੪. ਸਮਸੀਸਿਕਣ੍ਡੋ
ਇਦਾਨਿ ਸਙ੍ਘੋ ਚ ਦੁਲ੍ਲਭੋ ਲੋਕੇਤਿ ਪਦਸ੍ਸ ਵਣ੍ਣਨਾਕ੍ਕਮੋ ਸਮ੍ਪਤ੍ਤੋ. ਤਤ੍ਥ ਸਙ੍ਘੋਤਿ ਪਰਮਤ੍ਥਸਮ੍ਮੁਤਿਵਸੇਨ ਦੁਵਿਧੋ ਹੋਤਿ. ਤੇਸੁ ਪਰਮਤ੍ਥਸਙ੍ਘੋ ਚਤ੍ਤਾਰਿ ਪੁਰਿਸਯੁਗਾਨਿ, ਅਟ੍ਠਪੁਰਿਸਪੁਗ੍ਗਲਾ, ਚਤ੍ਤਾਲੀਸਮ੍ਪਿ ਪੁਗ੍ਗਲਾ, ਅਟ੍ਠਸਤਮ੍ਪਿ ਪੁਰਿਸਪੁਗ੍ਗਲਾਤਿ ਚਤੁਬ੍ਬਿਧੋ ਹੋਤਿ. ਤਤ੍ਥ ਸਙ੍ਖੇਪਵਸੇਨ ਸੋਤਾਪਤ੍ਤਿਮਗ੍ਗਟ੍ਠੋ ਫਲਟ੍ਠੋਤਿ ਏਕਂ ਯੁਗਂ, ਸਕਦਾਮਿਮਗ੍ਗਟ੍ਠੋ ਫਲਟ੍ਠੋਤਿ ਏਕਂ, ਅਨਾਗਾਮਿਮਗ੍ਗਟ੍ਠੋ ਫਲਟ੍ਠੋਤਿ ਏਕਂ, ਅਰਹਤ੍ਤਮਗ੍ਗਟ੍ਠੋ ਫਲਟ੍ਠੋਤਿ ਏਕਨ੍ਤਿ ਚਤ੍ਤਾਰਿ ਪੁਰਿਸਯੁਗਾਨਿ ਹੋਨ੍ਤਿ. ਚਤ੍ਤਾਰੋ ਮਗ੍ਗਟ੍ਠਾ ਚਤ੍ਤਾਰੋ ਫਲਟ੍ਠਾਤਿ ਅਟ੍ਠਪੁਰਿਸਪੁਗ੍ਗਲਾ ਹੋਨ੍ਤਿ. ਚਤ੍ਤਾਲੀਸਮ੍ਪਿ ਪੁਗ੍ਗਲਾਤਿ ਸੋਤਾਪਤ੍ਤਿਮਗ੍ਗਟ੍ਠੋ ਪਠਮਝਾਨਿਕਾਦਿਵਸੇਨ ਪਞ੍ਚ, ਤਥਾ ਸਕਦਾਗਾਮਿਅਨਾਗਾਮਿਅਰਹਤ੍ਤਮਗ੍ਗਟ੍ਠਾਪਿ ਪਞ੍ਚ ਪਞ੍ਚਾਤਿ ਵੀਸਤਿ ਮਗ੍ਗਟ੍ਠਪੁਗ੍ਗਲਾ, ਤਥਾ ਫਲਟ੍ਠਾਪਿ ਸੋਤਪਤ੍ਤਿਫਲਟ੍ਠਾਦਿਵਸੇਨ ਪਞ੍ਚ ਪਞ੍ਚਾਤਿ ਵੀਸਤਿ ਫਲਟ੍ਠਾਤਿ ਚਤ੍ਤਾਲੀਸਪੁਗ੍ਗਲਾ ਹੋਨ੍ਤਿ. ਏਤ੍ਥ ਚ ਮਗ੍ਗਸ੍ਸ ਏਕਚਿਤ੍ਤਕ੍ਖਣਿਕਤ੍ਤਾ ਕਥਂ ਵੀਸਤਿਮਗ੍ਗਟ੍ਠਾ ਪੁਗ੍ਗਲਾ ਭਵੇਯ੍ਯੁਨ੍ਤਿ.
ਵੁਚ੍ਚਤੇਪਾਦਕਜ੍ਝਾਨਸਮ੍ਮਸਿਤਜ੍ਝਾਨਪੁਗ੍ਗਲਜ੍ਝਾਸਯੇਸੁਪਿ ਹਿ ਅਞ੍ਞਤਰਵਸੇਨ ਤਂ ਤਂ ਝਾਨਸਦਿਸਵਿਤਕ੍ਕਾਦਿਅਙ੍ਗਪਾਤੁਭਾਵੇਨ ਚਤ੍ਤਾਰੋਪਿ ਮਗ੍ਗਟ੍ਠਾ ਪਠਮਜ੍ਝਾਨਿਕਾਦਿਵੋਹਾਰਂ ਲਭਨ੍ਤਾ ਪਚ੍ਚੇਕਂ ਪਞ੍ਚਪਞ੍ਚਧਾ ਵਿਭਜਿਯਨ੍ਤਿ, ਤਸ੍ਮਾ ਵੀਸਤਿ ਮਗ੍ਗਟ੍ਠਾ ਹੋਨ੍ਤਿ. ਤਤ੍ਥ ਪਠਮਜ੍ਝਾਨਾਦੀਸੁ ਯਂ ਯਂ ਝਾਨਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਨ੍ਤਸ੍ਸ ਵੁਟ੍ਠਾਨਗਾਮਿਨੀਵਿਪਸ੍ਸਨਾ ਪਵਤ੍ਤਾ, ਤਂ ਪਾਦਕਜ੍ਝਾਨਂ ਵੁਟ੍ਠਾਨਗਾਮਿਨਿਵਿਪਸ੍ਸਨਾਯ ਪਦਟ੍ਠਾਨਭਾਵਤੋ. ਯਂ ਯਂ ਝਾਨਂ ਸਮ੍ਮਸਨ੍ਤਸ੍ਸ ਸਾ ਪਵਤ੍ਤਾ, ਤਂ ਸਮ੍ਮਸਿਤਜ੍ਝਾਨਂ. ‘‘ਅਹੋ ਵਤ ਮੇ ਪਠਮਜ੍ਝਾਨਸਦਿਸੋ ਮਗ੍ਗੋ ਪਞ੍ਚਙ੍ਗਿਕੋ, ਦੁਤਿਯਜ੍ਝਾਨਾਦੀਸੁ ਵਾ ਅਞ੍ਞਤਰਸਦਿਸੋ ਚਤੁਰਙ੍ਗਿਕਾਦਿਭੇਦੋ ਮਗ੍ਗੋ ਭਵੇਯ੍ਯਾ’’ਤਿ ਏਵਂ ਯੋਗਾਵਚਰਸ੍ਸ ਉਪ੍ਪਨ੍ਨਜ੍ਝਾਸਯੋ ਪੁਗ੍ਗਲਜ੍ਝਾਸਯੋ ਨਾਮ. ਤਤ੍ਥ ਯੇਨ ਪਠਮਜ੍ਝਾਨਾਦੀਸੁ ਅਞ੍ਞਤਰਂ ਝਾਨਂ ਸਮਾਪਜ੍ਜਿਤ੍ਵਾ ਤਤੋ ਵੁਟ੍ਠਾਯ ਪਕਿਣ੍ਣਕਸਙ੍ਖਾਰੇ ਸਮ੍ਮਸਿਤ੍ਵਾ ਮਗ੍ਗੋ ਉਪ੍ਪਾਦਿਤੋ ਹੋਤਿ, ਤਸ੍ਸ ਸੋ ਮਗ੍ਗੋ ਪਠਮਜ੍ਝਾਨਾਦਿ ਤਂ ਤਂ ਪਾਦਕਜ੍ਝਾਨਸਦਿਸੋ ਹੋਤਿ. ਸਚੇ ਪਨ ਵਿਪਸ੍ਸਨਾਪਾਦਕਂ ਕਿਞ੍ਚਿਝਾਨਂ ਨਤ੍ਥਿ, ਕੇਵਲਂ ਪਠਮਜ੍ਝਾਨਾਦੀਸੁ ਅਞ੍ਞਤਰਂ ਝਾਨਂ ਸਮ੍ਮਸਿਤ੍ਵਾ ਮਗ੍ਗੋ ਉਪ੍ਪਾਦਿਤੋ ਹੋਤਿ, ਤਸ੍ਸ ਸੋ ਸਮ੍ਮਸਿਤਜ੍ਝਾਨਸਦਿਸੋ ਹੋਤਿ. ਯਦਾ ਪਨਯਂ ਕਿਞ੍ਚਿ ਝਾਨਂ ਸਮਾਪਜ੍ਜਿਤ੍ਵਾ ਤਤੋ ਅਞ੍ਞਂ ਸਮ੍ਮਸਿਤ੍ਵਾ ਮਗ੍ਗੋ ਉਪ੍ਪਾਦਿਤੋ ਹੋਤਿ, ਤਦਾ ਪੁਗ੍ਗਲਜ੍ਝਾਸਯਵਸੇਨ ਦ੍ਵੀਸੁ ਅਞ੍ਞਤਰਸਦਿਸੋ ਹੋਤਿ. ਏਵਂ ਸਮਥਯਾਨਿਕਸ੍ਸ ਪੁਥੁਜ੍ਜਨਸ੍ਸ ਅਰਿਯਾਨਂ ਵਾ ਪਾਦਕਜ੍ਝਾਨਸਮ੍ਮਸਿਤਜ੍ਝਾਨਪੁਗ੍ਗਲਜ੍ਝਾਸਯਵਸੇਨ ਪਠਮਜ੍ਝਾਨਾਦੀਨਂ ਅਞ੍ਞਤਰਝਾਨਸਦਿਸਸ੍ਸ ਮਗ੍ਗਙ੍ਗਿਕਸ੍ਸ ਪਵਤ੍ਤਨਤੋ ਪੁਗ੍ਗਲਭੇਦਵਸੇਨ ਵੀਸਤਿ ਮਗ੍ਗਟ੍ਠਾ ਪੁਗ੍ਗਲਾ ਹੋਨ੍ਤਿ, ਤਥਾ ਫਲਟ੍ਠਾਪਿ ਵੀਸਤੀਤਿ ਚਤ੍ਤਾਲੀਸਅਰਿਯਪੁਗ੍ਗਲਾ ਹੋਨ੍ਤਿ. ਅਪਰਮ੍ਪਿ ਸਚੇ ਪਨ ਪੁਗ੍ਗਲਸ੍ਸ ਤਥਾ ਵਿਧੋ ਅਜ੍ਝਾਸਯੋ ਨਤ੍ਥਿ, ਅਨੁਲੋਮਵਸੇਨ ਹੇਟ੍ਠਿਮਹੇਟ੍ਠਿਮਝਾਨਤੋ ਵੁਟ੍ਠਾਯ ਉਪਰੂਪਰਿਝਾਨਧਮ੍ਮੇ ਸਮ੍ਮਸਿਤ੍ਵਾ ਉਪ੍ਪਾਦਿਤਮਗ੍ਗੋ ਪਾਦਕਜ੍ਝਾਨਮਨਪੇਕ੍ਖਿਤ੍ਵਾ ਸਮ੍ਮਸਿਤਜ੍ਝਾਨਸਦਿਸੋ ਹੋਤਿ. ਪਟਿਲੋਮਵਸੇਨ ਉਪਰੂਪਰਿਝਾਨਤੋ ਵੁਟ੍ਠਾਯ ਹੇਟ੍ਠਿਮਹੇਟ੍ਠਿਮਝਾਨਧਮ੍ਮੇ ਸਮ੍ਮਸਿਤ੍ਵਾ ਉਪ੍ਪਾਦਿਤਮਗ੍ਗੋ ਸਮ੍ਮਸਿਤਜ੍ਝਾਨਮਨਪੇਕ੍ਖਿਤ੍ਵਾ ਪਾਦਕਜ੍ਝਾਨਸਦਿਸੋ ਹੋਤਿ, ਹੇਟ੍ਠਿਮਹੇਟ੍ਠਿਮਝਾਨਤੋ ਹਿ ਉਪਰੂਪਰਿਝਾਨਂ ਬਲਵਤਰਨ੍ਤਿ, ਅਟ੍ਠਸਤਮ੍ਪਿ ਪੁਰਿਸਪੁਗ੍ਗਲਾਤਿ ਤਤ੍ਥ ਏਕਬੀਜੀ, ਕੋਲਂਕੋਲੋ, ਸਤ੍ਤਕ੍ਖਤ੍ਤੁਪਰਮੋਤਿ ਤਯੋ ਸੋਤਾਪਨ੍ਨਾ. ਕਾਮਰੂਪਾਰੂਪਭਵੇਸੁ ਅਧਿਗਤਫਲਾ ਤਯੋ ਸਕਦਾਗਾਮਿਨੋਤਿ ਤੇ ਸਬ੍ਬੇਪਿ ਦੁਕ੍ਖਪਟਿਪਦਾ ਦਨ੍ਧਾਭਿਞ੍ਞਂ, ਦੁਕ੍ਖਪਟਿਪਦਾ ਖਿਪ੍ਪਾਭਿਞ੍ਞਂ, ਸੁਖਾਪਟਿਪਦਾ ਦਨ੍ਧਾਭਿਞ੍ਞਂ, ਸੁਖਾਪਟਿਪਦਾ ਖਿਪ੍ਪਾਭਿਞ੍ਞਨ੍ਤਿ ਚਤੁਨ੍ਨਂ ਪਟਿਪਦਾਨਂ ਵਸੇਨ ਚਤੁਵੀਸਤਿ, ਅਨ੍ਤਰਾਪਰਿਨਿਬ੍ਬਾਯੀ, ਉਪਹਚ੍ਚਪਰਿ ਨਿਬ੍ਬਾਯੀ, ਸਸਙ੍ਖਾਰਪਰਿਨਿਬ੍ਬਾਯੀ, ਅਸਙ੍ਖਾਰਪਰਿਨਿਬ੍ਬਾਯੀ, ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ ਅਵਿਹਾਸੁ ਪਞ੍ਚ ਅਨਾਮਿਗਾਨੋ, ਤਥਾ ਅਤਪ੍ਪਾਸੁਦਸ੍ਸਾਸੁਦਸ੍ਸੀਸੁਪਿ ਪਞ੍ਚ. ਅਕਨਿਟ੍ਠੇਸੁ ਪਨ ਉਦ੍ਧਂਸੋਤਵਜ੍ਜਾ ਅਨ੍ਤਰਾਪਰਿਨਿਬ੍ਬਾਯੀ, ਉਪਹਚ੍ਚਪਰਿਨਿਬ੍ਬਾਯੀ, ਸਸਙ੍ਖਾਰਪਰਿਨਿਬ੍ਬਾਯੀ, ਅਸਙ੍ਖਾਰਪਰਿਬ੍ਬਾਯੀਤਿ ਚਤ੍ਤਾਰੋਤਿ ਚਤੁਵੀਸਤਿ ਅਨਾਗਾਮਿਨੋ. ਸੁਕ੍ਖਵਿਪਸ੍ਸਕੋ, ਸਮਥਯਾਨਿਕੋਤਿ ਦ੍ਵੇ ਅਰਹਨ੍ਤੋ, ਚਤ੍ਤਾਰੋ ਮਗ੍ਗਟ੍ਠਾਤਿ ਚਤੁਪਞ੍ਞਾਸ ਤੇ ਸਬ੍ਬੇਪਿ ਸਦ੍ਧਾਧੁਰਪਞ੍ਞਾਧੁਰਾਨਂਵਸੇਨ ਦ੍ਵੇਗੁਣੇ ਹੁਤ੍ਵਾ ਅਟ੍ਠਸਤਂ ਅਰਿਯਪੁਗ੍ਗਲਾ ਹੋਨ੍ਤਿ. ਤੇ ਸਬ੍ਬੇਪਿ ‘‘ਅਟ੍ਠਸਤਂ ਵਾ’’ਤਿ ਵਿਤ੍ਥਾਰਵਸੇਨ ਉਦ੍ਦਿਟ੍ਠਾ ਅਰਿਯਪੁਗ੍ਗਲਾ ਤੇ ਸਙ੍ਖੇਪਤੋ ਯੁਗਵਸੇਨ ਸੋਤਾਪਤ੍ਤਿ ਮਗ੍ਗਟ੍ਠੋ ਫਲਟ੍ਠੋਤਿ ਏਕਂ ਯੁਗਨ੍ਤ੍ਯਾਦਿਨਾ ਚਤ੍ਤਾਰੋਵ ਹੋਨ੍ਤਿ. ਤੇਨੇਵਾਹ ਰਤਨਪਰਿਤ੍ਤੇ ‘‘ਯੇ ਪੁਗ੍ਗਲਾ ਅਟ੍ਠਸਤਂ ਪਸਤ੍ਥਾ, ਚਤ੍ਤਾਰਿ ਏਤਾਨਿ ਯੁਗਾਨਿ ਹੋਨ੍ਤੀ’’ਤਿ ਅਯਂ ਪਭੇਦੋਮਗ੍ਗਟ੍ਠਫਲਟ੍ਠੇਸੁ ਮਿਸ੍ਸਕਵਸੇਨ ਲਬ੍ਭਤਿ ਝਾਨਿਕਵਿਪਸ੍ਸਕਪਭੇਦੋ ਪਨ ਫਲਟ੍ਠੇਯੇਵ ਲਬ੍ਭਤਿ ਮਗ੍ਗਸ੍ਸ ਏਕਚਿਤ੍ਤਕ੍ਖਤਿਕਤ੍ਤਾ ਮਗ੍ਗਟ੍ਠੇਸੁ ਨ ਲਬ੍ਭਤਿ. ਤਤ੍ਥ ਸੋਤਾਪਤ੍ਤਿਫਲਟ੍ਠੋ ਝਾਨਿਕਸੁਕ੍ਖਵਿਪਸ੍ਸਕਵਸੇਨ ਦੁਵਿਧੋ. ਤੇਸੁ ਝਾਨਿਕੋ ਪੁਗ੍ਗਲੋ ਤਸ੍ਮਿਂ ਭਵੇ ਅਰਹਤ੍ਤਪ੍ਪਤ੍ਤੋ ਪਰਿਨਿਬ੍ਬਾਯਤਿ. ਅਪ੍ਪਤ੍ਤੋ ਬ੍ਰਹ੍ਮਲੋਕਗਤੋ ਹੋਤਿ, ਸੋ ਝਾਨਿਕੋ ਨਾਮ. ਮੂਲਟੀਕਾਯਂ ਪਨ ਨਿਕਨ੍ਤਿਯਾ ਸਤਿ ਪੁਥੁਜ੍ਜਨਾਦਯੋ ਯਥਾਲਦ੍ਧਜ੍ਝਾਨਸ੍ਸ ਭੂਮਿਭੂਤੇ ਸੁਦ੍ਧਾਵਾਸਵਜ੍ਜਿਤੇ ਯਤ੍ਥ ਕਤ੍ਥਚਿ ਨਿਬ੍ਬਤ੍ਤਨ੍ਤਿ ਤਥਾ ਕਾਮਭਵੇਪਿ ਕਾਮਾਵਚਰਕਮ੍ਮਬਲੇਨ ‘‘ਇਜ੍ਝਤਿ ਹਿ ਭਿਕ੍ਖਵੇ ਸੀਲਵਤੋ ਚੇਤੋਪਣਿਧਿ ਵਿਸੁਦ੍ਧਤ੍ਤਾ’’ਤਿ ਵੁਤ੍ਤਂ. ਅਨਾਗਾਮਿਨੋ ਪਨ ਕਾਮਰਾਗਸ੍ਸ ਸਬ੍ਬਸੋ ਪਹੀਨਤ੍ਤਾ ਕਾਮਭਵੇਸੁ ਨਿਕਨ੍ਤਿਂ ਨ ਉਪ੍ਪਾਦੇਨ੍ਤੀਤਿ ਕਾਮਲੋਕਵਜ੍ਜਿਤੇ ਯਥਾਲਦ੍ਧਸ੍ਸ ਭੂਮਿ ਭੂਤੇ ਯਤ੍ਥ ਕਤ੍ਥਚਿ ਨਿਬ੍ਬਤ੍ਤਨ੍ਤੀ’ਤਿ ਵੁਤ੍ਤਂ ਤਥਾ ਹਿ ਅਨਾਗਾਮਿਸ੍ਸੇਵ ਕਾਮਭਵੇ ਨਿਕਨ੍ਤਿਯਾ ਪਹੀਨਤ੍ਤਾ ਸੋਤਾਪਨ੍ਨਸਕਦਾਗਾਮੀਨਮ੍ਪਿ ਨਿਕਨ੍ਤਿਯਾ ਸਤਿ ਕਾਮਭਵੇ ਕਾਮਾਵਚਰਕਮ੍ਮਬਲੇਨ ਉਪ੍ਪਤ੍ਤਿਭਾਵੋ ਅਵਾਰਿਤੋਵ ਹੋਤੀਤਿ ਵਿਞ੍ਞਾਯਤਿ ਤਸ੍ਮਾ ‘‘ਅਪ੍ਪਤ੍ਤੇ ਬ੍ਰਹ੍ਮਲੋਕਗਤੋ ਹੋਤਿ, ਸੋ ਝਾਨਿਕੋ ਨਾਮਾਤਿ ਇਦਂ ਯੇਭੁਯ੍ਯਵਸੇਨ ਵੁਤ੍ਤ’’ਨ੍ਤਿ ਦਟ੍ਠਬ੍ਬਂ. ਸੁਕ੍ਖਵਿਪਸ੍ਸਕੋ ਪਨ ਤਿਵਿਧੋ ਏਕਬੀਜੀ, ਕੋਲਂਕੋਲੋ, ਸਤ੍ਤਕ੍ਖਤ੍ਤੁਪਰਮੋਤਿ. ਤਤ੍ਥ ਏਕੋ ਮਨੁਸ੍ਸਲੋਕੇ ਵਾ ਹੋਤੁ ਛਦੇਵਲੋਕੇ ਵਾ, ਏਕਪਟਿਸਨ੍ਧਿਕੋ ਹੁਤ੍ਵਾ ਅਰਹਤ੍ਤਂ ਪਤ੍ਵਾ ਪਰਿਨਿਬ੍ਬਾਯਤਿ, ਅਯਂ ਏਕਬੀਜੀ ਨਾਮ ਏਕੋ ਮਨੁਸ੍ਸਲੋਕੇ ਏਕਾ ਪਟਿਸਨ੍ਧਿ ਦੇਵਲੋਕੇ ਏਕਾਤਿ ਦ੍ਵੇਪਟਿਸਨ੍ਧਿਕੋ ਵਾ, ਏਵਂ ਤਿਚਤੁਪਞ੍ਚਛਪਰਮੋ ਹੁਤ੍ਵਾ ਅਰਹਤ੍ਤਂ ਪਤ੍ਵਾ ਪਰਿਨਿਬ੍ਬਾਯਤਿ, ਅਯਂ ਕੋਲਂਕੋਲੋ ਨਾਮ. ਏਕੋ ਮਨੁਸ੍ਸਲੋਕੇ ਸੋਤਾਪਨ੍ਨੋ ਹੁਤ੍ਵਾ ਦੇਵਲੋਕੇ ਏਕਾ ਪਟਿਸਨ੍ਧਿ ਤਤੋ ਪੁਨਾਗਨ੍ਤ੍ਵਾ ਮਨੁਸ੍ਸਲੋਕੇ ਏਕਾਤਿ ਏਵਂ ਮਨੁਸ੍ਸਦੇਵਲੋਕਮਿਸ੍ਸਕਵਸੇਨ ਤਤ੍ਥ ਚਤ੍ਤਾਰਿ ਇਧ ਤੀਣਿਤ੍ਯਾਦਿਨਾ ਤਤ੍ਥ ਛ, ਇਧ ਏਕੋਤਿ ਯਾਵ ਸਤ੍ਤਪਟਿਸਨ੍ਧਿਕੋ ਹੁਤ੍ਵਾ ਪਰਿਨਿਬ੍ਬਾਯਤਿ, ਅਯਂ ਸਤ੍ਤਕ੍ਖਤ੍ਤੁਪਰਮੋ ਨਾਮ. ਕੇਵਲਂ ਪਨ ਮਨੁਸ੍ਸਲੋਕੇ ਯੇਵ ਸਤ੍ਤ ਦੇਵਲੋਕੇਯੇਵ ਵਾ ਸਤ੍ਤਾਤਿ ਏਵਂ ਅਮਿਸ੍ਸੋ ਹੁਤ੍ਵਾ ਪਟਿਸਨ੍ਧਿਕੋ ਗਹੇਤਬ੍ਬੋ ਅਪਰੇ ਪਨ ‘‘ਇਤੋ ਸਤ੍ਤ, ਤਤੋ ਸਤ੍ਤ ਸਂਸਾਰੇ ਵਿਚਰਨ੍ਤੀ’’ਤਿ ਵੁਤ੍ਤਤ੍ਤਾ ਮਨੁਸ੍ਸਲੋਕਸਤ੍ਤਪਟਿਸਨ੍ਧਿਦੇਵਲੋਕ ਸਤ੍ਤਪਟਿਸਨ੍ਧਿਵਸੇਨ ਸਤ੍ਤਕ੍ਖਤ੍ਤੁਪਰਮਂ ਵਦਨ੍ਤਿ. ਤਂ ਅਯੁਤ੍ਤਂ ਕਸ੍ਮਾ ‘‘ਕਿਞ੍ਚਾਪਿ ਤੇ ਹੋਨ੍ਤਿ ਭੁਸਂਪਮਤ੍ਤਾ, ਨ ਤੇ ਭਵਂ ਅਟ੍ਠਮਮਾਦਿਯਨ੍ਤੀ’’ਤਿ ਪਾਲ਼ਿਯਾ ਵਿਰੋਧਤ੍ਤਾ. ਅਪਿਚ ਦ੍ਵਿਭਵਪਰਿਚ੍ਛਿਨ੍ਨੋ ਸਕਦਾਗਾਮੀਪਿ ਦ੍ਵਿਕ੍ਖਤ੍ਤੁਂ ਮਨੁਸ੍ਸਲੋਕਂ ਆਗਤੋ ਭਵੇਯ੍ਯ, ਤਸ੍ਸਪਿ ਤਤ੍ਥ ਏਕਂ, ਇਧ ਏਕਨ੍ਤਿ ਵਾਰਸ੍ਸ ਲਬ੍ਭਿਤਬ੍ਬਤੋ ਨ ਪਨੇਵਂ ਦਟ੍ਠਬ੍ਬਂ. ਸਕਿਂ ਇਮਂ ਮਨੁਸ੍ਸਲੋਕਂ ਆਗਚ੍ਛਤੀਤਿ ਸਕਦਾਗਾਮੀ ਇਧ ਪਤ੍ਵਾ ਇਧ ਪਰਿਨਿਬ੍ਬਾਯੀ, ਤਤ੍ਥ ਪਤ੍ਵਾ ਤਤ੍ਥ ਪਰਿਨਿਬ੍ਬਾਯੀ, ਤਤ੍ਥ ਪਤ੍ਵਾ ਇਧ ਪਰਿਨਿਬ੍ਬਾਯੀ, ਇਧ ਪਤ੍ਵਾ ਤਤ੍ਥ ਪਰਿਨਿਬ੍ਬਾਯੀਤਿ ਪਞ੍ਚਸੁ ਸਕਦਾਗਾਮੀਸੁ ਪਞ੍ਚਮਕੋ ਇਧ ਅਧਿਪ੍ਪੇਤੋ. ਯਦਿ ਏਵਂ ਇਧ ਪਤ੍ਵਾ ਇਧ ਪਰਿਨਿਬ੍ਬਾਯੀਤਿ ਆਦਯੋ ਚਤ੍ਤਾਰੋ ਕਥਂ ਸਕਦਾਗਾਮੀਨਾਮਾਤਿ. ਤੇ ਸਕਿਂ ਪੁਨ ਆਗਚ੍ਛਤੀਤਿ ਵਚਨਤ੍ਥੇਨ ਸਕਦਾਗਾਮੀ ਨਾਮ. ਕਾਮਤਣ੍ਹਾਯ ਸਬ੍ਬਸੋ ਪਹੀਨਤ੍ਤਾ ਇਮਂ ਕਾਮਧਾਤੁਂ ਅਨਾਗਚ੍ਛਤੀਤਿ ਅਨਾਗਾਮੀ, ਨਿਚ੍ਚਂ ਬ੍ਰਹ੍ਮਲੋਕੇਯੇਵ ਪਟਿਸਨ੍ਧਿ ਵਸੇਨ ਆਗਚ੍ਛਤੀਤਿ ਅਧਿਪ੍ਪਾਯੋ. ਝਾਨਿਕਸ੍ਸ ਏਵਂ ਹੋਤੁ, ਸੁਕ੍ਖਵਿਪਸ੍ਸਕਸ੍ਸ ਕਥਨ੍ਤਿ ਸੋਪਿ ਝਾਨਿਕੋਵ ਹੁਤ੍ਵਾ ਗਚ੍ਛਤਿ ਤਸ੍ਸ ਹਿ ਮਗ੍ਗਨ੍ਤਰੇ ਸੀਹਬ੍ਯਗ੍ਘਾਦੀਹਿ ਹਤਸ੍ਸਾਪਿ ਲਕ੍ਖਣਤ੍ਤਯਂ ਆਰੋਪੇਤ੍ਵਾ ਝਾਨਿਕੋ ਹੁਤ੍ਵਾਵ ਮਰਣਂ ਹੋਤਿ ਅਯਂ ਪਨ ਰੂਪਾਰੂਪਭਵੇਨ ਏਕਕ੍ਖਤ੍ਤੁਪਰਮੋ ਨਾਮ. ਸਤ੍ਤਕ੍ਖਤ੍ਤੁਪਰਮਾਦਯੋ ਅਰਿਯਾ ਰੂਪਾਰੂਪਲੋਕੇਸੁ ਅਨੇਕਕ੍ਖਤ੍ਤੁਪਟਿਸਨ੍ਧਿਕਾਪਿ ਬ੍ਰਹ੍ਮਲੋਕਸਾਮਞ੍ਞੇਨ ਏਕਪਟਿਸਨ੍ਧਿਕਾ ਨਾਮ ਹੋਨ੍ਤਿ. ਅਰਹਾ ਪਨ ਪਾਪਕਰਣੇ ਰਹਾਭਾਵਾ ਦਕ੍ਖਿਣਂ ਅਰਹਤ੍ਤਾ ਪੁਨ ਭਵਾ ਭਿਨਿਬ੍ਬਤ੍ਤਿਯਾਰਹਾਭਾਵਾਤ੍ਯਾਦਿਨਾ ਵਚਨਤ੍ਥੇਨ ਅਰਹਾ ਨਾਮ. ਸੋਪਿ ਤਿਵਿਧੋ ਝਾਨਿਕ ਸੁਕ੍ਖਵਿਪਸ੍ਸਕ ਸਮਸੀਸੀਵਸੇਨ. ਤਤ੍ਥ ਝਾਨਿਕੋ ਮਗ੍ਗੇਨੇਵ ਆਗਤੋ, ਸੋ ਪਟਿਸਮ੍ਭਿਦਾਪ੍ਪਤ੍ਤੋ ਨਾਮ. ਅਪਰੋਪਿ ਪੁਥੁਜ੍ਜਨਸੇਕ੍ਖਸਨ੍ਤਾਨੇ ਝਾਨਿਕੋ ਹੁਤ੍ਵਾ ਝਾਨਂ ਪਾਦਕਂ ਕਤ੍ਵਾ ਮਗ੍ਗਂ ਉਪ੍ਪਾਦੇਤਿ, ਸੋਪਿ ਝਾਨਿਕੋਵ. ਸੁਕ੍ਖਵਿਪਸ੍ਸਕੋ ਪਨ ਕਿਲੇਸਕ੍ਖਯਮਤ੍ਤਮੇਵ ਮਗ੍ਗੇਨ ਸਹ ਅਨਾਗਤਝਾਨਂ ਨਾਮ ਨਤ੍ਥਿ, ਤਂ ਪਚ੍ਛਾ ਪਰਿਹਾਯਤੀਤਿਪਿ ਵਦਨ੍ਤਿ. ਸਮਸੀਸੀ ਪਨ ਤਿਵਿਧੋ ਹੋਤਿ ਇਰਿਯਾਪਥਸਮਸੀਸੀ, ਰੋਗਸਮਸੀਸੀ, ਜੀਵਿਤਸਮਸੀਸੀਤਿ. ਤਤ੍ਥ ਯੋ ਠਾਨਾਦੀਸੁ ਇਰਿਯਾਪਥੇਸੁ ਯੇਨੇਵ ਇਰਿਯਪਥੇਨ ਸਮਨ੍ਨਾਗਤੋ ਹੁਤ੍ਵਾ ਵਿਪਸ੍ਸਨਂ ਆਰਭਤਿ, ਤੇਨੇਵ ਇਰਿਯਾਪਥੇਨ ਅਰਹਤ੍ਤਂ ਪਤ੍ਵਾ ਪਰਿਨਿਬ੍ਬਾਯਤਿ ਅਯਂ ਇਰਿਯਾਪਥਸਮਸੀਸੀ ਨਾਮ. ਯੋ ਪਨ ਏਕਂ ਰੋਗਂ ਪਤ੍ਵਾ ਅਨ੍ਤੋਰੋਗੇ ਏਵ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਰਹਤ੍ਤਂ ਪਤ੍ਵਾ ਤੇਨੇਵ ਰੋਗੇਨ ਪਰਿਨਿਬ੍ਬਾਯਤਿ ਅਯਂ ਰੋਗਸਮਸੀਸਿ ਨਾਮ. ਯੋ ਪਨ ਤੇਰਸਸੁ ਸੀਸੇਸੁ ਕਿਲੇਸਸੀਸਂ ਅਵਿਜ੍ਜਂ ਅਰਹਤ੍ਤਮਗ੍ਗੋ ਪਰਿਯਾਦਿਯਤਿ, ਪਵਤ੍ਤਿਸੀਸਂ ਜੀਵਿਤਿਨ੍ਦ੍ਰਿਯਂ ਚੁਤਿਚਿਤ੍ਤਂ ਪਰਿਯਾਦਿਯਤਿ, ਅਯਂ ਜੀਵਿਤਸਮਸੀਸੀਨਾਮ. ਤਤ੍ਥ ਤੇਰਸ ਸੀਸਾਨਿ ਕਤਮਾਨਿ ਤੇਰਸ ਸੀਸਾਨਿ. ਪਲਿਬੋਧਸੀਸਂ, ਤਣ੍ਹਾਬਨ੍ਧਨਸੀਸਂ, ਮਾਨਪਰਾਮਾਸਸੀਸਂ, ਦਿਟ੍ਠਿਵਿਕ੍ਖੇਪਸੀਸਂ, ਉਦ੍ਧਚ੍ਚਕਿਲੇਸਸੀਸਂ, ਅਵਿਜ੍ਜਾਅਧਿਮੋਕ੍ਖਸੀਸਂ, ਸਦ੍ਧਾਪਗ੍ਗਹਸੀਸਂ, ਵੀਰਿਯਉਪਟ੍ਠਾਨਸੀਸਂ, ਸਤਿਅਵਿਕ੍ਖੇਪਸੀਸਂ, ਸਮਾਧਿਦਸ੍ਸਨਸੀਸਂ, ਪਞ੍ਞਾਪਵਤ੍ਤਿਸੀਸਂ, ਜੀਵਿਤਿਨ੍ਦ੍ਰਿਯਗੋਚਰਸੀਸਂ, ਵਿਮੋਕ੍ਖਸਙ੍ਖਾਰਸੀਸਨ੍ਤਿ. ਏਤ੍ਥ ਚ ਅਵਿਜ੍ਜਾ ਪਰਿਯਾਦਾਯਕਂ ਮਗ੍ਗਚਿਤ੍ਤਂ ਜੀਵਿਤਿਨ੍ਦ੍ਰਿਯਂ ਪਰਿਯਾਦਾਤੁਂ ਸਕ੍ਕੋਤਿ, ਜੀਵਿਤਪਰਿਯਾਦਾਯਕਂ ਚੁਤਿਚਿਤ੍ਤਂ ਅਵਿਜ੍ਜਂ ਪਰਿਯਾਦਾਤੁਂ ਨ ਸਕ੍ਕੋਤਿ, ਅਵਿਜ੍ਜਾ ਪਰਿਯਾਦਾਯਕਂ ਚਿਤ੍ਤਂ ਅਞ੍ਞਂ, ਜੀਵਿਤਿਨ੍ਦ੍ਰਿਯਪਰਿਯਾਦਾਯਕਂ ਚਿਤ੍ਤਂ ਅਞ੍ਞਂ. ਕਥਂ ਪਨਿਦਂ ਸੀਸਂ ਸਮਂ ਹੋਤੀਤਿ. ਵਾਰਸਮਤਾਯ, ਯਸ੍ਮਿਞ੍ਹਿ ਵਾਰੇ ਮਗ੍ਗਵੁਟ੍ਠਾਨਂ ਹੋਤਿ, ਸੋਤਾਪਤ੍ਤਿਮਗ੍ਗੇ ਮਗ੍ਗਫਲਨਿਬ੍ਬਾਨਪਹੀਨਸੇਸਕਿਲੇਸਪਚ੍ਚਵੇਕ੍ਖਣਾਵਸੇਨ ਪਞ੍ਚ ਪਚ੍ਚਵੇਕ੍ਖਣਾਨਿ, ਤਥਾ ਸਕਦਾਮਿਮਗ੍ਗੇ ਪਞ੍ਚ, ਅਨਾਗਾਮਿਮਗ੍ਗੇ ਪਞ੍ਚ, ਅਰਹਤ੍ਤਮਗ੍ਗੇ ਸੇਸਕਿਲੇਸਾਭਾਵਾ ਚਤ੍ਤਾਰੀਤਿ ਏਕੂਨਵੀਸਤਿਮੇ ਪਚ੍ਚਵੇਕ੍ਖਣਞਾਣੇ ਪਤਿਟ੍ਠਾਯ ਭਵਙ੍ਗਂ ਓਤਰਿਤ੍ਵਾ ਪਰਿਨਿਬ੍ਬਾਯਤੋ ਇਮਾਯ ਵਾਰਸਮਤਾਯ ਇਦਂ ਉਭਯਸੀਸ ਪਰਿਯਾਦਾਨਮ੍ਪਿ ਸਮਂ ਹੋਤਿ ਨਾਮ. ਅਰਹਤ੍ਤਮਗ੍ਗੇ ਚ ਪਵਤ੍ਤਿਸੀਸਂ ਜੀਵਿਤਿਨ੍ਦ੍ਰਿਯਂ ਪਵਤ੍ਤਿਤੋ ਵੁਟ੍ਠਹਨ੍ਤੋ ਮਗ੍ਗੋ ਚੁਤਿਤੋ ਉਦ੍ਧਂ ਅਪ੍ਪਵਤ੍ਤਿਕਰਣਵਸੇਨ ਯਦਿਪਿ ਪਰਿਯਾਦਿਯਤਿ. ਯਾਵ ਪਨ ਚੁਤਿ, ਤਾਵ ਪਵਤ੍ਤਿਸਭਾਵਤੋ ਪਵਤ੍ਤਿਸੀਸਂ ਜੀਵਿਤਿਨ੍ਦ੍ਰਿਯਂ ਚੁਤਿਚਿਤ੍ਤਂ ਪਰਿਯਾਦਿਯਤਿ ਨਾਮ. ਕਿਲੇਸਪਰਿਯਾਦਾਨੇਨ ਮਗ੍ਗਚਿਤ੍ਤੇਨ ਅਤ੍ਤਨੋ ਅਨਨ੍ਤਰਂ ਵਿਯ ਨਿਪ੍ਫਾਦੇਤਬ੍ਬਾ ਪਚ੍ਚਵੇਕ੍ਖਣਵਾਰਾਵ ਪਰਿਪੁਣ੍ਣਾ. ਪਰਿਪੁਣ੍ਣਵਸੇਨ ਪਹੀਨਕਿਲੇਸੇ ਪਚ੍ਚਵੇਕ੍ਖਣਤੋ ਕਿਲੇਸਪਰਿਯਾਦਾਨਸ੍ਸੇਵ ਵਾਰਾਤਿ ਵਤ੍ਤਬ੍ਬਤਂ ਅਰਹਨ੍ਤਿ, ਤੇਨੇਵ ਕਿਲੇਸਸੀਸਂ ਅਵਿਜ੍ਜਾਪਰਿਯਾਦਾਨਞ੍ਚ ਪਵਤ੍ਤਿਸੀਸਂ ਜੀਵਿਤਿਨ੍ਦ੍ਰਿਯਪਰਿਯਾਦਾਨਞ੍ਚ ਸਮਂ ਕਤ੍ਵਾ ਇਮਾਯ ਵਾਰਸਮਤਾਯ ਕਿਲੇਸਪਰਿਯਾਦਾਨਂ ਜੀਵਿਤਪਰਿਯਾਦਾਨਾਨਂ ਅਪੁਬ੍ਬਚਰਿਮਤਾ ਵੇਦਿਤਬ੍ਬਾਤਿ ਵੁਤ੍ਤਂ. ਸਂਯੁਤ੍ਤਠਕਥਾਯਂ ਪਨ ਯਸ੍ਸ ਪੁਗ੍ਗਲਸ੍ਸ ਅਪੁਬ੍ਬਂ ਅਚਰਿਮਂ ਆਸਵਪਰਿਯਾਦਾਨਞ੍ਚ ਹੋਤਿ ਜੀਵਿਤਪਰਿਯਾਦਾਨਞ੍ਚ, ਅਯਂਤਿ ਪੁਗ੍ਗਲੋ ਸਮਸੀਸੀ. ਏਤ੍ਥ ਚ ਪਵਤ੍ਤਿਸੀਸਂ ਕਿਲੇਸਸੀਸਨ੍ਤਿ ਦ੍ਵੇ ਸੀਸਾਨਿ. ਤਤ੍ਥ ਪਵਤ੍ਤਿਸੀਸਂ ਨਾਮ ਜੀਵਿਤਿਨ੍ਦ੍ਰਿਯਂ. ਕਿਲੇਸਸੀਸਂ ਨਾਮ ਅਵਿਜ੍ਜਾ. ਤੇਸੁ ਜੀਵਿਤਿਨ੍ਦ੍ਰਿਯਂ ਚੁਤਿਚਿਤ੍ਤਂ ਖੇਪੇਤਿ. ਅਵਿਜ੍ਜਂ ਮਗ੍ਗਚਿਤ੍ਤਂ. ਦ੍ਵਿਨ੍ਨਂ ਚਿਤ੍ਤਾਨਂ ਏਕਤੋ ਉਪ੍ਪਾਦੋ ਨਤ੍ਥਿ. ਮਗ੍ਗਾਨਨ੍ਤਰਂ ਪਨ ਫਲਂ, ਫਲਾਨਨ੍ਤਰਂ ਭਵਙ੍ਗਂ, ਭਵਙ੍ਗਤੋ ਵੁਟ੍ਠਾਯ ਪਚ੍ਚਵੇਕ੍ਖਣਂ ਪਰਿਪੁਣ੍ਣਂ ਹੋਤਿ, ਤਂ ਅਪਰਿਪੁਣ੍ਣਂ ਵਾਤਿ. ਤਿਖਿਣੇਨ ਅਸਿਨਾ ਸੀਸੇ ਛਿਨ੍ਦਨ੍ਤੇਪਿ ਹਿ ਏਕੋ ਵਾ ਦ੍ਵੇ ਵਾ ਪਚ੍ਚਵੇਕ੍ਖਣਵਾਰਾ ਅਵਸ੍ਸਂ ਉਪ੍ਪਜ੍ਜਨ੍ਤਿਯੇਵ, ਚਿਤ੍ਤਾਨਂ ਪਨ ਲਹੁਪਰਿਵਤ੍ਤਿਤਾਯ ਆਸਵਕ੍ਖਯੋ ਚ ਜੀਵਿਤਪਰਿਯਾਦਾਨਞ੍ਚ ਏਕਕ੍ਖਣੇ ਵਿਯ ਸਞ੍ਜਾਯਤੀ’ਤਿ ਵੁਤ੍ਤਂ. ਤਟ੍ਟੀਕਾਯਞ੍ਚ ‘‘ਦ੍ਵਿਨ੍ਨਂ ਚਿਤ੍ਤਾਨਨ੍ਤਿ ਚੁਤਿਚਿਤ੍ਤਮਗ੍ਗਚਿਤ੍ਤਾਨਂ. ਤਨ੍ਤਿ ਪਚ੍ਚਯਵੇਕਲ੍ਲਂ. ਪਰਿਪੁਣ੍ਣਂ ਜਵਨਚਿਤ੍ਤਾਨਂ ਸਤ੍ਤਕ੍ਖਤ੍ਤੁਂ ਪਵਤ੍ਤਿਯਾ. ਅਪਰਿਪੁਣ੍ਣਂ ਪਞ੍ਚਕ੍ਖਤ੍ਤੁਂ ਪਵਤ੍ਤਿਯਾ. ਕਿਞ੍ਚਾਪਿ ਏਕੋ ਵਾ ਦ੍ਵੇ ਵਾ ਤਿ ਵੁਤ੍ਤਂ, ਤਂ ਪਨ ਵਚਨ ਸਿਲਿਟ੍ਠਵਸੇਨ ਵੁਤ੍ਤਂ. ਯਾਵ ਏਕਂ ਵਾ ਦ੍ਵੇ ਵਾ ਤਦਾਰਮ੍ਮਣਚਿਤ੍ਤਾਨੀਤਿ ਹੇਟ੍ਠਿਮਨ੍ਤੇਨ ਦ੍ਵੇ ਪਵਤ੍ਤਨ੍ਤੀਤਿ ਵਦਨ੍ਤੀ’’ਤਿ ਵੁਤ੍ਤਂ. ਏਤ੍ਥ ਚ ‘‘ਪਰਿਪੁਣ੍ਣਂ ਜਵਨਚਿਤ੍ਤਾਨਂ ਸਤ੍ਤਕ੍ਖਤ੍ਤੁਂ ਪਵਤ੍ਤਿਯਾ, ਅਪਰਿਪੁਣ੍ਣਂ ਪਞ੍ਛਕ੍ਖਤ੍ਤੁਂ ਪਵਤ੍ਤਿਯਾ’’ਤਿ ਇਮਿਨਾ ਅਟ੍ਠਕਥਾਟੀਕਾਵਚਨੇਨ ਸਮਸੀਸੀਨਂ ਪਚ੍ਚਵੇਕ੍ਖਣਾਵਸੇਨ ਮਰਣਾਸਨ੍ਨਵੀਥਿਯਂ ਪਰਿਪੁਣ੍ਣਵਸੇਨ ਸਤ੍ਤਕ੍ਖਤ੍ਤੁਂ, ਅਪਰਿਪੁਣ੍ਣਵਸੇਨ ਪਞ੍ਚਕ੍ਖਤ੍ਤੁਂ ਕ੍ਰਿਯਜਵਨਾਨਿ ਜਵਨ੍ਤੀਤਿ ਸਨ੍ਨਿਟ੍ਠਾਨਮੇਤ੍ਥਾਵ ਗਨ੍ਤਬ੍ਬਂ. ‘‘ਅਸਮ੍ਮੂਲ਼੍ਹੋ ਕਾਲਂ ਕਰੋਤੀ’’ਤਿ ਵੁਤ੍ਤਤ੍ਤਾ ਚ ਵਿਞ੍ਞਾਯਤਿ ਸਤ੍ਤਕ੍ਖਤ੍ਤੁਂ ਪਰਿਪੁਣ੍ਣਵਸੇਨ ਮਰਣਾਸਨ੍ਨਕਾਲੇ ਜਵਨਪਵਤ੍ਤਿ. ਏਵਞ੍ਚ ਸਤਿ ‘‘ਮਨ੍ਦਪ੍ਪਵਤ੍ਤਿਯਂ ਪਨ ਮਰਣਕਾਲਾਦੀਸੁ ਪਞ੍ਚਵਾਰਮੇਵਾ’’ਤਿ ਏਤ੍ਥ ‘‘ਮਨ੍ਦਪ੍ਪਵਤ੍ਤਿਯ’’ਨ੍ਤਿ ਵਿਸੇਸਨਂ ਸਾਤ੍ਥਕਂ ਸਿਯਾ. ‘‘ਪਞ੍ਚਵਾਰਮੇਵਾ’’ਤਿ ਏਤ੍ਥ ਏਵਕਾਰੇਨ ਮਨ੍ਦਪ੍ਪਵਤ੍ਤਿਕਾਲੇ ਛਸਤ੍ਤਕ੍ਖਤ੍ਤੁਂ ਨਿਵਤ੍ਤੇਤਿ. ਅਸਮ੍ਮੂਲ਼੍ਹਕਾਲੇ ਪਨ ਛਸਤ੍ਤਕ੍ਖਤ੍ਤੁਮ੍ਪਿ ਅਨੁਜਾਨਾਤਿ. ਕਾਮਾਵਚਰਜਵਨਾਨਞ੍ਚ ਅਨਿਯਤਪਰਿਮਾਣਾ ਬਲਵਕਾਲੇਪਿ ਪਰਿਸਮ੍ਪੁਣ੍ਣਭਾਵਾ ਤਥਾ ਹਿ ‘‘ਕਾਮਾਵਚਰਜਵਨਾਨਿਬਲਵਕਾਲੇ ਸਤ੍ਤਕ੍ਖਤ੍ਤੁਂ ਛਕ੍ਖਤ੍ਤੁਂ ਵਾ, ਮਨ੍ਦਪ੍ਪਵਤ੍ਤਿਯਂ ਪਨ ਮਰਣਕਾਲਾਦੀਸੁ ਪਞ੍ਚਵਾਰਮੇਵ. ਭਗਵਤੋ ਯਮਕਪਾਟਿਹਾਰਿਯਕਾਲਾਦੀਸੁ ਲਹੁਕਪ੍ਪਵਤ੍ਤਿਯਂ ਚਤ੍ਤਾਰਿ ਪਞ੍ਚਵਾ ਪਚ੍ਚਵੇਕ੍ਖਣਜਵਨਚਿਤ੍ਤਾਨਿ ਭਵਨ੍ਤੀ’’ਤਿ ਅਨਿਯਮਿਤਪ੍ਪਮਾਣਵਸੇਨ ਉਪ੍ਪਤ੍ਤਿਭਾਵੋ ਆਗਤੋ ਇਮਸ੍ਮਿਂ ਸਮਸੀਸਿਨਿਦ੍ਦੇਸਵਾਰੇਪਿ ਮਰਣਾਸਨ੍ਨਵੀਥਿਚਿਤ੍ਤਸ੍ਸ ਵਿਸੁਂ ਅਲਬ੍ਭਨਤੋ ਪਚ੍ਚਵੇਕ੍ਖਣਨ੍ਤੇਯੇਵ ਭਵਙ੍ਗਚਿਤ੍ਤੇਨ ਪਰਿਨਿਬ੍ਬਾਨਤੋ ਪਰਿਪੁਣ੍ਣਵਸੇਨ ਸਤ੍ਤ ਜਵਨਚਿਤ੍ਤਾਨਿ ਪਾਟਿਕਙ੍ਖਿਤਬ੍ਬਾਨੀਤਿ ਅਮ੍ਹਾਕਂ ਖਨ੍ਤਿ ਵੀਮਂਸਿਤ੍ਵਾ ਗਹੇਤਬ੍ਬੋ ਇਤੋ ਯੁਤ੍ਤਤਰੋ ਵਾ ਪਕਾਰੋ ਲਬ੍ਭਮਾਨੋ ਗਵੇਸਿਤਬ੍ਬੋ. ਏਵਂ ਪਰਮਤ੍ਥਸਙ੍ਘਵਸੇਨ ਚਤ੍ਤਾਰਿ ਪੁਰਿਸਯੁਗਾਨਿ, ਅਟ੍ਠ ਪੁਰਿਸਪੁਗ੍ਗਲਾ, ਚਤ੍ਤਾਲੀਸਮ੍ਪਿਪੁਗ੍ਗਲਾ ਅਟ੍ਠਸਤਮ੍ਪਿ ਪੁਰਿਸਪੁਗ੍ਗਲਾਤਿ ਸਬ੍ਬਂ ਸਮੋਧਾਨੇਤ੍ਵਾ ਇਮਸ੍ਮਿਂ ਲੋਕੇ ਸਙ੍ਘੋਪਿ ਦੁਲ੍ਲਭੋਤਿ ਵੇਦਿਤਬ੍ਬੋ ਤਥਾ ਹਿ ਅਰਿਯਪੁਗ੍ਗਲਾ ਅਤਿਦੁਲ੍ਲਭਾਵ ਸਾਸਨਸ੍ਸ ਵਿਜ੍ਜਮਾਨਕਾਲੇਪਿ ਇਦਾਨਿ ਸੋਤਾਪਨ੍ਨਸ੍ਸਾਪਿ ਅਵਿਜ੍ਜਮਾਨਤੋ ਅਯਂ ਪਰਮਤ੍ਥਸਙ੍ਘਵਿਚਾਰਣਾ. ਸਮ੍ਮੁਤਿਸਙ੍ਘੋ ਪਨ ਞਤ੍ਤਿਚਤੁਤ੍ਥੇਨ ਉਪਸਮ੍ਪਨ੍ਨੋ ਪੁਥੁਜ੍ਜਨਸਙ੍ਘੋਵ, ਸੋਪਿ ਦੁਲ੍ਲਭੋਯੇਵ. ਕਸ੍ਮਾ ਬੁਦ੍ਧੁਪ੍ਪਾਦਕਾਲੇਯੇਵ ਲਬ੍ਭਨਤੋ ਤਥਾ ਹਿ ਅਨੁਪ੍ਪਨ੍ਨੇ ਬੁਦ੍ਧੇ ਪਚ੍ਚੇਕਬੁਦ੍ਧਾਨਂ ਸਤਸਹਸ੍ਸਾਦਿਗਣਨੇ ਉਪ੍ਪਜ੍ਜਮਾਨੇਪਿ ਤੇਸਂ ਸਨ੍ਤਿਕੇ ਉਪਸਮ੍ਪਦਾਭਾਵਸ੍ਸ ਅਲਬ੍ਭਮਾਨਤੋ ਪਚ੍ਚੇਕਬੁਦ੍ਧਾਨਞ੍ਹਿ ਸਨ੍ਤਿਕੇ ਪਬ੍ਬਜਿਤਾਨਂ ਕੁਲਪੁਤ੍ਤਾਨਂ ਸਰਣਗਮਨਕਮ੍ਮਟ੍ਠਾਨਸ੍ਸਾਪਿ ਦਾਤੁਂ ਅਸਕ੍ਕੁਣੇਯ੍ਯਤ੍ਤਾ. ਪਚ੍ਚੇਕਬੁਦ੍ਧਾ ਚ ਨਾਮ ਮੂਗਸ੍ਸ ਸੁਪਿਨਦਸ੍ਸਨਂ ਵਿਯ ਅਤ੍ਤਨਾ ਪਟਿਲਦ੍ਧਸਚ੍ਚਧਮ੍ਮੇ ਪਰੇਸਂ ਆਚਿਕ੍ਖਿਤੁਂ ਨ ਸਕ੍ਕੋਨ੍ਤਿ, ਤਸ੍ਮਾ ਤੇ ਪਬ੍ਬਾਜੇਤ੍ਵਾ ਕਮ੍ਮਟ੍ਠਾਨੇ ਨਿਯੋਜੇਤੁਂ ਅਸਮਤ੍ਥਾ ‘‘ਏਵਂ ਤੇ ਨਿਵਾਸੇਤਬ੍ਬਂ, ਏਵਂ ਤੇ ਪਾਰੁਪਿਤਬ੍ਬ’’ਨ੍ਤਿ ਆਦਿਨਾਨਯੇਨ ਅਭਿਸਮਾਚਾਰਿਕਮੇਵ ਸਿਕ੍ਖਾਪੇਸੁਂ ਤਸ੍ਮਾ ਬੁਦ੍ਧੁਪ੍ਪਾਦਕਾਲੇਯੇਵ ਸਮ੍ਮੁਤਿਸਙ੍ਘੋ ਲਬ੍ਭਤਿ. ਅਪਿਚ ਨ ਤੇ ਦੁਲ੍ਲਭਾਯੇਵ ਹੋਨ੍ਤਿ, ਅਥ ਖੋ ਤਸ੍ਮਿਂ ਉਦ੍ਦਿਸ੍ਸ ਅਪ੍ਪਮਤ੍ਤਕਸ੍ਸਾਪਿ ਕਤਾਕਾਰਸ੍ਸ ਅਸਙ੍ਖ੍ਯੇਯ੍ਯਫਲਾਪਿ ਹੋਨ੍ਤਿ ਵੁਤ੍ਤਞ੍ਹੇਤਂ ਭਗਵਤਾ ‘‘ਭਵਿਸ੍ਸਨ੍ਤਿ ਖੋ ਪਨਾਨਨ੍ਦ ਅਨਾਗਤਮਦ੍ਧਾਨਂ ਗੋਤ੍ਰਭੁਨੋ ਕਾਸਾਵਕਣ੍ਠਾ ਦੁਸ੍ਸੀਲਾ ਪਾਪਧਮ੍ਮਾ ਤੇਸੁ ਦੁਸ੍ਸੀਲੇਸੁ ਸਙ੍ਘਂ ਉਦ੍ਦਿਸ੍ਸ ਦਾਨਂ ਦਸ੍ਸਨ੍ਤਿ, ਤਦਾ ਪਾਹਂ ਆਨਨ੍ਦ ਸਙ੍ਘਗਤਂ ਦਕ੍ਖਿਣਂ ਅਸਙ੍ਖ੍ਯੇਯ੍ਯਂ ਅਪ੍ਪਮੇਯ੍ਯਂ ਵਦਾਮਿ ਨ ਤ੍ਵੇਵਾਹਂ ਆਨਨ੍ਦ ਕੇਨਚਿ ਪਰਿਯਾਯੇਨ ਸਙ੍ਘਗਤਾ ਦਕ੍ਖਿਣਾ ਪਾਟਿਪੁਗ੍ਗਲਿਕਂ ਦਕ੍ਖਿਣਂ ਮਹਪ੍ਫਲਨ੍ਤਿ ਵਦਾਮੀ’’ਤਿ. ਤਥਾ ਹਿ ਉਪਰਿਪਣ੍ਣਾਸਕੇ ਦਕ੍ਖਿਣਵਿਭਙ੍ਗਵਣ੍ਣਨਾਯਂ ‘‘ਕਾਸਾਵਕਣ੍ਠਾਨਂ ਸਙ੍ਘੇ ਦਿਨ੍ਨੇ ਦਕ੍ਖਿਣਾਪਿ ਗੁਣਾਸਙ੍ਖ੍ਯਾਯ ਅਸਙ੍ਖ੍ਯੇਯ੍ਯਾ’’ਤਿ ਵੁਤ੍ਤਂ. ਸਙ੍ਘਗਤਦਕ੍ਖਿਣਾ ਹਿ ਸਙ੍ਘੇ ਚਿਤ੍ਤੀਕਾਰਂ ਕਾਤੁਂ ਸਕ੍ਕੋਨ੍ਤਸ੍ਸ ਹੋਤਿ. ਸਙ੍ਘੇ ਪਨ ਚਿਤ੍ਤੀਕਾਰੋ ਦੁਕ੍ਕਰੋ ਯੋ ਹਿ ‘‘ਸਙ੍ਘਗਤਂ ਦਕ੍ਖਿਣਂ ਦਸ੍ਸਾਮੀ’’ਤਿ ਦੇਯ੍ਯਧਮ੍ਮਂ ਪਟਿਯਾਦੇਤ੍ਵਾ ਵਿਹਾਰਂ ਗਨ੍ਤ੍ਵਾ ਭਨ੍ਤੇ ਸਙ੍ਘਂ ਉਦ੍ਦਿਸ੍ਸ ਏਕਂ ਥੇਰਂ ਦੇਥਾ’ਤਿ ਵਦਤਿ, ਅਥ ਸਙ੍ਘਤੋ ਸਾਮਣੇਰਂ ਲਭਿਤ੍ਵਾ ‘‘ਸਾਮਣੇਰੋ ਮੇ ਲਦ੍ਧੋ’’ਤਿ ਅਞ੍ਞਥਤ੍ਤਂ ਆਪਜ੍ਜਤਿ, ਤਸ੍ਸ ਦਕ੍ਖਿਣਾ ਸਙ੍ਘਗਤਾ ਨ ਹੋਤਿ. ਮਹਾਥੇਰਂ ਲਭਿਤ੍ਵਾ ਪਿ ‘‘ਮਹਾਥੇਰੋ ਮੇ ਲਦ੍ਧੋ’’ਤਿ ਸੋਮਨਸ੍ਸਂ ਉਪ੍ਪਾਦੇਨ੍ਤਸ੍ਸਾਪਿ ਨ ਹੋਤਿਯੇਵ. ਤਸ੍ਸ ਦਕ੍ਖਿਣਾ ਸਙ੍ਘਗਤਾ ਨ ਹੋਤਿ. ਯੋ ਪਨ ਸਾਮਣੇਰਂ ਉਪਸਮ੍ਪਨ੍ਨਂ ਵਾ ਦਹਰਂ ਵਾ ਥੇਰਂ ਵਾ ਬਾਲਂ ਵਾ ਪਣ੍ਡਿਤਂ ਵਾ ਯਂਕਿਞ੍ਚਿ ਸਙ੍ਘਤੋ ਲਭਿਤ੍ਵਾ ਨਿਬ੍ਬੇਮਤਿਕੋ ਹੁਤ੍ਵਾ ‘‘ਸਙ੍ਘਸ੍ਸ ਦਮ੍ਮੀ’’ਤਿ ਸਙ੍ਘੇ ਚਿਤ੍ਤੀਕਾਰਂ ਕਾਤੁਂ ਸਕ੍ਕੋਤਿ, ਤਸ੍ਸ ਦਕ੍ਖਿਣਾ ਸਙ੍ਘਗਤਾ ਨਾਮ ਹੋਤਿ. ਪਰਸਮੁਦ੍ਦਵਾਸਿਨੋ ਕਿਰ ਏਵਂ ਕਰੋਨ੍ਤਿ ਤਤ੍ਥ ਹਿ ਏਕੋ ਵਿਹਾਰਸ੍ਸਾਮਿਕੁਟੁਮ੍ਬਿਕੋ ‘‘ਸਙ੍ਘਗਤਂ ਦਕ੍ਖਿਣਂ ਦਸ੍ਸਾਮੀ’’ਤਿ ਸਙ੍ਘਤੋ ਉਦ੍ਦਿਸਿਤ੍ਵਾ ‘‘ਏਕਂ ਭਿਕ੍ਖੁਂ ਦੇਥਾ’’ਤਿ ਯਾਚਿਤ੍ਵਾ ਸੋ ਏਕਂ ਦੁਸ੍ਸੀਲਭਿਕ੍ਖੁਂ ਲਭਿਤ੍ਵਾ ਨਿਸੀਦਨਟ੍ਠਾਨਂ ਓਪੁਞ੍ਜਾਪੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਉਪਰਿ ਵਿਤਾਨਂ ਬਨ੍ਧਿਤ੍ਵਾ ਗਨ੍ਧਧੂਮਪੁਪ੍ਫੇਹਿ ਪੂਜੇਤ੍ਵਾ ਪਾਦੇ ਧੋਵਿਤ੍ਵਾ ਮਕ੍ਖੇਤ੍ਵਾ ਬੁਦ੍ਧਸ੍ਸ ਨਿਪਚ੍ਚਕਾਰਂ ਕਰੋਨ੍ਤੋ ਵਿਯ ਸਙ੍ਘੇ ਚਿਤ੍ਤੀਕਾਰੇਨ ਦੇਯ੍ਯਧਮ੍ਮਂ ਅਦਾਸਿ ਸੋ ਭਿਕ੍ਖੁ ਪਚ੍ਛਾਭਤ੍ਤਂ ਵਿਹਾਰਂ ਜਗ੍ਗਨਤ੍ਥਾਯ ‘‘ਕੁਦਾਲਕਂ ਦੇਥਾ’’ਤਿ ਘਰਦ੍ਵਾਰਂ ਆਗਤੋ ਉਪਾਸਕੋ ਨਿਸਿਨ੍ਨੋਵ ਕੁਦਾਲਂ ਪਾਦੇਨ ਖਿਪਿਤ੍ਵਾ ‘‘ਗਣ੍ਹਾ’’ਤਿ ਅਦਾਸਿ ਤਮੇਨਂ ਮਨੁਸ੍ਸਾ ਆਹਂਸੁ ‘‘ਤੁਮ੍ਹੇਹਿ ਪਾਤੋਵ ਏਤਸ੍ਸ ਕਤਸਕ੍ਕਾਰੋ ਵਤ੍ਤੁਂ ਨ ਸਕ੍ਕਾ, ਇਦਾਨਿ ਅਪਚਯਮਤ੍ਤਕਮ੍ਪਿ ਨਤ੍ਥਿ, ਕਿਂ ਨਾਮੇਤ’’ਨ੍ਤਿ. ਉਪਾਸਕੋ ‘‘ਸਙ੍ਘਸ੍ਸ ਸੋ ਅਯ੍ਯੋ ਚਿਤ੍ਤੀਕਾਰੋ, ਨ ਏਤਸ੍ਸਾ’’ਤਿ ਆਹ. ਕਾਸਾਵਕਣ੍ਠਸਙ੍ਘਦਿਨ੍ਨਦਕ੍ਖਿਣਂ ਪਨ ਕੋ ਸੋਧੇਤਿ, ਸਾਰਿਪੁਤ੍ਤਮੋਗ੍ਗਲਾਨਾਦਯੋ ਅਸੀਤਿਮਹਾਥੇਰਾ ਸੋਧੇਨ੍ਤਿ ਅਪਿ ਚ ਥੇਰਾ ਚਿਰਪਰਿਨਿਬ੍ਬੁਤਾ, ਥੇਰੇ ਆਦਿਂ ਕਤ੍ਵਾ ਯਾਵਜ੍ਜਤਨਾ ਧਰਮਾਨਖੀਣਾਸਵਾ ਸੋਧੇਨ੍ਤਿਯੇਵ, ਤਥਾ ਹਿ ਦਾਯਕਤੋ ਪਟਿਗ੍ਗਾਹਤੋਪਿ ਮਹਪ੍ਫਲਂ ਹੋਤਿ ਦਾਨਂ. ਦਾਯਕਤੋ ਵੇਸ੍ਸਨ੍ਤਰਜਾਤਕਂ ਕਥੇਤਬ੍ਬਂ ਵੇਸ੍ਸਨ੍ਤਰੋ ਹਿ ਦੁਸ੍ਸੀਲਸ੍ਸ ਜੂਜਕਾਬ੍ਰਾਹ੍ਮਣਸ੍ਸ ਨਯਨਸਦਿਸੇ ਦ੍ਵੇ ਜਾਲੀਕਣ੍ਹਾਜਿਨੇ ਪੁਤ੍ਤੇ ਦਤ੍ਵਾ ਪਥਵਿਂ ਕਮ੍ਪੇਸਿ. ਸਬ੍ਬਞ੍ਞੁਤਞ੍ਞਾਣਂ ਆਰਬ੍ਭ ਪਵਤ੍ਤਚੇਤਨਾਯ ਮਹਨ੍ਤਭਾਵੇਨ ਪਥਵਿਂ ਕਮ੍ਪੇਸਿ. ਏਵਂ ਦਾਯਕਤੋਪਿ ਮਹਪ੍ਫਲਂ ਹੋਤਿ. ਪਟਿਗ੍ਗਾਹਕਤੋ ਪਨ ਸਾਰਿਪੁਤ੍ਤਤ੍ਥੇਰਸ੍ਸ ਦਿਨ੍ਨਚੋਰਘਾਤਕਵਤ੍ਥੁ ਕਥੇਤਬ੍ਬਂ ਚੋਰਘਾਤਕੋ ਨਾਮ ਹਿ ਸਾਵਤ੍ਥਿਯਂ ਏਕੋ ਜਨਪਦਪੁਰਿਸੋ ਪਞ੍ਚਵੀਸਤਿ ਵਸ੍ਸਾਨਿ ਚੋਰਘਾਤਕਕਮ੍ਮਂ ਕਤ੍ਵਾ ਮਹਲ੍ਲਕਕਾਲੇਪਿ ਤਿਂਸ ਵਸ੍ਸਾਨਿ ਨਾਸਿਕਵਾਤੇਨੇਵ ਕਣ੍ਣਨਾਸਾਦੀਨਿ ਛਿਨ੍ਦਿਤ੍ਵਾ ਚੋਰਘਾਤਕਕਮ੍ਮਂ ਕਰੋਨ੍ਤਸ੍ਸੇਵ ਪਞ੍ਚਪਞ੍ਞਾਸ ਵਸ੍ਸਾਨਿ ਵੀਤਿਵਤ੍ਤਾਨਿ. ਸੋ ਮਰਣ ਮਞ੍ਚੇ ਨਿਪਨ੍ਨੋਵ ਅਤ੍ਤਨੋ ਕਮ੍ਮਬਲੇਨ ਮਹਾਨਿਰਯੇ ਨਿਬ੍ਬਤ੍ਤੋ ਵਿਯ ਮਹਾਸਦ੍ਦਂ ਕਤ੍ਵਾ ਦੁਕ੍ਖਿਤੋ ਹੋਤਿ, ਤਸ੍ਸ ਸਦ੍ਦੇਨ ਭੀਤਾ ਮਨੁਸ੍ਸਾ ਉਭਤੋ ਪਸ੍ਸੇ ਗੇਹਂ ਛਡ੍ਡੇਤ੍ਵਾ ਪਲਾਯਿਂਸੁ. ਤਦਾ ਸਾਰਿਪੁਤ੍ਤਤ੍ਥੇਰੋ ਦਿਬ੍ਬਚਕ੍ਖੁ ਨਾ ਲੋਕਂ ਵੋਲੋਕੇਨ੍ਤੋ ਤਂ ਦਿਸ੍ਵਾ ਤਸ੍ਸ ਅਨੁਕਮ੍ਪਂ ਪਟਿਚ੍ਚ ਤਸ੍ਸ ਗੇਹਦ੍ਵਾਰੇ ਅਟ੍ਠਾਸਿ. ਸੋ ਕੁਜ੍ਝਿਤ੍ਵਾ ਤਿਕ੍ਖਤ੍ਤੁਂ ਨਾਸਿਕਵਾਤੇਨ ਵਿਸ੍ਸਜ੍ਜਮਾਨੋਪਿ ਵਿਸ੍ਸਜ੍ਜਿਤੁਂ ਅਸਕ੍ਕੋਨ੍ਤੋ ਅਤਿਵਿਰੋਚਮਾਨਂ ਥੇਰਂ ਦਿਸ੍ਵਾ ਅਤਿਵਿਯ ਪਸੀਦਿਤ੍ਵਾ ਅਤ੍ਤਨੋ ਅਤ੍ਥਾਯ ਸਮ੍ਪਾਦਿਤਂ ਪਾਯਾਸਂ ਅਦਾਸਿ. ਥੇਰੋਪਿ ਮਙ੍ਗਲਂ ਵਡ੍ਢੇਤ੍ਵਾ ਪਕ੍ਕਮਿ. ਚੋਰਘਾਤਕੋ ਥੇਰਸ੍ਸ ਦਿਨ੍ਨਦਾਨਂ ਅਨੁਸ੍ਸਰਿਤ੍ਵਾ ਸਗ੍ਗੇ ਨਿਬ੍ਬਤ੍ਤਿ, ਏਵਂ ਪਟਿਗ੍ਗਾਹਕਤੋਪਿ ਮਹਪ੍ਫਲਂ ਹੋਤਿ. ਉਭਯਤੋਪਿ ਮਹਪ੍ਫਲਂ, ਅਨਾਥਪਿਣ੍ਡਿਕਵਿਸਾਖਾਦਯੋ ਬੁਦ੍ਧਪ੍ਪਮੁਖਸ੍ਸ ਦਿਨ੍ਨਦਾਨਂ ਵੇਦਿਤਬ੍ਬਂ.
ਵੁਤ੍ਤਞ੍ਹੇਤਂ ਭਗਵਤਾ.
‘‘ਤਥਾਗਤੇ ਚ ਸਮ੍ਬੁਦ੍ਧੇ, ਅਥਵਾ ਤਸ੍ਸ ਸਾਵਕੇ;
ਨਤ੍ਥਿ ਚਿਤ੍ਤੇ ਪਸਨ੍ਨਮ੍ਹਿ, ਅਪ੍ਪਕਾ ਨਾਮ ਦਕ੍ਖਿਣਾ.
ਏਵਂ ਅਚਿਨ੍ਤਿਯਾ ਬੁਦ੍ਧਾ, ਬੁਦ੍ਧਧਮ੍ਮਾ ਅਚਿਨ੍ਤਿਯਾ;
ਅਚਿਨ੍ਤਿਯੇ ਪਸਨ੍ਨਾਨਂ, ਵਿਪਾਕੋ ਹੋਤਿ ਅਚਿਨ੍ਤਿਯੋ’’ਤਿ.
ਏਵਂ ਉਭਯਵਸੇਨ ਮਹਪ੍ਫਲਭਾਵੋ ਵੇਦਿਤਬ੍ਬੋ. ਦਾਯਕਤੋਪਿ ਪਟਿਗ੍ਗਾਹਕਤੋਪਿ ਨਿਪ੍ਫਲਮੇਵ. ਸੇਯ੍ਯਥਾਪਿ ਮਕ੍ਖਲਿਗੋਸਾਲਛਸਤ੍ਥਾਰਾਦੀਨਂ ਅਤ੍ਤਨੋ ਉਪਾਸਕਮਿਚ੍ਛਾਦਿਟ੍ਠੀਹਿ ਪੂਜਾਵਿਸੇਸਾ ਵੁਤ੍ਤਞ੍ਹੇਤਂ ਭਗਵਤਾ.
‘‘ਮਾਸੇ ਮਾਸੇ ਕੁਸਗ੍ਗੇਨ, ਬਾਲੋ ਭੁਞ੍ਜੇਯ੍ਯ ਭੋਜਨਂ;
ਨ ਸੋ ਸਙ੍ਖਤਧਮ੍ਮਾਨਂ, ਕਲਂ ਨਾਗ੍ਘਤਿ ਸੋਲ਼ਸਿ’’ਨ੍ਤਿ.
ਤੇਨੇਵਾਹ ਭਗਵਾ ਚਤ੍ਤਾਰਿਮਾਨਿ ਆਨਨ੍ਦ ਦਕ੍ਖਿਣਵਿਸੁਦ੍ਧਿਯੋ’’ਤਿ. ਇਮਾਨਿ ਤੀਣਿ ਬੁਦ੍ਧਧਮ੍ਮਸਙ੍ਘਰਤਨਾਨਿ ਸਾਧੂਨਂ ਰਤਿਜਨਨਤ੍ਥੇਨ ਰਤਨਾਨਿ ਨਾਮ.
ਵੁਤ੍ਤਞ੍ਹੇਤਂ.
‘‘ਚਿਤ੍ਤੀਕਤਂ ਮਹਗ੍ਘਞ੍ਚ, ਅਤੁਲਂ ਦੁਲ੍ਲਭਦਸ੍ਸਨਂ;
ਅਨੋਮਸਤ੍ਤਪਰਿਭੋਗਂ, ਰਤਨਂ ਤੇਨ ਵੁਚ੍ਚਤੀ’’ਤਿ.
ਰਤਨਞ੍ਚ ਨਾਮ ਦੁਵਿਧਂ ਸਵਿਞ੍ਞਾਣਕਾਵਿਞ੍ਞਾਣਕਵਸੇਨ. ਤਤ੍ਥ ਅਵਿਞ੍ਞਾਣਕਂ ਚਕ੍ਕਰਤਨਂ, ਮਣਿਰਤਨਂ ਯਂ ਵਾ ਪਨਞ੍ਞਮ੍ਪਿ ਅਨਿਨ੍ਦ੍ਰਿਯਬਦ੍ਧਸੁਵਣ੍ਣਰਜਤਾਦਿ. ਸਵਿਞ੍ਞਾਣਕਂ ਹਤ੍ਥਿਅਸ੍ਸਰਤਨਾਦਿਪਰਿਣਾਯਕਰਤਨਪਰਿਯੋਸਾਨਂ, ਯਂ ਵਾ ਪਨਞ੍ਞਮ੍ਪਿ ਇਨ੍ਦ੍ਰਿਯਬਦ੍ਧਂ. ਏਵਂ ਦੁਵਿਧੇ ਚੇਤ੍ਥ ਸਵਿਞ੍ਞਾਣਕਰਤਨਂ ਅਗ੍ਗਮਕ੍ਖਾਯਤਿ, ਕਸ੍ਮਾ ਯਸ੍ਮਾ ਅਵਿਞ੍ਞਾਣਕਂ ਸੁਵਣ੍ਣਰਜਤਮਣਿਮੁਤ੍ਤਾਦਿਰਤਨਂ ਸਵਿਞ੍ਞਾਣਕਾਨਂ ਹਤ੍ਤਿਰਤਨਾਦੀਨਂ ਅਲਙ੍ਕਾਰਤ੍ਥਾਯ ਉਪਨੀਯਤਿ. ਸਵਿਞ੍ਞਾਣਕਰਤਨਮ੍ਪਿ ਦੁਵਿਧਂ ਤਿਰਚ੍ਛਾਨਗਤਰਤਨਂ ਮਨੁਸ੍ਸਰਤਨਞ੍ਚ. ਤਤ੍ਥ ਮਨੁਸ੍ਸਰਤਨਂ ਅਗ੍ਗਮਕ੍ਖਾਯਤਿ. ਕਸ੍ਮਾ ਯਸ੍ਮਾ ਤਿਰਚ੍ਛਾਨਗਤਰਤਨਂ ਮਨੁਸ੍ਸਰਤਨਸ੍ਸ ਓਪਵਯ੍ਹਂ ਹੋਤਿ. ਮਨੁਸ੍ਸਰਤਨਮ੍ਪਿ ਦੁਵਿਧਂ ਇਤ੍ਥਿਰਤਨਂ ਪੁਰਿਸਰਤਨਞ੍ਚ. ਤਤ੍ਥ ਪੁਰਿਸਰਤਨਂ ਅਗ੍ਗਮਕ੍ਖਾਯਤਿ. ਕਸ੍ਮਾ ਯਸ੍ਮਾ ਇਤ੍ਥਿਰਤਨਂ ਪੁਰਿਸਰਤਨਸ੍ਸ ਪਰਿਚਾਰਿਕਤ੍ਤਂ ਆਪਜ੍ਜਤਿ. ਪੁਰਿਸਰਤਨਮ੍ਪਿ ਦੁਵਿਧਂ ਅਗਾਰਿਕਰਤਨਂ ਅਨਗਾਰਿਕਰਤਨਞ੍ਚ ਤਤ੍ਥ ਅਨਗਾਰਿਕਰਤਨਂ ਅਗ੍ਗਮਕ੍ਖਾਯਤਿ. ਕਸ੍ਮਾ ਯਸ੍ਮਾ ਅਗਾਰਿਕਰਤਨੇਸੁ ਅਗ੍ਗੋ ਚਕ੍ਕਵਤ੍ਤੀਪਿ ਸੀਲਾਦਿਗੁਣਯੁਤ੍ਤਂ ਅਨਗਾਰਿਕਰਤਨਂ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਉਪਟ੍ਠਹਿਤ੍ਵਾ ਪਯਿਰੁਪਾਸਿਤ੍ਵਾ ਦਿਬ੍ਬਮਾਨੁਸ੍ਸਿਕਾ ਸਮ੍ਪਤ੍ਤਿਯੋ ਪਾਪੁਣਿਤ੍ਵਾ ਅਨ੍ਤੇ ਨਿਬ੍ਬਾਨਸਮ੍ਪਤ੍ਤਿਂ ਪਾਪੁਣਾਤਿ. ਅਨਗਾਰਿਕਰਤਨਮ੍ਪਿ ਦੁਵਿਧਂ ਅਰਿਯਪੁਥੁਜ੍ਜਨਵਸੇਨ. ਅਰਿਯਰਤਨਮ੍ਪਿ ਦੁਵਿਧਂ ਸੇਕ੍ਖਾਸੇਕ੍ਖਵਸੇਨ. ਅਸੇਕ੍ਖਰਤਨਮ੍ਪਿ ਦੁਵਿਧਂ ਸੁਕ੍ਖਵਿਪਸ੍ਸਕਸਮਥਯਾਨਿਕਵਸੇਨ. ਸਮਥਯਾਨਿਕਰਤਨਮ੍ਪਿ ਦੁਵਿਧਂ ਸਾਵਕਪਾਰਮਿਪ੍ਪਤ੍ਤਮਪਤ੍ਤਞ੍ਚ. ਤਤ੍ਥ ਸਾਵਕਪਾਰਮਿਪ੍ਪਤ੍ਤਂ ਅਗ੍ਗਮਕ੍ਖਾਯਤਿ. ਕਸ੍ਮਾ ਗੁਣਮਹਤ੍ਤਤਾਯ. ਸਾਵਕਪਾਰਮਿਪ੍ਪਤ੍ਤਰਤਨਤੋਪਿ ਪਚ੍ਚੇਕਬੁਦ੍ਧਰਤਨਂ ਅਗ੍ਗਮਕ੍ਖਾਯਤਿ. ਕਸ੍ਮਾ ਗੁਣਮਹਤ੍ਤਤਾਯ. ਸਾਰਿਪੁਤ੍ਤਮੋਗ੍ਗਲਾਨਸਦਿਸਾਪਿ ਹਿ ਅਨੇਕਸਤਾ ਸਾਵਕਾ ਪਚ੍ਚੇਕਬੁਦ੍ਧਸ੍ਸ ਗੁਣਾਨਂ ਸਤਭਾਗਮ੍ਪਿ ਨ ਉਪਨੇਨ੍ਤਿ. ਪਚ੍ਚੇਕਬੁਦ੍ਧਤੋ ਸਮ੍ਬੁਦ੍ਧਰਤਨਂ ਅਗ੍ਗਮਕ੍ਖਾਯਤਿ. ਕਸ੍ਮਾ ਗੁਣਮਹਤ੍ਤਤਾਯ ਸਕਲਮ੍ਪਿ ਜਮ੍ਬੁਦੀਪਂ ਪਲ੍ਲਙ੍ਕੇ ਨ ਪਲ੍ਲਙ੍ਕਂ ਘਟ੍ਟੇਨ੍ਤੋ ਨਿਸਿਨ੍ਨਾ ਪਚ੍ਚੇਕਸਮ੍ਬੁਦ੍ਧਾ ਏਕਸ੍ਸ ਗੁਣਾਨਂ ਨੇਵ ਸਙ੍ਖ੍ਯਂ ਕਲਂ ਗਣਨਭਾਗਂ ਉਪਨੇਨ੍ਤਿ, ਵੁਤ੍ਤਞ੍ਹੇਤਂ ਭਗਵਤਾ ‘‘ਯਾਵਤਾ ਭਿਕ੍ਖਵੇ ਸਤ੍ਤਾ ਅਪਦਾ ਵਾ…ਪੇ… ਤਥਾਗਤੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿ ਆਦਿ. ਏਵਂ ‘‘ਬੁਦ੍ਧੋ ਚ ਦੁਲ੍ਲਭੋ ਲੋਕੇ, ਸਦ੍ਧਮ੍ਮਸਵਨਮ੍ਪਿ ਚ, ਸਙ੍ਘੋ ਚ ਦੁਲ੍ਲਭੋ ਲੋਕੇ’’ਤਿ ਇਮੇਸਂ ਤਿਣ੍ਣਂ ਪਦਾਨਂ ਅਤ੍ਥੁਦ੍ਧਾਰਵਸੇਨ ਸਬ੍ਬਸੋ ਅਤ੍ਥੋ ਵੁਤ੍ਤੋਯੇਵ ਹੋਤਿ.
ਇਤਿ ਸਾਗਰਬੁਦ੍ਧਿਤ੍ਥੇਰਵਿਰਚਿਤੇ ਸੀਮਵਿਸੋਧਨੇ ਸਙ੍ਘਵਣ੍ਣਨਾਯ
ਸਮਸੀਸਿਕਣ੍ਡੋ ਚਤੁਤ੍ਥੋ ਪਰਿਚ੍ਛੇਦੋ.
ਪਕਿਣ੍ਣਕਕਣ੍ਡੋ
ਇਦਾਨਿ ਸਪ੍ਪੁਰਿਸਾਤਿ ਦੁਲ੍ਲਭਾਤਿ ਇਮਸ੍ਸ ਸਂਵਣ੍ਣਨਾਕ੍ਕਮੋ ਸਮ੍ਪਤ੍ਤੋ ਤਥਾ ਹਿ ਲੋਕੇ ਸਪ੍ਪੁਰਿਸਾਪਿ ਅਤਿਦੁਲ੍ਲਭਾਯੇਵ. ਸਪ੍ਪੁਰਿਸਾਤਿ ਕਲ੍ਯਾਣਗੁਣਸਮ੍ਪਨ੍ਨਾ ਉਤ੍ਤਮਪੁਰਿਸਾ. ਤੇ ਨਿਸ੍ਸਾਯ ਜਾਤਿਧਮ੍ਮਾ ਸਤ੍ਤਾ ਜਾਤਿਯਾ, ਮਰਣਧਮ੍ਮਾ ਸਤ੍ਤਾ ਮਰਣਤੋ ਮੁਚ੍ਚਨ੍ਤਿ ਵੁਤ੍ਤਞ੍ਹੇਤਂ ਭਗਵਤਾ ‘‘ਮਮਞ੍ਹਿ ਆਨਨ੍ਦ ਕਲ੍ਯਾਣਮਿਤ੍ਤਂ ਆਗਮ੍ਮ ਜਾਤਿਯਾ ਪਰਿਮੁਚ੍ਚਨ੍ਤਿ, ਜਰਾਧਮ੍ਮਾ ਸਤ੍ਤਾ ਜਰਾਯ ਮੁਚ੍ਚਨ੍ਤੀ’’ਤਿ ਆਦਿ ਵਚਨਤੋ ਪਨ ਸਮ੍ਮਾਸਮ੍ਬੁਦ੍ਧੋਯੇਵ ਸਬ੍ਬਾਕਾਰਸਮ੍ਪਨ੍ਨੋ ਕਲ੍ਯਾਣਮਿਤ੍ਤੋ ਨਾਮ. ਤਂ ਅਲਭਨ੍ਤੇਨ ਸਾਰਿਪੁਤ੍ਤਮੋਗ੍ਗਲਾਨਾਦਯੋ ਅਰਿਯਪੁਗ੍ਗਲਾ ਵਾ. ਤੇਪਿ ਅਲਭਨ੍ਤੇਨ ਏਕਨ੍ਤਜਹਿਤਂ ਸਿਵਟ੍ਠਿਕਂ ਕਲ੍ਯਾਣਮਿਤ੍ਤਂ ਲਭਿਤਬ੍ਬਂ, ਵੁਤ੍ਤਞ੍ਹੇਤਂ ਪੋਰਾਣੇਹਿ.
‘‘ਪਿਯੋ ਗਰੁ ਭਾਵਨੀਯੋ, ਵਤ੍ਤਾ ਚ ਵਚਨਕ੍ਖਮੋ;
ਗਮ੍ਭੀਰਞ੍ਚ ਕਥਂ ਕਤ੍ਤਾ, ਨੋਚਾਠਾਨੇ ਨਿਯੋਜਯੇ’’ਤਿ.
ਏਵਮਾਦਿਗੁਣਸਮਨ੍ਨਾਗਤੋ ਵਡ੍ਢਿਪਕ੍ਖੇ ਠਿਤਪਣ੍ਡਿਤਪੁਗ੍ਗਲੋ ਲੋਕੇ ਦੁਲ੍ਲਭੋਵ. ਕਤਮੋ ਪਣ੍ਡਿਤਪੁਗ੍ਗਲੋ ਬੁਦ੍ਧਪਚ੍ਚੇਕਬੁਦ੍ਧਾ ਅਸੀਤਿ ਚ ਮਹਾਸਾਵਕਾ ਅਞ੍ਞੇ ਚ ਤਥਾਗਤਸ੍ਸ ਸਾਵਕਾ ਸੁਨੇਤ੍ਤਮਹਾਗੋਵਿਨ੍ਦਵਿਧੁਰਸਰਭਙ੍ਗਮਹੋਸਧਸੁਤਸੋਮਨਿਮਿਰਾਜਅਯੋਘਰਕੁਮਾਰਕ ਅਕਤ੍ਤਿਪਣ੍ਡਿਤਾਦਯੋ ਚ ਪਣ੍ਡਿਤਾਤਿ ਵੇਦਿਤਬ੍ਬਾ. ਤੇ ਭਯੇ ਵਿਯ ਰਕ੍ਖਾ, ਅਨ੍ਧਕਾਰੇ ਵਿਯ ਪਦੀਪਾ, ਖੁਪ੍ਪਿਪਾਸਾਦਿਦੁਕ੍ਖਾਭਿਭਵੇ ਵਿਯ ਅਨ੍ਨਪਾਨਾਦਿਪਟਿਲਾਭੋ, ਅਤ੍ਤਨੋ ਵਚਨਕਰਾਨਂ ਸਬ੍ਬਭਯਉਪਦ੍ਦਵੂਪਸਗ੍ਗਵਿਦ੍ਧਂਸਨਸਮਤ੍ਥਾ ਹੋਨ੍ਤਿ ਤਥਾ ਹਿ ਤਥਾਗਤਂ ਆਗਮ੍ਮ ਅਸਙ੍ਖ੍ਯੇਯ੍ਯਾ ਅਪਰਿਮਾਣਾ ਦੇਵਮਨੁਸ੍ਸਾ ਆਸਵਕ੍ਖਯਂ ਪਤ੍ਤਾ ਬ੍ਰਹ੍ਮਲੋਕੇ ਪਤਿਟ੍ਠਿਤਾ, ਦੇਵਲੋਕੇ ਉਪ੍ਪਨ੍ਨਾ. ਸਾਰਿਪੁਤ੍ਤਤ੍ਥੇਰੇ ਚਿਤ੍ਤਂ ਪਸਾਦੇਤ੍ਵਾ ਚਤੂਹਿ ਚ ਪਚ੍ਚਯੇਹਿ ਥੇਰਂ ਉਪਟ੍ਠਹਿਤ੍ਵਾ ਅਸੀਤਿ ਕੁਸਲਹਸ੍ਸਾਨਿ ਸਗ੍ਗੇ ਨਿਬ੍ਬਤ੍ਤਾਨਿ, ਤਥਾ ਮਹਾਮੋਗ੍ਗਲਾਨਮਹਾਕਸ੍ਸਪਪਭੁਤਿ ਸੁਨੇਤ੍ਤਸ੍ਸ ਸਤ੍ਥੁਨੋ ਸਾਵਕਾ ਅਪ੍ਪੇਕਚ੍ਚੇ ਬ੍ਰਹ੍ਮਲੋਕੇ ਉਪਪਜ੍ਜਿਂਸੁ, ਅਪ੍ਪੇਕਚ੍ਚੇ ਪਰਨਿਮ੍ਮਿਤਵਸਵਤ੍ਤੀਨਂ ਦੇਵਾਨਂ ਸਹਬ੍ਯਤਂ…ਪੇ… ਅਪ੍ਪੇਕਚ੍ਚੇ ਗਹਪਤਿਮਹਾਸਾਲਕੁਲਾਨਂ ਸਹਬ੍ਯਤਂ ਉਪਪਜ੍ਜਿਂਸੁ, ਵੁਤ੍ਤਞ੍ਹੇਤਂ ‘‘ਨਤ੍ਥਿ ਭਿਕ੍ਖਵੇ ਪਣ੍ਡਿਤਤੋ ਭਯਂ, ਨਤ੍ਥਿ ਪਣ੍ਡਿਤਤੋ ਉਪਦ੍ਦਵੋ, ਨਤ੍ਥਿ ਪਣ੍ਡਿਤਤੋ ਉਪਸਗ੍ਗੋ’’ਤਿ. ਅਪਿਚ ਤਗ੍ਗਰਮਾਲਾਦਿਗਨ੍ਧਭਣ੍ਡਸਦਿਸੋ ਪਣ੍ਡਿਤੋ, ਤਗ੍ਗਰਮਾਲਾਦਿਗਨ੍ਧਭਣ੍ਡਪਲਿਵੇਠਨਪਤ੍ਤਸਦਿਸੋ ਤਦੁਪਸੇਵੀ ਵੁਤ੍ਤਞ੍ਹੇਤਂ ਨਾਰਦਜਾਤਕੇ.
‘‘ਤਗ੍ਗਰਞ੍ਚ ਪਲਾਸੇਨ, ਯੋ ਨਰੋ ਉਪਨਯ੍ਹਤਿ;
ਪਤ੍ਤਾਪਿ ਸੁਰਭਿ ਵਾਯਨ੍ਤਿ, ਏਵਂ ਧੀਰੂਪਸੇਵਨਾ’’ਤਿ.
ਅਕਿਤ੍ਤਿਪਣ੍ਡਿਤੋ ਸਕ੍ਕੇਨ ਦੇਵਾਨਮਿਨ੍ਦੇਨ ਵਰੇ ਦਿਯ੍ਯਮਾਨੇ ਏਵਮਾਹ
‘‘ਧੀਰਂ ਪਸ੍ਸੇ ਸੁਣੇ ਧੀਰਂ, ਧੀਰੇਨ ਸਹ ਸਂਵਸੇ;
ਧੀਰੇਨਾ’ਲਾਪਸਲ੍ਲਾਪਂ, ਤਂ ਕਰੇ ਤਞ੍ਚ ਰੋਚਯੇ.
ਕਿਂ ਨੁ ਤੇ ਅਕਰਂ ਧੀਰੋ, ਵਦ ਕਸ੍ਸਪ ਕਾਰਣਂ;
ਕੇਨ ਕਸ੍ਸਪ ਧੀਰਸ੍ਸ, ਦਸ੍ਸਨਂ ਅਭਿਕਙ੍ਖਸਿ.
ਨਯਂ ਨਯਤਿ ਮੇਧਾਵੀ, ਅਦੁਰਾਯਂ ਨ ਯੁਞ੍ਜਤਿ;
ਸਨਰੋ ਸੇਯ੍ਯਸੋ ਹੋਤਿ, ਸਮ੍ਮਾ ਵੁਤ੍ਤੋ ਨ ਕੁਪ੍ਪਤਿ;
ਵਿਨਯਂ ਸੋ ਪਜਾਨਾਤਿ, ਸਾਧੁ ਤੇਨ ਸਮਾਗਮੋ’’ਤਿ.
ਅਪਿਚ ਤੇਪਿ ਸਪ੍ਪੁਰਿਸੇ ਸਙ੍ਗਮ੍ਮ ਅਸ੍ਸੁਤਪੁਬ੍ਬਮ੍ਪਿ ਉਭਯਲੋਕਹਿਤਾਵਹਂ ਵਾਚਂ ਸੁਯ੍ਯਤੇਵ, ਵੁਤ੍ਤਮ੍ਪਿ ਚੇਤਂ.
‘‘ਸੁਭਾਸਿਤਂ ਉਤ੍ਤਮਮਾਹੁ ਸਨ੍ਤੋ, ਧਮ੍ਮਂ ਭਣੇ ਨਾਧਮ੍ਮਂ ਤਂ ਦੁਤਿਯਂ;
ਪਿਯਂ ਭਣੇ ਨਾਪ੍ਪਿਯਂ ਤਂ ਤਤਿਯਂ, ਸਚ੍ਚਂ ਭਣੇ ਨਾਲੀਕਂ ਤਂ ਚਤੁਤ੍ਥ’’ਨ੍ਤਿ ਚ.
‘‘ਯਂ ਬੁਦ੍ਧੋ ਭਾਸਤਿ ਵਾਚਂ, ਖੇਮਂ ਨਿਬ੍ਬਾਨਪਤ੍ਤਿਯਾ;
ਦੁਕ੍ਖਸ੍ਸਨ੍ਤਕਿਰਿਯਾਯ, ਸਾ ਵੇ ਵਾਚਾਨਮੁਤ੍ਤਮਾ’’ਤਿ.
ਸਪ੍ਪੁਰਿਸੂਪਨਿਸ੍ਸਯਸੇਵਨਪਚ੍ਚਯਾਯੇਵ ਦਾਨਾਦਿਕੁਸਲਸਮਾਯੋਗੇਨ ਅਪਾਯਦੁਕ੍ਖਤੋ ਮੁਚ੍ਚਨ੍ਤਿ ਵੁਤ੍ਤਞ੍ਹੇਤਂ ‘‘ਅਪਿਚ ਨੇਰਯਿਕਾਦਿਦੁਕ੍ਖਪਰਿਤ੍ਤਾਣਤੋ ਪੁਞ੍ਞਾਨਿ ਏਵ ਪਾਣੀਨਂ ਬਹੂਪਕਾਰਾਨਿ, ਯਤੋ ਤੇਸਮ੍ਪਿ ਉਪਕਾਰਾਨੁਸ੍ਸਰਣਤਾ ਕਤਞ੍ਞੁਤਾ ਸਪ੍ਪੁਰਿਸੇਹਿ ਪਸਂਸਨੀਯਾਦਿਨਾਨਪ੍ਪਕਾਰਵਿਸੇਸਾਧਿਗਮਹੇਤੂਚ ਹੋਨ੍ਤਿ ਵੁਤ੍ਤਞ੍ਹੇਤਂ ਭਗਵਤਾ, ‘‘ਦ੍ਵੇ ਮੇ ਭਿਕ੍ਖਵੇ ਪੁਗ੍ਗਲਾ ਦੁਲ੍ਲਭਾ ਲੋਕਸ੍ਮਿਂ, ਕਤਮੇ ਦ੍ਵੇ, ਯੋ ਚ ਪੁਬ੍ਬਕਾਰੀ, ਯੋ ਚ ਕਤਞ੍ਞੁ ਕਤਵੇਦੀ’’ਤਿ. ਅਪਿਚ ਵਿਧੁਰਮਹੋਸਧਜਾਤਕਾਦਿਕਾਲੇਪਿ ਇਧਲੋਕਪਰਲੋਕਸਮ੍ਪਤ੍ਤਿਅਤ੍ਥਮੇਵ ਅਤ੍ਤਨੋ ਵਚਨਕਰੇ ਸਮ੍ਮਾ ਯੋਜੇਨ੍ਤਿ. ਅਨਾਕੁਲਕਮ੍ਮਨ੍ਤਾਧਿਟ੍ਠਾਨੇਨ ਕਾਲਞ੍ਞੁਤਾਯ ਪਤਿਰੂਪਕਾਰਿਤਾਯ ਅਨਲਸਤਾਯ ਉਟ੍ਠਾਨਵੀਰਿਯਸਮਤਾਯ ਅਬ੍ਯਸਨਿਯਤਾਚ ਕਾਲਾਨਤਿਕ੍ਕਮਨਅਪ੍ਪਤਿਰੂਪਕਰਣਅਕਰਣਸਿਥਿਲਕਰਣਾਹਿ ਅਕੁਸਲਾਦੀਹਿ ਰਹਿਤਕਸਿਗੋਰਕ੍ਖਵਾਣਿਜ੍ਜਾਦਯੋ ਕਮ੍ਮਨ੍ਤਾ, ਏਤੇ ਅਤ੍ਤਨੋ ਵਾ ਪੁਤ੍ਤਦਾਰਸ੍ਸ ਵਾ ਦਾਸਕਮ੍ਮਕਰਾਨਂ ਵਾ ਬ੍ਯਤ੍ਤਤਾਯ ਏਵਂ ਪਯੋਜਿਤਾ ਦਿਟ੍ਠੇਵ ਧਮ੍ਮੇ ਧਨਧਞ੍ਞਵਿਤ੍ਤਿ ਪਟਿਲਾਭਹੇਤੂ ਹੋਨ੍ਤਿ, ਵੁਤ੍ਤਞ੍ਹੇਤਂ ਭਗਵਤਾ.
ਪਤਿਰੂਪਕਾਰੀਰਿ ਧੁਰਵਾ, ਉਟ੍ਠਾਨਤਾ ਵਿਨ੍ਦਤੇ ਧਨਨ੍ਤਿ ਚ;
ਨ ਦਿਵਾ ਸੋਪ੍ਪਸੀਲੇ, ਰਤ੍ਤਿਂ ਉਟ੍ਠਾਨਦਸ੍ਸਿਨਾ;
ਨਿਚ੍ਚਪ੍ਪਮਤ੍ਤੇਨ ਸੋਣ੍ਡੇਨ, ਸਕ੍ਕਾ ਆਵਸਿਤੁਂ ਘਰਂ.
ਅਤੀਸਿਤਂ ਅਤਿਉਣ੍ਹਂ, ਅਤਿਸਾਰਮਿਦਂ ਅਹੁ;
ਇਤਿ ਵਿਸ੍ਸਟ੍ਠਕਮ੍ਮਨ੍ਤੇ, ਅਤ੍ਥਾ ਅਚ੍ਚੇਨ੍ਤਿ ਮਾਣਵੇ.
ਯੋ ਚ ਸੀਤਞ੍ਚ ਉਣ੍ਹਞ੍ਚ; ਤਿਣਾਨਿ ਯੋ ਨ ਮਞ੍ਞਤਿ;
ਸਪ੍ਪੁਰਿਸਕਿਚ੍ਚਾਨਿ, ਸੋ ਸੁਖਂ ਨ ਵਿਹਾਯਤੀ’’ਤਿ ਚ.
ਭੋਗੇ ਸਂਹਰਮਾਨਸ੍ਸ, ਪਰਸ੍ਸੇਵ ਇਰਯਤੋ;
ਭੋਗਾ ਸਨ੍ਨਿਚਯਂ ਯਨ੍ਤਿ, ਵਮ੍ਮਿਕੋਵੂਪਚੀਯਤੀਤਿ.
ਏਵਮਾਦਿਪ੍ਪਭੇਦਾ ਸਪ੍ਪੁਰਿਸਾ ਲੋਕੇ ਅਤਿਦੁਲ੍ਲਭਾਵ. ਤਬ੍ਬਿਗਮੇਨ ਦੁਪ੍ਪੁਰਿਸਾ ਬਾਲਜਨਾ ਅਗਵੇਸਨ੍ਤੋਪਿ ਲਬ੍ਭਨ੍ਤੇਵ ਤੇ ਬਾਲਾ ਅਤ੍ਤਾਨਂ ਸੇਵਮਾਨੇ ਪਰਜਨੇ ਸਂਸਾਰਦੁਕ੍ਖੇਯੇਵ ਓਸੀਦੇਨ੍ਤਿ ਭਵਤੋ ਵੁਟ੍ਠਾਨਂ ਨ ਦੇਨ੍ਤਿ ਤਥਾ ਹਿ ਪੂਰਣਕਸ੍ਸਪਾਦਯੋ ਛਸਤ੍ਥਾਰਾ ਦੇਵਦਤ੍ਤਕੋਕਾਲਿਕ-ਮੋਦਕਤਿਸ੍ਸ ਖਣ੍ਡਦੇਵਿਯਾਪੁਤ੍ਤਸਮੁਦ੍ਦਦਤ੍ਤਚਿਞ੍ਚਮਾਣਵਿਕਾਦਯੋ ਅਤੀਤਕਾਲੇ ਚ ਦੀਘਦੁਕ੍ਖਸ੍ਸ ਲਾਭਾਤਿ ਇਮੇ ਅਞ੍ਞੇ ਚ ਏਵਰੂਪਾ ਸਤ੍ਤਾ ਬਾਲਾ ਅਗ੍ਗਿਪਦਿਤ੍ਤਮਿਵ ਅਗਾਰਂ ਅਤ੍ਤਨਾ ਦੁਗ੍ਗਹਿਤੇਨ ਅਤ੍ਤਾਨਞ੍ਚ ਅਤ੍ਤਨੋ ਵਚਨਕਾਰਕੇ ਚ ਵਿਨਾਸੇਨ੍ਤਿ ਤਥਾ ਹਿ ਦੇਵਦਤ੍ਤਮਾਗਮ੍ਮ ਰਾਜਾ ਅਜਾਤਸਤ੍ਤੁ-ਕੋਕਾਲਿਕਾਦਯੋ ਤਦਞ੍ਞੇਪਿ ਪੁਗ੍ਗਲਾ ਅਪਾਯੇ ਨਿਬ੍ਬਤ੍ਤਨ੍ਤਿ. ਰਾਜਾ ਅਜਾਤਸਤ੍ਤੁ ਸਾਮਞ੍ਞਫਲਸੁਤ੍ਤਨ੍ਤਸਵਨਕਾਲੇ ਯਦਿ ਪਿਤਰਂ ਅਘਾਤੇਯ੍ਯ, ਸੋਤਾਪਨ੍ਨੋ ਭਵੇਯ੍ਯ ਪਿਤਰਂ ਘਾਤਿਤਤ੍ਤਾ ਮਗ੍ਗਫਲਮ੍ਪਿ ਅਪ੍ਪਤ੍ਵਾ ਲੋਹਕੁਮ੍ਭਿਯਂ ਸਟ੍ਠਿਵਸ੍ਸਸਹਸ੍ਸਾਨਿ ਪਚ੍ਚਿਤ੍ਵਾ ਮੁਚ੍ਚਿਸ੍ਸਤਿ ਅਨਾਗਤੇਪਿ ਪਚ੍ਚੇਕਬੁਦ੍ਧੋ ਭਵਿਸ੍ਸਤਿ. ਕੋਕਾਲਿਕੋਪਿ ਸਾਰਿਪੁਤ੍ਤਮੋਗ੍ਗਲਾਨਤ੍ਥੇਰੇ ਅਨਪਚਾਯਿਤ੍ਵਾ ਮਹਾਨਿਰਯੇ ਪਦੁਮਗਣਨਾਯ ਪਚ੍ਚਨੋਕਾਸੇ ਨਿਰਯਪਦੇਸੇ ਪਦੁਮਨਿਰਯੇ…ਪੇ… ਪਦੁਮਂ ਖੋ ਪਨ ਅਞ੍ਞਤਰੋ ਭਿਕ੍ਖੁ ਨਿਰਯਂ ਕੋਕਾਲਿਕੋ ਭਿਕ੍ਖੁ ਉਪਪਨ੍ਨੋ ਸਾਰਿਪੁਤ੍ਤਮੋਗ੍ਗਲਾਨੇਸੁ ਚਿਤ੍ਤਂ ਆਘਾਤੇਤ੍ਵਾ’’ਤਿ ਆਹ. ਤਤ੍ਥ ਅਞ੍ਞਤਰੋ ਭਿਕ੍ਖੂਤਿ ਨਾਮਗੋਤ੍ਤੇਨ ਅਪਾਕਟਂ ‘‘ਕਿਂ ਵ ਦੀਘਂ ਨੁਖੋ ਭਨ੍ਤੇ ਪਦੁਮੇ ਨਿਰਯੇ ਆਯੁਪ੍ਪਮਾਣ’’ਨ੍ਤਿ ਪਞ੍ਹਂ ਪੁਚ੍ਛਿਤ੍ਵਾ ਨਿਸਿਨ੍ਨਂ ਏਕਂ ਭਿਕ੍ਖੁਂ ਏਵਮਾਹ ‘‘ਦੀਘਂ ਖੋ ਭਿਕ੍ਖੁ ਨਿਰਯੇ ਆਯੁਪ੍ਪਮਾਣਂ, ਤਂ ਨ ਸੁਕਰਂ ਸਙ੍ਖਾਤੁਂ ਏਤ੍ਤਕਾਨਿ ਵਸ੍ਸਾਨੀਤਿ ਵਾ ਏਤ੍ਤਕਾਨਿ ਵਸ੍ਸਸਤਾਨੀਤਿ ਵਾ ਏਤ੍ਤਕਾਨਿ ਵਸ੍ਸਸਹਸ੍ਸਾਨੀਤਿ ਵਾ ਏਤ੍ਤਕਾਨਿ ਵਸ੍ਸਸਤਸਹਸ੍ਸਾਨੀ’’ਤਿ ਵਾ ਸਕ੍ਕਾ ਪਨ ਭਨ੍ਤੇ ਉਪਮਂ ਕਾਤੁਨ੍ਤਿ. ‘‘ਸਕ੍ਕਾ ਭਿਕ੍ਖੂ’’ਤਿ ਭਗਵਾ ਅਵੋਚ. ਸੇਯ੍ਯਥਾਪਿ ਭਿਕ੍ਖੁ ਵੀਸਤਿਖਾਰਿਕੋ ਕੋਸਲਕੋ ਤਿਲਵਾਹੋ ਹੋਤਿ, ਤਤੋ ਪੁਰਿਸੋ ਵਸ੍ਸਸਤਸ੍ਸ ਵਸ੍ਸਸਹਸ੍ਸਸ੍ਸ ਅਚ੍ਚਯੇਨ ਏਕਮੇਕਂ ਤਿਲਂ ਉਦ੍ਧਰੇਯ੍ਯ, ਖਿਪ੍ਪਤਰਂ ਖੋ ਸੋ ਭਿਕ੍ਖੁ ਵੀਸਤਿਖਾਰਿਕੋ ਕੋਸਲਕੋ ਤਿਲਵਾਹੋ ਇਮਿਨਾ ਉਪਕ੍ਕਮੇਨ ਪਰਿਕ੍ਖਯਂ ਪਰਿਯਾਦਾਨਂ ਗਚ੍ਛੇਯ੍ਯ, ਨ ਤ੍ਵੇਵ ਏਕੋ ਅਬ੍ਬੁਦੋ ਨਿਰਯੋ. ਸੇਯ੍ਯਥਾਪਿ ਭਿਕ੍ਖੁ ਵੀਸ ਅਬ੍ਬੁਦੋ ਨਿਰਯੋ, ਏਵਮੇਕੋ ਨਿਰਬ੍ਬੁਦੋ ਨਿਰਯੋ’’ਤਿ ਆਦਿ. ਵੀਸਤਿਖਾਰਿਕੋ ਤਿ ਮਾਗਧਿਕੇਨ ਪਤ੍ਥੇਨ ਚਤ੍ਤਾਰੋ ਪਤ੍ਥਾ ਕੋਸਲਰਟ੍ਠੇ ਏਕੋ ਪਤ੍ਥੋ ਹੋਤਿ. ਤੇਨ ਪਤ੍ਥੇਨ ਚਤ੍ਤਾਰੋ ਪਤ੍ਥਾ ਆਲ਼੍ਹਕਂ. ਚਤ੍ਤਾਰਿ ਆਲ਼੍ਹਕਾਨਿ ਦੋਣਂ. ਚਤੁਦੋਣਾ ਮਾਨਿਕਾ. ਚਤੁਮਾਨਿਕਾ ਖਾਰੀ. ਤਾਯਖਾਰਿਯਾ ਵੀਸਤਿਖਾਰਿਕੋ ਤਿਲਵਾਹੋ. ਤਿਲਵਾਹੋਤਿ ਤਿਲਸਕਟਂ. ਅਬ੍ਬੁਦੋ ਨਿਰਯੋਤਿ ਅਬ੍ਬੁਦੋ ਨਾਮ ਏਕੋ ਪਚ੍ਚੇਕਨਿਰਯੋ ਨਤ੍ਥਿ, ਅਵੀਚਿਮ੍ਹਿ ਏਵ ਪਨ ਅਬ੍ਬੁਦਗਣਨਾਯ ਪਚ੍ਚਨੋਕਾਸੋ ‘‘ਅਬ੍ਬੁਦੋ ਨਿਰਯੋ’’ਤਿ ਵੁਤ੍ਤੋ. ਏਸ ਨਯੋ ਨਿਰਬ੍ਬੁਦਾਦੀਸੁਪਿ. ਤਤ੍ਥ ਵਸ੍ਸਗਣਨਾਪਿ ਏਵਂ ਵੇਦਿਤਬ੍ਬਾ ਯਥਾਹ ‘‘ਸਤਂਸਤਸਹਸ੍ਸਾਨਿ ਕੋਟਿ ਹੋਤਿ ਏਵਂ ਸਤਂਸਹਸ੍ਸਕੋਟਿਯੋ ਪਕੋਟਿ ਨਾਮ. ਸਤਂਸਤਸਹਸ੍ਸਪਕੋਟਿਯੋ ਕੋਟਿਪਕੋਟਿ ਨਾਮ. ਸਤਂ ਸਤਸਹਸ੍ਸਕੋਟਿਪਕੋਟਿਯੋ ਨਹੁਤਂ. ਸਤਂਸਤਸਹਸ੍ਸਨਹੁਤਾਨਿ ਨਿਨ੍ਨਹੁਤਂ. ਸਤਂਸਤਸਹਸ੍ਸਨਿਨ੍ਨਹੁਤਾਨਿ ਏਕੋ ਅਬ੍ਬੁਦੋ. ਤਤੋ ਵੀਸਤਿਗੁਣੋ ਨਿਰਬ੍ਬੁਦੋ. ਏਸ ਨਯੋ ਸਬ੍ਬਤ੍ਥ ਅਯਞ੍ਚ ਗਣਨਾ ਅਪਰਿਚਿਤਾਨਂ ਦੁਕ੍ਕਰਾ’’ਤਿ ਵੁਤ੍ਤਂ ਤਂ ਨ ਸੁਕਰਂ ਸਙ੍ਖਾਤੁ’ਨ੍ਤਿ ਕੇਚਿ ਪਨ ਤਤ੍ਥ ਪਰਿਦੇਵਨਾਨਤ੍ਤੇਨਪਿ ਕਮ੍ਮਕਰਣਨਾਨਤ੍ਤੇਨਪਿ ਇਮਾਨਿ ਨਾਮਾਨਿ ਲਦ੍ਧਾਨੀਤਿ ਵਦਨ੍ਤਿ. ਅਪਰੇਪਿ ਵਾਨਕਾਰਣੇਹੀਤਿ ਟੀਕਾਨੇਤ੍ਤਿ. ਯਥਾ ਚ ਦੀਘਵਿਦਸ੍ਸਆਘਾਤਾ ਚ ਬੁਦ੍ਧਨ੍ਤਰਂ ਸਟ੍ਠਿਯੋਜਨਮਤ੍ਤੇਨ ਅਤ੍ਤਭਾਵੇਨ ਉਤ੍ਤਾਨੋ ਪਤਿਤੋ ਮਹਾਨਿਰਯੇ ਪਚ੍ਚਤਿ ਯਥਾ ਚ, ਤਸ੍ਸ ਦਿਟ੍ਠਿਅਭਿਰੁਚਿਤਾਨਿ ਪਞ੍ਚ ਕੁਲਸਤਾਨਿ ਤਸ੍ਸੇਵ ਸਹਬ੍ਯਤਂ ਉਪ੍ਪਨ੍ਨਾਨਿ ਮਹਾਨਿਰਯੇ ਪਚ੍ਚਨ੍ਤਿ. ਵੁਤ੍ਤਞ੍ਚੇਤਂ ਭਗਵਤਾ ‘‘ਸੇਯ੍ਯਥਾਪਿ ਭਿਕ੍ਖਵੇ ਨਲ਼ਾਗਾਰਂ ਵਾ ਤਿਣਾਗਾਰਂ ਵਾ ਅਗ੍ਗਿਫੁਟ੍ਠੋ ਕੂਟਾਗਾਰਾਨਿ ਦਹਤਿ ਉਲ੍ਲਿਤ੍ਤਾਵਲਿਤ੍ਤਾਨਿ ਨਿਵਾਤਾਨਿ ਫੁਸਿਤਗ੍ਗਲ਼ਾਨਿ ਪਿਹਿਤ ਵਾਤਪਾਨਾਨਿ ਏਵਮੇਵ ਖੋ ਭਿਕ੍ਖਵੇ ਯਾਨਿਕਾਨਿਚਿ ਭਯਾਨਿ ਉਪ੍ਪਜ੍ਜਨ੍ਤਿ, ਸਬ੍ਬਾਨਿ ਬਾਲਤੋ ਉਪ੍ਪਜ੍ਜਨ੍ਤਿ, ਨੋ ਪਣ੍ਡਿਤਤੋ ਯੇਕੇਚਿ ਉਪਦ੍ਦਵਾ ਉਪ੍ਪਜ੍ਜਨ੍ਤਿ, ਨੋ ਪਣ੍ਡਿਤਤੋ, ਯੇਕੇਚਿ ਉਪਸਗ੍ਗਾ…ਪੇ… ਨੋ ਪਣ੍ਡਿਤਤੋ. ਇਤਿ ਖੋ ਭਿਕ੍ਖਵੇ ਸਪ੍ਪਟਿਭਯੋ ਬਾਲੋ ਅਪ੍ਪਟਿਭਯੋ ਪਣ੍ਡਿਤੋ ਸਉਪਦ੍ਦਵੋ ਬਾਲੋ ਅਨੁਪਦ੍ਦਵੋ ਪਣ੍ਡਿਤੋ, ਸਉਪਸਗ੍ਗੋ ਬਾਲੋ ਅਨੁਪਸਗ੍ਗੋ ਪਣ੍ਡਿਤੋਤਿ. ਅਪਿ ਚ ਪੂਤਿਮਚ੍ਛਸਦਿਸੋ ਬਾਲੋ, ਪੂਤਿਮਚ੍ਛਬਦ੍ਧਪਤ੍ਤ ਪੁਤਿਸਦਿਸੋ ਹੋਤਿ ਤਦੁਪਸੇਵੀ. ਛਡ੍ਡਨੀਯਤਂ ਜਿਗੁਚ੍ਛਨੀਯਤਞ੍ਚ ਆਪਜ੍ਜਤਿ ਵਿਞ੍ਞੂਨਂ ਵੁਤ੍ਤਮ੍ਪਿ ਚੇਤਂ ਨਾਰਦਜਾਤਕੇ.
‘‘ਪੂਤਿਮਚ੍ਛਂ ਕੁਸਗ੍ਗੇਨ, ਯੋ ਨਰੋ ਉਪਨਯ੍ਹਤਿ;
ਕੁਸਾਪਿ ਪੂਤਿ ਵਾਯਨ੍ਤਿ, ਏਵਂ ਬਾਲੂਪਸੇਵਨਾ’’ਤਿ.
ਅਕਤ੍ਤਿਪਣ੍ਡਿਤੋਚਾਪਿ ਸਕ੍ਕੇਨ ਦੇਵਾਨਮਿਨ੍ਦੇਨ ਵਰੇ ਦਿਯ੍ਯਮਾਨੇ ਏਵਮਾਹ
‘‘ਬਾਲਂ ਨ ਪਸ੍ਸੇ ਨ ਸੁਣੇ, ਨ ਚ ਬਾਲੇਨ ਸਂਵਸੇ;
ਬਾਲੇਨਾ’ਲ੍ਲਾਪਸਲ੍ਲਾਪਂ, ਨ ਕਰੇ ਨ ਚ ਰੋਚਯੇ.
ਕਿਂਨੁ ਤੇ ਅਕਰਂ ਬਾਲੋ, ਵਦ ਕਸ੍ਸਪ ਕਾਰਣਂ;
ਕੇਨ ਕਸ੍ਸਪ ਬਾਲਸ੍ਸ, ਦਸ੍ਸਨਂ ਨਾਭਿਕਙ੍ਖਸਿ.
ਅਨਯਂ ਨਯਤਿ ਦੁਮ੍ਮੇਧੋ, ਅਧੁਰਾਯਂ ਨਿਯੁਞ੍ਜਤਿ;
ਦੁਨ੍ਨਯੋ ਸੇਯ੍ਯਸੋ ਹੋਤਿ, ਸਮ੍ਮਾ ਵੁਤ੍ਤੋ ਪਕੁਪ੍ਪਤਿ;
ਵਿਨਯਂ ਸੋ ਨ ਜਾਨਾਤਿ, ਸਾਧੁ ਤਸ੍ਸ ਅਦਸ੍ਸਨ’’ਨ੍ਤਿ.
ਏਵਂ ਬਾਲਦੁਜ੍ਜਨਸਂਸਗ੍ਗਵਸੇਨੇਵ ਸਬ੍ਬਾਨਿ ਭਯੁਪਦ੍ਦਵਾਨਿ ਉਪ੍ਪਜ੍ਜਨ੍ਤਿ, ਨੋ ਪਣ੍ਡਿਤਸੇਵਨਵਸੇਨਾਤਿਸਬ੍ਬਸੋ ਸਪ੍ਪੁਰਿਸਾ ਅਤਿਦੁਲ੍ਲਭਾਵ.
ਇਦਾਨਿ.
‘‘ਦੁਲ੍ਲਭਞ੍ਚ ਮਨੁਸ੍ਸਤ੍ਤਂ, ਬੁਦ੍ਧੁਪ੍ਪਾਦੋ ਚ ਦੁਲ੍ਲਭੋ;
ਦੁਲ੍ਲਭਾ ਖਣਸਮ੍ਪਤ੍ਤਿ, ਸਦ੍ਧਮ੍ਮੋ ਪਰਮਦੁਲ੍ਲਭੋ’’ਤਿ.
ਇਮਿਸ੍ਸਾ ਗਾਥਾਯ ਵਣ੍ਣਨਾਕ੍ਕਮੋ ਸਮ੍ਪਤ੍ਤੋ. ਤਤ੍ਥ ਦੁਲ੍ਲਭਞ੍ਚ ਮਨੁਸ੍ਸਤ੍ਤਨ੍ਤਿ ਮਨੁਸ੍ਸਭਾਵੋਪਿ ਦੁਲ੍ਲਭੋਯੇਵ ਮਨੁਸ੍ਸਸ੍ਸ ਦੁਲ੍ਲਭਭਾਵੋ ਕਾਣਕਚ੍ਛਪੋਪਮਾਦੀਹਿ ਵੇਦਿਤਬ੍ਬੋ ਏਕੋ ਕਿਰ ਕਸ੍ਸਕੋ ਗਙ੍ਗਾਤੀਰੇ ਤੀਣਿ ਸਂਵਚ੍ਛਰਾਨਿ ਕਸਿਤ੍ਵਾ ਕਿਞ੍ਚਿਮਤ੍ਤਮ੍ਪਿ ਅਲਭਿਤ੍ਵਾ ਨਙ੍ਗਲਫਾਲਂ ਦ੍ਵੇਧਾ ਭਿਨ੍ਦਿਤ੍ਵਾ ਗਙ੍ਗਾਯਂ ਖਿਪਿ ਤੇਨ ਗਙ੍ਗਾਨਦਿਯਾ ਵਾਹੇਨ ਏਕੋ ਉਦ੍ਧਂ ਏਕੋ ਹੇਟ੍ਠਾਤਿ ਏਵਂ ਦ੍ਵੇ ਨਙ੍ਗਲਫਾਲਕਾ ਗਙ੍ਗਾਯਂ ਵੁਯ੍ਹਨ੍ਤਾ ਚਿਰੇਨ ਏਕੋ ਉਦ੍ਧਂ ਏਕੋ ਹੇਟ੍ਠਾਤਿ ਦ੍ਵੇ ਏਕਤੋ ਹੁਤ੍ਵਾ ਪਾਕਤਿਕਾ ਯੁਜ੍ਜਨ੍ਤਿ ਤਸ੍ਮਿਂ ਖਣੇ ਵਸ੍ਸਸਤਵਸ੍ਸਸਹਸ੍ਸਚ੍ਚਯੇਨ ਏਕਵਾਰਂ ਉਮ੍ਮੁਜ੍ਜਮਾਨੋ ਕਾਣਕਚ੍ਛਪੋ ਉਮ੍ਮੁਜ੍ਜਮਾਨਕ੍ਖਣੇ ਤਸ੍ਸ ਗੀਵਾ ਦ੍ਵਿਨ੍ਨਂ ਨਙ੍ਗਲਫਾਲਾਨਮਨ੍ਤਰੇ ਹੋਤਿ ਅਯਂ ਕਾਲੋ ਦੁਲ੍ਲਭੋਵ ਏਵਮੇਵ ਮਨੁਸ੍ਸਤ੍ਤਭਾਵੋਪਿ ਦੁਲ੍ਲਭੋਯੇਵ ਤਥਾਹਿ ਮਨੁਸ੍ਸਤ੍ਤਭਾਵਂ ਅਲਭਿਤ੍ਵਾਵ ਨਿਰਯਪੇਤਅਸੁਰਕਾਯਤਿਰਚ੍ਛਾਨਭੂਮੀਸੁਯੇਵ ਸਂਸਰਿਤ੍ਵਾ ਸੀਸਮ੍ਪਿ ਉਕ੍ਖਿਪਿਤੁਂ ਅਲਭਨ੍ਤਾ ਏਕਬੁਦ੍ਧਨ੍ਤਰਾ ਦ੍ਵੇ ਬੁਦ੍ਧਨ੍ਤਰਾ ਤਯੋ ਬੁਦ੍ਧਨ੍ਤਰਾ ਚਤ੍ਤਾਰੋ ਬੁਦ੍ਧਨ੍ਤਰਾ ਏਕਾਸਙ੍ਖ੍ਯੇਯ੍ਯਵਸੇਨ ਨਿਰਯੇ ਪਚ੍ਚਨਕਸਤ੍ਤਾਨਂ ਗਣਨਪਥਂ ਵੀਤਿਵਤ੍ਤਾ, ਤਥਾ ਪੇਤਅਸੁਰਕਾਯਤਿਰਚ੍ਛਾਨਭੂਮੀਸੁਪਿ ਅਤਿਖੁਦ੍ਦਕੇਨ ਅਤ੍ਤਭਾਵੇਨ ਤਿਲਬੀਜਸਾਸਪਬੀਜਸ੍ਸ ਚਤੁਪਞ੍ਚਛਸਤ੍ਤਅਟ੍ਠਕਲਭਾਗਮਤ੍ਤੇਨੇਵ ਅਙ੍ਗੁਲਿਯਾ ਪਤਿਟ੍ਠਿਤਟ੍ਠਾਨਮਤ੍ਤੇਯੇਵ ਭੂਮਿਪਦੇਸੇ ਨਿਸਿਨ੍ਨਾਨਂ ਅਤਿਖੁਦ੍ਦਕਸਤ੍ਤਾਨਂ ਗਣਨਪਥਮ੍ਪਿ ਵੀਤਿਵਤ੍ਤਾ ਤੇ ਹਿ ਗਣਿਤੁਂ ਇਦ੍ਧਿਮਨ੍ਤਪੁਗ੍ਗਲੇ ਠਪੇਤ੍ਵਾ ਅਞ੍ਞੋ ਕੋ ਨਾਮ ਸਕ੍ਖਿਸ੍ਸਤਿ ਤੇਹਿ ਮੋਹਨ੍ਧਭਾਵੇਨ ਕਣ੍ਹਸੁਕ੍ਕਪਕ੍ਖਮ੍ਪਿ ਅਜਾਨਨ੍ਤਾ ਅਨੇਕੇਸੁ ਬੁਦ੍ਧਸਤੇਸੁ ਵਾ ਬੁਦ੍ਧਸਹਸ੍ਸੇਸੁ ਵਾ ਉਪ੍ਪਜ੍ਜਮਾਨੇਸੁਪਿ ਬੁਦ੍ਧੋਤਿਸਦ੍ਦਂ ਅਸੁਤ੍ਵਾ ਵੀਤਿਵਤ੍ਤਾ, ਏਵਂ ਮਨੁਸ੍ਸਤ੍ਤਭਾਵੋਪਿ ਦੁਲ੍ਲਭੋਯੇਵ. ਮਨੁਸ੍ਸਤ੍ਤਭਾਵੇ ਲਭਮਾਨੇਪਿ ਬੁਦ੍ਧੁਪ੍ਪਾਦਕਾਲੋ ਅਤਿਦੁਲ੍ਲਭੋਵ. ਬੁਦ੍ਧੁਪ੍ਪਾਦਕਾਲੇਪਿ ਸਮ੍ਮਾਦਿਟ੍ਠਿ ਹੁਤ੍ਵਾ ਕੁਸਲੂਪਪਤ੍ਤਿਸਙ੍ਖਾਤਾ ਖਣਸਮ੍ਪਤ੍ਤਿ ਦੁਲ੍ਲਭਾਵ, ਸਦ੍ਧਮ੍ਮਦੇਸਕਸ੍ਸਾਪਿ ਦੁਲ੍ਲਭਤ੍ਤਾ, ਤਸ੍ਮਿਮ੍ਪਿ ਸਤਿ ਅਙ੍ਗਵਿਕਲਭਾਵੇਨ ਸਦ੍ਧਮ੍ਮਸਵਨਸ੍ਸਾਪਿ ਦੁਲ੍ਲਭਤ੍ਤਾਤਿ ਏਵਮਾਦਿਪ੍ਪਭੇਦਾ ਮਨੁਸ੍ਸਤ੍ਤਭਾਵਾਦਿਕਾ ਖਣਸਮ੍ਪਤ੍ਤਿਯੋ ਦੁਲ੍ਲਭਾਤਿ ਵੇਦਿਤਬ੍ਬਾ. ਦੁਲ੍ਲਭਾ ਖਣਸਮ੍ਪਤ੍ਤੀਤਿ ਕੁਸਲੂਪਪਤ੍ਤਿਸਙ੍ਖਾਤਾ ਖਣਸਮ੍ਪਤ੍ਤਿ ਦੁਲ੍ਲਭਾਯੇਵ ਤਥਾ ਹਿ ਪਚ੍ਚਨ੍ਤਵਿਸਯ ਅਰੂਪਅਸਞ੍ਞਸਤ੍ਤਤਿਰਚ੍ਛਾਨਪੇਤਨੇਰਯਿਕਕਾਲੇ ਵਾ ਮਜ੍ਝਿਮਦੇਸੇਪਿ ਚਕ੍ਖਾਦਿਅਙ੍ਗਵਿਕਲੇਵਾ ਪਰਿਪੁਣ੍ਣਅਙ੍ਗਭਾਵੇਪਿ ਮਿਚ੍ਛਾਦਿਟ੍ਠਿਭੂਤਾ ਵਾ ਕੁਸਲੂਪਪਤ੍ਤਿਸਙ੍ਖਾਤਾ ਖਣਾ ਨ ਹੋਨ੍ਤਿ ਪਚ੍ਚਨ੍ਤਵਿਸਯੇ ਹਿ ਪਵਤ੍ਤਾ ਜਨਾ ਪਾਣਾਤਿਪਾਤਾਦਿਦਸਅਕੁਸਲਕਮ੍ਮਪਥੇਯੇਵ ਰਮਨ੍ਤਿ ਅਭਿਰਮਨ੍ਤਿ, ਚਣ੍ਡਸਭਾਵਾ ਚ ਤੇ ਹੋਨ੍ਤਿ, ਰਤਨਤ੍ਤਯਗੁਣਮ੍ਪਿ ਨ ਜਾਨਨ੍ਤਿ. ਅਰੂਪਿਨੋਪਿ ਪੁਗ੍ਗਲਾ ਪਰਤੋਘੋਸਵਿਰਹਿਤਤ੍ਤਾ ਸੋਤਾਪਤ੍ਤਿਮਗ੍ਗਪਟਿਲਾਭੋਪਿ ਤੇਸਂ ਨਤ੍ਥਿ, ਬੁਦ੍ਧਦਸ੍ਸਨਾਦੀਨਿਪਿ ਨ ਲਭਨ੍ਤਿ. ਅਸਞ੍ਞਸਤ੍ਤਤਿਰਚ੍ਛਾਨਪੇਤਨੇਰਯਿਕਕਾਲੇਸੁ ਪਨ ਪਗੇਵ ਪੂਰਿਤਪਾਰਮੀਨਂ ਸਤ੍ਤਾਨਂ ਪਵਤ੍ਤਨਮ੍ਪਿ ਅਬ੍ਬੋਹਾਰਿਕਂ, ਸਮ੍ਮਾਦਿਟ੍ਠਿਕੁਲੇ ਜਾਯਮਾਨਾਪਿ ਚਕ੍ਖੁਵਿਕਲੇਨ ਬੁਦ੍ਧਸਙ੍ਘਰਤਨਾਨਂ ਅਦਸ੍ਸਨਂ, ਸੋਤਵਿਕਲੇਨ ਧਮ੍ਮਸਵਨਤੋਪਿ ਹਾਯਤਿ ਏਲ਼ਮੂਗਾਦਿਭਾਵੇਨ ਕੁਸਲਸਮਾਦਾਨਾ ਨ ਹੋਨ੍ਤਿ. ਅਙ੍ਗਸਮ੍ਪਨ੍ਨੇਪਿ ਮਿਚ੍ਛਾਦਿਟ੍ਠਿਭਾਵੇਨ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਪਰਿਕ੍ਖਿਤ੍ਤਂ ਸਬ੍ਬਜਨਾਨਂ ਨਯਨਰਸਾਯਤਨਭੂਤਂ ਸਬ੍ਬਞ੍ਞੁਬੁਦ੍ਧਮ੍ਪਿ ਦਿਸ੍ਵਾ ਪਸਾਦਸੋਮ੍ਮੇਨ ਚਕ੍ਖੁਨਾ ਓਲੋਕੇਤਬ੍ਬਮ੍ਪਿ ਨ ਮਞ੍ਞਨ੍ਤਿ ਮਨੋਪਦੋਸਵਸੇਨੇਵ ਯੁਗਗ੍ਗਾਹਾ ਹੁਤ੍ਵਾ ਯਮਕਪਾਟਿਹਾਰਿਯਕਾਲਾਦੀਸੁ ਅਨੇਕੇਪਿ ਮਿਚ੍ਛਾਦਿਟ੍ਠਿਨੋ ਮਹਾਨਿਰਯੇ ਉਪ੍ਪਜ੍ਜਨ੍ਤਿ. ਏਵਂ ਕੁਸਲੂਪਪਤ੍ਤਿਖਣਸਮ੍ਪਤ੍ਤਿਪਿ ਦੁਲ੍ਲਭਾਯੇਵ.
‘‘ਦੁਲ੍ਲਭਞ੍ਚ ਮਨੁਸ੍ਸਤ੍ਤਂ, ਬੁਦ੍ਧੁਪ੍ਪਾਦੋ ਚ ਦੁਲ੍ਲਭੋ;
ਦੁਲ੍ਲਭਾ ਖਣਸਮ੍ਪਤ੍ਤਿ, ਸਦ੍ਧਮ੍ਮੋ ਪਰਮਦੁਲ੍ਲਭੋ’’ਤਿ.
ਇਮਿਸ੍ਸਾ ਗਾਥਾਯ ਅਤ੍ਥੋ ਵੁਤ੍ਤੋਯੇਵ.
ਇਤਿ ਸਾਗਰਬੁਦ੍ਧਿਤ੍ਥੇਰਵਿਰਚਿਤੇ ਸੀਮਵਿਸੋਧਨੇ
ਪਕਿਣ੍ਣਕਕਣ੍ਡੋ ਨਾਮ ਪਞ੍ਚਮੋ ਪਰਿਚ੍ਛੇਦੋ.
ਏਵਂ ਸਤ੍ਥੁਪਰਿਨਿਬ੍ਬਾਨਤੋ ਵਸ੍ਸਸਤਚ੍ਚਯੇਨ ਪਤਿਟ੍ਠਿਤੇ ਇਸਿਨਾ ਕਾਰਿਤਤ੍ਤਾ’ ਇਸਿਨਗਰ’ਨ੍ਤਿ ਲਦ੍ਧਨਾਮੇ ਦ੍ਵਤ੍ਤਪਾਦਿਭੂਪਾਲਾਨਂ ਨਿਵਾਸਟ੍ਠਾਨਭੂਤੇ ਸੀਰਿਖੇਤ੍ਤਨਗਰੇ ਏਰਾਵਤਿਯਾ ਨਦਿਯਾ ਪਾਰਿਮਤੀਰਭੂਤੇ ਪਬ੍ਬਤਸਾਨੁਮ੍ਹਿ ਪਤਿਟ੍ਠਿਤਸ੍ਸ ਕਞ੍ਚਨਵਰਮਹਾਥੂਪਸ੍ਸ ਦਾਯਕਸ੍ਸ ਸਤ੍ਵਿਵਮਹਾਧਮ੍ਮਰਞ੍ਞੋ ਕਾਲੇ ਸਾਸਨਸ੍ਸ ਦ੍ਵਿਸਹਸ੍ਸਸਤਾਧਿਕਏਕਤਿਂਸਤਿਮੇ ਵਸ੍ਸੇ ਸਾਸਨੇ ਪਟਿਲਦ੍ਧਸਦ੍ਧਾਨਂ ਕੁਲਪੁਤ੍ਤਾਨਂ ਮਹਾਜਾਨਿਕਰਣਵਸੇਨ ਵਿਮਤਿਵਿਨੋਦਨਿਯਾ ਵੁਤ੍ਤਵਚਨਂ ਸਦ੍ਦਯੁਤ੍ਤਿਅਤ੍ਥਯੁਤ੍ਤਿਵਸੇਨ ਸਾਧੁਕਂ ਅਵਿਚਿਨਿਤ੍ਵਾ ਨਦਿਯਾ ਉਦਕੁਕ੍ਖੇਪਂ ਅਕਤ੍ਵਾ ਉਪਸਮ੍ਪਦਾ ਕਮ੍ਮਸ੍ਸ ਕਾਰਿਤਤ੍ਤਾ ਸਾਸਨੇ ਪਰਾਜਯਮਾਪਨ੍ਨੇ ਕੁਲਪੁਤ੍ਤੇ ਉਪਾਰਮ੍ਭਕਰਣਵਸੇਨ ਸੀਮਵਿਪਤ੍ਤਿਹਾਰਕੋ ਸੀਮਸਮ੍ਪਤ੍ਤਿਪ੍ਪਕਾਸਕੋ ਗਨ੍ਥੋ ਪਵਤ੍ਤਤਿ.
ਏਤ੍ਤਾਵਤਾ ਚ ਸਿਰਿਖੇਤ੍ਤਨਗਰਗੋਚਰਗਾਮੇਨ ਸਤ੍ਵਿਵਮਹਾਧਮ੍ਮਰਾਜਗੁਰੁਭੂਤੇਨ ਮਹਾਵੇਯ੍ਯਾਕਰਣੇਨ ਤਿਪਿਟਕਧਰੇਨ’ਸਦ੍ਧਮ੍ਮਕੋਵਿਦੋ’ਤਿ ਪਾਕਟ ਨਾਮਧੇਯ੍ਯੇਨ ਮਹਾਥੇਰੇਨ ਉਪਜ੍ਝਾਯੋ ਹੁਤ੍ਵਾ ਪਞ੍ਞਾਧਿਪਤੀਨਂ ਨਿਵਾਸਭੂਤੇ ਪਚ੍ਛਿਮਜਿਨਚਕ੍ਕਸਾਸਨਵਰੇ ਵਾਸਿਗਣਾਚਰਿਯੇਨ ਗਣਵਾਚਕੇਨ ਵਿਨਯਧਰੇਨ ਮਹਾਸਾਮਿਨਾ ਚ, ਰਾਜਗੁਰੁਨਾ ਤਿਪਿਟਕਨਾਗਤ੍ਥੇਰੇਨ ਚ ਆਚਰਿਯੋ ਹੁਤ੍ਵਾ ਵੇਜ੍ਜਕਮ੍ਮਜਙ੍ਘਪੇਸਨਕਮ੍ਮਾਦਿਵਸੇਨ ਅਨੇਸਨਂ ਪਹਾਯ ਸਮ੍ਮਾ ਆਜੀਵੇਨ ਵਿਸੁਦ੍ਧਾਜੀਵੇਹਿ ਸਙ੍ਘਗਣੇਹਿ ਕਾਰਕਸਙ੍ਘਾ ਹੁਤ੍ਵਾ ਸਿਰਿਖੇਤ੍ਤਨਗਰਸ੍ਸ ਦਕ੍ਖਿਣਦਿਸਾਭਾਗੇ ਦੀਘਪਬ੍ਬਤਸਾਨੁਮ੍ਹਿ ਏਰਾਵਤਿਯਾ ਨਦਿਯਾ ਤੀਰੇ ਵਾਲਿਕਪੁਲ਼ਿਨੇ ਸੀਮਾਪੇਕ੍ਖਾਯ ਸਹ ਉਦਕੁਕ੍ਖੇਪਂ ਕਤ੍ਵਾ ਪਵਤ੍ਤਾਯ ਉਦਕੁਕ੍ਖੇਪਸੀਮਾਯ ਦਸਧਾ ਬ੍ਯਞ੍ਜਨਵਿਪਤ੍ਤਿਂ ਅਕਤ੍ਵਾ ਠਾਨਾਰਹੇਨ ਞਤ੍ਤਿਚਤੁਤ੍ਥੇਨ ਕਮ੍ਮੇਨ ਉਪਸਮ੍ਪਦਾਯ ਵੀਸਤਿਵਸ੍ਸੇਨ ਸਾਗਰਬੁਦ੍ਧੀਤਿ ਗਰੂਹਿ ਗਹਿਤਨਾਮਧੇਯ੍ਯੇਨ ਭਿਕ੍ਖੁਨਾ ਰਚਿਤੋ ਸਾਸਨਵਿਪਤ੍ਤਿਹਾਰਕੋ ਸੀਮਵਿਸੋਧਨੀ ਨਾਮ ਗਨ੍ਥੋ ਸਮਤ੍ਤੋ.
ਏਤ੍ਤਾਵਤਾ ਵਿਭਤ੍ਤਾ ਹਿ, ਸਪ੍ਪਭੇਦਪ੍ਪਵਤ੍ਤਿਕਾ;
ਸੀਮਵਿਸੋਧਨੀਹੇਸਾ, ਨਿਪੁਣਾ ਸਾਧੁਚਿਨ੍ਤਿਤਾ.
ਸਿਰਿਖੇਤ੍ਤਾਤਿ ਪਞ੍ਞਾਤੇ, ਪੁਰੇ ਅਪਰਨਾਮਕੇ;
ਦਕ੍ਖਿਣੇਯ੍ਯਦਿਸਾਭਾਗੇ, ਉਚ੍ਚਨੇਨ ਕਤਾਲਯੇ.
ਵਸਨ੍ਤੋ ਭਿਕ੍ਖੁ ਨਾਮੇਨ, ਸਾਗਰਬੁਦ੍ਧੀਤਿ ਵਿਸ੍ਸੁਤੋ;
ਪੁਣ੍ਣੇ ਵੀਸਤਿਵਸ੍ਸਮ੍ਹਿ, ਗਨ੍ਥੋਯਂ ਸਾਧੁਚਿਨ੍ਤਿਤੋ.
ਮਯਾਯਂ ਰਚਿਤੋ ਗਨ੍ਥੋ, ਨਿਟ੍ਠਪ੍ਪਤ੍ਤੋ ਅਨਾਕੁਲੋ;
ਏਵਂ ਪਾਣਿਨਂ ਸਬ੍ਬੇ, ਸੀਘਂ ਸਿਜ੍ਝਨ੍ਤੁ ਸਙ੍ਕਪ੍ਪਾ.
ਯਾਵ ਬੁਦ੍ਧੋਤਿਨਾਮਮ੍ਪਿ ਲੋਕਜੇਟ੍ਠਸ੍ਸ ਤਾਦਿਨੋ;
ਤਾਵ ਤਿਟ੍ਠਤੁ ਯਂ ਗਨ੍ਥੋ, ਸਾਸਨੇ ਹਾਰਯਂ ਤਮਂ.
ਉਦ੍ਧਂ ਯਾਵ ਭਵਗ੍ਗਾ ਚ, ਅਧੋ ਯਾਵ ਅਵੀਚਿਤੋ;
ਸਮਨ੍ਤਾ ਚਕ੍ਕਵਾਲ਼ੇਸੁ, ਯੇ ਸਤ੍ਤਾ ਪਥਵੀਚਰਾ.
ਤੇਪਿ ਸਬ੍ਬੇ ਮਯਾ ਹੋਨ੍ਤੁ, ਸਮਸਮਵਿਪਾਕਿਨੋ;
ਚਿਰਂ ਜੀਵਤੁ ਨੋ ਰਾਜਾ, ਸਾਸਨਸ੍ਸ ਉਜ੍ਜੋਤਕੋ.
ਦਿਬ੍ਬਨ੍ਤੋ ਰਾਜਧਮ੍ਮੇਨ, ਅਰੋਗੋ ਸਹ ਞਾਤਿਭਿ;
ਅਨੇਨ ਪੁਞ੍ਞਕਮ੍ਮੇਨ, ਭਵੇਯ੍ਯਂ ਜਾਤਿਜਾਤਿਯਂ.
ਸਾਸਨਂ ਜੋਤਯਨ੍ਤੋਵ, ਸਕ੍ਯਪੁਤ੍ਤਸ੍ਸ ਸਾਸਨੇ;
ਯਦਾ ਨਸ੍ਸਤਿ ਸਦ੍ਧਮ੍ਮੋ, ਅਨ੍ਧੀਭੂਤੋ ਮਹੀਤਲੇ;
ਦੇਵਲੋਕੇ ਤਦਾ ਹੇਸ੍ਸਂ, ਤੁਸਿਤੇ ਠਾਨਮੁਤ੍ਤਮੇਤਿ.
ਸੀਮਵਿਸੋਧਨੀ ਨਿਟ੍ਠਿਤਾ.