੮. ਮਹਾਮਨ੍ਧਾਤੁਵਤ੍ਥੁਮ੍ਹਿ ਅਯਮਾਨੁਪੁਬ੍ਬੀਕਥਾ

ਇਤੋ ਕਿਰ ਏਕਨਵੁਤਿਕਪ੍ਪਮਤ੍ਥਕੇ ਵਿਪਸ੍ਸੀਨਾਮ ਸਮ੍ਮਾਸਮ੍ਬੁਦ੍ਧੋ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਵਰਧਮ੍ਮਚਕ੍ਕੋ ਸਦੇਵਕੇਹਿ ਲੋਕੇਹਿ ਪੂਜਿਯਮਾਨੋ ਬਨ੍ਧੁਮਤੀਨਗਰੇ ਪਟਿਵਸਤਿ. ਤਦਾ ਸੋ ਮਨ੍ਧਾਤਾ ਤਸ੍ਮਿਂ ਨਗਰੇ ਤੁਨ੍ਨਕਾਰੋ ਹੁਤ੍ਵਾ ਨਿਬ੍ਬਤ੍ਤਿ. ਤੁਨ੍ਨਕਾਰਕਮ੍ਮੇਨ ਜੀਵਿਕਂ ਕਪ੍ਪੇਨ੍ਤੋ ਵਿਹਰਤਿ. ਤਦਾ ਸਕਲਨਗਰਵਾਸਿਨੋ ਬੁਦ੍ਧਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਮਹਾਦਾਨ ਮਦਂਸੁ. ਅਥ ਸੋ ਏਵਂ ਚਿਨ੍ਤੇਸਿ, ਸਬ੍ਬੇਪਿਮੇ ਨਗਰਵਾਸਿਨੋ ਦਾਨਂ ਦਦਨ੍ਤਿ. ਅਹਮੇਕੋਵ ਸੇਸੋ ਦੁਗ੍ਗਤਤ੍ਤਾ, ਯਜ੍ਜਾਹਮਜ੍ਜ ਬੀਜਂ ਨ ਰੋਪੇਮਿ, ਇਮਮ੍ਹਾ ਦੁਕ੍ਖਾ ਨ ਪਰਿਮੁਚ੍ਚਿਸ੍ਸਾਮੀਤਿ. ਸੋ ਵੇਗੇਨ ਤੁਨ੍ਨਕਾਰਕਮ੍ਮਂ ਪਰਿਯੇਸਿਤ੍ਵਾ ਕਿਞ੍ਚਿਮੂਲਂ ਲਭਿਤ੍ਵਾ ਤੇਨ ਏਕਸ੍ਸਾਪਿ ਦਾਨਂ ਦਾਤੁਂ ਓਕਾਸ ਮਲਦ੍ਧਾ ਆਪਣਂ ਗਨ੍ਤ੍ਵਾ ਰਾਜਮਾਸਕੇ ਗਹੇਤ੍ਵਾ ਚਙ੍ਕੋਟਕਂ ਪੂਰੇਤ੍ਵਾ ਆਦਾਯ ਬੁਦ੍ਧਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਭਤ੍ਤਗ੍ਗਂ ਗਨ੍ਤ੍ਵਾ ਠਿਤੋ ਏਵਂ ਚਿਨ੍ਤੇਸਿ, ਨਤ੍ਥਿ ਦਾਨਿ ਓਕਾਸਂ ਏਕਸ੍ਸਾਪਿ ਭਿਕ੍ਖੁਨੋ ਪਤ੍ਤੇ ਓਕਿਰਿਤੁਂ, ਅਦ੍ਧਾਹਂ ਇਮੇ ਆਕਾਸੇ ਵਿਕਿਰਿਸ੍ਸਾਮੀਤਿ ਅਪ੍ਪੇਵਨਾਮ ਪਤਮਾਨਾਨਂ ਏਕਸ੍ਸਾਪਿ ਭਿਕ੍ਖੁਨੋ ਪਤ੍ਤੇ ਏਕਮ੍ਪਿ ਪਤੇਯ੍ਯ, ਤਂ ਮੇ ਭਵਿਸ੍ਸਤਿ ਦੀਘਰਤ੍ਤਂ ਹਿਭਾਯ ਸੁਖਾਯਾਤਿ ਪਸਨ੍ਨਮਾਨਸੋ ਉਦ੍ਧਂ ਖਿਪਿ, ਤ ਤੋ ਪਤਮਾਨਾ ਤੇ ਪਰਿਵਾਰਿਕਦੇਵਤਾਨਞ੍ਚ ਭਗਵਤੋ ਆਨੁਭਾਵੇਨਚ ਬਹਿ ਅਪਤਿਤ੍ਵਾ ਭਗਵਨ੍ਤਮਾਦਿਂ ਕਤ੍ਵਾ ਸਬ੍ਬੇਸਂ ਭਿਕ੍ਖੂਨਂ ਪਤ੍ਤੇਯੇਵ ਪਤਿਂਸੁ. ਅਥ ਸੋ ਤਂ ਅਚ੍ਛਰਿਯਂ ਦਿਸ੍ਵਾ ਪਸਨ੍ਨਮਾਨਸੋ ਸਿਰਸਿ ਅਞ੍ਜਲਿਂ ਪਗ੍ਗਯ੍ਹ ਠਿਤੋ ਏਵਂ ਪਤ੍ਥਨਮਕਾਸਿ.

੧. ਇਮਿਨਾ ਮੇ ਅਧਿਕਾਰੇਨ, ਪਸਾਦੇਨ ਯਤਿਸ੍ਸਰੇ;

ਕਾਮਭੋਗੀਨਹਂ ਅਗ੍ਗੋ, ਭਵੇਯ੍ਯਂ ਜਾਤਿਜਾਤਿਯਂ.

੨. ਪਹਰਿਤ੍ਵਾ ਯਦਾ ਪਾਣਿਂ, ਓਲੋਕੇਮਿ ਨਭੋਤਲਂ;

ਸਤ੍ਤਰਤਨਸਮ੍ਪਨ੍ਨਂ, ਵਸ੍ਸਂ ਵਸ੍ਸਤੁ ਸਬ੍ਬਦਾਤਿ.

ਸੋ ਤਤੋ ਪਟ੍ਠਾਯ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਮਹਨ੍ਤਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਭਦ੍ਦਕਪ੍ਪੇ ਆਦਿਮ੍ਹਿ ਮਹਾਸਮ੍ਮਤੋ ਨਾਮ ਰਾਜਾ ਅਹੋਸਿ. ਤਸ੍ਸ ਪੁਤ੍ਤੋ ਰੋਜੋ ਨਾਮ. ਤਸ੍ਸ ਪੁਤ੍ਤੋ ਵਰਰੋਜੋ ਨਾਮ, ਤਸ੍ਸ ਪੁਤ੍ਤੋ ਕਲ੍ਯਾਣੋ ਨਾਮ, ਤਸ੍ਸ ਪੁਤ੍ਤੋ ਵਰਕਲ੍ਯਾਣੋ ਨਾਮ. ਵਰਕਲ੍ਯਾਣਸ੍ਸ ਪੁਤ੍ਤੋ ਉਪੋਸਥੋ ਨਾਮ. ਉਪੋਸਥਸ੍ਸ ਪੁਤ੍ਤੋ ਮਨ੍ਧਾਤਾ ਨਾਮ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਸਤ੍ਤਹਿ ਰਤਨੇਹਿ ਚਤੂਹਿ ਚ ਇਦ੍ਧੀਹਿ ਸਮਨ੍ਨਾਗਤੋ ਚਕ੍ਕਵਤ੍ਤਿਰਜ੍ਜਂ ਕਾਰੇਸਿ, ਤਸ੍ਸ ਵਾਮਹਤ੍ਥਂ ਸਮ੍ਮਿਞ੍ਜਿਤ੍ਵਾ ਦਕ੍ਖਿਣਹਤ੍ਥੇਨ ਅਪ੍ਪੋਟ੍ਠਿਤੇ ਆਕਾਸਤੋ ਦਿਬ੍ਬਮੇਘਾ ਵਿਯ ਜਣ੍ਣੁਪ੍ਪਮਾਣਂ ਸਤ੍ਤਰਤਨਵਸ੍ਸਂ ਵਸ੍ਸਤਿ. ਏਵਰੂਪੋ ਅਚ੍ਛਰਿਯੋ ਅਹੋਸਿ. ਸੋ ਚਤੁਰਾਸੀਤਿਵਸ੍ਸਸਹਸ੍ਸਾਨਿ ਕੁਮਾਰਕੀਲ਼ਂ ਕੀਲ਼ਿ. ਚਤੁਰਾਸੀਤਿਵਸ੍ਸਸਹਸ੍ਸਾਨਿ ਓਪਰਜ੍ਜਂ ਕਾਰੇਸਿ. ਚਤੁਰਾਸੀਤਿਵਸ੍ਸਸਹਸ੍ਸਾਨਿ ਚਕ੍ਕਵਤ੍ਤਿਰਜ੍ਜਂ ਕਾਰੇਸਿ, ਆਯੁ ਪਨਸ੍ਸ ਅਸਙ੍ਖ੍ਯੇਯ੍ਯਂ ਅਹੋਸਿ. ਸੋ ਏਕਦਿਵਸਂ ਕਾਮਤਣ੍ਹਂ ਪੂਰੇਤੁਂ ਅਸਕ੍ਕੋਨ੍ਤੋ ਉਕ੍ਕਣ੍ਠਿਤਾਕਾਰਂ ਦਸ੍ਸੇਸਿ, ਅਮਚ੍ਚਾ ਦੇਵ ਕਿਨ੍ਨਖੋ ਉਕ੍ਕਣ੍ਠਾ ਸੀਤਿ ਪੁਚ੍ਛਿਂਸੁ. ਸੋ ਭਣੇ ਮਯ੍ਹਂ ਪੁਞ੍ਞਕਮ੍ਮੇ ਓਲੋਕਿਯਮਾਨੇ ਇਮਂ ਰਜ੍ਜਂ ਨਪ੍ਪਹੋਤਿ, ਕਤਰਨ੍ਨੁ ਖੋ ਠਾਨਂ ਰਮਣੀਯਨ੍ਤਿ. ਦੇਵਲੋਕੋ ਮਹਾਰਾਜਾਤਿ. ਸੋ ਚਕ੍ਕਰਤਨਂ ਅਬ੍ਭੁਕ੍ਕਿਰਿਤ੍ਵਾ ਪਰਿਸਾਯ ਸਦ੍ਧਿਂ ਚਾਤੁਮਹਾਰਾਜਿਕਦੇਵਲੋਕਂ ਅਗਮਾਸਿ, ਅਥਸ੍ਸ ਚਤ੍ਤਾਰੋ ਮਹਾਰਾਜਾਨੋ ਦਿਬ੍ਬਮਾਲਗਨ੍ਧ- ਹਤ੍ਥਾ ਦੇਵਗਣਪਰਿਵੁਤਾ ਪਚ੍ਚੁਗ੍ਗਮਨਂ ਕਤ੍ਵਾ ਤਂ ਆਦਾਯ ਚਾਤੁਮਹਾਰਾਜਿਕਦੇਵਲੋਕਂ ਗਨ੍ਤ੍ਵਾ ਰਜ੍ਜਂ ਅਦਂਸੁ, ਤਸ੍ਸ ਪਰਿਸਾਯ ਪਰਿਵੁਤਸ੍ਸ ਤਸ੍ਮਿਂ ਰਜ੍ਜਂ ਕਰੋਨ੍ਤਸ੍ਸ ਦੀਘੋ ਅਦ੍ਧਾ ਵੀਤਿਵਤ੍ਤੋ. ਸੋ ਤਤ੍ਥਪਿ ਤਣ੍ਹਂ ਪੂਰੇਤੁ ਮਸਕ੍ਕੋਨ੍ਤੋ ਉਕ੍ਕਣ੍ਠਿਤਾ ਕਾਰਂ ਦਸ੍ਸੇਸਿ. ਤਤੋ ਚਤ੍ਤਾਰੋ ਮਹਾਰਾਜਾਨੋ ਕਿਨ੍ਨੁਖੋ ਮਹਾਰਾਜ ਉਕ੍ਕਣ੍ਠਿਤੋਤਿ ਪੁਚ੍ਛਿਂਸੁ. ਇਮਮ੍ਹਾ ਦੇਵਲੋਕਾ ਕਤਰਨ੍ਨੁ ਖੋ ਠਾਨਂ ਰਮਣੀਯਨ੍ਤਿ, ਦੇਵ ਪਰੇਸਂ ਉਪਟ੍ਠਾਕਮਨੁਸ੍ਸਸਦਿਸਾ ਮਯਂ. ਤਾਵਤਿਂਸਦੇਵਲੋਕੋ ਇਤੋ ਸਤਗੁਣੇਨ ਰਮਣੀਯੋਤਿ. ਮਨ੍ਧਾਤਾ ਚਕ੍ਕਰਤਨਂ ਅਬ੍ਭੁਕ੍ਕਿਰਿਤ੍ਵਾ ਅਤ੍ਤਨੋ ਪਰਿਸਪਰਿਵੁਤੋ ਤਾਵਤਿਂਸਾਭਿਮੁਖੋ ਪਾਯਾਸਿ, ਅਥਸ੍ਸ ਸਕ੍ਕੋ ਦੇਵਰਾਜਾ ਦਿਬ੍ਬਮਾਲਗਨ੍ਧਹਤ੍ਥੋ ਦੇਵਗਣਪਰਿਵੁਤੋ ਪਚ੍ਚੁਗ੍ਗਮਨਂ ਕਤ੍ਵਾ ਤਂ ਹਤ੍ਥੇ ਗਹੇਤ੍ਵਾ ਇਤੋ ਏਹਿ ਮਹਾਰਾਜਾਤਿ ਆਹ. ਤਤੋ ਰਞ੍ਞੋ ਦੇਵਗਣਪਰਿਵੁਤਸ੍ਸ ਗਮਨਕਾਲੇ ਪਰਿਣਾਯਕਰਤਨਂ ਚਕ੍ਕਰਤਨਂ ਆਦਾਯ ਸਦ੍ਧਿਂਪਰਿਸਾਯ ਮਨੁਸ੍ਸਪਥਂ ਓਤਰਿਤ੍ਵਾ ਅਤ੍ਤਨੋ ਘਰਂ ਪਾਵਿਸਿ. ਸਕ੍ਕੋ ਮਨ੍ਧਾਤੁਂ ਸਕ੍ਕਭਵਨਂ ਨੇਤ੍ਵਾ ਦੇਵਤਾ ਦ੍ਵੇ ਕੋਟ੍ਠਾਸੇ ਕਤ੍ਵਾ ਅਤ੍ਤਨੋ ਰਜ੍ਜਂ ਮਜ੍ਝੇ ਭਿਨ੍ਦਿਤ੍ਵਾ ਅਦਾਸਿ. ਤਤੋ ਪਟ੍ਠਾਯ ਦ੍ਵੇਪਿ ਰਾਜਨੋ ਰਜ੍ਜਂ ਕਾਰੇਸੁਂ. ਏਵਂ ਕਾਲੇ ਗਚ੍ਛਨ੍ਤੇ ਸਕ੍ਕੋ ਸਟ੍ਠਿਸਤਸਹਸ੍ਸਾਧਿਕਾਨਿ ਤਿਸ੍ਸੋਚ ਵਸ੍ਸਕੋਟਿਯੋ ਆਯੁਂ ਖੇਪੇਤ੍ਵਾ ਚਵਿ. ਅਞ੍ਞੋ ਸਕ੍ਕੋ ਨਿਬ੍ਬਤ੍ਤਿ, ਸੋਪਿ ਤਥੇਵ ਦੇਵਰਜ੍ਜਂ ਕਾਰੇਤ੍ਵਾ ਆਯੁਕ੍ਖਯੇਨ ਚਵਿ, ਏਤੇਨੁ ਪਾਯੇਨ ਛਤ੍ਤਿਂਸ ਸਕ੍ਕਾ ਚਵਿਂਸੁ, ਮਨ੍ਧਾਤਾ ਪਨ ਮਨੁਸ੍ਸਪਰਿਹਾਰੇਨ ਦੇਵਰਜ੍ਜਂ ਕਾਰੇਸਿਯੇਵ, ਤਸ੍ਸੇਵਂ ਕਾਲੇ ਗਚ੍ਛਨ੍ਤੇ ਭੀਯ੍ਯੋਸੋ ਮਤ੍ਤਾਯ ਕਾਮਤਣ੍ਹਾ ਉਪ੍ਪਜ੍ਜਿ, ਸੋ ਕਿਮ੍ਮੇ ਉਪਡ੍ਢਰਜ੍ਜੇਨ. ਸਕ੍ਕਂ ਮਾਰੇਤ੍ਵਾ ਏਕਰਜ੍ਜਂ ਕਰਿਸ੍ਸਾਮੀਤਿ ਚਿਨ੍ਤੇਸਿ. ਸਕ੍ਕਂ ਪਨ ਮਾਰੇਤੁਂ ਨ ਸਕ੍ਕਾ, ਕਾਮਤਣ੍ਹਾ ਪਨੇਸਾ ਵਿਪਤ੍ਤਿਮੂਲਾ. ਤਥਾਹਿ.

੩. ਵਰਮਤ੍ਰ ਸੁਖਨ੍ਤ੍ਯਤ੍ਰ, ਅਤ੍ਰਿਚ੍ਛਾਵਿਹਤੋ ਨਰੋ;

ਇਧਵਾ ਪਰਤ੍ਥਵਾ ਕਿਞ੍ਚਿ, ਨ ਸਾਤਂ ਵਿਨ੍ਦਤੇ ਸਦਾ.

੪. ਤਣ੍ਹਾਯ ਜਾਯਤੇ ਸੋਕੋ,

ਤਣ੍ਹਾਯ ਜਾਯਤੇ ਭਯਂ;

ਤਣ੍ਹਾਯ ਵਿਪ੍ਪਮੁਤ੍ਤਸ੍ਸ,

ਨਤ੍ਥਿ ਸੋਕੋ ਕੁਤੋ ਭਯਂ.

੫. ਤਣ੍ਹਾਦਾਸੋ ਨਰੋ ਏਤ੍ਥ, ਰਾਜਚੋਰਾਦਿਸਮ੍ਭਵਂ;

ਹਤ੍ਤਚ੍ਛੇਦਾਦਿਕਂ ਦੁਕ੍ਖਂ, ਪਾਪੁਣਾਤਿ ਵਿਹਞ੍ਞਤਿ.

੬. ਯੇਨ ਲੋਭੇਨ ਜਾਤੇਨ, ਸਦਾ ਜੀਯਨ੍ਤਿ ਪਾਣਿਨੋ;

ਖੇਤ੍ਤਂ ਵਤ੍ਥੁਂ ਹਿਰਞ੍ਞਂਚ, ਗਵਾਸ੍ਸਂ ਦਾਸਪੋਰਿਸਂ;

ਸਬ੍ਬਤ੍ਥਾਮੇਨ ਸੋ ਲੋਭੋ, ਪਹਾਤਬ੍ਬੋਵ ਵਿਞ੍ਞੁਨਾਤਿ.

ਤਤੋ ਅਤ੍ਰਿਚ੍ਛਾਵਿਹਤਸ੍ਸ ਤਸ੍ਸ ਆਯੁਸਙ੍ਖਾਰੋ ਪਰਿਹਾਯਿ, ਜਰਾ ਸਰੀਰਂ ਪਹਰਿ, ਮਨੁਸ੍ਸਸਰੀਰਞ੍ਹਿ ਨਾਮ ਨ ਦੇਵਲੋਕੇਭਿਜ੍ਜਤਿ, ਤਥ ਸੋ ਦੇਵਲੋਕਾ ਭਸ੍ਸਿਤ੍ਵਾ ਬਨ੍ਧੁਮਤੀਨਗਰੁਯ੍ਯਾਨਂ ਪਾਵਿਸਿ, ਉਯ੍ਯਾਨਪਾਲੋ ਤਸ੍ਸ ਆਗਤਭਾਵਂ ਰਾਜਕੁਲਂ ਨਿਵੇਦੇਸਿ. ਰਾਜਾ ਰਾਜਕੁਲਾ ਆਗਨ੍ਤ੍ਵਾ ਉਯ੍ਯਾਨੇਯੇਵ ਆਸਨਂ ਪਞ੍ਞਾਪੇਸਿ. ਤਤੋ ਮਨ੍ਧਾਤਾ ਉਯ੍ਯਾਨੇ ਪਞ੍ਞਤ੍ਤਵਰਾਸਨੇ ਨਿਪਨ੍ਨੋ ਅਨੁਟ੍ਠਾਨਸੇਯ੍ਯਂ ਕਪ੍ਪੇਸਿ. ਤਤੋ ਅਮਚ੍ਚਾ ਦੇਵ ਤੁਮ੍ਹਾਕਂ ਪਰਤੋ ਕਿਨ੍ਨੁ ਕਥੇਸਾਮਾਤਿ ਪੁਚ੍ਛਿਂਸੁ, ਮਮ ਪਰਤੋ ਤੁਮ੍ਹੇ ਇਮਂ ਸਾਸਨਂ ਮਹਾਜਨਸ੍ਸ ਕਥੇਯ੍ਯਾਥ, ਮਨ੍ਧਾਤੁਮਹਾਰਾਜਾ ਦ੍ਵਿਸਹਸ੍ਸਦੀਪਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਚਕ੍ਕਵਤ੍ਤਿਰਜ੍ਜਂ ਕਾਰੇਤ੍ਵਾ ਚਾਤੁਮਹਾਰਾਜਿਕੇਸੁ ਰਜ੍ਜਂ ਕਾਰੇਤ੍ਵਾ ਛਤ੍ਤਿਂਸਸਕ੍ਕਾਨਂ ਆਯੁਪਰਿਮਾਣੇਨ ਦੇਵਲੋਕੇ ਰਜ੍ਜਂ ਕਾਰੇਤ੍ਵਾ ਕਾਲਮਕਾਸੀਤਿ. ਸੋ ਏਵਂ ਵਤ੍ਵਾ ਕਾਲਂਕਤ੍ਵਾ ਯਥਾਕਮ੍ਮਂ ਗਤੋਤਿ ਇਮਮਤ੍ਥਂ ਪਕਾਸੇਤੁਂ ਭਗਵਾ ਚਤੁਮਹਾਪਰਿਸਮਜ੍ਝੇ ਇਮਾ ਗਾਥਾਯੋ ਆਹ.

੭. ਯਾਵਤਾ ਚਨ੍ਦਿਮਸੁਰਿਯਾ, ਪਰਿਹਰਨ੍ਤਿ ਦਿਸਾ ਭਨ੍ਤਿ ਵਿਰੋਚਨਾ;

ਸਬ੍ਬੇਵ ਦਾਸਾ ਮਨ੍ਧਾਤਾ, ਯੇ ਪਾਣਾ ਪਥਵਿਨਿਸ੍ਸਿਤਾ.

੮. ਨ ਕਹਾਪਣਵਸ੍ਸੇਨ, ਤਿਤ੍ਤਿ ਕਾਮੇਸੁ ਵਿਜ੍ਜਤਿ;

ਅਪ੍ਪਸ੍ਸਦਾ ਦੁਖਾ ਕਾਮਾ, ਇਤਿ ਵਿਞ੍ਞਾਯ ਪਣ੍ਡਿਤੋ.

੯. ਅਪਿ ਦਿਬ੍ਬੇਸੁ ਕਾਮੇਸੁ, ਰਤਿਂਸੋ ਨਾਧਿਗਚ੍ਛਤਿ;

ਤਣ੍ਹਾਕ੍ਖਯਰਤੋ ਹੋਤਿ, ਸਮ੍ਮਾਸਮ੍ਬੁਦ੍ਧਸਾਵਕੋਤਿ.

ਤਂ ਸੁਤ੍ਵਾ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

੧੦. ਇਤਿ ਗਤਿਨਿਯਤਾਨਂ ਬੋਧਿਯਾ ਉਤ੍ਤਮਾਨਂ;

ਸਕਵਸਮੁਪਨੇਤ੍ਵਾ ਦੇਤਿ ਦੁਕ੍ਖਾਤਿਤਣ੍ਹਾ;

ਅਨਿਯਤਗਤਿਕਾਨਂ ਕਾ ਕਥਾ ਮਾਦਿਸਾਨਂ;

ਜਹਥ ਤਮਿਤਿ ਮਨ੍ਤ੍ਵਾ ਭੋ ਭਜਵ੍ਹੋ ਤਿਵਤ੍ਥੁਂਤਿ.

ਮਹਾਮਨ੍ਧਾਤੁਵਤ੍ਥੁਂ ਅਟ੍ਠਮਂ.