੨. ਭਵਤਿਕ੍ਰਿਯਾਪਦਮਾਲਾਵਿਭਾਗ

ਇਤੋ ਪਰਂ ਪਵਕ੍ਖਾਮਿ, ਸੋਤੂਨਂ ਮਤਿਵਡ੍ਢਨਂ;

ਕ੍ਰਿਯਾਪਦਕ੍ਕਮਂ ਨਾਮ, ਵਿਭਤ੍ਤਾਦੀਨਿ ਦੀਪਯਂ.

ਤਤ੍ਰ ਆਖ੍ਯਾਤਿਕਸ੍ਸ ਕ੍ਰਿਯਾਲਕ੍ਖਣਤ੍ਤਸੂਚਿਕਾ ਤ੍ਯਾਦਯੋ ਵਿਭਤ੍ਤਿਯੋ, ਤਾ ਅਟ੍ਠਵਿਧਾ ਵਤ੍ਤਮਾਨਾਪਞ੍ਚਮੀਸਤ੍ਤਮੀਪਰੋਕ੍ਖਾਹਿਯ੍ਯਤ੍ਤਨਜ੍ਜਤਨੀਭਵਿਸ੍ਸਨ੍ਤੀ ਕਾਲਾਤਿਪਤ੍ਤਿਵਸੇਨ.

ਤਤ੍ਥਤਿ ਅਨ੍ਤਿ, ਸਿ ਥ, ਮਿ ਮ, ਤੇ ਅਨ੍ਤੇ, ਸੇ ਵ੍ਹੇ, ਏ ਮ੍ਹੇ ਇਚ੍ਚੇਤਾ ਵਤ੍ਤਮਾਨਾਵਿਭਤ੍ਤਿਯੋ ਨਾਮ.

ਤੁ ਅਨ੍ਤੁ, ਹਿ ਥ, ਮਿ ਮ, ਤਂ ਅਨ੍ਤਂ, ਸੁ ਵ੍ਹੋ, ਏ ਆਮਸੇ ਇਚ੍ਚੇਤਾ ਪਞ੍ਚਮੀਵਿਭਤ੍ਤਿਯੋ ਨਾਮ.

ਏਯ੍ਯ ਏਯ੍ਯੁਂ, ਏਯ੍ਯਾਸਿ ਏਯ੍ਯਾਥ, ਏਯ੍ਯਾਮਿ ਏਯ੍ਯਾਮ, ਏਥ ਏਰਂ, ਏਥੋ ਏਯ੍ਯਾਵ੍ਹੋ, ਏਯ੍ਯਂ ਏਯ੍ਯਾਮ੍ਹੇ ਇਚ੍ਚੇਤਾ ਸਤ੍ਤਮੀਵਿਭਤ੍ਤਿਯੋ ਨਾਮ.

ਅ ਉ, ਏ ਤ੍ਥ, ਅਂ ਮ੍ਹ, ਤ੍ਥ ਰੇ, ਤ੍ਥੋ ਵ੍ਹੋ, ਇਂ ਮ੍ਹੇ ਇਚ੍ਚੇਤਾ ਪਰੋਕ੍ਖਾਵਿਭਤ੍ਤਿਯੋ ਨਾਮ.

ਆ ਊ, ਓ ਤ੍ਥ, ਅਂ ਮ੍ਹਾ, ਤ੍ਥ ਤ੍ਥੁਂ, ਸੇ ਵ੍ਹਂ, ਇਂ ਮ੍ਹਸੇ ਇਚ੍ਚੇਤਾ ਹਿਯ੍ਯਤ੍ਤਨੀਵਿਭਤ੍ਤਿਯੋ ਨਾਮ.

ਈ ਉਂ, ਓ ਤ੍ਥ, ਇਂ ਮ੍ਹਾ, ਆ ਊ, ਸੇ ਵ੍ਹਂ, ਅਂ ਮ੍ਹੇ ਇਚ੍ਚੇਤਾ ਅਜ੍ਜਤਨੀਵਿਭਤ੍ਤਿਯੋ ਨਾਮ.

ਸ੍ਸਤਿ ਸ੍ਸਨ੍ਤਿ, ਸ੍ਸਸਿ ਸ੍ਸਥ, ਸ੍ਸਾਮਿ ਸ੍ਸਾਮ, ਸ੍ਸਤੇ ਸ੍ਸਨ੍ਤੇ, ਸ੍ਸਸੇ ਸ੍ਸਵ੍ਹੇ, ਸ੍ਸਂ ਸ੍ਸਾਮ੍ਹੇ ਇਚ੍ਚੇਤਾ ਭਵਿਸ੍ਸਨ੍ਤੀਵਿਭਤ੍ਤਿਯੋ ਨਾਮ.

ਸ੍ਸਾ ਸ੍ਸਂਸੁ, ਸ੍ਸੇ ਸ੍ਸਥ, ਸ੍ਸਂ ਸ੍ਸਾਮ੍ਹਾ, ਸ੍ਸਥ ਸ੍ਸਿਸੁ, ਸ੍ਸਸੇ ਸ੍ਸਵ੍ਹੇ, ਸ੍ਸਿਂ ਸ੍ਸਾਮ੍ਹਸੇ ਇਚ੍ਚੇਤਾ ਕਾਲਾਤਿਪਤ੍ਤਿਵਿਭਤ੍ਤਿਯੋ ਨਾਮ.

ਸਬ੍ਬਾਸਮੇਤਾਸਂ ਵਿਭਤ੍ਤੀਨਂ ਯਾਨਿ ਯਾਨਿ ਪੁਬ੍ਬਕਾਨਿ ਛ ਪਦਾਨਿ, ਤਾਨਿ ਤਾਨਿ ਪਰਸ੍ਸਪਦਾਨਿ ਨਾਮ. ਯਾਨਿ ਯਾਨਿ ਪਨ ਪਰਾਨਿ ਛ ਪਦਾਨਿ, ਤਾਨਿ ਤਾਨਿ ਅਤ੍ਤਨੋਪਦਾਨਿ ਨਾਮ. ਤਤ੍ਥ ਪਰਸ੍ਸਪਦਾਨਿ ਵਤ੍ਤਮਾਨਾ ਛ, ਪਞ੍ਚਮਿਯੋ ਛ, ਸਤ੍ਤਮਿਯੋ ਛ, ਪਰੋਕ੍ਖਾ ਛ, ਹਿਯ੍ਯਤ੍ਤਨਿਯੋ ਛ, ਅਜ੍ਜਤਨਿਯੋ ਛ, ਭਵਿਸ੍ਸਨ੍ਤਿਯੋ ਛ, ਕਾਲਾਤਿਪਤ੍ਤਿਯੋ ਛਾਤਿ ਅਟ੍ਠਚਤ੍ਤਾਲੀਸਵਿਧਾਨਿ ਹੋਨ੍ਤਿ, ਤਥਾ ਇਤਰਾਨਿ, ਸਬ੍ਬਾਨਿ ਤਾਨਿ ਪਿਣ੍ਡਿਤਾਨਿ ਛਨ੍ਨਵੁਤਿਵਿਧਾਨਿ.

ਪਰਸ੍ਸਪਦਾਨਮਤ੍ਤਨੋਪਦਾਨਞ੍ਚ ਦ੍ਵੇ ਦ੍ਵੇ ਪਦਾਨਿ ਪਠਮਮਜ੍ਝਿਮੁਤ੍ਤਮਪੁਰਿਸਾ ਨਾਮ. ਤੇ ਵਤ੍ਤਮਾਨਾਦੀਸੁ ਚਤ੍ਤਾਰੋ ਚਤ੍ਤਾਰੋ, ਅਟ੍ਠਨ੍ਨਂ ਵਿਭਤ੍ਤੀਨਂ ਵਸੇਨ ਦ੍ਵਤ੍ਤਿਂਸ, ਪਿਣ੍ਡਿਤਾਨਿ ਪਰਿਮਾਣਾਨੇਵ.

ਦ੍ਵੀਸੁ ਦ੍ਵੀਸੁ ਪਦੇਸੁ ਪਠਮਂ ਪਠਮਂ ਏਕਵਚਨਂ, ਦੁਤਿਯਂ ਦੁਤਿਯਂ ਬਹੁਵਚਨਂ.

ਤਤ੍ਰ ਵਤ੍ਤਮਾਨਵਿਭਤ੍ਤੀਨਨ੍ਤਿ ਅਨ੍ਤਿ, ਸਿ ਥ, ਮਿ ਮ ਇਚ੍ਚੇਤਾਨਿ ਪਰਸ੍ਸਪਦਾਨਿ. ਤੇ ਅਨ੍ਤੇ, ਸੇ ਵ੍ਹੇ, ਏ ਮ੍ਹੇ ਇਚ੍ਚੇਤਾਨਿ ਅਤ੍ਤਨੋਪਦਾਨਿ. ਪਰਸ੍ਸਪਦਤ੍ਤਨੋਪਦੇਸੁਪਿਤਿ ਅਨ੍ਤਿ ਇਤਿ ਪਠਮਪੁਰਿਸਾ, ਸਿਥ ਇਤਿ ਮਜ੍ਝਿਮਪੁਰਿਸਾ, ਮਿ ਮ ਇਤਿ ਉਤ੍ਤਮਪੁਰਿਸਾ, ਤੇ ਅਨ੍ਤੇ ਇਤਿ ਪਠਮਪੁਰਿਸਾ, ਸੇ ਵ੍ਹੇ ਇਤਿ ਮਜ੍ਝਿਮਪੁਰਿਸਾ, ਏ ਮ੍ਹੇ ਇਤਿ ਉਤ੍ਤਮਪੁਰਿਸਾ.

ਪਠਮਮਜ੍ਝਿਮੁਤ੍ਤਮਪੁਰਿਸੇਸੁਪਿ ਤਿ-ਇਤਿ ਏਕਵਚਨਂ, ਅਨ੍ਤਿ-ਇਤਿ ਬਹੁਵਚਨਨ੍ਤਿ ਏਵਂ ਏਕਵਚਨਬਹੁਵਚਨਾਨਿ ਕਮਤੋ ਞੇਯ੍ਯਾਨਿ. ਏਵਂ ਸੇਸਾਸੁ ਵਿਭਤ੍ਤੀਸੁ ਪਰਸ੍ਸਪਦਤ੍ਤਨੋਪਦਪਠਮਮਜ੍ਝਿਮੁਤ੍ਤਮਪੁਰਿਸੇਕਵਚਨਬਹੁਵਚਨਾਨਿ ਞੇਯ੍ਯਾਨਿ.

ਤਤ੍ਥ ਵਿਭਤ੍ਤੀਤਿ ਕੇਨਟ੍ਠੇਨ ਵਿਭਤ੍ਤਿ? ਕਾਲਾਦਿਵਸੇਨ ਧਾਤ੍ਵਤ੍ਥਂ ਵਿਭਜਤੀਤਿ ਵਿਭਤ੍ਤਿ, ਸ੍ਯਾਦੀਹਿ ਨਾਮਿਕਵਿਭਤ੍ਤੀਹਿ ਸਹ ਸਬ੍ਬਸਙ੍ਗਾਹਕਵਸੇਨ ਪਨ ਸਕਤ੍ਥਪਰਤ੍ਥਾਦਿਭੇਦੇ ਅਤ੍ਥੇ ਵਿਭਜਤੀਤਿ ਵਿਭਤ੍ਤਿ, ਕਮ੍ਮਾਦਯੋ ਵਾ ਕਾਰਕੇ ਏਕਵਚਨਬਹੁਵਚਨਵਸੇਨ ਵਿਭਜਤੀਤਿ ਵਿਭਤ੍ਤਿ, ਵਿਭਜਿਤਬ੍ਬਾ ਞਾਣੇਨਾਤਿਪਿ ਵਿਭਤ੍ਤਿ, ਵਿਭਜਨ੍ਤਿ ਅਤ੍ਥੇ ਏਤਾਯਾਤਿਪਿ ਵਿਭਤ੍ਤਿ, ਅਥ ਵਾ ਸਤਿਪਿ ਜਿਨਸਾਸਨੇ ਅਵਿਭਤ੍ਤਿਕਨਿਦ੍ਦੇਸੇ ਸਬ੍ਬੇਨ ਸਬ੍ਬਂ ਵਿਭਤ੍ਤੀਹਿ ਵਿਨਾ ਅਤ੍ਥਸ੍ਸਾ’ਨਿਦ੍ਦਿਸਿਤਬ੍ਬਤੋ ਵਿਸੇਸੇਨ ਵਿਵਿਧੇਨ ਵਾ ਆਕਾਰੇਨ ਭਜਨ੍ਤਿ ਸੇਵਨ੍ਤਿ ਨਂ ਪਣ੍ਡਿਤਾਤਿਪਿ ਵਿਭਤ੍ਤਿ. ਤਤ੍ਥ ਅਵਿਭਤ੍ਤਿਕਨਿਦ੍ਦੇਸਲਕ੍ਖਣਂ ਵਦਾਮ ਸਹ ਪਯੋਗਨਿਦਸ੍ਸਨਾਦੀਹਿ.

ਅਵਿਭਤ੍ਤਿਕਨਿਦ੍ਦੇਸੋ, ਨਾਮਿਕੇਸੁਪਲਬ੍ਭਤਿ;

ਨਾਖ੍ਯਾਤੇਸੂਤਿ ਵਿਞ੍ਞੇਯ੍ਯ-ਮਿਦਮੇਤ੍ਥ ਨਿਦਸ੍ਸਨਂ.

ਨਿਗ੍ਰੋਧੋਵ ਮਹਾਰੁਕ੍ਖੋ, ਥੇਰ ਵਾਦਾਨਮੁਤ੍ਤਮੋ;

ਅਨੂਨਂ ਅਨਧਿਕਞ੍ਚ, ਕੇਵਲਂ ਜਿਨਸਾਸਨਂ.

ਤਤ੍ਰ ਥੇਰ-ਇਤਿ ਅਵਿਭਤ੍ਤਿਕੋ ਨਿਦ੍ਦੇਸੋ, ਥੇਰਾਨਂ ਅਯਨ੍ਤਿ ਥੇਰੋ. ਕੋ ਸੋ? ਵਾਦੋ. ਥੇਰਵਾਦੋ ਅਞ੍ਞੇਸਂ ਵਾਦਾਨਂ ਉਤ੍ਤਮੋਤਿ ਅਯਮਤ੍ਥੋ ਵੇਦਿਤਬ੍ਬੋ.

‘‘ਕਾਯੋ ਤੇ ਸਬ੍ਬ ਸੋਵਣ੍ਣੋ’’, ਇਚ੍ਚਾਦਿਮ੍ਹਿਪਿ ਨਾਮਿਕੇ;

ਅਵਿਭਤ੍ਤਿਕਨਿਦ੍ਦੇਸੋ, ਗਹੇਤਬ੍ਬੋ ਨਯਞ੍ਞੁਨਾ.

ਅਵਿਭਤ੍ਤਿਕਨਿਦ੍ਦੇਸੋ, ਨਨ੍ਵਾਖ੍ਯਾਤੇਪਿ ਦਿਸ੍ਸਤਿ;

‘‘ਭੋ ਖਾਦ ਪਿਵ’’ਇਚ੍ਚਤ੍ਰ, ਵਦੇ ਯੋ ਕੋਚਿ ਚੋਦਕੋ.

ਯਦਿ ਏਵਂ ਮਤੇਨਸ੍ਸ, ਭਵੇਯ੍ਯ ਅਵਿਭਤ੍ਤਿਕਂ;

‘‘ਭਿਕ੍ਖੁ, ਭੋ ਪੁਰਿਸਿ’’ਚ੍ਚਾਦਿ, ਪਦਮ੍ਪਿ, ਨ ਹਿਦਂ ਤਥਾ.

‘‘ਭਿਕ੍ਖੁ, ਭੋ ਪੁਰਿਸਿ’’ਚ੍ਚਾਦਿ, ਸਿ ਗ ਲੋਪੇਨ ਵੁਚ੍ਚਤਿ;

ਤਥਾ ‘‘ਖਾਦਾ’’ਤਿਆਦੀਨਿ, ਹਿ ਲੋਪੇਨ ਪਵੁਚ੍ਚਰੇ.

ਏਵਂ ਅਵਿਭਤ੍ਤਿਕਨਿਦ੍ਦੇਸੋ ਆਖ੍ਯਾਤੇਸੁ ਨ ਲਬ੍ਭਤਿ, ਨਾਮੇਸੁਯੇਵ ਲਬ੍ਭਤਿ. ਤਤ੍ਰਾਪਿ ‘‘ਅਟ੍ਠ ਚ ਪੁਗ੍ਗਲ ਧਮ੍ਮਦਸਾ ਤੇ’’ਤਿ ਏਤ੍ਥ ਛਨ੍ਦਵਸੇਨ ਪੁਗ੍ਗਲ ਇਤਿ ਰਸ੍ਸਕਰਣਂ ਦਟ੍ਠਬ੍ਬਂ, ਨ ‘‘ਕਕੁਸਨ੍ਧ ਕੋਣਾਗਮਨੋ ਚ ਕਸ੍ਸਪੋ’’ਤਿ ਏਤ੍ਥ ਕਕੁਸਨ੍ਧ ਇਤਿ ਅਵਿਭਤ੍ਤਿਕਨਿਦ੍ਦੇਸੋ ਵਿਯ ਅਵਿਭਤ੍ਤਿਕਨਿਦ੍ਦੇਸੋ ਦਟ੍ਠਬ੍ਬੋ. ‘‘ਭਿਕ੍ਖੁ ਨਿਸਿਨ੍ਨੇ ਮਾਤੁਗਾਮੋ ਉਪਨਿਸਿਨ੍ਨੋ ਵਾ ਹੋਤਿ ਉਪਨਿਪਨ੍ਨੋ ਵਾ’’ਤਿ ਏਤ੍ਥ ਪਨ ਭਿਕ੍ਖੂਤਿ ਇਦਂ ਭਿਕ੍ਖੁਮ੍ਹੀਤਿ ਵਤ੍ਤਬ੍ਬਤ੍ਥਤ੍ਤਾ ਭੁਮ੍ਮੇ ਪਚ੍ਚਤ੍ਤਨ੍ਤਿਪਿ ਅਦਿਟ੍ਠਵਿਭਤ੍ਤਿਕਨਿਦ੍ਦੇਸੋਤਿਪਿ ਵਤ੍ਤੁਂ ਯੁਜ੍ਜਤਿ. ਤਤ੍ਥ ਪਨ ਛਨ੍ਦਵਸੇਨ ਕਤਰਸ੍ਸਤ੍ਤਾ ਤਾਨਿ ਪਦਾਨਿ ਅਵਿਭਤ੍ਤਿਕਨਿਦ੍ਦੇਸਪਕ੍ਖਮ੍ਪਿ ਭਜਨ੍ਤੀਤਿ ਵਤ੍ਤੁਂ ਨ ਯੁਜ੍ਜਤਿ.

ਤਤ੍ਥ ਪਰਸ੍ਸਪਦਾਨੀਤਿ ਪਰਸ੍ਸ ਅਤ੍ਥਭੂਤਾਨਿ ਪਦਾਨਿ ਪਰਸ੍ਸਪਦਾਨਿ. ਏਤ੍ਥੁਤ੍ਤਮਪੁਰਿਸੇਸੁ ਅਤ੍ਤਨੋ ਅਤ੍ਥੇਸੁਪਿ ਅਤ੍ਤਨੋਪਦਵੋਹਾਰੋ ਨ ਕਰਿਯਤਿ.

ਕਿਞ੍ਚਾਪਿ ਅਤ੍ਤਨੋ ਅਤ੍ਥਾ, ਪੁਰਿਸਾ ਉਤ੍ਤਮਵ੍ਹਯਾ;

ਤਥਾਪਿ ਇਤਰੇਸਾਨ-ਮੁਸ੍ਸਨ੍ਨਤ੍ਤਾਵ ਤਬ੍ਬਸਾ;

ਤਬ੍ਬੋਹਾਰੋ ਇਮੇਸਾਨਂ, ਪੋਰਾਣੇਹਿ ਨਿਰੋਪਿਤੋ.

ਅਤ੍ਤਨੋਪਦਾਨੀਤਿ ਅਤ੍ਤਨੋ ਅਤ੍ਥਭੂਤਾਨਿ ਪਦਾਨਿ ਅਤ੍ਤਨੋਪਦਾਨਿ. ਏਤ੍ਥ ਪਨ ਪਠਮਮਜ੍ਝਿਮਪੁਰਿਸੇਸੁ ਪਰਸ੍ਸਤ੍ਥੇਸੁਪਿ ਪਰਸ੍ਸਪਦਵੋਹਾਰੋ ਨ ਕਰਿਯਤਿ.

ਪਠਮਮਜ੍ਝਿਮਾ ਚੇਤੇ, ਪਰਸ੍ਸਤ੍ਥਾ ਤਥਾਪਿ ਚ;

ਇਤਰੇਸਂ ਨਿਰੂਲ਼੍ਹਤ੍ਤਾ, ਤਬ੍ਬੋਹਾਰਸ੍ਸ ਸਚ੍ਚਤੋ.

ਇਮਸ੍ਸ ਪਨਿਮੇਸਾਨਂ, ਪੁਬ੍ਬਵੋਹਾਰਤਾਯ ਚ;

ਤਥਾ ਸਙ੍ਕਰਦੋਸਸ੍ਸ, ਹਰਣਤ੍ਥਾਯ ਸੋ ਅਯਂ;

ਅਤ੍ਤਨੋਪਦਵੋਹਾਰੋ, ਏਸਮਾਰੋਪਿਤੋ ਧੁਵਂ.

ਪਰਸ੍ਸਪਦਸਞ੍ਞਾਦਿ-ਸਞ੍ਞਾਯੋ ਬਹੁਕਾ ਇਧ;

ਪੋਰਾਣੇਹਿ ਕਤਤ੍ਤਾਤਾ, ਸਞ੍ਞਾ ਪੋਰਾਣਿਕਾ ਮਤਾ.

ਤਸ੍ਮਾ ਇਧ ਪਠਮਪੁਰਿਸਾਦੀਨਂ ਤਿਣ੍ਣਂ ਪੁਰਿਸਾਨਂ ਵਚਨਤ੍ਥਂ ਨ ਪਰਿਯੇਸਾਮ. ਰੂਲ਼੍ਹਿਯਾ ਹਿ ਪੋਰਾਣੇਹਿ ਤ੍ਯਾਦੀਨਂ ਪੁਰਿਸਸਞ੍ਞਾ ਵਿਹਿਤਾ.

ਏਕਵਚਨਬਹੁਵਚਨੇਸੁ ਪਨ ਏਕਸ੍ਸਤ੍ਥਸ੍ਸ ਵਚਨਂ ਏਕਵਚਨਂ. ਬਹੂਨਮਤ੍ਥਾਨਂ ਵਚਨਂ ਬਹੁਵਚਨਂ. ਅਥ ਵਾ ਬਹੁਤ੍ਤੇਪਿ ਸਤਿ ਸਮੁਦਾਯਵਸੇਨ ਜਾਤਿਵਸੇਨ ਵਾ ਚਿਤ੍ਤੇਨ ਸਮ੍ਪਿਣ੍ਡੇਤ੍ਵਾ ਏਕੀਕਤਸ੍ਸਤ੍ਥਸ੍ਸ ਏਕਸ੍ਸ ਵਿਯ ਵਚਨਮ੍ਪਿ ਏਕਵਚਨਂ, ਬਹੁਤ੍ਤੇ ਨਿਸ੍ਸਿਤਸ੍ਸ ਨਿਸ੍ਸਯਵੋਹਾਰੇਨ ਵੁਤ੍ਤਸ੍ਸ ਨਿਸ੍ਸਯਵਸੇਨ ਏਕਸ੍ਸ ਵਿਯ ਵਚਨਮ੍ਪਿ ਏਕਵਚਨਂ, ਏਕਤ੍ਤਲਕ੍ਖਣੇਨ ਬਵ੍ਹਤ੍ਥਾਨਂ ਏਕਵਚਨਂ ਵਿਯ ਵਚਨਮ੍ਪਿ ਏਕਵਚਨਂ. ਅਬਹੁਤ੍ਤੇਪਿ ਸਤਿ ਅਤ੍ਤਗਰੁਕਾਰਾਪਰਿਚ੍ਛੇਦਮਾਤਿਕਾਨੁਸਨ੍ਧਿਨਯਪੁਚ੍ਛਾਸਭਾਗਪੁਥੁਚਿਤ੍ਤ- ਸਮਾਯੋਗਪੁਥੁਆਰਮ੍ਮਣਵਸੇਨ ਏਕਤ੍ਥਸ੍ਸ ਬਹੂਨਂ ਵਿਯ ਵਚਨਂ ਬਹੁਵਚਨਂ, ਤਥਾ ਯੇ ਯੇ ਬਹਵੋ ਤਨ੍ਨਿਵਾਸਤਂਪੁਤ੍ਤਸਙ੍ਖਾਤਸ੍ਸੇਕਸ੍ਸਤ੍ਥਸ੍ਸ ਰੂਲ਼੍ਹੀਵਸੇਨ ਬਹੂਨਂ ਵਿਯ ਵਚਨਮ੍ਪਿ ਬਹੁਵਚਨਂ, ਏਕਸ੍ਸਤ੍ਥਸ੍ਸ ਅਞ੍ਞੇਨਤ੍ਥੇਨ ਏਕਾਭਿਧਾਨਵਸੇਨ ਬਹੂਨਂ ਵਿਯ ਵਚਨਮ੍ਪਿ ਬਹੁਵਚਨਂ, ਏਕਸ੍ਸਤ੍ਥਸ੍ਸ ਨਿਸ੍ਸਿਤਵਸੇਨ ਬਹੂਨਂ ਵਿਯ ਵਚਨਮ੍ਪਿ ਬਹੁਵਚਨਂ, ਏਕਸ੍ਸਤ੍ਥਸ੍ਸ ਆਰਮ੍ਮਣਭੇਦਕਿਚ੍ਚਭੇਦਵਸੇਨ ਬਹੂਨਂ ਵਿਯ ਵਚਨਮ੍ਪਿ ਬਹੁਵਚਨਂ. ਏਵਮਿਮੇਹਿ ਆਕਾਰੇਹਿ ਏਕਮ੍ਹਿ ਵਤ੍ਤਬ੍ਬੇ, ਏਕਮ੍ਹਿ ਵਿਯ ਚ ਵਤ੍ਤਬ੍ਬੇ ਏਕਵਚਨਂ, ਬਹੁਮ੍ਹਿ ਵਤ੍ਤਬ੍ਬੇ, ਬਹੁਮ੍ਹਿ ਵਿਯ ਚ ਵਤ੍ਤਬ੍ਬੇ ਬਹੁਵਚਨਂ ਹੋਤੀਤਿ ਦਟ੍ਠਬ੍ਬਂ. ਪੁਥੁਵਚਨਂ, ਅਨੇਕਵਚਨਨ੍ਤਿ ਚ ਇਮਸ੍ਸੇਵ ਨਾਮਂ.

ਵਚਨੇਸੁ ਅਯਂ ਅਤ੍ਥੋ, ਨਾਮਾਖ੍ਯਾਤਵਿਭਤ੍ਤਿਨਂ;

ਵਸੇਨ ਅਧਿਗਨ੍ਤਬ੍ਬੋ, ਸਾਸਨਤ੍ਥਗਵੇਸਿਨਾ.

ਤਸ੍ਮਾ ਤਦਤ੍ਥਵਿਞ੍ਞਾਪਨਤ੍ਥਂ ਇਧ ਨਾਮਿਕਪਯੋਗੇਹਿ ਸਹੇਵਾਖ੍ਯਾਤਪਯੋਗੇ ਪਵਕ੍ਖਾਮ – ‘‘ਰਾਜਾ ਆਗਚ੍ਛਤਿ, ਸਹਾਯੋ ਮੇ ਆਗਚ੍ਛਤਿ, ਏਕਂ ਚਿਤ੍ਤ’’ ਮਿਚ੍ਚੇਵਮਾਦਯੋ ਏਕਸ੍ਸਤ੍ਥਸ੍ਸ ਏਕਵਚਨਪਯੋਗਾ. ‘‘ਰਾਜਾਨੋ ਆਗਚ੍ਛਨ੍ਤਿ, ਸਹਾਯਾ ਮੇ ਆਗਚ੍ਛਨ੍ਤਿ, ਨ ਮੇ ਦੇਸ੍ਸਾ ਉਭੋ ਪੁਤ੍ਤਾ, ਦ੍ਵੇ ਤੀਣਿ’’ ਇਚ੍ਚੇਵਮਾਦਯੋ ਬਵ੍ਹਤ੍ਥਾਨਂ ਬਹੁਵਚਨਪਯੋਗਾ.

‘‘ਸਾ ਸੇਨਾ ਮਹਤੀ ਆਸਿ, ਬਹੁਜ੍ਜਨੋ ਪਸਨ੍ਨੋਸਿ, ਸਬ੍ਬੋ ਤਂ ਜਨੋ ਓਜਿਨਾਯਤੁ, ਇਤ੍ਥਿਗੁਮ੍ਬਸ੍ਸ ਪਵਰਾ, ਬੁਦ੍ਧਸ੍ਸਾਹਂ ਵਤ੍ਥਯੁਗਂ ਅਦਾਸਿਂ, ਦ੍ਵਯਂ ਵੋ ਭਿਕ੍ਖਵੇ ਦੇਸੇਸ੍ਸਾਮਿ, ਪੇਮਂ ਮਹਨ੍ਤਂ ਰਤਨਤ੍ਤਯਸ੍ਸ, ਕਰੇ ਪਸਾਦਞ੍ਚ ਨਰੋ ਅਵਸ੍ਸਂ, ਭਿਕ੍ਖੁਸਙ੍ਘੋ, ਬਲਕਾਯੋ, ਦੇਵਨਿਕਾਯੋ, ਅਰਿਯਗਣੋ’’- ਇਚ੍ਚੇਵਮਾਦਯੋ, ‘‘ਦ੍ਵਿਕਂ ਤਿਕ’’ਮਿਚ੍ਚਾਦਯੋ ਚ ਸਮੁਦਾਯਵਸੇਨ ਬਵ੍ਹਤ੍ਥਾਨਂ ਏਕਵਚਨਪਯੋਗਾ.

ਕਤ੍ਥਚਿ ਪਨ ਈਦਿਸੇਸੁ ਠਾਨੇਸੁ ਬਹੁਵਚਨਪਯੋਗਾਪਿ ਦਿਸ੍ਸਨ੍ਤਿ. ਤਥਾ ਹਿ ‘‘ਪੂਜਿਤਾ ਞਾਤਿਸਙ੍ਘੇਹਿ, ਦੇਵਕਾਯਾ ਸਮਾਗਤਾ, ਸਬ੍ਬੇਤੇ ਦੇਵਨਿਕਾਯਾ, ਦ੍ਵੇ ਦੇਵਸਙ੍ਘਾ, ਤੀਣਿ ਦੁਕਾਨਿ, ਚਤ੍ਤਾਰਿ ਨਵਕਾਨਿ’’ ਇਚ੍ਚੇਵਮਾਦਯੋ ਪਯੋਗਾਪਿ ਦਿਸ੍ਸਨ੍ਤਿ. ਇਮੇ ਏਕਵਚਨਵਸੇਨ ਵਤ੍ਤਬ੍ਬਸ੍ਸ ਸਮੁਦਾਯਸ੍ਸ ਬਹੁਸਮੁਦਾਯਵਸੇਨ ਬਹੁਵਚਨਪਯੋਗਾਤਿ ਗਹੇਤਬ੍ਬਾ, ਸਙ੍ਗਯ੍ਹਮਾਨਾ ਚ ਬਵ੍ਹਤ੍ਥਬਹੁਵਚਨੇ ਸਙ੍ਗਹਂ ਗਚ੍ਛਨ੍ਤਿ ਵਿਸੁਂਯੇਵ ਵਾ, ਤਸ੍ਮਾ ਬਹੁਸਮੁਦਾਯਾਪੇਕ੍ਖਬਹੁਵਚਨਨ੍ਤਿ ਏਤੇਸਂ ਨਾਮਂ ਵੇਦਿਤਬ੍ਬਂ.

‘‘ਪਾਣਂ ਨ ਹਨੇ, ਸਸ੍ਸੋ ਸਮ੍ਪਜ੍ਜਤਿ’’ ਇਚ੍ਚੇਵਮਾਦਯੋ ਜਾਤਿਵਸੇਨ ਬਵ੍ਹਤ੍ਥਾਨਂ ਏਕਵਚਨਪਯੋਗਾ, ਤਬ੍ਭਾਵਸਾਮਞ੍ਞੇਨ ਬਵ੍ਹਤ੍ਥਾਨਂ ਏਕਵਚਨਪਯੋਗਾਤਿਪਿ ਵਤ੍ਤੁਂ ਵਟ੍ਟਤਿ.

‘‘ਨਾਗਂ ਰਟ੍ਠਸ੍ਸ ਪੂਜਿਤਂ, ਸਾਵਤ੍ਥੀ ਸਦ੍ਧਾ ਅਹੋਸਿ ਪਸਨ੍ਨਾ’’ ਇਚ੍ਚੇਵਮਾਦਯੋ ਨਿਸ੍ਸਯਵਸੇਨ ਪਵਤ੍ਤਾਨਂ ਨਿਸ੍ਸਯਵੋਹਾਰੇਨ ਵੁਤ੍ਤਾਨਮੇਕਵਚਨਪਯੋਗਾ.

‘‘ਤਿਲਕ੍ਖਣਂ, ਕੁਸਲਾਕੁਸਲਂ, ਵਿਞ੍ਞਾਣਪਚ੍ਚਯਾ ਨਾਮਰੂਪਂ, ਨਾਮਰੂਪਪਚ੍ਚਯਾ ਸਲ਼ਾਯਤਨਂ, ਧਮ੍ਮਵਿਨਯੋ, ਚਿਤ੍ਤਸੇਨੋ ਚ ਗਨ੍ਧਬ੍ਬੋ, ਨਤਿਯਾ ਅਸਤਿ ਆਗਤਿਗਤਿ ਨ ਹੋਤਿ, ਆਗਤਿਗਤਿਯਾ ਅਸਤਿ ਚੁਤੂਪਪਾਤੋ ਨ ਹੋਤਿ’’ ਇਚ੍ਚੇਵਮਾਦਯੋ ਏਕਤ੍ਤਲਕ੍ਖਣੇ ਬਵ੍ਹਤ੍ਥਾਨਂ ਏਕਵਚਨਪਯੋਗਾ.

‘‘ਏਵਂ ਮਯਂ ਗਣ੍ਹਾਮ, ਅਮ੍ਹਾਕਂ ਪਕਤਿ, ਪਧਾਨਨ੍ਤਿ ਖੋ ਮੇਘਿਯ ਵਦਮਾਨਂ ਕਿਨ੍ਤਿ ਵਦੇਯ੍ਯਾਮ’’ ਇਚ੍ਚੇਵਮਾਦਯੋ ਏਕਸ੍ਸਤ੍ਥਸ੍ਸ ਅਤ੍ਤਵਸੇਨ ਬਹੁਵਚਨਪਯੋਗਾ.

‘‘ਤੇ ਮਨੁਸ੍ਸਾ ਤਂ ਭਿਕ੍ਖੁਂ ਏਤਦਵੋਚੁਂ ‘ਭੁਞ੍ਜਥ ਭਨ੍ਤੇ’ਤਿ, ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਅਬ੍ਭਾਗਤਾਨਾ’ਸਨਕਂ ਅਦਾਸਿਂ’’ ਇਚ੍ਚੇਵਮਾਦਯੋ ਏਕਸ੍ਸਤ੍ਥਸ੍ਸ ਗਰੁਕਾਰਵਸੇਨ ਬਹੁਵਚਨਪਯੋਗਾ.

‘‘ਅਪ੍ਪਚ੍ਚਯਾ ਧਮ੍ਮਾ, ਅਸਙ੍ਖਤਾ ਧਮ੍ਮਾ’’ ਇਚ੍ਚੇਵਮਾਦਯੋ ਏਕਸ੍ਸਤ੍ਥਸ੍ਸ ਅਪਰਿਚ੍ਛੇਦਵਸੇਨ ਬਹੁਵਚਨਪਯੋਗਾ, ਅਨਿਯਮਿਤਸਙ੍ਖਾਵਸੇਨ ਬਹੁਵਚਨਪਯੋਗਾ ਵਾ.

ਕੇਚਿ ਪਨ ‘‘ਦੇਸਨਾਸੋਤਪਾਤਵਸੇਨ ਬਹੁਵਚਨਪਯੋਗਾ’’ਤਿਪਿ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਨ ਹਿ ਤਥਾਗਤੋ ਸਤਿਸਮ੍ਪਜਞ੍ਞਰਹਿਤੋ ਧਮ੍ਮਂ ਦੇਸੇਤਿ, ਯੁਤ੍ਤਿ ਚ ਨ ਦਿਸ੍ਸਤਿ ‘‘ਮਾਤਿਕਾਯਂ ਪੁਚ੍ਛਾਯਂ ਵਿਸ੍ਸਜ੍ਜਨੇ ਚਾਤਿ ਤੀਸੁਪਿ ਠਾਨੇਸੁ ਅਪ੍ਪਚ੍ਚਯਾਦਿਧਮ੍ਮੇ ਦੇਸੇਨ੍ਤੋ ਸਤ੍ਥਾ ਪੁਨਪ੍ਪੁਨਂ ਬਹੁਵਚਨਵਸੇਨ ਦੇਸਨਾਸੋਤੇ ਪਤਿਤ੍ਵਾ ਧਮ੍ਮਂ ਦੇਸੇਤੀ’’ਤਿ.

‘‘ਕਤਮੇ ਧਮ੍ਮਾ ਅਪ੍ਪਚ੍ਚਯਾ’’ ਇਚ੍ਚੇਵਮਾਦਯੋ ਏਕਸ੍ਸਤ੍ਥਸ੍ਸ ਮਾਤਿਕਾਨੁਸਨ੍ਧਿਨਯੇਨ ਬਹੁਵਚਨਪਯੋਗਾ.

‘‘ਇਮੇ ਧਮ੍ਮਾ ਅਪ੍ਪਚ੍ਚਯਾ’’ ਇਚ੍ਚੇਵਮਾਦਯੋ ਏਕਸ੍ਸਤ੍ਥਸ੍ਸ ਪੁਚ੍ਛਾਨੁਸਨ੍ਧਿਨਯੇਨ ਬਹੁਵਚਨਪਯੋਗਾ.

‘‘ਕਤਮੇ ਧਮ੍ਮਾ ਨੋ ਪਰਾਮਾਸਾ, ਤੇ ਧਮ੍ਮੇ ਠਪੇਤ੍ਵਾ ਅਵਸੇਸਾ ਕੁਸਲਾਕੁਸਲਾਬ੍ਯਾਕਤਾ ਧਮ੍ਮਾ’’ ਇਚ੍ਚੇਵਮਾਦਯੋ ਏਕਸ੍ਸਤ੍ਥਸ੍ਸ ਪੁਚ੍ਛਾਸਭਾਗੇਨ ਬਹੁਵਚਨਪਯੋਗਾ.

‘‘ਅਤ੍ਥਿ ਭਿਕ੍ਖਵੇ ਅਞ੍ਞੇਵ ਧਮ੍ਮਾ ਗਮ੍ਭੀਰਾ ਦੁਦ੍ਦਸਾ ਦੁਰਨੁਬੋਧਾ ਸਨ੍ਤਾ ਪਣੀਤਾ ਅਤਕ੍ਕਾਵਚਰਾ ਨਿਪੁਣਾ ਪਣ੍ਡਿਤਵੇਦਨੀਯਾ, ਯੇ ਤਥਾਗਤੋ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤੀ’’ਤਿ ਅਯਮੇਕਸ੍ਸਤ੍ਥਸ੍ਸ ਪੁਥੁਚਿਤ੍ਤਸਮਾਯੋਗਪੁਥੁਆਰਮ੍ਮਣਵਸੇਨ ਬਹੁਵਚਨਪਯੋਗੋ.

‘‘ਏਕਂ ਸਮਯਂ ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਮਹਾਵਨੇ,

ਸਨ੍ਤਿ ਪੁਤ੍ਤਾ ਵਿਦੇਹਾਨਂ, ਦੀਘਾਵੁ ਰਟ੍ਠਵਡ੍ਢਨੋ;

ਤੇ ਰਜ੍ਜਂ ਕਾਰਯਿਸ੍ਸਨ੍ਤਿ, ਮਿਥਿਲਾਯਂ ਪਜਾਪਤਿ’’ –

ਇਚ੍ਚੇਵਮਾਦਯੋ ਸਦ੍ਦਾ ਯੇ ਯੇ ਬਹਵੋ, ਤਨ੍ਨਿਵਾਸਤਂਪੁਤ੍ਤਸਙ੍ਖਾਤਸ੍ਸੇਕਤ੍ਥਸ੍ਸ ਰੂਲ਼੍ਹੀਵਸੇਨ ਬਹੁਵਚਨਪਯੋਗਾ.

‘‘ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਆਮਨ੍ਤੇਸਿ ‘ਗਚ੍ਛਥ ਤੁਮ੍ਹੇ ਸਾਰਿਪੁਤ੍ਤਾ ਕੀਟਾਗਿਰਿਂ ਗਨ੍ਤ੍ਵਾ ਅਸ੍ਸਜਿਪੁਨਬ੍ਬਸੁਕਾਨਂ ਭਿਕ੍ਖੂਨਂ ਕੀਟਾਗਿਰਿਸ੍ਮਾ ਪਬ੍ਬਾਜਨੀਯਕਮ੍ਮਂ ਕਰੋਥ, ਤੁਮ੍ਹਾਕਂ ਏਤੇ ਸਦ੍ਧਿਵਿਹਾਰਿਨੋ’ਤਿ’’, ‘‘ਕਚ੍ਚਿ ਵੋ ਕੁਲਪੁਤ੍ਤਾ, ਏਥ ਬ੍ਯਗ੍ਘਾ ਨਿਵਤ੍ਤਵ੍ਹੋ’’ ਇਚ੍ਚੇਵਮਾਦਯੋ ਏਕਸ੍ਸਤ੍ਥਸ੍ਸ ਅਞ੍ਞੇਨਤ੍ਥੇਨ ਏਕਾਭਿਧਾਨਵਸੇਨ ਬਹੁਵਚਨਪਯੋਗਾ.

‘‘ਮਞ੍ਚਾ ਉਕ੍ਕੁਟ੍ਠਿਂ ਕਰੋਨ੍ਤਿ’’ ਇਚ੍ਚੇਵਮਾਦਯੋ ਏਕਸ੍ਸਤ੍ਥਸ੍ਸ ਨਿਸ੍ਸਿਤਵਸੇਨ ਬਹੁਵਚਨਪਯੋਗਾ.

‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਅਯਮਾਰਮ੍ਮਣਭੇਦੇਨ ਏਕਸ੍ਸਤ੍ਥਸ੍ਸ ਬਹੁਵਚਨਪਯੋਗੋ.

‘‘ਚਤ੍ਤਾਰੋ ਸਮ੍ਮਪ੍ਪਧਾਨਾ’’ਤਿ ਅਯਂ ਪਨ ਕਿਚ੍ਚਭੇਦੇਨ ਏਕਸ੍ਸਤ੍ਥਸ੍ਸ ਬਹੁਵਚਨਪਯੋਗੋ.

ਤਤ੍ਥ ਏਕਤ੍ਥੇਕਵਚਨਂ, ਸਮੁਦਾਯਾਪੇਕ੍ਖੇਕਵਚਨਂ, ਜਾਤ੍ਯਾਪੇਕ੍ਖੇਕਵਚਨਂ, ਤਨ੍ਨਿਸ੍ਸਯਾਪੇਕ੍ਖੇਕਵਚਨਂ, ਏਕਤ੍ਤਲਕ੍ਖਣੇਕਵਚਨਨ੍ਤਿ ਪਞ੍ਚਵਿਧਂ ਏਕਵਚਨਂ ਭਵਤਿ. ਏਤ੍ਥ ਪਨ ਜਾਤ੍ਯਾਪੇਕ੍ਖੇਕਵਚਨਂ ਅਤ੍ਥਤੋ ਸਾਮਞ੍ਞਾਪੇਕ੍ਖੇਕਵਚਨਮੇਵਾਤਿ ਦਟ੍ਠਬ੍ਬਂ.

ਬਵ੍ਹਤ੍ਥਬਹੁਵਚਨਂ, ਬਹੁਸਮੁਦਾਯਾਪੇਕ੍ਖਬਹੁਵਚਨਂ, ਅਤ੍ਤਬਹੁਵਚਨਂ, ਗਰੁਕਾਰਬਹੁਵਚਨਂ, ਅਪਰਿਚ੍ਛੇਦਬਹੁਵਚਨਂ, ਮਾਤਿਕਾਨੁਸਨ੍ਧਿਨਯਬਹੁਵਚਨਂ, ਪੁਚ੍ਛਾਨੁਸਨ੍ਧਿਨਯਬਹੁਵਚਨਂ, ਪੁਚ੍ਛਾਸਭਾਗਬਹੁਵਚਨਂ, ਪੁਥੁਚਿਤ੍ਤਸਮਾਯੋਗਪੁਥੁਆਰਮ੍ਮਣਬਹੁਵਚਨਂ, ਤਨ੍ਨਿਵਾਸਬਹੁਵਚਨਂ, ਤਂਪੁਤ੍ਤਬਹੁਵਚਨਂ, ਏਕਾਭਿਧਾਨਬਹੁਵਚਨਂ, ਤਨ੍ਨਿਸ੍ਸਿਤਾਪੇਕ੍ਖਬਹੁਵਚਨਂ, ਆਰਮ੍ਮਣਭੇਦਬਹੁਵਚਨਂ, ਕਿਚ੍ਚਭੇਦਬਹੁਵਚਨਨ੍ਤਿ ਪਨ੍ਨਰਸਵਿਧਂ ਬਹੁਵਚਨਂ ਭਵਤਿ. ਇਚ੍ਚੇਵਂ ਵੀਸਧਾ ਸਬ੍ਬਾਨਿ ਏਕਵਚਨਬਹੁਵਚਨਾਨਿ ਸਙ੍ਗਹਿਤਾਨਿ. ਅਤ੍ਰਿਦਂ ਪਾਲ਼ਿਵਵਤ੍ਥਾਨਂ –

ਏਕਤ੍ਥੇ ਦੇਕਵਚਨ-ਞ੍ਚਿਤਰਸ੍ਮਿਤਰਮ੍ਪਿ ਚ;

ਸਮੁਦਾਯਜਾਤਿਏਕਤ੍ਤ-ਲਕ੍ਖਣੇਕਵਚੋਪਿ ਚ;

ਸਾਟ੍ਠਕਥੇ ਪਿਟਕਮ੍ਹਿ, ਪਾਠੇ ਪਾਯੇਨ ਦਿਸ੍ਸਰੇ.

ਗਰੁਮ੍ਹਿ ਚਤ੍ਤਨੇਕਸ੍ਮਿਂ, ਬਹੁਵਚਨਕਂ ਪਨ;

ਪਾਲ਼ਿਯਂ ਅਪ੍ਪਕਂ ਅਟ੍ਠ-ਕਥਾਟੀਕਾਸੁ ਤਂ ਬਹੁਂ.

ਤਥਾ ਹਿ ਬਹੁਕਂ ਦੇਕ-ਵਚਨਂਯੇਵ ਪਾਲ਼ਿਯਂ;

ਗਰੁਮ੍ਹਿ ਚਤ੍ਤਨੇਕਸ੍ਮਿਂ, ਇਦਮੇਤ੍ਥ ਨਿਦਸ੍ਸਨਂ.

‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਤਵ ਸਾਸਨਮਾਗਮ੍ਮ, ਪਤ੍ਤੋਮ੍ਹਿ ਅਮਤਂ ਪਦਂ’’.

ਇਚ੍ਚੇਵਮਾਦਯੋ ਪਾਠਾ, ਬਹੁਧਾ ਜਿਨਸਾਸਨੇ;

ਦਿਸ੍ਸਨ੍ਤੀਤਿ ਵਿਜਾਨੇਯ੍ਯ, ਵਿਦ੍ਵਾ ਅਕ੍ਖਰਚਿਨ੍ਤਕੋ.

ਸਾਤਿਸਯਂ ਗਰੁਕਾਰਾ-ਰਹਸ੍ਸਾਪਿ ਮਹੇਸਿਨੋ;

ਏਕਵਚਨਯੋਗੇਨ, ਨਿਦ੍ਦੇਸੋ ਦਿਸ੍ਸਤੇ ਯਤੋ.

ਤਤੋ ਵੋਹਾਰਕੁਸਲੋ, ਕਰੇਯ੍ਯਤ੍ਥਾਨੁਰੂਪਤੋ;

ਏਕਵਚਨਯੋਗਂ ਵਾ, ਇਤਰਂ ਵਾ ਸੁਮੇਧਸੋ.

ਪਾਯੇਨ ਤਨ੍ਨਿਵਾਸਮ੍ਹਿ, ਬਹੁਵਚਨਕਂ ਠਿਤਂ;

ਤਂਪੁਤ੍ਤੇ ਅਪ੍ਪਕਂ ਤਨ੍ਨਿ-ਸ੍ਸਯੇਕਵਚਨਮ੍ਪਿ ਚ.

ਪੁਥੁਚਿਤ੍ਤਾਪਰਿਚ੍ਛੇਦ-ਮਾਤਿਕਾਸਨ੍ਧਿਆਦਿਸੁ;

ਬਹੁਵਚਨਕਞ੍ਚਾਪਿ, ਅਪ੍ਪਕਨ੍ਤਿ ਪਕਾਸਯੇ.

ਏਕਾਭਿਧਾਨਤੋ ਕਿਚ੍ਚਾ, ਤਥਾ ਗੋਚਰਤੋਪਿ ਚ;

ਬਹੁਵਚਨਕਂ ਤਨ੍ਨਿ-ਸ੍ਸਿਤਾਪੇਕ੍ਖਞ੍ਚ ਅਪ੍ਪਕਂ.

ਇਚ੍ਚੇਵਂ ਸਪ੍ਪਯੋਗਂ ਤੁ, ਞਤ੍ਵਾਨ ਵਚਨਦ੍ਵਯਂ;

ਕਾਤਬ੍ਬੋ ਪਨ ਵੋਹਾਰੋ, ਯਥਾਪਾਲ਼ਿ ਵਿਭਾਵਿਨਾ.

ਇਦਾਨਿ ਕਾਲਾਦਿਵਸੇਨ ਆਖ੍ਯਾਤਪ੍ਪਵਤ੍ਤਿਂ ਦੀਪਯਿਸ੍ਸਾਮ – ਕਾਲਕਾਰਕਪੁਰਿਸਪਰਿਦੀਪਕਂ ਕ੍ਰਿਯਾਲਕ੍ਖਣਂ ਆਖ੍ਯਾਤਿਕਂ. ਤਤ੍ਰ ਕਾਲਨ੍ਤਿ ਅਤੀਤਾਨਾਗਤਪਚ੍ਚੁਪ੍ਪਨ੍ਨਵਸੇਨ ਤਯੋ ਕਾਲਾ, ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਣਤ੍ਤਿਪਰਿਕਪ੍ਪਕਾਲਾਤਿਪਤ੍ਤਿਵਸੇਨ ਪਨ ਛ, ਤੇ ਏਕੇਕਾ ਤਿਪੁਰਿਸਕਾ.

ਵੁਤ੍ਤਪ੍ਪਕਾਰਕਾਲੇਸੁ, ਯਦਿਦਂ ਵਤ੍ਤਤੇ ਯਤੋ;

ਆਖ੍ਯਾਤਿਕਂ ਤਤੋ ਤਸ੍ਸ, ਕਾਲਦੀਪਨਤਾ ਮਤਾ.

ਕਾਰਕਨ੍ਤਿ ਕਮ੍ਮਕਤ੍ਤੁਭਾਵਾ. ਤੇ ਹਿ ਉਪਚਾਰਮੁਖ੍ਯਸਭਾਵਵਸੇਨ ਕਰੋਨ੍ਤਿ ਕਰਣਨ੍ਤਿ ਚ ‘‘ਕਾਰਕਾ’’ਤਿ ਵੁਚ੍ਚਨ੍ਤਿ. ਤੇਵ ਯਥਾਕ੍ਕਮਂ ਕ੍ਰਿਯਾਨਿਮਿਤ੍ਤ ਤਂਸਾਧਕ ਤਂਸਭਾਵਾਤਿ ਵੇਦਿਤਬ੍ਬਾ.

ਕਮ੍ਮਂ ਕਤ੍ਤਾ ਚ ਭਾਵੋ ਚ, ਇਚ੍ਚੇਵਂ ਕਾਰਕਾ ਤਿਧਾ;

ਵਿਭਤ੍ਤਿਪਚ੍ਚਯਾ ਏਤ੍ਥ, ਵੁਤ੍ਤਾ ਨਾਞ੍ਞਤ੍ਰ ਸਚ੍ਚਤੋ.

‘‘ਪਰਿਭਵਿਯ੍ਯਤਿ’’ਚ੍ਚਾਦੀ, ਕਮ੍ਮੇ ਸਿਜ੍ਝਨ੍ਤਿ ਕਾਰਕੇ;

‘‘ਸਮ੍ਭਵਤੀ’’ਤਿਆਦੀਨਿ, ਸਿਜ੍ਝਰੇ ਕਤ੍ਤੁਕਾਰਕੇ.

‘‘ਵਿਭਵਿਯ੍ਯਤਿ’’ਇਚ੍ਚਾਦੀ, ਭਾਵੇ ਸਿਜ੍ਝਨ੍ਤਿ ਕਾਰਕੇ;

ਤਿਵਿਧੇਸ੍ਵੇਵਮੇਤੇਸੁ, ਵਿਭਤ੍ਤਿਪਚ੍ਚਯਾ ਮਤਾ.

ਕਾਰਕਤ੍ਤਯਮੁਤ੍ਤਂ ਯਂ, ਆਖ੍ਯਾਤਂ ਨਤ੍ਥਿ ਸਬ੍ਬਸੋ;

ਤਸ੍ਮਾ ਤਦ੍ਦੀਪਨਤ੍ਤਮ੍ਪਿ, ਤਸ੍ਸਾਖ੍ਯਾਤਸ੍ਸ ਭਾਸਿਤਂ.

ਕਾਰਕਤ੍ਤਂ ਤੁ ਭਾਵਸ੍ਸ, ਸਚੇਪਿ ਨ ਸਮੀਰਿਤਂ;

ਕਾਰਕਲਕ੍ਖਣੇ ਤੇਨ, ਭਾਵੇਨ ਚ ਅਵਤ੍ਥੁਨਾ.

ਕ੍ਰਿਯਾਨਿਪ੍ਫਤ੍ਤਿ ਨਤ੍ਥੀਤਿ, ਯੁਤ੍ਤਿਤੋਪਿ ਚ ਨਤ੍ਥਿ ਤਂ;

ਤਥਾਪਾਖ੍ਯਾਤਿਕੇ ਤਸ੍ਸ, ਤਬ੍ਬੋਹਾਰੋ ਨਿਰੁਤ੍ਤਿਯਂ;

ਪਤਿਟ੍ਠਿਤਨਯੋਵਾਤਿ, ਮਨ੍ਤ੍ਵਾ ਅਮ੍ਹੇਹਿ ਭਾਸਿਤੋ.

ਪੁਰਿਸੋਤਿ ਏਕਵਚਨਬਹੁਵਚਨਕਾ ਪਠਮਮਜ੍ਝਿਮੁਤ੍ਤਮਪੁਰਿਸਾ. ਤਤ੍ਥ ਪਠਮਪੁਰਿਸੋ ਆਖ੍ਯਾਤਪਦੇਨ ਤੁਲ੍ਯਾਧਿਕਰਣੇ ਸਾਧਕਵਾਚਕੇ ਵਾ ਕਮ੍ਮਵਾਚਕੇ ਵਾ ਤੁਮ੍ਹਾ’ਮ੍ਹਸਦ੍ਦਵਜ੍ਜਿਤੇ ਪਚ੍ਚਤ੍ਤਵਚਨਭੂਤੇ ਨਾਮਮ੍ਹਿ ‘‘ਅਭਿਨੀਹਾਰੋ ਸਮਿਜ੍ਝਤਿ, ਬੋਧਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁਞਾਣ’’ਨ੍ਤਿਆਦੀਸੁ ਵਿਯ ਪਯੁਜ੍ਜਮਾਨੇਪਿ, ਤਟ੍ਠਾਨਿਯਤ੍ਤੇ ਸਤਿ ‘‘ਭਾਸਤਿ ਵਾ ਕਰੋਤਿ ਵਾ, ਪੀਲ਼ਿਯਕ੍ਖੋਤਿ ਮਂ ਵਿਦੂ, ਵੁਚ੍ਚਤੀਤਿ ਵਚਨ’’ਨ੍ਤਿਆਦੀਸੁ ਵਿਯ ਅਪ੍ਪਯੁਜ੍ਜਮਾਨੇਪਿ ਸਬ੍ਬਧਾਤੂਹਿ ਪਰੋ ਹੋਤਿ. ਕਤ੍ਥਚਿ ਪਨ ਪਾਲ਼ਿਪ੍ਪਦੇਸੇ ਨਾਮਸ੍ਸ ਅਪ੍ਪਯੁਤ੍ਤਤ੍ਤਾ ਪਠਮਪੁਰਿਸਪਯੋਗਤ੍ਥੋ ਦੁਰਨੁਬੋਧੋ ਭਵਤਿ, ਯਥਾ ‘‘ਦੁਕ੍ਖਂ ਤੇ ਵੇਦਯਿਸ੍ਸਾਮਿ, ਤਤ੍ਥ ਅਸ੍ਸਾਸਯਨ੍ਤੁ ਮ’’ਨ੍ਤਿ. ਤਥਾ ਹਿ ਏਤ੍ਥ ‘‘ਪਾਦਾ’’ਤਿ ਪਾਠਸੇਸੋ, ਤਸ੍ਮਿਂ ਦੁਕ੍ਖਸਾਸਨਾਰੋਚਨੇ ਵਤ੍ਤੁਂ ਅਵਿਸਹਨਵਸੇਨ ਕਿਲਮਨ੍ਤਂ ਮਂ ਦੇਵਸ੍ਸ ਉਭੋ ਪਾਦਾ ਅਸ੍ਸਾਸੇਨ੍ਤੁ, ਵਿਸ੍ਸਟ੍ਠੋ ਕਥੇਹੀਤਿ ਮਂ ਵਦਥਾਤਿ ਅਧਿਪ੍ਪਾਯੋ ਚ ਭਵਤਿ.

ਅਧਿਪ੍ਪਾਯੋ ਸੁਦੁਬ੍ਬੋਧੋ, ਯਸ੍ਮਾ ਵਿਜ੍ਜਤਿ ਪਾਲ਼ਿਯਂ;

ਤਸ੍ਮਾ ਉਪਟ੍ਠਹਂ ਗਣ੍ਹੇ, ਗਰੁਂ ਗਰੁਮਤਂ ਵਿਦੂ.

ਤਤ੍ਰਿਮਾਨਿ ਭੂਧਾਤਾਧਿਕਾਰਤ੍ਤਾ ਭੂਧਾਤੁਵਸੇਨ ਨਿਦਸ੍ਸਨਪਦਾਨਿ. ਸੋ ਪਰਿਭਵਤਿ, ਤੇ ਪਰਿਭਵਨ੍ਤਿ, ਪਰਿਭਵਤਿ, ਪਰਿਭਵਨ੍ਤਿ. ਸਪਤ੍ਤੋ ਅਭਿਭਵਿਯਤੇ, ਸਬ੍ਬਾ ਵਿਤ੍ਯਾ’ਨੁਭੂਯਤੇ, ਅਭਿਭਵਿਯਤੇ, ਅਨੁਭੂਯਤੇਤਿ. ਯਤ੍ਥ ਸਤਿਪਿ ਨਾਮਸ੍ਸ ਸਾਧਕਵਾਚਕਤ੍ਤੇ ਅਪਚ੍ਚਤ੍ਤਵਚਨਤ੍ਤਾ ਆਖ੍ਯਾਤਪਦੇਨ ਤੁਲ੍ਯਾਧਿਕਰਣਤਾ ਨ ਲਬ੍ਭਤਿ, ਤਤ੍ਥ ਕਮ੍ਮਵਾਚਕਂ ਪਚ੍ਚਤ੍ਤਵਚਨਭੂਤਂ ਤੁਲ੍ਯਾਧਿਕਰਣਪਦਂ ਪਟਿਚ੍ਚ ਪਠਮਪੁਰਿਸਾਦਯੋ ਤਯੋ ਲਬ੍ਭਨ੍ਤਿ. ਤਂ ਯਥਾ? ਪਰਿਭਵਿਯ੍ਯਤੇ ਪੁਰਿਸੋ ਦੇਵਦਤ੍ਤੇਨ, ਪਰਿਭਵਿਯ੍ਯਸੇ ਤ੍ਵਂ ਦੇਵਦਤ੍ਤੇਨ, ਪਰਿਭਵਿਯ੍ਯਮ੍ਹੇ ਮਯਂ ਅਕੁਸਲੇਹਿ ਧਮ੍ਮੇਹਿ. ਏਤ੍ਥ ਪਨਿਦਂ ਵਚਨਂ ਨ ਵਤ੍ਤਬ੍ਬਂ ‘‘ਨਿਨ੍ਦਨ੍ਤਿ ਤੁਣ੍ਹਿਮਾਸਿਨ’ਨ੍ਤਿਆਦੀਸੁ ਸਤਿਪਿ ਨਾਮਸ੍ਸ ਕਮ੍ਮਵਾਚਕਤ੍ਤੇ ਅਪਚ੍ਚਤ੍ਤਵਚਨਤ੍ਤਾ ਆਖ੍ਯਾਤਪਦੇਨ ਤੁਲ੍ਯਾਧਿਕਰਣਤਾ ਨ ਲਬ੍ਭਤੀਤਿ ਪਠਮਪੁਰਿਸੁਪ੍ਪਤ੍ਤਿ ਨ ਸਿਯਾ’’ਤਿ. ਕਸ੍ਮਾਤਿ ਚੇ? ‘‘ਨਿਨ੍ਦਨ੍ਤਿ ਤੁਣ੍ਹਿਮਾਸਿਨ’’ਨ੍ਤਿਆਦੀਸੁ ‘‘ਜਨਾ’’ਤਿ ਅਜ੍ਝਾਹਰਿਤਬ੍ਬਸ੍ਸ ਸਾਧਕਵਾਚਕਸ੍ਸ ਨਾਮਸ੍ਸ ਸਦ੍ਧਿਮਾਖ੍ਯਾਤਪਦੇਨ ਤੁਲ੍ਯਾਧਿਕਰਣਭਾਵਸ੍ਸ ਇਚ੍ਛਿਤਤ੍ਤਾ. ਏਵਮੁਤ੍ਤਰਤ੍ਰਾਪਿ ਨਯੋ.

ਮਜ੍ਝਿਮਪੁਰਿਸੋ ਆਖ੍ਯਾਤਪਦੇਨ ਤੁਲ੍ਯਾਧਿਕਰਣੇ ਸਾਧਕਵਾਚਕੇ ਵਾ ਕਮ੍ਮਵਾਚਕੇ ਵਾ ਪਚ੍ਚਤ੍ਤਵਚਨਭੂਤੇ ਤੁਮ੍ਹਸਦ੍ਦੇ ਪਯੁਜ੍ਜਮਾਨੇਪਿ, ਤਟ੍ਠਾਨਿਯਤ੍ਤੇ ਸਤਿ ਅਪ੍ਪਯੁਜ੍ਜਮਾਨੇਪਿ ਸਬ੍ਬਧਾਤੂਹਿ ਪਰੋ ਹੋਤਿ. ਤ੍ਵਂ ਅਤਿਭਵਸਿ, ਤੁਮ੍ਹੇ ਅਤਿਭਵਥ, ਅਤਿਭਵਸਿ, ਅਤਿਭਵਥ. ਤ੍ਵਂ ਪਰਿਭਵਿਯਸੇ ਦੇਵਦਤ੍ਤੇਨ, ਤੁਮ੍ਹੇ ਪਰਿਭਵਿਯਵ੍ਹੇ. ਯਤ੍ਥ ਸਤਿਪਿ ਤੁਮ੍ਹਸਦ੍ਦਸ੍ਸ ਸਾਧਕਵਾਚਕਤ੍ਤੇ ਅਪਚ੍ਚਤ੍ਤਵਚਨਤ੍ਤਾ ਆਖ੍ਯਾਤਪਦੇਨ ਤੁਲ੍ਯਾਧਿਕਰਣਤਾ ਨ ਲਬ੍ਭਤਿ, ਨ ਤਤ੍ਥ ਮਜ੍ਝਿਮਪੁਰਿਸੋ ਹੋਤਿ. ਇਤਰੇ ਪਨ ਦ੍ਵੇ ਹੋਨ੍ਤਿ ਕਮ੍ਮਵਾਚਕਂ ਪਚ੍ਚਤ੍ਤਵਚਨਭੂਤਂ ਤੁਲ੍ਯਾਧਿਕਰਣਪਦਂ ਪਟਿਚ੍ਚ. ਤਂ ਯਥਾ? ਤਯਾ ਅਭਿਭਵਿਯਤੇ ਸਪਤ੍ਤੋ, ਤਯਾ ਅਭਿਭਵਿਯੇ ਅਹਂ.

ਉਤ੍ਤਮਪੁਰਿਸੋ ਆਖ੍ਯਾਤਪਦੇਨ ਤੁਲ੍ਯਾਧਿਕਰਣੇ ਸਾਧਕਵਾਚਕੇ ਵਾ ਕਮ੍ਮਵਾਚਕੇ ਵਾ ਪਚ੍ਚਤ੍ਤਵਚਨਭੂਤੇ ਅਮ੍ਹਸਦ੍ਦੇ ਪਯੁਜ੍ਜਮਾਨੇਪਿ, ਤਟ੍ਠਾਨਿਯਤ੍ਤੇ ਸਤਿ ਅਪ੍ਪਯੁਜ੍ਜਮਾਨੇਪਿ ਸਬ੍ਬਧਾਤੂਹਿ ਪਰੋ ਹੋਤਿ. ਅਹਂ ਪਰਿਭਵਾਮਿ, ਮਯਂ ਪਰਿਭਵਾਮ, ਪਰਿਭਵਾਮਿ, ਪਰਿਭਵਾਮ. ਅਹਂ ਪਰਿਭਵਿਯ੍ਯਾਮਿ ਅਕੁਸਲੇਹਿ ਧਮ੍ਮੇਹਿ, ਮਯਂ ਪਰਿਭਵਿਯ੍ਯਾਮ, ਪਰਿਭਵਿਯ੍ਯਾਮਿ, ਪਰਿਭਵਿਯ੍ਯਾਮ. ਯਤ੍ਥ ਸਤਿਪਿ ਅਮ੍ਹਸਦ੍ਦਸ੍ਸ ਸਾਧਕਵਾਚਕਤ੍ਤੇ ਅਪਚ੍ਚਤ੍ਤਵਚਨਤ੍ਤਾ ਆਖ੍ਯਾਤਪਦੇਨ ਤੁਲ੍ਯਾਧਿਕਰਣਤਾ ਨ ਲਬ੍ਭਤਿ, ਨ ਤਤ੍ਥ ਉਤ੍ਤਮਪੁਰਿਸੋ ਹੋਤਿ. ਇਤਰੇ ਪਨ ਦ੍ਵੇ ਹੋਨ੍ਤਿ ਕਮ੍ਮਵਾਚਕਂ ਪਚ੍ਚਤ੍ਤਵਚਨਭੂਤਂ ਤੁਲ੍ਯਾਧਿਕਰਣਪਦਂ ਪਟਿਚ੍ਚ. ਤਂ ਯਥਾ? ਮਯਾ ਅਨੁਭਵਿਯਤੇ ਸਮ੍ਪਤ੍ਤਿ, ਮਯਾ ਅਭਿਭਵਿਯਸੇ ਤ੍ਵਂ. ਏਵਂ ਯਤ੍ਥ ਯਤ੍ਥ ਸਾਧਕਵਾਚਕਾਨਂ ਵਾ ਕਮ੍ਮਵਾਚਕਾਨਂ ਵਾ ਨਾਮਾਦੀਨਂ ਪਚ੍ਚਤ੍ਤਵਚਨਭੂਤਾਨਂ ਆਖ੍ਯਾਤਪਦੇਹਿ ਤੁਲ੍ਯਾਧਿਕਰਣਤ੍ਤੇ ਲਦ੍ਧੇ ਤਤ੍ਥ ਤਤ੍ਥ ਪਠਮਪੁਰਿਸਾਦਯੋ ਲਬ੍ਭਨ੍ਤਿ, ਤਸ੍ਮਾ ਨਾਮਾਦੀਨਂ ਪਚ੍ਚਤ੍ਤਵਚਨਭੂਤਾਨਂ ਤੁਲ੍ਯਾਧਿਕਰਣਭਾਵੋਯੇਵ ਪਠਮਪੁਰਿਸਾਦੀਨਮੁਪ੍ਪਤ੍ਤਿਯਾ ਕਾਰਣਂ.

ਦ੍ਵਿਨ੍ਨਂ ਤਿਣ੍ਣਂ ਵਾ ਪੁਰਿਸਾਨਮੇਕਾਭਿਧਾਨੇ ਪਰੋ ਪੁਰਿਸੋ ਗਹੇਤਬ੍ਬੋ. ਏਤ੍ਥ ਏਕਾਭਿਧਾਨਂ ਨਾਮ ਏਕਤੋ ਅਭਿਧਾਨਂ ਏਕਕਾਲਾਭਿਧਾਨਞ੍ਚ. ਤਞ੍ਚ ਖੋ ਚਸਦ੍ਦਪਯੋਗੇਯੇਵ, ਅਚਸਦ੍ਦਪਯੋਗੇ ਭਿਨ੍ਨਕਾਲਾਭਿਧਾਨੇ ਤਗ੍ਗਹਣਾਭਾਵਤੋ. ‘‘ਤੁਮ੍ਹੇ ਅਤ੍ਥਕੁਸਲਾ ਭਵਥ, ਮਯਮਤ੍ਥਕੁਸਲਾ ਭਵਾਮ’’ ਇਚ੍ਚੇਵਮਾਦਯੋ ਤਪ੍ਪਯੋਗਾ. ਤਤ੍ਥ ਤੁਮ੍ਹੇ ਅਤ੍ਥਕੁਸਲਾ ਭਵਥ – ਇਚ੍ਚੇਤਸ੍ਮਿਂ ਵੋਹਾਰੇ ‘‘ਸੋ ਚ ਅਤ੍ਥਕੁਸਲੋ ਭਵਤਿ, ਤ੍ਵਞ੍ਚ ਅਤ੍ਥਕੁਸਲੋ ਭਵਸਿ, ਤੁਮ੍ਹੇ ਅਤ੍ਥਕੁਸਲਾ ਭਵਥਾ’’ਤਿ ਏਵਂ ਦ੍ਵਿਨ੍ਨਮੇਕਾਭਿਧਾਨੇ ਪਰੋ ਪੁਰਿਸੋ ਗਹੇਤਬ੍ਬੋ. ‘‘ਮਯਮਤ੍ਥਕੁਸਲਾ ਭਵਾਮ’’ ਇਚ੍ਚੇਤਸ੍ਮਿਂ ਪਨ ‘‘ਸੋ ਚ ਅਤ੍ਥਕੁਸਲੋ ਭਵਤਿ, ਅਹਞ੍ਚ ਅਤ੍ਥਕੁਸਲੋ ਭਵਾਮਿ, ਮਯਮਤ੍ਥਕੁਸਲਾ ਭਵਾਮਾ’’ਤਿ ਵਾ ‘‘ਤ੍ਵਞ੍ਚ ਅਤ੍ਥਕੁਸਲੋ ਭਵਸਿ, ਅਹਞ੍ਚ ਅਤ੍ਥਕੁਸਲੋ ਭਵਾਮਿ, ਮਯਮਤ੍ਥਕੁਸਲਾ ਭਵਾਮਾ’’ਤਿ ਵਾ ਏਵਮ੍ਪਿ ਦ੍ਵਿਨ੍ਨਮੇਕਾਭਿਧਾਨੇ ਪਰੋ ਪੁਰਿਸੋ ਗਹੇਤਬ੍ਬੋ. ‘‘ਸੋ ਚ ਅਤ੍ਥਕੁਸਲੋ ਭਵਤਿ, ਤ੍ਵਞ੍ਚ ਅਤ੍ਥਕੁਸਲੋ ਭਵਸਿ, ਅਹਞ੍ਚ ਅਤ੍ਥਕੁਸਲੋ ਭਵਾਮਿ, ਮਯਮਤ੍ਥਕੁਸਲਾ ਭਵਾਮਾ’’ਤਿ ਵਾ ‘‘ਸੋ ਚ ਅਤ੍ਥਕੁਸਲੋ ਭਵਤਿ, ਤੇ ਚ ਅਤ੍ਥਕੁਸਲਾ ਭਵਨ੍ਤਿ, ਤ੍ਵਞ੍ਚ ਅਤ੍ਥਕੁਸਲੋ ਭਵਸਿ, ਤੁਮ੍ਹੇ ਚ ਅਤ੍ਥਕੁਸਲਾ ਭਵਥ, ਅਹਞ੍ਚ ਅਤ੍ਥਕੁਸਲੋ ਭਵਾਮਿ, ਮਯਮਤ੍ਥਕੁਸਲਾ ਭਵਾਮਾ’’ਤਿ ਵਾ ਏਵਂ ਤਿਣ੍ਣਮੇਕਾਭਿਧਾਨੇ ਪਰੋ ਪੁਰਿਸੋ ਗਹੇਤਬ੍ਬੋ.

ਅਪਰੋਪਿ ਅਤ੍ਥਨਯੋ ਵੁਚ੍ਚਤਿ – ‘‘ਤ੍ਵਞ੍ਚ ਅਤ੍ਥਕੁਸਲੋ ਭਵਸਿ, ਸੋ ਚ ਅਤ੍ਥਕੁਸਲੋ ਭਵਤਿ, ਤੁਮ੍ਹੇ ਅਤ੍ਥਕੁਸਲਾ ਭਵਥਾ’’ਤਿ ਵਾ ‘‘ਅਹਞ੍ਚ ਅਤ੍ਥਕੁਸਲੋ ਭਵਾਮਿ, ਸੋ ਚ ਅਤ੍ਥਕੁਸਲੋ ਭਵਤਿ, ਮਯਮਤ੍ਥਕੁਸਲਾ ਭਵਾਮਾ’’ਤਿ ਵਾ ਇਮਿਨਾ ਨਯੇਨ ਅਨੇਕਪ੍ਪਭੇਦੋ ਅਤ੍ਥਨਯੋ. ਏਵਂ ਸੇਸਾਸੁ ਵਿਭਤ੍ਤੀਸੁ ਪਞ੍ਚਮੀਸਤ੍ਤਮਿਯਾਦੀਸੁ ਪਰੋਪੁਰਿਸੋ ਗਹੇਤਬ੍ਬੋ. ਸਬ੍ਬੇਸੁ ਚ ਕ੍ਰਿਯਾਪਦੇਸੁ ਬਵ੍ਹਤ੍ਥਵਾਚਕੇਸੁ ਬਹੁਵਚਨਨ੍ਤੇਸੁ, ਨ ਪਨ ਬਹੁਵਚਨਨ੍ਤੇਸੁਪਿ ਏਕਸ੍ਸਤ੍ਤਨੋ ਵਾਚਕੇਸੁ ਗਰੁਕਾਤਬ੍ਬਸ੍ਸੇਕਸ੍ਸਤ੍ਥਸ੍ਸ ਵਾਚਕੇਸੁ ਚ ਕ੍ਰਿਯਾਪਦੇਸੁ. ਏਤ੍ਥ ਚੋਦਨਾਸਨ੍ਦੀਪਨਿਯੋ ਇਮਾ ਗਾਥਾ –

‘‘ਤ੍ਵਞ੍ਚ ਭਵਸਿ ਸੋ ਚਾਪਿ, ਭਵਤਿ’’ਚ੍ਚਾਦਿਭਾਸਨੇ;

‘‘ਤੁਮ੍ਹੇ ਭਵਥ’’ ਇਚ੍ਚਾਦਿ, ਪਰੋਪੋਸੋ ਕਥਂ ਸਿਯਾ?;

‘‘ਅਹਂ ਭਵਾਮਿ ਸੋ ਚਾਪਿ, ਭਵਤਿ’’ਚ੍ਚਾਦਿਭਾਸਨੇ;

‘‘ਮਯਂ ਭਵਾਮ’’ਇਚ੍ਚਾਦਿ, ਉਤ੍ਤਮੋ ਚ ਕਥਂ ਸਿਯਾ?;

ਏਤ੍ਥ ਚ ਵੁਚ੍ਚਤੇ –

ਪਚ੍ਛਾ ਵੁਤ੍ਤੋ ਪਰੋ ਨਾਮ, ਸਞ੍ਞਾਯ ਪਟਿਪਾਟਿਯਾ;

ਏਵਂ ਪਨ ਗਹੇਤਬ੍ਬੋ, ਪਰੋਪੁਰਿਸਨਾਮਕੋ.

ਪਠਮਮ੍ਹਾ ਪਰੋ ਨਾਮ, ਮਜ੍ਝਿਮੋ ਉਤ੍ਤਮੋਪਿ ਚ;

ਮਜ੍ਝਿਮਮ੍ਹਾ ਪਰੋ ਨਾਮ, ਉਤ੍ਤਮੋ ਪੁਰਿਸੋ ਰੁਤੋ.

ਏਵਂ ਤੁ ਗਹਣਞ੍ਹੇਤ੍ਥ, ਵੋਹਾਰਸ੍ਸਾਨੁਲੋਮਕਂ;

ਦੋਸੋ ਤਦਨੁਲੋਮਮ੍ਹਿ, ਗਹਣਸ੍ਮਿਂ ਨ ਵਿਜ੍ਜਤਿ.

‘‘ਤ੍ਵਞ੍ਚ ਭਦ੍ਦੇ ਸੁਖੀ ਹੋਹਿ, ਏਸੋ ਚਾਪਿ ਮਹਾਮਿਗੋ’’;

ਇਤਿ ਪਾਠੋ ਯਤੋ ਦਿਟ੍ਠੋ, ਤਸ੍ਮਾ ਏਵਂ ਵਦੇਮਸੇ.

‘‘ਤੁਮ੍ਹੇ ਦ੍ਵੇ ਸੁਖਿਤਾ ਹੋਥ’’, ਇਚ੍ਚਤ੍ਥੋ ਤਤ੍ਥ ਦਿਸ੍ਸਤਿ;

ਏਵਂਪ੍ਯਯਂ ਨਯੋ ਵੁਤ੍ਤੋ, ਅਤ੍ਤਨੋਮਤਿਯਾ ਮਮ.

ਅਤ੍ਤਨੋਮਤਿ ਕਿਞ੍ਚਾਪਿ, ਕਥਿਤਾ ਸਬ੍ਬਦੁਬ੍ਬਲਾ;

ਤਥਾਪਿ ਨਯਮਾਦਾਯ, ਕਥਿਤਤ੍ਤਾ ਅਕੋਪਿਯਾ.

‘‘ਧਮ੍ਮੇਨ ਰਜ੍ਜਂ ਕਾਰੇਨ੍ਤਂ, ਰਟ੍ਠਾ ਪਬ੍ਬਾਜਯਿਤ੍ਥ ਮਂ;

ਤ੍ਵਞ੍ਚ ਜਾਨਪਦਾ ਚੇਵ, ਨੇਗਮਾ ਚ ਸਮਾਗਤਾ’’.

‘‘ਅਹਞ੍ਚ ਮਦ੍ਦਿਦੇਵੀ ਚ, ਜਾਲੀਕਣ੍ਹਾਜਿਨਾ ਚੁਭੋ;

ਅਞ੍ਞਮਞ੍ਞਂ ਸੋਕਨੁਦਾ, ਵਸਾਮ ਅਸ੍ਸਮੇ ਤਦਾ’’.

ਏਤਾ ਗਾਥਾਪਿ ਏਤਸ੍ਸ, ਅਤ੍ਥਸ੍ਸ ਪਨ ਸਾਧਿਕਾ;

ਤਾਸੁ ਵੁਤ੍ਤਨਯੇਨੇਵ, ਅਤ੍ਥੋ ਸੁਪਾਕਟੋ ਸਿਯਾ;

ਏਵਂ ਵਿਞ੍ਞੂਹਿ ਵਿਞ੍ਞੇਯ੍ਯਂ, ਬਹੁਨਾ ਭਾਸਿਤੇਨ ਕਿਂ.

ਆਕਾਰੇਨ ਮਨਾਪੇਨ, ਕਥਨੇ ਯੇਨ ਕੇਨਚਿ;

ਨ ਵਿਰੁਜ੍ਝਤਿ ਚੇ ਅਤ੍ਥੋ, ਤਂ ਪਮਾਣਂ ਸੁਧੀਮਤਂ.

ਪੁਰਿਸਤ੍ਤਯਤੋ ਏਸੋ, ਪਰੋਪੁਰਿਸਨਾਮਕੋ;

ਨੁਪਲਬ੍ਭਤਿ ਪਚ੍ਚੇਕਂ, ਤਦਨ੍ਤੋਗਧਤੋਵ ਯਂ.

ਪਾਟਵਤ੍ਥਾਯ ਸੋਤੂਨਂ, ਵੋਹਾਰਤ੍ਥੇਸੁ ਸਬ੍ਬਸੋ;

ਵਿਸੁਂ ਅਲਬ੍ਭਮਾਨੋਪਿ, ਲਬ੍ਭਮਾਨੋਵ ਉਦ੍ਧਟੋ.