੫. ਨਵਵਾਸੀਰਟ੍ਠਸਾਸਨਵਂਸਕਥਾਮਗ੍ਗੋ

੫. ਇਦਾਨਿ ਵਨਵਾਸੀਰਟ੍ਠੇ ਸਿਰਿਖੇਤ੍ਤਨਗਰਸਾਸਨਵਂਸਂ ਵਕ੍ਖਾਮਿ. ਜਿਨਚਕ੍ਕੇ ਹਿ ਏਕਾਧਿਕੇ ਵਸ੍ਸਸਤੇ ਸਮ੍ਪਤ੍ਤੇ ਜਟਿਲੋ ਸਕ੍ਕੋ ਨਾਗੋ ਗਰੁਲ਼ੋ ਕੁਮ੍ਭਣ੍ਡੋ ਚਨ੍ਦੀ ਪਰਮੀਸ੍ਵਰੋਚਾਤਿ ਇਮੇ ਸਤ੍ਤ ਸਿਰਿਖੇਤ੍ਤਂ ਨਾਮ ਨਗਰਂ ਮਾਪੇਸੁਂ. ਤਤ੍ਥ ਦ੍ਵਤ੍ਤਪੋਙ੍ਕੋ ਨਾਮ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਕਿਰ ਤੀਣਿ ਅਕ੍ਖੀਨਿ ਸਨ੍ਤੀਤਿ. ਤਦਾ ਭਗਵਤੋ ਸਾਵਕਾ ਅਰਹਨ੍ਤਾ ਤਿਸਹਸ੍ਸਮਤ੍ਤਾ ਤਤ੍ਥ ਵਸਿਂਸੁ. ਸੋ ਰਾਜਾ ਤੇਸਂ ਅਰਹਨ੍ਤਾਨਂ ਦੇਵਸਿਕਂ ਚਤੂਹਿ ਪਚ੍ਚਯੇਹਿ ਉਪਤ੍ਥਮ੍ਭਿ. ਛ ਸਰੀਰਧਾਤੁਯੋ ਚ ਏਕੇਕਂ ਏਕੇਕਸ੍ਮਿਂ ਨਿਦਹਿਤ੍ਵਾ ਛ ਚੇਤਿਇਯਾਨਿ ਕਾਰਾਪੇਸਿ. ਦਕ੍ਖਿਣਬਾਹੁਂ ਪਨ ਨਿਦਹਿਤ੍ਵਾ ਏਕਮ੍ਪਿ ਚੇਤਿਯਂ ਕਾਰਾਪੇਸਿ.

ਉਣ੍ਹੀਸਧਾਤੁਂ ਪਨ ਕਙ੍ਗਰਨ੍ਨਗਰਤੋ ਆਨੇਤ੍ਵਾ ਏਕਮ੍ਪਿ ਚੇਤਿਯਂ ਕਾਰਾਪੇਸਿ. ਤਂ ਪਨ ਤਾਵ ਨ ਨਿਟ੍ਠਿਤਂ. ਪਚ੍ਛਾ ਅਨੁਰੁਦ੍ਧਰਾਜਾ ਗਹੇਤ੍ਵਾ ਅਰਿਮਦ੍ਦਨਨਗਰਂ ਆਨੇਤ੍ਵਾ ਚਞ੍ਞਿਙ੍ਖੁ ਨਾਮ ਚੇਤਿਯੇ ਨਿਧਾਨਂ ਅਕਾਸਿ. ਤਸ੍ਮਾ ਰਕ੍ਖਿਤਤ੍ਥੇਰਸ੍ਸ ਆਗਮਨਤੋ ਪੁਬ੍ਬੇਪਿ ਸਾਸਨਂ ਪਤਿਟ੍ਠਾਸੀਤਿ ਦਟ੍ਠਬ੍ਬਂ. ਤਤੋ ਪਚ੍ਛਾ ਸਾਸਨਂ ਦੁਬ੍ਬਲਂ ਹੁਤ੍ਵਾ ਅਟ੍ਠਾਸਿ.

ਇਦਂ ਵਨਵਾਸੀਰਟ੍ਠੇ ਪਠਮਂ ਸਾਸਨਸ੍ਸ ਪਤਿਟ੍ਠਾਨਂ.

ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਪਨ ਪੇਸਿਤੋ ਰਕ੍ਖਿਤਤ੍ਥੇਰੋ ਵਨਵਾਸੀਰਟ੍ਠਂ ਗਨ੍ਤ੍ਵਾ ਆਕਾਸੇ ਠਤ੍ਵਾ ਅਨਮਤਗ੍ਗਪਰਿਯਾਯਕਥਾਯ ਵਨਵਾਸਿਕੇ ਪਸਾਦੇਸਿ. ਕਥਾਪਰਿਯੋਸਾਨੇ ਪਨਸ੍ਸ ਸਟ੍ਠਿਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਸਤ੍ਤਤਿਸਹਸ੍ਸਮਤ੍ਤਾ ਪਬ੍ਬਜਿਂਸੁ. ਪਞ੍ਚਵਿਹਾਰਸਤਾਨਿ ਪਤਿਟ੍ਠਾਪੇਸੁਂ. ਏਵਂ ਸੋ ਤਤ੍ਥ ਸਾਸਨਂ ਪਤਿਟ੍ਠਾਪੇਸਿ. ਤੇਨੇਵ ਅਟ੍ਠ ਕਥਾਯਂ –

ਗਨ੍ਤ੍ਵਾਨ ਰਕ੍ਖਿਤਤ੍ਥੇਰੋ,

ਵਨਵਾਸਿਂ ਮਹਿਦ੍ਧਿਕੋ;

ਅਨ੍ਤਲਿਕ੍ਖੇ ਠਿਤੋ ਤਤ੍ਥ,

ਦੇਸੇਸਿ ਅਨਮਤਗ੍ਗਿਯਨ੍ਤਿ ਵੁਤ੍ਤਂ.

ਏਵਂ ਵਨਵਾਸੀਰਟ੍ਠੇ ਪੁਬ੍ਬੇਯੇਵ ਸਾਸਨਂ ਓਗਾਹੇਤ੍ਵਾ ਪਤਿਟ੍ਠਹਿ. ਨ ਪਨ ਤਾਵ ਸਕਲਂ ਬ੍ਯਾਪੇਤ੍ਵਾ ਪਤਿਟ੍ਠਹਿ.

ਇਦਂ ਤਾਵ ਵਨਵਾਸੀਰਟ੍ਠੇ ਸਿਰਿਖੇਤ੍ਤਨਗਰੇ ਦੁਤਿਯਂ

ਸਾਸਨਸ੍ਸ ਪਤਿਟ੍ਠਾਨਂ.

ਜਿਨਚਕ੍ਕੇ ਪਨ ਤੇਤ੍ਤਿਂਸਾਧਿਕੇ ਚਤੁਵਸ੍ਸਸਤੇ ਕੁਕ੍ਕੁਟ ਸੀਸੋ ਨਾਮ ਏਕੋ ਰਾਜਾ ਰਜ੍ਜਂ ਕਾਰੇਸਿ. ਤਸ੍ਸ ਰਞ੍ਞੋ ਕਾਲੇ ਭਗਵਤੋ ਸਾਵਕਾ ਅਰਹਨ੍ਤਾ ਪਞ੍ਚਸਤਮਤ੍ਤਾ ਅਹੇਸੁਂ. ਤੇਸਮ੍ਪਿ ਸੋ ਰਾਜਾ ਦੇਵਸਿਕਂ ਚਤੂਹਿ ਪਚ੍ਚਯੇਹਿ ਉਪਤ੍ਥਮ੍ਭੇਸਿ. ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਨੋ ਪਨ ਗਣਨਪਥਂ ਵੀਤਿਵਤ੍ਤਾ ਅਹੇਸੁਂ.

ਇਦਂ ਵਨਵਾਸੀਰਟ੍ਠੇ ਸਿਰਿਖੇਤ੍ਤਨਗਰੇ ਪਰਮ੍ਪਰਾਭਤਵਸੇਨ

ਤਤਿਯਂ ਸਾਸਨਸ੍ਸ ਪਤਿਟ੍ਠਾਨਂ.

ਇਚ੍ਚੇਵਂ ਵਨਵਾਸੀਰਟ੍ਠੇ ਅਨੇਕਸਤੇਹਿ ਅਰਹਨ੍ਤਤ੍ਥੇਰੇਹਿ ਸਾਸਨਂ ਪੁਣ੍ਣਿਨ੍ਦੁਸਙ੍ਕਾਸਂ ਹੁਤ੍ਵਾ ਅਤਿਵਿਯ ਵਿਜ੍ਜੋਤੇਸਿ. ਸਾਸਨਿਕ ਗਨ੍ਥਕਾਰਾ ਪਨ ਮਹਾਥੇਰਾ ਤਤ੍ਥ ਨ ਸਨ੍ਦਿਸ੍ਸਨ੍ਤਿ. ਅਰਹਨ੍ਤਤ੍ਥੇਰਾ ਪਨ ਰਾਜੂਨਂ ਆਯਾਚਨਂ ਆਰਬ੍ਭ ਧਮ੍ਮਸਤ੍ਥਂ ਏਕਂ ਵਿਰਚਯਿਂਸੂਤਿ ਪੋਰਾਣਾ ਵਦਨ੍ਤੀਤਿ. ਇਚ੍ਚੇਵਂ–

ਤੇਚ ਥੇਰਾ ਮਹਾਪਞ੍ਞਾ,

ਪਗ੍ਗਹੇਤ੍ਵਾਨ ਸਾਸਨਂ;

ਸੂਰਿਯੋ ਵਿਯ ਅਤ੍ਥਙ੍ਗੋ,

ਉਪਗਾ ਮਚ੍ਚੁਸਨ੍ਤਿਕਂ.

ਤਸ੍ਮਾ ਹਿ ਪਣ੍ਡਿਤੋ ਪੋਸੋ,

ਯਾਵ ਮਚ੍ਚੁ ਨਚਾਗਤੋ;

ਤਾਵ ਪੁਞ੍ਞਂ ਕਰੇ ਨਿਚ੍ਚਂ,

ਮਾ ਪਮਜ੍ਜੇਯ੍ਯ ਸਬ੍ਬਦਾਤਿ.

ਇਤਿ ਸਾਸਨਵਂਸੇ ਵਨਵਾਸੀਰਟ੍ਠਸਾਸਨਵਂਸਕਥਾਮਗ੍ਗੋ

ਨਾਮ ਪਞ੍ਚਮੋ ਪਰਿਚ੍ਛੇਦੋ.