੬. ਅਪਰਨ੍ਤਰਟ੍ਠਸਾਸਨਵਂਸਕਥਾਮਗ੍ਗੋ

੬. ਇਦਾਨਿ ਪਨ ਮਰਮ੍ਮਮਣ੍ਡਲੇ ਅਪਰਨ੍ਤਰਟ੍ਠੇ ਸਾਸਨਵਂਸਂ ਵਕ੍ਖਾਮਿ. ਅਮ੍ਹਾਕਞ੍ਹਿ ਮਰਮ੍ਮਰਟ੍ਠੇ ਸੁਪ੍ਪਾਦਕਤਿਤ੍ਥੇ ਵਾਣਿਜਗਾਮੇ ਵਸਨ੍ਤੇ ਚੂਲ਼ਪੁਣ੍ਣ ਮਹਾਪੁਣ੍ਣੇਦ੍ਵੇ ਭਾਤਿਕੇ ਪਟਿਚ੍ਚ ਭਗਵਤੋ ਧਰਮਾਨਸ੍ਸੇਵ ਅਤਿਰੇਕਵੀਸਤਿਵਸ੍ਸਕਾਲਤੋ ਪਭੁਤਿ ਸਾਸਨਂ ਪਤਿਟ੍ਠਾਸਿ. ਨ ਪਨ ਤਾਵ ਬ੍ਯਾਪੇਤ੍ਵਾ ਪਤਿਟ੍ਠਾਸਿ. ਤੇਨੇਵ ਪੁਨ ਸਾਸਨਸ੍ਸ ਪਤਿਟ੍ਠਾਪਨਤ੍ਥਾਯ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਯੋਨਕਧਮ੍ਮਰਕ੍ਖਿਤਤ੍ਥੇਰਂ ਪੇਸੇਸੀਤਿ.

ਭਗਵਾ ਪਨ ਲੋਹਿਤਚਨ੍ਦਨਵਿਹਾਰਂ ਪਟਿਗ੍ਗਹੇਤ੍ਵਾ ਸਤ੍ਤਸਤ੍ਤਾਹਾਨਿ ਨਿਸੀਦਿਤ੍ਵਾ ਸਮਾਗਤਾਨਂ ਦੇਵਮਨੁਸ੍ਸਾਨਂ ਧਮ੍ਮਰਸਂ ਅਦਾਸਿ. ਸਤ੍ਤਾਹੇਸੁ ਚ ਏਕਸ੍ਮਿਂ ਅਹੁ ਚਤੁਰਾਸੀਤਿਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਪਞ੍ਚਸਤਮਤ੍ਤੇਹਿ ਚ ਪਾਸਾਦੇਹਿ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਸਚ੍ਚਬਨ੍ਧਪਬ੍ਬਤੇ ਨਿਸਿਨ੍ਨਸ੍ਸ ਸਚ੍ਚਬਨ੍ਧਸ੍ਸ ਨਾਮ ਇਸਿਨੋ ਧਮ੍ਮਂ ਦੇਸੇਤ੍ਵਾ ਛਹਿ ਅਭਿਞ੍ਞਾਹਿ ਸਦ੍ਧਿਂ ਅਰਹਤ੍ਤਂ ਪਾਪੇਸਿ. ਵਾਣਿਜਗਾਮੇ ਚ ਇਸਿਦਿਨ੍ਨਸੇਟ੍ਠਿ ਆਦੀਨਮ੍ਪਿ ਧਮ੍ਮਰਸਂ ਪਾਯੇਸਿ. ਇਚ੍ਚੇਵਂ ਸਚ੍ਚਬਨ੍ਧਇਸਿਦਿਨ੍ਨਮਹਾਪੁਣ੍ਣਾਦਯੋ ਪਟਿਚ੍ਚ ਅਮ੍ਹਾਕਂ ਮਰਮ੍ਮਮਣ੍ਡਲੇ ਸਾਸਨਂ ਪਤਿਟ੍ਠਾਸਿ.

ਇਦਂ ਮਰਮ੍ਮਮਣ੍ਡਲੇ ਅਪਰਨ੍ਤਰਟ੍ਠੇ ਪਠਮਂ ਸਾਸਨਸ੍ਸ

ਪਤਿਟ੍ਠਾਨਂ.

ਭਗਵਤੋ ਪਰਿਨਿਬ੍ਬੁਤਤੋ ਪਞ੍ਚਤਿਂਸਾਧਿਕੇ ਦ੍ਵਿਵਸ੍ਸਸਤੇ ਸਮ੍ਪਤ੍ਤੇ ਤਤਿਯਸਙ੍ਗੀਤਿਂ ਸਙ੍ਗਾਯਿਤ੍ਵਾ ਅਵਸਾਨੇ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਅਤ੍ਤਨੋ ਸਦ੍ਧਿਵਿਹਾਰਿਕਂ ਯੋਨਕਧਮ੍ਮਰਕ੍ਖਿਤਤ੍ਥੇਰਂ ਸਦ੍ਧਿਂ ਚਤੂਹਿ ਭਿਕ੍ਖੂਹਿ ਅਪਰਨ੍ਤਰਟ੍ਠਂ ਪੇਸੇਸਿ. ਅਪਰਨ੍ਤਰਟ੍ਠਞ੍ਚ ਨਾਮ ਅਮ੍ਹਾਕਂ ਮਰਮ੍ਮਮਣ੍ਡਲੇ ਸੁਨਾਪਰਨ੍ਤਰਟ੍ਠਮੇਵ. ਤਮਤ੍ਥਂ ਪਨ ਹੇਟ੍ਠਾ ਅਵੋਚੁਮ੍ਹਾ.

ਯੋਨਕਧਮ੍ਮਰਕ੍ਖਿਤਤ੍ਥੇਰੋਪਿ ਅਪਰਨ੍ਤਰਟ੍ਠਂ ਆਗਨ੍ਤ੍ਵਾ ਅਗ੍ਗਿਕ੍ਖਨ੍ਧੋਪਮਸੁਤ੍ਤੇਨ ਰਟ੍ਠਵਾਸੀਨਂ ਪਸਾਦੇਸਿ. ਸਤ੍ਤਤਿਮਤ੍ਤਾਨਂ ਪਾਣਸਹਸ੍ਸਾਨਂ ਧਮ੍ਮਰਸਂ ਪਾਯੇਸਿ. ਰਟ੍ਠਵਾਸਿਨੋ ਚ ਬਹਵੋ ਸਾਸਨੇ ਪਬ੍ਬਜਿਂਸੁ. ਰਾਜਕੁਲਤੋਪਿ ਸਹਸ੍ਸਮਤ੍ਤਾ ਪਬ੍ਬਜਿਂਸੁ. ਇਤ੍ਥੀਨਂ ਪਨ ਅਤਿਰੇਕਸਟ੍ਠਿਸਹਸ੍ਸਮਤ੍ਤਾ ਪਬ੍ਬਜਿਂਸੁ. ਤਞ੍ਚ ਨ ਅਗ੍ਗਿਕ੍ਖਨ੍ਧੋਪਮਸੁਤ੍ਤਨ੍ਤਂ ਸੁਤ੍ਵਾ ਪਬ੍ਬਜਨ੍ਤੀਨਂ ਇਤ੍ਥੀਨਂ ਵਸੇਨ ਵੁਤ੍ਤਂ, ਅਥ ਖੋ ਆਦਿਤੋ ਪਟ੍ਠਾਯ ਯਾਵਚਿਰਕਾਲਾ ਸਾਸਨਂ ਪਸੀਦਿਤ੍ਵਾ ਪਬ੍ਬਜਨ੍ਤੀਨਂ ਇਤ੍ਥੀਨਂ ਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਕਸ੍ਮਾਤਿ ਚੇ, ਇਤ੍ਥੀਨਂ ਭਿਕ੍ਖੁਨੀਨਂ ਸਨ੍ਤਿਕੇਯੇਵ ਪਬ੍ਬਜਿਤੁਂ ਯੁਤ੍ਤਤ੍ਤਾ ਯੋਨਕਧਮ੍ਮਰਕ੍ਖਿਤਤ੍ਥੇਰੇਨ ਚ ਸਦ੍ਧਿਂ ਭਿਕ੍ਖੁਨੀਨਂ ਅਨਾਗਤਤ੍ਤਾ. ਏਵਂ ਚਿਰਕਾਲਂ ਅਤਿਕ੍ਕਮਿਤ੍ਵਾ ਪਚ੍ਛਾ ਭਿਕ੍ਖੁਨਿਯੋ ਆਗਨ੍ਤ੍ਵਾ ਤਾਸਂ ਸਨ੍ਤਿਕੇ ਪਬ੍ਬਜਿਤਾਨਂ ਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਸੀਹਲ਼ਦੀਪੇ ਅਨੁਲ਼ਾਦੇਵਿਯੋ ਪਬ੍ਬਜਿਤਕਾਲੇ ਮਹਾਮਹਿਨ੍ਦਤ੍ਥੇਰਸ੍ਸ ਸਙ੍ਘਮਿਤ੍ਤਾਥੇਰਿਯਾ ਪਕ੍ਕੋਸਨਤਾ ਇਧ ਞਾਪਕਾਤਿ. ਏਵਂ ਯੋਨਕਧਮ੍ਮਰਕ੍ਖਿਤਤ੍ਥੇਰਂ ਪਟਿਚ੍ਚ ਅਪਰਨ੍ਤਰਟ੍ਠੇ ਸਤ੍ਤਾਨਂ ਬਹੁਪਕਾਰੋ ਅਹੋਸਿ. ਤੇਨੇਵਟ੍ਠਕਥਾਯਂ–

ਅਪਰਨ੍ਤਂ ਵਿਗਾਹਿਤ੍ਵਾ, ਯੋਨਕੋ ਧਮ੍ਮਰਕ੍ਖਿਤੋ;

ਅਗ੍ਗਿਕ੍ਖਨ੍ਧੂਪਮੇਨੇਤ੍ਥ, ਪਸਾਦੇਸਿ ਜਨੇ ਬਹੂਤਿ.

ਤਤ੍ਥਾਯਂ ਅਧਿਪ੍ਪਾਯ ਵਿਸੇਸੋ ਗਹੇਤਬ੍ਬੋ. ਕਥਂ. ਅਗ੍ਗਿਕ੍ਖਨ੍ਧੋਪਮਸੁਤ੍ਤਨ੍ਤਂ ਨਾਮ ਭਿਕ੍ਖੂਨਂ ਪਟਿਪਤ੍ਤਿਵਸੇਨ ਵੁਤ੍ਤਂ, ਤਂ ਭਿਕ੍ਖੂਨਂਯੇਵ ਦੇਸੇਤੁਂ ਵਟ੍ਟਤਿ, ਥੇਰੋਪਿ ਤਤ੍ਥ ਤਂ ਦੇਸੇਸਿ, ਤਸ੍ਮਾ ਪੁਣ੍ਣਸਚ੍ਚਬਨ੍ਧਾਦਯੋ ਪਟਿਚ੍ਚ ਭਗਵਤੋ ਧਰਮਾਨਸ੍ਸ ਵੀਸਤਿਵਸ੍ਸਕਾਲੇਯੇਵ ਸਾਸਨਂ ਅਪਰਨ੍ਤਰਟ੍ਠੇ ਪਤਿਟ੍ਠਹਿਤ੍ਵਾ ਕਸ੍ਮਿਞ੍ਚਿ ਕਸ੍ਮਿਞ੍ਚਿ ਠਾਨੇ ਭਿਕ੍ਖੂਨਂ ਸਂਵਿਜ੍ਜਮਾਨਤ੍ਤਾ ਤੇਸਂ ਭਿਕ੍ਖੂਨਂ ਸਙ੍ਗਹੇਤ੍ਵਾ ਦੇਸੇਤੁਂ ਪਚ੍ਛਾ ਆਗਤਾਨਞ੍ਚ ਭਿਕ੍ਖੂਨਂ ਪਰਿਸੁਦ੍ਧਾਚਾਰਤਂ ਵਿਞ੍ਞਾਪੇਤੁਂ ਅਗ੍ਗਿਕ੍ਖਨ੍ਧੋਪਮਸੁਤ੍ਤਂ ਥੇਰੋ ਦੇਸੇਸੀਤਿ. ਏਵਞ੍ਚ ਸਤਿ ਅਰਿਮਦ੍ਦਨਨਗਰੇ ਸਮਣਕੁਤ੍ਤਕਾਨਂ ਸਂਵਿਜ੍ਜਮਾਨਭਾਵਂ ਵਕ੍ਖਮਾਨੇਨ ਵਚਨੇਨ ਸਮੇਤਿ.

ਇਦਂ ਮਰਮ੍ਮਮਣ੍ਡਲੇ ਅਪਰਨ੍ਤਰਟ੍ਠੇ ਦੁਤਿਯਂ

ਸਾਸਨਸ੍ਸ ਪਤਿਟ੍ਠਾਨਂ.

ਯਸ੍ਮਾ ਪਨ ਬੁਦ੍ਧੇ, ਭਗਵਾ ਪੁਣ੍ਣਤ੍ਥੇਰਸ੍ਸ ਯਾਚਨਮਾਰਬ੍ਭ ਅਪਰਨ੍ਤਰਟ੍ਠਂ ਆਗਨ੍ਤ੍ਵਾ ਵਾਣਿਜੇ ਹਿ ਕਾਰਿਤੇ ਚਨ੍ਦਨਵਿਹਾਰੇ ਵਸਿਤ੍ਵਾ ਏਕਸ੍ਮਿਂ ਸਮਯੇ ਆਨਨ੍ਦੇਨ ਪਚ੍ਛਾਸਮਣੇਨ ਤਮ੍ਬਦੀਪਰਟ੍ਠਮ੍ਪਿ ਦੇਸਚਾਰਿਕਂ ਆਹਿਣ੍ਡਿ. ਆਹਿਣ੍ਡਿਤ੍ਵਾ ਅਰਿਮਦ੍ਦਨਨਗਰਟ੍ਠਾਨਸਮੀਪਂ ਪਤ੍ਵਾ ਪਬ੍ਬਤਮੁਦ੍ਧਨਿ ਠਤ੍ਵਾ ਅਨਾਗਤੇ ਖੋ ਆਨਨ੍ਦ ਇਮਸ੍ਮਿਂ ਪਦੇਸੇ ਸਮ੍ਮੁਤਿ ਨਾਮ ਰਾਜਾ ਅਰਿਮਦ੍ਦਨਂ ਨਾਮ ਨਗਰਂ ਮਾਪੇਸ੍ਸਤਿ, ਤਸ੍ਮਿਞ੍ਚ ਨਗਰੇ ਮਮ ਸਾਸਨਂ ਵਿਰੂਲ਼ਂ ਹੁਤ੍ਵਾ ਪਤਿਟ੍ਠਹਿਸ੍ਸਤੀਤਿ ਬ੍ਯਾਕਾਸਿ. ਅਯਮਤ੍ਥੋ ਪੋਰਾਣਵੇਦਪਾਤ੍ਥਕੇਸੁ ਵੁਤ੍ਤੋ.

ਯੋਨਕਧਮ੍ਮਰਕ੍ਖਿਤਤ੍ਥੇਰੋ ਚ ਅਪਰਨ੍ਤਰਟ੍ਠਂ ਆਗਨ੍ਤ੍ਵਾ ਤਮ੍ਬਦੀਪਰਟ੍ਠਮ੍ਪਿ ਆਹਿਣ੍ਡਿਤ੍ਵਾ ਤਮ੍ਬਦੀਪਰਟ੍ਠਵਾਸੀਨਮ੍ਪਿ ਧਮ੍ਮਰਸਂ ਪਾਯੇਸਿਯੇਵ. ਅਯਮਤ੍ਥੋ ਖਤ੍ਤਿਯਕੁਲਤੋ ਏਵ ਪੁਰਿਸਸਹਸ੍ਸਾਨਿ ਪਬ੍ਬਜਿਂਸੂਤਿ ਅਟ੍ਠਕਥਾਯਂ ਵੁਤ੍ਤਤ੍ਤਾ ਵਿਞ੍ਞਾਯਤਿ. ਤਦਾ ਹਿ ਅਪਰਨ੍ਤਰਟ੍ਠੇ ਖਤ੍ਤਿਯੋ ਨਤ੍ਥਿ, ਤਮ੍ਬਦੀਪਰਟ੍ਠਿਨ੍ਦੋਯੇਵ ਤਂ ਅਨੁਸਾਸੇਤ੍ਵਾ ਅਤਿ ਵਸਤਿ, ਖਤ੍ਤਿਯੇ ਚ ਆਸਨ੍ਤੇ ਕੁਤੋ ਖਤ੍ਤਿਯਕੁਲਾਨਿ ਭਵਿਸ੍ਸਨ੍ਤਿ, ਤੇਨੇਵ ਤਮ੍ਬਦੀਪਰਟ੍ਠਤੋ ਪੁਰਿਸਸਹਸ੍ਸਾਨਿ ਪਬ੍ਬਜਿਂਸੂਤਿ ਵਿਞ੍ਞਾਤਬ੍ਬਂ. ਤਸ੍ਮਾ ਤਮ੍ਬਦੀਪਿਕਸਾਸਨਵਂਸਮ੍ਪਿ ਇਧ ਵਤ੍ਤੁਂ ਯੁਜ੍ਜਤਿ.

ਤੇਨਿਦਾਨਿ ਤਮ੍ਬਦੀਪਿਕਾਸਾਸਨਵਂਸਂ ਪਵਕ੍ਖਾਮਿ. ਅਮ੍ਹਾਕਞ੍ਹਿ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇ ਅਰਿਮਦ੍ਦਨਨਗਰੇ ਸਮ੍ਮੁਤਿਰਾਜਾ ਨਾਮ ਭੂਪਾਲੋ ਰਜ੍ਜਂ ਕਰੇਸਿ. ਤਤੋ ਪਟ੍ਠਾਯ ਯਾਵ ਅਨੁਰੁਦ੍ਧਰਞ੍ਞਾ ਸਮਥਿ ਨਾਮਕੇ ਦੇਸੇ ਨਿਸਿਨ੍ਨਾਨਂ ਤਿਂਸਮਤ੍ਤਾਨਂ ਸਮਣਕੁਤ੍ਤਕਾਨਂ ਸਟ੍ਠਿਸਹਸ੍ਸਮਤ੍ਤਾਨਂ ਸਿਸ੍ਸਾਨਂ ਓਵਾਦਂ ਦਤ੍ਵਾ ਚਰਿਂਸੁ.

ਤੇਸਂ ਪਨ ਸਮਣਕੁਤ੍ਤਕਾਨਂ ਅਯਂ ਵਾਦੋ,- ਸਚੇ ਯੋ ਪਾਣਾਤਿਪਾਤਂ ਕਰੇਯ੍ਯ, ਸੋ ਈਦਿਸਂ ਪਰਿਤ੍ਤਂ ਭਣਨ੍ਤੋ ਤਮ੍ਹਾ ਪਾਪਕਮ੍ਮਾ ਪਰਿਮੁਚ੍ਚੇਯ੍ਯ, ਸਚੇ ਪਨ ਯੋ ਮਾਤਾਪਿਤਰਂ ਹਨ੍ਤ੍ਵਾ ਅਨਨ੍ਤਰਿਯਕਮ੍ਮਤੋ ਪਰਿਮੁਚ੍ਚਿਤੁਕਾਮੋ ਭਵੇਯ੍ਯ, ਈਦਿਸਂ ਪਰਿਤ੍ਤਂ ਭਣੇਯ੍ਯ, ਸਚੇਪਿ ਪੁਤ੍ਤਧਿਤਾਨਂ ਆਵਾਹਵਿਵਾਹਕਮ੍ਮਂ ਕਤ੍ਤੁਕਾਮੋ ਭਵੇਯ੍ਯ, ਆਚਰਿਯਾਨਂ ਪਠਮਂ ਨਿਯ੍ਯਾਦੇਤ੍ਵਾ ਆਵਾਹਵਿਵਾਹਕਮ੍ਮਂ ਕਾਤਬ੍ਬਂ, ਯੋ ਇਦਂ ਚਾਰਿਤ੍ਤਂ ਅਤਿਕ੍ਕਮੇਯ੍ਯ, ਬਹੁ ਅਪੁਞ੍ਞਂ ਪਸਵੇਯ੍ਯਾਤਿ ਏਵਮਾਦੀਹਿ ਮਿਚ੍ਛਾਵਾਦੇਹਿ ਅਤ੍ਤਨੋ ਅਤ੍ਤਨੋ ਉਪਗਤਾਨਂ ਓਵਾਦਂ ਅਦਂਸੁ. ਤਮਤ੍ਥਂ ਸੁਤ੍ਵਾ ਅਨੁਰੁਦ੍ਧਰਾਜਾ ਪਰਿਚਿਤਪੁਞ੍ਞੋ ਤੇਸਂ ਵਾਦਂ ਨ ਰੁਚਿ. ਅਯਂ ਤੇਸਂ ਮਿਚ੍ਛਾਵਾਦੋਤਿ.

ਤਦਾ ਚ ਅਰਿਮਦ੍ਦਨਨਗਰੇ ਅਰਹਨ੍ਤੋ ਨਾਮ ਥੇਰੋ ਆਗਨ੍ਤ੍ਵਾ ਸਾਸਨਂ ਪਤਿਟ੍ਠਾਪੇਸਿ. ਅਯਂ ਅਰਹਨ੍ਤਤ੍ਥੇਰਸ੍ਸ ਅਟ੍ਠੁਪ੍ਪਤ੍ਤਿ,– ਰਾਜਵਂਸਾਗਤਪਰਿਤ੍ਤਨਿਦਾਨਾਗਤਸਾਸਨਪ੍ਪਵੇਣਿਯਾਗਤਵਸੇਨ ਤਿਵਿਧਾ ਹੋਤਿ.

ਤਤ੍ਥਾਯਂ ਰਾਜਵਂਸਾਗਤਟ੍ਠੁਪ੍ਪਤ੍ਤਿ,– ਤਦਾ ਹਿ ਸੁਨਾਪਰਨ੍ਤਤਮ੍ਬਦੀਪਰਟ੍ਠੇਸੁ ਸਬ੍ਬੇਨ ਸਬ੍ਬਂ ਸਬ੍ਬਦਾ ਥਿਰਂ ਸਾਸਨਂ ਨ ਤਾਵ ਪਤਿਟ੍ਠਾਸਿ. ਤੇਨੇਵ ਭਗਵਤੋ ਬ੍ਯਾਕਤਨਿਯਾਮੇਨ ਸਾਸਨਂ ਪਤਿਟ੍ਠਾਪੇਸ੍ਸਾਮਾਤਿ ਚਿਨ੍ਤੇਤ੍ਵਾ ਮਹਾਥੇਰਾ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਸਨ੍ਤਿਕਂ ਗਨ੍ਤ੍ਵਾ ਸਾਸਨਂ ਅਨੁਗ੍ਗਹਿਤੁਂ ਸਮਤ੍ਥਂ ਪੁਗ੍ਗਲਂ ਦੇਹੀਤਿ ਯਾਚਿਂਸੁ. ਸਕ੍ਕੋਚ ਦੇਵਾਨਮਿਨ੍ਦੋ ਤਾਵਤਿਂਸਭਵਨੇ ਏਕਂ ਦੇਵਪੁਤ੍ਤਂ ਯਾਚਿਤ੍ਵਾ ਏਕਿਸ੍ਸਾ ਬ੍ਰਾਹ੍ਮਣਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਾਪੇਸਿ. ਦਸਮਾਸਚ੍ਚਯੇਨ ਵਿਜਾਯਨਕਾਲੇ ਸੀਲਬੁਦ੍ਧਿ ਨਾਮ ਥੇਰੋ ਅਨੁਰਕ੍ਖਿਤ੍ਵਾ ਵਯੇ ਸਮ੍ਪਤ੍ਤੇ ਪਬ੍ਬਾਜੇਸਿ. ਤੀਸੁ ਪਿਟਕੇਸੁ ਅਤਿਵਿਯ ਛੇਕੋ ਹੁਤ੍ਵਾ ਅਰਹਤ੍ਤਂ ਪਾਪੁਣਿ. ਅਰਹਨ੍ਤੋਤਿ ਨਾਮੇਨ ਪਾਕਟੋ ਅਹੋਸਿ.

ਸੋਚ ਥੇਰੋ ਮਰਮ੍ਮਮਣ੍ਡਲੇ ਜਿਨਸਾਸਨਂ ਵਿਜ੍ਜੋਤਾਪੇਤੁਂ ਅਰਿਮਦ੍ਦਨਨਗਰਂ ਆਗਨ੍ਤ੍ਵਾ ਨਗਰਤੋ ਅਵਿਦੂਰੇ ਏਕਸ੍ਮਿਂ ਅਰਞ੍ਞੇ ਨਿਸੀਦਿ. ਤਦਾ ਸਕ੍ਕੋ ਦੇਵਾਨਮਿਨ੍ਦੋ ਏਕਂ ਨੇਸਾਦਂ ਪਲੋਭੇਤ੍ਵਾ ਤਸ੍ਸ ਥੇਰਂ ਦਸ੍ਸੇਸਿ. ਅਥ ਨੇਸਾਦਸ੍ਸ ਏਤਦਹੋਸਿ,– ਅਯਂ ਪਨ ਅਮਨੁਸ੍ਸੋ ਯਕ੍ਖੋ ਭਵੇਯ੍ਯ, ਸਚੇ ਪਨ ਮਨੁਸ੍ਸੋ ਭਵੇਯ੍ਯ, ਏਵਂ ਸਤਿ ਮਿਲਕ੍ਖੁਜਾਤਿਕੋ ਭਵੇਯ੍ਯਾਤਿ. ਏਵਂ ਪਨ ਚਿਨ੍ਤੇਤ੍ਵਾ ਰਞ੍ਞੋ ਦਸ੍ਸਨਤ੍ਥਾਯ ਨਗਰਂ ਆਨੇਸਿ. ਥੇਰੋ ਚ ਅਟ੍ਠਪਰਿਕ੍ਖਾਰੇ ਗਹੇਤ੍ਵਾ ਅਨੁਗਚ੍ਛਿ. ਨੇਸਾਦਾ ਚ ਥੇਰਂ ਆਨੇਤ੍ਵਾ ਰਞ੍ਞੋ ਦਸ੍ਸੇਸਿ.

ਰਾਜਾ ਦਿਸ੍ਵਾ ਸਨ੍ਤਿਨ੍ਦ੍ਰਿਯੋ ਅਯਂ, ਨ ਮਿਲਕ੍ਖੁਜਾਤਿਕੋ, ਇਮਸ੍ਸ ਅਬ੍ਭਨ੍ਤਰੇ ਸਾਰਧਮ੍ਮੋ ਅਤ੍ਥਿ ਮਞ੍ਞੇਤਿ ਲਦ੍ਧਸੂਰਿਯੋਭਾਸਂਵਿਯ ਪਦੁਮਂ ਫੁਲ੍ਲਚਿਤ੍ਤਂ ਹੁਤ੍ਵਾ ਵੀਮਂਸੇਤੁਕਾਮੋ ਥੇਰਂ ਆਹ,– ਅਤ੍ਤਨੋ ਸਾਰੁਪ੍ਪਂ ਆਸਨਂ ਞਤ੍ਵਾ ਨਿਸੀਦਾਹੀਤਿ.

ਥੇਰੋ ਚ ਰਾਜਪਲ੍ਲਙ੍ਕਂ ਆਰੁਹਿਤ੍ਵਾ ਨਸੀਦਿ. ਰਾਜਾ ਚ ਅਯਂ ਅਗ੍ਗਾਸਨੇ ਨਿਸੀਦਿ, ਅਵਸ੍ਸਂ ਅਗ੍ਗਪੁਗ੍ਗਲੋ ਭਵੇਯ੍ਯਾਤਿ ਚਿਨ੍ਤੇਤ੍ਵਾ ਤ੍ਵਂ ਕਸ੍ਸ ਞਾਤਿ, ਕਸ੍ਸ ਭਿਸ੍ਸੋ, ਕੁਤੋ ਆਗਤੋਸੀਤਿ ਪੁਚ੍ਛਿ. ਥੇਰੋ ਚ ਏਵਮਾਹ,– ਲੋਕਸ੍ਮਿਂ ਯੋ ਨਵਗੁਣਸਮ੍ਪਨ੍ਨੋ ਭਗਵਾ ਸਮ੍ਮਾਸਮ੍ਬੁਦ੍ਧੋ, ਤਸ੍ਸਾਹਂ ਞਾਤਿ, ਸੋਭਗਵਾਯੇਵ ਮਮਾਚਰਿਯੋ, ਭਿਕ੍ਖੁਸਙ੍ਘਸ੍ਸ ਨਿਸਿਨ੍ਨਟ੍ਠਾਨਤੋ ਆਗਤੋਮ੍ਹੀਤਿ.

ਰਾਜਾ ਚ ਸੋਮਨਸ੍ਸਪ੍ਪਤ੍ਤੋ ਹੁਤ੍ਵਾ ਆਹ, ਤਵ ਆਚਰਿਯੇਨ ਦੇਸਿਤਂ ਧਮ੍ਮਂ ਏਕਦੇਸਤੋ ਦੇਸੇਹੀਤਿ. ਅਥ ਯਥਾ ਸਿਰਿਧਮ੍ਮਾਸੋਕਰਞ੍ਞੋ ਨਿਗ੍ਰੋਧਸਾਮਣੇਰੇਨ ਅਪ੍ਪਮਾਦਧਮ੍ਮੋ ਦੇਸਿਤੋ, ਏਵਂ ਅਪ੍ਪਮਾਦਧਮ੍ਮਂਯੇਵ ਥੇਰੋ ਦੇਸੇਸਿ.

ਰਾਜਾ ਚ ਪੁਨ ਆਹ,– ਕੁਹਿਂ ਦਾਨਿ ਸਮ੍ਮਾਸਮ੍ਬੁਦ੍ਧੋ ਨਿਸੀਦਤਿ, ਤੇਨ ਪਨ ਦੇਸਿਤੋ ਧਮ੍ਮੋ ਕਤਿਪ੍ਪਮਾਣੋ, ਤਸ੍ਸ ਸਾਵਕਾ ਪਨ ਕਤਿਪ੍ਪਮਾਣਾ, ਤੁਮ੍ਹਾਦਿਸਾ ਅਞ੍ਞੇ ਅਤ੍ਥਿ ਵਾ ਮਾ ਵਾਤਿ. ਇਦਾਨਿ ਅਮ੍ਹਾਕਂ ਆਚਰਿਯੋ ਸਮ੍ਮਾਸਮ੍ਬੁਦ੍ਧੋ ਪਰਿਨਿਬ੍ਬੁਤੋ, ਧਾਤੁਯੋਯੇਵ ਇਦਾਨਿ ਅਤ੍ਥਿ, ਤੇਨ ਪਨ ਦੇਸਿਤੋ ਧਮ੍ਮੋ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਪ੍ਪਮਾਣੋ, ਸੁਧਮ੍ਮਪੁਰੇ ਪਿਟਕਤ੍ਤਯਂ ਯੁਗਲ਼ਵਸੇਨ ਤਿਂਸਵਿਧਾ ਅਤ੍ਥਿ, ਮਯਾ ਅਞ੍ਞੋ ਪਰਮਤ੍ਥ ਸਮ੍ਮੁਤਿਵਸੇਨ ਦੁਵਿਧੋਪਿ ਸਙ੍ਘੋ ਅਤ੍ਥੀਤਿ.

ਤਂ ਸੁਤ੍ਵਾ ਰਾਜਾ ਭਿਯ੍ਯੋਸੋਮਤ੍ਤਾਯ ਪਸਨ੍ਨੋ ਹੁਤ੍ਵਾ ਪੁਨ ਆਰੋਚੇਸਿ,– ਮਮ ਭਨ੍ਤੇ ਇਮਸ੍ਮਿਂ ਪਚ੍ਚਕ੍ਖੇ ਨਤ੍ਥਿ ਤਯਾ ਅਞ੍ਞੋ ਨਾਥੋ, ਅਜ੍ਜਭਗ੍ਗੇ ਪਾਣੁਪੇਤਂ ਮਂ ਉਪਾਸਕੋਤਿ ਧਾਰੇਹਿ, ਤਵ ਓਵਾਦਂ ਅਹਂ ਸਿਰਸਾ ਪਟਿਗ੍ਗਣ੍ਹਿਸ੍ਸਾਮੀਤਿ.

ਤਤੋ ਪਚ੍ਛਾ ਅਰਞ੍ਞਕਙ੍ਗਾਰਹੇ ਠਾਨੇ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ. ਸਮਣਕੁਤ੍ਤਕਾਨਮ੍ਪਿ ਵਾਦਂ ਭਿਨ੍ਦਿ, ਯਥਾ ਪਨ ਸੁਵਣ੍ਣਪਾਤਿਂ ਲਭਿਤ੍ਵਾ ਸੁਵਣ੍ਣਭਾਜਨਂ ਲਭਿਤ੍ਵਾ ਮਤ੍ਤਿਕਾਭਾਜਨਨ੍ਤਿ. ਸਕਲੇਪਿ ਚ ਰਟ੍ਠੇ ਸਮਣਕੁਤ੍ਤਕਾਨਂ ਵਾਦਂ ਜਹਾਪੇਸਿ. ਤਸ੍ਮਿਞ੍ਚ ਕਾਲੇ ਸਮਣਕੁਤ੍ਤਕਾ ਹੀਨਲਾਭਾ ਹੁਤ੍ਵਾ ਥੇਰਸ੍ਸ ਉਪਨਾਹਂ ਬਨ੍ਧਿਂਸੁ. ਤੇ ਪਨ ਸਮਣਕੁਤ੍ਤਕਾ ਅਰਞ੍ਞੇ ਨਿਸ੍ਸਾਮਿਕਾਵਿਯ ਕੋਲੇਯਕਾ ਸੁਨਖਾ ਅਨਾਥਾ ਹੁਤ੍ਵਾ ਕਾਯਿਕਚੇਤਸਿਕਦੁਕ੍ਖਂ ਲਭਿਂਸੁ.

ਰਾਜਾ ਚ ਤਮਤ੍ਥਂ ਞਤ੍ਵਾ ਯਥਾ ਸਮਣਕੁਤ੍ਤਕਾ ਨਾਭਿਭਵਨ੍ਤਿ, ਤਥਾ ਆਰਕ੍ਖਂ ਠਪੇਸਿ. ਤੇ ਚ ਸਮਣਕੁਤ੍ਤਕੇ ਸੇਤਵਤ੍ਥਂ ਨਿਵਾਸਾਪੇਤ੍ਵਾ ਆਵੁਧਗਾਹਯੋਧਭਾਵੇਨ ਰਾਜਕਮ੍ਮੇ ਨਿਯੋਜਾਪੇਸਿ. ਥੇਰੋ ਚ ਸਾਸਨੇ ਪਸਨ੍ਨੇ ਜਨੇ ਪਬ੍ਬਾਜੇਤ੍ਵਾ ਉਪਸਮ੍ਪਾਦੇਤ੍ਵਾ ਸਾਸਨਂ ਵਿਸੋਧਾਪੇਸਿ. ਰਾਜਾ ਚ ਇਮਸ੍ਮਿਂ ਰਟ੍ਠੇ ਪੋਰਾਣਿਕਾ ਰਾਜਾਨੋ ਸਮਣਕੁਤ੍ਤਕਾਨਂ ਵਾਦਂ ਗਹੇਤ੍ਵਾ ਰਜ੍ਜਂ ਕਾਰੇਸੁਂ, ਸਚੇ ਹਿ ਪਨ ਤੇਸਂ ਅਨਤ੍ਥਕਰਜ੍ਜਂ ਪੁਨ ਗਣ੍ਹਾਪੇਤੁਂ ਸਕ੍ਕੁਣੇਯ੍ਯਂ, ਏਵਂ ਸਤਿ ਅਹਂ ਤੇਸਂ ਅਨਤ੍ਥਕਰਜ੍ਜਂ ਅਪਨੇਤ੍ਵਾ ਸਾਤ੍ਥਕਰਜ੍ਜਂ ਗਣ੍ਹਾਪੇਤੁਮਿਚ੍ਛਾਮੀਤਿ ਅਨੁਸੋਚੀਤਿ.

ਅਯਂ ਪਨ ਪਰਿਤ੍ਤਨਿਦਾਨਾਗਤਟ੍ਠੁਪ੍ਪਤ੍ਤਿ, –

ਸੀਹਲ਼ਦੀਪੇ ਕਿਰ ਵਿਪ੍ਪਵਾਸੀਨਗਰੇ ਨਿਸਿਨ੍ਨੋ ਏਕੋ ਭਿਕ੍ਖੁਉਪਦ੍ਵਾਰਾਵਤੀਨਗਰਂ ਗਨ੍ਤ੍ਵਾ ਪਰਿਯਤ੍ਤਿਂ ਉਗ੍ਗਣ੍ਹਿ. ਤਤੋ ਪਚ੍ਛਾ ਸੁਧਮ੍ਮ ਪੁਰਂ ਗਨ੍ਤ੍ਵਾ ਪਰਿਯਤ੍ਤਿਂ ਉਗ੍ਗਣ੍ਹਿ. ਤਸ੍ਮਿਞ੍ਚ ਕਾਲੇ ਸਿਰਿਖੇਤ੍ਤਨਗਰੇ ਪਾਟਲਿਰੁਕ੍ਖੇ ਏਕੋ ਗਨ੍ਥੋ ਅਤ੍ਥੀਤਿ ਸੁਤ੍ਵਾ ਸੁਧਮ੍ਮਪੁਰਤੋ ਸਿਰਿਖੇਤ੍ਤਨਗਰਂ ਅਗਮਾਸਿ. ਅਨ੍ਤਰਾਮਗ੍ਗੇ ਲੁਦ੍ਧਕੋ ਥੇਰਂ ਪਸ੍ਸਿਤ੍ਵਾ ਅਯਂ ਯਕ੍ਖੋਤਿ ਮਞ੍ਞਿਤ੍ਵਾ ਗਹੇਤ੍ਵਾ ਅਨੁਰੁਦ੍ਧਰਞ੍ਞੋ ਦਸ੍ਸੇਸਿ.

ਤਦਾ ਰਾਜਾ ਥੇਰਂ ਪੁਚ੍ਛਿ,– ਕੋ ਪਨ ਤ੍ਵਨ੍ਤਿ. ਅਹਂ ਮਹਾਰਾਜ ਗੋਭਮਸ੍ਸ ਸਾਵਕੋਤਿ. ਪੁਨ ਰਾਜਾ ਪੁਚ੍ਛਿ,–ਤਿਣ੍ਣਂ ਪਨ ਰਤਨਾਨਂ ਕੀਦਿਸੋਤਿ. ਥੇਰੋ ਆਹ,– ਮਹੋਸਧਪਣ੍ਡਿਤੋਵਿਯ ਮਹਾਰਾਜ ਬੁਦ੍ਧੋ ਦਟ੍ਠਬ੍ਬੋ, ਉਮਙ੍ਗੋਵਿਯ ਧਮ੍ਮੋ, ਵਿਦੇਹਸੇਨਾ ਵਿਯ ਸਙ੍ਘੋਤਿ. ਏਵਂ ਉਪਮਾਹਿ ਪਕਾਸਿਤੋ ਰਾਜਾ ਪੁਨ ਪੁਚ੍ਛਿ,–ਕਿਂ ਨੁਖੋ ਇਮੇ ਗੋਤਮਸ੍ਸ ਸਾਵਕਾਤਿ. ਨ ਖੋ ਮਹਾਰਾਜ ਇਮੇ ਗੋਤਮਸ੍ਸ ਸਾਵਕਾ, ਇਮੇ ਪਨ ਅਮ੍ਹੇਹਿ ਵਿਸਭਾਗਾ ਸਮਣਕੁਤ੍ਤਕਾਯੇ ਵਾਤਿ. ਏਵਂ ਵੁਤ੍ਤੇ ਤਤੋ ਪਟ੍ਠਾਯ ਤੇ ਸਮਣਕੁਤ੍ਤਕੇ ਵਿਜਹਿ, ਤਿਣਂ ਵਿਯ ਨਾਤਿਮਞ੍ਞਿ. ਪਾਟਲਿਰੁਕ੍ਖਸੁ ਸਿਰਤੋਪਿ ਲਦ੍ਧਂ ਤੇਸਂ ਗਨ੍ਥਂ ਲਦ੍ਧਟ੍ਠਾਨੇਯੇਵ ਅਗ੍ਗਿਨਾ ਝਾਪੇਸਿ. ਤਮ੍ਪਿ ਠਾਨਂ ਯਾਵਜ੍ਜਤਨਾ ਅਗ੍ਗਿਝਾਪਨਥਲਨ੍ਤਿ ਪਾਕਟਨ੍ਤਿ.

ਥੇਰੋ ਚ ਵਿਮਾਨ ਵਤ੍ਥੁਂ ਰਞ੍ਞੋ ਦੇਸੇਸਿ. ਰਾਜਾ ਚ ਪਸੀਦਿਤ੍ਵਾ ਸਿਰਿਖੇਤ੍ਤਨਗਰਤੋ ਅਰਿਮਦ੍ਦਨਨਗਰਂ ਪਚ੍ਚਾਗਮਨਕਾਲੇ ਆਨੇਸਿ.

ਇਦਂ ਪਨ ਪਾਟਲਿਸੁਸਿਰੇ ਲਦ੍ਧਗਨ੍ਥਸ੍ਸ ਕਾਰਣਂ,- ਤੇਸਞ੍ਹਿ ਸਮਣਕੁਤ੍ਤਕਾਨਂ ਅਬ੍ਭਨ੍ਤਰੇ ਏਕੋ ਉਪਾਯਚ੍ਛੇਕੋ ਸਮਣਕੁਤ੍ਤਕੋ ਅਤ੍ਤਨੋ ਵਾਦਾਨੁਰੂਪਂ ਗਨ੍ਥਂ ਕਤ੍ਵਾ ਸਿਰਿਖੇਤ੍ਤਨਗਰੇ ਦ੍ਵਤ੍ਤਿਂਸਰਤਨਕ੍ਖਨ੍ਧਸ੍ਸ ਪਾਟਲਿਰੁਕ੍ਖਸ੍ਸ ਸੁਸਿਰੇ ਪਵੇਸੇਤ੍ਵਾ ਪੁਨਪ੍ਪੁਨਂ ਉਦਕੇਨ ਤੇਮੇਤ੍ਵਾ ਮਤ੍ਤਿਕਾਯ ਲਿਮ੍ਪੇਤ੍ਵਾ ਪੁਨ ਤਚਂ ਉਪ੍ਪਾਦੇਤ੍ਵਾ ਉਟ੍ਠਾਪੇਸਿ. ਤਦਾ ਮਯਂ ਸੁਪਿਨੇ ਪਾਟਲਿਰੁਕ੍ਖੇ ਸਾਰਗਨ੍ਥੋ ਅਤ੍ਥਬ੍ਯਞ੍ਜਨਸਮ੍ਪਨ੍ਨੋ ਏਕੋ ਅਤ੍ਥੀਤਿਇ ਪਸ੍ਸਾਮਾਤਿ ਕੋਲਾਹਲਂ ਉਪ੍ਪਾਦੇਸੁਂ. ਤਂ ਸੁਤ੍ਵਾ ਰਾਜਾ ਸਿਰਿਖੇਤ੍ਤਨਗਰਂ ਗਨ੍ਤ੍ਵਾ ਤਂ ਪਾਟਲਿਰੁਕ੍ਖਂ ਭਿਨ੍ਦਿਤ੍ਵਾ ਗਵੇਸੇਨ੍ਤੋ ਤਂ ਗਨ੍ਥਂ ਲਭਿ. ਗਨ੍ਥੇ ਪਨ ਸਕਵਾਦਵਸੇਨ ਸਮਣਕੁਤ੍ਤਕਸਾਮਞ੍ਞਤਾ ਈਦਿਸਾਯੇਵ, ਏਤੇ ਗੋਤਮਾਸਾਵਕਾ ਹੋਨ੍ਤਿਇ, ਏਤੇਸਂਯੇਵ ਆਚਾਰੋ ਸਗ੍ਗਮਗ੍ਗਪਥਭੂਤੋਤਿ ਏਵਮਾਦੀਹਿ ਕਾਰਣੇਹਿ ਵੁਤ੍ਤਂ. ਰਾਜਾ ਚ ਪਸੀਦਿਤ੍ਵਾ ਸਮਣਕੁਤ੍ਤਕਾਨਂ ਬਹੂਨਿ ਦਾਤਬ੍ਬਾਨਿ ਅਦਾਸਿ. ਤਤੋ ਪਚ੍ਛਾ ਥੇਰਸ੍ਸ ਧਮ੍ਮਕਥਂ ਸੁਤ੍ਵਾ ਤਂ ਅਗ੍ਗਿਨਾ ਝਾਪੇਸੀਤਿ ਏਵਂ ਸਮਣਕੁਤ੍ਤਕਾਨਂ ਵਚਨਂ ਸੁਤ੍ਵਾ ਸਿਰਿਖੇਤ੍ਤਨਗਰਂ ਗਨ੍ਤ੍ਵਾ ਅਰਿਮਦ੍ਦਨਨਗਰਂ ਪਚ੍ਚਾਗਚ੍ਛਨ੍ਤੋ ਥੇਰਂ ਆਨੇਸੀਤਿ ਦਟ੍ਠਬ੍ਬਂ. ਅਰਿਮਦ੍ਦਨਨਗਰਂ ਸਮ੍ਪਤ੍ਤਕਾਲੇ ਜੇਤਵਨਂ ਨਾਮ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ. ਥੇਰੋ ਚ ਤਤ੍ਥ ਸਾਸਾਨਂ ਵਿਸੋਧੇਤ੍ਵਾ ਨਿਸੀਦਿ. ਰਾਜਾ ਦੇਵਸਿਕਂ ਉਦਕਂ ਆਨੇਤ੍ਵਾ ਅਗ੍ਗਮਹੇਸੀ ਪਨ ਦੇਵਸਿਕਂਯੇਵ ਪਿਣ੍ਡਪਾਤਂ ਆਨੇਤ੍ਵਾ ਭੋਜੇਸਿ. ਉਪ੍ਪਨ੍ਨਕਙ੍ਖਾ ਕਾਲੇਪਿ ਤਂਤਂਕਙ੍ਖਾਟ੍ਠਾਨਂ ਪੁਚ੍ਛੀਤਿ.

ਅਯਂ ਪਨ ਸਾਸਨਪ੍ਪਵੇਣਿਯਾਗਤਟ੍ਠੁਪ੍ਪਤ੍ਤਿ,–

ਸੁਧਮ੍ਮਪੁਰੇ ਹਿ ਸਮਾਪਤ੍ਤਿਲਾਭੀ ਅਨੋਮਦਸ੍ਸੀ ਨਾਮ ਥੇਰੋ ਸੋਣੁਤ੍ਤਰਤ੍ਥੇਰਾਨਂ ਵਂਸਾਨੁਰੁਕ੍ਖਣਵਸੇਨ ਸਦ੍ਧਿਂ ਪਞ੍ਚਹਿ ਭਿਕ੍ਖੁ ਸਤੇਹਿ ਨਿਸੀਦਿ. ਤਸ੍ਸ ਪਨ ਪਧਾਨਸਿਸ੍ਸੋ ਅਧਿਸੀਲੋਨਾਮ, ਤਸ੍ਸ ਪਧਾਨਸਿਸ੍ਸੋ ਪ੍ਰਾਨਦਸ੍ਸੀ ਨਾਮ, ਤਸ੍ਸ ਪਧਾਨਸਿਸ੍ਸੋ ਕਾਲ਼ੋ ਨਾਮ, ਤਸ੍ਸ ਪਧਾਨਸਿਸ੍ਸੋ ਅਰਹਨ੍ਤੋ ਨਾਮ, ਤਸ੍ਸ ਪਧਾਨਸਿਸ੍ਸੋ ਅਰਿਯਵਂਸੋ ਨਾਮਾਤਿ.

ਇਦਞ੍ਚ ਵਚਨਂ-ਕੋ ਪਨੇਸ ਉਤ੍ਤਰਾਜੀਵਮਹਾਥੇਰੋਤਿ. ਅਯਞ੍ਹਿ ਥੇਰੋ ਰਾਮਞ੍ਞਦੇਸਿਯਪੁਤ੍ਤੋ ਅਰਿਯਵਂਸਤ੍ਥੇਰਸ੍ਸ ਸਿਸ੍ਸੋ. ਅਰਿਯਵਂਸਤ੍ਥੇਰੋ ਪਨ ਕਪ੍ਪੁਙ੍ਗਨਗਰਵਾਸੀ ਮਹਾਕਾਲ਼ਤ੍ਥੇਰਸ੍ਸ ਸਿਸ੍ਸੋ. ਸੋ ਪਨ ਸੁਧਮ੍ਮਨਗਰਵਾਸਿਨੋ ਪ੍ਰਾਨਦਸ੍ਸੀ ਮਹਾਥੇਰਸ੍ਸ ਸਿਸ੍ਸੋਤਿ ਕਲ੍ਯਾਣੀ ਸਿਲਾਲੇਖਨੇ ਵੁਤ੍ਤਵਚਨੇਨ ਨ ਸਮੇਤਿ. ਏਵਮ੍ਪਿ ਸਤਿ ਯਥਿਚ੍ਛਿਤ ਅਧਿਪ੍ਪਾਯੋ ਨ ਨਸ੍ਸਤੀਤਿ ਦਟ੍ਠਬ੍ਬਂ.

ਏਵਂ ਨਾਨਾਚਰਿਯਾਨਂ ਵਾਦੋ ਨਾਨਾਕਾਰੇਨ ਦਿਸ੍ਸਮਾਨੋਪਿ ਅਰਹਨ੍ਤਤ੍ਥੇਰਸ੍ਸ ਅਰਿਮਦ੍ਦਨਨਗਰੇ ਸਾਸਨਂ ਅਨੁਗ੍ਗਹੇਤ੍ਵਾ ਪਤਿਟ੍ਠਾਨਤਾਯੇਵੇਤ੍ਥ ਪਮਾਣਨ੍ਤਿ ਕਤ੍ਵਾ ਨਾਵਮਞ੍ਞਿਤਬ੍ਬੋ. ਸਬ੍ਬੇਸਞ੍ਹਿ ਆਚਰਿਯਾਨਂ ਵਾਦੇਪਿ ਅਰਹਨ੍ਤਤ੍ਥੇਰੋ ਅਰਿਮਦ੍ਦਨਨਗਰਂ ਆਗਨ੍ਤ੍ਵਾ ਸਾਸਨਂ ਪਤਿਟ੍ਠਾਪੇਸੀਤਿ ਅਤ੍ਥੋ ਇਚ੍ਛਿਤਬ੍ਬੋਯੇਵਾਤਿ.

ਅਰਹਨ੍ਤਤ੍ਥੇਰੋ ਪਨ ਮੂਲਨਾਮੇਨ ਧਮ੍ਮਦਸ੍ਸੀਤਿ ਪਾਕਟੋ ਸੁਧਮ੍ਮਪੁਰਵਾਸੀ ਸੀਲਬੁਦ੍ਧਿਤ੍ਥੇਰਸ੍ਸ ਸਿਸ੍ਸੋਤਿ ਦਟ੍ਠਬ੍ਬੋ. ਸੋ ਚ ਥੇਰੋ ਪੁਬ੍ਬੇਵ ਪਬ੍ਬਜ੍ਜਕਾਲਤੋ ਚਤੂਸੁ ਵੇਦੇਸੁ ਸਿਕ੍ਖਿਤਸਿਪ੍ਪੋ. ਪਬ੍ਬਜਿਤ੍ਵਾ ਪਨ ਸਾਲ਼ਕਥਂ ਪਿਟਕਤ੍ਤਯਂ ਉਗ੍ਗਣ੍ਹਿਤ੍ਵਾ ਪਾਰਂ ਗਨ੍ਤ੍ਵਾ ਸਬ੍ਬਤ੍ਥ ਪਾਕਟੋ. ਸੋਕ੍ਕਤਯਨਗਰਂ ਅਨੇਤ੍ਵਾ ਮਨੁਸ੍ਸਾ ਪੂਜੇਨ੍ਤਿ. ਤਤ੍ਥ ਦਸਵਸ੍ਸਾਨਿ ਵਸਿਤ੍ਵਾ ਪੁਨ ਸੁਧਮ੍ਮਪੁਰਂ ਆਗਨ੍ਤ੍ਵਾ ਅਰਞ੍ਞਵਾਸਂ ਸਮਾਦਿਯਿ.

ਤਤੋ ਪਚ੍ਛਾ ਜਿਨਚਕ੍ਕੇ ਏਕਸਟ੍ਠਾਧਿਕੇ ਪਞ੍ਚਸਤੇ ਸਹਸ੍ਸੇਚ ਸਮ੍ਪਤ੍ਤੇ ਕਲਿਯੁਗੇ ਏਕੂਨਾਸੀਤਾਧਿਕੇ ਤਿਸਤੇ ਸਮ੍ਪਤ੍ਤੇ ਅਨੁਰੁਦ੍ਧਰਾਜਾ ਰਜ੍ਜਂ ਪਾਪੁਣਿ. ਤਦਾ ਅਰਿਮਦ੍ਦਨਨਗਰੇ ਸਮਣਕੁਤ੍ਤਕਾ ਮਯਂ ਗੋਤਮਸਾਵਕਾਤਿ ਵਤ੍ਵਾ ਤਿਂਸਤਿਂਸਵਗ੍ਗਾ ਹੁਤ੍ਵਾ ਨਿਸੀਦਿਂਸੁ. ਵਗ੍ਗਵਸੇਨ ਕਿਰ ਸਹਸ੍ਸਮਤ੍ਤਾਤਿ. ਅਨੁਰੁਦ੍ਧਰਾਜਾ ਚ ਤੇਸਂ ਸਮਣਕੁਤ੍ਤਕਾਨਂ ਆਗਾਰਿਯਾਬ੍ਰਹ੍ਮਚਰਿਯਾਦੀਨਿ ਸੁਤ੍ਵਾ ਨ ਪਸੀਦਿ. ਏਵਮ੍ਪਿ ਪਵੇਣਿਯਾ ਆਗਭਤ੍ਤਾ ਨ ਪਜਹਿ. ਅਰਹਨ੍ਤਂ ਪਨ ਥੇਰਂ ਪਸ੍ਸਿਤ੍ਵਾ ਤਤੋ ਪਟ੍ਠਾਯ ਤੇਸਂ ਸਮਣਕੁਤ੍ਤਕਾਨਂ ਨਿਬਦ੍ਧਵਤ੍ਤਾਨਿ ਭਿਨ੍ਦਿਤ੍ਵਾ ਸਾਸਨੇ ਪਸੀਦਿ.

ਇਦਂ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇ ਅਰਿਮਦ੍ਦਨਨਗਰੇ ਅਰਹਨ੍ਤਂ.

ਨਾਮ ਥੇਰਂ ਪਟਿਚ੍ਚ ਤਤਿਯਂ ਸਾਸਨਸ੍ਸ ਪਤਿਟ੍ਠਾਨਂ.

ਤਸ੍ਮਿਞ੍ਚ ਕਾਲੇ ਅਰਹਨ੍ਤਤ੍ਥੇਰੋ ਅਨੁਰੁਦ੍ਧਰਾਜਾਨਂ ਆਹ,-ਤੀਸੁ ਸਾਸਨੇਸੁ ਪਰਿਯਤ੍ਤਿਸਾਸਨੇ ਤਿਟ੍ਠਨ੍ਤੇਯੇਵ ਪਟਿਪਤ੍ਤਿ ਸਾਸਨਂ ਤਿਟ੍ਠਤਿ, ਪਟਿਪਤ੍ਤਿਸਾਸਨੇ ਤਿਟ੍ਠਨ੍ਤੇਯੇਵ ਪਟਿਵੇਧਸਾਸਨਂ ਤਿਟ੍ਠਤਿ, ਯਥਾ ਹਿ ਗੁਨ੍ਨਂ ਸਤੇਪਿ ਸਹਸ੍ਸੇਪਿ ਵਿਜ੍ਜਮਾਨੇ ਪਵੇਣਿਪ,ਲਿਕਾਯ ਧੇਨੁਯਾ ਅਸਤਿ ਸੋ ਵਂਸੋ ਸਾਪਵੇਣੀ ਨ ਘਲ਼ੀਯਤਿਇ, ਏਵਮੇਵਂ ਧੁਤਙ੍ਗਧਰਾਨਂ ਭਿਕ੍ਖੂਨਂ ਸਤੇਪਿ ਸਹਸ੍ਸੇਪਿ ਵਿਜ੍ਜਮਾਨੇ ਪਰਿਯਤ੍ਤਿਯਾ ਅਨ੍ਤਰਹਿਤਾਯ ਪਟਿਵੇਧੋ ਨਾਮ ਨ ਹੋਤਿ, ਯਥਾ ਪਨ ਨਿਮਿਕੁਮ੍ਭਿਯੋ ਜਾਨਨਤ੍ਥਾਯ ਪਾਸਾਣ ਪਿਟ੍ਠੇ ਅਕ੍ਖਰੇਸੁ ਠਪਿਤੇਸੁ ਯਾਵ ਅਕ੍ਖਰਾਨਿ ਧਰਨ੍ਤਿ, ਤਾਵ ਨਿਧਿਕੁਮ੍ਭਿਯੋ ਨਟ੍ਠਾ ਨਾਮ ਨ ਹੋਨ੍ਤਿ, ਏਵਮੇਵਂ ਪਰਿਯਤ੍ਤਿਯਾ ਧਰਮਾਨਾਯ ਸਾਸਨਂ ਅਨਨ੍ਤਰਹਿਤਂ ਨਾਮ ਹੋਤਿ, ਯਥਾ ਚ ਮਹਤੋ ਤਲ਼ਾਕਸ੍ਸ ਪਾਲ਼ਿਯਾ ਥਿਰਾਯ ਉਦਕਂ ਨ ਠਸ੍ਸਤੀਤਿ ਨ ਵਤ੍ਤਬ੍ਬਂ, ਉਦਕੇ ਸਤਿ ਪਦੁਮਾਦੀਨਿ ਪੁਪ੍ਫਾਨਿ ਨ ਪੁਪ੍ਫਿਸ੍ਸਨ੍ਤੀਤਿ ਨ ਵਤ੍ਤਬ੍ਬਂ, ਏਵਮੇਵਂ ਮਹਾਤਲ਼ਾਕਸ੍ਸ ਥਿਰਪਾਲ਼ਿਸਦਿਸੇ ਤੇਪਿਟਕੇ ਬੁਦ੍ਧਵਚਨੇ ਸਤਿ ਉਦਕਸਦਿਸਾ ਪਟਿਪਤ੍ਤਿਪੂਰਕਾ ਕੁਲਪੁਤ੍ਤਾ ਨਤ੍ਥੀਤਿ ਨ ਵਤ੍ਤਬ੍ਬਂ, ਤੇਸੁ ਸਤਿ ਪਦੁਮਾਦਿਪੁਪ੍ਫਸਦਿਸੋ ਪਟਿਵੇਧੋ ਨਤ੍ਥੀਤਿ ਨ ਵਤ੍ਤਬ੍ਬਂ, ਏਵਂ ਏਕਨ੍ਤਤੋ ਪਰਿਯਤ੍ਤਿਮੇਵ ਪਮਾਣਂ, ਤਸ੍ਮਾ ਅਨ੍ਤਮਸੋ ਦ੍ਵੀਸੁ ਪਾਤਿਮੋਕ੍ਖਸੁ ਵਤ੍ਤਮਾਨੇਸੁਪਿ ਸਾਸਨਂ ਅਨਨ੍ਤਰਹਿਤਮੇਵ, ਪਰਿਯਤ੍ਤਿਯਾ ਅਨ੍ਤਰਹਿਤਾਯ ਸੁਪ੍ਪਟਿਪਨ੍ਨਸ੍ਸਾਪਿ ਧਮ੍ਮਾਭਿਸਮਯੋ ਨਤ੍ਥਿ, ਅਨਨ੍ਤਰਹਿਤਾਯ ਏਵ ਧਮ੍ਮਾਭਿਸਮਯੋ ਅਤ੍ਥਿ, ਇਦਾਨਿਪਿ ਅਮ੍ਹਾਕਂ ਪਰਿਯਤ੍ਤਿਸਾਸਨਂ ਪਰਿਪੁਣ੍ਣਂ ਨਤ੍ਥਿ, ਸਰੀਰਧਾਤੁਯੋ ਚ ਨਤ੍ਥਿ, ਤਸ੍ਮਾ ਯਤ੍ਥ ਪਰਿਯਤ੍ਤਿਸਾਸਨਂ ਸਰੀਰਧਾਤੁਯੋ ਚ ਅਤ੍ਥਿ, ਤਤ੍ਥ ਪਣ੍ਣਾਕਾਰੇਨ ਸਦ੍ਧਿਂ ਦੂਤਂ ਪੇਸੇਤ੍ਵਾ ਆਨੇਤਬ੍ਬਾ, ਏਵਂ ਸਤਿ ਅਮ੍ਹਾਕਂ ਰਟ੍ਠੇ ਜਿਨਸਾਸਨਂ ਚਿਰਕਾਲਂ ਪਤਿਟ੍ਠਹਿਸ੍ਸਤੀਤਿ.

ਏਵਂ ਪਨ ਭਨ੍ਤੇ ਸਤਿ ਕਤ੍ਥ ਯਾਚਿਸ੍ਸਾਮਾਤਿ. ਸੁਵਣ੍ਣਭੂਮਿਰਟ੍ਠੇ ਮਹਾਰਾਜ ਸੁਧਮ੍ਮਪੁਰੇ ਤੀਹਿ ਵਾਰੇਹਿ ਪਿਟਕਤ੍ਤਯਂ ਲਿਖਿਤ੍ਵਾ ਠਪੇਸਿ, ਸਰੀਰਧਾਤੁਯੋ ਚ ਬਹੂ ਤਤ੍ਥ ਅਤ੍ਥੀਤਿ. ਰਾਜਾ ਏਵਂ ਭਨ੍ਤੇਤਿ ਪਟਿਗ੍ਗਣ੍ਹਿਤ੍ਵਾ ਬਹੂ ਪਣ੍ਣਾਕਾਰੇ ਪਟਿਯਾਦੇਤ੍ਵਾ ਰਾਜਲੇਖਨਂ ਲਿਖਿਤ੍ਵਾ ਅਟ੍ਠਙ੍ਗਸਮਨ੍ਨਾਗਤਂ ਏਕਂ ਅਮਚ੍ਚਂ ਦੂਤਂ ਕਤ੍ਵਾ ਪੇਸੇਸਿ.

ਸੁਧਮ੍ਮਪੁਰਿਨ੍ਦੋ ਮਨੋਹਰਿ ਨਾਮ ਰਾਜਾਪਿ ਮਚ੍ਛੇਰਚਿਤ੍ਤੋ ਹੁਤ੍ਵਾ ਤੁਮ੍ਹਾਦਿਸਾਨਂ ਮਿਚ੍ਛਾਦਿਟ੍ਠੀਨਂ ਠਾਨੇ ਪਿਟਕਤ੍ਤਯਂ ਸਰੀਰਧਾਤੁਯੋ ਚ ਪਹਿਣਿਤੁਂ ਨ ਯੁਤ੍ਤਾ, ਤਿਲੋਕਗ੍ਗਸ੍ਸ ਹਿ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨਂ ਸਮ੍ਮਾਦਿਟ੍ਠੀਨਂ ਠਾਨੇਯੇਵ ਪਤਿਟ੍ਠਹਿਸ੍ਸਤਿ, ਯਥਾ ਨਾਮ ਕੇਸਰਸੀਹਰਾਜਸ੍ਸ ਵਸਾ ਸੁਵਣ੍ਣਪਾਤਿਯਂਯੇਵ, ਨ ਮਤ੍ਤਿਕਾਭਾਜਨੇਤਿ.

ਦੂਤਾ ਪਚ੍ਚਾਗਨ੍ਤ੍ਵਾ ਅਨੁਰੁਦ੍ਧਰਞ੍ਞੋ ਤਮਤ੍ਥਂ ਆਰੋਚੇਸੁਂ. ਤਂ ਸੁਤ੍ਵਾ ਅਨੁਰੁਦ੍ਧਰਾਜਾ ਕੁਜ੍ਝਿ, ਤਤ੍ਤਕਕਪਾਲੇ ਪਕ੍ਖਿਤ੍ਤਤਿਲਂਵਿਯ ਤਟ ਤਟਾਯਿ.

ਅਥ ਰਾਜਾ ਨਦੀਮਗ੍ਗੇਨ ਨਾਵਾਨਂ ਅਸੀਤਿਸਤਸਹਸ੍ਸੇਹਿ ਨਾਵਿਕਾਨਂ ਯੋਧਾਨਂ ਅਟ੍ਠਕੋਟੀਹਿ ਸੇਨਂ ਬ੍ਯੂਹਿਤ੍ਵਾ ਥਲਮਗ੍ਗੇਨ ਸਦ੍ਧਿਂ ਚਤੂਹਿ ਮਹਾਯੋਧਨਾਯਕੇਹਿ ਹਤ੍ਥੀਨਂ ਅਸੀਤਿ ਸਹਸ੍ਸੇਹਿ ਅਸ੍ਸਾਨਂ ਨਵੁਤਿਇਸਤਸਹਸ੍ਸੇਹਿ ਯੋਧਾਨਂ ਅਸੀਤਿਕੋਟਿਯਾ ਸੇਨਂ ਬ੍ਯੂਹਿਤ੍ਵਾ ਸਯਮੇਵ ਯੁਜ੍ਝਿਤੁਂ ਸੁਧਮ੍ਮਪਰਂ ਗਚ੍ਛਿ.

ਤਂ ਸੁਤ੍ਵਾ ਮਨੋਹਰਿਰਾਜਾ ਸੀਤਤਸਿਤੋ ਹੁਤ੍ਵਾ ਅਤ੍ਤਨੋ ਬਹੂ ਯੋਧੇ ਸਂਵਿਦਹਿਤ੍ਵਾ ਸੁਧਮ੍ਮਪੁਰਯੇਵ ਪਟਿਸੇਨਂ ਕਤ੍ਵਾ ਨਿਸੀਦਿ.

ਅਥ ਅਥਬ੍ਬਣਵੇਦੇ ਆਗਤਪ੍ਪਯੋਗਵਸੇਨ ਪੁਨਪ੍ਪੁਨਂ ਵਾਯਮਨ੍ਤਾਪਿ ਨਗਰਮੂਲਂ ਉਪਸਙ੍ਕਮਿਤੁਂ ਨ ਸਕ੍ਕਾ. ਤਦਾ ਰਾਜਾ ਵੇਦਞ੍ਞੁਨੋ ਪੁਚ੍ਛਿ,–ਕਸ੍ਮਾ ਪਨੇਤ੍ਥ ਨਗਰਮੂਲਂ ਉਪਸਙ੍ਕਮਿਤੁਂ ਨ ਸਕ੍ਕੋਮਾਤਿ. ਵੇਦਞ੍ਞੁਨੋ ਆਹਂਸੁ,-ਅਥਬ੍ਬਣਵੇਦਵਿਧਾਨਂ ਮਹਾਰਾਜ ਅਤ੍ਥਿ ਮਞ੍ਞੇਤਿ. ਅਥ ਰਾਜਾ ਪਥਵਿਯਂ ਨਿਦਹਿਤ੍ਵਾ ਮਤਕਲ਼ੇਵਰਂ ਉਦ੍ਧਰਿਤ੍ਵਾ ਮਹਾਸਮੁਦ੍ਦੇ ਖਿਪੇਸਿ.

ਏਕਂ ਕਿਰ ਮਨੁਸ੍ਸਂ ਹਿਨ੍ਦੁਕੁਲਂ ਜੇਙ੍ਗੁਨਾਮਕਂ ਕੀਟਂ ਖਾਦਾਪੇਤ੍ਵਾ ਤਂ ਮਾਰੇਤ੍ਵਾ ਹਤ੍ਥਪਾਦਾਦੀਨਿ ਅਙ੍ਗਪਚ੍ਚਙ੍ਗਾਨਿ ਗਹੇਤ੍ਵਾ ਛਿਨ੍ਨਛਿਨ੍ਨਾਨਿ ਕਤ੍ਵਾ ਨਗਰਸ੍ਸ ਸਾਮਨ੍ਤਾ ਪਥਵਿਯਂ ਨਦਹਿਤ੍ਵਾ ਠਪੇਸਿ. ਤਦਾ ਪਨ ਨਗਰਂ ਉਪਸਙ੍ਕਮਿਤੁਂ ਸਕ੍ਕਾ. ਨਗਰਞ੍ਚ ਪਵਿਸਿਤ੍ਵਾ ਅਨੁਰੁਦ੍ਧਰਾਜਾ ਮਨੋਹਰਿਰਾਜਾਨਂ ਜੀਵਗ੍ਗਾਹਂ ਗਣ੍ਹਿ. ਸੁਧਮ੍ਮਪੁਰੇ ਪੋਰਾਣਿਕਾਨਂ ਰਾਜੂਨਂ ਪਵੇਣੀਆਗਤਵਸੇਨ ਰਤਨਮਯਮਞ੍ਜੂਸਾਯਂ ਠਪੇਤ੍ਵਾ ਪੂਜਿਤਂ ਸਹਧਾਤੂਹਿ ਪਿਟਕਤ੍ਤਯਂ ਗਹੇਤ੍ਵਾ ਮਨੋਹਰਿਰਞ੍ਞੋ ਸਨ੍ਤਕਾਨਂ ਦ੍ਵਤ੍ਤਿਂਸਹਤ੍ਥੀਨਂ ਪਿਟ੍ਠਿਯਂ ਆਰੋਪੇਤ੍ਵਾ ਆਨੇਸਿ.

ਅਰਿਮਦ੍ਦਨਨਗਰਂ ਪਨ ਪਤ੍ਵਾ ਧਾਤੁਯੋ ਰਤਨਮਯਮਞ੍ਜੂਸਾਯਂ ਠਪੇਤ੍ਵਾ ਸਿਰਿਸਯਨਗਬ੍ਭੇ ਰਤਨਮਞ੍ਚੇ ਸੀਸੋਪਦੇਸਸ੍ਸ ਸਮੀਪੇ ਠਪੇਸਿ. ਪਿਟਕਤ੍ਤਯਮ੍ਪਿ ਰਤਨਮਯੇ ਪਾਸਾਦੇ ਠਪੇਤ੍ਵਾ ਭਿਕ੍ਖੁਸਙ੍ਘਸ੍ਸ ਉਗ੍ਗਹਧਾਰਣਾਦਿਅਤ੍ਥਾਯ ਨਿਯ੍ਯਾਦੇਸਿ. ਤਤੋ ਕਿਰ ਆਨੀਤਂ ਪਿਟਕਤ੍ਤਯਂ ਉਗ੍ਗਣ੍ਹਨ੍ਤਾਨਂ ਅਰਿਯਾਨਂ ਸਹਸ੍ਸਮਤ੍ਤਂ ਅਹੋਸੀਤਿ.

ਸੁਧਮ੍ਮਨਗਰਂ ਵਿਜਯਿਤ੍ਵਾ ਪਿਟਕੇਨ ਸਦ੍ਧਿਂ ਭਿਕ੍ਖੁਸਙ੍ਘਂ ਆਨੇਤ੍ਵਾ ਸਾਸਨਸ੍ਸ ਪਤਿਟ੍ਠਾਪਨਂ ਜਿਨਚਕ੍ਕੇ ਏਕਾਧਿਕੇ ਛਸਤੇ ਵਸ੍ਸਸਹਸ੍ਸੇ ਕਲਿਯੁਗੇ ਚ ਸੋਲ਼ਸਾਧਿਕੇ ਚਤੁਸਤੇ ਸਮ੍ਪਤ੍ਤੇਤਿ ਸਿਲਾਲੇਖਨੇਸੁ ਵੁਤ੍ਤਂ.

ਅਨੁਰੁਦ੍ਧਰਞ੍ਞੋ ਕਾਲੇ ਪੁਞ੍ਞਾਨੁਭਾਵੇਨ ਤਿਇਣ੍ਣਂ ਰਤਨਾਨਂ ਪਰਿਪੁਣ੍ਣਤ੍ਤਾ ਪੁਣ੍ਣਗਾਮੋਤਿ ਸਮਞ੍ਞਾ ਅਹੋਸਿ. ਚਿਰਕਾਲਂ ਅਤਿਕ੍ਕਨ੍ਤੇ ਣ੍ਣਕਾਰਂ ਲੋਪਵਸੇਨ ਮਕਾਰਸ੍ਸ ਚ ਨਿਗ੍ਗਹਿਤ ਵਸੇਨ ਪੁਗਮੀਤਿ ਮਰਮ੍ਮਭਾਸਾਯ ਵੋਹਾਰੀਯਤੀਤਿ ਅਨਾਗਤਵਂਸਰਾਜਵਂਸੇਸੁ ਵੁਤ੍ਤਂ.

ਅਨੁਰੁਦ੍ਧਰਾਜਾਯੇਵ ਚਤ੍ਤਾਰੋ ਮਹਾਯੋਧੇ ਸੀਹਲ਼ਦੀਪਂ ਪੇਸੇਤ੍ਵਾ ਤਤੋਪਿ ਪਿਟਕਤ੍ਤਯਂ ਆਨੇਸਿ. ਸੀਹਲ਼ਦੀਪਤੋ ਆਨੀਤਪਿਟਕਤ੍ਤਯੇਨ ਸੁਧਮ੍ਮਪੁਰਤੋ ਆਨੀਤਪਿਟਕਤ੍ਤਯਂ ਅਞ੍ਞਮਞ੍ਞਂ ਯੋਜੇਤ੍ਵਾ ਸਂਸਨ੍ਦੇਤ੍ਵਾ ਅਰਹਨ੍ਤਤ੍ਥੇਰੋ ਵੀਮਂਸੇਸਿ. ਤਦਾ ਗਙ੍ਗਾਦਕੇਨਵਿਯ ਯਮੁਨੋਦਕਂ ਅਞ੍ਞਮਞ੍ਞਂ ਅਨੂਨਂ ਅਨਧਿਕਂ ਅਹੋਸਿ. ਤੇਹਿ ਪਿਟਕੇਹਿ ਅਞ੍ਞਾਨਿਪਿ ਵਡ੍ਢੇਤ੍ਵਾ ਤਿਪਿਟਕਗਬ੍ਭੇ ਠਪੇਤ੍ਵਾ ਪੂਜੇਸਿ. ਤੇਸੁ ਤੇਸੁ ਠਾਨੇਸੁਪਿ ਪਤਿਟ੍ਠਾਪੇਸਿ.

ਮਨੋਹਰਿਰਾਜਾਨਮ੍ਪਿ ਮ੍ਰਙ੍ਕਪਾ ਨਾਮ ਦੇਸੇ ਉਪਟ੍ਠਾਕੇਹਿ ਸਹ ਠਪੇਸਿ. ਤਸ੍ਸ ਚ ਕਿਰ ਰਞ੍ਞੋ ਮੁਖਂ ਵਿਰਵਿਤ੍ਵਾ ਕਥਂ ਸਲ੍ਲਾਪੇਨ੍ਤਸ੍ਸ ਮੁਖਤੋ ਓਭਾਸੋ ਪਜ੍ਜਲਿਤ੍ਵਾ ਨਿਕ੍ਖਮਿ. ਸੋ ਕਦਾਚਿ ਕਦਾਚਿ ਅਨੁਰੁਦ੍ਧਰਞ੍ਞੋ ਸਨ੍ਤਿਕਂ ਆਗਨ੍ਤ੍ਵਾ ਗਾਰਵਵਸੇਨ ਵਨ੍ਦਨਾਦੀਨਿ ਅਕਾਸਿ. ਤਦਾ ਅਨੁਰੁਦ੍ਧਰਞ੍ਞੋ ਲੋਮਹਂਸੋ ਉਪ੍ਪਜ੍ਜਿ ਉਬ੍ਬਿਗ੍ਗੋ ਚ. ਤਸ੍ਮਾ ਤਸ੍ਸ ਰਞ੍ਞੋ ਨਿਤ੍ਥੇਜਤ੍ਥਾਯ ਬੁਦ੍ਧਰੂਪਸ੍ਸ ਚੇਤਿਯਸ੍ਸ ਭਤ੍ਤਂ ਪੂਜੇਤ੍ਵਾ ਤਂ ਗਹੇਤ੍ਵਾ ਮਨੋਹਰਿਰਞ੍ਞੋ ਭਾਜੇਸਿ. ਤਦਾ ਤਸ੍ਸ ਤਦਾਨੁਭਾਵੋ ਅਨ੍ਤਰਧਾਯਿ. ਮਨੋਹਰਿਰਾਜਾ ਸਂਵੇਗਂ ਆਪਜ੍ਜਿਤ੍ਵਾ ਸਂਸਾਰੇ ਸਂਸਰਨ੍ਤੋ ਯਾਵ ਨਿਬ੍ਬਾਨਂ ਨ ਪਾਪੁਣਾਮਿ, ਤਾਵ ਪਰਵਸੇ ਨਾਨੁਵਤ੍ਤੇਯ੍ਯਨ੍ਤਿ ਪਤ੍ਥਨਂ ਅਕਾਸਿ. ਸੁਧਮ੍ਮਪੁਰਤੋ ਆਭਤਂ ਅਤ੍ਤਨੋ ਸਨ੍ਤਕਂ ਮਨੋਮਯ ਮਣਿਂ ਏਕਸ੍ਸ ਸੇਟ੍ਠਿਨੋ ਸਨ੍ਤਿਕੇ ਵਿਕ੍ਕਿਣਿਤ੍ਵਾ ਲਦ੍ਧਮੂਲੇਨ ਪਞ੍ਚਵਾਹਰਜਤੇਨ ਅਭੁਜਿਤਪਲ੍ਲਙ੍ਕਵਸੇਨ ਏਕਂ ਮਹਨ੍ਤਂ ਬੁਦ੍ਧ ਬਿਮ੍ਬਂ ਪਰਿਨਿਬ੍ਬਾਨਾਕਾਰੇਨ ਏਕਨ੍ਤਿ ਦ੍ਵੇ ਬੁਦ੍ਧਪ੍ਪਟਿਬਿਮ੍ਬਾਨਿ ਕਾਰਾਪੇਸਿ. ਯਾਵਜ੍ਜਤਨਾ ਤਾਨਿ ਸਨ੍ਤੀਤਿ. ਇਚ੍ਚੇਵਂ ਅਨੁਰੁਦ੍ਧਰਾਜਾ ਸੁਧਮ੍ਮਪੁਰਤੋ ਸੀਹਲ਼ਦੀਪਤੋ ਚ ਸਾਸਨਂ ਆਨੇਤ੍ਵਾ ਅਰਿਮਦ੍ਦਨਨਗਰੇ ਪਤਿਟ੍ਠਾਪੇਸੀਤਿ.

ਇਦਂ ਅਮ੍ਹਾਕਂ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇ ਅਰਿਮਦ੍ਦਨਨਗਰੇ

ਅਨੁਰੁਦ੍ਧਰਾਜਾਨਂ ਪਟਿਚ੍ਚ ਚਤੁਤ੍ਥਂ ਸਾਸਨਸ੍ਸ ਪਤਿਟ੍ਠਾਨਂ.

ਉਤ੍ਤਰਾਜੀਵਤ੍ਥੇਰੋਪਿ ਸੋਣੁਤ੍ਤਰਾਨਂ ਵਂਸਤੋ ਸਾਸਨਂ ਗਹੇਤ੍ਵਾ ਸੁਧਮ੍ਮਪੁਰਤੋ ਅਰਿਮਦ੍ਦਨਨਗਰਂ ਆਗਨ੍ਤ੍ਵਾ ਸਾਸਨਂ ਪਤਿਟ੍ਠਾਪੇਸਿ.

ਇਦਂ ਅਮ੍ਹਾਕਂ ਮਰਮ੍ਮਮਣ੍ਡਲੇ ਤਮ੍ਬਦੀਪਰਟ੍ਠੇ ਅਰਿਮਦ੍ਦਨਨਗਰੇ ਉਤ੍ਤਰਾਜੀਵਤ੍ਥੇਰਂ ਪਟਿਚ੍ਚ ਪਞ੍ਚਮਂ ਸਾਸਨਸ੍ਸ ਪਤਿਟ੍ਠਾਨਂ.

ਉਤ੍ਤਰਾਜੀਵਤ੍ਥੇਰਸ੍ਸ ਸੀਹਲ਼ਦੀਪਂ ਗਤਕਾਲੇ ਤੇਨ ਸਦ੍ਧਿਂ ਗਤਂ ਛਪ੍ਪਦਂ ਨਾਮ ਸਾਮਣੇਰਂ ਸੀਹਲ਼ਦੀਪੇਯੇਵ ਸੀਹਲ਼ਦੀਪਿਕਾ ਪਬ੍ਬਜਿਂਸੁ. ਪਬ੍ਬਜਿਤ੍ਵਾ ਚ ਛਪ੍ਪਦਸਾਮਣੇਰੋ ਪਰਿਯਤ੍ਤਿਂ ਉਗ੍ਗਣ੍ਹਿਤ੍ਵਾ ਦਸਵਸ੍ਸਂ ਤਤ੍ਥ ਵਸਿਤ੍ਵਾ ਅਰਿਮਦ੍ਦਨਨਗਰਂ ਪਚ੍ਚਾਗਚ੍ਛਿ. ਸਿਵਲਿਤ੍ਥੇਰਞ੍ਚ ਤਾਮਲਿਨ੍ਦਤ੍ਥੇਰਞ੍ਚ ਆਨਨ੍ਦਤ੍ਥੇਰਞ੍ਚ ਰਾਹੁਲਤ੍ਥੇ ਰਞ੍ਚ ਅਨੇਸਿ. ਤੇ ਪਨ ਥੇਰਾ ਤਿਪਿਟਕਧਰਾ ਹੋਨ੍ਤਿ ਬ੍ਯਤ੍ਤਾ ਦਕ੍ਖਾ ਚ. ਅਯਞ੍ਚਤ੍ਥੋ ਵਿਤ੍ਥਾਰੇਨ ਹੇਟ੍ਠਾ ਵੁਤ੍ਤੋ.

ਅਰਿਮਦ੍ਦਨਨਗਰਂ ਪਤ੍ਵਾ ਅਰਿਮਦ੍ਦਨ ਵਾਸੀਹਿ ਭਿਕ੍ਖੂਹਿ ਸਦ੍ਧਿਂ ਵਿਨਯਕਮ੍ਮਾਨਿ ਅਕਤ੍ਵਾ ਪੁਥੁ ਹੁਤ੍ਵਾ ਨਿਸੀਦਿਂਸੁ. ਨਰਪਤਿਰਾਜਾ ਚ ਤੇਸੁ ਥੇਰੇਸੁ ਅਤਿਵਿਯ ਪਸੀਦਿ. ਏਰਾਵਤੀਨਦਿਯਂ ਉਲ਼ੁਮ੍ਪਂ ਬਨ੍ਧਿਤ੍ਵਾ ਤਤ੍ਥੇਵ ਉਪਸਮ੍ਪਦਕਮ੍ਮਂ ਕਾਰਾਪੇਸਿ. ਚਿਰਕਾਲਂ ਅਤਿਕ੍ਕਮਿਤ੍ਵਾ ਸੋ ਗਣੋ ਵੁਡ੍ਢਿ ਹੁਤ੍ਵਾ ਉਪ੍ਪਜ੍ਜਿ.

ਨਰਪਤਿਰਾਜਾ ਚ ਤੇ ਥੇਰੇ ਸਦ੍ਧਿਂ ਸਙ੍ਘੇਨ ਨਿਮਨ੍ਤੇਤ੍ਵਾ ਮਹਾਦਾਨਂ ਅਦਾਸਿ. ਤਦਾ ਛਣੇ ਆਕਪ੍ਪਸਮ੍ਪਨ੍ਨਂ ਰੂਪਸੋਭਗ੍ਗਪ੍ਪਕ੍ਕਂ ਏਕਂ ਨਾਟਕਿਤ੍ਤਿਂ ਦਿਸ੍ਵਾ ਰਾਹੁਲਤ੍ਥੇਰੋ ਪਟਿਬਦ੍ਧਚਿਤ੍ਤੋ ਲੇਪੇ ਲਗ੍ਗਿਤਵਾਨਰੋਵਿਯ ਕਦ੍ਦਮੇ ਲਗ੍ਗਿਤਮਾਤਙ੍ਗੋਵਿਯ ਚ ਕਾਮ ਗੁਣਲੇਪਕਦ੍ਦਮੇਸੁ ਲਗ੍ਗਿਤੋ ਸਾਸਨੇ ਵਿਰਮਿਤ੍ਵਾ ਹੀ ਨਾਯਾਵਤ੍ਤੀਤੁਂ ਆਰਭਿ. ਮਰਣਨ੍ਤਿ ਕਰੋਗੇਨ ਅਭਿਭੂਤੋ ਵਿਯ ਅਤੇਕਿਚ੍ਛੋ ਹੁਤ੍ਵਾ ਸੇਸਤ੍ਥੇਰੇਸੁ ਓਵਾਦਂ ਦਿਨ੍ਨੇਸੁ ਪਿਨਾਦਿਯਿ. ਤਦਾ ਸੇਸਤ੍ਥੇਰਾ ਤਂ ਏਵਮਾਹਂਸੁ,-ਮਾ ਤ੍ਵਂ ਏਕਂ ਤਂ ਪਟਿਚ੍ਚ ਸਬ੍ਬੇਪਿ ਅਮ੍ਹੇ ਲਜ੍ਜਾਪੇਤੁਂ ਨ ਅਰਹਸਿ, ਮਾ ਇਧ ਹੀਨਾਯਾ ਵਤ੍ਤੇਹਿ, ਮਲ੍ਲਾਰੁਦੀਪਂ ਗਨ੍ਤ੍ਵਾ ਯਥਾਰੁਚਿਂ ਕਰੋਹੀਤਿ ਪੇਸੇਸੁਂ. ਰਾਹੁਲਤ੍ਥੇਰੋ ਚ ਕੁਸਿਮਤਿਤ੍ਥਤੋ ਨਾਵਂ ਆਰੁਯ੍ਹ ਮਲ੍ਲਾਰੁਦੀਪਂ ਅਗਮਾਸਿ. ਮਲ੍ਲਾਰੁਦੀਪਂ ਪਤ੍ਤਕਾਲੇ ਮਲ੍ਲਾਰੁਰਾਜਾ ਵਿਨਯਂ ਜਾਨਿਤੁਕਾਮੋ ਸਹ ਟੀਕਾਯ ਖੁਦ੍ਦਸਿਕ੍ਖਾਪਕਰਣਂ ਤਸ੍ਸ ਸਨ੍ਤਿਕੇ ਉਗ੍ਗਣ੍ਹਿਤ੍ਵਾ ਏਕਪਤ੍ਤਮਤ੍ਤਂ ਮਣਿਂ ਅਦਾਸਿ. ਸੋਚ ਤਂ ਲਭਿਤ੍ਵਾ ਹੀਨਾਯਾਵਤ੍ਤੀਤਿ. ਹੋਨ੍ਤਿ ਚੇਤ੍ਥ,-

ਅਤਿਦੂਰੇਵ ਹੋਤਬ੍ਬਂ, ਭਿਕ੍ਖੁਨਾ ਨਾਮ ਇਤ੍ਥਿਭਿ;

ਇਤ੍ਥਿਯੋ ਨਾਮ ਭਿਕ੍ਖੂਨਂ, ਭਵਨ੍ਤਿ ਇਧ ਵੇਰਿਨੋ.

ਤਾਵ ਤਿਟ੍ਠਨ੍ਤੁ ਦੁਪ੍ਪਞ੍ਞਾ, ਮਯਂ ਪੋਰਾਣਿਕਾਪਿ ਚ;

ਮਹਾਪਞ੍ਞਾ ਵਿਨਾਸਂ, ਪਤ੍ਤਾ ਹਰਿਤਚਾਦਯੋ.

ਤਸ੍ਮਾ ਹਿ ਪਣ੍ਡਿਤੋ ਭਿਕ੍ਖੁ, ਅਨ੍ਤਮਸੋਵ ਇਤ੍ਥਿਭਿ;

ਵਿਸ੍ਸਾਸਂ ਨ ਕਰੇ ਲੋਕੇ, ਰਾਗੋ ਚ ਦੁਪ੍ਪਵਾਰਿਤੋਤਿ.

ਸੇਸੇਸੁ ਚ ਥੇਰੇਸੁ ਛਪ੍ਪਦੋ ਨਾਮ ਥੇਰੋ ਪਠਮਂ ਕਾਲਙ੍ਕਤੋ. ਸਿਵਲਿਤਾਮਲਿਨ੍ਦਾਨਨ੍ਦਤ੍ਥੇਰਾਯੇਵ ਤਯੋ ਪਰਿਯਤ੍ਤਿਉਗ੍ਗਹਣਧਾਰਣਾਦਿਵਸੇਨ ਸਾਸਨਂ ਉਪਤ੍ਥਮ੍ਭੇਤ੍ਵਾ ਅਰਿਮਦ੍ਦਨਨਗਰੇ ਨਿਸੀਦਿਂਸੁ. ਏਕਸ੍ਮਿਞ੍ਚ ਕਾਲੇ ਰਾਜਾ ਤੇਸਂ ਤਿਣ੍ਣਂ ਥੇਰਾਨਂ ਏਕੇਕਂ ਹਤ੍ਥਿਂ ਅਦਾਸਿ. ਸਿਵਲਿਤਾਮਲਿਨ੍ਦਤ੍ਥੇਰਾ ਪਟਿਗ੍ਗਹੇਤ੍ਵਾ ਵਨੇ ਵਿਸ੍ਸਜ੍ਜਾਪੇਸੁਂ. ਆਨਨ੍ਦਤ੍ਥੇਰੋ ਪਨ ਕਿਞ੍ਚਿਪੁਰਨਗਰਂ ਪਹਿਣਿਤ੍ਵਾ ਞਾਤਕਾਨਂ ਦੇਹੀਤਿ ਕੁਸਿਮਤਿਤ੍ਥਂ ਗਨ੍ਤ੍ਵਾ ਨਾਵਂ ਆਰੋਪੇਸਿ. ਤਂ ਕਾਰਣਂ ਞਤ੍ਵਾ ਸਿਵਲਿਤਾਮਲਿਨ੍ਦਤ੍ਥੇਰਾਤਂ ਏਵਮਾਹਂਸੁ,– ਮਯਂ ਪਨ ਆਵੁਸੋ ਹਤ੍ਥੀਨਂ ਸੁਖਤ੍ਥਾਯ ਵਨੇ ਵਿਸ੍ਸਜ੍ਜੇਮ,ਤ੍ਵਂ ਪਨ ਅਧਮ੍ਮਿਕਂ ਕਰੋਸੀਤਿ. ਕਿਨ੍ਨਾਮ ਭਨ੍ਤੇ ਞਾਭਕਾਨਂ ਸਙ੍ਗਹੋ ਨ ਵਟ੍ਟਤਿ, ਨਨੁ ਞਾਤਕਾਨਞ੍ਚ ਸਙ੍ਗਹੋਤਿ ਭਗਵਤਾ ਵੁਤ੍ਤਨ੍ਤਿ.

ਥੇਰਾ ਆਹਂਸੁ,-ਸਚੇ ਤ੍ਵਂ ਅਮ੍ਹਾਕਂ ਵਚਨਂ ਨਕਰੇਯ੍ਯਾਸਿ,ਭਵ ਇਚ੍ਛਾਨੁਰੂਪਂ ਕਰੋਹਿ, ਮਯਂ ਪਨ ਤਯਾ ਸਦ੍ਧਿਂ ਸਂਵਾਸਂ ਨ ਕਰਿਸ੍ਸਾਮਾਤਿ ਵਿਸੁਂ ਨਿਸੀਦਿਂਸੁ.

ਤਤੋ ਪਟ੍ਠਾਯ ਦ੍ਵੇ ਗਣਾ ਭਿਜ੍ਜਿਂਸੁ. ਤਤੋ ਪਚ੍ਛਾਕਾਲੇ ਅਤਿਕ੍ਕਨ੍ਤੇ ਤਾਮਲਿਨ੍ਦਤ੍ਥੇਰੋ ਬਹੁਸ੍ਸੁਤਾਨਂ ਬ੍ਯਤ੍ਤਿਬਲਾਨਂ ਸਿਸ੍ਸਾਨਂ ਅਨੁਗ੍ਗਹਤ੍ਥਾਯ ਗਹਟ੍ਠਾਨਂ ਸਨ੍ਤਿਕੇ ਅਯਂ ਬਹੁਸ੍ਸੁਤੋ ਅਯਂ ਮਹਾਪਞ੍ਞੋਤਿ ਏਵਮਾਦਿਨਾ ਵਚੀਵਿਞ੍ਞਤ੍ਤਿਂ ਸਮੁਟ੍ਠਾਪੇਤਿ, ਏਵਂ ਕਤੇ ਕੁਲਪੁਤ੍ਤਾ ਸੁਲਭਪਚ੍ਚਯਵਸੇਨ ਸਾਸਨਸ੍ਸ ਹਿਤਂ ਆਵਹਿਭੁਂਸਕ੍ਖਿਸ੍ਸਨ੍ਤੀਤਿ ਕਤ੍ਵਾ. ਤਂ ਕਾਰਣਂ ਸੁਤ੍ਵਾ ਸਿਵਲਿਤ੍ਥੇਰੋ ਏਵਮਾਹ,- ਕਸ੍ਮਾ ਤ੍ਵਂ ਵਚੀਵਿਞ੍ਞਤ੍ਤਿਂ ਸਮੁਟ੍ਠਾਪੇਤ੍ਵਾ ਬੁਦ੍ਧਪ੍ਪਟਿਕੁਚ੍ਛਿਤਂ ਕਮ੍ਮਂ ਕਰੋਸੀਤਿ. ਭਗਵਤਾ ਅਤ੍ਤਨੋ ਅਤ੍ਥਾਯਯੇਵ ਵਚੀਵਿਞ੍ਞਤ੍ਤਿਂ ਪਟਿਕ੍ਖਿਤ੍ਤਾ, ਅਹਂ ਪਨ ਪਰੇਸਂਯੇਵ ਅਤ੍ਥਾਯ ਵਚੀਵਿਞ੍ਞਤ੍ਤਿਂਸਮੁਟ੍ਠਾਪੇਮਿ, ਨਾਤ੍ਤਨੋ ਅਤ੍ਥਾਯ, ਸਾਸਨਸ੍ਸ ਹਿ ਵੇਪੁਲ੍ਲਤ੍ਥਾਯ ਏਵਂ ਵਚੀਵਿਞ੍ਞਤ੍ਤਿਂਸਮੁਟ੍ਠਾਪੇਮਿ. ਸਿਵਲਿਤ੍ਥੇਰੋਪਿ ਨ ਤ੍ਵਂ ਮਮ ਵਚਨਂ ਕਰੋਸਿ, ਯਂ ਯਂ ਤ੍ਵਂ ਇਚ੍ਛਸਿ, ਤਂ ਤਂ ਕਰੋਹਿ, ਅਹਂ ਪਨ ਤਯਾ ਸਦ੍ਧਿਂ ਸਂਵਾਸਂ ਨਕਰਿਸ੍ਸਾਮੀਤਿ ਵਿਸੁਂ ਹੁਤ੍ਵਾ ਸਦ੍ਧਿਂ ਸਕਪਕ੍ਖੇਨ ਨਿਸੀਦਿ. ਤਤੋ ਪਟ੍ਠਾਯ ਤਯੋ ਗਣਾ ਭਿਜ੍ਜਿਂਸੁ.

ਏਵਂ ਅਰਿਮਦ੍ਦਨਨਗਰੇ ਅਰਹਨ੍ਤਤ੍ਥੇਰਸ੍ਸ ਏਕੋ ਵਂਸੋ, ਸਿਵਲਿਤ੍ਥੇਰਸ੍ਸ ਏਕੋ, ਤਾਮਲਿਨ੍ਦਤ੍ਥੇਰਸ੍ਸ ਏਕੋ, ਆਨਨ੍ਦਤ੍ਥੇਰਸ੍ਸ ਏਕੋਤਿ ਚਤ੍ਤਾਰੋ ਗਣਾ ਅਹੇਸੁਂ.

ਤੇਸੁ ਅਰਹਨ੍ਤਤ੍ਥੇਰਗਣੋ ਸੁਧਮ੍ਮਪੁਰਤੋ ਪਠਮਂ ਆਗਤਤ੍ਤਾ ਪੁਰਿਮਗਣੋਤਿ ਵੋਹਾਰਿਯਤਿ, ਅਞ੍ਞੇ ਪਨ ਪਚ੍ਛਾ ਆਗਤਤ੍ਤਾ ਪਚ੍ਛਾਗਣਾਤਿ.

ਸਿਵਲਿਤ੍ਥੇਰੋ ਅਰਿਮਦ੍ਦਨਨਗਰੇ ਯਾਵੀਜੀਵਂ ਸਾਸਨਂ ਪਗ੍ਗਣ੍ਹਿਤ੍ਵਾ ਕਲਿਯੁਗੇ ਨਵੁਤਾਧਿਕੇ ਪਞ੍ਚਵਸ੍ਸਸਤੇ ਕਾਲੇ ਕਾਲਮਕਾਸਿ.

ਆਨਨ੍ਦਤ੍ਥੇਰੋ ਪਨ ਅਰਿਮਦ੍ਦਨਨਗਰੇਯੇਵ ਚਤੁਚਤ੍ਤਾਲੀਸ ਵਸ੍ਸਾਨਿ ਸਾਸਨਂ ਪਗ੍ਗਣ੍ਹਿਤ੍ਵਾ ਛਨਵੁਤਾਧਿਕੇ ਪਞ੍ਚਵਸ੍ਸਸਤੇ ਕਾਲੇ ਕਾਲਮਕਾਸਿ.

ਤਾਮਲਿਨ੍ਦਤ੍ਥੇਰੋਪਿ ਯਾਵਜੀਵਂ ਸਾਸਨਂ ਪਗ੍ਗਣ੍ਹਿਤ੍ਵਾ ਅਟ੍ਠਨ ਵੁਤਾਧਿਕੇ ਪਞ੍ਚਵਸ੍ਸਸਤੇ ਕਾਲੇ ਕਾਲਮਕਾਸੀਤਿ. ਅਹੋ ਸਙ੍ਖਾਰਸਭਾਵੋਤਿ.

ਸੇਯ੍ਯਥਾਜਗਰਸ੍ਸੇਵ, ਨਾਭਿਯਾ ਚਕ੍ਕਮਣ੍ਡਲੇ;

ਲਗ੍ਗੋ ਸਸੋ ਸਮਿਤ੍ਵਾਪਿ, ਦਿਸਂ ਗਚ੍ਛਤਿ ਤਂ ਮੁਖਂ.

ਤਥੇਵ ਸਬ੍ਬਸਤ੍ਤਾਪਿ, ਮਚ੍ਚੁਚਕ੍ਕੇਸੁ ਲਗ੍ਗਿਤਾ;

ਯਾਵਜੀਵਮ੍ਪਿ ਧਾਵਿਤ੍ਵਾ, ਮਚ੍ਚੁਮੁਖਂ ਉਪਾਗਮੁਨ੍ਤਿ.

ਇਚ੍ਚੇਵਂ ਅਰਿਮਦ੍ਦਨਪੁਰੇ ਅਰਹਨ੍ਤੇਹਿ ਚ ਗਨ੍ਥਕਾਰੇਹਿ ਚ ਪੁਥੁਜ੍ਜਨੇਹਿ ਜਿਨਸਾਸਨਂ ਨਭੇ ਚਨ੍ਦੋਵਿਯ ਵਿਜ੍ਜੋਤਤਿ.

ਤਤ੍ਥ ਹਿ ਯਦਾ ਅਨੁਰੁਦ੍ਧਰਾਜਾ ਸੁਧਮ੍ਮਪੁਰਤੋ ਸਾਸਨਂ ਆਨੇਸਿ, ਤਦਾ ਅਰਹਨ੍ਤਾ ਛਸਤਸਹਸ੍ਸਮਤ੍ਤਾ ਆਗਤਾ, ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਨੋ ਪਨ ਗਣਨਪਥਂ ਵੀਤਿ ਵਤ੍ਤਾਤਿ.

ਛਤ੍ਤਗੁਹਿਨ੍ਦਸ੍ਸ ਨਾਮ ਰਞ੍ਞੋ ਕਾਲੇਪਿ ਹਿਮਵਨ੍ਤੇ ਗਨ੍ਧਮਾਦਨਪਬ੍ਬਤਤੋ ਅਟ੍ਠ ਅਰਹਨ੍ਤਾ ਪਿਣ੍ਡਾਯ ਰਾਜਗੇਹਂ ਆਗਮਂਸੁ. ਰਾਜਾ ਚ ਪਤ੍ਤਂ ਗਹੇਤ੍ਵਾ ਪਿਣ੍ਡਪਾਤੇਨ ਭੋਜੇਤ੍ਵਾ ਇਦਾਨਿ ਕੁਤੋ ਆਗਤਤ੍ਥਾਭਿ ਪੁਚ੍ਛਿ. ਹਿਮਵਨ੍ਤੇ ਮਹਾਰਾਜ ਗਨ੍ਧ ਮਾਦਨਪਬ੍ਬਤਤੋਤਿ. ਅਥ ਰਾਜਾ ਅਤਿਪ੍ਪਸਨ੍ਨੋ ਹੁਤ੍ਵਾ ਇਧ ਤੇਮਾਸਂ ਵਸ੍ਸਂ ਉਪਗਚ੍ਛਥਾਤਿ ਯਾਚਿਤ੍ਵਾ ਵਿਹਾਰਂ ਕਾਰਾਪੇਤ੍ਵਾ ਅਦਾਸਿ. ਤੇਮਾਸਮ੍ਪਿ ਅਨ੍ਤੋਗੇਹੇ ਨਿਮਨ੍ਤੇਤ੍ਵਾ ਪਿਣ੍ਡਪਾਤੇਨ ਭੋਜੇਸਿ.

ਏਕਂ ਸਮਯਂ ਅਰਹਨ੍ਤਾਨਂ ਗਨ੍ਧਮਾਦਨਪਬ੍ਬਤੇ ਨਨ੍ਦਮੂਲਗੁਹਂ ਵਿਯ ਏਕਂ ਗੁਹਂ ਮਾਪੇਤ੍ਵਾ ਦਸ੍ਸੇਹੀਤਿ ਯਾਚਿ. ਤੇ ਚ ਅਰਹਨ੍ਤਾ ਨਨ੍ਦਮੂਲਗੁਹਂਵਿਯ ਏਕਂ ਗੁਹਂ ਇਦ੍ਧਿਯਾ ਮਾਪੇਤ੍ਵਾ ਦਸ੍ਸੇਸੁਂ. ਰਾਜਾ ਚ ਤਾਯ ਗੁਹਾਯ ਸਦਿਸਂ ਏਕਂ ਗੁਹਂ ਕਾਰਾਪੇਸਿ. ਨਨ੍ਦਮੂਲਗੁਹਾਕਾਰੇਨ ਪਨ ਕਤਤ੍ਤਾ ਨਨ੍ਦਾਤਿ ਨਾਮਮ੍ਪਿ ਅਕਾਸਿ. ਇਚ੍ਚੇਵਂ ਛਤ੍ਤਗੁਹਿਨ੍ਦਸ੍ਸ ਰਞ੍ਞੋ ਕਾਲੇ ਗਨ੍ਧਮਾਦਨਪਬ੍ਬਤੇ ਨਨ੍ਦਮੂਲਗੁਹਤੋ ਆਗਨ੍ਤ੍ਵਾ ਅਰਹਨ੍ਤਾ ਸਾਸਨਂ ਪਤਿਟ੍ਠਾਪੇਸੁਂ.

ਅਰਹਨ੍ਤਭਾਵੋ ਚ ਨਾਮੇਸ ਯਥਾਭੂਤਂ ਜਾਨਿਤੁਂ ਦੁਕ੍ਕਰੋ, ਅਨੁਪਸਮ੍ਪਨ੍ਨਾਨਂ ਉਤ੍ਤਰਿਮਨੁਸ੍ਸਧਮ੍ਮਦਸ੍ਸਨਸ੍ਸ ਪਟਿਕ੍ਖਿਤ੍ਤਤ੍ਤਾ, ਅਰਹਤ੍ਤਂ ਵਾ ਪਤ੍ਵਾਪਿ ਵਾਸਨਾਯ ਅਪ੍ਪਜਹਿਤਤ੍ਤਾ. ਅਰਹਾਪਿ ਹਿ ਸਮਾਨੋ ਅਹਂ ਅਰਹਾਤਿ ਅਨੁਪਸਮ੍ਪਨ੍ਨਾਨਂ ਕਥੇਤੁਂ ਨ ਵਟ੍ਟਤਿ, ਅਰਹਤ੍ਤਂ ਪਤ੍ਵਾਪਿ ਏਕਚ੍ਚੋ ਵਾਸਨਂ ਪਜਹਿਤੁਂ ਨ ਸਕ੍ਕਾ, ਪਿਲਿਨ੍ਦਵਚ੍ਛਤ੍ਥੇਰਵਤ੍ਥੁਚੇਤ੍ਥ ਞਾਪਕਂ. ਏਵਂ ਲੋਕੇ ਅਰਹਨ੍ਤ ਭਾਵੋ ਜਾਨਿਤੁਂ ਦੁਕ੍ਕਰੋ. ਤੇਨੇਵ ਮਹਾਕਸ੍ਸਪਤ੍ਥੇਰਸ੍ਸ ਉਪਟ੍ਠਾਕੋ ਏਕੋ ਭਿਕ੍ਖੁ ਅਤ੍ਤਨੋ ਉਪਜ੍ਝਾਯਸ੍ਸ ਮਹਾਕਸ੍ਸਪਤ੍ਥੇਰਸ੍ਸ ਸਨ੍ਤਿਕੇ ਵਸਿਤ੍ਵਾਪਿ ਤਸ੍ਸ ਅਰਹਨ੍ਤ ਭਾਵਂ ਨ ਜਾਨਿ.

ਮਹਾਕਸ੍ਸਪਤ੍ਥੇਰਞ੍ਹਿ ਏਕੇਨ ਸਦ੍ਧਿਵਿਹਾਰਿਕੇਨ ਸਦ੍ਧਿਂ ਅਰਞ੍ਞਵਿਹਾਰਤੋ ਗਾਮਂ ਪਿਣ੍ਡਾਯ ਚਰਨ੍ਤਂ ਅਨ੍ਤਰਾਮਗ੍ਗੇ ਪਤ੍ਤਾ ਦਿਪਰਿਕ੍ਖਾਰੇ ਗਹੇਤ੍ਵਾ ਪਚ੍ਛਾ ਗਚ੍ਛਨ੍ਤੋਯੇਵ ਏਕੋਸਦ੍ਧਿ ਵਿਹਾਰਿਕੋ ਏਵਮਾਹ,–ਲੋਕਸ੍ਮਿਂ ਭਨ੍ਤੇ ਅਰਹਾ ਅਰਹਾਤਿ ਪਾਕਟੋ, ਸੁਤਮਤ੍ਤੋਵਾਹਂ ਭਵਾਮਿ, ਨ ਕਦਾਚਿ ਦਿਟ੍ਠਪੁਬ੍ਬੋਤਿ. ਤਂ ਸੁਤ੍ਵਾ ਥੇਰੋ ਪਚ੍ਛਾ ਪਰਿਵਤ੍ਤਤ੍ਵਾ ਓਲੋਕੇਨ੍ਤੋ ਪਰਿਕ੍ਖਾਰੇ ਆਵੁਸੋ ਗਹੇਤ੍ਵਾ ਅਰਹਨ੍ਤਸ੍ਸ ਪਚ੍ਛਾਗਚ੍ਛਨ੍ਤੋਯੇਵ ਅਰਹਨ੍ਤਭਾਵਂ ਨ ਜਾਨਾਤੀਤਿ ਆਹਾਤਿ.

ਅਰਿਮਦ੍ਦਨਨਗਰੇਪਿ ਸੀਲਬੁਦ੍ਧਿਪੋਲ੍ਲੋਙ੍ਕਸੁਮੇਧਤ੍ਥੇਰਾਦਯੋਪਿ ਅਰਹਨ੍ਤਾਯੇਵ ਅਹੇਸੁਂ. ਨਰਪਤਿਰਾਜਾ ਹਿ ਖਣਿਤ੍ਤਿ ਪਾਦਪਬ੍ਬਤਂ ਗਨ੍ਤ੍ਵਾ ਪਚ੍ਚਾਗਮਨਕਾਲੇ ਅਨ੍ਤਰਾਮਗ੍ਗੇ ਏਕਿਸ੍ਸਾ ਮਾਤਿਕਾਯ ਮਣੋਭਾਸਂ ਦਿਸ੍ਵਾ ਇਧ ਪੁਞ੍ਞਂ ਕਾਰੇਤੁਕਾਮੋ ਸਕ੍ਕੋ ਦਸ੍ਸੇਤਿ ਮਞ੍ਞੇਤਿ ਮਨਸਿਕਰਿਤ੍ਵਾ ਚੇਤਿਯਂ ਕਾਰਾਪੇਸ੍ਸਾਮੀਤਿ ਤਤ੍ਥ ਰਟ੍ਠਵਾਸੀਤਿ ਸਮਂ ਭੂਮਿਭਾਗਂ ਕਾਰਾਪੇਸਿ.

ਅਥ ਏਕੋ ਸੀਲਬੁਦ੍ਧਿ ਨਾਮ ਥੇਰੋ ਏਵਮਾਹ,– ਪੁਞ੍ਞਂ ਮਹਾਰਾਜ ਕਰਿਸ੍ਸਮੀਤਿ ਇਦਂ ਭੂਮਿਪਰਿਕਮ੍ਮਂ ਕਾਰਾਪੇਸਿ, ਏਵਂ ਕਾਰਾਪੇਨ੍ਤਸ੍ਸ ਤੇ ਅਪੁਞ੍ਞਂਯੇਵ ਭਵਤਿ, ਨੋਪੁਞ੍ਞਨ੍ਤਿ ਵਤ੍ਵਾ ਬਹੂ ਸਤ੍ਤਾ ਮਾ ਕਿਲਮਨ੍ਤੂਤਿ ਮਨਸਿਕਤ੍ਵਾ ਰਞ੍ਞੋ ਦਣ੍ਡਕਮ੍ਮੇਨ ਤਜ੍ਜਨਤ੍ਥਾਯ ਰਞ੍ਞਾ ਦਿਨ੍ਨਂ ਪਿਣ੍ਡਪਾਤਂ ਨਭੁਞ੍ਜਿ. ਰਾਜਾ ਚ ਸਚੇ ਤ੍ਵਂ ਮਯਾ ਦਿਨ੍ਨਂ ਪਿਣ੍ਡਪਾਤਂ ਅਭੁਞ੍ਜਿਤੁਕਾਮੋ ਭਵੇਯ੍ਯਾਸਿ, ਮਮ ਵਿਜਿਤੇ ਵਸਨ੍ਤੋਯੇਵ ਤ੍ਵਂ ਮਮ ਪਿਣ੍ਡਪਾਤਾ ਨ ਮੁਚ੍ਚੇਯ੍ਯਾਸਿ, ਰਟ੍ਠਵਾਸੀਹਿਪਿ ਦਿਨ੍ਨਪਿਣ੍ਡਪਾਤੋ ਮਯ੍ਹਮੇਵ ਸਨ੍ਤਕੋ, ਨਨੁ ਨਾਮ ਮਮ ਪਿਣ੍ਡਪਾਤਂਯੇਵ ਤ੍ਵਂ ਭੁਞ੍ਜਸੀਤਿ ਆਹ.

ਸੀਲਬੁਦ੍ਧਿਤ੍ਥੇਰੋਪਿ ਸਚੇ ਅਹਂ ਏਵਂ ਭਵੇਯ੍ਯਾਮਿ, ਸੀਹਲ਼ਦੀਪਂ ਗਨ੍ਤ੍ਵਾ ਵਸਿਸ੍ਸਾਮੀਤਿ ਚਿਨ੍ਤੇਤ੍ਵਾ ਅਰਞ੍ਞੇ ਵਸਿ.

ਅਥ ਤਮਤ੍ਥਂ ਜਾਨਿਤ੍ਵਾ ਨਗਰਦ੍ਵਾਰੇ ਆਰਕ੍ਖੋ ਏਕੋ ਯਕ੍ਖੋ ਰਞ੍ਞੋ ਆਗਤਕਾਲੇ ਅਭਿਮੁਖਂ ਠਿਤੋਵ ਭਯਾਨਕਰੂਪਂ ਨਿਸੀਦਿ. ਅਥ ਨਾਨਾਵਿਜ੍ਜਾਕਮ੍ਮੇਹਿ ਅਪਨੇਨ੍ਤੋਪਿ ਨ ਸਕ੍ਕਾ ਅਪਨੇਤੁਂ.

ਅਥ ਰਾਜਾ ਨਿਮਿਤ੍ਤਪਾਠਕੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ,-ਕੇਨ ਕਾਰਣੇਨ ਅਯਂ ਯਕ੍ਖੋ ਇਧ ਨਿਸਿਨ੍ਨੋਤਿ. ਤ੍ਵਂ ਮਹਾਰਾਜ ਸੀਲਬੁਦ੍ਧਿਤ੍ਥੇਰਂ ਅਗਾਰਵਵਸੇਨ ਪੁਬ੍ਬੇ ਕਥੇਸਿ, ਯਕ੍ਖਾਪਿ ਥੇਰੇ ਅਤਿਵਿਯ ਪਸਨ੍ਨਾਤਿ ਅਮ੍ਹੇਹਿ ਸੁਤਪੁਬ੍ਬਾ, ਤਂ ਪਟਿਚ੍ਚ ਯਕ੍ਖੋ ਭਯਾਨਕਰੂਪਂ ਦਸ੍ਸੇਤ੍ਵਾ ਨਿਸਿਨ੍ਨੋ ਭਵਿਸ੍ਸਤੀਤਿ ਆਹ.

ਰਾਜਾਪਿ ਅਮਚ੍ਚੇ ਆਣਾਪੇਸਿ ਥੇਰਂ ਪਕ੍ਕਾਸਥਾਤਿ. ਥੇਰੋ ਨਾਗਚ੍ਛਿ. ਸੀਹਲ਼ਦੀਪਂਯੇਵ ਗਮਿਸ੍ਸਾਮੀਤਿ ਆਰਭਿ. ਤਮਤ੍ਥਂ ਸੁਤ੍ਵਾ ਰਾਜਾ ਏਕਂ ਚਤੁਰਙ੍ਗਪਚ੍ਚਯਂ ਨਾਮ ਅਮਚ੍ਚਂ ਪਕ੍ਕੋਸਾਪੇਤ੍ਵਾ ਤ੍ਵਂ ਗਨ੍ਤ੍ਵਾ ਥੇਰਂ ਪਕ੍ਕੋਸਾਹੀਤਿ ਪੇਸੇਸਿ. ਚਤੁਰਙ੍ਗਪਚ੍ਚਯੋ ਚ ਛੇਕਤਾਯ ਏਕਂ ਸੁਵਣ੍ਣਮਯਂ ਬੁਦ੍ਧਪ੍ਪਟਿਬਿਮ੍ਬਂ ਨਾਵਾਯ ਠਪੇਤ੍ਵਾ ਮਹਾਸਮੁਦ੍ਦਤਿਤ੍ਥਂ ਅਗਮਾਸਿ. ਅਥ ਥੇਰਂ ਸਮ੍ਪਾਪੁਣਿਤ੍ਵਾ ਇਦਾਨਿ ਇਧ ਭਗਵਾ ਸਮ੍ਮਾਸਮ੍ਬੁਦ੍ਧੋ ਅਗਮਾਸਿ, ਸੀਲਬੁਦ੍ਧਿਤ੍ਥੇਰੋ ਭਗਵਤੋ ਸਮ੍ਮਾਸਮ੍ਬੁਦ੍ਧਸ੍ਸ ਦਸ੍ਸਨਤ੍ਥਾਯ ਆਗਚ੍ਛਤੂਤਿ ਦੂਤਂ ਪੇਸੇਸਿ. ਥੇਰੋਪਿ ਭਗਵਤੋ ਸਮ੍ਮਾਸਮ੍ਬੁਦ੍ਧਸ੍ਸ ਦਸ੍ਸਨਤ੍ਥਾਯ ਆਗਚ੍ਛਤੂਤਿ ਵਚਨਂ ਪਟਿਕ੍ਖਿਪਿਤੁਂ ਬੁਦ੍ਧਗਾਰਵਵਸੇਨ ਅਵਿਸਹਤਾਯ ਆਗਚ੍ਛੀਤਿ.

ਪੋਰਾਣਿਕਾਨਂਵ ਥੇਰਾਨਂ, ਬੁਦ੍ਧੇ ਸਗਾਰਵਂ ਇਧ;

ਪਣ੍ਡਿਤੋ ਗਾਰਵਂ ਬੁਦ੍ਧੇ, ਕਰੇ ਪਸਨ੍ਨਚੇਤਸਾਤਿ.

ਨਾਵਂ ਅਭਿਰੂਹਿਤ੍ਵਾ ਥੇਰੋ ਭਗਵਤੋ ਸਮ੍ਮਾਸਮ੍ਬੁਦ੍ਧਸ੍ਸ ਵਨ੍ਦਨਾਮਾਨਪੂਜਾਸਕ੍ਕਾਰਦੀਨਿ ਅਕਾਸਿ. ਥੇਰਸ੍ਸ ਏਵਂ ਵਨ੍ਦਨਾਮਾਨਪੂਜਾਸਕ੍ਕਾਰਾਦੀਨਿ ਕਰੋਨ੍ਤਸ੍ਸੇਵ ਵੇਗੇਨ ਨਾਵਂ ਆਨੇਤ੍ਵਾ ਗਚ੍ਛਿ. ਅਥ ਚਤੁਰਙ੍ਗਪਚ੍ਚਯੋ ਏਵਮਾਹ,– ਇਦਾਨਿ ਭਨ੍ਤੇ ਤੁਮ੍ਹਾਕਂ ਆਚਰਿਯਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨਂ ਪਗ੍ਗਣ੍ਹਿਤੁਂ ਯੁਤ੍ਤੋਤਿ. ਰਾਜਾ ਚ ਅਮਚ੍ਚੇਹਿ ਪਰਿਵਾਰਿਤੋ ਪਚ੍ਚੁਗ੍ਗਚ੍ਛਿ. ਨਾਵਾਯ ਥੇਰਸ੍ਸ ਹਤ੍ਥੇ ਗਹੇਤ੍ਵਾ ਰਾਜਗੇਹਂ ਆਨੇਸਿ. ਦ੍ਵਾਰਂ ਪਤ੍ਤਕਾਲੇ ਯਕ੍ਖੋ ਪਥਵਿਯਂ ਨਿਸੀਦਿਤ੍ਵਾ ਥੇਰਂ ਵਨ੍ਦਿ.

ਰਾਜਾ ਰਾਜਗੇਹਂ ਪਤ੍ਵਾ ਥੇਰਂ ਨਾਨਾਭੋਜਨੇਹਿ ਭੋਜੇਸਿ. ਏਵਞ੍ਚ ਅਵੋਚ,–ਅਜ੍ਜਤਗ੍ਗੇ ਭਨ੍ਤੇ ਤ੍ਵਮਸਿ ਮਮਾਚਰਿਯੋ, ਭਗਵਤੋਵ ਓਵਾਦਂ ਸਿਰਸਾ ਪਟਿਗ੍ਗਹੇਤ੍ਵਾ ਅਨੁਵਤ੍ਤਿਸ੍ਸਾਮਾਤਿ ਅਤ੍ਤਨੋ ਪਞ੍ਚਪੁਤ੍ਤੇਪਿ ਥੇਰਸ੍ਸ ਅਦਾਸਿ. ਤੇ ਚ ਪਞ੍ਚਕੁਮਾਰਾ ਥੇਰੇਨ ਸਦ੍ਧਿਂ ਅਨੁਵਤ੍ਤਿਂਸੁ. ਥੇਰੋ ਤੇ ਪਕ੍ਕੋਸੇਤ੍ਵਾ ਵਿਹਾਰਂ ਅਗਮਾਸਿ. ਅਨ੍ਤਰਾਮਗ੍ਗੇ ਕਪ੍ਪਿਯਪਥਵਿਯਂ ਪਞ੍ਚ ਪਰਿਮਣ੍ਡਲਾਕਾਰਾਨਿ ਲਿਖਿਤ੍ਵਾ ਤੇਸਂ ਰਾਜਕੁਮਾਰਾਨਂ ਦਸ੍ਸੇਤ੍ਵਾ ਨਿਵਤ੍ਤਾਪੇਸਿ. ਰਾਜਕੁਮਾਰਾ ਪਟਿਨਿਵਤ੍ਤਿਤ੍ਵਾ ਤਂ ਕਾਰਣਂ ਰਞ੍ਞੋ ਆਰੋਚੇਸੁਂ. ਰਾਜਾ ਚ ਤੁਮ੍ਹਾਕਂ ਪੁਞ੍ਞਂ ਕਾਰਾਪਨਤ੍ਥਾਯ ਦਸ੍ਸੇਤੀਤਿ ਵਤ੍ਵਾ ਤੁਲਾਵਸੇਨ ਤੇਹਿ ਰਾਜਕੁਮਾਰੇਹਿ ਸੁਵਣ੍ਣਂ ਸਮਂ ਕਤ੍ਵਾ ਤੇਨ ਸੁਵਣ੍ਣੇਨ ਮੂਲਂ ਕਤ੍ਵਾ ਭਗਵਤੋ ਧਰਮਾਨਕਾਲੇ ਪਸ੍ਸੇਨਦਿਕੋਸਲਰਞ੍ਞਾ ਕਾਰਾਪਿਤਂ ਚਨ੍ਦਨਪ੍ਪਟਿਬਿਮ੍ਬਂਵਿਯ ਵਿਸੁਂ ਵਿਸੁਂ ਪਟਿਬਿਮ੍ਬਂ ਕਾਰਾਪੇਸਿ.

ਤੇਸਂ ਨਿਧਾਨਟ੍ਠਾਨਭੂਤਾਨਿ ਪਞ੍ਚ ਚੇਤਿਯਾਨਿਪਿ ਸਕ੍ਕੋ ਕਮ੍ਮ ਵਿਧਾਯਕੋ ਹੁਤ੍ਵਾ ਪਤਿਟ੍ਠਾਪੇਸਿ. ਏਤ੍ਥ ਚ ਪੁਬ੍ਬੇ ਰਞ੍ਞਾ ਪਸੀਦਿਤ੍ਵਾ ਥੇਰਸ੍ਸ ਰਾਜਕੁਮਾਰਾ ਦਿਨ੍ਨਾ, ਮੂਲਂ ਰਤਨਤ੍ਤਯਸ੍ਸ ਦਤ੍ਵਾ ਪੁਨ ਰਾਜਕੁਮਾਰੇ ਭੂਜਿਸ੍ਸੇ ਕਾਰੇਤੁਕਾਮਤਾਯ ਥੇਰੋ ਏਵਂ ਸਞ੍ਞਂ ਅਦਾਸੀਤਿ ਦਟ੍ਠਬ੍ਬਂ.

ਸੋ ਚ ਸੀਲਬੁਦ੍ਧਿਤ੍ਥੇਰੋ ਅਰਹਨ੍ਤਗਣਵਂਸੋਤਿ ਦਟ੍ਠਬ੍ਬੋ.

ਅਰਿਮਦ੍ਦਨਨਗਰੇਯੇਵ ਨਰਪਤਿ ਰਞ੍ਞੋ ਕਾਲੇ ਕਸ੍ਸਪੋ ਨਾਮ ਥੇਰੋ ਦੇਸਚਾਰਿਕਂ ਚਰਮਾਨੋ ਪੋਲ੍ਲੋਙ੍ਕਨਾਮਕਂ ਦੇਸਂ, ਤਦਵਸਰਿ. ਅਥ ਦ੍ਵੇ ਮਹਲ੍ਲਕਪੋਲ੍ਲੋਙ੍ਕਾ ਮਨੁਸ੍ਸਾ ਥੇਰੇ ਅਤਿਪ੍ਪਸਨ੍ਨਤਾਯ ਦ੍ਵੇ ਪੁਤ੍ਤੇ ਉਪਟ੍ਠਾਕਤ੍ਥਾਯ ਨਿਯ੍ਯਾਦੇਸੁਂ.

ਪੋਲ੍ਲੋਙ੍ਕਮਨੁਸ੍ਸਾਨਂ ਅਤਿਪ੍ਪਸਨ੍ਨਤਂ ਪਟਿਚ੍ਚ ਥੇਰੋਪਿ ਪੋਲ੍ਲੋਙ੍ਕਤ੍ਥੇਰੋਤਿ ਵੋਹਾਰਿਯਤਿ. ਯਦਾ ਚ ਪਨ ਸੋ ਥੇਰੋ ਸੀਹਲ਼ਦੀਪਂ ਗਨ੍ਤੁਕਾਮੋ ਅਹੋਸਿ, ਤਦਾ ਸਕ੍ਕੋ ਦੇਵਾਨਮਿਨ੍ਦੋ ਬ੍ਯਗ੍ਘਰੂਪਂ ਮਾਪੇਤ੍ਵਾ ਪਿਟ੍ਠਿਯਾ ਯਾਵ ਮਹਾਸਮੁਦ੍ਦਤੀਰਂ ਆਨੇਸਿ. ਮਹਾਸਮੁਦ੍ਦਤੀਰਂ ਪਨ ਪਤ੍ਵਾ ਨਾਵਂ ਅਭਿਰੂਹਿਤ੍ਵਾ ਵਾਣਿਜੇਹਿ ਸਦ੍ਧਿਂ ਤਰਿ.

ਮਹਾਸਮੁਦ੍ਦਮਜ੍ਝੇ ਪਨ ਪਤ੍ਵਾ ਸਾ ਨਾਵਾ ਨ ਗਚ੍ਛਿ, ਨਿਚ੍ਚਲਾਵ ਅਟ੍ਠਾਸਿ. ਅਥ ਵਾਣਿਜਾ ਮਨ੍ਤੇਸੁਂ,-ਅਮ੍ਹਾਕਂ ਨਾਵਾਯ ਅਲਕ੍ਖੀ ਪਾਪਜਨੋ ਅਤ੍ਥਿ ਮਞ੍ਞੇਤਿ. ਏਵਂ ਪਨ ਮਨ੍ਤੇਤ੍ਵਾ ਸਲਾਕਾਦਾਨਂ ਅਕਂਸੁ. ਯਾਵ ਤਤਿਯਮ੍ਪਿ ਥੇਰਸ੍ਸੇਵ ਹਤ੍ਥੇ ਸਲਾਕਾ ਪੁਬ੍ਬੇ ਕਤਕਮ੍ਮਵਿਪਾਕਵਸੇਨ ਨਿਪਤਿ. ਇਦਂ ਪਨ ਥੇਰਸ੍ਸ ਪੁਬ੍ਬੇ ਕਤਕਮ੍ਮਂ,-ਥੇਰੋ ਹਿ ਤਤੋ ਅਤ੍ਤਭਾਵਤੋ ਸਤ੍ਤਮੇ ਭਵੇ ਏਕਸ੍ਮਿਂ ਗਾਮੇ ਕੁਲਦਾਰਕੋ ਹੁਤ੍ਵਾ ਕੀਲ਼ਨਤ੍ਥਾਯ ਏਕਂ ਸੁਨਖਂ ਨਦਿਯਂ ਓਤਾਰੇਤ੍ਵਾ ਉਦਕੇ ਕੀਲ਼ਮਾਪੇਸਿ. ਏਵਂ ਕੀਲ਼ਮਨ੍ਤਂ ਸੁਨਖਂ ਸਯਮੇਵ ਉਰੇਨ ਉਗ੍ਗਹੇਤ੍ਵਾ ਤੀਰਂ ਆਨੇਸੀਤਿ ਏਵਂ ਪੁਬ੍ਬੇ ਕਤਕਮ੍ਮਵਿਪਾਕਵਸੇਨ ਥੇਰਸ੍ਸੇਵ ਹਤ੍ਥੇ ਸਲਾਕਾ ਨਿਪਤਿ.

ਤਦਾ ਵਾਣਿਜਾ ਉਦਕਪਿਟ੍ਠੇ ਖਿਪਿਂਸੁ. ਅਥ ਸਕ੍ਕੋ ਦੇਵਾਨਮਿਨ੍ਦੋ ਕੁਮ੍ਭੀਲਰੂਪਂ ਮਾਪੇਤ੍ਵਾ ਪਿਟ੍ਠਿਯਂ ਆਰੋਪੇਤ੍ਵਾ ਆਨੇਸਿ. ਥੇਰੋ ਯਕ੍ਖਦੀਪਂ ਪਤ੍ਵਾ ਅਨ੍ਧਚਕ੍ਖੁਕਾਨਂ ਯਕ੍ਖਾਨਂ ਮੇਤ੍ਤਾਨੁਭਾਵੇਨ ਚਕ੍ਖੁਂ ਲਭਾਪੇਸਿ. ਯਕ੍ਖਾ ਚ ਥੇਰਸ੍ਸ ਗੁਣਂ ਞਤ੍ਵਾ ਦ੍ਵੇ ਯਕ੍ਖਭਾਤਿਕੇ ਅਦਂਸੁ. ਥੇਰੋ ਚ ਸੀਹਲ਼ਦੀਪਂ ਗਨ੍ਤ੍ਵਾ ਮਹਾਚੇਤਿਯਰੂਪਂ ਲੋਹਪਾਸਾਦਰੂਪਂ ਸਰੀਰਧਾਤੁਂ ਮਹਾਬੋਧਿਬਿਜਾਨਿ ਚ ਆਨੇਤ੍ਵਾ ਪਚ੍ਚਾਗਮਾਸੀਤਿ.

ਸੁਮੇਧਤ੍ਥੇਰੋ ਚ ਹਲਙ੍ਕਸ੍ਸ ਨਾਮ ਨਗਰਸ੍ਸ ਦਕ੍ਖਿਣਦਿਸਾਭਾਗੇ ਮ੍ਹਤ੍ਤਿਪਾਮੇ ਪੁਰਤ੍ਥਿਮਾਯ ਅਨੁਦਿਸਾਯ ਦਿਨ੍ਨਨਾਮਿਕੇ ਵਿਹਾਰੇ ਵਸਿ. ਠਾਨਸ੍ਸ ਪਨ ਨਾਮਵਸੇਨ ਥੇਰਸ੍ਸੋਪਿ ਦਿਨ੍ਨਵਿਹਾਰੋ ਤ੍ਵੇਵ ਨਾਮਂ ਅਹੋਸਿ. ਸੋਪਿ ਥੇਰੋ ਪਂਸੁਕੂਲਿਕੋ ਲਜ੍ਜੀਪੇਸਲੋ ਸਿਕ੍ਖਾਕਾਮੋ ਝਾਨਲਾਭੀ ਅਰਹਾਯੇਵ. ਸੋ ਹਿ ਦੇਵਸਿਕਂ ਦੇਵਸਿਕਂ ਅਟ੍ਠਨਵਯੋਜਨਪ੍ਪਮਾਣੇ ਪਾਦਚੇਤਿਯਂ ਗਨ੍ਤ੍ਵਾ ਵਨ੍ਦਿ. ਚੇਤਿਯਙ੍ਗਣਵਤ੍ਤਞ੍ਚ ਅਕਾਸਿ. ਤਤੋ ਆਗਨ੍ਤ੍ਵਾ ਮ੍ਹਤ੍ਤਿਗਾਮੇ ਪਿਣ੍ਡਾਯ ਚਰਿ. ਇਦਂ ਥੇਰਸ੍ਸ ਨਿਬਦ੍ਧਵਤ੍ਤਂ.

ਅਪਰਾਨਿਪਿ ਵਤ੍ਥੂਨਿ ਬਹੂਨਿ ਸਨ੍ਤਿ, ਸਬ੍ਬਾਨਿ ਪਨ ਤਾਨਿ ਵਿਤ੍ਥਾਰੇਤ੍ਵਾ ਵਤ੍ਤਬ੍ਬਾਨਿਪਿ ਗਨ੍ਥਪਾਰਵਭਯੇਨ ਨ ਵਕ੍ਖਾਮ. ਸਬ੍ਬਾਨਿਪਿ ਹਿ ਵੁਚ੍ਚਮਾਨਾਨਿ ਅਯਂ ਸਾਸਨਵਂਸਪ੍ਪਦੀਪਿਕਾ ਅਤਿਪ੍ਪਪਞ੍ਚਾ ਭਵਿਸ੍ਸਤਿ.

ਸਮ੍ਮਾਸਮ੍ਬੁਦ੍ਧਸ੍ਸ ਹਿ ਪਰਿਨਿਬ੍ਬਾਨਤੋ ਯਾਵਜ੍ਜਤਨਾ ਥੇਰਾਨਂ ਪਰਮ੍ਪਰਵਸੇਨ ਸਙ੍ਘਟ੍ਟੇਤ੍ਵਾ ਆਨਯਨਮੇਵੇਤ੍ਥ ਅਧਿਪ੍ਪੇਤਂ. ਯਥਾਵੁਤ੍ਤਾਨਿ ਪਨ ਵਤ੍ਥੂਨਿ ਅਧੁਨਾ ਅਭਿਞ੍ਞਾਲਾਭੀਨਂ ਪੁਗ੍ਗਲਾਨਂ ਅਖੇਤ੍ਤਭਾਵੇਨ ਪਸਙ੍ਗਞਾਣਪ੍ਪਟਿਬਾਹਣਤ੍ਥਂ ਅਰਿਮਦ੍ਦਨਨਗਰੇ ਚ ਬਹੂਨਂ ਅਭਿਞ੍ਞਾਲਾਭੀਨਂ ਪੁਗ੍ਗਲਾਨਂ ਨਿਵਾਸਟ੍ਠਾਨਤਾ ਦਸ੍ਸਨਤ੍ਥਂ ਵੁਤ੍ਤਾਨਿ. ਵੁਤ੍ਤਞ੍ਚੇਤਂ ਭਿਕ੍ਖੁਨੀਖਨ੍ਧਕਟ੍ਠਕਥਾਯਂ,–

ਪਟਿਸਮ੍ਭਿਦਾਪਤ੍ਤੇਹਿ ਵਸ੍ਸਸਹਸ੍ਸਂ ਸੁਕ੍ਖਵਿਪਸ੍ਸਕੇਹਿ ਵਸ੍ਸਸਹਸ੍ਸਂ ਅਨਾਗਾਮੀਹਿ ਵਸ੍ਸਸਹਸ੍ਸਂ ਸਕਦਾਗਾਮੀਹਿ ਵਸ੍ਸਸਹਸ੍ਸਂ ਸੋਤਾਪਨ੍ਨੇਹਿ ਵਸ੍ਸਸਹਸ੍ਸਨ੍ਤਿ ਏਵਂ ਪਞ੍ਚਵਸ੍ਸਸਹਸ੍ਸਾਨਿ ਪਟਿਵੇਧਧਮ੍ਮੋ ਠਸ੍ਸਤੀਤਿ.

ਦੀਘਨਿਕਾਯਟ੍ਠਕਥਾਯਂ ਪਨ ਸਂਯੁਤ੍ਤਨਿਕਾਯਟ੍ਠਕਥਾਯਞ੍ਚ ਪਟਿਸਮ੍ਭਿਦਾਪਤ੍ਤੇਹਿ ਵਸ੍ਸਸਹਸ੍ਸਂ ਛਲ਼ਾਭਿਞ੍ਞੇਹਿ ਵਸ੍ਸਸਹਸ੍ਸਂ ਤੇਵਿਜ੍ਜੇਹਿ ਵਸ੍ਸਸਹਸ੍ਸਂ ਸੁਕ੍ਖਵਿਪਸ੍ਸਕੇਹਿ ਵਸ੍ਸਸਹਸ੍ਸਂ ਪਾਤਿਮੋਕ੍ਖੇਨ ਵਸ੍ਸਸਹਸ੍ਸਨ੍ਤਿ ਵੁਤ੍ਤਂ.

ਅਙ੍ਗੁਤ੍ਤਰਨਿਕਾਯਟ੍ਠਕਥਾਯਂ ਪਨ ਵਿਭਙ੍ਗਕਥਾਯਞ੍ਚ ਬੁਦ੍ਧਾਨਂ ਪਰਿਨਿਬ੍ਬਾਨਤੋ ਵਸ੍ਸਸਹਸ੍ਸਮੇਵ ਪਟਿਸਮ੍ਭਿਦਾ ਨਿਬ੍ਬਤ੍ਤੇਤੁਂ ਸਕ੍ਕੋਨ੍ਤਿ, ਤਤੋ ਪਰਂ ਛ ਅਭਿਞ੍ਞਾ, ਤਤੋਪਿ ਅਸਕ੍ਕੋਨ੍ਤਾ ਤਿਸ੍ਸੋ ਵਿਜ੍ਜਾ ਨਿਬ੍ਬਤ੍ਤਿਂਸੁ. ਗਚ੍ਛਨ੍ਤੇ ਕਾਲੇ ਤਾਪਿ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤਾ ਸੁਕ੍ਖਵਿਪਸ੍ਸਕਾ ਹੋਨ੍ਤਿ. ਏਤੇਨੇਵ ਨਯੇਨ ਅਨਾਗਾਮਿਨੋ ਸਕਦਾਗਾਮਿਨੋ ਸੋਤਾਪਨ੍ਨਾਤਿ ਵੁਤ੍ਤਂ.

ਏਵਂ ਨਾਨਾਨਯੇਹਿ ਅਟ੍ਠਕਥਾਯਪਿ ਆਗਤਤ੍ਤਾ ਅਧੁਨਾ ਲੋਕੇ ਅਰਿਯਪੁਗ੍ਗਲਾ ਭਵਿਤੁਂ ਨ ਸਕ੍ਕਾਤਿ ਨ ਵਤ੍ਤਬ੍ਬਂ. ਅਰਿਯਾਨਮੇਵ ਖੇਤ੍ਤਸ੍ਸ ਅਧੁਨਾਪਿ ਸਮ੍ਭਵਤੋ, ਸਚੇ ਆਰਦ੍ਧਵਿਪਸ੍ਸਕੋ ਭਵੇਯ੍ਯ ਸੋ ਅਰਹਾ ਭਵਿਤੁਂ ਸਕ੍ਕਾਯੇਵਾਤਿ ਨਿਟ੍ਠਮੇਤ੍ਥਾਵਗਨ੍ਤਬ੍ਬਂ. ਅਟ੍ਠਕਥਾਸੁ ਪਨ ਨਾਨਾਭਾਣਕਤ੍ਥੇਰਾਨਂ ਨਾਨਾਵਾਦਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਤ੍ਤਕੇਨੇਵ ਪਨ ਨਾਨਾਕਾਰੇਨ ਵਾਦੋ ਭਿਨ੍ਨੋਪਿ ਸਾਸਨਂ ਭਿਜ੍ਜਤਿਯੇਵ. ਸਾਸਨਸ੍ਸ ਅਭਿਨ੍ਨਂਯੇਵ ਹਿ ਏਤ੍ਥ ਪਮਾਣਨ੍ਤਿ.

ਏਵਂ ਮਰਮ੍ਮਮਣ੍ਡਲੇ ਅਰਿਮਦ੍ਦਨਨਗਰੇ ਅਨੇਕੇਹਿ ਅਰਹਨ੍ਤਸਤੇਹਿ ਸਾਸਨਂ ਵਿਜ੍ਜੋਤਤਿ. ਭਗਵਤੋ ਪਨ ਪਰਿਨਿਬ੍ਬਾਨਤੋ ਤਿਂਸਾਧਿਕਾਨਂ ਨਵਵਸ੍ਸਸਤਾਨਂ ਉਪਰਿ ਪਰਮ੍ਮਰਟ੍ਠੇ ਸੇਞਿਲਞ੍ਞਿਕ੍ਰੋਧਿਨਾਮੇਨ ਰਞ੍ਞਾ ਸਮਕਾਲਵਸੇਨ ਸੀਹਲ਼ਦੀਪੇ ਰਜ੍ਜਂ ਪਤ੍ਤਸ੍ਸ ਮਹਾਨਾਮਰਞ੍ਞੋ ਕਾਲੇ ਬੁਦ੍ਧਘੋਸਬੁਦ੍ਧਦਤ੍ਤਤ੍ਥੇਰੇਹਿ ਪਭੁਤਿ ਤੇਤੇਮਹਾਥੇਰਾ ਤੇਤੇਗਨ੍ਥੇ ਅਕਂਸੁ.

ਤਤੋ ਪਚ੍ਛਾ ਸਤਿਸਮਾਧਿਪਞ੍ਞਾਮਨ੍ਦਵਸੇਨ ਸੁਖਾਵਬੋਧਨਤ੍ਥਂ ਟੀਕਾਯੋ ਅਕਂਸੁ. ਅਰਿਮਦ੍ਦਨਨਗਰੇ ਜਿਨਚਕ੍ਕੇਸਤ੍ਤਨਵੁਤਾਧਿਕੇ ਛਸਤੇ ਸਹਸ੍ਸੇ ਚ ਸਮ੍ਪਤ੍ਤੇ ਤਿਣ੍ਣਂ ਪਿਟਕਾਨਂ ਮੂਲਭੂਤੇਸੁ ਸਦ੍ਦਨਯੇਸੁ ਸੋਤਾਰਾਨਂ ਛੇਕਤ੍ਥਾਯ ਮਹਾਸਮੁਦ੍ਦੇਵਿਯ ਆਨਨ੍ਦੋ ਨਾਮ ਮਹਾਮਚ੍ਛੋ ਤੀਸੁ ਪਿਟਕੇਸੁ ਸਾਟ੍ਠਕਥੇਸੁ ਵਿਲੋਲੇਤ੍ਵਾ ਅਗ੍ਗਵਂਸੋ ਨਾਮ ਥੇਰੋ ਸਦ੍ਦਨੀਤਿਪ੍ਪਕਰਣਂ ਅਕਾਸਿ. ਅਰਿਮਦ੍ਦਨਨਗਰੇ ਹਿ ਉਤ੍ਤਰਾਜੀਵਤ੍ਥੇਰਾਦੀਨਂ ਸੀਹਲ਼ਦੀਪਂ ਗਮਨਤੋ ਪੁਬ੍ਬੇਯੇਵ ਤਯੋ ਮਹਾਥੇਰਾ ਪਰਿਯਤ੍ਤਿਵਿਸਾਰਦਾ, ਮਹਾਅਗ੍ਗਪਣ੍ਡਿਤੋ, ਤਸ੍ਸ ਸਦ੍ਧਿਵਿਹਾਰਿਕੋ ਦੁਤਿਯਅਗ੍ਗਪਣ੍ਡਿਤੋ, ਤਸ੍ਸ ਭਾਗਿਨੇਯ੍ਯੋ ਤਤਿਯਅਗ੍ਗਪਣ੍ਡਿਤੋਤਿ. ਤਤਿਯਅਗ੍ਗਪਣ੍ਡਿਤੋ ਪਨ ਅਗ੍ਗਵਂਸੋਤਿਪਿ ਵੋਹਾਰਿਯਤਿ.

ਤਸ੍ਮਿਞ੍ਚ ਕਾਲੇ ਅਰਿਮਦ੍ਦਨਨਗਰਵਾਸਿਨੋ ਸਦ੍ਦਕੋਵਿਦਾ ਬਹਵੋ ਸਨ੍ਤੀਤਿ ਯਾਵ ਲਙ੍ਕਾਦੀਪਾ ਕਿਤ੍ਤਿਘੋਸੋ ਪਤ੍ਥਰਿ. ਤਸ੍ਮਾ ਸੀਹਲ਼ਦੀਪਿਕਾ ਸਦ੍ਦਕੋਵਿਦਾ ਵੀਮਂਸੇਤੁਕਾਮਾ ਹੁਤ੍ਵਾ ਅਰਿਮਦ੍ਦਨਨਗਰਂ ਆਗਮਂਸੁ. ਤਦਾ ਅਰਿਮਦ੍ਦਨਨਗਰਵਾਸਿਨੋ ਭਿਕ੍ਖੂ ਸਦ੍ਦਨੀਤਿਪ੍ਪਕਰਣਂ ਦਸ੍ਸੇਸੁ.

ਸੀਹਲ਼ਦੀਪਿਕਾ ਚ ਤਂ ਦਿਸ੍ਵਾ ਉਪਧਾਰੇਨ੍ਤਾ ਸਦ੍ਦਵਿਸਯੇ ਅਯਂ ਗਨ੍ਥੋਵਿਯ ਸੀਹਲ਼ਦੀਪੇ ਗਨ੍ਥੋ ਇਤ੍ਥਿ, ਇਮਸ੍ਮਿਂ ਪਕਰਣੇ ਆਗਤਵਿਨਿਚ੍ਛਯਮ੍ਪਿ ਸਕਲਂ ਨ ਜਾਨਿਮ੍ਹਾਤਿ ਨਾਨਾਪ੍ਪਕਾਰੇਹਿ ਥੋਮੇਸੁਨ੍ਤਿ ਯਾਵਜ੍ਜਭਨਾ ਕਥਾਮਗ੍ਗੋ ਨ ਉਪਚ੍ਛਿਨ੍ਨੋਤਿ.

ਅਰਿਮਦ੍ਦਨਨਗਰੇ ਸੀਹਲ਼ਦੀਪਂ ਗਨ੍ਤ੍ਵਾ ਪਚ੍ਚਾਗਤੋ ਛਪ੍ਪਦੋ ਨਾਮ ਸਦ੍ਧਮ੍ਮਜੋਤਿਪਾਲਤ੍ਥੇਰੋ ਸਦ੍ਦਨਯੇ ਛੇਕਤਾਯ ਸੁਤ੍ਤਨਿਦ੍ਦੇਸਂ ਅਕਾਸਿ. ਪਰਮਤ੍ਥਧਮ੍ਮੇ ਚ ਛੇਕਤਾਯ ਸਙ੍ਖੇਪਵਣ੍ਣਨਂ ਨਾਮਚਾਰਦੀਪਕਞ੍ਚ. ਵਿਨਯੇ ਛੇਕਤਾਯ ਵਿਨਯਗੂਲ਼ਤ੍ਥਦੀਪਨਿਂ ਸੀਮਾਲਙ੍ਕਾਰਞ੍ਚ ਅਕਾਸਿ. ਅਤ੍ਤਨਾ ਕਥਾਨਂ ਗਨ੍ਥਾਨਂ ਨਿਗਮੇ ਸਦ੍ਧਮ੍ਮ ਜੋਤਿਪਾਲੋਤਿ ਮੂਲਨਾਮੇਨ ਵੁਤ੍ਤਂ. ਕੁਸਿਮਨਗਰੇ ਪਨ ਛਪ੍ਪਦ ਗਾਮੇ ਜਾਤਤ੍ਤਾ ਠਾਨਸ੍ਸ ਨਾਮੇਨ ਛਪ੍ਪਦੋਤਿ ਪਾਕਟੋ.

ਕੁਖਨਨਗਰੇ ਪਨ ਛਪ੍ਪਦੋਤਿ ਵੋਹਾਰਿਤੋਪਿ ਏਕੋ ਥੇਰੋ ਅਤ੍ਥਿ. ਸੋ ਅਲਜ੍ਜੀ ਦੁਸ੍ਸੀਲੋ. ਏਕਚ੍ਚੇ ਪਨ ਨਾਮਸਾਮਞ੍ਞਲੇਸਮਤ੍ਤੇਨ ਪਤ੍ਤਲਙ੍ਕਂ ਸੀਲਵਨ੍ਤਂ ਪੇਸਲਂ ਸਿਕ੍ਖਾਕਾਮਂ ਛਪ੍ਪਦਤ੍ਥੇਰਂ ਅਲਜ੍ਜਿਦੁਸ੍ਸੀਲਭਾਵੇਨ ਉਪਵਦਨ੍ਤਿ, ਯਥਾ ਨਾਮ ਸਾਮਞ੍ਞਲੇਸਮਤ੍ਤੇਨ ਮਲ੍ਲਪੁਤ੍ਤਂ ਆਯਸ੍ਮਨ੍ਤਂ ਦਬ੍ਬਂ ਅਸਮਾਚਾਰੇਨਾਤਿ.

ਅਰਿਮਦ੍ਦਨਨਗਰਯੇਵ ਅਲੋਙ੍ਗਚਞ੍ਞਿਸੂਨਾਮਕਸ੍ਸ ਰਞ੍ਞੋ ਕਾਲੇ ਮਹਾਵਿਮਲਬੁਦ੍ਧਿਤ੍ਥੇਰੋ ਚੂਲ਼ਵਿਮਲਬੁਦ੍ਧਿਤ੍ਥੇਰੋਤਿ ਦ੍ਵੇ ਥੇਰਾ ਪਰਿਯਤ੍ਤਿਵਿਸਾਰਦਾ ਅਹੇਸੁਂ. ਤੇਸੁ ਮਹਾਵਿਮਲਬੁਦ੍ਧਿਤ੍ਥੇਰੋ ਕਚ੍ਚਾਯਨਸ੍ਸ ਸਂਵਣ੍ਣਨਂ ਨ੍ਯਾਸਗਨ੍ਥਮਕਾਸਿ.

ਕੇਚਿ ਪਨ ਸੀਹਲ਼ਦੀਪਵਾਸੀ ਵਿਮਲਬੁਦ੍ਧਿਤ੍ਥੇਰੋ ਤਮਕਾਸੀਤਿ ਵਦਨ੍ਤਿ. ਚੂਲ਼ਵਿਮਲਬੁਦ੍ਧਿਤ੍ਥੇਰੋ ਪਨ ਵੁਤ੍ਤੋਦਯਸ੍ਸ ਪੋਰਾਣਟੀਕਮਕਾਸਿ. ਛਨ੍ਦੋਸਾਰਤ੍ਥਵਿਕਾਸਿਨਿਂ ਸਦ੍ਧਮ੍ਮਞਾਣਤ੍ਥੇਰੋ ਅਕਾਸਿ. ਵਚਨਤ੍ਥਜੋਤਿਂ ਪਨ ਵੇਪੁਲ੍ਲਤ੍ਥੇਰੋ ਅਕਾਸਿ. ਨ੍ਯਾਸਗਨ੍ਥਸ੍ਸਪੋਰਾਣਟੀਕਂ ਨਰਪਤਿਰਞ੍ਞੋ ਕਾਲੇ ਏਕੋ ਅਮਚ੍ਚੋ ਅਕਾਸਿ.

ਸੋ ਹਿ ਰਞ੍ਞੋ ਏਕਂ ਓਰੋਧਂ ਪਟਿਚ੍ਚ ਜਾਤਂ ਏਕਂ ਧੀਤਰਂ ਦਿਸ੍ਵਾ ਵਾਨਰੋਵਿਯ ਲੇਪੇ ਲਗ੍ਗਿਤੋ ਤਿਸ੍ਸਂ ਪਟਿਬਨ੍ਧਚਿਤ੍ਤੋ ਹੁਤ੍ਵਾ ਲਗ੍ਗਿ. ਤਮਤ੍ਥਂ ਜਾਨਿਤ੍ਵਾ ਰਾਜਾ ਏਵਮਾਹ,– ਸਚੇ ਏਤਂ ਇਚ੍ਛੇਯ੍ਯਾਸਿ, ਏਕਂ ਗਨ੍ਥਂ ਪਰਿਪੁਣ੍ਣਵਿਨਿਚ੍ਛਯਂ ਗੂਲ਼ਤ੍ਥਂ ਕਰੋਹਿ, ਸਚੇ ਤ੍ਵਂ ਤਾਦਿਸਂ ਗਨ੍ਥਂ ਕਾਤੁਂ ਸਕ੍ਕੁਣੇਯ੍ਯਾਸਿ, ਏਤਂ ਲਭਿਸ੍ਸਸੀਤਿ. ਅਥ ਸੋ ਨ੍ਯਾਸਸ੍ਸ ਸਂਵਣ੍ਣਨਂ ਪੋਰਾਣਟੀਕਂ ਅਕਾਸਿ.

ਤਤੋ ਪਚ੍ਛਾ ਹੀਨਾਯਾਵਤ੍ਤਿਤ੍ਵਾ ਧੀਤਰਂ ਦਤ੍ਵਾ ਰਜ੍ਜੁਗ੍ਗਾਹਾਮਚ੍ਚਟ੍ਠਾਨੇ ਠਪੇਸਿ, ਯਂ ਮਰਮ੍ਮਵੋਹਾਰੇਨ ਸਂਪ੍ਯਙ੍ਗਇਤਿ ਵੁਚ੍ਚਤਿ. ਤੇਨ ਪਨ ਕਤਤ੍ਤਾ ਸੋਪਿ ਗਨ੍ਥੋ ਤਂ ਨਾਮੇਨ ਵੁਚ੍ਚਤਿ. ਕਾਰਿਕਂ ਤਸ੍ਸਾ ਚ ਸਂਵਣ੍ਣਨਂ ਛਤ੍ਤਗੁਹਿਨ੍ਦਸ੍ਸ ਨਾਮ ਰਞ੍ਞੋ ਕਾਲੇਧਮ੍ਮਸੇਨਾਪਤਿਤ੍ਥੇਰੋ ਅਕਾਸਿ. ਤੇਨ ਕਿਰ ਕਾਰਪਿਤੇ ਨਨ੍ਦਗੁਹਾਯ ਸਮੀਪੇ ਨਨ੍ਦਵਿਹਾਰੇ ਨਿਸੀਦਿਤ੍ਵਾ ਅਕਾਸਿ.

ਤਸ੍ਮਿਞ੍ਚਕਾਲੇ ਗਨ੍ਥਮਾਦਨਪਬ੍ਬਤੇ ਨਨ੍ਦਮੂਲਗੁਹਤੋ ਅਰਹਨ੍ਤਾ ਆਗਨ੍ਤ੍ਵਾ ਤਸ੍ਮਿਂ ਵਿਹਾਰੇ ਵਸ੍ਸਂ ਉਪਗਚ੍ਛਿਂਸੁ. ਤੇਸਂ ਸਮ੍ਮੁਖੇ ਕਤਤ੍ਤਾ ਤੇ ਚ ਗਨ੍ਥਾ ਪਣ੍ਡਿਤੇਹਿ ਸਾਰਤੋ ਪਚ੍ਚੇਤਬ੍ਬਾਤਿ ਆਚਰਿਯਾ ਵਦਨ੍ਤਿ.

ਵਾਚ੍ਚਵਾਚਕਂ ਪਨ ਧਮ੍ਮਦਸ੍ਸੀ ਨਾਮ ਸਾਮਣੇਰੋ ਅਕਾਸਿ.

ਸਦ੍ਦਤ੍ਥਭੇਦਚਿਨ੍ਤਂ ਪਨ ਅਰਿਮਦ੍ਦਨਨਗਰਸਮੀਪੇ ਠਿਤਸ੍ਸ ਖਣਿਤ੍ਤਿਪਾਦਪਬ੍ਬਤਸ੍ਸ ਸਮੀਪੇ ਏਕਸ੍ਮਿਂ ਗਾਮੇ ਵਸਨ੍ਤੋ ਸਦ੍ਧਮ੍ਮਸਿਰਿ ਨਾਮ ਥੇਰੋ ਅਕਾਸਿ. ਸੋਯੇਵ ਥੇਰੋ ਬ੍ਰਹਜਂ ਨਾਮ ਵੇਦਸਤ੍ਥਮ੍ਪਿ ਮਰਮ੍ਮਭਾਸਾਯ ਪਰਿਵਤ੍ਤੇਸਿ.

ਏਕਕ੍ਖਰਕੋਸਂ ਪਨ ਸਦ੍ਧਮ੍ਮਕਿਤ੍ਤਿਤ੍ਥੇਰੋ ਅਕਾਸਿ. ਸੋ ਹਿ ਕਲਿਯੁਗੇ ਸਤ੍ਤਾਸੀਤਾਧਿਕੇ ਅਟ੍ਠਸਤੇ ਸਮ੍ਪਤ੍ਤੇ ਮਿਚ੍ਛਾ ਦਿਟ੍ਠਿਕਾਨਂ ਜਲੁਮਸਞ੍ਞਿਤਾਨਂ ਕੁਲਾਨਂ ਭਯੇਨ ਸਕਲੇਪਿ ਤਮ੍ਬਦੀਪਰਟ੍ਠੇ ਸਾਸਨੋਭਾਸੋ ਮਿਲਾਯਤਿ. ਬਹੂਨਿਪਿ ਪੋਤ੍ਥਕਾਨਿ ਅਗ੍ਗਿਭਯੇਨ ਨਸ੍ਸੇਸੁਂ.

ਤਦਾ ਤਂ ਪਵਤ੍ਤਿਂ ਪਸ੍ਸਿਤ੍ਵਾ ਸਚੇ ਪਰਿਯਤ੍ਤਿਧਮ੍ਮੋਵਿਨਸ੍ਸੇਯ੍ਯ, ਪਟਿਪਤ੍ਤਿਧਮ੍ਮੋਪਿ ਨਸ੍ਸਿਸ੍ਸਤਿ, ਪਟਿਪਤ੍ਤਿਧਮ੍ਮੇ ਨਸ੍ਸਨ੍ਤੇ ਕੁਤੋ ਪਟਿਵੇਧਧਮ੍ਮੋ ਭਵਿਸ੍ਸਤੀਤਿ ਸਂਵੇਗਂ ਅਪਜ੍ਜਿਤ੍ਵਾ ਇਮਂ ਗਨ੍ਥਂ ਅਕਾਸੀਤਿ ਤਟ੍ਟਿਕਾਯਂ ਵੁਤ੍ਤਂ.

ਮੁਖਮਤ੍ਤਸਾਰਂ ਸਾਗਰਤ੍ਥੇਰੋ ਅਕਾਸਿ.

ਕਲਿਯੁਗੇ ਏਕਾਸੀਤਾਧਿਕੇ ਪਞ੍ਚਸਤੇ ਸਮ੍ਪਤ੍ਤੇ ਏਕਂ ਦਹਰਪੁਤ੍ਤਂ ਕਾਲਙ੍ਕਤਂ ਪਟਿਚ੍ਚ ਸਂਵੇਗਂ ਆਪਜ੍ਜਿਤ੍ਵਾ ਪਚ੍ਚੇਕਬੁਦ੍ਧਤ੍ਤਂ ਪਤ੍ਥਯਨ੍ਤਸ੍ਸ ਜੇਯ੍ਯਸਿਙ੍ਖਨਾਮਕਸ੍ਸ ਰਞ੍ਞੋ ਪੁਤ੍ਤੋ ਕ੍ਯਚ੍ਵਾਨਾਮਕੋ ਰਾਜਾ ਰਜ੍ਜਂ ਕਾਰੇਸਿ. ਧਮ੍ਮਰਾਜਾਤਿਪਿ ਨਾਮਲਞ੍ਛਂ ਪਟਿਗ੍ਗਣ੍ਹਿ. ਤੀਸੁ ਪਨ ਪਿਟਕੇਸੁ ਯਥਾਭੂਤਂ ਵਿਜਾਨਕਤਾਯ ਮਰਮ੍ਮਵੋਹਾਰੇਨ ਕ੍ਯਚ੍ਵਾਤਿ ਵੋਹਾਰਿਯਤਿ.

ਸੋ ਚ ਕਿਰ ਰਾਜਾ ਪਾਲ਼ਿਅਟ੍ਠਕਥਾਟੀਕਾਗਨ੍ਥਨ੍ਤਰੇਸੁ ਅਤਿਛੇਕਤਾਯ ਪਿਟਕਤ੍ਤਯੇ ਸਾਕਚ੍ਛਮਤ੍ਤਮ੍ਪਿ ਕਾਤੁਂ ਸਮਤ੍ਥੋ ਨਾਮ ਨਤ੍ਥੀਤਿ ਉਗ੍ਗਹਿਤਤਿਪਿਟਕੋ ਹੁਤ੍ਵਾ ਭਿਕ੍ਖੁਸਙ੍ਘਮ੍ਪਿ ਦਿਵਸੇ ਸਤ੍ਤਹਿ ਵਾਰੇਹਿ ਗਨ੍ਥਂ ਵਾਚੇਤਿ.

ਖਣਿਤ੍ਤਿਪਾਦਪਬ੍ਬਤਸ੍ਸ ਸਮੀਪੇਪਿ ਏਕਂ ਤਲ਼ਾਕਂ ਕਾਰਾਪੇਤ੍ਵਾ ਤਤ੍ਥ ਰਾਜਾਗਾਰਂ ਕਾਰਾਪੇਤ੍ਵਾ ਤਤ੍ਥ ਨਿਸੀਦਿਤ੍ਵਾ ਗਨ੍ਥਂ ਵਾਚੇਤਿ. ਸਬ੍ਬਾਨਿ ਪਨ ਰਾਜੂਨਂ ਕਿਚ੍ਚਾਨਿ ਪੁਤ੍ਤਸ੍ਸੇਵ ਉਪਰਾਜਸ੍ਸ ਨਿਯ੍ਯਾਦੇਸਿ. ਗਨ੍ਥਂ ਉਗ੍ਗਣ੍ਹਨ੍ਤਾਨਂ ਓਰੋਧਾਨਮਤ੍ਥਾਯ ਸਙ੍ਖੇਪਤੋ ਸਦ੍ਦਬਿਨ੍ਦੁਂ ਨਾਮ ਪਕਰਣਂ ਪਰਮਤ੍ਥਬਿਨ੍ਦੁਞ੍ਚ ਨਾਮ ਪਕਰਣਂ ਅਕਾਸਿ. ਤਸ੍ਸ ਹਿ ਚਿਤ੍ਤਂ ਪਰਿਯਤ੍ਤਿਯਂਯੇਵ ਰਮਤਿ. ਅਞ੍ਞਂ ਪਨ ਰਾਜਕਿਚ੍ਚਂ ਸੁਣਿਤੁਮ੍ਪਿ ਨ ਇਚ੍ਛਿ. ਅਨੁਰੁਦ੍ਧਰਾਜਾ ਅਨਾਗਤੇ ਅਹਂ ਰਾਜਾ ਭਵੇਯ੍ਯਾਮਿ, ਤਦਾਯੇਵ ਇਮਾਨਿ ਤਾਲ਼ਿਬੀਜਾਨਿ ਉਟ੍ਠਹਨ੍ਤੂਤਿ ਅਧਿਟ੍ਠਹਿਤ੍ਵਾ ਰੋਪੇਸਿ. ਤਾਨਿ ਤਸ੍ਸ ਰਞ੍ਞੋ ਕਾਲੇ ਉਟ੍ਠਹਿਂਸੁ. ਤੇਨੇਵ ਅਨੁਰੁਦ੍ਧਰਾਜਾਯੇਵਾਯਨ੍ਤਿ ਰਟ੍ਠਵਾਸਿਨੋ ਸਞ੍ਜਾਨਿਂਸੁ. ਸਮ੍ਮੁਤਿਰਾਜਾ ਹਿ ਅਨੁਰੁਦ੍ਧਰਾਜਾ ਕ੍ਯਚ੍ਵਾਰਾਜਾਤਿ ਇਮੇ ਤਯੋ ਏਕਸਨ੍ਤਾਨਾਤਿ ਵਦਨ੍ਤਿ.

ਸੋ ਰਾਜਾ ਏਕਮ੍ਪਿ ਚੇਤਿਯਂ ਅਕਾਸਿ, ਨ ਤਂ ਨਿਟ੍ਠਂ ਅਗਮਾਸਿ, ਪਰਿਯਤ੍ਤਿਯਂਯੇਵ ਪਰਿਚਾਰਕਤ੍ਤਾਤਿ ਰਾਜਵਂਸੇ ਆਗਤਂ. ਲੋਕਸਮ੍ਮੁਤਿਵਸੇਨ ਕਕ੍ਖਲ਼ਦਿਨੇ ਇਟ੍ਠਕਾਨਿ ਕਾਰਾਪੇਤ੍ਵਾ ਤਸ੍ਮਿਂਯੇਵ ਦਿਨੇ ਭੂਮਿਸਮਂ ਕਤ੍ਵਾ ਤਸ੍ਮਿਂਯੇਵ ਦਿਨੇ ਅਞ੍ਞਮ੍ਪਿ ਸਬ੍ਬਂ ਕਾਰਾਪੇਸਿ. ਤੇਨ ਮਰਮ੍ਮਵੋਹਾਰੇਨ ਪ੍ਰਸ੍ਸਦਾ ਚੇਤਿਯਨ੍ਤਿ ਯਾਵਜ੍ਜਭਨਾ ਪਾਕਟਂ.

ਤਸ੍ਸ ਰਞ੍ਞੋ ਏਕਾ ਧਿਭਾ ਵਿਭਤ੍ਯਤ੍ਥਂ ਨਾਮ ਗਨ੍ਥਂ ਅਕਾਸੀਤਿ.

ਪੁਬ੍ਬੇ ਕਿਰ ਅਰਿਮਦ੍ਦਨਨਗਰੇ ਉਗ੍ਗਹਧਾਰਣਾਦਿਵਸੇਨ ਸਾਸਨਂ ਅਤਿਵਿਯ ਵਿਰੂਲ਼ਮਾਪਜ੍ਜਿ. ਅਰਿਮਦ੍ਦਨਨਗਰੇਯੇਵ ਹਿ ਏਕੋ ਵੁਡ੍ਢਪਬ੍ਬਜਿਤੋ ਭਿਕ੍ਖੁ ਗਨ੍ਥਂ ਲਿਖਿਤੁਂ ਸਿਲਾਲੇਖਨਦਣ੍ਡੇਨ ਇਚ੍ਛਨ੍ਤੋ ਰਾਜਗੇਹਂ ਪਾਵਿਸਿ. ਰਾਜਾ ਕੇਨ ਆਗਤੋਸੀਤਿ ਪੁਚ੍ਛਿ. ਗਨ੍ਥਂ ਲਿਖਿਤੁਂ ਸਿਲਾਲੇਖਨਦਣ੍ਡੇਨ ਇਚ੍ਛਨ੍ਤੋ ਆਗਤੋ ਮ੍ਹੀਤਿ. ਏਵਂ ਮਹਲ੍ਲਕੋ ਤ੍ਵਂ ਗਨ੍ਥਂ ਮਹੁਸ੍ਸਾਹੇਨ ਪਰਿਯਾਪੁਣਨ੍ਤੋਪਿ ਗਨ੍ਥੇਸੁ ਛੇਕਸ੍ਸ ਓਕਾਸਂ ਨ ਪਸ੍ਸਾਮਿ, ਸਚੇ ਹਿਮੁਸਲੋ ਅਙ੍ਕੁਰਂ ਉਟ੍ਠਾਪੇਤ੍ਵਾ ਰੂਹੇਯ੍ਯ, ਏਵਂ ਸਤਿ ਤ੍ਵਂ ਗਨ੍ਥੇਸੁ ਛੇਕਤਂ ਆਪਜ੍ਜੇਯ੍ਯਾਸੀਤਿ ਆਹ.

ਤਤੋ ਪਚ੍ਛਾ ਵਿਹਾਰਂ ਗਨ੍ਤ੍ਵਾ ਦੇਵਸਿਕਂ ਦੇਵਸਿਕਂ ਏਕਦਨ੍ਤਕਟ੍ਠਪ੍ਪਮਾਣਤ੍ਤਂ ਲੇਖਨਂ ਉਗ੍ਗਹੇਤ੍ਵਾ ਕਚ੍ਚਾਯਨਅਭਿਧਮ੍ਮੇਤ੍ਥਸਙ੍ਗਹਪ੍ਪਕਰਣਂ ਆਦਿਂ ਕਤ੍ਵਾ ਆਚਰਿਯਸ੍ਸ ਸਨ੍ਤਿਕੇ ਉਗ੍ਗਣ੍ਹਿ. ਸੋ ਅਚਿਰੇਨੇਵ ਗਨ੍ਥੇਸੁ ਛੇਕਤਂ ਪਤ੍ਵਾ ਮੁਸਲੇ ਜਮ੍ਬੁਰੁਕ੍ਖਙ੍ਕੁਰਂ ਬਨ੍ਧਿਤ੍ਵਾ ਉਸ੍ਸਾਪੇਤ੍ਵਾ ਰਾਜਗੇਹਂ ਪਾਵਿਸਿ.

ਅਥ ਤਂ ਰਾਜਾ ਪੁਚ੍ਛਿ,-ਕੇਨਆਗਤੋਸੀਤਿ. ਅਯਂ ਮਹਾਰਜ ਮੁਸਲੋ ਅਙ੍ਕੁਰਂ ਉਟ੍ਠਾਪੇਤ੍ਵਾ ਰੂਹਤੀਤਿ ਆਚਿਕ੍ਖਿਤੁਂ ਆਗਤੋਮ੍ਹੀਤਿ ਵੁਤ੍ਤੇ ਰਾਜਾ ਏਤਸ੍ਸ ਗਨ੍ਥੇਸੁ ਛੇਕਤਂ ਪਤ੍ਤੋਮ੍ਹੀਤਿ ਵੁਤ੍ਤਂ ਹੋਤੀਤਿ ਜਾਨਾਸਿ. ਤਂ ਸਚ੍ਚਂ ਵਾ ਅਲਿਕਂ ਵਾਤਿ ਵੀਮਂਸਨਤ੍ਥਾਯ ਮਹਾਥੇਰਾਨਂ ਸਨ੍ਤਿਕਂ ਪਹਿਣਿ. ਮਹਾਥੇਰਾਪਿ ਗੂਲ਼ਟ੍ਠਾਨਂ ਪੁਚ੍ਛਿਂਸੁ. ਸੋਪਿ ਪੁਚ੍ਛਿਤਂ ਪੁਚ੍ਛਿਤਂ ਬ੍ਯਾਕਾਸਿ.

ਅਥ ਸੋ ਭਿਕ੍ਖੁ ਮਹਾਥੇਰੇ ਏਵਮਾਹ,-ਤੁਮ੍ਹੇ ਭਨ੍ਤੇ ਮਂ ਬਹੂ ਪੁਚ੍ਛਥ, ਅਹਮ੍ਪਿ ਤੁਮ੍ਹੇ ਪੁਚ੍ਛਿਤੁਂ ਇਚ੍ਛਾਮਿ, ਓਕਾਸਂ ਦੇਥਾਤਿ ਯਾਚਿਤ੍ਵਾ ਅਞ੍ਞਸਮਾਨਚੇਤਸਿਕਨ੍ਤਿ ਏਤ੍ਥ ਅਞ੍ਞਸਦ੍ਦਸ੍ਸ ਅਵਧ੍ਯਾਪੇਕ੍ਖਤ੍ਤਾ ਅਵਧਿਪਦਂ ਉਦ੍ਧਰਿਤ੍ਵਾ ਦਸ੍ਸੇਥਾਤਿ ਪੁਚ੍ਛਿ. ਮਹਾਥੇਰਾਪਿ ਪੁਬ੍ਬੇ ਅਮਨਸਿਕਤਤ੍ਤਾ ਸੀਘਂ ਵਿਸ੍ਸਜ੍ਜਿਤੁਂ ਨ ਸਕ੍ਖਿਂਸੁ. ਰਾਜਾ ਤਮਤ੍ਥਂ ਸੁਤ੍ਵਾ ਤੁਟ੍ਠਚਿਤ੍ਤੋ ਹੁਤ੍ਵਾ ਦਿਸਾ ਪਾਮੋਕ੍ਖਨਮੇਨ ਆਚਰਿਯਟ੍ਠਾਨੇ ਠਪੇਸਿ. ਸੋ ਪਨ ਭਿਕ੍ਖੁ ਅਗਨ੍ਥਕਾਰਕੋਪਿ ਗਨ੍ਥਕਾਰਕੋਵਿਯ ਪਚ੍ਛਿਮਾਨਂ ਜਨਤਾਨਂ ਦਿਨ੍ਨੋਪਦੇਸਵਸੇਨ ਉਪਕਾਰਂ ਕਤ੍ਵਾ ਸਾਸਨੇ ਉਪ੍ਪਜ੍ਜੀਤਿ. ਹੋਨ੍ਤਿ ਚੇਤ੍ਥ,–

ਅਹਂ ਮਹਲ੍ਲਕੋ ਹੋਮਿ, ਦੁਪ੍ਪਞ੍ਞੋ ਪਰਿਯਤ੍ਤਿਕਂ;

ਉਗ੍ਗਹਂ ਮਹੁਸ੍ਸਾਹੇਨ, ਨ ਸਕ੍ਖਿਸ੍ਸਾਮਿ ਜਾਨਿਤੁਂ.

ਏਵਞ੍ਚ ਨਾਤਿਮਞ੍ਞੇਯ੍ਯ,

ਨਾਪ੍ਪੋਸ੍ਸੁਕ੍ਕਤਮਾਪਜ੍ਜੇ;

ਸਦ੍ਧਮ੍ਮੇ ਛੇਕਕਾਮੋਵ,

ਉਸ੍ਸਾਹਂਵ ਕਰੇ ਪੋਸੋ.

ਵੁਡ੍ਢਪਬ੍ਬਜਿਤੋ ਭਿਕ੍ਖੁ,

ਮਹਲ੍ਲਕੋਪਿ ਦੁਪ੍ਪਞ੍ਞੋ;

ਆਪਜ੍ਜਿ ਛੇਕਤਂ ਧਮ੍ਮੇ,

ਤਮਪੇਕ੍ਖਨ੍ਤੁ ਸੋਤਾਰੋਤਿ.

ਪੁਬ੍ਬੇ ਕਿਰ ਅਰਿਮਦ੍ਦਨਨਗਰੇ ਮਾਤੁਗਾਮਾਪਿ ਗਨ੍ਥਂ ਉਗ੍ਗਣ੍ਹਿਂਸੁ. ਯੇਭੁਯ੍ਯੇਨ ਉਗ੍ਗਹਧਾਰਣਾਦਿਵਸੇਨ ਪਰਿਯਤ੍ਤਿਸਾਸਨਂ ਪਗ੍ਗਹੇਸੁਂ. ਮਾਤੁਗਾਮਾ ਹਿ ਅਞ੍ਞਮਞ੍ਞਂ ਪਸ੍ਸਨ੍ਤਾ ਤੁਮ੍ਹੇ ਕਿਤ੍ਤਕਂ ਗਨ੍ਥਂ ਉਗ੍ਗਣ੍ਹਥ, ਕਿਤ੍ਤਕਂ ਗਨ੍ਥਂ ਵਾਚੁਗ੍ਗਤਂ ਕਰੋਥਾਤਿ ਪੁਚ੍ਛਿ ਸੁਨ੍ਤਿ.

ਏਕੋ ਕਿਰ ਮਾਤੁਗਾਮੋ ਏਕਂ ਮਾਤੁਗਾ,ਮਂ ਪੁਚ੍ਛਿ,-ਤ੍ਵਂ ਇਦਾਨਿ ਕਿਤ੍ਤਕਂ ਗਨ੍ਥਂ ਵਾਚੁਗ੍ਗਤਂ ਕਰੋਸੀਤਿ. ਅਹਂ ਪਨ ਇਦਾਨਿ ਦਹਰਪੁਤ੍ਤੇਹਿ ਬਲਿਬੋਧਤ੍ਤਾ ਬ੍ਯਾਕੁਲਂ ਪਤ੍ਵਾ ਬਹੁਂ ਗਨ੍ਥਂ ਵਾਚੁਗ੍ਗਤਂ ਕਾਤੁਂ ਨਸਕ੍ਕਾ,ਸਮਨ੍ਤਮਹਾਪਟ੍ਠਾਨੇ ਪਨ ਕੁਸਲਤ੍ਤਿਕਮਤ੍ਤਂਵ ਵਾਚੁਗ੍ਗਤਂ ਕਰੋਮੀਤਿ ਆਹਾਤਿ.

ਇਦਮ੍ਪਿ ਅਰਿਮਦ੍ਦਨਨਗਰਵਾਸੀਨਂ ਮਾਤੁਗਾਮਾਨਮ੍ਪਿ ਪਰਿਯਤ੍ਤੁਗ੍ਗਹਣੇ ਏਕਂ ਵਤ੍ਥੁ,–

ਏਕਂ ਕਿਰ ਭਿਕ੍ਖੁਂ ਪਿਣ੍ਡਾਯ ਚਰਨ੍ਤਂ ਏਕਾ ਦ੍ਵਾਦਸਵਸ੍ਸਿਕਾ ਦਹਰਿਤ੍ਥੀ ਪੁਚ੍ਛਿ,-ਕਿਨ੍ਨਾਮੋਸਿ ਤ੍ਵਂ ਭਨ੍ਤੇਤਿ. ਖੇਮਾਨਾਮਾਹਨ੍ਤਿ. ਕਥਞ੍ਹਿ ਭਨ੍ਤੇ ਪੁਮਾਵ ਸਮਾਨੋ ਇਤ੍ਥਿਲਿਙ੍ਗੇਨ ਨਾਮਂ ਅਕਾਸੀਤਿ ਆਹ. ਅਥ ਅਨ੍ਤੋਗੇਹੇ ਨਿਸਿਨ੍ਨਾ ਮਾਤਾ ਸੁਤ੍ਵਾ ਧੀਤਰਂ ਆਹ,-ਤ੍ਵਂ ਰਾਜਾਦਿਗਣਸ੍ਸ ਲਕ੍ਖਣਂ ਨ ਜਾਨਾਸੀਤਿ. ਆਮ ਜਾਨਾਮਿ, ਅਯਂ ਪਨ ਖੇਮਸਦ੍ਦੋ ਨ ਰਾਜਾਦਿਗਣਪਕ੍ਖਂ ਭਜਤੀਤਿ. ਅਥ ਮਾਤਾ ਏਵਮਾਹ,-ਅਯਂ ਪਨ ਖੇਮਸਦ੍ਦੋ ਏਕਦੇਸੇਨੇਵ ਰਾਜਾਦਿਗਣਪਕ੍ਖਂ ਭਜਤੀਤਿ.

ਅਯਂ ਪਨੇਤ੍ਥ ਧੀਤੁ ਅਧਿਪ੍ਪਾਯੋ,-ਨ ਰਾਜਾਦਿਸਦ੍ਦੋ ਕਦਾਚਿ ਰਾਜੋਤਿ ਪਚ੍ਚਤ੍ਤਵਚਨਵਸੇਨ ਓਕਾਰਨ੍ਤੋ ਦਿਸ੍ਸਤਿ ਵਿਨਾ ਦੇਵਰਾਜੋਤਿਆਦਿਸਮਾਸਵਿਸਯਂ, ਖੇਮਸਦ੍ਦੋ ਪਨ ਕਤ੍ਥਚਿ ਖੇਮੋਤਿ ਚ ਖੇਮਨ੍ਤਿ ਚ ਲਿਙ੍ਗਨ੍ਤਰਵਸੇਨ ਰੂਪਨ੍ਤਰਂ ਦਿਸ੍ਸਤਿ, ਤੇਨੇਵ ਖੇਮਸਦ੍ਦੋ ਨ ਰਾਜਾਦਿਗਣੋਤਿ ਵੇਦਿਤਬ੍ਬੋਤਿ.

ਅਯਂ ਪਨ ਮਾਤੁ ਅਧਿਪ੍ਪਾਯੋ,-ਖੇਮਸਦ੍ਦੋ ਅਭਿਧੇਯ੍ਯਲਿਙ੍ਗਤ੍ਤਾ ਤਿਲਿਙ੍ਗਕੋ,ਯਦਾ ਪਨ ਸਞ੍ਞਾਸਦ੍ਦਾਧਿਕਾਰੇ ਪਚ੍ਚਤ੍ਤਵਚਨਵਸੇਨ ਖੇਮਾਤਿ ਆਕਾਰਨ੍ਤੋ ਦਿਸ੍ਸਤਿ, ਤਦਾ ਏਕਦੇਸੇਨ ਖੇਮਸਦ੍ਦੋ ਰਾਜਾਦਿਗਣਪਕ੍ਖਂ ਭਜਤੀਤਿ.

ਇਦਮ੍ਪਿ ਏਕਂ ਵਤ੍ਥੁ,–

ਅਰਿਮਦ੍ਦਨਨਗਰੇ ਕਿਰ ਏਕਸ੍ਸ ਕੁਟੁਮ੍ਬਿਕਸ੍ਸ ਏਕੋ ਪੁਤ੍ਤੋ ਦ੍ਵੇ ਧੀਤਰੋ ਅਹੇਸੁਂ. ਏਕਸ੍ਮਿਞ੍ਚ ਕਾਲੇ ਘਮ੍ਮਾਭਿਭੂਤਤ੍ਤਾ ਗੇਹਸ੍ਸ ਉਪਰਿਤਲੇ ਨਹਾਯਿਤ੍ਵਾ ਨਿਸੀਦਿ. ਅਥ ਏਕਾ ਦਾਸੀ ਗੇਹਸ੍ਸ ਹੇਟ੍ਠਾ ਠਤ੍ਵਾ ਕਿਞ੍ਚਿ ਕਮ੍ਮਂ ਕਰੋਨ੍ਤੀ ਤਸ੍ਸ ਕੁਟੁਮ੍ਬਿਕਸ੍ਸ ਗੁਯ੍ਹਟ੍ਠਾਨਂ ਓਲੋਕੇਸਿ. ਤਮਤ੍ਥਂ ਜਾਨਿਤ੍ਵਾ ਕੁਟੁਮ੍ਬਿਕੋ ਸਾਖਂ ਓਲੋਕੇਸੀਤਿ ਏਕਂ ਵਾਕ੍ਯਂ ਬਨ੍ਧਿਤ੍ਵਾ ਪੁਤ੍ਤਸ੍ਸ ਦਸ੍ਸੇਸਿ,ਇਮਸ੍ਸ ਅਤ੍ਥਯੋਜਨਂ ਕਰੋਹੀਤਿ. ਅਥ ਪੁਤ੍ਤੋ ਅਤ੍ਥਯੋਜਨਂ ਅਕਾਸਿ,-ਸਾਖਂ ਰੁਕ੍ਖਸਾਖਂ ਓਲੇਕੇਸਿ ਉਦਿਕ੍ਖਤੀਤਿ. ਅਥ ਪਚ੍ਛਾ ਏਕਾਯ ਧੀਤੁਯਾ ਦਸ੍ਸੇਸਿ, ਇਮਸ੍ਸ ਅਤ੍ਥਯੋਜਨਂ ਕਰੋਹੀਤਿ. ਸਾਪਿ ਅਤ੍ਥਯੋਜਨਂ ਅਕਾਸਿ,- ਸਾ ਸੁਨਖੋ ਖਂ ਆਕਾਸਂ ਓਲੋਕੇਸਿ ਉਦਿਕ੍ਖਤੀਤਿ. ਅਥ ਪਚ੍ਛਾ ਏਕਾਯ ਧੀਤੁਯਾ ਦਸ੍ਸੇਸਿ, ਇਮਸ੍ਸ ਅਤ੍ਥ ਯੋਜਨਂ ਕਰੋਹੀਤਿ. ਸਾਪਿ ਅਤ੍ਥਯੋਜਨਂ ਅਕਾਸਿ,-ਸਾ ਇਤ੍ਥੀ ਖਂ ਅਙ੍ਗਜਾਤਂ ਓਲੋਕੇਸਿ ਮੁਖਂ ਉਦ੍ਧਂ ਕਤ੍ਵਾ ਓਲੋਕੇਸੀਤਿ.

ਇਦਮ੍ਪਿ ਏਕਂ ਵਤ੍ਥੁ,–