ੍ਤਿ ਏਤ੍ਥ ਵਿਯ ਇਹ ਗਾਮ੍ਮਦੋਸੋ ਨਤ੍ਥੀਤਿ ਗਾਮ੍ਮਦੋਸਪਰਿਹਾਰਮਿਦਂ. ਕਾਮੋਯੇਵ ਚਣ੍ਡਾਲੋ ਕਾਮਚਣ੍ਡਾਲੋ, ਸਹ ਦਯਾਯ ਯੋ ਵਤ੍ਤਤੀਤਿ ਚ, ਨਤ੍ਥਿ ਦਯਾ ਅਸ੍ਸੇਤਿ ਚ, ਸੁਖਮਸ੍ਸ ਅਤ੍ਥੀਤਿ ਚ ਵਿਗ੍ਗਹੋ. ਅਪਿਸਦ੍ਦੋ ਅਕ੍ਖਮੇ.

੯੩. ਯਤਿਹੀਨਪਰਿਹਾਰੋ, ਨ ਪੁਨੇ’ਦਾਨਿ ਨੀਯਤੇ;

ਯਤੋ ਨ ਸਵਨੁਬ੍ਬੇਗਂ, ਹੇਟ੍ਠਾ ਯੇਤਂ ਵਿਚਾਰਿਤਂ.

੯੩. ‘‘ਯਤਿ’’ਚ੍ਚਾਦਿ. ਵਿਚਾਰਿਤਨ੍ਤਿ ‘‘ਤਂ ਨਮੇ ਸਿਰਸਾ ਚਾਮੀ-ਕਰਵਣ੍ਣਂ ਤਥਾਗਤ’’ਨ੍ਤਿਆਦਿਨਾ ਹੇਟ੍ਠਾ ਪਕਾਸਿਤਨ੍ਤਿ ਅਤ੍ਥੋ.

੯੩. ‘‘ਯਤਿਹੀਨਿ’’ਚ੍ਚਾਦਿ. ਯਤੋ ਯਸ੍ਮਾ ਸਵਨੁਬ੍ਬੇਗਂ ‘‘ਦੋਸਾਨਮੁਦ੍ਦੇਸਕ੍ਕਮੇਨ ਦੋਸਪਰਿਹਾਰਕ੍ਕਮੋ ਨ ਵੁਤ੍ਤੋ’’ਤਿ ਏਵਂ ਵਿਞ੍ਞੂਨਮੁਪ੍ਪਜ੍ਜਮਾਨਂ ਇਮਸ੍ਸ ਗਨ੍ਥਸ੍ਸ ਸਵਨਾਸਹਨਂ ਨਤ੍ਥਿ, ਤਤੋ ਯਤਿਹੀਨਪਰਿਹਾਰੋ ਯਤਿਹੀਨਦੋਸਸ੍ਸ ਪਰਿਹਰਣਵਸੇਨ ਪਵਤ੍ਤਮੁਦਾਹਰਣਂ ਇਦਾਨਿ ਪੁਨ ਨ ਨੀਯਤੇ ਨਾਹਰੀਯਤੇਤਿ. ਇਮਿਨਾਧਿਗਤਮਾਦੋ ਵੁਤ੍ਤਤ੍ਥਮੇਵ ਸਮਤ੍ਥੇਤਿ. ਹੇਟ੍ਠਾ ਯੇਤਂ ਵਿਚਾਰਿਤਨ੍ਤਿ ਏਵਂ ਯਤਿਹੀਨਦੋਸਪਰਿਹਰਣਂ ਹੇਟ੍ਠਾ ਅਨਨ੍ਤਰਪਰਿਚ੍ਛੇਦੇ ਵਿਚਾਰਿਤਂ ‘‘ਤਂ ਨਮੇ ਸਿਰਸਾ ਚਾਮੀ-ਕਰਵਣ੍ਣਂ ਤਥਾਗਤ’’ਨ੍ਤਿਆਦਿਨਾ ਪਕਾਸਿਤਨ੍ਤਿ. ਆਦੋ ਯਤਿਹੀਨਦੋਸਪਾਤੁਭਾਵੇਯੇਵ ਪਰਿਹਾਰਕ੍ਕਮਸ੍ਸਾਪਿ ਦਸ੍ਸਿਤਤ੍ਤਾ ਇਹਾਦਸ੍ਸਨੇਪਿ ਗਨ੍ਥਸ੍ਸ ਊਨਤਾ ਨਤ੍ਥੀਤਿ ਅਧਿਪ੍ਪਾਯੋ. ਯਤਿ ਹੀਨਾ ਏਤ੍ਥੇਤਿ ਚ, ਤਸ੍ਸ ਪਰਿਹਾਰੋਤਿ ਚ, ਸਵਨੇ ਉਬ੍ਬੇਗਨ੍ਤਿ ਚ ਵਿਗ੍ਗਹੋ.

ਕਮਚ੍ਚੁਤਸ੍ਸ ਯਥਾ –

੯੪. ਉਦਾਰਚਰਿਤੋ’ਸਿ ਤ੍ਵਂ, ਤੇਨੇਵਾ’ਰਾਧਨਾ ਤ੍ਵਯਿ;

ਦੇਸਂ ਵਾ ਦੇਹਿ ਗਾਮਂ ਵਾ, ਖੇਤ੍ਤਂ ਵਾ ਮਮ ਸੋਭਨਂ.

੯੪. ‘‘ਉਦਾਰ’’ਇਚ੍ਚਾਦਿ. ਉਦਾਰਂ ਉਦਾਰਤ੍ਤਂ ਚਾਗਾਤਿਸਯਸਮ੍ਬਨ੍ਧਤੋ ਚਰਿਤਂ ਅਤਿਗੁਣਪਵਤ੍ਤਿ ਯਸ੍ਸਾਤਿ ਵਿਗ੍ਗਹੋ. ਏਤ੍ਥ ਉਚਿਤਤ੍ਤਾ ਦੇਸਾਦੀਨਂ ਯਾਚਨਕ੍ਕਮਸ੍ਸ ਕਮਚ੍ਚੁਤਸ੍ਸ ਪਰਿਹਾਰੋਯਂ.

੯੪. ‘‘ਉਦਾਰਿ’’ਚ੍ਚਾਦਿ. ਤ੍ਵਂ ਪੁਞ੍ਞਵਨ੍ਤ ਉਦਾਰਚਰਿਤੋਸਿ ਚਾਗਾਤਿਸਯਯੋਗਤੋ ਵਿਸਾਰਦਪਵਤ੍ਤਿਯੁਤ੍ਤੋਸਿ, ਤੇਨੇਵ ਤੇਨ ਕਾਰਣੇਨੇਵ ਆਰਾਧਨਾ ਮਮ ਯਾਚਨਾ ਤ੍ਵਯਿ ਹੋਤਿ. ਦੇਸਂ ਵਾਜਨਪਦਂ ਵਾ, ਨੋ ਚੇ, ਗਾਮਂ ਵਾ ਸਂਵਸਥਂ ਵਾ, ਨੋ ਚੇ, ਸੋਭਨਂ ਖੇਤ੍ਤਂ ਵਾ ਕੇਦਾਰਂ ਵਾ ਮਮ ਦੇਹੀਤਿ ਅਨੁਪੁਬ੍ਬਂ ਹੀਨਪਦਤ੍ਥਯਾਚਨਾ ਦਾਯਕਸ੍ਸ ਦਾਨਸ੍ਸਾਪਿ ਯਾਚਕਸ੍ਸ ਇਚ੍ਛਿਤਤ੍ਥਪਟਿਲਾਭਸ੍ਸਾਪਿ ਅਨੁਰੂਪਤ੍ਤਾ ਕਮਚ੍ਚੁਤਦੋਸਮਪਨੇਤਿ. ਉਦਾਰਂ ਚਰਿਤਂ ਅਸ੍ਸਾਤਿ ਵਿਗ੍ਗਹੋ.

ਅਤਿਵੁਤ੍ਤਸ੍ਸ ਯਥਾ –

੯੫. ਮੁਨਿਨ੍ਦਚਨ੍ਦਸਮ੍ਭੂਤ-

ਯਸੋਰਾਸਿਮਰੀਚਿਨਂ;

ਸਕਲੋਪ੍ਯ’ਯਮਾਕਾਸੋ,

ਨਾ’ਵਕਾਸੋ ਵਿਜਮ੍ਭਨੇ.

੯੫. ‘‘ਮੁਨਿਨ੍ਦ’’ਇਚ੍ਚਾਦਿ. ਮੁਨਿਨ੍ਦੋਯੇਵ ਚਨ੍ਦੋ, ਤਤੋ ਸਮ੍ਭੂਤਾ ਪਾਤੁਭੂਤਾ, ਯਸੋਰਾਸੀ ਏਵ ਮਰੀਚਿਯੋ, ਤਾਸਂ. ਅਯਂ ਸਕਲੋ ਆਕਾਸੋਪਿ ਗਗਨਮੇਵ, ਨ ਤਸ੍ਸੇਕੋ ਪਦੇਸੋ. ਵਿਜਮ੍ਭਨੇ ਬ੍ਯਾਪਨੇ ਨਾਵਕਾਸੋ ਤਾਦਿਸਤ੍ਤਾ ਤਾਸਂ ਮਰੀਚਿਨਨ੍ਤਿ ਨਾਤਿਵੁਤ੍ਤਂ.

੯੫. ‘‘ਮੁਨਿਨ੍ਦਿ’’ਚ੍ਚਾਦਿ. ਮੁਨਿਨ੍ਦਚਨ੍ਦਸਮ੍ਭੂਤਯਸੋਰਾਸਿਮਰੀਚਿਨਂ ਮੁਨਿਨ੍ਦਸਙ੍ਖਾਤਚਨ੍ਦਤੋ ਪਾਤੁਭੂਤਾਨਂ ਕਿਤ੍ਤਿਸਮੂਹਸਙ੍ਖਾਤਕਿਰਣਾਨਂ ਵਿਜਮ੍ਭਨੇ ਬ੍ਯਾਪਨੇ ਅਯਂ ਸਕਲੋਪਿ ਆਕਾਸੋ ਨਾਵਕਾਸੋ ਨ ਓਕਾਸੋ ਹੋਤੀਤਿ. ਹੇਤੁਫਲਾਦਿਏਕੇਕਕਾਰਣੇਨਾਪਿ ਅਪ੍ਪਮੇਯ੍ਯਾਨਂ ਸਬ੍ਬਞ੍ਞੁਗੁਣਾਨਂ ਪਵਤ੍ਤਿਯਾ ਅਪ੍ਪਮੇਯ੍ਯਸਾਮਞ੍ਞਭੂਤਾਕਾਸਸ੍ਸ ਨਿਰਵਕਾਸਸ੍ਸ ਇਵ ਕਥਨਮੁਚਿਤਨ੍ਤਿ ਅਤਿਵੁਤ੍ਤਦੋਸੋ ਇਹ ਨ ਭਵਤਿ. ਚਨ੍ਦੋ ਇਵ ਚਨ੍ਦੋ, ਮੁਨਿਨ੍ਦੋ ਏਵ ਚਨ੍ਦੋ, ਤਤੋ ਸਮ੍ਭੂਤਾਨਂਯੇਵ ਯਸਾਨਂ ਰਾਸੀ ਚ ਤਾ ਮਰੀਚਿਯੋ ਚਾਤਿ ਵਿਗ੍ਗਹੋ.