੩. ਪਤ੍ਤਵਗ੍ਗੋ, ੧੦. ਪਰਿਣਤ ਸਿਕ੍ਖਾਪੁਚ੍ਛਾ
ਪੁਚ੍ਛਾ – ਯਂ ਤੇਨ ਆਵੁਸੋ ਭਗਵਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਜਾਨਂ ਸਙ੍ਘਿਕਂ ਲਾਭਂ ਅਤ੍ਥਨੋ ਪਰਿਣਾਮੇਨ੍ਤਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ ਕਤ੍ਥ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਪਞ੍ਞਤ੍ਤਂ.
ਪੁਚ੍ਛਾ – ਕਂ ਆਵੁਸੋ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਛਬ੍ਬਗ੍ਗਿਯੇ ਭਨ੍ਤੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਜਾਨਂ ਸਙ੍ਘਿਕਂ ਲਾਭਂ ਪਰਿਣਤਂ ਅਤ੍ਤਨੋ ਪਰਿਣਾਮੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਜਾਨਂ ਆਵੁਸੋ ਸਙ੍ਘਿਕਂ ਲਾਭਂ ਪਰਿਣਤਂ ਅਤ੍ਤਨੋ ਪਰਿਣਾਮੇਨ੍ਤੋ, ਕਤਿ ਆਪਤ੍ਤਿਯੋ ਆਪਜ੍ਜਤਿ.
ਵਿਸ੍ਸਜ੍ਜਨਾ – ਜਾਨਂ ਭਨ੍ਤੇ ਸਙ੍ਘਿਕਂ ਲਾਭਂ ਪਰਿਣਤਂ ਅਤ੍ਤਨੋ ਪਰਿਣਾਮੇਨ੍ਤੋ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ, ਪਰਿਣਾਮੇਤਿ ਪਯੋਗੇ ਦੁਕ੍ਕਟਂ, ਪਰਿਣਾਮਿਤੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਜਾਨਂ ਭਨ੍ਤੇ ਸਙ੍ਘਿਕਂ ਲਾਭਂ ਪਰਿਣਤਂ ਅਤ੍ਤਨੋ ਪਰਿਣਾਮੇਨ੍ਤੋ ਇਮਾ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ.
ਪੁਚ੍ਛਾ – ਕਸ੍ਸ ਆਵੁਸੋ ਵਚਨਂ.
ਵਿਸ੍ਸਜ੍ਜਨਾ – ਭਗਵਤੋ ਭਨ੍ਤੇ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.
ਪੁਚ੍ਛਾ – ਕੇਨਾਵੁਸੋ ਆਭਤਂ.
ਵਿਸ੍ਸਜ੍ਜਨਾ – ਪਰਮ੍ਪਰਾਯ ਭਨ੍ਤੇ ਆਭਤਂ.
ਪੁਚ੍ਛਾ – ਅਤ੍ਥਿ ਨੁਖੋ ਆਵੁਸੋ ਤਤ੍ਥ ਕੋਚਿਪਿ ਵਿਰਦ੍ਧਦੋਸੋ.
ਵਿਸ੍ਸਜ੍ਜਨਾ – ਨਤ੍ਥਿ ਭਨ੍ਤੇ.
ਸਂਗਾਯਨਤ੍ਥਾਯ ਞਾਪਨਂ
ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਹਂ ਭਨ੍ਤੇ ਇਮੇਸਂ ਸੋਲ਼ਸਨ੍ਨਂ ਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਾਨਂ ਨਿਦਾਨਾਦੀਨਿ ਅਨੇਕਾਨਿ ਪੁਚ੍ਛਿਤਬ੍ਬਾਨਿ ਆਯਸ੍ਮਨ੍ਤਂ ਵਿਚਿਤ੍ਤਸਾਰਾਭਿਵਂਸਂ ਤਿਪਿਟਕਧਰ ਧਮ੍ਮਭਣ੍ਡਾਗਾਰਿਕਂ ਪੁਚ੍ਛਿਂ, ਸੋ ਚ ਪੁਟ੍ਠੋ ਪੁਟ੍ਠੋ ਵਿਸ੍ਸਜ੍ਜੇਤਿ, ਇਤਿਹਿਦਂ ਭਨ੍ਤੇ ਸਿਕ੍ਖਾਪਦਸਞ੍ਜਾਤਂ ਨਿਮ੍ਮਲਂ ਸੁ ਪਰਿਸੁਦ੍ਧਂ ਤਸ੍ਸੇਵ ਭਗਵਤੋ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ, ਤਸ੍ਮਾ ਯਥਾ ਪੁਰੇ ਮਹਾਕਸ੍ਸਪਾਦਯੋ ਮਹਾਥੇਰ ਵਰਾ ਪੋਰਾਣਸਂਗੀਤਿਕਾਰਾ ਬ੍ਰਹ੍ਮਚਰਿਯਸਙ੍ਖਾਤਸ੍ਸ ਬੁਦ੍ਧਸਾਸਨਸ੍ਸ ਚਿਰਟ੍ਠਿਤਿਯਾ ਬਹੁਜਨਹਿਤਾਯ ਬਹੁਜਨਸੁਖਾਯ ਲੋਕਾਨੁਕਮ੍ਪਾਯ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨਂ ਧਮ੍ਮਵਿਨਯਂ ਸਂਗਾਯਿਂਸੁਚੇਵ ਅਨੁਸਂਗਾਯਿਂਸੁਚ, ਏਵਮੇਵ ਮਯਮ੍ਪਿ ਦਾਨਿ ਛਟ੍ਠਸਂਗੀਤਿ ਮਹਾਧਮ੍ਮਸਭਾਪਰਿਯਾਪਨ੍ਨਾ ਇਮਾਨਿ ਸਿਕ੍ਖਾਪਦਾਨਿ ਯਥਾਨੁਪ੍ਪਤ੍ਤਟ੍ਠਾਨਤੋ ਪਟ੍ਠਾਯ ਏਕਤੋ ਗਣਸਜ੍ਝਾਯਂ ਕਤ੍ਵਾ ਸਂਗਾਯੇਯ੍ਯਾਮ.