੭. ਵੇਸ੍ਸਾਮਿਤ੍ਤਾਯ ਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਜਮ੍ਬੁਦੀਪੇ ਕਿਰ ਕੋਸਮ੍ਬਿਨਗਰੇ ਕੋਸਮ੍ਬਿਰਞ੍ਞੋ ਵੇਸ੍ਸਾਮਿਤ੍ਤਾਨਾਮ ਅਗ੍ਗਮਹੇਸੀ ਅਹੋਸਿ. ਤਦਾ ਭਗਵਾ ਕੋਸਮ੍ਬਿਯਂ ਪਟਿਵਸਤਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਚਾਰਿਕਂ ਚਰਮਾਨੋ. ਤਸ੍ਮਿਂ ਸਮਯੇ ਸਾ ਰਞ੍ਞਾ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਅਨੋਪਮਾਯ ਬੁਦ੍ਧਲੀਲ਼ਾਯ ਮਧੁਰੇਨ ਸਰੇਨ ਦੇਸੇਨ੍ਤਸ੍ਸ ਭਗਵਤੋ ਧਮ੍ਮਂ ਸੁਤ੍ਵਾ ਪਸਨ੍ਨਾ ਸਰਣੇਸੁ ਪਤਿਟ੍ਠਾਯ ਬੁਦ੍ਧਮਾਮਿਕਾ ਹੁਤ੍ਵਾ ਵਿਹਰਤਿ. ਅਥਾ ਪਰਭਾਗੇ ਤਸ੍ਸ ਰਞ੍ਞੋ ਰਜ੍ਜਤ੍ਥਾਯ ਪਚ੍ਚਨ੍ਤਰਾਜਾ ਯੁਦ੍ਧਸਜ੍ਜੋ ਰਜ੍ਜਂ ਵਾ ਦੇਤੁ, ਯੁਦ੍ਧਂਵਾਤਿ ਪਣ੍ਣਂ ਪਹਿਣਿ. ਤਂ ਸੁਤ੍ਵਾ ਰਾਜਾ ਮਹਤਿਯਾ ਸੇਨਾਯ ਪਰਿਵੁਤੋ ਯੁਦ੍ਧਭੂਮਿਂ ਗਚ੍ਛਨ੍ਤੋ ਮਹੇਸਿਯਾ ਸਦ੍ਧਿਂ ਗਨ੍ਤ੍ਵਾ ਖਨ੍ਧਾਵਾਰਂ ਨਿਵਾਸੇਤ੍ਵਾ ਤਸ੍ਸਾ ਏਵਮਾਹ. ਭਦ੍ਦੇ ਸਙ੍ਗਾਮਸੀਸੇ ਜਯਪਰਾਜਯੋ ਨਾਮ ਨ ਸਕ੍ਕਾ ਵਿਞ੍ਞਾਤੁਂ. ਸਚੇ ਮੇ ਪਰਾਜਯੋ ਅਭਵਿਸ੍ਸ, ਪੁਰੇਤਰਮੇਵ ਰਤ੍ਤਪਤਾਕਂ ਉਸ੍ਸਾਪੇਸ੍ਸਾਮਿ, ਤੇਨ ਅਭਿਞ੍ਞਾਣੇਨ ਤ੍ਵਂ ਕੋਸਮ੍ਬਿਮੇਵ ਗਚ੍ਛਾਹੀਤਿ ਅਨੁਸਾਸਿਤ੍ਵਾ ਸਙ੍ਗਾਮ ਮਣ੍ਡਲਂ ਗਨ੍ਤ੍ਵਾ ਮਹਾਰਣਂ ਕਰੋਨ੍ਤੋ ਅਤ੍ਤਨੋ ਪਰਾਜਯਭਾਵਂ ਞਤ੍ਵਾ ਮਾਤੁਗਾਮਂ ਸਰਿਤ੍ਵਾ ਰਤ੍ਤਦ੍ਧਜਂ ਉਸ੍ਸਾਪੇਤ੍ਵਾ ਯੁਜ੍ਝਨ੍ਤੋ ਰਣੇ ਪਤਿ. ਅਥ ਸਾ ਰਤ੍ਤਪਤਾਕਂ ਦਿਸ੍ਵਾ ਪਰਾਜਿਤੋ ਨੂਨ ਮੇ ਸਾਮਿਕੋਤਿ ਭਯੇਨ ਪਲਾਯਿਤੁਮਾਰਭਿ. ਅਥ ਤਂ ਚੋਰਰਞ੍ਞੋ ਮਨੁਸ੍ਸਾ ਦਿਸ੍ਵਾ ਨੂਨਾਯਂ ਰਞ੍ਞੋ ਅਗ੍ਗਮਹੇਸੀਤਿ ਞਤ੍ਵਾ ਅਤ੍ਤਨੋ ਰਾਜਾਨਂ ਦਸ੍ਸੇਸੁਂ, ਰਾਜਾ ਤਂ ਦਿਸ੍ਵਾ ਪਟਿਬਦ੍ਧਚਿਤ੍ਤੋ ਮਮੇਤਂ ਅਭਿਸੇਕਂ ਕਰੋਥਾਤਿ ਅਮਚ੍ਚੇ ਆਣਾਪੇਸਿ. ਅਮਚ੍ਚਾ ਤਂ ਅਭਿਸੇਕਤ੍ਥਾਯ ਯਾਚਿਂਸੁ, ਸਾ ਨ ਮੇ ਭਣੇ ਅਭਿਸੇਕੇਨਤ੍ਥੋਤਿ ਨ ਇਚ੍ਛਿ. ਅਮਚ੍ਚਾ ਤਮਤ੍ਥਂ ਰਞ੍ਞੋ ਆਰੋਚੇਸੁਂ. ਰਾਜਾ ਨਂ ਪਕ੍ਕੋਸਾਪੇਤ੍ਵਾ ਕਸ੍ਮਾ ਨ ਇਚ੍ਛਸੀਤਿ ਪੁਚ੍ਛਿ. ਸਾ ਏਵਮਾਹ.

੧. ਸੁਣੋਹਿ ਸਾਧੁਕਂ ਦੇਵ, ਭਾਸਮਾਨਾਯ ਮੇ ਵਚੋ;

ਭਤ੍ਤਾ ਮਯ੍ਹਂ ਮਤੋ ਅਜ੍ਜ, ਸਬ੍ਬਸਮ੍ਪਤ੍ਤਿਦਾਯਕੋ.

੨. ਕਤ੍ਵਾਨ ਸੋਭਿਸੇਕਂ ਮਂ, ਅਤ੍ਤਨੋ ਹਦਯਂ ਵਿਯ;

ਪਾਲੇਤਿ ਤਂ ਸਰਨ੍ਤਸ੍ਸਾ, ਸੋਕਗ੍ਗਿ ਦਹਤੇ ਮਨਂ.

੩. ਮਹਾਰਾਜ ਸਚਞ੍ਞਸ੍ਸ, ਅਸ੍ਸ ਮਗ੍ਗਮਹੇਸਿਕਾ;

ਤਮ੍ਹਾ ਦੁਕ੍ਖਾ ਨ ਮੁਚ੍ਚਾਮਿ, ਤੇਨਾਹਂ ਤਂ ਨ ਪਤ੍ਥਯੇ.

੪. ਸੋਕਗ੍ਗਿਨਾ ਪਦਿਤ੍ਤਾਹਂ, ਸੋਕੇ ਸੋਕਂ ਕਥਂ ਖਿਪੇ;

ਜਲਨ੍ਤਗ੍ਗਿਮ੍ਹੀ ਕੋ ਨਾਮ, ਪਲਾਲਂ ਪਕ੍ਖਿਪੇ ਬੁਧੋ.

੫. ਪਿਯਵਿਪ੍ਪਯੋਗਦੁਕ੍ਖਂ, ਤਂ ਚਿਨ੍ਤਯਨ੍ਤੀ ਪੁਨਪ੍ਪੁਨਂ;

ਤਮ੍ਹਾ ਦੁਕ੍ਖਾ ਨ ਮੁਚ੍ਚਾਮਿ, ਤਸ੍ਮਾਹਂ ਤਂ ਨ ਪਤ੍ਥਯੇਤਿ.

ਤਂ ਸੁਤ੍ਵਾ ਰਾਜਾ ਕੋਧੇਨਾਭਿਭੂਤੋ ਸਚੇ ਨਾਭਿਸਿਞ੍ਚਿਸ੍ਸਸਿ, ਅਗ੍ਗਿਮ੍ਹਿ ਤਂ ਪਕ੍ਖਿਪਿਸ੍ਸਾਮੀਤਿ ਵਤ੍ਵਾ ਮਹਨ੍ਤਂ ਦਾਰੁਚਿਤਕਂ ਕਾਰਾਪੇਤ੍ਵਾ ਅਗ੍ਗਿਂ ਦਤ੍ਵਾ ਏਕਪਜ੍ਜੋਤੇ ਜਾਤੇ ਏਤ੍ਤ ਪਵਿਸਾਤਿ ਆਹ. ਅਥ ਸਾ ਯਾਚਨ੍ਤੀ ਰਾਜਾਨਂ ਆਹ.

੬. ਪਾਪੋ ਨਿਪ੍ਪਾਪਿਨਂ ਰਾਜ, ਪਾਤਨਂ ਖਲੁ ਪਾਵਕੇ;

ਹੋਤਿ ਪਾਪਫਲਂ ਤਸ੍ਸ, ਪਚ੍ਚਤ੍ਤੇਚ ਪਰਤ੍ਥਚ.

੭. ਪੁਰਾਤਨੇਹਿ ਭੂਪਾਲ, ਸਮਣਬ੍ਰਹ੍ਮਣੇਸੁਚ;

ਮਾਤਾਪਿਤੁਸੁ ਬਾਲੇਸੁ, ਰੋਗੇਨਾ ਤੁਰਇਤ੍ਥਿਸੁ;

ਨਪ੍ਪਸਤ੍ਥੋ ਵਧੋ ਦੇਵ, ਤਸ੍ਮਾਹਂ ਨ ਵਧਾਰਹਾਤਿ.

ਤਂ ਸੁਤ੍ਵਾਪਿ ਰਾਜਾ ਅਸਦ੍ਦਹਨ੍ਤੋ ਮਨੁਸ੍ਸੇ ਆਣਾਪੇਸਿ. ਏਤਾਯ ਹਤ੍ਥਪਾਦੇ ਗਹੇਤ੍ਵਾ ਅਗ੍ਗਿਮ੍ਹਿ ਪਕ੍ਖਿਪਥਾਤਿ ਤੇ ਤਥਾ ਕਰਿਂਸੁ, ਅਥ ਸਾ ਅਗ੍ਗਿਮ੍ਹਿ ਪਕ੍ਖਿਪਮਾਨਾ ਨਤ੍ਥੇਤ੍ਥ ਮੇ ਕੋਚਿ ਪਟਿਸਰਣੋਤਿ ਸਰਣਮੇਵ ਸਰਣਂ ਕਰੋਮੀਤਿ ਚਿਨ੍ਤੇਤ੍ਵਾ ‘‘ਬੁਦ੍ਧਂ ਸਰਣਂ ਗਚ੍ਛਾਮਿ, ਧਮ੍ਮਂ ਸਰਣਂ ਗਚ੍ਛਾਮਿ, ਸਙ੍ਘਂ ਸਰਣਂ ਗਚ੍ਛਾਮੀਤਿ’’ ਵਦਨ੍ਤੀ ਮਨਸਾਚ ਅਨੁਸ੍ਸਰਨ੍ਤੀ ਅਗ੍ਗਿਮ੍ਹਿ ਪਤਿ, ਤਥਾਵਿਧੋਪਿ ਅਗ੍ਗਿ ਤਸ੍ਸਾ ਸਰੀਰੇ ਲੋਮਕੂਪਮਤ੍ਤਮ੍ਪਿ ਉਣ੍ਹਾਕਾਰਂ ਕਾਤੁਂ ਨਾਸਕ੍ਖਿ. ਪਦੁਮਗਬ੍ਭਂ ਪਵਿਟ੍ਠਾ ਵਿਯ ਸੀਤਿਭੂਤਸਰੀਰਾ ਅਹੋਸਿ. ਰਾਜਾ ਤਂ ਅਚ੍ਛਰਿਯਂ ਦਿਸ੍ਵਾ ਸਂਵਿਗ੍ਗੋ ਲੋਮਹਟ੍ਠਜਾਤੋ ਵੇਗੇਨ ਤਂ ਉਪਸਙ੍ਕਮਿਤ੍ਵਾ ਉਭੋਹਿ ਹਤ੍ਥੇਹਿ ਪਗ੍ਗਯ੍ਹ ਉਰੇ ਨਿਪਜ੍ਜਾਪੇਤ੍ਵਾ ਰਾਜਾਸਨੇ ਨਿਸੀਦਾਪੇਤ੍ਵਾ ਅਞ੍ਜਲਿਂ ਗਗ੍ਗਯ੍ਹ ਠਿਤੋ ਕਸ੍ਮਾ ਤੇ ਤਂ ਅਗ੍ਗਿ ਸਰੀਰਂ ਮਾ ਪਰਿਦਹੀਤਿ ਪੁਚ੍ਛਿ. ਸਾ ਤਂ ਕਾਰਣਂ ਕਥੇਨ੍ਤੀ ਏਵ ਮਾਹ.

੮. ਮਾਤਾ ਪਿਤਾਚ ਞਾਤੀਚ, ਪਰਿਵਾਰਾਚ ਸੋਹਦਾ;

ਮਨ੍ਤੋ ਸਧਾਦਯੋਚਾਪਿ, ਮਹੇਸਕ੍ਖਾਚ ਦੇਵਤਾ.

੯. ਏਤੇਚ ਞ੍ਞੇਚ ਭੂਪਾਲ, ਸਤ੍ਤਾਨਂ ਭਯ ਮਾਗਤੇ;

ਰਕ੍ਖਿਤੁਂ ਨੇਵ ਸਕ੍ਕੋਨ੍ਤਿ, ਹਿਤ੍ਵਾਨ ਸਰਣਤ੍ਤਯਂ.

੧੦. ਅਗਾਹਂ ਬੁਦ੍ਧਂ ਸਰਣਂ, ਬੁਦ੍ਧੋ ਮੇ ਸਰਣਂ ਇਤਿ;

ਤੇਨ ਤੇਜੇਨ ਮਂ ਰਾਜ, ਜਲਨ੍ਤੋ ਅਗ੍ਗਿ ਨੋ ਦਹਿ.

੧੧. ਅਗਾਹਂ ਧਮ੍ਮਂ ਸਰਣਂ, ਧਮ੍ਮੋ ਮੇ ਸਰਣਂ ਇਤਿ;

ਤੇਨ ਤੇਜੇਨ ਮਂ ਰਾਜ, ਜਲਨ੍ਤੋ ਅਗ੍ਗਿ ਨੋ ਦਹਿ.

੧੨. ਅਗਾਹਂ ਸਙ੍ਘਂ ਸਰਣਂ, ਸਙ੍ਘੋ ਮੇ ਸਰਣਂ ਇਤਿ;

ਤੇਨ ਤੇਜੇਨ ਮਂ ਰਾਜ, ਜਲਨ੍ਤੋ ਅਗ੍ਗਿ ਨੋ ਦਹਿ.

੧੩. ਏਵਂ ਮਹਾਨੁਭਾਵਨ੍ਤਂ, ਪਚ੍ਚਕ੍ਖਂ ਏਹਿਪਸ੍ਸਿਕਂ;

ਨਾਨੋ ਪਦ੍ਦਵ ਵਿਦ੍ਧਂਸਿਂ, ਨਾਨਾਸਮ੍ਪਤ੍ਤਿਦਾਯਕਂ.

੧੪. ਸਰਣਤ੍ਤਯਞ੍ਹਿ ਯੋ ਸਤ੍ਤੋ, ਨ ਸਮਾਦਾਯ ਗਣ੍ਹਤਿ;

ਇਧਵਾ ਪਰਤ੍ਥਵਾ ਲੋਕੇ, ਸੋ ਸੁਖਂ ਨਾਨੁਭੋਸ੍ਸਤਿ.

੧੫. ਸਰਣਤ੍ਤਯਞ੍ਹਿ ਯੋ ਸਤ੍ਤੋ, ਸੁਸਮਾਦਾਯ ਗਣ੍ਹਤਿ;

ਇਧਵਾਪਰਤ੍ਥਵਾ ਲੋਕੇ, ਸੋ ਸੁਖਾ ਨ ਵਿਹਾਯਤਿ.

੧੬. ਤਸ੍ਮਾ ਤੁਵਮ੍ਪਿ ਭੂਪਾਲ, ਗਣ੍ਹਾਹਿ ਸਰਣਤ੍ਤਯਂ;

ਤਂ ਤੇ ਭਵਤਿ ਸਬ੍ਬਤ੍ਥ, ਤਾਣਂ ਲੇਣਂ ਪਰਾਯਣਨ੍ਤਿ.

ਤਂ ਸੁਤ੍ਵਾ ਰਾਜਾ ਅਤਿਵਿਯ ਪਸਨ੍ਨਮਾਨਸੋ ਤਂ ਖਮਾਪੇਤ੍ਵਾ ਮਹਨ੍ਤਂ ਸਕ੍ਕਾਰਸਮ੍ਮਾਨਂ ਕਤ੍ਵਾ ਅਜ੍ਜਪ੍ਪਟ੍ਠਾਯ ਤ੍ਵਂ ਮਮ ਮਾਤਾਤਿ ਤਂ ਮਾਤੁਟ੍ਠਾਨੇ ਠਪੇਤ੍ਵਾ ਸਰਣ ਮਗਮਾਸਿ. ਤਸ੍ਮਿਂ ਸਨ੍ਨਿਪਤਿਤ੍ਵਾ ਠਿਤਮਹਾਜਨਾ ਤਂ ਪਾਟਿਹਾਰਿਯਂ ਦਿਸ੍ਵਾ ਸਰਣੇਸੁਚ ਸੀਲੇਸੁਚ ਪਤਿਟ੍ਠਾਯ ਦਾਨਾਦੀਨਿ ਪੁਞ੍ਞਕਮ੍ਮਾਨਿ ਕਤ੍ਵਾ ਯਥਾਕਮ੍ਮਂ ਗਤਾਤਿ.

੧੭. ਇਤਿ ਸਰਣਵਰਂ ਸਾ ਕੇਵਲਂ ਉਗ੍ਗਹੇਤ੍ਵਾ,

ਜਲਿਤਦਹਨਮਜ੍ਝੇ ਸੀਤਿਭਾਵਂ ਅਲਤ੍ਥ;

ਪਰਮਸਰਣਸੀਲਂ ਪਾਲਯਨ੍ਤਾ ਕਥਂ ਵੋ,

ਨ ਲਭਥ ਭਵਭੋਗਂ ਨਿਬ੍ਬੁਤਿਞ੍ਚਾਪਿ ਅਨ੍ਤੇਤਿ.

ਵੇਸ੍ਸਾਮਿਤ੍ਤਾਪ ਵਤ੍ਥੁਂ ਸਤ੍ਤਮਂ.