੩. ਨਿਬ੍ਬਾਨਕਣ੍ਡੋ

ਇਦਾਨਿ ‘‘ਸਦ੍ਧਮ੍ਮਸਵਨਮ੍ਪਿ ਚਾਤਿ ਇਮਸ੍ਸ ਸਂਵਣ੍ਣਨਾਕ੍ਕਮੋ ਸਮ੍ਪਤ੍ਤੋ ਤਤ੍ਥ ਸਦ੍ਧਮ੍ਮਸਵਨਮ੍ਪਿ ਚ ਲੋਕੇ ਦੁਲ੍ਲਭਮੇਵ ਤਥਾ ਹਿ ਸਦ੍ਧਮ੍ਮੋ ਨਾਮ ਤਿਵਿਧੋ ਹੋਤਿ. ਪਰਿਯਤ੍ਤਿਸਦ੍ਧਮ੍ਮੋ, ਪਟਿਪਤ੍ਤਿਸਦ੍ਧਮ੍ਮੋ, ਪਟਿਵੇਧਸਦ੍ਧਮ੍ਮੋਤਿ. ਤਤ੍ਥ ਪਰਿਯਤ੍ਤਿਸਦ੍ਧਮ੍ਮੋ ਨਾਮ ਤੇਪਿਟਕਂ ਬੁਦ੍ਧਵਚਨਂ. ਪਟਿਪਤ੍ਤਿਸਦ੍ਧਮ੍ਮੋ ਨਾਮ ਤੇਰਸਧੁਤਙ੍ਗਾਨਿ ਅਸੀਤਿ ਖਨ੍ਧਕਵਤ੍ਤਾਦਯੋ ਅਭਿਸਮਾਚਾਰਵਤ੍ਤਾਦੀਨਿ. ਪਟਿਵੇਧਸਦ੍ਧਮ੍ਮੋ ਨਾਮ ਚਤੁਸਚ੍ਚਪ੍ਪਟਿਵੇਧੋ. ਤੇਸੁ ਪਰਿਯਤ੍ਤਿਸਦ੍ਧਮ੍ਮੋ ਦ੍ਵਿਨ੍ਨਂ ਸਦ੍ਧਮ੍ਮਾਨਂ ਪੁਬ੍ਬਙ੍ਗਮੋਯੇਵ ਪਦਟ੍ਠਾਨਞ੍ਚ. ਕਸ੍ਮਾ ਤਂਮੂਲਕਤ੍ਤਾ ਤਥਾ ਹਿ ਪਰਿਯਤ੍ਤਿਯਾ ਅਸਤਿ ਪਟਿਵੇਧੋ ਨਾਮ ਨਤ੍ਥਿ. ਪਰਿਯਤ੍ਤਿਯਾ ਅਨ੍ਤਰਹਿਤਾਯ ਪਟਿਪਤ੍ਤਿ, ਪਟਿਪਤ੍ਤਿਯਾ ਅਨ੍ਤਰਹਿਤਾਯ ਅਧਿਗਮੋ ਅਨ੍ਤਰਧਾਯਤਿ. ਕਿਂ ਕਾਰਣਾ ਅਯਞ੍ਹਿ ਪਰਿਯਤ੍ਤਿ ਪਟਿਪਤ੍ਤਿਯਾ ਪਚ੍ਚਯੋ ਹੋਤਿ. ਪਟਿਪਤ੍ਤਿਅਧਿਗਮਸ੍ਸਾਪਿ ਪਰਿਯਤ੍ਤਿਯੇਵ ਪਮਾਣਂ. ਤਤ੍ਥ ਪਟਿਵੇਧੋ ਚ ਪਟਿਪਤ੍ਤਿ ਚ ਹੋਤਿਪਿ ਨਹੋਤਿਪਿ. ਏਕਸ੍ਮਿਞ੍ਹਿ ਕਾਲੇ ਪਟਿਵੇਧਧਰਾ ਭਿਕ੍ਖੂ ਬਹੂ ਹੋਨ੍ਤਿ, ‘‘ਏਸ ਭਿਕ੍ਖੁ ਪੁਥੁਜ੍ਜਨੋ’’ਤਿ ਅਙ੍ਗੁਲਿਂ ਪਹਰਿਤ੍ਵਾ ਦਸ੍ਸੇਤਬ੍ਬੋ ਹੋਤਿ. ਇਮਸ੍ਮਿਂ ਯੇਵ ਦੀਪੇ ਏਕਵਾਰਂ ਪੁਥੁਜ੍ਜਨਭਿਕ੍ਖੁਨਾਮ ਨਾਹੋਸਿ. ਪਟਿਪਤ੍ਤਿਪੂਰਕਾਪਿ ਕਦਾਚਿ ਬਹੂ ਹੋਨ੍ਤਿ ਕਦਾਚਿ ਅਪ੍ਪਾ. ਇਤਿ ਪਟਿਵੇਧੋ ਚ ਪਟਿਪਤ੍ਤਿ ਚ ਹੋਤਿਪਿ ਨ ਹੋਤਿਪਿ. ਸਾਸਨਸ੍ਸ ਠਿਤਿਯਾ ਪਨ ਪਰਿਯਤ੍ਤਿਯੇਵ ਪਮਾਣਂ ਪਣ੍ਡਿਤੋ ਹਿ ਤੇਪਿਟਕਂ ਸੁਤ੍ਵਾ ਦ੍ਵੇਪਿ ਪੂਰੇਤਿ, ਯਥਾ ਅਮ੍ਹਾਕਂ ਬੋਧਿਸਤ੍ਤੋ ਆਲ਼ਾਰਸ੍ਸ ਸਨ੍ਤਿਕੇ ਪਞ੍ਚ ਅਭਿਞ੍ਞਾ ਸਤ੍ਤ ਚ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨ ਸਮਾਪਤ੍ਤਿਯਾ ਪਰਿਕਮ੍ਮਂ ਪੁਚ੍ਛਿ. ਸੋ ‘‘ਨ ਜਾਨਾਮੀ’’ਤਿ ਆਹ. ਤਤੋ ਉਦਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਧਿਗਤਵਿਸੇਸਂ ਸਂਸਨ੍ਦਿਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਸ੍ਸ ਪਰਿਕਮ੍ਮਂ ਪੁਚ੍ਛਿ. ਸੋ ਆਚਿਕ੍ਖਿ, ਤਸ੍ਸ ਵਚਨਸਮਨਨ੍ਤਰਮੇਵ ਮਹਾਸਤ੍ਤੋ ਤਂ ਸਮ੍ਪਾਦੇਸਿ ਏਵਮੇਵ ਪਞ੍ਞਵਾ ਭਿਕ੍ਖੁ ਪਰਿਯਤ੍ਤਿਂ ਸੁਤ੍ਵਾ ਦ੍ਵੇਪਿ ਪੂਰੇਤਿ ਤਸ੍ਮਾ ਪਰਿਯਤ੍ਤਿਯਾ ਠਿਤਾਯ ਸਾਸਨਂ ਠਿਤਂ ਹੋਤਿ ਯਥਾ ਮਹਾਤਲ਼ਾਕਸ੍ਸ ਪਾਲ਼ਿਯਾ ਥਿਰਾਯ ਉਦਕਂ ਨ ਠਸ੍ਸਤੀਤਿ ਨ ਵਤ੍ਤਬ੍ਬਂ ਉਦਕੇ ਸਤਿ ਪਦੁਮਾਦੀਨਿ ਪੁਪ੍ਫਾਨਿ ਨ ਪੁਪ੍ਫਿਸ੍ਸਨ੍ਤੀਤਿ ਨ ਵਤ੍ਤਬ੍ਬਂ ਏਵਮੇਵ ਮਹਾਤਲ਼ਾਕਸ੍ਸ ਥਿਰਪਾਲ਼ਿਸਦਿਸੇ ਤੇਪਿਟਕੇ ਬੁਦ੍ਧਵਚਨੇ ਸਤਿ ਮਹਾਤਲ਼ਾਕੇ ਉਦਕਸਦਿਸਾ ਪਟਿਪਤ੍ਤਿਪੂਰਕਾ ਕੁਲਪੁਤ੍ਤਾ ਨਤ੍ਥੀਤਿ ਨ ਵਤ੍ਤਬ੍ਬਂ. ਤੇਸੁ ਸਤਿ ਮਹਾਤਲ਼ਾਕੇਸੁ ਪਦੁਮਾਦੀਨਿ ਪੁਪ੍ਫਾਨਿ ਵਿਯ ਸੋਤਾਪਨ੍ਨਾਦਯੋ ਅਰਿਯਪੁਗ੍ਗਲਾ ਨਤ੍ਥੀਤਿ ਨ ਵਤ੍ਤਬ੍ਬਂ, ਏਕਨ੍ਤਤੋ ਪਰਿਯਤ੍ਤਿਯੇਵ ਪਮਾਣਂ ਪਰਿਯਤ੍ਤਿਯਾ ਅਨ੍ਤਰਹਿਤਾਯ ਪਟਿਪਤ੍ਤਿਪਟਿਵੇਧਾਨਂ ਅਨ੍ਤਰਧਾਨਤੋ. ਤਤ੍ਥ ਪਰਿਯਤ੍ਤਿਨਾਮ ਤੇਪਿਟਕਂ ਬੁਦ੍ਧਵਚਨਂ ਸਾਟ੍ਠਕਥਾ ਪਾਲ਼ਿਯਾਵ ਸਾ ਤਿਟ੍ਠਤਿ, ਤਾਵ ਪਰਿਯਤ੍ਤਿ ਪਰਿਪੁਣ੍ਣਾ ਹੋਤਿ. ਗਚ੍ਛਨ੍ਤੇ ਕਾਲੇ ਕਲਿਯੁਗਰਾਜਾਨੋ ਅਧਮ੍ਮਿਕਾ ਹੋਨ੍ਤਿ ਤੇਸੁ ਅਧਮ੍ਮਿਕੇਸੁ ਰਾਜਾਮਚ੍ਚਾਦਯੋ ਅਧਮ੍ਮਿਕਾ ਹੋਨ੍ਤਿ ਤਥਾ ਰਟ੍ਠਜਨਪਦਵਾਸਿਨੋਪਿ ਅਧਮ੍ਮਿਕਾ ਏਤੇਸਂ ਅਧਮ੍ਮਿਕਤਾਯ ਨ ਦੇਵੋ ਸਮ੍ਮਾ ਵਸ੍ਸਤਿ, ਤਤੋ ਸਸ੍ਸਾਨਿ ਨ ਸਮ੍ਪਜ੍ਜਨ੍ਤਿ. ਤੇਸੁ ਸਮ੍ਪਜ੍ਜਨ੍ਤੇਸੁ ਪਚ੍ਚਯਦਾਯਕਾ ਭਿਕ੍ਖੁਸਙ੍ਘਸ੍ਸ ਪਚ੍ਚਯੇ ਦਾਤੁਂ ਨ ਸਕ੍ਕੋਨ੍ਤਿ. ਭਿਕ੍ਖੂ ਪਚ੍ਚਯੇਹਿ ਕਿਲਮਨ੍ਤਾ ਅਨ੍ਤੇਵਾਸਿਕੇ ਸਙ੍ਗਹੇਤੁਂ ਨ ਸਕ੍ਕੋਨ੍ਤਿ. ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਪਰਿਯਤ੍ਤਿ ਪਰਿਹਾਯਤਿ, ਅਤ੍ਥਵਸੇਨ ਧਾਰੇਤੁਂ ਨ ਸਕ੍ਕੋਨ੍ਤਿ, ਪਾਲ਼ਿਵਸੇਨੇਵ ਧਾਰੇਨ੍ਤਿ. ਤਤੋ ਕਾਲੇ ਗਚ੍ਛਨ੍ਤੇ ਪਾਲ਼ਿਮ੍ਪਿ ਸਕਲਂ ਧਾਰੇਤੁਂ ਨ ਸਕ੍ਕੋਨ੍ਤਿ ਪਠਮਂ ਅਭਿਧਮ੍ਮਪਿਟਕਂ ਪਰਿਹਾਯਤਿ. ਪਰਿਹਾਯਮਾਨਂ ਮਤ੍ਥਕਤੋ ਪਟ੍ਠਾਯ ਪਰਿਯਤ੍ਤਿ ਹਾਯਤਿ ਪਠਮਞ੍ਹਿ ਮਹਾਪਕਰਣਂ ਪਰਿਹਾਯਤਿ. ਤਸ੍ਮਿਂ ਪਰਿਹਾਯਮਾਨੇ ਯਮਕਂ, ਕਥਾਵਤ੍ਥੁ, ਪੁਗ੍ਗਲਪਞ੍ਞਤ੍ਤਿ, ਧਾਤੁਕਥਾ, ਵਿਭਙ੍ਗੋ, ਧਮ੍ਮਸਙ੍ਗਹੋਤਿ ਏਵਂ ਅਭਿਧਮ੍ਮਪਿਟਕੇ ਪਰਿਹੀਨੇ ਮਤ੍ਥਕਤੋ ਪਟ੍ਠਾਯ ਸੁਤ੍ਤਨ੍ਤਪਿਟਕਂ ਪਰਿਹਾਯਤਿ. ਪਠਮਞ੍ਹਿ ਅਙ੍ਗੁਤ੍ਤਰਨਿਕਾਯੋ ਪਰਿਹਾਯਤਿ. ਤਸ੍ਮਿਮ੍ਪਿ ਪਠਮਂ ਏਕਾਦਸਨਿਪਾਤੋ…ਪੇ… ਤਤੋ ਏਕਨਿਪਾਤੋਤਿ ਏਵਂ ਅਙ੍ਗੁਤ੍ਤਰੇ ਪਰਿਹੀਨੇ ਮਤ੍ਥਕਤੋ ਪਟ੍ਠਾਯ ਸਂਯੁਤ੍ਤਨਿਕਾਯੋ ਪਰਿਹਾਯਤਿ, ਪਠਮਂ ਮਹਾਵਗ੍ਗੋ ਪਰਿਹਾਯਤਿ. ਤਤੋ ਪਟ੍ਠਾਯ ਸਲ਼ਾਯਤਨਵਗ੍ਗੋ, ਖਨ੍ਧਵਗ੍ਗੋ, ਨਿਦਾਨਵਗ੍ਗੋ, ਸਗਾਥਾਵਗ੍ਗੋਤਿ ਏਵਂ ਸਂਯੁਤ੍ਤਨਿਕਾਯੇ ਪਰਿਹੀਨੇ ਮਤ੍ਥਕਤੋ ਪਟ੍ਠਾਯ ਮਜ੍ਝਿਮਨਿਕਾਯੋ ਪਰਿਹਾਯਤਿ ਪਠਮਞ੍ਹਿ ਉਪਰਿਪਣ੍ਣਾਸਕੋ ਪਰਿਹਾਯਤਿ. ਤਤੋ ਮਜ੍ਝਿਮਪਣ੍ਣਾਸਕੋ, ਤਤੋ ਮੂਲਪਣ੍ਣਾਸਕੋਤਿ ਏਵਂ ਮਜ੍ਝਿਮਨਿਕਾਯੇ ਪਰਿਹੀਨੇ ਮਤ੍ਥਕਤੋ ਪਟ੍ਠਾਯ ਦੀਘਨਿਕਾਯੋ ਪਰਿਹਾਯਤਿ, ਪਠਮਞ੍ਹਿ ਪਾਥਿਯਵਗ੍ਗੋ ਪਰਿਹਾਯਤਿ ਤਤੋ ਮਹਾਵਗ੍ਗੋ, ਤਤੋ ਖਨ੍ਧਕਵਗ੍ਗੋਤਿ ਦੀਘਨਿਕਾਯੇ ਪਰਿਹੀਨੇ ਸੁਤ੍ਤਨ੍ਤਪਿਟਕਂ ਪਰਿਹੀਨਂ ਨਾਮ ਹੋਤਿ. ਵਿਨਯਪਿਟਕੇਨ ਸਦ੍ਧਿਂ ਜਾਤਕਮੇਵ ਧਾਰੇਨ੍ਤਿ. ਵਿਨਯਪਿਟਕਂ ਲਜ੍ਜਿਨੋ ਧਾਰੇਨ੍ਤਿ. ਲਾਭਕਾਮਾ ਪਨ ਸੁਤ੍ਤਨ੍ਤੇ ਕਥਿਤੇਪਿ ਸਲ੍ਲਕ੍ਖੇਨ੍ਤਾ ਨਤ੍ਥੀਤਿ ਜਾਤਕਮੇਵ ਧਾਰੇਨ੍ਤਿ. ਗਚ੍ਛਨ੍ਤੇ ਕਾਲੇ ਜਾਤਕਮ੍ਪਿ ਧਾਰੇਤੁਂ ਨ ਸਕ੍ਕੋਨ੍ਤਿ. ਅਥ ਨੇਸਂ ਪਠਮਂ ਵੇਸ੍ਸਨ੍ਤਰਜਾਤਕਂ ਪਰਿਹਾਯਤਿ. ਤਤੋ ਪਟਿਲੋਮਕ੍ਕਮੇਨ ਪੁਣ੍ਣਕਜਾਕਤਕਂ, ਮਹਾਨਾਰਦਕਸ੍ਸਪਜਾਤਕਂ ਪਰਿਹਾਯਤਿ. ਵਿਨਯਪਿਟਕਮੇਵ ਧਾਰੇਨ੍ਤਿ. ਗਚ੍ਛਨ੍ਤੇ ਕਾਲੇ ਤਮ੍ਪਿ ਮਤ੍ਥਕਤੋ ਪਰਿਹਾਯਤਿ ਪਠਮਞ੍ਹਿ ਪਰਿਵਾਰੋ ਪਰਿਹਾਯਤਿ, ਤਤੋ ਖਨ੍ਧਕੋ ਭਿਕ੍ਖੁਨੀਵਿਭਙ੍ਗੋ ਮਹਾਵਿਭਙ੍ਗੋਤਿ ਅਨੁਕ੍ਕਮੇਨ ਉਪੋਸਥਕ੍ਖਨ੍ਧਕਮਤ੍ਤਮੇਵ ਧਾਰੇਨ੍ਤਿ, ਤਦਾ ਪਰਿਯਤ੍ਤਿ ਅਨਨ੍ਤਰਹਿਤਾਵ ਹੋਤਿ. ਯਾਵ ਪਨ ਮਨੁਸ੍ਸੇਸੁ ਚਤੁਪ੍ਪਦਿਕਗਾਥਾਪਿ ਪਵਤ੍ਤਤਿ, ਤਾਵ ਪਰਿਯਤ੍ਤਿ ਅਨਨ੍ਤਰਹਿਤਾਵ ਹੋਤਿ. ਯਦਾ ਸਦ੍ਧੋ ਪਸਨ੍ਨੋ ਰਾਜਾ ਹਤ੍ਥਿਕ੍ਖਨ੍ਧੇ ਸੁਵਣ੍ਣਚਙ੍ਕੋਟਕਮ੍ਹਿ ਸਹਸ੍ਸਤ੍ਥਵਿਕਂ ਠਪਾਪੇਤ੍ਵਾ ‘‘ਬੁਦ੍ਧੇਹਿ ਕਥਿਤਂ ਚਤੁਪ੍ਪਦਿਕਂ ਗਾਥਂ ਜਾਨਨ੍ਤੋ ਇਮਂ ਸਹਸ੍ਸਂ ਗਣ੍ਹਤੂ’’ਤਿ ਨਗਰੇ ਭੇਰਿਂ ਚਰਾਪੇਤ੍ਵਾ ਗਣ੍ਹਕਂ ਅਲਭਿਤ੍ਵਾ ਏਕਵਾਰਂ ਚਰਾਪਿਤੇ ਨ ਸੁਣਨ੍ਤਾਪਿ ਹੋਨ੍ਤਿ ਅਸੁਣਨ੍ਤਾਪਿ, ਯਾਵ ਤਤਿਯਂ ਚਰਾਪੇਤ੍ਵਾ ਗਣ੍ਹਕਂ ਅਲਭਿਤ੍ਵਾ ਰਾਜਪੁਰਿਸਾ ਸਹਸ੍ਸਤ੍ਥਵਿਕਂ ਪੁਨ ਰਾਜਕੁਲਂ ਪਵੇਸੇਨ੍ਤਿ, ਤਦਾ ਪਰਿਯਤ੍ਤਿਅਨ੍ਤਰਹਿਤਾ ਨਾਮ ਹੋਤਿ. ਏਵਂ ਪਰਿਯਤ੍ਤਿਯਾ ਅਨ੍ਤਰਹਿਤਾਯ ਪਟਿਪਤ੍ਤਿਪਿ ਪਟਿਵੇਧੋਪਿ ਅਨ੍ਤਰਹਿਤੋਵ ਹੋਤਿ. ਸਦ੍ਧਮ੍ਮਸਵਨਸ੍ਸ ਦੁਲ੍ਲਭਭਾਵੋ ਧਮ੍ਮਸੋਣ੍ਡਕਵਤ੍ਥੁਨਾ ਦੀਪੇਤਬ੍ਬੋ ਅਮ੍ਹਾਕਂ ਕਿਰ ਸਮ੍ਮਾਸਮ੍ਬੁਦ੍ਧੋ ਕਸ੍ਸਪਸਮ੍ਮਾਸਮ੍ਬੁਦ੍ਧਸ੍ਸ ਧਮ੍ਮਰਾਜਸ੍ਸ ਸਾਸਨਨ੍ਤਰਧਾਨਤੋ ਨਚਿਰੇਨੇਵ ਕਾਲੇਨ ਬਾਰਾਣਸਿਰਞ੍ਞੋ ਪੁਤ੍ਤੋ ਧਮ੍ਮਸੋਣ੍ਡਕਰਾਜਕੁਮਾਰੋ ਹੁਤ੍ਵਾ ਪਿਤੁਅਚ੍ਚਯੇਨ ਰਜ੍ਜੇ ਪਤਿਟ੍ਠਾਯ ਕਸ੍ਸਪਦਸਬਲੇਨ ਦੇਸਿਤਂ ਧਮ੍ਮਂ ਸੋਤੁਕਾਮੋ ਹੁਤ੍ਵਾ ਮਾਸਮਤ੍ਤਂ ਰਜ੍ਜਂ ਕਤ੍ਵਾ ਅਮ੍ਹਾਕਂ ਸਮ੍ਮਾਸਮ੍ਬੁਦ੍ਧੋ ਇਮਸ੍ਮਿਂ ਯੇਵ ਭਦ੍ਦਕਪ੍ਪੇ ਰਜ੍ਜਂ ਕਾਰੇਤ੍ਵਾ ਦੇਵਨਗਰਸਦਿਸੇ ਬਾਰਾਣਸਿਨਗਰੇ ਚਕ੍ਕਵਤ੍ਤਿਰਜ੍ਜਸਦਿਸਂ ਰਜ੍ਜਂ ਕਰੋਨ੍ਤੋ ਏਵਂ ਚਿਨ੍ਤੇਸਿ… ‘‘ਮਯ੍ਹਂ ਏਵਰੂਪਂ ਰਜ੍ਜਂ ਕਿਂ ਵਿਲਾਸਂ ਰਜ੍ਜਾਨੁਭਾਵਂ ਸਦ੍ਧਮ੍ਮਵਿਯੋਗੇਨ, ਦਿਵਾਕਰਵਿਰਹਿਤੋ ਆਕਾਸੋ ਵਿਯ, ਸਸਙ੍ਕਵਿਰਹਿਤਰਤ੍ਤਿ ਵਿਯ, ਦਾਠਾਵਿਰਹਿਤਗਜੋ ਵਿਯ, ਵੇਲਨ੍ਤਵਿਰਹਿਤਮਹਾਸਮੁਦ੍ਦੋ ਵਿਯ ਚਕ੍ਖੁਵਿਰਹਿਤ ਸੁਸਜ੍ਜਿਤਵਦਨਂ ਵਿਯ, ਸੁਗਨ੍ਧਵਿਰਹਿਤਪਾਰਿਛਤ੍ਤਪੁਪ੍ਫਂ ਵਿਯ, ਚਤੁਅਕ੍ਖਰਨਿਯਮਿਤਧਮ੍ਮਦੇਸਨਾਵਿਯੋਗੇਨ ਮਯ੍ਹਂ ਇਦਂ ਰਜ੍ਜਂ ਨ ਸੋਭਤੀ’’ਤਿ ਚਿਨ੍ਤੇਤ੍ਵਾ ਸੁਵਣ੍ਣਚਙ੍ਕੋਟਕੇਨ ਸਹਸ੍ਸਤ੍ਥਵਿਕਂ ਭਣ੍ਡਕਂ ਸੁਸਜ੍ਜਿਤਂ ਮਙ੍ਗਲਹਤ੍ਥਿਕੁਮ੍ਭੇ ਠਪੇਤ੍ਵਾ ਬਾਰਾਣਸੀਨਗਰੇ ਮਹਾਵੀਥਿਯਂ ਭੇਰਿਂ ਚਰਾਪੇਤਿ ‘‘ਏਕਪਦਿਕਂ ਵਾ ਦ੍ਵਿਪਦਿਕਂ ਵਾ ਤਿਪਦਿਕਂ ਵਾ ਚਤੁਪ੍ਪਦਿਕਂ ਵਾ ਧਮ੍ਮਪਦਂ ਜਾਨਨ੍ਤਸ੍ਸ ਦਮ੍ਮੀ’’ਤਿ ਏਵਂ ਭੇਰਿਂ ਚਰਾਪੇਤ੍ਵਾ ਧਮ੍ਮਜਾਨਨਕਂ ਅਲਭਿਤ੍ਵਾ ਪੁਨਪ੍ਪੁਨਂ ਦ੍ਵਿਸਹਸ੍ਸਂ ਤਿਸਹਸ੍ਸਂ ਯਾਵ ਸਤਸਹਸ੍ਸਂ ਕੋਟਿ ਦ੍ਵੇ ਸਹਸ੍ਸਕੋਟਿ, ਸਤਸਹਸ੍ਸਕੋਟਿ ਗਾਮਨਿਗਮਜਨਪਦਸੇਨਾਪਤਿਟ੍ਠਾਨਂ ਉਪਰਾਜਟ੍ਠਾਨਂ. ਪਰਿਯੋਸਾਨੇ ਧਮ੍ਮਦੇਸਕਂ ਅਲਭਿਤ੍ਵਾ ਅਤ੍ਤਨੋ ਸੁਵਣ੍ਣਪੀਠਕਂ ਸੇਤਚ੍ਛਤ੍ਤਂ ਚਜਿਤ੍ਵਾਪਿ ਧਮ੍ਮਦੇਸਕਂ ਅਲਭਿਤ੍ਵਾ ਰਜ੍ਜਸਿਰਿਂ ਪਹਾਯ ਅਤ੍ਤਾਨਂ ਚਜਿਤ੍ਵਾ ‘‘ਧਮ੍ਮਦੇਸਕਸ੍ਸ ਦਾਸੋ ਹੁਤ੍ਵਾਪਿ ਧਮ੍ਮਂ ਸੋਸ੍ਸਾਮੀ’’ਤਿ ਵਤ੍ਵਾ ਏਵਮ੍ਪਿ ਧਮ੍ਮ ਦੇਸਕਂ ਅਲਭਿਤ੍ਵਾ ਵਿਪ੍ਪਟਿਸਾਰੀ ਹੁਤ੍ਵਾ ‘‘ਕਿਂ ਮੇ ਸਦ੍ਧਮ੍ਮਵਿਯੋਗੇਨ ਰਜ੍ਜੇਨਾਤਿ ਅਮਚ੍ਚਾਨਂ ਰਜ੍ਜਂ ਨਿਯ੍ਯਾਤੇਤ੍ਵਾ ਸਦ੍ਧਮ੍ਮਗਵੇਸਕੋ ਹੁਤ੍ਵਾ ਧਮ੍ਮਸੋਣ੍ਡਕਮਹਾਰਾਜਾ ਮਹਾਵਨਂ ਪਾਵਿਸਿ ਧਮ੍ਮਸੋਣ੍ਡਕਮਹਾਰਾਜਸ੍ਸ ਸਦ੍ਧਮ੍ਮਸਵਨਂ ਸਨ੍ਧਾਯ ਪਵਿਟ੍ਠਕ੍ਖਕੇ ਸਕ੍ਕਦੇਵਮਹਾਰਾਜਸ੍ਸ ਵੇਜਯਨ੍ਤਪਾਸਾਦੋ ਸਹੇਵ ਕਿਣ੍ਣਿਕਾਯ ਕਮ੍ਪੋ ਅਹੋਸਿ, ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਅਹੋਸਿ. ਸਕ੍ਕੋਦੇਵਰਾਜਾ ਕੇਨਕਾਰਣੇਨ ਪਣ੍ਡੁਕਮ੍ਬਲਸਿਲਾਸਨਂ ਉਣ੍ਹਾਕਾਰਂ ਅਹੋਸੀ’’ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਸਹਸ੍ਸਨੇਤ੍ਤੇਨ ਦੇਵਮਨੁਸ੍ਸੇਸੁ ਵਿਤ੍ਥਾਰੇਤ੍ਵਾ ਓਲੋਕੇਨ੍ਤੋ ਧਮ੍ਮਗਵੇਸਕੋ ਹੁਤ੍ਵਾ ਵਨਂ ਪਵਿਟ੍ਠਂ ਧਮ੍ਮਸੋਣ੍ਡਕਮਹਾਰਾਜਾਨਂ ਦਿਸ੍ਵਾ ਚਿਨ੍ਤੇਸਿ… ‘‘ਅਜ੍ਜ ਮੇ ਅਤ੍ਤਾਨਮ੍ਪਿ ਜਹਾਯ ਰਕ੍ਖਸਵੇਸਂ ਮਾਪੇਤ੍ਵਾ ਏਤਂ ਅਨਿਚ੍ਚਪਰਿਦੀਪਨਂ ਜਾਤਿਜਰਾਬ੍ਯਾਧਿਮਰਣਂ ਸਕਲਸਰੀਰੇ ਦੋਸਂ ਦਸ੍ਸੇਤ੍ਵਾ ਧਮ੍ਮਂ ਦੇਸੇਤ੍ਵਾ ਏਤਂ ਸਕਰਜ੍ਜੇਯੇਵ ਪਤਿਟ੍ਠਾਪੇਤਬ੍ਬ’’ਨ੍ਤਿ ਚਿਨ੍ਤੇਤ੍ਵਾ ਸਕ੍ਕੋ ਦੇਵਰਾਜਾ ਯਕ੍ਖਸਰੂਪਂ ਮਾਪੇਤ੍ਵਾ ਬੋਧਿਸਤ੍ਤਸ੍ਸ ਅਭਿਮੁਖੋ ਅਵਿਦੂਰੇ ਅਤ੍ਤਾਨਂ ਦਸ੍ਸੇਸਿ. ਤਂ ਦਿਸ੍ਵਾ ਧਮ੍ਮਸੋਣ੍ਡਕਮਹਾਰਾਜਾ ਏਵਂ ਚਿਨ੍ਤੇਸਿ… ‘‘ਏਵਂਰੂਪੋ ਨਾਮ ਰਕ੍ਖਸੋ ਧਮ੍ਮਂ ਜਾਨੇਯ੍ਯਾ’’ਤਿ, ਚਿਨ੍ਤੇਤ੍ਵਾ ਅਵਿਦੂਰੇ ਠਾਨੇ ਠਤ੍ਵਾ ਪੁਚ੍ਛਾਮੀਤਿ ਰਕ੍ਖਸੇਨ ਸਦ੍ਧਿਂ ਸਲ੍ਲਪਨ੍ਤੋ ਆਹ ‘‘ਸਾਮਿਪੁਞ੍ਞਦੇਵਰਾਜ ਇਮਸ੍ਮਿਂ ਪਨ ਵਨਘਨੇ ਵਸਨਕਦੇਵਰਾਜਾ ਕਿਂ ਨੁਖੋ ਧਮ੍ਮਂ ਜਾਨਾਸੀ’’ਤਿ, ਦੇਵਤਾ ‘‘ਮਹਾਰਾਜ ਧਮ੍ਮਂ ਜਾਨਾਮੀ’’ਤਿ ਆਹ. ‘‘ਯਦਿ ਧਮ੍ਮਂ ਜਾਨਾਸਿ, ਮਯ੍ਹਂ ਧਮ੍ਮਕਥਂ ਕਥੇਥਾ’’ਤਿ ਆਹ. ‘‘ਅਹਂ ਤੁਯ੍ਹਂ ਧਮ੍ਮਂ ਕਥੇਸ੍ਸਾਮਿ, ਤ੍ਵਂ ਮਯ੍ਹਂ ਕੀਦਿਸਂ ਧਮ੍ਮਕਥਿਕਸ੍ਸ ਸਕ੍ਕਾਰਂ ਕਰਿਸ੍ਸਸੀ’’ਤਿ ਆਹ. ‘‘ਏਵਂ ਸਨ੍ਤੇ ਮਯ੍ਹਂ ਧਮ੍ਮਂ ਕਥੇਤ੍ਵਾ ਪਚ੍ਛਾ ਮਯ੍ਹਂ ਸਰੀਰੇ ਮਂਸਂ ਖਾਦਿਸ੍ਸਸੀ’’ਤਿ ਆਹ. ‘‘ਅਹਂ ਮਹਾਰਾਜ ਛਾਤੋ ਹੁਤ੍ਵਾ ਧਮ੍ਮਂ ਕਥੇਤੁਂ ਨ ਸਕ੍ਕੋਮੀ’’ਤਿ ਆਹ. ‘‘ਯਦਿ ਤੁਮ੍ਹੇ ਪਠਮਂ ਮਂਸਂ ਖਾਦਥ, ਧਮ੍ਮਂ ਕੋ ਸੁਣਿਸ੍ਸਤੀ’’ਤਿ ਆਹ. ਪੁਨ ਸੋ ਰਕ੍ਖਸੋ ‘‘ਨਾਹਂ ਧਮ੍ਮਂ ਦੇਸੇਤੁਂ ਸਕ੍ਕੋਮੀ’’ਤਿ. ਪੁਨ ਰਾਜਾ ‘‘ਮਯ੍ਹਂ ਧਮ੍ਮਪਟਿਲਾਭਞ੍ਚ ਤੁਮ੍ਹਾਕਂ ਮਂਸਪਟਿਲਾਭਞ੍ਚ ਤੁਮ੍ਹੇ ਜਾਨਿਤ੍ਵਾ ਮਯ੍ਹਂ ਧਮ੍ਮਂ ਦੇਸੇਥਾ’’ਤਿ ਆਹ. ਅਥ ਸਕ੍ਕੋ ਦੇਵਰਾਜਾ ‘‘ਸਾਧੁ ਹੋਥਾ’’ਤਿ ਵਤ੍ਵਾ ਅਵਿਦੂਰੇ ਠਾਨੇ ਉਬ੍ਬੇਧੇਨ ਤਿਗਾਵੁਤਮਤ੍ਤਂ ਮਹਨ੍ਤਂ ਅਞ੍ਜਨਪਬ੍ਬਤਂ ਮਾਪੇਤ੍ਵਾ ਏਵਮਾਹ… ‘‘ਸਚੇ ਮਹਾਰਾਜ ਇਮਂ ਪਬ੍ਬਤਮੁਦ੍ਧਨਿਂ ਆਰੂਯ੍ਹ ਆਕਾਸਾ ਉਪ੍ਪਤਿਤ੍ਵਾ ਤ੍ਵਂ ਮਮ ਮੁਖੇ ਪਤਿਸ੍ਸਸਿ, ਅਹਂ ਤੇ ਆਕਾਸਗਤਕਾਲੇ ਧਮ੍ਮਂ ਦੇਸੇਸ੍ਸਾਮਿ, ਏਵਂ ਸਨ੍ਤੇ ਤੁਯ੍ਹਞ੍ਚ ਧਮ੍ਮਪ੍ਪਲਾਭੋ ਮਯ੍ਹਞ੍ਚ ਮਂਸਪਟਿਲਾਭੋ ਭਵਿਸ੍ਸਤੀ’’ਤਿ ਆਹ. ਤਸ੍ਸ ਕਥਂ ਸੁਤ੍ਵਾ ਧਮ੍ਮਸੋਣ੍ਡਕਮਹਾਰਾਜਾ ‘‘ਅਨਮਤਗ੍ਗੇ ਸਂਸਾਰੇ ਪੁਰਿਸੋ ਹੁਤ੍ਵਾ ਅਧਮ੍ਮਸਮਙ੍ਗੀ ਹੁਤ੍ਵਾ ਅਧਮ੍ਮਸ੍ਸੇਵ ਅਤ੍ਥਾਯ ਪਾਣਾਤਿਪਾਤੋ ਅਦਿਨ੍ਨਾਦਾਨੋ ਕਾਮੇਸੁਮਿਚ੍ਛਾਚਾਰੋ ਸੂਕਰਿਕੋ ਓਰਬ੍ਭਿਕੋ ਸਾਕੁਣਿ ਕੋ ਚੋਰੋ ਪਰਦਾਰਿਕੋ ਤਂ ਗਹੇਤ੍ਵਾ ਸੀਸਚ੍ਛਿਨ੍ਨਾਨਂ ਲੋਹਿਤਂ ਚਤੂਸੁ ਮਹਾਸਮੁਦ੍ਦੇਸੁ ਉਦਕਤੋਪਿ ਬਹੁਤਰਂ ਮਾਤਾਪਿਤੁਆਦੀਨਮ੍ਪਿ ਮਨਾਪਾਨਂ ਅਤ੍ਥਾਯ ਰੋਦਨ੍ਤਾਨਂ ਅਸ੍ਸੁ ਚਤੂਸੁਮਹਾਸਮੁਦ੍ਦੇਸੁ ਉਦਕਤੋਪਿ ਬਹੁਤਰਂ, ਇਮਂ ਪਨ ਸਰੀਰਂ ਧਮ੍ਮਸ੍ਸ ਅਤ੍ਥਾਯ ਵਿਕ੍ਕਿਣਾਮਿ ਤਂ ਮਹਪ੍ਫਲਞ੍ਚ ਮਨਾਪਞ੍ਚਾ’’ਤਿ ਚਿਨ੍ਤੇਤ੍ਵਾ ‘‘ਸਾਧੁ ਮਾਰਿਸ ਏਵਂ ਕਰੋਮੀ’’ਤਿ ਪਬ੍ਬਤਂ ਆਰੂਯ੍ਹ ਪਬ੍ਬਤਗ੍ਗੇ ਠਿਤੋ ‘‘ਮਮ ਰਜ੍ਜੇਨ ਸਦ੍ਧਿਂ ਮਯ੍ਹਂ ਸਜੀਵਸਰੀਰਂ ਸਦ੍ਧਮ੍ਮਸ੍ਸਤ੍ਥਾਯ ਦਸ੍ਸਾਮੀ’’ਤਿ ਸੋਮਨਸ੍ਸੋ ਹੁਤ੍ਵਾ ‘‘ਧਮ੍ਮਂ ਕਥੇਥਾ’’ਤਿ ਸਦ੍ਧਮ੍ਮਤ੍ਥਾਯ ਜੀਵਿਤਂ ਪਰਿਚ੍ਚਜਿਤ੍ਵਾ ਆਕਾਸਤੋ ਉਪ੍ਪਤਿਤ੍ਵਾ ਧਮ੍ਮਂ ਕਥੇਥਾਤਿ ਆਹ. ਅਥ ਸਕ੍ਕੋ ਦੇਵਰਾਜਾ ਸਕਤ੍ਤਭਾਵੇਨ ਸਬ੍ਬਾਲਙ੍ਕਾਰੇਹਿ ਪਟਿਮਣ੍ਡਿਤੋ ਅਤਿਵਿਯ ਸੋਤੁਂ ਸੋਮਨਸ੍ਸੋ ਆਕਾਸਤੋ ਪਤਨ੍ਤਂ ਦਿਬ੍ਬਫਸ੍ਸੇਨ ਪਰਾਮਸਨ੍ਤੋ ਉਰੇਨ ਪਟਿਗ੍ਗਣ੍ਹਿਤ੍ਵਾ ਦੇਵਲੋਕਂ ਨੇਤ੍ਵਾ ਪਣ੍ਡੁਕਮ੍ਬਲਸਿਲਾਸਨੇ ਨਿਸੀਦਾਪੇਤ੍ਵਾ ਮਾਲਾਗਨ੍ਧਾਦੀਹਿ ਪੂਜੇਤ੍ਵਾ ਧਮ੍ਮਸੋਣ੍ਡਕਮਹਾਰਾਜਸ੍ਸ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ.

‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ’’ਤਿ.

ਏਵਂ ਸਕ੍ਕੋ ਧਮ੍ਮਸੋਣ੍ਡਕਮਹਾਰਾਜਸ੍ਸ ਧਮ੍ਮਂ ਦੇਸੇਤ੍ਵਾ ਦੇਵਲੋਕਸਮ੍ਪਤ੍ਤਿਂ ਦਸ੍ਸੇਤ੍ਵਾ ਦੇਵਲੋਕਤੋ ਆਨੇਤ੍ਵਾ ਸਕਰਜ੍ਜੇ ਪਤਿਟ੍ਠਾਪੇਤ੍ਵਾ ਅਪ੍ਪਮਾਦੇਨ ਓਵਦਿਤ੍ਵਾ ਦੇਵਲੋਕਮੇਵ ਅਗਮਾਸਿ ਏਵਂ ਸਦ੍ਧਮ੍ਮਸਵਨਸ੍ਸਾਪਿ ਦੁਲ੍ਲਭਭਾਵੋ ਵੇਦਿਤਬ੍ਬੋ. ਏਵਂ ਪਰਿਯਤ੍ਤਿਅਨ੍ਤਰਧਾਨੇਨ ਪਟਿਪਤ੍ਤਿ ਪਟਿਵੇਧਾਪਿ ਅਨ੍ਤਰਧਾਯਨ੍ਤਿ. ਏਤ੍ਥ ਚ ਤੀਣਿ ਪਰਿਨਿਬ੍ਬਾਨਾਨਿ ਵੇਦਿਤਬ੍ਬਾਨਿ ਕਤਮਾਨਿ ਤੀਣਿ ਪਰਿਨਿਬ੍ਬਾਨਾਨਿ. ਕਿਲੇਸਪਰਿਨਿਬ੍ਬਾਨਂ, ਖਨ੍ਧਪਰਿਨਿਬ੍ਬਾਨਂ, ਧਾਤੁਪਰਿਨਿਬ੍ਬਾਨਨ੍ਤਿ. ਤਤ੍ਥ ਕਿਲੇਸਪਰਿਨਿਬ੍ਬਾਨਂ ਬੋਧਿਮਣ੍ਡੇਯੇਵ ਹੋਤਿ, ਭਗਵਾ ਹਿ ਬੋਧਿਮਣ੍ਡੇਯੇਵ ਵੀਰਿਯਪਾਦੇਹਿ ਸੀਲਪਥਵਿਯਂ ਪਤਿਟ੍ਠਾਯ ਸਦ੍ਧਾਹਤ੍ਥੇਨ ਕਮ੍ਮਕ੍ਖਯਕਰਂ ਞਾਣਫਰਸੁਂ ਗਹੇਤ੍ਵਾ ਸਬ੍ਬੋ ਲੋਭਦੋਸਮੋਹਵਿਪਰੀਤਮਨਸਿਕਾਰਅਹਿਰੀਕਾਨੋਤ੍ਤਪ੍ਪਕੋਧੂਪਨਾਹਮਕ੍ਖਪਲ਼ਾਸ- ਇਸ੍ਸਾਮਚ੍ਛਰਿਯਮਾਯਾਸਾਠੇਯ੍ਯਥਮ੍ਭਸਾਰਮ੍ਭਮਾਨਾਤਿ ਮਾਨਮਦਪਮਾਦਤਣ੍ਹਾ’ਵਿਜ੍ਜਾਤਿਵਿਧਾਕੁਸਲਮੂਲਦੁਚ੍ਚਰਿਤਸਂਕਿਲੇਸਮਲਵਿਸਮਸਞ੍ਞਾਵਿਤਕ੍ਕ ਪਪਞ੍ਚਚਤੁਬ੍ਬਿਧਵਿਪਰਿਯੇਸਆਸਵਗਨ੍ਥਓਘਯੋਗਾ’ਗਤਿਗਨ੍ਥੁ’ ਪਾਦਾਨਪਞ੍ਚਚੇਤੋਖਿਲਵਿਨਿਬਨ੍ਧਨੀਵਰਣਾ’ਭਿਨਨ੍ਦਨ ਛਵਿਵਾਦਮੂਲਤਣ੍ਹਾਕਾਯਸਤ੍ਤਾਨੁਸਯ ਅਟ੍ਠਮਿਚ੍ਛਤ੍ਤਨਵਤਣ੍ਹਾਮੂਲਕਦਸਾਕੁਸਲਕਮ੍ਮਪਥ ਦ੍ਵਾਸਟ੍ਠਿਦਿਟ੍ਠਿਗਤ ਅਟ੍ਠਸਤਤਣ੍ਹਾਵਿਚਰਿਤਪ੍ਪ ਭੇਦ ਸਬ੍ਬਦਰਥਪਰਿਲ਼ਾਹਕਿਲੇਸਸਤਸਹਸ੍ਸਾਨਿ, ਸਙ੍ਖੇਪਤੋ ਵਾ ਪਞ੍ਚ ਕਿਲੇਸਅਭਿਸਙ੍ਖਾਰਖਨ੍ਧਮਚ੍ਚੁਦੇਵਪੁਤ੍ਤਮਾਰੇ ਅਸੇਸਤੋ ਹਤਾ ਵਿਹਤਾ ਅਨਭਾਵਂਕਤਾ ਤਸ੍ਮਾ ਸਬ੍ਬੇਪਿ ਕਿਲੇਸਾ ਬੋਧਿਮਣ੍ਡੇਯੇਵ ਨਿਬ੍ਬਾਨਂ ਨਿਰੋਧਂ ਗਚ੍ਛਨ੍ਤੀਤਿ ਕਿਲੇਸਨਿਬ੍ਬਾਨਂ ਬੋਧਿਮਣ੍ਡੇਯੇਵ ਹੋਤਿ ਏਤ੍ਥ ਚ ਬੋਧੀਤਿ ਅਰਹਤ੍ਤਮਗ੍ਗਞ੍ਞਾਣਂ ਅਧਿਪ੍ਪੇਤਂ ਤਥਾ ਹਿ ਸਬ੍ਬੇਸਮ੍ਪਿ ਬੁਦ੍ਧਪਚ੍ਚੇਕਬੁਦ੍ਧਅਰਿਯਸਾਵਕਾਨਂ ਅਰਹਤ੍ਤਮਗ੍ਗਕ੍ਖਣੇਯੇਵ ਸਬ੍ਬੇਪਿ ਕਿਲੇਸਾ ਅਸੇਸਂ ਨਿਰੋਧਂ ਨਿਬ੍ਬਾਨਂ ਗਚ੍ਛਨ੍ਤਿ ਤੇਪਿ ਬੁਦ੍ਧਾ ਉਗ੍ਘਟਿਤਵਿਞ੍ਞੂਵਿਭਜ੍ਜਿਤਞ੍ਞੂਨੇਯ੍ਯਵਸੇਨ ਤਿਵਿਧਾ ਹੋਨ੍ਤਿ ਵੁਤ੍ਤਞ੍ਹੇਤਂ ਜਾਤਤ੍ਤਕੀਸੋਤਤ੍ਤਕੀਨਿਦਾਨੇ.

‘‘ਉਗ੍ਘਟਿਤਞ੍ਞੁਨਾਮਕੋ, ਵਿਭਜ੍ਜਿਤਞ੍ਞੁਨੋ ਦੁਵੇ;

ਤਤਿਯੋ ਨੇਯ੍ਯੋ ਨਾਮੇਨ, ਬੋਧਿਸਤ੍ਤੋ ਤਿਧਾ ਮਤੋ.

ਉਗ੍ਘਟਿਤਞ੍ਞੁਬੋਧਿਸਤ੍ਤੋ, ਪਞ੍ਞਾਧਿਕੋਤਿ ਨਾਮਸੋ;

ਵਿਭਜ੍ਜਿਤਞ੍ਞੁਬੋਧਿਸਤ੍ਤੋ, ਵੁਤ੍ਤੋ ਵੀਰਿਯਾਧਿਕੋ.

ਮਤੋ ਨੇਯ੍ਯੋ ਸਦ੍ਧਾਧਿਕੋ ਨਾਮ, ਬੋਧਿਸਤ੍ਤਾ ਇਮੇ ਤਯੋ;

ਕਪ੍ਪੇਚ ਸਤਸਹਸ੍ਸੇ, ਚਤੁਰੋ ਚ ਅਸਙ੍ਖ੍ਯੇਯ੍ਯੇ.

ਪੂਰੇਤ੍ਵਾ ਬੋਧਿਸਮ੍ਭਾਰੇ, ਲਦ੍ਧਬ੍ਯਾਕਰਣੋ ਪੁਰੇ;

ਉਗ੍ਘਟਿਤਞ੍ਞੁਬੋਧਿਸਤ੍ਤੋ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ.

ਅਟ੍ਠਮੇ ਚ ਅਸਙ੍ਖ੍ਯੇਯ੍ਯੇ, ਕਪ੍ਪੇ ਚ ਸਤਸਹਸ੍ਸੇ;

ਪੂਰੇਤ੍ਵਾ ਬੋਧਿਸਮ੍ਭਾਰੇ, ਲਦ੍ਧਬ੍ਯਾਕਰਣੋ ਪੁਰੇ.

ਵਿਪਞ੍ਚਿਤਞ੍ਞੁਬੋਧਿਸਤ੍ਤੋ, ਪਤ੍ਤੋ ਸਮ੍ਬੋਧਿਮੁਤ੍ਤਮਂ;

ਨੇਯ੍ਯੋ ਤੁ ਬੋਧਿਸਤ੍ਤੋ ਚ, ਸੋਲ਼ਸੇ ਅਸਙ੍ਖ੍ਯੇਯ੍ਯੇ.

ਕਪ੍ਪੇ ਚ ਸਤਸਹਸ੍ਸੇ, ਲਦ੍ਧਬ੍ਯਾਕਰਣੋ ਪੁਰੇ;

ਪੂਰੇਤ੍ਵਾ ਬੋਧਿਸਮ੍ਭਾਰੇ, ਪਤ੍ਤੋ ਸਮ੍ਬੋਧਿਮੁਤ੍ਤਮ’’ ਨ੍ਤਿ.

ਸੁਤ੍ਤਨਿਪਾਤਅਪਦਾਨਟ੍ਠਕਥਾਸੁ ਪਨ ‘‘ਬੁਦ੍ਧਾਨਂ ਆਨਨ੍ਦ ਹੇਟ੍ਠਿਮਪਰਿਚ੍ਛੇਦੇਨ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚ, ਮਜ੍ਝਿਮਪਰਿਚ੍ਛੇਦੇਨ ਅਟ੍ਠ ਅਸਙ੍ਖ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚ, ਉਪਰਿਮਪਰਿਚ੍ਛੇਦੇਨ ਸੋਲ਼ਸਾਸਙ੍ਖ੍ਯ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚ. ਏਤੇਚ ਪਞ੍ਞਾਧਿਕਸਦ੍ਧਾਧਿਕਵੀਰਿਯਾਧਿਕਵਸੇਨ ਵੇਦਿਤਬ੍ਬਾਤਿ ਵੁਤ੍ਤਂ ਤੇਸੁ ਪਞ੍ਞਾਧਿਕੋ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚ, ਸਦ੍ਧਾਧਿਕੋ ਅਟ੍ਠਅਸਙ੍ਖੇਯ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚ, ਵੀਰਿਯਾਧਿਕੋ ਸੋਲ਼ਸਅਸਙ੍ਖ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚਾਤਿ ਵੇਦਿਤਬ੍ਬਂ. ਤਤ੍ਥ ਪਞ੍ਞਾਧਿਕੋ ਯੋਨਿਗਤਿਵਿਞ੍ਞਾਣਟ੍ਠਿਤਿਸਤ੍ਤਾਵਾਸੇਸੁ ਸਂਸਰਨ੍ਤੋਪਿ ਪਞ੍ਞਾਬਹੁਲ੍ਲਵਸੇਨ ਸਮ੍ਪਨ੍ਨਜ੍ਝਾਸਯ ਸਮ੍ਭਵਤੋ ਖਿਪ੍ਪਞ੍ਞੇਵ ਤਸ੍ਸ ਸਮ੍ਬੋਧਿ. ਸਦ੍ਧਾਧਿਕੋ ਪਨ ਮਨ੍ਦਪਞ੍ਞਤ੍ਤਾ ਅਸ੍ਸਦ੍ਦਹਿਤਬ੍ਬੇਪਿ ਸਦ੍ਦਹਤਿ, ਤਸ੍ਮਾ ਤਸ੍ਸ ਮਨ੍ਦਞ੍ਞੇਵ ਸਮ੍ਬੋਧਿ. ਵੀਰਿਯਾਧਿਕੋ ਪਨ ਉਭਯਮਨ੍ਦੋ ਅਸ੍ਸਦ੍ਦਹਿਤਬ੍ਬਮ੍ਪਿ ਸਦ੍ਦਹਤਿ, ਅਕਤ੍ਤਬ੍ਬਮ੍ਪਿ ਕਰੋਤਿ, ਰਾਜਾ ਪਸ੍ਸੇਨਦੀਕੋਸਲੋ ਯਥਾ ਸੋ ਹਿ ਸਬ੍ਬਞ੍ਞੁਬੁਦ੍ਧੇ ਧਰਮਾਨੇਯੇਵ ਅਗਮਨੀਯਮ੍ਪਿ ਪਰਦਾਰਂ ਗਨ੍ਤੁਂ ਚਿਤ੍ਤਂ ਉਪ੍ਪਾਦੇਤ੍ਵਾ ਪਰਂ ਜੀਵਿਤਾ ਵੋਰੋਪੇਤੁਂ ਆਰਦ੍ਧੋ ਨੇਰਯਿਕਾਨਂ ਵਿਰਵਨ੍ਤਾਨਂ ਦੁ-ਸ-ਨ-ਸੋਤਿ ਸਦ੍ਦਮ੍ਪਿ ਸੁਤ੍ਵਾ ਅਤਿਵਿਮੂਲ਼੍ਹੋ ਸਬ੍ਬਞ੍ਞੁਬੁਦ੍ਧਂ ਠਪੇਤ੍ਵਾ ਮਿਚ੍ਛਾਦਿਟ੍ਠਿਬ੍ਰਾਹ੍ਮਣਂ ਪੁਚ੍ਛਿਤ੍ਵਾ ਤਸ੍ਸ ਵਚਨੇਨ ਸਬ੍ਬਜਨਾਨਂ ਯਞ੍ਞਤ੍ਥਾਯ ਦੁਕ੍ਖਂ ਉਪ੍ਪਾਦੇਸਿ ਕੋ ਪਨਵਾਦੋ ਅਨੁਪ੍ਪਨ੍ਨੇ ਬੁਦ੍ਧੇ, ਤਥਾ ਹਿ ਏਸ ਕਸ੍ਸਪਭਗਵਤੋ ਸਾਸਨਨ੍ਤਰਧਾਨੇਨ ਅਨ੍ਧਭੂਤੇ ਲੋਕੇ ਬਾਰਾਣਸਿਯਂ ਰਾਜਾ ਹੁਤ੍ਵਾਪਿ ਨਿਗ੍ਰੋਧਰੁਕ੍ਖਦੇਵਤਾਯ ਯਞ੍ਞਤ੍ਥਾਯ ਏਕਸਤਰਾਜਾਨੋ ਮਹੇਸੀਹਿ ਸਦ੍ਧਿਂ ਮਾਰੇਤੁਂ ਆਰਦ੍ਧੋ. ਏਵਂ ਵੀਰਿਯਾਧਿਕੋ ਉਭਯਮਨ੍ਦੋ, ਤਸ੍ਮਾ ਤਸ੍ਸ ਸਮ੍ਬੋਧਿ ਅਤਿਮਨ੍ਦੋਤਿ ਏਵਂ ਪਞ੍ਞਾਧਿਕਸਦ੍ਧਾਧਿਕਵੀਰਿਯਾਧਿਕਵਸੇਨ ਕਾਲਸ੍ਸਾਪਿ ਰਸ੍ਸਦੀਘਭਾਵੋ ਵੇਦਿਤਬ੍ਬੋਤਿ. ਪਚ੍ਛਿਮਨਯੋਏਵ ਪਸਂਸਿਤਬ੍ਬੋਤਿ ਅਯਮੇਤ੍ਥ ਅਮ੍ਹਾਕਂ ਅਤ੍ਤਨੋਮਤਿ. ਖਨ੍ਧਪਰਿਨਿਬ੍ਬਾਨਂ ਪਨ ਕੁਸਿਨਾਰਾਯ ਉਪਵਤ੍ਤਨੇ ਮਲ੍ਲਾਨਂ ਸਾਲਵਨੇ ਯਮਕਸਾਲਾਨਮਨ੍ਤਰੇ ਵੇਸਾਖਪੁਣ੍ਣਮਦਿਵਸੇ ਪਚ੍ਚੂਸਸਮਯੇ ਏਕੂਨਵੀਸਤਿਯਾ ਚੁਤਿਚਿਤ੍ਤੇਸੁ ਮੇਤ੍ਤਾਪੁਬ੍ਬਭਾਗਸ੍ਸ ਸੋਮਨਸ੍ਸਞਾਣਸਮ੍ਪਯੁਤ੍ਤਅਸਙ੍ਖਾਰਿਕਕੁਸਲਚਿਤ੍ਤਸਦਿਸੇਨ ਮਹਾਵਿਪਾਕਚਿਤ੍ਤੇਨ ਅਬ੍ਯਾਕਤੇਨ ਚਰਿਮਕਂ ਕਤ੍ਵਾ ਕਤ੍ਥਚਿ ਭਵੇ ਪਟਿਸਨ੍ਧਿਵਿਞ੍ਞਾਣਸ੍ਸ ਅਨਨ੍ਤਰਪਚ੍ਚਯੋ ਹੁਤ੍ਵਾ ਕਮ੍ਮਤਣ੍ਹਾਕਿਲੇਸੇਹਿ ਅਨੁਪਾਦਾਨੋ ਸਬ੍ਬੁਪਧਿਪਟਿਨਿਸ੍ਸਗ੍ਗੋ ਉਪਾਦਿਨ੍ਨਕਕ੍ਖਨ੍ਧਪਰਿਚ੍ਚਾਗੋ ਹੋਤੀਤਿ ਵੇਦਿਤਬ੍ਬਂ. ਵਿਤ੍ਥਾਰੋ ਪਨ ਦੀਘਨਿਕਾਯੇ ਮਹਾਵਗ੍ਗੇ ਮਹਾਪਰਿਨਿਬ੍ਬਾਨਸੁਤ੍ਤਵਣ੍ਣਨਾਯਂ ਓਲੋਕੇਤਬ੍ਬੋ. ਤਤ੍ਥ ਵਿਦੇਸਂ ਗਚ੍ਛਨ੍ਤੋ ਪੁਰਿਸੋ ਸਬ੍ਬਂ ਞਾਤਿਜਨਂ ਆਲਿਙ੍ਗੇਤ੍ਵਾ ਸੀਸੇ ਚੁਮ੍ਬਿਤ੍ਵਾ ਗਚ੍ਛਤਿ ਵਿਯ ਭਗਵਾਪਿ ਨਿਬ੍ਬਾਨਪੁਰਂ ਪਵਿਸਨ੍ਤੋ ਸਬ੍ਬੇਪਿ ਚਤੁਵੀਸਤਿਕੋਟਿਸਤਸਹਸ੍ਸਸਮਾਪਤ੍ਤਿਯੋ ਅਨਵਸੇਸਂ ਸਮਾਪਜ੍ਜਿਤ੍ਵਾ ਯਾਵ ਸਞ੍ਞਾਵੇਦਯਿਤਂ, ਤਤੋਪਿ ਵੁਟ੍ਠਾਯ ਯਾਵ ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਝਾਨਙ੍ਗਾਨਿ ਪਚ੍ਚਵੇਕ੍ਖਿਤ੍ਵਾ ਭਵਙ੍ਗਚਿਤ੍ਤੇਨ ਅਬ੍ਯਾਕਤੇਨ ਦੁਕ੍ਖਸਚ੍ਚੇਨ ਪਰਿਨਿਬ੍ਬਾਯਿ. ਪਾਲ਼ਿਯਂ ਪਨ ‘‘ਚਤੁਤ੍ਥਜ੍ਝਾਨਾ ਵੁਟ੍ਠਹਿਤ੍ਵਾ ਸਮਨਨ੍ਤਰਾ ਭਗਵਾ ਪਰਿਨਿਬ੍ਬਾਯੀ’’ਤਿ ਵੁਤ੍ਤਂ ਤਤ੍ਥ ਦ੍ਵੇ ਸਮਨਨ੍ਤਰਾ ਝਾਨਸਮਨਨ੍ਤਰਾ, ਪਚ੍ਚਵੇਕ੍ਖਣਸਮਨਨ੍ਤਰਾਤਿ. ਤਤ੍ਥ ਝਾਨਾ ਵੁਟ੍ਠਾਯ ਭਵਙ੍ਗਂ ਓਤਿਣ੍ਣਸ੍ਸ ਤਤ੍ਥੇਵ ਪਰਿਨਿਬ੍ਬਾਨਂ ਝਾਨਸਮਨਨ੍ਤਰਂ ਨਾਮ. ਝਾਨਾ ਵੁਟ੍ਠਹਿਤ੍ਵਾ ਪੁਨ ਝਾਨਙ੍ਗਾਨਿ ਪਚ੍ਚਵੇਕ੍ਖਿਤ੍ਵਾ ਭਵਙ੍ਗਂ ਓਤਿਣ੍ਣਸ੍ਸ ਤਤ੍ਥੇਵ ਪਰਿਨਿਬ੍ਬਾਨਂ ਪਚ੍ਚਵੇਕ੍ਖਣਸਮਨਨ੍ਤਰਂ ਨਾਮ. ਭਗਵਾ ਪਨ ਝਾਨਸਮਨਨ੍ਤਰਾ ਅਪਰਿ ਨਿਬ੍ਬਾਯਿਤ੍ਤਾ ਪਚ੍ਚਵੇਕ੍ਖਣਸਮਨਨ੍ਤਰਮੇਵ ਪਰਿਨਿਬ੍ਬਾਯੀਤਿ ਵੇਦਿਤਬ੍ਬਂ, ਤੇਨੇਵਾਹ ‘‘ਭਗਵਾ ਪਨ ਝਾਨਂ ਸਮਾਪਜ੍ਜਿਤ੍ਵਾ ਝਾਨਾ ਵੁਟ੍ਠਾਯ ਝਾਨਙ੍ਗਾਨਿ ਪਚ੍ਚਵੇਕ੍ਖਿਤ੍ਵਾ ਭਵਙ੍ਗਚਿਤ੍ਤੇਨ ਅਬ੍ਯਾਕਤੇਨ ਦੁਕ੍ਖਸਚ੍ਚੇਨ ਪਰਿਨਿਬ੍ਬਾਯੀ’’ਤਿ. ਏਤ੍ਥ ਭਗਵਤੋ ਪਰਿਨਿਬ੍ਬਾਨਚਿਤ੍ਤਸ੍ਸ ਕਿਂ ਆਰਮ੍ਮਣਂ ਕਮ੍ਮਂ ਵਾ ਹੋਤਿ, ਉਦਾਹੁ ਕਮ੍ਮਨਿਮਿਤ੍ਤਗਤਿਨਿਮਿਤ੍ਤਾਨਿ, ਅਥ ਨਿਬ੍ਬਾਨਨ੍ਤਿ ਅਪਰੇ ਏਵਂ ਵਦਨ੍ਤਿ.

ਨਾਹੁ ਅਸ੍ਸਾਸਪਸ੍ਸਾਸਾ, ਠਿਤਚਿਤ੍ਤਸ੍ਸ ਤਾਦਿਨੋ;

ਅਨੇਜੋ ਸਨ੍ਤਿ’ਮਾਰਬ੍ਭ, ਯਂਕਾਲ’ਮਕਰੀ ਮੁਨਿ.

ਅਸਲ੍ਲੀਨੇਨ ਚਿਤ੍ਤੇਨ, ਵੇਦਨਂ ਅਜ੍ਝਵਾਸਯਿ;

ਪਜ੍ਜੋਤਸ੍ਸੇ’ਵ ਨਿਬ੍ਬਾਨਂ, ਵਿਮੋਕ੍ਖੋ ਚੇਤਸੋ ਅਹੂ’ਤਿ.

ਇਮਿਸ੍ਸਾਗਾਥਾਯ ‘‘ਯਂ ਯੋ ਮੁਨਿ ਅਨੇਜੋ ਸਨ੍ਤਿ ਨਿਬ੍ਬਾਨਂ ਆਰਬ੍ਭ ਕਾਲਂ ਅਕਰੀ’’ਤਿ ਯੋਜੇਤ੍ਵਾ ਭਗਵਤੋ ਪਰਿਨਿਬ੍ਬਾਨਚਿਤ੍ਤਸ੍ਸ ਨਿਬ੍ਬਾਨਾਰਮ੍ਮਣਨ੍ਤਿ ਤਮਯੁਤ੍ਤਂ, ਪਟਿਸਨ੍ਧਿਭਵਙ੍ਗਚੁਤੀਨਂ ਨਿਬ੍ਬਾਨਾਰਮ੍ਮਣਸ੍ਸ ਅਨਾਰਹਤ੍ਤਾ ‘‘ਨਿਬ੍ਬਾਨਂ ਗੋਤ੍ਰਭੁਸ੍ਸ ਵੋਦਾਨਸ੍ਸ ਮਗ੍ਗਸ੍ਸ ਆਰਮ੍ਮਣਪਚ੍ਚਯੇਨਪਚ੍ਚਯੋ, ਨਿਬ੍ਬਾਨਂ ਫਲਸ੍ਸ ਆਵਜ੍ਜਨਾਯਾ’’ਤਿ ਪਟ੍ਠਾਨਪਾਲ਼ਿਯਾ ਜਵਨਆਵਜ੍ਜਨਾਨਮੇਵ ਅਧਿਪ੍ਪੇਤਤ੍ਤਾ ਤਸ੍ਮਾ ਏਤ੍ਥ ‘‘ਯਂ ਯੋ ਮੁਨਿ ਫਲਸਮਾਪਤ੍ਤਿਯਾ ਅਨੇਜੋ ਅਨੇਜਸਙ੍ਖਾਤੋ ਤਣ੍ਹਾਰਹਿਤੋ ਸਨ੍ਤਿਂ ਨਿਬ੍ਬਾਨਂ ਆਰਬ੍ਭ ਆਰਮ੍ਮਣਂ ਕਤ੍ਵਾ ਕਾਲਂ ਅਸੀਤਿਵਸ੍ਸਪਰਿਮਾਣਂ ਅਕਰਿ ਅਤਿਕ੍ਕਮੀ’’ਤਿ ਯੋਜਨਾ ਕਾਤਬ੍ਬਾ. ਕੇਚਿ ਪਨ ਏਵਂ ਵਦਨ੍ਤਿ… ‘‘ਕਤ੍ਥਚਿ ਪਨ ਅਨੁਪ੍ਪਜ੍ਜਮਾਨਸ੍ਸ ਖੀਣਾਸਵਸ੍ਸ ਯਥੋਪਟ੍ਠਿਤਂ ਨਾਮਰੂਪਧਮ੍ਮਾਦਿਕਮੇਵ ਚੁਤਿਪਰਿਯੋਸਾਨਾਨਂ ਗੋਚਰਭਾਵਂ ਗਚ੍ਛਤਿ, ਨ ਕਮ੍ਮ-ਕਮ੍ਮਨਿਮਿਤ੍ਤਾਦਯੋ’’ਤਿ ਵੁਤ੍ਤਤ੍ਤਾ ਕਮ੍ਮਨਿਤ੍ਤਗਤਿਨਿਮਿਤ੍ਤਾਨਿ ਅਰਹਤੋ ਚੁਤਿਚਿਤ੍ਤਸ੍ਸ ਆਰਮ੍ਮਣਭਾਵਂ ਨ ਗਚ੍ਛਨ੍ਤੀਤਿ ਤਮ੍ਪਿ ਅਯੁਤ੍ਤਮੇਵ ਅਯਞ੍ਹੇਤ੍ਥਤ੍ਥੋ ਕਤ੍ਥਚਿ ਪਨ ਭਵੇ ਅਨੁਪ੍ਪਜ੍ਜਮਾਨਸ੍ਸ ਖੀਣਾਸਵਸ੍ਸ ਅਰਹਤੋ ਯਥਾ ਯਥਾ ਯੇਨ ਯੇਨ ਪਕਾਰੇਨ ਉਪਟ੍ਠਿਤਂ ਨਾਮਰੂਪਧਮ੍ਮਾਦਿਕਮੇਵ ਚੁਤਿਪਰਿਯੋਸਾਨਂ ਆਵਜ੍ਜਨਜਵਨਚਿਤ੍ਤਾਨਂ ਗੋਚਰਭਾਵਂ ਗਚ੍ਛਤਿ, ਪੁਨ ਭਵਾਭਿਨਿਬ੍ਬਤ੍ਤਿਯਾ ਅਭਾਵਤੋ. ਕਿਂ ਕਾਰਣਂ ਭੂਤਾਨਿ ਕਮ੍ਮਕਮ੍ਮਨਿਮਿਤ੍ਤਗਤਿਨਿਮਿਤ੍ਤਾਨਿ ਗੋਚਰਭਾਵਂ ਨ ਗਚ੍ਛਨ੍ਤੀਤਿ. ਚੁਤਿਚਿਤ੍ਤਸ੍ਸ ਪਨ ਪਟਿਸਨ੍ਧਿਚਿਤ੍ਤੇਨ ਗਹਿਤਂ ਅਤੀਤਾਰਮ੍ਮਣਮੇਵ ਗੋਚਰਭਾਵਂ ਗਚ੍ਛਤਿ. ‘‘ਨਾਮਰੂਪਾਦਿਕਮੇਵਾ ਤਿ ਏਤ੍ਥ ਨਾਮ’’ਨ੍ਤਿ ਚਿਤ੍ਤਚੇਤਸਿਕਨਿਬ੍ਬਾਨਂ ਰੂਪਨ੍ਤਿ ਅਟ੍ਠਾਰਸਵਿਧਂ ਰੂਪਂ ਸਙ੍ਗਣ੍ਹਾਤਿ. ਨਾਮਞ੍ਚ ਰੂਪਞ੍ਚ ਨਾਮਰੂਪਾ. ਨਾਮਰੂਪਾ ਚ ਤੇ ਧਮ੍ਮਾ ਚੇਤਿ ਤਥਾ. ਤੇ ਆਦਿ ਯੇਸਂ ਤੇਤਿ ਨਾਮਰੂਪਧਮ੍ਮਾਦਿ ਤਮੇਵ ਨਾਮਰੂਪਧਮ੍ਮਾਦਿਕਂ. ਆਦਿਸਦ੍ਦੇਨ ਛ ਪਞ੍ਞਤ੍ਤਿਯੋ ਸਙ੍ਗਣ੍ਹਾਤਿ, ਤੇਨ ਨਿਬ੍ਬਾਨਮ੍ਪਿ ਅਰਹਤੋ ਮਰਣਾਸਨ੍ਨਕਾਲੇ ਕ੍ਰਿਯਜਵਨਸ੍ਸਪਿ ਆਰਮ੍ਮਣਭਾਵੋ ਭਵੇਯ੍ਯਾਤਿ ਅਮ੍ਹਾਕਂ ਖਨ੍ਤਿ ਵੀਮਂਸਿਤ੍ਵਾ ਪਨ ਗਹੇਤਬ੍ਬਂ. ਭਗਵਤੋ ਨਿਬ੍ਬਾਨਚਿਤ੍ਤਸ੍ਸ ਪਨ ਤੁਸਿਤਪੁਰਤੋ ਚਵਿਤ੍ਵਾ ਸਿਰੀਮਹਾਮਾਯਾਯ ਕੁਚ੍ਛਿਮ੍ਹਿ ਵਸਿਤਪਟਿਸਨ੍ਧਿਚਿਤ੍ਤੇਨ ਗਹਿਤਾਰਮ੍ਮਣਮੇਵ ਆਰਮ੍ਮਣਂ ਹੋਤੀਤਿ ਦਟ੍ਠਬ੍ਬਂ ਤਞ੍ਚ ਖੋ ਗਤਿਨਿਮਿਤ੍ਤਮੇਵ, ਨ ਕਮ੍ਮਕਮ੍ਮਨਿਮਿਤ੍ਤਾਨਿ. ਯੁਤ੍ਤਿਤੋਪਿ ਆਗਮਤੋਪਿ ਗਤਿਨਿਮਿਤ੍ਤਮੇਵ ਯੁਜ੍ਜਤਿ ਤਥਾ ਹਿ ਤੁਸਿਤਪੁਰੇਯੇਵ ਸੇਤਕੇਤੁਦੇਵਪੁਤ੍ਤੋ ਹੁਤ੍ਵਾ ਦਿਬ੍ਬਗਣਨਾਯ ਚਤ੍ਤਾਰਿ ਸਹਸ੍ਸਾਨਿ, ਮਨੁਸ੍ਸਗਣਨਾਯ ਸਤ੍ਤਪਞ੍ਞਾਸਵਸ੍ਸਕੋਟਿ,ਸਟ੍ਠਿਵਸ੍ਸਸਤਸਹਸ੍ਸਾਨਿ ਠਤ੍ਵਾ ਪਰਿਯੋਸਾਨੇ ਪਞ੍ਚ ਪੁਬ੍ਬਨਿਮਿਤ੍ਤਾਨਿ ਦਿਸ੍ਵਾ ਸੁਦ੍ਧਾਵਾਸੇ ਅਰਹਨ੍ਤਬ੍ਰਹ੍ਮੁਨਾ ਦਸਹਿ ਚਕ੍ਕਵਾਲ਼ਸਹਸ੍ਸੇਹਿ ਆਗਮ੍ਮ ਦੇਵਤਾਵਿਸੇਸੇਹਿ ਚ.

‘‘ਕਾਲੋ ਦੇਵ ਮਹਾਵੀਰ, ਉਪ੍ਪਜ੍ਜ ਮਾਤੁਕੁਚ੍ਛਯਂ;

ਸਦੇਵਕਂ ਤਾਰਯਨ੍ਤੋ, ਬੁਜ੍ਝਸ੍ਸੁ ਅਮਤਂ ਪਦ’’ਨ੍ਤਿ.

ਯਾਚਿਯਮਾਨੋ ‘‘ਕਾਲਂ ਦੀਪਞ੍ਚ ਦੇਸਞ੍ਚ, ਕੁਲਂ ਮਾਤਰਮੇਵ ਚਾ’’ਤਿ ਵੁਤ੍ਤਾਨਿ ਪਞ੍ਚ ਮਹਾਵਿਲੋਕਨਾਨਿ ਵਿਲੋਕੇਤ੍ਵਾ ਤੁਸਿਤਪੁਰਤੋ ਚਵਿਤ੍ਵਾ ਆਸਾਲ਼੍ਹੀਪੁਣ੍ਣਮਾਯਂ ਉਤ੍ਤਰਾਸਾਲ਼੍ਹਨਕ੍ਖਤ੍ਤੇਨੇਵ ਸਦ੍ਧਿਂ ਏਕੂਨਵੀਸਤਿਯਾ ਪਟਿਸਨ੍ਧਿਚਿਤ੍ਤੇਸੁ ਮੇਤ੍ਤਾਪੁਬ੍ਬਭਾਗਮਸ੍ਸ ਸੋਮਨਸ੍ਸਞਾਣਸਮ੍ਪਯੁਤ੍ਤਅਸਙ੍ਖਾਰਿਕਕੁਸਲਚਿਤ੍ਤਸ੍ਸ ਸਦਿਸੇਨ ਮਹਾਵਿਪਾਕਚਿਤ੍ਤੇਨ ਪਟਿਸਨ੍ਧਿਂ ਅਗ੍ਗਹੇਸਿ. ਤਦਾਰਮ੍ਮਣਾਸਨ੍ਨਵੀਥਿਤੋ ਪੁਬ੍ਬਭਾਗੇ ਆਲੋਕਿਤਾਨਿ ਕਾਲਦੀਪਦੇਸਕੁਲਮਾਤਰਵਸੇਨ ਇਮਾਨਿ ਪਞ੍ਚ ਪਟਿਸਨ੍ਧਿਚਿਤ੍ਤਸ੍ਸ ਗਤਿਨਿਮਿਤ੍ਤਾਰਮ੍ਮਣਭਾਵੇਨ ਗੋਚਰਭਾਵਂ ਗਚ੍ਛਨ੍ਤੀਤਿ ਅਮ੍ਹਾਕਂ ਖਨ੍ਤਿ ਤਨ੍ਨਿਨ੍ਨਤਪ੍ਪੋਣਤਪ੍ਪਬ੍ਭਾਰਵਸੇਨ ਬਾਹੁਲ੍ਲਪ੍ਪਵਤ੍ਤਿਤੋ ਤੇਨੇਵ ਅਭਿਧਮ੍ਮਤ੍ਥਸਙ੍ਗਹਾਦੀਸੁ ਅਭਿਧਮ੍ਮਤ੍ਥ ਵਿਭਾਵਨਿਯਂ ‘‘ਮਰਣਕਾਲੇ ਯਥਾਰਹਂ ਅਭਿਮੁਖੀਭੂਤਂ ਭਵਨ੍ਤਰੇ ਪਟਿਸਨ੍ਧਿਜਨਕਂ ਕਮ੍ਮਂ ਵਾ ਤਂ ਕਮ੍ਮਕਰਣਕਾਲੇ ਰੂਪਾਦਿਕਮੁਪਲਦ੍ਧਪੁਬ੍ਬਮੁਪਕਰਣਭੂਤਞ੍ਚ ਕਮ੍ਮਨਿਮਿਤ੍ਤਂ ਵਾ ਅਨਨ੍ਤਰਮੁਪ੍ਪਜ੍ਜਮਾਨਭਵੇ ਉਪਲਭਿਤਬ੍ਬਂ ਉਪਭੋਗਭੂਤਂ ਗਤਿਨਿਮਿਤ੍ਤਂ ਵਾ ਕਮ੍ਮਬਲੇਨ ਛਨ੍ਨਂ ਦ੍ਵਾਰਾਨਮਞ੍ਞਤਰਸ੍ਮਿਂ ਪਚ੍ਚੁਪਟ੍ਠਾਸਿ, ਤਤੋ ਪਰਂ ਤਮੇਵ ਤਥੋਪਟ੍ਠਿਤਮਾਲਮ੍ਬਣਂ ਆਰਬ੍ਭ ਵਿਪਚ੍ਚਮਾਨਕਕਮ੍ਮਾਨੁਰੂਪਂ ਪਰਿਸੁਦ੍ਧਂ ਵਾ, ਉਪਕ੍ਕਿਲਿਟ੍ਠਂ ਵਾ ਉਪਪਜ੍ਜਿਤਬ੍ਬਭਵਾਨੁਰੂਪਂ ਤਤ੍ਥੋਣਤਂਵ ਚਿਤ੍ਤਸਨ੍ਤਾਨਮਭਿਣ੍ਹਂ ਪਵਤ੍ਤਤਿ ਬਾਹੁਲ੍ਲੇਨ. ਤਮੇਵ ਵਾ ਪਨ ਜਨਕਭੂਤਂ ਕਮ੍ਮਂ ਅਭਿਨਵਕਰਣਵਸੇਨ ਦ੍ਵਾਰਪ੍ਪਤ੍ਤਂ ਹੋਤਿ. ਪਚ੍ਚਾਸਨ੍ਨਮਰਣਸ੍ਸ ਪਨ ਤਸ੍ਸ ਵੀਥਿਚਿਤ੍ਤਾਵਸਾਨੇ ਭਵਙ੍ਗਕ੍ਖਯੇਵਾ ਚਵਨਵਸੇਨ ਪਚ੍ਚੁਪ੍ਪਨ੍ਨਭਵਪਰਿਯੋਸਾਨਭੂਤਂ ਚੁਤਿਚਿਤ੍ਤਂ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਤਿ. ਤਸ੍ਮਿਂ ਨਿਰੁਦ੍ਧਾਵਸਾਨੇ ਤਸ੍ਸਾਨਨ੍ਤਰਮੇਵ ਤਥਾ ਗਹਿਤਮਾਲਮ੍ਬਣਮਾਰਬ੍ਭ ਸਵਤ੍ਥੁਕਮਵਤ੍ਥੁਕਮੇਵ ਵਾ ਯਥਾਰਹਂ ਅਵਿਜ੍ਜਾਨੁਸਯਪਰਿਕ੍ਖਿਤ੍ਤੇਨ ਤਣ੍ਹਾਨੁਸਯਮੂਲਕੇਨ ਸਙ੍ਖਾਰੇਨ ਜਨਿਯਮਾਨਂ ਸਮ੍ਪਯੁਤ੍ਤੇਹਿ ਪਰਿਗ੍ਗਯ੍ਹਮਾਨਂ ਸਹਜਾਤਾਨਮਧਿਟ੍ਠਾਨਭਾਵੇਨ ਪੁਬ੍ਬਙ੍ਗਮਭੂਤਂ ਭਵਨ੍ਤਰਪਟਿਸਨ੍ਧਾਨਵਸੇਨ ਪਟਿਸਨ੍ਧਿਸਙ੍ਖਾਤਂ ਮਾਨਸਮੁਪ੍ਪਜ੍ਜਮਾਨਮੇਵ ਪਤਿਟ੍ਠਾਤਿ ਭਵਨ੍ਤਰੇ’’ਤਿ ਵੁਤ੍ਤਂ. ਤਤ੍ਥ ‘‘ਤਤ੍ਥੋਣਤਂਵ ਚਿਤ੍ਤਸਨ੍ਤਾਨਮਭਿਣ੍ਹਂ ਪਵਤ੍ਤਤਿ ਬਾਹੁਲ੍ਲੇਨਾ’’ਤਿ ਇਮਿਨਾ ਕਮ੍ਮਬਲੇਨ ਉਪਟ੍ਠਿਤਂ ਗਤਿਨਿਮਿਤ੍ਤਂ ਮਰਣਾਸਨ੍ਨਵੀਥਿਤੋ ਪੁਬ੍ਬੇ ਏਕਾਹਦ੍ਵੀਹਾਦਿਵਸੇਨ ਸਤ੍ਤਾਹਮ੍ਪਿ, ਸਤ੍ਤਾਹਤੋ ਉਤ੍ਤਰਿਪਿ ਉਪ੍ਪਜ੍ਜਤੇ ਵਾਤਿ ਦਸ੍ਸੇਤਿ ਤਥਾ ਹਿ ਪਰਿਸੁਦ੍ਧਂ ਵਾ ਉਪਕ੍ਕਿਲਿਟ੍ਠਂ ਵਾ ਵਿਪਚ੍ਚਮਾਨਕਕਮ੍ਮਾਨੁਰੂਪਂ ਗਤਿਨਿਮਿਤ੍ਤਂ ਚਿਰਕਾਲਮ੍ਪਿ ਤਿਟ੍ਠਤਿ, ਅਰਿਯਗਾਲਤਿਸ੍ਸਚੋਰਘਾਤਕਾਦਯੋ ਵਿਯ ਤਥਾ ਹਿ ਅਰਿਯਗਾਲਤਿਸ੍ਸੋ ਨਾਮ ਉਪਾਸਕੋ ਸੀਹਲ਼ਦੀਪੇ ਅਤ੍ਤਨੋ ਭਰਿਯਾਯ ਸੁਮਨਾਯ ਸਦ੍ਧਿਂ ਯਾਵਜੀਵਂ ਦਾਨਾਦਿ ਪੁਞ੍ਞਕਮ੍ਮਾਨਿ ਕਤ੍ਵਾ ਆਯੂਹਪਰਿਯੋਸਾਨੇ ਅਰਿਯਗਾਲਤਿਸ੍ਸਸ੍ਸ ਮਰਣਮਞ੍ਚੇ ਨਿਪਨ੍ਨਸ੍ਸ ਛਦੇਵਲੋਕਤੋ ਰਥਂ ਆਨੇਤ੍ਵਾ ਅਤ੍ਤਨੋ ਅਤ੍ਤਨੋ ਦੇਵਲੋਕਂ ਵਣ੍ਣੇਸੁਂ. ਉਪਾਸਕੋ ਦੇਵਤਾਨਂ ਕਥਂ ਸੁਤ੍ਵਾ ਤੁਸਿਤਪੁਰਤੋ ਆਹਟਰਥਂ ਠਪੇਤ੍ਵਾ ਅਵਸੇਸਰਥੇ ‘‘ਗਹੇਤ੍ਵਾ ਗਚ੍ਛਥਾ’’ਤਿ ਆਹ. ਸੁਮਨਾ ਪਨ ਅਤ੍ਤਨੋ ਸਾਮਿਕਸ੍ਸ ਵਚਨਂ ਸੁਤ੍ਵਾ ‘‘ਕਿਂ ਤਿਸ੍ਸ ਮਰਣਾਸਨ੍ਨੇ ਵਿਲਾਪਂ ਅਕਾਸੀ’’ਤਿ ਆਹ. ਤਿਸ੍ਸੋ ਅਤ੍ਤਨੋ ਭਰਿਯਾਯ ਕਥਂ ਸੁਤ੍ਵਾ ਆਹ… ‘‘ਅਹਂ ਵਿਲਾਪਂ ਨ ਕਰੋਮਿ, ਦੇਵਲੋਕਤੋ ਦੇਵਤਾ ਛ ਰਥੇ ਆਨੇਸੁਂ ਤਾਹਿ ਦੇਵਤਾਹਿ ਸਦ੍ਧਂ ਕਥੇਮੀ’’ਤਿ. ਤਂ ਨਪਸ੍ਸਾਮਿ ਕੁਹਿ’’ਨ੍ਤਿ ਵੁਤ੍ਤੇ ਪੁਪ੍ਫਦਾਮਂ ਆਹਰਾਪੇਤ੍ਵਾ ਆਕਾਸੇ ਖਿਪਾਪੇਸਿ. ਸਾ ਤਂ ਪੁਪ੍ਫਦਾਮਂ ਰਥਸੀਸੇ ਓਲਮ੍ਬਮਾਨਂ ਦਿਸ੍ਵਾ ਗਬ੍ਭਂ ਪਵਿਸਿਤ੍ਵਾ ਸਯਨੇ ਸਯਿਤ੍ਵਾ ਨਾਸਿਕਵਾਤਂ ਸਨ੍ਨਿਰੁਜ੍ਝਿਤ੍ਵਾ ਚਵਿਤ੍ਵਾ ਪਾਤੁਰਹੋਸਿ. ਸਾ ਅਤ੍ਤਨੋ ਸਾਮਿਕਸ੍ਸ ਸਾਸਨਂ ਪੇਸੇਸਿ… ‘‘ਅਹਂ ਪਨ ਪਠਮਂ ਆਗਤੋਮ੍ਹਿ, ਤ੍ਵਂ ਕਸ੍ਮਾ ਚਿਰਾਯਸੀ’’ਤਿ. ਉਭੋਪਿ ਰਥੇ ਠਤ੍ਵਾ ਸਬ੍ਬੇ ਓਲੋਕੇਨ੍ਤਾਨਂਯੇਵ ਤੁਸਿਤਪੁਰਂ ਅਗਮਂਸੁ. ਇਮਸ੍ਮਿਞ੍ਹਿ ਵਤ੍ਥੁਸ੍ਮਿਂ ਸਾਮਿਕਸ੍ਸ ਉਪਟ੍ਠਿਤਗਤਿਨਿਮਿਤ੍ਤਂ ਭਰਿਯਾਯ ਪਾਕਟਂ ਹੁਤ੍ਵਾ ਪੁਰੇਤਰਤੁਸਿਤਪੁਰੇ ਨਿਬ੍ਬਤ੍ਤਿਤ੍ਵਾ ਸਾਮਿਕਸ੍ਸ ਸਾਸਨਂ ਪੇਸੇਸਿ ਤੇਨ ਅਰਿਯਗਾਲਤਿਸ੍ਸਸ੍ਸ ਚਿਰਕਾਲਂ ਗਤਿਨਿਮਿਤ੍ਤਂ ਉਪਟ੍ਠਾਤੀਤਿ ਵੇਦਿਤਬ੍ਬਂ. ਮਨੁਸ੍ਸਲੋਕੇ ਹਿ ਚਿਰਕਾਲਂ ਤੁਸਿਤਪੁਰੇ ਮੁਹੁਤ੍ਤਂਵ ਹੋਤਿ. ਏਵਂ ਪਰਿਸੁਦ੍ਧਂ ਵਿਪਚ੍ਚਮਾਨਕਕਮ੍ਮਾਨੁਰੂਪਂ ਗਤਿਨਿਮਿਤ੍ਤਂ ਚਿਰਕਾਲਂ ਪਵਤ੍ਤਤਿ ਇਮਿਨਾ ਨਯੇਨ ਦੁਟ੍ਠਗਾਮਣਿਅਭਯਧਮ੍ਮਿਕਉਪ੍ਸਕਾਦੀਨਮ੍ਪਿ ਵਤ੍ਥੁ ਵਿਤ੍ਥਾਰੇਤਬ੍ਬਂ. ਚੋਰਘਾਤਕਸ੍ਸ ਪਨ ਮਹਾਨਿਰਯੇ ਵਿਪਚ੍ਚਮਾਨਕਕਮ੍ਮਾਨੁਰੂਪਂ ਨੇਰਯਗ੍ਗਿਜਾਲਾਦਿਕਂ ਸਤ੍ਤਾਹਂ ਉਪਟ੍ਠਾਤਿ. ਸਾਵਤ੍ਥਿਨਗਰੇ ਕਿਰ ਪਞ੍ਚਸਤਾ ਚੋਰਾ ਬਹਿਨਗਰੇ ਚੋਰਕਮ੍ਮਂ ਕਰੋਨ੍ਤਿ. ਅਥੇਕਦਿਵਸਂ ਜਨਪਦਪੁਰਿਸੋ ਤੇਸਂ ਅਬ੍ਭਨ੍ਤਰੋ ਹੁਤ੍ਵਾ ਚੋਰਕਮ੍ਮਂ ਅਕਾਸਿ, ਤਦਾ ਤੇ ਸਬ੍ਬੇਪਿ ਰਾਜਪੁਰਿਸਾ ਅਗ੍ਗਹੇਸੁਂ. ਰਾਜਾ ਤੇ ਦਿਸ੍ਵਾ ‘‘ਤੁਮ੍ਹਾਕਂ ਅਨ੍ਤਰੇ ਇਮੇ ਸਬ੍ਬੇ ਮਾਰੇਤੁਂ ਸਮਤ੍ਥਸ੍ਸ ਜੀਵਿਤਂ ਦਮ੍ਮੀ’’ਤਿ ਆਹ. ਪਞ੍ਚਸਤਾ ਚੋਰਾ ਅਞ੍ਞਮਞ੍ਞਂ ਸਮ੍ਬਨ੍ਧਾ ਅਞ੍ਞਮਞ੍ਞਂ ਸਹਾਯਕਾਤਿ ਅਞ੍ਞਮਞ੍ਞਂ ਮਾਰੇਤੁਂ ਨ ਇਚ੍ਛਿਂਸੁ, ਜਨਪਦਮਨੁਸ੍ਸੋ ਪਨ ‘‘ਅਹਂ ਮਾਰੇਮੀ’’ਤਿ ਵਤ੍ਵਾ ਸਬ੍ਬੇ ਮਾਰੇਸਿ. ਰਾਜਾ ਤਸ੍ਸ ਤੁਸ੍ਸਿਤ੍ਵਾ ਚੋਰਘਾਤਕਕਮ੍ਮਂ ਅਦਾਸਿ. ਸੋ ਪਞ੍ਚਵੀਸਤਿਵਸ੍ਸਾਨਿ ਚੋਰਘਾਤਕਕਮ੍ਮਂ ਆਕਾਸਿ. ਰਾਜਾ ਤਸ੍ਸ ਮਹਲ੍ਲਕੋਤਿ ਵਤ੍ਵਾ ਅਞ੍ਞਸ੍ਸ ਚੋਰਘਾਤਕ ਕਮ੍ਮਂ ਦਾਪੇਸਿ. ਸੋ ਚੋਰਘਾਤਕਕਮ੍ਮਾ ਅਪਨੀਤੋ ਅਞ੍ਞਤਰਸ੍ਸ ਸਨ੍ਤਿਕੇ ਨਾਸਿਕਵਾਤਂ ਉਗ੍ਗਣ੍ਹਿਤ੍ਵਾ ਹਤ੍ਥਪਾਦਕਣ੍ਣਨਾਸਾਦੀਹਿ ਛਿਨ੍ਦਿਤਬ੍ਬਾਨਂ ਊਰੂਥਨਕਟ੍ਠਾਨਂ ਭਿਨ੍ਦਨ੍ਤਮਾਰੇਤਬ੍ਬਯੁਤ੍ਤਾਨਂ ਨਾਸਿਕਵਾਤਂ ਵਿਸ੍ਸਜ੍ਜੇਤ੍ਵਾ ਮਾਰੇਤਬ੍ਬਂ ਮਨ੍ਤਂ ਲਭਿ. ਸੋ ਰਾਜਾਨਂ ਆਰੋਚੇਤ੍ਵਾ ਨਾਸਿਕਵਾਤੇਨ ਚੋਰਘਾਤਕਕਮ੍ਮਂ ਕਰੋਨ੍ਤਸ੍ਸੇਵ ਤਿਂਸ ਵਸ੍ਸਾਨਿ ਅਤਿਕ੍ਕਮਿ. ਸੋ ਪਚ੍ਛਾ ਮਹਲ੍ਲਕੋ ਹੁਤ੍ਵਾ ਮਰਣਮਞ੍ਚੇ ਨਿਪਜ੍ਜਿ ‘‘ਸਤ੍ਤਦਿਵਸੇਨ ਕਾਲਂ ਕਰਿਸ੍ਸਤੀ’’ਤਿ. ਮਰਣਕਾਲੇ ਮਹਨ੍ਤਂ ਵੇਦਨਂ ਅਹੋਸਿ. ਸੋ ਮਹਾਨਿਰਯੇ ਨਿਬ੍ਬਤ੍ਤੋ ਵਿਯ ਮਹਾਸਦ੍ਦਂ ਕਤ੍ਵਾ ਦੁਕ੍ਖਿਤੋ ਹੋਤਿ. ਤਸ੍ਸ ਸਦ੍ਦੇਨ ਭੀਤਾ ਮਨੁਸ੍ਸਾ ਉਭਤੋਪਸ੍ਸੇ ਗੇਹਂ ਛਡ੍ਡੇਤ੍ਵਾ ਪਲਾਯਿਂਸੁ. ਤਸ੍ਸ ਮਰਣਦਿਵਸੇ ਸਾਰਿਪੁਤ੍ਤਤ੍ਥੇਰੋ ਦਿਬ੍ਬਚਕ੍ਖੁਨਾ ਲੋਕਂ ਓਲੋਕੇਨ੍ਤੋ ਏਤਸ੍ਸ ਕਾਲਂ ਕਤ੍ਵਾ ਮਹਾਨਿਰਯੇ ਨਿਬ੍ਬਤ੍ਤਮਾਨਂ ਦਿਸ੍ਵਾ ਤਸ੍ਸ ਅਨੁਕਮ੍ਪਂ ਪਟਿਚ੍ਚ ਗੇਹਦ੍ਵਾਰੇ ਪਾਕਟੋ ਅਹੋਸਿ. ਸੋ ਕੁਜ੍ਝਿਤ੍ਵਾ ਨਾਸਿਕਵਾਤਂ ਵਿਸ੍ਸਜ੍ਜੇਸਿ. ਯਾਵ ਤਤਿਯਂ ਵਿਸ੍ਸਜ੍ਜਮਾਨੋਪਿ ਵਿਸ੍ਸਜ੍ਜਾਪੇਤੁਂ ਅਸਕ੍ਕੋਨ੍ਤੋ ਥੇਰਂ ਅਤਿਰੇਕੇਨ ਵਿਰੋਚਮਾਨਂ ਦਿਸ੍ਵਾ ਚਿਤ੍ਤਂ ਪਸਾਦੇਤ੍ਵਾ ਪਾਯਾਸਂ ਥੇਰਸ੍ਸ ਦਾਪੇਸਿ. ਥੇਰੋ ਮਙ੍ਗਲਂ ਵਡ੍ਢੇਤ੍ਵਾ ਅਗਮਾਸਿ. ਚੋਰਘਾਤਕੋ ਥੇਰਸ੍ਸ ਦਿਨ੍ਨਦਾਨਂ ਅਨੁਸ੍ਸਰਿਤ੍ਵਾ ਚਵਿਤ੍ਵਾ ਸਗ੍ਗੇ ਨਿਬ੍ਬਤ੍ਤਿ, ਨਿਰਯਜਾਲਾਦਯੋ ਅਨ੍ਤਰਧਾਯਨ੍ਤਿ. ਸੋ ਅਨਾਗਤੇਪਿ ਪਚ੍ਚੇਕਬੁਦ੍ਧੋ ਭਵਿਸ੍ਸਤਿ. ਏਵਂ ਉਪਕ੍ਕਿਲਿਟ੍ਠਂ ਵਾ ਵਿਪਚ੍ਚਮਾਨ ਕਕਮ੍ਮਾਨੁਰੂਪਂ ਗਤਿਨਿਮਿਤ੍ਤਮ੍ਪਿ ਸਤ੍ਤਾਹਪਰਮਂ ਉਪਟ੍ਠਾਤਿ. ਅਤ੍ਥਿਕੇਹਿ ਪਨ ਸਹਸ੍ਸਵਤ੍ਥੁ ਸਗਾਥਾਵਗ੍ਗੇਸੁ ਓਲੋਕੇਤਬ੍ਬੋ. ਭਗਵਤੋ ਪਨ ਪਰਿਸੁਦ੍ਧਂ ਮੇਤ੍ਤਾਪੁਬ੍ਬਭਾਗਸ੍ਸ ਸੋਮਨਸ੍ਸ ਞਾਣਸਮ੍ਪਯੁਤ੍ਤਕੁਸਲਸ੍ਸ ਕਮ੍ਮਸ੍ਸ ਵੇਗੇਨ ਕਾਲਦੀਪਦੇਸਕੁਲਮਾਤਰਵਸੇਨ ਇਮਾਨਿ ਪਞ੍ਚਗਤਿਨਿਮਿਤ੍ਤਾਨਿ ਚਿਰਕਾਲਂ ਹੁਤ੍ਵਾ ਉਪਟ੍ਠਹਨ੍ਤਿ. ਚਿਰਕਾਲਨ੍ਤਿ ਮਨੁਸ੍ਸਲੋਕੇ ਸਤ੍ਤਾਹਮਤ੍ਤਂ, ਤੁਸਿਤਪੁਰੇਮੁਹੁਤ੍ਤਮੇਵ, ਤਥਾਪਿ ਮਨੁਸ੍ਸਲੋਕੇ ਸਤ੍ਤਾਹਮਤ੍ਤੇ ਕਾਲੇ ਦੇਵਤਾਨਂ ਪਞ੍ਚਪੁਬ੍ਬਨਿਮਿਤ੍ਤਾਨਿ ਪਞ੍ਞਾਯਨ੍ਤਿ ਤਞ੍ਚ ਖੋ ਪੁਞ੍ਞਵਨ੍ਤਾਨਂਯੇਵ ਪਞ੍ਞਾਯਨ੍ਤਿ, ਨ ਸਬ੍ਬੇਸਂ ਮਨੁਸ੍ਸਲੋਕੇ ਪੁਞ੍ਞਵਨ੍ਤਾਨਂ ਰਾਜਰਾਜਮਹਾਮਤ੍ਤਾਦੀਨਂ ਵਿਯ ਤਂ ਦਿਸ੍ਵਾ ਮਹੇਸਕ੍ਖਾ ਦੇਵਤਾ ਜਾਨਨ੍ਤਿ, ਨ ਅਪ੍ਪੇਸਕ੍ਖਾ, ਮਨੁਸ੍ਸਲੋਕੇ ਨੇਮਿਤ੍ਤਕਾ ਬ੍ਰਾਹ੍ਮਣਪਣ੍ਡਿਤਾਦਯੋਵਿਯ. ਮਹੇਸਕ੍ਖਾ ਦੇਵਤਾ ਤਂ ਪੁਬ੍ਬਨਿਮਿਤ੍ਤਂ ਦਿਸ੍ਵਾ ਨਨ੍ਦਵਨਂ ਨੇਤ੍ਵਾ ‘‘ਕਾਲੋ ਦੇਵਾ’’ਤਿ ਆਦੀਹਿ ਯਾਚਨ੍ਤਿ. ਮਹਾਸਕ੍ਕੋ ਤਤ੍ਥੇਵ ਨਨ੍ਦਵਨੁਯ੍ਯਾਨੇ ਕਾਲਦੀਪਦੇਸਕੁਲਮਾਤਰਵਸੇਨ ਪਞ੍ਚ ਵਿਲੋਕੇਤ੍ਵਾ ਚਵਿਤ੍ਵਾ ਤਮਾਰਮ੍ਮਣਂ ਕਤ੍ਵਾ ਮਹਾਮਾਯਾਯ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਅਗ੍ਗਹੇਸੀਤਿ ਸਨ੍ਨਿਟ੍ਠਾਨਮਵਗਨ੍ਤਬ੍ਬਂ.

ਤਤ੍ਥ ਕਾਲਨ੍ਤਿ ਮਨੁਸ੍ਸਲੋਕੇ ਏਕੂਨਤਿਂਸਤਿਮੇ ਵਸ੍ਸੇ ਵੇਸਾਖਪੁਣ੍ਣਮਦਿਵਸੇ ਬੁਦ੍ਧੋ ਭਵਿਸ੍ਸਾਮੀਤਿ ਕਾਲਂ ਓਲੋਕੇਸਿ. ਦੀਪਨ੍ਤਿ ਜਮ੍ਬੁਦੀਪੇਯੇਵ ਭਵਿਸ੍ਸਾਮਿ, ਨ ਅਞ੍ਞਦੀਪੇਸੂਤਿ ਦੀਪਂ ਓਲੋਕੇਸਿ. ਦੇਸਨ੍ਤਿ ਮਜ੍ਝਿਮਦੇਸੇਯੇਵ, ਤਞ੍ਚ ਖੋ ਮਹਾਬੋਧਿਮਣ੍ਡੇਯੇਵ, ਨ ਅਞ੍ਞਦੇਸੇਤਿ ਦੇਸਂ ਓਲੋਕੇਸਿ. ਕੁਲਨ੍ਤਿ ਦ੍ਵੇ ਕੁਲਾਨਿ ਖਤ੍ਤਿਯਕੁਲਬ੍ਰਾਹ੍ਮਣਕੁਲਵਸੇਨ. ਤਤ੍ਥ ਯਸ੍ਮਿਂ ਕਾਲੇ ਖਤ੍ਤਿਯਕੁਲਂ ਲੋਕੇ ਸੇਟ੍ਠਭਾਵੇਨ ‘‘ਅਯਮੇਵ ਲੋਕੇ ਅਗ੍ਗੋ’’ਤਿ ਸਮ੍ਮਨ੍ਨਤਿ, ਤਦਾ ਖਤ੍ਤਿਯਕੁਲੇਯੇਵ ਬੁਦ੍ਧਾ ਉਪ੍ਪਜ੍ਜਨ੍ਤਿ. ਯਸ੍ਮਿਂ ਪਨ ਕਾਲੇ ਬ੍ਰਾਹ੍ਮਣਕੁਲਂ ਅਯਮੇਵ ਲੋਕੇ ਅਗ੍ਗੋਤਿ, ਤਦਾ ਬ੍ਰਾਹ੍ਮਣਕੁਲੇਯੇਵ ਬੁਦ੍ਧਾ ਉਪ੍ਪਜ੍ਜਨ੍ਤਿ. ਇਦਾਨਿ ਪਨ ਖਤ੍ਤਿਯਕੁਲਮੇਵ ਅਗ੍ਗੋਤਿ ਸਮ੍ਮਨ੍ਨਨ੍ਤਿ. ਖਤ੍ਤਿਯਕੁਲੇਪਿ ਸਕ੍ਯਰਾਜਾਨੋਵ ਲੋਕੇ ਉਤ੍ਤਮਾ, ਅਸਮ੍ਭਿਨ੍ਨਖਤ੍ਤਿਯਕੁਲਤ੍ਤਾ ਤਸ੍ਮਾ ਸਕ੍ਯਰਾਜਕੁਲੇਯੇਵ ਭਵਿਸ੍ਸਾਮੀਤਿ ਕੁਲਂ ਓਲੋਕੇਸਿ. ਮਾਤਰਨ੍ਤਿ ਮਮ ਮਾਤਰਂ ਦਸ ਮਾਸਾਨਿ ਸਤ੍ਤ ਚ ਦਿਵਸਾਨਿ ਠਸ੍ਸਤਿ, ਏਤ੍ਥਨ੍ਤਰੇ ਮਮ ਮਾਤੁਯਾ ਅਰੋਗੋ ਭਵਿਸ੍ਸਤੀਤਿ ਮਾਤਰਮ੍ਪਿ ਓਲੋਕੇਸਿ. ਬੋਧਿਸਤ੍ਤਮਾਤਾ ਪਨ ਪਚ੍ਛਿਮਵਯੇ ਠਿਤਾ. ਏਵਂ ਯੁਤ੍ਤਿਤੋਪਿ ਆਗਮਤੋਪਿ ਭਗਵਤੋ ਨਿਬ੍ਬਾਨਚਿਤ੍ਤਸ੍ਸ ਪਟਸਨ੍ਧਿਚਿਤ੍ਤੇਨ ਗਹਿਤਨਿਮਿਤ੍ਤਮੇਵ ਆਰਮ੍ਮਣਂ ਹੋਤੀਤਿ ਵੇਦਿਤਬ੍ਬਂ.

ਸਬ੍ਬਞ੍ਞੁਜਿਨਨਿਬ੍ਬਾਨ, ਚਿਤ੍ਤਸ੍ਸ ਗੋਚਰਂ ਸੁਭਂ;

ਵਿਞ੍ਞੇਯ੍ਯਂ ਗਤਿਨਿਮਿਤ੍ਤਂ, ਗਨ੍ਥੇਹਿ ਅਵਿਰੋਧਤੋ.

ਧਾਤੁਪਰਿਨਿਬ੍ਬਾਨਮ੍ਪਿ ਬੋਧਿਮਣ੍ਡੇਯੇਵ ਭਵਿਸ੍ਸਤਿ ਵੁਤ੍ਤਞ੍ਹੇਤਂ ਉਪਰਿਪਣ੍ਣਾਸਕੇ ‘‘ਧਾਤੁਪਰਿਨਿਬ੍ਬਾਨਂ ਅਨਾਗਤੇ ਭਵਿਸ੍ਸਤਿ ਸਾਸਨਸ੍ਸ ਹਿ ਓਸਕ੍ਕਨਕਾਲੇ ਇਮਸ੍ਮਿਂ ਤਮ੍ਬਪਣ੍ਣਿਦੀਪੇ ਧਾਤੁਯੋ ਸਨ੍ਨਿਪਤਿਤ੍ਵਾ ਮਹਾਚੇਤਿਯਤੋ ਨਾਗਦੀਪੇ ਰਾਜਾਯਤਨਚੇਤਿਯਂ, ਤਤੋ ਮਹਾਬੋਧਿਪਲ੍ਲਙ੍ਕਂ ਗਮਿਸ੍ਸਨ੍ਤਿ. ਨਾਗਭਵਨਤੋਪਿ ਦੇਵਲੋਕਤੋਪਿ ਧਾਤੁਯੋ ਮਹਾਬੋਧਿਪਲ੍ਲਙ੍ਕਮੇਵ ਗਮਿਸ੍ਸਨ੍ਤਿ ਸਾਸਪਮਤ੍ਤਾਪਿ ਧਾਤੁਯੋ ਅਨ੍ਤਰਾ ਨ ਨਸ੍ਸਿਸ੍ਸਨ੍ਤਿ, ਸਬ੍ਬਾ ਧਾਤੁਯੋ ਮਹਾਬੋਧਿਪਲ੍ਲਙ੍ਕੇ ਰਾਸਿਭੂਤਾ ਸੁਵਣ੍ਣਕ੍ਖਨ੍ਧਾ ਵਿਯ ਏਕਗ੍ਘਨਾ ਹੁਤ੍ਵਾ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜਿਸ੍ਸਨ੍ਤਿ, ਤਾ ਦਸਸਹਸ੍ਸਲੋਕਧਾਤੁਂ ਫਰਿਸ੍ਸਨ੍ਤਿ. ਤਤੋ ਦਸਸਹਸ੍ਸਚਕ੍ਕਵਾਲ਼ੇਸੁ ਦੇਵਤਾ ਸਨ੍ਨਿਪਤਿਤ੍ਵਾ ''ਅਜ੍ਜ ਸਤ੍ਥਾ ਪਰਿਨਿਬ੍ਬਾਯਤਿ ਅਜ੍ਜ ਸਾਸਨਂ ਓਸਕ੍ਕਤਿ ਪਚ੍ਛਿਮਦਸ੍ਸਨਂ ਇਦਂ ਅਮ੍ਹਾਕ’’ਨ੍ਤਿ ਦਸਬਲਸ੍ਸ ਪਰਿਨਿਬ੍ਬੁਤਦਿਵਸਤੋ ਮਹਨ੍ਤਤਰਂ ਕਾਰੁਞ੍ਞਂ ਕਰਿਸ੍ਸਨ੍ਤਿ ਠਪੇਤ੍ਵਾ ਅਨਾਗਾਮਿਖੀਣਾਸਵੇ ਅਵਸੇਸਾ ਸਕਤ੍ਤਭਾਵੇਨ ਸਨ੍ਧਾਰੇਤੁਂ ਨਾਸਕ੍ਖਿਂਸੁ, ਧਾਤੁਸਰੀਰਤੋ ਤੇਜੋਧਾਤੁ ਉਟ੍ਠਹਿਤ੍ਵਾ ਯਾਵ ਬ੍ਰਹ੍ਮਲੋਕਾ ਉਗ੍ਗਚ੍ਛਿਸ੍ਸਤਿ. ਸਾਸਪਮਤ੍ਤਾਯਪਿ ਧਾਤੁਯਾ ਸਤਿ ਏਕਜਾਲਾ ਭਵਿਸ੍ਸਤਿ ਧਾਤੂਸੁ ਪਰਿਯਾਦਾਨਂ ਗਤਾਸੁ ਪਚ੍ਛਿਜ੍ਜਿਸ੍ਸਤਿ. ਏਵਂ ਮਹਨ੍ਤਂ ਆਨੁਭਾਵਂ ਦਸ੍ਸੇਤ੍ਵਾ ਧਾਤੂਸੁ ਅਨ੍ਤਰਹਿਤਾਸੁ ਸਾਸਨਂ ਅਨ੍ਤਰਹਿਤਂ ਨਾਮ ਹੋਤਿ. ਯਾਵ ਏਵਂ ਨ ਅਨ੍ਤਰਧਾਯਤਿ, ਤਾਵ ਅਨਨ੍ਤਰਧਾਨਮੇਵ ਸਾਸਨਂ. ਪਰਿਨਿਬ੍ਬਾਨਕਾਲਤੋ ਪਟ੍ਠਾਯ ਯਾਵ ਸਾਸਪਮਤ੍ਤਾ ਧਾਤੁ ਤਿਟ੍ਠਤਿ, ਤਾਵ ਬੁਦ੍ਧਕਾਲਤੋ ਪਚ੍ਛਾਤਿ ਨ ਵੇਦਿਤਬ੍ਬਂ ਧਾਤੂਸੁ ਹਿ ਠਿਤਾਸੁ ਬੁਦ੍ਧਾ ਠਿਤਾ ਵ ਹੋਨ੍ਤਿ, ਤਸ੍ਮਾ ਏਤ੍ਥਨ੍ਤਰੇ ਅਞ੍ਞਸ੍ਸ ਬੁਦ੍ਧਸ੍ਸ ਉਪ੍ਪਤ੍ਤਿ ਨਿਵਾਰਿਤਾਵ ਹੋਤਿ. ਤੇਨੇਵ ਵਦਾਮ.

ਪਰਿਨਿਬ੍ਬਾਨਕਾਲਤੋ, ਪਚ੍ਛਾ ਧਰਨ੍ਤਿ ਧਾਤੁਯੋ;

ਅਨਿਬ੍ਬੁਤੋਵ ਸਮ੍ਬੁਦ੍ਧੋ, ਅਞ੍ਞਬੁਦ੍ਧਸ੍ਸ ਵਾਰਿਤਾ.

ਜੀਵਮਾਨੇਪਿ ਸਮ੍ਬੁਦ੍ਧੇ, ਨਿਬ੍ਬੁਤੇ ਵਾ ਤਥਾਗਤੇ;

ਯੋ ਕਰੋਤਿ ਸਮਂ ਪੂਜਂ, ਫਲਂ ਤਾਸ ਸਮਂ ਸਿਯਾ’ਤਿ.

ਇਤਿ ਸਾਗਰਬੁਦ੍ਧਿਤ੍ਥੇਰਵਿਚਰਿਤੇ ਸੀਮਵਿਸੋਧਨੇ ਧਮ੍ਮਵਣ੍ਣਨਾਯ

ਨਿਬ੍ਬਾਨਕਣ੍ਡੋ ਤਤਿਯੋ ਪਰਿਚ੍ਛੇਦੋ.